၃။ အန္တိခရစ်များ၏ စိတ်သဘောထား အနှစ်သာရ

ယနေ့ မိတ်သဟာယဖွဲ့ခြင်း၏ အလေးပေးချက်မှာ အန္တိခရစ်များ၏ စိတ်သဘောထား အနှစ်သာရက အတိအကျအားဖြင့် အဘယ်အရာဖြစ်သည်ဟူသည်ကို အကျဉ်းချုပ်ဖော်ပြရန် အဓိကဖြစ်နေဆဲဖြစ်သည်။ ငါတို့ ယခုပင် ဆွေးနွေးခဲ့သော လူသားတို့၏ ဖောက်ပြန်ပျက်စီးသည့် စိတ်သဘောထားခြောက်မျိုးအနက် အန္တိခရစ်များ၏ စိတ်သဘောထား အနှစ်သာရရှိသူတို့ကို သတ်မှတ်ရန် မည်သည့်သုံးမျိုးကို ပို၍တိကျစွာ အသုံးပြုထားသနည်း။ (သမ္မာတရားကို အလွန်အမင်းမနှစ်မြို့ခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့ ဖြစ်ပါသည်။) နယ်ပယ်ကို ဤသုံးမျိုးအထိ ငါတို့ လျှော့ချပြီးဖြစ်သည့်အတွက် ပထမသုံးမျိုးသည် ဤမိတ်သဟာယဖွဲ့ခြင်း၏ အစိတ်အပိုင်းတစ်ခု ဖြစ်မည်မဟုတ်ပေ။ သို့ဆိုလျှင် အန္တိခရစ်များ၏ စိတ်သဘောထားအနှစ်သာရ ရှိသူတို့၌ စိတ်နှလုံးမာကျောခြင်း၊ မာနထောင်လွှားမှုနှင့် လှည့်ဖြားတတ်ခြင်းတည်းဟူသော ဖောက်ပြန်ပျက်စီးသည့် စိတ်သဘောထားများ ကင်းမဲ့သလော။ (မကင်းမဲ့ပါ။) သို့ဆိုလျှင် အန္တိခရစ်များ၏ စိတ်သဘောထားအနှစ်သာရကို သတ်မှတ်ရန် ပထမသုံးမျိုးကို အဘယ်ကြောင့် အသုံးမပြုသနည်း။ (အကြောင်းမှာ သာမန် ဖောက်ပြန်ပျက်စီးသော လူသားများသည်လည်း ပထမသုံးမျိုးကို ပိုင်ဆိုင်ကြပြီး ယင်းတို့က လူတစ်ဦး၏ အနှစ်သာရကို ကိုယ်စားမပြုသောကြောင့် ဖြစ်ပါသည်။) ဤသည်မှာ အလွန်တိကျသော အကျဉ်းချုပ်ဖော်ပြချက်တစ်ခု ဖြစ်သည်။ စိတ်သဘောထား အနှစ်သာရတည်းဟူသော အကြောင်းအရာနှင့်စပ်လျဉ်း၍ ပထမ ဖောက်ပြန်ပျက်စီးသည့် စိတ်သဘောထားသုံးမျိုးသည် အတိုင်းအတာအားဖြင့် အတော်အသင့် ပိုမပြင်းထန်သည့်အပြင်၊ အန္တိခရစ်များ၏ စိတ်သဘောထား အနှစ်သာရကို အမှန်တကယ် အကျဉ်းချုပ်ဖော်ပြနိုင်သည့်အရာများမှာ နောက်သုံးမျိုးဖြစ်သည့် သမ္မာတရားကို အလွန်အမင်းမနှစ်မြို့ခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့ ဖြစ်သည်။ ဤဖောက်ပြန်ပျက်စီးသည့် စိတ်သဘောထားသုံးမျိုးသည် အန္တိခရစ်များ၏ စိတ်သဘောထားအနှစ်သာရကို ပို၍တိကျစွာ သတ်မှတ်နိုင်သည်။ ပထမသုံးမျိုးကို အန္တိခရစ်များ၏ အနှစ်သာရအား သတ်မှတ်ရန် အသုံးမပြုသော်လည်း ထိုဖောက်ပြန်ပျက်စီးသည့် စိတ်သဘောထားသုံးမျိုးထဲမှ တစ်ခုစီတိုင်းသည် အန္တိခရစ်တစ်ဦး၌ ရှိနေပြီး သာမန်လူများ၌ရှိသည်ထက် ပို၍ပြင်းထန်သည်။ သမ္မာတရားကို အလွန်အမင်းမနှစ်မြို့ခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့အားလုံးကို ၎င်းတို့၏ စိတ်နှလုံးမာကျောခြင်းအား အကျဉ်းချုပ်ဖော်ပြရန်နှင့် သတ်မှတ်ရန်လည်းကောင်း၊ ၎င်းတို့၏ စိတ်နှလုံးမာကျောခြင်း အတိုင်းအတာကို ဖော်ပြရန်လည်းကောင်း အသုံးပြုနိုင်သည်။ ထို့အပြင် အထက်တွင်ဖော်ပြထားသော စိတ်သဘောထားသုံးမျိုးကို ၎င်းတို့၏ မာနထောင်လွှားမှုနှင့် လှည့်ဖြားတတ်ခြင်းတို့အား အကျဉ်းချုပ်ဖော်ပြရန်နှင့် သတ်မှတ်ရန် အလားတူ အသုံးပြုနိုင်သည်။ အန္တိခရစ်များ၏ စိတ်သဘောထား အနှစ်သာရနှင့်ဆိုင်သည့် အဓိကလက္ခဏာများမှာ သမ္မာတရားကို အလွန်အမင်းမနှစ်မြို့ခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့ ဖြစ်သည်မှာ သိသာထင်ရှားပေသည်။

က။ ကောက်ကျစ်ဆိုးယုတ်ခြင်း

ဤဖောက်ပြန်ပျက်စီးသော စိတ်သဘောထားသုံးမျိုးဖြစ်သည့် သမ္မာတရားကို အလွန်အမင်းမနှစ်မြို့ခြင်း၊ ရက်စက်ကြမ်းကြုတ်ခြင်းနှင့် ကောက်ကျစ်ဆိုးယုတ်ခြင်းတို့အနက် ကောက်ကျစ်ဆိုးယုတ်ခြင်းသည် အန္တိခရစ်၏ စိတ်သဘောထား အနှစ်သာရကို အပြည့်စုံဆုံး အကျဉ်းချုပ်ဖော်ပြသည့် စိတ်သဘောထားဖြစ်ပြီး၊ ယင်းမှာ အန္တိခရစ်တစ်ဦး၏ စိတ်သဘောထား အနှစ်သာရထဲတွင် အတွေ့ရအများဆုံးပင် ဖြစ်သည်။ အန္တိခရစ်တစ်ဦး၏ စိတ်သဘောထား အနှစ်သာရကို ဖော်ပြရန် ကောက်ကျစ်ဆိုးယုတ်မှုကို အဘယ်ကြောင့် အသုံးပြုသနည်း။ အန္တိခရစ်များသည် အတော်အတန် ကောက်ကျစ်ဆိုးယုတ်သည်ဟု ဆိုပါက၊ ၎င်းတို့၏ အတွေးများဖြင့် အကဲဖြတ်သည့်အခါ၊ ၎င်းတို့က ကောက်ကျစ်ဆိုးယုတ်သော အနှစ်သာရရှိသည့် လူများဖြစ်သည်ကို သက်သေပြသည့် မည်သည့်အရာကို ၎င်းတို့ နေ့တိုင်း စဉ်းစား၊ ပြောဆိုကာ လုပ်ဆောင်ကြသနည်း။ ဤသည်မှာ စဉ်းစားဆင်ခြင်သင့်သော မေးခွန်းတစ်ခု မဟုတ်လော။ (ဟုတ်ပါသည်။) သို့ဆိုလျှင် ဤလူတို့၌ ကောက်ကျစ်ဆိုးယုတ်သော အနှစ်သာရတစ်ခု အမှန်တကယ် တည်ရှိခြင်း ရှိမရှိဟူသည်ကို အကဲဖြတ်ရန်အလို့ငှာ ၎င်းတို့ တွေးတောသည့်အရာ၊ ၎င်းတို့၏ စကားနှင့် ပြုမူပြောဆိုပုံ၊ ပြီးလျှင် ၎င်းတို့ မိမိတို့ကိုယ်ကို ကျင့်ကြံပြုမူပုံနှင့် လူအများနှင့် ပေါင်းသင်းဆက်ဆံပုံတို့မှနေ၍ ငါတို့၏ စိစစ်ခြင်းနှင့် လေ့လာမှုတို့ကို စတင်သင့်သည်။ ပထမဆုံးအနေဖြင့် အန္တိခရစ်များက နေ့စဉ် မည်သည့်အရာ စဉ်းစားကြသည်ကို ကြည့်ကြစို့။ အချို့လူတို့သည် မိမိတို့၏ စိတ်နှလုံးထဲ၌၊ “ဤလူအုပ်စုထဲတွင် ငါသည် အစွမ်းဆောင်နိုင်ဆုံးဟု မှတ်ယူခြင်းမခံရသကဲ့သို့ အမြင့်မားဆုံးသော ဆုကျေးဇူးများလည်း မရှိပါ။ သို့ဖြစ်၍ ငါသည် ပို၍ကျော်ကြားမှုကို မည်သို့ ရရှိနိုင်မည်နည်း၊ လူတိုင်း၏ လေးစားမှုကို မည်သို့ ရယူနိုင်မည်နည်း၊ ငါ၏ ဘိုးဘေးများကို ဂုဏ်ဆောင်ပြီး ဂုဏ်သတင်းကျော်စောမှုကို မည်သို့ရရှိနိုင်မည်နည်း။ အခြားသူများအား မည်သို့ ဖျောင်းဖျပြီး သူတို့ကို ငါ့စကားနားထောင်စေကာ ငါ့ကို အားကျစေနိုင်မည်နည်း။ အဆင့်အတန်းရှိခြင်းသည် ကောင်းသောအရာဖြစ်သည်ဟု ထင်ရသည်။ အချို့လူတို့သည် အမှန်ပင် ဂုဏ်သိက္ခာဖြင့် စကားပြောကြပြီး အခြားလူတို့၌ ပြဿနာများရှိသောအခါ သူတို့ထံ သွားကြသည်၊ အဘယ်ကြောင့် မည်သူမျှ ကျွန်ုပ်ထံ မလာသနည်း။ အဘယ်ကြောင့် မည်သူကမျှ ငါ့ကို သတိမထားမိသနည်း။ ငါ၌ ဉာဏ်၊ စိတ်ကူးများ၊ ငါ၏ လုပ်ဆောင်ချက်များအတွက် စနစ်ကျသော လုပ်နည်းကိုင်နည်းတစ်ခု ရှိပြီး ကိစ္စရပ်များ၌ ဝေဖန်ပိုင်းခြားနိုင်စွမ်းကို အသုံးပြုနိုင်စွမ်း ရှိသည်။ အဘယ်ကြောင့် မည်သူကမျှ ငါ့ကို အာရုံမစိုက်သနည်း သို့မဟုတ် အထင်မကြီးသနည်း။ မည်သည့်အချိန်တွင် ငါသည် အခြားသူများထက် ထင်ပေါ်လိမ့်မည်နည်း။ မည်သည့်အချိန်တွင် လူတိုင်းသည် အကူအညီအတွက် ကျွန်ုပ်ထံ လာပြီး ငါ့ကို ထောက်ခံကြမည်နည်း”ဟု စဉ်းစားကြလေသည်။ ဤလူတို့သည် အဘယ်အရာကို စဉ်းစားနေကြသနည်း။ အပြုသဘောဆောင်သောအရာများကို စဉ်းစားနေကြသလော သို့မဟုတ် အပျက်သဘောဆောင်သော အရာများကို စဉ်းစားနေကြသလော။ (အပျက်သဘောဆောင်သော အရာများ ဖြစ်ပါသည်။) အချို့လူတို့သည် အခြားသူများက အချင်းချင်း ကောင်းသောဆက်ဆံရေးရှိသည်ကို မြင်သောအခါ၊ “သူတို့၏ ဆက်ဆံရေးသည် အဘယ်ကြောင့် ထိုမျှ ကောင်းမွန်ရသနည်း။ ငါသည် သွေးခွဲရန် နည်းလမ်းတစ်ခုကို ရှာဖွေပြီး သူတို့၏ ဆက်ဆံရေးကို ပျက်ပြားအောင် လုပ်ရန် လိုအပ်သည်။ ဤနည်းအားဖြင့် ငါသည် အထီးကျန်မည်မဟုတ်ဘဲ အဖော်တစ်ဦး ရရှိလိမ့်မည်”ဟု စဉ်းစားကြသည်။ ဤလူတို့သည် အဘယ်အရာကို ပြုလုပ်နေကြသနည်း။ မည်သည့်နည်းလမ်းကို ၎င်းတို့ အသုံးပြုသည်ဖြစ်စေ ယင်းအားလုံးသည် သွေးခွဲခြင်းသဘော သက်ရောက်သည်ပင်ဖြစ်သည်။ တစ်စုံတစ်ယောက်သည် မိမိ၏တာဝန်ကို စိတ်အားထက်သန်စွာနှင့် စိတ်ဓာတ်တက်ကြွစွာ ထမ်းဆောင်နေကာ မိမိ၏တာဝန်ကို ထမ်းဆောင်စဉ် မည်သည့်အရာကို ပြုလုပ်သည်ဖြစ်စေ ဉာဏ်အလင်း ရရှိနေသည်ကို ၎င်းတို့ မြင်သောအခါ မနာလိုဖြစ်လာပြီး ထိုသူကို မည်သို့ ထိခိုက်နစ်နာစေရမည်၊ ၎င်းတို့အား မည်သို့ အားလျော့စေပြီး အပျက်သဘောဆောင်အောင်လုပ်ရမည်ဟူသည်တို့ကို စဉ်းစားဆင်ခြင်ကြသည်။ ဤအတွေးများသည် လက်တွေ့လုပ်ဆောင်သည်ဖြစ်စေ၊ မလုပ်ဆောင်သည်ဖြစ်စေ အပျက်သဘောဆောင်သော အတွေးအခေါ်များ ဖြစ်ကြသည်။ “အသစ်ရွေးကောက်ခံရသော ခေါင်းဆောင်သည် ငါ့ကို မည်သို့ ရှုမြင်သနည်း။ ငါသည် ဤခေါင်းဆောင်နှင့် ရင်းနှီးရန် လိုအပ်သည်။ ငါတို့၏ ဆက်ဆံရေးသည် မကောင်းမွန်သကဲ့သို့ ငါတို့ သိပ်မရင်းနှီးကြပါ။ သို့ဖြစ်၍ ငါသည် သူ့ကို မည်သို့ မျက်နှာလုပ်နိုင်မည်နည်း။ ငါ့ လက်ထဲ၌ ငွေအချို့ ရှိသည်၊ သို့ဖြစ်၍ သူလိုအပ်သည့်အရာကို ငါ သိအောင်လုပ်ပြီးနောက် သူ့အတွက် ဝယ်ပေးမည်။ သို့သော် သူက ကွန်ပျူတာတစ်လုံး လိုအပ်ပါက ထိုသို့သောငွေမျိုးကို ငါ သုံးစွဲလိုစိတ် မရှိပါ။ အကယ်၍ သူသည် အနာဂတ်တွင် ခေါင်းဆောင်တစ်ဦးအဖြစ်မှ ရပ်စဲသွားပါက ထိုငွေသည် အလဟဿ ဖြစ်သွားမည် မဟုတ်လော။ အကယ်၍ သူသည်လက်အိတ်များ သို့မဟုတ် အဝတ်အစားများကဲ့သို့သော အရာတစ်ခုခု လိုအပ်ပါက ထိုအရာကို ငါ တတ်နိုင်ပြီး ကုန်ကျစရိတ်နှင့် တန်သည်။ ငွေကို မှန်ကန်သောအရာများအတွက် သုံးစွဲသင့်သည်၊ မဖြုန်းတီးသင့်ပါ။ ထို့အပြင်၊ ခေါင်းဆောင်ကို အနှစ်မဲ့သော စကားများဖြင့်သာမက လက်တွေ့လုပ်ဆောင်မှုများဖြင့်လည်း ဖားယားမြှောက်ပင့်ပြီး စိတ်ကျေနပ်အောင် လုပ်ရမည်။ ဤခေါင်းဆောင် ကြိုက်နှစ်သက်သည့်အရာကို ငါ အကဲခတ်နေရန် လိုအပ်သည်။ ထို့အပြင် နေ့စဉ် အစာစားချိန်ရောက်သောအခါ ခေါင်းဆောင်၏ အစားအစာကို ပြင်ဆင်ပေးပြီး သူစားသောက်ပြီးသောအခါ သူ၏ ပန်းကန်များကို ငါ ဆေးကြောပေးမည်။ အကယ်၍ ခေါင်းဆောင်သည် တစ်စုံတစ်ဦးကို ဝေဖန်ပါက ငါ လိုက်ဝေဖန်ပြီး သံယောင်လိုက်မည်။ အကယ်၍ ခေါင်းဆောင်သည် တစ်စုံတစ်ဦးကို ချီးကျူးပါက ထိုသူကို ငါ အမြန် ထောက်ခံပြီး သူ၏ ကောင်းမြတ်မှုများကို ချီးကျူးမည်”ဟုပင် စဉ်းစားသောသူများလည်း ရှိသည်။ ဤလူတို့သည် အဘယ်အရာကို တွေးတောနေကြသနည်း။ (ခေါင်းဆောင်ကို ကျေနပ်စေခြင်းနှင့် ၎င်းတို့အပေါ် မျက်နှာလုပ်ခြင်းတို့ကို တွေးတောနေကြပါသည်။) ဘုရားအိမ်တော်၌ အလုပ်လုပ်နေစဉ်၊ “အခြားသူများသည် ကြိုးစားပြီး စိတ်ပါလက်ပါ အလုပ်လုပ်ကြသည်။ ငါ လိမ္မာပါးနပ်ရမည်။ မိုက်မဲ၍မဖြစ်သည့်အပြင် ငါကိုယ်တိုင် အလွန် ပင်ပန်း၍မဖြစ်ပါ။ အကယ်၍ ဘုရားအိမ်တော်က အနာဂတ်တွင် ငါ့ကို မလိုအပ်လျှင်၊ ဤကြိုးစားအားထုတ်မှုသည် အချည်းနှီး ဖြစ်သွားမည် မဟုတ်လော။ ငါ့အနေဖြင့် အချည်းနှီး ကြိုးစားအလုပ်လုပ်နေခြင်းဖြစ်မည် မဟုတ်လော။ သို့သော် အကယ်၍ ငါလုံးဝ အလုပ်မလုပ်ပါက ဘုရားအိမ်တော်က ငါ့ကို အိမ်ပြန်လွှတ်လိမ့်မည်။ ငါ အဘယ်အရာ လုပ်ဆောင်သင့်သနည်း။ ခေါင်းဆောင် ရှိနေသောအခါ အစွမ်းကုန် ငါ ကြိုးစားအလုပ်လုပ်မည်၊ ချွေးထွက်အောင် လုပ်ဆောင်ပြီး ခေါင်းဆောင်ကို မြင်စေမည်။ သူတို့ မရှိသောအခါ အိမ်သာသို့ ငါ သွားမည်၊ ရေသောက်မည်၊ လမ်းလျှောက်ထွက်မည် သို့မဟုတ် အနားယူရန် ထောင့်တစ်နေရာကို ရှာဖွေမည်။ အကယ်၍ အခြားသူများ မြေကြီးကို ဂေါ်ပြားသုံးချက် တူးပါက ဂေါ်ပြားတစ်ဝက်မျှသာ ငါ တူးမည်၊ အကယ်၍ အခြားသူများက အရာဝတ္ထုများကို သယ်ဆောင်လျက် သုံးကြိမ် သို့မဟုတ် ငါးကြိမ် အပြန်ပြန်အလှန်လှန် သွားပါက တစ်ကြိမ်မျှသာ ငါ သွားမည်။ ငါ တတ်နိုင်သည့်အခါတိုင်း အနားယူပြီး ပျင်းရိမည်။ ငါသည် အလွန် စိတ်ပါလက်ပါ မရှိသင့်ပါ။ ငါ အလွန်တရာ ကြိုးစားလုပ်ဆောင်ခြင်းကြောင့် ဖျားနာသွားပါက သို့မဟုတ် ပင်ပန်းနွမ်းနယ်သွားပါက မည်သူသည် ငါ့အတွက် စိတ်မကောင်း ဖြစ်မည်နည်း။ မည်သူသည် ငါ၏ ဖျားနာမှုကို ကုသပေးမည်နည်း။ ခေါင်းဆောင်က ယင်းကို ဂရုစိုက်မည်လော။ ဘုရားက ယင်းကို ဂရုစိုက်မည်လော။ ဘုရားက ဤအရာများအတွက် တာဝန်ယူမည်လော။ ထို့ကြောင့် အလုပ်လုပ်နေစဉ် မည်သည့်နေရာ၌ အထင်ရှားဆုံး အလုပ်လုပ်နိုင်မည်ကို ငါ စဉ်းစားရမည်။ ငါ ပျင်းရိလိုသောအခါ အတွေ့ခံရဖို့ အလားအလာအနည်းဆုံးနေရာ၊ အာရုံစိုက်ခံရရန် အလားအလာအနည်းဆုံးနေရာကို ရှာဖွေရမည်”ဟု စဉ်းစားသည့်သူများလည်း ရှိသည်။ ဤလူတို့သည် အဘယ်အရာကို တွေးတောနေကြသနည်း။ (ပျင်းရိခြင်းနှင့် ကောက်ကျစ်စဉ်းလဲစွာ ပြုမူခြင်းတို့ ဖြစ်ပါသည်။)

၁။ လူတို့အပေါ် အန္တိခရစ်များ လုပ်ဆောင်သည့်အရာ

တစ်နေ့လုံး ကောက်ကျစ်ဆိုးယုတ်သော အတွေးများရှိသောလူတို့၏ ကိုယ်ကျင့်စရိုက်မှာ အဘယ်နည်း။ ယင်းမှာ တည်ကြည်မှုနိမ့်ကျပြီး မသိမသာ အန္တရာယ်ပေးသည့် ကိုယ်ကျင့်စရိုက်တစ်ခု ဖြစ်သည်။ ၎င်းတို့၏ စိတ်သဘောထားကို အကဲဖြတ်ခြင်းအားဖြင့် ဤသည်မှာ အဘယ်နည်း။ (ကောက်ကျစ်ဆိုးယုတ်ခြင်း ဖြစ်ပါသည်။) ၎င်းတို့ တွေးတောသည့် ဤအရာများ၏ သဘောသဘာဝ၌ တည်ကြည်ဖြောင့်မှန်သောအရာ တစ်ခုတလေ ရှိသလော။ မြင့်မြတ်သောအရာ၊ ပွင့်လင်းပြီး တရားမျှတပုံရသည့်အရာ တစ်ခုတလေ ရှိသလော။ ကောင်းသောအရာ တစ်ခုတလေ ရှိသလော။ (တစ်ခုမျှ မရှိပါ။) သို့ဖြစ်၍ အကျဉ်းချုပ်အားဖြင့် အန္တိခရစ်များ၏ အနှစ်သာရကို ပိုင်ဆိုင်သောသူတို့၏ ကောက်ကျစ်ဆိုးယုတ်သော စိတ်သဘောထား၌ ထင်ရှားပေါ်လွင်သည့် ပထမဆုံးအရာမှာ ၎င်းတို့ တစ်နေ့လုံး တွေးတောသမျှသည် ဆိုးယုတ်မှုဖြစ်သည်ဟူ၍ ဖြစ်သည်။ ၎င်းတို့သည် ကြီးမားသော ပြဿနာတစ်ခုနှင့် ရင်ဆိုင်ရသည်ဖြစ်စေ၊ သေးငယ်သော ပြဿနာတစ်ခုနှင့် ရင်ဆိုင်ရသည်ဖြစ်စေ ၎င်းတို့၏ အတွေးများက မကောင်းမှုဖြင့် ပြည့်နေသည်။ တိကျစွာဆိုရလျှင် ၎င်းတို့သည် လူတို့အပေါ် အချို့အရာများကို လုပ်ဆောင်ပြီး ဘုရားသခင်အပေါ်၌လည်း မတူညီသော သရုပ်သကန်များနှင့် လက်တွေ့လုပ်ဆောင်မှုများ ရှိကြသည်။ သို့ဆိုလျှင် ၎င်းတို့သည် လူတို့အပေါ် အဘယ်အရာများကို လုပ်ဆောင်ကြသနည်း။ ၎င်းတို့သည် မိမိတို့၏ အတွေး၌ မည်သို့သော လက်တွေ့လုပ်ဆောင်မှုမျိုးများကို ဖြစ်ပေါ်စေသနည်း။ ယခုတင် ဖော်ပြခဲ့သော ဥပမာအနည်းငယ်တွင် ဤသို့သောလူစားမျိုးသည် အခြားသူများအပေါ် စဉ်ဆက်မပြတ် ကြံစည်နေပုံကို သင်တို့ မြင်နိုင်သလော။ ၎င်းတို့သည် မရပ်မနား ကြံစည်နေကြပြီး ၎င်းတို့နှင့် ဆက်ဆံရေး သို့မဟုတ် ထိတွေ့မှုရှိသော မည်သူမဆိုသည် ၎င်းတို့အကြံအစည်များ၏ ပစ်မှတ် ဖြစ်လာသည်။ ဒုတိယအနေဖြင့် တစ်ခါတစ်ရံ ၎င်းတို့သည် အမှုအရာများကို လုပ်ဆောင်သောအခါ စကားမပြောကြသော်လည်း ၎င်းတို့ လုပ်ဆောင်ချက်များ၏ နည်းလမ်းများ၊ နည်းစနစ်များနှင့် ရင်းမြစ်များသည် စစ်မှန်ခြင်းမရှိသည့်အပြင် ၎င်းတို့က သမ္မာတရားကို လက်တွေ့လုပ်ဆောင်နေခြင်း မဟုတ်ပေ။ ယင်းမှာ အရိပ်ပမာဖြစ်သော အသွင်အပြင်တစ်ခုမျှသာ ဖြစ်သည်။ ဤအရာ၏ သဘောသဘာဝမှာ အဘယ်နည်း။ ဤလက်တွေ့လုပ်ဆောင်ခြင်းမှာ အဘယ်နည်း။ ယင်းမှာ လှည့်စားခြင်းနှင့် ဟန်ဆောင်ခြင်းဖြစ်ပြီး ၎င်းတို့သည် အခြားသူများကိုလည်း သွေးဆောင်နေကြသည်။ ၎င်းတို့သည် ဟန်ဆောင်နိုင်ပြီး လူတို့ကို လှည့်စားနိုင်သည့်အတွက် လူတို့ကို ဆွဲဆောင်ပြီး အထင်အမြင်လည်းမှားစေနိုင်ကြသလော။ (မှားစေနိုင်ပါသည်။) ထို့အပြင် ဤသို့သောလူစားမျိုးသည် အဆင့်အတန်း၊ ဂုဏ်သတင်း၊ သိက္ခာနှင့် မိမိတို့၏ ကိုယ်ပိုင်အကျိုးစီးပွားတို့အတွက် အခြားသူများနှင့် အဆက်မပြတ် ယှဉ်ပြိုင်တိုက်ခိုက်နေကြသည်။ ၎င်းတို့သည် ကျော်ကြားမှုအတွက်၊ ဆုံးဖြတ်ပိုင်ခွင့်ရှိသူဖြစ်ခြင်းအတွက်၊ မည်သူ၌ အကြံဉာဏ်များ ပိုမိုရှိသည်ဟူသည်အတွက်၊ မည်သူ၏ ထင်မြင်ယူဆချက်များက ပို၍အမြော်အမြင်ရှိပြီး ပို၍ကျိုးကြောင်းဆီလျော်သည်ဟူသည်အတွက်၊ မည်သူက လူတိုင်း၏ ထောက်ခံမှုကို ပိုမိုရရှိသည်ဟူသည်အတွက်လည်းကောင်း၊ မည်သူက အကျိုးအမြတ်များ ပိုမိုရရှိနိုင်သည်ဟူသည်အတွက်လည်းကောင်း ပြိုင်ဆိုင်ကြသည်။ ဤသည်မှာ ၎င်းတို့ ယှဉ်ပြိုင်သည့်အရာ ဖြစ်သည်။ အဆင့်အတန်းမရှိဘဲနှင့်ပင် ၎င်းတို့သည် လူတို့ကို ဤသို့ ကြံစည်နေဆဲဖြစ်သည်။ သို့ဆိုလျှင် ၎င်းတို့၌ အဆင့်အတန်းရှိသောအခါ အဘယ်သို့နည်း။ ထိုအခါ ၎င်းတို့၏ အုပ်စိုးမှုအောက်ရှိလူတို့သည် အဆက်မပြတ် ညှဉ်းပန်းခြင်း ခံနေရသည်။ ၎င်းတို့သည် လူတိုင်းကို မိမိတို့စကားနားထောင်စေပြီး မိမိတို့ကို နာခံစေမည့် ရည်မှန်းချက်ဖြင့် သမ္မာတရားကို မချစ်မြတ်နိုးသောသူတို့ကို ဆွဲဆောင်ပြီး စည်းရုံးသိမ်းသွင်းကာ သမ္မာတရားကို လက်ခံနိုင်သောသူတို့ကို တိုက်ခိုက်ပြီး ဖယ်ကြဉ်ကြသည်။ ၎င်းတို့သည် အုပ်စုများအတွင်း၌ ဂိုဏ်းများဖွဲ့ပြီး သွေးခွဲခြင်းတို့ကို အမြဲ ပြုလုပ်ကြကာ အဆုံးတွင် လူတိုင်းကို ၎င်းတို့နှင့်သက်ဆိုင်စေကြသည်။ ဤအရာအားလုံးသည် ၎င်းတို့၏ ညှဉ်းပန်းခြင်း နယ်ပယ်အတွင်း၌ ကျရောက်သည်။ အန္တိခရစ်များသည် တစ်နေ့လုံး မကောင်းမှုကို တွေးတောနေကြပြီး ၎င်းတို့ ထုတ်ဖော်သည့် စိတ်သဘောထားတိုင်းက မကောင်းမှုဖြစ်သည်။ သို့ဆိုလျှင် ထိုသို့သောလူများ၏ စိတ်သဘောထားက ကောက်ကျစ်ဆိုးယုတ်သည်ဟု ဆိုခြင်းသည် မှန်ကန်တိကျသလော။ (မှန်ကန်တိကျပါသည်။) လူတိုင်းက မိမိတို့၏ နေရာကို သိရှိပြီး မိမိတို့၏ ကိုယ်ပိုင်အလုပ်ကို စွဲမြဲကာ မိမိတို့ လုပ်ဆောင်သင့်သည့်အရာကို လုပ်ဆောင်သည့် အဖွဲ့တစ်ခုတွင် အန္တိခရစ်တစ်ဦး ပေါ်လာသည်နှင့်တစ်ပြိုင်နက် ၎င်းတို့သည် အချင်းချင်း မသင့်မြတ်အောင်လုပ်ဆောင်လျက် လူ (ခ) ၏ရှေ့တွင် လူ (က) အကြောင်း မကောင်းပြောကာ အပြန်အလှန် မကောင်းပြောရင်း အတွင်းမှ သွေးခွဲလေသည်။ ဤသည်မှာ သွေးခွဲခြင်း၏ အကျိုးဆက် မဟုတ်လော။ သို့ဆိုလျှင် အန္တိခရစ်တစ်ဦး၏ ကြံစည်ခြင်းနှင့်ဆိုင်သည့် သရုပ်သကန်အချို့မှာ အဘယ်နည်း။ ဥပမာအားဖြင့် အသင်းတော်၌ ရွေးကောက်ပွဲတစ်ခု ရှိသောအခါ ရည်မှန်းချက်မရှိသော သာမန်လူတို့က “မည်သူ ရွေးကောက်ခံရသည်ဖြစ်စေ ငါ ကျိုးနွံနာခံမည်၊ ဘုရားသခင် ခေါင်းဆောင်ဖြစ်ခွင့်ပြုသော မည်သူ့ကိုမဆို ငါထောက်ခံမည်ဖြစ်ပြီး ငါသည် အနှောင့်အယှက်ပေးသူ သို့မဟုတ် ပြဿနာရှာသူ ဖြစ်မည်မဟုတ်” ဟု တွေးထင်ကောင်း တွေးထင်နိုင်သည်။ သို့သော် မကောင်းသော ရည်ရွယ်ချက်ရှိသော သူတို့သည် ဤသို့ မတွေးတောကြပေ။ အကယ်၍ ၎င်းတို့သည် ဤရွေးကောက်ပွဲ၌ မိမိတို့ အနိုင်ရရန် မျှော်လင့်ချက်မရှိကြောင်း မြင်ပါက မိမိတို့၏ စိတ်နှလုံးထဲ၌ “ငါသည် လူတိုင်းအတွက် ပစ္စည်းကောင်းအချို့ကို ဝယ်ပေးရန် လိုအပ်သည်။ ဤနေ့ရက်များတွင် အသင်းတော်၌ အဘယ်အရာ လိုအပ်နေသနည်း။ လေသန့်စင်စက်တစ်လုံးကို ငါ ဝယ်ပြီး စုဝေးသည့်နေရာ၌ ထားမည်။ သို့မှသာ လူတိုင်းက လတ်ဆတ်သောလေကို ရှူရှိုက်သောအခါ ငါ့ကို တွေးမိကြလိမ့်မည်။ ဤနည်းအားဖြင့် ရွေးကောက်ပွဲအချိန်ကျသောအခါ သူတို့ တွေးမိသည့် ပထမဆုံးကိုယ်စားလှယ်လောင်းမှာ ငါ ဖြစ်မည်မဟုတ်လော။ ထို့ကြောင့် ငါသည် အချည်းနှီး ပြုမူနေခြင်း သို့မဟုတ် ငွေသုံးနေခြင်း ဖြစ်မည်မဟုတ်ပါ”ဟု စတင်တွက်ချက်နေကြလေသည်။ ဤသို့ တွေးတောပြီးနောက် ၎င်းတို့သည် အသက်သာဆုံးနှင့် အမြင်အားဖြင့် အဆွဲဆောင်နိုင်ဆုံးသော လေသန့်စင်စက်တစ်လုံးကို အမြန်ဝယ်ယူကြသည်။ ထို့အပြင် ၎င်းတို့က၊ “ဤအချိန်အတောအတွင်းတွင် ငါ ဂရုစိုက်ဖို့လိုအပ်သည်။ မှားယွင်းသောအရာများကို ငါ မပြောရပါ၊ ပြီးလျှင် အပျက်သဘောဆောင်ပြီး လူကိုတည်ဆောက်မှုမပေးသော အရာများကို မပြောရပါ။ ငါသည် လူများနှင့် တွေ့ဆုံသည့်အခါတိုင်း မြှောက်ပင့်သောစကားများကို ပြောဆိုရမည်ဖြစ်ပြီး အခြားသူများကို ‘သင်သည် တကယ်ကို ကြည့်ကောင်းပါသည်။ သင်သည် သမ္မာတရားကို အမှန်တကယ် လိုက်စားနေပါသည်။ သင်သည် ကျွန်ုပ်လောက် ဘုရားသခင်ကို အချိန်ကြာမြင့်စွာ မယုံကြည်သေးသော်လည်း ကျွန်ုပ်ထက် သမ္မာတရားကို ပိုလိုက်စားခဲ့ပါသည်။ သင်၏ လူ့သဘာဝသည် ကောင်းမွန်ပြီး သင်ကဲ့သို့ ကောင်းသောလူ့သဘာဝရှိသော လူများသည် ကယ်တင်ခြင်းခံရနိုင်သည်။ ကျွန်ုပ်က စံမမီပါ’ ဟူသကဲ့သို့သော အရာများဖြင့် မကြာခဏ ချီးကျူးရမည်။ ငါသည် နှိမ့်ချသည့်ပုံပေါ်သင့်ပြီး အခြားသူများကို အဘက်ဘက်တွင် ငါကိုယ်တိုင်ထက် ပိုတော်သည်ဟု ချီးကျူးသင့်ကာ အခြားသူများကို လုံလောက်သော လေးစားမှုအား ၎င်းတို့ ရရှိသည်ဟု ခံစားစေသင့်သည်”ဟု စဉ်းစားကြလေသည်။ ဤသည်မှာ အကွက်ဆင်ခြင်း မဟုတ်လော။ အန္တိခရစ်များသည် ထိုသို့သောအရာများကို အားစိုက်ထုတ်စရာမလိုဘဲ ပြုလုပ်ကြသည်။ သာမန်လူတို့သည် ၎င်းတို့ကို အကွက်ဆင်ရာ၌ မယှဉ်နိုင်ပေ။ မယုံကြည်သူများအကြား ဆိုရိုးစကားမှာ အဘယ်နည်း။ (သင်သည် တစ်စုံတစ်ဦး၏ ရောင်းစားခြင်းကို ခံရပြီးဖြစ်သော်လည်း ၎င်းတို့အား ငွေရေတွက်ရာ၌ ကူညီနေဆဲ ဖြစ်သည်။) အန္တိခရစ်များသည် ထိုသို့သောအရာများကို ကျူးလွန်ကြပြီး လူအများစုမှာ ၎င်းတို့၏ သစ္စာဖောက်ခြင်းနှင့် အကွက်ဆင်ခြင်းတို့၏ ပစ်မှတ်များ ဖြစ်ကြသည်။

ငါ့ကို ပြောကြလော့၊ အန္တိခရစ်များသည် ပြုပြင်ခြင်းကို လက်ခံကြသလော။ ၎င်းတို့၌ ဖောက်ပြန်ပျက်စီးသော စိတ်သဘောထားတစ်ခုရှိကြောင်း ၎င်းတို့ ဝန်ခံကြသလော။ (ဝန်မခံကြပါ။) ၎င်းတို့သည် ဖောက်ပြန်ပျက်စီးသော စိတ်သဘောထားတစ်ခုရှိကြောင်း ဝန်မခံကြသော်လည်း ပြုပြင်ခြင်းခံရပြီးနောက် မိမိတို့ကိုယ်ကို သိရှိသကဲ့သို့ ဟန်ဆောင်နေကြဆဲ ဖြစ်သည်။ ၎င်းတို့သည် နတ်ဆိုးတစ်ကောင်နှင့် စာတန်တစ်ကောင်ဖြစ်ကြောင်း၊ လူ့သဘာဝကင်းမဲ့ပြီး အစွမ်းအစညံ့ဖျင်းကြောင်း၊ အမှုအရာများကို စေ့စေ့စပ်စပ် မစဉ်းစားနိုင်ကြောင်း၊ အသင်းတော်က စီစဉ်ပေးသော တာဝန်များနှင့် မသင့်တော်ကြောင်း၊ မိမိတို့၏ တာဝန်များကို ကောင်းစွာ မထမ်းဆောင်ခဲ့ကြောင်း ပြောဆိုကြသည်။ ထို့နောက် လူအများစု၏ရှေ့တွင် ၎င်းတို့သည် မိမိတို့၏ ဖောက်ပြန်ပျက်စီးသော စိတ်သဘောထားကို ဝန်ခံကြသည်။ မိမိတို့က နတ်ဆိုးတစ်ကောင်ဖြစ်ကြောင်း ဝန်ခံကြပြီး နောက်ဆုံးတွင် ဤသည်မှာ ဘုရားသခင်က ၎င်းတို့ကို စစ်ဆေးပြီး ကယ်တင်နေခြင်းဖြစ်သည်ဟုလည်း ဆိုကြကာ၊ ပြုပြင်ခြင်းကို မည်မျှ ၎င်းတို့ လက်ခံနိုင်စွမ်းရှိကြောင်းနှင့် သမ္မာတရားကို မည်မျှ ကျိုးနွံနာခံကြောင်း လူတို့ကို ပြသကြသည်။ ၎င်းတို့သည် အဘယ်ကြောင့် ၎င်းတို့ ပြုပြင်ခြင်းခံနေရသည်ကို မဖော်ပြကြ သို့မဟုတ် ၎င်းတို့၏ လုပ်ဆောင်ချက်များက အသင်းတော်အလုပ်အပေါ် ဖြစ်ပေါ်စေခဲ့သော ထိခိုက်နစ်နာမှုနှင့် ဆုံးရှုံးမှုများကို ဖော်ပြခြင်းမရှိကြပေ။ ၎င်းတို့သည် ထိုစကားများကို ရှောင်လွှဲ၍ မပြောဘဲ၊ အနှစ်မရှိသော စကားများ၊ အယူဝါဒ စကားများ၊ လျှောက်လဲချက်စကားများနှင့် မိမိကိုယ်ကို ဖြောင့်မတ်ရာရောက်စေသော စကားများကိုသာ ပြောဆိုလေသည်။ ဤသို့ဖြင့် ဘုရားသခင်၏ အိမ်တော်က ၎င်းတို့အား ပြုပြင်ခြင်းသည် မသင့်လျော်ကြောင်းနှင့် တရားမမျှတကြောင်း၊ ၎င်းတို့သည် ကြီးစွာသော မတရားမှုကို ခံစားခဲ့ရသကဲ့သို့ဖြစ်ကြောင်း လူတို့ကို အထင်အမြင် လွဲမှားစေ၏။ ပြုပြင်ခြင်းခံရပြီးနောက် ၎င်းတို့သည် မိမိတို့၏ စိတ်နှလုံးထဲ၌ မကျိုးနွံဘဲ ခေါင်းမာနေဆဲဖြစ်ပြီး မိမိတို့၏ အမျိုးမျိုးသော ဒုစရိုက်အမှုများထဲမှ တစ်ခုကိုမျှ အနည်းငယ်မျှပင် အသိအမှတ်မပြုကြပေ။ သို့ဆိုလျှင် မိမိတို့၏ ဖောက်ပြန်ပျက်စီးသော စိတ်သဘောထားကို ဝန်ခံခြင်း၊ သမ္မာတရားကို လက်ခံလိုစိတ်ရှိခြင်းနှင့် ပြုပြင်ခြင်းအား ကျိုးနွံနာခံနိုင်ခြင်းတို့နှင့်ပတ်သက်၍ မိတ်သဟာယဖွဲ့ခဲ့သော ဤစကားအားလုံးမှာ အဘယ်အရာများ ဖြစ်သနည်း။ ဤအရာများသည် ၎င်းတို့၏ စစ်မှန်သော စိတ်ခံစားချက်များလော။ လုံးဝမဟုတ်ပေ။ ၎င်းတို့အားလုံးသည် လူတို့ကို အထင်အမြင်မှားစေရန်နှင့် သွေးဆောင်ဖြားယောင်းရန် ရည်ရွယ်သည့် မုသားများ၊ ဟန်ဆောင်မှုနှင့် နတ်ဆိုးဆန်သော စကားများ ဖြစ်ကြသည်။ လူတို့ကို ၎င်းတို့ အထင်အမြင်မှားစေခြင်း၏ ရည်မှန်းချက်မှာ အဘယ်နည်း။ (လူတို့အား ၎င်းတို့ကို ကိုးကွယ်ပြီး နောက်လိုက်စေရန် ဖြစ်ပါသည်။) အတိအကျပင်၊ ယင်းမှာ လူတိုင်းကို ၎င်းတို့ မှန်ကန်ပြီး ကောင်းမွန်သည်ဟု ထင်မြင်စေလျက် လူတို့ကို ၎င်းတို့နောက်လိုက်စေပြီး ၎င်းတို့စကားနားထောင်စေရန်အတွက် အထင်အမြင်မှားစေရန်နှင့် သွေးဆောင်ဖြားယောင်းရန် ဖြစ်သည်။ ဤနည်းအားဖြင့် မည်သူမျှ ၎င်းတို့ကို ရိပ်စားမိခြင်း သို့မဟုတ် ဆန့်ကျင်ခြင်း ပြုမည်မဟုတ်ပေ။ ဆန့်ကျင်ဘက်အားဖြင့် လူတို့သည် ၎င်းတို့အား သမ္မာတရားကို လက်ခံသူတစ်ဦး၊ ပြုပြင်ခြင်းကို လက်ခံသူတစ်ဦးနှင့် နောင်တရသူတစ်ဦးဖြစ်သည်ဟု ယုံကြည်ကြသည်။ သို့ဆိုလျှင် ၎င်းတို့သည် အဘယ်ကြောင့် မိမိတို့၏ ဒုစရိုက်အမှုများကို ဝန်မခံကြသနည်း သို့မဟုတ် ဘုရားအိမ်တော်၏ အလုပ်အပေါ် ၎င်းတို့ ဖြစ်ပေါ်စေခဲ့သော ဆုံးရှုံးမှုများကို အသိအမှတ်မပြုကြသနည်း။ အဘယ်ကြောင့် ၎င်းတို့သည် ဤကိစ္စရပ်များကို မိတ်သဟာယဖွဲ့ရန်အတွက် လူသိရှင်ကြား မထုတ်ဖော်ကြသနည်း။ (အကယ်၍ ၎င်းတို့သည် ဤအရာများကို ပြောဆိုမည်ဆိုလျှင် လူတို့က ၎င်းတို့ကို ပိုင်းခြားသိမြင်ကြလိမ့်မည်ဖြစ်သည်။) အကယ်၍ လူတို့သည် ၎င်းတို့ကို ပိုင်းခြားသိမြင်ပြီး ရိပ်စားမိကာ ၎င်းတို့၏ လူ့သဘာဝနှင့် စိတ်သဘောထားအနှစ်သာရကို ရိပ်စားမိမည်ဆိုလျှင် ၎င်းတို့ကို စွန့်ပစ်ကြလိမ့်မည်။ ထိုလူတို့သည် ၎င်းတို့၏ လှည့်စားမှုများကို ခံကြဦးမည်လော။ ၎င်းတို့၏ အထင်အမြင်မှားစေခြင်းကို ခံကြဦးမည်လော။ ၎င်းတို့ကို အထင်ကြီးလေးစားနေကြဦးမည်လော။ ၎င်းတို့ကို မြှောက်စားနေကြဦးမည်လော။ ၎င်းတို့ကို ကိုးကွယ်နေကြဦးမည်လော။ ၎င်းတို့သည် ဤအရာများထဲမှ တစ်ခုကိုမျှ ပြုလုပ်ကြမည်မဟုတ်ပေ။ အန္တိခရစ်များသည် မိမိတို့ကိုယ်ကို သိရှိသကဲ့သို့ ဟန်ဆောင်ကြသော်လည်း လက်တွေ့တွင် ထိုအရာသည် လူတို့ကို အထင်အမြင်မှားစေရန်နှင့် လူတို့ကို ၎င်းတို့အတွက် ရပ်တည်ပေးစေရန်အတွက် တစ်ပတ်ရိုက်သောစကားများနှင့် မိမိကိုယ်ကို ရှင်းလင်းချက်များမျှသာဖြစ်ပြီး ယင်းမှာ ၎င်းတို့၏ ကွယ်ဝှက်ထားသော ရည်ရွယ်ချက် ဖြစ်သည်။ ၎င်းတို့သည် လူတို့ကို အထင်အမြင်မှားစေကာ သွေးဆောင်ဖြားယောင်းရန်၊ လူတို့အား ၎င်းတို့ကို လေးစားပြီး ကိုးကွယ်စေရန် အရေးကြီးသော ကိစ္စရပ်များကို ရှောင်လွှဲပြီး မိမိတို့ကိုယ်ကို သိရှိခြင်းနှင့် ပြုပြင်ခြင်းကို လက်ခံခြင်းအကြောင်းကို ပေါ့ပေါ့တန်တန် ပြောဆိုကြသည်။ ဤနည်းလမ်းသည် အတော်အတန် ကောက်ကျစ်ဆိုးယုတ်သည် မဟုတ်လော။ အချို့လူတို့သည် အမှန်တကယ်ပင် ထိုအရာ၏ လှည့်စားခြင်းခံရကာအန္တိခရစ်များ၏ အထင်အမြင်မှားစေခြင်းကို ခံရပြီးနောက် ၎င်းတို့က “ထိုသူသည် အလွန်အပြောကောင်းပေသည်။ ကျွန်ုပ် အလွန် စိတ်အားတက်ကြွမိသည်။ ကျွန်ုပ် အကြိမ်ပေါင်းများစွာ ငိုခဲ့ရသည်” ဟု ဆိုကြသည်။ ထိုအချိန်တွင် ဤလူတို့သည် ၎င်းတို့ကို အလွန် ကိုးကွယ်ပြီး အထင်ကြီးကြသော်လည်း အဆုံးတွင် ဖြစ်ချင်တော့ ၎င်းတို့မှာ အန္တိခရစ်များ ဖြစ်နေသည်။ ဤသည်မှာ အန္တိခရစ်များက အခြားသူများကို အထင်အမြင်မှားစေပြီး သွေးဆောင်ဖြားယောင်းခြင်း၏ အကျိုးဆက် ဖြစ်သည်။ အန္တိခရစ်များသည် လူတို့ကို ဤသို့ အထင်အမြင်မှားစေနိုင်ပြီး ယင်း၌ အလိမ်ခံရကာ လှည့်စားခြင်းခံရသောသူများမှာ အသေအချာပင် မနည်းလှပေ။ အကယ်၍ တစ်စုံတစ်ဦးသည် ဤကိစ္စ၌ အန္တိခရစ်များကို ပိုင်းခြားသိမြင်နိုင်ပါက ထိုသူသည် သမ္မာတရားကို နားလည်ပြီး ပိုင်းခြားသိမြင်မှုရှိသောသူတစ်ဦး ဖြစ်သည်။

အန္တိခရစ်များသည် လူတို့ကို မကြာခဏ ညှဉ်းပန်းကြသည်။ ၎င်းတို့၌ ထင်ရှားသော ဆိုရိုးစကားတစ်ခု ရှိသည်၊ ယင်းမှာ “သေနာလေးများ၊ သင် ငါ့ကို အလျှော့မပေးသည့်အတွက်၊ လှုပ်ရှားမှု အနည်းငယ်မျှဖြင့် ငါ့ကို ဒူးထောက်ပြီး ရှိခိုးလာအောင် ငါလုပ်ပြမည်။ အလျှော့မပေးလျှင် သင့်ကို အသေသတ်ပစ်မည်”ဟူ၍ ဖြစ်သည်။ အန္တိခရစ်များသည် အဘယ်အရာကို လုပ်ဆောင်လိုကြသနည်း။ ၎င်းတို့သည် လူတို့ကို ညှဉ်းပန်းလိုကြသည်။ မည်သည့် လူစားမျိုးကို ၎င်းတို့ ညှဉ်းပန်းလိုကြသနည်း။ အကယ်၍ သင်သည် ၎င်းတို့ကို နာခံလျှင်၊ မြှောက်ပင့်ဖားယားပြီး ကိုးကွယ်လျှင်၊ ၎င်းတို့သည် သင့်ကို ညှဉ်းပန်းလိမ့်မည်လော။ အကယ်၍ သင်သည် ၎င်းတို့ကို နာခံပြီး ကျိုးနွံ ပါက၊ အကယ်၍ ၎င်းတို့သည် သင့်ကို ခြိမ်းခြောက်မှုမရှိသူအဖြစ် မြင်လျှင်၊ သင်သည် အနိုင်ကျင့်ရန် လွယ်ကူသူ သို့မဟုတ် ကျွန်တစ်ဦးမျှသာဖြစ်သည်ဟု မြင်လျှင် ၎င်းတို့သည် သင့်ကို ညှဉ်းပန်းရန် ဒုက္ခခံမည်မဟုတ်။ အကယ်၍ ၎င်းတို့သည် မကောင်းသည့်အရာတစ်ခုခုကို ပြုလုပ်သည် သို့မဟုတ် ဒုစရိုက်အမှုများကို ကျူးလွန်လျှင်၊ အကယ်၍ ၎င်းတို့သည် ၎င်းတို့ကို ပိုင်းခြားသိမြင်သောသူ၊ ၎င်းတို့ကို ဖော်ထုတ်ပြီး ဖွင့်ပြမည့်သူ၊ ၎င်းတို့ကို ၎င်းတို့၏ ရာထူးမှ ဆွဲချမည့်သူ၊ ၎င်းတို့၏ ဂုဏ်သတင်းကို ဖျက်ဆီးပြီး ၎င်းတို့၏ လုပ်ဆောင်ချက်များကို ထိခိုက်နစ်နာစေမည့်သူ တစ်စုံတစ်ဦးကို တွေ့ရှိပါက ထိုသူအား မည်သို့ ညှဉ်းပန်းရမည်ကို ၎င်းတို့ တွေးတောကြလိမ့်မည်။ အန္တိခရစ်များသည် လူတို့ကို စိတ်လိုက်မာန်ပါ ညှဉ်းပန်းခြင်း မပြုကြပေ။ ယင်းအစား ၎င်းတို့သည် လူတို့ကို အဆက်မပြတ် စူးစမ်းလေ့လာပြီး စမ်းသပ်ကာ၊ မည်သူက ၎င်းတို့၏ နောက်ကွယ်တွင် ၎င်းတို့အကြောင်း မကောင်းပြောနေသည်၊ မည်သူက ၎င်းတို့ကို လက်မခံဘဲရှိနေသည်၊ မည်သူက ၎င်းတို့၏ လုပ်ဆောင်ချက်များကို ပိုင်းခြားသိမြင်သည်၊ မည်သူက ၎င်းတို့ကို အာရုံစိုက်ခြင်းမရှိသည်၊ မည်သူက ၎င်းတို့နှင့် ရင်းနှီးရန် ငြင်းဆန်သည်ဟူသည်တို့ကို ကြည့်ရှုနေကြသည်။ အတန်ကြာ စူးစမ်းလေ့လာပြီး ထိုသို့သော လူနှစ်ဦး သို့မဟုတ် သုံးဦးကို တွေ့ရှိပြီးနောက်တွင် ၎င်းတို့သည် စုဝေးပွဲများအတွင်း ဤလူတို့၏ ပြဿနာများအကြောင်းကို စတင်မိတ်သဟာယဖွဲ့ကြသည်။ ၎င်းတို့ ပြောဆိုသည့်အရာသည် အပေါ်ယံအားဖြင့် မှန်ကန်သည်ဟု ထင်ရသော်လည်း လက်တွေ့တွင် အကြောင်းရင်းနှင့် ရည်ရွယ်ချက်တစ်ခုဖြင့် ပစ်မှတ်ထားခြင်း ဖြစ်သည်။ အကြောင်းရင်းမှာ အဘယ်နည်း။ ၎င်းတို့သည် စေ့စေ့စပ်စပ် စုံစမ်းစစ်ဆေးပြီးသား ဖြစ်သည်။ ဤပုဂ္ဂိုလ်များသည် ၎င်းတို့ကို ဖော်ထုတ်ရန်နှင့် ရာထူးမှ ထုတ်ပယ်ရန် အစဉ် ကြိုးစားလျက်၊ ၎င်းတို့ကို လက်မခံကြသည့်အပြင် ၎င်းတို့ကို ပိုင်းခြားသိမြင်ကြလေသည်။ ၎င်းတို့သည် ဤအရာများကို ထိုပုဂ္ဂိုလ်များအတွက် သတိပေးချက်ပေးဖို့အလို့ငှာ၊ ၎င်းတို့ကို သတိပေးနှိုးဆော်ရန်အလို့ငှာ ပြောဆိုကြသည်။ အကယ်၍ ဤလူတို့သည် နောက်ဆုတ်ပြီး ဆက်လက်မလုပ်ဆောင်ဝံ့တော့ဘဲ အရာရာတိုင်းက အန္တိခရစ်များ၏ ဆန္ဒအတိုင်း ဖြစ်သွားပါက အန္တိခရစ်များသည် ၎င်းတို့ကို လျစ်လျူရှုကြလေသည်။ သို့သော် အကယ်၍ ဤလူများသည် ယခင်အတိုင်း ဆက်လက်ပြုမူပြီး ၎င်းတို့နှင့် ရင်းနှီးရန် ငြင်းဆန်ကာ ၎င်းတို့ကို ဖော်ထုတ်ရန်၊ အထက်သို့ တိုင်ကြားရန်နှင့် ရာထူးမှ ထုတ်ပယ်ရန် ရည်ရွယ်နေဆဲဖြစ်ပါက ၎င်းတို့သည် နောက်ထပ် အန္တိခရစ်များ၏ ညှဉ်းပန်းခြင်းခံရမည့် ပစ်မှတ်များ ဖြစ်လာကြသည်။ ၎င်းတို့သည် အခြားသော လုပ်နည်းကိုင်နည်းများကို တွေးတောကြပြီး ပို၍အင်အားသုံးသော၊ ပို၍ပြင်းထန်သော နည်းလမ်းများကို သုံးစွဲကာ ၎င်းတို့နှင့်ပတ်သက်သည့် အားနည်းချက်အား အမိအရအသုံးချရန် နည်းလမ်းများကို ကြိုးစားရှာဖွေပြီး ၎င်းတို့ကို ညှဉ်းပန်းဖို့ အခွင့်အလမ်းများကို ရှာဖွေကာ အသင်းတော်မှ နှင်ထုတ်မခံရမချင်း မရပ်တန့်ကြပေ။ အန္တိခရစ်များသည် သဘောထားကွဲလွဲသူများကို ဤသို့သော ညှဉ်းပန်းမှုမျိုးဖြင့် ဆက်ဆံကြပြီး မိမိတို့၏ ရည်မှန်းချက်ကို မအောင်မြင်မချင်း အနားယူကြလိမ့်မည်မဟုတ်ပေ။ အန္တိခရစ်များက လူတို့ကို ညှဉ်းပန်းရန် အသုံးပြုသည့် နည်းလမ်းများသည် ရက်စက်ကြမ်းကြုတ်သည်။ ၎င်းတို့သည် အကြောင်းပြချက်တစ်ခုကို ရှာဖွေပြီး လူတို့ကို တံဆိပ်ကပ်ခြင်းဖြင့် စတင်ကာ ထို့နောက် လူတို့က ၎င်းတို့ကို လုံးဝ နာခံပြီး အညံ့ခံသည်အထိ မရပ်တန့်ဘဲ စတင်ညှဉ်းပန်းကြသည်၊ သို့မဟုတ်ပါက မပြီးဆုံးပေ။ အသင်းတော်၌ အန္တိခရစ်များသည် ဂိုဏ်းကို ဖန်တီးကာ အသင်းတော်ကို ထိန်းချုပ်ရန် ရည်မှန်းလျက်၊ ဂိုဏ်းဖွဲ့ခြင်းနှင့် သွေးခွဲခြင်းတို့ကို အစဉ်တစိုက် ပြုလုပ်ကြသည်။ ဤသည်မှာ အဖြစ်များသော ဖြစ်စဉ်တစ်ခု မဟုတ်လော။ အန္တိခရစ်များသည် ဂိုဏ်းများဖွဲ့သည်၊ သွေးခွဲသည်၊ အင်အားစုများကို ဆွဲဆောင်သည်၊ ၎င်းတို့အတွက် အကျိုးအမြတ်ရှိသောသူများ၊ အရေးကြီးသောအချိန်များ၌ ၎င်းတို့အတွက် ထောက်ခံပြောဆိုပေးနိုင်သူများ၊ ၎င်းတို့၏ ဒုစရိုက်အမှုများကို ဖုံးကွယ်ပေးပြီး ၎င်းတို့ကို ကာကွယ်ပေးနိုင်သူများနှင့် ပူးပေါင်းကြံစည်ကြသည်။ ၎င်းတို့သည် ဤလူတို့ကို ၎င်းတို့အတွက် အမှုအရာများအား လုပ်ဆောင်စေပြီး အခြားသူများအကြောင်း တိုင်ကြားရန်နှင့် ၎င်းတို့၏ သတင်းစကားပေးပို့သူများအဖြစ်ပင် ဆောင်ရွက်စေကြသည်။ အကယ်၍ ၎င်းတို့၌ အဆင့်အတန်းရှိပါက ဤအုပ်စုသည် ၎င်းတို့၏ သီးခြားနယ်ပယ် ဖြစ်လာသည်။ ၎င်းတို့၌ အဆင့်အတန်း ကင်းမဲ့ပါက ၎င်းတို့နှင့် ၎င်းတို့၏ အုပ်စုသည် အသင်းတော်၏ ပုံမှန်အစီအစဉ်ကို နှောင့်ယှက်ကာ ဝင်စွက်ဖက်ပြီး ပုံမှန်အသင်းတော်အသက်တာနှင့် အလုပ်ကို နှောင့်ယှက်လျက် အသင်းတော်အတွင်းတွင် အင်အားစုတစ်ခုကို ဖွဲ့စည်းကြလေသည်။

အန္တိခရစ်များ၏ ကောက်ကျစ်ဆိုးယုတ်သော အနှစ်သာရနှင့်ဆိုင်သည့် အတွေ့ရအများဆုံး သရုပ်သကန်မှာ ၎င်းတို့သည် ဟန်ဆောင်ခြင်းနှင့် သူတော်ကောင်းယောင်ဆောင်ခြင်းတို့၌ အထူးကျွမ်းကျင်ကြခြင်း ဖြစ်သည်။ ၎င်းတို့အနေဖြင့် အထူးသဖြင့် ရက်စက်ကြမ်းကြုတ်သော၊ မသိမသာ အန္တရာယ်ပေးတတ်သော၊ ရက်စက်ပြီး မာနထောင်လွှားသော စိတ်သဘောထားရှိသော်လည်း မိမိတို့ကိုယ်ကို အပြင်ပန်းအားဖြင့် အထူးနှိမ့်ချပြီး ကြင်နာသကဲ့သို့ ပြသကြသည်။ ဤသည်မှာ ဟန်ဆောင်ခြင်း မဟုတ်လော။ ဤလူတို့သည် မိမိတို့၏ စိတ်နှလုံးထဲ၌၊ “ငါသည် ပို၍ခရစ်ယာန်ဖြစ်ပုံပေါ်ရန်၊ ပို၍တည်ကြည်ပုံပေါ်ရန်၊ ပို၍ဝိညာဉ်ရေးရာဆန်ရန်၊ ပို၍ဝန်ထုပ်ထမ်းပုံပေါ်ရန်၊ ပို၍ခေါင်းဆောင်တစ်ဦးနှင့်တူရန် မည်သည့် အဝတ်အစားမျိုးကို ဝတ်ဆင်သင့်သနည်း။ ငါသိမ်မွေ့သည်၊ ကျက်သရေရှိသည်၊ ဂုဏ်သိက္ခာရှိသည်၊ လုံလောက်စွာ မြင့်မြတ်သည်ဟု လူတို့ကို ခံစားစေရန်အလို့ငှာ ငါ မည်သို့ စားသောက်သင့်သနည်း။ ခေါင်းဆောင်မှုနှင့် စွဲဆောင်မှုရှိသော ဟန်ပန်ကို ပေးဖို့ သာမန်လူတစ်ဦးမဟုတ်ဘဲ ထူးခြားသော လူတစ်ဦးဖြစ်သည့်ပုံပေါ်ရန် မည်သို့သော လမ်းလျှောက်သည့်ဟန်ပန်ကို ငါ ခံယူသုံးစွဲသင့်သနည်း။ အခြားသူများနှင့် ငါ၏ စကားစမြည်ပြောဆိုမှုများတွင် မည်သည့်အသံနေအသံထား၊ ဝေါဟာရ၊ အကြည့်များနှင့် မျက်နှာအမူအရာတို့က ငါသည် လူမှုအထက်တန်းလွှာ သို့မဟုတ် အဆင့်မြင့်ပညာတတ်တစ်ဦးကဲ့သို့ အဆင့်အတန်းမြင့်သည်ဟု လူတို့အား ခံစားစေနိုင်မည်နည်း။ ငါ၏ ဝတ်စားဆင်ယင်မှု၊ ဟန်ပန်အမူအရာ၊ စကားနှင့် အပြုအမူတို့က လူတို့အားငါ့ကို အထင်ကြီးစေရန်၊ ၎င်းတို့အပေါ် မေ့မရနိုင်သော စွဲမှတ်မှုတစ်ခုကို ချန်ထားရန်၊ ၎င်းတို့၏ စိတ်နှလုံးထဲ၌ ထာဝစဉ် ကျန်ရှိနေဖို့ သေချာစေရန် မည်သို့ ပြုလုပ်နိုင်မည်နည်း။ လူတို့၏ စိတ်နှလုံးများကို စည်းရုံးသိမ်းသွင်းပြီး နွေးထွေးစေရန်၊ တည်မြဲသော ထင်မြင်ချက်တစ်ခုကို ဖြစ်စေရန် အဘယ်အရာကို ငါ ပြောဆိုသင့်သနည်း။ ငါ့အနေဖြင့် အခြားသူများကို ပိုမိုကူညီပြီး ၎င်းတို့အကြောင်း အကောင်းပြောရမည်။ လူတို့ရှေ့တွင် ဘုရား၏နှုတ်ကပတ်တော်များအကြောင်း မကြာခဏ ပြောဆိုပြီး ဝိညာဉ်ရေးရာ ဝေါဟာရအချို့ကို အသုံးပြုရမည်။ အခြားသူများထံ ဘုရားနှုတ်ကပတ်တော်များကို ပိုမိုဖတ်ရှုပေးရမည်၊ ၎င်းတို့အတွက် ပိုမိုဆုတောင်းပေးရမည်၊ လူတို့ကို ၎င်းတို့၏ နားများကို စွင့်စေပြီး ငါ့စကားနားထောင်စေရန် အသံကို နှိမ့်ပြောရမည်။ ငါ နူးညံ့သည်၊ ဂရုစိုက်တတ်သည်၊ ချစ်ခင်တတ်သည်၊ စိတ်သဘောထားကြီးသည်၊ ခွင့်လွှတ်တတ်သည်ဟု ၎င်းတို့အား ခံစားစေရမည်”ဟု တွေးလျက် နေ့စဉ် စဉ်းစားဆင်ခြင်ကြလေသည်။ ဤသည်မှာ ဟန်ဆောင်ခြင်း မဟုတ်လော။ ဤအရာများသည် အန္တိခရစ်များ၏ စိတ်နှလုံးကို နေရာယူထားသော အတွေးများ ဖြစ်သည်။ ၎င်းတို့၏ အတွေးများတွင် ပြည့်နေသည့်အရာမှာ ဘာသာတရားမရှိသောလောက၏ ခေတ်ရေစီးကြောင်းများမှလွဲ၍ အခြားမဟုတ်ပေ။ ၎င်းတို့၏ အတွေးအခေါ်များနှင့် ရှုထောင့်အမြင်များက လောကနှင့်လည်းကောင်း၊ စာတန်နှင့်လည်းကောင်း သက်ဆိုင်ကြောင်းကို လုံးလုံးလျားလျား ညွှန်ပြနေသည်။ အချို့လူတို့သည် ပြည့်တန်ဆာတစ်ဦး သို့မဟုတ် အကျင့်ပျက်သော အမျိုးသမီးတစ်ဦးကဲ့သို့ပင် တိတ်တဆိတ် ဝတ်စားဆင်ယင်ကောင်း ဝတ်စားဆင်ယင်နိုင်သည်။ ၎င်းတို့၏ အဝတ်အစားသည် ဆိုးယုတ်သော ခေတ်ရေစီးကြောင်းများနှင့် အထူးသဖြင့် လိုက်လျောညီထွေဖြစ်စေပြီး အထူးဖက်ရှင်ကျသည်။ သို့ရာတွင် ၎င်းတို့သည် အသင်းတော်၊ ညီအစ်ကိုမောင်နှမများထဲသို့ ရောက်လာသောအခါ လုံးဝကွဲပြားသော ဝတ်စုံနှင့် အမူအကျင့်ကို ဆင်ယင်ထားကြသည်။ ၎င်းတို့သည် ဟန်ဆောင်ခြင်း၌ အလွန့်အလွန် ကျွမ်းကျင်ကြသည် မဟုတ်လော။ (ကျွမ်းကျင်ကြပါသည်။) အန္တိခရစ်များက မိမိတို့၏ စိတ်နှလုံးထဲ၌ စဉ်းစားဆင်ခြင်သည့်အရာ၊ ၎င်းတို့ လုပ်ဆောင်သည့်အရာ၊ ၎င်းတို့၏ အမျိုးမျိုးသော သရုပ်သကန်များနှင့် ၎င်းတို့ ထုတ်ဖော်သည့် စိတ်သဘောထားများအားလုံးသည် ၎င်းတို့၏ စိတ်သဘောထားအနှစ်သာရက ကောက်ကျစ်ဆိုးယုတ်ကြောင်းကို သရုပ်ဖော်သည်။ အန္တိခရစ်များသည် သမ္မာတရား၊ အပြုသဘောဆောင်သောအရာများ၊ မှန်ကန်သောလမ်းခရီး သို့မဟုတ် ဘုရားသခင်၏ သတ်မှတ်ချက်များကို မစဉ်းစားမဆင်ခြင်ကြပေ။ ၎င်းတို့၏ အတွေးအခေါ်များနှင့် ၎င်းတို့ ရွေးချယ်သည့် လုပ်နည်းကိုင်နည်းများ၊ နည်းလမ်းများနှင့် ပန်းတိုင်များအားလုံး ကောက်ကျစ်ဆိုးယုတ်သည်။ ထိုအရာအားလုံးသည် မှန်ကန်သောလမ်းကြောင်းမှ သွေဖည်ပြီး သမ္မာတရားနှင့် သဟဇာတမဖြစ်ပေ။ သမ္မာတရားကိုပင် ဆန့်ကျင်ပြီး၊ ယေဘုယျအားဖြင့် ယင်းတို့ကို မကောင်းမှုအဖြစ် အကျဉ်းချုပ်ဖော်ပြနိုင်သည်။ ဤမကောင်းမှု၏ သဘောသဘာဝသည် ကောက်ကျစ်ဆိုးယုတ်ခြင်းမျှသာဖြစ်သည်။ ထို့ကြောင့် ယင်းကို စုပေါင်း၍ ကောက်ကျစ်ဆိုးယုတ်ခြင်းဟု ရည်ညွှန်းသည်။ ၎င်းတို့သည် ရိုးသားသောလူတစ်ဦးဖြစ်ခြင်း၊ ဖြူစင်ပြီး ပွင့်လင်းခြင်း သို့မဟုတ် ရိုးသားစစ်မှန်ပြီး သစ္စာစောင့်သိခြင်းတို့ကို မစဉ်းစားဆင်ခြင်ကြပေ။ ယင်းအစား ၎င်းတို့သည် ကောက်ကျစ်ဆိုးယုတ်သော နည်းလမ်းများကို တွေးတောကြသည်။ ဥပမာအနေဖြင့် ဖြူစင်သောပုံစံဖြင့် မိမိတို့ကိုယ်ကို ပွင့်လင်းစွာ ထုတ်ဖော်နိုင်သောလူတစ်ဦးကို ကြည့်လော့။ ယင်းမှာ အပြုသဘောဆောင်သောအရာဖြစ်ပြီး သမ္မာတရားကို လက်တွေ့လုပ်ဆောင်နေခြင်း ဖြစ်သည်။ အန္တိခရစ်များက ဤအရာကို လုပ်ဆောင်ကြသလော။ (မလုပ်ဆောင်ကြပါ။) အဘယ်အရာကို လုပ်ဆောင်ကြသနည်း။ ၎င်းတို့သည် စဉ်ဆက်မပြတ် ဟန်ဆောင်နေကြပြီး မကောင်းသည့်အရာတစ်ခုကို လုပ်ဆောင်ကာ အမှတ်တမဲ့ဖြင့် မိမိကိုယ်ကို အစဖော်မိသည်နှင့်တစ်ပြိုင်နက် ယင်းကို ဒေါသတကြီး ဖုံးကွယ်သည်၊ မိမိတို့ကိုယ်ကို မှန်ကြောင်းပြပြောဆိုကာ ကာကွယ်ပြီး အချက်အလက်များကို ဖုံးကွယ်လေသည်။ ထို့နောက်တွင် ၎င်းတို့သည် နောက်ဆုံး၌ မိမိတို့၏ အကြောင်းပြချက်များကို ပေးကြလေသည်။ ဤလက်တွေ့လုပ်ဆောင်မှုများထဲမှ တစ်ခုတလေသည် သမ္မာတရားကို လက်တွေ့လုပ်ဆောင်ခြင်းနှင့် ကိုက်ညီသလော။ (မကိုက်ညီပါ။) ထိုအရာများထဲမှ တစ်ခုတလေသည် သမ္မာတရားစည်းမျဉ်းများနှင့် ကိုက်ညီသလော။ သာ၍ပင် မကိုက်ညီပေ။

ယခုတင် အန္တိခရစ်များ၏ စိတ်သဘောထားအနှစ်သာရနှင့်ဆိုင်သည့် ပထမဆုံး သွင်ပြင်လက္ခဏာဖြစ်သည့် ကောက်ကျစ်ဆိုးယုတ်ခြင်းကို ငါတို့ မိတ်သဟာယဖွဲ့ပြီး စိတ်ဖြာလေ့လာဆွေးနွေးခဲ့ကြသည်။ ငါတို့သည် အန္တိခရစ်များ၏ ကောက်ကျစ်ဆိုးယုတ်သော စိတ်သဘောထားကို စိတ်ဖြာလေ့လာဆွေးနွေးရန် ၎င်းတို့၏ အတွေးများ၊ သဘောထားအမြင်များနှင့် အမျိုးမျိုးသော ကိစ္စရပ်များကို ၎င်းတို့ တုံ့ပြန်သည့် နည်းလမ်းများနှင့် နည်းစနစ်များအား အသုံးပြုလျက် အန္တိခရစ်များ တစ်နေ့လုံး တွေးတောသည့်အရာကို စိတ်ဖြာလေ့လာဆွေးနွေးခြင်းဖြင့် အစပြုခဲ့ကြသည်။ ငါတို့သည် ၎င်းတို့၏ အတွေးများထဲ၌ တည်ရှိသည့်အရာကို အခြေခံ၍ အန္တိခရစ်များ ပြုလုပ်သည့် အမျိုးမျိုးသောအရာများ၏ သဘောသဘာဝကိုလည်း စိတ်ဖြာလေ့လာဆွေးနွေးခဲ့သည်။ ဤသာဓကများမှတစ်ဆင့် ထုတ်ဖော်သည့် ၎င်းတို့၏ စိတ်သဘောထားအနှစ်သာရကို စိတ်ဖြာလေ့လာဆွေးနွေးရန် ဥပမာအချို့ကိုလည်း ငါတို့ ပေးခဲ့ကြသည်။ ဤဥပမာများနှင့်စပ်လျဉ်း၍၊ သင်တို့အနေဖြင့်ဤအပြုအမူများကို ပြသပြီး ဤစိတ်သဘောထားများကို ထုတ်ဖော်သောသူတို့ထဲတွင် အတော်အသင့် ကောင်းမွန်သော လူ့သဘာဝရှိသည့်သူ တစ်ဦးတလေကို သင်တို့ မြင်တွေ့ပြီးကြပြီလော။ ထိုသို့သော ထုတ်ဖော်ချက်များနှင့် သရုပ်သကန်များရှိသော လူတစ်ဦးနှင့် ပတ်သက်လာသည့်အခါ၊ ၎င်းတို့၏ ကိုယ်ကျင့်စရိုက်သည် ရိုးသားခြင်း၊ ကြင်နာခြင်း၊ ရိုးရှင်းခြင်း၊ ရိုးသားစစ်မှန်ခြင်း၊ တည်ကြည်ဖြောင့်မတ်ခြင်း အစရှိသည်တို့ကို ပိုင်ဆိုင်သလော။ (မပိုင်ဆိုင်ပါ။) သိသာရှင်းလင်းစွာပင် ၎င်းတို့၌ ဤအရည်အသွေးများ ကင်းမဲ့ပေသည်။ ဆန့်ကျင်ဘက်အားဖြင့် ၎င်းတို့၏ ကိုယ်ကျင့်စရိုက်သည် မသိမသာ အန္တရာယ်ပေးတတ်သည်၊ ရက်စက်သည်၊ အကျင့်ဖြစ်နေအောင် လိမ်ညာတတ်သည်၊ တစ်ကိုယ်ကောင်းဆန်သည်၊ ယုတ်မာပြီး အရှက်တရား ကင်းမဲ့လေသည်။ ၎င်းတို့ ကိုယ်ကျင့်စရိုက်၏ ဤအင်္ဂါရပ်များသည် အတော်ပင် သိသာထင်ရှားသည်။ တစ်နေ့လုံး ကောက်ကျစ်ဆိုးယုတ်သော အတွေးများရှိပြီး အမျိုးမျိုးသော ကောက်ကျစ်ဆိုးယုတ်သည့်အရာများကို ပြုလုပ်နိုင်သော သူအားလုံးသည် အလွန်ညံ့ဖျင်းသော ကိုယ်ကျင့်စရိုက်ရှိသည်ဟု တိကျစွာ ပြောဆိုနိုင်သည်။ ယင်းမှာ မည်သည့်အတိုင်းအတာအထိ ညံ့ဖျင်းသနည်း။ ယင်း၌ အသိစိတ်၊ တည်ကြည်မှုနှင့် အထူးသဖြင့် ပုံမှန်ဆင်ခြင်တုံတရားတို့ ကင်းမဲ့သည်။ ဤအရာများ ကင်းမဲ့သောလူတို့ကို လူသားများအဖြစ် မှတ်ယူနိုင်သလော။ ဤအရာများကို ကင်းမဲ့သောလူတို့သည် လူသားများမဟုတ်၊ လူသားတစ်ဦး၏ အပြင်ပန်းအခွံကို ဝတ်ဆင်ထားခြင်းမျှသာဖြစ်သည်ဟု ခိုင်မာစွာ ပြောနိုင်သည်။ အချို့က “ယင်းမှာ သိုးရေခြုံထားသော ဝံပုလွေတစ်ကောင်နှင့် တူသည် မဟုတ်လော” ဟု မေးကောင်းမေးနိုင်သည်။ ယင်းမှာ ဥပစာတစ်ခုမျှသာ ဖြစ်သည်။ သိုးရေခြုံထားသော ဝံပုလွေများမှာ အဘယ်အရာများ ဖြစ်သနည်း။ ၎င်းတို့သည် အနှစ်သာရအားဖြင့် ဝံပုလွေများ ဖြစ်ကြသည်။ ဝံပုလွေများနှင့် နတ်ဆိုးများ သို့မဟုတ် အန္တိခရစ်များအကြား အနှစ်သာရပိုင်းဆိုင်ရာ ကွဲပြားမှုတစ်ခု ရှိသလော။ ဝံပုလွေများသည် ကျွဲနွားများနှင့် သိုးများကို လောဘကြောင့်မဟုတ်ဘဲ ဘုရားသခင်သတ်မှတ်ထားသည့် ၎င်းတို့၏ သဘာဝနှင့်ဆိုင်သည့် အစိတ်အပိုင်းတစ်ခုအဖြစ် အမဲလိုက်ပြီး စားသုံးကြသည်။ သို့ရာတွင် အန္တိခရစ်များ မပိုင်ဆိုင်သည့် ဝံပုလွေများ ပိုင်ဆိုင်သော အရာတစ်ခု ရှိသည်။ အကယ်၍ တစ်စုံတစ်ဦးသည် ဝံပုလွေတစ်ကောင်ကို မွေးစားပြီး မွေးမြူပါက သို့မဟုတ် ၎င်း၏ အသက်ကို ကယ်တင်ခဲ့ပါက ဝံပုလွေသည် ထိုသူကို မည်သည့်အခါမျှ အန္တရာယ်ပြုမည်မဟုတ်ဘဲ ကျေးဇူးသိတတ်မှုကို ပြသလိမ့်မည်ဖြစ်သည်။ ဆန့်ကျင်ဘက်အားဖြင့် အန္တိခရစ်များသည် ဘုရားသခင်၏ ကျေးဇူးတော်၊ ဦးဆောင်မှုနှင့် ဘုရား နှုတ်ကပတ်တော်များ၏ ထောက်ပံ့မှုတို့ကို ခံစားကြရသော်လည်း အရာရာ၌ ဘုရားသခင်ကို ကြံစည်ကြပြီး သူနှင့် အစဉ် ဆန့်ကျင်ဘက်ပြုကာ ရန်ဘက်ပြုကြသည်။ ၎င်းတို့သည် ဘုရားသခင် လုပ်ဆောင်သည့် မည်သည့်အရာကိုမျှ ကျိုးနွံနာခံနိုင်ခြင်း မရှိကြပေ။ ယင်းကို ၎င်းတို့က အာမင်ဟု မဆိုနိုင်ပေ။ ၎င်းတို့က ဆန့်ကျင်ရပ်တည်လိုကြသည်။ အန္တိခရစ်များသည် သိုးရေခြုံထားသော ဝံပုလွေများဖြစ်သည်ဟု ဆိုခြင်းသည် သင့်လျော်သလော။ ဤဥပစာသည် တိကျမှန်ကန်သလော။ (မတိကျပါ။) အတိတ်တွင် ဘာသာတရား၌ အန္တိခရစ် သို့မဟုတ် ဆိုးယုတ်သောလူဟု တံဆိပ်ကပ်ခြင်းခံရသော မည်သူမဆိုသည် သိုးရေခြုံထားသော ဝံပုလွေတစ်ကောင်အဖြစ် မှတ်ယူခြင်းခံခဲ့ရသည်။ ဤသည်မှာ လူတို့က သမ္မာတရားကိုလည်းကောင်း၊ အမျိုးမျိုးသော လူပုဂ္ဂိုလ်တို့၏ လူ့သဘာဝအနှစ်သာရနှင့် စိတ်သဘောထားတို့ကိုလည်းကောင်း နားမလည်သောအခါ အသုံးပြုသည့် ဥပစာတစ်ခုမျှသာ ဖြစ်သည်။ သို့ရာတွင် သမ္မာတရားကို ဤအဆင့်၌ မိတ်သဟာယဖွဲ့သောအခါ ဤဥပစာကို အသုံးပြုခြင်းသည် သိပ်မသင့်တော်ဘဲဖြစ်လာသည်။ နတ်ဆိုးများသည် နတ်ဆိုးများသာဖြစ်ပြီး အန္တိခရစ်များသည် နတ်ဆိုးများနှင့် ညီမျှကာ ၎င်းတို့သည် ဘုရားသခင် ဖန်ဆင်းခဲ့သော သက်ရှိအရာအားလုံးနှင့် နှိုင်းယှဉ်ရန် မထိုက်တန်ပေ။ ဘုရားသခင် ဖန်ဆင်းခဲ့သော အရာများဖြစ်သည့် ဝံပုလွေများ သို့မဟုတ် အခြားသော အသားစားသတ္တဝါများထဲမှ တစ်ကောင်တလေသည် ဘုရားသခင်ကို တစ်ကြိမ်တစ်ခါမျှ ဆန့်ကျင်ခြင်း သို့မဟုတ် ပုန်ကန်ခြင်း ပြုခဲ့ဖူးသလော။ ၎င်းတို့သည် ဘုရားသခင်ကို ကန့်ကွက်ပြောဆိုခြင်း သို့မဟုတ် ဆန့်ကျင်ဘက်ပြုခြင်း ပြုမည်လော။ ၎င်းတို့သည် ဘုရားသခင် ပြောဆိုသည့် မည်သည့်အရာကိုမဆို ဝေဖန်ခြင်း၊ ပြစ်တင်ရှုတ်ချခြင်း သို့မဟုတ် တိုက်ခိုက်ခြင်း ပြုမည်လော။ ထိုသို့သောအရာများကို ၎င်းတို့ မပြုလုပ်ကြပေ၊ ၎င်းတို့အား ဘုရားသခင် သတ်မှတ်ထားသည့် ဗီဇများနှင့် ရှင်သန်ရာပတ်ဝန်းကျင်တို့နှင့်အညီသာ ၎င်းတို့ ရှင်သန်ကြသည်။ ဘုရားသခင်က ၎င်းတို့ကို မည်သည့်အရာအဖြစ် ဖန်ဆင်းခဲ့သည်ဖြစ်စေ ယင်းမှာ ၎င်းတို့ ဖြစ်သည့်အရာပင်ဖြစ်သည်၊ မည်သည့်ဟန်ဆောင်မှုမျှ မရှိပေ။ သို့သော် အန္တိခရစ်များမှာ ကွဲပြားသည်၊ ၎င်းတို့၌ စာတန်၏သဘာဝ ရှိပြီး ၎င်းတို့သည် အပြုသဘောဆောင်သောအရာများနှင့် သမ္မာတရားကို ဆန့်ကျင်ပြုမူရာ၌ အထူးပြုကြသည်။ ၎င်းတို့သည် အဆင်းနီသော နဂါးကြီးကဲ့သို့ပင် ဖြစ်သည်။ ဘုရားသခင်ကို ဆန့်ကျင်သော လုပ်ရပ်များကို ကျူးလွန်ရာ၌ အထူးပြုကြပေသည်။