ပူဇော်သက္ကာများကို ထိန်းသိမ်းစောင့်ရှောက်ခြင်းနှင့် စပ်လျဉ်း၍ ခေါင်းဆောင်များနှင့် အမှုဆောင်များ၏ တာဝန်ဝတ္တရားများ

၁။ ပူဇော်သက္ကာများကို သင့်တော်လျောက်ပတ်စွာ ထိန်းသိမ်းစောင့်ရှောက်ခြင်း

ဆက်လက်၍ ပူဇော်သက္ကာများကို ထိန်းသိမ်းစောင့်ရှောက်ခြင်းနှင့် ပတ်သက်လာသည့်အခါ၊ ခေါင်းဆောင်များနှင့် အမှုဆောင်များအနေဖြင့် မည်သည့်တာဝန်ဝတ္တရားများကို အတိအကျ ဖြည့်ဆည်းသင့်သည်ကို ငါတို့ ကြည့်ရှုကြမည်။ ပူဇော်သက္ကာများနှင့်ပတ်သက်၍ ခေါင်းဆောင်များနှင့် အမှုဆောင်များသည် ပထမဦးစွာ ပူဇော်သက္ကာများက မည်သည့်အရာဖြစ်သည်ကို နားလည်ရမည်။ လူတို့က ၎င်းတို့ရရှိသည့်အရာ၏ ဆယ်ဘို့တစ်ဘို့ကို ပူဇော်သောအခါ ယင်းမှာ ပူဇော်သက္ကာဖြစ်သည်။ ၎င်းတို့သည် ဘုရားသခင်ထံ ငွေ သို့မဟုတ် ပစ္စည်းများကို ပူဇော်နေခြင်းဖြစ်ကြောင်း ရှင်းလင်းစွာ ပြောဆိုသောအခါ ယင်းတို့သည် ပူဇော်သက္ကာများဖြစ်သည်။ ၎င်းတို့သည် အသင်းတော်နှင့် ဘုရားအိမ်တော်သို့ ပစ္စည်းတစ်ခုကို ပူဇော်နေခြင်းဖြစ်ကြောင်း ရှင်းလင်းစွာ ပြောဆိုသောအခါ ယင်းမှာ ပူဇော်သက္ကာဖြစ်၏။ ပူဇော်သက္ကာများ၏ အဓိပ္ပာယ်ဖွင့်ဆိုချက်နှင့် အယူအဆကို နားလည်ပြီးသည်နှင့်တစ်ပြိုင်နက် ခေါင်းဆောင်များနှင့် အမှုဆောင်များသည် လူတို့ပြုလုပ်သော ပူဇော်သက္ကာများကို ခိုင်မာသော သဘောပေါက်နားလည်မှုရှိပြီး စီမံခန့်ခွဲရမည်ဖြစ်ကာ ဤအရာနှင့်စပ်လျဉ်း၍ သင့်လျော်သော စိစစ်မှုကို လုပ်ဆောင်ရမည်။ ပထမဦးစွာ ၎င်းတို့သည် ပူဇော်သက္ကာများကို စနစ်တကျ မှတ်တမ်းတင်ရန်နှင့် ထိန်းသိမ်းစောင့်ရှောက်ရန်အတွက် ထိန်းသိမ်းစောင့်ရှောက်သူများအဖြစ် ဆောင်ရွက်ရန် လူ့သဘာဝ စံနှုန်းပြည့်မီသည့် အားကိုး၍ရသောလူများကို ရှာဖွေရမည်။ ဤသည်မှာ ခေါင်းဆောင်များနှင့် အမှုဆောင်များ လုပ်ဆောင်ရမည့်အလုပ်တွင် ပထမဆုံးသော အလုပ်တာဝန်ဖြစ်၏။ ဤပူဇော်သက္ကာများကို ထိန်းသိမ်းစောင့်ရှောက်သည့် ဤလူများသည် သာမန်အစွမ်းအစရှိပြီး ခေါင်းဆောင်များ သို့မဟုတ် အမှုဆောင်များ ဖြစ်နိုင်စွမ်းမရှိသော်လည်း ၎င်းတို့သည် စိတ်ချရလိမ့်မည်ဖြစ်ပြီး မည်သည့်အရာကိုမျှ အလွဲသုံးစားလုပ်မည်မဟုတ်ပေ။ ၎င်းတို့၏ လက်ဝယ်တွင်ရှိနေစဉ် ပူဇော်သက္ကာများသည် ပျောက်ဆုံးသွားမည် မဟုတ်သည့်အပြင် ရောထွေးသွားမည်လည်းမဟုတ်ဘဲ ကောင်းမွန်စွာ ထိန်းသိမ်းစောင့်ရှောက်ခြင်းခံရလိမ့်မည်။ ဤအတွက် အလုပ်အစီအစဉ်များတွင် စည်းမျဉ်းများ ရှိသည်။ လူ့သဘာဝ စံနှုန်းပြည့်မီသည့် အားကိုးထိုက်သောသူတစ်ဦးမှလွဲ၍ မည်သည့်အရာမျှ အလုပ်ဖြစ်မည်မဟုတ်။ လူ့သဘာဝညံ့ဖျင်းသောသူများသည် ကောင်းသောအရာတစ်ခုကို မြင်သောအခါ တပ်မက်ကြပြီး မိမိတို့ကိုယ်တိုင်အတွက် ရယူရန် အခွင့်အရေးများကို အမြဲ ရှာဖွေနေကြသည်။ မည်သည့်အရာဖြစ်ပျက်သည်ဖြစ်စေ ၎င်းတို့သည် အခွင့်ကောင်းယူရန် အမြဲကြိုးပမ်းနေကြသည်။ ထိုသို့သောလူများကို အသုံးပြု၍မရပေ။ လူ့သဘာဝ စံနှုန်းပြည့်သောသူတစ်ဦးသည် အနည်းဆုံးအားဖြင့် လူတို့ ယုံကြည်စိတ်ချရသော ရိုးသားသောသူတစ်ဦး ဖြစ်ရမည်။ ပူဇော်သက္ကာများကို ထိန်းသိမ်းစောင့်ရှောက်ရန် သို့မဟုတ် အသင်းတော်၏ အဖိုးတန်ပစ္စည်းများကို စီမံခန့်ခွဲရန် တာဝန်ပေးအပ်ခံရပါက ၎င်းတို့သည် ထိုအရာကို ကောင်းမွန်စွာ၊ စေ့စေ့စပ်စပ်၊ လုံ့လဝီရိယရှိစွာနှင့် အလွန်ဂရုတစိုက် လုပ်ဆောင်လိမ့်မည်။ ၎င်းတို့တွင် ဘုရားသခင်ကို ကြောက်ရွံ့သော စိတ်နှလုံးရှိပြီး ဤအရာများကို တလွဲအသုံးပြုမည်မဟုတ်၊ ထုတ်ချေးခြင်း စသည်တို့ ပြုမည်မဟုတ်ပေ။ အတိုချုပ်အားဖြင့် သင်သည် ပူဇော်သက္ကာများကို ၎င်းတို့၏ လက်ထဲသို့ ထားရှိသည့်အခါ တစ်ပြားတစ်ချပ်မျှ ပျောက်ဆုံးမည်မဟုတ်သည့်အပြင် ပစ္စည်းတစ်ခုတလေမျှလည်း ဆုံးရှုံးမည်မဟုတ်ကြောင်း စိတ်ချနိုင်၏။ ဤကဲ့သို့သောလူတစ်ဦးကို ရှာဖွေရမည်။ ထို့အပြင် ဘုရားအိမ်တော်တွင် ထိုသို့သောလူတစ်ဦးတည်းကိုသာ ရှာဖွေရန်မဟုတ်၊ နှစ်ဦး သို့မဟုတ် သုံးဦး ရှာဖွေခြင်းက အကောင်းဆုံးဖြစ်သည်ဟူသော စည်းမျဉ်းတစ်ခု ရှိသည်။ ၎င်းတို့ထဲမှ အချို့က မှတ်တမ်းများ ထိန်းသိမ်းပြီး အချို့က ထိန်းသိမ်းစောင့်ရှောက်ခြင်းကို လုပ်ဆောင်ရမည်။ ဤလူများကို ရှာဖွေပြီးသည်နှင့်တစ်ပြိုင်နက် ပူဇော်သက္ကာများကို အမျိုးအစားခွဲခြားရမည်ဖြစ်ပြီး မည်သူက မည်သည့်အမျိုးအစားကို ထိန်းသိမ်းစောင့်ရှောက်နေသည်၊ မည်မျှ ထိန်းသိမ်းစောင့်ရှောက်နေသည်ဟူသည်တို့ကို စနစ်တကျ မှတ်တမ်းများ ပြုလုပ်ရမည်။ သင့်တော်သောလူများကို ရှာဖွေပြီး ပစ္စည်းများကို ထိန်းသိမ်းစောင့်ရှောက်ကာ အမျိုးအစားများအလိုက် စာရင်းသွင်းပြီးသည်နှင့်တစ်ပြိုင်နက် ဤမျှနှင့် ပြီးပြီလော။ (မဟုတ်ပါ။) သို့ဆိုလျှင် ဆက်လက်၍ မည်သည့်အရာကို လုပ်ဆောင်သင့်သနည်း။ အဝင်အထွက်စာရင်းများက မှန်ကန်ခြင်း ရှိမရှိဟူသည်ကို သုံးလမှ ငါးလ တစ်ကြိမ်စစ်ဆေးရမည်၊ ဆိုလိုသည်မှာ မှတ်တမ်းထိန်းသိမ်းသူသည် ၎င်း၏ မှတ်တမ်းတင်ခြင်းများတွင် တိကျမှုရှိမရှိ၊ စာရင်းသွင်းသည့်အခါ တစ်စုံတစ်ရာ ချန်လှပ်ခဲ့ခြင်း ရှိမရှိ၊ စုစုပေါင်းပမာဏက အဝင်အထွက်စာရင်းများနှင့် ကိုက်ညီမှုရှိမရှိ အစရှိသည်တို့ကို စစ်ဆေးရမည်။ ထိုသို့သော စာရင်းကိုင်အလုပ်ကို စေ့စေ့စပ်စပ် လုပ်ဆောင်ရမည်။ ထိုသို့သောအလုပ်တွင် သိပ်မကျွမ်းကျင်သော ခေါင်းဆောင်များနှင့် အမှုဆောင်များသည် ယင်းကို လုပ်ဆောင်ရန် အတော်အတန် ကျွမ်းကျင်သောသူတစ်ဦးကို စီစဉ်ပေးသင့်ပြီး ထို့နောက် ပုံမှန် စစ်ဆေးခြင်းများ ပြုလုပ်ကာ ၎င်း၏ အစီရင်ခံချက်များကို နားထောင်သင့်သည်။ အချုပ်အားဖြင့်ဆိုသော် ၎င်းတို့ကိုယ်တိုင်က စာရင်းကိုင်အလုပ်နှင့် အလုံးစုံစီစဉ်ခြင်းအလုပ်ကို နားလည်သည်ဖြစ်စေ၊ နားမလည်သည်ဖြစ်စေ ပူဇော်သက္ကာများကို ထိန်းသိမ်းစောင့်ရှောက်ခြင်းအလုပ်အား ဂရုမစိုက်ဘဲ ထား၍မရနိုင်သည့်အပြင်၊ ယင်းကို လျစ်လျူရှုပြီး လုံးဝ မမေးမြန်းဘဲလည်း နေ၍မရပေ။ ထိုအစား ၎င်းတို့သည် စစ်ဆေးပြီးသော စာရင်းများ မည်သို့ရှိသည်၊ ကိုက်ညီမှုရှိမရှိဟူသည်တို့ကို မေးမြန်းလျက် ပုံမှန် စစ်ဆေးမှုများ ပြုလုပ်ရမည်ဖြစ်ပြီး ထို့နောက် လတ်တလော သုံးစွဲမှုအခြေအနေ မည်သို့ရှိသည်၊ ဖြုန်းတီးမှု တစ်စုံတစ်ရာ ရှိမရှိ၊ စာရင်းကိုင်အလုပ်၏ အခြေအနေက မည်သို့ရှိသည်၊ ဝင်ငွေနှင့် ထွက်ငွေများ ကိုက်ညီမှုရှိမရှိဟူသည်တို့ကို သိရှိရန် အသုံးစရိတ်မှတ်တမ်းအချို့ကို ကျပန်းစစ်ဆေးရမည်။ ခေါင်းဆောင်များနှင့် အမှုဆောင်များသည် ဤအခြေအနေအားလုံးကို ခိုင်ခိုင်မာမာ သိရှိနားလည်ထားရမည်။ ဤသည်မှာ ပူဇော်သက္ကာများကို ထိန်းသိမ်းစောင့်ရှောက်ရာတွင် ပါဝင်သော အလုပ်တာဝန်တစ်ခု ဖြစ်၏။ ဤအလုပ်တာဝန်သည် လွယ်ကူသည်ဟု သင်တို့ ဆိုမည်လော။ ယင်း၌ အခက်အခဲ အတိုင်းအတာတစ်ခု ရှိသလော။ အချို့သော ခေါင်းဆောင်များနှင့် အမှုဆောင်များက “ကျွန်ုပ်သည် ကိန်းဂဏန်းများကို မကြိုက်ပါ။ ယင်းတို့ကို မြင်လျှင် ခေါင်းကိုက်ပါသည်”ဟု ဆိုကြသည်။ သို့ဆိုလျှင် စစ်ဆေးခြင်းများနှင့် ကြီးကြပ်မှုများတွင် သင့်ကို ကူညီရန် သင့်တော်သောသူတစ်ဦးကို ရှာဖွေလော့။ ဤအရာများကို စိစစ်ရာတွင် သင့်ကို ကူညီစေလော့။ သင်သည် ဤအလုပ်ကို မကြိုက်နှစ်သက်ခြင်း သို့မဟုတ် မကျွမ်းကျင်ခြင်းတို့ ဖြစ်ကောင်းဖြစ်နိုင်သော်လည်း အကယ်၍ သင်သည် လူတို့အား မည်သို့ အသုံးပြုရမည်ကို သိပြီး ထိုသို့ မှန်ကန်စွာ အသုံးပြုပါက ဤအလုပ်ကို ကောင်းမွန်စွာ လုပ်ဆောင်နိုင်ဆဲ ဖြစ်လိမ့်မည်။ ယင်းကို လုပ်ဆောင်ရန် သင့်တော်သောလူများကို အသုံးပြုလော့၊ သင်သည် ၎င်းတို့၏ အစီရင်ခံချက်များကိုသာ နားထောင်၍ရသည်။ ယင်းမှာလည်း အလုပ်ဖြစ်၏။ ဤစည်းမျဉ်းကို စွဲကိုင်ထားလော့။ ထိန်းသိမ်းစောင့်ရှောက်ထားသော အဖိုးတန် ပစ္စည်းအားလုံးအား ထိုအလုပ်ကို တာဝန်ယူသောသူနှင့်အတူ ပုံမှန် စစ်ဆေးပြီး စာရင်းပြုစုလော့၊ ထို့နောက် အရေးကြီးသော အသုံးစရိတ်များနှင့်ပတ်သက်၍ မေးခွန်းအနည်းငယ် မေးမြန်းလော့၊ ဤအရာကို စွမ်းဆောင်ရရှိနိုင်သလော။ (စွမ်းဆောင်ရရှိနိုင်ပါသည်။) ခေါင်းဆောင်များနှင့် အမှုဆောင်များသည် ဤအလုပ်ကို အဘယ်ကြောင့် လုပ်ဆောင်ရမည်နည်း။ အကြောင်းမှာ ယင်းသည် ပူဇော်သက္ကာများကို ထိန်းသိမ်းစောင့်ရှောက်နေခြင်း ဖြစ်သောကြောင့်ဖြစ်သည်၊ ယင်းမှာ သင်၏ တာဝန်ဝတ္တရား ဖြစ်သည်။

ဘုရားသခင်ထံ လူတို့ဆက်ကပ်သော ပူဇော်သက္ကာများသည် ဘုရားသခင် မွေ့လျော်ခံစားရန်အတွက် ဖြစ်သည်၊ သို့သော် သူက ထိုအရာများကို အသုံးပြုသလော။ ဘုရားသခင်သည် ဤငွေနှင့် ဤပစ္စည်းများကို အသုံးပြုရန် လိုအပ်သလော။ ဘုရားသခင်ထံပြုသော ဤပူဇော်သက္ကာများသည် ဧဝံဂေလိအလုပ်ကို ဖြန့်ဝေရန်အတွက် အသုံးပြုဖို့ ရည်ရွယ်ထားသည် မဟုတ်လော။ ယင်းတို့သည် ဘုရားအိမ်တော်အလုပ်၏ အသုံးစရိတ်အားလုံးအတွက် ရည်ရွယ်ခြင်း မဟုတ်လော။ ယင်းတို့သည် ဘုရားအိမ်တော်၏ အလုပ်နှင့် ဆက်စပ်သောကြောင့် ပူဇော်သက္ကာများ၏ စီမံခန့်ခွဲမှုနှင့် အသုံးစရိတ် နှစ်မျိုးလုံးတွင် ခေါင်းဆောင်များနှင့် အမှုဆောင်များ၏ တာဝန်ဝတ္တရားများ ပါဝင်၏။ ဤငွေကို မည်သူက ပူဇော်သည်ဖြစ်စေ သို့မဟုတ် ဤပစ္စည်းများက မည်သည့်နေရာမှ လာသည်ဖြစ်စေ၊ ယင်းတို့က ဘုရားအိမ်တော်နှင့် သက်ဆိုင်နေသမျှကာလပတ်လုံး သင်သည် ယင်းတို့ကို ကောင်းမွန်စွာ စီမံခန့်ခွဲသင့်ပြီး ဤအလုပ်ကို နောက်ဆက်တွဲလုပ်ဆောင်ကာ စစ်ဆေးပြီး ဂရုစိုက်သင့်သည်။ အကယ်၍ ဘုရားသခင်ထံ ပြုလုပ်သော ပူဇော်သက္ကာများကို ဘုရားသခင်၏ ဧဝံဂေလိအလုပ်အား ဖြန့်ဝေရန်အတွက် သင့်တော်စွာ အသုံးမပြုနိုင်ဘဲ၊ ထိုအစား လက်လွတ်စပယ် ဖြုန်းတီးပစ်ခြင်း သို့မဟုတ် ဆိုးယုတ်သောလူများ၏ သိမ်းပိုက်ခြင်း သို့မဟုတ် လက်ဝယ်ရယူပိုင်ဆိုင်ခြင်းကိုပင် ခံရပါက ယင်းမှာ သင့်တော်သလော။ ယင်းမှာ ခေါင်းဆောင်များနှင့် အမှုဆောင်များဘက်မှ တာဝန်ဝတ္တရား ပျက်ကွက်ခြင်း မဟုတ်လော။ (ဟုတ်ပါသည်။) ယင်းမှာ ၎င်းတို့ဘက်မှ တာဝန်ဝတ္တရား ပျက်ကွက်ခြင်း ဖြစ်သည်။ သို့ဖြစ်၍ ခေါင်းဆောင်များနှင့် အမှုဆောင်များသည် ဤအလုပ်ကို လုပ်ဆောင်ရမည်။ ယင်းသည် ၎င်းတို့ တာဝန်ရှိသောအရာဖြစ်သည်။ ပူဇော်သက္ကာများကို ကောင်းမွန်စွာ စီမံခန့်ခွဲခြင်း၊ ၎င်းတို့ကို ဧဝံဂေလိအလုပ်အား ဖြန့်ဝေရာတွင်လည်းကောင်း၊ ဘုရားသခင်၏ စီမံခန့်ခွဲမှုနှင့် ဆက်စပ်သော မည်သည့်အလုပ်တွင်မဆိုလည်းကောင်း မှန်ကန်စွာ အသုံးပြုနိုင်စေခြင်းသည် ခေါင်းဆောင်များနှင့် အမှုဆောင်များ၏ တာဝန်ဝတ္တရားဖြစ်ပြီး ယင်းကို လျစ်လျူမရှုသင့်ပေ။ ညီအစ်ကိုမောင်နှမများသည် ဘုရားသခင်ထံ ပူဇော်ရန် ငွေအနည်းငယ်ကို ဒုက္ခခံ၍ စုဆောင်းကြရသည်။ ခေါင်းဆောင်များနှင့် အမှုဆောင်များက ၎င်းတို့၏ တာဝန်များတွင် ပေါ့ဆ၍ တာဝန်မကျေပွန်ခြင်းကြောင့် ဤငွေသည် ဆိုးယုတ်သောလူများ၏ လက်ထဲသို့ ကျရောက်သွားသည် ဆိုပါစို့။ ယင်းအားလုံးကို ဆိုးယုတ်သောလူများက မဆင်မခြင် ဖြုန်းတီးပစ်ကာ အလဟဿဖြစ်စေသည် သို့မဟုတ် ၎င်းတို့၏ သိမ်းပိုက်ခြင်းကိုပင် ခံရသည် ဆိုပါစို့။ အကျိုးဆက်အနေဖြင့် ခေါင်းဆောင်များနှင့် အမှုဆောင်များသည် ခရီးစရိတ်များ သို့မဟုတ် စားဝတ်နေရေးစရိတ်များအတွက် ငွေအလုံအလောက် မရှိတော့သည့်အပြင် ဘုရားသခင်၏ နှုတ်ကပတ်တော်စာအုပ်များကို ပုံနှိပ်ရန် သို့မဟုတ် လိုအပ်သော စက်ပစ္စည်းများနှင့် ကိရိယာများကို ဝယ်ယူရန် အချိန်ကျရောက်လာသည့်အခါတွင်ပင် ငွေအလုံအလောက် မရှိတော့ပေ။ ဤသည်မှာ အလုပ်ကို နှောင့်နှေးစေခြင်း မဟုတ်လော။ ညီအစ်ကိုမောင်နှမများက ပူဇော်သောငွေသည် သင့်တော်သော အသုံးပြုခြင်းကို ခံရခြင်းထက် ဆိုးယုတ်သောလူများ၏ လက်ဝယ်သို့ ရောက်ရှိသွားပြီး ဘုရားအိမ်တော်အလုပ်အတွက် ငွေသုံးရန် လိုအပ်သော်လည်း အလုံအလောက်မရှိသည့်အခါ အလုပ်သည် အဟန့်အတားဖြစ်ရလေပြီ မဟုတ်လော။ ခေါင်းဆောင်များနှင့် အမှုဆောင်များသည် ၎င်းတို့၏ တာဝန်ဝတ္တရားကို ဖြည့်ဆည်းရန် ပျက်ကွက်လေပြီ မဟုတ်လော။ (ဟုတ်ပါသည်။) ခေါင်းဆောင်များနှင့် အမှုဆောင်များသည် ၎င်းတို့၏ တာဝန်ဝတ္တရားကို ဖြည့်ဆည်းရန် ပျက်ကွက်ခဲ့ပြီး ပူဇော်သက္ကာများကို ကောင်းမွန်စွာ စီမံခန့်ခွဲခြင်း မရှိခဲ့သည့်အတွက် ၎င်းတို့သည် ကောင်းသော ဘဏ္ဍာစိုးများ မဖြစ်ခဲ့ကြသည့်အတွက် သို့မဟုတ် ဤအလုပ်နှင့်ပတ်သက်၍ ၎င်းတို့၏ တာဝန်ဝတ္တရားကို ဖြည့်ဆည်းရာတွင် စိတ်မနှစ်ခဲ့ကြသည့်အတွက် ပူဇော်သက္ကာများက ဆုံးရှုံးမှုများ ဖြစ်ပေါ်ခဲ့ပြီး အချို့သော အသင်းတော်အလုပ်သည် အချိန်တစ်ခုအထိ တုံ့ဆိုင်းသွားသည် သို့မဟုတ် ရပ်တန့်သွားခဲ့ရသည်။ ဤအတွက် ခေါင်းဆောင်များနှင့် အမှုဆောင်များသည် ကြီးမားသော တာဝန်တစ်ခု ရှိသည် မဟုတ်လော။ ဤသည်မှာ အပြစ်ဒုစရိုက်ဖြစ်သည်။ သင်သည် ဤပူဇော်သက္ကာများကို သိမ်းပိုက်ခြင်း၊ ဖြုန်းတီးခြင်းတို့ ပြုကောင်းမပြုခဲ့နိုင်သည့်အပြင်၊ သင်၏ ကိုယ်ပိုင်အိတ်ကပ်ထဲသို့လည်း ထည့်ကောင်းမထည့်ခဲ့နိုင်သော်လည်း၊ ဤအခြေအနေသည် သင်၏ ပေါ့ဆခြင်းနှင့် တာဝန်ဝတ္တရား ပျက်ကွက်ခြင်းတို့ကြောင့် ဖြစ်ပေါ်လာခဲ့ခြင်း ဖြစ်သည်။ ဤအတွက် သင်သည် တာဝန်ယူသင့်သည် မဟုတ်လော။ (ဟုတ်ပါသည်။) ဤသည်မှာ ယူရမည့် အလွန်ကြီးမားသော တာဝန်တစ်ခု ဖြစ်သည်။

၂။ စာရင်းများ စစ်ဆေးခြင်း

၎င်းတို့၏ အလုပ်တွင် ခေါင်းဆောင်များနှင့် အမှုဆောင်များသည် အမျိုးမျိုးသော အလုပ်အစီအစဉ်များကို ကောင်းမွန်စွာ အကောင်အထည်ဖော်ခြင်းနှင့် ပြဿနာများကို ဖြေရှင်းရန် သမ္မာတရားကို မိတ်သဟာယဖွဲ့နိုင်ခြင်းတို့အပြင် ပူဇော်သက္ကာများကို ကောင်းမွန်စွာ ထိန်းသိမ်းစောင့်ရှောက်ရမည်။ ၎င်းတို့သည် ပူဇော်သက္ကာများကို စနစ်တကျ စီမံခန့်ခွဲမှုပြုလုပ်ရန် ဘုရားအိမ်တော်၏ သတ်မှတ်ချက်များအတိုင်း သင့်တော်သောလူများကို ရှာဖွေရမည်ဖြစ်ပြီး အခါအားလျော်စွာ စာရင်းများကို စစ်ဆေးရမည်။ အချို့က “အခြေအနေများက ခွင့်မပြုသည့်အခါ ကျွန်ုပ် မည်သို့ စစ်ဆေးနိုင်မည်နည်း” ဟု မေးကြသည်။ “အခြေအနေများက ခွင့်မပြုခြင်း” ဟူသည့်အရာမှာ စာရင်းများကို မစစ်ဆေးရန် အကြောင်းပြချက်တစ်ခုလော။ အခြေအနေများက ခွင့်မပြုသည့်အခါတွင်ပင် သင်သည် ၎င်းတို့ကို စစ်ဆေးနိုင်သည်၊ အကယ်၍ သင်ကိုယ်တိုင် မသွားနိုင်ပါက ကြီးကြပ်မှုပြုလုပ်ရန် အားကိုးထိုက်သော၊ သင့်တော်သောသူတစ်ဦးကို သင် စေလွှတ်ရမည်ဖြစ်ပြီး ထိန်းသိမ်းစောင့်ရှောက်သူသည် ပူဇော်သက္ကာများကို သင့်တော်သောနည်းလမ်းဖြင့် ထိန်းသိမ်းစောင့်ရှောက်နေခြင်း ရှိမရှိ၊ စာရင်းများတွင် ကွဲလွဲချက်များ တစ်ခုတလေ ရှိမရှိ၊ ထိန်းသိမ်းစောင့်ရှောက်သူသည် အားကိုးထိုက်ခြင်း ရှိမရှိ၊ လတ်တလောတွင် သူ၏ အခြေအနေများ မည်သို့ရှိပြီး သူသည် အပျက်သဘောဆောင်နေခြင်း ရှိမရှိ၊ အချို့သော အခြေအနေများနှင့် ရင်ဆိုင်ရသည့်အခါ သူ ကြောက်ရွံ့ခြင်း ရှိမရှိဟူသည်နှင့် သစ္စာဖောက်နိုင်ခြေ ရှိမရှိဟူသည်တို့ကို ကြည့်ရှုရမည်။ သူ၏ မိသားစုအတွက် ငွေကြေး ကျပ်တည်းနေသည်ဟု သင် ကြားသည် ဆိုပါစို့၊ သူသည် ပူဇော်သက္ကာများကို တလွဲအသုံးပြုနိုင်ခြေ ရှိသလော။ မိတ်သဟာယဖွဲ့ခြင်းနှင့် အခြေအနေကို စစ်ဆေးခြင်းတို့မှတစ်ဆင့် ထိန်းသိမ်းစောင့်ရှောက်သူသည် အတော်အတန် အားကိုးထိုက်ကြောင်း၊ ပူဇော်သက္ကာများကို ထိတွေ့ခြင်းမပြုရသည်ကို သူသိကြောင်း၊ သူ၏ မိသားစုအတွက် ငွေကြေး မည်မျှပင် ကျပ်တည်းနေပါစေ ပူဇော်သက္ကာများကို သူ လက်ဖျားနှင့်ပင် မထိခဲ့ကြောင်း သင် တွေ့မြင်နိုင်ပြီး ရှည်လျားသော အချိန်ကာလတစ်ခုကြာ လေ့လာကြည့်ရှုခြင်းမှတစ်ဆင့် ထိန်းသိမ်းစောင့်ရှောက်သူသည် လုံးဝ အားကိုးထိုက်ကြောင်း သက်သေပြနိုင်ပေမည်။ ထို့အပြင် ပူဇော်သက္ကာများ ထားရှိသည့်အိမ်၏ ပတ်ဝန်းကျင်သည် အန္တရာယ်ရှိမရှိ၊ ထိုနေရာတွင် ညီအစ်ကိုမောင်နှမ တစ်ဦးတလေသည် အဆင်းနီသော နဂါးကြီး၏ ဖမ်းဆီးခြင်းကို ခံခဲ့ရခြင်း ရှိမရှိ၊ ပူဇော်သက္ကာများကို ထိန်းသိမ်းစောင့်ရှောက်သူသည် အန္တရာယ်တစ်ခုတလေနှင့် ရင်ဆိုင်ခဲ့ရခြင်း ရှိမရှိ၊ ပူဇော်သက္ကာများကို သင့်တော်သောနေရာတွင် သိုလှောင်ထားခြင်း ရှိမရှိဟူသည်နှင့် ယင်းတို့ကို ပြောင်းရွှေ့သင့်ခြင်း ရှိမရှိဟူသည်တို့ကို စစ်ဆေးရမည်။ ထိန်းသိမ်းစောင့်ရှောက်သူများ၏ နေအိမ်များ ပတ်ဝန်းကျင်နှင့် အခြေအနေများကို မကြာခဏ စစ်ဆေးရမည်၊ သို့မှသာ သင့်တော်သော တုံ့ပြန်မှုများနှင့် အစီအစဉ်များကို အချိန်မရွေး ပြုလုပ်နိုင်မည်ဖြစ်သည်။ ဤသို့ သင်လုပ်ဆောင်သည့်အခါ လတ်တလောတွင် မည်သည့်အဖွဲ့များက စက်ပစ္စည်းအသစ်များ ရရှိခဲ့သည်၊ ထိုစက်ပစ္စည်းများကို မည်သို့ ရရှိခဲ့သည်ဟူသည်တို့ကိုလည်း အခါအားလျော်စွာ သင် စုံစမ်းမေးမြန်းရမည်။ အကယ်၍ ထိုပစ္စည်းများကို ဝယ်ယူခဲ့ပါက မဝယ်ယူမီတွင် တစ်ဦးတလေက လျှောက်လွှာများကို သုံးသပ်ပြီး လက်မှတ်ရေးထိုးခဲ့ခြင်း ရှိမရှိ၊ ယင်းတို့ကို ဈေးကြီးပေး၍ ဝယ်ယူခဲ့ခြင်း သို့မဟုတ် ကျိုးကြောင်းညီညွတ်သော ဈေးကွက်ပေါက်ဈေးဖြင့် ဝယ်ယူခဲ့ခြင်း ရှိမရှိ၊ မလိုအပ်သောငွေကို သုံးစွဲခဲ့ခြင်း ရှိမရှိ အစရှိသည်တို့ကို သင် မေးမြန်းရမည်။ စာရင်းများကို စစ်ဆေးခြင်းနှင့် သုံးသပ်ခြင်းတို့မှတစ်ဆင့် စာရင်းစာအုပ်များတွင် ပြဿနာတစ်စုံတစ်ရာ မတွေ့ရှိရသော်လည်း အချို့သော ဝယ်ယူသူများသည် အသုံးအဖြုန်းကြီးသောပုံစံဖြင့် ပူဇော်သက္ကာများကို မကြာခဏ ဖြုန်းတီးနေကြောင်း တွေ့ရှိရသည် ဆိုပါစို့။ တစ်စုံတစ်ခုသည် မည်မျှပင် ဈေးကြီးပါစေ ၎င်းတို့ ဝယ်မည်ဖြစ်သည်၊ ထို့အပြင် ထုတ်ကုန်တစ်ခုသည် ဈေးလျှော့မည်၊ ဈေးကျမည်ဟူသည်ကို ကောင်းစွာ သိရှိသည့်အခါတွင် ၎င်းတို့က မစောင့်ဘဲ ထိုအစား ချက်ချင်း ဝယ်ယူမည်ဖြစ်ပြီး ကောင်းသောပစ္စည်းများ၊ အရည်အသွေးမြင့်ပစ္စည်းများ၊ နောက်ဆုံးပေါ် မော်ဒယ်များကို ဝယ်ယူကြလိမ့်မည်။ ဤဝယ်ယူသူများသည် စည်းမျဉ်းမရှိသည့်အပြင် အသုံးအဖြုန်းကြီးသော ပုံစံဖြင့် ငွေသုံးစွဲကြပြီး ဘုရားအိမ်တော်အတွက် ပစ္စည်းများဝယ်ယူရန် ပူဇော်သက္ကာများကို သုံးစွဲကြသည်မှာ ၎င်းတို့၏ ရန်သူအတွက် အမှုအရာများကို လုပ်ဆောင်ပေးနေသည့်အလား ဖြစ်၏။ ၎င်းတို့သည် စည်းမျဉ်းများနှင့်အညီ လက်တွေ့ကျသော ပစ္စည်းများကို မည်သည့်အခါမျှ မဝယ်ယူဘဲ မည်သည့်ဆိုင်ကိုမဆို ရှာဖွေပြီး ဈေးနှုန်းကိုလည်းကောင်း၊ အရည်အသွေးကိုလည်းကောင်း ဂရုမစိုက်ဘဲ ပစ္စည်းများကို တန်းဝယ်ကြသည်။ ပစ္စည်းများကို ပြန်ယူလာပြီးသည်နှင့်တစ်ပြိုင်နက် အသုံးပြုပြီး ရက်အနည်းငယ်အတွင်းတွင် ပျက်စီးသွားကာ ဤဝယ်ယူသူများသည် ထိုပစ္စည်းများ ပျက်စီးသည့်အခါ ပြန်မပြင်ကြဘဲ အသစ်များကို ဝယ်ယူကြသည်။ စာရင်းများကို စစ်ဆေးခြင်းနှင့် ဘဏ္ဍာရေးအသုံးစရိတ်များကို သုံးသပ်ခြင်းတို့ ပြုလုပ်သည့်အခါ အချို့လူများသည် ပူဇော်သက္ကာများကို အကြီးအကျယ် ဖြုန်းတီးကာ အလဟဿဖြစ်စေကြောင်း တွေ့ရှိပါက ဤအရာကို မည်သို့ ကိုင်တွယ်ရမည်နည်း။ ထိုလူများကို သတိပေးဆုံးမခြင်း ပြုလုပ်သင့်သလော သို့မဟုတ် ၎င်းတို့ကို လျော်ကြေးပေးစေသင့်သလော။ နှစ်မျိုးလုံး လိုအပ်သည်မှာ အမှန်ပင်ဖြစ်သည်။ အကယ်၍ ၎င်းတို့၏ စိတ်နှလုံးသည် မမှန်ကန်ကြောင်း၊ ၎င်းတို့သည် ဘာသာတရားမရှိသူများ၊ မယုံကြည်သူများသာဖြစ်ကြောင်း၊ ၎င်းတို့သည် နတ်ဆိုးများဖြစ်ကြောင်း တွေ့ရှိပါက ၎င်းတို့အား သတိပေးဆုံးမခြင်း သို့မဟုတ် ပြုပြင်ခြင်းမျှဖြင့် ဤပြဿနာကို ဖြေရှင်း၍မရနိုင်ပေ။ သမ္မာတရားကို မည်သို့ပင် မိတ်သဟာယဖွဲ့ပါစေ ၎င်းတို့ လက်ခံမည်မဟုတ်၊ ၎င်းတို့ကို မည်သို့ပင် ပြုပြင်ပါစေ ၎င်းတို့ အလေးအနက်ထားမည်မဟုတ်။ ၎င်းတို့ကို လျော်ကြေးပေးရန် တောင်းဆိုပါက ၎င်းတို့ ပေးမည်ဖြစ်သော်လည်း အနာဂတ်တွင် အလားတူပုံစံဖြင့် ဆက်လက်ပြုမူနေမည်ဖြစ်ပြီး ၎င်းတို့ ပြောင်းလဲမည်မဟုတ်ပေ။ ၎င်းတို့သည် ဘုရားအိမ်တော်၏ သတ်မှတ်ချက်များနှင့်အညီ သေချာပေါက် ပြုမူဆောင်ရွက်မည် မဟုတ်ပေ။ ထိုအစား ၎င်းတို့သည် တစ်ဇွတ်ထိုး၊ မဆင်မခြင်နှင့် စည်းမျဉ်းမရှိဘဲ ပြုမူကြလိမ့်မည်။ ဤသို့သော လူစားမျိုးကို မည်သို့ ကိုင်တွယ်ရမည်နည်း။ ၎င်းတို့ကို ရှေ့ဆက်၍ အသုံးပြုနိုင်သေးသလော။ အသုံးမပြုသင့်ပေ၊ အသုံးပြုပါက ထိုခေါင်းဆောင်များနှင့် အမှုဆောင်များသည် ဉာဏ်အလွန်တုံးသောသူများ ဖြစ်သည်၊ ၎င်းတို့သည် အလွန်မိုက်မဲလှသည်။ ထိုသို့သော မယုံကြည်သူများကို တွေ့ရှိသည့်အခါ ၎င်းတို့ကို ချက်ချင်း ဖြုတ်ချခြင်း၊ ဖယ်ရှားရှင်းလင်းခြင်းနှင့် အသင်းတော်မှ သန့်စင်ဖယ်ရှားခြင်းတို့ကို ပြုလုပ်သင့်သည်။ ၎င်းတို့သည် အစေခံရန်ပင် အရည်အချင်းမပြည့်မီပေ။ ထိုသို့ပြုရန် ၎င်းတို့ မသင့်တော်ပေ။

ခေါင်းဆောင်များနှင့် အမှုဆောင်များသည် စာရင်းများနှင့် အသုံးစရိတ်များကို စစ်ဆေးသည့်အခါ ဖြုန်းတီးမှုနှင့် အလဟဿဖြစ်စေမှု သို့မဟုတ် ကျိုးကြောင်းမညီညွတ်သော အသုံးစရိတ်အချို့ကို တွေ့ရှိရုံသာမက၊ ဤအလုပ်ကို လုပ်ဆောင်နေသော လူအချို့သည် ကိုယ်ကျင့်စရိုက် နိမ့်ကျကြောင်း၊ ၎င်းတို့သည် ယုတ်ညံ့ပြီး တစ်ကိုယ်ကောင်းဆန်ကြောင်းနှင့် အသင်းတော်အလုပ်ကို ဆုံးရှုံးမှုများ ဖြစ်စေခဲ့ကြောင်းကိုလည်း တွေ့ရှိနိုင်ပေသည်။ သင်သည် ဤအခြေအနေမျိုးကို တွေ့ရှိပါက မည်သို့ ကိုင်တွယ်သင့်သနည်း။ ကိုင်တွယ်ရန် လွယ်ကူ၏။ သင်သည် ယင်းကို ထိုနေရာတွင်ပင် ကိုင်တွယ်ကာ ဖြေရှင်းရမည်။ ထိုလူများကို ဖြုတ်ချပြီးနောက် အလုပ်ကို လုပ်ဆောင်ရန် သင့်တော်သောလူများကို ရွေးချယ်လော့။ သင့်တော်သောလူများဆိုသည်မှာ လူ့သဘာဝ စံနှုန်းပြည့်မီသော၊ အသိစိတ်နှင့် ဆင်ခြင်တုံတရားကို ပိုင်ဆိုင်သော၊ ဘုရားအိမ်တော်၏ စည်းမျဉ်းများအတိုင်း အမှုအရာများကို ကိုင်တွယ်နိုင်စွမ်းရှိသောသူများ ဖြစ်သည်။ ၎င်းတို့သည် ဘုရားသခင်၏ အိမ်တော်အတွက် ဈေးဝယ်ထွက်သည့်အခါ၊ ဝယ်ရန်မဖြစ်မနေလိုအပ်သော၊ အတော်အသင့် လက်တွေ့ကျပြီး ခိုင်ခံ့သည့် သက်သာသော အရာများကို ဝယ်ကြလိမ့်မည်။ ၎င်းတို့သည် ဈေးပေါသော အရာများကိုသာ ဝယ်ရန် မဖြစ်မနေ စိတ်ပိုင်းဖြတ်ထားခြင်း မရှိသော်လည်း ဈေးအကြီးဆုံးအရာများကို ဝယ်ရန် လိုအပ်သည်ဟုလည်း မခံစားရပေ။ အလားတူ ထုတ်ကုန်အုပ်စုတစ်ခုအတွင်းတွင် ၎င်းတို့သည် အတော်အတန် ကောင်းမွန်သော သုံးသပ်ချက်များနှင့် နာမည်ဂုဏ်သတင်းရှိသည့်အပြင် သင့်တော်သော ဈေးနှုန်းများရှိသည့် ပစ္စည်းများကို ရွေးချယ်လိမ့်မည်ဖြစ်ပြီး အကယ်၍ ၎င်းတို့၏ အာမခံကာလက ပိုကြာရှည်ပါက သာ၍ပင် ကောင်းမွန်သည်မှာ အမှန်ပင်ဖြစ်သည်။ ဤသည်မှာ ဘုရားအိမ်တော်အတွက် ဈေးဝယ်ပေးရန် သင် ရှာဖွေရမည့် လူစားမျိုး ဖြစ်သည်။ ၎င်းတို့သည် စိတ်နှလုံးမှန်ကန်ရမည်ဖြစ်ပြီး မိမိတို့၏ လုပ်ဆောင်ချက်များတွင် ဘုရားအိမ်တော်ကို စဉ်းစားပေးရမည်ဖြစ်ကာ အမှုအရာများကို သေချာစဉ်းစားရမည်။ ၎င်းတို့သည် ဘုရားအိမ်တော်၏ သတ်မှတ်ချက်များအတိုင်း အမှုအရာများကိုလည်း ကိုင်တွယ်ရမည်ဖြစ်ပြီး မရေမရာလုပ်ခြင်း မရှိဘဲ၊ ရှင်းလင်းတိကျမှုဖြင့် ကောင်းမွန်စွာ ပြုမူကျင့်ကြံရမည်။ ထိုသို့သောလူတစ်ဦးကို သင် ရှာတွေ့ပြီးသည်နှင့်တစ်ပြိုင်နက် ၎င်းကို ဘုရားအိမ်တော်အတွက် အမှုအရာအနည်းငယ်အား ကိုင်တွယ်စေပြီး လေ့လာကြည့်ရှုလော့။ အကယ်၍ သူသည် အတော်အတန် သင့်တော်ပုံရပါက သူ့ကို အသုံးပြုနိုင်ပေသည်။ သို့သော် ထိုသို့ စီစဉ်ပြီးသည်နှင့် ပြီးဆုံးသွားခြင်းမဟုတ်ပေ၊ ရှေ့ဆက်၍ သင်သည် သူနှင့် တွေ့ဆုံခြင်း၊ မိတ်သဟာယဖွဲ့ခြင်းနှင့် သူ၏အလုပ်ကို စစ်ဆေးခြင်းတို့ကို ပြုလုပ်ရမည်။ အချို့က “ယင်းမှာ သူ့ကို ယုံကြည်ကိုးစား၍ မရသောကြောင့်လော”ဟု မေးကြသည်။ ယင်းမှာ ယုံကြည်ကိုးစားမှု ကင်းမဲ့ခြင်းကြောင့်ချည်းတော့ မဟုတ်ပေ။ တစ်ခါတစ်ရံတွင် သူ့ကို ယုံကြည်လျှင်ပင် စစ်ဆေးမှုများကို ပြုလုပ်ရဦးမည်ဖြစ်သည်။ မည်သည့်အရာကို စစ်ဆေးရမည်နည်း။ စည်းမျဉ်းများကို သူ နားမလည်သည့်အခြေအနေများတွင် သူ၏ လက်တွေ့လုပ်ဆောင်မှု၌ လမ်းလွဲမှုများ ရှိမရှိ သို့မဟုတ် လွဲချော်သော နားလည်သဘောပေါက်မှု ရှိမရှိဟူသည်ကို ကြည့်ရှုလော့။ စိစစ်ခြင်းကို ဆောင်ရွက်ခြင်းဖြင့် ၎င်းတို့ကို ကူညီရန် လိုအပ်သည်။ ဥပမာအားဖြင့် ဈေးတွင် အလွန်လူကြိုက်များသော ပစ္စည်းတစ်ခုရှိသော်လည်း ဘုရားအိမ်တော်က ယင်းကို အသုံးပြုရန် လိုအပ်ခြင်း ရှိမရှိဟူသည်ကို သူ မသိကြောင်း၊ အကယ်၍ ယခု မဝယ်ပါက အနာဂတ်တွင် မရောင်းတော့ဘဲနေမည်ကို သူ စိုးရိမ်ကြောင်း ပြောသည် ဆိုပါစို့။ ဤအရာကို မည်သို့ ကိုင်တွယ်ရမည်ကို သူက သင့်ကို မေးသည်။ အကယ်၍ သင် မသိပါက ထိုအတတ်ပညာဆိုင်ရာအလုပ်တွင် ပါဝင်သောသူတစ်ဦးထံ သူ့ကို သွားမေးစေသင့်သည်။ ထိုအခါ ထိုအတတ်ပညာရှင်က ထိုပစ္စည်းသည် ခေတ္တခဏသာ ခေတ်စားသောပစ္စည်းဖြစ်ပြီး အများအားဖြင့် အသုံးဝင်မည်မဟုတ်သောကြောင့် ယင်းအတွက် ငွေသုံးရန် မလိုအပ်ကြောင်း ပြောသည်။ အတတ်ပညာရှင်၏ အကြံပြုချက်ကို အကိုးအကားပြု၍ ထိုပစ္စည်းကို ဝယ်ရန်မလိုအပ်ကြောင်း၊ ဝယ်လျှင် ဖြုန်းတီးရာရောက်မည်ဖြစ်ပြီး ယခု မဝယ်လျှင်လည်း ဆုံးရှုံးမှုမရှိကြောင်း ဆုံးဖြတ်လိုက်သည်။ ခေါင်းဆောင်များနှင့် အမှုဆောင်များသည် မိမိတို့၏ အလုပ်ကို ဤအတိုင်းအတာအထိ လုပ်ဆောင်ရမည်။ တစ်စုံတစ်ခုသည် မည်မျှပင် အရေးကြီးသည်ဖြစ်စေ သို့မဟုတ် မပြောပလောက်သည်ဖြစ်စေ၊ ထိုအရာကို ၎င်းတို့ မြင်နိုင်ပါက၊ စဉ်းစားနိုင်ပါက သို့မဟုတ် သိရှိနိုင်ပါက တညီတညွတ်တည်း နောက်ဆက်တွဲလုပ်ဆောင်ပြီး စစ်ဆေးရမည်ဖြစ်ကာ ဤအရာကို ဘုရားအိမ်တော်၏ လိုအပ်ချက်များအတိုင်း သတ်မှတ်ထားသောပုံစံဖြင့် လုပ်ဆောင်ရမည်။ ဤသည်မှာ မိမိ၏ တာဝန်ဝတ္တရားကို ဖြည့်ဆည်းခြင်းဟု ခေါ်သည့်အရာ ဖြစ်သည်။

အချို့လူများသည် အချို့သောပစ္စည်းများကို ဝယ်ယူရန် မကြာခဏ လျှောက်ထားပြီး ဤထုတ်ကုန်များကို ဝယ်ယူရန် ဘုရားအိမ်တော်ကို တောင်းဆိုကြပြီး ဂရုတစိုက် သုံးသပ်မှုနှင့် စစ်ဆေးမှုများမှတစ်ဆင့် တောင်းဆိုထားသော ပစ္စည်းငါးမျိုးတွင် တစ်မျိုးသာ ဝယ်ရန်လိုအပ်ပြီး အခြားလေးမျိုးကို ဝယ်ရန်မလိုအပ်ကြောင်း အများအားဖြင့် တွေ့ရှိရသည်။ ထိုသို့သောအခြေအနေများတွင် မည်သို့လုပ်ဆောင်ရမည်နည်း။ ၎င်းတို့ လျှောက်ထားသည့် ပစ္စည်းများကို တင်းကျပ်သောပုံစံဖြင့် သုံးသပ်ပြီး စဉ်းစားရမည်။ ၎င်းတို့ကို အလျင်စလို ဝယ်ယူခြင်းမပြုရပေ။ ထိုလူများက အလုပ်အတွက် လိုအပ်သည်ဟု ပြောဆိုရုံမျှကြောင့် ၎င်းတို့ကို ဝယ်ယူခြင်းမပြုရပေ။ ၎င်းတို့၏ အလုပ်အတွက်ဟူသော အကြောင်းပြချက်ဖြင့် ထိုလူများကို မိမိတို့သဘောအတိုင်း မဆင်မခြင် လျှောက်ထားခွင့် မပြုရပေ။ ဤလူများက မည်သို့ပင် အကြောင်းပြချက်ပေးပါစေ၊ ၎င်းတို့၏ အရေးတကြီးဖြစ်မှုက မည်သို့ပင်ဖြစ်စေ ခေါင်းဆောင်များနှင့် အမှုဆောင်များ သို့မဟုတ် ပူဇော်သက္ကာများကို စီမံခန့်ခွဲရန် တာဝန်ရှိသူများသည် စိတ်နှလုံး တည်ငြိမ်ရမည်မှာ မလွဲဧကန်ပင် ဖြစ်သည်။ ၎င်းတို့သည် ဤအရာများကို စေ့စေ့စပ်စပ် စစ်ဆေးကြည့်ရှုရမည်၊ အမှားအယွင်း အနည်းငယ်မျှ ရှိ၍မဖြစ်ပေ။ မလွဲမသွေ ဝယ်ယူရမည့် ပစ္စည်းများကို ခေါင်းဆောင်များက စူးစမ်းလေ့လာပြီး သဘောတူညီချက် ပေးရမည်ဖြစ်ပြီး ဝယ်ယူခြင်းသည် မဖြစ်မနေ မဟုတ်ပါက ခွင့်မပြုဘဲ ငြင်းပယ်ရမည်။ အကယ်၍ ခေါင်းဆောင်များနှင့် အမှုဆောင်များသည် ဤအလုပ်ကို စေ့စေ့စပ်စပ်၊ ခိုင်လုံစွာနှင့် ခြေခြေမြစ်မြစ်လုပ်ဆောင်ပါက ပူဇော်သက္ကာများ ဖြုန်းတီးခံရသည့် ဖြစ်ရပ်များကို လျော့နည်းစေမည်ဖြစ်ပြီး ကျိုးကြောင်းမညီညွတ်သော အသုံးစရိတ်များကိုလည်း သာ၍ပင် လျော့နည်းစေမည်မှာ အမှန်ပင်ဖြစ်သည်။ ဤအလုပ်ကို လုပ်ဆောင်ခြင်းသည် စာရင်းစာအုပ်များပေါ်ရှိ မှတ်တမ်းတင်ထားသော အဝင်အထွက်များသည် မည်သည့်အရာဖြစ်သည်၊ ကိန်းဂဏန်းများက မည်သည့်အရာဖြစ်သည်ဟူသည်ကို သေချာစွာ ကြည့်ရှုရုံမျှသာ မဟုတ်ပေ။ ယင်းမှာ အဓိကမဟုတ်သောအရာ ဖြစ်သည်။ အရေးကြီးဆုံးအချက်မှာ သင်၏ စိတ်နှလုံးသည် မှန်ကန်ရမည်ဖြစ်ပြီး အသုံးစရိတ်တိုင်းနှင့် စာရင်းသွင်းမှုတိုင်းကို သင်၏ကိုယ်ပိုင်ဘဏ်စာရင်းထဲမှ စာရင်းတစ်ခုကဲ့သို့ သဘောထားရမည် ဖြစ်သည်။ ထိုအခါ သင်သည် ယင်းတို့ကို အသေးစိတ် ကြည့်ရှုမည်ဖြစ်ပြီး မှတ်မိနိုင်မည်ဖြစ်ကာ နားလည်နိုင်လိမ့်မည်ဖြစ်သည်။ အကယ်၍ ချွတ်ချော်မှု သို့မဟုတ် ပြဿနာတစ်ခု ရှိပါက သင် ပြောပြနိုင်လိမ့်မည်။ အကယ်၍ သင်သည် ယင်းတို့ကို အခြားသူတစ်ဦး၏ စာရင်းများ သို့မဟုတ် အများပိုင် စာရင်းများအဖြစ် ရှုမြင်ပါက သင်သည် မျက်စိနှင့် စိတ်တို့က မမြင်မကန်းဖြစ်ကြသည်မှာ သေချာသည်၊ မည်သည့်ပြဿနာကိုမျှ ရှာဖွေတွေ့ရှိနိုင်မည်မဟုတ်ပေ။ အချို့လူများသည် ဘဏ်တွင် ငွေအနည်းငယ် စုဆောင်းထားပြီး လစဉ် ၎င်းတို့၏ စာရင်းရှင်းတမ်းကို ဖတ်ကာ အတိုးကို ကြည့်ရှုပြီးနောက် စာရင်းများကို စစ်ဆေးကြသည်။ ၎င်းတို့ လစဉ် မည်မျှ သုံးစွဲသည်၊ ထုတ်ယူမှု မည်မျှ ပြုလုပ်သည်၊ မည်မျှ အပ်နှံသည်ဟူသည်တို့ကို စစ်ဆေးကြသည်။ စာရင်းတစ်ခုချင်းစီကို ၎င်းတို့၏ စိတ်ထဲတွင် မှတ်တမ်းတင်ထားသည်၊ ၎င်းတို့သည် မိမိတို့၏ လိပ်စာကို သိသလောက် ကိန်းဂဏန်းတိုင်းကို ကောင်းစွာ သိကြပြီး ၎င်းတို့၏ စိတ်ထဲတွင် ရှင်းလင်းစွာ ရှိနေသည်။ တစ်နေရာရာတွင် ပြဿနာတစ်ခု ပေါ်ပေါက်လာပါက ၎င်းတို့သည် တစ်ချက်ကြည့်ရုံဖြင့် သိရှိနိုင်ပြီး အသေးငယ်ဆုံးသော အမှားကိုပင် လျစ်လျူမရှုကြပေ။ လူတို့သည် မိမိတို့၏ ကိုယ်ပိုင်ငွေနှင့်ပတ်သက်၍ အလွန်ဂရုစိုက်နိုင်ကြသော်လည်း ဘုရားသခင်၏ ပူဇော်သက္ကာများအပေါ် အလားတူ စိုးရိမ်ပူပန်မှုကို ပြသကြသလော။ ငါ၏ အမြင်တွင်မူ ၉၉.၉% သောလူတို့သည် မပြသကြပေ။ သို့ဖြစ်၍ ဘုရားသခင်၏ ပူဇော်သက္ကာများကို လူတို့အား ထိန်းသိမ်းစောင့်ရှောက်ရန် လွှဲပြောင်းပေးသည့်အခါ ဖြုန်းတီးမှုများနှင့် အလဟဿဖြစ်မှုများအပြင် ကျိုးကြောင်းမညီညွတ်သော အသုံးစရိတ်အမျိုးမျိုးတို့ မကြာခဏ ဖြစ်ပေါ်လေ့ရှိသော်လည်း မည်သူမျှ ယင်းကို ပြဿနာဟု မခံစားရသည့်အပြင် ဤအလုပ်အတွက် တာဝန်ရှိသူများသည်လည်း မည်သည့်အခါမျှ လိပ်ပြာမလုံခြင်းကို မခံစားရကြပေ။ ယွမ်တစ်ရာ ဆုံးရှုံးခြင်းကို မဆိုထားနှင့်၊ တစ်ထောင်၊ တစ်သောင်း ဆုံးရှုံးလျှင်ပင် ၎င်းတို့သည် စိတ်နှလုံးထဲတွင် အပြစ်တင်ခြင်း၊ အကြွေးတင်ခြင်း သို့မဟုတ် စွပ်စွဲခံရခြင်းတို့ကို မခံစားရကြပေ။ ဤကိစ္စနှင့်ပတ်သက်လာသည့်အခါ လူတို့သည် အဘယ်ကြောင့် ဤမျှ နားဝေတိမ်တောင် ဖြစ်နေကြသနည်း။ ဤသည်မှာ လူအများစု၏ စိတ်နှလုံးများ မမှန်ကန်ကြောင်းကို ညွှန်ပြသည် မဟုတ်လော။ သင်သည် ဘဏ်တွင် ငွေမည်မျှ စုဆောင်းပြီးဖြစ်သည်ကို အဘယ်ကြောင့် ဤမျှ ရှင်းလင်းစွာ သိရှိနေရသနည်း။ ဘုရားအိမ်တော်၏ ငွေကို သင်၏ စာရင်းတွင် ယာယီအပ်နှံထားသည့်အခါ၊ သင် ထိန်းသိမ်းစောင့်ရှောက်ဖို့အတွက် ဖြစ်သည့်အခါ သင်သည် ယင်းကို အလေးအနက်မထား သို့မဟုတ် ဂရုမစိုက်ပေ။ ဤသည်မှာ မည်သည့် စိတ်နေသဘောထားဖြစ်သနည်း။ သင်သည် ဘုရားသခင်၏ ပူဇော်သက္ကာများကို ထိန်းသိမ်းစောင့်ရှောက်ခြင်းနှင့် ပတ်သက်လာသည့်အခါ သစ္စာပင် မစောင့်သိပေ၊ ထို့ကြောင့် သင်သည် ဘုရားသခင်ကို ယုံကြည်သူတစ်ဦး ဖြစ်နေသေးသလော။ ပူဇော်သက္ကာများအပေါ် ထားရှိသော လူတို့၏ သဘောထားသည် ဘုရားသခင်အပေါ် ထားရှိသော ၎င်းတို့၏ သဘောထားနှင့်ဆိုင်သည့် သက်သေပင်ဖြစ်သည်၊ ပူဇော်သက္ကာများအပေါ် ၎င်းတို့၏ သဘောထားသည် အလွန် သိသာထင်ရှားလှသည်။ လူတို့သည် ပူဇော်သက္ကာများကို ဂရုမစိုက်သည့်အပြင် စိတ်မဝင်စားကြပေ။ ပူဇော်သက္ကာများ ဆုံးရှုံးသွားပါက ၎င်းတို့ ဝမ်းနည်းခြင်းမရှိ၊ ၎င်းတို့ တာဝန်မယူသည့်အပြင် ဂရုမစိုက်ကြပေ။ သို့ဆိုလျှင် ၎င်းတို့သည် ဘုရားသခင်အပေါ် အလားတူ သဘောထား ရှိကြသည် မဟုတ်လော။ (ဟုတ်ပါသည်။) တစ်ဦးတလေက၊ “ဘုရားသခင်၏ ပူဇော်သက္ကာများသည် သူ၏ ပစ္စည်းများ ဖြစ်သည်။ ကျွန်ုပ်သည် ယင်းတို့ကို မတပ်မက်သရွေ့ သို့မဟုတ် မသိမ်းပိုက်သရွေ့ ကိစ္စအဝဝ အဆင်ပြေပါသည်။ မည်သူမဆို ယင်းတို့ကို သိမ်းပိုက်ပါက အပြစ်ဒဏ်ပေးခြင်း ခံရလိမ့်မည်၊ ယင်းမှာ သူတို့၏ ကိစ္စဖြစ်ပြီး သူတို့ ခံထိုက်ပါသည်။ ယင်းမှာ ကျွန်ုပ်နှင့် မည်သို့မျှ မသက်ဆိုင်ပါ။ ယင်းကို စိုးရိမ်ပူပန်ရန် ကျွန်ုပ်၌ တာဝန်မရှိပါ”ဟု ပြောသလော။ ဤပြောဆိုချက်သည် မှန်ကန်သလော။ သိသာထင်ရှားစွာပင် မမှန်ကန်ပေ။ သို့ဆိုလျှင် မည်သည့်နေရာတွင် မှားယွင်းနေသနည်း။ (၎င်းတို့၏ စိတ်နှလုံး မမှန်ကန်ပါ၊ ၎င်းတို့သည် ဘုရားအိမ်တော်၏ အလုပ်ကို မကာကွယ်ကြသည့်အပြင်၊ ပူဇော်သက္ကာများကိုလည်း မကာကွယ်ကြပါ။) ဤသို့သောလူစားမျိုး၏ လူ့သဘာဝသည် မည်သို့ဖြစ်သနည်း။ (ယင်းမှာ တစ်ကိုယ်ကောင်းဆန်ပြီး ယုတ်ညံ့ပါသည်။ ၎င်းတို့သည် မိမိတို့၏ ကိုယ်ပိုင်ပစ္စည်းများကို အလွန်ဂရုစိုက်ပြီး အလွန်ကောင်းမွန်စွာ ကာကွယ်ကြသော်လည်း ဘုရားသခင်၏ ပူဇော်သက္ကာများကိုမူ ဂရုမစိုက် သို့မဟုတ် မေးမြန်းခြင်းပင် မပြုကြပါ။ ထိုကဲ့သို့သောလူများ၏ လူ့သဘာဝသည် အလွန် အဆင့်အတန်း နိမ့်ကျလှပါသည်။) အဓိကအားဖြင့် ယင်းမှာ တစ်ကိုယ်ကောင်းဆန်ပြီး ယုတ်ညံ့ခြင်း ဖြစ်သည်။ ဤသို့သောလူစားမျိုးသည် သွေးအေးကြသည် မဟုတ်လော။ ၎င်းတို့သည် တစ်ကိုယ်ကောင်းဆန်ပြီး ယုတ်ညံ့သည်၊ သွေးအေးပြီး လူ့ခံစားချက် ကင်းမဲ့ကြသည်။ ထိုသို့သောလူများသည် ဘုရားသခင်ကို ချစ်နိုင်သလော။ သူ့ကို ကျိုးနွံနာခံနိုင်သလော။ ၎င်းတို့တွင် ဘုရားသခင်ကို ကြောက်ရွံ့သော စိတ်နှလုံး ရှိနိုင်သလော။ (မရှိနိုင်ပါ။) သို့ဆိုလျှင် ထိုသို့သောလူများသည် ဘုရားသခင်နောက်ကို အဘယ်အတွက် လိုက်ကြသနည်း။ (ကောင်းချီးများ ရရှိရန် ဖြစ်ပါသည်။) ဤသည်မှာ အရှက်တရားကင်းမဲ့ခြင်း မဟုတ်လော။ ဘုရားသခင်၏ ပူဇော်သက္ကာများကို လူတစ်ဦး သဘောထားပုံသည် သူ၏ သဘာဝက မည်သည့်အရာဖြစ်သည်ကို အထင်ရှားဆုံး ထုတ်ဖော်ပြသသည်။ လူတို့သည် ဘုရားသခင်အတွက် မည်သည့်အရာကိုမျှ အမှန်တကယ် လုပ်ဆောင်နိုင်ခြင်းမရှိပေ။ ၎င်းတို့သည် တာဝန်အနည်းငယ်ကို ထမ်းဆောင်နိုင်လျှင်ပင် ယင်းမှာ အလွန် အကန့်အသတ်ရှိသည်။ သင်သည် ဘုရားသခင်ပိုင်ဆိုင်သော ပူဇော်သက္ကာများကိုပင် မှန်ကန်စွာ သဘောမထားနိုင်ပါက သို့မဟုတ် ကောင်းမွန်စွာ မကာကွယ်မစောင့်ရှောက်နိုင်ပါက၊ သင်သည် ထိုသို့သော အမြင်နှင့် သဘောထားမျိုးကို ထားရှိပါက လူ့သဘာဝ အကင်းမဲ့ဆုံးသောသူတစ်ဦး မဟုတ်လော။ သင်သည် ဘုရားသခင်ကို ချစ်သည်ဟု ဆိုခြင်းမှာ အယောင်ဆောင်ခြင်း မဟုတ်လော။ ယင်းမှာ လှည့်ဖြားခြင်း မဟုတ်လော။ အလွန် လှည့်ဖြားခြင်းပင်တည်း။ ဤလူစားမျိုးတွင် လူ့သဘာဝ လုံးဝမရှိပေ။ ဘုရားသခင်သည် ထိုသို့သော အမှိုက်သရိုက်ကို ကယ်တင်မည်လော။

၃။ အသုံးစရိတ်မျိုးစုံကို နောက်ဆက်တွဲလုပ်ဆောင်ခြင်း၊ စုံစမ်းမေးမြန်းခြင်း၊ စစ်ဆေးခြင်းနှင့် တင်းကျပ်စွာ စိစစ်ခြင်း

ခေါင်းဆောင်များနှင့် အမှုဆောင်များအနေဖြင့် ဘုရားအိမ်တော်၏ ဘဏ္ဍာစိုးကောင်းများ ဖြစ်ရန်အတွက် ၎င်းတို့ ကောင်းမွန်စွာ လုပ်ဆောင်ရမည့် ပထမဆုံးအလုပ်မှာ ပူဇော်သက္ကာများကို သင့်လျော်စွာ စီမံခန့်ခွဲရန် ဖြစ်သည်။ ပူဇော်သက္ကာများကို သင့်လျော်စွာ ထိန်းသိမ်းစောင့်ရှောက်ခြင်းအပြင် ၎င်းတို့သည် ပူဇော်သက္ကာများ၏ အသုံးစရိတ်များနှင့် စပ်လျဉ်း၍ တင်းကျပ်သော စိစစ်မှုကို ဆောင်ရွက်သင့်သည်။ တင်းကျပ်သော စိစစ်ခြင်းဟူသည်မှာ အဘယ်အရာကို ဆိုလိုသနည်း။ အဓိကအားဖြင့်၊ ယင်းမှာ ပူဇော်သက္ကာများ ပြုန်းတီးခြင်းနှင့် အလဟဿဖြစ်ခြင်းမျိုး မဖြစ်စေဘဲ၊ ကျိုးကြောင်းမဆီလျော်သော အသုံးစရိတ်များကို လုံးဝ ဖယ်ရှားပစ်ရန်နှင့် ပူဇော်သက္ကာများ၏ အသုံးစရိတ်တိုင်းကို ကျိုးကြောင်းဆီလျော်ပြီး ထိရောက်စေဖို့ ကြိုးပမ်းရန် ဖြစ်သည်။ ပြုန်းတီးခြင်း သို့မဟုတ် အလဟဿဖြစ်ခြင်း ကိစ္စရပ်များကို တွေ့ရှိပါက ခေါင်းဆောင်များနှင့် အမှုဆောင်များသည် ယင်းတို့ကို ချက်ချင်းရပ်တန့်စေရမည်သာမက တာဝန်ခံစေသင့်သည့်အပြင် ထိုအလုပ်ကို လုပ်ဆောင်ရန် သင့်တော်သောလူများကိုလည်း ရှာဖွေဖော်ထုတ်ရမည်။ ခေါင်းဆောင်များနှင့် အမှုဆောင်များသည် ၎င်းတို့၏ စီမံခန့်ခွဲမှုနယ်ပယ်အတွင်းတွင် အသုံးစရိတ်တစ်ခုချင်းစီသည် မည်သည့်နေရာသို့ ရောက်ရှိသွားပြီး၊ မည်သည့်အရာအတွက်ဖြစ်သည်ကို တိတိကျကျ သိရှိသင့်သည်၊ ၎င်းတို့သည် ဤအရာများကို တင်းကျပ်သောပုံစံဖြင့် ပြန်လည်သုံးသပ်သင့်သည်။ ဥပမာအားဖြင့်၊ အခန်းတစ်ခန်းတွင် ပန်ကာတစ်လုံး လိုအပ်ပါက မည်သူက ဝယ်ရမည်၊ မည်မျှသုံးစွဲရမည်၊ မည်သို့သော လုပ်ဆောင်ချက်များ ပါရှိရန် အသင့်တော်ဆုံးဖြစ်မည်ဟူသည့် ကန့်သတ်ချက်ဘောင်များကို ၎င်းတို့ သတ်မှတ်ပေးသင့်သည်။ အချို့သော ခေါင်းဆောင်များနှင့် အမှုဆောင်များက “ကျွန်ုပ်တို့ အလုပ်များပါသည်၊ လိုက်ဝယ်ပေးဖို့ အချိန်မပေးနိုင်ပါ”ဟု ပြောကြသည်။ သင့်ကို ကိုယ်တိုင်သွားဝယ်ရန် တောင်းဆိုနေခြင်း မဟုတ်ပေ။ သင်သည် ဤတာဝန်ကို ကိုင်တွယ်ရန် လူတော်တစ်ဦး၊ အစွမ်းအစရှိသူတစ်ဦးကို ရွေးချယ်သင့်သည်။ ဉာဏ်မရှိသူတစ်ဦး သို့မဟုတ် စိတ်နှလုံးမမှန်ကန်သော လူဆိုးတစ်ဦးကို မဝယ်ခိုင်းနှင့်။ ပုံမှန်လူ့သဘာဝရှိသူများသည် သင့်လျော်သော လုပ်ဆောင်ချက်များနှင့် သင့်လျော်သော ဈေးနှုန်းရှိသည့်အရာများအား ဝယ်ရမည်ကို သိကြသည်၊ အလွန်အကျွံ လုပ်ဆောင်ချက်များသည် အသုံးမဝင်သည့်အပြင် ပို၍လည်း ဈေးကြီးသည်။ ဆန့်ကျင်ဘက်အားဖြင့်၊ စိတ်နှလုံးမမှန်ကန်သော အပျော်အပါးမက်သူများကမူ လုပ်ဆောင်ချက်အမျိုးမျိုး ရောထွေးနေသည့် လက်တွေ့မကျသောအရာများကို ဝယ်ကြရာ ပို၍ ငွေကုန်ကြေးကျများစေသည်။ ဝယ်ယူသူများသည် ဆင်ခြင်တုံတရားပိုင်ဆိုင်ရမည်။ စည်းမျဉ်းများကို ၎င်းတို့ နားလည်ရမည်။ ဝယ်ယူသည့် ပစ္စည်းများသည် ကုန်ကျစရိတ် မများဘဲ လက်တွေ့ကျရမည်ဖြစ်ပြီး လူတိုင်းက သင့်တော်သည်ဟု မှတ်ယူရမည်။ အကယ်၍ သင်သည် ဤဝယ်ယူမှုကို ပြုလုပ်ရန် မဆင်မခြင်ငွေသုံးပြီး ဖြုန်းတီးခြင်းကို နှစ်သက်သော တာဝန်မဲ့သူတစ်ဦးအား ခိုင်းစေပါက ၎င်းတို့သည် ပန်ကာတစ်လုံးဝယ်ရန် ကုန်ကျစရိတ်၏ ဆယ်ဆရှိသော ထိပ်တန်းအဆင့် လေအေးပေးစက်တစ်လုံးအတွက် ဈေးကြီးပေးရုံသာ ဖြစ်ပေလိမ့်မည်။ ငွေအနည်းငယ်ပိုကုန်သော်လည်း လူကို ဦးစားပေးရမည်ဟု ၎င်းတို့က ယုံကြည်သည်၊ ထိုလေအေးပေးစက်သည် လေကို စစ်ထုတ်ပေးရုံသာမက စိုထိုင်းဆနှင့် အပူချိန်ကိုလည်း ချိန်ညှိနိုင်ပြီး အချိန်တိုင်းကိရိယာအမျိုးမျိုးနှင့် ဆက်တင်အမျိုးမျိုးလည်း ပါရှိသည်ဟု ၎င်းတို့က ယုံကြည်သည်။ ယင်းမှာ ဖြုန်းတီးခြင်း မဟုတ်လော။ ဤသည်မှာ ဖြုန်းတီးခြင်းနှင့် အလဟဿဖြစ်စေခြင်း ဖြစ်သည်။ ထိုသူသည် ဇိမ်ခံဖို့ကြိုးပမ်းနေခြင်းဖြစ်ပြီး စိတ်လှုပ်ရှားမှုများအတွက်၊ ကြွားဝါရန်အတွက် ငွေသုံးနေခြင်းဖြစ်သည်၊ လက်တွေ့ကျသောအရာများကို ဝယ်ယူနေခြင်း မဟုတ်ပေ။ ထိုသို့သောလူများသည် စိတ်နှလုံးမမှန်ကန်ကြပေ။ ၎င်းတို့သည် မိမိတို့ကိုယ်တိုင်အတွက် ဈေးဝယ်ပါက ငွေချွေတာရန် နည်းလမ်းများကို ရှာဖွေကြသည်။ လျှော့ဈေးပေးထားသော ပစ္စည်းများကို ရှာဖွေကြပြီး ဈေးဆစ်ရန် ကြိုးစားကြသည်။ ၎င်းတို့သည် တတ်နိုင်လျှင် ငွေချွေတာကြသည်၊ ဈေးသက်သာလေ ကောင်းလေ ဖြစ်သည်။ သို့သော် ဘုရားအိမ်တော်အတွက် ဈေးဝယ်သည့်အခါတွင်မူ မည်မျှပင် ငွေသုံးပါစေ ၎င်းတို့ ဂရုမစိုက်ကြပေ။ ဈေးပေါသောပစ္စည်းများကို ဒုက္ခခံပြီး ကြည့်ပင်မကြည့်ကြဘဲ ဈေးကြီးသော၊ အဆင့်မြင့်သော၊ ခေတ်မီသောပစ္စည်းများကိုသာ ဝယ်လိုကြသည်။ ဤသည်မှာ ၎င်းတို့၏ စိတ်နှလုံးများ မမှန်ကန်ကြောင်းကို ဆိုလိုသည်။ စိတ်နှလုံးမမှန်ကန်သော လူတို့ကို အသုံးပြု၍ရသလော။ (အသုံးပြု၍မရပါ။) ဘုရားအိမ်တော်အတွက် အလုပ်တာဝန်များကို ကိုင်တွယ်သည့်အခါ စိတ်နှလုံးမမှန်ကန်သောလူများသည် အဓိပ္ပာယ်မဲ့ပြီး အသုံးမကျသောအရာများကိုသာ လုပ်ဆောင်ကြသည်။ ၎င်းတို့သည် မှန်ကန်သောအရာများအတွက် ငွေမသုံးကြပေ။ ၎င်းတို့သည် ပူဇော်သက္ကာများကိုသာ ဖြုန်းတီးကာ အလဟဿဖြစ်စေကြပြီး ၎င်းတို့၏ အသုံးစရိတ်တိုင်းသည် ကျိုးကြောင်းမဆီလျော်ပေ။

အချို့သော အခြားလူများမှာမူ ဆင်းရဲနွမ်းပါးသော စိတ်ဓာတ်ရှိကြပြီး ဘုရားအိမ်တော်အတွက် ဈေးဝယ်သည့်အခါ ဈေးအပေါဆုံးအရာများကို ဝယ်ရမည်ဟု ယုံကြည်ကြသည်။ ဈေးပေါလေ ကောင်းလေ ဖြစ်သည်။ ဤသည်မှာ ဘုရားအိမ်တော်အတွက် ငွေချွေတာခြင်းဖြစ်သည်ဟု ၎င်းတို့က ထင်သောကြောင့် ခေတ်မမီတော့သော၊ ဈေးလျှော့ထားသော အရာများကိုသာ သီးသန့်ဝယ်ယူကြသည်။ အကျိုးဆက်အနေဖြင့် ၎င်းတို့သည် စုတ်ချာသည့် ဈေးအပေါဆုံးစက်များကို ဝယ်ယူမိကြသည်။ ဤစက်များသည် သုံးလျှင်သုံးချင်း ပျက်စီးသွားပြီး ပြင်၍မရနိုင်တော့သည့်အပြင် သုံးမရတော့ပေ။ ထို့နောက် အရည်အသွေးပြည့်မီပြီး ပုံမှန်အသုံးပြု၍ရနိုင်သည့် အခြားစက်များကို ဝယ်ရန် လိုအပ်လာကာ နောက်ထပ်ငွေပမာဏတစ်ခု ကုန်ရပြန်သည်။ ဤသည်မှာ မိုက်မဲခြင်း မဟုတ်လော။ ထိုသို့သောလူများကို ကပ်စေးနှဲသူများ၊ ဆင်းရဲနွမ်းပါးသော စိတ်ဓာတ်ရှိသူများဟု ခေါ်ဆိုရမည်။ ၎င်းတို့သည် ဘုရားအိမ်တော်၏ ငွေကို အမြဲချွေတာလိုကြပြီး ၎င်းတို့၏ ခြိုးခြံချွေတာခြင်းနှင့် စုဆောင်းခြင်းအားလုံးမှ အဘယ်အရာ ဖြစ်ပေါ်လာသနည်း။ ယင်းမှာ ဖြုန်းတီးခြင်း၊ ငွေကို အလဟဿဖြစ်စေခြင်းအဖြစ်သို့ ပြောင်းလဲသွားသည်။ ၎င်းတို့သည် မိမိတို့ကိုယ်တိုင်အတွက် ဆင်ခြေများပင်ပေးကြသေးသည်။ “ကျွန်ုပ် တမင်လုပ်ခဲ့ခြင်း မဟုတ်ပါ။ ကျွန်ုပ်မှာ ရည်ရွယ်ချက်ကောင်းများ ရှိခဲ့ပါသည်၊ ဘုရားအိမ်တော်အတွက် ငွေချွေတာရန် ကြိုးစားနေခြင်းသာ ဖြစ်ပါသည်၊ ငွေကို လက်လွတ်စပယ် မသုံးချင်ခဲ့ပါ” ဟူ၍ ဖြစ်သည်။ ၎င်းတို့ ထိုသို့မလုပ်ဆောင်လိုခြင်းက အသုံးဝင်မှုတစ်ခုတလေရှိသလော။ အမှန်တွင် ၎င်းတို့သည် ငွေကို လက်လွတ်စပယ် သုံးစွဲနေကြခြင်း ဖြစ်သည်၊ ၎င်းတို့သည် ဖြုန်းတီးမှုကို အမှန်ပင် ဖြစ်စေကြပြီး ဤသည်မှာ ငွေနှင့် လူအင်အားကို ကုန်ဆုံးစေသည်။ ထိုသို့သောလူများကိုလည်း အသုံးပြု၍မရပေ၊ ၎င်းတို့သည် ဉာဏ်မရှိသူများဖြစ်သည်၊ ၎င်းတို့သည် လုံလောက်အောင် မပါးနပ်ကြပေ။ အတိုချုပ်ဆိုရလျှင် စိတ်နှလုံးမမှန်ကန်သောလူများကို ဘုရားအိမ်တော်အတွက် ဈေးဝယ်ရန် အသုံးမပြုသင့်သည့်အပြင် ဉာဏ်မရှိသူများကိုလည်း အသုံးမပြုသင့်ပေ။ အသုံးပြုသင့်သူများမှာ အတိုင်းအတာတစ်ခုအထိ ဈေးဝယ်အတွေ့အကြုံနှင့် အစွမ်းအစတစ်ခုခုရှိပြီး အရာရာကို မလွဲချော်သောအမြင်ရှိသည့် လိမ္မာပါးနပ်သူများ ဖြစ်ကြသည်။ မည်သည့်အရာကိုပင် ဝယ်သည်ဖြစ်စေ ယင်းမှာ လက်တွေ့ကျရမည်၊ ယင်း၏ဈေးနှုန်းမှာ ကျိုးကြောင်းဆီလျော်ရမည်၊ ပျက်စီးသွားလျှင်ပင် ပြင်ရလွယ်ကူရမည်၊ ၎င်းအတွက် အပိုပစ္စည်းများ ဝယ်ရလွယ်ကူရမည်။ ယင်းမှာ ကျိုးကြောင်းဆီလျော်သည်။ အချို့လူများသည် တစ်စုံတစ်ခုကို ဝယ်ပြီးနောက် တစ်လအတွင်း ပြန်သွင်းနိုင်သည့် အချိန်ကာလရှိသည်ကို မြင်သောအခါ အလျင်အမြန် စမ်းသုံးကြည့်ကြပြီး တစ်လအတွင်း အဖြေရရှိကြသည်။ အကယ်၍ အနည်းငယ် ချို့ယွင်းပြီး ကောင်းစွာအလုပ်မလုပ်ပါက ၎င်းတို့သည် ချက်ချင်းပြန်ပို့ပြီး ဆုံးရှုံးမှုများကို လျှော့ချလျက် အခြားတစ်စုံတစ်ခုကို ရွေးချယ်ကြသည်။ ဤလူများသည် အတော်အတန် ကောင်းမွန်သော လူ့သဘာဝရှိကြသည်။ လူ့သဘာဝမရှိသူများမှာမူ တစ်စုံတစ်ခုကို ဝယ်ပြီးနောက် ဘေးတွင် ပစ်ထားကြသည်။ ယင်း၌ ချို့ယွင်းချက် တစ်စုံတစ်ရာ ရှိမရှိ သို့မဟုတ် ခိုင်ခံ့မှု ရှိမရှိကို စမ်းသပ်မကြည့်ကြသည့်အပြင် ၎င်း၏ အာမခံသက်တမ်း မည်မျှကြာသည် သို့မဟုတ် ပြန်ပို့ရန် အချိန်မည်မျှရသည်ကိုလည်း မကြည့်ကြပေ။ ဤအရာအားလုံးကို ၎င်းတို့ ဂရုမစိုက်ကြပေ။ တစ်နေ့တွင် ထိုပစ္စည်းအပေါ် ရုတ်တရက် စိတ်ဝင်စားလာသောအခါ ၎င်းတို့က ယူ၍ စမ်းသုံးကြည့်ကြပြီး၊ ထိုအခါမှသာ ပျက်စီးနေသည်ကို တွေ့ရှိကြသည်။ ၎င်းတို့သည် ပြေစာကို စစ်ဆေးပြီး ပြန်ပို့ရမည့်ကာလ ကျော်လွန်သွားပြီဖြစ်၍ ပြန်ပို့၍မရတော့သည်ကို တွေ့ရှိကြသည်။ ထို့နောက် ၎င်းတို့က “သို့ဆိုလျှင် နောက်တစ်ခုဝယ်ကြစို့” ဟု ပြောကြသည်။ ယင်းမှာ ဖြုန်းတီးခြင်း မဟုတ်လော။ “နောက်တစ်ခုဝယ်ကြစို့” ဟူသော ထိုစကားစုကြောင့် ဘုရားအိမ်တော်သည် နောက်ထပ်ငွေပမာဏတစ်ခု ထပ်မံကုန်ကျရသည်။ နောက်တစ်ခုဝယ်ရန် လျှောက်ထားခြင်းသည် အပေါ်ယံအားဖြင့် အသင်းတော်အလုပ်အတွက်ဖြစ်ပြီး ကျိုးကြောင်းဆီလျော်သော အသုံးစရိတ်တစ်ခုဟု ထင်ရသော်လည်း၊ အမှန်တွင်မူ ယင်း၏နောက်ကွယ်၌ ပစ္စည်းဝယ်ပြီးနောက် ချက်ချင်းမစစ်ဆေးဘဲ မိမိတို့၏ တာဝန်ဝတ္တရားများတွင် ပေါ့ဆခြင်းကြောင့် ဖြစ်သည်။ ပူဇော်သက္ကာတစ်ကြိမ်စာ ဖြုန်းတီးပြီးနောက် နောက်တစ်ကြိမ် ထပ်မံပေးချေရပြီး ပစ္စည်းအသစ်ကို ထိန်းသိမ်းစောင့်ရှောက်ရန် လူကောင်းတစ်ဦးမျှ မရှိသေးသောကြောင့် ယင်းသည်လည်း မကြာမီ ပျက်စီးသွားပြန်သည်။ ဤအရာများကို ကြီးကြပ်ရန် တစ်ဦးတစ်ယောက်မျှ မရှိခြင်း၊ ပေါ်ပေါက်လာသော ပြဿနာများကို ကိုင်တွယ်ရန် တစ်ဦးတစ်ယောက်မျှ မရှိခြင်းမှာ အံ့အားသင့်စရာပင်ဖြစ်သည်။ ခေါင်းဆောင်များနှင့် အမှုဆောင်များက မည်သည့်အရာကို လုပ်ဆောင်နေကြသနည်း။ ၎င်းတို့သည် ဤအလုပ်နှင့်စပ်လျဉ်း၍ မိမိတို့၏ တာဝန်ဝတ္တရားများတွင် လုံးဝ ပျက်ကွက်နေခဲ့ကြသည်၊ ၎င်းတို့သည် ကြီးကြပ်ခြင်း၊ စစ်ဆေးခြင်းနှင့် စိစစ်ခြင်းတို့အား လုပ်ဆောင်ရမည့် တာဝန်ကို မထမ်းဆောင်ခဲ့ကြသောကြောင့် ပူဇော်သက္ကာများသည် ဤသို့ ဖြုန်းတီးခြင်းနှင့် အလဟဿဖြစ်စေခြင်းတို့ကို ခံနေရသည်။ ဝယ်ယူသူများသည် တာဝန်ယူတတ်သူများဖြစ်ပါက ၎င်းတို့ဝယ်ယူခဲ့သော ပစ္စည်းသည် လက်တွေ့မကျကြောင်း တွေ့ရှိသည့်အခါ ချက်ချင်းပြန်ပို့ကြလိမ့်မည်။ ဤသည်မှာ ဆုံးရှုံးမှုနှင့် ဖြုန်းတီးမှုကို လျှော့ချပေးသည်။ ၎င်းတို့သည် စိတ်နှလုံးမမှန်ကန်သော တာဝန်မဲ့သူများဖြစ်ပါက အရည်အသွေးညံ့သောပစ္စည်းများကို ဝယ်ယူကြမည်ဖြစ်ပြီး ထိုသို့ဖြင့် ပူဇော်သက္ကာများကို ဖြုန်းတီးကြလိမ့်မည်။ သို့ဖြစ်လျှင် ဤငွေကြေးဆုံးရှုံးမှုကို မည်သူ့ထံ၌ အတိအကျ တာဝန်ရှိသည်ဟု သတ်မှတ်ရမည်နည်း။ ဝယ်ယူသူနှင့် ခေါင်းဆောင်များ၊ အမှုဆောင်များအားလုံးတွင် တာဝန်ရှိသည် မဟုတ်လော။ ခေါင်းဆောင်များနှင့် အမှုဆောင်များသည် ဤကိစ္စကို စေ့စေ့စပ်စပ်၊ တိတိကျကျနှင့် ဂရုတစိုက် ကိုင်တွယ်ခဲ့ပါလျှင် ဤပြဿနာများကို ရှာဖွေတွေ့ရှိမည် မဟုတ်လော။ ဤချို့ယွင်းချက်များကို ဖြည့်ဆည်းပြီး ဖြစ်မည်မဟုတ်လော။ (ဖြည့်ဆည်းပြီးဖြစ်ပါမည်။) အကယ်၍ ခေါင်းဆောင်များနှင့် အမှုဆောင်များသည် ပူဇော်သက္ကာများ၏ အသုံးစရိတ်အခြေအနေကို စစ်ဆေးရန် အမျိုးမျိုးသော နေရာများတွင်ရှိသည့် အသင်းတော်များသို့ မကြာခဏ သွားရောက်ပါက ၎င်းတို့သည် ပြဿနာများကို ရှာတွေ့နိုင်လိမ့်မည်ဖြစ်ပြီး ဤဖြုန်းတီးခြင်းနှင့် အလဟဿဖြစ်စေခြင်းမျိုးကို ဖယ်ရှားရှင်းလင်းနိုင်မည်ဖြစ်သည်။ အကယ်၍ ခေါင်းဆောင်များနှင့် အမှုဆောင်များသည် ပျင်းရိပြီး တာဝန်မဲ့ပါက ဤကျိုးကြောင်းမဆီလျော်သော အသုံးစရိတ်များနှင့် ဖြုန်းတီးခြင်း၊ အလဟဿဖြစ်စေခြင်း ကိစ္စရပ်များသည် ထပ်ခါတလဲလဲ ပေါ်ပေါက်လာလိမ့်မည်၊ ၎င်းတို့သည် ဆက်လက်၍ ပျံ့နှံ့နေလိမ့်မည်။ ဤပျံ့နှံ့မှုကို အဘယ်အရာက ဖြစ်စေသနည်း။ ယင်းသည် ခေါင်းဆောင်များနှင့် အမှုဆောင်များက လက်တွေ့ကျသောအလုပ်ကို မလုပ်ဆောင်ဘဲ အခြားသူများအထက်တွင် မိမိတို့ကိုယ်ကို ထားရှိပြီး အစွမ်းအစမရှိသော အရာရှိကြီးများကဲ့သို့ ပြုမူခြင်းနှင့် ပတ်သက်မှု တစ်စုံတစ်ရာ ရှိသည် မဟုတ်လော။ (ဟုတ်ပါသည်။) ထိုသို့သော ခေါင်းဆောင်များနှင့် အမှုဆောင်များတွင် အသိစိတ် သို့မဟုတ် ဆင်ခြင်တုံတရားမရှိသည့်အပြင် လူ့သဘာဝလည်း မရှိပေ။ အဘယ်ကြောင့်ဆိုသော် အသင်းတော်သုံးစွဲသော ငွေအားလုံးသည် ဘုရားအိမ်တော်ပိုင်ဖြစ်ပြီး အားလုံးမှာ ဘုရားသခင်၏ ပူဇော်သက္ကာများဖြစ်သောကြောင့် ၎င်းတို့နှင့် မည်သည့်ပတ်သက်မှုမျှမရှိဟု ၎င်းတို့ ယုံကြည်ကြသည်။ ၎င်းတို့သည် ထိုအရာကို ဂရုမစိုက်သည့်အပြင် မေးမြန်းခြင်းလည်းမရှိဘဲ လျစ်လျူရှုကြသည်။ ဘုရားအိမ်တော်၏ ငွေကို သုံးစွဲသင့်သည်၊ မည်သည့်နည်းလမ်းဖြင့်မဆို သုံးစွဲ၍ရသည်၊ မိမိတို့အိတ်ကပ်ထဲသို့ မထည့်သရွေ့ သို့မဟုတ် အလွဲသုံးစားမလုပ်သရွေ့ ဖြုန်းတီးမိလျှင် အရေးမကြီးသည့်အပြင်၊ ယင်းမှာ လူတို့ အတွေ့အကြုံဝယ်ယူခြင်းနှင့် မိမိတို့၏ အမြင်ကို ကျယ်ပြန့်စေခြင်းမျှသာဖြစ်သည်ဟု လူအများစုက ယုံကြည်ကြသည်။ ခေါင်းဆောင်များနှင့် အမှုဆောင်များကမူ “မည်သူမဆို ထိုငွေကို မိမိတို့ကြိုက်သလို သုံးနိုင်သည်၊ မိမိတို့ကြိုက်နှစ်သက်ရာကို ဝယ်နိုင်သည်။ မည်မျှ ဖြုန်းတီးခံရသည်မှာ အရေးမကြီးပါ၊ ငွေဖြုန်းသူတိုင်းတွင် တာဝန်ရှိပြီး ၎င်းတို့သည် အနာဂတ်တွင် ဒဏ်ခတ်ခြင်းနှင့် အပြစ်ဒဏ်ပေးခြင်းတို့ကို ရင်ဆိုင်ရလိမ့်မည်။ ဤသည်မှာ ကျွန်ုပ်နှင့် မသက်ဆိုင်ပါ၊ မည်သို့ပင်ဖြစ်စေ ကျွန်ုပ်သုံးစွဲနေခြင်းမဟုတ်သည့်အပြင်၊ ကျွန်ုပ်၏ငွေကို သုံးစွဲနေခြင်းလည်း မဟုတ်ပါ”ဟုဆိုကာ မသိကျိုးကျွံပြုကြသည်။ ဤသည်မှာ အများပိုင် ရန်ပုံငွေများကို သုံးစွဲခြင်းအပေါ် ဘာသာတရားမရှိသူများက ထားရှိသည့် အမြင်နှင့် သဘောထားအတိုင်းပင် မဟုတ်လော။ ယင်းမှာ ၎င်းတို့ ရန်သူများ၏ငွေကို သုံးစွဲနေသည့်အလားပင် ဖြစ်သည်။ ဘာသာတရားမရှိသူများသည် စက်ရုံတစ်ရုံတွင် အလုပ်လုပ်သည့်အခါ စီမံခန့်ခွဲမှုက လျော့ရဲလျှင်၊ အများပိုင်ပစ္စည်းများ အမြဲ ခိုးယူခြင်းခံရပြီး လူတို့၏အိမ်များသို့ ယူဆောင်သွားခြင်း သို့မဟုတ် ပေါ့ပေါ့ဆဆ ဖျက်ဆီးခြင်း ခံရမည်ဖြစ်ကာ တစ်စုံတစ်ခု ပျက်စီးသွားပါက စက်ရုံကို အသစ်တစ်ခုဝယ်ခိုင်းကြလိမ့်မည်။ ၎င်းတို့သည် စက်ရုံအတွက် ဈေးဝယ်သည့်အခါ ကောင်းသော၊ ဈေးကြီးသောပစ္စည်းများကိုသာ သီးသန့်ဝယ်ယူကြလိမ့်မည်။ မည်သို့ပင်ဖြစ်စေ ငွေကို ထင်ရာမြင်ရာ သုံးစွဲမည်ဖြစ်ပြီး အများဆုံးသုံး၍ရသည့် အကန့်အသတ်လည်း ရှိမည်မဟုတ်ပေ။ အကယ်၍ ဘုရားသခင်ကို ယုံကြည်သူများသည်လည်း ပူဇော်သက္ကာများအပေါ် ထိုသို့သော စိတ်သဘောထားရှိပါက ၎င်းတို့ကို ကယ်တင်၍ရနိုင်သလော။ ဘုရားသခင်သည် ထိုသို့သော လူအုပ်စုအပေါ် အလုပ်လုပ်လိမ့်မည်လော။ (အလုပ်လုပ်လိမ့်မည် မဟုတ်ပါ။) အကယ်၍ လူတို့သည် ဘုရားသခင်၏ ပူဇော်သက္ကာများအပေါ် ဤကဲ့သို့သော သဘောထားရှိပါက ဘုရားသခင်က ထိုလူများအပေါ် မည်သည့် သဘောထားရှိသည်ကို ငါမပြောဘဲ သင်သိသင့်သည်။

ဘုရားသခင်အပေါ်ထားသော လူတစ်ဦး၏ သဘောထားက ထင်ရှားသည့် တိုက်ရိုက်အဖြစ်ဆုံးသော နည်းလမ်းမှာ ပူဇော်သက္ကာများအပေါ်ထားသော ၎င်း၏သဘောထားဖြင့်ဖြစ်သည်။ သင်၏ ပူဇော်သက္ကာများအပေါ်ထားသော သင်၏ သဘောထားက မည်သည့်အရာပင်ဖြစ်စေ၊ ယင်းမှာ ဘုရားသခင်အပေါ်ထားသော သင်၏သဘောထားပင် ဖြစ်သည်။ သင်သည် ပူဇော်သက္ကာများကို သင်၏ ကိုယ်ပိုင်ဘဏ်စာရင်းထဲမှ စာရင်းများကဲ့သို့ စေ့စေ့စပ်စပ်၊ ဂရုတစိုက်၊ သတိဖြင့်၊ တင်းကျပ်စွာ၊ တာဝန်ယူမှုရှိရှိနှင့် အာရုံစိုက်၍ သဘောထားပါက ဘုရားသခင်အပေါ်ထားသော သင်၏သဘောထားသည်လည်း ဤကဲ့သို့ပင် အနည်းနှင့်အများ ဖြစ်ပေသည်။ အကယ်၍ ပူဇော်သက္ကာများအပေါ်ထားသော သင်၏ သဘောထားသည် အများပြည်သူ ပိုင်ဆိုင်မှုအပေါ်၊ ဈေးထဲရှိ ဟင်းသီးဟင်းရွက်များအပေါ်ထားသော သင်၏သဘောထားကဲ့သို့ ဖြစ်ပါက၊ သင်လိုအပ်သမျှကို ပေါ့ပေါ့ဆဆ ဝယ်ယူပြီး သင်မကြိုက်သည့် မည်သည့်ဟင်းသီးဟင်းရွက်ကိုမျှ ကြည့်ပင်မကြည့်ဘဲ၊ မည်သည့်နေရာတွင် ပုံထားသည်ဖြစ်စေ လျစ်လျူရှုကာ၊ မည်သူက ယူသုံးသည်ဖြစ်စေ ဂရုမစိုက်ဘဲ၊ မြေပေါ်ကျပြီး တစ်စုံတစ်ယောက်က နင်းမိသည့်အခါ မမြင်ချင်ယောင်ဆောင်သည့်အပြင်၊ ဤအရာအားလုံးသည် သင်နှင့်မသက်ဆိုင်ဟု ယုံကြည်ပါက ယင်းက သင့်အတွက် ဒုက္ခပြဿနာကို ဖိတ်ခေါ်နေပေသည်။ အကယ်၍ ယင်းသည် ပူဇော်သက္ကာများအပေါ် ထားရှိသည့် သင်၏သဘောထားဖြစ်ပါက၊ သင်သည် တာဝန်သိတတ်သူတစ်ဦးလော။ သင်ကဲ့သို့သောလူတစ်ဦးသည် တာဝန်ကို ကောင်းစွာ ထမ်းဆောင်နိုင်သလော။ သင့်တွင် မည်သည့် လူ့သဘာဝမျိုးရှိသည်မှာ သိသာထင်ရှားသည်။ အတိုချုပ်ဆိုရလျှင်၊ ပူဇော်သက္ကာများကို စီမံခန့်ခွဲခြင်းအလုပ်တွင် ခေါင်းဆောင်များနှင့် အမှုဆောင်များ၏ အဓိကတာဝန်ဝတ္တရားမှာ ယင်းတို့ကို ကောင်းမွန်စွာ ထိန်းသိမ်းစောင့်ရှောက်ခြင်းအပြင် နောက်ဆက်တွဲအလုပ်ကိုလည်း လိုက်လံလုပ်ဆောင်ရန်ဖြစ်သည်။ အရေးကြီးဆုံးမှာ ၎င်းတို့သည် စာရင်းများကို ပုံမှန်စစ်ဆေးရမည်ဖြစ်ပြီး၊ အသုံးစရိတ်မျိုးစုံကို နောက်ဆက်တွဲလုပ်ဆောင်ခြင်း၊ စုံစမ်းမေးမြန်းခြင်း၊ စစ်ဆေးခြင်းနှင့် တင်းကျပ်စွာ စိစစ်ခြင်းတို့ကိုလည်း ပြုလုပ်ရမည်။ ၎င်းတို့သည် ဖြုန်းတီးခြင်းနှင့် အလဟဿဖြစ်ခြင်းတို့ကို မဖြစ်ပေါ်စေမီ ကျိုးကြောင်းမဆီလျော်သော အသုံးစရိတ်များကို လုံးဝ ဖယ်ရှားရှင်းလင်းပစ်ရမည်။ အကယ်၍ ကျိုးကြောင်းမဆီလျော်သော အသုံးစရိတ်များသည် ထိုအရာများကို ဖြစ်ပေါ်စေနှင့်ပြီးဖြစ်ပါက ၎င်းတို့အနေဖြင့် တာဝန်ရှိသူများကို တာဝန်ခံစေရမည်၊ သတိပေးချက်တစ်ခု ပေးရမည်ဖြစ်ပြီး လျော်ကြေးငွေပေးစေရမည်။ အကယ်၍ သင်သည် ဤအလုပ်ကိုပင် ကောင်းစွာ မလုပ်ဆောင်နိုင်ပါက အလျင်အမြန် နုတ်ထွက်လော့။ ခေါင်းဆောင် သို့မဟုတ် အမှုဆောင်တစ်ဦး၏ အလုပ်ကို သင်မလုပ်ဆောင်နိုင်သောကြောင့် ထိုရာထူးကို မယူထားနှင့်။ အကယ်၍ သင်သည် ဤအလုပ်ကိုပင် တာဝန်မယူနိုင်သည့်အပြင်၊ ကောင်းစွာမလုပ်ဆောင်နိုင်ပါက မည်သည့်အလုပ်ကို လုပ်ဆောင်နိုင်သနည်း။ ငါ့ကို စနစ်တကျ ပြောလော့။ ပူဇော်သက္ကာများနှင့်စပ်လျဉ်း၍ ခေါင်းဆောင်များနှင့် အမှုဆောင်များ လုပ်ဆောင်ရမည့် တာဝန်စုစုပေါင်း မည်မျှရှိသနည်း။ (ပထမတစ်ခုမှာ ယင်းတို့ကို ထိန်းသိမ်းစောင့်ရှောက်ခြင်း ဖြစ်သည်။ ဒုတိယတစ်ခုမှာ စာရင်းများကို စစ်ဆေးခြင်း ဖြစ်သည်။ တတိယတစ်ခုမှာ အသုံးစရိတ်မျိုးစုံကို နောက်ဆက်တွဲလုပ်ဆောင်ခြင်း၊ စုံစမ်းမေးမြန်းခြင်း၊ စစ်ဆေးခြင်းနှင့် တင်းကျပ်စွာ စိစစ်ခြင်း ဖြစ်သည်၊ ကျိုးကြောင်းမဆီလျော်သော အသုံးစရိတ်များကို ဖယ်ရှားရှင်းလင်းပစ်ရမည်ဖြစ်ပြီး မည်သူမဆို ဖြုန်းတီးခြင်း သို့မဟုတ် အလဟဿပြုခြင်းကို ဖြစ်စေပါက ၎င်းတို့ကို တာဝန်ခံစေပြီး လျော်ကြေးပေးစေရမည်။) ဤအဆင့်များအတိုင်း အလုပ်လုပ်ရန် လွယ်ကူသလော။ (လွယ်ကူပါသည်။) ဤသည်မှာ ရှင်းလင်းစွာ အသေးစိတ်ချပြထားသော အလုပ်လုပ်နည်းတစ်ခု ဖြစ်သည်။ အကယ်၍ သင်သည် ထိုသို့သော ရိုးရှင်းသည့်အလုပ်ကိုပင် မလုပ်ဆောင်နိုင်ပါက ဘုရားအိမ်တော်၏ ဘဏ္ဍာစိုးတစ်ဦးအနေဖြင့် သင်သည် ခေါင်းဆောင် သို့မဟုတ် အမှုဆောင်တစ်ဦးအဖြစ် မည်သည့်အရာကို လုပ်နိုင်သနည်း။ နေရာတိုင်း ပူဇော်သက္ကာများ ဖြုန်းတီးခြင်းနှင့် အလဟဿဖြစ်စေခြင်း သာဓကများ ရှိနေပြီး၊ ခေါင်းဆောင် သို့မဟုတ် အမှုဆောင်တစ်ဦးအနေဖြင့် သင်သည် ယင်းကို သတိမထားမိသည့်အပြင်၊ လုံးဝ စိတ်မကောင်းမဖြစ်ပါက သင်၏စိတ်နှလုံးထဲတွင် ဘုရားသခင်ပင် ရှိပါ၏လော။ သူ့အတွက် နေရာတစ်ခုပင် ရှိပါ၏လော။ ဤသည်မှာ မေးခွန်းထုတ်စရာပင်။ သင်၏ ဘုရားသခင်ကို ချစ်သော စိတ်နှလုံးသည် ကြီးမားကြောင်းနှင့် သင်၌ ဘုရားသခင်ကို ကြောက်ရွံ့သော စိတ်နှလုံး အမှန်တကယ်ရှိသည်ဟု သင်ပြောသော်လည်း၊ သူ၏ ပူဇော်သက္ကာများ ဤသို့ ဖြုန်းတီးခြင်းနှင့် အလဟဿဖြစ်စေခြင်းတို့ကို ခံရသည့်အခါ သင်သည် တစ်နည်းနည်းဖြင့် သတိမထားမိသည့်အပြင်၊ လုံးဝ စိတ်မကောင်းမဖြစ်ပေ။ ယင်းက သင်၏ ဘုရားသခင်အပေါ်ထားသော ချစ်ခြင်းနှင့် ကြောက်ရွံ့ခြင်းကို မေးခွန်းထုတ်စရာ ဖြစ်စေသည် မဟုတ်လော။ (ဖြစ်စေပါသည်။) ဘုရားသခင်အပေါ်ထားသော သင်၏ ချစ်ခြင်းနှင့် ကြောက်ရွံ့ခြင်းကို မဆိုထားနှင့်၊ သင်၏ယုံကြည်ခြင်းပင်လျှင် မေးခွန်းထုတ်စရာ ဖြစ်သည်။ ဘုရားသခင်အပေါ်ထားသော သင်၏ ချစ်ခြင်းနှင့် ကြောက်ရွံ့ခြင်းသည် ခိုင်လုံမှုမရှိပေ။ ယင်းမှာ အခြေအမြစ်မရှိပေ။ ပူဇော်သက္ကာများကို ကောင်းမွန်စွာ ထိန်းသိမ်းစောင့်ရှောက်ခြင်းသည် ခေါင်းဆောင်များနှင့် အမှုဆောင်များ ဖြည့်ဆည်းသင့်သော ဝတ္တရားတစ်ခုဖြစ်ပြီး ၎င်းတို့၏ ရှောင်လွှဲမရသော တာဝန်လည်း ဖြစ်သည်။ အကယ်၍ ပူဇော်သက္ကာများကို ကောင်းမွန်စွာ စောင့်ရှောက်ကာကွယ်ထားခြင်းမရှိပါက ယင်းမှာ ၎င်းတို့ဘက်မှ တာဝန် ပျက်ကွက်ခြင်း ဖြစ်သည်။ ပူဇော်သက္ကာများကို ညံ့ဖျင်းစွာ ထိန်းသိမ်းစောင့်ရှောက်သူအားလုံးသည် အယောင်ဆောင် ခေါင်းဆောင်များနှင့် အယောင်ဆောင် အမှုဆောင်များပင် ဖြစ်ကြသည်ဟု ဆိုနိုင်ပေသည်။