၁ စိတ်သဘောထားပြောင်းလဲမှုတစ်ခုမှာ နေ့ချင်းညချင်း မဖြစ်ပေ၊ ဤသည်မှာ အမှန်တရားတစ်ခုပင် ဖြစ်သည်။ ဤသို့ဖြစ်ရသည့် အကြောင်းရင်းမှာ စိတ်သဘောထားပြောင်းလဲမှုသည် လူတစ်ဦး၏ ဖောက်ပြန်ပျက်စီးသော အနှစ်သာရ၏ အရင်းအမြစ်ကို ရှာဖွေတွေ့ရှိခြင်းမှ ရရှိသည့် ပြောင်းလဲမှုမျိုးပင် ဖြစ်၍ဖြစ်သည်။ ဤဖြစ်စဉ်အတွင်း၌ အမှုအရာများစွာ ကြုံရပြီးနောက်တွင် သင်သည် သမ္မာတရား၏ ကဏ္ဍတစ်ခုတည်းကိုသာ နားလည်ကောင်းနားလည်လိမ့်မည် ဖြစ်ပြီး၊ ထို့နောက်တွင်မှ သင့်စိတ်သဘောထား အပြောင်းအလဲ၏ ကဏ္ဍတစ်ခုကို ရရှိလိမ့်မည် ဖြစ်သည်။ သို့မဟုတ် လူများ၊ အဖြစ်အပျက်များ၊ အမှုအရာများနှင့် ခြားနားသော ပတ်ဝန်းကျင်များစွာကို ကြုံတွေ့ရပြီးနောက်နှင့် ကွေ့ကောက်သောလမ်းများစွာကို လျှောက်ရပြီးနောက်မှသာ ပြောင်းလဲခြင်း အနည်းငယ်မျှကိုသာ ရရှိနိုင်ကောင်း ရရှိလိမ့်မည်ဖြစ်သည်။ သင့်ပြောင်းလဲမှု၏ ပမာဏ မည်မျှရှိလင့်ကစား ယင်းမှာ ဘုရားသခင်၏ အမြင်တွင် အဖိုးတန်ပေသည်။ သင်သည် လွန်စွာ ဒုက္ခခံပြီး ကြီးမားသော အဖိုးအခ ပေးခဲ့ရသောကြောင့် သူသည် ယင်းကို တန်ဖိုးထားပြီး အောက်မေ့သည်။ ဘုရားသခင်သည် လူတို့၏စိတ်နှလုံး နက်ရှိုင်းသည့်အတွင်းပိုင်းကို ကြည့်မြင်ပြီး၊ သင်၏ စိတ်ဆန္ဒများ အဘယ်အရာဖြစ်သည်ကို သူသိနားလည်သည်။ သူသည် သင်၏ အားနည်းချက်များ အဘယ်အရာဖြစ်သည်ကိုလည်း သိရှိပြီး၊ ထို့ထက်ပို၍ပင် သင်လိုအပ်သည့်အရာကို သိနားလည်သည်။

၂ သမ္မာကျမ်းစာထဲတွင် ပျောက်သောသား ပြန်လာခြင်းနှင့် စပ်ဆိုင်သော ပုံပြင်တစ်ခုရှိသည်။ ထိုကဲ့သို့သော ပုံဥပမာတစ်ခုကို အဘယ့်ကြောင့် ဖန်တီးရသနည်း။ လူသားမျိုးနွယ်ကို ကယ်တင်ရန် ဘုရားသခင်၏ အလိုတော်မှာ စစ်မှန်သည်။ သူသည် လူတို့အား နောင်တရရန်နှင့် ပြောင်းလဲရန် အခွင့်အရေးများကို ပေးပြီး ဤဖြစ်စဉ် အတောအတွင်း သူသည် လူတို့ကို နားလည်ပြီး ၎င်းတို့၏ အားနည်းချက်များနှင့် ၎င်းတို့၏ ဖောက်ပြန်ပျက်စီးခြင်း၏ အတိုင်းအတာအပေါ် လေးနက်သော အသိပညာရှိသည်။ ၎င်းတို့ ထိမိ၍လဲကြမည်ကို သူ သိသည်။ ဘုရားသခင်သည် လူတို့၏ အတွင်းနှလုံးသားကို မြင်တော်မူ၏ဟု ဆိုထားခြင်းဖြစ်သည်။ သင် မည်မျှ အားနည်ပါစေ၊ ဘုရားသခင်၏ နာမကို မစွန့်သရွေ့၊ ဘုရားသခင် သို့မဟုတ် ဤလမ်းကို သင်ကျောခိုင်းခြင်း မပြုသရွေ့ သင်သည် စိတ်သဘောထား ပြောင်းလဲမှုကိုရရန် အခွင့်အရေးတစ်ခု အမြဲ ရှိလိမ့်မည်။ စိတ်သဘောထား ပြောင်းလဲမှုမှာ အဘယ်အရာဖြစ်ကြောင်း ကျွန်ုပ်တို့ သိရသည့်အခါနှင့် စိတ်သဘောထား ပြောင်းလဲမှုကို တွေ့ကြုံဖို့ ကျွန်ုပ်တို့ ကြုံရမည့် ဖြစ်စဉ်မျိုးကို ကျွန်ုပ်တို့ နားလည်သောအခါတွင် စိုးရိမ်စရာမလိုပေ။ ထို့ထက် ကျွန်ုပ်တို့ မိမိကိုယ်ကိုယ်ယုံကြည်မှု ရှိသင့်သည်။ စိတ်သဘောထားပြောင်းလဲမှု ရရှိခြင်းအားဖြင့် ကျွန်ုပ်တို့သည် ဘုရားသခင်၏အလုပ်မှာ ယထာဘူတရော၊ လက်တွေ့ပါကျကြောင်း၊ သူသည် စာတန်၏ ဖောက်ပြန်ပျက်စီးခြင်း အနှစ်သာရမှ လူသားများကို ကယ်တင်ရန်နှင့် စာတန်၏လက်မှ သူတို့ကို ပြန်လုယူရန် တန်ခိုးအာဏာရှိကြောင်းကို ကျွန်ုပ်တို့ မြင်တွေ့နိုင်သည်။ သူသည် လူတို့ကို စိတ်သဘောထားပြောင်းလဲမှု ရရှိခွင့်ပြုရန်အတွက် တန်ခိုးအာဏာနှင့် ဉာဏ်ပညာလည်း ရှိသည်။

“နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောချက်များ၊ မိမိ၏စိတ်သဘောထားပြောင်းလဲခြင်းအပေါ် လက်တွေ့လုပ်ဆောင်ခြင်း လမ်းကြောင်း” ကို ကောက်နုတ်၍ ဆီလျော်စွာ ပြုပြင်ထားသည်