ဘုရားသခင်သည် လူသားမျိုးနွယ်ကို ချစ်သည်။ ဤသည်မှာ မှန်ကန်သည်၊ ထို့အပြင် ဤအမှန်တရားကို လူတိုင်းက အသိအမှတ်ပြုသည်။ သို့ဆိုလျှင် ဘုရားသခင်က လူသားကို မည်သို့ချစ်သနည်း။ (ဘုရားသခင်သည် သမ္မာတရားကို ဖော်ပြသည်၊ လူသားကို သမ္မာတရားဖြင့် ထောက်ပံ့သည်၊ ထုတ်ဖော်သည်၊ တရားစီရင်သည်၊ ဆုံးမပဲ့ပြင်သည်၊ ၎င်းတို့ကို စစ်ကြောပြီး စစ်ဆေးသည်၊ သမ္မာတရားကို နားလည်ဖို့နှင့် ရယူဖို့ ၎င်းတို့ကို ခွင့်ပြုပေးသည်။) ဤသည်မှာ သင်တို့ တွေ့ကြုံပြီး မြင်ပြီးသမျှအားလုံး ဖြစ်သည်။ လူသားမျိုးနွယ်အတွက် သူ၏ချစ်ခြင်းကို ဘုရားသခင်၏ ဖော်ပြချက်သည် ခေတ်တစ်ခုနှင့်တစ်ခု ကွာခြားသည်။ အချို့အခြေအနေများတွင် ဘုရားသခင်၏ချစ်ခြင်းသည် လူများ၏အယူဝါဒများနှင့် ကိုက်ညီသည်၊ ပြီးလျှင် ယင်းကို ၎င်းတို့ ချက်ချင်း နားလည်သဘောပေါက်ပြီး အသိအမှတ်ပြုနိုင်သည်။ သို့သော် တစ်ခါတစ်ရံတွင် ဘုရားသခင်၏ချစ်ခြင်းသည် လူများ၏အယူဝါဒများနှင့် ဆန့်ကျင်နေပြီး လူများက လက်ခံဖို့ ဆန္ဒမရှိဖြစ်တတ်သည်။ ဘုရားချစ်ခြင်း၏ မည်သည့်လက္ခဏာသွင်ပြင်များက လူများ၏အယူဝါဒများနှင့် ဆန့်ကျင်နေသနည်း။ ဘုရားသခင်၏တရားစီရင်ခြင်း၊ ပြစ်တင်ဆုံးမခြင်း၊ ပြစ်တင်ရှုတ်ချခြင်း၊ အပြစ်ဒဏ်ပေးခြင်း၊ အမျက်ဒေါသနှင့် ကျိန်ခြင်းအမင်္ဂလာများ အစရှိသည်တို့ဖြစ်သည်။ ဤအရာများကို မည်သူမျှ ရင်ဆိုင်လိုခြင်းမရှိသကဲ့သို့ ယင်းတို့ကို လက်ခံနိုင်ခြင်းမရှိပေ၊ သို့မဟုတ် ဘုရားသခင်၏ ချစ်ခြင်းသည် ဤနည်းအားဖြင့် ထင်ရှားနိုင်ကြောင်းကို ၎င်းတို့ မည်သည့်အခါမျှ စိတ်မကူးမိခဲ့ပေ။ သို့ဆိုလျှင် ဘုရားသခင်၏ချစ်ခြင်းကို လူသားက နဂိုမူလက မည်သို့ဘောင်ခတ်ခဲ့သနည်း။ ၎င်းတို့သည် နာမကျန်းသူများကို သခင်ယေရှု၏ အနာငြိမ်းစေခြင်း၊ နတ်ဆိုးများကို မောင်းထုတ်ခြင်း၊ လူငါးထောင်တို့ကို ပေါင်မုန့်ငါးလုံးနှင့် ငါးနှစ်ကောင်ဖြင့် ကျွေးမွေးခြင်း၊ ပေါလျှံကြွယ်ဝသည့်ကျေးဇူးတော်ကို ပေးအပ်ခြင်းနှင့် လမ်းပျောက်နေကြသည့်သူတို့ကို ရှာဖွေခြင်းတို့ဖြင့် ဘုရားသခင်၏ချစ်ခြင်းကို နဂိုမူလက ဘောင်ခတ်ခဲ့ကြသည်။ ၎င်းတို့၏ စိတ်ကူးပုံဖော်မှုတွင် ဘုရားသခင်က ၎င်းတို့ကို အမြဲတစေ အလွန်ညင်သာစွာဖြင့် ကြင်ကြင်နာနာပွတ်သပ်ရင်း လူသားမျိုးနွယ်ကို သိုးသူငယ်ကလေးတစ်ကောင်သဖွယ် ဆက်ဆံသည်။ ဤသည်မှာ ၎င်းတို့အတွက် ဘုရားသခင်၏ချစ်ခြင်းတွင် ပါဝင်သည့်အရာဖြစ်သည်။ ဤအကြောင်းကြောင့် ဘုရားသခင်က ပြင်းပြင်းထန်ထန်ပြောဆိုကာ တရားစီရင်ခြင်း၊ ပြစ်တင်ဆုံးမခြင်း၊ ရိုက်နှက်ခြင်းနှင့် ဆုံးမပဲ့ပြင်ခြင်းတို့ဖြင့် ကိုင်တွယ်ဖြေရှင်းခြင်းကို ၎င်းတို့ သတိပြုမိသောအခါ ယင်းသည် ၎င်းတို့ စိတ်ကူးပုံဖော်ထားသည့် ဘုရားသခင်ပုံစံနှင့် ထိပ်တိုက်တွေ့ကာ ၎င်းတို့၌ အယူဝါဒများ ဖြစ်ပေါ်လာကြသည်၊ ပုန်ကန်လာကြပြီး ဘုရားသခင်ကို ငြင်းဆန်ခြင်းပင် လုပ်လာကြသည်။ အကယ်၍ သင်တို့ကို ဘုရားသခင်က ကျိန်ဆဲမည်ဆိုလျှင်၊ သင်တို့တွင် လူ့သဘာဝကင်းမဲ့ကြောင်း၊ သမ္မာတရားကို မချစ်ကြကြောင်း၊ လူ့တိရစ္ဆာန်တစ်ကောင်နှင့် မခြားကြကြောင်းအပြင် သင်တို့ကို သူက ကယ်တင်လိမ့်မည်မဟုတ်ကြောင်း ပြောဆိုလျှင် သင်တို့ မည်သို့ထင်ကြမည်နည်း။ ဘုရားသခင်၏ချစ်ခြင်းသည် မစစ်မှန်ဟုလည်းကောင်း၊ ဘုရားသခင်သည် ချစ်ခင်နှစ်လိုဖွယ် မကောင်းဟုလည်းကောင်း သင်ထင်မည်လော။ သူ့အပေါ် သင်၏ယုံကြည်ခြင်း ဆုံးရှုံးသွားမည်လော။ “ကျွန်ုပ်ကို ကယ်တင်ဖို့ ဘုရားသခင်က ကျွန်ုပ်ကို တရားစီရင်၍ ပြစ်တင်ဆုံးမသော်လည်း သူက ကျွန်ုပ်ကို ကျိန်ဆဲမည်ဆိုလျှင် ကျွန်ုပ်၏ဘုရားသခင်အဖြစ် သူ့ကို ကျွန်ုပ် လက်မခံပါ။ အကယ်၍ ဘုရားသခင်က တစ်ယောက်ယောက်ကို ကျိန်ဆဲပါက ယင်းက ထိုသူအတွက် အဆုံးသတ်ပြီဟု ဆိုလိုသည်မဟုတ်လော။ ၎င်းသည် အပြစ်ဒဏ်ပေးခံရမည်ဖြစ်ပြီး ငရဲသို့ သက်ဆင်းရလိမ့်မည်ဟု ဆိုလိုသည်မဟုတ်လော။ မျက်မြင်ထင်ရှား အဆုံးသတ်တစ်ခုမျှမရှိဘဲနှင့် ဘုရားသခင်အပေါ် ယုံကြည်နေခြင်းတွင် အဘယ်အကျိုးရှိသနည်း” ဟု အချို့က ဆိုကြသည်။ ဤသည်မှာ လွဲချော်နေသော အယူဝါဒတစ်ခု မဟုတ်လော။ အကယ်၍ ဘုရားသခင်က အနာဂတ်တစ်နေ့နေ့တွင် သင့်ကို ကျိန်ဆဲပါက ယခု သင်သူ့နောက်သို့ လိုက်နေသကဲ့သို့ သင်လိုက်ဦးမည်လော။ သင်၏တာဝန်ကို သင်ဆက်လုပ်နေဦးမည်လော။ ပြောဖို့ ခက်လှသည်။ လူအချို့သည် ၎င်းတို့၏တာဝန်တွင် မဆုတ်မနစ်ကြိုးစားနိုင်ကြသည်။ ၎င်းတို့သည် သမ္မာတရားလိုက်စားသည့်အပေါ်တွင် အလေးအနက်ထားကြပြီး ပြင်ဆင်ထားကြပြီးဖြစ်သည်။ သို့ရာတွင် အခြားလူများကမူ သမ္မာတရားကို မလိုက်စားကြသကဲ့သို့ အသက်တာတိုးတက်ရေးအပေါ်တွင် အလေးမထားကြပေ၊ ဤအရာများကို ၎င်းတို့ လျစ်လျူရှုထားကြသည်။ ၎င်းတို့စဉ်းစားသမျှမှာ ဆုလာဘ်များနှင့် အကျိုးခံစားခွင့်များ ရရှိဖို့နှင့် ဘုရားအိမ်တော်တွင် အသုံးကျသောလူတစ်ယောက် ဖြစ်ဖို့သာဖြစ်သည်။ လတ်တလောတွင် ၎င်းတို့မည်သည့်အလုပ်ကို လုပ်ဆောင်ခဲ့သည်၊ အသင်းတော်အတွက် မည်သည့်ကောင်းမှုများကို လုပ်ဆောင်ခဲ့သည်၊ မည်သည့်အဖိုးအခကြီးကြီးမားမား ပေးဆပ်ခဲ့သည်နှင့် မည်သည့်ဆုလာဘ်များနှင့် သရဖူများကို ၎င်းတို့အား ပေးသင့်သည်ဆိုသည်တို့ကို အခါအခွင့်သင့်တိုင်း ၎င်းတို့ အစဉ်သဖြင့် ပေါင်းရုံးသုံးသပ်ကြသည်။ ဤသည်တို့မှာ ၎င်းတို့အချိန်အားတိုင်း ပေါင်းရုံးသုံးသပ်လေ့ရှိသည့် ကိစ္စမျိုးများဖြစ်ကြသည်။ ထိုကဲ့သို့သောလူများကို ဘုရားသခင်က ကျိန်ဆဲသောအခါ ယင်းက ၎င်းတို့အတွက် တုန်လှုပ်ဖွယ်ရာနှင့် မမျှော်လင့်ထားသောအဖြစ် မဟုတ်လော။ ၎င်းတို့သည် ဘုရားသခင်အပေါ် ယုံကြည်ခြင်းကို ချက်ချင်းရပ်တန့်ပစ်လိုက်နိုင်ဖွယ် ရှိသလော။ ဤသည်က ဖြစ်နိုင်ချေရှိသလော။ (ဟုတ်ပါသည်။) ဖန်ဆင်းခံတစ်ဦးက ဖန်ဆင်းရှင်အပေါ် ရှိသင့်သည့် တစ်ခုတည်းသော သဘောထားမှာ အကြွင်းမဲ့ ကျိုးနွံနာခံခြင်းတစ်ခု ဖြစ်သည့် ကျိုးနွံနာခံခြင်းတစ်ခု ဖြစ်သည်။ ဤသည်မှာ ယနေ့ခေတ်လူအချို့ လက်ခံကောင်း လက်ခံနိုင်ခြင်း မရှိသည့် အရာတစ်ခု ဖြစ်သည်။ ဤသည်မှာ အဘယ်ကြောင့်ဆိုသော် လူသား၏ ဝိညာဉ်ရင့်ကျက်မှုသည် သေးငယ်လွန်းပြီး ၎င်းတို့သည် သမ္မာတရား စစ်မှန်မှုမရှိသောကြောင့် ဖြစ်သည်။ ဘုရားသခင်သည် သင်၏ အယူအဆများနှင့် ကွဲလွဲသောအရာများကို လုပ်ဆောင်သောအခါ သင်သည် ဘုရားသခင်ကို အနက်အဓိပ္ပာယ်ကောက်လွဲနိုင်ခြေရှိလျှင်၊ ဘုရားသခင်ကို ပုန်ကန်ပြီး ဘုရားသခင်ကို သစ္စာဖောက်နိုင်ချေပင် ရှိလျှင် သင်သည် ဘုရားသခင်ကို ကျိုးနွံနာခံနိုင်ခြင်းနှင့် အလှမ်းဝေးလေသည်။ လူသားသည် ဘုရားသခင်၏ နှုတ်ကပတ်တော်များအားဖြင့် ထောက်ပံ့ခံရပြီး ရေလောင်းခံရစဉ်တွင် ၎င်းတို့သည် အမှန်အားဖြင့် တစ်ခုတည်းသောပန်းတိုင်အတွက် ကြိုးပမ်းနေပေသည်။ ယင်းမှာ နောက်ဆုံးတွင် ဘုရားသခင်ကို အကြွင်းမဲ့၊ လုံးဝ ကျိုးနွံနာခံမှုတစ်ခုကို စွမ်းဆောင်ရရှိနိုင်ရန် ဖြစ်သည်၊ ယင်းအခြေအနေတွင် ဤဖန်ဆင်းခံဖြစ်သည့် သင်သည် သတ်မှတ်ထားသည့် စံနှုန်းကို ရောက်ရှိပြီးဖြစ်လိမ့်မည်။ ဘုရားသခင်က သင်၏ အယူအဆများနှင့် ကွဲလွဲသည့်အရာများကို တမင်လုပ်ဆောင်သောအချိန်များ၊ သင်၏ ဆန္ဒများနှင့် ဆန့်ကျင်သောအရာများကို တမင်လုပ်ဆောင်သောအချိန်များရှိသည်။ ပြီးလျှင် ထိုအရာများသည် သမ္မာတရားနှင့် ဆန့်ကျင်ကာ သင့်အပေါ် မစာနာဘဲ သင်၏ကိုယ်ပိုင် နှစ်သက်မှုများနှင့် မကိုက်ညီသည့် ပုံစံပင် ရှိနေနိုင်သည်။ ဤအရာများသည် သင့်အတွက် လက်ခံရန် ခက်ခဲနိုင်သည်။ ထိုအရာများကို သင် နားလည်သဘောပေါက်ခြင်း မရှိကောင်း မရှိနိုင်ပေ။ ထိုအရာများကို သင်မည်မျှ ပိုင်းခြားစိစစ်ပါစေ ထိုအရာများသည် သင့်အတွက် မှားယွင်းသည်ဟု ခံစားမိနိုင်ပြီး ထိုအရာများကို သင် လက်မခံနိုင်ခြင်း ဖြစ်နိုင်သည်။ ဘုရားသခင်သည် ဤအရာကို လုပ်ဆောင်သည်မှာ ကျိုးကြောင်းမသင့်ဟု သင် ခံစားရနိုင်သည်။ သို့သော် အမှန်တကယ်တွင် ဘုရားသခင်သည် ဤအရာကို တမင်တကာ လုပ်ဆောင်ခဲ့သည်။ ထို့ကြောင့် ဤအရာများကို လုပ်ဆောင်ရာတွင် ဘုရားသခင်၏ ရည်ရွယ်ချက်သည် အဘယ်နည်း။ ယင်းသည် သင့်အား စမ်းသပ်ပြီး ထုတ်ဖော်ရန် သင်သည် သမ္မာတရားကို ရှာဖွေနိုင်ခြင်းရှိမရှိ ကြည့်ရန်၊ သင်သည် ဘုရားသခင်အပေါ် အမှန်တကယ် ကျိုးနွံနာခံခြင်း ရှိမရှိကြည့်ရန် ဖြစ်သည်။ ဘုရားသခင် လုပ်ဆောင်ပြီး မေးမြန်းသည့်အရာ အားလုံးအတွက် အခြေပြုချက်ကို မရှာဖွေနှင့်။ အဘယ်ကြောင့်နည်းဟု မမေးနှင့်။ ဘုရားသခင်နှင့် ကျိုးကြောင်းပြ ငြင်းခုံခြင်းသည် အသုံးမဝင်ပေ။ ဘုရားသခင်သည် သမ္မာတရားဖြစ်သည်ဟု သင် သိမြင်ပြီး အကြွင်းမဲ့ ကျိုးနွံနာခံခြင်းကို လုပ်ဆောင်နိုင်စွမ်း ရှိဖို့သာလိုသည်။ ဘုရားသခင်သည် သင်၏ ဖန်ဆင်းရှင်ဖြစ်ပြီး သင်၏ ဘုရားသခင်ဖြစ်သည်ဟု သိမြင်ဖို့သာလိုသည်။ ဤသည်မှာ မည်သည့်ကျိုးကြောင်းစဉ်းစားမှုမဆိုထက် မြင့်သည်။ မည်သည့် လောကီအသိပညာများထက်မဆို မြင့်သည်။ လူသား၏ အကျင့်စာရိတ္တ၊ ကျင့်ဝတ်၊ အသိပညာ၊ အတွေးအခေါ်၊ သို့မဟုတ် ရိုးရာယဉ်ကျေးမှုတိုင်းထက် မြင့်မားသည်။ လူသား၏ ခံစားချက်များ၊ လူသား၏ ဖြောင့်မတ်မှုနှင့် လူသား၏ ချစ်ခြင်းဆိုသော အရာများထက်ပင် မြင့်မားသည်။ ယင်းသည် အရာအားလုံးထက် မြင့်မားသည်။ ဤအရာကို သင် ရှင်းလင်းစွာ မသိလျှင် သင့်တွင် တစ်စုံတစ်ခုဖြစ်ပျက်ပြီး သင်လဲကျသည့်နေ့ရက်သည် အနှေးနှင့်အမြန် ရောက်လာလိမ့်မည်။ အနည်းဆုံးအနေဖြင့် သင်သည် ဘုရားသခင်ကို ဆန့်ကျင်ပုန်ကန်ပြီး လွဲမှားသောလမ်းကို လျှောက်လိမ့်မည်။ သင်သည် အဆုံးတွင် နောင်တရနိုင်လျှင်၊ ဘုရားသခင်၏ ချစ်ဖွယ်ကောင်းခြင်းကို သိမြင်လျှင်၊ သင့်တွင်ရှိသော ဘုရားသခင်၏ လုပ်ဆောင်မှု၏ အရေးပါမှုကို သိမြင်လျှင် သင်သည် ကယ်တင်ခြင်းအတွက် မျှော်လင့်ချက် ရှိနေဦးမည်ဖြစ်သည်။ သို့သော် ဤအရာကြောင့် သင်သည် လဲကျပြီး ပြန်၍ မတက်နိုင်လျှင် သင့်၌ မျှော်လင့်ချက်မရှိပေ။ ဘုရားသခင်က လူတို့ကို တရားစီရင်သည်ဖြစ်စေ၊ ပြစ်တင်ဆုံးမသည်ဖြစ်စေ၊ သို့မဟုတ် ကျိန်ဆဲသည်ဖြစ်စေ ဤအရာအားလုံးသည် လူတို့ကို ကယ်တင်ဖို့အတွက်ဖြစ်သည်။ လူတို့က ကြောက်စရာမလိုပေ။ မည်သည့်အရာကို သင်ကြောက်သင့်သနည်း။ ဘုရားသခင်က “ငါ သင့်ကို ပစ်ပစ်ခါခါငြင်းသည်” ဟု ပြောသည်ကို ကြောက်သင့်သည်။ ဘုရားသခင်က ဤသို့ပြောလျှင် သင်သည် ဒုက္ခရောက်ပြီဖြစ်သည်။ ယင်းသည် ဘုရားသခင်က သင့်ကို ကယ်တင်မည်မဟုတ်၊ သင်သည် ကယ်တင်ခြင်းအတွက် မျှော်လင့်ချက်မရှိဟု အဓိပ္ပာယ်သက်ရောက်သည်။ ထို့ကြောင့် ဘုရားသခင်၏ အမှုတော်ကို လက်ခံရာတွင် လူတို့သည် ဘုရားသခင်၏ ရည်ရွယ်ချက်များကို နားလည်ရမည်။ သင်သည် မည်သည့်အရာကို လုပ်ဆောင်သည်ဖြစ်စေ ဘုရားနှုတ်ကပတ်တော်နှင့်ပတ်သက်လျှင် “တရားစီရင်ခြင်းနှင့် ပြစ်တင်ဆုံးမခြင်းက အဆင်ပြေသည်။ သို့သော် ရှုတ်ချခြင်း၊ ကျိန်ဆဲခြင်း၊ ဖျက်ဆီးခြင်းတို့က ကျွန်ုပ်အတွက် အဆုံးသတ်ပြီဆိုသည့် သဘောဖြစ်သည်မဟုတ်လော။ ဖန်ဆင်းခံဖြစ်ခြင်း၏ အဓိပ္ပာယ်မှာ အဘယ်နည်း။ ထို့ကြောင့် ကျွန်ုပ်သည် ဖန်ဆင်းခံဖြစ်မည် မဟုတ်တော့ဘဲ သင်သည် ကျွန်ုပ်၏ ဘုရားသခင်ဖြစ်မည် မဟုတ်တော့ပေ။” ဟု ပြောဆိုလျက် ကြေးများခြင်းမပြုနှင့်။ သင်သည် ဘုရားသခင်ကို ငြင်းပယ်ပြီး သင်၏ သက်သေခံချက်တွင် ခိုင်မာစွာ မရပ်တည်လျှင် ဘုရားသခင်က သင့်အား အမှန်တကယ် ငြင်းပယ်နိုင်သည်။ ဤအရာကို သင်တို့သိသလော။ လူတို့သည် ဘုရားသခင်ကို ယုံကြည်ခဲ့သည်မှာ မည်မျှကြာသည်ဖြစ်စေ၊ လမ်းမည်မျှကို ၎င်းတို့ ခရီးသွားခဲ့သည်ဖြစ်စေ၊ အလုပ်မည်မျှကို လုပ်ဆောင်ပြီးဖြစ်စေ၊ သို့မဟုတ် တာဝန်မည်မျှကို ၎င်းတို့ ထမ်းဆောင်ပြီးဖြစ်စေ ဤအချိန်ကာလအတွင်း ၎င်းတို့ လုပ်ဆောင်ခဲ့သမျှသည် တစ်ခုသောအရာအတွက် ပြင်ဆင်ခြင်း ဖြစ်သည်။ အဘယ်အရာနည်း။ ၎င်းတို့သည် အဆုံးတွင် ဘုရားသခင်အပေါ် အကြွင်းမဲ့ ကျိုးနွံနာခံခြင်းရှိဖို့ရန်၊ ခြွင်းချက်မရှိ ကျိုးနွံနာခံခြင်းရှိဖို့ရန် ပြင်ဆင်နေခြင်းဖြစ်သည်။ “ခြွင်းချက်မရှိ နာခံခြင်း” ဆိုသည်မှာ အဘယ်အရာကို ဆိုလိုသနည်း။ ယင်းက သင်သည် အကျိုးအကြောင်းသင့် ရှင်းပြခြင်း မပြုလုပ်ဘဲ သင်၏ ကိုယ်ပိုင်အရှိအတိုင်းဖြစ်သော အကြောင်းပြချက်များနှင့်ပတ်သက်ပြီး လုံးဝ မပြောခြင်းကို ဆိုလိုသည်။ သင်သည် စကားကတ်ပြောဆိုခြင်း လုံးဝ မပြုလုပ်ဟု ဆိုလိုသည်။ သင်သည် ဖန်ဆင်းခံတစ်ဦးဖြစ်သဖြင့် ဤအရာသည် သင်နှင့် မထိုက်တန်ပေ။ သင်သည် ဘုရားသခင်နှင့် စကားကတ်ပြောဆိုလျှင် သင်၏ နေရာကို မှားယွင်းမှတ်ယူပြီး ဖြစ်သည်။ သင်သည် ဘုရားသခင်နှင့် ကျိုးကြောင်းပြငြင်းခုံရန် ကြိုးစားသောအခါ သင်၏ နေရာကို တစ်ဖန် မှားယွင်းမှတ်ယူပြီး ဖြစ်သည်။ ဘုရားသခင်နှင့် မငြင်းခုံနှင့်။ အကြောင်းပြချက်ကို အဖြေရှာရန် အစဉ် မကြိုးစားနှင့်။ သင်ကျိုးနွံနာခံခြင်း မရှိမီတွင် နားလည်ရန်၊ သင် နားမလည်သောအခါတွင် ကျိုးနွံနာခံခြင်း မရှိရန် မရမက လုပ်ဆောင်ခြင်းမပြုနှင့်။ သင်သည် ဤသို့ လုပ်ဆောင်သောအခါ သင်၏နေရာကို မှားယွင်းမှတ်ယူမိပြီဖြစ်သည်။ ဤဖြစ်ရပ်တွင် ဘုရားသခင်အပေါ် သင်၏ ကျိုးနွံနာခံခြင်းသည် အကြွင်းမဲ့မဟုတ်ပေ။ ယင်းမှာ နှိုင်းယှဉ်ချက်ရှိပြီး အခြေအနေပေါ်တွင် မူတည်သော ကျိုးနွံနာခံခြင်းဖြစ်သည်။ ဘုရားသခင်အပေါ် ၎င်းတို့ ကျိုးနွံနာခံခြင်းအတွက် သတ်မှတ်ချက်များ ပြုလုပ်သောသူများသည် ဘုရားသခင်ကို အမှန်ကျိုးနွံနာခံသောသူများဖြစ်သလော။ သင်သည် ဘုရားသခင်ကို ဘုရားသခင်အဖြစ် ဆက်ဆံနေသလော။ သင်သည် ဘုရားသခင်ကို ဖန်ဆင်းရှင်အဖြစ် ကိုးကွယ်သလော။ သင်သည် ဤသို့မလုပ်ဆောင်လျှင် ဘုရားသခင်က သင့်ကို အသိအမှတ်မပြုပေ။ ဘုရားသခင်အပေါ် အကြွင်းမဲ့၊ ခြွင်းချက်မရှိ ကျိုးနွံနာခံခြင်းကို ရရှိရန် မည်သည့်အရာကို သင်တွေ့ကြုံရမည်နည်း။ ပြီးလျှင် မည်သို့ တွေ့ကြုံသင့်သနည်း။ တစ်ခုမှာ လူတို့သည် ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံရမည်။ ပြီးလျှင် ပြုပြင်ခံရခြင်းကို လက်ခံရမည်။ ထို့အပြင် ဘုရားသခင်၏ စေခိုင်းချက်ကို လက်ခံရမည်။ မိမိတို့တာဝန်ကို ထမ်းဆောင်သောအခါတွင် သမ္မာတရားကို လိုက်စားရမည်။ အသက်ဝင်ရောက်မှုနှင့် ဆက်စပ်သော သမ္မာတရား၏ ရှုထောင့်အမျိုးမျိုးကို နားလည်ပြီး ဘုရားသခင်၏ ရည်ရွယ်ချက်များကို နားလည်ခြင်းကို ရယူရမည်။ တစ်ခါတစ်ရံတွင် ဤသည်မှာ လူတို့၏ အစွမ်းအစထက် ကျော်လွန်သည်။ ၎င်းတို့သည် သမ္မာတရားကို နားလည်ခြင်းအားရရှိရန် ထိုးထွင်းသိမြင်နိုင်သော အစွမ်းမရှိပေ။ အခြားလူများက ၎င်းတို့နှင့် မိတ်သဟာယဖွဲ့သည့်အခါ၊ သို့မဟုတ် ဘုရားသခင်က ဖန်တီးသော အခြေအနေအမျိုးမျိုးမှ သင်ခန်းစာများကို သင်ယူခြင်းမှတစ်ဆင့်သာ အနည်းငယ် နားလည်နိုင်သည်။ သို့သော် သင်သည် ဘုရားသခင်အပေါ် ကျိုးနွံနာခံသည့် စိတ်နှလုံးရှိရမည် ဖြစ်သည်ကို သတိပြုမိရမည်။ ဘုရားသခင်နှင့် ကျိုးကြောင်းပြငြင်းခုံရန်၊ သို့မဟုတ် သတ်မှတ်ချက်များပြုလုပ်ရန် မကြိုးစားရပေ။ ဘုရားသခင် လုပ်ဆောင်သမျှသည် လုပ်ဆောင်သင့်သည့်အရာများ ဖြစ်သည်။ သူသည် ဖန်ဆင်းရှင်ဖြစ်ပြီး သင်သည် ဖန်ဆင်းခံတစ်ဦးဖြစ်သောကြောင့် ဖြစ်သည်။ သင့်တွင် ကျိုးနွံနာခံခြင်း သဘောထားတစ်ခုရှိရမည်။ အကြောင်းပြချက်ကို အစဉ်မေးမြန်းခြင်း၊ သို့မဟုတ် သတ်မှတ်ချက်များကို ပြောဆိုခြင်း မပြုလုပ်ရပေ။ သင်သည် ကျိုးနွံနာခံခြင်း၏ အခြေခံအကျဆုံး သဘောထားပင် မရှိပါက၊ ဘုရားသခင်အပေါ် သံသယဖြစ်ပြီး သတိထားခြင်းပင် ဖြစ်တတ်လျှင်၊ သို့မဟုတ် “ဘုရားသခင်သည် ငါ့ကို အမှန်တကယ် ကယ်တင်မည်လော၊ ဘုရားသခင်သည် အမှန်တကယ် ဖြောင့်မတ်ခြင်းရှိမရှိတို့ကို ငါကြည့်ဖို့လိုအပ်သည်။ ဘုရားသခင်က ချစ်ခြင်းဖြစ်သည်ဟု လူတိုင်းက ပြောကြသည်။ ဤသို့ဆိုလျှင် ငါ့တွင် ဘုရားသခင် လုပ်ဆောင်သောအရာ၌ ချစ်ခြင်း အမှန်တကယ် ပါဝင်ခြင်း ရှိမရှိ၊ ယင်းသည် အမှန်တကယ်ပင် ချစ်ခြင်း ဟုတ်မဟုတ်ကို ကြည့်ဖို့လိုအပ်သည်” ဟု သင်၏ စိတ်နှလုံးတွင် ထင်မြင်တတ်လျှင်၊ သင်သည် ဘုရားသခင် လုပ်ဆောင်သောအရာက သင်၏ အယူအဆများ၊ နှစ်သက်မှုများနှင့်ဖြစ်စေ၊ သမ္မာတရားဖြစ်သည်ဟု သင်ယုံကြည်သည့်အရာနှင့်ပင်ဖြစ်စေ ကိုက်ညီခြင်းရှိမရှိကို အစဉ်သဖြင့် စစ်ဆေးနေလျှင် သင်သည် သင်၏ နေရာကို မှားယွင်းမှတ်ယူပြီးဖြစ်သည်။ သင်သည် ဒုက္ခရောက်ပြီဖြစ်သည်။ သင်သည် ဘုရားသခင်၏ စိတ်သဘောထားကို ပုန်ကန်ပြစ်မှားနိုင်ချေရှိသည်။ ကျိုးနွံနာခံခြင်းနှင့် ဆက်စပ်သော သမ္မာတရားများသည် အလွန်အရေးပါသည်။ မည်သည့်သမ္မာတရားကိုမျှ စာကြောင်းနှစ်ကြောင်း၊ သုံးကြောင်းဖြင့် ပြည့်စုံစွာ၊ အသေအချာ ရှင်းပြနိုင်ခြင်းမရှိပေ။ ယင်းတို့အားလုံးသည် လူတို့၏ အမျိုးမျိုးသော အခြေအနေနှင့် ဖောက်ပြန်ပျက်စီးမှုနှင့် ဆက်နွှယ်နေကြသည်။ သမ္မာတရား စစ်မှန်မှုအတွင်းသို့ ဝင်ရောက်ခြင်းကို တစ်နှစ်၊ သို့မဟုတ် နှစ်နှစ်၊ သုံးနှစ်၊ သို့မဟုတ် ငါးနှစ်ဖြင့် မရယူနိုင်ပေ။ အမှုအရာများစွာကို ကြုံတွေ့ရန်၊ ဘုရားနှုတ်ကပတ်တော်၏ တရားစီရင်ခြင်းနှင့် ပြစ်တင်ဆုံးမခြင်းကို များစွာ ကြုံတွေ့ရန်၊ ပြုပြင်ခြင်းကို များစွာ ကြုံတွေ့ရန် လိုအပ်သည်။ အဆုံးတွင် သမ္မာတရားကို လက်တွေ့လုပ်ဆောင်နိုင်စွမ်းကို သင်ရရှိသည့်အချိန်မှသာ သမ္မာတရားကို သင်၏ လိုက်စားခြင်းက ထိရောက်လိမ့်မည်။ ထိုအခါမှသာ သင်သည် သမ္မာတရား စစ်မှန်မှုကို ပိုင်ဆိုင်လိမ့်မည်။ သမ္မာတရား စစ်မှန်မှုကို ပိုင်ဆိုင်သောသူများသာ စစ်မှန်သော အတွေ့အကြုံရှိသူများဖြစ်သည်။