သင်တို့ကိုယ်တိုင် အသက်ရှင်ကျန်ရစ်ရန်၊ ငါ့လုပ်ငန်းဆောင်တာများလည်း ချောမွေ့စွာ အခြေအနေတိုးတက်လာရန်၊ တိုင်းနိုင်ငံအသီးသီးရှိ လူများထံသို့ ငါ့စကား၊ ငါ့အာဏာ၊ ဘုန်းအာနုဘော်နှင့် တရားစီရင်ခြင်းအကြောင်း ဖော်ပြရင်း စကြဝဠာတစ်လျှောက်လုံး ငါအစပြုသည့်အလုပ်များကို ပိုမိုပြည့်စုံစွာနှင့် ပိုမိုသင့်တော်အောင် ဆက်လက် လုပ်ဆောင်ရန် ယနေ့တွင် သင်တို့ကို သတိပေးလိုက်ပါသည်။ သင်တို့အကြား ငါလုပ်ဆောင်သော အလုပ်သည် စကြဝဠာတစ်လျှောက် လုပ်ဆောင်သော ငါ့အမှုများ၏ အစဖြစ်သည်။ ယခုအချိန်သည် နောက်ဆုံးသောကာလ ဖြစ်သော်လည်း “နောက်ဆုံးသော ကာလ” သည် ခေတ်ကာလတစ်ခု၏ အမည်သာ ဖြစ်သည်ကို သိရှိပါ။ ပညတ်တော်ခေတ်နှင့် ကျေးဇူးတော်ခေတ်ကဲ့သို့ ထိုအရာသည် ခေတ်ကာလတစ်ခုကို ရည်ညွှန်းထားခြင်းဖြစ်ပြီး၊ အနည်းငယ်သော နောက်ဆုံးနှစ် သို့မဟုတ် လများကို ညွှန်းဆိုထားခြင်းထက် ခေတ်ကာလတစ်ခုလုံးကို ညွှန်းဆိုထားခြင်း ဖြစ်သည်။ သို့သော်လည်း နောက်ဆုံးသော ကာလသည် ပညတ်တော်ခေတ်၊ ကျေးဇူးတော်ခေတ်တို့ကဲ့သို့ လုံးဝမဟုတ်ပါ။ နောက်ဆုံးသောကာလ၏ လုပ်ငန်းကို ဣသရေလပြည်တွင် မလုပ်ဆောင်ပဲ တစ်ပါးအမျိုးသားများ အကြားတွင် လုပ်ဆောင်သည်။ စကြဝဠာတစ်လျှောက်ရှိ ငါ့ဘုန်းတန်ခိုးသည် အာကာသတစ်ခုလုံး ပြည့်နှံ့စေဖို့အလို့ငှာ ထိုအလုပ်သည် ဣသရေလ၏ ပြင်ပရှိ တိုင်းနိုင်ငံများနှင့် လူမျိုးများမှ လူတို့ကို ငါ့ပလ္လင်ရှေ့တွင် သိမ်းပိုက်အောင်မြင်မှု ဖြစ်ပေသည်။ ထိုသို့ဖြစ်ရခြင်းမှာ ပိုမိုကြီးမားသော ဘုန်းတန်ခိုးကိုရရှိဖို့အလို့ငှာ၊ ကမ္ဘာပေါ်ရှိ သက်ရှိအားလုံးသည် တိုင်းနိုင်ငံတိုင်းသို့ ငါ့ဘုန်းတန်ခိုးကို လက်ဆင့်ကမ်းနိုင်ဖို့ အလို့ငှာ၊ ကမ္ဘာပေါ်၌ ငါခံသည့် ဘုန်းတန်ခိုးအားလုံးကို မျိုးဆက်အားလုံး၊ သက်ရှိအားလုံး မြင်တွေ့နိုင်ဖို့ရန်ဖြစ်သည်။ နောက်ဆုံးသောကာလတွင် ငါလုပ်ဆောင်သော အလုပ်သည် သိမ်းပိုက်ခြင်းလုပ်ငန်းဖြစ်သည်။ ထိုအရာသည် ကမ္ဘာပေါ်ရှိ လူသားများ အားလုံး၏အသက်ကို လမ်းပြခြင်း မဟုတ်ဘဲ လူသားမျိုးနွယ်၏ မပျောက်ပျက်နိုင်သော နှစ်ထောင်ချီကြာ ကမ္ဘာပေါ်၌ ဒုက္ခခံစားရခြင်း၏ အဆုံးသတ်ဖြစ်ပါသည်။ အကျိုးဆက်အနေဖြင့် နောက်ဆုံးသောကာလ၏ အလုပ်သည် နှစ်ထောင်ပေါင်း အချို့မျှကြာသော ဣသရေလပြည်တွင် အလုပ်လုပ်ခြင်းနှင့်လည်းကောင်း၊ ဆယ်စုနှစ်ကြာ ယုဒပြည်တွင် လုပ်ဆောင်ပြီးမှ ဘုရားသခင်၏ ဒုတိယအကြိမ် လူ့ဇာတိခံယူခြင်း မတိုင်မီအထိ နှစ်ထောင်ပေါင်းများစွာ ကြာညောင်းမည့် အလုပ်နှင့်လည်းကောင်း မတူညီနိုင်ပါ။ နောက်ဆုံးသောကာလ၏ လူတို့သည် ရွေးနုတ်သောသူ လူ့ဇာတိ၌ ပြန်လည် ပေါ်ထွန်းလာသည်ကိုသာ တွေ့ကြုံကြရပြီး ဘုရားသခင် ကိုယ်တိုင်၏ စကားတော်နှင့် အလုပ်ကို လက်ခံရရှိ ကြသည်။ နောက်ဆုံးသောကာလ အချိန်မကုန်ဆုံးမီ နှစ်ပေါင်း နှစ်ထောင် ကြာလိမ့်မည် မဟုတ်ပါ။ အချိန်သည် တိုတောင်းမည်ဖြစ်ကာ ယုဒပြည်၌ ကျေးဇူးတော်ခေတ်အတွင်း ယေရှု လုပ်ဆောင်ခဲ့သကဲ့သို့ ဖြစ်လာလိမ့်မည်။ အဘယ်ကြောင့်ဆိုသော် နောက်ဆုံးသောကာလသည် ခေတ်ကာလတစ်ခုလုံး၏ အဆုံးသတ် ဖြစ်သောကြောင့် ဖြစ်သည်။ ထိုကာလသည် ဘုရားသခင်၏ နှစ်ပေါင်းခြောက်ထောင်ကြာ စီမံခန့်ခွဲမှု အစီအစဉ်အဆုံးသတ်နှင့် ပြီးမြောက်ခြင်းဖြစ်ကာ လူသားမျိုးနွယ် ဒုက္ခခံစားရခြင်း အသက်တာ ခရီးလမ်း၏ အဆုံးသတ်လည်း ဖြစ်ပါသည်။ ၎င်းတို့သည် လူသားမျိုးနွယ် တစ်ရပ်လုံးကို ခေတ်ကာလသစ်ထဲသို့ ယူဆောင်သွားခြင်းမရှိပဲ လူသားမျိုးနွယ်၏ အသက်တာကိုလည်း ဆက်လက်အသက်ရှင်ဖို့ ခွင့်ပြုမထားပါ။ ထိုအရာသည် လူသား၏ ဖြစ်တည်မှု သို့မဟုတ် ငါ၏ စီမံခန့်ခွဲမှု အစီအစဉ်အတွက် အဓိပ္ပာယ်မရှိပါ။ လူသားမျိုးနွယ်သည် ဤကဲ့သို့သာ ဆက်လက် အသက်ရှင်သန်နေမည်ဆိုပါက အနှေးနှင့်အမြန် ဆိုသလို သူတို့သည် စာတန်၏ လုံးလုံးလျားလျား ဝါးမြိုခြင်းကို ခံရပြီး၊ ငါပိုင်ဆိုင်သော ဝိညာဉ်များသည်ပင် အဆုံး၌ စာတန်လက်ထဲတွင် အဆုံးရှုံးခံရလိမ့်မည်။ ငါ့လုပ်ငန်းသည် နှစ်ပေါင်း ခြောက်ထောင် ကြာညောင်းပြီး၊ လူသားမျိုးနွယ် တစ်ရပ်လုံးကို စာတန်၏ ထိန်းချုပ်ခြင်းသည်လည်း နှစ်ပေါင်း ခြောက်ထောင်ထက် မကြာအောင် ငါကတိပြုပါသည်။ ထို့ကြောင့် ယခုအချိန်စေ့ပြီဖြစ်သည်။ ငါသည် ဆက်လက် လုပ်ဆောင်မည် မဟုတ်သကဲ့သို့ ထပ်၍ နှောင့်နှေးစေတော့မည် မဟုတ်။ နောက်ဆုံးသောကာလ အတောအတွင်း စာတန်ကို နှိမ်နင်းပြီး၊ ငါ၏ဘုန်းတန်ခိုးအားလုံးကို ပြန်လည်သိမ်းပိုက်ကာ ဘေးရောက်နေသော ဝိညာဉ်အားလုံး ဒုက္ခဘေးမှ လွှတ်မြောက်အောင် ကမ္ဘာပေါ်ရှိ ငါနှင့် သက်ဆိုင်သော ဝိညာဉ်အားလုံးကို ပြန်လည် သိမ်းယူပြီး၊ ကမ္ဘာပေါ်ရှိ ငါ့အလုပ် တစ်ခုလုံးကို အဆုံးသတ်စေမည်ဖြစ်သည်။ ဤနေ့မှစ၍ ကမ္ဘာပေါ်တွင် ငါသည် ဘယ်တော့မှ လူ့ဇာတိခံယူမည် မဟုတ်တော့ပါ၊ အရာခပ်သိမ်းကို ထိန်းချုပ်သည့် ငါ၏ဝိညာဉ်ကို ကမ္ဘာပေါ်တွင် ဘယ်တော့မျှ လုပ်စေမည်မဟုတ်တော့ပါ။ ကမ္ဘာပေါ်တွင် တစ်ခုသာ လုပ်ဆောင်တော့မည် ဖြစ်သည်။ လူသားမျိုးနွယ်ကို အသစ်ပြုပြင်မည်၊ ထိုလူသားမျိုးနွယ်သည် သန့်ရှင်းစင်ကြယ်ပြီး၊ ထိုသူတို့သည် ကမ္ဘာပေါ်ရှိ ငါ၏ သစ္စာရှိသောမြို့ ဖြစ်လိမ့်မည်။ တစ်လောကလုံးကို ငါသည် အမြစ်ဖြတ် သုတ်သင်ပယ်ရှင်းမည် မဟုတ်ကြောင်းနှင့် လူသားမျိုးနွယ် တစ်ရပ်လုံးကို အမြစ်ဖြတ် သုတ်သင်ပယ်ရှင်းမည် မဟုတ်ကြောင်း သိရှိပါ။ ကျန်ရှိသော သုံးပုံတစ်ပုံကို ငါထိန်းသိမ်းမည်။ ငါ့ကိုချစ်ပြီး ငါက လုံးလုံးလျားလျား သိမ်းပိုက်ထားသော သုံးပုံတစ်ပုံကို ကမ္ဘာပေါ်တွင် မျိုးပွား၊ တိုးပွားစေကာ ကမ္ဘာကြီး၏ ချမ်းသာကြွယ်ဝမှုနှင့် ပေါများစွာသော သိုး၊ ဆိတ်များဖြင့် အာဟာရ ဖြည့်တင်းပေးရင်း ပညတ်တော် အောက်တွင် အသက်ရှင်သော ဣသရေလလူမျိုးများ ကဲ့သို့ဖြစ်စေမည်။ ဤလူသားမျိုးနွယ်သည် ငါနှင့်အတူ ထာဝရ ကျန်ရစ်နေပြီး၊ စက်ဆုပ်ရွံရှာဖွယ်သော ယခုလူသားမျိုးနွယ် ကဲ့သို့မဟုတ်၊ ငါ၏ ရယူခြင်းကို ခံခဲ့ပြီးသော သူအားလုံး၏ အစုအဝေးဖြစ်သည့် လူသားမျိုးနွယ်ပင် ဖြစ်သည်။ ထိုကဲ့သို့သော လူသားမျိုးနွယ်သည် စာတန်ကို ငါအောင်နိုင်ပြီးနောက် ကမ္ဘာပေါ်တွင် တည်ရှိသည့် တစ်ခုတည်းသော လူသားမျိုးနွယ် ဖြစ်လိမ့်မည်ဖြစ်ပြီး၊ စာတန်၏ဝိုင်းရံထားခြင်း၊ နှောင့်ယှက်ခြင်း၊ ဖျက်ဆီးခြင်း ခံရတော့မည် မဟုတ်ပါ။ ထိုလူသားမျိုးနွယ်သည် ယနေ့တွင် ငါသိမ်းပိုက်ပြီးသောသူများ၊ ငါ၏ကတိကို ရရှိပြီးသော သူများဖြစ်ကြသည်။ ထို့ကြောင့် နောက်ဆုံးသောကာလ အတောအတွင်း သိမ်းပိုက်ခြင်းခံရသော လူသားမျိုးနွယ်သည် လွတ်ငြိမ်းခွင့်ရသော သူများဖြစ်ကြပြီး၊ ငါ၏ ထာဝရ ကောင်းချီးမင်္ဂလာများကို ရရှိခံစားကြလိမ့်မည်။ ထိုအရာသည်သာ စာတန်အပေါ် ငါ့အောင်နိုင်ခြင်းကို ပြသသည့် တစ်ခုတည်းသော သက်သေအထောက်အထား ဖြစ်လိမ့်မည်ဖြစ်ပြီး၊ စာတန်နှင့် ငါ၏တိုက်ပွဲမှ တစ်ခုတည်းသော လက်ရပစ္စည်းများ ဖြစ်လာမည်။ စစ်ပွဲ၏ ဤလက်ရပစ္စည်းများသည် စာတန် အုပ်စိုးခြင်းမှ ငါကယ်တင်ပြီး၊ နှစ်ပေါင်းခြောက်ထောင်ကြာ ငါ့စီမံခန့်ခွဲမှု အစီအစဉ်၏ တစ်ခုတည်းသော အသီးအပွင့်နှင့် မြင်တွေ့နိုင်သော ရလဒ်တို့ဖြစ်သည်။ သူတို့သည် တိုင်းနိုင်ငံခပ်သိမ်း၊ ဂိုဏ်းဂဏ ခပ်သိမ်း၊ နေရာခပ်သိမ်းနှင့် စကြဝဠာတစ်လျှောက်ရှိ တိုင်းပြည်ခပ်သိမ်းမှ ရောက်ရှိလာကြခြင်းဖြစ်သည်။ သူတို့သည် အမျိုးမျိုးသော မျိုးနွယ်စု၊ အမျိုးမျိုးသော ဘာသာစကား၊ အမျိုးမျိုးသော ရိုးရာနှင့် အသားအရောင်ရှိသောသူများ ဖြစ်ကြပြီး၊ ကမ္ဘာတစ်ဝှမ်း ဂိုဏ်းဂဏခပ်သိမ်း၊ တိုင်းနိုင်ငံခပ်သိမ်း၊ ကမ္ဘာ့နေရာ အစွန်ဆုံးအထိတိုင် ပျံ့နှံ့ကြသည်။ နောက်ဆုံး၌ သူတို့သည် စာတန်၏ အင်အားစုများ လက်လှမ်းမမီနိုင်သော လူသားအစုအဝေးတစ်ခု၊ ပြီးပြည့်စုံသော လူသားမျိုးနွယ် တစ်ခုကို ဖွဲ့စည်းရန် အတူတကွ ရောက်လာကြလိမ့်မည်။ လူသားမျိုးနွယ်စုထဲမှ ငါ၏ သိမ်းပိုက်ခြင်း၊ ကယ်တင်ခြင်းကို မခံရသော လူသားများသည် ပင်လယ်နက်ထဲတွင် တိတ်တဆိတ် နှစ်မြုပ်သွားမည်ဖြစ်ကာ ငါ၏ လောင်မြိုက်နေသည့် မီးတောက်ထဲတွင် ထာဝရကာလတိုင် လောင်ကျွမ်းခြင်းကို ခံရကြလိမ့်မည်ဖြစ်သည်။ သိုးသငယ်၏ အသားကိုစား၊ သိုးသငယ်၏ အသွေးကိုသောက်ကာ သူတို့၏ တံခါးထုပ်များကို သိုးသငယ်၏ အသွေးဖြင့် အမှတ်အသားပြုလုပ်သော ဣသရေလလူမျိုးများကို ချန်ရစ်လျက် အဲဂုတ္တုပြည်၏ သားဦးနှင့် ကျွဲနွားတိရစ္ဆာန်များကို ငါသည် အမြစ်ဖြတ် သုတ်သင်ခဲ့ သကဲ့သို့ အလွန့်အလွန် ညစ်ညမ်းသော လူသားမျိုးနွယ်၊ ဤလူဟောင်းများကို ငါအမြစ်ဖြတ် သုတ်သင်ပယ်ရှင်းမည်။ ငါသိမ်းပိုက်ထားပြီးသည့် ငါ့မိသားစုဝင်များဖြစ်ကြသော လူများသည် သိုးသငယ်ဖြစ်သည့် ငါ့အသားကိုစား၊ ငါ၏ အသွေးကို သောက်သောသူများ ဖြစ်ကြပြီး၊ ငါရွေးနုတ်ပြီးသောသူများ၊ ငါ့ကိုကိုးကွယ်သောသူများ မဟုတ်ကြသလော။ ထိုလူတို့သည် ငါ့ဘုန်းတန်ခိုးနှင့်အတူ အစဉ်အမြဲရှိသောသူ မဟုတ်ကြသလော။ သိုးသငယ်ဖြစ်သည့် ငါ၏အသား မပါသော ထိုသူများသည် ပင်လယ်နက်ထဲသို့ တိတ်တဆိတ် နှစ်မြုပ်သွားပြီးသောသူများ မဟုတ်ကြသလော။ ယနေ့တွင် သူတို့သည် ငါ့ကိုပုန်ကန်ကြပြီ၊ ယနေ့ ငါ့စကားများသည် ဣသရေလသားများ၊ မြေးများထံပြောခဲ့သည့် ယေဟောဝါ စကားကဲ့သို့ ဖြစ်သည်။ သို့သော်လည်း သင်တို့၏ နှလုံးသားများအတွင်းရှိ မာကျောမှုက ငါ့အမျက်ဒေါသကို သိုလှောင်ထားပြီး သင်တို့၏ ကိုယ်ခန္ဓာအပေါ် ဘေးဒုက္ခ ပိုမိုယူဆောင်လာလျက်၊ သင်တို့၏ အပြစ်များအတွက် တရားစီရင်မှု ပိုမို ယူဆောင်လာကာ သင်တို့၏ မဖြောင့်မတ်ခြင်းကြောင့် အမျက်ဒေါသ ပိုမိုတိုးပွားစေသည်။ ယနေ့တွင် ငါ့ကို ထိုကဲ့သို့ ဆက်ဆံလျှင် အမျက်ဒေါသနေ့တွင် အဘယ်သူသည် လွတ်မြောက်နိုင်မည်နည်း။ ငါ၏ ပြစ်တင်ဆုံးမခြင်း မျက်စိအောက်မှ အဘယ်သို့သော ဖြောင့်မတ်သူသည် လွတ်မြောက်နိုင်မည်နည်း။ အနန္တတန်ခိုးရှင် ငါ့လက်တော်မှ အဘယ်သူ၏ အပြစ်များသည် လွတ်မြောက်နိုင်သနည်း။ အနန္တတန်ခိုးရှင် ငါ့တရားစီရင်ခြင်းကို အဘယ်သူ၏ အာဏာ ဖီဆန်ခြင်းက လွတ်မြောက်နိုင်သနည်း။ ငါ ယေဟောဝါသည် တစ်ပါးအမျိုးသား မိသားစုမှ ဆင်းသက်လာသော သင်တို့ကို ပြောနေသည်။ ငါသင်တို့ကို မိန့်ဆိုသည့်စကားမှာ ကျေးဇူးတော်ခေတ်၊ ပညတ်တော်ခေတ်တို့ကို ကျော်လွန်သော်လည်း သင်တို့သည် အဲဂုတ္တုလူမျိုးများထက် မာကျောကြသည်။ ငါသည် ငြိမ်သက်စွာ အလုပ်လုပ်စဉ် ငါ၏ အမျက်ဒေါသကို သင်တို့ သိုထားပြီ မဟုတ်လော။ အနန္တတန်ခိုးရှင် ငါ့နေ့ရက်မှ အနာတရမဖြစ်ဘဲ သင်တို့သည် အဘယ်သို့ လွတ်မြောက် နိုင်မည်နည်း။

သင်တို့အထဲတွင် ငါသည် ဤနည်းကဲ့သို့ စကားပြောပြီးပြီ၊ အလုပ်လုပ်ဆောင်ပြီးပြီ၊ များစွာသော ခွန်အားနှင့် အားထုတ်ကြိုးစားမှုများလည်း ပြုပြီ၊ သို့သော် ရှင်းလင်းစွာ ငါပြောသည့်အရာကို ဘယ်အချိန်က သင်တို့နားထောင်ဖူးသနည်း။ အနန္တတန်ခိုးရှင် ငါ့ကို အဘယ်မှာ ဦးချကြသနည်း။ အဘယ်ကြောင့် ဤကဲ့သို့ ငါ့ကို ဆက်ဆံကြသနည်း။ အဘယ်ကြောင့် သင်တို့ပြောသမျှနှင့် လုပ်ဆောင်သမျှသည် ငါ့အမျက်ဒေါသကို နှိုးဆော်သနည်း။ အဘယ်ကြောင့် သင့်တို့ နှလုံးသားများသည် အလွန်မာကျောသနည်း။ ငါသင်တို့ကို အလဲထိုးဖူးပါသလား။ ငါ့ကို ဝမ်းနည်း၊ ပူပန်စေခြင်းမှတစ်ပါး အဘယ်ကြောင့် ဘာမှမလုပ်ကြသနည်း။ သင်တို့အပေါ် ငါယေဟောဝါ၏ အမျက်ဒေါသ ကျရောက်မည့်နေ့ကို စောင့်နေကြသလော။ သင်တို့၏ မနာခံမှုက ထွက်စေသည့် ငါ့အမျက်ဒေါသကို စေလွှတ်ဖို့ သင်တို့စောင့်နေသလော။ ငါလုပ်ဆောင်သမျှသည် သင့်တို့အတွက် မဟုတ်သလော။ သို့သော်လည်း သင်တို့သည် ယေဟောဝါဖြစ်သည့် ငါ့ကို ဤနည်းအားဖြင့် အမြဲဆက်ဆံ နေပါပြီတကား၊ ငါ၏ ယစ်ပူဇော်သက္ကာကို သင်တို့ခိုးယူပြီး၊ ငါ့ယဇ်ပလ္လင်ပေါ်ရှိ အလှူကို လည်း သင့်တို့အိမ်သို့ ယူသွားကာ ဝံပုလွေတွင်းထဲရှိ သားပေါက်များနှင့် မြေးပေါက်များကို ကျွေးလေပြီ။ လူတို့သည် အချင်းချင်း တစ်ယောက်ကိုတစ်ယောက် တိုက်ကြခိုက်ကြပြီ၊ အချင်းချင်း အမျက်ဒေါသလောင်မြိုက်စွာ မျက်နှာချင်းဆိုင်လျက် ဓါးများ၊ လှံများဖြင့် ရင်ဆိုင်ကြပါပြီတကား၊ အနန္တတန်ခိုးရှင် ငါ့စကားကိုလည်း မစင်ကဲ့သို့ ညစ်ညမ်းအောင် အိမ်သာအတွင်းသို့ ပစ်ပါပြီတကား။ သင်တို့၏ တည်ကြည်မှုက အဘယ်မှာနည်း။ သင်တို့၏ လူ့သဘောသဘာဝသည် သားရဲသဘောသဘာဝ ဖြစ်လာပြီ။ သင်တို့၏ နှလုံးသားများသည် ကျောက်တုံးပမာ ပြောင်းလဲသွားသည်မှာ ကြာလှပြီ။ ငါ၏ အမျက်ဒေါသ ကျရောက်မည့်နေ့သည် အနန္တတန်ခိုးရှင် ငါ့ကို ယနေ့ ဆန့်ကျင်လျက် မကောင်းသော အရာများအား ပြုလုပ်နေသောသူများကို ငါက တရားစီရင်မည့်အချိန် ဖြစ်သည်ကို သင်တို့ မသိသလော။ ဤကဲ့သို့ ငါ့ကိုအရူးလုပ်ရင်း၊ ငါ၏စကားကို နားမထောင်ဘဲ ငါ၏စကားကို ရွှံ့နွံထဲသို့ ပစ်ချလျက်၊ ဤကဲ့သို့ ငါ့နောက်ကွယ်တွင် လုပ်ဆောင်လျက် ငါ့အမျက်ဒေါသနှင့် ပြည့်နေသော စူးစိုက်ကြည့်ခြင်းမှ လွတ်မြောက်နိုင်မည် ထင်သလော။ ငါ၏ယစ်ပူဇော်သက္ကာကို လုယူချိန်နှင့် ငါ့ပစ္စည်းဥစ္စာကို တပ်မက်နေချိန် ငါယေဟောဝါ၏ မျက်စိဖြင့် သင်တို့ကို တွေ့မြင်ပြီဖြစ်ကြောင်း သင်တို့မသိသလော။ ငါ့ယစ်ပူဇော်သက္ကာကို လုယူသည့်နေရာသည် ပူဇော်သက္ကာကို ပေးလှူသည့်နေရာ ယဇ်ပလ္လင် ရှေ့မှောက်တွင်ဖြစ်ကြောင်း သင်တို့မသိသလော။ ဤနည်းအားဖြင့် ငါ့ကိုလှည့်ဖြားရန် သင်တို့ကိုယ်သင်တို့ ပါးနပ်လှပြီဟု အဘယ်ကြောင့် ယုံကြည်နိုင်သနည်း။ စက်ဆုပ်ရွံရှာဖွယ်ကောင်းသော သင်တို့၏အပြစ်မှ ငါ့အမျက်ဒေါသသည် အဘယ်သို့ ထွက်သွားနိုင်မည်နည်း။ မကောင်းသည့် သင်တို့၏အပြုအမူများမှ အဘယ်သို့ ပြင်းထန်သော ငါ့အမျက်ကို ကျော်သွားစေနိုင်မည်နည်း။ ယနေ့ သင်တို့ကျူးလွန်သည့် မကောင်းသောအရာများသည် သင်တို့အတွက် လမ်းမဖွင့်ပေးဘဲ သင်တို့၏ မနက်ဖြန်အတွက် ပြစ်တင်ဆုံးမခြင်းကို သိုထားလေပြီ၊ အနန္တတန်ခိုးရှင် ငါ၏ ပြစ်တင်ဆုံးမခြင်းကို လှုံ့ဆော်နေပြီ။ မကောင်းသည့် သင်တို့၏အပြုအမူများနှင့် မကောင်းသော သင်တို့၏စကားလုံးများက ငါ၏ ပြစ်တင်ဆုံးမခြင်းမှ အဘယ်သို့ လွတ်မြောက်နိုင်မည်နည်း။ သင်တို့၏ ဆုတောင်းချက်များသည် အဘယ်သို့ ငါ၏နားဆီသို့ ရောက်ရှိလာနိုင်မည်နည်း။ သင်တို့၏ မဖြောင့်မတ်ခြင်းအတွက် အဘယ်သို့ ငါလမ်းဖွင့်ပေးနိုင်မည်နည်း။ ငါ့အာဏာကို ဖီဆန်သည့် သင်တို့၏ မကောင်းသည့် အပြုအမှုများကို အဘယ်သို့ ခွင့်လွှတ်နိုင်မည်နည်း။ မြွေကဲ့သို့ အဆိပ်ရှိသည့် သင်တို့၏ လျှာများကို အဘယ်ကြောင့် ငါမဖြတ်နိုင်ရမည်နည်း။ သင်တို့သည် သင်တို့၏ ဖြောင့်မတ်ခြင်းအတွက် ငါ့ကို ဖိတ်ခေါ်မည့်အစား သင်တို့၏ မဖြောင့်မတ်ခြင်းက ငါ့အမျက်ဒေါသကို သိုထားနေပြီ။ သင်တို့ကို အဘယ်သို့ ငါသည် ခွင့်လွှတ်နိုင်မည်နည်း။ အနန္တတန်ခိုးရှင် ငါ၏ မျက်စိအောက်တွင် သင်တို့၏ အပြုအမူများနှင့် အပြောအဆိုများသည် ညစ်ညမ်းညစ်ပတ်နေသည်။ အနန္တတန်ခိုးရှင် ငါ၏ မျက်စိအောက်တွင် သင်တို့၏ မဖြောင့်မတ်ခြင်းကို မငဲ့ညှာရမည့် ပြစ်တင်ဆုံးမခြင်းအဖြစ် တွေ့မြင်သည်။ ငါ၏ ဖြောင့်မတ်သော တရားစီရင်ခြင်းနှင့် ပြစ်တင်ဆုံးမခြင်းသည် သင်တို့ထံမှ အဘယ်သို့ ထွက်ခွာသွားနိုင်မည်နည်း။ ဤကဲ့သို့ ငါ့အပေါ်ပြုလုပ်နေခြင်းက ငါ့ကို အမျက်ဒေါသထွက်စေ၊ ဝမ်းနည်းစေသောကြာင့် ငါ ယေဟောဝါ၏ လက်တော်နှင့် ကျိန်ခြင်း၊ ပြစ်တင်ဆုံးမခြင်းနေ့မှ သင်တို့ကို အဘယ်သို့ လွတ်မြောက်စေနိုင်မည်နည်း။ မကောင်းသည့် သင်တို့စကားများနှင့် ဖွင့်ဆိုချက်တို့သည် ငါ၏နားထဲထိ ရောက်ရှိပြီဖြစ်ကြောင်း သင်တို့မသိသလော။ သင်တို့၏ မဖြောင့်မတ်မှုက ငါ၏ သန့်ရှင်းသော ဖြောင့်မတ်ခြင်း ဝတ်လုံကို အသရေ ဖျက်ပြီဖြစ်ကြောင်း သင်တို့မသိသလော။ သင်တို့၏ မနာခံမှုက ငါ၏ ပြင်းထန်သောဒေါသကို ထွက်စေသည်ကို သင်တို့ မသိသလော။ ငါ၏ ဒေါသအမျက်ကို ခြောင်းခြောင်းထွက်စေပြီး၊ ငါ့စိတ်ရှည်မှုကို သင်တို့ စမ်းသပ်နေသည်မှာလည်း ကြာရှည်ပြီဖြစ်ကြောင်း သင်တို့မသိသလော။ ငါ့ကိုယ်ခန္ဓာကို အဝတ်စုတ်ဖြစ်အောင် သင်တို့ဖျက်ဆီးပြီး ဖြစ်သည်ကို သင်တို့ မသိပါသလော။ ယခုအချိန်ထိ ငါ့အမျက်ဒေါသ ထွက်စေခြင်းကို သည်းခံခဲ့ပြီ၊ ပို၍ စိတ်ရှည်သည်းခံမည် မဟုတ်တော့ပါ။ မကောင်းသည့် သင့်အပြုအမူများသည် ငါ၏ မျက်စိရှေ့မှောက်သို့ ရောက်ရှိလာပြီး၊ ငါ့ငိုကြွေးသံသည် အဖခမည်းတော်၏ နားတော်ထဲသို့ ရောက်ရှိပြီးဖြစ်ကြောင်း သင်တို့ မသိပါသလော။ ဤကဲ့သို့ငါ့အား ဆက်ဆံခြင်းကို သူသည် သင်တို့ကို အဘယ်သို့ ခွင့်ပြုလိမ့်မည်နည်း။ သင်တို့အထဲတွင် ငါလုပ်ဆောင်သော အလုပ်သည် သင်တို့အတွက် မဟုတ်သလော။ သို့သော်လည်း ငါ ယေဟောဝါ၏ အလုပ်ကို သင်တို့ထဲမှ မည်သူက ပိုမိုနှစ်သက်လာသနည်း။ ငါသည် ပြင်းထန်စွာ ဝေဒနာ ခံစားသောကြောင့်လည်းကောင်း၊ ငါသည် အားနည်းသောကြောင့်လည်းကောင်း ငါ့ခမည်းတော်ထံ သစ္စာမရှိဘဲ နေနိုင်ပါသလော။ ငါ့စိတ်နှလုံးကို သင်တို့ မသိနားမလည်နိုင်ကြသလော။ သင်တို့အတွက် များစွာသောအရာများကို ငါစွန့်လွှတ်ပြီ မဟုတ်လော၊ ယေဟောဝါ ပြောခဲ့သကဲ့သို့ သင်တို့ကို ငါပြောသည်။ ငါ့ခမည်းတော်၏ အမှုတော်အတွက် ဤဒုက္ခများစွာကိုခံရန် ဆန္ဒရှိသော်လည်း ငါခံစားရသော ဒုက္ခဝေဒနာ၏ ရလဒ်အနေဖြင့် သင်တို့အပေါ် ငါယူဆောင်လာမည့် ပြစ်တင်ဆုံးမခြင်းမှ သင်တို့ အဘယ်သို့ ထွက်ပြေးနိုင်မည်နည်း။ ငါ့ကြောင့် ပျော်ရွှင်ခဲ့ရပြီ မဟုတ်လော။ ယနေ့တွင် ငါ့ကိုသင်တို့အား ခမည်းတော်က အပ်နှင်းထားပြီးဖြစ်သည်၊ ငါ၏ ကြွယ်ဝသော စကားများထက် များစွာနှစ်သက်ကြကြောင်း သင်တို့မသိပါသလော။ သင်တို့ နှစ်သက်သောအရာ၊ သင်တို့အသက်အတွက်နှင့် ငါ့အသက်ကို အလဲအလှယ် လုပ်လိုက်ကြောင်း သင်တို့မသိပါသလော။ ငါ့အသက်ကို စာတန်နှင့် တိုက်ခိုက်ရာတွင် အသုံးပြုပြီး၊ ငါ့အသက်ကိုလည်း သင်တို့အပေါ်ပေးဆပ်ကြောင်း၊ အဆတစ်ရာ လက်ခံရရှိရန်နှင့် များစွာသော သွေးဆောင်ဖြားယောင်းခြင်းကို သင်တို့ရှောင်ရှားနိုင်ရန် ဖြစ်ကြောင်း သင်တို့မသိကြသလော။ များစွာသော သွေးဆောင်ဖြားယောင်းခြင်း၊ များစွာသော ပြင်းထန်သည့် ပြစ်တင်ဆုံးမခြင်းများမှ သင်တို့ကင်းလွတ်ခြင်းသည် ငါ့လုပ်ဆောင်ချက်ကြောင့် ဖြစ်သည်ကို သင်တို့မသိကြသလော။ ယနေ့အချိန်ထိ သင်တို့ ပျော်ရွှင်နိုင်ရခြင်းသည် ငါ့အားဖြင့်သာ ခမည်းတော်က ခွင့်ပြုထားသည်ကို သင်တို့မသိကြသလော။ သင်တို့၏ စိတ်နှလုံးများသည် အကြင်နာကင်းမဲ့သကဲ့သို့ ယနေ့ထိတိုင် အဘယ်ကြောင့် မာကျော၍ ရှိရစ်နေရသနည်း။ ယနေ့ သင်တို့ကျူးလွန်သော မကောင်းသည့်အရာအတွက် လောကမှ ငါထွက်ခွာသွားမည့်အချိန်မှ စတင်ကာ ကျရောက်မည့် အမျက်ဒေါသကျရောက်သည့်နေ့ကို အဘယ်သို့ လွတ်မြောက်နိုင်မည်နည်း။ နှလုံး မာကျောသော သင်တို့ကို ယေဟောဝါ၏ အမျက်ဒေါသမှ အဘယ်သို့ ငါသည် လွတ်မြောက်စေနိုင်မည်နည်း။

အတိတ်ကာလကို ပြန်လည်တွေးတော စဉ်းစားပါ။ ဘယ်အချိန်၌ သင်တို့အပေါ် ငါ၏ အသံတင်းမာဖူးသနည်း၊ ဘယ်အချိန်၌ သင်တို့အပေါ် ငါစိတ်ဆိုးဒေါသဖြင့် ကြည့်ခဲ့ဖူးသနည်း။ ဘယ်အချိန်က သင်တို့ကို ငါအသေးစိတ် စစ်ဆေးခဲ့သနည်း။ ဘယ်အချိန်က သင်တို့ကို မတန်တဆ ငါအပြစ်ဖော်ဆုံးမခဲ့သနည်း။ သင်တို့ရှေ့၌ ဘယ်အချိန်က သင်တို့ကို အပြစ်ဖော်ဆုံးမခဲ့ပြီးသနည်း။ သင်တို့ကို သွေးဆောင်ဖြားယောင်းခြင်းတိုင်းမှ ထိန်းသိမ်းရန် ငါ့ခမည်းတော်ကို ငါတောင်းခံခြင်းသည် ငါ့အလုပ်အတွက် မဟုတ်ပါသလော။ သင်တို့သည် အဘယ်ကြောင့် ဤကဲ့သို့ ငါ့ကို ဆက်ဆံကြသနည်း။ ငါ၏အာဏာကို အသုံးချပြီး သင့်ကိုယ်ခန္ဓာကို တိုက်ခိုက်ဖူးပြီလော။ အဘယ်ကြောင့် ထိုကဲ့သို့ ငါ့ကို ပြန်ပေးသနည်း။ ငါ့ဆီသို့ အပူနှင့်အအေးကို မှုတ်ထုတ်ပြီးမှ သင်တို့သည် အေးလည်းမအေး၊ ပူလည်းမပူဘဲ ငါ့ကို လိမ်လည်လျက်၊ အရာရာကို ငါ့ထံမှလျှို့ဝှက်ပြီ၊ သင်တို့၏ နှုတ်များသည်လည်း မဖြောင့်မတ်မှုများဖြင့်သာ ပြည့်နှက်နေသည်။ သင်တို့၏ လျှာများသည် ငါ၏ဝိညာဉ်ကို လိမ်လည်နိုင်မည်ဟု ထင်သလော။ သင်တို့၏ လျှာများသည် ငါ၏အမျက်ဒေါသအောက်မှ လွတ်မြောက်နိုင်မည်ဟု ထင်ပါသလော။ သင်တို့ အလိုရှိတိုင်း၊ သင်တို့၏ လျှာများသည် ငါယေဟောဝါဆောင်ရွက်သည့် တရားစီရင်ခြင်းမှ လွတ်မြောက်နိုင်မည် ထင်ပါသလော။ ငါသည် လူသားများ၏ ပြစ်တင်ဝေဖန်ခြင်း ခံရသည့် ဘုရားသခင်လော။ ထိုသို့ဆိုလျှင် သေးငယ်သော လောက်ကောင်အား ငါ့ကိုကျိန်ဆဲရန် ငါခွင့်ပြုနိုင်သလော။ ထိုကဲ့သို့သော မနာခံသောသားများကို ငါ၏ ထာဝရ ကောင်းကြီးမင်္ဂလာများထဲသို့ အဘယ်သို့လျှင် ထည့်သွင်းနိုင်မည်နည်း။ သင်တို့၏ အပြုအမူများနှင့် အပြောအဆိုများသည် သင်တို့ကို အပြစ်တင်၊ အပြစ်ဖော်ပြလေပြီ။ ငါသည် မိုးကောင်းကင်ကို ဖြန့်ကျက်သောအခါနှင့် အရာခပ်သိမ်းကို ဖန်ဆင်းသောအခါ ငါဖန်ဆင်းထားသော အရာများကို သူတို့အလိုရှိသည်အတိုင်း ပါဝင်ခွင့်မပြုခဲ့ပေ၊ သူတို့အလိုရှိတိုင်း ငါ၏စီမံခန့်ခွဲမှု၊ ငါ၏ အလုပ်များကို အနှောင့်အယှက်ပေးရန် သာ၍ ခွင့်မပြုခဲ့ပေ။ အဘယ်အရာမဆို သို့မဟုတ် မည်သည့်လူသားကိုမဆို ငါသည်းမခံပါ၊ ငါ့အပေါ် ရက်စက်သော သူများနှင့် လူသားမဆန်သောသူများကို အဘယ်သို့ ငါသည် လွတ်ငြိမ်းချမ်းသာခွင့် ပြုနိုင်မည်နည်း။ ငါ၏ စကားကို ဆန့်ကျင် တိုက်ခိုက်သောသူကို အဘယ်သို့ ငါခွင့်လွှတ်နိုင်မည်နည်း။ ငါ့အား မနာခံသောသူများကို အဘယ်သို့ လွှတ်ပေးနိုင်မည်နည်း။ လူသားများ၏ ကံကြမ္မာသည် ငါအနန္တတန်ခိုးရှင်၏ လက်ထဲတွင် ရှိသည်မဟုတ်လော။ သင်၏ မဖြောင့်မတ်ခြင်းနှင့် မနာခံခြင်းကို အဘယ်သို့ သန့်ရှင်းသည်ဟု သတ်မှတ်နိုင်မည်နည်း။ သင်၏အပြစ်က ငါ၏ သန့်ရှင်းခြင်းကို အဘယ်သို့ ညစ်ညမ်းစေနိုင်မည်နည်း။ မဖြောင့်မတ်သော သူများ၏ မသန့်ရှင်း မစင်ကြယ်ခြင်းက ငါ့ကို မညစ်ညမ်းစေနိုင်ပါ၊ မဖြောင့်မတ်သူများ၏ အလှူများကိုလည်း ငါမနှစ်သက်ပါ။ ငါ ယေဟောဝါအပေါ် သင်သည် သစ္စာရှိမည်ဆိုပါက ငါ၏ယဇ်ပလ္လင်ရှိ ယစ်ပူဇော်သက္ကာကို သင့်အတွက် မည်သို့လျှင် ယူဆောင်သွားနိုင်သနည်း။ ငါ၏သန့်ရှင်းသော နာမကို ကျိန်ဆဲရန် အဆိပ်နှင့်ပြည့်သော သင့်လျှာကို အဘယ်သို့ အသုံးပြုနိုင်သနည်း။ ဤနည်းအားဖြင့် ငါ့စကားကို ဆန့်ကျင်တိုက်ခိုက်နိုင်သလော။ ငါ၏ သန့်ရှင်းသော အမည်နာမနှင့် ဘုန်းတော်ကို စာတန်၊ မကောင်းဆိုးဝါးကို အစေခံရာတွင် တန်ဆာအဖြစ် အသုံးပြုနိုင်သလော။ သန့်ရှင်းသောသူများ ပျော်မွေ့ရန်အလို့ငှာ ငါ၏အသက်ကို ထောက်ပံ့ထားခြင်း ဖြစ်သည်။ သင်အလိုရှိသည်အတိုင်း ငါ၏အသက်ကို ကစားရန်၊ သင်တို့ကြား ပြဿနာဖြစ်စိမ့်သောငှာ တန်ဆာအဖြစ် အသုံးပြုရန် အဘယ်သို့ ငါခွင့်ပြုပေးနိုင်မည်နည်း။ အဘယ်ကြောင့် သင်တို့သည် ငါနှင့် ပတ်သက်လာလျှင် အကြင်နာ အလွန်ကင်းမဲ့နိုင်ရသနည်း၊ ကောင်းသောအရာများလည်းမရှိ။ ဤအသက်စာစောင်ထဲတွင် သင်တို့၏ မကောင်းသည့် အပြုအမူများကို ငါရေးမှတ်ထားပြီဖြစ်ကြောင်း သင်တို့မသိပါသလော။ ငါသည် အဲဂုတ္တုပြည်ကို ဆုံးမသောအချိန်၌ အမျက်ဒေါသ ကျရောက်မည့်နေ့ကို အဘယ်သို့ သင်လွတ်မြောက်နိုင်မည်နည်း။ ဤနည်းအားဖြင့် အဘယ်သို့ သင်တို့သည် ငါ့ကို ထပ်ခါထပ်ခါ ဆန့်ကျင်၊ ညစ်ညမ်းစေနိုင်သနည်း။ ငါသင်တို့ကို ရှင်းရှင်းလင်းလင်း ပြောမည်၊ အချိန်ကျရောက် လာသောအခါ သင်တို့ကို ပြစ်တင်ဆုံးမခြင်းသည် အဲဂုတ္တုပြည်ကို ဆုံးမခြင်းထက် ပိုမို မခံမရပ်နိုင်အောင် ဖြစ်လာလိမ့်မည်။ ငါ၏ အမျက်ဒေါသ ကျရောက်မည့်နေ့ကို အဘယ်သို့ သင်တို့ လွတ်မြောက်နိုင် မည်နည်း။ ငါ ဧကန်အမှန် ဆိုသည်ကား၊ ငါ၏သည်းခံခြင်းသည် မကောင်းသော သင်တို့၏ အပြုအမူများအတွက် ပြင်ဆင်ထားခြင်းဖြစ်ပြီး၊ ထိုနေ့ရက်၌ သင်တို့ကို ပြစ်တင်ဆုံးမရန် တည်ရှိခြင်းဖြစ်သည်။ ငါ၏ သည်းခံနိုင်မှုသည် အဆုံးသို့ရောက်ရှိလာသည်နှင့် အမျက်ဒေါသ တရားစီရင်ခြင်းကို ခံမည့်သူသည် သင်တို့မဟုတ်သလော။ အရာခပ်သိမ်းသည် ငါအနန္တတန်ခိုးရှင်၏ လက်ထဲ၌ ရှိသည်မဟုတ်လော။ ကောင်းကင်အောက်တွင် ငါ့အားမနာခံဖို့ သင်တို့ကို အဘယ်သို့ ခွင့်ပြုနိုင်မည်နည်း။ ကြွရောက်လာမည်ဟု ကြိုတင်ဟောထားကြသော်လည်း မည်သည့်အခါမျှ ပြန်မလာသေးသည့် မေရှိယနှင့် သင်တို့တွေ့ဆုံပြီ ဖြစ်သောကြောင့် သင်တို့ဘဝသည် အလွန်ခက်ခဲလိမ့်မည်။ သင်တို့သည် သူ၏ရန်သူ မဟုတ်သလော။ ယေရှုသည် သင်တို့နှင့် မိတ်ဆွေဖြစ်လာပြီ ဖြစ်သော်လည်း သင်တို့သည် မေရှိယ၏ ရန်သူဖြစ်နေဆဲပင်ဖြစ်သည်။ သင်တို့သည် ယေရှုနှင့် မိတ်ဆွေဖြစ်သော်လည်း သင်တို့၏ မကောင်းသော အပြုအမူများက စက်ဆုပ်ဖွယ် ကောင်းသောသူများ၏ အိုးကိုဖြည့်နေပြီဆိုသည်ကို သင်တို့မသိသလော။ သင်တို့သည် ယေဟောဝါနှင့် အလွန်နီးကပ်သော်လည်း မကောင်းသော သင်တို့၏ အပြောအဆိုများသည် ယေဟောဝါ၏ နားထဲသို့ရောက်ပြီး သူ၏ အမျက်ဒေါသကို လှုံ့ဆော်သည်ကို သင်တို့မသိပါသလော။ သူသည် အဘယ်သို့ သင်နှင့်နီးကပ်နိုင်မည်နည်း၊ မကောင်းသော အပြုအမူများနှင့် ပြည့်နှက်နေသည့် သင့်အိုးကို အဘယ်ကြောင့် သူသည် မီးရှို့ မဖျက်ဆီးနိုင်ရမည်နည်း။ သူသည် သင့်ရန်သူအဘယ်ကြောင့် မဖြစ်နိုင်မည်နည်း။