သင်တို့ထဲတွင် ငယ်ရွယ်သူအနည်းငယ်ရှိသည့်အပြင် မိသားစု မထူထောင်ရသေးသည့် လူများ ရှိသည်။ သင်တို့အားလုံးသည် သင်တို့တာဝန်ကို လုပ်ဆောင်ရန် နှစ်အတော်ကြာ သင်တို့၏ အိမ်များကို စွန့်ခွာကြပြီး ဖြစ်သည်။ ထို့ကြောင့် အိမ်ကို သင်တို့ လွမ်းကြသလော။ သင်တို့၏ မိဘများကို လွမ်းကြသလော။ သင်တို့ မိဘများကို လွမ်းသည့် အခြေအနေတွင် သင်တို့ မကြာခဏ ရှိကြသလော။ သင်တို့မိဘများကို လွမ်းသည့် အခြေအနေအကြောင်းကို နားထောင်ကြစို့။ ဤသည်မှာ တကယ့် အတွေ့အကြုံ ဖြစ်သည်။ (ကျွန်ုပ် ဤအတိုင်း ရေမြေခြားသို့ လာခဲ့ချိန်တွင် ကျွန်ုပ်၏ မိခင်နှင့် အစ်မကို အထူးသဖြင့် သတိရမိခဲ့ပါသည်။ ကျွန်ုပ်သည် သူတို့အပေါ် အစဉ်သဖြင့် မှီခိုလေ့ရှိခဲ့သည်။ ထို့ကြောင့် မိမိတစ်ယောက်တည်း ထွက်ခွာလာခဲ့ချိန်တွင် သူတို့ကို စဉ်ဆက်မပြတ် လွမ်းခဲ့သည်။ သို့ရာတွင် ဤမျှလောက် ရေမြေခြားအတွေ့အကြုံဖြင့် ယခု ကျွန်ုပ် နောက်ချန်ထားခဲ့၍ မရနိုင်သည့်သူမှာ ဘုရားသခင်ဖြစ်ကြောင်း ကျွန်ုပ် ခံစားရပါသည်။ တစ်ခုခု ဖြစ်ပျက်သည့်အခါတွင် သူ့ထံ ကျွန်ုပ် ဆုတောင်းပြီး သူတို့ကို ကျွန်ုပ် နောက်ထပ် မလွမ်းမိတော့ပါ။) ဤသည်တို့မှာ မတူကွဲပြားသော အခြေအနေနှစ်ခု ဖြစ်သည်။ ပထမဆုံး အခြေအနေမှာ အဘယ်နည်း။ အမြဲ အိမ်ကိုလွမ်းခြင်း၊ သင်၏ မိခင်နှင့် အစ်မတို့ကို လွမ်းခြင်း ဖြစ်သည်။ ဤအခြေအနေမျိုး၏ အသေးစိတ်အချက်များမှာ အဘယ်နည်း။ တစ်စုံတစ်ရာ ဖြစ်ပျက်သည့်အခါ ဤအရာ ထိုအရာအား မည်သို့ လုပ်ဆောင်ရမည်ကို သင် မသိသောကြောင့် အကူအညီမဲ့ သင် ခံစားရခြင်း ဖြစ်သည်။ သင်၏ ချစ်ခင်ရသူများ သင့်ဘေးတွင် မရှိဘဲ သင် မနေနိုင်သကဲ့သို့ အားကိုးရန် မည်သူမျှ မရှိပေ။ မနက်တွင် သင်၏ မျက်လုံးများကို ဖွင့်သည့်အခါ ၎င်းတို့ကို သင် စတင်လွမ်းဆွတ်ပြီး ညတွင် မအိပ်မီ ၎င်းတို့အကြောင်း သင် တွေးသည်။ သင်၏ ချစ်ခင်ရသူများအား လွမ်းဆွတ်သည့် ဤအခြေအနေမျိုးတွင် သင် ပိတ်မိနေသည်။ ထို့ကြောင့် သင်သည် ၎င်းတို့အား အဘယ်ကြောင့် အလွန် လွမ်းဆွတ်ရသနည်း။ အဘယ်ကြောင့်ဆိုသော် သင်၏ အခြေအနေများသည် ပြောင်းလဲပြီး ၎င်းတို့ကို သင် နောက်ချန်ထားရစ်ပြီးဖြစ်သောကြောင့် ဖြစ်သည်။ ၎င်းတို့အကြောင်းကို သင် စိုးရိမ်ပူပန်သည်။ ထို့အပြင် ၎င်းတို့အပေါ် အားကိုးခြင်း၊ ရှင်သန်ခြင်းအတွက် ၎င်းတို့အပေါ် မှီခိုခြင်းနှင့် အားထားခြင်းတို့ကို သင် တိုး၍ ကျင့်သားရခဲ့ပြီးဖြစ်သည်။ ဘဝတွင်ရှိသော အရာများစွာ၌ သင်တို့သည် အချင်းချင်း ခွဲခြားမရနိုင်အောင် ဖြစ်ပြီးသားဖြစ်သောကြောင့် ၎င်းတို့ကို သင် အလွန်လွမ်းဆွတ်လေသည်။ ဤသည်မှာ သင် ရှိသည့် အခြေအနေမျိုး ဖြစ်သည်။ ထို့ကြောင့် ၎င်းတို့ကို သင် မလွမ်းဆွတ်ရသည်မှာ ယခု သင်သည် မည်သည့် အခြေအနေမျိုးတွင် ရှိသနည်း။ (ကျွန်ုပ်၏ အိမ်ကို စွန့်ခွာခြင်းနှင့် ကျွန်ုပ်၏ တာဝန်ကို လုပ်ဆောင်ခြင်းတို့သည် ဘုရားသခင်၏ ချစ်ခြင်းမေတ္တာ၊ သူ၏ ကယ်တင်ခြင်းဖြစ်သကဲ့သို့ ကျွန်ုပ် ခံစားရသည်။ ယင်းက သူ့အပေါ် မည်သို့ မှီခိုအားကိုးရမည်ဆိုသည်ကို သင်ယူစေဖို့ ကျွန်ုပ်အား ထောက်ကူပေးပြီးဖြစ်ပါသည်။ ကျွန်ုပ်၏ ဖောက်ပြန်ပျက်စီးသော စိတ်သဘောထားသည် အတော်အတန် ပြောင်းလဲပြီးဖြစ်ကာ ကျွန်ုပ်၏ စိတ်ဝိညာဉ် သက်သောင့်သက်သာခံစားရပါသည်။ ထို့အပြင် ဘုရားသခင်၏ အချုပ်အခြာအာဏာကို အသိအမှတ်ပြုခြင်းအားဖြင့် လူအားလုံး၏ ကံကြမ္မာများသည် သူ၏ လက်ထဲတွင်ရှိကြောင်းကို ကျွန်ုပ် သိပါသည်။ သူတို့တွင် သူတို့၏ ဘဝပေးတာဝန်ရှိပြီး ကျွန်ုပ်တွင် ကျွန်ုပ်၏ ဘဝပေးတာဝန်ရှိသည်။ ထို့ကြောင့် သူတို့ကို ကျွန်ုပ် မလွမ်းဆွတ်တော့ပါ။) ပြဿနာ ပြေလည်သွားပြီလော။ (ပြေလည်သွားသကဲ့သို့ ခံစားရပါသည်။) လူတိုင်း မည်သည့်အရာ ခံစားရသနည်း၊ ပြေလည်သွားပြီလော။ (ခဏတာ ပြေလည်သွားပါသည်။) ခဏတာ ပြေလည်သွားပေသည်။ တစ်နေ့ မိမိ၏ အသွင်အပြင်၊ လေသံ၊ သင့်ကို ဆက်ဆံပုံတို့က သင်၏ မိခင် သို့မဟုတ် အထူးသဖြင့် အစ်မနှင့် တူသော ညီအစ်မတစ်ဦးကို သင် ဆုံမိလျှင် သင် မည်သို့ ခံစားရမည်နည်း။ (သူတို့ကို တစ်ဖန် ကျွန်ုပ် လွမ်းဆွတ်မိပါမည်။) သူတို့ကို တစ်ဖန် တွေးတောသည့် အခြေအနေထဲသို့ သင် ကျရောက်မည်ဖြစ်သည်။ ထို့ကြောင့် ပြဿနာသည် ပြေလည်သွားမည် မဟုတ်။ ထို့ကြောင့် ဤပြဿနာကို အရင်းအမြစ်မှ သင် မည်သို့ ဖြေရှင်းသနည်း။ သင်၏ ချစ်ခင်ရသူများကို သင် လွမ်းဆွတ်သည့်အခါ မည်သည့်အရာကို သင် လွမ်းဆွတ်နေပါသနည်း။ ပုံမှန်အားဖြင့် တစ်စုံတစ်ဦးကို သင် လွမ်းဆွတ်သည့်အခါ ချစ်ခင်သူတစ်ဦးကို လွမ်းဆွတ်သည့်အခါ၊ သို့မဟုတ် အိမ်ကို လွမ်းသည့်အခါ သင့်ကို ဝမ်းနည်းစေသည့်အရာများကို သင် ဧကန်မုချ မလွမ်းဆွတ်ပေ။ သင့်ကို ကျေနပ်စေသည့်အရာများ၊ သင့်ကို ပျော်ရွှင်စေပြီး စိတ်ချမ်းသာစေသည့်အရာများနှင့် သင်၏ မိခင်က သင့်ကို ကြည့်ရှုစောင့်ရှောက်လေ့ရှိပုံ၊ သင့်ကို တုန်နေအောင်ချစ်ပြီး မြတ်နိုးတန်ဖိုးထားပုံ သို့မဟုတ် သင့်အတွက် သင့်ဖခင်က ဝယ်ပေးလေ့ရှိသည့် ကောင်းမွန်သည့်အရာများကဲ့သို့သော သင် မွေ့လျော်ခံစားသည့်အရာများကို သင် သတိရလွမ်းဆွတ်၏။ ဤကောင်းမွန်သည့် အရာအားလုံးကို သင် လွမ်းဆွတ်သောကြောင့် သင်၏ ချစ်ခင်ရသူများကို သင် လွမ်းဆွတ်ခြင်းကို မရပ်နိုင်ပေ။ သင်၏ ချစ်ခင်ရသူများကို သင် တွေးလေ ၎င်းတို့ကို သာ၍ မစွန့်လွှတ်နိုင်လေဖြစ်ပြီး သင့်ကို သင်ချုပ်ထိန်းမရနိုင်ပေ။ လူအချို့က “ဤနှစ်များ တစ်လျှောက်လုံးတွင် ကျွန်ုပ်၏ မိခင်ကို ယခင်က ကျွန်ုပ် လုံးဝ မထားရစ်ခဲ့ဖူးပါ။ သူ သွားသည့်နေရာတိုင်း ကျွန်ုပ် လိုက်သည်။ ကျွန်ုပ်သည် သူ၏ အချစ်တော်ဖြစ်သည်။ အလွန်အချိန်ကြာမြင့်စွာ ထွက်သွားပြီးနောက်တွင် သူ့ကို ကျွန်ုပ် အဘယ်သို့ မလွမ်းဆွတ်ဘဲ နေနိုင်မည်နည်း”ဟု ဆိုကြသည်။ သူမကို လွမ်းဆွတ်ခြင်းသည် သဘာဝကျ၏။ ဤသည်မှာ လူတို့၏ ဇာတိပကတိဖြစ်သည့်ပုံသာ ဖြစ်သည်။ ဖောက်ပြန်ပျက်စီးသော လူသားသည် မိမိတို့၏ စိတ်ခံစားမှုများတွင် အသက်ရှင်ကြ၏။ ၎င်းတို့က “ဤသို့ အသက်ရှင်ခြင်းသည်သာ လူသားနှင့် ဆင်တူခြင်း ဖြစ်သည်။ ကျွန်ုပ်၏ ချစ်ခင်ရသူများကိုပင် ကျွန်ုပ် မလွမ်းဆွတ်ပါက၊ သို့မဟုတ် သူတို့‌အကြောင်း မတွေးပါက၊ သို့မဟုတ် သူတို့၌ အားဖြစ်စေခြင်းကို ရှာမတွေ့ပါက ကျွန်ုပ် လူသားပင် ဖြစ်ပါသလော။ တိရစ္ဆာန်များနှင့် တူမည် မဟုတ်လော”ဟု စဉ်းစားကြသည်။ လူတို့သည် ဤသို့ စဉ်းစားကြသည် မဟုတ်လော။ ၎င်းတို့သည် ချစ်ခင်မှု သို့မဟုတ် ခင်မင်ရင်းနှီးမှုတို့ မရှိသကဲ့သို့ အခြားသူများကို စဉ်းစားခြင်းမရှိပါက ၎င်းတွင် လူ့သဘာဝမရှိကြောင်းနှင့် ဤသို့ ၎င်းတို့ အသက်ရှင်၍မရကြောင်း အခြားသူများက စဉ်းစားပေသည်။ ဤရှုထောင့်အမြင်သည် မှန်ကန်ပါသလော။ (မမှန်ပါ။) အမှန်တွင် သင်၏ မိဘများကို သင် လွမ်းဆွတ်ခြင်းရှိမရှိသည် ကြီးမားသည့် ပြဿနာတစ်ခု မဟုတ်။ ၎င်းတို့ကို လွမ်းဆွတ်ခြင်းသည် မမှားသကဲ့သို့ မလွမ်းဆွတ်ခြင်းသည်လည်း မမှားပေ။ လူအချို့သည် အလွန် အမှီအခိုကင်းကြသော်လည်း လူအချို့ကမူ မိမိတို့၏မိဘများကို မခွာဘဲကပ်ကြသည်။ သို့သော် သင်တို့အားလုံးသည် မိမိတို့ တာဝန်ကို လုပ်ဆောင်ရန် မိမိတို့ အိမ်များနှင့် မိဘများကို စွန့်ခွာနိုင်ကြပြီးဖြစ်သည်။ ပထမဦးစွာ သင်တို့၏ တာဝန်ကို လုပ်ဆောင်ရန် သင်တို့ လိုလားမှု၊ သင်တို့၏ တာဝန်ကို လုပ်ဆောင်ရန် အလိုဆန္ဒ၊ ဘုရားသခင်အတွက် မိမိတို့ကိုယ်ကို အသုံးခံကာ အမှုအရာများကို ဘေးဖယ်ထားရန် အလိုဆန္ဒရှိကြသည်။ သို့သော် သင်တို့၏ အခက်အခဲများကို အားထုတ်မှုအဟုန်တစ်ခုမျှဖြင့် ဖြေရှင်းမရနိုင်သကဲ့သို့ သင်တို့၏ ဖောက်ပြန်ပျက်စီးသော စိတ်သဘောထားများကို သင်တို့အားထုတ်မှု၏ ကောင်းမှုများနှင့် အပြုအမူကောင်းများ အရှိန်အဟုန်တစ်ခုမျှဖြင့် မဖြေရှင်းနိုင်။ ဤအယူဝါဒကို သင်တို့ နားလည်ကြသည်၊ ဟုတ်သလော။ ထို့ကြောင့် သင်တို့၏ မိဘများကို လွမ်းဆွတ်သည့် ကိစ္စရပ်အား အရင်းအမြစ်မှ သင်တို့ မည်သို့ ဖြေရှင်းကြသနည်း။ လူအချို့သည် နှစ်နှစ် သို့မဟုတ် သုံးနှစ်ကြာ အိမ်ကိုစွန့်ခွာကာ အမှီအခိုကင်းစွာ အသက်ရှင်နေကြပြီး ဖြစ်သည်။ ၎င်းတို့သည် အရွယ်ရောက်နှင့်ကြပြီးဖြစ်ကာ ၎င်းတို့၏ မိဘများကို အလွန် မလွမ်းဆွတ်ကြပေ။ ထိုသို့ဖြင့် ပြဿနာ ပြေလည်သွားသလော။ မပြေလည်ပေ။ မည်သူကို ၎င်းတို့ အရင်းနှီးဆုံးဖြစ်သည်ကို ၎င်းတို့အား သင် မေးပါက ၎င်းတို့က “ကျွန်ုပ်သည် ဘုရားသခင်နှင့် အရင်းနှီးဆုံးဖြစ်ပါသည်။ ဘုရားသခင်သည် ကျွန်ုပ်၏ အချစ်ခင်ရဆုံးသူ ဖြစ်သည်”ဟု စာအုပ်ကြီးအတိုင်းဖြစ်သော အဖြေတစ်ခုဖြင့် တုံ့ပြန်ကြသည်။ သို့ရာတွင် ၎င်းတို့၏ စိတ်နှလုံးများတွင် ၎င်းတို့က “ဘုရားသခင်သည် ကျွန်ုပ် နံဘေးတွင်မရှိသကဲ့သို့ ကျွန်ုပ်ကို ကြည့်ရှုစောင့်ရှောက်နိုင်ခြင်း မရှိပါ။ ကျွန်ုပ်သည် ကျွန်ုပ်၏ မိခင်နှင့် အနီးကပ်ဆုံး ဖြစ်နေဆဲ ဖြစ်သည်။ သူ၏ အသွေးအသားအရင်းမှ ကျွန်ုပ် ဖြစ်လာသည်။ သူသည် ကျွန်ုပ်ကို တုန်နေအောင်အချစ်ဆုံးဖြစ်ပြီး ကျွန်ုပ်ကို သူ အသိဆုံးနှင့် သဘောပေါက်နားအလည်ဆုံး ဖြစ်သည်။ အမှုအရာများ အခက်အခဲဆုံးနှင့် အခါးသီးဆုံးဖြစ်နေချိန်တွင် ကျွန်ုပ်၏ မိခင်သည် ကျွန်ုပ်ကို နှစ်သိမ့်၊ ကူညီပြီး စောင့်ရှောက်ရန် အမြဲ ရှိနေခဲ့သည်။ ယခုတွင် အိမ်ကို စွန့်ခွာပြီးနောက် ကျွန်ုပ် နေမကောင်းဖြစ်သည့်အခါ ကျွန်ုပ်၏ မိခင်ကဲ့သို့ ကျွန်ုပ်ကို ကြည့်ရှုစောင့်ရှောက်မည့်သူ တစ်ဦးမျှမရှိပါ။ ဘုရားသခင် ကောင်းမြတ်သည်ဟု သင် ပြောသော်လည်း သူ၏ မျက်နှာကို ကျွန်ုပ် မမြင်နိုင်ပါ။ ထို့ကြောင့် သူ အဘယ်မှာရှိပါသနည်း။ ယင်းမှာ လက်တွေ့မကျပါ”ဟု တွေးကြသည်။ ဘုရားသခင်အပေါ် မှီခိုခြင်းသည် လက်တွေ့ကျခြင်းမရှိဟု ၎င်းတို့ တွေးထင်ကြပြီး ဘုရားသခင်က ၎င်းတို့နှင့် အနီးကပ်ဆုံးဖြစ်သည်ဆိုသည့် ၎င်းတို့၏ စကားများသည် အနည်းငယ် အတင်းအကျပ် ပြောသည့်အရာတစ်ခု၊ အနည်းငယ် ကြောင်သူတော်ဆန်သည့် အရာတစ်ခု ဖြစ်သည်။ အမှန်တွင် ၎င်းတို့၏ စိတ်နှလုံး နက်နက်နေရာများတွင် ၎င်းတို့၏ မိခင်သည် ၎င်းတို့နှင့် အနီးကပ်ဆုံးဖြစ်သည်ဟု တွေးထင်ကြသည်။ သို့ရာတွင် အဘယ်ကြောင့်နည်း။ “ကျွန်ုပ်၏ မိခင်က ကျွန်ုပ်ထံ ဧဝံဂေလိ ဖြန့်ဝေသောကြောင့် ဘုရားသခင်ကို ကျွန်ုပ် ယုံကြည်ခြင်း ဖြစ်သည်။ သူမရှိဘဲနှင့် ကျွန်ုပ် ဤနေရာတွင် ရှိမည်မဟုတ်ပါ”ဟူ၍ ဖြစ်သည်။ ၎င်းတို့ ဤသို့ တွေးကြသည် မဟုတ်လော။ (တွေးကြပါသည်။) ထိုသို့သော လူများသည် သမ္မာတရားကို နားလည်ကြသည်ဟု သင် ထင်ပါသလော။ (မထင်ပါ။) သင်၏ မိခင်က သင့်ကို မွေးရုံမျှမွေးဖွားခဲ့ပြီး အနှစ်နှစ်ဆယ်ခန့် သင့်ကို စောင့်ရှောက်ခဲ့ရုံမျှသာရှိသည်။ သူသည် သင့်ကို သမ္မာတရား ပေးနိုင်သလော။ အသက်ပေးနိုင်သလော။ သင့်ကို စာတန်၏ စွမ်းအားမှ ကယ်တင်နိုင်သလော။ သင်၏ ဖောက်ပြန်ပျက်စီးသော စိတ်သဘောထားကို သူ သန့်စင်စေနိုင်သလော။ ဤအရာတစ်ခုကိုမျှ သူ မလုပ်ဆောင်နိုင်ပေ။ ထို့ကြောင့် မိဘ၏ ကျေးဇူးနှင့် ချစ်ခြင်းမေတ္တာသည် အကြီးအကျယ် အကန့်အသတ်ရှိ၏။ ဘုရားသခင်သည် သင့်အတွက် မည်သည့်အရာ လုပ်ဆောင်နိုင်သနည်း။ ဘုရားသခင်သည် လူတို့အား သမ္မာတရားကို ပေးနိုင်သည်၊ စာတန်၏ စွမ်းအားနှင့် သေခြင်းမှ ကယ်တင်နိုင်ပြီး ထာဝရအသက်ကို ပေးနိုင်သည်။ ဤသည်မှာ ကြီးမြတ်သော ချစ်ခြင်းမေတ္တာ မဟုတ်လော။ ဤချစ်ခြင်းမေတ္တာသည် ကောင်းကင်လောက် မြင့်မားပြီး မြေကြီးလောက် နက်ရှိုင်းလေသည်။ အလွန့်အလွန် ကြီးမားသည်။ မိဘ၏ မေတ္တာထက် အဆတစ်ရာမဟုတ်၊ အဆတစ်ထောင် ကြီးမား၏။ ဘုရားသခင်၏ မေတ္တာ မည်မျှကြီးမားသည်ကို လူတို့ အမှန်တကယ် သိရှိလာသည့်အခါ မိမိတို့၏ မိဘများနှင့်ပတ်သက်၍ အလွန်ပြင်းထန်စွာ ခံစားရဦးမည်လော။ နှစ်သစ်ကူးနှင့် အားလပ်ရက်များအတွင်းတွင် ၎င်းတို့အကြောင်းကို တစ်နေ့လုံး စဉ်းစားနေကြဦးမည်လော။ သမ္မာတရားကို ၎င်းတို့ နားလည်ပါက ဘုရားသခင်၏ မေတ္တာအကြောင်း ၎င်းတို့ ပိုမို စဉ်းစားကြလိမ့်မည်။ တစ်စုံတစ်ဦးသည် ဘုရားသခင်ကို နှစ်ချီ ယုံကြည်ပြီး ၎င်းတို့ မိဘများ၏ မေတ္တာက ဘုရားသခင်၏ မေတ္တာထက် သာ၍ ကြီးမားသည်ဟု တွေးထင်ဆဲဖြစ်ပါက ထိုလူသည် မျက်ကန်းဖြစ်ပြီး ဘုရားသခင်ကို ယုံကြည်ခြင်း လုံးဝ မရှိပေ။ တစ်စုံတစ်ဦးသည် ဘုရားသခင်ကို ယုံကြည်သော်လည်း သမ္မာတရားကို မလိုက်စားပါက မိမိတို့၏ ဖောက်ပြန်ပျက်စီးသော စိတ်သဘောထားကို ၎င်းတို့ ဖြေရှင်းနိုင်သလော။ ကယ်တင်ခြင်းကို ၎င်းတို့ ရရှိနိုင်သလော။ မရရှိနိုင်ပါ။ ၎င်းတို့၏ ဖောက်ပြန်ပျက်စီးသော စိတ်သဘောထား ပြေလည်ခြင်းမရှိသကဲ့သို့ ၎င်းတို့၏ ဘဝသည် ဝိညာဉ်ရင့်ကျက်မှု တစ်ခုခုထိ ကြီးထွားပြီးခြင်းမရှိပါက သင်သည် ဆောင်ပုဒ်အချို့ကို ကြွေးကြော်နိုင်သော်လည်း ဝိညာဉ်ရင့်ကျက်မှု မရှိသောကြောင့် ထိုဆောင်ပုဒ်များကို ဆောင်ရွက်နိုင်လိမ့်မည် မဟုတ်ပေ။ လုပ်ဆောင်ရန် အစွမ်းရှိသလောက် အမှုအရာများကို သင် လုပ်ဆောင်နိုင်သည်။ သည်းညည်းခံရန် ဝိညာဉ်ရင့်ကျက်မှု ကြီးမားသလောက် စမ်းသပ်မှုများကို သင် ဖြတ်ကျော်နိုင်သည်။ သင် နားလည်နိုင်သလောက် သမ္မာတရား စစ်မှန်မှုထဲသို့ သင် ဝင်ရောက်နိုင်သည်။ ယင်းမှာ သမ္မာတရား စစ်မှန်မှု မည်မျှကို သင် အသက်ရှင်နေထိုင်နိုင်သည်ဆိုသည့်အရာ ဖြစ်သည်။ အလားတူစွာပင် ယင်းမှာ သင်၏ ဖောက်ပြန်ပျက်စီးသော စိတ်သဘောထား ထုတ်ဖော်ခြင်း မည်မျှရှိသည်ဆိုသည်နှင့် သင်၏ ကိုယ်ပိုင် အခက်အခဲမည်မျှကို သင် ဖြေရှင်းနိုင်သည်ဆိုသည့်အရာ ဖြစ်သည်။ ယင်းမှာ ဆက်နွှယ်နေကြပေသည်။

တစ်နေ့တွင် သမ္မာတရားအချို့ကို သင်နားလည်သွားသောအခါ သင်၏မိခင်က အကောင်းဆုံးသောပုဂ္ဂိုလ်ဖြစ်သည်၊ သို့မဟုတ် သင့်မိဘများက အကောင်းဆုံးသောသူများဖြစ်သည်ဟု ထင်မြင်တော့မည် မဟုတ်ပေ။ ၎င်းတို့သည်လည်း ဖောက်ပြန်ပျက်စီးသည့် လူသားမျိုးနွယ်ဝင်များ ဖြစ်သည်ကိုလည်းကောင်း၊ ၎င်းတို့၏ ဖောက်ပြန်ပျက်စီးသော စိတ်သဘောထားများမှာ အားလုံးအတူတူပင် ဖြစ်သည်ကိုလည်းကောင်း သင်သဘောပေါက်လိမ့်မည်။ ၎င်းတို့ကို ခွဲခြားပေးသောအရာမှာ သင်နှင့် ရုပ်ပိုင်းဆိုင်ရာ သွေးသားတော်စပ်မှုသာ ဖြစ်သည်။ ၎င်းတို့သည် ဘုရားသခင်ကို မယုံကြည်လျှင် ဘာသာတရားမရှိသူများနှင့် အတူတူပင်ဖြစ်၏။ သင်သည် ၎င်းတို့ကို မိသားစုဝင်ရှုထောင့်မှ၊ သို့မဟုတ် ဇာတိပကတိဆိုင်ရာ တော်စပ်မှုရှုထောင့်မှ ကြည့်တော့မည် မဟုတ်ဘဲ သမ္မာတရားဘက်မှ ကြည့်မည်ဖြစ်သည်။ သင်ကြည့်ရှုသင့်သည့် အဓိကအချက်များမှာ အဘယ်အရာများနည်း။ ဘုရားသခင်ကို ယုံကြည်ခြင်းနှင့်ပတ်သက်၍ ၎င်းတို့၏ အမြင်များ၊ လောကအပေါ် ၎င်းတို့၏ အမြင်များ၊ အကြောင်းကိစ္စများကို ကိုင်တွယ်ရာတွင် ၎င်းတို့၏ အမြင်များ၊ အရေးကြီးဆုံးအနေဖြင့် ဘုရားသခင်အပေါ် ၎င်းတို့၏ သဘောထားများကို သင်ကြည့်ရှုသင့်သည်။ ဤသွင်ပြင်လက္ခဏာများကို တိကျစွာ အကဲဖြတ်ပါက ၎င်းတို့သည် လူကောင်းများလော သို့မဟုတ် လူဆိုးများလောဆိုသည်ကို သင်ရှင်းလင်းစွာ မြင်နိုင်လိမ့်မည်။ ၎င်းတို့သည် သင်ကဲ့သို့ပင် ဖောက်ပြန်ပျက်စီးသော စိတ်သဘောထား ရှိသည့်လူများ ဖြစ်ကြောင်း တစ်နေ့တွင် သင် ရှင်းလင်းစွာ မြင်ကောင်းမြင်နိုင်သည်။ ၎င်းတို့သည် သင်စိတ်ကူးထင်မြင်ထားသကဲ့သို့ သင့်အပေါ် အမှန်တကယ်ချစ်သော ကြင်နာတတ်သူများ မဟုတ်ကြောင်း၊ ၎င်းတို့သည် သင့်ကို သမ္မာတရားထံသို့၊ သို့မဟုတ် ဘဝတွင် မှန်ကန်သော လမ်းကြောင်းဆီသို့ လုံးဝ မခေါ်ဆောင်ပေးနိုင်ကြောင်းတို့ကို သာ၍ပင် ရှင်းလင်းသွားနိုင်သည်။ သင့်အတွက် ၎င်းတို့လုပ်ဆောင်ပေးခဲ့သည့်အရာသည် သင့်အဖို့ ကြီးကြီးမားမား အကျိုးမပြုကြောင်း၊ ဘဝတွင် မှန်ကန်သော လမ်းကြောင်းကို လျှောက်လှမ်းရာတွင် ထိုအရာက သင့်အတွက် အသုံးမဝင်ကြောင်းကို သင် ရှင်းလင်းစွာ မြင်ကောင်းမြင်နိုင်သည်။ ၎င်းတို့၏ လက်တွေ့လုပ်ဆောင်မှုနှင့် ထင်မြင်ချက်များစွာတို့သည် သမ္မာတရားနှင့် ဆန့်ကျင်နေကြောင်း၊ ၎င်းတို့သည် ဇာတိပကတိနှင့် သက်ဆိုင်ကြောင်း၊ ဤအရာက သင့်အား ၎င်းတို့အပေါ် စက်ဆုပ်ရွံရှာစေကြောင်း၊ ပစ်ပစ်ခါခါငြင်းပယ်ခြင်းနှင့် အလွန်အမင်း မနှစ်မြို့ခြင်းတို့ကို ခံစားရစေကြောင်းကိုလည်း သင်မြင်နိုင်သည်။ ဤအရာများကို သင် မြင်လာပါက သင်၏ စိတ်နှလုံးတွင် သင်၏ မိဘများကို မှန်မှန်ကန်ကန် သဘောထားနိုင်လိမ့်မည်ဖြစ်ပြီး ၎င်းတို့ကို သတိရလွမ်းဆွတ်တော့မည်မဟုတ်၊ စိုးရိမ်တော့မည်မဟုတ်၊ သို့မဟုတ် ၎င်းတို့နှင့် ခွဲခွာလျက် အသက်မရှင်နိုင်ဖြစ်တော့မည် မဟုတ်ပေ။ ၎င်းတို့သည် မိဘများအဖြစ် ၎င်းတို့၏ အထူးတာဝန်ကို ပြီးမြောက်ခဲ့ပြီဖြစ်သောကြောင့် သင်သည် ၎င်းတို့ကို အရင်းနှီးဆုံးလူများအဖြစ် ဆက်ဆံတော့မည်မဟုတ်၊ သို့မဟုတ် မြတ်နိုးကြည်ညိုတော့မည်မဟုတ်ပေ။ ထိုအစား သင်သည် ၎င်းတို့ကို သာမန်လူများအဖြစ် သဘောထားလိမ့်မည်။ ထိုအချိန်တွင် သင်သည် ခံစားချက်များ၏ ချည်နှောင်မှုမှ အပြည့်အဝ လွတ်မြောက်ပြီး သင်၏ ခံစားချက်များနှင့် မိသားစု ချစ်ခင်တွယ်တာမှုများမှ အမှန်တကယ် လွတ်မြောက်လာလိမ့်မည်။ ယင်းကို သင် လုပ်ဆောင်ပြီးသည်နှင့် ထိုအရာများသည် ချစ်ခင်မြတ်နိုးထိုက်ခြင်းမရှိကြောင်း သင် သဘောပေါက်လိမ့်မည်။ ထိုအချိန်တွင် ဆွေမျိုးများ၊ မိသားစုနှင့် ဇာတိပကတိ ဆက်နွှယ်မှုများကို သမ္မာတရား သိနားလည်ခြင်းနှင့် ခံစားချက်များမှ မိမိကိုယ်ကို လွတ်မြောက်စေခြင်းတို့အတွက် ခလုတ်တံသင်းများအဖြစ် သင် မြင်လိမ့်မည်။ ယင်းမှာ သင်သည် ၎င်းတို့နှင့်ပတ်သက်၍ မိသားစု ဆက်ဆံရေးရှိသောကြောင့် သင့်ကို တုံ့ဆိုင်းရပ်တန့်စေသည့်၊ လမ်းလွဲစေပြီး ၎င်းတို့က သင့်ကို အကောင်းဆုံး ဆက်ဆံသည်၊ သင့်အတွက် အရင်းအနှီးဆုံးဖြစ်ကြသည်၊ မည်သူမဆိုထက် သင့်ကို ပိုဂရုစိုက်ကြပြီး သင့်ကို အချစ်ဆုံးသောသူများဖြစ်သည်ဟု ယုံကြည်စေသည့် ထိုဇာတိပကတိ ဆက်နွှယ်မှုရှိသောကြောင့် ဖြစ်သည်။ ၎င်းတို့က ကောင်းသောလူများ ဖြစ်သလော၊ သို့မဟုတ် မကောင်းသောလူများဖြစ်သလောဆိုသည်ကို သင့်အား ရှင်းလင်းစွာ မသိမြင်နိုင်စေသည်မှာ ဤအရာအားလုံး ဖြစ်သည်။ ဤခံစားချက်များကို သင် အမှန်တကယ် စွန့်ခွာသည်နှင့် ၎င်းတို့အကြောင်းကို မကြာခဏ သင် တွေးကောင်းတွေးနိုင်နေဆဲ ဖြစ်သော်လည်း ၎င်းတို့ကို ယခုကဲ့သို့ သင်၏ စိတ်နှလုံးအကြွင်းမဲ့ဖြင့် သတိရ၊ တဝဲလည်လည်တွေးကာ တောင့်တဦးမည်လော။ တောင့်တမည် မဟုတ်ပေ။ သင်က “ကျွန်ုပ်အတွက် အမှန်တကယ်ကို မရှိ၍မဖြစ်သောသူမှာ ကျွန်ုပ်၏ မိခင်ဖြစ်သည်။ သူမသည် ကျွန်ုပ်ကို ချစ်သောသူ၊ စောင့်ရှောက်သောသူနှင့် ကျွန်မအတွက် ဂရုအစိုက်ဆုံးသောသူ ဖြစ်သည်”ဟု သင် ပြောမည်မဟုတ်ပေ။ သင်သည် ဤသိမြင်နားလည်ခြင်းအဆင့် ရှိသည့်အခါ ၎င်းတို့အကြောင်းကို တွေးမိချိန်တွင် သင် ငိုကြွေးဦးမည်လော။ ငိုကြွေးမည်မဟုတ်။ ဤပြဿနာ ပြေလည်သွားလိမ့်မည်။ ထို့ကြောင့် သင့်ကို အခက်အခဲဖြစ်စေသည့် ပြဿနာများ သို့မဟုတ် ကိစ္စရပ်များနှင့် ပတ်သက်၍ သင်သည် သမ္မာတရား၏ ထိုသွင်ပြင်လက္ခဏာကို မရရှိသေးပါက၊ ပြီးလျှင် သမ္မာတရား စစ်မှန်မှု၏ ထိုသွင်ပြင်လက္ခဏာထဲသို့ သင် မဝင်ရောက်သေးပါက ထိုသို့သော အခက်အခဲများ သို့မဟုတ် အခြေအနေများတွင် သင် ပိတ်မိနေလိမ့်မည်ဖြစ်ပြီး ထိုအရာများမှ သင် မည်သည့်အခါတွင်မျှ ထွက်လာနိုင်လိမ့်မည် မဟုတ်ပေ။ ဤကဲ့သို့ အခက်အခဲမျိုးနှင့် ပြဿနာမျိုးကို အသက်ဝင်ရောက်မှု၏ အဓိကပြဿနာများအဖြစ် သင် သဘောထားပြီးနောက် ဖြေရှင်းရန် သမ္မာတရားကို ရှာဖွေပါက ဤသမ္မာတရား စစ်မှန်မှု၏ ဤသွင်ပြင်လက္ခဏာထဲသို့ သင် ဝင်ရောက်နိုင်လိမ့်မည်။ အမှတ်တမဲ့ဆိုသလို သင်သည် ဤအခက်အခဲများနှင့် ပြဿနာများမှ သင်ခန်းစာများ သင်ယူလိမ့်မည်။ ပြဿနာများ ပြေလည်သွားသည့်အခါ သင်သည် သင်၏ မိဘများ၊ မိသားစုဝင်များနှင့် ထိုမျှ နီးစပ်ခြင်းမရှိဟု သင် ခံစားရလိမ့်မည်။ ၎င်းတို့၏ သဘာဝ အနှစ်သာရတို့ကို သာ၍ ရှင်းလင်းစွာ သင် မြင်လိမ့်မည်ဖြစ်ပြီး ၎င်းတို့ အမှန်တကယ် မည်သည့် လူစားမျိုးများ ဖြစ်သည်ကို သင် မြင်လိမ့်မည်။ သင်၏ ချစ်ရသူများကို ရှင်းလင်းစွာ သင် သိမြင်သည့်အခါ သင်က “ကျွန်ုပ်၏ မိခင်သည် သမ္မာတရားကို လုံးဝ လက်မခံပါ။ သူသည် သမ္မာတရားကို အမှန်တကယ်ပင် အလွန်အမင်း မနှစ်မြို့သကဲ့သို့ မုန်းတီးသည်။ သူ၏ အနှစ်သာရအားဖြင့် သူသည် ဆိုးယုတ်သော လူတစ်ဦး၊ နတ်ဆိုးတစ်ဦး ဖြစ်သည်။ ကျွန်ုပ်၏ ဖခင်သည် ကျွန်ုပ် မိခင်ဘက်တွင်ရပ်တည်လျက် လူ့အကြိုက်လိုက်သူတစ်ဦး ဖြစ်သည်။ သူသည် သမ္မာတရားကို လက်မခံသကဲ့သို့ လက်တွေ့လုပ်ဆောင်ခြင်းလည်း မရှိပါ။ သူသည် သမ္မာတရားကို လိုက်စားသောသူတစ်ဦး မဟုတ်ပါ။ ကျွန်ုပ်၏ မိခင်နှင့် ဖခင်တို့၏ အပြုအမူအရ သူတို့နှစ်ဦးသည် မယုံကြည်သူများ ဖြစ်သည်။ နှစ်ဦးလုံးက နတ်ဆိုးများ ဖြစ်သည်။ သူတို့ကို ကျွန်ုပ် လုံးဝ ပုန်ကန်ရမည်ဖြစ်ပြီး သူတို့နှင့် ကျွန်ုပ် ရှင်းလင်းသည့် ကန့်သတ်ချက်များ ထားရှိရမည်ဖြစ်သည်”ဟု ပြောလိမ့်မည်။ ဤသို့ဖြင့် သင်သည် သမ္မာတရားဘက်တွင် ရပ်တည်လိမ့်မည်ဖြစ်ပြီး ၎င်းတို့ကို စွန့်လွှတ်နိုင်လိမ့်မည်။ ၎င်းတို့ မည်သူဖြစ်သည်၊ မည်သည့်လူစားမျိုးများ ဖြစ်သည်ဆိုသည်တို့ကို သင် ပိုင်းခြားသိမြင်နိုင်သည့်အခါ ၎င်းတို့အတွက် သင် ခံစားချက်များ ရှိဦးမည်လော။ ၎င်းတို့အတွက် ချစ်ခင်တွယ်တာမှုကို သင် ခံစားရဦးမည်လော။ ၎င်းတို့နှင့် ဇာတိပကတိဆိုင်ရာ ဆက်နွှယ်မှုတစ်ခု သင် ရှိဦးမည်လော။ ရှိလိမ့်မည် မဟုတ်။ သင်၏ ခံစားချက်များကိုချုပ်ထိန်းရန် လိုအပ်ဦးမည်လော။ (လိုအပ်မည်မဟုတ်ပါ။) သို့ဆိုလျှင် ဤအခက်အခဲများကို ဖြေရှင်းရန် မည်သည့်အရာအပေါ် သင် အမှန်တကယ် မှီခိုသနည်း။ သမ္မာတရား သိနားလည်ခြင်း၊ ဘုရားသခင်အပေါ် အမှီပြုခြင်းနှင့် ဘုရားသခင်ကို အားကိုးခြင်းတို့အပေါ် သင် မှီခိုပေသည်။ သင်၏ စိတ်နှလုံးတွင် ဤအရာများနှင့်ပတ်သက်၍ ရှင်းလင်းပါက သင့်ကိုယ်သင် ချုပ်ထိန်းရန် လိုအပ်သေးသလော။ မတရားခံရသည်ဟု သင် ခံစားရသေးသလော။ ထိုသို့သော ကြီးမားသည့် စိတ်ဆင်းရဲခြင်းကို ခံစားရန် သင် လိုအပ်သေးသလော။ အခြားသူများအား သင်နှင့်အတူ မိတ်သဟာယပြုပေးရန်နှင့် သဘောတရားဆိုင်ရာ အလုပ်ကို လုပ်ဖို့ သင် လိုအပ်သေးသလော။ မလိုအပ်ပေ၊ အဘယ့်ကြောင့်ဆိုသော် သင်သည် အမှုအရာများကို မိမိဘာသာ ပြီးပြတ်စေနှင့်ပြီးဖြစ်သောကြောင့် ဖြစ်သည်။ ယင်းမှာ အလွယ်လေးဖြစ်၏။ ပြန်ပြောရမည်ဆိုပါက ၎င်းတို့ကို သင် မစဉ်းစားဖို့ဖြစ်စေ၊ သတိမရဖို့ဖြစ်စေ ဤပြဿနာကို သင် မည်သို့ ဖြေရှင်းသင့်သနည်း။ (ဖြေရှင်းရန် သမ္မာတရားကို ရှာရမည်။) ထိုစကားများမှာ အလွန်တရားဝင်ဖြစ်ပုံရသော ကြီးကျယ်သည့် စကားများဖြစ်သည်။ သို့သော် အနည်းငယ် ပို၍ လက်တွေ့ကျစွာ ပြောဆိုလော့။ (၎င်းတို့၏ အနှစ်သာရများကို ရိပ်စားမိရန် ဘုရားနှုတ်ကပတ်တော်များကို အသုံးပြုပါ။ ဆိုလိုသည်မှာ ၎င်းတို့၏ အနှစ်သာရအရ ၎င်းတို့ကို ပိုင်းခြားသိမြင်ပါ။ ထို့နောက်တွင် ကျွန်ုပ်တို့၏ ချစ်ခင်တွယ်တာမှုနှင့် ဇာတိပကတိဆိုင်ရာ ဆက်နွှယ်မှုများကို ကျွန်ုပ်တို့ ဘေးဖယ်ထားနိုင်လိမ့်မည်။) မှန်ပေသည်။ လူတို့၏ သဘာဝ အနှစ်သာရအပေါ် သင်၏ ချင့်ချိန်နိုင်စွမ်းကို ဘုရားနှုတ်ကပတ်တော်များအပေါ် သင် အခြေခံရမည်။ ဘုရားနှုတ်ကပတ်တော်၏ ဖော်ထုတ်ခြင်းမရှိဘဲနှင့်၊ အခြားသူတို့၏ သဘာဝ အနှစ်သာရကို မည်သူမျှ မရိပ်စားမိနိုင်ပေ။ ဘုရားနှုတ်ကပတ်တော်များနှင့် သမ္မာတရားအပေါ် အခြေခံခြင်းအားဖြင့်သာ လူတို့၏ သဘာဝ အနှစ်သာရတို့ကို ရိပ်စားမိနိုင်ပေသည်။ ထိုအခါမှသာ အကြင်သူသည် လူသား ခံစားချက်များနှင့် သက်ဆိုင်သည့် ပြဿနာကို ယင်း၏ အရင်းအမြစ်မှနေ၍ ဖြေရှင်းနိုင်သည်။ ပထမဦးစွာ သင်၏ ချစ်ခင်တွယ်တာမှုများနှင့် ဇာတိပကတိဆိုင်ရာ ဆက်နွှယ်မှုများကို နောက်ချန်ထားခြင်းအားဖြင့် အစပြုလော့။ မည်သူအတွက် သင်၏ ခံစားချက်များက အားအကောင်းဆုံး ဖြစ်သည်ဖြစ်စေ ထိုသူမှာ ပထမဦးဆုံး သင် စိစစ်ပြီး သိမြင်သင့်သည့်သူ ဖြစ်သည်။ ဤဖြေရှင်းချက်ကို သင် မည်သို့ ထင်မြင်ပါသနည်း။ (ကောင်းပါသည်။) လူအချို့က “ကျွန်ုပ်၏ ခံစားချက်များ အားအကောင်းဆုံးဖြစ်သည့် လူတို့ကို ပိုင်းခြားသိမြင်ခြင်းနှင့် စိစစ်ခြင်းတို့သည် အလွန် စာနာစိတ် ကင်းမဲ့ရာကျသည်”ဟု ပြောကြသည်။ ထိုသူတို့ကို သင် ပိုင်းခြားသိမြင်ခြင်း၏ လိုရင်းမှာ ၎င်းတို့နှင့် ဆက်ဆံရေးများကို သင် ဖြတ်ရန်အလို့ငှာ မဟုတ်ပေ။ သင်၏ မိဘနှင့်လည်းကောင်း၊ သားသမီးနှင့်လည်းကောင်း ဆက်ဆံရေးများကို အဆက်ဖြတ်ရန် မဟုတ်သကဲ့သို့ ၎င်းတို့ကို လုံးဝ စွန့်လွှတ်ရန်၊ ၎င်းတို့နှင့် မည်သည့်အခါတွင်မျှ တစ်ဖန် မဆက်ဆံရန်အလို့ငှာ မဟုတ်ပေ။ သင်၏ ချစ်ရသူများပေါ် သင်၏ တာဝန်များကို သင် ဖြည့်ဆည်းသင့်သော်လည်း သင်သည် ဘုရားသခင်၏ နောက်လိုက်တစ်ဦးဖြစ်သောကြောင့် ၎င်းတို့အားဖြင့် ဘောင်ခတ်ခံ၍မရ သို့မဟုတ် တွယ်ငြိခံ၍ မရပေ။ ဤစည်းမျဉ်းကို သင် ပိုင်ဆိုင်ရမည်။ သင်သည် ထိုသူတို့အားဖြင့် ဘောင်ခတ်ခံလာရကောင်းခံရနိုင်ဆဲ၊ သို့မဟုတ် တွယ်ငြိခံလာရကောင်း ခံရနိုင်ဆဲဖြစ်လျှင်၊ သင်၏ တာဝန်ကို ကောင်းစွာ သင် မထမ်းဆောင်နိုင်သကဲ့သို့ လမ်းဆုံးထိ ဘုရားသခင်နောက်သို့ သင် လိုက်လျှောက်နိုင်သည်ဟု အာမမခံနိုင်ပေ။ သင်သည် ဘုရားသခင်၏ နောက်လိုက် သို့မဟုတ် သမ္မာတရားကို ချစ်သောသူတစ်ဦး မဟုတ်ပါက သင့်အပေါ် ဤအရာကို မည်သူမျှ တောင်းဆိုမည် မဟုတ်။ လူအချို့က “လတ်တလောတွင် သမ္မာတရားကို ကျွန်ုပ် နားမလည်ပါ။ အခြားသူများအား မည်သို့ ပိုင်းခြားသိမြင်ရမည်ကို မသိပါ”ဟု ပြောကြသည်။ သင်သည် ဤဝိညာဉ်ရင့်ကျက်မှုမရှိပါက ယခုလောလောဆယ်တွင် ပိုင်းခြားသိမြင်နိုင်စွမ်းကို ဘေးဖယ်ထားလော့။ သင်၏ ဝိညာဉ်ရင့်ကျက်မှု ပြည့်စုံလုံလောက်ပြီး ထိုသို့သော စမ်းသပ်မှုများကို သင် ဖြတ်ကျော်ကာ ဤသို့လက်တွေ့လုပ်ဆောင်ရန် မိမိဘာသာ ကနဦးခြေလှမ်း လှမ်းနိုင်သည့်အခါ သမ္မာတရား၏ ဤသွင်ပြင်လက္ခဏာကို လက်တွေ့လုပ်ဆောင်ရန် သင့်အတွက် အလွန်နောက်ကျလိမ့်မည် မဟုတ်ပေ။

လူများစွာတို့သည် မလိုအပ်ဘဲ စိတ်လှုပ်ရှားထိခိုက်လွယ်စွာ ခံစားကြသည်။ အမှန်တွင် ဤအရာအားလုံးသည် မလိုအပ်သည့် အချည်းနှီးသော ဆင်းရဲဒုက္ခဖြစ်သည်။ ထိုသို့ အဘယ်ကြောင့် ငါ ပြောရသနည်း။ လူတို့သည် မိမိတို့၏ ခံစားချက်များဖြင့် အမြဲ ဘောင်ခတ်ခံရသောကြောင့် သမ္မာတရားကို လက်တွေ့မလုပ်ဆောင်နိုင်သကဲ့သို့ ဘုရားသခင်ကို ကျိုးနွံနာခံနိုင်ခြင်း မရှိကြချေ။ ထို့အပြင် ခံစားချက်များ၏ ဘောင်ခတ်ခံရခြင်းသည် မိမိတာဝန်ကို ထမ်းဆောင်ခြင်း သို့မဟုတ် ဘုရားသခင်နောက် လိုက်လျှောက်ခြင်းအတွက် လုံးဝ အကျိုးမပြုသည့်အပြင် အသက်ဝင်ရောက်မှုအတွက် ကြီးမားသည့် အတားအဆီး ဖြစ်သည်။ ထို့ကြောင့် ခံစားချက်များ၏ ဘောင်ခတ်ခြင်းကို ခံစားရခြင်းသည် အဓိပ္ပာယ်မရှိသကဲ့သို့ ထိုအရာကို ဘုရားသခင်က မအောက်မေ့ပေ။ သို့ဆိုလျှင် ဤအဓိပ္ပာယ်မဲ့သည့် ဆင်းရဲဒုက္ခမှ သင်သည် မိမိကိုယ်ကို မည်သို့ လွတ်မြောက်စေသနည်း။ သမ္မာတရားကို သင် နားလည်ရန် လိုအပ်ပြီး ဤဇာတိပကတိဆိုင်ရာ ဆက်နွှယ်မှုများ၏ အနှစ်သာရကို ရိပ်စားကာ နားလည်ဖို့ လိုအပ်သည်။ ထို့နောက်တွင် ဇာတိပကတိ၏ ခံစားချက်များအားဖြင့် ဘောင်ခတ်ခံရခြင်းမှ သင် လွတ်မြောက်ရန် လွယ်ကူလိမ့်မည်။ ဘုရားသခင်ကို ယုံကြည်သောလူအချို့သည် မိမိတို့ ဘာသာတရားမရှိသူမိဘများ၏ ပြင်းထန်စွာ နှိပ်စက်ညှဉ်းပန်းမှု ခံရကြသည်။ ၎င်းတို့ကို လက်တွဲဖော် အတင်းအဓမ္မ မရှာခိုင်းလျှင် အလုပ်တစ်ခု အတင်းအဓမ္မ ရှာခိုင်းကြသည်။ ၎င်းတို့အနေဖြင့် မိမိတို့ အလိုရှိသည့်အရာ မည်သည့်အရာကိုမဆို လုပ်ဆောင်နိုင်သော်လည်း ဘုရားသခင်ကို ယုံကြည်ခွင့်မရကြပေ။ မိဘအချို့သည် ဘုရားသခင်ကိုပင် ပြစ်မှားစော်ကားကြသည်။ ထို့ကြောင့် ဤလူများသည် မိမိတို့ မိဘများ၏ စစ်မှန်သည့် နတ်ဆိုးဆန်သော စရိုက်လက္ခဏာများကို မြင်ကြ၏။ ထိုအခါမှသာ ၎င်းတို့၏ စိတ်နှလုံးများက “သူတို့သည် အမှန်တကယ် နတ်ဆိုးများဖြစ်ကြသည်။ ထို့ကြောင့် သူတို့ကို ကျွန်ုပ်၏ ချစ်ခင်ရသူများအဖြစ် ကျွန်ုပ် သဘောမထားနိုင်ပါ”ဟု ဟစ်အော်ကြလေသည်။ ထိုအချိန်မှစ၍ ၎င်းတို့သည် ၎င်းတို့၏ ခံစားချက်များ၏ ဘောင်ခတ်ခြင်းများနှင့် အချုပ်အချယ်များမှ လွတ်မြောက်သွားကြသည်။ လူတို့ကို ဘောင်ခတ်ပြီး ချည်နှောင်ရန် စာတန်က ချစ်ခင်တွယ်တာမှုကို အသုံးပြုချင်သည်။ လူတို့သည် သမ္မာတရားကို နားမလည်ပါက လှည့်ဖြားခံရရန် ၎င်းတို့အတွက် လွယ်ကူသည်။ မကြာခဏဆိုသကဲ့သို့ ၎င်းတို့၏ မိဘများနှင့် ချစ်ခင်ရသူများအတွက် ၎င်းတို့သည် ဝမ်းနည်းကြသည်၊ ငိုကြွေးကြသည်၊ အခက်အခဲများကို ခါးစီးခံကြပြီး စွန့်လွှတ်စတေးမှုများ ပြုလုပ်ကြသည်။ ဤသည်မှာ ၎င်းတို့၏ အသိပညာကင်းမဲ့သော မသိနားမလည်မှု ဖြစ်သည်။ ထိုအရာကို ၎င်းတို့ မညည်းမညူ လက်ခံပြီး မိမိတို့ စိုက်သည့်အရာကို ရိတ်သိမ်းကြသည်။ ဤအရာများကို ခံစားခြင်းသည် တန်ဖိုးမရှိပေ။ ဘုရားသခင်က လုံးဝ သတိမရမည့် အချည်းနှီးသော အားထုတ်မှုတစ်ခု ဖြစ်ပြီး ၎င်းတို့က အလွန်အမင်း ဒုက္ခဆင်းရဲခံနေခြင်းဖြစ်သည်ဟု တစ်ဦးတစ်ယောက်က ပြောကောင်းပြောနိုင်ပေသည်။ သမ္မာတရားကို အမှန်တကယ် သင် နားလည်ပြီး ၎င်းတို့၏ အနှစ်သာရကို သင် ရိပ်စားမိသည့်အခါ သင် လွတ်မြောက်လာလိမ့်မည်။ သင်၏ ယခင်က ဆင်းရဲဒုက္ခသည် မသိနားမလည်မှုနှင့် အသိပညာကင်းမဲ့မှုဖြစ်သည်ဟု သင် ခံစားရလိမ့်မည်။ အခြားမည်သူကိုမျှ သင် အပြစ်တင်လိမ့်မည် မဟုတ်။ သင်၏ ကိုယ်ပိုင် ကြောင်းကျိုးမမြင်ခြင်း၊ မိုက်မဲမှုနှင့် သမ္မာတရားကို သင်နားမလည် သို့မဟုတ် အမှုကိစ္စများကို ရှင်းလင်းစွာ မမြင်သည့်အချက်တို့ကို သင် အပြစ်တင်လိမ့်မည်။ ဤခံစားချက်များနှင့်ဆိုင်သည့် ပြဿနာသည် ဖြေရှင်းရန် လွယ်ကူသည့်အရာတစ်ခု ဖြစ်သလော။ သင်တို့ ဖြေရှင်းပြီးပြီလော။ (မဖြေရှင်းရသေးပါ။ ကျွန်ုပ်တို့သည် လက်တွေ့လုပ်ဆောင်ခြင်း မရှိသေး၊ သို့မဟုတ် ဘုရားသခင် ထောက်ပြသည့် လက်တွေ့လုပ်ဆောင်ခြင်း လမ်းကြောင်းထဲသို့ မဝင်ရောက်သေးပါ။ ဤအရာမျိုး ဖြစ်ပျက်သည့်အခါ ရည်ညွှန်းခြင်းအတွက် အခြေခံအကြောင်းရင်းတစ်ခု ကျွန်ုပ်တို့ ရှိကြခြင်းသာ ဖြစ်ပါသည်။) ဤအရာအားလုံးကို ပြောဆိုရာတွင် လက်တွေ့ကျသည့် ကိစ္စရပ်များအကြောင်းကို ပြောဆိုနေသည်ဖြစ်စေ၊ လမ်းကြောင်းများအဖြစ် သင် အဓိပ္ပာယ်ကောက်သည့် အရာများအကြောင်းကို ပြောဆိုနေသည်ဖြစ်စေ သင်တို့ကို ငါ အမှန်ကို ပြောနေခြင်းဖြစ်သည်။ ဤအရာမျိုးကို သင်တို့ ကြုံရသည့်အခါ ကိုင်တွယ်ခြင်းအတွက် အကောင်းဆုံးသောနည်းမှာ ဘုရားသခင်ထံ ဆုတောင်းရန်နှင့် သမ္မာတရား ရှာဖွေရန်ဖြစ်ပြီး ထို့နောက်တွင် ထိုအရာကို ဖြေရှင်းရန် နည်းလမ်းတစ်ခု သင် ရှိလိမ့်မည်။ ဇာတိပကတိ ခံစားချက်များ၏ အနှစ်သာရကို သင် ရိပ်စားမိပြီးသည့်အခါ သမ္မာတရား စည်းမျဉ်းများအတိုင်း ကိစ္စရပ်များကို ကိုင်တွယ်ရန် သင့်အတွက် လွယ်ကူလိမ့်မည်။ သင်၏ ချစ်ခင်ရသူများနှင့် ပတ်သက်၍ ဇာတိပကတိ ဆက်နွှယ်မှုများ၏ ဘောင်ခတ်ခြင်းကို သင် အမြဲခံရပါက သမ္မာတရားကို လက်တွေ့လုပ်ဆောင်ရန် နည်းလမ်းမရှိပေ။ အယူဝါဒကို သင် နားလည်ပြီး ဆောင်ပုဒ်များကို ကြွေးကြော်လျှင်ပင် သင်၏ တကယ့် ပြဿနာများကို မဖြေရှင်းနိုင်သေးဘဲ ရှိလိမ့်ဦးမည် ဖြစ်သည်။ လူအချို့သည် သမ္မာတရားအား မည်သို့ လက်တွေ့လုပ်ဆောင်ရမည်ကို တကယ် မသိကြချေ။ အခြားသူများမှာ သမ္မာတရားကို ရှာဖွေနိုင်ကြသော်လည်း ၎င်းတို့ထံ အခြားသူများက သမ္မာတရားကို ရှင်းလင်းစွာ မိတ်သဟာယပြုသည့်အခါ ၎င်းတို့သည် အပြည့်အဝ မယုံကြည်ကြသကဲ့သို့ လုံးဝ လက်မခံနိုင်ကြချေ။ ယင်းကို အယူဝါဒဖြစ်သည့်အလား နားထောင်လိုက်ကြသည်။ ထို့ကြောင့် သင်၏ ခံစားချက်များဖြင့် ဘောင်ခတ်ခံရခြင်း ပြဿနာသည် မည်သည့်အခါတွင်မျှ မပြေလည်နိုင်ပေ။ ထိုပြဿနာ မပြေလည်နိုင်ပါက ထိုအရာအတွင်းမှ မည်သည့်အခါတွင်မျှ သင် မလွတ်မြောက်နိုင်သကဲ့သို့ သင်သည် ဆက်လက်၍ ဘောင်ခတ်ခံရကာ ချည်နှောင်ခံရလိမ့်မည်။ ဘုရားသခင်ကို သင် ယုံကြည်သော်လည်း သူ့နောက် လိုက်မလျှောက်နိုင် သို့မဟုတ် သင် လုပ်သင့်သည့်တာဝန်ကို မထမ်းဆောင်နိုင်ပါက သင်သည် အဆုံးတွင် ဘုရားသခင်၏ ကတိတော်ကို လက်ခံဖို့ရာ ထိုက်တန်တော့မည် မဟုတ်သည်မှာ တစ်နေ့တွင် ကပ်ဘေးထဲသို့ ကျရောက်ကာ အပြစ်ပေးခံရသည်အထိ ဖြစ်လိမ့်မည်။ ငိုကြွေးခြင်းနှင့် အံသွားခဲကြိတ်ခြင်းတို့သည် အချည်းနှီးဖြစ်လိမ့်မည်ဖြစ်ပြီး မည်သူကမျှ သင့်ကို ကယ်တင်နိုင်လိမ့်မည် မဟုတ်။ ဖောက်ပြန်ပျက်စီးသော စိတ်သဘောထားများကို ဖြေရှင်းခြင်း၏ အကျိုးဆက်များနှင့်ပတ်သက်၍ သင်တို့ ယခု ရှင်းပြီလော။

ယနေ့တွင် မည်သည့်အရာကို ငါတို့ မိတ်သဟာယပြုပြီးပြီနည်း။ လူတို့၏ အခြေအနေများ၊ ၎င်းတို့၏ ဖောက်ပြန်ပျက်စီးမှုများအပြင် သမ္မာတရား စစ်မှန်မှုထဲသို့ မည်သို့ ဝင်ရောက်ရမည်၊ သင်ကြုံရသည့် ကိစ္စများအား မည်သို့ မှန်ကန်စွာ သဘောထားရမည်၊ မည်သည့် ရှုထောင့်မျိုးများကို သင် စွဲကိုင်သင့်သည်ဆိုသည်နှင့် သင်ကိုယ်တိုင်၏ ဖောက်ပြန်ပျက်စီးသော စိတ်သဘောထားကို မည်သို့ သိရှိကာ စိတ်ဖြာလေ့လာဆွေးနွေးပြီး ဖြေရှင်းရမည်ဆိုသည်တို့ကို ငါတို့ မိတ်သဟာယပြုပြီး ဖြစ်သည်။ အသက်ဝင်ရောက်မှု သင်ခန်းစာကို အမြဲ သင်ယူရမည်။ သင်ယူရန် မည်သည့်အခါတွင်မျှ နောက်မကျပေ၊ သို့မဟုတ် စတင်ရန်မှာ မည်သည့်အခါတွင်မျှ နောက်မကျပေ။ သို့ဆိုလျှင် မည်သည့်အခါတွင် အလွန်နောက်ကျသွားသနည်း။ သင် သေဆုံးပြီးပါက အလွန်နောက်ကျသွားပြီဖြစ်သည်။ အသက်ရှင်နေဆဲဖြစ်ပါက အလွန် နောက်မကျသေးပေ။ ယခု သင်တို့အားလုံး မသေဘဲ အသက်ရှင်ကြသော်လည်း အသက်ရှင်ခြင်းနှင့် သေခြင်းက မည်သည့်အရာ ဖြစ်သည်ကို သင်တို့ အမှန်တကယ် ရှင်းကြသလော။ အင်္ဂလိပ်စကားတွင် လူတို့က “ကျွန်ုပ် အသက်ရှင်သေးသည်”ဟု အမြဲပြောကြသည်။ ယင်းမှာ မည်သည့်အရာကို ဆိုလိုသနည်း။ အမှုအရာများ သင့်ထံ ဖြစ်ပျက်သည့်အခါ သို့မဟုတ် လူ့အဖွဲ့အစည်း၏ ခေတ်ရေစီးကြောင်းထဲသို့ ဆွဲဆောင်ခြင်းကို သင် ခံရပြီးသည့်အခါ၊ သို့မဟုတ် သင်သည် အကျင့်ပျက်သည်ဟု ခံစားရပြီးနောက် သင့်ကိုယ်သင် အပ်ဖြင့်ထိုးပြီး ထိုအရာကို ခံစားသိမြင်နိုင်သည့်အခါ သင်သည် အသက်ရှင်နေသေးကြောင်း၊ သင်၏ စိတ်နှလုံးသည် မသေသေးကြောင်းကို သင် ခံစားမိလိမ့်မည်။ သင် အသက်ရှင်သေးပါက လိုက်စားမှုများ သင် ရှိသင့်ပြီး လူသား သဏ္ဌာန်တူခြင်းကို အသက်ရှင်နေထိုင်သင့်သည်။ ယခင်က သင်သည် အကျင့်ပျက်ခဲ့သည်၊ လောကီအရာများနောက်လိုက်ကာ ဆိုးယုတ်မှု၏ ခေတ်ရေစီးကြောင်းတစ်ခုဖြင့် အသက်ရှင်ခဲ့သည်။ သင်သည် ဣန္ဒြေဆည်ကာ ရှေ့ဆက်အကျင့်ပျက်ခြင်းကို ရှောင်ရှားရမည့် အချိန် မဟုတ်လော။ သင်မြင်သလော၊ အနောက်တိုင်းသားများသည် စစ်မှန်သည့် လမ်းခရီးကို ရှာမတွေ့ကြသေးသကဲ့သို့ လူသားဘဝနှင့် ၎င်းတို့၏ ဘဝနေထိုင်မှုပုံစံတို့နှင့် ပတ်သက်လာသည့်အခါ ၎င်းတို့ မျှော်လင့်ချက်မဲ့ခံစားကြသည်။ ထို့ကြောင့် ၎င်းတို့၏ စကားများသည် နက်ရှိုင်းသည့် စိတ်ခံစားမှုများနှင့် ပြည့်ပြီး စိတ်ပျက်လက်ပျက် ဖြစ်ခြင်းနှင့် မျှော်လင့်ချက်မဲ့ခြင်းမျိုး ရှိသည်။ ဆိုလိုသည်မှာ အတွင်းတွင် မျှော်လင့်ချက်မဲ့သည့် စိတ်အခြေအနေတစ်ခု ပါရှိသည်ဟု ဆိုရပေမည်။ ၎င်းတို့ အသက်ရှင်သည်နှင့်အမျှ ၎င်းတို့ လူသားမဟုတ်ဟု မကြာခဏ ခံစားရသော်လည်း ၎င်းတို့ ဤသို့ အသက်ရှင်ကြရမည်ဖြစ်သည်။ ၎င်းတို့အနေဖြင့် သရဲတစ္ဆေများ၊ တိရစ္ဆာန်များ သို့မဟုတ် သားရဲများကဲ့သို့ ခံစားရလျှင်ပင် ဤနည်းဖြင့် ၎င်းတို့ ဆက်လက်အသက်ရှင်ရမည် ဖြစ်သည်။ မည်သည့်အရာကို လုပ်ဆောင်၍ ရသနည်း။ ၎င်းတို့ လုပ်ဆောင်နိုင်သည့်အရာ တစ်ခုမျှ မရှိချေ။ ၎င်းတို့ မသေဆုံးကြပါက ဤသို့ အသက်ရှင်ကြရမည်။ ၎င်းတို့အတွက် အခြားသော လမ်းကြောင်း မရှိသကဲ့သို့ သနားကရုဏာသက်ဖွယ်ရာ အသက်ရှင်ကြသည်။ သင်တို့အားလုံး ဤကဲ့သို့ ဖြစ်ကြသလော။ တစ်နေ့တွင် သင်တို့သည် “ဟာ၊ ငါ အသက်ရှင်ပါသေးသည်၊ ငါ့ နှလုံး မသေသေးပါ”ဟု တွေးလျက် နက်ရှိုင်းသည့် ခံစားမှုဖြင့် ပြည့်ပါက၊ လူတစ်ဦးသည် ထိုအခြေအနေထိ အသက်ရှင်ပါက ၎င်းတို့မှ မည်သည့်အရာ ဖြစ်လာမည်နည်း။ ၎င်းတို့သည် ကြီးစွာ အန္တရာယ်ရှိနှင့်ကြပြီး ဖြစ်သည်။ ယုံကြည်သူတစ်ဦးအတွက် ဤသည်မှာ အလွန်အန္တရာယ်ရှိနှင့်ပေသည်။ “ကျွန်ုပ် အသက်ရှင်သေးသော်လည်း ကျွန်ုပ်၏ သွေးသားသည် အခွံတစ်ခုဖြစ်ပြီး ကျွန်ုပ်သည် လမ်းလျှောက်နေသည့် အလောင်းကောင်တစ်ကောင်ဖြစ်သည်။ ကျွန်ုပ်၏ နှလုံးသား အသက်ရှိပြီး ကျွန်ုပ် စိတ်နှလုံးထဲက စိတ်ဆန္ဒများနှင့် စံသတ်မှတ်ချက် အနည်းငယ်ကသာ ကျွန်ုပ်၏ ဇာတိပကတိကို ထောက်ကူပေးထားသည်”ဟူသကဲ့သို့သော တစ်စုံတစ်ရာကို သင် လုံးဝ ပြော၍ မရပေ။ ထိုအခြေအနေထိ မရောက်စေနှင့်။ ထိုအခြေအနေထိ သင် ရောက်ပါက သင့်ကို ကယ်တင်ရန် အလွန်ခက်ခဲလိမ့်မည်။ သင်တို့အားလုံးကို ယခု ကြည့်သည့်အခါ သင်တို့၏ အခြေအနေများက မဆိုးပေ။ ဘာသာတရားမရှိသူတစ်ဦးထံ ဘုရားနှုတ်ကပတ်တော်ကို သင်တို့ ဖတ်ရွတ်ပြပါက မည်သည့် အသိမျှ ၎င်းတို့ ရရှိလိမ့်မည် မဟုတ်။ ထို့ကြောင့် ယခု သင်တို့ကို ပြုပြင်ရန် ပြင်းထန်သည့် စကားများကို ငါ အသုံးပြုပါက ထိုအရာကို သင်တို့ လုံးဝ သတိထားမိလိမ့်မည်လော။ (သတိထားမိပါမည်။) သင်တို့ထဲမှအချို့သည် ပြုပြင်ခံရသည့်နောက်တွင်သာ မိမိတို့ကိုယ်ကို သိလာကြပေသည်။ ထိုအခါမှသာ သင်တို့ နောင်တရကြသည်။ ဤသည်မှာ သင်တို့သည် သတိရှိနေကြသေးပြီး သင်တို့ စိတ်နှလုံးများလည်း အပြည့်အဝ မသေဆုံးသေးဟု ဆိုလိုသည်။ ထိုအရာက သင်တို့သည် နိုးထနေဆဲ၊ အသက်ရှိနေဆဲဖြစ်သည်ကို သက်သေပြပေသည်။ သမ္မာတရားကို သင် လက်ခံနိုင်ပြီး လက်တွေ့လုပ်ဆောင်နိုင်ပါက ကယ်တင်ခံရမည့် မျှော်လင့်ချက်တစ်ခု ရှိ၏။ တစ်စုံတစ်ဦးသည် သမ္မာတရားကို တကယ် လက်ခံမည် မဟုတ်တော့သည့် အခြေအနေထိ ရောက်ရှိပါက ၎င်းတို့ လုံးဝ သေဆုံးပြီး ကယ်တင်၍ မရတော့ပေ။ အသင်းတော်ထဲတွင် သမ္မာတရားကို တကယ် လက်ခံလိမ့်မည် မဟုတ်သည့်သူများမှာ လူအနည်းငယ်ထက်ပိုပေသည်။ ဤလူများသည် အသက်ရှူနေကြသော်လည်း အမှန်တကယ် ဝိညာဉ်များမရှိကြချေ။ ၎င်းတို့သည် ဝိညာဉ်မဲ့ လူသေ၊ လမ်းလျှောက်နေသည့် အလောင်းကောင်များ ဖြစ်သည်။ ထိုသို့သောလူများသည် လုံးဝ ထုတ်ဖော်ကာ ဖယ်ရှားရှင်းလင်းခြင်း ခံရပြီးဖြစ်သည်။

၂၀၁၆ ခုနှစ်၊ အောက်တိုဘာလ ၅ ရက်