လူတို့သည် ဘုရားသခင်နှင့် မိမိတို့၏ တာဝန်များအပေါ် ရိုးသားသော စိတ်နှလုံးဖြင့် ချဉ်းကပ်ရမည်။ ရိုးသားသော စိတ်နှလုံးရှိလျှင် ၎င်းတို့သည် ဘုရားသခင်ကို ကြောက်ရွံ့သော လူများဖြစ်လိမ့်မည်။ ရိုးသားသော စိတ်နှလုံးရှိသော လူများသည် ဘုရားသခင်အပေါ်တွင် မည်သို့သော သဘောထားမျိုးရှိသနည်း။ အနည်းဆုံးအနေဖြင့် ၎င်းတို့တွင် ဘုရားသခင်ကို ကြောက်ရွံ့သော စိတ်နှလုံး၊ အရာခပ်သိမ်းတွင် ဘုရားသခင်ကို ကျိုးနွံနာခံသော စိတ်နှလုံးရှိကြသည်။ ၎င်းတို့သည် ကောင်းချီးများအကြောင်း သို့မဟုတ် ကံဆိုးခြင်းများအကြောင်း မမေးမြန်းပေ။ အခြေအနေများနှင့်ပတ်သက်၍ မည်သည့်အရာမျှ မပြောပေ။ ၎င်းတို့သည် ဘုရားစီစဉ်ညွှန်ကြားခြင်း၏ ပြုသမျှကို ခံကြသည်။ ဤသူတို့သည် ရိုးသားသောစိတ်နှလုံးရှိသည့်လူများ ဖြစ်ကြသည်။ ဘုရားသခင်နှင့်ပတ်သက်၍ အစဉ်သံသယရှိသောသူ၊ ဘုရားသခင်အား အစဉ် ကြည့်ရှုစစ်ဆေးနေသောသူ၊ ဘုရားသခင်နှင့် အပေးအယူတစ်ခုပြုလုပ်ရန် အစဉ်ကြိုးစားနေသောသူများသည် ရိုးသားသော စိတ်နှလုံး ရှိသည့်လူများ ဖြစ်သလော။ (မဟုတ်ပါ။) ဤသို့သောလူများ၏ စိတ်နှလုံးအတွင်းတွင် မည်သည့်အရာ တည်ရှိသနည်း။ လှည့်စားတတ်ခြင်းနှင့် ကောက်ကျစ်ဆိုးယုတ်မှုဖြစ်သည်။ ၎င်းတို့သည် အစဉ်သဖြင့် ကြည့်ရှုစစ်ဆေးနေသည်။ ၎င်းတို့ ကြည့်ရှုစစ်ဆေးသည့်အရာမှာ မည်သည့်အရာဖြစ်သနည်း။ (လူတို့အပေါ် ဘုရားသခင်၏ သဘောထားဖြစ်သည်။) ၎င်းတို့သည် လူတို့အပေါ် ဘုရားသခင်၏ သဘောထားကို အစဉ် ကြည့်ရှုစစ်ဆေးနေသည်။ ဤသည်မှာ မည်သည့်ပြဿနာ ဖြစ်သနည်း။ အဘယ်ကြောင့် ဤအရာကို ၎င်းတို့ ကြည့်ရှုစစ်ဆေးသနည်း။ ၎င်းတို့၏ မရှိမဖြစ်သော အကျိုးစီးပွား ပါဝင်နေသောကြောင့်ဖြစ်သည်။ ၎င်းတို့၏ စိတ်နှလုံးတွင် မိမိတို့ကိုယ်ကို စဉ်းစားကြသည်။ “ဘုရားသခင်က ဤအခြေအနေများကို ငါ့အတွက် ဖန်တီးခဲ့သည်။ သူသည် ဤအရာကို ငါ့ထံ ဖြစ်စေခဲ့သည်။ အဘယ်ကြောင့် ထိုသို့ သူလုပ်ဆောင်ခဲ့သနည်း။ ဤအရာက အခြားသူများအပေါ် မဖြစ်ပျက်ခဲ့ပါ။ ငါ့ထံတွင် အဘယ်ကြောင့် ဖြစ်ပျက်ရသနည်း။ နောက်ပိုင်းတွင် အကျိုးဆက်များက မည်သည့်အရာ ဖြစ်လိမ့်မည်နည်း။” ဤအရာတို့သည် ၎င်းတို့ ကြည့်ရှုစစ်ဆေးသော အရာများ ဖြစ်သည်။ ၎င်းတို့သည် ၎င်းတို့၏ အကျိုးအမြတ်များ၊ ဆုံးရှုံးမှုများ၊ ကောင်းချီးများနှင့် ကံဆိုးမှုများကို စေ့စေ့စပ်စပ် ကြည့်ရှုစစ်ဆေးသည်။ ဤအရာများကို ကြည့်ရှုစစ်ဆေးနေစဉ်တွင် ၎င်းတို့သည် သမ္မာတရားကို လက်တွေ့လုပ်ဆောင်နိုင်သလော။ ဘုရားသခင်ကို ကျိုးနွံနာခံနိုင်သလော။ ဤသို့မလုပ်ဆောင်နိုင်ပေ။ ထို့ပြင် ၎င်းတို့စိတ်နှလုံးများ၏ စဉ်းစားဆင်ခြင်ခြင်းများမှ ထွက်ပေါ်သောအရာများ၏ သဘာဝမှာ မည်သို့ ရှိသနည်း။ ဤအရာများမှာ သဘာဝအရ ၎င်းတို့၏ ကိုယ်ပိုင် အကျိုးစီးပွားများကို အလေးထားခြင်းများသာ ဖြစ်သည်၊ အားလုံးသည် ၎င်းတို့၏ ကိုယ်ကျိုးအတွက် ဖြစ်သည်။ မည်သည့်တာဝန်ကို ၎င်းတို့ထမ်းဆောင်သည်ဖြစ်စေ ဤလူများသည် အရင်ဦးဆုံး စေ့စေ့စပ်စပ် ကြည့်ရှုစစ်ဆေးကြ၏။ “ဤတာဝန်ကို ထမ်းဆောင်သောအခါ ငါ ဆင်းရဲဒုက္ခခံရမည်လော။ မကြာခဏအလုပ်လုပ်၍ အပြင်သို့ ခရီးသွားရမည်လော။ ပုံမှန်စားသောက်ကာ အနားယူနိုင်မည်လော။ အစဉ်သဖြင့် စောစောထနေရမည်လော။ မည်သို့သောလူစားမျိုးကို ငါ တွေ့ရမည်နည်း။ ဘာသာတရား မရှိသူများနှင့် မကြာခဏ တွေ့ရမည်လော။ ယခုအခါတွင် ပြင်ပလောကသည် အလွန်ပင် ရန်လိုနေကြသည်။ အစဉ်သဖြင့် အပြင်တွင် အလုပ်လုပ်ပြီး ခရီးသွားနေရလျှင် အဆင်းနီသောနဂါးကြီး၏ ဖမ်းဆီးခြင်းကို ခံရလျှင် မည်သို့လုပ်ဆောင်ရမည်နည်း” ဟူ၍ ဖြစ်သည်။ ၎င်းတို့သည် မိမိတို့၏တာဝန်များကို လက်ခံသည့်ပုံစံရှိသော်လည်း ၎င်းတို့ စိတ်နှလုံးတွင် လှည့်ဖြားတတ်ခြင်း ရှိသည်။ ၎င်းတို့သည် ဤအရာများကို အစဉ် စေ့စေ့စပ်စပ် ကြည့်ရှုစစ်ဆေးကြသည်။ အမှန်တကယ်တွင် ဤအရာများကို ၎င်းတို့ စေ့စေ့စပ်စပ် ကြည့်ရှုစစ်ဆေးခြင်းအားဖြင့် ၎င်းတို့သည် မိမိတို့၏ ကိုယ်ပိုင် အလားအလာများနှင့် ကံကြမ္မာများကို အလေးထားနေကြခြင်းသာ ဖြစ်သည်။ ဘုရားအိမ်တော်၏ အကျိုးစီးပွားများကို မစဉ်းစားပေ။ လူတို့သည် ၎င်းတို့၏ ကိုယ်ပိုင် အလားအလာများနှင့် ကံကြမ္မာများအပြင် အကျိုးစီးပွားများကိုသာ ထည့်စဉ်းစားကြသောအခါ ရလဒ်သည် အဘယ်နည်း။ ယင်းမှာ ၎င်းတို့အတွက် ဘုရားသခင်ကို ကျိုးနွံနာခံရန် မလွယ်ကူခြင်း ဖြစ်ပေသည်။ ၎င်းတို့သည် ဆန္ဒရှိလျှင်ပင် မလုပ်ဆောင်နိုင်ပေ။ မိမိတို့၏ရှေ့ရေး၊ ကံကြမ္မာများနှင့် ကိုယ်ပိုင် အကျိုးစီးပွားများကို အထူးသဖြင့် တန်ဖိုးထားသော လူတို့သည် ဘုရားသခင်၏ အမှုတော်အား ၎င်းတို့၏ရှေ့ရေးနှင့် ကံကြမ္မာများအတွက် အကျိုးပြုမပြုကိုလည်းကောင်း၊ ၎င်းတို့ကို ကောင်းချီးများ ရစေခြင်း ရှိမရှိကိုလည်းကောင်း အမြဲတမ်း စေ့စေ့စပ်စပ် ကြည့်ရှုစစ်ဆေးကြ၏။ အဆုံးသတ်၌ ၎င်းတို့ စေ့စေ့စပ်စပ် ကြည့်ရှုစစ်ဆေးခြင်း၏ ရလဒ်မှာ အဘယ်နည်း။ ၎င်းတို့လုပ်ဆောင်သမျှသည် ဘုရားသခင်ကို ပုန်ကန်ပြီး ဆန့်ကျင်ခြင်းဖြစ်သည်။ ၎င်းတို့သည် မိမိတို့၏ တာဝန်များကို ဆက်လက် ထမ်းဆောင်သောအခါတွင်ပင် ဝတ်ကျေတမ်းကျေ ဖြစ်စွာဖြင့် အပျက်သဘောဆောင်သော စိတ်ခံစားချက် အခြေအနေတစ်ခုဖြင့် လုပ်ဆောင်ကြသည်။ ၎င်းတို့၏ စိတ်နှလုံးတွင် မည်သို့ အခွင့်အရေးယူရမည်၊ ပြီးလျှင် ရှုံးနိမ့်သည့်ဘက်တွင်မရှိရန် မည်သို့နေရမည်တို့ကို အစဉ် စဉ်းစားနေကြသည်။ ဤအရာတို့သည် ၎င်းတို့၏တာဝန်များကို ထမ်းဆောင်သောအခါ ၎င်းတို့၏ ရည်ရွယ်ချက်များဖြစ်သည်။ ဤတွင် ၎င်းတို့သည် ဘုရားသခင်နှင့် အပေးအယူလုပ်ရန် ကြိုးစားနေခြင်းဖြစ်သည်။ ဤသည်မှာ မည်သည့်စိတ်သဘောထားနည်း။ လှည့်ဖြားတတ်ခြင်းဖြစ်သည်။ ကောက်ကျစ်ဆိုးယုတ်သော စိတ်သဘောထားတစ်ခုဖြစ်သည်။ ဤသည်မှာ သာမန် ဖောက်ပြန်ပျက်စီးသော စိတ်သဘောထားတစ်ခု မဟုတ်တော့ပေ။ ကောက်ကျစ်ဆိုးယုတ်ခြင်းသို့ မြင့်တက်သွားပြီဖြစ်သည်။ လူတစ်ဦး၏ စိတ်နှလုံးတွင် ဤသို့သော ကောက်ကျစ်ဆိုးယုတ်သည့် စိတ်သဘောထားမျိုးရှိသည့်အခါ ဤသည်မှာ ဘုရားသခင်ကို အတိုက်အခံလုပ်ခြင်း ဖြစ်သည်။ ဤပြဿနာနှင့် ပတ်သက်၍သင်ရှင်းလင်းစွာ သိသင့်သည်။ လူတို့သည် ဘုရားသခင်ကို အစဉ် ကြည့်ရှုစစ်ဆေးပြီး ၎င်းတို့၏ တာဝန်များကို ထမ်းဆောင်သောအခါ အပေးအယူများပြုလုပ်ရန် အစဉ်ကြိုးစားလျှင်၊ ၎င်းတို့သည် မိမိတို့၏ တာဝန်များကို မှန်ကန်စွာ ထမ်းဆောင်နိုင်သလော။ လုံးဝ မထမ်းဆောင်နိုင်ပေ။ ၎င်းတို့သည် ဘုရားသခင်ကို မိမိတို့၏ စိတ်နှလုံးဖြင့်လည်းကောင်း၊ ရိုးသားမှုဖြင့်လည်းကောင်း မကိုးကွယ်ပေ။ ၎င်းတို့တွင် ရိုးသားသော စိတ်နှလုံးမရှိပေ။ ၎င်းတို့သည် ၎င်းတို့၏ တာဝန်များကို ထမ်းဆောင်လျက်ဖြင့် ကြည့်ရှုနေကြသည်။ အစဉ်သဖြင့် တွန့်ဆုတ်နေကြသည်။ ရလဒ်မှာ အဘယ်နည်း။ ဘုရားသခင်သည် ၎င်းတို့တွင် အလုပ်မလုပ်ပေ။ ၎င်းတို့သည် ကမောက်ကမဖြစ်စေကာ စိတ်ရှုပ်ထွေးလာသည်။ ၎င်းတို့သည် သမ္မာတရားစည်းမျဉ်းများကို နားမလည်ကြပေ။ ၎င်းတို့၏ ကိုယ်ပိုင် လိုအင်ဆန္ဒအတိုင်း လုပ်ဆောင်ကာ အစဉ်သဖြင့် လွဲချော်ကြသည်။ ၎င်းတို့သည် အဘယ်ကြောင့် အစဉ်သဖြင့် လွဲချော်ကြသနည်း။ ၎င်းတို့၏ စိတ်နှလုံးသည် ရှင်းလင်းပြတ်သားမှု အလွန်ကင်းမဲ့သောကြောင့်ဖြစ်သည်။ ၎င်းတို့ထံ အကြောင်းအရာများ ဖြစ်ပျက်သောအခါ မိမိတို့ကိုယ်ကို မသုံးသပ်ကြပေ၊ သို့မဟုတ် ဖြေရှင်းချက်ရှာရန်အတွက် သမ္မာတရားကို မရှာဖွေကြသကဲ့သို့၊ ၎င်းတို့၏ ကိုယ်ပိုင် နှစ်သက်မှုများနှင့်အညီ မိမိတို့၏ ဆန္ဒရှိသည့်အတိုင်း အမှုကိစ္စများကို မလျှော့တမ်းလုပ်ဆောင်ကြသည်။ ဤအရာ၏ရလဒ်မှာ ၎င်းတို့၏ တာဝန်ကိုထမ်းဆောင်သောအခါ အစဉ်သဖြင့် လွဲချော်ကြသည်။ ၎င်းတို့သည် အသင်းတော်၏ အလုပ်ကို လုံးဝ မစဉ်းစားသကဲ့သို့ ဘုရားအိမ်တော်၏ အကျိုးစီးပွားများကိုလည်း မစဉ်းစားပေ။ ၎င်းတို့သည် အစဉ်သဖြင့် မိမိတို့၏ ကိုယ်ပိုင်အကျိုးအတွက် အစဉ် လျှို့ဝှက်ကြံစည်ကြသည်။ ၎င်းတို့၏ ကိုယ်ပိုင်အကျိုးစီးပွားများ၊ မာနနှင့် ဂုဏ်အဆင့်အတန်းအတွက် အစဉ် စီစဉ်ကြပြီး မိမိတို့၏တာဝန်များကို ညံ့ဖျင်းစွာထမ်းဆောင်ရုံတင်မကဘဲ အသင်းတော်၏ အလုပ်ကို ၎င်းတို့ နှောင့်နှေးပြီး ထိခိုက်စေသည်။ ဤသည်မှာ လမ်းလွဲခြင်းနှင့် မိမိတို့၏ တာဝန်များကို လျစ်လျူရှုခြင်း မဟုတ်လော။ တစ်စုံတစ်ယောက်သည် မိမိတာဝန်ကို ထမ်းဆောင်သောအခါတွင် အစဉ်သဖြင့် မိမိ၏ အကျိုးစီးပွားနှင့် မျှော်လင့်ချက်များအတွက် စီစဉ်နေလျှင်၊ အသင်းတော်အလုပ်အတွက်၊ သို့မဟုတ် ဘုရားအိမ်တော်၏ အကျိုးစီးပွားအတွက် မစဉ်းစားလျှင် ဤသည်မှာ တာဝန်ထမ်းဆောင်ခြင်း မဟုတ်ပေ။ ဤသည်မှာ အခွင့်အရေး ယူခြင်းဖြစ်သည်။ ယင်းမှာ မိမိ၏ အကျိုးအမြတ်အတွက် လုပ်ဆောင်ခြင်းနှင့် မိမိကောင်းချီးများရရန် လုပ်ဆောင်ခြင်း ဖြစ်သည်။ ဤသို့ဖြင့် မိမိ၏ တာဝန်ထမ်းဆောင်ခြင်းနောက်ကွယ်ရှိ သဘောသဘာဝက ပြောင်းလဲသွားသည်။ ဤသည်မှာ ဘုရားသခင်နှင့် အပေးအယူ လုပ်ခြင်းသာ ဖြစ်သလို မိမိ၏ ကိုယ်ပိုင်ပန်းတိုင်များကို ရရှိရန်အတွက် မိမိ၏ တာဝန်ထမ်းဆောင်ခြင်းအား အသုံးပြုလိုခြင်းသာဖြစ်သည်။ ဤသို့လုပ်ဆောင်သည့်ပုံစံသည် ဘုရားအိမ်တော်၏ အလုပ်အား အနှောင့်အယှက်ဖြစ်စေဖို့ အလွန်ပင် ဖြစ်နိုင်ချေရှိသည်။ ယင်းသည် အသင်းတော်အလုပ်အား အသေးစား ဆုံးရှုံးမှုများသာ ဖြစ်စေလျှင် ထိုသူသည် ရှင်းလင်းပစ်ခြင်းမခံရဘဲ ဆုံးရှုံးမှုများကို ပြန်လည် အဖတ်ဆယ်ရန်အတွက် အခွင့်အလမ်းရှိဆဲဖြစ်ပြီး မိမိ၏တာဝန်ကို ထမ်းဆောင်ရန် အခွင့်အလမ်းပေးခြင်း ခံရနိုင်သေးသည်။ သို့သော် ယင်းက အသင်းတော်အလုပ်အပေါ် ကြီးစွာသော ဆုံးရှုံးမှုဖြစ်စေပြီး ဘုရားသခင်ကိုရော လူများကိုပါ ကြီးစွာသော အမျက်ဒေါသ ထွက်စေလျှင် သူသည် မိမိတာဝန်များကို ဆက်၍ ထမ်းဆောင်ရန် အခွင့်အရေးရှိတော့မည်မဟုတ်ဘဲ ထုတ်ဖော်ခြင်းခံရပြီး ဖယ်ရှားရှင်းလင်းခြင်း ခံရမည်ဖြစ်သည်။ အချို့သောလူတို့မှာ ဤပုံစံဖြင့် ထုတ်ဖော်ပြီး ဖယ်ရှားရှင်းလင်းခြင်းခံရသည်။ ၎င်းတို့သည် အဘယ်ကြောင့် ဖယ်ရှားရှင်းလင်းခြင်းခံရသနည်း။ အကြောင်းရင်းဇာစ်မြစ်ကို သင်ရှာတွေ့ပြီးလော။ အကြောင်းရင်းဇာစ်မြစ်မှာ ၎င်းတို့သည် ၎င်းတို့၏ ကိုယ်ပိုင်အကျိုးအမြတ်နှင့် ဆုံးရှုံးမှုများကို အစဉ် စဉ်းစားကြခြင်း၊ ၎င်းတို့၏ ကိုယ်ပိုင် အကျိုးစီးပွားများ၏ လွှမ်းမိုးမှုကို အလွန်အမင်းခံထားရခြင်း၊ ဇာတိပကတိကို မပုန်ကန်နိုင်ခြင်းနှင့် ဘုရားသခင်အပေါ် လုံးဝ နာခံသော သဘောထားမရှိခြင်းတို့ ဖြစ်သည်။ ထို့ကြောင့် ၎င်းတို့သည် မဆင်မခြင် ပြုမူတတ်ကြသည်။ ၎င်းတို့သည် အကျိုးအမြတ်၊ ကျေးဇူးတော်နှင့် ကောင်းချီးများကို ရရှိရန်အတွက်သာ ဘုရားသခင်အား ယုံကြည်ကြပြီး သမ္မာတရားကို လုံးဝမရရှိသောကြောင့် ဘုရားသခင်အပေါ် ၎င်းတို့၏ ယုံကြည်ခြင်းသည် အရေးနိမ့်ရလေ၏။ ဤသည်မှာ ပြဿနာ၏ အရင်းအမြစ်ဖြစ်သည်။ ၎င်းတို့သည် ထုတ်ဖော်ခြင်းနှင့် ဖယ်ရှားရှင်းလင်းခြင်း ခံရသည်မှာ တရားမမျှတဟု သင်ထင်သလော။ ဤသည်မှာ တရားမမျှတခြင်း စိုးစဉ်းမျှ မရှိပေ။ ဤသည်မှာ ၎င်းတို့၏ သဘာဝအားဖြင့်သာ ဆုံးဖြတ်ခံရခြင်း ဖြစ်သည်။ သမ္မာတရားကို မချစ်သော၊ သို့မဟုတ် သမ္မာတရားကို မလိုက်စားသော မည်သူမဆိုသည် အဆုံးတွင် ထုတ်ဖော်ခြင်းခံရပြီး ဖယ်ရှားရှင်းလင်းခြင်းခံရမည်ဖြစ်သည်။ သို့သော် သမ္မာတရားကို ချစ်ကြသော လူများအတွက်မူ ကွဲပြားခြားနားလေသည်။ ၎င်းတို့တွင် တစ်စုံတစ်ခု ဖြစ်ပေါ်သည့်အခါ ၎င်းတို့က “ငါသည် သမ္မာတရားနှင့်အညီ မည်သို့ လုပ်ဆောင်နိုင်သနည်း။ ဘုရားအိမ်တော်၏ အကျိုးစီးပွားကို မထိခိုက်စေရန် မည်သို့ လုပ်ဆောင်သင့်သနည်း။ မည်သည့်အရာက ဘုရားသခင်ကို ကျေနပ်စေမည်နည်း” ဟု ဦးစွာ စဉ်းစားကြသည်။ ဤ ပုံစံအတိုင်း စဉ်းစားသော လူတစ်ယောက်သည် သမ္မာတရားကို ရှာဖွေနေခြင်း ဖြစ်သည်။ ၎င်းတို့သည် သမ္မာတရားအား ချစ်ကြောင်းကို ဤအတွေးများက သက်သေပြသည်။ ၎င်းတို့သည် ၎င်းတို့၏ ကိုယ်ပိုင် အကျိုးစီးပွားကို ဦးစားပေး မစဉ်းစားဘဲ ဘုရားအိမ်တော်၏ အကျိုးစီးပွားကို အလေးထားကြသည်။ ၎င်းတို့သည် မိမိတို့ ကျေနပ်အားရဖို့ကို အလေးမထားပေ၊ ဘုရားသခင် ကျေနပ်ခြင်း ရှိမရှိကိုသာ ထည့်စဉ်းစားကြသည်။ ဤသည်တို့မှာ သမ္မာတရားကို ချစ်သော လူများ၏ စိတ်နေစိတ်ထားနှင့် အတွေးများ ဖြစ်ကြသည်၊ ဤ လူတို့မှာ ဘုရားသခင် ချစ်သောလူများ ဖြစ်ကြသည်။ အကယ်၍ ၎င်းတို့တွင် တစ်စုံတစ်ခု ဖြစ်ပျက်သည့်အခါ ၎င်းတို့နောက်ကွယ်၌ ဘုရားသခင်က အာမခံပေးသူအဖြစ် ရှိနေသဖြင့် ၎င်းတို့သည် သမ္မာတရားစည်းမျဉ်းများနှင့်အညီ လက်တွေ့ လုပ်ဆောင်နိုင်လျှင်၊ ဘုရားသခင်၏ စေ့စေ့စပ်စပ် ကြည့်ရှုစစ်ဆေးမှုကိုလည်း လက်ခံနိုင်လျှင် ၎င်းတို့သည် မိမိတို့တာဝန်ကို ထမ်းဆောင်နေစဉ်အတွင်း အမှားများကို လုပ်နိုင်ဖွယ် မရှိချေ။ ပြီးလျှင် ၎င်းတို့အနေဖြင့် ယင်းတာဝန်ကို ဘုရားသခင်၏ ရည်ရွယ်ချက်များနှင့်အညီ ကောင်းမွန်စွာ ဖြည့်ဆည်းရန် လွယ်ကူလိမ့်မည်။ အကယ်၍ လူတစ်ယောက်သည် မိမိ၏ ကိုယ်ပိုင်အစွမ်းအစဖြင့် အမြဲတမ်း လုပ်ဆောင်နေသည်၊ မိမိ၏ကိုယ်ပိုင် အကျိုးစီးပွားအတွက် လှည့်စားနေသည်၊ ကြံစည် ပြင်ဆင်နေလျှင်၊ ထိုသူသည် ဘုရားအိမ်တော်၏ အကျိုးစီးပွား သို့မဟုတ် ဘုရားသခင် ရည်ရွယ်ချက်များကို ထည့်မတွက်ဘဲ ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကိုလည်း ကျိုးနွံနာခံရန် ဆန္ဒအနည်းငယ်မျှ မရှိလျှင်၊ ဤအရာကို လုပ်ဆောင်ရန် လိုအင်ဆန္ဒပင် ကင်းမဲ့သည်ဆိုလျှင် အဆုံးသတ်ရလဒ်မှာ မည်သို့ ဖြစ်လာမည်နည်း။ ၎င်းတို့သည် အသင်းတော်၏အလုပ်ကို မကြာခဏ အနှောင့်အယှက် ပေးပြီး အဖျက်အမှောင့်လုပ်ကြလိမ့်မည်။ ၎င်းတို့သည် ဘုရားသခင် ရွေးချယ်ထားသော လူများကြားတွင် ဒေါသတရားကို ဖြစ်ပေါ်စေလိမ့်မည်၊ ၎င်းတို့ကို ဘုရားသခင် ရွေးချယ်ထားလူများက အထင်အမြင်သေးပြီး အလွန် မုန်းတီးလိမ့်မည်။ ပြီးလျှင် ဆိုးရွားသောကိစ္စများတွင် ၎င်းတို့သည် ထုတ်ဖော်ခြင်းခံရကာ ဖယ်ရှားရှင်းလင်းခြင်းလည်း ခံရလိမ့်မည်။ ရည်မှန်းချက်များနှင့် လိုအင်ဆန္ဒများ အမြဲတမ်း ရှိကြသည့် လူများသည် ရှုံးနိမ့်ပြီး မှောက်မှားကြမည်မှာ မလွဲဧကန် ဖြစ်သည်။ “အမြင့်ရောက်လေ၊ အကျ နာလေ” ဟူသော ဆိုရိုးအတိုင်း ဖြစ်၏။ ဤအရာကို မည်သို့ ခေါ်လေသနည်း။ ထုတ်ဖော်ခံရခြင်းဟု ခေါ်သည်။ ဤသည်မှာ ထိုက်တန်သလော။ ဤ လူစားမျိုးသည် သနားကရုဏာနှင့် ထိုက်တန်သလော။ မထိုက်တန်ချေ။ ဤသည်မှာ မိမိတို့၏ ကိုယ်ပိုင် အကျိုးစီးပွားများအတွက် အကွက်ချ စီစဉ်ကြသော လူများအားလုံး၏ နောက်ဆုံးပိတ် အဆုံးသတ် ဖြစ်သည်။ အချို့သောလူများက “ကျွန်ုပ်သည်လည်း မိမိ၏ကိုယ်ပိုင် အကျိုးစီးပွားအတွက် မကြာခဏ အကွက်ချ စီစဉ်မိပါသည်။ ဤအရာသည် ကျွန်ုပ်ထံတွင် မည်သို့ကြောင့် မဖြစ်ပေါ်ခဲ့သနည်း” ဟု ဆိုကြသည်။ ယင်းမှာ သင်သည် အသင်းတော်၏ အလုပ်ကို မထိခိုက်ရသေးသောကြောင့် ဖြစ်သည်၊ ထို့ကြောင့် ဘုရားသခင်က သင့်အား အလေးအနက် မထားပေ။ ဘုရားသခင်သည် သင့်ကို အလေးအနက် မထားဘဲ နေ၏၊ ဤသည်မှာ ကောင်းသော အရာလော၊ သို့မဟုတ် ဆိုးသောအရာလော။ (ဆိုးသောအရာ ဖြစ်ပါသည်။) အဘယ်ကြောင့် ထိုသို့ ပြောသနည်း။ (ကျွန်ုပ်သည် ဤအတိုင်း ဆက်လက် လုပ်ဆောင်မိလျှင် သန့်ရှင်းသော ဝိညာဉ်တော်၏ လုပ်ဆောင်ချက်ကို ရရှိနိုင်လိမ့်မည် မဟုတ်ပါ။) မှန်ပေသည်။ လူတစ်ယောက်သည် သမ္မာတရားကို မလိုက်စားဘဲ၊ ဘုရားသခင်၏ အမှုတော်ကိုလည်း မတွေ့ကြုံဘဲ နေလျှင် သန့်ရှင်းသော ဝိညာဉ်တော်သည် ထိုသူအတွင်း၌ လုပ်ဆောင်လိမ့်မည် မဟုတ်ပေ။ မည်သည့် မကောင်းသောအရာများကို လုပ်ဆောင်သည်ဖြစ်စေ ဘုရားသခင်၏ ဆုံးမပဲ့ပြင်ခြင်းကို မခံရသော လူများအတွက် ဤအရာသည် အထူး မှန်ကန်လေသည်။ ၎င်းတို့အနေဖြင့် လုံးဝ နိဂုံးချုပ်ပြီ ဖြစ်သည်။ ဘုရားသခင်သည် ဤသို့သော လူများကို အမှန်ပင် အလိုမရှိချေ၊ သူသည် ၎င်းတို့အား ဘေးဖယ်ထား၏။ သင်သည် သမ္မာတရားကို မလိုက်စားလျှင် အသက်ကို မပိုင်ဆိုင်ပေ။ ကျော်ကြားမှု၊ အကျိုးအမြတ်နှင့် ဂုဏ်ဒြပ်တို့နောက် အစဉ်သဖြင့် လိုက်နေကြသော၊ သမ္မာတရားကို မလိုက်စားသော၊ သမ္မာတရားအား လက်တွေ့ လုပ်ဆောင်သည်ကို သင့်အနေဖြင့် တစ်ခါမျှ မမြင်တွေ့ရသော လူများကဲ့သို့ပင် ဖြစ်သည်။ ဤသို့သော လူများသည် အသက်ကြီးထွားရင့်ကျက်မှုတစ်ခုခု ရှိသလော။ ၎င်းတို့သည် သမ္မာတရားကို လက်တွေ့ မလုပ်ဆောင်သောကြောင့် ဘုရားသခင်အား မည်သို့ပင် နှစ်ပေါင်းများစွာ ယုံကြည်သည်ဖြစ်စေ၊ ၎င်းတို့တွင် မည်သည့် အသက်ကြီးထွားတိုးတက်မှုမျှ ရှိလိမ့်မည် မဟုတ်ပေ။ လွန်ခဲ့သော သုံးနှစ်က ပြောဆိုနေခဲ့သော အကြောင်းအရာများကို ယနေ့အချိန်တွင် ပြောဆိုနေဆဲ ရှိကြသည့် လူအချို့ ရှိသေးသည်၊ ထူးမခြားနား စကားများနှင့် အယူဝါဒများကို ပြောဆိုနေကြဆဲ ဖြစ်သည်။ ထိုလူများသည် ဇာတ်သိမ်းကြပြီဖြစ်သည်။ ၎င်းတို့၏ ဝိညာဉ်ရင့်သန်မှုများ သို့မဟုတ် မိမိကိုယ်ကို သိနားလည်ခြင်းတွင် မည်သည့် ကြီးထွားတိုးတက်မှုကိုမျှ မြင်နိုင်မည် မဟုတ်ပေ။ ဘုရားသခင်ကို ၎င်းတို့၏ ယုံကြည်ခြင်းသည် တစ်ပုံစံတည်းသာ ရှိနေသော်လည်း ၎င်းတို့၏ အသက်စိတ်သဘောထားများတွင် ပြောင်းလဲခြင်း စိုးစဉ်းမျှ မရှိချေ။ ဘုရားသခင်နှင့်ပတ်သက်သည့် ၎င်းတို့၏ အထင်လွဲခြင်းများသည် တိုးပွားလာခဲ့ပြီ ဖြစ်သည်၊ ပြီးလျှင် ဘုရားသခင်ကို ခုခံသော ၎င်းတို့၏ ဖောက်ပြန်ပျက်စီးသည့် စိတ်သဘောထားများမှာလည်း ပို၍ ပြင်းထန်လာခဲ့ပြီ ဖြစ်သည်။ ဤအရာသည် ပို၍ ကြောက်စရာ မကောင်းသလော။ အမှန်ပင် ပို၍ ကြောက်စရာကောင်းပေသည်၊ ၎င်းတို့သည်လည်း ဧကန်မုချ ဖယ်ရှားရှင်းလင်းခြင်းခံရလိမ့်မည်။

ပုံမှန်အားဖြင့် သင်တို့သည် မိမိ၏တာဝန် သို့မဟုတ် မိမိ၏ ဖောက်ပြန်ပျက်စီးသော စိတ်သဘောထားများနှင့် သက်ဆိုင်သည့် အကြောင်းကိစ္စများကို တွေ့ကြုံရသည့်အခါ သင်တို့အတွင်း၌ ရှိနေသည့် ပြဿနာများအား မိမိကိုယ်ကို ပြန်လည် ဆန်းစစ်ခြင်းမှတစ်ဆင့် ဖော်ထုတ်နိုင်ကြသလော။ (ကျွန်ုပ်သည် ယင်းတို့ကို ယခုအခါ အနည်းငယ်မျှ ဖော်ထုတ်နိုင်ပါသည်။ မိမိ၏ တာဝန်ကို လုပ်ဆောင်သည့်အချိန်တွင် ကျွန်ုပ်သည် အမြဲပင် ခေါင်းဆောင်သူ ဖြစ်ချင်၍ ဆုံးဖြတ်ပိုင်ခွင့်လည်း ရှိချင်သည်။ ပြီးလျှင် အခြားလူများက ကျွန်ုပ်အား အထင်ကြီးလာစေရန်အတွက် ကြွားဝါဖို့လည်း ကြိုးစားပါသည်။ သို့သော် ကျွန်ုပ်၏ ညီအစ်ကိုမောင်နှမများက ဤအရာကို ကျွန်ုပ်အား ထောက်ပြပြီးသည့်နောက်တွင် ကျွန်ုပ်သည် မိမိကိုယ်ကို ပြန်လည်သုံးသပ်၍ မိမိ၏ မာနထောင်လွှားသော သဘာဝအကြောင်းကို အသိအနည်းငယ် ရရှိပါသည်။) သင်သည် သင်၏ မာနထောင်လွှားမှုကို သတိပြုမိနိုင်သည်။ ဘုရားသခင်အပေါ် သင်၏ ကျိုးနွံနာခံခြင်းမှာရော မည်သို့ရှိသနည်း၊ ယင်းသည် တိုးပွားခဲ့ပြီလော။ ကျိုးနွံနာခံဖို့ သင်၏ ရည်ရွယ်ချက်နှင့် လိုအင်ဆန္ဒတို့မှာ တိုးပွားခဲ့ပြီလော။ ဘုရားသခင်ကို သင်၏ ယုံကြည်ခြင်းသည် ကြီးထွားခဲ့ပြီလော။ (ယင်းတို့သည် အနည်းငယ် တိုးပွားလာခဲ့ပါပြီ။) သမ္မာတရားကို မရှာဖွေဘဲ တာဝန်တစ်ခု ထမ်းဆောင်ခြင်းသည် အလုပ်မဖြစ်နိုင်ချေ။ ပြဿနာများနှင့် ရင်ဆိုင်ရသည့်အခါ သင်သည် ယင်းတို့ကို ဖြေရှင်းရန် သမ္မာတရားကို အသုံးပြုရမည်။ သင်သည် သင်၏ကိုယ်ပိုင် အလိုဆန္ဒနှင့် စာတန်ဆန်သော အတွေးအခေါ်များနှင့်အညီ မိမိ၏တာဝန်ကို အစဉ်အမြဲ ထမ်းဆောင်လျှင် သင်၏ ဖောက်ပြန်ပျက်စီးမှုများ ထုတ်ဖော်ခြင်း ပြဿနာကို ဖြေရှင်းရန် သင် ပျက်ကွက်လိမ့်မည်သာမက ဘုရားသခင်ကို သင်၏ ယုံကြည်ခြင်း၊ ဘုရားသခင်ကို ကျိုးနွံနာခံခြင်းနှင့် ချစ်ခြင်းတို့သည်လည်း တိုးပွားလာလိမ့်မည် မဟုတ်ပေ။ သင်သည် သမ္မာတရားကို လက်မခံသည့်အပြင် သင်၏ ပြဿနာများကို ဖြေရှင်းရန်အတွက်လည်း သမ္မာတရားအား အသုံးပြုခြင်း မရှိလျှင် သင်သည် အသက်၌ လုံးဝ ကြီးထွားတိုးတက်လိမ့်မည် မဟုတ်။ ပြီးလျှင် သင်၏ ဖောက်ပြန်ပျက်စီးခြင်း ပြဿနာကိုလည်း သင်သည် လုံးဝ ဖြေရှင်းနိုင်လိမ့်မည် မဟုတ်ပေ။ သင်တို့သည် ယခုအခါ မိမိတို့၏တာဝန်ကို ထမ်းဆောင်သည့် အချိန်တွင် မည်သည့် ဖောက်ပြန်ပျက်စီးသော စိတ်သဘောထားများ ထုတ်ဖော်ကြသနည်း။ လူသား၏ မည်သည့် မစင်ကြယ်မှုများသည် ကျန်ရှိနေသနည်း။ သင်သည် ဤ အကြောင်းအချက်များကို ဖော်ထုတ်ရန် မကြာခဏ မိမိကိုယ်ကို ပြန်လည်သုံးသပ်ခြင်း ပြုလုပ်ရမည်။ မိမိကိုယ်ကို ဆန်းစစ်ခြင်း မရှိဘဲ ယင်းတို့ကို မသိနိုင်ချေ။ တစ်ခါတစ်ရံတွင် သင်သည် အခြားလူများက ၎င်းတို့၏ ကိုယ်ပိုင် အသိအကြောင်း ပြောဆိုသည်ကို ကြားရသည့် အချိန်မှသာ သင်သည်လည်း အတူတူပင်ဖြစ်ကြောင်း ခံစားမိပေသည်။ အခြားလူများက ၎င်းတို့၏ အခြေအနေများအား ဖော်ပြနေသည်ကို သင့်အနေဖြင့် မကြားမိလျှင် သင်သည် မိမိ၏ ကိုယ်ပိုင်ပြဿနာများကို ဖော်ထုတ်နိုင်လိမ့်မည် မဟုတ်။ အခြားလူများ၏ အတွေ့အကြုံဆိုင်ရာ သက်သေခံချက်ကို လိုလိုလားလား၊ နားထောင်ကြသည့် လူအများအပြား ရှိကြသည်မှာ ၎င်းတို့အနေဖြင့် ယင်းမှ အကျိုးခံစားရသည့်အပြင် တစ်စုံတစ်ရာကိုလည်း ရရှိသောကြောင့် အတိအကျပင် ဖြစ်လေသည်။ သင်သည် သင်၏ ဖောက်ပြန်ပျက်စီးသော စိတ်သဘောထားများနှင့် သင်၏ကိုယ်ပိုင် ရည်ရွယ်ချက်များ၊ အကြံအစည်များကို ပို၍ အသေအချာ ဆန်းစစ်ပြီး ပို၍ စေ့စေ့စပ်စပ် သိလာသည်နှင့်အမျှ သင်သည် ယင်းတို့ကို ပို၍ စွန့်လွှတ်နိုင်လာလိမ့်မည်။ ပြီးလျှင် သမ္မာတရားကို လက်တွေ့လုပ်ဆောင်ခြင်းအတွက် သင်၏ ယုံကြည်ခြင်းသည်လည်း ပိုမို အားကောင်းလာလိမ့်မည်။ သမ္မာတရားကို လက်တွေ့လုပ်ဆောင်ခြင်းအတွက် သင်၏ ယုံကြည်ခြင်း ပိုမို အားကောင်းလာလေ သင့်အနေဖြင့် သမ္မာတရားကို လက်တွေ့လုပ်ဆောင်ရန် ပိုမို လွယ်ကူလာလိမ့်မည်။ သင့်အနေဖြင့် သမ္မာတရားကို မကြာခဏ လက်တွေ့လုပ်ဆောင်သည့်အခါ သင်သည် မိမိ၏တာဝန်ကို ပိုမိုကြီးမားသော စင်ကြယ်မှုဖြင့် ပို၍ ပြည့်ပြည့်ဝဝ ထမ်းဆောင်နိုင်လာလိမ့်မည်။ ဤသည်မှာ အသက် ကြီးထွားတိုးတက်မှု၏ လုပ်ငန်းစဉ် ဖြစ်သည်၊ ဤသည်တို့မှာ မိမိကိုယ်ကို ပြန်လည်သုံးသပ်ခြင်းနှင့် မိမိကိုယ်ကို သိခြင်း၏ အသီးအပွင့်များ ဖြစ်ကြသည်။ တရားဒေသနာများကို နှစ်ပေါင်းများစွာ ကြားနာခဲ့ပြီး များစွာသော စကားများနှင့် အယူဝါဒများကိုလည်း နားလည်ထားသောကြောင့် မိမိတို့ကိုယ်ကို ပြန်လည်သုံးသပ်ရန်နှင့် မိမိတို့ကိုယ်ကို သိမြင်မှုကို ရရှိရန် မလိုအပ်သည့်အလား ၎င်းတို့တွင် ဖောက်ပြန်ပျက်စီးသော စိတ်သဘောထားတစ်ခု မရှိဟူ၍ ထင်ကြသည့် လူအချို့ ရှိလေသည်။ ဤသည်တို့မှာ ယုံကြည်သူအသစ်များသာ အာရုံစိုက်ရမည့် အရာများ ဖြစ်ကြောင်း၊ ထို့ပြင် ဘုရားသခင်ကို နှစ်ပေါင်းများစွာ ယုံကြည်ခြင်းနှင့် ကောင်းမွန်သော အပြုအမူများ အများအပြား ရှိခြင်းတို့သည် ၎င်းတို့အနေဖြင့် ပြောင်းလဲနေခဲ့ပြီးဖြစ်ကာ ၎င်းတို့တွင် ဖောက်ပြန်ပျက်စီးသော စိတ်သဘောထားတစ်ခု မရှိဟု ဆိုလိုကြောင်း ၎င်းတို့က အစဉ် ယုံကြည်ကြ၏။ ဤသည်မှာ အလွန်ဆိုးရွားသော နားလည်မှုလွဲခြင်း ဖြစ်သည်။ သင့်အနေဖြင့် ပြောင်းလဲနေခဲ့ပြီဟု ထင်လျှင် သင်သည် သမ္မာတရား မည်မျှကို လက်တွေ့ လုပ်ဆောင်နိုင်သနည်း။ သင့်ထံတွင် စစ်မှန်သော အတွေ့အကြုံဆိုင်ရာ သက်သေခံချက်များ မည်မျှ ရှိသနည်း။ သင်သည် ယင်းတို့အကြောင်းကို ပြောနိုင်သလော။ သင်သည် အခြားသူများရှေ့တွင် ဘုရားသခင်အတွက် သက်သေခံနိုင်သလော။ သင့်အနေဖြင့် ယင်းအကြောင်းကို မပြောဆိုနိုင်လျှင် သင်သည် အတွေ့အကြုံဆိုင်ရာ သက်သေခံချက် မရှိကြောင်း၊ သင့်ထံတွင် သမ္မာတရား စစ်မှန်မှု ကင်းမဲ့ကြောင်းကို ယင်းက သက်သေပြလေသည်။ သင်ကဲ့သို့သော လူတစ်ယောက်သည် အမှန်တကယ် ပြောင်းလဲနိုင်ခဲ့မည်လော။ သင်သည် အစစ်အမှန် နောင်တရခဲ့သည့် လူတစ်ယောက်လော။ ဤသည်ကို သံသယမဖြစ်ဘဲ မနေနိုင်ချေ။ မိမိကိုယ်ကို မည်သည့်အခါမျှ ပြန်လည်မသုံးသပ်သော သို့မဟုတ် မိမိကိုယ်ကို သိမြင်မှုကို ရရှိရန် မည်သည့်အခါမျှ မကြိုးစားသော လူတစ်ယောက်သည် အသက် ဝင်ရောက်မှုကို မည်သို့ ရှိနိုင်မည်နည်း။ မိမိကိုယ်ကို သိမြင်ခြင်းအကြောင်းကို လုံးဝ မပြောဆိုသော လူတစ်ယောက်သည် စစ်မှန်သော အတွေ့အကြုံဆိုင်ရာ သက်သေခံချက်ကို မည်သို့ မျှဝေနိုင်မည်နည်း။ ဤအရာများသည် မဖြစ်နိုင်ချေ။ လူတစ်ယောက်က ၎င်းသည် အမှန်တကယ် ပြောင်းလဲခဲ့ပြီး မိမိကိုယ်ကို သိရန် မလိုအပ်ဟု ယုံကြည်လျှင် ဤပုဂ္ဂိုလ်မှာ ကြောင်သူတော် တစ်ယောက်ဟု ဆိုနိုင်သည်။ လူအချို့သည် ၎င်းတို့၏ တာဝန်များကို ထမ်းဆောင်နေသည့်အချိန်တွင် ဟန်ပြရုံမျှ လုပ်ပြကြ၏။ အတောအသင့်မျှသာ လုပ်ဆောင်ခြင်းသည် လက်ခံနိုင်စရာဖြစ်ကြောင်း၊ အပြင်ပန်းအရ အသင့်အတင့် ဖြစ်သည်ဟု ထင်ရခြင်းသည် ၎င်းတို့၏ တာဝန်များက စံနှုန်းမီသည့် အဓိပ္ပာယ်ပင် ဖြစ်ကြောင်း ယုံကြည်ကြသည်။ ဤနည်းဖြင့် အမှုကိစ္စများ လုပ်ဆောင်ခြင်းသည် ဝတ်ကျေတမ်းကျေ ဖြစ်သည်မဟုတ်လော။ ဤသို့သော လူတစ်ယောက်သည် ဘုရားသခင်ကို အမှန်တကယ် ကျိုးနွံနာခံနေခြင်းလော။ ဤလူစားမျိုးသည် မည်သည့် သမ္မာတရားစည်းမျဉ်းမျှ မပါဘဲ မိမိ၏တာဝန်ကို ထမ်းဆောင်၏၊ လုပ်ငန်းတာဝန်များကို ထမ်းဆောင်ရုံ၊ အားသွန်ခွန်စိုက် လုပ်ရုံမျှဖြင့် ကျေနပ်ရောင့်ရဲ၏။ ထို့နောက် မိမိ၏တာဝန်မှာ စံနှုန်းမီသည်ဟု ထင်လေသည်။ အမှန်အားဖြင့် ၎င်းတို့သည် သင့်တင့်သော အလုပ်လုပ်ပေးသူသာ ဖြစ်သည်၊ မိမိ၏တာဝန်ကို ပြည့်ပြည့်ဝဝ ထမ်းဆောင်နေခြင်း မဟုတ်ပေ။ ပြည့်ပြည့်ဝဝ အလုပ်လုပ်ပေးရုံမျှဖြင့် ကျေနပ်ရောင့်ရဲသော သူတို့သည် သမ္မာတရားကို ဘယ်သောအခါမျှ ရရှိလိမ့်မည် မဟုတ်၊ သို့မဟုတ် စိတ်သဘောထားဆိုင်ရာ ပြောင်းလဲခြင်းကိုလည်း ရလိမ့်မည် မဟုတ်ပေ။ မိမိ၏တာဝန်ကို ဘုရားသခင်၏ တောင်းဆိုချက်များနှင့်အညီ မထမ်းဆောင်သော၊ သမ္မာတရားစည်းမျဉ်းများကို မရှာဖွေသော၊ မိမိ၏ တစ်ကိုယ်ရေ အလိုဆန္ဒအတိုင်း မလျှော့တမ်း လုပ်ဆောင်သော လူတစ်ယောက်သည် အလုပ်လုပ်ပေးနေရုံမျှသာ၊ အားသွန်ခွန်စိုက် လုပ်နေရုံမျှသာ ဖြစ်သည်။ သင်တို့သည် ယခုအခါ မည်သည့်အဆင့်တွင် ရှိသနည်း။ (ကျွန်ုပ်သည် အလုပ်လုပ်ပေးသော အဆင့်တွင် ရှိနေပါသေးသည်။) အချိန်အများစု၌ သင်သည် အလုပ်လုပ်ပေးနေသည်။ တစ်ခါတစ်ရံတွင် သင်သည် မိမိ၏ တာဝန်ကို ထမ်းဆောင်နေသည့်အခါ သမ္မာတရားကို ရရှိရန် ကြိုးပမ်းနိုင်စွမ်း ရှိပြီး ကျိုးနွံနာခံခြင်း အနည်းငယ်လည်း ရှိလေသည်။ သို့သော် သင်သည် ဤကဲ့သို့ မကြာခဏ ဖြစ်သလော။ (မဖြစ်ပါ၊ မကြာခဏ မဖြစ်ပါ။) သမ္မာတရားကို လိုက်စားခြင်း၏ ပန်းတိုင်မှာ ဤကိစ္စရပ်ကို ဖြေရှင်းရန် ဖြစ်သည်။ သင်သည် မိမိ၏ အလုပ်လုပ်ပေးခြင်းအားလုံးကို မိမိ၏ တာဝန်ထမ်းဆောင်ခြင်းအဖြစ် ပြောင်းလဲရန် ကြိုးပမ်းလျက် မိမိတာဝန်ကို တိုး၍တိုး၍ ထမ်းဆောင်ရန်၊ အလုပ်လုပ်ပေးခြင်းကိုမူ နည်းသည်ထက် နည်းစေရန် ကြိုးပမ်း အားထုတ်ရမည်။ အလုပ်လုပ်ပေးခြင်းနှင့် တာဝန်တစ်ခု ထမ်းဆောင်ခြင်းကြား ခြားနားချက်မှာ အဘယ်နည်း။ အလုပ်လုပ်ပေးသောလူတစ်ယောက်သည် မိမိအနေဖြင့် ဘုရားသခင်ကို ခုခံခြင်း သို့မဟုတ် သူ၏ စိတ်သဘောထားကို ပုန်ကန်ပြစ်မှားခြင်း မရှိသရွေ့ အဆင်ပြေသည်ဟု တွေးထင်လျက်၊ ၎င်းတို့ ဖြစ်သလိုလုပ်ပြီး မည်သူကမျှ စုံစမ်း စစ်ဆေးခြင်း မရှိသရွေ့ ယင်းမှာ လက်သင့်ခံနိုင်ဖွယ်ဖြစ်သည်ဟု တွေးထင်လျက် မိမိဆန္ဒ ရှိသည့်အရာမှန်သမျှကို လုပ်ဆောင်ကြသည်။ ထိုသူတို့သည် မိမိကိုယ်ကို သိမြင်မှုကို ရရှိခြင်း၊ ရိုးသားသူတစ်ယောက် ဖြစ်ခြင်း၊ အမှုကိစ္စများကို သမ္မာတရားစည်းမျဉ်းများနှင့်အညီ လုပ်ဆောင်ခြင်း၊ သို့မဟုတ် ဘုရားသခင်၏ အစီအစဉ်များကို ကျိုးနွံနာခံခြင်းတို့အား စိတ်မဝင်စားကြချေ။ ပြီးလျှင် သမ္မာတရား စစ်မှန်မှုအတွင်း ဝင်ရောက်ခြင်းကိုလည်း သေချာပေါက် စိတ်မဝင်စားကြချေ။ ထိုသူတို့သည် ဤအရာများကို တစ်ခုမျှ စိတ်မဝင်စားကြ။ ဤသည်မှာ အလုပ်လုပ်ပေးခြင်းပင် ဖြစ်သည်။ အလုပ်လုပ်ပေးခြင်းသည် မရပ်နားသော အားသွန်ခွန်စိုက်လုပ်ခြင်း ဖြစ်၏။ ကျွန်တစ်ယောက် အားသွန်ခွန်စိုက်လုပ်သကဲ့သို့ မိုးလင်းမှ မိုးချုပ်တိုင် အလုပ်လုပ်နေခြင်း ဖြစ်သည်။ ဤသို့သော အားသွန်ခွန်စိုက်လုပ်ခြင်းမျိုး ဖြစ်၏။ သင်သည် အလုပ်လုပ်ပေးသူတစ်ယောက်အား အဘယ်ကြောင့် ဤနှစ်ပေါင်းများစွာ တစ်လျှောက်လုံး အလုပ် လုပ်နေခဲ့သနည်းဟု မေးကြည့်လျှင် ထိုသူက “ကောင်းချီးများ ရရှိရန်အတွက်” ဟု ဖြေပေလိမ့်မည်။ ဘုရားသခင်ကို နှစ်ပေါင်းများစွာ ယုံကြည်လာပြီးသည့် နောက်တွင် ၎င်းတို့၏ ဖောက်ပြန်ပျက်စီးသော စိတ်သဘောထားများ လုံးဝ ပြောင်းလဲသွားခဲ့ခြင်း ရှိမရှိ၊ ၎င်းတို့သည် ဘုရားသခင်၏ တည်ရှိခြင်းကို အတည်ပြုချက်တစ်ခုခု ရရှိခဲ့ခြင်း ရှိမရှိ၊ ဖန်ဆင်းရှင်၏ စီစဉ်ညွှန်ကြားခြင်းများနှင့် အစီအစဉ်များအပေါ် စစ်မှန်သော သိမြင်ခြင်းနှင့် အတွေ့အကြုံတစ်ခုခုကို ရရှိခဲ့ခြင်း ရှိမရှိ သင်က မေးကြည့်လျှင် ၎င်းတို့သည် ဤအရာများကို တစ်ခုမျှ မရရှိသေးဘဲ ယင်းတို့အကြောင်းကိုလည်း တစ်ခုမျှ ပြောဆိုနိုင်လိမ့်မည် မဟုတ်။ ၎င်းတို့သည် အသက် ကြီးထွားတိုးတက်ခြင်း၊ စိတ်သဘောထားဆိုင်ရာ ပြောင်းလဲခြင်းတို့နှင့် သက်ဆိုင်သည့် အမျိုးမျိုးသော လက္ခဏာရပ်များနှင့် ပတ်သက်၍ တစ်ခုကိုမျှ ဝင်ရောက်ခြင်း သို့မဟုတ် တိုးတက်ခြင်း မရှိကြသေးချေ။ စိတ်သဘောထားဆိုင်ရာ ပြောင်းလဲခြင်းဟူသည် မည်သည့်အရာဖြစ်ကြောင်း နားမလည်ကြဘဲ ဆက်၍သာ အလုပ်လုပ်ပေးနေ၏။ လူအချို့မှာ အနည်းငယ်မျှ ပြောင်းလဲခြင်း မရှိဘဲ နှစ်ပေါင်းများစွာ အလုပ်လုပ်ပေးကြ၏။ ၎င်းတို့သည် အခက်အခဲများနှင့် ကြုံရသည့်အခါ အပျက်သဘောဆောင်လာခြင်း၊ ညည်းညူခြင်းနှင့် ၎င်းတို့၏ ဖောက်ပြန်ပျက်စီးသော စိတ်သဘောထားများကို ထုတ်ဖော်ခြင်းတို့ မကြာခဏ ရှိနေသေး၏။ ပြုပြင်ခြင်း ခံရသည့်အခါ ၎င်းတို့သည် ငြင်းခုံမှုများ၊ ကတ်တီးကတ်ဖဲ့ ပြောခြင်းများကို အားကိုး အားထားပြုကြသည်။ သမ္မာတရားကိုလည်း အနည်းငယ်မျှပင် လက်ခံနိုင်ခြင်း မရှိဘဲ ဘုရားသခင်ကိုလည်း မည်သို့မျှ ကျိုးနွံနာခံခြင်း မရှိကြချေ။ နောက်ဆုံး၌ ၎င်းတို့သည် ၎င်းတို့၏တာဝန်များကို ထမ်းဆောင်ခြင်းမှ ပိတ်ပင်ခံကြရသည်။ အချို့သော လူများသည် ၎င်းတို့၏ တာဝန်များကို ထမ်းဆောင်နေသည့်အချိန်တွင် အလုပ်ကို ကမောက်ကမ ဖြစ်အောင် ပြုလုပ်ကြပြီး ဝေဖန်မှုကိုလည်း လက်မခံကြပေ။ ယင်းအစား ၎င်းတို့အနေဖြင့် မည်သည့် အမှားအယွင်းကိုမျှ မလုပ်ခဲ့ကြောင်း အရှက်မရှိ ပြောဆိုနေကြကာ နောင်တလည်း လုံးလုံး မရကြချေ။ နောက်ဆုံးတွင် ဘုရားအိမ်တော်က ၎င်းတို့၏တာဝန်များကို ရုပ်သိမ်း၍ ၎င်းတို့အား ပြန်ခိုင်းသည့်အခါတွင် ၎င်းတို့သည် ငိုကြွေးရင်း၊ မကျေမနပ် ပြောဆိုရင်းဖြင့် မိမိတို့၏ အလုပ်နေရာကို စွန့်ခွာကြရသည်။ ဤသည်မှာ ၎င်းတို့အနေဖြင့် ဖယ်ရှားရှင်းလင်းခြင်းခံကြရပုံ ဖြစ်သည်။ ဤသည်မှာ တာဝန်များက လူများကို စေ့စေ့စပ်စပ် ထုတ်ဖော်သည့် နည်းလမ်းပင် ဖြစ်သည်။ လူများသည် အများအားဖြင့် ဟိတ်ကြီးဟန်ကြီး ပြောဆိုကြကာ ကြွေးကြော်သံများကိုလည်း ကျယ်ကျယ်လောင်လောင် ဟစ်အော်ကြ၏၊ သို့သော် တာဝန်တစ်ခုကို ထမ်းဆောင်သည့်အခါ ၎င်းတို့သည် လူသားများကဲ့သို့ မပြုမူဘဲ နတ်ဆိုးများ ဖြစ်လာကြသည်မှာ အဘယ်ကြောင့်နည်း။ ဤသည်မှာ လူ့သဘာဝ ကင်းမဲ့သော လူများသည် မည်သည့်နေရာသို့ သွားသည်ဖြစ်စေ၊ နတ်ဆိုးများသာ ဖြစ်၍ဖြစ်သည်။ ပြီးလျှင် ၎င်းတို့သည် သမ္မာတရားကိုလည်း လက်ခံခြင်း မရှိသဖြင့် မည်သည့်နေရာတွင်မှ ခိုင်မာစွာ မရပ်တည်နိုင်ကြချေ။ လူအချို့သည် အများအားဖြင့် ၎င်းတို့၏ တာဝန်များကို ဝတ်ကျေတမ်းကျေဖြင့် ထမ်းဆောင်ကြ၏။ ပြီးလျှင် ပြုပြင်ခြင်း ခံရသည့်အခါတွင်လည်း ၎င်းတို့က ငြင်းခုံရန်နှင့် အကျိုးအကြောင်းပြရန် ကြိုးစားကြသည်။ ထပ်ကာတလဲလဲ ပြုပြင်ခြင်း ခံရပြီးသည့်နောက်တွင် ၎င်းတို့သည် နောင်တရရန် လိုအင်ဆန္ဒအနည်းငယ် ဖြစ်ကြ၏၊ ထို့ကြောင့် ၎င်းတို့သည် မိမိကိုယ်ကို ချုပ်ထိန်းခြင်း နည်းလမ်းများကို စတင် အသုံးပြုလာကြသည်။ သို့သော် နောက်ဆုံးတွင် ၎င်းတို့သည် မိမိကိုယ်ကို မချုပ်ထိန်းနိုင်ကြချေ၊ ၎င်းတို့အနေဖြင့် သစ္စာပြုခြင်းနှင့် မိမိကိုယ်ကို ကျိန်ဆိုခြင်း ပြုကောင်း ပြုနိုင်သော်လည်း ယင်းမှာ အကျိုးမထူးပေ။ ၎င်းတို့၏ ဝတ်ကျေတမ်းကျေ ပြုခြင်း ပြဿနာကိုလည်းကောင်း၊ ၎င်းတို့၏ ငြင်းခုံခြင်းနှင့် ကတ်တီးကတ်ဖဲ့ ပြောဆိုခြင်း ပြဿနာကိုလည်းကောင်း ၎င်းတို့ မဖြေရှင်းရသေးချေ။ နောက်ဆုံးတွင် လူတိုင်းလူတိုင်းက ဤလူတို့ကို ရွံမုန်းလာကြ၍ ဝေဖန်ကြသည့်နောက်မှသာ ၎င်းတို့က “ကျွန်ုပ်တွင် ဖောက်ပြန်ပျက်စီးသော စိတ်သဘောထားများ အမှန်ပင် ရှိပါသည်။ ကျွန်ုပ်သည် နောင်တရချင်သော်လည်း ယင်းသို့ မစွမ်းနိုင်ပါ။ ကျွန်ုပ်သည် မိမိ၏တာဝန်ကို လုပ်ဆောင်သည့်အခါ ကိုယ့်ကိုယ်ပိုင်အကျိုး၊ ကိုယ့်မာနနှင့် ဂုဏ်သတင်းကို အမြဲ ထည့်စဉ်းစားသည်။ ယင်းကြောင့် ဘုရားသခင်ကို မကြာခဏ ပုန်ကန်မိပါသည်။ ကျွန်ုပ်သည် သမ္မာတရားကို လက်တွေ့လုပ်ဆောင်ချင်သည်၊ သို့သော် ကျွန်ုပ်၏ ရည်ရွယ်ချက်များနှင့် လိုအင်ဆန္ဒများကို လက်မလွှတ်နိုင်ပါ။ ကျွန်ုပ်သည် ယင်းတို့ကို မပုန်ကန်နိုင်ပါ။ အမှုကိစ္စများကို ကျွန်ုပ်၏ အလိုဆန္ဒအတိုင်းသာ အမြဲတမ်း လုပ်ဆောင်ချင်သည်၊ ကျွန်ုပ်သည် အလုပ်ကို ရှောင်ရန်အတွက် အကြံအစည်များ ဖန်တီးပါသည်။ ပြီးလျှင် အနားယူခြင်းနှင့် ပျော်ရွှင်သာယာမှုကိုလည်း အငမ်းမရ ဖြစ်ပါသည်။ ကျွန်ုပ်သည် ပြုပြင်ခံရခြင်းကို လက်မခံနိုင်ဘဲ ယင်းမှ လွတ်မြောက်ရန်အတွက် ကန့်ကွက်ငြင်းခုံရန် အမြဲ ကြိုးစားပါသည်။ ကျွန်ုပ်အနေဖြင့် အားသွန်ခွန်စိုက်လုပ်ခဲ့ပြီး ဆင်းရဲဒုက္ခများကို ကြံ့ကြံ့ခံခဲ့သည်မှာ ကောင်းစွာ လုံလောက်သည်ဟု ထင်မိသည်၊ ထို့ကြောင့် တစ်စုံတစ်ယောက်က ကျွန်ုပ်အား ပြုပြင်ရန် ကြိုးစားသည့်အခါ ကျွန်ုပ်သည် စိတ်နှလုံး၌ လက်မခံနိုင်ဘဲ ငြင်းခုံခြင်းနှင့် ကတ်တီးကတ်ဖဲ့ ပြောခြင်းကို အားကိုးအားထား ပြုပါသည်။ ကျွန်ုပ်သည် ကိုင်တွယ်ရန် အမှန်တကယ် ခက်ခဲလွန်း၏။ ဤပြဿနာများကို ဖြေရှင်းရန်အတွက် ကျွန်ုပ်သည် သမ္မာတရားကို မည်သို့ ရှာဖွေသင့်သနည်း” ဟု အဆုံး၌ မဖြစ်မနေ ဝန်ခံကြရမည်ဟု ခံစားရလေ၏။ ၎င်းတို့သည် ဤအရာများကို စ၍ ဆင်ခြင်ကြည့်ကြသည်။ ဤသည်မှာ လူတို့အနေဖြင့် မည်သို့ လုပ်ဆောင်သင့်ပုံနှင့်ပတ်သက်၍ ၎င်းတို့တွင် သိနားလည်ခြင်း အနည်းငယ် ရှိသည့်အပြင် အသိစိတ် အနည်းငယ်လည်း ရှိနေသည့် အဓိပ္ပာယ်ဖြစ်သည်။ အကယ်၍ အလုပ်လုပ်ပေးသူတစ်ယောက်သည် တစ်ချိန်ချိန်၌ ၎င်းတို့၏ တကယ့်အလုပ်ကို စတင်၍ ဂရုတစိုက် လုပ်ဆောင်ပြီး ၎င်း၏ စိတ်သဘောထား ပြောင်းလဲခြင်းကို အာရုံစူးစိုက်သည်၊ ပြီးလျှင် ၎င်းတို့သည်လည်း ဖောက်ပြန်ပျက်စီးသော စိတ်သဘောထားများ ရှိသည်ကို သဘောပေါက်သည်၊ ၎င်းတို့သည်လည်း မာနထောင်လွှား၍ ဘုရားသခင်ကို ကျိုးနွံနာခံနိုင်စွမ်း မရှိကြောင်း၊ ဤပုံစံဖြင့် ဆက်သွားလျှင်လည်း အဆင်ပြေမည် မဟုတ်ကြောင်း နားလည်လျှင်၊ ၎င်းတို့သည် ဤအရာများကို စတင် ဆင်ခြင်၍ နားလည်သဘောပေါက်ရန် ကြိုးစားသည့်အချိန်၌၊ ၎င်းတို့ တွေ့ရှိသော ပြဿနာများကို ရင်ဆိုင်ရန် သမ္မာတရားကို ရှာဖွေနိုင်သည့်အချိန်၌ ၎င်းတို့၏ လမ်းကြောင်းကို စတင် နောက်ပြန်လှည့်မိလိမ့်မည် မဟုတ်လော။ ၎င်းတို့သည် မိမိတို့၏ လမ်းကြောင်းကို စတင် နောက်ပြန်လှည့်လျှင် ၎င်းတို့အတွက် ပြောင်းလဲရန် မျှော်လင့်ချက် ရှိပေသည်။ သို့ရာတွင် ၎င်းတို့သည် သမ္မာတရားကို လိုက်စားရန် လုံးဝ ရည်ရွယ်ချက်မရှိလျှင်၊ ၎င်းတို့ လက်ဝယ်တွင် ရှိသော အလုပ်ကို ပြီးစီးခြင်းသည် ၎င်းတို့၏ အလုပ်တာဝန် ပြီးမြောက်ခြင်း၊ ဘုရားသခင်၏ တာဝန်ပေးစေခိုင်းချက် ပြီးဆုံးခြင်း ဖြစ်သည်ဟု ယုံကြည်လျက် သမ္မာတရားအတွက် ကြိုးပမ်းရန် လိုအင်ဆန္ဒ ကင်းမဲ့ပြီး အားသွန်ခွန်စိုက်လုပ်ရန်နှင့် အလုပ်လုပ်ရန်ကိုသာ သိလျှင် ဘုရားသခင်၏ သတ်မှတ်ချက်များက မည်သည့်အရာများ ဖြစ်သည်ကိုဖြစ်စေ၊ သမ္မာတရားက မည်သည့်အရာ ဖြစ်သည်ကိုဖြစ်စေ ၎င်းတို့သည် ဘုရားသခင်ကို ကျိုးနွံနာခံသော လူတစ်ယောက် ဟုတ်မဟုတ်ကိုဖြစ်စေ မည်သည့်အခါမျှ အလေးမထားဘဲ၊ ဤအရာတစ်ခုကိုမျှ လုံးဝ နားလည်ရန် ကြိုးစားခြင်း မရှိဘဲ အားထုတ်မှုအနည်းငယ် စိုက်ထုတ်ခြင်းသည် ၎င်းတို့၏တာဝန် ပြီးစီးသွားသည့်သဘော ဖြစ်သည်ဟု ယုံကြည်လျှင်၊ ဤသည်မှာ ၎င်းတို့၏ တာဝန်ကို ချဉ်းကပ်ပုံ ချဉ်းကပ်နည်း ဖြစ်လျှင် ၎င်းတို့သည် ကယ်တင်ခြင်းကို ရရှိနိုင်မည်လော။ ရရှိလိမ့်မည်မဟုတ်ပေ။ ၎င်းတို့သည် ကယ်တင်ခြင်း လမ်းကြောင်းကို စတင်ခြင်း မရှိသေးချေ၊ ဘုရားသခင်ကို ယုံကြည်ခြင်း လမ်းကြောင်းမှန်ပေါ် မရောက်ရှိသေးချေ၊ ပြီးလျှင် ဘုရားသခင်နှင့် ဆက်ဆံရေး တစ်ခုကိုလည်း မပျိုးထောင်ရသေးချေ။ ၎င်းတို့သည် ဘုရားအိမ်တော်တွင် ယခုထိ အားသွန်ခွန်စိုက် လုပ်နေခြင်းနှင့် အလုပ်လုပ်ပေးနေခြင်းသာ ဖြစ်သည်။ ၎င်းတို့အနေဖြင့် ဘုရားသခင်၏ အိမ်တော်တွင် အလုပ်လုပ်ပေးသည့်အခါတွင် ဘုရားသခင်သည် ထိုသို့သော လူများကိုလည်း ကြည့်ရှုကာ ကာကွယ်ပေး၏။ သို့သော် သူသည် ၎င်းတို့ကို ကယ်တင်ရန် ရည်ရွယ်ချက် မရှိပေ။ ဘုရားသခင်သည် ၎င်းတို့ကို ပြုပြင်ခြင်း၊ တရားစီရင်ခြင်း၊ ပြစ်တင်ဆုံးမခြင်း၊ စမ်းသပ်ခြင်း သို့မဟုတ် စစ်ဆေးခြင်း မပြုချေ။ သူသည် ၎င်းတို့အား ဤအသက်တာ၌ ကောင်းချီး အနည်းငယ် ရရှိရန်သာ အခွင့်ပေး၏၊ ထိုမျှသာ ဖြစ်လေသည်။ ဤလူများသည် မိမိတို့ကိုယ်ကို ပြန်လည်သုံးသပ်ဖို့နှင့် သိမြင်ဖို့ သိနားလည်ကြပြီး သမ္မာတရားအား လက်တွေ့ လုပ်ဆောင်ခြင်း၏ အရေးပါမှုကိုလည်း သိကြသည့်အခါတွင် ၎င်းတို့အနေဖြင့် ၎င်းတို့ ကြားနာထားသော တရားဒေသနာများကို နားလည်သွားခြင်း ဖြစ်သည်၊ နောက်ဆုံး၌ အကျိုးရလဒ်အချို့ ရရှိခဲ့ပြီဟူသော အဓိပ္ပာယ် ဖြစ်သည်။ ထိုအခါ ၎င်းတို့သည် “ဘုရားသခင်ကို ယုံကြည်ခြင်းမှာ အလွန် အံ့ဩစရာကောင်းလှသည်။ ဘုရားနှုတ်ကပတ်တော်များသည် လူများကို အမှန်တကယ် ပြောင်းလဲစေနိုင်၏။ ယခုအချိန်တွင် အရေးကြီးဆုံးအရာမှာ ငါ့အနေဖြင့် သမ္မာတရားကို ရရှိဖို့ ကြိုးစားရန် ဖြစ်သည်။ ငါသည် မိမိကိုယ်ကို သိခြင်းကို အာရုံမစိုက်လျှင်၊ သို့မဟုတ် ငါ၏ ဖောက်ပြန်ပျက်စီးသော စိတ်သဘောထားများကို မဖယ်ရှားဘဲ၊ အလုပ်လုပ်ပေးနေရုံမျှဖြင့် ဆက်၍ ကျေနပ်နေလျှင် ဘာကိုမျှ ရရှိလိမ့်မည် မဟုတ်” ဟု စဉ်းစားမိ၏။ ထို့ကြောင့် ဤလူပုဂ္ဂိုလ်သည် “ငါ့ထံတွင် မည်သည့် ဖောက်ပြန်ပျက်စီးသော စိတ်သဘောထားများ ရှိသနည်း။ ငါသည် ယင်းတို့ကို မည်သို့ သိလာမည်နည်း။ ဤဖောက်ပြန်ပျက်စီးသော စိတ်သဘောထားများကို ငါသည် မည်သို့ ဖြေရှင်းသင့်သနည်း” ဟု စတင် ဆင်ခြင်မိသည်။ ဤ အကြောင်းအရာများကို ၎င်းတို့၏ ဆင်ခြင်ခြင်းသည် သမ္မာတရားကို နားလည်ခြင်းနှင့် စိတ်သဘောထားဆိုင်ရာ ပြောင်းလဲမှုနှင့် ဆက်စပ်၏။ သို့ဖြစ်ရာ ၎င်းတို့၏ ကယ်တင်ခြင်းအတွက် မျှော်လင့်ချက် ရှိ၏။ လူတစ်ယောက်သည် မိမိကိုယ်ကို ပြန်လည်သုံးသပ်နိုင်ပြီး မိမိ၏ တာဝန်မှတစ်ဆင့် မိမိကိုယ်ကို သိနားလည်နိုင်လျှင်၊ သမ္မာတရားကို ရှာဖွေနိုင်လျှင်၊ ဘုရားသခင်၏ တောင်းဆိုချက်များကို ဖြည့်ဆည်းရန် အလုပ်ကြိုးစားနိုင်လျှင်၊ မိမိ၏ ဖောက်ပြန်ပျက်စီးသော စိတ်သဘောထားများကိုလည်း ဖြေရှင်းနိုင်လျှင် ထိုသူသည် ဘုရားသခင်ကို ယုံကြည်ခြင်း လမ်းကြောင်းမှန်ပေါ် ရောက်ရှိခဲ့ပြီဖြစ်သည်။ ဤ အကြောင်းအရာများကို မပြတ်တမ်း ဆင်ခြင်ခြင်းနှင့် သမ္မာတရား ရရှိရန် ကြိုးစားခြင်းအားဖြင့် ၎င်းတို့သည် ဘုရားသခင်၏ ဉာဏ်ပွင့်စေခြင်း၊ အလင်းပေးခြင်းနှင့် လမ်းပြမှုတို့ကို ရရှိလိမ့်မည်။ ဤနည်းအားဖြင့် ၎င်းတို့သည် ဘုရားသခင်၏ ပြုပြင်ခြင်းကို လက်ခံနိုင်လိမ့်မည်။ ယင်းနောက် မကြာမီတွင်လည်း ၎င်းတို့သည် တရားစီရင်ခြင်းနှင့် ပြစ်တင်ဆုံးမခြင်းကိုလည်းကောင်း၊ စမ်းသပ်ခြင်းနှင့် စစ်ဆေးခြင်းကိုလည်းကောင်း ခံရနိုင်သည်။ ဘုရားသခင်သည် ၎င်းတို့ကို သန့်စင်ပေးခြင်း၊ ပြောင်းလဲစေခြင်းဖြင့် သူ၏အမှုတော်ကို ၎င်းတို့အပေါ် စတင်ပေလိမ့်မည်။

အချို့သော လူများက “ကျွန်ုပ်သည် နှစ်ပေါင်းများစွာ ဘုရားသခင်ကို ယုံကြည်ခဲ့ပြီး မိမိ၏ တာဝန်ကို ထမ်းဆောင်ခဲ့သည်။ သို့သော် ကျွန်ုပ်သည် ပြုပြင်ခြင်းကို လုံးဝ မခံခဲ့ရပါ။ ထို့ပြင် စမ်းသပ်မှုများနှင့် စစ်ဆေးခြင်းကို ခံရရန် မဆိုထားနှင့်၊ ဉာဏ်ပွင့်စေခြင်းနှင့် အလင်းပေးခြင်း တစ်ခုတလေကိုမျှ မရရှိခဲ့ပါ” ဟု ဆိုကြသည်။ ဤသို့သော လူတစ်ယောက်သည် ဘုရားသခင်၏ အမှုတော်ကို တွေ့ကြုံနေခြင်းလော။ ၎င်းတို့အနေဖြင့် ဘုရားသခင်၏ နှုတ်ကပတ်တော်များကို အမှန်တကယ် တွေ့ကြုံ၍ လက်တွေ့လုပ်ဆောင်နိုင်လျှင် ၎င်းတို့သည် ဉာဏ်ပွင့်စေခြင်း သို့မဟုတ် အလင်းပေးခြင်းကို မည်သို့ကြောင့် မရနိုင်ခဲ့ကြသနည်း။ ၎င်းတို့သည် မိမိတို့၏ ဖောက်ပြန်ပျက်စီးမှုကို မကြာခဏ ထုတ်ဖော်လျှင် ပြုပြင်ခြင်း သေချာပေါက် ခံရပေမည်။ ပြုပြင်ခြင်း ခံရပြီးနောက် နောင်တမရကြလျှင် ၎င်းတို့၌ မည်သည့် လူ့သဘာဝမျှ မရှိသည်မှာ အသေအချာပင် ဖြစ်သည်။ ပြီးလျှင် ၎င်းတို့သည် ဖယ်ရှားရှင်းလင်းခံရသင့်သော လူများ ဖြစ်၏။ အချို့သော လူများက “ကျွန်ုပ်သည် ပြုပြင်ခြင်းကို မကြာခဏ တွေ့ကြုံရသည်။ ကျွန်ုပ်သည် ဘုရားသခင်၏ ဉာဏ်ပွင့်စေခြင်းနှင့် အလင်းပေးမှုကိုလည်း မကြာခဏ ရရှိသည်၊ အလင်းအသစ်ကိုလည်း ရရှိပါသည်” ဟု ဆိုကြသည်။ ဤနေရာတွင် မည်သို့ ဖြစ်ပျက်နေသနည်း။ (ဘုရားသခင်က ၎င်းတို့ကို ဦးဆောင် လမ်းပြနေပါသည်။) အခြားသော လူအချို့ကမူ “ကျွန်ုပ်သည် အရာရာတိုင်း အဆင်ပြေ ချောမွေ့ကြသည့် အခြားလူများနည်းတူ ဘာကြောင့် မဖြစ်ရသနည်း။ ၎င်းတို့သည် ဘုရားသခင်၏ ကောင်းချီးများကို အမြဲ ရရှိကြပြီး မည်သည့် ဆင်းရဲဒုက္ခများကိုမျှ ခက်ခက်ခဲခဲ မကျော်လွှားရဘဲ ပုခက်ထဲမှ ကလေးငယ်များကဲ့သို့ နေကြရသည်။ ကျွန်ုပ်သည် ဘာကြောင့် စမ်းသပ်ခြင်းနှင့် စစ်ဆေးခြင်းကို အမြဲတမ်း ခံနေရသနည်း” ဟု ဆိုကြသည်။ စမ်းသပ်ခြင်းနှင့် စစ်ဆေးခြင်းကို အမြဲ ခံရခြင်းသည် ကောင်းသော အရာတစ်ခုလော၊ ဆိုးသော အရာတစ်ခုလော။ (ကောင်းသော အရာတစ်ခု ဖြစ်ပါသည်။) ကောင်းသော အရာတစ်ခု ဖြစ်သည်၊ ဆိုးသော အရာတစ်ခု မဟုတ်။ လူများကို စမ်းသပ်ခြင်းနှင့် စစ်ဆေးခြင်းအတွက် ဘုရားသခင်၏ ရည်ရွယ်ချက်မှာ အဘယ်နည်း။ (လူတို့အနေဖြင့် ၎င်းတို့၏ ဖောက်ပြန်ပျက်စီးသော စိတ်သဘောထားများကို သိလာနိုင်စေရန် ဖြစ်သည်။) ဘုရားသခင်သည် ယင်းကို လူများအား ညှဉ်းပန်းနှိပ်စက်ရန် သို့မဟုတ် ဒုက္ခပေးရန်အတွက် လုပ်ဆောင်ခြင်း မဟုတ်။ လူများအနေဖြင့် ၎င်းတို့၏ ဖောက်ပြန်ပျက်စီးသော စိတ်သဘောထားများကို သိလာနိုင်စေရန် လုပ်ဆောင်ခြင်း ဖြစ်သည်။ ၎င်းတို့ ဖောက်ပြန်ပျက်စီးမှု၏ အနှစ်သာရနှင့် သွင်ပြင် အစစ်အမှန်ကိုလည်း ရှင်းရှင်းလင်းလင်း မြင်ကြစေရန် ဖြစ်သည်။ ဤသို့ဖြင့် ၎င်းတို့သည် ၎င်းတို့၏ ရည်ရွယ်ချက်များနှင့် အကြံအစည်များကို စွန့်လွှတ်နိုင်၍ ဘုရားသခင်အား ကျိုးနွံနာခံခြင်းကိုလည်း ရရှိနိုင်ကြစေရန် ဖြစ်သည်။ ထိုအခါ ၎င်းတို့သည် အလုပ်လုပ်ပေးနေခြင်းသက်သက် မဟုတ်တော့ဘဲ ၎င်းတို့၏ တာဝန်များကို ထမ်းဆောင်နေခြင်း ဖြစ်လေသည်။ သင်သည် ဖန်ဆင်းခံတစ်ယောက်၏ တာဝန်ကို စစ်မှန်စွာ၊ စနစ်ကျစွာဖြင့် ထမ်းဆောင်သည့်အခါ ဘုရားသခင်နှင့် သင်၏ ဆက်ဆံရေးသည် ပုံမှန် ဖြစ်လာပြီး ဘုရားသခင်နှင့် သင်၏ ပုံမှန်မဟုတ်သော ဟိုယခင် ဆက်ဆံရေးကို ပြောင်းပြန်ဖြစ်စေသည်။ သင်နှင့် ဘုရားသခင်အကြား ဆက်ဆံရေးသည် အလုပ်သမားတစ်ဦးနှင့် သူ၏အလုပ်ရှင်တို့ ကြားမှ ဆက်ဆံရေးမျိုး ဖြစ်လျှင် သင်သည် ကယ်တင်ခြင်းကို မရရှိနိုင်ပေ။ အကယ်၍ သင်သည် ဘုရားသခင်၏ တာဝန်ပေးစေခိုင်းချက်ကို လက်ခံကာ ဘုရားသခင် အိမ်တော်၏ အစီအစဉ်များကို နာခံနိုင်ပြီး မိမိ၏ တာဝန်ကို ကောင်းစွာ ထမ်းဆောင်ခြင်းအတွက် အလေးအနက် တာဝန်ယူလျှင် ဘုရားသခင်နှင့် သင်၏ ဆက်ဆံရေးသည် ပုံမှန် ဖြစ်လာလိမ့်မည်။ သင်သည် ဖန်ဆင်းခံတစ်ယောက် ဖြစ်လာလိမ့်မည်၊ ဖန်ဆင်းရှင်၏ အစီအစဉ်များကို နာခံနိုင်လာလိမ့်မည်၊ ပြီးလျှင် သင်၏ စိတ်နှလုံး၌ ဘုရားသခင်ကို ကယ်တင်ရှင်အဖြစ် လက်ခံနိုင်လာလိမ့်မည်၊ ထို့ပြင် သင်သည် ဘုရားသခင်၏ ကယ်တင်ခြင်း ပစ်မှတ်တစ်ခု ဖြစ်လာလိမ့်မည်။ ဘုရားသခင်နှင့် သင်၏ ဆက်ဆံရေးသည် ဤအဆင့်အတန်းသို့ ရောက်ရှိပေမည်။ သို့သော် သင်သည် အမြဲတမ်း အလုပ်လုပ်ပေးနေရုံသက်သက် ဖြစ်လျှင်၊ ဘုရားသခင်က သင့်အား မည်သည့် တာဝန်ပေးစေခိုင်းချက်ကို အပ်နှံသည်ဖြစ်စေ သင်က ယင်းကို ဝတ်ကျေတမ်းကျေ ဖြစ်သော သဘောထားဖြင့် အမြဲ ထမ်းဆောင်လျှင်၊ သမ္မာတရား စည်းမျဉ်းများကိုလည်း လက်ခံခြင်း မရှိ၊ စစ်မှန်သော ကျိုးနွံနာခံခြင်းလည်း မရှိဘဲ အားသွန်ခွန်စိုက်လုပ်ရန်နှင့် အလုပ်လုပ်ရန်သာ သိလျှင်၊ အမှုကိစ္စများကို ပြုလုပ်သည့်အခါလည်း ဖြစ်သလို လုပ်ဆောင်နေလျှင် သင်သည် အမှန်ပင် အလုပ်လုပ်ပေးသူတစ်ယောက် ဖြစ်၏။ အလုပ်လုပ်ပေးသူများ ဖြစ်ကြသော ထိုသူတို့သည် သမ္မာတရားကို လက်မခံသည့်အပြင် ပြောင်းလဲခြင်း အတိုင်းအတာ စိုးစဉ်းမျှကိုပင် လုံးဝ မကြုံရသောကြောင့် ဘုရားသခင်နှင့် ၎င်းတို့၏ ဆက်ဆံရေးမှာ အစဉ်ထာဝရ အလုပ်သမားများနှင့် ၎င်းတို့အလုပ်ရှင်၏ ဆက်ဆံရေးမျိုး ဖြစ်ပေသည်။ ၎င်းတို့သည် ဘုရားသခင်ကို ဘယ်သောအခါမျှ အမှန်တကယ် ကျိုးနွံနာခံလိမ့်မည် မဟုတ်၊ ဘုရားသခင်ကလည်း ၎င်းတို့ကို ယုံကြည်သူများအဖြစ် သို့မဟုတ် သူနှင့် သက်ဆိုင်သူများအဖြစ် အသိအမှတ်ပြုလိမ့်မည် မဟုတ်ပေ။ ဤသည်မှာ သမ္မာတရားကို လိုက်စားခြင်း မရှိဘဲ ဘုရားသခင်ကို ယုံကြည်ကြသော လူတို့အတွက် အကျိုးဆက် ဖြစ်သည်။ ယင်းကို ၎င်းတို့ လျှောက်လှမ်းကြသည့် လမ်းက ဆုံးဖြတ်ခြင်း ဖြစ်သည်။ သင်သည် ဘုရားသခင်နှင့် သင်၏ ဆက်ဆံရေးကို တိုးတက်ချင်လျှင် မည်သည့်အရာကို လုပ်ဆောင်သင့်သနည်း။ (သမ္မာတရားအား လိုက်စားသည့် လမ်းကို လျှောက်လှမ်းပါ။) မှန်သည်။ သမ္မာတရားအား လိုက်စားသည့်လမ်းကို လျှောက်ရမည်။ သင်၏ ပထမဆုံး ခြေလှမ်းမှာ မည်သို့ ဖြစ်သင့်သနည်း။ (မိမိတာဝန်အား မည်သို့ ထမ်းဆောင်ရမည်ကို နားလည်ရပါမည်။) ဘုရားသခင်ကို ယုံကြည်သူများသည် တာဝန်တစ်ခုကို ထမ်းဆောင်ရမည်၊ ဤသည်မှာ ဘုရားသခင်၏ တောင်းဆိုချက် ဖြစ်၏။ ဘုရားသခင်နောက် လိုက်လျှောက်ခြင်းသည် မိမိ၏တာဝန်အား ထမ်းဆောင်ခြင်းကို ရည်ညွှန်းခြင်း ဖြစ်ပေသည်။ တာဝန်များကို ထမ်းဆောင်ခြင်း မရှိဘဲ ဘုရားသခင်ကို ယုံကြည်သူများမှာ ဘုရားသခင်နောက်သို့ လိုက်လျှောက်နေခြင်း မဟုတ်ပေ။ သင်သည် ဘုရားသခင်နောက်သို့ လိုက်လျှောက်ချင်လျှင် သင်၏ တာဝန်ကို ကောင်းစွာ ထမ်းဆောင်ရမည်။ တာဝန်တစ်ခုကို ထမ်းဆောင်သည့်အခါ သမ္မာတရား၏ မည်သည့် သွင်ပြင်လက္ခဏာကို ပထမဆုံး လက်တွေ့လုပ်ဆောင်သင့်သနည်း။ (ကျိုးနွံနာခံခြင်းသမ္မာတရား ဖြစ်ပါသည်။) မှန်ပေသည်။ အချို့သော လူများက “ယခုအခါ ဤသည်မှာ ကျွန်ုပ်၏တာဝန် ဖြစ်သည်။ ကျွန်ုပ်သည် စာကြိုးစားရမည်၊ အင်္ဂလိပ်စာ သင်ယူရာတွင် တိုးတက်မှုများ ရရှိအောင် လုပ်ရမည်။ ထို့နောက် တစ်နှစ်၊ နှစ်နှစ်တွင် အင်္ဂလိပ်စာ စမ်းသပ်မှု စာမေးပွဲကို ဖြေရမည်၊ သို့မဟုတ် ပါရဂူဘွဲ့ကို ယူရမည်။ ထိုအခါ ကျွန်ုပ်သည် ဘာသာတရားမရှိသူများ၏ လောကတွင် အသိအမှတ်ပြုခြင်း ခံလာရနိုင်သည်၊ သို့မဟုတ် ဘုရားသခင်၏ အိမ်တော်တွင် အဆင်ပြေလာနိုင်၍ အနာဂတ်တွင်လည်း ခေါင်းဆောင်တစ်ယောက် ဖြစ်ကောင်း ဖြစ်လာနိုင်သည်” ဟု ဆိုကြသည်။ ထိုလူများသည် ၎င်းတို့၏ ကိုယ်ပိုင်အကျိုးအတွက် ကြံစည်နေခြင်းသာ မဟုတ်လော။ (ဟုတ်ပါသည်။) မိမိ၏ ဇာတိပကတိအတွက် အမြဲ ပြင်ဆင်ကာ စီစဉ်နေခြင်း၊ မိမိအသက်၏ အရေးကိစ္စများကိုသာမက သေလွန်ပြီး အချိန်အတွက်ပါ စီစဉ်နေခြင်းပင်။ ဤသည်မှာ ဘာသာတရားမရှိသူတစ်ယောက်၏ စိတ်နေစိတ်ထား ဖြစ်သည်။ ဘာသာတရားမရှိသူများသည် ဘုရားသခင်၏ တည်ရှိမှုကို အသိအမှတ်မပြုသောကြောင့် ၎င်းတို့၏ နေ့ရက်များကို ဤနည်းအတိုင်း စဉ်းစားကာ နေထိုင်ကြခြင်းသည် ၎င်းတို့အတွက် ပုံမှန်ဖြစ်သည်။ ထို့ကြောင့် ၎င်းတို့မှာ ၎င်းတို့၏ ဇာတိပကတိကိုသာ စဉ်းစားနိုင်ကြသည်၊ တိရစ္ဆာန်များကဲ့သို့ ၎င်းတို့၏ ရှင်သန်ခြင်းကိုသာ ထည့်စဉ်းစားနိုင်ကြသည်။ သို့သော် ဘုရားသခင်ကို ယုံကြည်သော လူများမှာမူ ဘုရားသခင်၏ နှုတ်ကပတ်တော်များကို နေ့စဉ် ဖတ်ရှု၍ သမ္မာတရားကို နားလည်ကြ၏။ ထို့ကြောင့် ၎င်းတို့သည် တာဝန်တစ်ခု ထမ်းဆောင်ခြင်း၏ အဓိပ္ပာယ်နှင့် ယင်းအတွက် အကြောင်းပြချက်ကို သိသင့်ကြသည်။ ၎င်းတို့သည် ဤအရာများကို နားလည် သဘောပေါက်ရမည်။ ယင်းတို့မှာ ဘုရားသခင်ကို ယုံကြည်ခြင်းတွင် လူတစ်ယောက် လျှောက်လှမ်းသည့် လမ်းနှင့် တိုက်ရိုက် သက်ဆိုင်၏။ လူတစ်ယောက်သည် သမ္မာတရားကို နားလည်ရန်၊ စိတ်သဘောထား ပြောင်းလဲခြင်း ရရှိရန်အတွက် ဘုရားသခင်၏ အမှုတော်ကို မည်သို့ နာခံ၍ ဘုရားသခင်၏ နှုတ်ကပတ်တော်များကို မည်သို့ တွေ့ကြုံသင့်သည်၊ မိမိ၏တာဝန်ကို ကောင်းစွာ လုပ်ဆောင်ရန်နှင့် ဘုရားသခင်ကို ကျိုးနွံနာခံရန်အတွက် သမ္မာတရား၏ မည်သည့် လက္ခဏာသွင်ပြင်များကို ကြိုးပမ်းရရှိရမည်၊ ထို့ပြင် လူများသည် ၎င်းတို့၏ ဖောက်ပြန်ပျက်စီးသော စိတ်သဘောထားများ သန့်စင်နိုင်ရန်အတွက် ဘုရားသခင်၏ တရားစီရင်မှုနှင့် ပြစ်တင်ဆုံးမမှုကို မည်သို့ လက်ခံသင့်သည် စသည့် ဤအကြောင်းအရာများနှင့် ပတ်သက်သည့် သမ္မာတရားကို ၎င်းတို့အနေဖြင့် နားလည်ရန် ပို၍ပင် လိုအပ်သည်။ ဤသည်မှာ ဘုရားသခင်ကို ယုံကြည်ခြင်းတွင် လူတစ်ယောက် လျှောက်လှမ်းသင့်သည့် လမ်းကြောင်း ဖြစ်၏။ ဤနည်းအတိုင်း သမ္မာတရားကို လိုက်စားခြင်းအားဖြင့်သာ လူတစ်ယောက်သည် မိမိတာဝန်ကို ကောင်းစွာ ထမ်းဆောင်နိုင်၍ ဘုရားသခင်၏ ကယ်တင်ခြင်းကိုလည်း ရရှိနိုင်သည်။ ဘုရားသခင်သည် သမ္မာတရားအား ဤသို့ လိုက်စားသော လူများကို ကယ်တင်ချင်၏၊ စုံလင်အောင် ပြုချင်၏။ သူ၏ ကယ်တင်ခြင်း အမှုကို ပြီးဆုံးစေခြင်းအားဖြင့် ဘုရားသခင်သည် ထိုသို့သော လူပုဂ္ဂိုလ်အနည်းငယ်ကို ရရှိချင်သည်။ အကယ်၍ လူတစ်ယောက်သည် မည်သို့မည်ပုံ အောင်မြင်ရမည်၊ အရေးပါသော ခေါင်းဆောင်တစ်ယောက် မည်သို့ ဖြစ်လာရမည်၊ ပြီးလျှင် မည်မျှသောလူများကို စီမံအုပ်ချုပ်ရလိမ့်မည်၊ နောက်ဆုံး၌ မည်မျှသောမြို့များကို အုပ်စိုးရနိုင်သည် တို့ကိုသာ စဉ်းစားလျှင် ဤသည်တို့မှာ ရည်မှန်းချက်များနှင့် လိုအင်ဆန္ဒများ ဖြစ်ပေသည်။ ဤ လူပုဂ္ဂိုလ်သည် အန္တိခရစ်များကဲ့သို့သော လူစားမျိုး ဖြစ်သည်၊ အန္တိခရစ်များအားလုံးသည် ဤအရာများကို ရရှိရန် ကြံစည်တတ်ကြ၏။ ဤအရာများ ရရှိရန် ကြံစည်ခြင်းသည် သဘာဝကျသလော။ (သဘာဝ မကျပါ။) သဘာဝမကျမှန်း သိနေလျှင် ၎င်းတို့အနေဖြင့် ယင်းတို့ကို မစွန့်လွှတ်နိုင်သလော။ (လွယ်ကူမည် မဟုတ်ပါ။) သာမန်အခြေအနေများတွင် လူများသည် ၎င်းတို့၏ ရည်မှန်းချက် ပန်းတိုင်များ အောင်မြင်ရန်အတွက် ကိုယ်ပိုင် ရည်ရွယ်ချက်များအတိုင်း လုပ်ဆောင်ကြသည်။ သင် ပြုသမျှ အရာရာတိုင်းတွင် သင်သည် မိမိ၏ ကိုယ်ပိုင် ရည်မှန်းချက်များ အောင်မြင်ရန်အတွက် လုပ်ဆောင်သလော။ သို့မဟုတ် သင်သည် မိမိကိုယ်ကို ပြန်လည်သုံးသပ်သလော၊ သမ္မာတရားကို ရှာဖွေသလော၊ သင်၏ ရည်မှန်းချက်များနှင့် လျှို့ဝှက်ကြံစည်ခြင်းများကိုပုန်ကန်ကာ သမ္မာတရား လိုက်စားခြင်းလမ်းကို လျှောက်လှမ်းရန် ရွေးချယ်သလော။ မှန်ကန်သော လမ်းဟူသည် အဘယ်နည်း။ (မိမိကိုယ်ကို အမြဲတမ်း ပုန်ကန်ခြင်းနှင့် ဘုရားသခင်၏ တောင်းဆိုချက်များနှင့်အညီ လုပ်ဆောင်ခြင်း ဖြစ်ပါသည်။) မည်သည့် ပုဂ္ဂိုလ်မျိုး၏ လိုက်စားမှုသည် ဤအရာကို အောင်မြင်နိုင်စွမ်း ရှိသနည်း။ ကြင်နာတတ်သော၊ ရိုးသား ဖြောင့်မတ်သော စိတ်နှလုံး ရှိသည့် လူတစ်ယောက်သည်သာ ယင်းကို အောင်မြင်နိုင်သည်။ သမ္မာတရားကို မချစ်သည့် လှည့်ဖြားတတ်သော၊ စိတ်နှလုံးခိုင်မာသော၊ ကောက်ကျစ်ဆိုးယုတ်သော လူများမှာ ယင်းကို မအောင်မြင်နိုင်ချေ။ ၎င်းတို့ လျှောက်သောလမ်းသည် လမ်းမှန် မဟုတ်ကြောင်း၊ ယင်းသည် ပေါလု၏ မှားယွင်းသော လမ်း ဖြစ်ကြောင်းနှင့် ၎င်းတို့အနေဖြင့် ကယ်တင်ခြင်းကို အမှန်တကယ် ရလိမ့်မည် မဟုတ်ကြောင်း သိကြသည်ဖြစ်သဖြင့် ၎င်းတို့သည် အဘယ်ကြောင့် မှန်ကန်သော လမ်းကို မစတင်ကြသနည်း။ ၎င်းတို့သည် မိမိကိုယ်ကို မထိန်းချုပ်နိုင်သောကြောင့် ဖြစ်သည်။ ဤအရာကို ၎င်းတို့၏ သဘာဝက လုံးလုံးလျားလျား အဆုံးအဖြတ်ပေးခြင်း ဖြစ်သည်။ ယင်းက လူနှစ်ယောက်သည် တူညီသော အစွမ်းအစ ရှိကာ ဘုရားသခင်ကို နှစ်ကာလအရေအတွက် တူညီစွာ ယုံကြည်ခဲ့ကြ၍ တစ်ပုံစံတည်းသော တရားဒေသနာများကို ကြားနာခဲ့ကြပြီး တစ်ပုံစံတည်းသော တာဝန်များကို ထမ်းဆောင်ခဲ့ကြသော်လည်း မတူညီသော လမ်းများကို လျှောက်ကြသကဲ့သို့ ဖြစ်သည်။ ၎င်းတို့နှစ်ဦးသည် နှစ်အနည်းငယ်မျှ အကြာမှာပင် မတူညီသော လမ်းများကို လျှောက်မိကြ၍ တစ်ဦးမှာ ဖယ်ရှားရှင်းလင်းခြင်း ခံရသော်လည်း ကျန်တစ်ဦးမှာမူ ရယူခြင်းကို ခံရလေသည်။ တစ်ယောက်သောသူသည် ရိုးသားပြီး ဖြောင့်မတ်သော စိတ်နှလုံး ရှိ၏၊ သမ္မာတရားကို ချစ်၏၊ သမ္မာတရား လိုက်စားခြင်း လမ်းကိုလည်း လျှောက်လှမ်း၏။ တစ်စုံတစ်ယောက်သည် ဤလူအား လှည့်စား၍ ဆိုးယုတ်သောလမ်းကို လျှောက်ရန် သွေးဆောင်ဖို့ ကြိုးစားလျှင်ပင် ထိုလူသည် လက်ခံမည်လော။ လက်ခံမည် မဟုတ်ချေ။ ထိုလူမျိုးတို့သည် ယင်းတို့ကို သေချာပေါက် ငြင်းပယ်လိမ့်မည်။ ထိုသူတို့သည် သမ္မာတရားကို ရှာဖွေနိုင်၏၊ ဘုရားသခင်၏ တောင်းဆိုချက်များနှင့်အညီ လုပ်ဆောင်ကြ၏၊ ပြီးလျှင် ၎င်းတို့၏တာဝန်ကို ထမ်းဆောင်ရာတွင်လည်း ပို၍ ပို၍ ကောင်းမွန်လာကြ၏။ သို့သော် အခြားသောသူမှာမူ အတော်ပင် ကောက်ကျစ်ဆိုးယုတ်၍ လှည့်စားတတ်လေသည်။ ထိုသူတို့သည် ဂုဏ်ဒြပ်နောက်သို့ လိုက်ကြပြီး ၎င်းတို့၏ ရည်မှန်းချက်များမှာ ကြီးမားလွန်းသည်။ တစ်စုံတစ်ယောက်သည် ၎င်းတို့အား သမ္မာတရားအကြောင်းကို မည်သို့ မိတ်သဟာယ ပြုသည်ဖြစ်စေ ၎င်းတို့က ဂုဏ်ဒြပ်နောက်သို့ လိုက်ကြခြင်းကို စွန့်လွှတ်လိမ့်မည် မဟုတ်ပေ။ ဤသည်မှာ ၎င်းတို့သဘာဝ၏ ပြဿနာပင် ဖြစ်သည်။ ထို့ပြင် သမ္မာတရားကို လက်မခံသော၊ ဂုဏ် အဆင့်အတန်းကို လုံးဝ မစွန့်လွှတ်နိုင်သော ဤလူအတွက် အဆုံးသတ်မှာ အဘယ်နည်း။ ထိုသူသည် ဖယ်ရှားရှင်းလင်းခြင်း ခံရပေမည်။ ဤ လူနှစ်ဦး၏ အဆုံးသတ်များသည် သိသာထင်ရှားစွာ ခြားနား၏။ စိတ်နှလုံးတွင် ရိုးသား၍ သမ္မာတရားကို လိုက်စားသော လူသည် သမ္မာတရားကို ပို၍ ပို၍ နားလည်လာသည်၊ ပို၍ ကြည်လင် ပြတ်သားသော အတွေးအမြင်ဖြင့် ဘုရားသခင်၏ ရည်ရွယ်ချက်များနှင့် တဖြည်းဖြည်း ကိုက်ညီလာသည်။ သမ္မာတရားကို မလိုက်စားသော လူသည်ကား အယူဝါဒကို သိနားလည်နိုင်စွမ်းသာ ရှိ၍ ယင်းကို လက်တွေ့ မလုပ်ဆောင်နိုင်ပေ။ ၎င်းတို့သည် အဘယ်ကြောင့် ယင်းကို လက်တွေ့မလုပ်ဆောင်နိုင်သနည်း။ ၎င်းတို့၏ ရည်မှန်းချက်များနှင့် လိုအင်ဆန္ဒများသည် ကြီးမားလွန်းသည် ဖြစ်သဖြင့် ၎င်းတို့သည် ယင်းတို့ကို လက်မလွှတ်နိုင်ချေ။ ၎င်းတို့ပြုသမျှ အရာရာတိုင်းတွင် ၎င်းတို့သည် ကိုယ်ပိုင်အကျိုးစီးပွား၊ ရည်မှန်းချက်များ၊ လိုအင်ဆန္ဒများ၊ ကျော်ကြားမှု၊ အကျိုးအမြတ်နှင့် အဆင့်အတန်းကို ဦးစားပေးကြသည်။ ၎င်းတို့ထံတွင် ဤအရာများ ပြည့်နှက်နေပြီး ယင်းတို့ကြောင့် ၎င်းတို့သည် စိတ်ထိန်းမနိုင်သိမ်းမရဖြစ်ကြသည်။ ၎င်းတို့ထံတွင် တစ်စုံတစ်ခု ဖြစ်ပျက်သည့်အခါ ၎င်းတို့သည် ၎င်းတို့၏ ဇာတိပကတိနှင့် ကိုယ်ပိုင် လိုအင်ဆန္ဒများကို ဦးဆုံး ဖြည့်ဆည်းကြ၏။ အမှုကိစ္စများအားလုံးတွင် ၎င်းတို့၏ လိုအင်ဆန္ဒများအတိုင်း လုပ်ဆောင်ကြပြီး ဤရည်မှန်းချက်နောက်သို့ လိုက်နေကြကာ သမ္မာတရားကို ဘေးဖယ်ထားကြလေသည်။ အကျိုးဆက်အနေဖြင့် ၎င်းတို့သည် ၎င်းတို့၏ တာဝန်ကို ကောင်းမွန်စွာ မထမ်းဆောင်ကြဘဲ အလုပ်ကို ကမောက်ကမ ဖြစ်စေ၍ နောက်ဆုံး၌ ဖယ်ရှားရှင်းလင်းခြင်း ခံကြရ၏။ ဤလူများသည် ဘုရားသခင်၏ အိမ်တော်က ဖယ်ရှားရှင်းလင်းသည့် လူများပင် မဟုတ်လော။ သို့ဆိုလျှင် ၎င်းတို့အတွက် မည်သည့် မျှော်လင့်ချက်မျှ မရှိလေသလော။ ၎င်းတို့အနေဖြင့် အမှန်တကယ် နောင်တရနိုင်လျှင် ဖယ်ရှားရှင်းလင်းခံရခြင်းကို ရှောင်ရှားနိုင်ပြီး ၎င်းတို့၏ ကယ်တင်ခြင်းအတွက် မျှော်လင့်ချက်လည်း ရှိလိမ့်မည်။ သို့သော် ၎င်းတို့၏ စိတ်နှလုံးခိုင်မာပြီး ၎င်းတို့သည် မိမိတို့၏ လိုအင်ဆန္ဒများကို အရိုးထိရောက်အောင်ခဲထားသော ခွေးဆိုး တစ်ကောင်ကဲ့သို့ အရူးအမူး ဖက်တွယ်လျှင် ၎င်းတို့အနေဖြင့် ကယ်တင်ခြင်း ရလိမ့်မည်ဟူသော မျှော်လင့်ချက်မှာ လုံးဝ မရှိချေ။ လူတို့သည် မှန်ကန်သောလမ်းကို မလျှောက်လျှင် သမ္မာတရားကို မရရှိနိုင်ပေ။ သမ္မာတရားကို လိုက်စားခြင်း လမ်းသည်သာ မှန်ကန်သောလမ်း ဖြစ်သည်။ ယင်းလမ်းကို လျှောက်လှမ်းခြင်းအားဖြင့်သာ လူတစ်ယောက်သည် သမ္မာတရားကို ရရှိနိုင်၏။ သမ္မာတရားကို လိုက်စားခြင်းအားဖြင့်သာ လူတစ်ယောက်သည် ဘုရားသခင်၏ ကယ်တင်ခြင်းကို ရရှိခြင်းဟူသော မျှော်လင့်ချက် ရှိနိုင်လေသည်။

လှည့်စားတတ်ပြီး ကောက်ကျစ်ဆိုးယုတ်သည့် လူများ၏ စိတ်နှလုံးများသည် ၎င်းတို့၏တစ်ကိုယ်ရေ ရည်မှန်းချက်များ၊ အစီအစဉ်များနှင့် အကြံအစည်များဖြင့် ပြည့်နှက်နေသည်။ ဤအရာများသည် ဘေးဖယ်ဖို့ လွယ်ကူသလော။ (မလွယ်ကူပါ။) သင်သည် သင်၏တာဝန်ကို ကောင်းစွာထမ်းဆောင်လိုဆဲ ဖြစ်သော်လည်း ဤအရာများကို ဘေးမဖယ်နိုင်လျှင် မည်သည့်အရာကို လုပ်ဆောင်သင့်သနည်း။ ဤနေရာတွင် လမ်းကြောင်းတစ်ခုရှိသည်။ သင်လုပ်ဆောင်သည့် အရာ၏ သဘာဝသည် သင့်အတွက် ရှင်းလင်းရမည်ဖြစ်သည်။ တစ်စုံတစ်ခုသည် ဘုရားအိမ်တော်၏ အကျိုးစီးပွားနှင့် သက်ဆိုင်ပါက၊ ယင်းသည် အလွန်ပင် အရေးပါပါက သင်သည် ယင်းကို နေ့ရွှေ့ညရွှေ့လုပ်၍ မရပေ၊ အမှားလုပ်၍မရပေ၊ ဘုရားအိမ်တော်၏ အကျိုးစီးပွားကို ထိခိုက်၍မရပေ၊ သို့မဟုတ် ဘုရားအိမ်တော်၏အလုပ်ကို နှောင့်ယှက်၍ မရပေ။ ဤသည်မှာ သင်၏တာဝန် ထမ်းဆောင်ခြင်း၌ သင်လိုက်နာသင့်သည့် စည်းမျဉ်း ဖြစ်သည်။ ဘုရားအိမ်တော်၏ အကျိုးစီးပွားများကို ထိခိုက်ခြင်းမှ သင်ရှောင်ရှားလိုလျှင် ရှေးဦးစွာ သင်၏ရည်မှန်းချက်များနှင့် အလိုဆန္ဒတို့ကို ဘေးဖယ်ထားလော့။ သင်၏အကျိုးစီးပွားများ အတော်အတန် အထိခိုက်ခံရမည်ဖြစ်သည်၊ ယင်းတို့ကို ဘေးဖယ်ထားရမည်ဖြစ်သည်၊ ပြီးလျှင် ဘုရားသခင်၏ စိတ်သဘောထားကို ပုန်ကန်ပြစ်မှားခြင်းထက် သင်သည် မကြာမီ အနည်းငယ် ဆင်းရဲဒုက္ခခံရမည်ဖြစ်သည်။ ထိုသို့ပုန်ကန်ပြစ်မှားခြင်းက လက်သင့်မခံနိုင်ဖွယ် ဖြစ်သည်။ သင်သည် သင်၏နုံချာသော ရည်မှန်းချက်များနှင့် ဝင့်ဝါမှုကို ဖြည့်ဆည်းဖို့ငှာ အသင်းတော်၏အလုပ်ကို ကဖျက်ယဖျက်လုပ်ပါက သင့်အတွက် အဆုံးသတ် အကျိုးဆက်မှာ အဘယ်အရာ ဖြစ်မည်နည်း။ သင်သည် အစားထိုးခံရမည်ဖြစ်ပြီး ဖယ်ရှားရှင်းလင်းခြင်း ခံရနိုင်သည်။ သင်သည် ဘုရားသခင်၏ စိတ်သဘောထားကို ရန်စပြီးဖြစ်လိမ့်မည်ဖြစ်ကာ ကယ်တင်ခံရရန် နောက်ထပ် အခွင့်အရေး တစ်ခုတလေမျှ ရကောင်းရမည် မဟုတ်ပေ။ ဘုရားသခင်က လူများကို ပေးသည့် အခွင့်အရေး အရေအတွက်၌ အကန့်အသတ် ရှိသည်။ လူများသည် ဘုရားသခင်၏ စမ်းသပ်ခြင်းခံရဖို့ အခွင့်အရေးမည်မျှ ရရှိသနည်း။ ဤအရာကို ၎င်းတို့၏ အနှစ်သာရအတိုင်း ဆုံးဖြတ်လေသည်။ သင့်အား ပေးသည့် အခွင့်အရေးများကို ဖြစ်နိုင်သမျှ အကျိုးအမြတ်ရအောင် ဆောင်ရွက်ပြီး သင်၏ မာနနှင့် ဝင့်ဝါမှုတို့ကို လက်လွှတ်နိုင်ကာ အသင်းတော်အလုပ်ကို ကောင်းစွာ လုပ်ဆောင်ဖို့ ဦးစားပေးပါက သင်၌ မှန်ကန်သော စိတ်ဓာတ် ရှိလေပြီ။ သင်၏ စိတ်နှလုံးသည် ဘယ်သို့ ညာသို့ ယိမ်းယိုင်ခြင်း မရှိဘဲ ဖြောင့်မတ်နေရမည်။ သင့်ထံတွင် မှားယွင်းသော ရည်ရွယ်ချက်များ ရှိသည့်အခါ ချက်ချင်း ဆုတောင်း၍ ယင်းတို့ကို ပြုပြင်ရမည်။ အလွန်အရေးကြီးသော အချိန်များတွင် သင်သည် ဘုရားအိမ်တော်၏ အကျိုးကို ကာကွယ်သင့်ပြီး သင်၏အလုပ်များကို ပြီးမြောက်သင့်သည်။ ဤသို့ လုပ်ဆောင်သော လူတစ်ယောက်သည် မှန်ကန်သော လူတစ်ယောက် ဖြစ်၏။ တစ်စုံတစ်ခု ပြီးမြောက်သွားသည့်နောက်တွင် တစ်ခါတစ်ရံ၌ သင်က “ဤအရာကို ကျွန်ုပ် လုပ်ခဲ့ပါသည်” ဟူ၍ မိမိ၏ ဘဝင်မာန ပြေစေရုံမျှ အလောတကြီး ပြောဆိုသည်ဆိုလျှင် ယင်းသည် မည်သည့်အရာမျှမဖြစ်ချေ။ ဘုရားသခင်က ခွင့်ပြုပေလိမ့်မည်။ သင့်အနေဖြင့် မည်သို့ တွေးထင်မိသည်ဖြစ်စေ၊ သင်သည် အလုပ်ကို ပြီးစီးခဲ့ပြီ ဖြစ်သောကြောင့် ဘုရားသခင်က အမှတ်ထားပေလိမ့်မည်။ ဤသည်မှာ တရားသည် မဟုတ်လော။ အကြောင်းမှာ ဤအရာသည် သင့်အနေဖြင့် စိတ်နှလုံး၊ ရိုးသားမှုတို့ဖြင့် ပြီးမြောက်ခဲ့သောအရာတစ်ခု အမှန်ပင် ဖြစ်သောကြောင့်တည်း။ သင်သည် သင်၏ဇာတိပကတိနှင့် သင်၏ကိုယ်ပိုင် ရည်မှန်းချက်ကို ပုန်ကန်ခဲ့၏။ သင်၏တာဝန်ကို ထမ်းဆောင်ခဲ့၏၊ ဘုရားသခင်အိမ်တော်၏ အကျိုးကို မထိခိုက်စေဘဲ ဘုရားသခင်၏ တာဝန်ပေးစေခိုင်းချက်ကို ပြီးစီးခဲ့၏။ ဘုရားသခင်၏စိတ်နှလုံး ချမ်းမြေ့ရသလို၊ တစ်ချိန်တည်းတွင်ပင် သင်သည်လည်း စိတ်နှလုံး၌ ငြိမ်းချမ်းခြင်းနှင့် ဝမ်းမြောက်ခြင်းကို ခံစားရသည်။ ဤသည်မှာ ငွေဖြင့် မဝယ်ယူနိုင်သည့် ပျော်ရွှင်မှုတစ်ခု ဖြစ်သည်၊ သင်သည် သင်၏ရိုးသားမှန်ကန်မှုဖြင့် ထိုက်ထိုက်တန်တန် ရခဲ့ခြင်းဖြစ်သည်။ ယင်းသည် သမ္မာတရားကို လိုက်စားခြင်း၏ အကျိုးရလဒ် ဖြစ်သည်။ ထို့နောက် သင်က “ဤအရာအား ငါ လုပ်ခဲ့သည်ကို သင်တို့အားလုံး သိခဲ့ကြသလော” ဟု ကြွားဝါလျှင် ဘုရားသခင်က ရန်တွေ့လိမ့်မည် မဟုတ်ပေ။ သို့သော် အရေးကြီးသည့် အချိန်များအတွင်းတွင် သင်သည် အခြေခံစည်းမျဉ်းကို ထိန်းသိမ်းရမည်။ ဘုရားသခင်၏ အမျက်ဒေါသကို ဆွပေးခြင်း၊ သို့မဟုတ် သူ၏ စိတ်သဘောထားကို ပုန်ကန်ပြစ်မှားခြင်း မပြုရပေ။ အကယ်၍ သင်သည် ဤအရာကို လိုက်နာနိုင်သည်၊ အရေးကြီးသော အချိန်တိုင်းတွင် ထိုအခြေခံစည်းမျဉ်းကို မလွတ်တမ်း ဆုပ်ကိုင်ထားသည်၊ မိမိတာဝန်အား ထမ်းဆောင်ရန် အခွင့်အရေးကို အမိအရ ဖမ်းဆုပ်ထားသည်ဆိုလျှင် သင်၏ ကယ်တင်ခြင်းအတွက် မျှော်လင့်ချက် ရှိလိမ့်မည်။ အကယ်၍ သင်သည် ပုံမှန် အခြေအနေများတွင် သတိရှိသော်လည်း သင့်အနေဖြင့် ပြတ်ပြတ်သားသား ဆင်ဆင်ခြင်ခြင်ဖြင့် လုပ်ဆောင်ရန် လိုအပ်သည့် အရေးကြီးသော အချိန်များကဲ့သို့ သမ္မာတရား စည်းမျဉ်းများနှင့် သက်ဆိုင်သည့် အမှုကိစ္စများနှင့် ပတ်သက်လာသောအခါ သင်သည် သင်၏ ရည်မှန်းချက်များနှင့် ဆန္ဒများကို မထိန်းသိမ်းဘဲ သင် ကြိုက်နှစ်သက်သလို လုပ်ဆောင်၍ အသင်းတော်၏ အလုပ်ကို ကမောက်ကမ ဖြစ်စေသည်၊ အဆုံးစွန်ဖြစ်သော အခြေခံ စည်းမျဉ်းကို ထိန်းသိမ်းရန် ပျက်ကွက်လျှင် ဤသည်မှာ ဘုရားသခင်၏ စိတ်သဘောထားကို ရန်စ ဖြစ်စေလိမ့်မည်။ ဤအရာသည် အပြစ်ဒဏ်ပေးခြင်း မခံရထိုက်သလော။ အနည်းဆုံးအားဖြင့် ဘုရားသခင်၏ စိတ်သဘောထားကို ပုန်ကန်ပြစ်မှားခြင်း မပြုရ၊ ဤသည်မှာ အခြေခံစည်းမျဉ်း ဖြစ်သည်။ ဘုရားသခင်၏ အခြေခံစည်းမျဉ်းမှာ မည်သည့်အရာဖြစ်သည်၊ သင် ထိန်းသိမ်းသင့်သည့် အခြေခံစည်းမျဉ်းမှာ မည်သည့်အရာ ဖြစ်သည် ဆိုသည်ကို သင် သိရမည်။ အကယ်၍ သင်သည် အရေးကြီးသောအချိန်များတွင် ဤအခြေခံစည်းမျဉ်းကို ထိန်းသိမ်းပြီး မိမိ၏တာဝန်ကို ထမ်းဆောင်ပြီးသည့်နောက်တွင်လည်း ဘုရားသခင်က သင့်ကို ပစ်ပစ်ခါခါငြင်းခြင်းနှင့် ပြစ်တင်ရှုတ်ချခြင်း ရှိမည့်အစား သင့်အား အမှတ်ထားကာ လက်ခံလျှင် ဤသည်မှာ ကောင်းသော အလုပ်တစ်ခု ဖြစ်၏။ သင် မည်သည့်အရာကို စဉ်းစားသည်၊ သင်၏ အောင်မြင်မှုများအပေါ် သင့်ကိုယ်သင် မည်သို့ ကျေနပ်မိနိုင်သည်၊ သို့မဟုတ် ဂုဏ်ယူမိနိုင်သည် ဆိုသည်တို့ကို ဘုရားသခင်က အာရုံမစိုက်ချေ။ ဘုရားသခင်က ဤအရာများကို စိတ်မဝင်စားသည့်အပြင် သင့်ကိုလည်း အလေးအနက် ထားလိမ့်မည် မဟုတ်ပေ။ အဓိက ကျန်ရှိနေသည်မှာ သင်၏ ကိုယ်ပိုင် ပြောင်းလဲခြင်းကိစ္စသာ ဖြစ်သည်။ သင်သည် ပဓာနကျသော စည်းမျဉ်းကို အခြေအနေများ အားလုံးတွင် ဖမ်းဆုပ်ထားနိုင်သည်၊ ဘုရားသခင်၏ သတ်မှတ်ချက်များနှင့်အညီ လုပ်ဆောင်နိုင်သည်၊ အရေးကြီးသော အချိန်များတွင် သစ္စာစောင့်သိပြီး ဘုရားသခင်၏စိတ်နှလုံး ကျေနပ်အောင် လုပ်ပေးနိုင်သည်၊ သင်၏ အခြေခံစည်းမျဉ်းကိုလည်း ထိန်းသိမ်းနိုင်သည် ဖြစ်ရာ ဤအရာက မည်သည်ကို သက်သေပြသနည်း။ သင့်ထံတွင် ဘုရားသခင်ကို ကျိုးနွံနာခံခြင်း သဘောထားတစ်ခု ရှိနေကြောင်းကို သက်သေပြ၏။ သင်သည် ဘုရားသခင်ကို တစ်စိတ်တစ်ဒေသမျှ ကျေနပ်စေခဲ့ပြီဟု အထိုက်အလျောက် ဆိုနိုင်လေသည်။ ဤသည်မှာ ထိုအရာကို ဘုရားသခင်က ရှုမြင်ပုံ ဖြစ်သည်။ ဘုရားသခင်သည် ဖြောင့်မတ်သည် မဟုတ်လော။ (ဖြောင့်မတ်ပါသည်။) ထို့ကြောင့် ဤပုံစံဖြင့် လက်တွေ့ လုပ်ဆောင်သော လူများကသာ ပါးနပ်သောသူများ ဖြစ်ကြသည်။ “ဤအကြိမ်တွင် ငါသည် ငါ၏တာဝန်ကို ဘုရားသခင် ကျေနပ်စေရန် လုံလုံလောက်လောက် မထမ်းဆောင်ခဲ့ပေ။ ချို့ယွင်းချက်အချို့ ရှိခဲ့သေးသည်။ ကိုယ်တော်က ထိုအရာကို လက်မခံဘဲ နေမည်လော” ဟူ၍ မစဉ်းစားနှင့်။ ဘုရားသခင်သည် ထိုအရာနှင့်ပတ်သက်၍ အသေးစိတ် အာရုံစိုက်လိမ့်မည် မဟုတ်။ ဤအလုပ်ကို လုပ်နေချိန်တွင် သင့်ထံ၌ အခြေခံ စည်းမျဉ်းတစ်ခု ရှိမရှိကိုသာ ဘုရားသခင်က စောင့်ကြည့်လိမ့်မည်။ သင်သည် အခြေခံစည်းမျဉ်းကို မကျော်လွန်ဘဲ အလုပ်ကို ပြီးစီးနေသရွေ့ ဘုရားသခင်က အသိအမှတ်ပြုပေလိမ့်မည်။ အကယ်၍ သင်သည် မည်သည့်တာဝန်ကို ထမ်းဆောင်သည်ဖြစ်စေ၊ မည်သည့် အရာများကို လုပ်ဆောင်သည်ဖြစ်စေ၊ သမ္မာတရား စည်းမျဉ်းများကို အမြဲ ရှာဖွေနိုင်ပြီး ထူးထူးခြားခြား ခက်ခဲသော အခြေအနေများ၌ပင် အခြေခံစည်းမျဉ်းကို မကျော်လွန်ဘဲ နေလျှင် သင်သည် အမှုကိစ္စများကို လုပ်ကိုင်ပုံနှင့် တာဝန် ထမ်းဆောင်ပုံတွင် စည်းမျဉ်းနှင့်ညီလေသည်။ သင်၏ တာဝန် ထမ်းဆောင်မှုသည် အခြေခံအားဖြင့် စံနှုန်းမီသည်ဟု ဆိုနိုင်သည်။