နောက်တစ်ကြောင်းမှာ အဘယ်နည်း။ (“သင်၌ ဘုရားသခင်အတွက် ကြီးစွာသော ဆန္ဒတစ်ခုရှိကာ...အာသာငမ်းငမ်း ရှာဖွေရမည်။”) ဤအရာတို့သည် လူ့အပေါ် ဘုရားသခင် ပြုသည့် တောင်းဆိုချက်များသာ ဖြစ်သည်။ လူတို့သည် သမ္မာတရားကို နားလည်လိုပြီး ကယ်တင်ခံရလိုလျှင် ၎င်းတို့၏ စိတ်နှလုံးများက ဤအရာကို တမ်းတရမည်၊ ၎င်းတို့တွင် ထိုအရာကို လိုက်စားရန် စိတ်ပိုင်းဖြတ်ချက်ရှိရမည်ဖြစ်ပြီး စစ်မှန်သည့် တောင့်တမှုတစ်ခု ရှိရမည်။ ထို့နောက်တွင် ၎င်းတို့အနေဖြင့် ဘုရားသခင် သတ်မှတ်ထားသည့် လက်တွေ့လုပ်ဆောင်မှု လမ်းကြောင်းနှင့်အညီ လက်တွေ့လုပ်ဆောင်ပြီး ဝင်ရောက်ရမည်။ တဖြည်းဖြည်းနှင့် ဘုရားသခင်သည် ဤလူများကို သမ္မာတရား လက်တွေ့ကျမှုနှင့် မှန်ကန်ပြီး ပုံမှန်ဖြစ်သော အခြေအနေတစ်ခုထဲသို့ ဆောင်ကြဉ်းလိမ့်မည်ဖြစ်သည်။ ထိုသို့သော လူများသည် ဘုရားသခင်၏ နှုတ်ကပတ်တော်များရှိ သမ္မာတရားများကို ပိုပိုပြီး နားလည်လာကြကာ ပိုပို၍ လက်တွေ့ကျလာလိမ့်မည်။ အဆုံးတွင် ဤလူများ ပိုင်ဆိုင်သည့် မူမမှန်သော အခြေအနေများစွာ၊ ၎င်းတို့တွင် ထုတ်ဖော်ပြသည့် ဖောက်ပြန်ပျက်စီးခြင်းနှင့် ၎င်းတို့၏ ပုန်ကန်မှုတို့သည် ဘုရားသခင် စီစဉ်သည့် အမျိုးမျိုးကွဲပြားသော ပတ်ဝန်းကျင်များစွာထဲက ဘုရားအမှုတော်၏ နည်းလမ်းအမျိုးမျိုးအားဖြင့် တဖြည်းဖြည်း ဖြေရှင်းခံရလိမ့်မည်။ သို့ဆိုလျှင် သင်တို့ နားလည်သင့်သည့်အရာမှာ အဘယ်နည်း။ ဤအရာဖြစ်၏။ လူတို့ လုပ်ဆောင်သင့်သည့် အရာများ၊ ၎င်းတို့ လက်တွေ့လုပ်ဆောင်သင့်သည့် အရာများသည် ဘုရားသခင်၏ တောင်းဆိုချက်များအတိုင်း ပြီးမြောက်ရမည်ဟူ၍တည်း။ ဘုရားသခင်၏ တောင်းဆိုချက်များနှင့်အညီ လူတို့ လက်တွေ့လုပ်ဆောင်ပြီး ပြုမူသည့်အခါ ၎င်းတို့အတွက် ဘုရားသခင် ညွှန်ပြသည့် မှန်ကန်သော လမ်းကြောင်းပေါ်တွင် ၎င်းတို့ လျှောက်ကြလိမ့်မည်။ လူတို့သည် ဤမှန်ကန်သော လမ်းကြောင်းပေါ် လျှောက်ကြသည့်အခါ ဘုရားသခင်သည် သူ၏ နည်းလမ်းနှင့် သူ၏ တောင်းဆိုချက်များ၊ စည်းမျဉ်းများအားဖြင့် အချိန်တန်သည့်အခါ ၎င်းတို့အပေါ် မှန်ကန်သည့် ခွဲတမ်းကို ပေးသနားလိမ့်မည်။ ဤနေရာတွင် မည်သည့်အရာကို လူတို့ နားလည်သင့်သနည်း။ လူတို့၏ ပူးပေါင်းဆောင်ရွက်ခြင်း၊ ၎င်းတို့ ပေးသည့် အဖိုးအခနှင့် ၎င်းတို့၏ အသုံးခံမှုတို့သည် မရှိမဖြစ်ဖြစ်သည်။ လူတို့သည် ဘုရားသခင်၏ သတ်မှတ်ချက်များအတိုင်း ပြုမူကာ လက်တွေ့လုပ်ဆောင်ရမည်။ လူသား စိတ်ဆန္ဒများနှင့်အညီ၊ သို့မဟုတ် လူသား စိတ်ကူးများနှင့် အယူအဆများအရ ၎င်းတို့ မပြုမူမဆောင်ရွက်ရပေ။ မည်သည့်အဆုံးသတ် ရလဒ်ကို ရရှိသည်၊ တစ်စုံတစ်ဦး မည်မျှ ပြောင်းလဲနိုင်သည်၊ မည်မျှရရှိနိုင်သည်တို့ကို လူတစ်ဦးစီ၏ ဆန္ဒများအားဖြင့် ဆုံးဖြတ်သလော။ မဆုံးဖြတ်ပေ၊ ယင်းမှာ ဘုရားသခင်၏ ကိစ္စဖြစ်ပြီး သင်နှင့် မည်သည့် ပတ်သက်မှုမျှမရှိ။ အဆုံးတွင် ဘုရားသခင်က သင့်ကို မည်သည့်အရာပေးပြီး မည်မျှပေးသည်၊ မည်သည့်အချိန်တွင် သင့်ကို ပေးသည်၊ သင့်ကို ပေးထားသည့်အရာကို သင်ရရှိသည့် အသက်အရွယ်တို့သည် ဘုရားသခင်၏ ကိစ္စဖြစ်ပြီး သင်နှင့် မည်သည့် ပတ်သက်မှုမျှမရှိပေ။ ဤအရာတွင် ငါ၏ အဓိပ္ပာယ်မှာ အဘယ်နည်း။ ယင်းမှာ သမ္မာတရားအား လက်တွေ့လုပ်ဆောင်ခြင်းအပေါ်သာ သင် အာရုံစိုက်ရန်၊ ဘုရားသခင် သင့်ကို ပေးသည့် လမ်းကြောင်းအတိုင်း ဝင်ရောက်ရန်၊ ဖန်ဆင်းခံတစ်ဦး ပြုမူဆောင်ရွက်သင့်သည့်အရာကို ပြုမူဆောင်ရွက်ရန်နှင့် သင်လုပ်သင့်သည့် ပူးပေါင်းဆောင်ရွက်မှုကို ပေးရန်သာ လိုအပ်ခြင်း ဖြစ်သည်။ သင် မည်သည့်အရာနှင့် မည်မျှ ရရှိမည်ဆိုသည်အတွက်မူ ထိုအရာကို သင် ရရှိမည့်အချိန်နှင့် ဤကိစ္စရပ်များကို ဘုရားသခင် မည်သို့ကိုင်တွယ်မည်ဆိုသည်တို့မှာ ဘုရားသခင်၏ ကိစ္စဖြစ်ပြီး ဘုရားသခင်၏ အချိန်တွင် ဖြစ်ပွားလိမ့်မည်။ လူအချို့က “ဤအရာကို ကျွန်ုပ် လက်တွေ့လုပ်ဆောင်လျှင် အဆုံးတွင် ကျွန်ုပ် ကယ်တင်ခံရမလား”ဟု ပြောကြသည်။ ငါ့ကို ပြောလော့၊ ၎င်းတို့ ကယ်တင်ခံရနိုင်သည်ဟု သင် ထင်သလော။ လူတို့အပေါ် ဘုရားသခင် ပေးသနားပြီး ထောက်ပံ့ပေးပြီးဖြစ်သည့် ဤနှုတ်ကပတ်တော်များနှင့် သမ္မာတရားများသည် ကယ်တင်ခြင်းဆီသို့ လူ၏ လမ်းကြောင်းဖြစ်သည်။ ဘုရားသခင်၏ ဤနှုတ်ကပတ်တော်များနှင့် သမ္မာတရားများနှင့်အညီ သင် လက်တွေ့လုပ်ဆောင်ပြီး ဘုရားနှုတ်ကပတ်တော်၏ လက်တွေ့ကျမှုထဲသို့ ဝင်ရောက်ပါက သင်ကယ်တင်ခံရကောင်း ခံရမည်မဟုတ်ဟု စိုးရိမ်ရန် လိုအပ်သေးသလော။ ဘုရားသခင်က သင့်ကို စွန့်ပစ်မည်ကို ကြောက်ရွံ့သည့်အတွက် စိုးရိမ်ခြင်းနှင့် သောကဖြင့် နေ့တိုင်း သင် အချိန်ကုန်ဆုံးနေဆဲဖြစ်သလော။ ဤအရာသည် အလွန်သေးငယ်သည့် ယုံကြည်ခြင်းနှင့် ဘုရားသခင်၏ ရည်ရွယ်ချက်များကို နားလည်ရန် ပျက်ကွက်ခြင်းအားဖြင့် ဖြစ်သည် မဟုတ်လော။ သင်သည် သမ္မာတရား လက်တွေ့ကျမှုထဲသို့ အမှန်တကယ် ဝင်ရောက်ပါက၊ သင့်စိတ်နှလုံးက ငြိမ်သက်ခြင်းနှင့် ဝမ်းမြောက်ခြင်း ရှိပါက၊ စစ်မှန်သည့် အတွေ့အကြုံဆိုင်ရာ သက်သေခံချက် သင်ပေးနိုင်ပြီး သင်၏ စိတ်နှလုံးတွင် ဘုရားသခင်နှင့် ပုံမှန် ဆက်ဆံရေးတစ်ခု ရှိနိုင်ပါက သင် ကယ်တင်ခံရလိမ့်မည်မဟုတ်ဟု သင်စိုးရိမ်လိမ့်ဦးမည်လော။ မစိုးရိမ်နှင့်၊ ထိုအရာသည် သင်၏ ကိစ္စမဟုတ်။ သင့်အနေဖြင့် ဘုရားနှုတ်ကပတ်တော်များကိုသာ လက်တွေ့လုပ်ဆောင်ပြီး ဝင်ရောက်သင့်၏။ ဘုရားနှုတ်ကပတ်တော်တွင် အရေးမကြီးသည့် စာကြောင်းမရှိပေ။ ဘုရားနှုတ်ကပတ်တော်တစ်ခုလုံးသည် သမ္မာတရားဖြစ်ပြီး သမ္မာတရားသည် လူက ရှိသင့်သည့် အသက်ဖြစ်၏။ ဘုရားနှုတ်ကပတ်တော်တစ်ခုလုံးသည် ကယ်တင်ခြင်းရရှိရန် လူတို့ လိုအပ်ပြီး ပိုင်ဆိုင်သင့်သောအရာ ဖြစ်သည်။ လက်တွေ့လုပ်ဆောင်မှုဖြင့် ဤဘုရားနှုတ်ကပတ်တော်များကို သင်လိုက်လျှောက်သော်လည်း သင် ကယ်တင်ခံရလိမ့်မည်မဟုတ်ဟု စိုးရိမ်နေဆဲဖြစ်ပါက သင်သည် စဉ်းစားဉာဏ်မရှိသကဲ့သို့ မသိနားမလည်ဖြစ်သလော။ သင်သည် အလွန်တရာပင် ပူတတ်ရန်ကော။ ထိုသို့သော အသုံးမကျသည့် အတွေးများကို လက်သင့်ခံနေသည့်အစား ဘုရားသခင်၏ ရည်ရွယ်ချက်များကို သင် ထောက်ထားမှုပြလျှင် သင်သည် သာ၍ ပျော်ရွှင်ရပေမည်။ မှန်ကန်သည့် လမ်းကြောင်းကို သင် လျှောက်နေလျှင် သင် ရောက်ရှိမည့် နောက်ဆုံး ခရီးပန်းတိုင်သည် ဧကန်မုချ မှန်ကန်သည့်အရာတစ်ခု၊ သင့်အတွက် ဘုရားသခင် သတ်မှတ်ထားသည့် ခရီးပန်းတိုင်ဖြစ်လိမ့်မည်။ သင်သည် လမ်းမှားသွားလိမ့်မည် မဟုတ်။ ထို့ကြောင့် ဘုရားသခင်၏ တောင်းဆိုချက်များကို သင်လက်တွေ့လုပ်ဆောင်ပြီး ဝင်ရောက်ပါက သင်ကယ်တင်ခံရခြင်း ရှိမရှိဆိုသည့်အပေါ် စိုးရိမ်ရန် မလိုအပ်ပေ။ ဘုရားသခင် ညွှန်ပြသည့် ကယ်တင်ခြင်း လမ်းကြောင်းကိုသာ လက်တွေ့လုပ်ဆောင်ပြီး လိုက်စားလော့၊ ယင်းသည် မှန်ကန်သည့် လမ်းခရီးဖြစ်၏။ လူအချို့က “ကယ်တင်ခြင်း ရရှိရန်မှာ မည်သည့်အရာကဲ့သို့ ခံစားရလိမ့်မည်နည်း။ လေထဲတွင် ကျွန်ုပ်တို့ လွင့်မျောနေသကဲ့သို့ ခံစားရလိမ့်မည်လား။ ယခု ငါတို့ ခံစားပုံနှင့် မတူဘဲ ခံစားရလိမ့်မည်လား”ဟု ဆိုကြသည်။ ဤမေးခွန်းသည် အနည်းငယ် ဆန္ဒစောလွန်း၏။ ဤသည်မှာ သင်ယခုသိရှိရန် လိုအပ်သည့်အရာတစ်ခု မဟုတ်။ သင်အမှန်တကယ် ကယ်တင်ခံရသည့်အခါ သိလိမ့်မည်။ လူအချို့က “ကျွန်ုပ် ကယ်တင်ခံရသည့်အခါ ယောဘထံ ပေါ်လာခဲ့သကဲ့သို့ ဘုရားသခင်သည် ကျွန်ုပ်ထံ ပေါ်လာမည်လား”ဟု ဆိုကြသည်။ ဤသည်မှာ ကျိုးကြောင်းသင့်သော တောင်းဆိုမှုတစ်ခုလော။ ဤအတွက် မတောင်းဆိုနှင့်။ သင် ကယ်တင်ခံရမည်လားဆိုသည်ကို သင်မသိသေးသောကြောင့် ဤတောင်းဆိုချက် ပြုခြင်းသည် မည်သည့်အကျိုး ရှိသနည်း။ လုံးဝ မရှိပေ။ ဥပမာအားဖြင့် သင်သည် လတ်တလောတွင် မူလတန်းတက်နေသည်ဟု ဆိုပါစို့။ သင်၏ အတန်းအားလုံးတွင် အမှတ်ကောင်းကောင်းရခြင်းနှင့် သင့်ဆရာ၏ သတ်မှတ်ချက်များအား ဖြည့်ဆည်းခြင်းအပေါ် အာရုံစိုက်သင့်သည်။ “အနာဂတ်တွင် မည်သည့် တက္ကသိုလ်သို့ ကျွန်ုပ် သွားလိမ့်မည်နည်း။ နောက်ပိုင်း ဘဝတွင် မည်သည့်အလုပ်မျိုးကို ငါ ရှိမည်နည်း”ဟူသည့် အရာနှင့်ပတ်သက်၍ အမြဲ မတွေးဆနှင့်။ ထိုအရာများကို စဉ်းစားခြင်းသည် အချည်းနှီးဖြစ်၏။ အလွန်အလှမ်းဝေးပြီး လက်တွေ့မကျချေ။ မှန်ကန်သည့် နည်းစနစ်များနှင့် လမ်းကြောင်းများထဲသို့ သင် လက်တွေ့လုပ်ဆောင်ပြီး ဝင်ရောက်သရွေ့ နောက်ဆုံး ရည်မှန်းချက်ပန်းတိုင်ကို သင်ဧကန်မုချ စွမ်းဆောင်ရရှိနိုင်လိမ့်မည်။ ထို့အပြင် ဘုရားသခင်၏ လမ်းပြမှုဖြင့် မည်သည့်အရာကို သင်စိုးရွံ့နေဆဲဖြစ်သနည်း။ ဘုရားသခင်သည် သင်၏ အနန္တတန်ခိုးရှင်ဖြစ်သည်ဟု သင် ယုံကြည်သလော။ (ယုံကြည်ပါသည်။) ဘုရားသခင်သည် အနန္တတန်ခိုးရှင် ဖြစ်သောကြောင့် သင်ကဲ့သို့ သေးငယ်သည့် လူတစ်ဦးကို ကယ်တင်ရန် ဘုရားသခင်အတွက် ခက်ခဲသလော။ ဘုရားသခင်အတွက် တစ်လောကလုံးကို ယူပြီး သင့်ကို ပေးရန်မှာ ခက်ခဲသည့် အလုပ်ဖြစ်မည်မဟုတ်။ ထို့ကြောင့် သေးငယ်သော ဖောက်ပြန်ပျက်စီးသည့် လူသားတစ်ဦးကို ကယ်တင်ရန် အဘယ်သို့ ခက်ခဲနိုင်မည်နည်း။ ထို့ကြောင့် သင်သည် စိုးရိမ်သောကရောက်ရန် လိုအပ်သေးသလော။ ဘုရားသခင်က သင့်ကို ကယ်တင်နိုင်ခြင်း ရှိမရှိဆိုသည်ကို မစိုးရိမ်နှင့်၊ ဘုရားနှုတ်ကပတ်တော်များက သင့်ကို ကယ်တင်နိုင်ခြင်း ရှိမရှိဆိုသည်ကို မစိုးရိမ်နှင့်။ ထို့ထက် ဘုရားနှုတ်ကပတ်တော်များကို သင် နားလည်နိုင်ခြင်း ရှိမရှိနှင့် ဘုရားနှုတ်ကပတ်တော်များ၌ လက်တွေ့လုပ်ဆောင်မှု လမ်းကြောင်းတစ်ခု သင် ရှာတွေ့နိုင်ခြင်း ရှိမရှိဆိုသည့်အရာနှင့် ပတ်သက်၍ သင် စိုးရိမ်သင့်ပေသည်။ ယခုတွင် သင်သည် ဘုရားနှုတ်ကပတ်တော်များ၏ လက်တွေ့ကျမှုထဲသို့ ဝင်ရောက်ပြီးခြင်း ရှိမရှိနှင့် သင်၏ လုပ်ရပ်များတွင် သင်သည် ဘုရားသခင် ညွှန်ပြပြီးဖြစ်သည့် လမ်းကြောင်းကို လျှောက်နေခြင်း ရှိမရှိဆိုသည့်အကြောင်းကို သင် စိုးရိမ်သင့်သည်။ ယင်းသည် များစွာ သာ၍ ကောင်းမွန်၏။ ဤအရာများကို စဉ်းစားခြင်းသည် လက်တွေ့ကျပြီး စစ်မှန်၏။ အခြားတစ်ခုတလေနှင့်ပတ်သက်၍ စိုးရိမ်ရန်မှာ အချည်းနှီးဖြစ်သည်။

နောက်တစ်ကြောင်းမှာ အဘယ်နည်း။ (“စာတန်၏ ဆင်ခြေများ၊ ရည်ရွယ်ချက်များနှင့် လှည့်ကွက်များကို ငြင်းပယ်လျက်။”) ဤစာကြောင်းကို ယခုတင် ငါတို့ မိတ်သဟာယပြုပြီး ဖြစ်သောကြောင့် ဤပြဿနာကို ဖြေရှင်းရန် လွယ်ကူရပေမည်။ အချိန်အများစုတွင် “စာတန်၏ ဆင်ခြေများ၊ ရည်ရွယ်ချက်များနှင့် လှည့်ကွက်များ”သည် လူ၏ ဖောက်ပြန်ပျက်စီးသော စိတ်သဘောထားက ဖြစ်ပေါ်စေသည့် အမျိုးမျိုးသော အကြောင်းပြချက်များ၊ ဆင်ခြေများ၊ ရည်ရွယ်ချက်များနှင့် လှည့်ကွက်များအပြင် သင် ထိတွေ့ဆက်ဆံလာရသည့် ဆိုးယုတ်သော လူများနှင့် မယုံကြည်သူများ အသုံးပြုသော နည်းလမ်းများမှ အရင်းခံကြောင်းကို နားလည်ရန်သာ လူအတွက် လိုအပ်ပေသည်။ ထိုသို့သော အရာများကို သင် မည်သို့ ပိုင်းခြားပြီး ငြင်းပယ်ရမည်ဆိုသည့်အရာနှင့် သင်ပြုလုပ်သင့်သည့် ရွေးချယ်မှုများအတွက်မူ ယင်းမှာ သင်၏ ကိုယ်ရေးကိုယ်တာ လိုက်စားမှုဖြစ်သည်။ နောက်တစ်ကြောင်းကို ဖတ်လော့။ (“စိတ်မပျက်လေနှင့်။ အားမလျော့လေနှင့်။ သင့်စိတ်နှလုံး အကြွင်းမဲ့ဖြင့် ရှာဖွေလော့၊ သင့်စိတ်နှလုံး အကြွင်းမဲ့ဖြင့် စောင့်မျှော်လော့။”) ဤစာကြောင်းအကြောင်းကိုလည်း ကျွန်ုပ်တို့ ယခုတင် အသေးစိတ် မိတ်သဟာယပြုပြီး ဖြစ်သည်။ လူအတွက် စာကြောင်းတိုင်းသည် သတိပေးခြင်းနှင့် သတိပေးချက်တစ်ခု ဖြစ်ပြီး တစ်ချိန်တည်းတွင် အားပေးမှု၊ အကူအညီနှင့် ထောက်ပံ့မှုမျိုးတစ်ခု ဖြစ်သည်။ ဤစကားများတွင် လူသားမျိုးနွယ်အတွက် ဘုရားသခင်၏ ရည်ရွယ်ချက် ပါရှိပြီး လူသားမျိုးနွယ်အတွက် အလျှံပယ်သော သူ၏ မျှော်လင့်ချက်ကို သယ်ဆောင်သည်မှာ အမှန်ဖြစ်၏။ လူတို့သည် အားနည်းချက်နှင့် အခက်အခဲများ ကြုံရသည့်အခါ ၎င်းတို့ စိတ်ပျက်အားလျော့၍ မျှော်လင့်ချက် ဆုံးရှုံးကာ ယုံကြည်ခြင်း ပျောက်ဆုံး၍ သမ္မာတရားနှင့် ကယ်တင်ခြင်း လိုက်စားရန် ၎င်းတို့၏ စိတ်ပိုင်းဖြတ်ချက် ပျောက်ဆုံးပြီး သမ္မာတရား ရရှိရန်နှင့် ဘုရားသခင်၏ စုံလင်အောင်ပြုခြင်း ခံရရန် အခွင့်အရေး ဆုံးရှုံးသည်ကို ဘုရားသခင် မမြင်လိုပေ။ လူတို့အား သူရဲဘောကြောင်သူများဖြစ်ရန် ဘုရားသခင် အလိုမရှိပေ။ ထိုအစား အခက်အခဲ မည်မျှ လူတို့ ကြုံရသည်ဖြစ်စေ၊ ၎င်းတို့ မည်မျှအားနည်းသည်ဖြစ်စေ၊ ၎င်းတို့တွင် ရှိသည့် ဖောက်ပြန်ပျက်စီးခြင်းကို မည်မျှ ထုတ်ဖော်ပြသည်ဖြစ်စေ ၎င်းတို့အနေဖြင့် လုံးဝ လက်လျှော့မည်မဟုတ်ဟုလည်းကောင်း၊ လုံးဝ မဆုတ်မနစ် ကြိုးပမ်းလိမ့်မည်ဟုလည်းကောင်း၊ သမ္မာတရားကို ဆက်လက် လိုက်စားကြလိမ့်မည်ဟုလည်းကောင်း၊ ၎င်းတို့၏ လိုက်စားမှုတွင် ၎င်းတို့အတွက် ဘုရားသခင် ညွှန်ပြသည့် လက်တွေ့လုပ်ဆောင်မှု လမ်းကြောင်းများကို လိုက်လျှောက်ကြလိမ့်မည်ဟုလည်းကောင်း၊ ဘုရားသခင်အတွက် ကြီးစွာသော ဆန္ဒရှိသည့် စိတ်နှလုံးတစ်ခု ရှိကြလိမ့်ဦးမည်ဟုလည်းကောင်း သူမျှော်လင့်လေသည်။ ဘုရားသခင်၌ လူတို့၏ ယုံကြည်ခြင်းသည် အတွေ့အကြုံနှင့်အတူ၊ ဘုရားနှုတ်ကပတ်တော်များအပေါ် ၎င်းတို့၏ သိနားလည်မှုနှင့်အတူ တိုး၍ ကြီးထွားသင့်ပြီး အားနည်းသည့်အခါ ၎င်းတို့ နောက်ပြန်မဆုတ်သင့်၊ အခက်အခဲများ ကြုံရသည့်အခါ အပျက်သဘောမဆောင်လာသင့်၊ ပြီးလျှင် ၎င်းတို့အနေဖြင့် ဖောက်ပြန်ပျက်စီးခြင်း အနည်းငယ် ထုတ်ဖော်ပြသည့်အခါ ရှေ့ဆက်တိုးမည့်အစား ရှိုက်ငိုပြီး နောက်တွန့်ခြင်း မပြုသင့်ကြပေ။ ဤကဲ့သို့သော သရုပ်သကန်များကို ဘုရားသခင် မမြင်လိုပေ။ လူတို့အနေဖြင့် သူ၏ စိတ်တော်နှင့် တညီတညွတ်တည်း ဖြစ်မည်ဟုလည်းကောင်း၊ ဤအပိုင်းတွင် အချိန်၊ ပတ်ဝန်းကျင်၊ ရုပ်ပိုင်းဆိုင်ရာ တည်နေရာ၊ သို့မဟုတ် ဖြစ်ပေါ်နိုင်သည့် အခြေအနေတစ်ခုခုကို အကြောင်းပြ၍ ပြောင်းလဲခြင်းမရှိဖို့ကိုလည်းကောင်း ဘုရားသခင် မျှော်လင့်သည်။ ဘုရားသခင်ကို ရှာဖွေရန်ဖြစ်သော သင်၏ စိတ်ဆန္ဒမပြောင်းလဲသကဲ့သို့ ဘုရားသခင်ကို ရှာဖွေရာတွင် သင်၏ ဇွဲလုံ့လ မလျော့နည်းပါက ဘုရားသခင်သည် ဤအရာများကို မြင်လိမ့်မည်ဖြစ်ကာ သင်၏ ရိုးသားစစ်မှန်သည့် စိတ်နှလုံးကို မြင်ကာ သိလိမ့်မည်။ အဆုံးတွင် သင့်အပေါ် ဘုရားသခင် ပေးသနားမည့်အရာသည် သင် တောင်းဆိုနိုင်သမျှ သို့မဟုတ် စဉ်းစားတွေးတောနိုင်သမျှထက် ဧကန်မုချ ကျော်လွန်လိမ့်မည်။ ဘုရားသခင်၏ အချုပ်အခြာအာဏာကို ယောဘ တွေ့ကြုံခဲ့သည့် ဆယ်စုနှစ်များအတွင်းတွင် ဘုရားသခင်က သူ့ကို စကားပြောမည်၊ သို့မဟုတ် ကိုယ်တော်တိုင် သူ့ထံ ပေါ်ထွန်းမည်ဟု သူ လုံးဝ စိတ်မကူးဝံ့ခဲ့ပေ။ ထိုအရာကို သူလုံးဝ စိတ်မကူးဝံ့ခဲ့သော်လည်း သူ၏ နောက်ဆုံး စမ်းသပ်မှုပြီးသည့်နောက်တွင် ဘုရားသခင်သည် လေပွေတစ်ခုမှ သူ့ကို ကိုယ်တိုင်ကိုယ်ကျ စကားပြောဆိုရင်း သူ့ထံ အမှန်တကယ် ပေါ်ထွန်းခဲ့သည်။ ဤသည်မှာ လူက တောင်းဆိုနိုင်သမျှထက် ကျော်လွန်သည် မဟုတ်လော။ (ဟုတ်ပါသည်။) ဤသည်မှာ တစ်စုံတစ်ဦးက တောင်းဆိုနိုင်သည့် မည်သည့်အရာမဆိုထက် ကျော်လွန်ပြီး ထိုစိတ်ကူးကို မည်သူမျှက လက်သင့်ပင်မခံဝံ့ကြချေ။ ဘုရားသခင် မည်သည့်အရာကို လုပ်ဆောင်သည်ဖြစ်စေ လူသည် မိမိ၏ မှန်ကန်သည့် နေရာတွင် ရပ်တည်ရမည်၊ မိမိ လုပ်သင့်သည့်အရာကို လုပ်ရမည်၊ လျှောက်သင့်သည့် လမ်းကြောင်းကို လျှောက်ရမည်၊ သူ့အပေါ် တောင်းဆိုသည့်အရာထက် ကျော်လွန်၍မလုပ်ဆောင်ဘဲ သူ့ကို ပေးထားသည့် တာဝန်များကို လုပ်ဆောင်သင့်ပြီး ဘုရားသခင် စက်ဆုပ်သည့်အရာများ လုပ်ဆောင်ခြင်းမှ ရှောင်ကြဉ်သင့်သည်။ ဘုရားသခင်အပေါ် သင် အလွန်များစွာ တောင်းဆိုနေမိကြောင်း၊ သင်၏ တောင်းလျှောက်မှုများက ရည်မှန်းချက်များနှင့် လိုအင်ဆန္ဒများအပြင် ဆင်ခြင်တုံတရားကင်းမဲ့ခြင်း၏ ရလဒ်ဖြစ်ကြောင်း၊ သင်ခံစားရသည့်အခါတိုင်းတွင်၊ ဘုရားသခင်ရှေ့မှောက်သို့ သင်ချက်ချင်းလာရမည်၊ သူ့ရှေ့တွင် မိမိကိုယ်ကို ပျပ်ဝပ်ကာ သင်၏ အပြစ်များကို ဝန်ချရမည်။ သင်သည် လှိုက်လှိုက်လှဲလှဲ နောင်တရကာ သင့်ကိုယ်သင် ပြောင်းလဲရမည်။ ဤသည်မှာ လူသားမျိုးနွယ်အပေါ် ဘုရားသခင် တောင်းဆိုသည့်အရာဖြစ်ပြီး သူ့နောက်လိုက်ကာ သမ္မာတရားကို ချစ်သောသူတိုင်းအတွက် သူမျှော်လင့်သည့်အရာ ဖြစ်သည်။

ဤစာပိုဒ်နှင့်ပတ်သက်၍ ငါတို့၏ မိတ်သဟာယကို ဤနေရာတွင် ငါတို့ အဆုံးသတ်ကြမည်။ အလွန်များသည့် မိတ်သဟာယပြုပြီးနောက်တွင် ဆုံးမသွန်သင်သင့်သည့်အရာကို ငါ ဆုံးမသွန်သင်ပြီးဖြစ်ကာ လူ နားလည်ရန်အတွက် သင့်တင့်လျောက်ပတ်သောအရာကို သင်တို့အား နားလည်စေပြီးဖြစ်သည်။ ဤမိတ်သဟာယမျိုးသည် ဘုရားနှုတ်ကပတ်တော်များကို မည်သို့ ဖတ်ရှုရမည်ဆိုသည်ကို သင်တို့အား ပြောပြရန်၊ ဘုရားနှုတ်ကပတ်တော်များကို ဖတ်ရှုရမည့် နည်းလမ်းအား သင်တို့ကို သွန်သင်ပေးရန်နှင့် ဘုရားနှုတ်ကပတ်တော်ရှိ မည်သည့်စာပိုဒ်ကိုမျှ အချည်းနှီး ပြောဆိုထားခြင်း မရှိသည်ကို အားလုံး သိစေရန် ရည်ရွယ်ပေသည်။ ထိုနှုတ်ကပတ်တော်အားလုံးသည် ဘုရားသခင်၏ ရည်ရွယ်ချက်များနှင့် ပြည့်နေပြီး ဘုရားသခင်၏ မျှော်လင့်ချက်များကို သယ်ဆောင်သည်။ ဤသို့ ရှုမြင်သည့်အခါ ဘုရားနှုတ်ကပတ်တော်အားလုံးသည် နက်နဲသည်ဖြစ်စေ၊ ရိုးရှင်းသည်ဖြစ်စေ လူက ပိုင်ဆိုင်သင့်ပြီး လိုက်နာစောင့်ထိန်းသင့်သည့် အရာများ ဖြစ်သည်။ ရိုးရှင်းသည့် နှုတ်ကပတ်တော် အနည်းငယ်သာ လူတို့ လိုက်နာအသင့်ဆုံးသော လက်တွေ့လုပ်ဆောင်မှု စည်းမျဉ်းများ ပါရှိသော်လည်း ဤသည်ကို မည်သူမျှ မဖြစ်မြောက်ကြချေ။ မည်သူကမျှ ဤဘုရားနှုတ်ကပတ်တော် အနည်းငယ်ကို အရေးထားမှုတစ်ခုမျှ မရှိသကဲ့သို့ ထိုနှုတ်ကပတ်တော်များအတွက် မည်သူကမျှ အလေးထားမှုတစ်ခုတလေ မရှိချေ။ ငါ့ကို ပြောလော့၊ လူသည် မည်မျှ ထုံထိုင်းသနည်း။ စင်စစ်အားဖြင့် ထုံထိုင်းသည်ဆိုသည်မှာ စကားအလှသုံး၍ ပြောခြင်းဖြစ်သည်။ အမှန်တွင် ၎င်းတို့အားလုံးသည် ဤစကားများကို အထင်သေးပြီး မြင်ရန် သို့မဟုတ် ဖတ်ရှုရန် ဆန္ဒမရှိကြသည်မှာ လူ၏ အကန့်အသတ်မဲ့ မာနထောင်လွှားမှုကြောင့် ဖြစ်သည်။ မည်သည့်အရာကို ၎င်းတို့ ဖတ်လိုကြသနည်း။ နက်နဲကာ မြင့်မြတ်သည့် ဒဿနိကဆိုင်ရာနှင့် စနစ်ကျသော စကားလုံးများကို ဖတ်လိုကြ၏။ ထိုအဆင့်မြင့်ပြီး နက်နဲသော စကားများအကြောင်း မပြောလေနှင့်။ ဤရိုးရှင်းသည့် စကားအနည်းငယ်ကို လူတို့ နားလည်နိုင်လျှင် အတော်လုံလောက်ပေသည်။ ဤစကားများသည် ရိုးရှင်းပုံရကာ ဖတ်သောသူ မည်သူမဆိုက နားလည်နိုင်သော်လည်း မည်သူသည် ထိုစကားများကို အမှန်တကယ် လက်တွေ့လုပ်ဆောင်သနည်း။ မိမိတို့ထံ ဖြစ်ပျက်သည့် အရာများကို ဘုရားရှေ့မှောက်သို့ မည်သူက အမှန်တကယ် ယူဆောင်ပြီး ဆုတောင်းနိုင်သနည်း။ ဖြေရှင်းချက်များအတွက် စိတ်မရှည်ဖြစ်ခြင်း မရှိဘဲ မည်သူသည် ဘုရားသခင်၏ အချိန်ကို စောင့်ဆိုင်းသနည်း။ ဤအရာကို လူမည်မျှက လက်တွေ့လုပ်ဆောင်နိုင်သနည်း။ ယခုထက်ထိတိုင် ဤဘုရားနှုတ်ကပတ်တော်များကို လိုက်နာပြီး လက်တွေ့လုပ်ဆောင်ပြီးသူ မည်သူကိုမျှ ငါ မတွေ့သေးသကဲ့သို့ ဤစကားများကို စိတ်ဝင်စားသည့်သူ၊ ဘုရားနှုတ်ကပတ်တော်များက မည်မျှ လှိုက်လှိုက်လှဲလှဲဖြစ်သည်၊ ရိုးသားစစ်မှန်ပြီး တန်ဖိုးရှိသည်ကို တွေ့မြင်ပြီးနောက်တွင် ယင်းတို့ကို တန်ဖိုးထားပြီးဖြစ်သည့်သူ တစ်ဦးမျှလည်း ငါ မတွေ့သေးချေ။ ယခုတွင်ပင် ဤဓမ္မတေးသီချင်း သင်တို့ ဖွင့်နေသည်ကို ကြားသည့်အခါ ဤဘုရားနှုတ်ကပတ်တော်အပိုဒ်အား မည်သို့ စားသောက်ခဲ့ကြသည်ကို သင်တို့ကို ငါ မေးခဲ့သည်။ တစ်ဦးတလေက ဆုတောင်းရင်းဖြင့် ဖတ်ရှုခြင်းမှတစ်ဆင့် ဤလွယ်ကူကာ အပိုအလိုမရှိဘဲ ရိုးစင်းသော စကားများမှ ဘုရားသခင်၏ ရည်ရွယ်ချက်ကို ရှာဖွေတွေ့ရှိပြီးပြီလော။ လူက နားလည်ပြီး ဝင်ရောက်သင့်သည့် လက်တွေ့လုပ်ဆောင်မှု လမ်းကြောင်းကို ရှာတွေ့ရန်အလို့ငှာ ထိုနှုတ်ကပတ်တော်များကို တစ်ဦးတလေက ဆုတောင်းရင်းဖြင့် ဖတ်ရှုပြီးပြီလော။ တစ်ဦးတလေက ထိုနှုတ်ကပတ်တော်များမှ သမ္မာတရား တစ်ခုတလေကို နားလည်ပြီလော။ ငါ မေးနေသည့်အရာမှာ ထိုနှုတ်ကပတ်တော်များတွင် ပါရှိသည့် သမ္မာတရားသည် လူတစ်ဦးစီ၌ အကျိုးဖြစ်ထွန်းလေပြီလော။ ထိုနှုတ်ကပတ်တော်များသည် သက်ရောက်မှုတစ်ခု ရှိခဲ့ကြပြီလော။ အမှန်တကယ် မရှိသေးကြောင်း ငါတို့၏ မိတ်သဟာယက ပြသပြီးဖြစ်သည်။ သင်တို့၏ ဝိညာဉ်ရင့်ကျက်မှုက အလွန် နည်းပါးလွန်း၏။ ဤနှစ်ကာလများတစ်လျှောက် ဘုရားသခင် ပြောဆိုထားသည့် နှုတ်ကပတ်တော်အများစုသည် သင်တို့၏ စိတ်နှလုံးများတွင် အမှန်တကယ် အမြစ်တွယ်ခြင်း မရှိသေးသည့်ပုံရသည်။ ထိုနှုတ်ကပတ်တော်များကို သမ္မာတရားများအဖြစ် သင်တို့ တန်ဖိုးထားသည့် အဆင့်ကို သင်တို့ မရရှိသေးပေ။ ဤသည်မှာ ကောင်းမွန်သည့် နိမိတ်မဟုတ်။ ကောင်းမွန်သည့် လက္ခဏာတစ်ခု မဟုတ်ပေ။ လူအချို့က “ကျွန်ုပ်တို့သည် နေ့စဉ်နေ့တိုင်း ကျွန်ုပ်တို့၏ တာဝန်များကို ထမ်းဆောင်ရင်း အလွန် အလုပ်များကြသည်။ ဘုရားနှုတ်ကပတ်တော်များကို ဆင်ခြင်ရန် အချိန်မရှိပါ”ဟု ဆိုကြသည်။ အမှန်တွင် ၎င်းတို့ အချိန်မရှိကြခြင်း မဟုတ်၊ အားထုတ်မှုမပြုကြခြင်း သို့မဟုတ် အာရုံမစိုက်ကြခြင်း ဖြစ်သည်။ တစ်စုံတစ်ဦးသည် မည်သည့်တာဝန်ကို ထမ်းဆောင်သည်ဖြစ်စေ ထိုအရာက မိမိတို့ စိတ်နှလုံးတွင် ဘုရားနှုတ်ကပတ်တော်များကို ဆင်ခြင်ပုံအား ထိခိုက်နိုင်သလော။ စားသောက်ကာ အနားယူနေစဉ်တွင် ဘုရားနှုတ်ကပတ်တော်များကို ၎င်းတို့ ဆင်ခြင်၍မရနိုင်သလော။ အားလုံးက ၎င်းတို့ လိုအင်ဆန္ဒ ရှိမရှိဆိုသည့်အပေါ် တည်မှီသည်။ အလွန်အလုပ်များခြင်းသည် စိတ်ကျေနပ်ရသည်ဟု လူတို့ တွေးထင်ကြသည်။ အမှန်တွင် စဉ်းစားရန် အားလပ်ချိန်ရှိသည့်အခါတွင် သင်၏ စိတ်နှလုံးတွင် ဘုရားနှုတ်ကပတ်တော်တစ်ခုကိုမျှ သင် အမှန်တကယ် လုံးဝ ဆင်ခြင်ခြင်းမရှိဖူးသေးကြောင်းကို သဘောပေါက်လိမ့်မည်။ သင်သည် မည်သည့်အရာကိုမျှ ထိန်းသိမ်းခြင်း မရှိသေးသကဲ့သို့ ထိုနှုတ်ကပတ်တော်များသည် သင့်ဘဝ၏ လမ်းညွှန်နှင့် သင်၏ လက်တွေ့လုပ်ဆောင်မှုအတွက် စံ ဖြစ်မလာသေးပေ။ ဤအရာကို သင် သုံးသပ်ဆင်ခြင်သည့်အခါတွင် အရှက်ရလိမ့်မည်။ သင်၏ အလုပ်များခြင်းသည် သင့်ကို လှည့်ဖြားသည့် အတွေးမှားတစ်ခုသာ ဖြစ်သည်။ ထိုအရာက ဘုရားသခင်၌ သင်၏ ယုံကြည်ခြင်းကြောင့် သင်၏ ဘဝသည် အနှစ်မဲ့ခြင်းထက် ပြည့်ဝမှုရှိကြောင်း၊ သင်သည် လောကီ လူများနှင့် ကွာခြားကြောင်း၊ လောက၏ ရေပန်းစားမှုများနောက် သင်မလိုက်ကြောင်း သင့်ကို ခံစားရစေသည်။ ထို့ထက် သင်သည် တရားအမျှတဆုံးသော လူများထဲတွင်ရှိသည်၊ သင်သည် တရားမျှတသည့် လုပ်ဆောင်ချက်များကို လုပ်ဆောင်လျက် ဘုရားသခင်၏ အမှုတော်တွင် ပူးပေါင်းဆောက်ရွက်နေသည်ဟူ၍ ခံစားစေသည်။ သင်သည် ကယ်တင်ခံရပြီးသားဖြစ်သည်၊ သို့မဟုတ် ကယ်တင်ခြင်း လမ်းပေါ်သို့ အစပြုနှင့်ပြီးဖြစ်သည်ဟု သင် ခံစားရသည်။ လူအချို့သည် ၎င်းတို့က အောင်မြင်သောသူများ ဖြစ်ပြီးသားဖြစ်သည်ဟု တွေးထင်သည်အထိပင် ခံစားကြသည်။ ဤအရာအားလုံးကို ထောက်ဆသော် ထိုသို့ ရိုးရှင်းသည့် ဓမ္မတေးသီချင်းတစ်ပုဒ်နှင့် ရိုးရှင်းသည့် ဘုရားနှုတ်ကပတ်တော် အနည်းငယ်၊ ဘုရားသခင် ဖော်ပြသည့် အစောဆုံး နှုတ်ကပတ်တော်များအပေါ် ဤသဘောထားမျိုးကိုပင် သင်တို့ ခံယူကြလေသည်။ မည်သူကမျှ ဤစကားများတွင် မည်သည့်အရာကိုမျှ မရရှိသေး သို့မဟုတ် မည်သည့် ဉာဏ်အလင်းပေးမှုကိုမျှ ရှာမတွေ့သေးပေ၊ သို့မဟုတ် မည်သည့်နည်းဖြင့်မျှ ထိုနှုတ်ကပတ်တော်များကို လက်တွေ့လုပ်ဆောင်ခြင်း မရှိသေးချေ။ မိမိတို့ကိုယ်တိုင်အတွက် အကျိုးတစ်ခုတလေ သို့မဟုတ် ရလဒ်များတစ်ခုတလေ ရရှိပြီးသူ တစ်ဦးမျှကို ငါ မမြင်ရပေ။ ဤသည်မှာ ကောင်းသည့်အရာတစ်ခုလော၊ သို့မဟုတ် ဆိုးသည့်အရာတစ်ခုလော။ (ဆိုးသည့်အရာတစ်ခု ဖြစ်ပါသည်။) ဤနှစ်ကာလများအတောအတွင်းတွင် သင်တို့၏ တာဝန်များကို မအားမလပ် သင်တို့ ထမ်းဆောင်နေခဲ့ကြပြီးဖြစ်ကာ အထူးသဖြင့် ဧဝံဂေလိ အလုပ်နှင့် မိမိကိုယ်ကို အလုပ်များစေလျက် ရှိကြပြီးဖြစ်သည်။ အချို့သော အောင်မြင်မှုများကို သင်တို့ ရရှိပြီးဖြစ်ကာ သင်တို့ စိတ်နှလုံးအားလုံးက ဝမ်းမြောက်ပျော်ရွှင်ခဲ့ကြသည်။ တစ်နည်းမဟုတ် တစ်နည်းဖြင့် ဘုရားသခင်၏ နှုတ်ကပတ်တော်နှင့် ဧဝံဂေလိအလုပ်သည် ပျံ့နှံ့ပြီးဖြစ်သည်။ နိုင်ငံနှင့် ဒေသတိုင်းရှိ လူတို့ထံ ဘုရားနှုတ်ကပတ်တော်ကို ယူဆောင်ပြီးဖြစ်ကာ ပိုများသည့် လူတို့က ဘုရားနှုတ်ကပတ်တော်ကို စားသောက်နေကြသည်။ အပေါ်ယံအနေဖြင့် သင်တို့သည် အောင်မြင်မှု စွမ်းဆောင်ရရှိပြီး ဖြစ်ပုံရသော်လည်း သင်၏ ကယ်တင်ခြင်းဖြစ်သည့် ဘဝတွင် ကြီးမားသည့် ကိစ္စရပ်အကြောင်းကို သင်တို့ တစ်ခုတလေ သိကြပါသလော။ ဤဘုရားနှုတ်ကပတ်တော်အပိုဒ်အပေါ် လူတို့ထားသည့် သဘောထားမှ အကဲဖြတ်သည့်အခါ သင်တို့ မသိကြချေ။ ဒေသ အသုံးအနှုန်းတစ်ခု သုံးရလျှင်၊ ပထမဆုံးသော ဆေးချက် မထင်သေးပေ။ ငါ့ကို ပြောလော့၊ သင်တို့အားလုံး ဤသို့ဖြစ်သည်ကို မြင်ရသဖြင့် ငါသည် အဘယ်သို့ ခံစားရသနည်း။ ရိုးရှင်းသည့် စကားအနည်းငယ်သာ ဖြစ်သော်လည်း ထိုစကားများကို သင်တို့အား အသေးစိတ်ဖော်ပြရှင်းလင်းပြီး ဆွေးနွေးရန် ငါ လိုအပ်ဆဲဖြစ်သည်။ ငါ၏ စကားများသည် ပြည့်စုံစေ့စပ်ပြီး အသေးစိတ်ကျလွန်း၏။ သင်တို့ နားထောင်ရန် လိုလားလျက်ရှိကြသလော။ ငါ နားပူနားဆာ လုပ်လွန်းသည်ဟု သင်တို့ ပြောကြလိမ့်မည်လော။ ငါသည်လည်း ဤသို့ နားပူနားဆာ မလုပ်လို။ သင်တို့အားလုံး တည်ကြည်ဖြောင့်မတ်ကြပုံရသည်။ သင်တို့အားလုံးသည် ဉာဏ်နှင့် အသိပညာ အနည်းငယ် ရှိကြပြီး သင်တို့အများစုက ကျွမ်းကျင်မှုတစ်ခု ရှိကြသည်။ ထိုသို့ဖြစ်လျက်ပင် ဤဓမ္မတေးသီချင်း၏ စကားအနည်းငယ်ကို သင်တို့ အလေးဂရုပြုခြင်း တစ်ခုတလေ မရှိကြသကဲ့သို့ နှလုံးမသွင်းကြလေပြီ။ ယခုထက်ထိတိုင် ဤစကားများ၏ လက်တွေ့ကျမှုထဲသို့ လူတစ်ဦးမျှ မဝင်ရောက်သေး။ ယင်းမှာ အမှန်တကယ် ဒုက္ခပေးသည့်အရာနှင့် ဒေါသထွက်စရာတစ်ခု ဖြစ်ပါတကား။ သို့ဆိုလျှင် အသင်းတော်တွင် သင်တို့ လုပ်ဆောင်သည့် အလုပ်အားလုံး၏ အဓိပ္ပာယ်မှာ အဘယ်နည်း။ ဤသည်မှာ ပေါလုက “ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည်ခြင်းတရားကို စောင့်ရှောက်ပြီ။ ယခုမှစ၍ ဓမ္မသရဖူသည် ငါ့အဘို့သိုထားလျက်ရှိ၏။” ဟု ဆိုခဲ့ချိန်တွင် သူ ပြောနေခဲ့သည့် ရည်မှန်းချက်ပန်းတိုင်အတွက် ဖြစ်သလော။ ဤသည်မှာ အမှန်တကယ် ရည်မှန်းချက်ပန်းတိုင်ဖြစ်လျှင် သင်တို့အားလုံးသည် ပေါလုများဖြစ်ကြပြီး ဖြစ်လာမည့်အရာက မကောင်းနိုင်ပေ။ ထိုသို့ဖြစ်သလော။ (ဟုတ်ပါသည်။) ဘုရားနှုတ်ကပတ်တော်များကို စားသောက်ရာတွင် သင် မကြိုးစားပါက အနှေးနှင့်အမြန်ဆိုသလို သင် ဖယ်ရှားရှင်းလင်းခံရလိမ့်မည်ဖြစ်ပြီး ထိုအရာက သင့်ကို မည်သည့်အရာမျှ ရရှိစေလိမ့်မည် မဟုတ်။ သင် ဖယ်ရှားရှင်းလင်းခံရသည့်နေ့တွင် သင်က “မည်သည့်အရာကို ငါ ရရှိပြီးပြီနည်း”ဟု ပြောလိမ့်မည်။ အမှုအရာတစ်ခုမျှ သင် မရရှိသေးသောကြောင့် သင်သည် လုံးဝအရှက်ရပြီး သေပင်သေလိုက်ချင်တော့သည်။ ထိုအရာမှာ အလွန် သနားစဖွယ်ဖြစ်၏။ ကိစ္စရပ်များအားလုံးအပေါ် ပြောဆိုလျက် ဘုရားနှုတ်ကပတ်တော်များသည် ကြွယ်ဝပြီး အလျှံပယ်ဖြစ်သည်။ ထိုနှုတ်ကပတ်တော်များ လိုက်စားခြင်းကို သင် လုံးဝ နှလုံးမသွင်းသေးသည်မှာ၊ ဘုရားနှုတ်ကပတ်တော်များကို သင် မည်သည့်အခါတွင်မျှ လုံးဝ လေးလေးနက်နက် မဖတ်ရှုသေးသည်မှာ စိတ်မကောင်းစရာပါတကား။ ဘုရားနှုတ်ကပတ်တော်များစွာထဲမှ စာတစ်ကြောင်းမျှ သင်၏ စိတ်နှလုံးတွင် နေရာမရှိပေ။ သင် ဖယ်ရှားရှင်းလင်းခြင်း မခံရပါက မည်သူ ဖယ်ရှားရှင်းလင်းခံရဖွယ် ရှိနိုင်မည်နည်း။ ဤသည်မှာ အခြေအနေများ ဖြစ်တည်သည့်ပုံစံ မဟုတ်လော။ (ဟုတ်ပါသည်။) ဘုရားနှုတ်ကပတ်တော်များကို စားသောက်ခြင်း၊ ဘုရားသခင်၏ နှုတ်ကပတ်တော်များကို သင်၏ လက်တွေ့ကျမှု ဖြစ်စေခြင်း။ ယင်းမှာ အရေးကြီးသော ကိစ္စတစ်ခု ဖြစ်သည်။ အခြားမည်သည့်အရာမဆိုထက် အရေးကြီးသည်၊ နောက်မျိုးဆက်ကို ပေါက်ဖွားစေခြင်းထက် အရေးကြီးသည်၊ မိမိတာဝန်ကို လုပ်ဆောင်ခြင်းထက် အရေးကြီးသည်၊ အတတ်ပညာဆိုင်ရာ ကျွမ်းကျင်မှုတစ်ခုကို သင်ယူခြင်းထက် အရေးကြီးသည်၊ ဧဝံဂေလိ ဖြန့်ဝေရန် အလုပ်လုပ်ခြင်းထက် အရေးကြီးသည်၊ အခြားအရာအားလုံးထက် အရေးကြီးပေသည်။ သင်သည် ဘုရားနှုတ်ကပတ်တော်များ၏ လက်တွေ့ကျမှုထဲသို့ ဝင်ရောက်ခြင်းမရှိသေးပါက၊ မည်သည့်တာဝန်များကို သင် ထမ်းဆောင်သည်ဖြစ်စေ၊ မည်မျှဝေးဝေး သင် ပြေးသည်ဖြစ်စေ၊ ထိုအရာအားလုံး တန်ဖိုးရှိလိမ့်မည် မဟုတ်။ အဆုံးတွင် မည်သည့် ရလဒ်မျှ သင် ရရှိလိမ့်မည်မဟုတ်သကဲ့သို့ သင် လုပ်ဆောင်သမျှအားလုံး အချည်းနှီးဖြစ်လာလိမ့်မည်။ ယခုတွင် သင်သည် မည်မျှ ပြင်းထန်စွာ ပြေးနေသည်ဖြစ်စေ သင်၏ လက်ရှိ အနေအထားကို ပဓာနမထားဘဲ သင် လုပ်နေသည့် အလုပ် သို့မဟုတ် မည်သည့် ကြီးကျယ်ခမ်းနားသော အောင်မြင်မှုများ သင် ပြုလုပ်ပြီးသည်ဖြစ်စေ၊ နောက်ဆုံးတွင် မြင်ကွင်းမှ ပျောက်ကွယ်သွားမည့် မီးခိုးငွေ့ပါးပါးတစ်ခုသာ ဖြစ်သည်။ လူတစ်ဦးသည် ဘုရားနှုတ်ကပတ်တော်များ၏ လက်တွေ့ကျမှုထဲသို့ ဝင်ရောက်သည့်အခါတွင်သာ ထိုနှုတ်ကပတ်တော်တွင် ပါရှိသည့် သမ္မာတရားကို ရရှိပြီး ဘုရားနှုတ်ကပတ်တော်များ၌ လက်တွေ့လုပ်ဆောင်မှု စည်းမျဉ်းများ၊ လမ်းကြောင်းများနှင့် ဦးတည်ချက်များ ရှာတွေ့သည့်အခါတွင်သာ ဤအရာများကို ၎င်းတို့ထံမှ မည်သူကမျှ ယူဆောင်မသွားနိုင်ပေ။ သမ္မာတရား ဤလက်တွေ့ကျမှုများထဲသို့ ၎င်းတို့ ဝင်ရောက်ပြီးသည့်အခါတွင်သာ မိမိတို့၏တာဝန်များကို ထမ်းဆောင်ခြင်းနှင့် ၎င်းတို့ ပေးဆပ်သည့် အဖိုးအခအားလုံးတို့သည် အဓိပ္ပာယ်ရှိကာ တန်ဖိုးရှိလိမ့်မည်ဖြစ်သည်။ ထိုအခါတွင်မှ ထိုအရာသည် ဘုရားသခင်၏ လက်ခံခြင်းခံရလိမ့်မည်။ ဘုရားနှုတ်ကပတ်တော်၏ လက်တွေ့ကျမှုထဲသို့ သင် ဝင်ရောက်ပြီး သင် လုပ်ဆောင်သမျှတိုင်း၌ ဘုရားနှုတ်ကပတ်တော် တောင်းဆိုသည့် စည်းမျဉ်းများနှင့် စံနှုန်းများကို လက်တွေ့လုပ်ဆောင်ပြီးသည့်နောက်တွင် သင်၏ တာဝန်သည် အချည်းနှီး ထမ်းဆောင်ထားခြင်း မဟုတ်သကဲ့သို့ ထိုတာဝန်၏ တစ်စိတ်တစ်ပိုင်းက ဘုရားသခင်၏ လက်ခံခြင်းခံရလိမ့်မည်။ သင်တို့ နားလည်ကြသလော။ (နားလည်ပါသည်။) သင်သည် ဆင်းရဲဒုက္ခခံပြီး အဖိုးအခပေးရန် သင်၏ တစ်ကိုယ်‌ရေ မိမိကိုယ်ကို ချုပ်တည်းခြင်း၊ လူသား ဇွဲလုံ့လ၊ လူသား ဉာဏ်နှင့် ဆုကျေးဇူးများ၊ ပြီးလျှင် လူသားနည်းလမ်းများနှင့် နည်းစနစ်များအပေါ်သာ မှီခိုပါက သင် လုပ်ဆောင်သမျှသည် ဘုရားနှုတ်ကပတ်တော်များနှင့် မည်သို့မျှ မပတ်သက်ပေ။ နောက်ဆုံးရလဒ် ဖြစ်မည့်အရာသည် သင့်အဖို့ ရှင်းလင်းသိသာနေသင့်သည်။ လူများစွာတို့သည် ၎င်းတို့၏ ငွေရေးကြေးရေး ဖြစ်တည်မှုများနှင့် ကုန်ကျစရိတ် အကျိုးအမြတ် ဖြစ်တည်မှုများကို စောင့်ကြည့်မှတ်တမ်းတင်နိုင်ကြသော်လည်း ဤဖြစ်တည်မှုကိုမူ စောင့်ကြည့်မှတ်တမ်းတင်မည့်သူ တစ်ဦးမျှ မရှိပေ။ အပြင်ပန်း အရေးကိစ္စများကို ကိုင်တွယ်ရာတွင် သင် အတော်လေး ဉာဏ်ရည်ဉာဏ်စွမ်းရှိပုံရသည်၊ သင့်ထံတွင် သင်၏ နည်းလမ်းများနှင့် နည်းစနစ်များရှိပြီး အတော်လေး လိမ္မာပါးနပ်သော်လည်း ဘုရားသခင်၌ သင်၏ ယုံကြည်ခြင်းနှင့် ကယ်တင်ခြင်း ကိစ္စရပ်နှင့် ဘုရားနှုတ်ကပတ်တော်များကို မည်သို့ သဘောထားရမည်ဆိုသည့် ကိစ္စရပ်များကို မည်သို့မျှ လုံးဝ အာရုံစိုက်ခြင်းမရှိဘဲ သင် လျစ်လျူရှုမိပြီး ဖြစ်သည်။ အာရုံစိုက်မှု ကင်းမဲ့ခြင်းအားဖြင့် ဘုရားသခင် တောင်းဆိုသည့် ပညတ်ချက်ကို သင် ရှောင်ရှားနိုင်မည်ဟု တွေးထင်ခဲ့သလော။ အားထုတ်မှု အနည်းငယ်ဖြင့် သင်သည် ကံကောင်းပြီး ဘုရားသခင်၏ တရားမျှတသည့် တရားစီရင်ခြင်းကို လွတ်မြောက်နိုင်မည်ဟု သင် တွေးထင်ခဲ့သလော။ မိမိကိုယ်ကို မလှည့်ဖြားနှင့်။ လူက ဖန်တီးသည့် ဥပဒေများအားလုံးသည် လူသား အသိပညာနှင့် ထိုးထွင်းအမြင်များ၏ ရလဒ်ဖြစ်သည်။ အားလုံးက လူသား လိမ္မာပါးနပ်မှုဖြစ်သည်။ ထိုအရာများသည် ဘုရားသခင်၏ ဖြောင့်မတ်သော စိတ်သဘောထားက ဖြစ်ပေါ်စေသည့် ဥပဒေများ မဟုတ်ပေ။ သင်၏ ကယ်တင်ခြင်းနှင့် ပတ်သက်လာသည့်အခါ ကံနှင့်ဆိုင်သော စိတ်နေစိတ်ထားကို မခံယူနှင့်။ သင်သည် မိမိကိုယ်ကိုသာ လှည့်ဖြားနိုင်သည်၊ ဘုရားသခင်ကို မလှည့်ဖြားနိုင်ပေ။

ကယ်တင်ခြင်း လိုက်စားမှုတွင် သင် လုပ်ဆောင်သင့်သည့် ပထမဆုံး ကြီးမြတ်သော အရာမှာ အဘယ်နည်း။ သမ္မာတရားကို သင် နားလည်ကာ ထိုသမ္မာတရား၏ လက်တွေ့ကျမှုထဲသို့ ဝင်ရောက်ရန်အလို့ငှာ ဘုရားနှုတ်ကပတ်တော်များကို စားသောက်လော့။ ဤသည်မှာ ပထမဆုံး ကြီးမြတ်သော အရာဖြစ်သည်။ သင်၏ တာဝန်ကို လုပ်ဆောင်ရာတွင် သင် မည်မျှ အလုပ်များသည်ဖြစ်စေ၊ မည်မျှ များပြားသည့်အလုပ်ကို သင် ပုံထားပါစေ၊ ဘုရားနှုတ်ကပတ်တော်များကို စားသောက်ဖို့၊ ထိုနှုတ်ကပတ်တော်များတွင် အရာခပ်သိမ်း၌ သမ္မာတရားကို လက်တွေ့လုပ်ဆောင်ခြင်းအတွက် စည်းမျဉ်းများနှင့် လမ်းကြောင်းများကို ရှာကာ သမ္မာတရား လက်တွေ့ကျမှုထဲသို့ ဝင်ရောက်ဖို့ သင် အချိန်ယူရဦးမည်ဖြစ်သည်။ ဤသည်မှာ ဘုရားသခင်၌ ယုံကြည်ခြင်း၏ တစ်ခုတည်းသော ရည်မှန်းချက် ဖြစ်သည်။ သမ္မာတရား လက်တွေ့ကျမှုထဲသို့ သင် ဝင်ရောက်ပြီး လက်တွေ့လုပ်ဆောင်ခြင်း စည်းမျဉ်းများကို သင် ရရှိပြီးသည်နှင့်တစ်ပြိုင်နက် သင် လုပ်ဆောင်သမျှတိုင်းသည် သင့်တာဝန်ကို စိတ်ကျေနပ်ဖွယ် ထမ်းဆောင်မှုဖြစ်လိမ့်မည်ဖြစ်ပြီး ထိုအရာသည် တန်ဖိုးရှိကာ အဓိပ္ပာယ်ရှိလာလိမ့်မည်။ သို့မဟုတ်လျှင် သင် လုပ်ဆောင်သမျှသည် အလုပ်လုပ်ပေးခြင်း ဖြစ်ပြီး သင်သည် သင်၏ တာဝန်ကို ထမ်းဆောင်နေခြင်း မရှိပေ။ ဤအလုပ်လုပ်ပေးခြင်းကလည်း သင့်ကို ကယ်တင်ရန် ကူညီပေးလိမ့်မည် မဟုတ်။ ဘုရားနှုတ်ကပတ်တော်များကို သင် မစားသောက်ပါက၊ ဘုရားနှုတ်ကပတ်တော်များကို လက်တွေ့လုပ်ဆောင်ခြင်းနှင့် တွေ့ကြုံခြင်း မရှိပါက၊ သမ္မာတရား လက်တွေ့ကျမှုထဲသို့ ဝင်ရောက်ခြင်းအား လေးနက်သည့် တစ်စုံတစ်ရာအဖြစ် သဘောထားခြင်း မရှိသကဲ့သို့ သမ္မာတရား လက်တွေ့လုပ်ဆောင်ခြင်းကို အလေးမထားဘဲ မိမိဘာသာ အားထုတ်ရုံမျှဖြင့်လည်းကောင်း၊ အမှုအရာများကို လုပ်ဆောင်ခြင်းမျှဖြင့်လည်းကောင်း စိတ်ကျေနပ်ပါက သင်သည် လူနုံလူအတစ်ဦး ဖြစ်မည် မဟုတ်လော။ လူတိုင်းက မိမိတို့ တော်တတ်ပြီး မိမိတို့အလုပ်တွင် အားကိုးရသည်ဟု တွေးထင်ကြသည်။ “ယခုတွင် ဤနေရာ၌ ငါရှိသဖြင့် ဤအလုပ် ကောင်းစွာ ပြီးမည်မှာ သေချာသည်။ သတိထားကြည့်ရန် ဤနေရာတွင် ငါ ရှိနေသရွေ့ မည်သည့်အရာကမျှ အသင်းတော်၏ အလုပ်ကို အဖျက်အမှောင့်လုပ်လိမ့်မည် မဟုတ်ပါ။ ငါ မပျင်းရိသရွေ့၊ ဘုရားအိမ်တော်တွင် ငါ၏တာဝန်ကို ဆက်ထမ်းဆောင်နေသရွေ့ ငါ ကယ်တင်ခံရလိမ့်မည်”ဟူ၍ ဖြစ်သည်။ မိမိကိုယ်ကို အရူးမလုပ်နှင့်။ တစ်စုံတစ်ဦးသည် မိမိတာဝန်ကို စဉ်ဆက်မပြတ် ထမ်းဆောင်သရွေ့ ကယ်တင်ခံရလိမ့်မည်ဟု ဘုရားသခင် လုံးဝ မပြောခဲ့ပေ။ ဤသည်မှာ လူ၏ ကိုယ်ပိုင် စိတ်ကူးနှင့် ဖြစ်လိုသည့် အတွေးမှ လာပေသည်။ ဤအရာကို ပြောဆိုသောသူတို့သည် မိမိတို့ကိုယ်ကို လုံးဝ မသိကြသကဲ့သို့ လူက စာတန်၏ ဖောက်ပြန်ပျက်စီးစေခြင်းခံရသည့် နက်ရှိုင်းမှု၏ အနှစ်သာရနှင့် အမှန်တရားကို ၎င်းတို့ နားမလည်ကြချေ။ ဤသည်မှာ ထိုသို့သော မိုက်မဲသည့် စကားများကို ၎င်းတို့ ပြောနိုင်ရသည့် အကြောင်းရင်း ဖြစ်သည်။ ခေတ်ကာလများအားလုံး တစ်လျှောက်တွင် ဘုရားသခင်၏ နောက်လိုက်များအားလုံးသည် မိမိတို့တာဝန်များကို လုပ်ဆောင်နေခဲ့ကြသည် မဟုတ်လော။ ၎င်းတို့ ကယ်တင်ခံခဲ့ရကြသလော။ မခံခဲ့ရပေ။ ၎င်းတို့သည် ကောင်းကင် နိုင်ငံတော်ထဲသို့ ဝင်ရောက်ရန် အရည်အချင်း ပြည့်မီကြသလော။ မပြည့်မီကြပေ။ ဘုရားသခင်၏ နောက်ဆုံးသော ကာလ တရားစီရင်ခြင်း အမှုတော်သည် လူ၏ ဖောက်ပြန်ပျက်စီးခြင်း အမှန်တရားကို ရှင်းလင်းစွာ ဖော်ထုတ်ပြီး ဖြစ်သည်။ ဤအရာက လူတိုင်းကို နားလည်ခွင့်ပေးသည်၊ လမ်းကြောင်းပြောင်းခွင့်ပေးပြီး သမ္မာတရားကို ရရှိခွင့်ပေးကာ တကယ့် ပြောင်းလဲမှုများကို ကြုံလျက် ထိုသမ္မာတရား၏ လက်တွေ့ကျမှုထဲသို့ ဝင်ရောက်ခွင့်ပေးလေသည်။ ဤသည်မှာ လူ့ထံမှ ဘုရားသခင် တောင်းဆိုသည့်အရာ ဖြစ်သည်။ သင်သည် မိမိတာဝန်ကို စဉ်ဆက်မပြတ် ထမ်းဆောင်ခြင်းအပေါ်သာ အာရုံစိုက်လျှင် စစ်မှန်သည့် ပြောင်းလဲမှုကို ရရှိနိုင်သလော။ သမ္မာတရားကို ရရှိနိုင်သလော။ ဘုရားသခင်ကို ကျိုးနွံနာခံခြင်းအား ရရှိနိုင်သလော။ အခွင့်အလမ်းမရှိပေ။ အလွန်အရေးပါသော အရာမှာ အကြင်သူသည် ဘုရားသခင်၏ ရည်ရွယ်ချက်များနှင့် ကိုက်ညီရန်အလို့ငှာ သမ္မာတရားကို လိုက်စားရမည်၊ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို ကျိုးနွံနာခံပြီး သမ္မာတရားကို ရရှိရမည်ဖြစ်သည်။ ဤစကားများကို ပြောဆိုရာတွင် ဘုရားသခင်သည် မိမိကိုယ်ပိုင် နှလုံးသွေးဖြင့် အဖိုးအခပေးပြီး သူ၏ အသက်ကို လူအတွက် ပေးကမ်းလေသည်။ ဘုရားနှုတ်ကပတ်တော်များကို မည်သည့်အခါတွင်မျှ လေးနက်စွာ သဘောမထားဘဲလျက် ထိုအရာများကို သင် ချစ်ခင်မြတ်နိုးခြင်းမရှိဘဲ သင်၏ စိတ်နှလုံးတွင် အမြဲ လျစ်လျူရှုကာ အထင်သေးပါက သင် ကယ်တင်ခံရနိုင်သလော။ အဆုံးသတ် ရလဒ်က ကောင်းဖွယ်ရှိနိုင်သလော။ ထိုအရာနှင့်ပတ်သက်၍ သင် စဉ်းစားရန်ပင် မလိုအပ်ပေ။ ဘုရားသခင်ကို သင် ယုံကြည်သည့်အခါ ပထမဆုံး ကြီးမြတ်သည့်အရာမှာ အဘယ်နည်း။ သမ္မာတရားကို နားလည်ရန် ဘုရားနှုတ်ကပတ်တော်များကို စားသောက်ခြင်းဖြစ်ပြီး ဤအရာအားဖြင့် နှောင့်နှေးခြင်း မရှိဘဲ သမ္မာတရား လက်တွေ့ကျမှုထဲသို့ ဝင်ရောက်ရန် ဖြစ်သည်။ သင့်အနီးဝန်းကျင်တွင် ဖြစ်ပျက်နေသည့်အရာ သင် မြင်ကာ ခံစားနိုင်သည့်အရာဖြင့် အစပြုလော့။ မိမိကိုယ်ကို ပြန်လည်သုံးသပ်ရန်၊ သမ္မာတရားကို ရှာဖွေပြီး ပြဿနာအားလုံးကို ဖြေရှင်းကာ စစ်မှန်သည့် ပြောင်းလဲမှုများ ရရှိရန် ဘုရားနှုတ်ကပတ်တော်များကို အသုံးပြုလော့။ သင်သည် ဘုရားနှုတ်ကပတ်တော်များကို စားသောက်ခြင်း မရှိသကဲ့သို့ ဘုရားနှုတ်ကပတ်တော်များ၏ လက်တွေ့ကျမှုထဲသို့ ဝင်ရောက်ခြင်းမရှိပါက သင်၏ ကယ်တင်ခံရမည့် အခွင့်အရေးသည် သုညဖြစ်၏။ သင်သည် ကယ်တင်ခြင်းနှင့်ဆိုင်သည့် အခွင့်အလမ်းတစ်ခုတလေကို လုံးဝ အဆုံးခံရပြီးဖြစ်သည်။ ဘုရားသခင်၏ အမှုတော် အဆုံးသတ်သည့်အခါ သင်က “ယခင် ဧဝံဂေလိ ဖြန့်ဝေသည့် အလုပ် အတောအတွင်းတွင် ကျွန်ုပ်၏ ကဏ္ဍကို ကျွန်ုပ် လုပ်ဆောင်ခဲ့သည်။ ဧဝံဂေလိ ဖြန့်ဝေသည့် အလုပ်အတောအတွင်းတွင် ထိုထိုသော အရေးကြီးသည့် အဆင့်တွင် ကျွန်ုပ် အဖိုးအခပေးပြီး ကျွန်ုပ်၏ အချိန်နှင့် အားထုတ်မှုတို့ကို ဆက်ကပ်မြှုပ်နှံခဲ့သည်”ဟု ပြောလိမ့်မည်။ သို့တိုင် ထိုနေ့ရက်ထိ သင်သည် သမ္မာတရားကို မရရှိဘဲ ရှိနေဆဲဖြစ်သည်။ ဘုရားသခင်၏ နှုတ်ကပတ်တော်များကို ပုံမှန် သင် စားသောက်နိုင်ခြင်း မရှိသကဲ့သို့ သင်၏ တာဝန်ကို ပုံမှန် မထမ်းဆောင်နိုင်ပေ။ အခြေခံအားဖြင့် သင်သည် ဘုရားသခင်ကို ကျိုးနွံနာခံသည့်လူတစ်ဦး မဟုတ်ပေ။ ထိုအခါတွင်မှ သင်သည် မိမိ၏ ကယ်တင်ခြင်း အခွင့်အလမ်း လက်လွှတ်လိုက်ရပြီး ဖြစ်သည်ကို သိလိမ့်မည်။ ထိုအရာမှာ အလွန်နောက်ကျနှင့်ပြီ မဟုတ်လော။ သင်သည် မည်သည့် အခွင့်အလမ်းမျှမရှိ၊ ကပ်ဘေးထဲသို့ ကျဆင်းနှင့်ပြီး ဖြစ်သောကြောင့် သင်၏ သေခြင်းက ဖြစ်အံ့ဆဲဆဲ ဖြစ်သည်။ ထို့ကြောင့် ကယ်တင်ခြင်း၌ရှိသော ဤအခွင့်အလမ်းသည် အလွန် ရှားပါးသကဲ့သို့ နေ့တိုင်းနှင့် မိနစ်တိုင်းကို သင် မြတ်နိုးတန်ဖိုးထားရမည်။ သင့်အနီးဝန်းကျင်ရှိ သေးငယ်သည့်အရာများနှင့် ဦးစွာ အစပြုပြီးနောက် သာ၍များသော အရာများနှင့် သာ၍ ကြီးမားသော အရာများကို တဖြည်းဖြည်း လုပ်ဆောင်လော့။ ဘုရားနှုတ်ကပတ်တော်များနှင့် သမ္မာတရားကို ရှာဖွေပြီး ဘုရားနှုတ်ကပတ်တော်များနှင့် သမ္မာတရား လက်တွေ့ကျမှုထဲသို့ ဝင်ရောက်လော့။ သင်၏ စိတ်နှလုံးဖြင့် ဘုရားသခင်ထံ သင် မကြာခဏ ဆုတောင်းပြီး သူ့ထံ ချဉ်းကပ်သင့်သည်။ သင်၏ စိတ်နှလုံးကို ဇာတိပကတိ၏ လိုအင်များ၊ လောကီ၏ ရေပန်းစားမှုများနှင့် အခြား ထိုသို့သော စာတန်ဆန်သော အရာများ၏ သိမ်းပိုက်နေရာယူခြင်းကို အခွင့်မပေးနှင့်။ ထိုအစား ဘုရားနှုတ်ကပတ်တော်များနှင့် သမ္မာတရားအား သင်၏ စိတ်နှလုံးတွင် တန်ခိုးအာဏာ စွဲကိုင်ခွင့်ပေးလော့။ ပြီးလျှင် သင်၏ စိတ်နှလုံးသည် ဘုရားနှုတ်ကပတ်တော်များကို စတင် တန်ဖိုးထားလိမ့်မည်။ ဘုရားနှုတ်ကပတ်တော်များနှင့် သမ္မာတရားက သင့်စိတ်နှလုံးတွင် နေရာတစ်ခု ထိန်းသိမ်းပြီး သင်၏ ဘဝကို ဦးဆောင်လမ်းပြသရွေ့ သင်၏ ဘဝသည် ရည်မှန်းချက်ပန်းတိုင်တစ်ခုနှင့် လမ်းပြမည့် အလင်းတစ်ခု ရှိလိမ့်မည်ဖြစ်ပြီး သင်၏ စိတ်နှလုံးက ပျော်ရွှင်မှုကို သိရှိလိမ့်မည်။ သင်သည် ဘုရားနှုတ်ကပတ်တော်များထဲမှ စကားသုံးခွန်း၊ ထို့နောက် စကားငါးခွန်း နားလည်ကာ ထို့နောက်တွင် စကားဆယ်ခွန်း၊ ထို့နောက် စကားအခွန်းတစ်ရာကို သိနားလည်ပါက ဤစကားများက စုပုံလာလိမ့်မည်ဖြစ်ကာ တဖြည်းဖြည်းနှင့် ဘုရားနှုတ်ကပတ်တော်များသည် သင်၏ စိတ်နှလုံးကို ပိုပိုပြီး နေရာယူလာလိမ့်မည်၊ သင်၏ စဉ်းစားတွေးခေါ်မှုများကို ဦးဆောင်လမ်းပြလိမ့်မည်၊ သင်၏ လုပ်ရပ်များကို ဦးဆောင်လမ်းပြလိမ့်မည်ဖြစ်ပြီး သင့်ဘဝကို ဦးဆောင်လမ်းပြလိမ့်မည်။ သင်သည် သာ၍သာ၍ ဘုရားနှုတ်ကပတ်တော်များ၏ လက်တွေ့ကျမှုထဲသို့ ဝင်ရောက်လိမ့်မည်ဖြစ်ပြီး ပိုပိုများသည့် သမ္မာတရား စည်းမျဉ်းများကို သင် သဘောပေါက်လာလိမ့်မည်။ သင်၏ လုပ်ရပ်များသည် သင်၏ ကိုယ်ပိုင် အလိုဆန္ဒများနှင့် တစ်ဦးချင်း လိုအင်များအပေါ် အခြေခံတော့မည် မဟုတ်ပေ။ သင်၏ တာဝန်ကို သင် ထမ်းဆောင်ရာတွင် ရောနှောသည့် မသန့်စင်မှုများ နည်းသည်ထက် နည်းသွားလိမ့်မည်ဖြစ်ပြီး ဘုရားသခင်ကို တိုး၍ စစ်မှန်သော နှလုံးသားဖြင့် သင် ဆက်ဆံလိမ့်မည်။ တဖြည်းဖြည်းချင်းဖြင့် သင် နားလည်သည့် အယူဝါဒများသည် သမ္မာတရား လက်တွေ့ကျမှုများအဖြစ်သို့ ပြောင်းလဲသွားလိမ့်မည်။ ဤသို့ဖြင့် သင်၏ အသက်စိတ်သဘောထားတွင် စစ်မှန်သည့် ပြောင်းလဲမှုတစ်ခု ရှိလိမ့်မည်။ သင်၏ ကယ်တင်ခြင်း မျှော်လင့်ချက်သည် နည်းပါးတော့မည်မဟုတ်၊ မမြင်သာအောင် ဖြစ်တော့မည်မဟုတ်ဘဲ တိုး၍ မြင်နိုင်စရာဖြစ်ပြီး ကြီးမားလာလိမ့်မည်။ ဤအလင်းကို သင် မြင်နိုင်သည့်အခါ ဤသည်မှာ အမှန်တကယ်ပင် ဘုရားနှုတ်ကပတ်တော်၌ စိတ်ပါဝင်စားမှုတစ်ခုကို သင် စတင်ရရှိပြီး ကယ်တင်ခြင်း ကိစ္စရပ်တွင် ကြီးမားသည့် မျှော်လင့်ချက်တစ်ခု ရင်းနှီးမြှုပ်နှံသည့် အချိန်ကာလ ဖြစ်သည်။ ထိုသို့သော အချိန်တွင် ဘုရားသခင်သည် သင့်ကို သူ၏ နှုတ်ကပတ်တော်များအား ပိုပိုပြီး နားလည်ခွင့်ပေးလိမ့်မည်။ သူ၏ နှုတ်ကပတ်တော်များထဲသို့ ဝင်ရောက်ခွင့်ပေးလိမ့်မည်၊ စုံစမ်းနှောင့်ယှက်ခြင်းထဲသို့ မကျရောက်စေရန် သင့်ကို ကွယ်ကာပေးလိမ့်မည်၊ စာတန်၏ ကျော့ကွင်းများနှင့် အမှောင်စွမ်းအားထဲသို့ ကျဆင်းခြင်းမှ သင့်ကို ကွယ်ကာလိမ့်မည်ဖြစ်ပြီး အနှောင်အဖွဲ့များ၊ သဘောထားကွဲလွဲမှုများ၊ မနာလိုမှုများနှင့် အငြင်းပွားမှုများမှ၊ အခြားသော အရာများအလယ်မှ သင့်ကို ကွယ်ကာပေးလိမ့်မည်။ ဤသို့ဖြင့် ဘုရားသခင်သည် သင့်ကို အလင်းတွင် အသက်ရှင်စေလိမ့်မည်ဖြစ်ပြီး သူ့နှုတ်ကပတ်တော်များ၏ လမ်းပြမှုအောက်တွင် အသက်ရှင်စေလိမ့်မည်။ ဤသည်မှာ ပျော်ရွှင်ခြင်း၊ ဝမ်းမြောက်ခြင်းနှင့် ငြိမ်သက်ခြင်း ဖြစ်သည်။ ဤအရာအားလုံးကို ပြီးမြောက်ခြင်းသည် ဘုရားနှုတ်ကပတ်တော်များကို တန်ဖိုးထားခြင်းနှင့် သမ္မာတရားကို သိနားလည်ရန် ဘုရားနှုတ်ကပတ်တော်များကို လက်တွေ့လုပ်ဆောင်ခြင်းနှင့် တွေ့ကြုံခြင်းတို့ဖြင့် အစပြု၏။ အမှန်တွင် ထိုအရာမှာ မခက်ခဲပေ။ သင်သည် တရားဒေသနာများကို မကြာခဏ နားထောင်ပြီး ဘုရားနှုတ်ကပတ်တော်များကို လက်တွေ့လုပ်ဆောင်ကာ တွေ့ကြုံနိုင်ပါက သမ္မာတရားကို သင် တဖြည်းဖြည်း နားလည်လာလိမ့်မည်။ ဤသို့ဖြင့် တဖြည်းဖြည်း တစ်ကြိမ်တွင် အနည်းငယ် ကူးပြောင်းရင်းနှင့် နည်းနည်းချင်း ရှေ့ဆက်ရင်း သင် အခက်တွေ့လိမ့်မည်မဟုတ်။ အဓိကအရာမှာ သမ္မာတရားကို ချစ်ခြင်း ရှိမရှိဖြစ်သည်။ သင်သည် သမ္မာတရားကို ချစ်ပါက ဘုရားသခင်၌ ယုံကြည်ခြင်းဖြင့် သင်သည် မှန်ကန်သော ကိစ္စရပ်များကို အာရုံစိုက်လုပ်ဆောင်နိုင်လိမ့်မည်၊ သမ္မာတရားအတွက် ကြိုးပမ်းနိုင်လိမ့်မည်ဖြစ်ပြီး၊ ဘုရားနှုတ်ကပတ်တော်များကို ဖတ်ရှုခြင်းနှင့် တွေးဆခြင်းတို့အပေါ် အာရုံစိုက်နိုင်လိမ့်မည်။ ဘုရားနှုတ်ကပတ်တော်များကို တွေးဆရန် သင်ယူပြီး၊ ဘုရားနှုတ်ကပတ်တော်များကို ဆုတောင်းရင်းဖြင့် ဖတ်ရှုရန် သင်ယူလော့။ ထို့နောက်တွင် ဘုရားနှုတ်ကပတ်တော်များ၏ အဓိပ္ပာယ်ကို သင် နားလည်နိုင်လိမ့်မည်။ ဘုရားနှုတ်ကပတ်တော်များ၌ လက်တွေ့လုပ်ဆောင်ခြင်း လမ်းကြောင်းများ သင် ရှာတွေ့နိုင်လိမ့်မည်။ ဘုရားသခင်၏ ရည်ရွယ်ချက်များကို သင် နားလည်နိုင်လိမ့်မည်ဖြစ်ပြီး သမ္မာတရားကို စတင် နားလည်လိမ့်မည်။ ထို့နောက်တွင် သင်၏ သမ္မာတရားအပေါ် သိနားလည်ခြင်းကို အခြေခံ၍ သင်၏ ကိုယ်ပိုင် ဖောက်ပြန်ပျက်စီးသော စိတ်သဘောထားကို သုံးသပ်ပြီး သတိပြုလော့၊ သင်၏ ဖောက်ပြန်ပျက်စီးသော စိတ်သဘောထား၏ အနှစ်သာရကို စိတ်ဖြာလေ့လာ ဆွေးနွေးပြီးနောက် ထိုအရာကို ဖြေရှင်းရန် သမ္မာတရားကို အသုံးပြုလော့။ ဤသို့ သင် လက်တွေ့လုပ်ဆောင်ပြီး ဝင်ရောက်ပါက သင်သည် မိမိကိုယ်ကို အမှန်တကယ် သိရှိနိုင်လိမ့်မည်ဖြစ်ပြီး သင်၏ ဖောက်ပြန်ပျက်စီးသော စိတ်သဘောထားကို ဖယ်ရှားရန် လွယ်ကူလိမ့်မည်။ သိမြင်မှုကို နည်းနည်းချင်း ရရှိခြင်း၊ အတွေ့အကြုံကို နည်းနည်းချင်း ရရှိခြင်း၊ ဘုရားသခင်၏ ရည်ရွယ်ချက်များကို တဖြည်းဖြည်း သိနားလည်ခြင်းနှင့် မိမိတို့၏ ဖောက်ပြန်ပျက်စီးခြင်းကို နည်းနည်းချင်း ဖယ်ရှားခြင်းမှတစ်ဆင့် လူတို့သည် သိပင်မသိလိုက်ဘဲ စတင်ပြောင်းလဲကြလိမ့်မည်။ ဤသည်မှာ အသက်တာ အတွေ့အကြုံနှင့်ဆိုင်သည့် ဖြစ်စဉ်ဖြစ်သည်။ သမ္မာတရားကို သိနားလည်ခြင်းသည် အရေးအပါဆုံးသော အရာဖြစ်သည်။ တစ်စုံတစ်ဦးသည် သမ္မာတရားကို သိနားလည်သည်နှင့်တစ်ပြိုင်နက် ဘုရားသခင်က လူကို လိုက်လျှောက်ရန် တောင်းဆိုသည့် စံနှုန်းများကို ၎င်းတို့ သိလိမ့်မည်။ ဤအရာကို အဘယ်ကြောင့် ဘုရားသခင် ပြောဆိုသည်ဆိုသည်နှင့် သူ ရရှိရန် ကြိုးစားသည့် အကျိုးတရားကိုလည်း သိကြလိမ့်မည်။ လူ့အပေါ် ဘုရားသခင် တောင်းဆိုသည့် စံနှုန်းများသည် အမှန်တွင် လူသားများက စွမ်းဆောင်ရရှိနိုင်သည့်အရာများသာ ဖြစ်သည်ကိုလည်း သိကြလိမ့်မည်။ ထိုအရာများသည် လူသား အသိစိတ်နှင့် ဆင်ခြင်တုံတရားတို့ စွမ်းဆောင်ရရှိနိုင်သည့် အရာများအားလုံး ဖြစ်သည်။ ဤဖြစ်စဉ်များအားလုံးသည် အသက်ဝင်ရောက်မှုနှင့်ဆိုင်သည့် ကိစ္စတစ်ခုသာ ဖြစ်သည်။ အသက်ဝင်ရောက်မှုသည် သင်၏ တာဝန်များကို လုံ့လရှိစွာ သင် ထမ်းဆောင်ရန် လိုအပ်သည်၊ သမ္မာတရားကို ရှာဖွေပြီး သမ္မာတရားကို လုံ့လရှိစွာ လက်တွေ့လုပ်ဆောင်ကာ မိမိတာဝန်များကို ကောင်းစွာ ထမ်းဆောင်ဖို့ ဘုရားသခင်ထံ ဆုတောင်းကာ ဘုရားသခင်အပေါ် မှီခိုရန် လိုအပ်သည်။ ထိုသို့သော အတွေ့အကြုံနှင့် လက်တွေ့လုပ်ဆောင်မှုမှတစ်ဆင့် သင်သည် ပိုကောင်းသည်ထက် ကောင်းမွန်သော ရလဒ်များ ရှိလိမ့်မည်။ သမ္မာတရားကို မချစ်သောလူတို့သည် ထိုသို့သော အရာများကို စိတ်ဝင်စားမှု ပြလိမ့်မည် မဟုတ်။ ၎င်းတို့သည် အသက်ဝင်ရောက်မှုနှင့်စပ်လျဉ်းသော ဝန်ထုပ်တစ်ခု မခံစားကြသကဲ့သို့ ထိုသို့လုပ်ဆောင်ခြင်းကိုလည်း စိတ်မဝင်စားကြချေ။ ထို့ကြောင့် ဘုရားသခင်ကို နှစ်များစွာ ၎င်းတို့ ယုံကြည်ကြပြီးဖြစ်သော်လည်း မိမိတို့၏ အတွေ့အကြုံဆိုင်ရာ သက်သေခံချက်နှင့်ပတ်သက်၍ ၎င်းတို့ မပြောဆိုနိုင်ကြချေ။ သမ္မာတရားကို ချစ်သောလူတို့မှာ ဤသို့ မဟုတ်။ ၎င်းတို့ တွေ့ကြုံပြီးဖြစ်သည့် အရာတိုင်းနှင့်ဆိုင်သော သက်သေခံချက်များနှင့် မိမိတို့၏ အတွေ့အကြုံ ကာလအသီးသီးကို ၎င်းတို့ ထုတ်ရေးကြသည်။ ရက်များနှင့် လများအတွင်းတွင် ဤအကျိုးတရားများ စုဆောင်းမိလျက် ၎င်းတို့၏ အတွေ့အကြုံများအားလုံးမှ အမှန်တကယ် အကျိုးရရှိကြသည်။ ဆယ်နှစ် သို့မဟုတ် အနှစ်နှစ်ဆယ်နောက်တွင် ကြီးမားသည့် အပြောင်းအလဲများ ၎င်းတို့ ကြုံရပြီးဖြစ်လိမ့်မည်။ ထိုအချိန်တွင် မိမိတို့၏ အတွေ့အကြုံဆိုင်ရာ သက်သေခံချက်များကို အားထုတ်စရာမလိုဘဲ ၎င်းတို့ ရေးနိုင်ကြပြီး ၎င်းတို့အတွက် သမ္မာတရားအပေါ် မိတ်သဟာယတွင် ပါဝင်ခြင်းက ခက်ခဲသည့်အရာ မဟုတ်ပေ။ မိမိတို့တာဝန်ကို ထမ်းဆောင်ရာတွင် အရာရာကို သင့်တင့်လျောက်ပတ်စွာ ထမ်းဆောင်ကြသည်။

သင်တို့သည် သမ္မာတရားကို ချစ်သောလူများ ဖြစ်ကြသလော။ ဘုရားသခင်အတွက် ကြီးစွာသော လိုအင်ဆန္ဒရှိသည့် စိတ်နှလုံးများ သင်တို့ ရှိကြသလော။ ရိုးသားစစ်မှန်သည့် စိတ်နှလုံးများ သင်တို့ ရှိကြသလော။ ဖြေရန်ခက်သည် မဟုတ်လော။ အမှန်တွင် သင်တို့၏ စိတ်နှလုံးများ၌ ဤအချက်နှင့်ပတ်သက်၍ သင်တို့အားလုံး ရှင်းကြသည်။ သင်သည် သင်၏တာဝန်ကို ဝတ်ကျေတမ်းကျေ ဖြစ်သော ပုံစံဖြင့် လုပ်ဆောင်လိုသည့်အခါ၊ သင်သည် စိတ်မချရ သို့မဟုတ် အချောင်ခိုချင်သည့်အခါ၊ သင်သည် ထင်ရာစိုင်းပြီး မဆင်မခြင်ဖြစ်လိုသည့်အခါ ဤအရာကို သင် သတိပြုမိနိုင်သလော။ ဇာတိပကတိကို သင် ပုန်ကန်နိုင်သလော။ မည်သည့် ရွေးချယ်မှုကို သင်လုပ်ဆောင်သနည်း။ သမ္မာတရားကို လက်တွေ့လုပ်ဆောင်ရန် သင် ရွေးချယ်သလော သို့မဟုတ် ဇာတိပကတိ၏ လိုအင်များကို ရွေးချယ်သလော။ အပြုသဘောကို သင် ရွေးချယ်သလော သို့မဟုတ် အပျက်သဘောကို သင် ရွေးချယ်သလော။ သမ္မာတရားကို ရရှိရန်အလို့ငှာ ဆင်းရဲဒုက္ခခံပြီး အဖိုးအခပေးရန် သင် ရွေးချယ်သလော သို့မဟုတ် ဇာတိပကတိ၏ ကိုယ်စိတ်ချမ်းသာမှုနောက်လိုက်ရန် သင် ရွေးချယ်သလော။ ဤသည်တို့မှာ ဘုရားသခင်ကို သင် အမှန်တကယ် ချစ်ပြီး ကျိုးနွံနာခံသည့် စိတ်နှလုံးတစ်ခု ရှိမရှိဆိုသည်နှင့် သင့်ကိုယ်သင် ဘုရားသခင်အတွက် ရိုးသားစစ်မှန်စွာ အသုံးခံခြင်း ရှိမရှိဆိုသည်တို့ကို အကဲဖြတ်ရန် အသုံးပြုမည့် မေးခွန်းများ ဖြစ်သည်။ သင်သည် ဘုရားသခင်အတွက် ရိုးသားစစ်မှန်သည့် စိတ်နှလုံးတစ်ခု မရှိပါက၊ အမှုအရာများကို ထင်ရာစိုင်းပြီး မဆင်မခြင် လုပ်ဆောင်လိုပါက သင် စိတ်ကျေနပ်သရွေ့ ပျော်ရွှင်ပြီး စိတ်မကျေနပ်သည့်အခါ ဒေါသထွက်၍ ဝုန်းဒိုင်းကြဲသည့်အပြင် အမှုအရာများ မိမိသဘောအတိုင်း မဖြစ်သည့်အခါ သင်၏တာဝန်ကို စွန့်လွှတ်လိုပါက ဤသည်မှာ မှန်ကန်သည့် စိတ်အခြေအနေ ဖြစ်သလော။ ဤသည်မှာ ဘုရားသခင်ကို ကျိုးနွံနာခံသည့် စိတ်နှလုံးရှိခြင်း ဆိုလိုသည့်အရာ ဖြစ်သလော။ ဤသည်မှာ မိမိတာဝန်ကို သစ္စာစောင့်သိစွာ ထမ်းဆောင်ခြင်းလော။ သင်သည် အဘယ်ကြောင့် သမ္မာတရားကို လက်တွေ့မလုပ်ဆောင်သနည်း။ ဘုရားနှုတ်ကပတ်တော်များကို သင် နားမလည်သောကြောင့် ဖြစ်သလော။ သို့မဟုတ် သမ္မာတရားကို မချစ်သောကြောင့် ဖြစ်သလော။ လူအချို့က “ဘုရားနှုတ်ကပတ်တော်များက ရိုးရှင်းသော်လည်း လက်တွေ့လုပ်ဆောင်ရန် ခက်ခဲသည်။ ဘုရားအိမ်တော်သည် လူတို့အား သမ္မာတရားကို လက်တွေ့လုပ်ဆောင်ရန် အမြဲ တောင်းဆိုသော်လည်း ဤသည်မှာ လူတို့အတွက် ခက်ခဲပြီး ပြဿနာများစွာ ပေးသည်။ ကျွန်ုပ်၏ စိတ်နှလုံးက သက်သောင့်သက်သာ မဖြစ်လျှင် သမ္မာတရားကို ကျွန်ုပ် လက်တွေ့မလုပ်ဆောင်ပါ။ အသင်းတော်က ကျွန်ုပ်ကို မရှင်းလင်းပစ်သရွေ့၊ သို့မဟုတ် ဖယ်ရှားရှင်းလင်းခြင်း မရှိသရွေ့ လွတ်လပ်ပြီး စိတ်အေးလက်အေးဖြစ်ကာ ကိုယ်လုပ်ချင်သည့်အရာ မှန်သမျှ လုပ်ဆောင်ဖို့ ကျွန်ုပ် ရွေးချယ်မည်”ဟု ဆိုကြသည်။ ဤသည်မှာ ဘုရားသခင်ကို အမှန်တကယ် ယုံကြည်သည့် တစ်စုံတစ်ဦး ဖြစ်သလော။ မယုံကြည်သူတစ်ဦးဖြစ်သည် မဟုတ်လော။ ဤသည်မှာ မယုံကြည်သူများက မိမိတို့တာဝန်များကို ထမ်းဆောင်သည့်အခါ ခံယူသည့် သဘောထား ဖြစ်သည်။ သမ္မာတရားကို ၎င်းတို့ လက်မခံကြသောကြောင့်၊ လွတ်လပ်မှုနှင့် သောက်စားပျော်ပါးခြင်းကို ၎င်းတို့ နှစ်သက်ကြပြီး ဝတ်ကျေတမ်းကျေဖြစ်ခြင်းကို နှစ်သက်ကြသောကြောင့် ဖြစ်သည်။ ၎င်းတို့ မည်သို့ ပြုပြင်ခံရသည်ဖြစ်စေ အသုံးမဝင်ပေ။ ၎င်းတို့၏ နားများက သမ္မာတရားအပေါ် မိတ်သဟာယပြုခြင်းမှ မည်သည့်အရာကိုမျှ မကြားကြ။ ၎င်းတို့ကို ဖယ်ထုတ်ပြီး ဖယ်ရှားရှင်းလင်းရန်မှလွဲ၍ လုပ်ဆောင်ရန် ဘာမျှမရှိပေ။ သမ္မာတရားကို ၎င်းတို့ လက်မခံဘဲ ထိုအစား သမ္မာတရားကို အလွန်အမင်း မနှစ်မြို့သည့် လူများ၊ ၎င်းတို့သည် ဘာသာတရားမရှိသူများ ဖြစ်သောကြောင့် ဘုရားသခင်က ၎င်းတို့ကို ကယ်တင်လိမ့်မည် မဟုတ်။ သမ္မာတရားကို ချစ်သောလူတို့အတွက်မူ ၎င်းတို့၏ ဖောက်ပြန်ပျက်စီးသော စိတ်သဘောထား ထုတ်ဖော်ပြသည့်အခါတွင်ပင် ပြုပြင်ခြင်းခံရရန် လက်ခံနိုင်ကြသည်။ သမ္မာတရားကို ရှာဖွေနိုင်ကြသည်၊ မိမိတို့ကိုယ်ကို သုံးသပ်ပြီး မိမိတို့ကိုယ်ကို သိရှိလာနိုင်ကြကာ နောင်တရဖို့ သိနိုင်ကြသည်။ ဤသည်တို့မှာ ဘုရားသခင် ကယ်တင်လိုသည့် လူများ ဖြစ်သည်။ တစ်စုံတစ်ဦးသည် သမ္မာတရားကို မချစ်သည့်အခါ သမ္မာတရားကို လက်ခံရန် ၎င်းအတွက် ခက်ခဲသည်။ ဤသမ္မာတရား လက်ခံနိုင်စွမ်းမရှိခြင်း၏ အကြီးမားဆုံးသော အန္တရာယ်မှာ အဘယ်နည်း။ ဘုရားသခင်အပေါ် သစ္စာဖောက်ခြင်း ဖြစ်သည်။ သမ္မာတရားကို လက်မခံသောသူတို့သည် ဘုရားသခင်ကို သစ္စာဖောက်ဖို့ အလားအလာ အရှိဆုံးဖြစ်ပြီး အချိန်မရွေး နေရာမရွေး ဘုရားသခင်ကို သစ္စာဖောက်နိုင်သည်။ အသေးအဖွဲအရာတစ်ခုက မိမိတို့ သဘောအတိုင်း မဖြစ်သည့်အခါ ဘုရားသခင်ကို ၎င်းတို့ သစ္စာဖောက်နိုင်သည်။ တစ်ကြိမ်တစ်ခါ ပြုပြင်ခြင်းကို ၎င်းတို့ လက်မခံနိုင်သောကြောင့် ဘုရားသခင်ကို သစ္စာဖောက်နိုင်ကြသည်။ ကပ်ဘေးတစ်ခုနှင့် ထိပ်တိုက်တွေ့သည့်အခါ ဘုရားသခင်ကို ၎င်းတို့ စောဒကတက်ပြီး သစ္စာဖောက်ရန် သာ၍ပင် အလားအလာရှိ၏။ မည်သို့ပင်ဖြစ်စေ သမ္မာတရားကို မချစ်သူများ သို့မဟုတ် လက်မခံသူများသည် အန္တရာယ်အရှိဆုံး ဖြစ်သည်။ တစ်စုံတစ်ဦး ကယ်တင်ခံရနိုင်ခြင်း ရှိမရှိဆိုသည်မှာ သမ္မာတရားနှင့် အပြုသဘောဆောင်သော အရာများကို ၎င်းတို့ နှစ်သက်သည့် အတိုင်းအတာအပြင် သမ္မာတရားကို ၎င်းတို့ လက်ခံနိုင်ကာ လက်တွေ့လုပ်ဆောင်နိုင်ခြင်း ရှိမရှိဆိုသည့်အပေါ် မူတည်သည်။ သင်၏ စစ်မှန်သည့် ဝိညာဉ်ရင့်ကျက်မှုကို အကဲဖြတ်ရန်၊ သင့်ကိုယ်သင် ပိုင်းခြားသိမြင်ရန်နှင့် သင်၏ ကိုယ်ပိုင် ဖောက်ပြန်ပျက်စီးခြင်း အမှန်တရားကို သိရှိပြီး သင်၏ သဘာဝက မည်သည့်အရာ အမှန်တကယ်ဖြစ်သည်ကို သိနားလည်ရန် သမ္မာတရား၏ တောင်းဆိုချက်များကို အသုံးပြုလော့။ တစ်နည်းအားဖြင့် ထိုသို့သော ချင့်ချိန်နိုင်စွမ်းက သင့်ကိုယ်သင် သိရှိရန်နှင့် စစ်မှန်သည့် နောင်တရကို ရရှိနိုင်ရန် ကူညီလိမ့်မည်။ နောက်တစ်နည်းအားဖြင့် ထိုအရာက သင့်ကို ဘုရားသခင်အား သိခွင့်ပေးလိမ့်မည်ဖြစ်ပြီး သူ၏ ရည်ရွယ်ချက်များကို နားလည်ခွင့်ပေးလိမ့်မည်။ သမ္မာတရားကို လက်ခံနိုင်စွမ်း မရှိခြင်းသည် ဘုရားသခင်ကို ပုန်ကန်ခြင်းနှင့် အတိုက်အခံလုပ်ခြင်း သရုပ်သကန်တစ်ခု ဖြစ်သည်။ ဤပြဿနာအပေါ် ရှင်းလင်းသော သိနားလည်မှုက သင့်ကို ကယ်တင်ခြင်း လမ်းကြောင်းပေါ် လျှောက်လှမ်းရန် ကူညီလိမ့်မည်။ တစ်စုံတစ်ဦးသည် သမ္မာတရားကို အမှန်တကယ် ချစ်သည့်အခါ ဘုရားသခင်အတွက် ကြီးစွာသော လိုအင်ဆန္ဒရှိသည့် စိတ်နှလုံးတစ်ခု၊ သမ္မာတရားကို လက်တွေ့လုပ်ဆောင်ပြီး ဘုရားသခင်ကို ကျိုးနွံနာခံရန် ရိုးသားစစ်မှန်သော စိတ်နှလုံးနှင့် စိတ်ဓာတ်လှုံ့ဆော်မှုတို့ ရှိနိုင်ကြသည်။ စစ်မှန်သည့် ခွန်အားကို ပိုင်ဆိုင်လျက် ၎င်းတို့သည် ဘုရားနှုတ်ကပတ်တော်များကို လက်တွေ့လုပ်ဆောင်မှု၊ သမ္မာတရားကို လက်တွေ့လုပ်ဆောင်မှုနှင့် ဘုရားနှုတ်ကပတ်တော်၏ စစ်မှန်မှုထဲသို့ ဝင်ရောက်ခြင်းအတွက် လမ်းရှင်းပေးရင်း ၎င်းတို့သည် အဖိုးအခပေးနိုင်ကြသည်၊ မိမိတို့၏ အားအင်နှင့် အချိန်ကို ဆက်ကပ်မြှုပ်နှံနိုင်ကြသည်၊ ကိုယ်ရေးကိုယ်တာ အကျိုးအမြတ်များကို စွန့်လွှတ်နိုင်ကြပြီး ဇာတိပကတိ၏ အနှောင်အဖွဲ့အားလုံးကို လက်လွှတ်နိုင်ကြသည်။ ဘုရားနှုတ်ကပတ်တော်၏ လက်တွေ့ကျမှုထဲသို့ ဝင်ရောက်ရန်အလို့ငှာ၊ သင်၏ ကိုယ်ပိုင် အယူအဆများကို သင် လက်လွှတ်နိုင်ပါက၊ သင့်ကိုယ်ပိုင် ဇာတိပကတိ၏ အကျိုးစီးပွားများ၊ နာမည်ဂုဏ်သတင်း၊ အဆင့်အတန်း၊ ကျော်ကြားမှုနှင့် ဇာတိပကတိ၏ ပျော်မွေ့မှုများကို သင် လက်လွှတ်နိုင်ပါက၊ ထိုသို့သော အရာအားလုံးကို သင် လက်လွှတ်နိုင်ပါက၊ သမ္မာတရား လက်တွေ့ကျမှုထဲသို့ သင် ပိုပိုပြီး ဝင်ရောက်လိမ့်မည်။ သင်၌ ရှိသည့် မည်သည့် အခက်အခဲများနှင့် ဒုက္ခများမဆို ပြဿနာများ ဖြစ်တော့မည်မဟုတ်။ ထိုအရာများသည် အလွယ်တကူ ပြေလည်သွားလိမ့်မည်ဖြစ်ပြီး ဘုရားနှုတ်ကပတ်တော်များ၏ လက်တွေ့ကျမှုထဲသို့ သင် အလွယ်တကူ ဝင်ရောက်လိမ့်မည်။ သမ္မာတရား လက်တွေ့ကျမှုထဲသို့ ဝင်ရောက်ရန်၊ ရိုးသားစစ်မှန်သည့် စိတ်နှလုံးတစ်ခုနှင့် ဘုရားသခင်အတွက် ကြီးစွာသော ဆန္ဒရှိသည့် စိတ်နှလုံးတစ်ခုတို့သည် မရှိမဖြစ်သော သတ်မှတ်ချက်နှစ်ခု ဖြစ်သည်။ သင်သည် စစ်မှန်ရိုးသားသည့် စိတ်နှလုံးတစ်ခုသာ ရှိသော်လည်း အမြဲ သူရဲဘောကြောင်စွာဖြင့် ဘုရားသခင်အတွက် ကြီးစွာသော လိုအင်ဆန္ဒတစ်ခု ကင်းမဲ့ပြီး အခက်အခဲများ ကြုံရသည့်အခါ နောက်တွန့်ပါက ဤသည်မှာ မလုံလောက်ပေ။ သင်သည် သင်၏ စိတ်နှလုံးတွင် ဘုရားသခင်အတွက် ကြီးစွာသော လိုအင်ဆန္ဒသာ ရှိပြီး အနည်းငယ် စိတ်လိုက်မာန်ပါ ပြုလုပ်တတ်ကာ ဤပြင်းပြသော ဆန္ဒသာရှိသော်လည်း သင့်ထံ အမှုအရာများဖြစ်ပျက်သည့်အခါ ရိုးသားစစ်မှန်သည့် စိတ်နှလုံးတစ်ခု ကင်းမဲ့ပြီး နောက်တွန့်ကာ မိမိကိုယ်ပိုင် အကျိုးစီးပွားများကို ရွေးချယ်ပါက ဤသည်မှာလည်း မလုံလောက်ပေ။ သင်သည် ရိုးသားစစ်မှန်သော စိတ်နှလုံးနှင့် ဘုရားသခင်အတွက် ကြီးစွာသော လိုအင်ဆန္ဒရှိသည့် စိတ်နှလုံး နှစ်ခုလုံး လိုအပ်သည်။ သင်၏ စိတ်နှလုံး ရိုးသားစစ်မှန်မှု အတိုင်းအတာနှင့် ဘုရားသခင်အတွက် သင်၏ ကြီးစွာသော လိုအင်ဆန္ဒ၏ စွမ်းအားတို့က သမ္မာတရားကို လက်တွေ့လုပ်ဆောင်ရန် သင့် စိတ်ဓာတ်လှုံ့ဆော်မှု၏ ခွန်အားကို အဆုံးအဖြတ်ပေးသည်။ သင်သည် ရိုးသားစစ်မှန်သည့် စိတ်နှလုံးတစ်ခု မရှိသကဲ့သို့ သင်၏ စိတ်နှလုံးက ဘုရားသခင်အတွက် ကြီးစွာသော လိုအင်ဆန္ဒတစ်ခု ရှိပါက ဘုရားသခင်၏ နှုတ်ကပတ်တော်များကို သင် နားလည်နိုင်လိမ့်မည် မဟုတ်သကဲ့သို့ သမ္မာတရားကို လက်တွေ့လုပ်ဆောင်ရန် စိတ်ဓာတ်လှုံ့ဆော်မှုရှိလိမ့်မည် မဟုတ်။ ဤသို့ဖြင့် သင်သည် သမ္မာတရား လက်တွေ့ကျမှုထဲသို့ မဝင်ရောက်နိုင်သကဲ့သို့ ကယ်တင်ခြင်း ရရှိရန် သင့်အတွက် ခက်ခဲလိမ့်မည်ဖြစ်သည်။

ကယ်တင်ခံရခြင်းသည် မည်သည့်အရာကို ဆိုလိုသည်ကို လူများစွာတို့က ရှင်းရှင်းလင်းလင်း မသိကြပေ။ ဘုရားသခင်ကို အချိန်ကြာမြင့်စွာ ယုံကြည်ပါက ၎င်းတို့ကယ်တင်ခြင်းခံရဖို့ အလားအလာရှိသည်ဟု လူအချို့က ယုံကြည်ကြသည်။ လူအချို့ကမူ ဝိညာဉ်ရေးရာ အယူဝါဒများစွာကို ၎င်းတို့ နားလည်ပါက ၎င်းတို့ကယ်တင်ခြင်းခံရဖို့ အလားအလာ ရှိသည်ဟု ယုံကြည်ကြသည်၊ သို့မဟုတ် အချို့က ခေါင်းဆောင်များနှင့် အမှုဆောင်များသည် သေချာ‌ပေါက် ကယ်တင်ခြင်းခံရမည်ဟု တွေးထင်ကြသည်။ ဤအရာ အားလုံးသည် လူသား၏ အယူအဆများနှင့် စိတ်ကူးတို့ ဖြစ်ကြသည်။ အဓိကဖြစ်သောအရာမှာ ကယ်တင်ခြင်းသည် အဘယ်အရာကို ဆိုလိုကြောင်း လူများနားလည်ရမည် ဖြစ်သည်။ ကယ်တင်ခံရခြင်းဟူသည်မှာ အဓိကအားဖြင့် အပြစ်မှ လွတ်မြောက်ဖို့နှင့် စာတန်၏စွမ်းအားမှ လွတ်မြောက်ခြင်း၊ ပြီးလျှင် ဘုရားသခင်ထံသို့ စစ်မှန်စွာ ပြန်လှည့်ပြီး ဘုရားသခင်ကို ကျိုးနွံနာခံခြင်းတို့ကို ဆိုလိုသည်။ အပြစ်နှင့် စာတန်၏ စွမ်းအားတို့မှ လွတ်မြောက်ဖို့ သင်သည် အဘယ်အရာကို ပိုင်ဆိုင်ရမည်နည်း။ သမ္မာတရား ဖြစ်သည်။ လူများသည် သမ္မာတရားကို ရရှိဖို့ မျှော်လင့်ပါက ၎င်းတို့သည် ဘုရားနှုတ်ကပတ်တော်များစွာဖြင့် ပြင်ဆင်ရမည်၊ ၎င်းတို့သည် သမ္မာတရားကို နားလည်နိုင်ပြီး လက်တွေ့ကျမှုကို ဝင်ရောက်နိုင်ဖို့အလို့ငှာ ထိုနှုတ်ကပတ်တော်များကို တွေ့ကြုံပြီး လက်တွေ့လုပ်ဆောင်နိုင်ရမည်။ သို့မှသာလျှင် ၎င်းတို့ ကယ်တင်ခြင်း ခံရနိုင်သည်။ လူတစ်ဦးက ကယ်တင်ခံရနိုင်ခြင်း ရှိမရှိသည် ဘုရားသခင်ကို ၎င်းမည်မျှ ကြာအောင်ယုံကြည်ခဲ့သည်၊ မည်မျှ အသိပညာရှိသည်၊ ၎င်းသည် ဆုကျေးဇူးများ၊ သို့မဟုတ် ကျွမ်းကျင်မှုများ ပိုင်ဆိုင်ခြင်း ရှိမရှိ၊ သို့မဟုတ် ၎င်းတို့ မည်မျှဒုက္ခခံသည်တို့နှင့် မသက်ဆိုင်ပေ။ ကယ်တင်ခြင်းနှင့် တိုက်ရိုက် ဆက်နွှယ်မှုရှိသည့် တစ်ခုတည်းသော အရာမှာ လူတစ်ဦးအနေဖြင့် သမ္မာတရားကို ရနိုင်ခြင်း ရှိမရှိ ဖြစ်ပေသည်။ ထို့ကြောင့် ယခုအခါတွင် သင်သည် သမ္မာတရားမည်မျှကို စစ်မှန်စွာ နားလည်ပြီးဖြစ်သနည်း။ ပြီးလျှင် ဘုရားသခင်၏ နှုတ်ကပတ်တော် မည်မျှက သင်၏အသက် ဖြစ်လာပြီး ဖြစ်သနည်း။ ဘုရားသခင်၏ တောင်းဆိုချက်များ အားလုံးထဲမှ သင်သည် မည်သည့်အရာကို ဝင်ရောက်မှု ရရှိပြီးဖြစ်သနည်း။ သင်၏ ဘုရားသခင်ကို ယုံကြည်သည့် နှစ်များအတောအတွင်းတွင် ဘုရားနှုတ်ကပတ်တော်၏ လက်တွေ့ကျမှုထဲသို့ သင် မည်မျှ ဝင်ရောက်ပြီးပြီနည်း။ သင်မသိပါက၊ သို့မဟုတ် ဘုရားနှုတ်ကပတ်တော်များ၏ လက်တွေ့ကျမှု တစ်ခုတလေထဲ ဝင်ရောက်ခြင်းကို သင် စွမ်းဆောင် ရရှိပြီးခြင်း မရှိသေးပါက ရှင်းရှင်းပြောရလျှင် သင်သည် ကယ်တင်ခြင်း မျှော်လင့်ချက် မရှိပေ။ သင်သည် ကယ်တင်ခြင်းခံရဖို့ မဖြစ်နိုင်ပေ။ သင်သည် မြင့်မားသော အသိပညာအတိုင်းအတာကို ပိုင်ဆိုင်သည်ဖြစ်စေ၊ သို့မဟုတ် ဘုရားသခင်ကို အချိန်ကြာမြင့်စွာ ယုံကြည်ပြီးဖြစ်စေ၊ ကောင်းမွန်သော အသွင်အပြင် ရှိသည်ဖြစ်စေ၊ စကားပြောကောင်းပြီး နှစ်အတော်ကြာအောင် ခေါင်းဆောင်တစ်ဦး၊ သို့မဟုတ် အမှုဆောင်တစ်ဦး ဖြစ်ပြီးသည်ဖြစ်စေ အရေးမကြီးပေ။ သမ္မာတရားကို မလိုက်စားသကဲ့သို့ ဘုရားနှုတ်ကပတ်တော်များကို ကောင်းမွန်စွာ လက်တွေ့လုပ်ဆောင်ခြင်း၊ သို့မဟုတ် တွေ့ကြုံခြင်း မရှိသကဲ့သို့ စစ်မှန်သည့် အတွေ့အကြုံဆိုင်ရာ သက်သေခံချက် သင်၌ မရှိပါက သင့်အတွက် ကယ်တင်ခံရဖို့ မျှော်လင့်ချက် မရှိပေ။ သင် မည်သည့်ပုံစံရှိသည်၊ သိပ္ပံပညာဆိုင်ရာ အသိပညာ သင် မည်မျှရှိသည်၊ သင် မည်မျှ ဆင်းရဲဒုက္ခခံရပြီးဖြစ်သည်၊ သို့မဟုတ် သင် မည်မျှ ကြီးမားသည့် အဖိုးအခ ပေးပြီးဖြစ်သည်ဆိုသည်တို့ကို ငါ ဂရုမစိုက်ပေ။ ဤအရာကို သင့်အား ငါ ပြောမည်။ သမ္မာတရားကို သင် လက်မခံသကဲ့သို့ ဘုရားနှုတ်ကပတ်တော်များ၏ လက်တွေ့ကျမှုထဲသို့ လုံးဝ မဝင်ရောက်ပါက သင် ကယ်တင်မခံရနိုင်ပေ။ ဤသည်မှာ သေချာ၏။ ဘုရားနှုတ်ကပတ်တော်များ၏ လက်တွေ့ကျမှုထဲသို့ သင် မည်မျှ ဝင်ရောက်ပြီးဖြစ်သည်ကို ငါ့အား သင် ပြောပါက ကယ်တင်ခြင်းပတ်သက်၍ သင် မျှော်လင့်ချက် မည်မျှရှိသည်ကို သင့်အား ငါ ပြောမည်။ ဤအရာကို အကဲဖြတ်ခြင်းအတွက် စံသတ်မှတ်ချက်များကို ယခု သင့်အား ငါ ပြောပြီးသည်ဖြစ်၍ ထိုအရာကို သင့်ဘာသာ အကဲဖြတ်နိုင်အပ်သည်။ ဤစကားများက သင့်ကို မည်သည့်အဖြစ်မှန်များ ပြောပြသနည်း။ ဘုရားသခင်သည် ကမ္ဘာလောကကို ဖန်ဆင်းရန် နှုတ်ကပတ်တော်များ အသုံးပြုခဲ့သည်။ အဖြစ်မှန်မျိုးစုံကို ပြီးမြောက်စေရန်၊ ဘုရားသခင် လုပ်ဆောင်ပြီးစီးရန် ဆန္ဒရှိသည့် အဖြစ်မှန်များအားလုံးကို ပြီးမြောက်ရန် နှုတ်ကပတ်တော်များကို သူ အသုံးပြုပြီး သူ၏ အမှုတော် အဆင့်နှစ်ဆင့်ကို ဆောင်ရွက်ရန် နှုတ်ကပတ်တော်များကို သူ အသုံးပြုသည်။ ယနေ့တွင် ဘုရားသခင်သည် သူ့အမှုတော်၏ တတိယအဆင့်ကို လုပ်ဆောင်နေပြီး အမှု၏ဤအဆင့်တွင် အခြားအဆင့်တစ်ခုတလေထက် ပို၍များသော နှုတ်ကပတ်တော်များကို ဘုရားသခင် ပြောဆိုပြီးဖြစ်သည်။ ဤသည်မှာ လူသားမျိုးနွယ် သမိုင်းတစ်လျှောက်လုံး သူ၏ အမှုတော်တွင် နှုတ်ကပတ်တော်အများဆုံးပြောသည့်အချိန် ဖြစ်သည်။ ကမ္ဘာလောကကို ဖန်ဆင်းရန်၊ အဖြစ်မှန်များအားလုံးကို ပြီးမြောက်ရန်၊ ဘာမျှမရှိခြင်းမှသည် တည်ရှိခြင်းအဖြစ်သို့၊ ပြီးလျှင် တည်ရှိခြင်းမှသည် ဘာမျှမရှိခြင်းအဖြစ်သို့ အဖြစ်မှန်များကို ဆောင်ကြဉ်းရန် နှုတ်ကပတ်တော်များကို ဘုရားသခင် အသုံးပြုနိုင်ခြင်းမှာ ဘုရားနှုတ်ကပတ်တော်များ၏ ဩဇာအာဏာ ဖြစ်ပြီး နောက်ဆုံးတွင် လူသားမျိုးနွယ်၏ ကယ်တင်ခြင်း အဖြစ်မှန်ကို ပြီးမြောက်ရန်လည်း နှုတ်ကပတ်တော်များကို သူ အသုံးပြုမည် ဖြစ်သည်။ ယနေ့တွင် ဤအဖြစ်မှန်များကို သင်တို့အားလုံး မြင်နိုင်သည်။ နောက်ဆုံးသော ကာလတွင် ဘုရားသခင်သည် သူ၏ နှုတ်ကပတ်တော်နှင့် မဆက်စပ်သည့် မည်သည့် အမှုကိုမျှ မလုပ်ဆောင်လေပြီ၊ သူသည် တစ်လျှောက်လုံး စကားပြောပြီးဖြစ်သည်၊ ယနေ့ထက်တိုင် လူကို လမ်းပြရန် နှုတ်ကပတ်တော်များကို တောက်လျှောက် အသုံးပြုပြီးဖြစ်သည်။ စကားပြောနေစဉ်တွင် ဘုရားသခင်သည် သူ့နောက်လိုက်သူများနှင့် သူ၏ ဆက်ဆံရေးကို ထိန်းသိမ်းရန်လည်း နှုတ်ကပတ်တော်များကို အသုံးပြုပြီး ဖြစ်သည်ကလည်းကောင်း၊ ၎င်းတို့ကို လမ်းပြရန် နှုတ်ကပတ်တော်များကို အသုံးပြုပြီးဖြစ်ကာ ဤနှုတ်ကပတ်တော်များသည် ကယ်တင်ခံရရန် ဆန္ဒရှိသူတို့အတွက်၊ သို့မဟုတ် ဘုရားသခင်က ကယ်တင်ရန် ဆန္ဒရှိသူတို့အတွက် အဆုံးစွန် အရေးကြီးသည်ကလည်းကောင်း အမှန်ဖြစ်၏။ ဘုရားသခင်သည် လူသားမျိုးနွယ်၏ ကယ်တင်ခြင်း အဖြစ်မှန်ကို ပြီးမြောက်ရန် ဤနှုတ်ကပတ်တော်များကို အသုံးပြုလိမ့်မည်။ သိသိသာသာပင် ထိုနှုတ်ကပတ်တော်များ၏ ပါဝင်သည့် အကြောင်းအရာ သို့မဟုတ် အရေအတွက်အရ ရှုမြင်သည်ဖြစ်စေ၊ ထိုနှုတ်ကပတ်တော်များက မည်သည့်စကားမျိုး ဖြစ်သည်ဖြစ်စေ၊ ယင်းတို့သည် ဘုရားနှုတ်ကပတ်တော်များ၏ မည်သည့် အစိတ်အပိုင်း ဖြစ်သည်ဖြစ်စေ ထိုစကားများသည် ကယ်တင်ခံရရန် ဆန္ဒရှိသူ တစ်ဦးစီအတွက် အဆုံးစွန် အရေးကြီးပေသည်။ ဘုရားသခင်သည် သူ၏ အနှစ်ခြောက်ထောင် စီမံခန့်ခွဲမှု အစီအစဉ်၏ နောက်ဆုံး အကျိုးတရားကို စွမ်းဆောင်ရရှိရန် ဤစကားများကို အသုံးပြုနေသည်။ လူသားမျိုးနွယ်အဖို့၊ ယနေ့ခေတ် လူသားမျိုးနွယ်ဖြစ်စေ၊ အနာဂတ် လူသားမျိုးနွယ်ဖြစ်စေ ထိုစကားများသည် အဆုံးစွန် အရေးကြီးမှု ပါရှိ၏။ ယင်းမှာ ဘုရားသခင်၏ သဘောထားဖြစ်သည်။ သူ့နှုတ်ကပတ်တော်များ၏ ရည်မှန်းချက်နှင့် အရေးပါမှု ဖြစ်သည်။ ထို့ကြောင့် လူသားမျိုးနွယ်သည် မည်သည့်အရာကို လုပ်ဆောင်သင့်သနည်း။ လူသားမျိုးနွယ်သည် ဘုရားသခင်၏ နှုတ်ကပတ်တော်များနှင့် အမှုတော်တွင် ပူးပေါင်းဆောင်ရွက်သင့်သည်။ ထိုအရာများကို လျစ်လျူမရှုသင့်ပေ။ သို့ရာတွင် ယင်းမှာ ဘုရားသခင်၌ လူအချို့တို့၏ ယုံကြည်ခြင်း နည်းလမ်းမဟုတ်ပေ။ ဘုရားသခင် မည်သည့်အရာ ပြောဆိုသည်ဖြစ်စေ၊ ဘုရားနှုတ်ကပတ်တော်များက ၎င်းတို့နှင့် မည်သည့် ပတ်သက်မှုမျှ မရှိသည့်အလား ဖြစ်သည်။ ၎င်းတို့သည် မိမိတို့ အလိုရှိသည့်အရာကို လိုက်စားကြဆဲ၊ မိမိတို့ အလိုရှိသည့်အရာကို လုပ်ဆောင်ကြဆဲဖြစ်ပြီး ဘုရားနှုတ်ကပတ်တော်များပေါ် အခြေခံ၍ သမ္မာတရားကို မရှာဖွေကြချေ။ ဤသည်မှာ ဘုရားသခင်၏ အမှုတော်ကို တွေ့ကြုံခြင်း မဟုတ်ပေ။ ဘုရားသခင် မည်သည့်အရာ ပြောသည်ဖြစ်စေ အာရုံမစိုက်သူများ၊ မိမိတို့ စိတ်နှလုံးများတွင် ခံယူချက်တစ်ခုသာ ရှိသည့် အခြားသူများ ရှိ၏။ “ဘုရားသခင် မည်သည့်အရာ စေခိုင်းသည်ဖြစ်စေ ကျွန်ုပ် လုပ်ဆောင်မည်။ ဘုရားသခင်က အနောက်အရပ်သို့ သွားရန် ကျွန်ုပ်ကို ပြောလျှင် အနောက်အရပ်သို့ ကျွန်ုပ် သွားမည်။ အရှေ့အရပ်သို့ သွားရန် သူ ပြောလျှင်၊ အရှေ့အရပ်သို့ ကျွန်ုပ် သွားမည်။ ကျွန်ုပ်ကို သူ သေခိုင်းလျှင် ကျွန်ုပ် သေသည်ကို သူ့အား မြင်ခွင့်ပေးမည်”ဟူ၍ ဖြစ်သည်။ သို့ရာတွင် အချက်တစ်ချက်သာ ရှိ၏။ ၎င်းတို့သည် ဘုရားနှုတ်ကပတ်တော်များကို မသိမှတ်ကြပေ။ ၎င်းတို့က “ဘုရားနှုတ်ကပတ်တော် အလွန်များသည်။ ထိုနှုတ်ကပတ်တော်များသည် အနည်းငယ် ပို၍ ရိုးစင်းသင့်ပြီး ငါ့ကို ဘာလုပ်ရမည်ဆိုသည်ကို အတိအကျ ပြောသင့်သည်။ ငါ့ စိတ်နှလုံးတွင် ဘုရားသခင်ကို ငါ ကျိုးနွံနာခံနိုင်ပါသည်”ဟု မိမိတို့ဘာသာ တွေးကြ၏။ နှုတ်ကပတ်တော် မည်မျှ ဘုရားသခင် ပြောဆိုသည်ဖြစ်စေ၊ ထိုသို့သော လူများသည် နောက်ဆုံးတွင် သမ္မာတရားကို နားလည်နိုင်စွမ်းမရှိဘဲ ရှိမြဲ ရှိနေသကဲ့သို့ မိမိတို့၏ အတွေ့အကြုံနှင့် သိမြင်မှုတို့ကို မပြောပြနိုင်မြဲ ရှိကြသည်။ ၎င်းတို့သည် ဝိညာဉ်ရေးရာ နားလည်ခြင်း မရှိသည့် သာမန်လူတစ်ဦးကဲ့သို့ ဖြစ်ကြသည်။ ထိုသို့သော လူများသည် ဘုရားသခင်၏ ချစ်ခင်ရသူများဖြစ်သည်ဟု သင်တို့ ထင်ကြသလော။ ထိုသို့သော လူများအပေါ် သနားကရုဏာရှိဖို့ ဘုရားသခင် ဆန္ဒရှိသလော။ (မရှိပါ။) ဧကန်မုချ မရှိပေ။ ထိုသို့သော လူများကို ဘုရားသခင် မနှစ်သက်ပေ။ ဘုရားသခင်က “မရေမတွက်နိုင်အောင်များသော နှုတ်ကပတ်တော်များကို ထောင်နှင့်ချီ၍ ငါ ပြောဆိုပြီး ဖြစ်သည်။ မျက်ကန်းဖြစ်သည့် သို့မဟုတ် နားမကြားသည့် တစ်စုံတစ်ဦးကဲ့သို့ သင်သည် ထိုနှုတ်ကပတ်တော်များကို မမြင်ဖူး သို့မဟုတ် မကြားဖူးသည်မှာ အဘယ်သို့ဖြစ်သနည်း။ သင်၏ စိတ်နှလုံးတွင် မည်သည့်အရာအတိအကျကို သင် စဉ်းစားနေသနည်း။ သင်သည် ကောင်းချီးများနှင့် လှပကောင်းမွန်သည့် ခရီးပန်းတိုင်နောက်လိုက်ခြင်းကို စွဲလမ်းသည့် သူတစ်ဦးထက် ဘာမျှမပိုသည်ကို ငါ မြင်သည်။ သင်သည် ပေါလုကဲ့သို့ အလားတူ ရည်မှန်းချက်ပန်းတိုင်များနောက် လိုက်နေသည်။ ငါ၏ စကားများကို သင် နားမထောင်လိုပါက၊ ငါ၏ လမ်းခရီးကို သင် လိုက်လျှောက်ရန် ဆန္ဒမရှိပါက ဘုရားသခင်ကို အဘယ်ကြောင့် သင် ယုံကြည်သနည်း။ သင်သည် ကယ်တင်ခြင်းနောက် လိုက်နေခြင်း မရှိ၊ လှပကောင်းမွန်သည့် ခရီးပန်းတိုင်နှင့် ကောင်းချီးများအတွက် စိတ်ဆန္ဒနောက် သင် လိုက်နေသည်။ ဤသည်မှာ သင် ကြံစည်နေသည့်အရာ ဖြစ်သည့်အတွက် သင့်အတွက် အသင့်တော်ဆုံးသောအရာမှာ အလုပ်လုပ်ပေးသူတစ်ဦး ဖြစ်ခြင်းဖြစ်သည်”ဟု ပြောသည်။ အမှန်တွင် သစ္စာစောင့်သိသည့် အလုပ်လုပ်ပေးသူတစ်ဦး ဖြစ်ခြင်းသည်လည်း ဘုရားသခင်ကို နာခံခြင်း သရုပ်သကန်တစ်ခု ဖြစ်သော်လည်း ဤသည်မှာ အနိမ့်ဆုံး စံနှုန်းဖြစ်သည်။ သစ္စာစောင့်သိသည့် အလုပ်လုပ်ပေးသူတစ်ဦးအဖြစ် ရှိနေခြင်းသည် ဘာသာတရားမရှိသူတစ်ဦးကဲ့သို့ ထာဝရပြစ်ဒဏ်နှင့် ပျက်စီးခြင်းထဲသို့ ကျဆင်းခြင်းထက် များစွာ သာ၍ ကောင်းသည်။ အထူးသဖြင့် ဘုရားအိမ်တော်သည် အလုပ်လုပ်ပေးသူများကို လိုအပ်ပြီး ဘုရားသခင်အတွက် အလုပ်လုပ်ပေးနိုင်ခြင်းကိုလည်း ကောင်းချီးတစ်ခုအဖြစ် မှတ်ယူသည်။ ဤသည်မှာ နတ်ဆိုးမင်းများ၏ လက်ပါးစေများဖြစ်ခြင်းထက် များစွာ သာ၍ ကောင်းသည်၊ နှိုင်းမရအောင် သာ၍ ကောင်း၏။ သို့ရာတွင် ဘုရားသခင်ကို အလုပ်လုပ်ပေးခြင်းသည် ဘုရားသခင်အတွက် အပြည့်အဝ စိတ်ကျေနပ်ဖွယ်ရာ မဟုတ်ပေ။ အဘယ်ကြောင့်ဆိုသော် ဘုရားသခင်၏ တရားစီရင်ခြင်း အမှုတော်သည် လူများကို ကယ်တင်၊ သန့်စင်စေပြီး စုံလင်စေရန်အလို့ငှာ ဖြစ်သောကြောင့် ဖြစ်သည်။ လူတို့သည် ဘုရားသခင်ကို အလုပ်လုပ်ပေးခြင်းမျှဖြင့် ကျေနပ်ရောင့်ရဲကြပါက ဤသည်မှာ ဘုရားသခင်က လူတို့တွင် အမှုပြုခြင်းအားဖြင့် စွမ်းဆောင်ရရှိရန် ဆန္ဒရှိသည့် ရည်မှန်းချက် မဟုတ်သကဲ့သို့ ဘုရားသခင် မြင်ရန် ဆန္ဒရှိသည့် အကျိုးတရားလည်း မဟုတ်ပေ။ သို့ရာတွင် လူတို့သည် လိုအင်ဆန္ဒဖြင့် လောင်မြိုက်ကြသည်။ ၎င်းတို့သည် မိုက်မဲပြီး ကြောင်းကျိုးမမြင်ဖြစ်ကြသည်။ ၎င်းတို့သည် သေးနုပ်သည့် အကျိုးအမြတ်အချို့ဖြင့် ဖမ်းစားခံရ၊ ဝါးမျိုခံရပြီး ဘုရားသခင် မိန့်မြွက်သည့် အဖိုးတန်သော အသက်နှုတ်ကပတ်တော်များကို ပယ်ချကြသည်။ ထိုနှုတ်ကပတ်တော်ကို အလွန်မြတ်နိုးတန်ဖိုးထားဖို့ မပြောနှင့်၊ အလေးအနက်ပင် သဘောမထားနိုင်ပေ။ ဘုရားနှုတ်ကပတ်တော်များကို မဖတ်ရှုခြင်း သို့မဟုတ် သမ္မာတရားကို မြတ်နိုးတန်ဖိုးထားမှု မရှိခြင်းသည် တော်ခြင်းဖြစ်သလော၊ နုံအခြင်းဖြစ်သလော။ လူတို့သည် ဤနည်းဖြင့် ကယ်တင်ခြင်း ရရှိနိုင်ကြသလော။ ဤအရာအားလုံးကို လူတို့ နားလည်သင့်၏။ ၎င်းတို့အနေဖြင့် မိမိတို့၏ အယူအဆများနှင့် စိတ်ကူးများကို ဘေးဖယ်ကာ သမ္မာတရား လိုက်စားခြင်းကို အာရုံစိုက်လျှင်သာ ကယ်တင်ခြင်း မျှော်လင့်ချက် ရှိကြသည်။