ဆက်လက်၍ လူတို့၏ အစွမ်းအစနှင့်ပတ်သက်ပြီး မိတ်သဟာယပြုကြစို့။ လူတစ်ဦးက အစွမ်းအစ ပိုင်ဆိုင်ခြင်း ရှိမရှိကို တိုင်းတာသည့်အခါ နေ့စဉ်ဘဝတွင် အမှုအရာများ ၎င်းတို့ထံ ဖြစ်ပျက်သည့်အခါ ဘုရားသခင်၏ ရည်ရွယ်ချက်များနှင့် သဘောထားများအပြင် ၎င်းတို့ ခံယူသင့်သည့် နေရာနှင့် လိုက်လျှောက်သင့်သည့် စည်းမျဉ်းများ၊ ပြီးလျှင် ၎င်းတို့ ရှိသင့်သည့် သဘောထားကို သဘောပေါက်နိုင်ခြင်း ရှိမရှိဟူသည်ကို ကြည့်လော့။ သင်သည် ဤအရာအားလုံးကို နားလည်နိုင်ပါက သင်၌ အစွမ်းအစရှိသည်။ သင်နားလည်သည့်အရာသည် သင်၏ တကယ့်အသက်တာတွင် သင့်အတွက် ဘုရားသခင် စီစဉ်ညွှန်ကြားသည့် အရာအားလုံးနှင့် လားလားမျှ မသက်ဆိုင်ပါက သင်၌ အစွမ်းအစ မရှိ၊ သို့မဟုတ် သင့်အစွမ်းအစက ညံ့ဖျင်း၏။ ပေတရုနှင့် ယောဘတို့၏ စစ်မှန်သော ဝိညာဉ်ရင့်ကျက်မှုသည် မည်သို့ဖြစ်လာသနည်း၊ ပြီးလျှင် ၎င်းတို့သည် နောက်ဆုံးတွင် ဘုရားသခင်၌ ၎င်းတို့၏ ယုံကြည်မှုမှ ၎င်းတို့ရရှိသည့်အရာကို မည်သို့ရရှိခဲ့ပြီး ၎င်းတို့ရိတ်သိမ်းခဲ့သည့်အရာကို မည်သို့ရိတ်သိမ်းခဲ့သနည်း။ ယနေ့ခေတ် သင်တို့အကျိုးခံစားရသည့် အရာကို ၎င်းတို့ လုံးဝ မခံစားခဲ့ရပေ။ သင်တို့၌ သမ္မာတရားကို မိတ်သဟာယ ပြုပေးမည့်သူတစ်ဦး၊ သင်တို့အတွက် ထောက်ပံ့ဖို့၊ ထောက်ခံအားပေးဖို့နှင့် သင်တို့ကို ကူညီဖို့ လူတစ်ဦး အစဉ်ရှိသည်။ သင်တို့ အမှုကိစ္စများကို စစ်ဆေးရာတွင် ကူညီဖို့လူတစ်ဦး အစဉ်သဖြင့် ရှိသည်။ ၎င်းတို့တွင် ဤအရာတစ်ခုမျှ မရှိချေ။ ၎င်းတို့နားလည်ခဲ့သည့် သမ္မာတရား အများစုသည် ၎င်းတို့၏နေ့စဉ်အသက်တာများတွင် ၎င်းတို့ နားလည်သဘောပေါက်ခဲ့သည့်အရာ၊ တွေ့ကြုံခဲ့သည့်အရာ၊ ဖြည်းဖြည်းချင်း သဘောပေါက်ခဲ့ပြီး ဖြတ်ကျော်ခဲ့ရသည့်အရာများမှ ရရှိခဲ့ခြင်း ဖြစ်သည်။ ဤသည်မှာ မြင့်မားသည့် အစွမ်းအစရှိခြင်းကို ဆိုလိုသည့် အရာပင် ဖြစ်လေသည်။ လူများက ထိုသို့သော အစွမ်းအစကို မပိုင်ဆိုင်ဘဲ သမ္မာတရားနှင့် ကယ်တင်ခြင်းအပေါ် ဤသဘောထားမျိုး မရှိသည့်အခါ ၎င်းတို့သည် သမ္မာတရားကို ရှာဖွေမည် မဟုတ်သကဲ့သို့ အရာရာတွင် သမ္မာတရားကို လက်တွေ့လုပ်ဆောင်ဖို့ အာရုံစိုက်မည် မဟုတ်ချေ။ အကျိုးဆက်အနေဖြင့် ၎င်းတို့သည် သမ္မာတရားကို ရရှိနိုင်ခြင်း မရှိကြပေ။ ယောဘနှင့် ပေတရုတို့၏ ဇာတ်လမ်းများကို ကြားပြီးနောက်တွင် လူအများစုက ၎င်းတို့ကို အားကျကြသည်။ သို့ရာတွင် အချိန်တစ်ခုကြာ အားကျပြီးနောက် ထိုကိစ္စကို အလေးအနက် မထားကြတော့ပေ။ ၎င်းတို့ထံ အမှုအရာများ ဖြစ်ပျက်သည့်အခါ ၎င်းတို့သည်လည်း ယောဘနှင့် ပေတရုကဲ့သို့ အထင်ကရ စကားများကို ပြောနိုင်ကြသည်ဟု ခံစားကြသောကြောင့် ဤအရာများကို ရိုးရှင်းသည်ဟု တွေးထင်ကြလေသည်။ ယခု ငါတို့ ဤအရာများကို စဉ်းစားသည့်အခါ ယင်းတို့မှာ မရိုးရှင်းပေ။

ဓမ္မသစ်ကျမ်းတွင် ခရစ်ဝင်ကျမ်းလေးကျမ်းမှလွဲ၍ ပေါလု၏ ဩဝါဒစာများက နေရာအများဆုံး ယူထားသည်။ အချိန်ကာလတစ်ခုတည်းအတွင်းတွင်ပင် ပေါလုနှင့် ပေတရုတို့သည် တူညီသည့်အလုပ်ကို လုပ်ခဲ့ကြသည်မှာ သေချာသလောက် ဖြစ်သော်လည်း ပေါလု၏ နာမည်ဂုဏ်သတင်းသည် ပေတရုထက် များစွာ သာ၍ ကြီးမားခဲ့သည်။ ဤအခြေအနေနှစ်ခုမှ မည်သည့်အရာကို ငါတို့ မြင်နိုင်သနည်း။ ဤလူနှစ်ဦးလျှောက်လှမ်းခဲ့သည့် လမ်းကြောင်းနှစ်ခုကို ငါတို့ မြင်နိုင်သည်။ ပေါလု၏ ဩဝါဒစာများမှ စာကြောင်းများစွာကို နောင်မျိုးဆက်များက ဆောင်ပုဒ်များအဖြစ် ခံယူခဲ့ကြပြီး လူတိုင်းက မိမိတို့ကိုယ်ကို လှုံ့ဆော်ရန် ပေါလု၏ ကျော်ကြားသော ဆိုရိုးများကို အသုံးပြုခဲ့ကြသည်။ အကျိုးဆက်အနေဖြင့် ၎င်းတို့အားလုံးသည် မှားယွင်းသည့် လမ်းကြောင်းပေါ်တွင် အဆုံးသတ်သွားခဲ့ကြပြီး များစွာသောသူတို့သည် အန္တိခရစ်များ၏ လမ်းကြောင်းထဲသို့ပင် ထိုးဆင်းသွားကြသည်။ နှိုင်းယှဉ်ကြည့်ရာတွင် ပေတရုသည် မိမိကိုယ်ကို လူသိရှင်ကြား ပြသည်မှာ ရှားပါးလှသည်။ အခြေခံအားဖြင့် မည်သည့် စာအုပ်ကိုမျှ သူ မရေးခဲ့၊ နက်နဲပြီး နားလည်ရခက်သော အယူဝါဒများကို ဖော်ထုတ်တင်ပြခဲ့ခြင်းမရှိသည့်အပြင် ထိုအချိန်က ညီအစ်ကို မောင်နှမများကို သွန်သင်ကာ ကူညီရန် အဆင့်မြင့်ပုံရသော ဆောင်ပုဒ်များ၊ သို့မဟုတ် သီအိုရီများကို မပေးခဲ့သကဲ့သို့ အနာဂတ်မျိုးဆက်များကို လွှမ်းမိုးရန် မြင့်မားသည့် သီအိုရီများကိုလည်း မပေးခဲ့ပေ။ သူသည် ဘုရားသခင်ကို လက်တွေ့ကျပြီး တည်ငြိမ်သော ပုံစံဖြင့် ချစ်ကာ စိတ်ကျေနပ်စေရန်သာ ကြိုးစားခဲ့သည်။ ဤသည်မှာ ၎င်းတို့နှစ်ဦး လျှောက်လှမ်းသည့် လမ်းကြောင်းများကြား ခြားနားချက်ဖြစ်သည်။ အဆုံးတွင် ပေါလုသည် အန္တိခရစ်တို့၏ လမ်းကြောင်းကို လျှောက်ခဲ့ပြီး ပျက်စီးဆုံးရှုံးခဲ့သော်လည်း ပေတရုကမူ သမ္မာတရားကို လိုက်စားကာ ဘုရားသခင်ကို ချစ်ခင်သည့် လမ်းကြောင်းအား လျှောက်ခဲ့ပြီး စုံလင်အောင်ပြုခြင်းခံခဲ့ရသည်။ ၎င်းတို့ လျှောက်သည့် လမ်းကြောင်းများကို စဉ်းစားခြင်းအားဖြင့် ဘုရားသခင်က မည်သည့်လူစားမျိုးများကို အလိုရှိကြောင်း၊ မည်သည့် လူစားမျိုးများကို နှစ်သက်ခြင်း မရှိကြောင်း၊ ဘုရားသခင် မနှစ်သက်သော လူတို့၏ ထုတ်ဖော်ခြင်းများနှင့် သရုပ်သကန်များ၊ ဤလူများက မည်သည့် လမ်းကြောင်းမျိုး လျှောက်လှမ်းကြသည်၊ ဘုရားသခင်နှင့် မည်သည့် ဆက်ဆံရေးမျိုး ရှိကြပြီး မည်သည့်အရာများကို ၎င်းတို့ အာရုံစိုက်ကြသည်ဆိုသည်တို့ကို သင် မြင်နိုင်ပေသည်။ ပေါလုတွင် အစွမ်းအစရှိသည်ဟု သင်တို့ပြောမည်လော။ ပေါလု၏ အစွမ်းအစသည် မည်သည့်အတန်းအစားနှင့် သက်ဆိုင်သနည်း။ (ယင်းမှာ အလွန်ကောင်းမွန်ပါသည်။) သင်တို့သည် အလွန်များစွာသော ဒေသနာများကို ကြားနာပြီးဖြစ်သော်လည်း နားမလည်ကြပေ။ ပေါလု၏ အစွမ်းအစကို အလွန် ကောင်းမွန်သည်ဟု ယူဆနိုင်သလော။ (မဟုတ်ပါ၊ ညံ့ဖျင်းပါသည်။) ပေါလု၏ အစွမ်းအစသည် အဘယ့်ကြောင့် ညံ့ဖျင်းရသနည်း။ (သူက သူ့ကိုယ်သူ မသိသကဲ့သို့ ဘုရားသခင်၏ နှုတ်ကပတ်တော်များအပေါ် သဘောပေါက်နားလည်နိုင်ခြင်း မရှိခဲ့သောကြောင့် ဖြစ်ပါသည်။) ယင်းမှာ သူသည် သမ္မာတရားကို သဘော‌ပေါက်နားလည်ခြင်း မရှိသောကြောင့် ဖြစ်သည်။ သူသည်လည်း သခင်ယေရှုဟောကြားသည့် ဒေသနာများကို ကြားခဲ့ပြီးဖြစ်သည်၊ ထို့အပြင် သူ အလုပ်လုပ်ခဲ့သည့် ကာလအတွင်းတွင် သန့်ရှင်းသောဝိညာဉ်တော်၏ အလုပ်လည်း ရှိခဲ့သည်မှာ မှန်ပေသည်။ သို့ဆိုလျှင် သူသည် ထိုအလုပ်များ အားလုံးကို လုပ်ခဲ့ပြီး ထိုဩဝါဒစာများ အားလုံးကို ရေးသားခဲ့ကာ ထိုအသင်းတော်များ အားလုံးတွင် ခရီးသွားလာခဲ့သည့်အချိန်တွင် မည်သို့လျှင် သမ္မာတရားအကြောင်း တစ်ခုမျှ နားမလည်ဘဲ အယူဝါဒမျှလွဲ၍ မည်သည့်အရာကိုမျှ မဟောကြားဆဲ ဖြစ်ခဲ့သနည်း။ ယင်းမှာ မည်သည့် အစွမ်းအစမျိုးဖြစ်သနည်း။ ညံ့ဖျင်းသည့် အစွမ်းအစတစ်ခု ဖြစ်သည်။ ထို့အပြင် ပေါလုသည် သခင်ယေရှုကို နှိပ်စက်ညှဉ်းပန်းခဲ့ပြီး သူ၏ တပည့်တော်များကို ဖမ်းဆီးခဲ့သည်။ ထို့နောက်တွင် သခင်ယေရှုက သူ့ကို ကောင်းကင်မှ ကြီးမားသော အလင်းဖြင့် ရိုက်ချခဲ့သည်။ ပေါလုသည် သူ့အပေါ် ကျရောက်ခဲ့သည့် ဤကြီးမားသော အဖြစ်အပျက်ကို မည်သို့ ချဉ်းကပ်ကာ နားလည်ခဲ့သနည်း။ သူ၏ သိနားလည်မှုပုံစံသည် ပေတရုနှင့် ကွာခြား၏။ သူက၊ “သခင်ယေရှုက ငါ့ကို ရိုက်ချခဲ့သည်၊ ငါ အပြစ်ပြုမိပြီဖြစ်သောကြောင့် ဤအတွက် ထေမိစေရန် ငါ အလုပ်ပိုကြိုးစားရမည်ဖြစ်ပြီး ငါ၏ ကောင်းမှုများက အပြစ်များနှင့် ဟန်ချက်ညီသွားသည်နှင့် ငါ ဆုလာဘ်ချီးမြှင့်ခြင်း ခံရမည်ဖြစ်သည်”ဟု စဉ်းစားခဲ့သည်။ သူသည် မိမိကိုယ်ကို သိရှိခဲ့သလော။ မသိရှိခဲ့ပေ။ သူက “ငါ၏ မလိုမုန်းထားသော သဘာဝ၊ ငါ၏ အန္တိခရစ် သဘာဝကြောင့် သခင်ယေရှုကို ငါ ဆန့်ကျင်ခဲ့သည်။ သခင်ယေရှုကို ငါ ဆန့်ကျင်မိခဲ့သည်။ ငါနှင့်ပတ်သက်၍ ကောင်းသောအရာ တစ်ခုမျှ မရှိပါ”ဟု မပြောခဲ့ပေ။ သူသည် ထိုသို့သော မိမိကိုယ်ကို သိသည့်အသိ ပိုင်ဆိုင်ခဲ့သလော။ (မပိုင်ဆိုင်ခဲ့ပါ။) သူသည် ဤအဖြစ်အပျက်ကို သူ၏ ဩဝါဒစာများတွင် မည်သို့ မှတ်တမ်းတင်ခဲ့သနည်း။ ထိုအရာအပေါ် သူ၏ အမြင်သည် အဘယ်နည်း။ (အလုပ်လုပ်ရန် ဘုရားသခင်၏ ခေါ်ခြင်းခံခဲ့ရသည်ဟု သူ ခံစားခဲ့ပါသည်။) ဘုရားသခင်က သူ့အပေါ် ကြီးမားသည့် အလင်းထွန်းလင်းစေခြင်းအားဖြင့် သူ့ကို ခေါ်ခဲ့ပြီးဖြစ်ကြောင်းနှင့် သူ့ကို ဘုရားသခင် ကြီးမားစွာ စတင်အသုံးပြုမည်ဖြစ်ကြောင်း သူ ယုံကြည်ခဲ့သည်။ မိမိကိုယ်ကို သိသောအသိ အနည်းငယ်မျှမရှိဘဲ ဤသည်မှာ သူ ဆုလာဘ်ချီးမြှင့်ခံရကာ သရဖူဆောင်ခြင်းခံရမည့် အားအကောင်းဆုံးသော သက်သေဖြစ်သည့်အပြင် ဆုလာဘ်များနှင့် သရဖူကို ရရှိရန် သူ အသုံးပြုနိုင်မည့် အကြီးမားဆုံးသော အရင်းအနှီးဖြစ်သည်ဟု သူ ယုံကြည်ခဲ့သည်။ ထို့အပြင် သူ၏ စိတ်နှလုံး အတွင်းနက်နက်တွင် ဆူးတစ်ခု စူးသည့်ဒဏ်ကို ခံစားခဲ့ရသည်။ ဤဆူးသည် မည်သည့်အရာ ဖြစ်သနည်း။ ဤသည်မှာ သခင်ယေရှုကို သူ၏ အရူးအမူး အတိုက်အခံ လုပ်ခြင်းအတွက် အပြစ်ဒဏ်ပေးခြင်းတစ်ခုအနေဖြင့် သူ့ကို ဘုရားသခင်ပေးသည့် ရောဂါတစ်ခုဖြစ်သည်။ ဤကိစ္စရပ်ကို သူ မည်သို့ ကိုင်တွယ်ဖြေရှင်းခဲ့သနည်း။ သူ၏ စိတ်နှလုံးတွင် အမြဲ နာမကျန်းမှုတစ်ခု ရှိခဲ့ပြီး “ဤသည်မှာ ငါ့ဘဝ၏ အကြီးမားဆုံး အမှားဖြစ်သည်။ ဘုရားက ခွင့်လွှတ်နိုင်ခြင်းရှိမရှိ ငါ မသိပါ။ ကံကောင်းထောက်မ၍ သခင်ယေရှုက ငါ့ဘဝကို ချမ်းသာပေးခဲ့ပြီး ဧဝံဂေလိ ဖြန့်ဝေဖို့ တာဝန်ပေးခဲ့သည်။ ဤသည်မှာ ငါ့ကိုယ်ငါ အဖတ်ဆယ်ဖို့ အခွင့်ကောင်းတစ်ခု ဖြစ်သည်။ ဧဝံဂေလိကို အစွမ်းသတ္တိရှိသမျှဖြင့် ငါ ဖြန့်ဝေသင့်ပြီး ငါ၏ အပြစ်များ ခွင့်လွှတ်ခြင်းခံရနိုင်ရုံမက သရဖူနှင့် ဆုလာဘ်များကိုလည်း ငါ ရရှိကောင်း ရရှိနိုင်သည်။ ယင်းမှာ အလွန်ကောင်းပေမည်”ဟု တွေးခဲ့သည်။ သို့ရာတွင် ဤဆူးကို သူ မည်သည့်အခါတွင်မျှ မဖယ်ရှားနိုင်ခဲ့ပေ။ ယင်းက သူ၏ စိတ်နှလုံးတွင် အံ့ဩတုန်လှုပ်ခြင်း ဖြစ်စေခဲ့သည်။ ထိုအရာနှင့်ပတ်သက်၍ သူ အမြဲ စိတ်မအေးခဲ့ရပေ။ “ဤကမ်းကုန်သော အမှားအတွက် ငါ မည်သို့ ပြုပြင်နိုင်မည်နည်း။ ငါ၏ ရှေ့ရေး သို့မဟုတ် ငါ ရရှိရန် မျှော်လင့်သည့် သရဖူကို မထိခိုက်စေရန် ထိုအမှားကို ငါ မည်သို့ ပယ်ဖျက်နိုင်မည်နည်း။ သခင့်အတွက် ငါ အလုပ်ပိုမို လုပ်ဆောင်ရမည်၊ သာ၍ကြီးမားသည့် အဖိုးအခတစ်ခု ပေးရမည်၊ ပိုများသည့် ဩဝါဒစာများကို ရေးပြီး ပြေးလွှားအလုပ်လုပ်ရင်း စာတန်နှင့် တိုက်ခိုက်ရင်းနှင့် ကောင်းမွန်သည့် သက်သေခံချက်ကို ခံရင်း အချိန်ပို ကုန်ဆုံးရမည်”ဟူ၍ ဖြစ်သည်။ ဤသည်မှာ ထိုအရာကို သူ ချဉ်းကပ်ပုံဖြစ်သည်။ သူသည် နောင်တတစ်ခုတလေ ရှိခဲ့သလော။ (မရှိခဲ့ပါ။) သူ့ကိုယ်သူ သိသည့်အသိ တစ်ခုတလေရှိရန် မဆိုထားနှင့်၊ နောင်တ အနည်းငယ်မျှပင် မရှိခဲ့ပေ။ သူသည် ဤအရာများထဲမှ မည်သည့်အရာမျှ မရှိခဲ့ပေ။ ဤအရာက ပေါလု၏ အစွမ်းအစနှင့်ပတ်သက်၍ ပြဿနာတစ်ခု ရှိကြောင်းနှင့် သူသည် သမ္မာတရားကို သဘောပေါက်နားလည်နိုင်စွမ်း မရှိကြောင်း ပြသည်။ တစ်စိတ်တစ်ပိုင်းအနေဖြင့် သူ၏ လူ့သဘာဝနှင့် သူ လိုက်စားသည့်အရာကြောင့်၊ ပြီးလျှင် တစ်စိတ်တစ်ပိုင်းအနေဖြင့် သူ၏ အစွမ်းအစကြောင့် ဤအရာများကို သူ သဘောမပေါက်နိုင်ခဲ့သကဲ့သို့ “လူသည် စာတန်၏ ဖောက်ပြန်ပျက်စီးစေခြင်းကို အလွန်အမင်း ခံရပြီးဖြစ်သည်။ လူ၏ သဘာဝသည် အလွန် ဆိုးရွားသည်၊ အလွန် ကောက်ကျစ်ဆိုးယုတ်သည်။ လူ၏ သဘာဝသည် စာတန်နှင့် အန္တိခရစ်တို့၏ သဘာဝဖြစ်သည်။ ဤသည်မှာ လူသားမျိုးနွယ်နှင့်ဆိုင်သည့် ဘုရားသခင်၏ ရွေးနုတ်ခြင်း ရင်းမြစ်တွင်ရှိသည်။ လူသည် ဘုရားသခင်၏ ရွေးနုတ်ခြင်း လိုအပ်နေသည်။ ထို့ကြောင့် လူသည် ဘုရားသခင်၏ ရွေးနုတ်ခြင်းကို လက်ခံရန် သူ၏ ရှေ့မှောက်သို့ မည်သို့ လာသင့်သနည်း”ဟု သူ သဘောပေါက်ခြင်း မရှိပေ။ ထိုသို့သော အရာများကို သူ လုံးဝ မပြောခဲ့ပေ။ ယေရှုကို သူ အဘယ်ကြောင့် အတိုက်အခံလုပ်ပြီး ရှုတ်ချခဲ့သည်ကို သူ လုံးဝ နားမလည်ခဲ့ပေ။ သူသည် အဓိက တရားခံဖြစ်ကြောင်းကို ဝန်ခံခဲ့သော်လည်း ထိုကိစ္စရပ်ကို လုံးဝ မသုံးသပ်ခဲ့ပေ။ ထိုသို့သော ဆိုးရွားသည့် အပြစ်များအား မည်သို့ ထေမိနိုင်မည်၊ သူ၏ အပြစ်များအတွက် မည်သို့ သူ ပြေရာပြေကြောင်း ပြုလုပ်နိုင်မည်၊ ချီးမွမ်းထိုက်သော လုပ်ဆောင်ချက်များဖြင့် သူ၏ အပြစ်များအတွက် ပေးချေနိုင်ကာ နောက်ဆုံးတွင် သူ မျှော်လင့်ခဲ့သည့် သရဖူနှင့် ဆုလာဘ်များအား မည်သို့ ရရှိနိုင်ဦးမည်ဆိုသည်တို့ကိုသာ သူ ပြန်ပြောင်း ပြောဆိုနေခဲ့သည်။ သူ့ထံ မည်သည့်အရာ ဖြစ်ပျက်ခဲ့သည်ဖြစ်စေ၊ သူ့ထံ ဖြစ်ပွားခဲ့သည့်အရာများမှနေ၍ သမ္မာတရားကိုဖြစ်စေ၊ ဘုရားသခင်၏ ရည်ရွယ်ချက်များကိုဖြစ်စေ သူ နားမလည်နိုင်ခဲ့ပေ။ ဘုရားသခင်၏ ရည်ရွယ်ချက်များကို သူ လုံးဝ နားမလည်ခဲ့။ သမ္မာတရားကို သဘောပေါက်နားလည်ခြင်းအတွက်မူ ပေါလုသည် အဆိုးရွားဆုံးသော လူဖြစ်သောကြောင့် ပေါလု၏ အစွမ်းအစက အဆိုးဆုံးဖြစ်သည်ဟု ငါတို့ ပြောနိုင်သည်။

အလွန် ညံ့ဖျင်းသည့် အစွမ်းအစရှိသော လူတို့သည် သမ္မာတရားကို နားလည်နိုင်သလော။ (နားမလည်နိုင်ပါ။) သမ္မာတရားကို နားမလည်နိုင်သည့်လူတို့သည် ကယ်တင်ခံရနိုင်သလော။ (ကယ်တင်မခံရနိုင်ပါ။) ကယ်တင်ခံရလိုသည့် လူတို့သည် ကျေနပ်ဖွယ်ရာ အစွမ်းအစ ရှိရမည်။ ၎င်းတို့အနေဖြင့် အနည်းဆုံး သာမန် အစွမ်းအစ ရှိရမည်ဖြစ်ပြီး အစွမ်းအစတွင် အလွန် ညံ့ဖျင်း၍မရပေ။ ၎င်းတို့အနေဖြင့် သမ္မာတရား သိနားလည်မှုတစ်ခု ရရှိရမည်ဖြစ်သည်။ သမ္မာတရားကို ၎င်းတို့ သဘောပေါက်နိုင်သည့် အတိုင်းအတာ မည်မျှရှိသည်ဖြစ်စေ သမ္မာတရားကို ၎င်းတို့ သိနားလည်မှုအရ၊ ၎င်းတို့သည် အနည်းဆုံးအနေဖြင့် မိမိတို့ကိုယ်ကို သိရှိလာရမည်ဖြစ်ကာ သမ္မာတရားအား မည်သို့ လက်တွေ့လုပ်ဆောင်ရမည်ကို သိရှိရမည်ဖြစ်သည်။ ဤနည်းဖြင့် ၎င်းတို့ ကယ်တင်ခံရနိုင်ပေသည်။ ဤနည်းဖြင့် ၎င်းတို့ ကယ်တင်ခံရနိုင်သည်ဟု ငါ အဘယ်ကြောင့် ပြောသနည်း။ သင်၏ နေ့စဉ်ဘဝတွင် အတားအဆီးဖြစ်သည့် အရာများကို သမ္မာတရားနှင့် သင် ချိတ်ဆက်နိုင်ပြီး ဘုရားနှုတ်ကပတ်တော်များကို အခြေခံ၍ အမှုအရာများကို ရှုမြင်နိုင်ပြီး သဘောထားနိုင်သည့်အခါ ဘုရားနှုတ်ကပတ်တော်များကို သင်၏ လက်တွေ့ဘဝထဲသို့ သင် ဆောင်ကြဉ်းနိုင်လိမ့်မည်ဖြစ်ကာ ဤအခြေခံအုတ်မြစ်ပေါ်တွင် သင်သည် ဘုရားနူတ်ကပတ်တော်များ၏ ပြုပြင်ခြင်းကို ခံရလျက် ဘုရားနှုတ်ကပတ်တော်များ၏ တရားစီရင်ခြင်းများအပြင် သူ့နှုတ်ကပတ်တော်များရှိ စမ်းသပ်မှုများနှင့် စစ်ဆေးမှုများကို လက်ခံနိုင်လိမ့်မည်။ သို့မဟုတ်လျှင် သမ္မာတရားကို သင် နားမလည်ပါက သူ့နှုတ်ကပတ်တော်များ၏ တရားစီရင်ခြင်းများ၊ စမ်းသပ်မှုများနှင့် စစ်ဆေးမှုများကို လက်ခံရန် အရည်အချင်းပင်ပြည့်မီမည် မဟုတ်ပေ။ ဘုရားနှုတ်ကပတ်တော်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို လက်မခံမီတွင် သင်သည် သမ္မာတရားအချို့ကို အနည်းဆုံး နားလည်ရမည်၊ ဘုရားသခင်ကို ကျိုးနွံနာခံသည့် သဘောထားတစ်ခု ရှိရမည်ဖြစ်ပြီး တစ်နည်းနည်းဖြင့် ပြောင်းလဲပြီးဖြစ်ရမည်။ ဘုရားသခင်၏ လုပ်ဆောင်ချက်များကို မည်သည့် သဘောထား၊ စိတ်နေစိတ်ထားနှင့် ရှုထောင့်အမြင်တို့ဖြင့် သင် ကိုင်တွယ်သင့်သည်ကိုလည်း သင် သိရမည်။ ဤအရာများအားလုံးတွင် သမ္မာတရား ပါဝင်သည်။ ဤအရာများကို သာမန်ကာလျှံကာ သဘောထားရန် ရိုးရှင်းသည့် ဘာသာတရားဆောင်ပုဒ်များ၊ ဘာသာရေး ဟိတ်ဟန်များနှင့် စည်းမျဉ်းစည်းကမ်းများကို အသုံးပြုခြင်းသည် သမ္မာတရားနှင့် တစ်စုံတစ်ရာ ဆက်စပ်မှုရှိခြင်း မဟုတ်သကဲ့သို့ ကောင်းမှုအချို့ကို လုပ်ဆောင်ခြင်းသက်သက်တွင် သမ္မာတရားကို လက်တွေ့လုပ်ဆောင်မှု ပါဝင်ခြင်းလည်း မဟုတ်ပေ။ ထိုမျှ မရိုးရှင်းပေ။ သင် သိသည့်အရာ၊ သင် တွေ့ကြုံသည့်အရာနှင့် သင့်အနီးနားတွင် ဖြစ်ပျက်သည့်အရာတို့နှင့် စပ်လျဉ်း၍ သင် လိုက်နာစောင့်ထိန်းသင့်သည့် စည်းမျဉ်းများကို သင်၏ စိတ်နှလုံးတွင် သိရှိရမည်။ ဤနည်းဖြင့်သာ သင်သည် သမ္မာတရားနှင့် ပတ်သက်ပေသည်။ ထို့အပြင် ဘုရားသခင်က သင့်ကို လုပ်ဆောင်စေသည့်အရာများကို သင် သဘောထားပုံ၊ သင့်ကို ဘုရားသခင် ဆက်ဆံသည့် ပုံစံနှင့် သဘောထားတို့ကို သင် သဘောထားပုံအပြင် သင် ခံယူသည့် သဘောထားနှင့် ရှုထောင့်အမြင်တို့သည် သမ္မာတရား ပါဝင်ရမည်။ ဤနည်းဖြင့်သာ သင်သည် အသက်ဝင်ရောက်မှုရှိနိုင်ပေသည်။ သို့မဟုတ်လျှင် ဘုရားသခင်သည် သင့်အပေါ် မည်သည့်အမှုမျှ လုပ်ဆောင်နိုင်လိမ့်မည် မဟုတ်။ သင် နားလည်သလော။ (နားလည်ပါသည်။) စည်းမျဉ်းစည်းကမ်းများကို လိုက်နာစောင့်ထိန်းသည့်၊ အယူဝါဒများအကြောင်း ပြောဆိုပြီး သဘောကောင်းပုံ ဟန်ဆောင်သည့် ဘာသာတရားများထဲမှ လူများကို ကြည့်လော့။ ၎င်းတို့၏ လုပ်ရပ်များသည် အပြင်ပန်းတွင် ကောင်းသည့်ပုံရသော်လည်း ဘုရားသခင်သည် ၎င်းတို့အပေါ် မည်သည့်အခါတွင်မျှ အမှုမပြုသနည်း။ အဘယ်ကြောင့်ဆိုသော် ၎င်းတို့ လုပ်ဆောင်သည့်အရာများနှင့် ၎င်းတို့၏ ကောင်းမွန်သည့် လုပ်ဆောင်ချက်များအားလုံး သမ္မာတရား မပါဝင်သောကြောင့် ဖြစ်သည်။ ၎င်းတို့သည် မိမိတို့၏ အပြုအမူကိုသာ ပြောင်းလဲပြီးဖြစ်သော်လည်း ဤအရာတွင် ၎င်းတို့ စိတ်သဘောထားထဲက ပြောင်းလဲခြင်း မပါဝင်ပေ။ အဘယ်ကြောင့်ဆိုသော် ယင်းတို့သည် ဘုရားသခင်၏ သတ်မှတ်ချက်များ၊ စံနှုန်းများနှင့် ကိုက်ညီခြင်း မရှိသောကြောင့် ဖြစ်သည်။ ထိုအရာမှာ အခြေခံမူလတန်းကျောင်းမှ ယခုတင် ကျောင်းပြီးထားသည့် ကလေးတစ်ဦးက တက္ကသိုလ်သို့ တန်းသွားချင်သည့်အလား ဖြစ်သည်။ ထိုအရာ ဖြစ်နိုင်သလော။ ၎င်းတို့ အရည်အချင်း မပြည့်မီသောကြောင့် လုံးဝ မဖြစ်နိုင်ပေ။ ထို့ကြောင့် လူတို့ လျှောက်လှမ်းသည့် လမ်းကြောင်းအကြောင်းကို ငါတို့ ပြောဆိုနေသည်ဖြစ်စေ၊ ၎င်းတို့၏ လူ့သဘာဝနှင့် အစွမ်းအစအကြောင်းကို ပြောဆိုနေသည်ဖြစ်စေ လူတို့သည် အနည်းဆုံးအနေဖြင့် ကယ်တင်ခြင်းအတွက် လိုအပ်သည့် သတ်မှတ်ချက်များကို ပြည့်မီသင့်ကြပေသည်။ ဂဃနဏဆိုရလျှင် သမ္မာတရားကို ၎င်းတို့ နားလည်ရမည်၊ ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားရမည်ဖြစ်ပြီး ဘုရားသခင်ကို အမှန်တကယ် ကျိုးနွံနာခံနိုင်ရမည်ဖြစ်သည်။

လူတို့၏ အစွမ်းအစများကို ငါတို့ မည်သို့ တိုင်းတာကြသနည်း။ ဤအရာကို လုပ်ဆောင်ရန် သင့်လျော်သည့် နည်းလမ်းမှာ သမ္မာတရားအပေါ် ၎င်းတို့၏ သဘောထားနှင့် သမ္မာတရားကို ၎င်းတို့ သဘောပေါက်နားလည်နိုင်ခြင်း ရှိမရှိ ဟူသည်တို့ကို ကြည့်ခြင်းအားဖြင့် ဖြစ်သည်။ လူအချို့သည် အထူးပြုပညာအချို့ကို အလွန်မြန်ဆန်စွာ သင်ယူနိုင်ကြသော်လည်း သမ္မာတရားကို ကြားသည့်အခါ ၎င်းတို့ မရှင်းမလင်း ဖြစ်လာကာ ငိုက်မြည်းသွားကြသည်။ ၎င်းတို့၏ စိတ်နှလုံးများတွင် ၎င်းတို့သည် နားဝေတိမ်တောင် ဖြစ်လာကြသည်၊ ၎င်းတို့ ကြားသည့်မည်သည့်အရာကိုမျှ နားမဝင်သကဲ့သို့ ကြားနေသည့်အရာကို နားလည်းမလည်ကြပေ။ ယင်းမှာ ညံ့ဖျင်းသည့် အစွမ်းအစ ဟူသည့်အရာဖြစ်သည်။ လူအချို့နှင့်ပတ်သက်၍ ၎င်းတို့တွင် ညံ့ဖျင်းသည့် အစွမ်းအစ ရှိကြောင်းကို ၎င်းတို့အား သင် ပြောပြသည့်အခါ လက်မခံကြပေ။ အလွန် ပညာတတ်ပြီး နှံ့စပ်ခြင်းက ၎င်းတို့အနေဖြင့် အစွမ်းအစကောင်း ရှိသည့်သဘော ဖြစ်သည်ဟု ၎င်းတို့ တွေးထင်ကြသည်။ ကောင်းမွန်သည့် ပညာရေးက မြင့်မားသည့် အစွမ်းအစကို ပြသသလော။ မပြသပေ။ လူတို့၏ အစွမ်းအစကို မည်သို့ တိုင်းတာသင့်သနည်း။ ဘုရားနှုတ်ကပတ်တော်များနှင့် သမ္မာတရားကို ၎င်းတို့ သဘောပေါက်နားလည်သည့် ပမာဏပေါ် အခြေခံ၍ တိုင်းတာသင့်ပေသည်။ ဤသည်မှာ ထိုအရာကို လုပ်ဆောင်ခြင်းနှင့်ဆိုင်၍ အတိကျအမှန်ကန်ဆုံးသော နည်းလမ်းဖြစ်သည်။ လူအချို့သည် ကျလောက်အောင် အပြောကောင်းကြသည်၊ ဉာဏ်ထက်ကြပြီး အခြားလူတို့ကို ကိုင်တွယ်ရာတွင် အထူးသဖြင့် ကျွမ်းကျင်ကြသည်။ သို့သော် တရားဒေသနာများကို နားထောင်ကြသည့်အခါ မည်သည့်အရာကိုမျှ ၎င်းတို့ လုံးဝ နားမလည်နိုင်ကြသကဲ့သို့ ဘုရားနှုတ်ကပတ်တော်များကို ဖတ်ရှုသည့်အခါ ယင်းတို့ကို သဘောပေါက်နားလည်ခြင်း မရှိကြချေ။ ၎င်းတို့၏ အတွေ့အကြုံဆိုင်ရာ သက်သေခံချက်အကြောင်းကို ၎င်းတို့ ပြောဆိုသည့်အခါ အတွေ့အကြုံနုသူများသာ ဖြစ်သည်ကို မိမိတို့ကိုယ်ကို ထုတ်ဖော်ကာ ၎င်းတို့တွင် ဝိညာဉ်ရေးရာ နားလည်သဘောပေါက်မှုမရှိကြောင်း အခြားသူတို့အား သိစေလျက် စကားများနှင့် အယူဝါဒများကို အမြဲ ပြောဆိုကြလေသည်။ ဤလူများသည် ညံ့ဖျင်းသည့် အစွမ်းအစရှိသည့် လူများ ဖြစ်သည်။ ထို့ကြောင့် ထိုသို့သောလူများသည် ဘုရားအိမ်တော်အတွက် အလုပ်လုပ်ရန် အရည်အချင်းရှိကြသလော။ (မရှိကြပါ။) အဘယ်ကြောင့်နည်း။ (၎င်းတို့တွင် သမ္မာတရား စည်းမျဉ်းများ ကင်းမဲ့သည်။) မှန်ပေ၏၊ ဤသည်မှာ ယခု သင်တို့ နားလည်သင့်သည့်အရာတစ်ခု ဖြစ်သည်။ ဘုရားအိမ်တော်အတွက် အလုပ်လုပ်နေကြောင်း ပြောဆိုရန် အခြားသော နည်းလမ်းမှာ မိမိတာဝန်ကို ထမ်းဆောင်ခြင်း ဖြစ်သည်။ မိမိတာဝန်ကို ထမ်းဆောင်ခြင်းနှင့် ပတ်သက်လာသည့်အခါ ဤအရာတွင် သမ္မာတရား၊ ဘုရားသခင်၏ အမှုတော်၊ ပြုမူနေထိုင်မှု စည်းမျဉ်းများနှင့် လူမျိုးစုံကို ဆက်ဆံခြင်းအတွက် နည်းလမ်းများနှင့် စည်းစနစ်များ ပါဝင်၏။ ဤကိစ္စများအားလုံးသည် လူတို့အနေဖြင့် မိမိတို့တာဝန်များကို ထိရောက်ပြီး ကျေနပ်ဖွယ်သော ပုံစံဖြင့် ထမ်းဆောင်နိုင်ခြင်း ရှိမရှိနှင့် ဆက်စပ်မှုရှိပေသည်။ မိမိတာဝန်ကို ထမ်းဆောင်ခြင်းနှင့် ဆက်စပ်သည့် ဤကိစ္စရပ်များတွင် သမ္မာတရား ပါဝင်သလော။ သမ္မာတရား ပါဝင်သည့်တိုင် သမ္မာတရားကို သင် နားမလည်သကဲ့သို့ သင်၏ သေးနုပ်သော ပါးနပ်မှုအပေါ်သာ သင် မှီခိုလျှင် သင်သည် ပြဿနာများကို ဖြေရှင်းနိုင်မည်လော၊ ပြီးလျှင် သင်၏တာဝန်ကို ကောင်းမွန်စွာ ထမ်းဆောင်နိုင်လိမ့်မည်လော။ (မဟုတ်ပါ။) မဟုတ်ပေ။ အချို့သော ကိစ္စရပ်များတွင် မည်သည့်အရာမျှ မလွဲချော်လျှင်ပင် ထိုအရာများသည် သမ္မာတရားနှင့် မည်သည့်ပတ်သက်မှုမျှ မရှိသကဲ့သို့ အပြင်ပန်း အမှုအရာများ သက်သက် ဖြစ်ကောင်းဖြစ်နိုင်သည်။ သို့ရာတွင် အပြင်ပန်းအရာများကို လုပ်ဆောင်နေချိန်တွင် စည်းမျဉ်းများကို သင် ပိုင်ဆိုင်ရဦးမည်ဖြစ်ပြီး ယင်းတို့ကို လူတိုင်းက သင့်လျော်သည့်အရာအဖြစ် မှတ်ယူသည့် နည်းလမ်းတစ်ခုဖြင့် ကိုင်တွယ်ရမည်ဖြစ်သည်။ တစ်စုံတစ်ရာကို စည်းမျဉ်းများနှင့်အညီ သင့်ဘာသာ ကိုင်တွယ်ရန် သင် စေခိုင်းခံရပြီး ဤအရာကို သင် လုပ်ဆောင်နေစဉ် မျှော်လင့်မထားသည့် အခြေအနေတစ်ခု ဖြစ်ပေါ်ကာ မည်သို့ ကိုင်တွယ်ဖြေရှင်းရမည်ကို သင်မသိဟု ဆိုပါစို့။ သင်၏ အတွေ့အကြုံအတိုင်း သင် ရှေ့ဆက် လုပ်ဆောင်သင့်သည်ဟု သင် တွေးထင်သော်လည်း အတွေ့အကြုံက သင့်ကို သွန်သင်ခဲ့သည့်အတိုင်း အတိအကျ ဆောင်ရွက်ခြင်းက သင် လုပ်ဆောင်နေသည့်အရာကို ကမောက်ကမသာ ဖြစ်စေလျက် နှောင့်ယှက်ကာ အဖျက်အမှောင့် လုပ်ရုံသာဖြစ်စေသည်။ ဤသည်မှာ အမှားတစ်ခု မဟုတ်လော။ ထိုအရာကိုဖြစ်စေသော အကြောင်းတရားမှာ အဘယ်နည်း။ အဘယ်ကြောင့်ဆိုသော် သင့်ထံတွင် ရှင်းလင်းသည့် သဘောပေါက်နားလည်မှု မရှိသောကြောင့်၊ သမ္မာတရားကို သင် နားမလည်သကဲ့သို့ စည်းမျဉ်းများကို သဘောပေါက်ခြင်း မရှိသောကြောင့် ဖြစ်သည်။ သမ္မာတရားနှင့် စည်းမျဉ်းများ ပါဝင်သည့် ကိစ္စရပ်များကို သင် ကြုံရသည့်အခါတိုင်းတွင် ယင်းတို့ကို သင် ကိုင်တွယ်ဖြေရှင်းနိုင်ခြင်း မရှိသကဲ့သို့ သင်၏ကိုယ်ပိုင် အလိုဆန္ဒက ပွင့်ထွက်လာလိမ့်မည်။ အကျိုးဆက်အနေဖြင့် အသင်းတော်အလုပ်နှင့် ဘုရားအိမ်တော်၏ အကျိုးစီးပွားများကို သင် ထိခိုက်နစ်နာစေကာ မိမိကိုယ်ကို အရှက်ရစေသည်။ လူသား အတွေ့အကြုံနှင့် စည်းစနစ်များကို အခြေခံ၍ ပြဿနာများကို ကိုင်တွယ်ဖြေရှင်းခြင်းသည် ထိရောက်သလော။ (မထိရောက်ပါ။) အဘယ်ကြောင့် မထိရောက်သနည်း။ အဘယ်ကြောင့်ဆိုသော် လူသား အတွေ့အကြုံနှင့် စည်းစနစ်များသည် သမ္မာတရား မဟုတ်သကဲ့သို့ ဘုရားသခင် ရွေးချယ်ထားသော လူတို့သည် ယင်းတို့ကို လက်ခံလိမ့်မည် မဟုတ်သောကြောင့် ဖြစ်သည်။ သင်သည် ပြဿနာများကို လူသား အတွေ့အကြုံနှင့် စည်းစနစ်များကို အသုံးပြုလျက် အမြဲ ကိုင်တွယ်လျှင် ယင်းမှာ သင့်ကိုယ်သင် အမှန်တကယ် ဖြစ်နေသည်ထက် တော်သည်ဟု တွေးထင်သည့်သဘောသာဖြစ်သည် မဟုတ်လော။ ယင်းသည် မာနထောင်လွှားကာ မိမိကိုယ်ကို မှန်သည်ဟု မှတ်ယူခြင်း မဟုတ်လော။ လူအချို့က “ဤကိစ္စရပ်နှင့်စပ်လျဉ်း၍ သမ္မာတရားကို ကျွန်ုပ် နားမလည်ခြင်း မဟုတ်ပါ။ ကျွန်ုပ်၏ စိတ်နှလုံးတွင် ထိုအရာကိုနားလည်ပါသည်။ ထိုအရာနှင့်ပတ်သက်၍ လုံလောက်အောင် ကျွန်ုပ် မစဉ်းစားခြင်းသာ ဖြစ်သည်။ ကျွန်ုပ်သည် ပိုမိုအားထုတ်ကာ ထိုကိစ္စရပ်ကို ပို၍ သေချာစွာ ဆင်ခြင်စဉ်းစားလျှင် ကောင်းစွာ ကျွန်ုပ် ကိုင်တွယ်နိုင်ပါသည်။ ယခင်က ဘာသာတရားမရှိသူများနှင့်အတူ ကိစ္စရပ်များကို တုံ့ပြန်ကာ ကိုင်တွယ်ခဲ့ချိန်တွင် အချို့သော စည်းစနစ်များနှင့် နည်းလမ်းများကို ကျွန်ုပ် အသုံးပြုခဲ့ရသည်။ သို့ရာတွင် ဘုရားအိမ်တော်က ဤလုပ်နည်းကိုင်နည်းများကို ခွင့်မပြုသောကြောင့် မည်သည့်အရာကို လုပ်ဆောင်ရမှန်း ကျွန်ုပ် မသိပါ။ ကိစ္စရပ်ကို ကျွန်ုပ်သဘောဖြင့်သာ ကိုင်တွယ်ဖြေရှင်းခဲ့သောကြောင့် အမှားအနည်းငယ် ပြုလုပ်မိခဲ့သည်မှာ အံ့ဩစရာမရှိပါ”ဟု စောဒကတက်ကြသည်။ ဤလူများသည် မိမိတို့ကိုယ်ကို သိရှိကြသလော။ (မသိရှိကြပါ။) အဘယ်ကြောင့် မိမိတို့ကိုယ်ကို မသိရှိကြသနည်း။ ဤအရာသည် သမ္မာတရားနှင့် တစ်စုံတစ်ရာ ပတ်သက်သည် မဟုတ်လော။ ၎င်းတို့သည် ဤကိစ္စရပ်တွင် သမ္မာတရားကို မရှာဖွေကြဘဲ မိမိတို့၏ အမှားကို ဖုံးဖိရန် နည်းလမ်းများကို အကြံထုတ်ကြသည်။ ၎င်းတို့အနေဖြင့် အမှားတစ်ခုသာ ပြုလုပ်မိခဲ့ကာ မိမိတို့၏ အပြုအမူအရ ပေါ့ဆမိခဲ့သည်ဟု တွေးထင်ကြသည်။ ၎င်းတို့၏ အမှားက သမ္မာတရားနှင့် ပတ်သက်သည် သို့မဟုတ် ၎င်းတို့၏ သမ္မာတရား သိနားလည်မှု ကင်းမဲ့ခြင်းနှင့် ၎င်းတို့၏ ဖောက်ပြန်ပျက်စီးသော စိတ်သဘောထားများကို အခြေခံ၍ ၎င်းတို့ ပြုမူသည့် အချက်ကြောင့် ထိုအရာ ဖြစ်ပေါ်သည်ဟု မထင်ကြပေ။ ဤသည်မှာ ညံ့ဖျင်းသည့် အစွမ်းအစရှိခြင်းကို ဆိုလိုသည့်အရာ ဖြစ်သည်။ အမှုအရာများ ဖြစ်ပျက်သည့်အခါ ဤလူများသည် အကြောင်းပြချက်များနှင့် ဆင်ခြေများကို အမြဲ ရှာဖွေကြသည်။ အမှားတစ်ခုကိုသာ ၎င်းတို့ ပြုလုပ်မိခဲ့သည်ဟု တွေးထင်ကြသည်။ ၎င်းတို့၏ ပထမဆုံး တုံ့ပြန်ချက်၌ သမ္မာတရားအား ရှာဖွေရမည်ကို ၎င်းတို့ မသိကြချေ။ ၎င်းတို့၏ ဒုတိယတုံ့ပြန်ချက်၌ သမ္မာတရားအား ရှာဖွေရမည်ကို ၎င်းတို့ မသိကြသေးချေ။ ပြီးလျှင် ၎င်းတို့၏ တတိယတုံ့ပြန်ချက်၌ သမ္မာတရားကို ရှာဖွေပြီး မိမိတို့ကိုယ်ကို သိရှိရန် လိုအပ်ကြောင်း ၎င်းတို့ မသိကြသေးချေ။ ဤသည်မှာ အလွန်ညံ့ဖျင်းသည့် အစွမ်းအစရှိခြင်းကို ဆိုလိုသည့်အရာ ဖြစ်သည်။ ၎င်းတို့ကို သင် မည်မျှ လမ်းညွှန်သည်ဖြစ်စေ၊ ၎င်းတို့ကို ဖော်ထုတ်ကာ ၎င်းတို့နှင့်အတူ မိတ်သဟာပြုပေးသည်ဖြစ်စေ မည်သည့် သမ္မာတရား စည်းမျဉ်းများအား ၎င်းတို့ ချိုးဖောက်မိပြီးဖြစ်သည်ဆိုသည်နှင့် မည်သည့် သမ္မာတရားများအား လက်တွေ့လုပ်ဆောင်သင့်သည်ဆိုသည်တို့ကို ၎င်းတို့ သဘောပေါက်ကြဦးမည် မဟုတ်။ ၎င်းတို့ကို သင် မည်မျှ လမ်းညွှန်သည်ဖြစ်စေ ဤအရာများကို ၎င်းတို့ လုံးဝ သတိပြုမိကြလိမ့်မည် မဟုတ်။ ၎င်းတို့အနေဖြင့် သမ္မာတရားကို သဘောပေါက်နားလည်နိုင်စွမ်း အနည်းငယ်မျှပင် မရှိပေ။ ဤသည်မှာ ညံ့ဖျင်းသည့် အစွမ်းအစရှိခြင်းကို ဆိုလိုသည့်အရာ ဖြစ်သည်။ သမ္မာတရားနှင့်ပတ်သက်၍ သင် မည်မျှရှင်းလင်းစွာ မိတ်သဟာယပြုသည်ဖြစ်စေ ယင်းမှာ သမ္မာတရားဖြစ်သည်ကို ၎င်းတို့ သဘောပေါက်လိမ့်မည် မဟုတ်။ ၎င်းတို့သည် အမှန်တရားများကို ဖုံးဖိရန်အလို့ငှာ မိမိတို့ကိုယ်ပိုင် အကြောင်းပြချက်များနှင့် ဆင်ခြေများကို အသုံးပြုကြလိမ့်မည်၊ သို့မဟုတ် ထိုအရာက အမှားတစ်ခု သို့မဟုတ် အပြုမှားတစ်ခုသာ ဖြစ်သည်ဟု ပြောကြလိမ့်မည်။ ၎င်းတို့အနေဖြင့် သမ္မာတရားကို ချိုးဖောက်မိပြီဖြစ်ကြောင်း သို့မဟုတ် မိမိတို့၏ ဖောက်ပြန်ပျက်စီးသော စိတ်သဘောထားများကို ထုတ်ဖော်မိပြီဖြစ်ကြောင်း စိုးစဉ်းမျှ ဝန်ခံကြလိမ့်မည် မဟုတ်။ ၎င်းတို့ မည်သည့်အမှားများကို ပြုလုပ်မိပြီးသည်ဖြစ်စေ၊ မည်သည့် ဖောက်ပြန်ပျက်စီးသော စိတ်သဘောထားများကို ထုတ်ဖော်မိပြီးသည်ဖြစ်စေ၊ သို့မဟုတ် ဖောက်ပြန်ပျက်စီးသော အခြေအနေမည်မျှကို ၎င်းတို့ ဖြစ်ပေါ်စေပြီးဖြစ်သည်ဖြစ်စေ၊ ၎င်းတို့၏ ဖောက်ပြန်ပျက်စီးသော အနှစ်သာရက မည်သည့်အရာ ဖြစ်သည်ကို မဆိုထားနှင့်၊ မည်သည့် ဖောက်ပြန်ပျက်စီးသော စိတ်သဘောထားများကို ၎င်းတို့ အမှန်တကယ် ထုတ်ဖော်မိပြီးဖြစ်သည်ကို မည်သည့်အခါတွင်မျှ သဘောပေါက်ကြလိမ့်မည် မဟုတ်ပေ။ သို့တည်းမဟုတ် ဤကိစ္စရပ်တွင် သမ္မာတရားအား မည်သို့ ရှာဖွေရမည်ကိုဖြစ်စေ၊ မိမိတို့ကိုယ်ကို မည်သို့ သိရှိရမည်ဆိုသည်ကိုဖြစ်စေ ၎င်းတို့ မသိကြ။ ဤအရာများထဲမှ မည်သည့်အရာကိုမျှ မသိကြချေ။ ၎င်းတို့သည် ဝိညာဉ်ရေးရာအရ ထုံထိုင်းပြီး ဤအရာများနှင့်ပတ်သက်၍ ခံစားချက် တစ်စက်မျှ မရှိကြပေ။ ဤသည်မှာ ညံ့ဖျင်းသော အစွမ်းအစ၏ သရုပ်သကန်တစ်ခု ဖြစ်သည်။

လူတစ်ဦး၏ အစွမ်းအစကို တိုင်းတာပုံအကြောင်း အနည်းငယ် မိတ်သဟာယပြုရန် ဥပမာအချို့ကို ထည့်ပြောကြစို့။ ဥပမာအနေဖြင့် လူအချို့သည် အမှုအရာများကို လုပ်ဆောင်ရာတွင် အချိန်ဆွဲကာ ဝတ်ကျေတမ်းကျေဖြစ်ကြသည်ဟု ငါ ပြောခဲ့သည်။ ဤအရာကိုကြားပြီးသည့်နောက်တွင် အစွမ်းအစကောင်းရှိသည့် လူတို့သည် ဤအခြေအနေမှာ ၎င်းတို့လည်း တွေ့ကြုံသည့်အရာတစ်ခု ဖြစ်ကြောင်းနှင့် ၎င်းတို့အနေဖြင့် ရုပ်ပိုင်းအရ နေမကောင်းဖြစ်သည့်အခါ သို့မဟုတ် အပျက်သဘောဆောင်သည့်အခါ၊ ပျင်းရိသည့်အခါ ထိုသို့သော အခြေအနေနှင့် သဘောထားကို မကြာခဏ တွေ့ကြုံကြောင်းတို့ကို ချက်ချင်း သဘောပေါက်လိမ့်မည်ဖြစ်သည်။ ထို့အပြင် အချို့သော အလုပ်တာဝန်များကို ၎င်းတို့ အချိန်ဆွဲခဲ့သည့် အချိန်များ သို့မဟုတ် ဝတ်ကျေတမ်းကျေ ဆောင်ရွက်ခဲ့သည့် အချိန်များနှင့်ပတ်သက်၍ ပုံရိပ်အချို့က ၎င်းတို့စိတ်တွင် ပေါ်လာလိမ့်မည်။ ၎င်းတို့သည် မိမိတို့ကိုယ်ကို ဘုရားနှုတ်ကပတ်တော်များနှင့် နှိုင်းယှဉ်ကြည့်ကြလိမ့်မည်ဖြစ်ပြီး ဘုရားသခင် ဖော်ထုတ်ပြသည့်အရာမှာ လူ၏ ဖောက်ပြန်ပျက်စီးခြင်းနှင့်ဆိုင်သော စစ်မှန်မှုဖြစ်ကြောင်းနှင့် ထိုအရာသည် လူ၏ ဖောက်ပြန်ပျက်စီးသော စိတ်သဘောထားများနှင့် ဆက်စပ်ကြောင်း ဝန်ခံကြလိမ့်မည်။ ထိုနည်းတူ ဘုရားနှုတ်ကပတ်တော်များက သမ္မာတရားဖြစ်ကြောင်း ဝန်ခံကြလိမ့်မည်ဖြစ်ပြီး အထင်လွဲခြင်း သို့မဟုတ် မိမိတို့ကိုယ်ပိုင် အယူအဆများမရှိဘဲ ရှင်းလင်းသော ပုံစံဖြင့် ထိုနှုတ်ကပတ်တော်များကို သဘောပေါက်နားလည်ကြလိမ့်မည်။ ဤသည်မှာ အစွမ်းအစကောင်းရှိခြင်းဟု ဆိုလိုသည့်အရာ ဖြစ်သည်။ ဤစကားများကို ကြားသည့်အခါ ၎င်းတို့၏ ပထမဆုံး တုံ့ပြန်ချက်မှာ မိမိတို့ကိုယ်ကို ထိုနှုတ်ကပတ်တော်များနှင့် နှိုင်းယှဉ်ချိန်ဆခြင်း ဖြစ်လိမ့်မည်။ ဤသည်မှာ ၎င်းတို့လည်း တွေ့ကြုံကြရသည့် အခြေအနေတစ်ခုဖြစ်ကြောင်း သဘောပေါက်ကြလိမ့်မည်ဖြစ်ပြီး ဤဘုရားနှုတ်ကပတ်တော်များကို မိမိတို့ကိုယ်ပိုင် အခြေအနေများနှင့် နေ့စဉ်ဘဝများဖြင့် ဆက်စပ်ကြည့်ကြလိမ့်မည်။ ထို့နောက်တွင် ၎င်းတို့သည် မိမိကိုယ်ကို ပြန်လည်သုံးသပ်ကြလိမ့်မည်၊ ၎င်းတို့၏ ဤအခြေအနေကို ရှင်းရှင်းလင်းလင်း မြင်ကြလိမ့်မည်ဖြစ်ပြီး၊ ဘုရားနှုတ်ကပတ်တော်များက သမ္မာတရားဖြစ်ကြောင်း လက်ခံကြလိမ့်မည်။ ဤသည်မှာ ဘုရားနှုတ်ကပတ်တော်များကို ကြားသည့်အခါ အစွမ်းအစကောင်း ရှိသည့်လူများ တုံ့ပြန်ကြသည့်ပုံစံ ဖြစ်သည်။ သာမန်အစွမ်းအစရှိသည့် လူတစ်ဦးအတွက်မူ သင့်အနေဖြင့် “အချိန်ဆွဲသည်”နှင့် “ဝတ်ကျေတမ်းကျေဖြစ်သည်”ဟုသာ ပြော၍မရပေ။ ၎င်းတို့၏ သရုပ်သကန်များကို ဖော်ထုတ်ခြင်းအားဖြင့်လည်းကောင်း၊ “သင်သည် မကြာခဏ နားဝေတိမ်တောင်ဖြစ်ပြီး အမှုအရာများကို အလေးအနက် မထားပါ။ သင်၏ တာဝန်ကို ဤသို့ ထမ်းဆောင်ခြင်းအားဖြင့် သင်သည် ဝတ်ကျေတမ်းကျေ ဖြစ်နေခြင်းသာ ဖြစ်သည်။ ဤအရာကို သင် အဘယ်သို့ဖြစ်ပြီး နားမလည်နိုင်သနည်း။ ဤအရာကို သင့်အား အကြိမ်ပေါင်းမည်မျှ ငါ ပြောပြီးဖြစ်သနည်း။ ဤအရာကို ဝတ်ကျေတမ်းကျေဖြစ်ခြင်းနှင့် အချိန်ဆွဲခြင်းဟု ခေါ်သည်”ဟု ဆိုလျက် ၎င်းတို့ လုပ်ဆောင်သည့် အရာများနှင့် ပေါင်းစပ်ခြင်းအားဖြင့်လည်းကောင်း ၎င်းတို့၏ ပြဿနာများကို သင် တိုက်ရိုက် ထောက်ပြရမည်။ ၎င်းတို့၏ ပြဿနာများကို ဤကဲ့သို့ ထောက်ပြလော့။ ဤအရာကို ကြားပြီးသည့်နောက်တွင် ၎င်းတို့ မည်သို့ အချိန်ဆွဲပြီး ဝတ်ကျေတမ်းကျေပုံစံဖြင့် ပြုမူခဲ့သည်ကို ပြန်လည်သုံးသပ်ကြလိမ့်မည်။ ဤအရာအပေါ် ၎င်းတို့ အမှန်တကယ် ပြန်လည်သုံးသပ်ကာ သိရှိလာသည့်နောက်တွင် ၎င်းတို့၏ အမှားများကို ဝန်ခံကြလိမ့်မည်ဖြစ်ပြီး ယင်းတို့ကို အမှန်ပြင်နိုင်ကြလိမ့်မည်။ သို့ရာတွင် ၎င်းတို့ သတိပြုမိသည့်အရာမှာ ပုံသေဖြစ်သည့်အရာ၊ ပုံသေဖြစ်သည့် အခြေအနေတစ်ခု ဖြစ်သည်။ ၎င်းတို့၏ ကိုယ်ပိုင် စိတ်ကူးများနှင့် ကိုက်ညီလျှင်သာ သင် ပြောသည့်အရာကို ၎င်းတို့ လက်ခံပြီး ဝန်ခံနိုင်သည်။ ဤသည်မှာ သာမန်အစွမ်းအစဟု ငါတို့ ခေါ်သည့်အရာ ဖြစ်သည်။ သာမန်အစွမ်းအစရှိသည့် လူတို့ကို ကိုင်တွယ်ဆက်ဆံခြင်းသည် အားထုတ်မှုလိုအပ်ပြီး အချက်အလက်များကို အခြေခံ၍ စကားပြောခြင်းအားဖြင့်သာ ၎င်းတို့ကို သင် အပြည့်အဝ သိမ်းသွင်းစည်းရုံးနိုင်ပေသည်။ ညံ့ဖျင်းသော အစွမ်းအစ ပိုင်ဆိုင်သည့် လူတို့၏ အခြေအနေမှာ အဘယ်နည်း။ ၎င်းတို့ကို မည်သို့ ချဉ်းကပ်သင့်သနည်း။ ညံ့ဖျင်းသည့် အစွမ်းအစရှိသော လူတို့သည် ရိုးအကြပြီး ထုံသောသူများ ဖြစ်သည်။ ၎င်းတို့ ကြုံရသည့် မည်သည့်အခြေအနေကိုမျှ ၎င်းတို့ မရိပ်စားမိနိုင်ကြသကဲ့သို့ သမ္မာတရားကို မရှာဖွေကြပေ။ လူတို့က ၎င်းတို့အား အမှုအရာများကို ရှင်းလင်းပြီး တိုက်ရိုက်ကျသော ပုံစံဖြင့် မပြောပြလျှင် ထိုအရာများကို မိမိတို့ဘာသာ နားမလည်နိုင်ကြပေ။ ထို့ကြောင့် ညံ့ဖျင်းသည့် အစွမ်းအစရှိသော လူတို့ကို စကားပြောသည့်အခါ သင်သည် သာ၍ ရှင်းလင်းစွာနှင့် တိုက်ရိုက် ပြောဆိုရမည်ဖြစ်ပြီး ဥပမာများကိုလည်း ပေးရမည်ဖြစ်သည်။ အချက်အလက်များကို အခြေခံကာ ထပ်ခါထပ်ခါ ပြောရမည်ဖြစ်သည်။ ဤသည်မှာ သင်၏ စကားများ သက်ရောက်မှုတစ်ခုခုရှိရန် တစ်ခုတည်းသော နည်းလမ်းဖြစ်သည်။ သင့်အနေဖြင့် ဤသို့ စကားပြောရမည်။ “သင်သည် သင်၏ တာဝန်ကို ဤကဲ့သို့ ထမ်းဆောင်ခြင်းအားဖြင့် အချိန်ဆွဲကာ ဝတ်ကျေတမ်းကျေဖြစ်နေသည်”ဟူ၍ ဖြစ်သည်။ ၎င်းတို့၏ ပထမဆုံး တုံ့ပြန်ချက်က မည်သည့်အရာ ဖြစ်လိမ့်မည်နည်း။ “ကျွန်ုပ် ထိုသို့ပြုမူခဲ့သလော။ အချိန်ဆွဲခဲ့သလော။ မနက်တွင် ကျွန်ုပ် နိုးနိုးချင်း ကျွန်ုပ်၏ တာဝန်နှင့် ဆက်စပ်သည့် အရာများအကြောင်းကို ကျွန်ုပ် စဉ်းစားပြီး ထိုအရာများကို ဦးစွာ ပြီးစီးအောင်လုပ်သည်။ အပြင်ထွက်သည့်အခါ ထိုအရာများကို မည်သို့ကောင်းစွာ လုပ်ဆောင်ရမည့်အကြောင်းကိုလည်း ကျွန်ုပ် စဉ်းစားသည်။ ကျွန်ုပ် အချိန်မဆွဲပါ၊ သို့မဟုတ် ဝတ်ကျေတမ်းကျေပုံစံဖြင့် မပြုမူပါ။ ဤအရာများကို ကျွန်ုပ် အလွန်အားထုတ်ပါသည်”ဟူ၍ ဖြစ်သည်။ ၎င်းတို့၏ ပထမဆုံး တုံ့ပြန်ချက်မှာ သင် ပြောခဲ့သည့်အရာကို ငြင်းပယ်ခြင်း ဖြစ်သည်။ ၎င်းတို့တွင် အသိမရှိသကဲ့သို့ အခြေခံအားဖြင့် ၎င်းတို့က မိမိတို့၏တာဝန်များကို ဝတ်ကျေတမ်းကျေဖြစ်သည့် ပုံစံတစ်ခုဖြင့် အချိန်ဆွဲ၍ ထမ်းဆောင်နေသည်ကို သဘောမပေါက်ကြပေ။ ထို့နောက် သင်သည် အချိန်ဆွဲခြင်းနှင့် ဝတ်ကျေတမ်းကျေ ဖြစ်ခြင်းတို့၏ သရုပ်သကန်များက မည်သည့်အရာများဖြစ်သည်ကို ၎င်းတို့အား ရှင်းပြရလိမ့်မည်ဖြစ်ပြီး ၎င်းတို့က သင်၏ စကားများကို လက်မခံမီ ၎င်းတို့ကို အမှန်တကယ် ယုံကြည်လက်ခံစေသည့် နည်းလမ်းတစ်ခုဖြင့် ပြောဆိုရမည် ဖြစ်သည်။ ၎င်းတို့အနေဖြင့် ကောင်းစွာ မလုပ်ဆောင်ခဲ့ကြောင်း၊ အပြင်ပန်း ကိစ္စရပ်များတွင် အမှားများ ပြုလုပ်မိခဲ့ကြကြောင်း ဝန်ခံရန် ၎င်းတို့အတွက် မလွယ်ကူပေ။ တစ်စုံတစ်ခုက သမ္မာတရား၊ လက်တွေ့လုပ်ဆောင်မှု စည်းမျဉ်းများ သို့မဟုတ် ဘုရားသခင်၏ စိတ်သဘောထားများနှင့် ပတ်သက်လျှင် ညံ့ဖျင်းသည့် အစွမ်းအစရှိသော လူတို့အတွက် သာ၍ပင် ခက်ခဲလေသည်။ သင် ပြောသည့် မည်သည့်အရာကိုမျှ ၎င်းတို့ နားလည်ကြမည်မဟုတ်သကဲ့သို့ သင် ပြောဆိုလေ၊ ၎င်းတို့ မရှင်းမလင်းဖြစ်ကာ ဘာမျှမသိဟု ခံစားရလေဖြစ်ပြီး နောက်ထပ် နားထောင်လိုကြမည်မဟုတ်ပေ။ ဤသည်မှာ အလွန့်အလွန် နိမ့်ကျသည့် အစွမ်းအစရှိသော လူများဖြစ်သည်။ ဤသည်မှာ သမ္မာတရားကို ၎င်းတို့၏ လက်လှမ်းမီနိုင်စွမ်းမရှိခြင်း၏ သရုပ်သကန်တစ်ခု ဖြစ်သည်။ ညံ့ဖျင်းသည့် အစွမ်းအစရှိသော လူတို့အတွက် သမ္မာတရားနှင့်ပတ်သက်၍ သင် မည်မျှ မိတ်သဟာယ ပြုသည်ဖြစ်စေ အသုံးမဝင်ပေ။ ၎င်းတို့ကို စကားပြောရန် သင် မည်မျှ ကြိုးစားသည်ဖြစ်စေ ၎င်းတို့ နားမလည်နိုင်ကြ။ အလွန်ဆုံးအနေဖြင့် အချို့သော အယူဝါဒများနှင့် စည်းမျဉ်းစည်းကမ်းများကို ၎င်းတို့ နားလည်နိုင်ကြသည်။ ထို့ကြောင့် အလွန်အမင်း ညံ့ဖျင်းသော အစွမ်းအစရှိသည့် လူများနှင့်အတူ သမ္မာတရားကို အလွန် အသေးစိတ် မိတ်သဟာယပြုရန် မလိုအပ်ပေ။ ၎င်းတို့အား မည်သည့်အရာ လုပ်ဆောင်ရမည်ကို ရိုးရှင်းသော ပုံစံဖြင့်သာ ပြောပြလော့၊ ပြီးလျှင် ယင်းကို ၎င်းတို့ စွဲစွဲမြဲမြဲ လုပ်ဆောင်နိုင်လျှင် အတော်လေး ကောင်းပေသည်။ အလွန့်အလွန် ညံ့ဖျင်းသည့် အစွမ်းအစရှိသော လူတို့သည် သမ္မာတရားကို မည်သည့်အခါမျှ နားလည်နိုင်ကြလိမ့်မည် မဟုတ်သည့် အတိုင်းအတာအထိ သဘောပေါက်နားလည်နိုင်စွမ်း တစ်ခုတလေ ကင်းမဲ့ကြပြီး စည်းမျဉ်းများအတိုင်း ပြုမူဆောင်ရွက်သည့် အဆင့်ထိ ရောက်ရှိရန် ၎င်းတို့ကို သေချာပေါက် တောင်းဆို၍မရပေ။ ဤလူများ၏ ရှေ့တည့်တည့်တွင် တစ်စုံတစ်ရာ ဖြစ်ပျက်ပြီး ထိုအရာကို ၎င်းတို့အတွက် သင် ရှင်းလင်းဖော်ပြလျှင် ၎င်းတို့က ထိုအရာကို မိမိတို့ကိုယ်တိုင်နှင့် ချိတ်ဆက်မိနိုင်ကြဦးမည် မဟုတ်ပေ။ ဤသည်မှာ ညံ့ဖျင်းသော အစွမ်းအစဟု ငါတို့ ခေါ်သည့်အရာ ဖြစ်သည်။ ဥပမာအားဖြင့် လိမ်ညာခြင်းနှင့် ပတ်သက်လာသည့်အခါ အစွမ်းအစကောင်း ရှိသူများ တုံ့ပြန်ပုံကို ကြည့်လော့။ အခြားသူတို့က ၎င်းတို့၏ လိမ်ညာသည့် အခြေအနေများအကြောင်း ပြောဆိုပြီး ဥပမာများပေးလျက် လိမ်ညာကာ လှည့်ဖြားသည့် အခြေအနေများအား ၎င်းတို့ ကိုင်တွယ်ပုံနှင့် ဖြေရှင်းပုံအကြောင်း ပြောဆိုသည်ကို အစွမ်းအစကောင်းရှိသည့် လူတို့က ကြားသည့်အခါ မိမိတို့ကိုယ်ကို ပြန်လည်သုံးသပ်ကြလိမ့်မည်ဖြစ်ပြီး ၎င်းတို့ ကြားခဲ့သည့်အရာကို ၎င်းတို့၏ ကိုယ်ပိုင် အခြေအနေများနှင့် နှိုင်းယှဉ်ချိန်ဆ ကြည့်ကြလိမ့်မည်။ ဤသို့ပြုပြီးနောက်တွင် အလိမ်အညာများ ၎င်းတို့ ပြောဆိုခဲ့ကြသည့် အခြေအနေများနှင့် ထိုသို့ ပြုမူနေစဉ် မည်သည့် ရည်ရွယ်ချက်များ ရှိခဲ့ကြသည်ဆိုသည်တို့ကို ၎င်းတို့ သတိပြုမိနိုင်ကြလိမ့်မည်။ ၎င်းတို့၏ နေ့စဉ်ဘဝများနှင့်ပတ်သက်သည့် ထုတ်ဖော်ပြချက်များအရ ၎င်းတို့၏ ရည်ရွယ်ချက်များ၊ စေ့ဆော်မှုများနှင့် အတွေးများကို ဆန်းစစ်ခြင်းမှတစ်ဆင့် အစွမ်းအစကောင်းရှိသည့် လူတို့သည် ၎င်းတို့၏ စကားများထဲမှ မည်သည်တို့က အလိမ်အညာများဖြစ်ပြီး မည်သည်တို့က လှည့်ဖြားမှုပါရှိသည်ဆိုသည်ကို သိရှိနိုင်ကြလိမ့်မည်။ အခြားလူတို့၏ အတွေ့အကြုံဆိုင်ရာ သက်သေခံချက်များကို နားထောင်သည့်အခါ ၎င်းတို့ အကျိုးရှိကာ တစ်စုံတစ်ရာကို ရရှိနိုင်ကြသည်။ အနည်းငယ်သော စည်းမျဉ်းများကိုသာ သင် ပြောဆိုလျှင်ပင် ၎င်းတို့ နားလည်ကာ ယင်းတို့ကို ကျင့်သုံးရန် သင်ယူကြလိမ့်မည်။ ထို့နောက်တွင် ၎င်းတို့သည် ဤစကားများကို မိမိတို့ကိုယ်ပိုင် စစ်မှန်မှု ဖြစ်စေလျက် သမ္မာတရား စည်းမျဉ်းများအဖြစ် သဘောထားကြလိမ့်မည်ဖြစ်ပြီး မိမိတို့ကိုယ်ကို ဖြည်းဖြည်းချင်း ပြောင်းလဲကြလိမ့်မည်။ သာမန်အစွမ်းအစရှိသည့် လူတစ်ဦးက အခြားလူတို့၏ အတွေ့အကြုံဆိုင်ရာ သက်သေခံချက်များကို ကြားပြီးသည့်နောက်တွင် သိသာထင်ရှားသော ကိစ္စများသည် မိမိကိုယ်တိုင်နှင့် မည်သို့ဆက်နွယ်မှုရှိကြောင်းကို မြင်နိုင်မည်ဖြစ်သော်လည်း သိသာထင်ရှားမှုနည်းပါးသော အရာများကိုဖြစ်စေ၊ ထိုလူတို့၏ စိတ်နှလုံးနက်ရှိုင်းရာရှိ ၎င်းတို့၏ စကားများဖြင့် ဖော်ပြရခြင်းမရှိသေးသည့် အရာများကိုဖြစ်စေ မိမိတို့ကိုယ်တိုင်နှင့် ချိတ်ဆက်နိုင်လိမ့်မည် မဟုတ်ချေ။ ထို့အပြင် သမ္မာတရား စည်းမျဉ်းများအပေါ် ၎င်းတို့၏ သဘောပေါက်နားလည်ခြင်းသည်လည်း အယူဝါဒများကဲ့သို့ အနည်းငယ် သာ၍ ပေါ့တန်လေသည်။ ၎င်းတို့၏ သဘောပေါက်နားလည်နိုင်စွမ်း အဆင့်သည် အစွမ်းအစ ကောင်းရှိသည့် လူတို့ထက် များစွာ ဆိုးရွား၏။ ညံ့ဖျင်းသည့် အစွမ်းအစရှိသော လူတို့မှာမူ အခြားသူတို့၏ သက်သေခံချက်များကို နားထောင်သည့်အခါ မည်သည့်အရာများသည် အလိမ်အညာများနှင့် အနှစ်မဲ့သော စကားများဖြစ်ပြီး မည်သည့်အရာများက လှည့်ဖြားတတ်သော အခြေအနေများဖြစ်ကြောင်းကို ထိုအခြားသောသူတို့က မည်မျှ သေချာစွာ စိတ်ဖြာလေ့လာဆွေးနွေးသည်ဖြစ်စေ ဤအရာကို မိမိတို့ကိုယ်တိုင်နှင့် ဆက်စပ်ကြည့်နိုင်ကြလိမ့်မည် မဟုတ်သကဲ့သို့ မိမိတို့ကိုယ်ကို ပြန်လည်သုံးသပ်နိုင်ကြလိမ့်မည် မဟုတ်၊ သိရှိလာနိုင်ကြလိမ့်မည် မဟုတ်ပေ။ ဤလူများသည် မိမိတို့ကိုယ်ပိုင် လိမ်ညာခြင်းနှင့် လှည့်ဖြားတတ်သော အခြေအနေများကို အသိအမှတ်မပြုနိုင်ကြသည်သာမက မိမိတို့ကိုယ်ကို အလိမ်အညာများ မပြောနိုင်သည့် အလွန်ရိုးသားသော လူများအဖြစ်ပင် တွေးထင်ကြသည်။ အခြားသူတို့က ၎င်းတို့ကို လိမ်ညာပြီး လှည့်ဖြားလျှင်ပင် ဤအရာကို ၎င်းတို့ ပိုင်းခြားသိမြင်နိုင်ခြင်း မရှိကြသကဲ့သို့ အလွယ်တကူ လှည့်စားခြင်းခံရကြသည်။ ၎င်းတို့သည် အခြားသူတို့ မိတ်သဟာယပြုသည့် သမ္မာတရား စည်းမျဉ်းများကို သာ၍ပင် နားမလည်နိုင်ကြပေ။ သဘောပေါက်နားလည်နိုင်စွမ်း စိုးစဉ်းမျှ မရှိကြချေ။ ဤသည်မှာ ညံ့ဖျင်းသော အစွမ်းအစ၏ သရုပ်သကန်တစ်ခု ဖြစ်သည်။

ငါတို့ ယခုတင် ဖော်ပြခဲ့သည့် အစွမ်းအစသုံးမျိုးရှိသည့် လူများထဲတွင် မည်သည့်အမျိုးအစားက စိတ်သဘောထား၌ ပြောင်းလဲမှုတစ်ခု ရရှိနိုင်သနည်း။ မည်သည့် လူစားမျိုးက သမ္မာတရား စစ်မှန်မှုထဲသို့ ဝင်ရောက်နိုင်သနည်း။ (အစွမ်းအစကောင်း ရှိသော လူများဖြစ်သည်။) အစွမ်းအစကောင်း ရှိသော လူတို့သည် သမ္မာတရား စစ်မှန်မှုထဲသို့ အနည်းငယ် သာ၍ မြန်ဆန်စွာနှင့် နက်ရှိုင်းစွာ ဝင်ရောက်နိုင်ကြသည်။ သာမန် အစွမ်းအစရှိသည့် လူတို့သည် သာ၍ နှေးကွေးစွာနှင့် အပေါ်ယံအားဖြင့် ဝင်ရောက်နိုင်ကြသည်။ ညံ့ဖျင်းသည့် အစွမ်းအစရှိသော လူတို့မှာမူ လုံးဝ မဝင်ရောက်နိုင်ကြပေ။ ဤသည်မှာ ခြားနားချက်ဖြစ်သည်။ လူတို့အနေဖြင့် တစ်ဦးနှင့်တစ်ဦး မည်သို့ ကွဲပြားခြားနားသည်ကို သင် မြင်နိုင်သလော။ (မြင်နိုင်ပါသည်။) ၎င်းတို့၏ ခြားနားချက်များက အဘယ်မှာနည်း။ ၎င်းတို့၏ ခြားနားချက်များက ၎င်းတို့၏ အစွမ်းအစနှင့် သမ္မာတရားအပေါ် သဘောထားတို့တွင် တည်ရှိ၏။ သမ္မာတရားကို ချစ်ပြီး အစွမ်းအစကောင်းရှိသော လူတို့သည် သမ္မာတရား စစ်မှန်မှုထဲသို့ မြန်ဆန်စွာ ဝင်ရောက်ကြပြီး အသက်ကို ရရှိနိုင်ကြသည်။ သာမန် အစွမ်းအစရှိသော လူတို့သည် ခေါင်းမာကာ ထုံထိုင်းကြသည်။ သမ္မာတရားထဲသို့ ၎င်းတို့၏ ဝင်ရောက်မှုသည် နှေးကွေးပြီး ၎င်းတို့၏ ဘဝတိုးတက်မှုကလည်း နှေးကွေးသည်။ ညံ့ဖျင်းသည့် အစွမ်းအစရှိသော လူတို့သည် မိုက်မဲပြီး မသိနားမလည်ဖြစ်ရုံမက ငေးငိုင်ပြီး မကြည်လင်သော မျက်နှာများဖြင့် နုံလည်းနုံအကြသည်။ ၎င်းတို့သည် စိတ်ဓာတ်အားဖြင့် ထုံထိုင်းကြသည်၊ တုံ့ပြန်မှု နှေးကွေးကြပြီး သမ္မာတရားကို သဘောပေါက်နားလည်ရန် နှေးကွေးကြသည်။ ထိုသို့သော လူများသည် သမ္မာတရားကို နားမလည်ကြသည့်အတွက် အသက်ကင်းမဲ့ကြပြီး အယူဝါဒများကိုသာ ပြောဆိုကြသည်၊ ဆောင်ပုဒ်များကိုသာ ဟစ်ကြွေးကြပြီး စည်းမျဉ်းစည်းကမ်းများကိုသာ လိုက်လျှောက်ကြသည်။ သမ္မာတရားကို ၎င်းတို့ နားမလည်ကြသည့်အတွက် သမ္မာတရား စစ်မှန်မှုထဲသို့ မဝင်ရောက်နိုင်ကြချေ။ သမ္မာတရား စစ်မှန်မှုထဲသို့ မဝင်ရောက်နိုင်သည့်သူများအတွင်းတွင် အသက်ရှိသလော။ ၎င်းတို့သည် အသက် ကင်းမဲ့ကြ၏။ အသက်ကင်းမဲ့သည့် လူများထံ အမှုအရာများ ဖြစ်ပျက်သည့်အခါ တစ်ခါတစ်ရံ ဦးတည်ချက်တစ်ခုသို့ လမ်းလွဲသွားကြကာ အခြားအချိန်များတွင် နောက်ထပ် ဦးတည်ချက်ဖြင့် လမ်းလွဲသွားလျက် တိကျသည့် လက်တွေ့လုပ်ဆောင်မှု လမ်းကြောင်း ကင်းမဲ့ကာ အမြဲ ချီတုံချတုံဖြစ်ပြီး အကူအညီမဲ့ ခံစားရင်း မိမိတို့ကိုယ်ပိုင် အလိုဆန္ဒနောက်ကို ၎င်းတို့ လိုက်ကြပြီး ကျိုးကြောင်းမမြင် ပြုမူကြသည်။ သနားစဖွယ် မြင်ကွင်းကို ၎င်းတို့ ဖန်တီးကြသည်။ နှစ်ကာလများအတွင်းတွင် လူအချို့က ၎င်းတို့ထံ အမှုအရာများ ဖြစ်ပျက်သည့်အခါ မည်သည့်အရာ လုပ်ဆောင်ရမည်ကို မသိကြောင်း ပြောကြသည်ကို စဉ်ဆက်မပြတ် ငါ ကြားရပြီးဖြစ်သည်။ အလွန်များသည့် တရားဒေသနာများကို နားထောင်ပြီးသည့်နောက်တွင်ပင် အဘယ်သို့များ ထိုသို့ ဖြစ်နိုင်သေးသနည်း။ ၎င်းတို့ ဘာလုပ်ရမှန်းမသိဖြစ်ကြကြောင်းကို ၎င်းတို့၏ အမူအရာများက ပြသည်။ ၎င်းတို့၏ မျက်နှာများ ငေးငိုင်ကာ မကြည်မလင်ဖြစ်နေသည်။ လူအချို့က “အဘယ်သို့ ထုံထိုင်းသည်ဟု ငါ အခေါ်ခံရနိုင်သနည်း။ ကမ္ဘာလောကထဲက ရေပန်းစားသောအရာကို ကျွန်ုပ် အလွန် ခံစားနားလည်လွယ်သည်။ ကွန်ပြူတာ၊ ဟမ်းဖုန်းများနှင့် ဂိမ်းစက်မျိုးစုံကို အသုံးပြုရမည့်ပုံ ကျွန်ုပ် သိသည်။ သင်တို့သည် ထုံထိုင်းပြီး ယင်းတို့ကို အသုံးပြုရမည့်ပုံ မသိကြပါ။ သင်တို့၏ အစွမ်းအစသည် အဘယ်သို့ဖြစ်ပြီး အလွန် ညံ့ဖျင်းနိုင်ရသနည်း”ဟု ပြောကြသည်။ သို့ရာတွင် ၎င်းတို့၏ အနည်းငယ်သော လိမ္မာပါးနပ်မှုမှာ ကျွမ်းကျင်မှုတစ်ခု၊ ချက်ချာပါးနပ်မှု အနည်းငယ်သာ ဖြစ်သည်။ ထိုအရာကို အစွမ်းအစအဖြစ် ယူဆခြင်းမရှိပေ။ ၎င်းတို့အား တရားဒေသနာတစ်ခု နားထောင်ရန် သို့မဟုတ် သမ္မာတရားနှင့်ပတ်သက်၍ မိတ်သဟာယပြုရန် သင် စေခိုင်းလျှင် ဤလူများ ထုတ်ဖော်ခြင်းခံရသည်။ ၎င်းတို့၏ ဝိညာဉ်အားဖြင့် ၎င်းတို့သည် အလွန် ထုံထိုင်းကြသည်။ ၎င်းတို့ မည်မျှ ထုံထိုင်းကြသနည်း။ ဘုရားသခင်ကို နှစ်ချီ ယုံကြည်ကြပြီးဖြစ်သော်လည်း ၎င်းတို့ ကယ်တင်ခံရလိမ့်မည်လော ဟူသည်ကို မသေချာသေးဘဲ ဤအရာကို ၎င်းတို့ အကဲမဖြတ်နိုင်ကြသကဲ့သို့ ၎င်းတို့က မည်သည့်လူစားမျိုး ဖြစ်သည်ကို မရှင်းလင်းကြချေ။ ၎င်းတို့၏ အစွမ်းအစနှင့် ပတ်သက်၍ အဘယ်အရာ တွေးထင်သည်ကို သင် မေးလျှင် ၎င်းတို့က “ကျွန်ုပ်၏ အစွမ်းအစသည် ကောင်းမွန်သည့် အစွမ်းအစထက် အနည်းငယ် ညံ့သော်လည်း သာမန်အစွမ်းအစထက် များစွာ သာ၍ ကောင်းပါသည်”ဟု ပြောကြလိမ့်မည်။ ယင်းက ၎င်းတို့၏ အစွမ်းအစ မည်မျှ ညံ့ဖျင်းသည်ကို ပြပေသည်။ ဤသည်မှာ အနည်းငယ် မိုက်မဲသည် မဟုတ်လော။ အမှန်တကယ် ညံ့ဖျင်းသည့် အစွမ်းအစဖြင့် လူများသည် ဤမိုက်မဲမှုမျိုးကို ထုတ်ဖော်ကြသည်။ မည်သည့်အရာဖြစ်စေ တစ်စုံတစ်ရာသည် သမ္မာတရား သို့မဟုတ် စည်းမျဉ်းများနှင့် ပတ်သက်လျှင် ထိုအရာနှင့်သက်ဆိုင်၍ ဘာကိုမျှ ၎င်းတို့ နားလည်ကြလိမ့်မည် မဟုတ်သကဲ့သို့ ထိုအဆင့်သို့ တိုးတက်နိုင်ကြလိမ့်မည် မဟုတ်။ ဤသည်မှာ ညံ့ဖျင်းသော အစွမ်းအစ ရှိခြင်းဟူသည့်အရာ ဖြစ်သည်။

ယခုတွင် ဤအရာများနှင့်ပတ်သက်၍ ငါတို့ မိတ်သဟာယပြုပြီးဖြစ်သဖြင့် မည်သည့်အရာက ကောင်းမွန်သည့် အစွမ်းအစ ဖြစ်ပြီး မည်သည့်အရာက ညံ့ဖျင်းသည့် အစွမ်းအစ ဖြစ်သည်ကို သင်တို့ အကဲဖြတ်နိုင်ကြလိမ့်မည်လော။ ကောင်းမွန်သည့် အစွမ်းအစက မည်သည့်အရာဖြစ်ပြီး ညံ့ဖျင်းသည့် အစွမ်းအစ မည်သည့်အရာဖြစ်သည်ကို သင် နားလည်နိုင်ကာ သင်၏ ကိုယ်ပိုင် အစွမ်းအစနှင့် သင်၏ သဘာဝ အနှစ်သာရတို့ကို ရှင်းလင်းစွာ မြင်နိုင်လျှင် ထိုအရာက သင့်ကိုယ်သင် သိရှိရန် ကူညီလိမ့်မည်။ သင်၏ ကိုယ်ပိုင် နေရာနှင့်သက်ဆိုင်သည့် ရှင်းလင်းသော အယူအဆတစ်ခု သင်၌ ရှိသည်နှင့် သင်သည် အသိစိတ် အနည်းငယ် ရှိလိမ့်မည်ဖြစ်ကာ သင်၏ ကိုယ်ပိုင် အတိုင်းအတာကို သိရှိလိမ့်မည်။ သင်သည် မာနထောင်လွှားလာဖွယ် ရှိလိမ့်မည် မဟုတ်သကဲ့သို့ သင်၏ တာဝန်ကို ထမ်းဆောင်နေချိန်တွင် သာ၍ တည်ကြည်ခိုင်မာကာ စိတ်အေးလက်အေးဖြစ်လိမ့်မည်။ သင်သည် မြင့်မားလွန်းသည့် ရည်မှန်းချက်များ ထားရှိလိမ့်မည် မဟုတ်သကဲ့သို့ သင်၏ သင့်တင့်လျောက်ပတ်သော အလုပ်ကို အာရုံစိုက်နိုင်လိမ့်မည်။ လူတို့အနေဖြင့် မိမိတို့ကိုယ်ကို မသိရှိသည့်အခါ ထိုအရာက ဒုက္ခပြဿနာများစွာ ဖြစ်စေသည်။ မည်သည့် ဒုက္ခပြဿနာမျိုးနည်း။ ၎င်းတို့၏ အစွမ်းအစက သာမန်ဖြစ်သည်မှာ သိသာသော်လည်း ၎င်းတို့တွင် အစွမ်းအစကောင်း ရှိကြောင်း၊ အခြားသူတို့ထက် ပိုတော်ကြောင်း ၎င်းတို့ အမြဲ တွေးထင်ကြသည်။ ၎င်းတို့၏ စိတ်နှလုံးများတွင် စေ့ဆော်မှုများ အမြဲရှိပြီး အမြဲ ခေါင်းဆောင်များအဖြစ် အစေခံလိုကာ အခြားသူများကို ဦးဆောင်လိုကြသည်။ ၎င်းတို့၏ စိတ်နှလုံးများတွင် ထိုသို့သောအရာများ အမြဲ ရှိသောကြောင့် ဤအရာက ၎င်းတို့ တာဝန်များကို ထမ်းဆောင်မှုအား ထိခိုက်လိမ့်မည်လော။ ၎င်းတို့သည် ဤအရာများ၏ နှောင့်ယှက်မှုကို စဉ်ဆက်မပြတ် ခံကြရသည်။ ၎င်းတို့၏ စိတ်နှလုံးများ မအေးချမ်းသကဲ့သို့ ၎င်းတို့ စိတ်တည်ငြိမ်အောင် မလုပ်နိုင်ကြပေ။ ၎င်းတို့၏ တာဝန်များကို ကောင်းစွာ မထမ်းဆောင်နိုင်ကြသည်သာမက မိုက်မဲသည့်၊ ကသိကအောက် ဖြစ်သောအရာများနှင့် ဘုရားသခင် အလွန်မုန်းတီးသည့် အသိစိတ်မရှိသော အရာအချို့ကိုလည်း ၎င်းတို့ လုပ်ဆောင်ကြသည်။ ၎င်းတို့တွင် ထိုသို့သော ဆိုးရွားသည့် ပြဿနာများ ရှိကြလေသည်။ ထိုပြဿနာများ မပြေမလည်ရှိနေလျှင် အဆင်ပြေသလော။ မုချ အဆင်မပြေပေ။ ဤလူများအနေဖြင့် ယင်းတို့ကို ဖြေရှင်းရန် သမ္မာတရား ရှာဖွေရမည်ဖြစ်သည်။ ဦးစွာပထမ ဘုရားသခင်ထံ ၎င်းတို့ ဆုတောင်းရမည်ဖြစ်ပြီး ထိုသို့သော အတွေးများ ၎င်းတို့ အဘယ်ကြောင့် ရှိကြသည်ဆိုသည်ကိုလည်းကောင်း၊ ၎င်းတို့သည် အဘယ်ကြောင့် အလွန်ရည်မှန်းချက် ကြီးကြသည်ကိုလည်းကောင်း၊ ဤအရာများက မည်သည့်နေရာမှ လာသည်ကိုလည်းကောင်း ပြန်လည်သုံးသပ်ရမည်။ ၎င်းတို့အနေဖြင့် ဤအရာများနှင့်ပတ်သက်၍ ရိုးရှင်းသည့် ပုံစံဖြင့်သာ စဉ်းစားလျှင် ပြဿနာများ၏ အနှစ်သာရကို ၎င်းတို့ ထိုးထွင်းမြင်နိုင်ကြလိမ့်မည်လော။ လုံးဝ မြင်နိုင်ကြလိမ့်မည် မဟုတ်။ ပြဿနာများ၏ ရင်းမြစ်ကို ရှာတွေ့ရန် ၎င်းတို့အနေဖြင့် ဘုရားသခင်ထံ ဆုတောင်းပြီး ဘုရားနှုတ်ကပတ်တော်များကို ဖတ်ရှုရမည်။ ထိုအခါမှသာ ၎င်းတို့အတွက် ဖြေရှင်းရန် လွယ်ကူလိမ့်မည်။ ၎င်းတို့၏ ဖောက်ပြန်ပျက်စီးသော စိတ်သဘောထားများကို ၎င်းတို့ ဖြေရှင်းပြီးသည့်အခါတွင်သာ ၎င်းတို့၏ ရည်မှန်းချက်များနှင့် လိုအင်ဆန္ဒများကို အမြစ်ဖြတ်နိုင်ပေသည်။ ဤသို့ဖြင့် ၎င်းတို့သည် မိမိတို့ တာဝန်များကို လက်တွေ့ကျသော ပုံစံဖြင့် ထမ်းဆောင်နိုင်ကြလိမ့်မည်ဖြစ်ပြီး များစွာ သာ၍ တာဝန်သိနိုင်လိမ့်မည်။ ၎င်းတို့အနေဖြင့် ဟိုသည် ဟိတ်ဟန်ထုတ်၍ ပြုမူပြောဆိုကြလိမ့်မည် မဟုတ်တော့၊ အခြားလူတိုင်းထက် ၎င်းတို့ ပိုတော်သည်ဟု ယုံကြည်ကြလိမ့်မည် မဟုတ်တော့၊ သို့မဟုတ် အထက်စီးဆန်စွာ ပြုမူကြလိမ့်မည် မဟုတ်တော့သကဲ့သို့ အခြားသူများနှင့် ကွဲပြားခြားနားသည်ဟု မိမိတို့ကိုယ်ကို ခံစားကြလိမ့်မည် မဟုတ်ပေ။ ဤဖောက်ပြန်ပျက်စီးသော စိတ်သဘောထားများက ၎င်းတို့ကို စိတ်အနှောင့်အယှက် ပေးကြတော့မည် မဟုတ်သကဲ့သို့ ၎င်းတို့သည် များစွာ သာ၍ ရင့်ကျက်လာကြလိမ့်မည်။ အနည်းဆုံးအနေဖြင့် သိက္ခာရှိကာ တည်ကြည် မွန်မြတ်သော လူမှုကျင့်ဝတ်ကို ပိုင်ဆိုင်ကြလိမ့်မည်ဖြစ်သည်။ ဤနည်းဖြင့်သာ ဘုရားသခင် ရှေ့မှောက်တွင် အသက်ရှင်ရန် ၎င်းတို့ သေချာနိုင်ပေသည်။ လူတို့သည် ဘုရားသခင်ကို ယုံကြည်ကာ ဘုရားအိမ်တော်သို့ ရောက်လာကြသည့်အခါ ၎င်းတို့အနေဖြင့် သမ္မာတရားကို လက်ခံရန်အလို့ငှာ အသိတရားနှင့် အသိစိတ်တို့ကို အနည်းဆုံး ပိုင်ဆိုင်သင့်ကြပေသည်။ ၎င်းတို့က ဘာသာတရားမရှိသူများကဲ့သို့ဖြစ်လျှင်၊ ယဉ်ပါးအောင် လုပ်မရနိုင်သည့် တောရိုင်း တိရစ္ဆာန်များကဲ့သို့ဖြစ်လျှင် ဘုရားသခင် ရှေ့သို့ လာနိုင်ကြလိမ့်မည် မဟုတ်ပေ။ လူအချို့က “ဘုရားသခင်ရှေ့သို့ လာခြင်းနှင့်ပတ်သက်၍ အဘယ်အရာက အလွန် ခက်ခဲသနည်း။ ဘုရားသခင် ရှေ့မှောက်သို့ ကျွန်ုပ် မကြာခဏ လာပါသည်”ဟု ပြောကြသည်။ ဘုရားသခင်ရှေ့မှောက်သို့ လာရန်မှာ ရိုးရှင်းသည့် ကိစ္စတစ်ခု မဟုတ်ပေ။ သင့်အနေဖြင့် ဘုရားသခင်၏ လက်ခံခြင်းကို ရရှိရန်အလို့ငှာ မှန်ကန်သည့် သဘောထားတစ်ခုနှင့် ဘုရားသခင်ကို ကျိုးနွံနာခံသော စိတ်နှလုံးတစ်ခု ရှိရမည်။ သားရဲတိရစ္ဆာန်များကဲ့သို့ဖြစ်သော လူများသည် ဘုရားသခင် ရှေ့မှောက်သို့ လာကြလျှင် ဘုရားသခင်က ၎င်းတို့ကို သေချာပေါက် မုန်းလိမ့်မည်ဖြစ်ကာ ရွံရှာစက်ဆုပ်လိမ့်မည် ဖြစ်သည်။ ထို့ကြောင့် ဘုရားသခင်ရှေ့မှောက်သို့ လာခြင်းသည် လူတို့၏ ဖြစ်လိုသည့်အတွေးဖြင့် စွမ်းဆောင်ရရှိနိုင်သည့် အရာတစ်ခု မဟုတ်၊ ထိုအရာမှာ သင့်အနေဖြင့် ထိုသို့ လုပ်ဆောင်ရန် ဆန္ဒရှိရုံဖြင့် ဘုရားသခင်က သင့်ကို သူ့ရှေ့မှောက်သို့ လာပြီးဖြစ်ကြောင်း အသိအမှတ်ပြုမည့်အလား မဟုတ်ပေ။ ဤကိစ္စရပ်တွင် ဆုံးဖြတ်ချက်ချပိုင်ခွင့်မှာ ဘုရားလက်ထဲတွင်ရှိ၏။ ဘုရားသခင်က သင့်ကို အသိအမှတ်ပြုသည့်အခါတွင်သာ သင်သည် ဘုရားသခင်ရှေ့မှောက်သို့ လာပြီးဖြစ်လိမ့်မည်ဖြစ်သည်။ သင့်ထံတွင် မှန်ကန်သည့် ရည်ရွယ်ချက်များရှိသည့်အခါတွင်သာ သမ္မာတရားကို သင် ရှာဖွေပြီး ဘုရားသခင်ထံ မကြာခဏ ဆုတောင်းသည့်အခါတွင်သာ သန့်ရှင်းသော ဝိညာဉ်တော်၏ ဉာဏ်အလင်းပေးခြင်းကို သင် ရရှိနိုင်ပေသည်။ ထိုအခါမှသာ သင်သည် ဘုရားသခင် ရှေ့မှောက်သို့ အမှန်တကယ် ရောက်လာပြီးဖြစ်ပေသည်။ သင်သည် မသိနားမလည်သော အရပ်သူအရပ်သား၊ ယဉ်ပါးအောင်လုပ်မရနိုင်သည့် တောရိုင်းတိရစ္ဆာန်တစ်ကောင်ဖြစ်သည်ဟု ဘုရားသခင်က ပြောလျှင် သူက သင့်ကို အလေးထားလိမ့်မည်လော။ (အလေးထားလိမ့်မည် မဟုတ်ပါ။) ဘုရားသခင်က သင့်ကို အလေးထားလိမ့်မည် မဟုတ်၊ သူသည် သင့်ကို ကျေးဇူးတော် အနည်းအကျဉ်းနှင့် ကောင်းချီး အနည်းငယ်ကဲ့သို့သော အပေါ်ယံအဆင့်ဖြစ်သော အရာများကိုသာ ပေးလိမ့်မည်။ လက်တွေ့သဘောအရ သင်သည် ဘုရားသခင်နှင့် အမှန်တကယ် ရင်းနှီးနိုင်လိမ့်မည် မဟုတ်၊ သို့မဟုတ် သူ့ရှေ့မှောက်သို့ လုံးဝ လာနိုင်လိမ့်မည် မဟုတ်ပေ။ ထို့ကြောင့် ဘုရားသခင်က သင့်ကို သူ၏ နောက်လိုက်တစ်ဦးအဖြစ် အသိအမှတ်မပြုမီတွင် သူ့အိမ်တော်သားတစ်ဦးအဖြစ် သင့်ကို ဘုရားသခင် အသိအမှတ်ပြုသည့် အဆင့်သို့ ရောက်ရှိရန် သင်သည် အပြောင်းအလဲအချို့ကို ပြုလုပ်ရမည်။ ထိုအခါမှသာ ဘုရားသခင်က သင်၏ တာဝန်ကို စတင် စစ်ဆေးလိမ့်မည်ဖြစ်ကာ သင်၏ စကားနှင့် လုပ်ဆောင်ချက်တိုင်း၊ သင်၏ အတွေးနှင့် စိတ်ကူးတိုင်းကို စစ်ဆေးလိမ့်မည်ဖြစ်သည်။ ထို့နောက်တွင်မှ ဘုရားသခင်က သင့်အပေါ် စတင်အမှုပြုလိမ့်မည်ဖြစ်သည်။ ဘုရားအိမ်တော်တံခါးထဲသို့ မဝင်သွားမီတွင် အချို့သော လူတို့၏ အပြုအမူများနှင့် သရုပ်သကန်များ၊ ၎င်းတို့ လူ့သဘာဝ၏ ထုတ်ဖော်ပြမှုများ၊ ၎င်းတို့၏ ကျင့်ကြံမှုများ၊ ၎င်းတို့၏ အတွေးများနှင့် စိတ်ကူးများအပြင် ဘုရားသခင်အပေါ် ၎င်းတို့၏ သဘောထားများသည် ဘုရားသခင်အတွက် မုန်းတီးစက်ဆုပ်ဖွယ်ဖြစ်ပြီး ရွံရှာဖွယ်ဖြစ်သည်။ မုန်းတီးစက်ဆုပ်ဖွယ်ဖြစ်ပြီး ရွံရှာဖွယ်ဖြစ်သည်ဟု သူ မြင်သည့် လူတို့၏ လက်များကို ဘုရားသခင်က ကိုင်ပြီး သူ့အိမ်တော်တံခါးကို ဖြတ်၍ ဦးဆောင်သွားလိမ့်မည်လော။ (ဦးဆောင်လိမ့်မည် မဟုတ်ပါ။) သို့ဆိုလျှင် ဤကဲ့သို့သော လူအချို့သည် အဘယ်ကြောင့် အလွန် ကျေနပ်အားရကာ အလွန် ပျော်ရွှင်နေကြသနည်း။ ဤခံစားချက်သည် မည်သည့်နေရာမှ လာသနည်း။ ဟန်ဆောင်မှုမှ လာပေသည်။ ဤသည်မှာ အသိစိတ် အနည်းငယ် ကင်းမဲ့ခြင်း ဖြစ်သည် မဟုတ်လော။ (ဟုတ်ပါသည်။) ဖန်ဆင်းရှင်ဖြစ်သည့် ဘုရားသခင်သည် သူ၏ နောက်လိုက်များကို ရွေးချယ်ခြင်းအတွက် စံနှုန်းများ လုံးဝ ရှိပေသည်။ ယုံကြည်ရန်မျှသည် လူတို့အတွက် မလုံလောက်ပေ။ ဘုရားသခင်က ရိုးသားသော လူတို့ကို နှစ်သက်ပြီး သူ့အတွက် မိမိတို့ကိုယ်ကို စစ်မှန်ရိုးသားစွာ အသုံးတော်ခံကြသည့်လူများကို ကောင်းချီးပေး၏။ သူ့ကို ချီးမြှောက်ပြီး သက်သေခံနိုင်သည့်သူများကို ဘုရားသခင် အသုံးပြုသည်။ လူတို့အတွက် ဘုရားသခင်၏ စံနှုန်းများသည် လူ၏ စံနှုန်းများနှင့် မတူပေ။ ပေါင်းသင်းရန် မိတ်ဆွေတစ်ဦးကို သင် ရွေးချယ်သည့်အခါ ၎င်းတို့၏ အကျင့်စရိုက်၊ သင်၏ အကြိုက်နှင့် ၎င်းတို့ ကိုက်ညီခြင်း ရှိမရှိ၊ ၎င်းတို့တွင် မည်သည့် ပင်ကိုစရိုက်မျိုး ရှိသည်၊ ၎င်းတို့က သင်နှင့် ဝါသနာများ တူညီခြင်း ရှိမရှိဆိုသည်နှင့် ၎င်းတို့၏ သွင်ပြင်တို့ကို သင် စဉ်းစားရမည်ဖြစ်သည်။ သင်ပင်လျှင် လူတို့ကို ရွေးချယ်သည့်အခါ စံနှုန်းများရှိသောကြောင့် ဘုရားသခင်ကရော အဘယ်သို့နည်း။ လူအချို့က “လူတို့ကို ရွေးချယ်ရန် မည်သည့် စံနှုန်းကို ဘုရားသခင် အသုံးပြုသနည်း။ ဘုရားသခင်ကို ချဉ်းကပ်ရန် ထိုမျှ ခက်ခဲသလော။ ဘုရားသခင်ရှေ့မှောက်သို့လာပြီး ဘုရားအိမ်တော် တံခါးထဲသို့ ဝင်ရန် လူတို့အတွက် အလွန် ခက်ခဲသလော”ဟု ပြောကြသည်။ အမှန်တွင် မခက်ခဲပေ၊ သတ်မှတ်ချက်က မမြင့်မားသော်လည်း စံနှုန်းများ ရှိပေသည်။ ပထမဦးစွာ လူတို့သည် အနည်းဆုံးအနေဖြင့် ဘုရားတရားကိုင်းရှိုင်းသည့် သဘောထား ရှိရမည်ဖြစ်ပြီး မိမိတို့ နေရာကို သိရမည်ဖြစ်သည်။ ထို့အပြင် ဘုရားသခင်ကို ရိုးသားပြီး ဖြူစင်သည့် စိတ်နှလုံးဖြင့် ချဉ်းကပ်ရမည်။ ပြီးလျှင် ၎င်းတို့ လုပ်ဆောင်ပြီး ပြောဆိုသည့် အရာအားလုံးတွင် မွန်မြတ်သော လူမှုကျင့်ဝတ်ရှိခြင်းဖြင့် ပြုမူကျင့်ကြံရမည်ဖြစ်ပြီး အနည်းဆုံးအနေဖြင့် ကောင်းမွန်သည့် စကားအချို့နှင့် လုပ်ဆောင်ချက်အချို့၊ ပြောပုံဆိုပုံအချို့နှင့် ကြီးပြင်းခြင်းတို့ကို ပိုင်ဆိုင်ရမည်။ ဤအခြေခံ သတ်မှတ်ချက်များကိုပင် သင် မပြည့်မီပါက သင့်ကို ရိုးရိုးသားသားပြောရလျှင် ဘုရားသခင်က သင့်ကို လုံးဝ အလေးထားလိမ့်မည် မဟုတ်။ ဤတွင် အဘယ်အရာဖြစ်နေသည်ကို သင် သိသလော။ ဘုရားသခင်ကို ယုံကြည်သည့် လူအချို့နှင့် ပတ်သက်လာသည့်အခါ ၎င်းတို့ လုပ်ဆောင်သည့်အရာ၊ ၎င်းတို့ ထင်ရှားစေသည့်အရာနှင့် ၎င်းတို့ ထုတ်ဖော်သည့်အရာကို ကြည့်လော့။ ၎င်းတို့သည် အဘယ်ကြောင့် ဘုရားသခင်အတွက် အလွန် ရွံရှာဖွယ်ရာနှင့် မုန်းတီးစက်ဆုပ်ဖွယ်ရာ ဖြစ်ရသနည်း။ အဘယ်ကြောင့်ဆိုသော် ဤလူများတွင် လူ့သဘာဝမရှိ၊ အသိတရားနှင့် အသိစိတ်တို့ မရှိကြသောကြောင့်ဖြစ်ပြီး အခြေခံကျကာ အဓိကအကျဆုံးသော မွန်မြတ်သော လူမှုကျင့်ဝတ်ပင် မရှိကြသောကြောင့် ဖြစ်သည်။ ဤကဲ့သို့သော လူတို့အနေဖြင့် ၎င်းတို့ကို လက်မှကိုင်စွဲကာ သူ၏ အိမ်တော်တံခါးမှ ဝင်ဖို့ ဘုရားသခင်ကဦးဆောင်သည်ကို အလိုရှိကြသော်လည်း ယင်းမှာ မဖြစ်နိုင်ပေ။ လူ့သဘာဝ ကင်းမဲ့သည့် ဤကဲ့သို့သော လူများထံ မိုက်မဲသူများသာ ဧဝံဂေလိ ဖြန့်ကြမည်ဖြစ်သည်။ လူအချို့သည် ၎င်းတို့၏ နေ့စဉ်ဘဝများတွင် မိတ်ကပ်ထူထူ လိမ်းကြပြီး မလုံမခြုံ အဝတ်အစားများကို ဝတ်ဆင်ကြသည်။ ၎င်းတို့သည် ဘာသာတရားမရှိသူများကြားမှ ကချေသည်လေးများထက် သာ၍ပင် ဆွဲဆောင်မှုရှိသော ပုံစံဖြင့် ဝတ်စားဆင်ယင်ကြသည်။ ၎င်းတို့၏ သီးသန့် ဘဝများနှင့် ၎င်းတို့၏ ပြုမူနေထိုင်မှုတွင် ဘာသာတရားမရှိသူများနှင့် ၎င်းတို့ ကွဲပြားခြားနားပုံကို သင် မမြင်ရပေ။ ညီအစ်ကို မောင်နှမများကြားတွင် ၎င်းတို့ ရှိသည့်အခါ ဘာသာတရားမရှိသူများနှင့်လည်းကောင်း၊ မယုံကြည်သူများနှင့်လည်းကောင်း သိသိသာသာ တူကြလေသည်။ ထိုသို့သော လူများသည် အပြင်ပန်းတွင် စစ်မှန်သော ယုံကြည်သူများကဲ့သို့ ဖြစ်ပုံရနိုင်သည်။ အမှုအရာများကို ၎င်းတို့ စွန့်လွှတ်ပြီး ဖြစ်နိုင်သည်။ မိမိတို့တာဝန်များကို ထမ်းဆောင်ကောင်း ထမ်းဆောင်နိုင်ကာ ၎င်းတို့ထဲမှ အချို့သည် နှိပ်စက်ညှဉ်းပန်းမှုနှင့် အတိဒုက္ခတို့နှင့် ရင်ဆိုင်ရသည့်အခါ နောက်ဆုတ်ကောင်းနောက်ဆုတ်မည် မဟုတ်သော်လည်း ထိုသို့သော လူများသည် သမ္မာတရားကို လက်ခံနိုင်ကြသလော။ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းတို့ကို ၎င်းတို့ လက်ခံနိုင်ကြသလော။ ၎င်းတို့ အသက်ရှင်နေထိုင်သည့် အရာများအရ ၎င်းတို့သည် သိက္ခာရှိပြီး တည်ကြည်သော လူများဖြစ်သလော။ ရိုးသားသော လူများ ဖြစ်သလော။ သမ္မာတရားကို ချစ်သော လူများဖြစ်သလော။ ဘုရားသခင်အတွက် မိမိတို့ကိုယ်ကို ရိုးသားစစ်မှန်စွာ အသုံးတော်ခံသော လူများဖြစ်ကြသလော။ ဤကဲ့သို့သော လူများကို ဘုရားသခင် အလိုရှိသလော။ လုံးဝ အလိုမရှိပေ။ ဤသည်တို့မှာ ဘုရားအိမ်တော်ထဲသို့ ခိုးကြောင်ခိုးဝှက် ဝင်ရောက်ကြသည့် ဘာသာတရားမရှိသူများဖြစ်သည်။ ၎င်းတို့သည် ဘုရားအိမ်တော် တံခါးပြင်ဘက်တွင်ရှိကြပြီး မဖြတ်ကျော်ရသေးပေ။ ဘုရားအိမ်တော်အတွက် ၎င်းတို့ လုပ်ဆောင်သည့်အရာများမှာ အကူအညီပေးခြင်းနှင့် အားသွန်ခွန်စိုက်လုပ်ခြင်းဖြစ်သည်။ ဤလူများသည် အသင်းတော်၏ မိတ်ဆွေများဖြစ်သော်လည်း ဘုရားအိမ်တော်နှင့် မသက်ဆိုင်ပေ။ ဘုရားသခင်သည် ဘာသာတရားမရှိသူများသို့မဟုတ် တောရိုင်း တိရစ္ဆာန်များကို အလိုမရှိပေ။ ဘုရားသခင်ကို ၎င်းတို့ ယုံကြည်ခဲ့သည့် နှစ်များစွာ၊ ၎င်းတို့ ပိုင်ဆိုင်သည့် အရင်းအနှီး အနည်းငယ်နှင့် အတိတ်တွင် ၎င်းတို့ ထမ်းဆောင်ခဲ့သည့် အရေးကြီးသော တာဝန်များကို အခြေခံ၍ အသင်းတော်ကို ထိန်းချုပ်ကာ ဩဇာအာဏာအားလုံး ရှိလိုလျက် ဘုရားအိမ်တော်တွင် ဩဇာသုံးသည့် လူအချို့လည်း ရှိပေသည်။ ဘုရားသခင်နှင့် သမ္မာတရားအပေါ် ဤလူတို့၏ သဘောထားများသည် ဘုရားသခင်အတွက် မုန်းတီးစက်ဆုပ်ဖွယ်ဖြစ်သည်။ ၎င်းတို့၏ အနှစ်သာရနှင့် ၎င်းတို့ စိတ်နှလုံးများ၏ အတွင်းနက်နက်နေရာများတွင် ပါရှိသည့် အရာများအရ ထိုသို့သော လူများကို သူ့အိမ်တော်သားများအဖြစ် ဘုရားသခင် အသိအမှတ်မပြုပေ။ ထိုသို့သော လူများကို သူ၏ အိမ်တော်သားများအဖြစ် ဘုရားသခင် အသိအမှတ် မပြုသည့်အတွက် အဘယ်ကြောင့် ၎င်းတို့ကို သူ၏ အိမ်တော်ထဲတွင် အလုပ်လုပ်ခွင့်ပေးသနည်း။ ဘုရားသခင်က ၎င်းတို့ကို ကူညီခွင့်ပေးခြင်း၊ သို့မဟုတ် ယာယီအလုပ်ကို လုပ်ခွင့်ပေးခြင်း ဖြစ်သည်။ အကူအညီပေးကာ ယာယီအလုပ်ကို လုပ်သည့် ဖြစ်စဉ်တွင် ၎င်းတို့အနေဖြင့် အသိတရားနှင့် အသိစိတ် အမှန်တကယ် ရှိကြလျှင်၊ သမ္မာတရားကို နားထောင်၊ ကျိုးနွံနာခံကာ လက်ခံနိုင်ကြလျှင် မွန်မြတ်သော လူမှုကျင့်ဝတ်၊ ဘုရားသခင်ကို ကြောက်ရွံ့သော စိတ်နှလုံးနှင့်ဆိုင်သည့်အရာတစ်ခုခု ရှိကာ အမှုအရာများကို ရိုးသားစစ်မှန်သည့် စိတ်နှလုံးဖြင့် လုပ်ဆောင်လျှင်၊ ဤစစ်ဆေးချက်များကို ၎င်းတို့ အောင်လျှင် ဘုရားသခင်က ၎င်းတို့ကို သူ၏ အိမ်တော်ထဲသို့ ဦးဆောင်လိမ့်မည်ဖြစ်ပြီး ၎င်းတို့သည် ဘုရားသခင်၏ အိမ်တော်သားများ ဖြစ်လာကြလိမ့်မည် ဖြစ်သည်။ ဤအချိန်တွင် ၎င်းတို့ လုပ်ဆောင်သည့်အလုပ်နှင့် ၎င်းတို့ကို ဘုရားသခင် တာဝန်ပေးအပ်သည့်အရာတို့သည် ၎င်းတို့၏ တာဝန်များ ဖြစ်လာလိမ့်မည်။ ဘုရားအိမ်တော် တံခါးပြင်ဘက်တွင် လူတို့ လုပ်ဆောင်သည့်အရာသည် တာဝန်တစ်ခုကို ထမ်းဆောင်ခြင်း မဟုတ်၊ ဘုရားအိမ်တော်အတွက် အလုပ်လုပ်ခြင်းနှင့် အကူအညီပေးခြင်းဖြစ်ပြီး ဤလူများသည် အလုပ်လုပ်ပေးသူများ ဖြစ်သည်။

ယခုတွင် သင်တို့သည် ဘုရားသခင်၏ အိမ်တော်သားတစ်ဦး ဟုတ်မဟုတ်ဆိုသည်ကို တိုင်းတာနိုင်ကြသလော။ ဘုရားသခင်ကို သင် ယုံကြည်ခဲ့သည့် အချိန်ကာလ ရှည်ကြာမှုနှင့် သင် အကဲဖြတ်လျှင် သင်သည် အိမ်တော်သားတစ်ဦး ဖြစ်သင့်သော်လည်း ဤသည်မှာ မှန်ကန်တိကျသည့် တိုင်းတာနည်းတစ်ခုလော။ (မဟုတ်ပါ။) တိုင်းတာခြင်းအတွက် သင် အသုံးပြုသင့်သည့် အခြေခံမှာ အဘယ်နည်း။ ထိုအရာမှာ သင်သည် သမ္မာတရားကို ကြားသည့်အခါ အတွင်းပိုင်း တုံ့ပြန်ချက်တစ်ခုခု ရှိမရှိ၊ သမ္မာတရားကို သင် ချိုးဖောက်မိသည့်အခါ သို့မဟုတ် ဘုရားသခင်ကို အတိုက်အခံလုပ်ကာ ပုန်ကန်မိသည့်အခါ သင်၏ စိတ်နှလုံးထဲတွင် အပြစ်ရှိသည့်စိတ်ခံစားရခြင်း၊ အပြစ်ဖော်ဆုံးမခံရခြင်းနှင့် ပဲ့ပြင်ဆုံးမခံရခြင်းတို့ ရှိမရှိဟူသည်တို့ကို အခြေခံပေသည်။ အချို့သောသူတို့သည် ဝေဖန်သုံးသပ်သော စကားများကို ပြောပြီးမှ ပါးစပ်အနာများ ဖြစ်ပေါ်သည့်အသွင်ဖြင့် ပဲ့ပြင်ဆုံးမခြင်းခံရသည်။ အခြားသူတို့မှာ အမှုအရာများကို အလေးအနက် မထားဘဲ ဝတ်ကျေတမ်းကျေပုံစံဖြင့် ပြုမူကြသောကြောင့် ဘုရားသခင်က ၎င်းတို့ကို နာမကျန်းဖြစ်စေသည်။ ဤအရာများကို ဖော်ပြသည့်အခါ ဤလူများအနေဖြင့် စိတ်ထဲတွင် ဝမ်းနည်းပြီး နောင်တရနိုင်ပါက၊ ဤသရုပ်သကန်များကို ၎င်းတို့ ပြသပါက ၎င်းတို့အနေဖြင့် ဘုရားသခင်၏ အိမ်တော်သားများ ဖြစ်ကြပေသည်။ ဘုရားသခင်က ဤလူများကို ဘုရားသခင်၏ အိမ်တော်သားများ၊ ဘုရားသခင် ကိုယ်တော်တိုင်၏ မိသားစုဝင်များအဖြစ် သဘောထားသည်။ သူသည် ၎င်းတို့ကို ရိုက်နှက်သည်၊ ပဲ့ပြင်ဆုံးမသည်၊ အပြစ်ဖော်ဆုံးမပြီး ပြုပြင်လေသည်။ ဤသည်မှာ ဘုရားအိမ်တော်သားတစ်ဦး ဖြစ်သည့်အရာ ဖြစ်သည်။ ဘုရားသခင်အပေါ် သင်၏ သဘောထား ပြောင်းလဲပြီး သင် နောင်တရနိုင်သည့်အခါ ဘုရားသခင်လည်း သင့်အပေါ် သူ၏ သဘောထားကို ပြောင်းလဲလိမ့်မည်။ သင်သည် အသက်ထဲသို့ ဝင်ရောက်ပြီးဖြစ်ကာ အမှုအရာများအပေါ် သင်၏ အမြင်များနှင့် သင့်ဘဝ၏ ဦးတည်ချက်တို့သည် ပြောင်းလဲမှုအချို့ကို ကြုံရပြီး သင်၏ စိတ်နှလုံး အတွင်းနက်နက်နေရာများတွင် သင် စွဲကိုင်ထားသည့် ဘုရားသခင်ကို ယုံကြည်ခြင်းနှင့် ကြောက်ရွံ့ခြင်းတို့သည် တဖြည်းဖြည်း ကြီးထွားကာ ပြောင်းလဲပြီးဖြစ်လိမ့်မည်၊ သင်သည် ဘုရားအိမ်တော်၏ တစ်စိတ်တစ်ပိုင်း ဖြစ်လာပြီးဖြစ်လိမ့်မည်။ လူအချို့သည် ဘုရားသခင်ကို နှစ်များစွာ ယုံကြည်ပြီးဖြစ်သော်လည်း ဘုရားအိမ်တော်ကို အကျိုးပြုရန် များစွာ မလုပ်ဆောင်ကြသေးပေ။ အမှန်တွင် ၎င်းတို့သည် မကောင်းသည့်အရာ အတော်များများ လုပ်ဆောင်မိပြီးဖြစ်သည်။ ၎င်းတို့က လိမ်ညာကာ လှည့်စားပြီးဖြစ်သည်၊ ဝတ်ကျေတမ်းကျေပုံစံဖြင့် အမှုအရာများကို လုပ်ဆောင်ပြီးဖြစ်သည်၊ ထင်ရာမြင်ရာနှင့် တစ်ဖက်သတ် ပြုမူပြီးဖြစ်သည်၊ လှူဖွယ်ပစ္စည်းများကို ခိုးယူပြီးဖြစ်သည်၊ အပေါင်းအဖော်ချင်း ရန်တွေ့စေခြင်းငှာ ပြုပြီးဖြစ်သည်၊ အနှောင့်အယှက်များနှင့် အဖျက်အမှောင့်လုပ်ခြင်းများ ဖြစ်စေပြီးဖြစ်ကာ အသင်းတော်၏ အလုပ်ကို ဖျက်ဆီးပြီးဖြစ်သည်။ ၎င်းတို့သည် အမှားများစွာကို ကျူးလွန်ပြီးဖြစ်သော်လည်း အပြစ်တင်ခြင်းကို လုံးဝ မခံစားကြရလေပြီ။ ၎င်းတို့၏ စိတ်နှလုံးများက မည်သည့် နောင်တမျှ မခံစားရသကဲ့သို့ အပြစ်ရှိသည့်စိတ် စိုးစဉ်းမျှ မရှိကြပေ။ ဤသည်တို့မှာ ဘုရားအိမ်တော်တံခါးပြင်ဘက်တွင် ရပ်ကြသည့်လူများဖြစ်သည်။ ဤလူစားမျိုးများသည် ဘုရားအိမ်တော်၏ တံခါးပြင်ဘက်တွင် အမြဲ အသက်ရှင်ကြ၏။ ၎င်းတို့ လုပ်ဆောင်သည့်အရာတွင် မည်သည့် စည်းမျဉ်းကိုမျှ လိုက်မလျှောက်ကြသကဲ့သို့ ဘုရားနှုတ်ကပတ်တော်များ သို့မဟုတ် သမ္မာတရားကို စိတ်မဝင်စားကြပေ။ အလုပ်တာဝန်များကို ထမ်းဆောင်ခြင်း၊ ပြေးလွှားနေရခြင်း၊ အားထုတ်ကြိုးပမ်းခြင်း၊ မိမိတို့ကိုယ်ကို အလွန်ပင် ကိုယ်ရည်သွေးခြင်းနှင့် ကိုယ်ရေးကိုယ်တာ အရင်းအနှီးကို စုဆောင်းခြင်းတို့ကိုသာ အဓိက အာရုံစိုက်ကြသည်။ အသင်းတော်အလုပ်၊ မိမိတို့၏ တာဝန်များနှင့် ပတ်သက်လာသည့်အခါ ၎င်းတို့ ဝတ်ကျေတမ်းကျေ ပြုမူဆောင်ရွက်ကြသည်။ ၎င်းတို့သည် ဘုရားသခင်ကို လိမ်ညာကာ လှည့်ဖြားကြပြီး ညီအစ်ကို မောင်နှမများကိုပင် အထင်အမြင်မှားစေကာ ထိန်းချုပ်ကြသည်။ ၎င်းတို့သည် အပြစ်ဖော်ဆုံးမခြင်းနှင့် နောင်တ စိုးစဉ်းမျှ မခံစားရသကဲ့သို့ ဘုရားသခင်၏ ပဲ့ပြင်ဆုံးမခြင်းကိုလည်း မခံစားကြပေ။ ဤလူများသည် ဘုရားအိမ်တော်သားများ မဟုတ်ပေ။ အပြင်ပန်းတွင် ဤလူစားမျိုးသည် ပြေးလွှားနေရခြင်းနှင့် မိမိတို့ကိုယ်ကို အသုံးခံခြင်းတို့အတွက် စိတ်ထက်သန်မှုများစွာ ပြကြသည်။ ၎င်းတို့တွင် ယုံကြည်ခြင်းများစွာရှိပြီး မိမိတို့ကိုယ်ကို အသုံးခံရန် လိုလားနေကြသည်။ သမ္မာတရားကို ၎င်းတို့ အမှန်တကယ် ချစ်သည့်ပုံပေါ်သည်၊ ဘုရားသခင်ကို ချစ်ပြီး သမ္မာတရားကို လက်တွေ့လုပ်ဆောင်ရန် လိုလားနေပုံပေါ်ကြသည်။ သို့သော် တရားဒေသနာများကို ၎င်းတို့ နားထောင်သည်နှင့်တစ်ပြိုင်နက် ၎င်းတို့ ငိုက်မြည်းကြသည်။ မတ်မတ် မထိုင်နိုင်ကြသကဲ့သို့ မနှစ်မြို့ခြင်းကို ခံစားကြရသည်။ ၎င်းတို့ စိတ်နှလုံးများတွင် “ဤအရာများနှင့် ပတ်သက်၍ မိတ်သဟာယပြုခြင်းသည် လူတို့၏ အခြေအနေများကို ထောက်ပြခြင်း၊ လူတို့အား မိမိတို့ကိုယ်ကို သိရှိရန် ပြောပြပြီးသည့်နောက် သမ္မာတရား အနည်းငယ်ကို နားလည်စေကာ နောက်ဆုံးတွင် ကျိုးနွံနာခံမှုကို စွမ်းဆောင်ရရှိစေခြင်းသာ ဖြစ်သည် မဟုတ်လော။ ဤအရာအားလုံးကို ငါ နားလည်သည်။ ထို့ကြောင့် အဘယ်ကြောင့် တစ်ဖန် မိတ်သဟာယပြုရမည်နည်း”ဟု တွေးကြသည်။ ဤလူများသည် သမ္မာတရားကို လုံးဝ မနှစ်သက်ကြသကဲ့သို့ ဤကဲ့သို့ဖြစ်နေသည့်တိုင် ၎င်းတို့သည် စိတ်ခံစားချက် လုံးဝ မရှိသည့်အလား အပြစ်တင်မှုမခံစားရဘဲ မည်သည့် ဆုံးမပဲ့ပြင်ခြင်းကိုမျှ မရရှိကြချေ။ ဤလူများအားလုံးသည် ဘုရားအိမ်တော် ပြင်ပတွင် ရှိကြ၏။ ၎င်းတို့သည် ဘာသာတရားမရှိသူများ ဖြစ်ကြသည်။ ဘုရားသခင်၏ အမှုတော်ကို ၎င်းတို့ ကနဦး လက်ခံသည့်အချိန်မှသည် ယနေ့ထိတိုင် ၎င်းတို့သည် ဖန်ဆင်းခံများဖြစ်ပြီး ဘုရားသခင်က ၎င်းတို့၏ ဖန်ဆင်းရှင်ဖြစ်ကြောင်းကို ၎င်းတို့ လုံးဝ အမှန်တကယ် အသိအမှတ်မပြုကြသေးပေ။ ၎င်းတို့သည် သမ္မာတရားကို အနည်းငယ်မျှ လက်မခံကြသကဲ့သို့ မိမိတို့တာဝန်များကို လိုလိုလားလား ထမ်းဆောင်ခြင်း မရှိကြချေ။ သို့ရာတွင် ၎င်းတို့၌ ၎င်းတို့၏ ရည်မှန်းချက်နှင့်အတူပူးတွဲလျက် လိမ္မာပါးနပ်သော အသိဉာဏ်နှင့် စိတ်ထက်သန်မှုအနည်းငယ် ရှိကြသောကြောင့် လူတို့၏ လေးစားမှုကို ရရှိရန် နေရာအနှံ့ ပျာယာခတ် ပြေးလွှားသွားလာခြင်းနှင့် အလုပ်လုပ်ခြင်းကို အာရုံစိုက်ကြလေသည်။ အားလုံးမှာ မိမိတို့အတွက် ဘုရားအိမ်တော်တွင် နေရာတစ်ခုကို ဖန်တီးရယူရန်အလို့ငှာ ဖြစ်သည်။ ၎င်းတို့က “ဤအလုပ်တာဝန်များကို လုပ်ဆောင်ကာ ဤသို့ ပြေးလွှားသွားလာခြင်းအားဖြင့် ဂုဏ်သိက္ခာကို ငါ ရရှိပြီးဖြစ်ကာ အမျိုးမျိုးသော နေရာများတွင် အများယုံကြည်လက်ခံနိုင်မှုကို ရရှိပြီးဖြစ်သည်။ အသင်းတော်တွင် ငါ၏ နေရာကို အရယူပြီးဖြစ်ကာ ငါ သွားသည့်နေရာတိုင်းတွင် ညီအစ်ကို မောင်နှမများက ငါ့ကို အထင်ကြီးကြသည်။ ညီအစ်ကို မောင်နှမများကြားတွင် ထိုသို့သော ဂုဏ်သတင်းရှိခြင်းသည် လုံလောက်၏။ ဤသည်မှာ ငါ အသက်ရှိကြောင်းကို ဆိုလိုပေသည်။ ထိုအရာကို ဘုရားသခင် မည်သို့သတ်မှတ်မည်ကိုမူ စိုးရိမ်ကြောင့်ကြနေရန် မလိုအပ်ပါ”ဟု တွေးကြသည်။ ဤလူများသည် မည်သည့်လူစားမျိုးများ ဖြစ်ကြသနည်း။ အတိအကျ ပြောရလျှင်၊ ၎င်းတို့သည် မယုံကြည်သူများဖြစ်သည်။ ဤအရာကို ပြောဆိုခြင်းအတွက် အခြေခံအကြောင်းရင်းမှာ အဘယ်နည်း။ အခြေခံအကြောင်းရင်းမှာ သမ္မာတရားနှင့် ဘုရားသခင်အပေါ် ၎င်းတို့၏ သဘောထားဖြစ်သည်။ ၎င်းတို့သည် လုံးဝ နောင်တရခြင်းမရှိ၊ မိမိတို့ကိုယ်ကို လုံးဝ သိရှိလာကြခြင်း မရှိသကဲ့သို့ ဘုရားသခင်ကို ကျိုးနွံနာခံရန်မှာ မည်သည့်အရာဖြစ်သည်ကို လုံးဝ မသိခဲ့ကြပေ။ ထိုအစား မိမိတို့တာဝန်များကို ထမ်းဆောင်နေသည်ဟု အကြောင်းပြ၍ ကိုယ်ရေးကိုယ်တာ စီမံခန့်ခွဲမှုတွင် ပါဝင်ပတ်သက်ကာ မိမိတို့ကိုယ်ပိုင် ဆန္ဒများနှင့် နှစ်ခြိုက်မှုများကို ဖြည့်ဆည်းရင်း မိမိတို့ အလိုရှိသည့် မည်သည့်အရာကိုမဆို လုပ်ဆောင်ကြလေသည်။ ၎င်းတို့သည် ဘုရားသခင်ကို နှစ်များစွာကြာ ယုံကြည်ပြီးဖြစ်ကာ အလွန်များသည့် တရားဒေသနာများကို နားထောင်ပြီးဖြစ်သော်လည်း သမ္မာတရားနှင့်ဆိုင်သည့် အယူအဆမရှိကြသကဲ့သို့ ဘုရားသခင်ကို ယုံကြည်ခြင်းက သမ္မာတရားကို လက်တွေ့လုပ်ဆောင်ရန် လိုအပ်သည်ဟူသော အယူအဆလည်း မရှိကြချေ။ အလွန်များသည့် တရားဒေသနာများကို နားထောင်ပြီးနောက်တွင် လမ်းခရီးက အမှန်တကယ် မည်သည့်အရာ ဖြစ်ကြောင်းကို ၎င်းတို့ နားမလည်ကြသေးပေ။ ၎င်းတို့၏ စိတ်ရင်းအမှန်တွင် လူသည် အလွန့်အလွန် ဖောက်ပြန်ပျက်စီးပြီး ဘုရားသခင်၏ ကယ်တင်ခြင်းကို လိုအပ်ကြောင်း မခံစားကြရပေ။ သမ္မာတရားနှင့် ဘုရားသခင်အတွက် လှိုက်လှိုက်လှဲလှဲဖြစ်သည့် စစ်မှန်သော ဆန္ဒများနှင့် တမ်းတမှုတို့ မရှိကြချေ။ ဤသည်မှာ ခက်ခဲသည် မဟုတ်လော။ (ခက်ခဲပါသည်။) အလွန်ခက်ခဲပေသည်။ ၎င်းတို့အတွက် ဘုရားသခင်၊ သမ္မာတရားနှင့် ကယ်တင်ခြင်းတို့သည် လေလုံးတစ်ခု၊ အကြောင်းပြချက်တစ်မျိုး သို့မဟုတ် ဆောင်ပုဒ်တစ်မျိုးမျှသာ ဖြစ်သည်။ ယင်းမှာ အလွန် ခက်ခဲပေသည်။

ပေါလုနှင့် ပေတရုကြား အသိသာဆုံးသော ခြားနားချက်အဖြစ် မည်သည့်အရာကို သင်တို့ မြင်သနည်း။ ပေါလုသည် နှစ်များစွာ ခရီးသွားရင်း၊ မိမိကိုယ်ကို အသုံးခံရင်း၊ ပံ့ပိုးမှုများ ပြုလုပ်ရင်းနှင့် ဆင်းရဲဒုက္ခများစွာ ခါးစီးခံရင်း အလုပ်လုပ်ခဲ့သော်လည်း သူ လျှောက်လှမ်းခဲ့သည့် လမ်းကြောင်းသည် သမ္မာတရားပါဝင်ခြင်းမရှိ၊ ဘုရားသခင်ကို ကျိုးနွံနာခံခြင်း မပါဝင်၊ စိတ်သဘောထားဆိုင်ရာ ပြောင်းလဲခြင်း မပါဝင်ခဲ့သကဲ့သို့ ကယ်တင်ခံရခြင်းက မုချ မပါဝင်ခဲ့ပေ။ ထို့ကြောင့် ပေါလု၏ ဂုဏ်သတင်း မည်မျှမြင့်မားသည်ဖြစ်စေ၊ သူ၏ အရေးအသားများက အနာဂတ် မျိုးဆက်များကို မည်မျှ လွှမ်းမိုးပြီးဖြစ်စေ သူသည် သခင်ယေရှုကို အမှန်တကယ် ချစ်ခဲ့သူတစ်ဦး မဟုတ်ပေ။ သူ့ထံတွင် သခင်ယေရှုအပေါ် စစ်မှန်သည့် သိနားလည်မှု မရှိ၊ သခင်ယေရှုကို တစ်ပါးတည်းသော စစ်မှန်သည့် ဘုရားသခင်အဖြစ် အသိအမှတ်မပြုခဲ့ဘဲ သခင်ယေရှုကို ဘုရားသခင်၏ သားတော်အဖြစ်၊ သာမန်လူတစ်ဦးအဖြစ်သာ အသိအမှတ်ပြုခဲ့သည်။ အကျိုးဆက်အနေဖြင့် သူ့ထံတွင် သခင်ယေရှုကို စစ်မှန်သည့် ကျိုးနွံနာခံမှု မရှိခဲ့ပေ။ သူသည် ဘုရားသခင်၏ အသိအမှတ်ပြုခြင်းကို ရရှိဖို့ မျှော်လင့်ချက်ဖြင့်သာ ဧဝံဂေလိ ဖြန့်ဝေပြီး လူတို့ကို စည်းရုံးသိမ်းသွင်းရန်၊ အသင်းတော်များကို တည်ထောင်ပြီး ထိုအသင်းတော်များကို ကိုယ်တိုင်ကိုယ်ကျ ထိန်းကျောင်းရန် တတ်နိုင်သမျှ အရာရာ လုပ်ဆောင်ခဲ့ခြင်းဖြစ်သော်လည်း ဘုရားသခင်သည် ပေါလု၏ စိတ်နှလုံးကို စေ့စေ့စပ်စပ် ကြည့်ရှုစစ်ဆေးခဲ့ကာ သူ့ကို အသိအမှတ်မပြုခဲ့ပေ။ နှိုင်းယှဉ်ကြည့်လျှင် ပေတရုသည် အမှုအရာများကို တိတ်ဆိတ်စွာ လုပ်ဆောင်ခဲ့ပြီး သူ၏ စိတ်နှလုံးသည် သူ့ကို သခင်ယေရှု ပြောခဲ့သည့်အရာနှင့် အမြဲ ပြည့်နေခဲ့သည်။ သူသည် သခင်ယေရှု၏ သတ်မှတ်ချက်များအတိုင်း ဘုရားသခင်ကို ချစ်ခြင်းနှင့် နားလည်ခြင်းတို့ကို လိုက်စားခဲ့သည်။ ဤအချိန်အတောအတွင်းတွင် သူသည် ဘုရားသခင်၏ အပြစ်ဖော်ဆုံးမခြင်း၊ ပြုပြင်ခြင်းနှင့် ပြစ်တင်မောင်းမဲခြင်းကိုပင် လက်ခံခဲ့ပြီးဖြစ်သည်။ ပေတရုကို ပြစ်တင်မောင်းမဲရန် ဘုရားသခင် အသုံးပြုခဲ့သည့် စကားများမှာ အဘယ်နည်း။ (“အချင်းစာတန်၊ ငါ့နောက်သို့ဆုတ်လော့။” (ရှင်မဿဲခရစ်ဝင် ၁၆:၂၃)ဟူ၍ ဖြစ်သည်။) မှန်၏၊ “အချင်းစာတန်၊ ငါ့နောက်သို့ ဆုတ်လော့”ဟူ၍ ဖြစ်သည်။ ဘုရားသခင်သည် ထိုသို့သော စကားများကို ပြောဆိုခဲ့သော်လည်း ဤစကားများက ပေတရု၏အဆုံးသတ်ကို မသတ်မှတ်ခဲ့ပေ၊ ယင်းတို့က ပြစ်တင်မောင်းမဲခြင်းမျှသာ ဖြစ်သည်။ ဘုရားသခင်သည် ပေါလုအား သူ၏ အလုပ်အတောအတွင်းတွင် ပြစ်တင်မောင်းမဲခဲ့သလော။ (ပြစ်တင်မောင်းမဲခြင်း မရှိခဲ့ပါ။) တစ်နည်းအားဖြင့် စိတ်ခံစားချက်အရဖြစ်သော အချက်များကို ကြည့်သည့်အခါ ဘုရားသခင်က သူ့ကို ပြစ်တင်မောင်းမဲခြင်း မရှိခဲ့ပေ။ နောက်တစ်နည်းအားဖြင့် အမှန်တကယ်ဖြစ်သော အချက်များနှင့် ဆိုင်သော ရှုထောင့်အမြင်မှကြည့်လျှင် ပေါလုသည် သမ္မာတရားကို လက်မခံခဲ့ပေ၊ သမ္မာတရားကို မရှာဖွေခဲ့သကဲ့သို့ ကယ်တင်ခြင်းကို ရရှိမည့် နည်းလမ်းကို လုံးဝ မရှာဖွေခဲ့သောကြောင့် ဤအရာများကို သူ မရရှိနိုင်ခဲ့ သို့မဟုတ် မတွေ့ကြုံနိုင်ခဲ့ပေ။ သူ့အပေါ် ဘုရားသခင် ပြုခဲ့သည့်အမှုမှာ သူ၏ အစေခံမှုကို အသုံးပြုခြင်း ဖြစ်သည်။ သူသည် ကြီးမားသည့် မကောင်းမှု တစ်ခုမျှ ကျူးလွန်ခြင်းမရှိဘဲ အဆုံးထိတိုင် အလုပ်လုပ်ပေးနိုင်ခဲ့မည်ဆိုလျှင် အလုပ်လုပ်ပေးသူတစ်ဦးအဖြစ် သူ ကျန်ရှိနေနိုင်မည်ဖြစ်သည်။ သို့ရာတွင် ကြီးမားသည့် မကောင်းမှုတစ်ခုတလေကို သူ ကျူးလွန်မိခဲ့လျှင်မူ ရလဒ်က ကွဲပြားခြားနားမည်ဖြစ်သည်။ ယင်းမှာ ကွာခြားချက်ဖြစ်၏။ တစ်ဖက်တွင် ပေတရုသည် ဘုရားသခင်ထံမှ ပဲ့ပြင်ဆုံးမမှု၊ ရိုက်နှက်ခြင်းနှင့် ပြစ်တင်မောင်းမဲခြင်းများစွာ ရရှိခဲ့သည်။ အပြင်ပန်းအားဖြင့် ပေတရုသည် ဘုရားသခင်ကို မကျေမနပ်ဖြစ်စေရင်း ဘုရားသခင်၏ ရည်ရွယ်ချက်များနှင့် ကိုက်ညီခဲ့ခြင်း မရှိဟု ထင်ရမည်ဖြစ်သော်လည်း ဘုရားသခင်၏ ရည်ရွယ်ချက်များနှင့်ဆိုင်သော ရှုထောင့်အမြင်မှကြည့်လျှင် ထိုသို့သော လူတစ်ဦးသည် သူ အလိုရှိကာ သူ့ကို ကျေနပ်အားရစေခဲ့သည့် သူတစ်ဦး အတိအကျ ဖြစ်ခဲ့ပေသည်။ ယင်းကြောင့် သူ့အနေဖြင့် ဖြည်းဖြည်းချင်း ကြီးထွားရင့်ကျက်ရန်အလို့ငှာ၊ သမ္မာတရားထဲသို့ ဝင်ရောက်ကာ ဘုရားသခင်၏ ရည်ရွယ်ချက်များကို နားလည်လာပြီး နောက်ဆုံးတွင် စစ်မှန်သော ကျိုးနွံနာခံမှုနှင့် စစ်မှန်သော ပြောင်းလဲမှုကို ရရှိရန်အလို့ငှာ ဘုရားသခင်က သူ့ကို အဆက်မပြတ် ရိုက်နှက်ဆုံးမကာ ပြုပြင်ခဲ့ခြင်း ဖြစ်သည်။ ဤသည်မှာ ဘုရားသခင်၏ ချစ်ခြင်းမေတ္တာနှင့် ကယ်တင်ခြင်း ဖြစ်သည်။