ယခုအခါ နောက်ဆုံးတွင်မူ လူသားမျိုးနွယ်သည် ဘုရားသခင်၏ လုံလောက်ပြီး အလျှံပယ်ဖြစ်သော ကျေးဇူးတော်ကို မွေ့လျော်ပြီးဖြစ်သဖြင့် မည်သည့် ရှုထောင့်မဆိုမှ ရှုမြင်လင့်ကစား ဤလောကနှင့် ဤလူသားမျိုးနွယ်သည် ဘုရားသခင်က လူသားမျိုးနွယ်ကို စစ်မှန်သည့် ကယ်တင်ခြင်း အမှုအား လုပ်ဆောင်မည့်အဆင့်တစ်ခုသို့ ရောက်လာကြပြီဖြစ်သည်။ လူသားမျိုးနွယ်ကို ဘုရားသခင်က သိမ်းပိုက်၊ ပြစ်တင်ဆုံးမကာ တရားစီရင်မည့် အချိန်၊ လူသားမျိုးနွယ်ကို စုံလင်စေရန်နှင့် ထိုအရာများထဲတွင် အရာခပ်သိမ်း၏ ဘဏ္ဍာစိုးဖြစ်နိုင်သည့် အုပ်စုတစ်စုကို လူသားမျိုးနွယ်မှ ရရှိရန် သမ္မာတရားများစွာ သူဖော်ပြမည့်အချိန်ကာလသို့ ၎င်းတို့ ရောက်လာကြပြီးဖြစ်သည်။ ဤအချိန်ကာလ ရောက်လာသည့်အခါ ဘုရားသခင်သည် စိတ်ရှည်ရန် မလိုအပ်တော့သကဲ့သို့ ကျေးဇူးတော်တွင် အသက်ရှင်ရန် ကျေးဇူးတော်ခေတ်၏ လူသားမျိုးနွယ်ကို ဆက်လက်ဦးဆောင်ရန် မလိုတော့ပေ။ ကျေးဇူးတော်၌ အသက်ရှင်နေသည့် လူသားမျိုးနွယ်အတွက် သူ ဆက်လက် ထောက်ပံ့ပေးရန်၊ သို့မဟုတ် ၎င်းတို့ကို ထိန်းကျောင်းရန်၊ သို့မဟုတ် စောင့်ရှောက်ရန်၊ သို့မဟုတ် ကာကွယ်ပေးရန် မလိုအပ်တော့ပေ။ လူသားမျိုးနွယ်ကို ကျေးဇူးတော်၊ ကောင်းချီးများနှင့် မမောနိုင် မပန်းနိုင်၊ အကြွင်းမဲ့ ထောက်ပံ့ပေးရန် မလိုအပ်တော့ပေ။ ၎င်းတို့သည် သူ့ကို လုံးဝ ကိုးကွယ်ခြင်းမရှိဘဲ သူ၏ ကျေးဇူးတော်ကို လောဘတကြီးနှင့် အရှက်မဲ့စွာ တောင်းခံသည်နှင့်အမျှ ကျေးဇူးတော်၌ရှိသည့် လူသားမျိုးနွယ်နှင့်ပတ်သက်၍ သူသည် အကြွင်းမဲ့ စိတ်ရှည်ရန် မလိုအပ်တော့ပေ။ ဤအရာအစား ဘုရားသခင် လုပ်ဆောင်မည့်အရာမှာ သူ၏ ရည်ရွယ်ချက်များ၊ သူ၏ စိတ်သဘောထား၊ သူ့နှလုံးသား၏ စစ်မှန်သော အသံနှင့် သူ၏ အနှစ်သာရကို ဖော်ပြရန် ဖြစ်သည်။ ဤအချိန်အတောအတွင်းတွင် ဘုရားသခင်သည် လူသားမျိုးနွယ်ကို ၎င်းတို့ လိုအပ်သည့် အမျိုးစုံသော သမ္မာတရားများ၊ နှုတ်ကပတ်တော်များနှင့် ထောက်ပံ့ပေးနေစဉ်တွင် သူ၏ စစ်မှန်သော စိတ်သဘောထားဖြစ်သည့် ဖြောင့်မတ်သော စိတ်သဘောထားကိုလည်း ထုတ်ဖော်ကာ ဖော်ပြနေပေသည်။ သူ၏ ဖြောင့်မတ်သော စိတ်သဘောထားကို ဖော်ပြရာတွင် သူသည် တရားစီရင်ခြင်းနှင့် ရှုတ်ချခြင်း စကားရပ် အနည်းငယ်ကို အနှစ်မဲ့စွာ ပေးပြီး ထိုအရာနှင့်ပတ်သက်၍ အပြီးသတ်လိုက်သည့်အလား မဟုတ်ပေ။ ထိုအစား လူသားမျိုးနွယ်၏ ဖောက်ပြန်ပျက်စီးခြင်း၊ ၎င်းတို့၏ အနှစ်သာရနှင့် ၎င်းတို့၏ ဆိုးယုတ်သော အကျည်းတန်မှုကို ဖော်ထုတ်ရန် အချက်အလက်များကို သူ အသုံးပြုသည်။ လူသားမျိုးနွယ်၏ ပုန်ကန်မှု၊ အတိုက်အခံလုပ်ခြင်းနှင့် သူ့အပေါ် ငြင်းပယ်ခြင်းအပြင်၊ သူနှင့် ပတ်သက်သည့် ၎င်းတို့၏ အမျိုးမျိုးသော အယူအဆများနှင့် သူ့အပေါ် သစ္စာဖောက်ခြင်းတို့ကို သူ ဖော်ထုတ်သည်။ ဤကာလတွင် သူဖော်ပြသည့်အရာအများစုသည် လူသားမျိုးနွယ်ထံ သူ ရရှိစေသည့် သနားကရုဏာနှင့် မေတ္တာကျေးဇူးတော်တို့ကို ကျော်လွန်ပေသည်။ ယင်းမှာ လူသားမျိုးနွယ်အတွက် သူ ရှိသည့် မုန်းတီးမှု၊ ရွံရှာမှု၊ မနှစ်သက်ခြင်းနှင့် ရှုတ်ချခြင်းတို့ ဖြစ်သည်။ ဘုရားသခင်၏ စိတ်သဘောထားနှင့် ပင်ကိုလက္ခဏာတွင် ဤရုတ်ခြည်းဖြစ်သည့် လုံးဝဥဿုံဖြစ်သော အလှည့်အပြောင်း၊ သို့မဟုတ် ပြောင်းလဲခြင်းက လူသားမျိုးနွယ်ကို မမျှော်လင့်ဘဲ အငိုက်မိသွားစေပြီး လက်ခံနိုင်စွမ်းမရှိ ဖြစ်စေသည်။ ဘုရားသခင်သည် သူ၏ စိတ်သဘောထားနှင့် နှုတ်ကပတ်တော်များကို ကြီးမားသော တန်ခိုးအာဏာဖြင့် ရုတ်တရက် ဖော်ပြ၏။ လူသားမျိုးနွယ် လိုအပ်သမျှအားလုံးနှင့်ပတ်သက်၍လည်း အလွန်ကြီးမားသည့် စိတ်ရှည်သည်းခံခြင်းဖြင့် သူ ထောက်ပံ့လေသည်။ မတူကွဲပြားသော နည်းလမ်းများဖြင့်လည်းကောင်း၊ မတူကွဲပြားသော ရှုထောင့်များမှလည်းကောင်း ဘုရားသခင်သည် ဖန်ဆင်းရှင်တစ်ဦးအဖြစ် သူ၏ ရပ်တည်ချက် ရှုထောင့်မှ အဖန်ဆင်းခံများကို ဆက်ဆံရမည့် အသင့်တော်ဆုံး၊ အကိုက်ညီဆုံး၊ အခိုင်လုံဆုံးနှင့် တိုက်ရိုက်အကျဆုံး နည်းလမ်းများဖြင့် လူသားမျိုးနွယ်ကို စကားပြောကာ သူ၏ စိတ်သဘောထားကို ဖော်ပြလေသည်။ ယင်းတို့မှာ နှစ်ပေါင်း ခြောက်ထောင်ကြာ စောင့်ဆိုင်းခြင်းဖြင့် ဘုရားသခင် တောင့်တနေခဲ့သည့် အပြောနှင့် အလုပ်ညီသော နည်းလမ်းများ ဖြစ်သည်။ အနှစ်ခြောက်ထောင်ကြာ တောင့်တခြင်း၊ အနှစ်ခြောက်ထောင်ကြာ စောင့်ဆိုင်းခြင်း၊ ဤသည်တို့က သူ၏ အနှစ်ခြောက်ထောင် မျှော်လင့်စောင့်စားမှု ပါရှိလျက် ဘုရားသခင်၏ အနှစ်ခြောက်ထောင်ကြာ စိတ်ရှည်ခြင်းကို ပြောဆိုပေသည်။ လူသားမျိုးနွယ်သည် ဘုရားသခင်၏ ဖန်ဆင်းခြင်းကို ခံရလင့်ကစား ကြယ်များပြောင်းလဲကာ သမုဒ္ဒရာများ ရွေ့လျားပြောင်းလဲခြင်းဟူသည့် နှစ်ခြောက်ထောင်ကြာ မရပ်မနား ပြောင်းလဲမှုကို တွေ့ကြုံရပြီးသည့်နောက်တွင် ၎င်းတို့သည် ကနဦးက ဘုရားသခင် ဖန်ဆင်းခဲ့သည့် အနှစ်သာရမျိုးဖြင့် လူသားမျိုးနွယ် မဟုတ်တော့ပေ။ သို့ဖြစ်၍ ယနေ့ ဘုရားသခင်သည် မိမိ၏အမှုတော်ကို စတင်တော်မူသောအခါ၊ ကိုယ်တော်မြင်တွေ့တော်မူသော လူသားမျိုးနွယ်သည် ဘုရားသခင် မျှော်လင့်တော်မူသည့်အရာဖြစ်သော်ငြားလည်း ကိုယ်တော် ရွံရှာစက်ဆုပ်တော်မူသည့်အရာလည်းဖြစ်သည်၊ ကိုယ်တော် မကြည့်ရက်နိုင်သည့်အရာလည်း ဖြစ်သည်မှာလည်း အမှန်ပင်တည်း။ ဤနေရာတွင် အချက်သုံးချက်ကို ငါ ပြောခဲ့သည်။ ထိုအရာများကို သင်တို့ သတိရကြသလော။ ဘုရားသခင် မျှော်လင့်ထားသည့်အရာ ဖြစ်သော်လည်း ထိုသို့သော လူသားမျိုးနွယ်သည် သူ၏ စက်ဆုပ်ခြင်းကိုလည်း ခံရသည်။ အခြားတစ်ခုမှာ အဘယ်နည်း။ (ဘုရားသခင်အတွက် ၎င်းတို့ကို ရှုမြင်ရသည်မှာ အလွန် ဝမ်းနည်းစရာ ဖြစ်ပါသည်။) ၎င်းတို့သည် ဘုရားသခင်အတွက် ရှုမြင်ရန် အလွန်ဝမ်းနည်းစရာလည်း ဖြစ်သည်။ ဤအရာသုံးခုလုံးသည် လူ့အထဲတွင် တစ်ပြိုင်နက်တည်း တည်ရှိနေသည်။ ဘုရားသခင် မျှော်လင့်ထားသည်မှာ မည်သည့်အရာ ဖြစ်သနည်း။ ပညတ်တော်ကို တွေ့ကြုံကာ ထို့နောက် ရွေးနုတ်ခြင်းကို တွေ့ကြုံပြီးသည့်နောက်တွင် ထိုသို့သော လူသားမျိုးနွယ်သည် လူက ထိန်းသိမ်းသင့်သည့်၊ အခြေခံကျသော ပညတ်တရားအချို့နှင့် ပညတ်ချက်အချို့ကို သိနားလည်ခြင်း အခြေခံအုတ်မြစ်ပေါ် နောက်ဆုံးတွင် ယနေ့ထိတိုင် လျှောက်လှမ်းကြပြီး အာဒံနှင့် ဧဝဖြစ်ခဲ့သကဲ့သို့ မိမိတို့စိတ်နှလုံး အတွင်း၌ ဗလာနတ္တိဖြစ်သည့် ရိုးရှင်းသော လူသားမျိုးနွယ်တစ်ခု ဖြစ်တော့မည်မဟုတ်။ ထိုအစား ၎င်းတို့၏ စိတ်နှလုံးတွင် အသစ်သောအရာများ အတိုင်းအတာတစ်ခု ရှိမည်ဖြစ်သည်။ ထိုအရာများမှာ လူသားမျိုးနွယ် ပိုင်ဆိုင်မည်ဟု ဘုရားသခင် မျှော်လင့်ထားသည့် အရာများ ဖြစ်သည်။ သို့တိုင် တစ်ချိန်တည်းမှာပင် လူသားမျိုးနွယ်သည် ဘုရားသခင် စက်ဆုပ်သည့် လူသားမျိုးနွယ်လည်း ဖြစ်နေသည်။ ထိုသို့ဖြစ်လျှင် ဘုရားသခင် စက်ဆုပ်သည့်အရာမှာ မည်သည့်အရာနည်း။ သင်တို့အားလုံး မသိကြသလော။ (လူ၏ ပုန်ကန်မှုနှင့် အတိုက်အခံလုပ်ခြင်း ဖြစ်သည်။) လူသားမျိုးနွယ်သည် ဆိုးရွားသော ဘဝတစ်ခုကို ရှင်သန်လျက် လူလည်း သိပ်မဟုတ်၊ မကောင်းဆိုးဝါးလည်းမဟုတ်ဘဲ စာတန်၏ ဖောက်ပြန်ပျက်စီးသော စိတ်သဘောထားဖြင့် ပြည့်နေသည်။ လူသားမျိုးနွယ်သည် မြွေ၏ ဆွဲဆောင်မှုကို မခံရပ်နိုင်အောင် သိပ်မရိုးရှင်းတော့ချေ။ လူသားမျိုးနွယ်သည် အားလုံးသော အမှုအရာများ၊ ဖြစ်ရပ်များတို့နှင့် စပ်လျဉ်း၍ မိမိတို့ကိုယ်ပိုင် အတွေးများနှင့် အမြင်များ၊ မိမိတို့ကိုယ်ပိုင် တိကျသော အယူအဆများနှင့် မိမိတို့ကိုယ်ပိုင် နည်းလမ်းများ ရှိသော်လည်း လူများနှင့် အမှုအရာများအပေါ် လူသားမျိုးနွယ်၏ အမြင်များတွင်၊ သို့မဟုတ် ၎င်းတို့၏ ကိုယ်ပိုင်ကျင့်ကြံပြုမူခြင်းနှင့် လုပ်ဆောင်ချက်များတွင် ဘုရားသခင် အလိုရှိသည့်အရာ မည်သည့်အရာမျှ လုံးဝ မရှိချေ။ လူသားမျိုးနွယ်သည် စဉ်းစားပြီး အမြင်များကို စွဲကိုင်နိုင်ကာ မိမိတို့ လုပ်ဆောင်ချက်များအတွက် ကိုယ်ပိုင် အကြောင်းပြချက်များ၊ နည်းလမ်းများနှင့် သဘောထားများ ရှိကြသော်လည်း ၎င်းတို့ ပိုင်ဆိုင်သည့် ဤအရာအားလုံးက စာတန်၏ ဖောက်ပြန်ပျက်စီးခြင်း၌ ဇစ်မြစ်ရှိလေသည်။ အားလုံးက စာတန်၏ အမြင်များနှင့် အတွေးအခေါ်များပေါ် အခြေပြုသည်။ လူသည် ဘုရားသခင်ရှေ့သို့ ရောက်လာသည့်အခါ ၎င်းတို့၏ စိတ်နှလုံးတွင် ဘုရားသခင်အပေါ် ကျိုးနွံနာခံမှု အရိပ်အယောင် မရှိသကဲ့သို့ ရိုးသားစစ်မှန်မှု တစ်ခုတလေလည်း မရှိပေ။ လူသည် စာတန်၏ အဆိပ်အတောက်များဖြင့် ပြည့်ဝပြီး ၎င်း၏ ပညာရေး၊ အတွေးများနှင့် ဖောက်ပြန်ပျက်စီးသော စိတ်သဘောထားတို့ဖြင့် ပြည့်နေသည်။ ဤအရာက မည်သည့်အရာကို ညွှန်ပြသနည်း။ ၎င်းတို့၏ တည်ရှိခြင်း နည်းလမ်းနှင့် ဘုရားသခင်အပေါ် ဆက်ဆံသည့် သဘောထားကို ပြောင်းလဲရန်အလို့ငှာ သာ၍ တိကျစွာ ဆိုရလျှင် ၎င်းတို့၏ လူများနှင့် အမှုအရာများအပေါ် အမြင်များနှင့် ၎င်းတို့၏ ကိုယ်ပိုင်ကျင့်ကြံပြုမူခြင်းနှင့် လုပ်ဆောင်ချက်များအတွက် စံနှုန်းများနှင့် နည်းလမ်းများကို ပြောင်းလဲရန်အလို့ငှာ ဘုရားသခင်သည် လူအတွက် များစွာသော နှုတ်ကပတ်တော်များ ပြောဆိုကာ အမှုများစွာ လုပ်ဆောင်ရမည်ဖြစ်သည်။ ဤအရာအားလုံး သက်ရောက်မှုမရှိမီတွင် လူသားမျိုးနွယ်သည် ဘုရားသခင်၏ အမြင်တွင် စက်ဆုပ်ခြင်းခံရသူ ဖြစ်သည်။ သူ၏ စက်ဆုပ်ခြင်းခံရသူတစ်ဦးကို ဘုရားသခင် ကယ်တင်သည့်အခါ မည်သည့်အရာကို ဘုရားသခင် လိုအပ်ပါသနည်း။ သူ၏ စိတ်နှလုံးတွင် ဝမ်းမြောက်မှု ရှိသလော။ ပျော်ရွှင်မှု ရှိသလော။ စိတ်သက်သာမှု ရှိသလော။ (မရှိပါ။) စိတ်သက်သာမှု လုံးဝ မရှိသကဲ့သို့ မည်သည့် ပျော်ရွှင်မှုမျှလည်း မရှိပေ။ သူ၏ စိတ်နှလုံးသည် စက်ဆုပ်ခြင်းဖြင့် ပြည့်နေ၏။ ထိုသို့သော အခြေအနေများတွင် မမောနိုင်မပန်းနိုင် စကားပြောခြင်းမှလွဲ၍ ဘုရားသခင် လုပ်ဆောင်မည့်အရာမှာ သည်းခံခြင်းကို ကျင့်သုံးရန် ဖြစ်သည်။ ဤသည်မှာ သူ၏ အမြင်မှတစ်ဆင့် စက်ဆုပ်မှုအဖြစ် မြင်ရသည်နှင့်အမျှ ထိုသို့သော လူသားမျိုးနွယ်အပေါ် ဘုရားသခင် ခံစားသည့်အရာ၏ ဒုတိယ အရိပ်လက္ခဏာ ဖြစ်သည်။ တတိယ အရိပ်လက္ခဏာမှာ ၎င်းတို့ကို ရှုမြင်ရသည်မှာ အလွန်ဝမ်းနည်းဖွယ် ဖြစ်ခြင်း ဖြစ်သည်။ လူသားမျိုးနွယ်ကို ဖန်ဆင်းရာတွင် ဘုရားသခင်၏ မူလ အကြံအရ၊ လူနှင့် ဘုရားသခင်၏ ဆက်ဆံရေးသည် မိဘနှင့် ကလေး ဆက်ဆံရေး၊ မိသားစုဆက်ဆံရေး ဖြစ်သည်။ ဤဆက်ဆံရေး ရှုထောင့်သည် လူသားမျိုးနွယ်၏ သွေးချင်းဆက်နွှယ်မှုများကဲ့သို့ မဖြစ်နိုင်သော်လည်း ဘုရားသခင်အဖို့ ယင်းသည် လူသားမျိုးနွယ်၏ ဇာတိဆိုင်ရာ သွေးချင်းဆက်နွှယ်မှုများထက် သာလွန်သည်။ ကနဦး ဘုရားသခင် ဖန်ဆင်းခဲ့သည့် လူသားမျိုးနွယ်သည် နောက်ဆုံးသော ကာလတွင် သူ မြင်ရသည့် လူသားမျိုးနွယ်နှင့် ပုံသဏ္ဌာန်အားဖြင့် လုံးဝ ကွဲပြားခြားနား၏။ အစအဦးတွင် လူသည် ရိုးရှင်းပြီး ကလေးဆန်သော ပုံသဏ္ဌာန်ရှိခဲ့ပြီး ၎င်းတို့ မသိနားမလည်ခဲ့သော်လည်း ၎င်းတို့၏ စိတ်နှလုံးက ဖြူစင်ကာ သန့်ရှင်း၏။ ၎င်းတို့၏ စိတ်နှလုံး နက်နက်ထဲက ကြည်လင်ပြတ်သားမှုနှင့် ပွင့်လင်းမြင်သာမှုကို ၎င်းတို့၏ မျက်လုံးများတွင် မြင်နိုင်သည်။ ၎င်းတို့သည် ယခု လူတွင်ရှိသည့် အမျိုးမျိုးသော ဖောက်ပြန်ပျက်စီးသည့် စိတ်သဘောထားများ မရှိခဲ့ကြချေ။ စိတ်နှလုံးမာကျောခြင်း၊ မာနထောင်လွှားခြင်း၊ ကောက်ကျစ်ဆိုးယုတ်မှု၊ သို့မဟုတ် လှည့်ဖြားမှုတို့ မရှိခဲ့ကြသကဲ့သို့ သေချာပေါက် သမ္မာတရားကို အလွန်အမင်း မနှစ်မြို့သည့် စိတ်သဘောထား မရှိခဲ့ကြချေ။ လူ၏ စကားနှင့် လုပ်ရပ်များမှ၊ ၎င်းတို့၏ မျက်လုံးများမှ၊ ၎င်းတို့၏ မျက်နှာမှ၊ ထိုလူသားမျိုးနွယ်သည် ဘုရားသခင်က အစအဦး၌ ဖန်ဆင်းခဲ့ပြီး သူ မျက်နှာသာပေးခဲ့သည့် လူသားမျိုးနွယ်ဖြစ်သည်ကို မြင်နိုင်သည်။ သို့ရာတွင် အဆုံး၌ ဘုရားသခင်သည် လူသားမျိုးနွယ်ကို တစ်ဖန် ကြည့်ရှုလေ့လာသည့်အခါ လူ၏ စိတ်နှလုံးသည် အတွင်းကျကျ နေရာများ၌ သိပ် မရှင်းလင်းတော့သကဲ့သို့ ၎င်းတို့၏ မျက်လုံးများသည်လည်း သိပ်မရှင်းတော့ချေ။ လူ၏ စိတ်နှလုံးသည် စာတန်၏ ဖောက်ပြန်ပျက်စီးသော စိတ်သဘောထားများဖြင့် ပြည့်ကာ ဘုရားသခင်နှင့် ဆုံသည့်အခါ ၎င်းတို့၏ မျက်နှာ၊ စကားနှင့် လုပ်ရပ်များသည် သူ့အတွက် စက်ဆုပ်ဖွယ်ဖြစ်လေသည်။ သို့ရာတွင် မည်သူမျှ မငြင်းနိုင်သည့် အမှန်တရားတစ်ခုရှိပြီး ထိုသို့သော လူသားမျိုးနွယ်သည် သူ၏ မျက်လုံးများဖြင့် ရှုမြင်ရသည်မှာ အလွန် ဝမ်းနည်းဖွယ်ဖြစ်သည်ဟု ဘုရားသခင် ပြောသည်မှာ ဤအမှန်တရားကြောင့် ဖြစ်သည်။ ယင်းမှာ မည်သည့် အမှန်တရား ဖြစ်သနည်း။ ယင်းမှာ မည်သူမျှ မငြင်းနိုင်သည့် ဤအရာဖြစ်သည်။ ဘုရားသခင်သည် သူ့ရှေ့မှောက်သို့ နောက်တစ်ကြိမ် ရောက်လာပြီဖြစ်သည့် ဤလူသားမျိုးနွယ်ကို မိမိကိုယ်တိုင်၏ လက်ဖြင့် ဖန်ဆင်းခဲ့သော်လည်း ၎င်းတို့သည် အစအဦး၌ ရှိခဲ့သည့် လူသားမျိုးနွယ် မဟုတ်တော့ချေ။ လူ၏ မျက်လုံးများမှသည် အတွေးများ၊ ၎င်းတို့၏ စိတ်နှလုံး အတွင်းကျကျထိတိုင် ဘုရားသခင်အပေါ် အတိုက်အခံလုပ်ခြင်း၊ သစ္စာဖောက်ခြင်းတို့နှင့် ပြည့်နေသည်။ လူ၏ မျက်လုံးများမှသည် ၎င်းတို့၏ အတွေးများနှင့် ၎င်းတို့၏ စိတ်နှလုံး အတွင်းကျကျထိတိုင် ထိုအရာများမှ ထုတ်ဖော်ပြသည့်အရာများသည် စာတန်၏ ဖောက်ပြန်ပျက်စီးသော စိတ်သဘောထားထက် တစ်ပြားသားမျှ မလျော့ပေ။ စိတ်နှလုံးမာကျောခြင်း၊ မာနထောင်လွှားခြင်း၊ လှည့်ဖြားခြင်း၊ ကောက်ကျစ်ဆိုးယုတ်မှုနှင့် သမ္မာတရားကို အလွန်အမင်း မနှစ်မြို့ခြင်း နှင့်ဆိုင်သည့် လူ၏ စာတန်ဆန်သော စိတ်သဘောထားများသည် ၎င်းတို့၏ အကြည့်နှင့် မျက်နှာအမူအရာများမှ ထပ်တူထပ်မျှ ဖုံးကွယ်ခြင်းမရှိဘဲ အလိုအလျောက် ထုတ်ဖော်ပြလေသည်။ ဘုရားနှုတ်ကပတ်တော်နှင့် ရင်ဆိုင်ရသည့်အခါ၊ သို့မဟုတ် ဘုရားသခင်နှင့် တေ့တေ့ဆိုင်ဆိုင် ရင်ဆိုင်ရသည့်အခါတွင်ပင် လူ၏ ဖောက်ပြန်ပျက်စီး၍ စာတန်ဆန်သော စိတ်သဘောထားနှင့် စာတန် ဖျက်ဆီးထားသော လူ၏ အနှစ်သာရတို့က ဤနည်းဖြင့် ဖုံးကွယ်ခြင်းမရှိဘဲ ထုတ်ဖော်ပြလေသည်။ ဤအမှန်တရား ပေါ်ထွက်လာခြင်းက ဘုရားသခင်ကို မည်သည့်အရာ ခံစားစေသည်ဆိုသည်ကို အမိအရပြောနိုင်သည့် စကားရပ်တစ်ခုသာရှိပြီး ယင်းမှာ “ရှုမြင်ရသည်မှာ အလွန်ဝမ်းနည်းဖွယ်ဖြစ်သည်”ဟူ၍ ဖြစ်သည်။ လူတို့ မိမိတို့ကိုယ်ကို တွေ့ရှိရသည့် အခြေအနေများနှင့် အနေအထားများ၏ သီးသန့် ရှုထောင့်တစ်ခုစီအရ လူတို့၏ ကြီးမားသောပတ်ဝန်းကျင် မည်သို့ပင်ဖြစ်ပါစေ ယနေ့အချိန်နှင့် ယနေ့ခေတ်သို့ ရောက်လာပြီဖြစ်သည့် လူသားမျိုးနွယ်သည် ဘုရားအမှုတော်၏ တတိယနှင့် နောက်ဆုံးအဆင့်အတွက် ဘုရားသခင်၏သတ်မှတ်ချက်များနှင့်သက်ဆိုင်သော အဆင့်၊ လူသားမျိုးနွယ်ကို ကယ်တင်ခြင်းအဆင့်သို့ ရောက်လာကြပြီဖြစ်သည်။ သို့တိုင် ဘုရားသခင်သည် ဤလူသားမျိုးနွယ်အတွက် မျှော်လင့်စောင့်စားမှုအပြည့် ရှိသည့်အတိုင်းပင် သူသည် ၎င်းတို့အတွက် အမုန်းတရားလည်း အပြည့်ရှိလေသည်။ ဘုရားသခင်သည် လူသားမျိုးနွယ်၏ ဖောက်ပြန်ပျက်စီးခြင်းနှင့် ဆိုင်သည့် ဖြစ်ရပ်များ တစ်ခုပြီးတစ်ခု မြင်သည်နှင့်အမျှ ၎င်းတို့သည် ရှုမြင်ခံရသည်မှာ အလွန် ဝမ်းနည်းဖွယ်ရာဖြစ်သည်ဟု ခံစားနေရဆဲဖြစ်သည်မှာ အမှန်ဖြစ်သည်။ သို့တိုင် ဝမ်းမြောက်၍ စိတ်သက်သာရာရသည့်အရာမှာ ဘုရားသခင်သည် လူ့ကိုယ်စား အကျိုးမရှိသည့် စိတ်ရှည်ခြင်းနှင့် အကျိုးမရှိသည့် စောင့်ဆိုင်းခြင်းကို အာရုံစိုက်ရန် မလိုအပ်တော့ခြင်း ဖြစ်သည်။ သူ လုပ်ဆောင်ရန် လိုအပ်သည့်အရာမှာ အနှစ်ခြောက်ထောင်ကြာ သူစောင့်ဆိုင်းပြီးဖြစ်သည့်၊ အနှစ်ခြောက်ထောင်ကြာ သူမျှော်မှန်းထားသည့်အမှုနှင့် အနှစ်ခြောက်ထောင်ကြာ သူမျှော်လင့်စောင့်ဆိုင်းပြီး ဖြစ်သည့်အမှု၊ သူ၏ နှုတ်ကပတ်တော်များ၊ သူ၏ စိတ်သဘောထားနှင့် သမ္မာတရားတိုင်းကို ဖော်ပြသည့် အမှု ဖြစ်သည်။ ဤသည်မှာ ဘုရားသခင် ရွေးချယ်ပြီးဖြစ်သည့် ဤလူသားမျိုးနွယ်ကြားတွင် ဘုရားသခင် အချိန်ကြာမြင့်စွာ စောင့်ဆိုင်းပြီးဖြစ်သည့် လူတစ်စု၊ အရာခပ်သိမ်း၏ ဘဏ္ဍာစိုးဖြစ်လာမည့်သူနှင့် အရာခပ်သိမ်း၏ အရှင်သခင် ဖြစ်လာမည့်သူတို့ ထွက်ပေါ်လာလိမ့်မည်ဟု ဆိုလိုသည်မှာလည်း မှန်ပေ၏။ အခြေအနေတစ်ခုလုံးကို ကြည့်သည့်အခါ အရာရာသည် မျှော်လင့်ထားသည့်အရာမှ အလွန် အလှမ်းဝေးနေပြီဖြစ်သည်။ အရာရာသည် အလွန် နာကျင်ဖွယ်၊ ဝမ်းနည်းဖွယ် ဖြစ်လေပြီ။ သို့ရာတွင် ဘုရားသခင်၏ ပျော်ရွှင်မှုနှင့် အထိုက်တန်ဆုံးသော အရာမှာ အချိန်ကာလနှင့် မတူကွဲပြားသော ခေတ်တို့ ကုန်လွန်ခြင်းကြောင့် စာတန်၏ ဖောက်ပြန်ပျက်စီးခြင်းကို ခံရသည့် လူသားမျိုးနွယ်၏ နေ့ရက်ကာလများ ကုန်ဆုံးသွားခြင်း ဖြစ်သည်။ လူသားမျိုးနွယ်သည် ပညတ်တော်၏ ဗတ္တိဇံနှင့် ဘုရားသခင်၏ ရွေးနုတ်ခြင်းကို ကြုံတွေ့ရပြီး ဖြစ်သည်။ နောက်ဆုံးတွင် ၎င်းတို့သည် ဘုရားသခင်၏ ပြစ်တင်ဆုံးမခြင်း၊ တရားစီရင်ခြင်းနှင့် သူ၏ သိမ်းပိုက်ခြင်းတို့ကို လက်ခံခြင်း၏ အဆုံးသတ် ရလဒ်အနေဖြင့် လူသားမျိုးနွယ် ကယ်တင်ခံရသည့် အဆင့်ဖြစ်သော ဘုရားသခင် လုပ်ဆောင်မည့် အမှုတော်၏ နောက်ဆုံးအဆင့်သို့ ရောက်လာကြပြီဖြစ်သည်။ လူသားမျိုးနွယ်အဖို့၊ ဤသည်မှာ ကြီးမြတ်သည့် သတင်းဖြစ်သည်မှာ သေချာပြီး ဘုရားသခင်အဖို့ ယင်းမှာ အချိန်ကြာမြင့်စွာ မျှော်လင့်စောင့်စားခဲ့ရသည့် အရာတစ်ခု ဖြစ်သည်မှာ သေချာပေါက် ဖြစ်ပေသည်။ မည်သည့် ရှုထောင့်မဆိုမှ မြင်ရသည့်အတိုင်းပင်၊ ဤအရာသည် လူသားမျိုးနွယ်အားလုံး၏ အကြီးမြတ်ဆုံးသော ခေတ် ပေါ်ထွန်းခြင်း ဖြစ်သည်။ လူသားမျိုးနွယ်၏ ဖောက်ပြန်ပျက်စီးခြင်း ရှုထောင့်မှဖြစ်စေ၊ လောက၏ ရေပန်းစားမှု၊ သို့မဟုတ် လူမှုရေး ဖွဲ့စည်းတည်ဆောက်ပုံ၊ သို့မဟုတ် လူသားမျိုးနွယ်၏ နိုင်ငံရေး၊ သို့မဟုတ် တစ်ကမ္ဘာလုံး၏ အရင်းအမြစ်များ သို့မဟုတ် လက်ရှိ ကပ်ဘေးများ၏ ရှုထောင့်မှဖြစ်စေ မည်သည့် ရှုထောင့်မဆိုမှ မြင်ရသည့်အတိုင်းပင် လူသားမျိုးနွယ်၏ ရလဒ်သည် နီးကပ်လာပြီ ဖြစ်သည်။ ဤလူသားမျိုးနွယ်သည် နောက်ဆုံးအဆင့်သို့ ရောက်လာပြီဖြစ်သည်။ သို့တိုင် ဤသည်မှာ ဘုရားသခင်၏ အမှုတော်တွင် အထွတ်အထိပ် အဖြစ်ဆုံးသော အချိန်ကာလ၊ လူ၏ သတိရခြင်းနှင့် ဝမ်းမြောက်၍ စိတ်သက်သာရာရခြင်းတို့နှင့် အထိုက်တန်ဆုံးသော အချိန်ကာလဖြစ်ပြီး သူ၏ စီမံခန့်ခွဲမှု အစီအစဉ်နှင့်ပတ်သက်၍ ဘုရားသခင်၏ အမှုတော် အနှစ်ခြောက်ထောင်တွင် အရေးအကြီးဆုံးနှင့် အရေးအပါဆုံးသော အချိန်ကာလ၊ လူသားမျိုးနွယ်၏ ကံကြမ္မာကို ဆုံးဖြတ်သည့်အချိန်ကာလလည်း အမှန်ဖြစ်ပေ၏။ ထို့ကြောင့် လူသားမျိုးနွယ်ထံ မည်သည့်အရာ ဖြစ်ပျက်သည်ဖြစ်စေ၊ ပြီးလျှင် အချိန်မည်မျှကြာ ဘုရားသခင် စောင့်ဆိုင်းပြီး စိတ်ရှည်မှုကို ကျင့်သုံးသည်ဖြစ်စေ အားလုံး ထိုက်တန်လေပြီဖြစ်၏။

ဆွေးနွေးရန် ငါတို့ စတင်ခဲ့သည့် “လူတို့သည် အဘယ်ကြောင့် သမ္မာတရားကို လိုက်စားရမည်နည်း”ဟူသည့် အကြောင်းအရာကို ပြန်သွားကြစို့။ ဘုရားသခင်၏ စီမံခန့်ခွဲမှု အစီအစဉ်သည် လူသားမျိုးနွယ်ကြားတွင် အမှုတော်၏ အဆင့်သုံးဆင့်အဖြစ်သို့ ခွဲထားသည်။ သူသည် ယခင်အဆင့်နှစ်ဆင့်ကို ပြီးစီးနှင့်ပြီးဖြစ်သည်။ ပစ္စုပ္ပန်ကာလအထိ ထိုအဆင့်များကို ကြည့်သည့်အခါ ပညတ်တရားဖြစ်စေ၊ ပညတ်ချက်များဖြစ်စေ လူသားအတွက် ထိုအရာများ၏ အသုံးဝင်မှုမှာ ပညတ်တရား၊ ပညတ်ချက်များ၊ ဘုရားသခင်၏ အမည်နာမ၊ မိမိတို့ စိတ်နှလုံး၏ နေရာများရှိ ယုံကြည်ခြင်း၊ အပြုအမူကောင်းအနည်းငယ်နှင့် ကောင်းမွန်သည့် သက်ဝင်ယုံကြည်မှုအနည်းငယ်ကို ၎င်းတို့အား ထိန်းသိမ်းစေခြင်းထက် ဘာမျှမပိုပေ။ လူသည် အရာခပ်သိမ်း၏ ဘဏ္ဍာစိုးတစ်ဦးဖြစ်ခြင်းနှင့် အရာခပ်သိမ်းအပေါ် အရှင်သခင်ဖြစ်လာခြင်းတည်းဟူသော ဘုရားသခင်၏ သတ်မှတ်ချက် စံနှုန်းနှင့် လျော်ညီအောင် အသက်ရှင်ရန် အခြေခံအားဖြင့် ပျက်ကွက်လေသည်။ ထိုသို့ ဖြစ်သည် မဟုတ်လော။ ၎င်းတို့သည် အခြေခံအားဖြင့် ထိုအရာနှင့် လျော်ညီအောင် နေရန် ပျက်ကွက်ကြလေသည်။ ပညတ်တော်နှင့် ကျေးဇူးတော်ခေတ်ကို ဖြတ်သန်းရပြီးဖြစ်သည့် လူသည် ၎င်းတို့ လုပ်ဆောင်ရန် ဘုရားသခင် တောင်းဆိုသည့်အရာကို လုပ်ဆောင်ခိုင်းပါက ပညတ်တော်အားဖြင့်၊ သို့မဟုတ် ကျေးဇူးတော်ခေတ်တွင် ၎င်းတို့အပေါ် ပေးသနားသည့် ကျေးဇူးတော်နှင့် ကောင်းချီးများအားဖြင့်သာ အရာခပ်သိမ်းကို သဘောထားပြုမူကြမည်ဖြစ်သည်။ ဤသည်မှာ လူသည် အရာခပ်သိမ်း၏ ဘဏ္ဍာစိုးဖြစ်သင့်သည်ဟူသည့် ဘုရားသခင်၏ သတ်မှတ်ချက်ကို လွန်စွာ စံမမီသကဲ့သို့ လူသားမျိုးနွယ်သည် ၎င်းတို့ လုပ်ဆောင်ရန် ဘုရားသခင် တောင်းဆိုသည့် အရာများနှင့် ၎င်းတို့ ဖြည့်ဆည်းရန် ဘုရားသခင် တောင်းဆိုသည့် တာဝန်နှင့် ဝတ္တရားတို့ကို ပြီးမြောက်ခြင်းငှာ လွန်စွာ စံမမီပေ။ လူသည် ၎င်းတို့အနေဖြင့် အရာခပ်သိမ်း၏ အရှင်သခင်များနှင့် နောင်တစ်ခေတ်၏ အရှင်သခင်များ ဖြစ်သင့်သည်ဟူသည့် ဘုရားသခင်၏ သတ်မှတ်ချက် စံနှုန်းကို တကယ် မပြည့်မီနိုင်၊ သို့မဟုတ် လျော်ညီအောင်မနေနိုင်ပေ။ ထို့ကြောင့် သူ့အမှုတော်၏ နောက်ဆုံးအဆင့်တွင် ဘုရားသခင်၏ တောင်းဆိုချက် စံနှုန်းများက မည်သည့်အရာဖြစ်သည်၊ အရာခပ်သိမ်းကို ၎င်းတို့ မည်သို့သဘောထားပြုမူသင့်သည်၊ အရာခပ်သိမ်းကို ၎င်းတို့ မည်သို့ ရှုမြင်သင့်သည်၊ အရာခပ်သိမ်း၏ ဘဏ္ဍာစိုးများ ၎င်းတို့ ဖြစ်သင့်ပုံ၊ ၎င်းတို့၏ တည်ရှိခြင်း အခြေအနေက မည်သည့်အရာ ဖြစ်သင့်သည်ဆိုသည်နှင့် ဖန်ဆင်းရှင်၏ အုပ်စိုးမှုအောက်ရှိ စစ်မှန်သော ဖန်ဆင်းခံများအဖြစ် ဘုရားသခင်၏ ရှေ့မှောက်တွင် ၎င်းတို့ မည်သည့် ပုံစံဖြင့် အသက်ရှင်သင့်သည်ဆိုသည်တို့ကို လူက သိရှိနိုင်ရန်အလို့ငှာ လူသားမျိုးနွယ် လိုအပ်သည့် သမ္မာတရားအားလုံးနှင့် ၎င်းတို့ လိုအပ်သည့် လက်တွေ့လုပ်ဆောင်မှု စည်းမျဉ်းများကို ထိုအရာများ၏ ကဏ္ဍစုံလင်စွာဖြင့် ဘုရားသခင်က လူတို့ကို ဖော်ပြပြီး ပြောပြလေသည်။ လူသည် ဤအရာများကို နားလည်သည်နှင့် တစ်ပြိုင်နက် ၎င်းတို့အတွက် ဘုရားသခင်၏ သတ်မှတ်ချက်များက မည်သည့်အရာများ ဖြစ်သည်ကိုလည်း ၎င်းတို့ သိကြလေသည်။ ဤအရာများကို ၎င်းတို့ ဖြည့်ဆည်းပြီးသည်နှင့်တစ်ပြိုင်နက် ၎င်းတို့အတွက် ဘုရားသခင်၏ တောင်းဆိုချက် စံနှုန်းများကိုလည်း ဖြည့်ဆည်းပြီးဖြစ်လိမ့်မည်။ ပညတ်တော်၊ ပညတ်ချက်များနှင့် အပြုအမူအတွက် ရိုးရှင်းသော စံသတ်မှတ်ချက်များသည် သမ္မာတရားအတွက် အစားထိုးစရာ မဟုတ်သဖြင့် ဘုရားသခင်သည် နောက်ဆုံးသော ကာလတွင် လူ၏ လက်တွေ့လုပ်ဆောင်မှု၊ ၎င်းတို့၏ ကျင့်ကြံပြုမူခြင်းနှင့် လုပ်ဆောင်ချက်များ၊ လူများနှင့် အမှုအရာများအပေါ် ၎င်းတို့၏ အမြင်များနှင့် ပတ်သက်သည့် အလွန်များသည့် နှုတ်ကပတ်တော်များနှင့် သမ္မာတရားများကို ဖော်ပြလေသည်။ လူများနှင့် အမှုအရာများကို မည်သို့ ရှုမြင်ရမည်ဆိုသည်နှင့် မည်သို့ကျင့်ကြံပြုမူကာ ဆောင်ရွက်ရမည်ဆိုသည်တို့ကို ဘုရားသခင်က လူအား ပြောပြလေသည်။ ဤအရာအားလုံးကို ဘုရားသခင် ပြောပြသည်မှာ မည်သည့်အရာကို ဆိုလိုသနည်း။ သင်သည် ဤသမ္မာတရားအားလုံးနှင့်အညီ လူများနှင့် အမှုအရာများကို ရှုမြင်ပြီး ကျင့်ကြံပြုမူကာ ဆောင်ရွက်ရန်နှင့် ထိုနည်းအားဖြင့် လောကတွင် အသက်ရှင်ရန် ဘုရားသခင် တောင်းဆိုသည်ဟု ဆိုလိုပေသည်။ မည်သည့် တာဝန်မျိုးကို သင် ထမ်းဆောင်ပြီး မည်သည့် စေခိုင်းချက်မျိုးကို ဘုရားသခင်ထံမှ သင်လက်ခံသည်ဖြစ်စေ၊ သင့်အပေါ် သူ၏ သတ်မှတ်ချက်များ မပြောင်းလဲပေ။ ဘုရားသခင်၏ သတ်မှတ်ချက်များကို သင်နားလည်ပြီးသည်နှင့်တစ်ပြိုင်နက် ဘုရားသခင်သည် သင့်ဘေးတွင် ရှိသည်ဖြစ်စေ၊ မရှိသည်ဖြစ်စေ၊ သင့်ကို စေ့စေ့စပ်စပ် ကြည့်ရှုစစ်ဆေးနေခြင်း ရှိသည်ဖြစ်စေ၊ မရှိသည်ဖြစ်စေ သင် နားလည်သည့်အတိုင်း သူ၏ သတ်မှတ်ချက်များနှင့်အညီ သင်သည် လက်တွေ့လုပ်ဆောင်ရမည်၊ သင်၏ တာဝန်ကို ထမ်းဆောင်ကာ သင့်အပေါ် ဘုရားသခင်၏ စေခိုင်းချက်ကို ပြီးမြောက်ရမည်ဖြစ်သည်။ ဤသို့ဖြင့်သာ သင်သည် ဘုရားသခင် ယုံကြည်စိတ်ချရသည့်၊ စံနှုန်းပြည့်မီပြီး ဘုရားသခင်၏ တာဝန်ပေးစေခိုင်းချက်နှင့် ထိုက်တန်သည့်သူ၊ အရာခပ်သိမ်း၏ အရှင်သခင်တစ်ဦး ဧကန်အမှန် ဖြစ်လာနိုင်ပေသည်။ ဤအရာက လူသည် အဘယ်ကြောင့် သမ္မာတရားကို လိုက်စားရမည်နည်းဟူသည့် အကြောင်းအရာတွင် ပါဝင်သည် မဟုတ်လော။ (ပါဝင်ပါသည်။) ယခု သင်တို့ နားလည်ပြီလော။ ဤသည်တို့မှာ ဘုရားသခင် ဆောင်ကြဉ်းမည့် အမှန်တရားများ ဖြစ်သည်။ ထို့ကြောင့် သမ္မာတရားကို လိုက်စားခြင်းသည် မိမိ၏ ဖောက်ပြန်ပျက်စီးသော စိတ်သဘောထားကို စွန့်ပယ်ခြင်းနှင့် ဘုရားသခင်ကို အတိုက်အခံမလုပ်ခြင်း သက်သက်မျှသာ မဟုတ်ပေ။ သမ္မာတရားကို လိုက်စားခြင်းတွင် ငါတို့ပြောနေကြသည့် သာ၍ ကြီးမားသော အရေးပါမှုနှင့် သာ၍ ကြီးမားသော တန်ဖိုးရှိလေသည်။ အမှန်ပင် လူသား၏ ခရီးပန်းတိုင်နှင့် ကံကြမ္မာ ပါဝင်၏။ သင် နားလည်ပါသလော။ (နားလည်ပါသည်။) လူတို့သည် အဘယ်ကြောင့် သမ္မာတရားကို လိုက်စားရမည်နည်း။ အကြောင်းပြချက် အသေးစားကို လူနားလည်သည့် အခြေခံအကျဆုံးသော အယူဝါဒများအားဖြင့် ဖော်ပြထားသည်။ ကျယ်ပြန့်စွာကြည့်လျှင် အဓိကအကျဆုံး အကြောင်းရင်းမှာ ဘုရားသခင်၏ အမြင်ရှုထောင့်မှ ကြည့်ရလျှင် သမ္မာတရား လိုက်စားခြင်းသည် လူသားမျိုးနွယ်အပေါ် သူ၏ စီမံခန့်ခွဲမှု၊ လူသားမျိုးနွယ်အပေါ် သူ၏ မျှော်မှန်းချက်များနှင့်လည်းကောင်း၊ လူသားမျိုးနွယ်အပေါ် သူထားရှိသည့် မျှော်လင့်ချက်များနှင့်လည်းကောင်း ဆက်နွှယ်လေသည်။ ယင်းသည် ဘုရားသခင်၏ စီမံခန့်ခွဲမှု အစီအစဉ်၏ အစိတ်အပိုင်းတစ်ခု ဖြစ်သည်။ ဤအရာကို အခြေခံ၍ အကဲဖြတ်ရလျှင် သင် မည်သူဖြစ်စေ၊ ဘုရားသခင်ကို သင် မည်မျှကြာအောင် ယုံကြည်ပြီးသည်ဖြစ်စေ သမ္မာတရားကို သင် မလိုက်စားပါက၊ သို့မဟုတ် ထိုသမ္မာတရားကို မချစ်ပါက အဆုံးတွင် ဖယ်ရှားရှင်းလင်းခြင်း၏ ပစ်မှတ်တစ်ခု မလွဲမသွေ ဖြစ်လိမ့်မည် ဖြစ်သည်။ ဤသည်မှာ အလွန် သိသာထင်ရှားပေသည်။ ဘုရားသခင်သည် အမှုတော်၏ အဆင့်သုံးဆင့်ကို လုပ်ဆောင်သည်။ သူသည် လူသားမျိုးနွယ်ကို ဖန်ဆင်းခဲ့ကတည်းက စီမံခန့်ခွဲမှု အစီအစဉ်တစ်ခုရှိပြီး သူသည် လူသားမျိုးနွယ်အပေါ် ထိုစီမံခန့်ခွဲမှုအစီအစဉ်၏ အဆင့်အသီးသီးကို ဆက်လက်အကောင်အထည်ဖော်ဆောင်ရွက်ပြီး ဖြစ်ကာ လူသားမျိုးနွယ်ကို မျက်မှောက်နေ့ရက်အထိ တစ်လှမ်းချင်း ဆက်လက်ဦးဆောင်ပြီး ဖြစ်သည်။ လူသားမျိုးနွယ်ကို သူဖော်ပြထားသည့် သမ္မာတရားများနှင့် သူပြောထားသည့် သူတောင်းဆိုသော စံသတ်မှတ်ချက်များ၏ ရှုထောင့်တိုင်းတို့ကို လူတို့အတွင်း သွတ်သွင်းပြီး ယင်းတို့ကို လူ၏ အသက်နှင့် လက်တွေ့ကျမှုအဖြစ် ပြောင်းလဲဖို့ ဖြစ်သည့် နောက်ဆုံးရည်မှန်းချက်ဖြင့် ဘုရားသခင်သည် သူ၏ ကြီးမားသည့် အဖိုးအခများစွာကို အသုံးပြုပြီးဖြစ်ကာ အချိန်ကြာမြင့်စွာပင် သူ ခါးစည်းခံပြီးဖြစ်သည်။ ဘုရားသခင်၏ အမြင်တွင် ဤသည်မှာ အင်မတန် အရေးကြီးသော ကိစ္စတစ်ခု ဖြစ်ပြီး ဘုရားသခင်သည် ထိုအရာနှင့်ပတ်သက်၍ ထိုသို့ အလေးအနက်ထားပေသည်။ ဘုရားသခင်သည် အလွန်များသည့် နှုတ်ကပတ်တော်များကို ဖော်ပြပြီးဖြစ်ကာ ထိုသို့မဖော်ပြမီတွင် သူသည် ပြင်ဆင်သည့် အလုပ်များစွာ လုပ်ဆောင်ခဲ့သည်။ အဆုံးတွင် သူဖော်ပြပြီးဖြစ်သည့်နောက်တွင် ဤနှုတ်ကပတ်တော်များကို သင် မလိုက်စားပါက၊ သို့မဟုတ် ယင်းတို့ထဲသို့ မဝင်ရောက်ပါက ဘုရားသခင်သည် သင့်ကို မည်သို့ ရှုမြင်လိမ့်မည်နည်း။ သင့်ကို ဘုရားသခင်က မည်သည့်စီရင်ဆုံးဖြတ်ချက် ချမည်နည်း။ ဤသည်မှာ အလွန်သိသာထင်ရှားပေသည်။ ထို့ကြောင့် သင်၏ အစွမ်းအစ၊ အသက်အရွယ်၊ သို့မဟုတ် ဘုရားသခင်ကို သင်ယုံကြည်ခဲ့သည့် နှစ်ကာလအရေအတွက် မည်မျှဖြစ်စေ လူတစ်ဦးချင်းစီနှင့်ပတ်သက်ပါက သင်သည် သမ္မာတရားကို လိုက်စားခြင်း လမ်းကြောင်းအတွက် အားထုတ်မှုများပြုသင့်ပေသည်။ သင်သည် ဓမ္မဓိဋ္ဌာန်ကျသော မည်သည့် ဆင်ခြေများကိုမျှ အလေးမထားသင့်ပေ။ သင်သည် သမ္မာတရားကို အကြွင်းမဲ့ လိုက်စားသင့်၏။ ဖြစ်သလို မနေနှင့်။ သင်သည် သမ္မာတရား လိုက်စားခြင်းကို သင်၏ အသက်တာတွင် ကြီးမားသည့် ကိစ္စတစ်ခုအဖြစ် ခံယူပြီး ယင်းအတွက် ကြိုးစားမှုနှင့် သင်၏ အားထုတ်မှုများ ပြုသည်ဆိုပါစို့၊ အဆုံး၌ သင်၏ လိုက်စားမှုတွင် သင် ရရှိပြီး လက်လှမ်းမီနိုင်သည့် သမ္မာတရားသည် သင် ဆန္ဒရှိခဲ့သည့်အရာ မဟုတ်သည်မှာ ဖြစ်ကောင်းဖြစ်နိုင်သည်။ သို့သော် ဘုရားသခင်က သမ္မာတရား လိုက်စားမှုအပေါ် သင်၏ သဘောထားနှင့် သင်၏ရိုးသားစစ်မှန်မှုတို့ကို ထောက်ရှု၍ သင့်တင့်လျောက်ပတ်သော ခရီးပန်းတိုင်တစ်ခုကို သူပေးမည်ဟု ပြောပါက ယင်းမှာ ကောင်းလိုက်မည့် ဖြစ်ခြင်းပါတကား။ ယခုအခါတွင်မူ သင်၏ ခရီးပန်းတိုင်၊ သို့မဟုတ် အဆုံးသတ်က မည်သည့်အရာဖြစ်လိမ့်မည်ဆိုသည်ကိုဖြစ်စေ၊ မည်သည့်အရာ ဖြစ်ပျက်လိမ့်မည်ဆိုသည်နှင့် အနာဂတ်တွင် မည်သည့်အရာ ဖြစ်မည်ကိုဖြစ်စေ၊ ကပ်ဘေးကို သင် ရှောင်ရှားနိုင်ကာ သေမည် ဟုတ်မဟုတ်ဟူသည်ကိုဖြစ်စေ အာရုံမစိုက်နှင့်။ ဤအရာများကို မတွေးနှင့်၊ သို့မဟုတ် ဤအရာများနှင့် စပ်လျဉ်း၍ တောင်းဆိုမှုများ မပြုနှင့်။ ဘုရားနှုတ်ကပတ်တော်များနှင့် တောင်းဆိုချက်များကို အာရုံစိုက်ပြီး သမ္မာတရားကို လိုက်စားလာကာ သင်၏ တာဝန်ကို ကောင်းစွာ ထမ်းဆောင်၍ ဘုရားသခင်၏ ရည်ရွယ်ချက်များ အထမြောက်အောင် ဆောင်ရွက်လော့၊ ပြီးလျှင် ဘုရားသခင်၏ အနှစ်ခြောက်ထောင် စောင့်ဆိုင်းခဲ့ရခြင်းကိုလည်းကောင်း၊ သူ၏ အနှစ်ခြောက်ထောင် မျှော်လင့်စောင့်စားခဲ့ရခြင်းကိုလည်းကောင်း စိတ်ပျက်အောင် လုပ်ခြင်းမှ ရှောင်ကြဉ်လော့။ ဘုရားသခင်ကို နှစ်သိမ့်မှုအချို့ ပေးလော့။ သူ့အား သင့်ထဲတွင် မျှော်လင့်ချက်အချို့ကို မြင်ခွင့်ပေးပြီး သူ၏ ဆန္ဒများ သင့်အထဲ၌ အကောင်အထည် ဖော်ခွင့်ပေးလော့။ ငါ့ကို ပြောလော့၊ ထိုသို့ သင်လုပ်ဆောင်ခဲ့ပါက ဘုရားသခင်သည် သင့်ကို မတရားသဖြင့် ဆက်ဆံမည်လော။ ဧကန်မဟုတ်ပေ။ အဆုံးသတ် ရလဒ်များသည် သင်က ဆန္ဒရှိခဲ့မည့်အရာကဲ့သို့ မဟုတ်လျှင်ပင် သင်သည် ဖန်ဆင်းခံတစ်ဦးအနေဖြင့် ထိုအမှန်တရားကို မည်သို့ သဘောထားပြုမူသင့်သနည်း။ သင်သည် မည်သည့် ကိုယ်ရေးကိုယ်တာ ရည်မှန်းချက်တစ်ခုမျှမရှိဘဲ အရာခပ်သိမ်းတွင် ဘုရားသခင်၏ စီစဉ်ညွှန်ကြားမှုများနှင့် အစီအစဉ်များကို ကျိုးနွံနာခံသင့်ပေသည်။ ဤသည်မှာ ဖန်ဆင်းခံများ ခံယူသင့်သည့် ရှုထောင့်အမြင် မဟုတ်လော။ (ဟုတ်ပါသည်။) ဤစိတ်ဓာတ်ရှိခြင်းက မှန်ကန်ပေသည်။ ယင်းနှင့်အတူ လူတို့သည် အဘယ်ကြောင့် သမ္မာတရား လိုက်စားရမည်နည်းဆိုသည့်အရာ၏ အဓိက ဆိုလိုရင်းနှင့်ပတ်သက်၍ ငါတို့၏ မိတ်သဟာယကို ငါတို့ အဆုံးသတ်မည်။