“အဆုံးထိတိုင် လိုက်လျှောက်သောသူသည် ဧကန်မုချ ကယ်တင်ခံရလိမ့်မည်” ဟု ဆိုထားသော်လည်း ဤအရာကို လက်တွေ့လုပ်ဆောင်ဖို့ လွယ်ကူပါသလော။ မလွယ်ကူသည့်အပြင် အဆင်းနီသော နဂါးကြီး၏ လိုက်လံဖမ်းဆီးကာ နှိပ်စက်ညှဉ်းပန်းခြင်း ခံရသူများစွာတို့သည် အလွန်တွန့်ဆုတ်လာပြီး ဘုရားနောက်လိုက်ဖို့ ကြောက်ရွံ့လာကြသည်။ အဘယ်ကြောင့် ၎င်းတို့ ပြိုလဲခဲ့ကြသနည်း။ အဘယ်ကြောင့်ဆိုသော် စစ်မှန်သည့် ယုံကြည်ခြင်း ကင်းမဲ့သောကြောင့် ဖြစ်သည်။ လူအချို့သည် သမ္မာတရားကို လက်ခံနိုင်သည်၊ ဘုရားထံ ဆုတောင်းနိုင်သည်၊ ဘုရားအပေါ် မှီခိုနိုင်ပြီး စမ်းသပ်မှုများနှင့် အတိဒုက္ခများတွင် ခိုင်ခိုင်မာမာ ရပ်တည်နိုင်သော်လည်း အခြားသူများမှာ အဆုံးထိ လိုက်မလျှောက်နိုင်ကြချေ။ စမ်းသပ်မှုများနှင့် အတိဒုက္ခများအတောအတွင်း တစ်ချိန်ချိန်တွင် ၎င်းတို့ ပြိုလဲကြလိမ့်မည်၊ မိမိတို့ သက်သေခံချက်ကို ဆုံးရှုံးကြလိမ့်မည်ဖြစ်ပြီး လဲကျနေရာမှ ပြန်ထပြီး ဆက်မသွားနိုင်ကြချေ။ ကြီးသည်ဖြစ်စေ ငယ်သည်ဖြစ်စေ သင်၏ သန္နိဋ္ဌာန်ကို ကိုင်လှုပ်နိုင်သည့်အရာများ၊ သင်၏ စိတ်နှလုံး၌ နေရာယူနိုင်သည့်အရာများ၊ သို့မဟုတ် သင်၏တာဝန်အား ထမ်းဆောင်နိုင်စွမ်းကို ဘောင်ခတ်နိုင်သည့်အရာများ နှင့် သင်၏ ရှေ့ဆက် တိုးတက်မှု ဖြစ်သည့် နေ့တိုင်း ဖြစ်ပေါ်သည့်အရာများအားလုံးသည် လုံ့လဝီရိယရှိသည့် စိစစ်ကုစားမှု လိုအပ်ပေသည်။ သင်သည် ၎င်းတို့ကို သေချာ ဆန်းစစ်ကာ သမ္မာတရားကို ရှာဖွေသင့်သည်။ ဤအရာအားလုံးမှာ သင် တွေ့ကြုံသည်နှင့်အမျှ ဖြေရှင်းရမည့် ပြဿနာများဖြစ်သည်။ လူအချို့သည် အခက်အခဲများ ကြုံရသည့်အခါ အပျက်သဘောဆောင်လာကြသည်၊ ညည်းညူကာ မိမိတို့တာဝန်များကို နုတ်ထွက်လိုက်ကြပြီး ဆုတ်ဆိုင်းမှုတစ်ခုစီနောက်ပိုင်းတွင် ဖြည်းဖြည်းချင်းပင် ပြန်လည်ထူထောင်နိုင်ခြင်း မရှိကြချေ။ ဤလူအားလုံးတို့သည် သမ္မာတရားကို မချစ်သော လူနုံလူအများဖြစ်ကြပြီး ၎င်းတို့သည် တစ်သက်တာလုံး ယုံကြည်ခြင်းဖြင့်ပင် ယင်းကို ရကြလိမ့်မည် မဟုတ်ပေ။ ယင်းကဲ့သို့ လူနုံလူအများသည် အဆုံးတိုင် အဘယ်သို့ လိုက်နိုင်မည်နည်း။ အလားတူအရာသည် သင့်ထံ ဆယ်ကြိမ် ဖြစ်ပျက်သော်လည်း ထိုအရာမှ သင် ဘာမျှမရရှိပါက သင်သည် သာမန်မျှ၊ အသုံးမကျသော လူတစ်ဦးဖြစ်သည်။ ပါးနပ်ချက်ချာသော လူများနှင့် ဝိညာဉ်ရေးရာ သိနားလည်မှုရှိသော စစ်မှန်သော အစွမ်းအစရှိသူများမှာ သမ္မာတရားကို ရှာဖွေသောသူများ ဖြစ်သည်။ ၎င်းတို့ထံ တစ်စုံတစ်ရာ ဆယ်ကြိမ် ဖြစ်ပျက်ပါက ထိုကိစ္စများထဲမှ ရှစ်ကြိမ်တွင် ဉာဏ်အလင်းပေးခြင်းအချို့ကို ၎င်းတို့ ရရှိနိုင်ကြပေမည်၊ သင်ခန်းစာအချို့ကို သင်ယူနိုင်ကြပေမည်၊ သမ္မာတရား အချို့ကို နားလည်ကာ တိုးတက်မှု အချို့ကို ပြုလုပ်ကောင်း ပြုလုပ်နိုင်ကြပေမည်။ ဝိညာဉ်ရေးရာ သိနားလည်မှု မရှိသော လူနုံလူအတစ်ဦးအပေါ် အမှုအရာများ ဆယ်ကြိမ် ဖြစ်သောအခါ တစ်ကြိမ်မျှ ၎င်းတို့၏ ဘဝကို အကျိုးရှိစေလိမ့်မည်မဟုတ်၊ တစ်ကြိမ်တစ်ခါမျှ ၎င်းတို့ကို ပြောင်းလဲစေလိမ့်မည်မဟုတ်သကဲ့သို့ တစ်ကြိမ်တစ်ခါမျှ ၎င်းတို့၏ အကျည်းတန်သော မျက်နှာကို သိစေမည်မဟုတ်ချေ။ ယင်းမှာ ၎င်းတို့အတွက် အဆုံးသတ်ဖြစ်ပေသည်။ ၎င်းတို့အပေါ် တစ်စုံတစ်ရာ ဖြစ်ပျက်သည့်အခါတိုင်းတွင် ၎င်းတို့ လဲကျကြသည်။ ၎င်းတို့ လဲကျသည့်အခါတိုင်းတွင် ၎င်းတို့ကို အားပေးဖို့နှင့် ချော့ဖို့ အခြားတစ်စုံတစ်ဦးကို ၎င်းတို့ လိုအပ်ကြသည်။ အားပေးခြင်းနှင့် ချော့မော့ခြင်း မရှိဘဲ ၎င်းတို့ မထနိုင်ကြသည့်အပြင် တစ်စုံတစ်ရာ ဖြစ်ပျက်သည့် အကြိမ်တိုင်းတွင် ၎င်းတို့ လဲကျမည့် အန္တရာယ်နှင့် အရည်အသွေး နိမ့်ကျစေမည့် အန္တရာယ်ရှိသည်။ ဤသည်မှာ ၎င်းတို့အတွက် အဆုံးသတ်ဖြစ်သည် မဟုတ်လော။ ထိုသို့သော အသုံးမကျသည့် ဤလူများကို ကယ်တင်ရန်အတွက် အခြားအကြောင်းပြချက် တစ်ခုတလေ ရှိသေးသလော။ လူသားမျိုးနွယ်ကို ဘုရားသခင်၏ကယ်တင်ခြင်းမှာ သမ္မာတရားကို ချစ်သောသူတို့အား ကယ်တင်ခြင်း၊ လိုအင်ဆန္ဒနှင့် သန္နိဋ္ဌာန်ရှိသည့် ၎င်းတို့၏ တစ်စိတ်တစ်ဒေသနှင့် ၎င်းတို့၏ စိတ်နှလုံးထဲတွင် သမ္မာတရားနှင့် တရားမျှတမှုကို တမ်းတသော ၎င်းတို့၏ တစ်စိတ်တစ်ဒေသကို ကယ်တင်ခြင်း ဖြစ်သည်။ လူတစ်ဦး၌ စိတ်ဆုံးဖြတ်ချက်သည် တရားမျှတမှု၊ ကောင်းမြတ်ခြင်းနှင့် သမ္မာတရားကို တမ်းတပြီး အသိတရား ပိုင်ဆိုင်သည့် ၎င်းတို့ စိတ်နှလုံးထဲရှိ ၎င်းတို့၏ တစ်စိတ်တစ်ဒေသ ဖြစ်သည်။ သမ္မာတရားကို ၎င်းတို့ နားလည်ပြီး ရရှိရန် ၎င်းတို့၏ဖောက်ပြန်ပျက်စီးခြင်းသည် ဆေးကြောသန့်စင်ခံရပြီး ၎င်းတို့၏အသက်စိတ်သဘောထား ပြောင်းလဲနိုင်ရန်အလို့ငှာ ဘုရားသခင်သည် လူတို့၏ ဤတစ်စိတ်တစ်ဒေသကို ကယ်တင်ပြီး ယင်းမှတစ်ဆင့် ၎င်းတို့၏ ဖောက်ပြန်ပျက်စီးသော စိတ်သဘောထားကို ပြောင်းလဲလေသည်။ သင်သည် သင့်အတွင်း၌ ဤအရာများ မရှိလျှင် ကယ်တင်မခံရနိုင်ပေ။ အကယ်၍ သင့်အတွင်း၌ သမ္မာတရားကို ချစ်ခြင်း သို့မဟုတ် တရားမျှတမှုနှင့် အလင်းအတွက် ပြင်းပြသောဆန္ဒမရှိပါက သင် မကောင်းသောအရာများနှင့် ကြုံတွေ့သည့်အခါတိုင်း သင်သည် ယင်းတို့ကို စွန့်ပစ်လိုစိတ် မရှိသကဲ့သို့ အခက်အခဲကို ခံစားရန် စိတ်ဆုံးဖြတ်ချက် မရှိပေ။ ထို့အပြင် သင်၏အသိတရားသည် ထုံထိုင်းနေပါက သမ္မာတရားကို လက်ခံနိုင်သော သင်၏စွမ်းရည်မှာလည်း ထုံထိုင်းကာ သင်သည် သမ္မာတရား သို့မဟုတ် ဖြစ်ပေါ်လာသော အဖြစ်အပျက်များကို ထိုးထွင်းသိမြင်ခြင်း မရှိပါက သင့်အပေါ် ကျရောက်သည့် မည်သည့်အရာကိုမဆို ရင်ဆိုင်ရာတွင် ပြဿနာများကို ဖြေရှင်းရန် သမ္မာတရားကို သင် မရှာဖွေနိုင်သကဲ့သို့ စဉ်ဆက်မပြတ် အပျက်သဘောဆောင်ပါက သင့်အတွက် ကယ်တင်ခံရဖို့ နည်းလမ်းမရှိပေ။ ထိုသို့သော လူတစ်ဦးသည် ၎င်းတို့ကို ထောက်ခံရန် တစ်စုံတစ်ခုမျှမရှိ၊ ဘုရားသခင် အလုပ်လုပ်ရန် ထိုက်တန်သည့်အရာ တစ်ခုမျှ မရှိချေ။ ၎င်းတို့၏ အသိစိတ်က ထုံထိုင်းသည်၊ ၎င်းတို့၏ စိတ်က မကြည်လင်ပေ၊ ပြီးလျှင် သမ္မာတရားကို ၎င်းတို့ မချစ်ကြသကဲ့သို့ ၎င်းတို့၏ စိတ်နှလုံး အတွင်းထဲတွင် တရားမျှတမှုကို မတမ်းတကြပေ။ ဘုရားသခင်သည် သမ္မာတရားကိုမည်မျှပင် ရှင်းရှင်းလင်းလင်း သို့မဟုတ် ပွင့်ပွင့်လင်းလင်း ပြောစေကာမူ ၎င်းတို့သည် စိုးစဉ်းမျှ တုံ့ပြန်မှု မရှိသည်မှာ ၎င်းတို့၏ စိတ်နှလုံးသည် သေဆုံးနှင့်ပြီးဖြစ်ကြသည့်အလား ဖြစ်သည်။ အမှုအရာများသည် ၎င်းတို့အတွက် ဆုံးခန်းတိုင်ပြီ မဟုတ်သလော။ ၎င်းတို့ထဲတွင် ထွက်သက်ဝင်သက် ကျန်ရှိသော လူတစ်ဦးသည် အသက်ရှူကူခြင်းဖြင့် ကယ်တင်၍ရနိုင်သော်လည်း အကယ်၍ ၎င်းတို့သည် သေဆုံးနှင့်ပြီး ၎င်းတို့၏ဝိညာဉ် ထွက်သွားခဲ့ပြီးပါက အသက်ရှူကူခြင်းသည် မည်သို့မျှ အလုပ်ဖြစ်မည်မဟုတ်ပေ။ ပြဿနာများ၊ အခက်အခဲများဖြင့် ရင်ဆိုင်ရသည့်အခါ လူတစ်ဦးသည် နောက်တွန့်ကာ ရှောင်ဖယ်ဖို့ ကြိုးစားပါက၊ ၎င်းတို့သည် သမ္မာတရားကို လုံးဝ မရှာဖွေသကဲ့သို့ အပျက်သဘောဆောင်ကာ မိမိတို့အလုပ်တွင် ခိုကတ်ဖို့ ရွေးချယ်ပါက ၎င်းတို့၏ အမှန်တကယ် အရှိအတိုင်း ထုတ်ဖော်ပြခံရပေသည်။ ထိုသို့သောလူများသည် အတွေ့အကြုံဆိုင်ရာ သက်သေခံချက်များ လုံးဝမရှိပေ။ ၎င်းတို့သည် ကပ်ပါးရပ်ပါးများ၊ ဝန်ထုပ်ဝန်ပိုးသာ ဖြစ်သည်။ ဘုရားအိမ်တော်တွင် ၎င်းတို့ အသုံးမကျသကဲ့သို့ အလွန်အမင်း ပျက်စီးကိန်းဆိုက်ကြသည်။ ပြဿနာများ ဖြေရှင်းဖို့ သမ္မာတရားကို ရှာဖွေနိုင်သူတို့သာ ဝိညာဉ်ရင့်ကျက်မှုရှိသည့် လူများဖြစ်ပြီး ၎င်းတို့သည်သာ သက်သေခံချက်တွင် ခိုင်ခိုင်မာမာ ရပ်တည်နိုင်ပေသည်။ ပြဿနာများနှင့် အခက်အခဲများကို ကြုံရသည့်အခါ ထိုအရာတို့ကို ခေါင်းအေးအေးဖြင့် သင် ရင်ဆိုင်ရမည်ဖြစ်ပြီး မှန်ကန်သည့် နည်းလမ်းဖြင့် တုံ့ပြန်ရမည်ဖြစ်ကာ ရွေးချယ်မှုပြုလုပ်ရမည် ဖြစ်သည်။ ပြဿနာများကို ဖြေရှင်းရန် သမ္မာတရားကို အသုံးပြုဖို့ သင် သင်ယူသင့်သည်။ မူလက သင် နားလည်ထားသည့် သမ္မာတရားများသည် နက်နဲပါက သို့မဟုတ် ပေါ့တန်ပါက ထိုသမ္မာတရားများကို သင် အသုံးပြုသင့်သည်။ သမ္မာတရားများမှာ တစ်စုံတစ်ခု သင့်ထံ ဖြစ်ပျက်သည့်အခါ သင့်နှုတ်မှထွက်လာသည့် စကားမျှ မဟုတ်သကဲ့သို့ အခြားသူများ၏ ပြဿနာများကို ဖြေရှင်းရန် ယင်းတို့ကို အတိအကျ အသုံးမပြုရပေ။ ထိုအစား ၎င်းတို့သည် သင့်ထံတွင် ရှိသည့် ပြဿနာများနှင့် အခက်အခဲများကို ဖြေရှင်းရန် အသုံးပြုဖို့ ဖြစ်သည်။ ယင်းမှာ အရေးအကြီးဆုံးအရာတည်း။ သင့်ကိုယ်ပိုင် ပြဿနာများကို သင် ဖြေရှင်းသည့်အခါမှသာ အခြားသူများ၏ ပြဿနာများကို သင် ဖြေရှင်းနိုင်လိမ့်မည်ဖြစ်သည်။ ပေတရုကို အသီးအပွင့်ဖြစ်သည်ဟု အဘယ့်ကြောင့် ဆိုရသနည်း။ အဘယ်ကြောင့်ဆိုသော် သူ၌ ထိုက်တန်သော အရာများ၊ စုံလင်စေရန် ထိုက်တန်သောအရာများ ရှိသောကြောင့် ဖြစ်သည်။ သူသည် အရာအားလုံး၌ သမ္မာတရားကို ရှာဖွေခဲ့ကာ စိတ်ပိုင်းဖြတ်ထားခဲ့ပြီး လိုအင်ဆန္ဒ ခိုင်မာခဲ့ပေသည်။ သူ၌ ဆင်ခြင်တုံတရားရှိခဲ့၏၊ အခက်အခဲကို ခံစားရန် လိုလိုလားလား ရှိခဲ့သကဲ့သို့ သူ၏ စိတ်နှလုံးထဲတွင် သမ္မာတရားကို ချစ်သည်။ ဖြစ်လာသည့်အရာကို သူ လက်မလွှတ်ခဲ့သကဲ့သို့ အရာအားလုံးမှ သင်ခန်းစာများ သင်ယူနိုင်ခဲ့သည်။ ဤအရာအားလုံးသည် အားသာချက်များ ဖြစ်သည်။ သင်သည် ဤအားသာချက်များထဲမှ မည်သည့်အရာမျှ မရှိပါက ဒုက္ခရောက်ပြီဟု ဆိုလိုပေသည်။ သမ္မာတရား ရရှိပြီး ကယ်တင်ခံရရန် သင့်အတွက် လွယ်ကူမည်မဟုတ်ပေ။ မည်သို့ တွေ့ကြုံရမည်ကို သင် မသိပါက သို့မဟုတ် အတွေ့အကြုံ မရှိပါက အခြားသူများ၏ ပြဿနာများကို သင် ဖြေရှင်းနိုင်လိမ့်မည် မဟုတ်ပေ။ ဘုရားနှုတ်ကပတ်တော်များကို သင် လက်တွေ့လုပ်ဆောင်နိုင်စွမ်းနှင့် တွေ့ကြုံနိုင်စွမ်း မရှိသောကြောင့် သင်၌ အမှုအရာများ ဖြစ်ပျက်သည့်အခါ မည်သည့်အရာ လုပ်ဆောင်ရမည်ကို သင် မသိပေ။ ပြီးလျှင် ပြဿနာများ ကြုံရသည့်အခါ သင်သည် စိတ်ပျက်ပြီး မျက်ရည်များ ရုတ်တရက်ကျကာ အသေးစား ဆုတ်ဆိုင်းမှုအချို့ ခံစားရသည့်အခါ သင်သည် အပျက်သဘောဆောင်လာပြီး ထွက်ပြေးသကဲ့သို့ မှန်ကန်သည့်နည်းလမ်းဖြင့် တုံ့ပြန်နိုင်စွမ်းမရှိချေ။ ဤအရာကြောင့် အသက်ဝင်ရောက်မှုကို ရရှိရန် သင့်အတွက် မဖြစ်နိုင်ပေ။ အသက်ဝင်ရောက်မှုမရှိဘဲနှင့် အခြားသူများအတွက် သင် မည်သို့ ထောက်ပံ့နိုင်မည်နည်း။ လူတို့၏ ဘဝများအတွက် ထောက်ပံ့ပေးရန် သမ္မာတရားကို ရှင်းလင်းစွာ သင် မိတ်သဟာယပြုရမည်ဖြစ်ပြီး ပြဿနာများကို ဖြေရှင်းရန်အလို့ငှာ လက်တွေ့လုပ်ဆောင်မှု စည်းမျဉ်းများကို ရှင်းလင်းစွာ မိတ်သဟာယပြုနိုင်ရမည်ဖြစ်သည်။ စိတ်ပါလက်ပါရှိသူ တစ်စုံတစ်ဦးအတွက် သင်သည် အနည်းငယ်မျှသာ ပြောဖို့လိုပြီး ၎င်းတို့ နားလည်ကြလိမ့်မည် ဖြစ်သည်။ သို့သော် သမ္မာတရားအနည်းငယ်ကိုသာ နားလည်ခြင်းသည် အလုပ်ဖြစ်မည်မဟုတ်။ ၎င်းတို့တွင် လက်တွေ့လုပ်ဆောင်မှု လမ်းကြောင်းနှင့် စည်းမျဉ်းများလည်း ရှိရမည်။ ဤအရာသည်သာ ၎င်းတို့ကို သမ္မာတရားအား လက်တွေ့လုပ်ဆောင်ဖို့ ကူညီမည်ဖြစ်သည်။ အကယ်၍ လူတို့၌ ဝိညာဉ်ရေးရာ သိနားလည်မှုရှိပြီး ယင်းတို့ကို နားလည်ရန် ၎င်းတို့အတွက် စကားအနည်းငယ်သာ လိုအပ်လျှင်ပင် သမ္မာတရားကို လက်တွေ့မလုပ်ဆောင်ပါက အသက်ဝင်ရောက်မှု ရှိလိမ့်မည် မဟုတ်ပေ။ သမ္မာတရားကို လက်မခံနိုင်ပါက ၎င်းတို့အတွက် ပြီးဆုံးသွားပြီဖြစ်ကာ သမ္မာတရား စစ်မှန်မှုများထဲသို့ မည်သည့်အခါတွင်မျှ ဝင်ရောက်နိုင်ကြလိမ့်မည် မဟုတ်ပေ။ လူအချို့ကို သွန်သင်ပေးနေစဉ် ၎င်းတို့လက်ကို သင် ကိုင်နိုင်ပြီး ထိုအချိန်တွင် ၎င်းတို့ နားလည်သည့်ပုံရလိမ့်မည် ဖြစ်သော်လည်း သင် လက်လွှတ်သည်နှင့်တစ်ပြိုင်နက် တစ်ဖန် မရှင်းမလင်း ဖြစ်လာကြသည်။ ဤသည်မှာ ဝိညာဉ်ရေးရာ သိနားလည်မှုရှိသူတစ်ဦး မဟုတ်ပေ။ မည်သည့် ပြဿနာများကို သင်ကြုံရပါစေ၊ အပျက်သဘောဆောင်ပြီး အားနည်းပါက သင်သည် သက်သေခံချက် လုံးဝမရှိသကဲ့သို့ သင် လုပ်သင့်သည့်အရာ၊ သင် ပူးပေါင်းလုပ်ဆောင်သင့်သည့်အရာ၌ သင်သည် ပူးပေါင်းမလုပ်ဆောင်ပါက ဤအရာက သင်သည် သင့်စိတ်နှလုံးတွင် ဘုရားသခင် မရှိသကဲ့သို့ သမ္မာတရားကို ချစ်သောသူမဟုတ်သည်ကို သက်သေပြသည်။ သန့်ရှင်းသော ဝိညာဉ်တော်၏ အလုပ်က လူတို့ကို မည်သို့တို့ထိသည်ဖြစ်စေ နှစ်များစွာ ဘုရားအမှုတော်ကို တွေ့ကြုံခြင်း၊ သမ္မာတရားများစွာ နားထောင်ခြင်း၊ အသိစိတ်အနည်းငယ် ရှိခြင်းနှင့် မိမိကိုယ်ကို ချုပ်တည်းခြင်းအပေါ် မှီခိုခြင်းမျှအားဖြင့် လူတို့သည် အနိမ့်ဆုံးစံကို အနည်းဆုံး ပြည့်မီသင့်သကဲ့သို့ မိမိတို့ အသိစိတ်၏ ပြစ်တင်မောင်းမဲခြင်းကို မခံရသင့်ပေ။ လူတို့သည် ယခုလောက် ထုံထိုင်းကာ အားမနည်းသင့်သကဲ့သို့ ဤအခြေအနေတွင် ၎င်းတို့ရှိသည်မှာ တကယ်ကို မတွေးဝံ့စရာ ဖြစ်သည်။ သင်တို့သည် မည်သည့် သမ္မာတရားကိုမျှ မလိုက်စား၊ မည်သည့်တိုးတက်မှုမျှ လုံးဝ မပြုလုပ်ဘဲ လွန်ခဲ့သည့် နှစ်အနည်းငယ်ကို ကြက်သေသေခြင်းဖြင့် ဖြတ်သန်းကောင်းဖြတ်သန်းပြီး ဖြစ်နိုင်သည်။ ဤသို့မဖြစ်ပါက အဘယ်သို့ သင်သည် အလွန်ထုံထိုင်းနိုင်ရသနည်း။ သင်သည် ဤသို့ဖြစ်သည့်အခါ သင်ကိုယ်တိုင်၏ မိုက်မဲမှုနှင့် မသိနားမလည်မှုကြောင့်သက်သက် ဖြစ်ပြီး အခြားမည်သူကိုမျှ သင် အပြစ်တင်၍ မရပေ။ သမ္မာတရားသည် အခြားလူများထက် လူအချို့ကို ဘက်မလိုက်ပေ။ သမ္မာတရားကို သင် လက်မခံသကဲ့သို့ ပြဿနာများကို ဖြေရှင်းရန် သမ္မာတရားမရှာဖွေပါက သင် မည်သို့ ပြောင်းလဲနိုင်မည်နည်း။ လူအချို့က မိမိတို့၏ အစွမ်းအစများ အလွန်နိမ့်ကျကာ သဘောပေါက်နားလည်နိုင်စွမ်း ကင်းမဲ့သည်ဟု ခံစားရသောကြောင့် မိမိတို့ကိုယ်ကို ဘောင်ခတ်ပြီး သမ္မာတရားကို ၎င်းတို့ မည်မျှ လိုက်စားသည်ဖြစ်စေ ဘုရားသခင်၏ သတ်မှတ်ချက်များကို ဖြည့်ဆည်းနိုင်လိမ့်မည်မဟုတ်ဟု ခံစားကြသည်။ ၎င်းတို့ မည်မျှ ကြိုးစားသည်ဖြစ်စေ အသုံးမဝင်သကဲ့သို့ ထိုမျှသာရှိသောကြောင့် ၎င်းတို့သည် အမြဲ အပျက်သဘောဆောင်ကာ အကျိုးဆက်အနေဖြင့် ဘုရားသခင်ကို နှစ်ချီ၍ ယုံကြည်ပြီးသည့်နောက်တွင်ပင် မည်သည့် သမ္မာတရားမျှ မရရှိသေးချေ။ သမ္မာတရားကိုလိုက်စားဖို့ အလုပ်ကြိုးစားခြင်းမရှိဘဲ သင်၏ အစွမ်းအစ အလွန်ညံ့ဖျင်းသည်ဟု သင်ပြောပါက မိမိကိုယ်ကို အရှုံးပေးပြီး အပျက်သဘောဆောင်သည့် အခြေအနေတွင် အမြဲ အသက်ရှင်သည်။ အကျိုးဆက်အနေဖြင့် သင် နားလည်သင့်သည့် သမ္မာတရားကို နားမလည်ပါက သို့မဟုတ် သင် တတ်စွမ်းနိုင်သမျှ သမ္မာတရားကို လက်တွေ့လုပ်ဆောင်ခြင်း မရှိပါက သင်သည် မိမိကိုယ်ကို ဟန့်တားနေသည့်သူ မဟုတ်ပါလော။ သင်၏ အစွမ်းအစက လုံလောက်အောင် မကောင်းဟု သင် အမြဲပြောပါက ဤသည်မှာ တာဝန်ကို ရှောင်လွှဲကာ အချောင်ခိုခြင်း ဖြစ်သည် မဟုတ်လော။ သင်သည် ဆင်းရဲဒုက္ခခံနိုင်ပါက အဖိုးအခပေးနိုင်ပြီး သန့်ရှင်းသော ဝိညာဉ်တော်၏ အလုပ်ကို ရရှိနိုင်ပါက သမ္မာတရားအချို့ကို မလွဲမသွေ သင် နားလည်နိုင်လိမ့်မည်ဖြစ်ပြီး စစ်မှန်မှုအချို့ထဲသို့ ဝင်ရောက်နိုင်လိမ့်မည် ဖြစ်သည်။ သင်သည် ဘုရားသခင်ကို မကြည့်၊ မမှီခိုသကဲ့သို့ မည်သည့် အားထုတ်မှုမျှမပြုဘဲ သို့မဟုတ် အဖိုးအခမပေးဘဲ ကိုယ့်ဘဝကို လက်လျှော့ပြီး တကယ်ကို အရှုံးပေးပါက သင်သည် အသုံးမကျသူတစ်ဦး ဖြစ်သကဲ့သို့ အသိတရားနှင့် အသိစိတ် တစ်စက်မျှ မရှိပေ။ သင်၏ အစွမ်းအစ ညံ့ဖျင်းသည်ဖြစ်စေ၊ ပြောင်မြောက်သည်ဖြစ်စေ အသိစိတ်နှင့် ဆင်ခြင်တုံတရား အနည်းငယ်ရှိပါက သင်သည် သင် လုပ်သင့်သည့်အရာနှင့် သင်၏လုပ်ငန်းတာဝန်တို့ကို သင့်တင့်လျောက်ပတ်စွာ အဆုံးသတ်သင့်သည်။ စွန့်ခွာပြေးသူတစ်ဦးဖြစ်ခြင်းသည် ဆိုးရွားသောအရာဖြစ်ပြီး ဘုရားသခင်ကို သစ္စာဖောက်ခြင်း ဖြစ်သည်။ ဤအရာသည် ကယ်တင်၍ မရနိုင်ပေ။ သမ္မာတရားကို လိုက်စားခြင်းသည် ခိုင်မာသော ဆန္ဒတစ်ခု လိုအပ်ပြီး အလွန် အပျက်သဘောဆောင်သည့် လူများ သို့မဟုတ် အားနည်းသော လူများသည် မည်သည့်အရာမျှ ဖြစ်မြောက်ခြင်း ရှိလိမ့်မည် မဟုတ်ပေ။ ၎င်းတို့သည် ဘုရားသခင်ကို အဆုံးတိုင်အောင် ယုံကြည်နိုင်ခြင်း ရှိမည် မဟုတ်ချေ။ ထို့ပြင် သမ္မာတရားကို ရရှိဖို့ ၎င်းတို့ဆန္ဒရှိပြီး စိတ်သဘောထား ပြောင်းလဲမှုတစ်ခုကို ၎င်းတို့ စွမ်းဆောင်ရရှိလိုပါက ၎င်းတို့၌ မျှော်လင့်ချက် သာ၍ နည်းပေသေးသည်။ သန္နိဋ္ဌာန် ချမှတ်ထားပြီး သမ္မာတရားကို လိုက်စားသည့် သူများသာလျှင် ယင်းကို ရရှိနိုင်ပြီး ဘုရားသခင်အားဖြင့် စုံလင်စေခြင်းခံရနိုင်ပေသည်။