လူအများစုသည် ဘုရားသခင်၏အမှုတော်ကို နားမလည်ကြသောကြောင့် ၎င်းတို့၏ ယုံကြည်မှုသည် အလွန်ပင် ချို့တဲ့လွန်းသည်။ ဘုရားသခင်၏ အမှုကို သိမြင်ခြင်းသည် မလွယ်ကူပေ။ ဘုရားသခင်၏အမှုတော်အားလုံးတွင် အစီအစဉ်တစ်ခုရှိပြီး ယင်းတို့အားလုံးကို ဘုရားသခင်၏ အချိန်အခါ၌ လုပ်ဆောင်ကြောင်း ရှေးဦးစွာ သိရမည်။ ဘုရားသခင်မည်သည့်အမှုကို မည်သည့်အချိန်တွင် ပြုလုပ်ကြောင်း လူသားသည် ထာဝရ နားလည်နိုင်စွမ်း မရှိပေ။ ဘုရားသခင်သည် အမှုတစ်ခုကို အချိန်တစ်ခု၌ လုပ်ဆောင်ပြီး၊ ကိုယ်တော်သည် နှောင့်နှေးကြန့်ကြာခြင်း မရှိ၊ သူ၏အမှုတော်ကို မည်သူမျှ မဖျက်ဆီးနိုင်ပေ။ သူ၏ အစီအစဉ်အတိုင်း သူ၏ရည်ရွယ်ချက်များအတိုင်း လုပ်ဆောင်ခြင်းသည် သူ၏အမှုတော်ကို သူပြုသည့် နိယာမဖြစ်ပြီး၊ ဤအရာကို မည်သူမျှပြောင်းလဲ၍ မရချေ။ ထိုအရာထဲ၌ ဘုရားသခင်၏ စိတ်သဘောထားကို သင်တွေ့မြင်သင့်သည်။ ဘုရားသခင်၏ အမှုတော်က မည်သူကိုမျှ မစောင့်ဆိုင်းသကဲ့သို့ အမှုအနည်းငယ်ကို ပြုရန် အချိန်ရောက်သည့်အခါ လုပ်ဆောင်ရမည်ဖြစ်သည်။ ပြီးခဲ့သည့် နှစ်အနည်းငယ်တွင် ဘုရားသခင်၏ အမှုတော်ကို သင်တို့အားလုံး တွေ့ကြုံရပြီးဖြစ်သည်။ မည်သူသည် လူတို့ကို သူ ထောက်ပံ့သည့် နည်းလမ်းကို ဖျက်ဆီးနိုင်သနည်း၊ သူ၏ စကားများကို ပြောရန်လိုအပ်သည့်အခါ သူပြောခြင်းမှလည်းကောင်း၊ အမှုကို ပြီးစီးရန်လိုအပ်သည့်အခါ ဆောင်ရွက်ခြင်းမှလည်းကောင်း အဘယ်သူသည် သူ့ကို တားဆီးနိုင်သနည်း။ ၎င်းတို့သည် ဧဝံဂေလိတရားကို စတင် ဖြန့်ဝေသည့်အခါ လူအများစုသည် မိမိတို့၏ ဘုရားနှုတ်ကပတ်တော်များနှင့်ဆိုင်သော စာအုပ်များကို အသင်းတော်တွင် ရှိသောသူများနှင့် ဘာသာရေးသမားများကို ပေးကြသည်။ ဤအရာ၏ ရလဒ်မှာ အဘယ်နည်း။ ဤလူများထဲတွင် အလွန်နည်းပါးသောသူတို့သည် ဘုရားသခင်၏ နှုတ်ကပတ်တော်များကို စုံစမ်းစစ်ဆေးခဲ့ကြ၏။ ၎င်းတို့အများစုက အသရေဖျက်တတ်ကြသည်၊ ဝေဖန်တတ်ကြပြီး ရန်လိုမှုအပြည့် ရှိကြသည်။ အချို့က ထိုစာအုပ်များကို မီးရှို့ကြသည်၊ အချို့က သိမ်းယူကြသည်၊ အချို့က ဧဝံဂေလိ ဖြန့်နေသောသူတို့ကို ရိုက်နှက်ပြီး မိမိတို့၏ အပြစ်ကို အတင်းဝန်ခံစေခဲ့ပြီး အချို့က ၎င်းတို့ကို ဖမ်းဆီးပြီး နှိပ်စက်ရန် ရဲများကိုပင် ခေါ်ခဲ့ကြသည်။ ထိုအချိန်တွင် ဂိုဏ်းဂဏများအားလုံးက ကသုတ်ကရက် အတိုက်အခံ လုပ်ခဲ့ကြသော်လည်း အဆုံးတွင် နိုင်ငံတော်၏ ဧဝံဂေလိတရားသည် တရုတ်ပြည်အနှံ့ ဖြန့်ဖြူးခြင်းခံခဲ့ရဆဲ ဖြစ်သည်။ ဘုရားသခင်၏ အလိုတော်ကို ဆောင်ရွက်ခြင်းအား မည်သူက နှောင့်ယှက်နိုင်သနည်း။ ဘုရားသခင်၏ နိုင်ငံတော် ဧဝံဂေလိတရား ပျံ့နှံ့မှုအား အဘယ်သူ တားဆီးနိုင်သနည်း။ ဘုရားသခင်၏ သိုးများက ဘုရားသခင်၏ အသံကို နားထောင်ကြပြီး ဘုရားသခင်၏ ရယူခြင်း ခံရသင့်သည့်သူများသည် အနှေးနှင့်အမြန် ရယူခြင်းခံကြရလိမ့်မည် ဖြစ်သည်။ ဤသည်မှာ မည်သူမျှ ဖျက်ဆီး၍မရနိုင်သည့်အရာတစ်ခု ဖြစ်သည်။ “ရှင်ဘုရင်၏ နှလုံးသားသည် မြစ်ရေကဲ့သို့ ယေဟောဝါ၏ လက်တော်တွင် ရှိ၏။ ယင်းကို သူ အလိုရှိသည့်နေရာတိုင်းသို့ လှည့်တော်မူသည်။” (သုတ္တံကျမ်း ၂၁:၁)ဟု ဖော်ပြသည့် သုတ္တံကျမ်းထဲမှ စာကြောင်းကဲ့သို့ပင် ဖြစ်သည်။ ဤသည်မှာ အရေးမပါသည့် လူများအတွက် သာ၍ပင် မှန်ကန်သည်၊ ဟုတ်ပါသလော။ ဘုရားသခင်တွင် မည်သည့်အချိန် မည်သည့်အမှု သူပြုရမည်ဆိုသည်နှင့်ပတ်သက်၍ သူ၏ ကိုယ်ပိုင် အကြံအစည်များနှင့် အစီအစဉ်များရှိသည်။ ဘုရားသခင်အတွက် ဤအရာ သို့မဟုတ် ထိုအရာကို လုပ်ဆောင်ရန် မဖြစ်နိုင်ဟု လူအချို့က အမြဲ ဝေဖန်ကြသော်လည်း ထိုသို့သော အယူအဆများသည် လူတို့၏ စိတ်ကူးစိတ်သန်းများသာ ဖြစ်သည်။ လူတို့သည် ထိခိုက်နစ်နာမှု မည်မျှ လုပ်ဆောင်ပြီး စာတန်က ဒုက္ခပြဿနာ မည်မျှ လှုံ့ဆော်သည်ဖြစ်စေ၊ ဘာမျှ ဖြစ်လာလိမ့်မည် မဟုတ်သကဲ့သို့ ဘုရားသခင်၏ အမှုတော်ကို ၎င်းတို့ တားဆီးနိုင်လိမ့်မည် မဟုတ်။ သန့်ရှင်းသော ဝိညာဉ်တော်၏ အလုပ်က အရာရာကို ဆုံးဖြတ်ပြီး လူတို့သည် သန့်ရှင်းသော ဝိညာဉ်တော်၏ အလုပ်မရှိဘဲ မည်သည့်အရာမျှ မပြီးမြောက်နိုင်ကြပေ။ ဤအရာနှင့်စပ်လျဉ်း၍ လူတို့သည် မည်သည့် အသိစိတ်မျိုး ပိုင်ဆိုင်သင့်သနည်း။ လူတစ်ဦးသည် သန့်ရှင်းသော ဝိညာဉ်တော် အလုပ်လုပ်နေခြင်းမရှိသည်ကို သဘောပေါက်သည့်အခါ မိမိတို့၏ ကိုယ်ပိုင် အယူအဆများကို လက်လွှတ်သင့်ပြီး မည်သည့်အရာကိုမျှ ကြောင်းကျိုးမမြင်ဘဲ မလုပ်ဆောင်ရန် ဂရုစိုက်သင့်သည်။ အမြော်အမြင်ရှိသော ရွေးချယ်မှုမှာ ဘုရားသခင်၏ ရည်ရွယ်ချက်များကို ရှာဖွေကာ ဘုရားသခင်၏ အချိန်ကို စောင့်ဆိုင်းရန် ဖြစ်သည်။ လူအချို့သည် မိမိတို့ကိုယ်ပိုင် လူသား အယူအဆများနှင့် စိတ်ကူးများပေါ် အမြဲမှီခိုပြီး ဘုရားသခင်ကို ကြိုတင်ဟန့်တားကြကာ ရလဒ်မှာ သန့်ရှင်းသော ဝိညာဉ်တော် အလုပ်လုပ်ခြင်းမရှိသကဲ့သို့ ၎င်းတို့၏ အားထုတ်မှုများ အချည်းနှီးဖြစ်သွားခြင်း ဖြစ်သည်။ သို့သော် လူတို့သည် မိမိတို့ လုပ်ဆောင်သင့်သည့်အရာကို လုပ်ရမည်ဖြစ်ပြီး မိမိတို့၏ တာဝန်ကို ဖြည့်ဆည်းရမည်။ တစ်စုံတစ်ရာ တလွဲလုပ်မိမည်ကို ကြောက်သည့်အတွက် မလှုပ်မယှက် သင် စောင့်ဆိုင်း၍ မရပေ။ ပြီးလျှင် သင့်အနေဖြင့် “ထိုအရာကို ဘုရားသခင် မလုပ်သေးပါ၊ ပြီးလျှင် ကျွန်ုပ်အား မည်သည့်အရာကို သူ လုပ်ဆောင်စေလိုသည်ဟု သူ မပြောသေးပါ။ ထို့ကြောင့် ယခုတွင် မည်သည့်အရာကိုမျှ ကျွန်ုပ် လုပ်မည် မဟုတ်ပါ”ဟု သေချာပေါက် ပြော၍မရပေ။ ဤသည်မှာ သင်၏ တာဝန်ကို လုပ်ဆောင်ရန် ပျက်ကွက်မှုတစ်ခု မဟုတ်လော။ ထိုအရာကို သင် သေချာစဉ်းစားရမည်။ အကြောင်းမှာ ထိုအရာသည် အသေးအမွှား ကိစ္စမဟုတ်သကဲ့သို့ စဉ်းစားရာတွင် အမှားတစ်ချက်က သင်၏ ရှေ့ရေးကို ပျက်စီးစေနိုင်သည် သို့မဟုတ် သင့်ကို ဖျက်ဆီးသွားနိုင်သည်။

ဘုရားသခင်၏ စီမံခန့်ခွဲမှု အစီအစဉ်တွင် ဘုရားသခင် လုပ်ဆောင်သည့် မည်သည့်အရာမဆိုသည် အချိန်ဇယားဖြင့်၊ သင့်တော်သည့်အချိန်တွင် အလွန် တိကျစွာ လုပ်ဆောင်ခြင်းဖြစ်ပြီး “ဤအရာအလုပ်ဖြစ်မည်မဟုတ်၊ ထိုအရာ အလုပ်ဖြစ်မည်မဟုတ်၊ ဤအရာက သင့်ကို မည်သည့်နေရာမျှ ရောက်စေမည်မဟုတ်”ဟု ပြောသည့် လူများ၏ စိတ်ကူးအတိုင်း လုပ်ဆောင်ခြင်း လုံးဝ မဟုတ်ပေ။ ဘုရားသခင်သည် အနန္တတန်ခိုးရှင်ဖြစ်ပြီး ဘုရားသခင်အတွက် မည်သည့်အရာမျှ မခက်ပေ။ ပညတ်တော်ခေတ်မှသည် ကျေးဇူးတော်ခေတ်မှနေ၍ နိုင်ငံတော်ခေတ်ထိတိုင် ဘုရားသခင်၏ အမှုတော် အဆင့်တိုင်းသည် ဖြစ်နိုင်ခြေမရှိဟု တွေးထင်သည့် လူတို့၏ အယူအဆများကို ဆန့်ကျင်လျက် လုပ်ဆောင်ထားပြီးဖြစ်သည်။ မည်သို့ဆိုစေ အဆုံးတွင် အားလုံး ဖြစ်လာသည်။ ပြီးလျှင် စာတန်သည် လုံးဝ အရှက်ရကာ ကျရှုံးသွားပြီး လူတို့သည် မိမိတို့နှုတ်များကို ပိတ်နေကြသည်။ လူတို့သည် မည်သည့်အရာကို လုပ်ဆောင်နိုင်သနည်း။ သမ္မာတရားကိုပင် ၎င်းတို့ လက်တွေ့မလုပ်ဆောင်နိုင်ကြဘဲ မာနထောင်လွှားကာ စိတ်ကြီးဝင်နိုင်ကြဆဲဖြစ်ကာ မည်သည့်အရာကိုမဆို ၎င်းတို့ လုပ်ဆောင်နိုင်သည်ဟု တွေးထင်ကြဆဲဖြစ်သည်။ ပြီးလျှင် ၎င်းတို့၏ စိတ်နှလုံးများသည် လွန်ကဲသော လိုအင်ဆန္ဒများနှင့်ပြည့်ကာ စစ်မှန်သည့် သက်သေကို လုံးဝ မခံကြပေ။ “ဘုရားသခင်၏ နေ့ရက်သည် မကြာမီ ရောက်လာမည်၊ ကျွန်ုပ်တို့ နောက်ထပ် ဆင်းရဲဒုက္ခခံရန် မလိုတော့ပါ၊ ကောင်းမွန်သည့် ဘဝတစ်ခုကို ကျွန်ုပ်တို့ ရလိမ့်မည်ဖြစ်ပြီး အဆုံးသတ်ကို မြင်နေရပြီ”ဟု ပြောသည့် လူများပင် ရှိသည်။ သင်တို့ကို ငါ ပြောပါရစေ၊ ထိုသို့သော လူများသည် အလေးအနက်မထားဘဲ အလိုက်သင့်နေပြီး ကရော်ကမည် နိုင်နေခြင်းသာ ဖြစ်ကာ အဆုံးတွင် ၎င်းတို့သည် အပြစ်ပေးခြင်းသာ ခံရလိမ့်မည်ဖြစ်၍ မည်သည့်အရာမျှ ရရှိကြလိမ့်မည်မဟုတ်။ ဘုရားသခင်၏ နေ့ရက်ကို မြင်ရခြင်းနှင့် ကြီးမားသော ကပ်ဘေးကို လွတ်မြောက်ခြင်းအတွက် ဘုရားသခင်ကို ယုံကြည်ခြင်းသည် လူတစ်ဦးအား သမ္မာတရားနှင့် အသက်ကို ရရှိရန် ထောက်ကူပေးနိုင်သလော။ ကပ်ဘေးကို လွတ်မြောက်ရန်နှင့် ဘုရားသခင်၏ နေ့ရက်ကို မြင်ရရန် ဘုရားသခင်ကို ယုံကြည်သောသူ မည်သူမဆိုသည် ပျက်စီးဆုံးရှုံးလိမ့်မည်။ သို့သော် သမ္မာတရားကို လိုက်စားရန်နှင့် စိတ်သဘောထား၌ ပြောင်းလဲခြင်းတစ်ခုမှတစ်ဆင့် ကယ်တင်ခံရရန် ယုံကြည်သောသူများသည် ရှင်ကျန်ကြလိမ့်မည်။ ဤသူများသည် ဘုရားသခင်၌ စစ်မှန်သော ယုံကြည်သူများဖြစ်သည်။ ထိုနားဝေတိမ်တောင်ဖြစ်သည့် ယုံကြည်သူများမှာ နောက်ဆုံးတွင် မည်သည့်အရာမျှ ရရှိကြလိမ့်မည်မဟုတ်၊ အချည်းနှီး အလုပ်လုပ်ခြင်းသာဖြစ်လိမ့်မည်ဖြစ်ပြီး သာ၍ ကြီးလေးစွာ အပြစ်ပေးခံရလိမ့်မည်။ လူအားလုံးသည် ပြင်းထန်သော ထိုးထွင်းအမြင် ချို့တဲ့မှု ရှိကြသည်။ ဘုရားသခင်ကို ယုံကြည်သော်လည်း မိမိတို့ အလုပ်တာဝန်များကို မမြင်သကဲ့သို့ ကောက်ကျစ်ဆိုးယုတ်သည့် အရာများအကြောင်းကို အမြဲ တွေးနေကြသူများသည် မကောင်းမှုပြုသူများဖြစ်သည်။ ၎င်းတို့သည် မယုံကြည်သူများဖြစ်ပြီး မိမိတို့ကိုယ်ကိုသာ ထိခိုက်နစ်နာစေနိုင်သည်။ ယုံကြည်သူများနှင့် ဘာသာတရားမရှိသောသူများ နှစ်ဦးလုံးသည် ဘုရားသခင်၏ လက်ထဲတွင်ရှိသည် မဟုတ်လော။ ဘုရားသခင်၏ လက်တော်ကို အဘယ်သူ လွတ်မြောက်နိုင်သနည်း။ မည်သူမျှ မလွတ်မြောက်နိုင်ပေ။ လွတ်မြောက်သောသူများသည် နောက်ဆုံးတွင် ဘုရားသခင်ထံ ပြန်လာရမည်ဖြစ်ပြီး အပြစ်ဒဏ်ပေးခြင်းခံရမည်ဖြစ်သည်။ ဤသည်မှာ သိသာထင်ရှားသည်။ လူတို့က အဘယ်ကြောင့် ရှင်းလင်းစွာ မမြင်နိုင်ကြသနည်း။

လူအချို့သည် အနန္တတန်ခိုးရှင် ဘုရားသခင်ကို ယုံကြည်ကြသော်လည်း ဘုရားသခင်၏ အနန္တတန်ခိုးနှင့်ဆိုင်သော အသိပညာ စိုးစဉ်းမျှ မရှိကြပေ။ ၎င်းတို့သည် အောက်ပါ မေးခွန်းနှင့်ပတ်သက်၍ မပြတ် စိတ်ရှုပ်ထွေးကြသည်။ “ဘုရားသခင်သည် အနန္တတန်ခိုးရှင်ဖြစ်သည့်အတွက်၊ ဩဇာအာဏာရှိပြီး အရာခပ်သိမ်းအပေါ် အချုပ်အခြာအာဏာ စွဲကိုင်နိုင်သည့်အတွက် အဘယ်ကြောင့် စာတန်ကို သူ ဖန်ဆင်းခဲ့သေးသနည်း၊ ထိုစာတန်ကို လူသားမျိုးနွယ်အား အနှစ် ၆၀၀၀ ကြာ ဖျက်ဆီးခွင့်ပေးပြီး ကမ္ဘာလောကကို ပရမ်းပတာအခြေအနေတစ်ခုသို့ တွန်းပို့ခွင့်ပေးသေးသနည်း။ စာတန်ကို ဘုရားသခင်က အဘယ်ကြောင့် မဖျက်ဆီးရသနည်း။ စာတန်သည် ဖယ်ရှားရှင်းလင်းခြင်းခံခဲ့ရလျှင် လူတို့သည် ကောင်းမွန်သည့် ဘဝရကြမည်မဟုတ်လော”ဟူ၍ ဖြစ်သည်။ ဤသည်မှာ လူအများစု တွေးထင်ကြသည့် နည်းလမ်းဖြစ်သည်။ ဤကိစ္စရပ်ကို သင်တို့ ယခု ရှင်းပြနိုင်ကြသလော။ ဤအရာတွင် ရူပါရုံများနှင့်စပ်လျဉ်းသည့် သမ္မာတရား ပါဝင်သည်။ ဤမေးခွန်းကို များစွာသောသူတို့က စဉ်းစားကြပြီးဖြစ်သော်လည်း ယခု သင်တို့တွင် အခြေခံအုတ်မြစ်နှင့်ဆိုင်သော အရာတစ်ခု ရှိကြပြီဖြစ်သဖြင့် ထိုအရာကြောင့် ဘုရားသခင်ကို သင်တို့ သံသယဖြစ်ကြလိမ့်မည် မဟုတ်။ သို့ရာတွင် ဤအရာနှင့်ပတ်သက်သည့် ရှုပ်ထွေးမှုကို ရှင်းလင်းရမည်ဖြစ်သည်။ “ဘုရားသခင်သည် အဘယ်ကြောင့် ကောင်းကင်တမန်မင်းအား သူ့ကို သစ္စာဖောက်ခွင့်ပေးခဲ့သနည်း။ ကောင်းကင်တမန်မင်းအနေဖြင့် သူ့ကို သစ္စာဖောက်နိုင်စွမ်း ရှိသည်ကို ဘုရားသခင် မသိခဲ့ခြင်းသည် ဖြစ်နိုင်မည်လော။ ထိုကောင်းကင်တမန်မင်းကို ဘုရားသခင် ထိန်းချုပ်ရန် ပျက်ကွက်ခဲ့သလော၊ သူ အခွင့်ပေးခဲ့သလော သို့မဟုတ် ဘုရားသခင်တွင် ရည်ရွယ်ချက်တစ်ခုခု ရှိခဲ့သလော” ဟု မေးသောလူအချို့ ရှိသည်။ လူတို့အနေဖြင့် ဤမေးခွန်းထုတ်ခြင်းသည် ပုံမှန်ဖြစ်ပြီး ဤမေးခွန်းတွင် ဘုရားသခင်၏ စီမံခန့်ခွဲမှု အစီအစဉ်တစ်ခုလုံး ပါဝင်သည်ကို ၎င်းတို့ သိသင့်ကြသည်။ ကောင်းကင်တမန်မင်းတစ်ပါး ရှိရန်အတွက် ဘုရားသခင် စီစဉ်ခဲ့ခြင်းဖြစ်ပြီး ဘုရားသခင်အပေါ် ဤကောင်းကင်တမန်မင်း၏ သစ္စာဖောက်ခြင်းကို ဘုရားသခင်က ခွင့်ပြုထားခြင်းဖြစ်ပြီး သူ စီစဉ်ထားခြင်းလည်း ဖြစ်သည်။ ထိုအရာသည် ဘုရားသခင်၏ စီမံခန့်ခွဲမှု အစီအစဉ်၏ နယ်ပယ်အတွင်းတွင် ကျရောက်သည်မှာ သေချာသည်။ ကောင်းကင်တမန်မင်းက သူ့ကို သစ္စာဖောက်ခဲ့ပြီးသည့်နောက်တွင် ဘုရားသခင်သည် သူ ဖန်ဆင်းခဲ့ပြီးဖြစ်သည့် လူသားမျိုးနွယ်ကို ကောင်းကင်တမန်မင်းအား ဖျက်ဆီးခွင့်ပေးခဲ့သည်။ လူသားမျိုးနွယ်အနေဖြင့် မြွေ၏ သွေးဆောင်ခြင်းခံရကာ စာတန်၏ ဖောက်ပြန်ပျက်စီးစေခြင်းခံရရန်အလို့ငှာ ဘုရားသခင်က စာတန်ကို ထိန်းချုပ်ရန် ပျက်ကွက်ခဲ့ခြင်းမဟုတ်ဘဲ စာတန်အား ဤအရာကို လုပ်ဆောင်ခွင့်ပေးခဲ့သူမှာ ဘုရားသခင် ဖြစ်သည်။ ဤအရာဖြစ်ပျက်ရန်အတွက် သူ၏ ခွင့်ပြုချက်ကို သူ ပေးခဲ့ပြီးနောက်တွင်သာ ဘုရားသခင်သည် သူ၏ စီမံခန့်ခွဲမှု အစီအစဉ်နှင့် လူသားမျိုးနွယ်ကို ကယ်တင်သည့် သူ၏ အမှုတော်ကို အစပြုခဲ့ခြင်း ဖြစ်သည်။ လူသည် ဤနေရာတွင် နက်နဲမှုကို နားလည်သဘောပေါက်နိုင်သလော။ လူသားမျိုးနွယ်သည် စာတန်၏ ဖျက်ဆီးခြင်းကို ခံခဲ့ရပြီးသောအခါ ဘုရားသခင်သည် လူသားမျိုးနွယ်အပေါ် စီမံခန့်ခွဲသည့် သူ၏အမှုကို စတင်ခဲ့သည်။ ပထမဦးစွာ သူသည် ပညတ်တော်ခေတ်၏ အမှုကို ဣသရေလနိုင်ငံတွင် ပြုခဲ့သည်။ နှစ်ပေါင်း နှစ်ထောင် ကုန်လွန်ခဲ့ပြီးနောက် သူသည် ကျေးဇူးတော်ခေတ်၌ ကားစင်တင်ခံရခြင်း အမှုကို သူ လုပ်ဆောင်ခဲ့ပြီး လူသားမျိုးနွယ်အပေါင်း ရွေးနှုတ်ကယ်တင်ခြင်းကို ခံခဲ့ရသည်။ နောက်ဆုံးသောကာလ အချိန်တွင် သူသည် နောက်ဆုံးသောကာလရှိ လူစုကို သိမ်းပိုက်ပြီး ကယ်တင်ဖို့ နောက်တစ်ကြိမ် လူ့ဇာတိခံယူလေသည်။ နောက်ဆုံးသောကာလတွင် မွေးဖွားခဲ့သောသူများမှာ မည်ကဲ့သို့ လူအမျိုးအစား ဖြစ်သနည်း။ ၎င်းတို့မှာ စာတန်၏ ဖျက်ဆီးခြင်းကို နှစ်ထောင်ချီ ခံခဲ့ပြီးသောသူများ ဖြစ်ကြပြီး လူသားပုံသဏ္ဌာန်မရှိတော့သည့်တိုင်အောင် ပြင်းပြင်းထန်ထန် ဖျက်ဆီးခြင်းကို ခံခဲ့ပြီးသောသူများ ဖြစ်သည်။ သို့သော်လည်း ဘုရားနှုတ်ကပတ်တော်များ၏ တရားစီရင်ခြင်း၊ ပြစ်တင်ဆုံးမခြင်းနှင့် ထုတ်ဖော်ခြင်းကို တွေ့ကြုံပြီးနောက်၊ သိမ်းပိုက်ခြင်းကို ခံပြီးနောက် ၎င်းတို့သည် ဘုရားသခင်၏ နှုတ်ကပတ်တော်ထဲမှ သမ္မာတရားကို ရကြပြီး ဘုရားသခင်၏ လက်ခံယုံကြည်စေခြင်းကို ရိုးသားစွာ ခံကြသည်၊ ၎င်းတို့သည် ဘုရားသခင်အကြောင်း သိနားလည်ခြင်းကို ရရှိကြပြီး ဘုရားသခင်ကို အကြွင်းမဲ့ ကျိုးနွံနာခံနိုင်ပြီး သူ၏ ရည်ရွယ်ချက်များကို ဖြည့်ဆည်းနိုင်ကြသည်။ အဆုံးတွင် ဘုရားသခင်၏ စီမံခန့်ခွဲမှုအစီအစဉ်မှတစ်ဆင့် ရရှိသော လူစုတစ်စုသည် ဤကဲ့သို့ လူများ ဖြစ်လိမ့်မည်။ စာတန်အားဖြင့် ဖျက်ဆီးခြင်း မခံရသေးသည့် လူများသည် ဘုရားသခင်၏ ရည်ရွယ်ချက်များ အထမြောက်အောင် ဆောင်ရွက်လိမ့်မည်ဟု သင်ထင်သလော၊ သို့မဟုတ် စာတန်၏ ဖျက်ဆီးခြင်း ခံရပြီးဖြစ်ကာ နောက်ဆုံးတွင် ကယ်တင်ခြင်းခံရသည့် သူများသည် ဘုရားအလိုတော်ကို ဖြည့်ဆည်းမည်ဟု ထင်သလော။ စီမံခန့်ခွဲမှုအစီအစဉ်တစ်ခုလုံး တစ်လျှောက်တွင် ရလိမ့်မည် ဖြစ်သော လူများသည် ဘုရားသခင်၏ ရည်ရွယ်ချက်များကို နားလည်နိုင်သော၊ ဘုရားသခင်ထံမှ သမ္မာတရားကို ရရှိပြီး ဘုရားသခင် သတ်မှတ်ထားသော အသက်နှင့် လူသားပုံသဏ္ဌာန်ကို ပိုင်ဆိုင်သော လူစုတစ်စု ဖြစ်သည်။ လူသားများကို ဘုရားသခင် ကနဦးဖန်ဆင်းခဲ့သည့်အချိန်က ၎င်းတို့တွင် လူသားပုံသဏ္ဌာန်နှင့် လူ့အသက်တို့ ရှိရုံမျှသာ ဖြစ်သည်။ သို့ရာတွင် ၎င်းတို့သည် လူသားများကို ဘုရားသခင် တောင်းဆိုသည့် သမ္မာတရားကို မပိုင်ဆိုင်သကဲ့သို့ လူသားတို့ အသက်ရှင်နေထိုင်ပြီးဖြစ်မည်ဟု ဘုရားသခင် အစဉ်သဖြင့် မျှော်လင့်ခဲ့သော လူသားပုံသဏ္ဌာန်ကို ၎င်းတို့ အသက်ရှင်နေထိုင်နိုင်ခြင်း မရှိခဲ့ချေ။ အဆုံးတွင် ရရှိမည့် လူတစ်စုသည် နောက်ဆုံးတွင် ကျန်ရစ်မည့် လူများဖြစ်ပြီး ဤသည်တို့သည် ဘုရားသခင် ရရှိသည့် လူများဖြစ်သည်။ ၎င်းတို့ကို ဘုရားသခင်က အားရပြီး ၎င်းတို့ကလည်း ဘုရားသခင်ကို ကျေနပ်စေသည်။ စီမံခန့်ခွဲမှုနှင့်ဆိုင်သော အမှုတော်၏ ထောင်စုနှစ်အချို့ တစ်လျှောက်တွင် နောက်ဆုံး၌ သူ ကယ်တင်ပြီးဖြစ်သော ဤလူများသည် အကျိုးအရရှိဆုံး ဖြစ်ကြလေပြီ။ ဤလူတို့ ရရှိပြီးဖြစ်သည့် သမ္မာတရားသည် ဘုရားသခင်က စာတန်နှင့် သူ၏ စစ်ပွဲမှတစ်ဆင့် ပေးထားသည့် ရေလောင်းပေးခြင်းနှင့် အာဟာရ အတိအကျ ဖြစ်လေပြီ။ ဤအဖွဲ့တွင်ရှိသည့် လူများသည် အစအဦး၌ ဘုရားသခင် ဖန်ဆင်းခဲ့သည့်သူများထက် များစွာ သာ၍ ကောင်းမွန်ကြသည်။ ၎င်းတို့သည် ဖောက်ပြန်ပျက်စီးခဲ့ကြသော်လည်း ဤသည်မှာ ရှောင်လွှဲမရနိုင်ခဲ့သကဲ့သို့ ဘုရားသခင်၏ စီမံခန့်ခွဲမှု အစီအစဉ်၏ နယ်ပယ်အတွင်းတွင် ကျရောက်သည့် ကိစ္စရပ်တစ်ခု ဖြစ်သည်။ ဤအရာက သူ၏ အနန္တတန်ခိုးနှင့် ဉာဏ်ပညာတို့အပြင် ဘုရားသခင် စီစဉ်ပြီးဖြစ်သည့်၊ ကြံစည်ကာ စွမ်းဆောင်ရရှိပြီးဖြစ်သည့် အရာဟူသမျှသည် အကြွင်းမဲ့ အကြီးမြတ်ဆုံးဖြစ်သည်ဟူသည့် အချက်တို့ကို အပြည့်အဝ ထုတ်ဖော်ပြလေသည်။ ထို့နောက်ပိုင်းတွင် သင်သည် “ဘုရားသခင်က အနန္တတန်ခိုးရှိလျှင် ကောင်းကင်တမန်မင်းက သူ့ကို အဘယ်သို့ဖြစ်ပြီး သစ္စာဖောက်နိုင်သေးသနည်း။ ထို့နောက် ဘုရားသခင်က ထိုကောင်းကင်တမန်မင်းကို မြေကြီးသို့ ပစ်ချခဲ့ပြီး ထိုနေရာတွင် လူသားမျိုးနွယ်ကို ဖျက်ဆီးခွင့် ပေးခဲ့သည်။ ဤအရာ၏ အဓိပ္ပာယ်မှာ အဘယ်နည်း”ဟု တစ်ဖန် အမေးခံရလျှင်၊ သင်က “ဤကိစ္စရပ်သည် ဘုရားသခင်၏ စီမံမှုအတွင်းတွင် ကျရောက်ပြီး အရေးအပါဆုံး ဖြစ်သည်။ လူသည် ထိုအရာကို လုံးဝ နားလည်သဘောပေါက်နိုင်ခြင်းမရှိသော်လည်း လူက သဘောပေါက်ကာ အလှမ်းမီနိုင်သည့် အဆင့်မှနေ၍ ဘုရားသခင် လုပ်ဆောင်ခဲ့သည့်အရာသည် အလွန် အဓိပ္ပာယ်ရှိကြောင်းကို မြင်၍ရသည်။ ဤသည်မှာ ဘုရားသခင်သည် ခဏတာ သတိလစ်ဟင်းခြင်းတစ်ခု ရှိသည် သို့မဟုတ် သူသည် ထိန်းချုပ်မှု ဆုံးရှုံးကာ အမှုအရာများကို စီမံရန် နည်းလမ်းမရှိသကဲ့သို့ ထို့နောက်တွင် သူက ‘ကောင်းကင်တမန်မင်းသည် မည်သို့ဆိုစေ သစ္စာဖောက်ခြင်းတွင် ပါဝင်ပတ်သက်ခဲ့သောကြောင့် ငါသည်လည်း ထိုအရာနှင့်ပတ်သက်၍ မထူးတော့သည့်အတူတူ ဆက်လုပ်ကာ ထိုကောင်းကင်တမန်မင်းက လူသားမျိုးနွယ်အားလုံးကို ဖျက်ဆီးပြီးနောက်မှသာ ငါ ကယ်တင်လိုက်မည်’ ဟု ပြောလျက် စာတန်၏ လှည့်ကွက်များကို သူ့အပေါ် ပြန်သုံးခြင်းဖြစ်သည်ဟု ပြောရန် သေချာပေါက်မဟုတ်ပေ။ ဤသည်မှာ လုံးဝ မမှန်ကန်ပေ”ဟု ပြောနိုင်သည်။ ဤကိစ္စရပ်သည် ဘုရားသခင်၏ စီမံခန့်ခွဲမှု အစီအစဉ်၏ နယ်ပယ်အတွင်းတွင် ကျရောက်သည်ကို အနည်းဆုံးအနေဖြင့် လူတို့ သိသင့်ကြသည်။ မည်သည့် အစီအစဉ်နည်း။ ပထမအဆင့်တွင် ကောင်းကင်တမန်မင်းတစ်ပါး ရှိခဲ့၏။ ဒုတိယအဆင့်တွင် ကောင်းကင်တမန်မင်းက သစ္စာဖောက်ခဲ့သည်။ တတိယအဆင့်တွင် ကောင်းကင်တမန်မင်း၏ သစ္စာဖောက်ခြင်းနောက်တွင် သူသည် လူသားမျိုးနွယ်ကို ဖောက်ပြန်ပျက်စီးစေရန် ၎င်းတို့ကြား ရောက်လာပြီးနောက် ဘုရားသခင်က လူသားမျိုးနွယ်ကို စီမံခန့်ခွဲသည့် သူ၏ အမှုတော်ကို အစပြုခဲ့သည်။ လူတို့သည် ဘုရားသခင်ကို ယုံကြည်သည့်အခါ ဘုရားသခင်၏ စီမံခန့်ခွဲမှု အစီအစဉ်နှင့်ဆိုင်သော ရူပါရုံကို ၎င်းတို့ နားလည်ရမည်။ အချို့သည် သမ္မာတရား၏ ဤသွင်ပြင်လက္ခဏာကို လုံးဝ နားမလည်ကြ၊ ဖြေရှင်းမရနိုင်သည့် ဆန့်ကျင်ကွဲလွဲမှုများစွာ ရှိသည်ဟု အမြဲ ခံစားနေကြသည်။ သိနားလည်မှုမရှိဘဲ ၎င်းတို့ မသေမချာဖြစ်ကြပြီး ၎င်းတို့ မသေချာကြလျှင် ရှေ့ဆက်သွားရန် အားအင် မရှိကြချေ။ သမ္မာတရားမရှိဘဲနှင့် တိုးတက်မှုတစ်ခုခု လုပ်ဆောင်ရန် ခက်ခဲသည်။ ထို့ကြောင့် ပြဿနာတစ်ခုနှင့် ရင်ဆိုင်ရသည့်အခါ သမ္မာတရား မရှာဖွေသောသူတို့အတွက် အမှန်တကယ် ခက်ခဲပေသည်။ ဤမိတ်သဟာယသည် သင်တို့ကို နားလည်စေရန် အထောက်အကူပြုပြီလော။ ဘုရားသခင်က လူသားမျိုးနွယ်ကို ကယ်တင်ရန် စီမံခန့်ခွဲမှု အစီအစဉ် ရှိခဲ့သည်မှာ ကောင်းကင်တမန်မင်း၏ သစ္စာဖောက်မှုနောက်တွင်သာ ဖြစ်သည်။ ကောင်းကင်တမန်မင်းက မည်သည့်အချိန်တွင် သူ၏ သစ္စာဖောက်ခြင်းကို အစပြုခဲ့သနည်း။ သူ၏ သစ္စာဖောက်ခြင်းကို ထုတ်ဖော်ပြခဲ့သည့် အရာအချို့ မုချရှိခဲ့သည်။ ကောင်းကင်တမန်မင်း၏ သစ္စာဖောက်ခြင်းတွင် ဖြစ်စဉ်တစ်ခု ရှိခဲ့သည်။ ယင်းမှာ စာသားက သရုပ်ဖော်ထားသလောက် သေချာပေါက် မရိုးရှင်းနိုင်ပေ။ ထိုအရာသည် ယေရှုအပေါ် ယုဒ၏ သစ္စာဖောက်ခြင်းကဲ့သို့ ဖြစ်သည်။ ဖြစ်စဉ်တစ်ခု ရှိသည်။ သူသည် သခင်ယေရှုနောက်လိုက်ပြီးနောက် မကြာမီတွင်ပင် သစ္စာဖောက်ခဲ့ခြင်း မဟုတ်ပေ။ ယုဒသည် သမ္မာတရားကို မချစ်ခဲ့ပေ၊ ငွေကို တပ်မက်ခဲ့ပြီး အမြဲ ငွေခိုးယူခြင်းရှိခဲ့သည်။ ဘုရားသခင်က သူ့ကို စာတန်ထံ ပေးအပ်ခဲ့ပြီးနောက် ယေရှုကို သူ သစ္စာဖောက်ရန် အစပြုခဲ့သည်။ ယုဒသည် တစ်ဆင့်ပြီးတစ်ဆင့် အကျင့်ပျက်လာခဲ့ပြီး အချို့သော တိကျသည့် အခြေအနေများတွင် အချိန်ကျလာသည့်အခါ ယေရှုကို သူ သစ္စာဖောက်ခဲ့သည်။ လူတို့ အကျင့်ပျက်ပြားခြင်းအတွက် ပုံမှန်ပုံစံတစ်ခုရှိပြီး ဖြစ်မည်ဟု လူတို့ စိတ်ကူးသလောက် မရိုးရှင်းပေ။ လောလောလတ်လတ်တွင် ဘုရားသခင်၏ စီမံခန့်ခွဲမှု အစီအစဉ်တွင်ရှိသည့် အရာများကို လူတို့က ဤအတိုင်းအတာထိတာ နားလည်နိုင်ကြသည်။ သို့သော် ၎င်းတို့အနေဖြင့် ဝိညာဉ်ရင့်သန်မှုတွင် ကြီးထွားသည့်အခါ ယင်း၏ အရေးပါမှုကို သာ၍ နက်ရှိုင်းစွာ သဘောပေါက်နိုင်ကြလိမ့်မည် ဖြစ်သည်။