အနီးဝန်းကျင်ကို ကြည့်လော့၊ အသင်းတော်ထဲတွင် ဝိညာဉ်ရေးရာ နားလည်သဘောပေါက်မှုရှိပြီး သမ္မာတရားကို နားလည်နိုင်သော လူများစွာ ရှိသလောဟူသည်ကို သင်တို့ ပြောနိုင်သလော။ (ဝိညာဉ်ရေးရာ နားလည်သဘောပေါက်မှု ကင်းမဲ့သော လူများသည် အဓိပ္ပာယ်မရှိသည့် သိနားလည်မှု ရှိခဲ့သောသူများ သို့မဟုတ် ထုံအပြီး ဉာဏ်ထိုင်းသူများဖြစ်စဉ်တွင် မိမိတို့တာဝန်ကို လုပ်ဆောင်သည့် လူအများစုက ဝိညာဉ်ရေးရာ နားလည်သဘောပေါက်မှု ရှိကြသည်ဟု ကျွန်ုပ် တွေးထင်လေ့ရှိခဲ့သည်။ ယခု၊ ဘုရားသခင်၏ မိတ်သဟာယကို နားထောင်ပြီးနောက်တွင်၊ သမ္မာတရားကို နားလည်နိုင်သောသူတို့သည်သာ ဝိညာဉ်ရေးရာ နားလည်သဘောပေါက်မှု အမှန်တကယ် ရှိကြသည်ကို ကျွန်ုပ် သဘောပေါက်သည်။ သူတို့သည် လူနည်းစုဖြစ်ကြစဉ်တွင် လူအများစုက ဝိညာဉ်ရေးရာ နားလည်သဘောပေါက်မှု ကင်းမဲ့ကြသည်။) လတ်တလောတွင်၊ ဝိညာဉ်ရေးရာ နားလည်သဘောပေါက်မှုရှိပြီး သမ္မာတရားကိုနားလည်သောသူများသည် လူနည်းစုတွင်ရှိကြပြီး၊ ဝိညာဉ်ရေးရာ နားလည်သဘောပေါက်မှု မရှိသူများ သို့မဟုတ် သမ္မာတရားကို နားမလည်သူများက လူအများစုတွင် ရှိကြသည်။ ဥပမာအနေဖြင့်၊ လူတို့သည် ကျိုးနွံနာခံခြင်းနှင့်ဆိုင်သည့် သမ္မာတရားကို မည်သို့ သဘောပေါက်နားလည်ကာ သိရှိသင့်သနည်း။ လူအများစုက ကျိုးနွံနာခံခြင်းဟူသည်မှာ ၎င်းတို့ကို ပြောသည့်အရာအား လုပ်ဆောင်ပြီး ပြဿနာတစ်ခု ရင်ဆိုင်နေရချိန်တွင် အတိုက်အခံမလုပ်၊ မပုန်ကန်ခြင်းကို ဆိုလိုသည်ဟု တွေးထင်ကြသည်။ ၎င်းတို့အတွက် ဤသည်မှာ ကျိုးနွံနာခံခြင်း ဖြစ်သည်။ ဘုရားသခင်က လူတို့အား သူ့ကို ကျိုးနွံနာခံစေသည့် အကြောင်းရင်း၊ ကျိုးနွံနာခံခြင်း၏ အဓိပ္ပာယ်က မည်သည့်အရာဖြစ်သည်၊ ကျိုးနွံနာခံခြင်း၏ စည်းမျဉ်းက မည်သည့်အရာဖြစ်သည်၊ လူတစ်ဦးက မည်သို့ ကျိုးနွံနာခံသင့်ပြီး၊ ကျိုးနွံနာခံခြင်းကို လက်တွေ့လုပ်ဆောင်ချိန်တွင် လူတို့အတွင်းရှိ မည်သည့် ဖောက်ပြန်ပျက်စီးခြင်းများအား ဖြေရှင်းရန်လိုအပ်သည်ဟူသည်တို့နှင့်ဆိုင်သော အသေးစိတ်အချက်တစ်ခုကိုမျှ လူတို့ နားမလည်ကြပေ။ စည်းမျဉ်းစည်းကမ်းများကို ၎င်းတို့ ပုံသေစောင့်ထိန်းရုံသာဖြစ်သည်။ ၎င်းတို့က၊ “ကျိုးနွံနာခံခြင်းဟူသည်မှာ သင့်ကို ချက်ပြုတ်ရန် ပြောထားလျှင်၊ ကြမ်းပြင်ကို တံမြက်စည်းမလှည်းနှင့်၊ ပြီးလျှင် ကြမ်းပြင်ကို တံမြက်စည်းလှည်းရန် ပြောထားလျှင် မှန်ကို သန့်ရှင်းရေးမလုပ်နှင့်ဟု ဆိုလိုသည်။ တစ်စုံတစ်ရာကို လုပ်ဆောင်ရန် သင့်အား ပြောထားလျှင်၊ ထိုအရာကို လုပ်သာလုပ်လော့။ ထိုမျှ ရိုးရှင်းသည်။ သင့်စိတ်နှလုံးတွင် ရှိသည့်အရာကို စိတ်မပူပန်နှင့်။ အဘယ်ကြောင့်ဆိုသော် ဘုရားသခင်သည် ဤအရာများကို မကြည့်ပါ”ဟု တွေးကြသည်။ အမှန်တွင်၊ လူတို့အနေဖြင့် စစ်မှန်သည့် ကျိုးနွံနာခံမှုကို ရယူနိုင်ရန်အလို့ငှာ ဘုရားသခင်သည် လူတို့အား သူ့ကို ကျိုးနွံနာခံသည့်တစ်ချိန်တည်းတွင် ၎င်းတို့၏ ပုန်ကန်မှုနှင့် ဖောက်ပြန်ပျက်စီးခြင်းတို့ကို ဖြေရှင်းစေသည်။ ဤသည်မှာ ကျိုးနွံနာခံခြင်း၏ သမ္မာတရား ဖြစ်သည်။ လူတို့သည် နောက်ဆုံးတွင် မည်မျှ နားလည်လာကာ သိရှိလာကြသနည်း။ လူတို့အား လုပ်ဆောင်ရန် ဘုရားသခင် တောင်းဆိုသည့်အရာတိုင်းသည် ၎င်းတို့ လုပ်ဆောင်သင့်သည့်အရာတစ်ခု ဖြစ်သည်ကို ၎င်းတို့ နားလည်ကြသည်။ ဤတွင် ဘုရားသခင်၏ ရည်ရွယ်ချက်များရှိပြီး၊ လူတို့သည် သူ့ကို အကြွင်းမဲ့ ကျိုးနွံနာခံသင့်ကြသည်။ လူတစ်ဦးသည် ဤမျှ သိရှိလာနိုင်လျှင်၊ ကျိုးနွံနာခံခြင်းနှင့်ဆိုင်သည့် သမ္မာတရားကို သူနားလည်ပြီး၊ ဘုရားသခင်ကို ကျိုးနွံနာခံခြင်းအား လက်တွေ့လုပ်ဆောင်နိုင်ကာ သူ့ကို စိတ်ကျေနပ်စေနိုင်သည်။ သို့ရာတွင်၊ ဘုရားသခင်ကို ကျိုးနွံနာခံခြင်းက မည်သည့်အရာဖြစ်သည်ကို လူအများစုက မသိကြပေ။ စည်းမျဉ်းစည်းကမ်းများအား မည်သို့ ပုံသေစောင့်ထိန်းရမည်ကိုသာ ၎င်းတို့ သိကြသည်။ အကျိုးဆက်အနေဖြင့်၊ ဘုရားသခင်ကို ကျိုးနွံနာခံခြင်းအား ၎င်းတို့ မစွမ်းဆောင်နိုင်ကြပေ။ အဘယ့်ကြောင့်ဆိုသော် ဘုရားသခင်၏ ရည်ရွယ်ချက် သို့မဟုတ် ကျိုးနွံနာခံခြင်းနှင့်ဆိုင်သည့် သမ္မာတရားကို ၎င်းတို့ နားမလည်ကြသောကြောင့် ဖြစ်သည်။ ဤသည်တို့မှာ ဝိညာဉ်ရေးရာ နားလည်သဘောပေါက်မှု မရှိသောလူများ ဖြစ်သည်။ ဝိညာဉ်ရေးရာ နားလည်သဘောပေါက်မှုမရှိသော လူများသည် ကျိုးနွံနာခံခြင်း သမ္မာတရားကို နားမလည်နိုင်ကြသောကြောင့်၊ လက်တွေ့လုပ်ဆောင်ရန် ၎င်းတို့အတွက် ခက်ခဲလေသည်။ ၎င်းတို့သည် လက်တွေ့လုပ်ဆောင်ခြင်း နည်းလမ်း သို့မဟုတ် စည်းမျဉ်းများကို ရှာမတွေ့နိုင်ကြပေ။ ဝိညာဉ်ရေးရာ နားလည်သဘောပေါက်မှုမရှိသောလူများသည် ဝိညာဉ်ရေးအရ ဉာဏ်အလင်းမရကြပေ။ ၎င်းတို့ထံ သမ္မာတရားကို မည်မျှ မိတ်သဟာယပြုထားသည်ဖြစ်စေ၊ ၎င်းတို့ နားမလည်ကြပေ။ ကျိုးနွံနာခံခြင်း သမ္မာတရားကို လက်တွေ့လုပ်ဆောင်ခြင်းသည် အသက်ဝင်ရောက်မှု၏ ဖြစ်စဉ်ဖြစ်သည်ကို ၎င်းတို့ မသိကြ။ အသက်ဝင်ရောက်မှုသည် လူတစ်ဦးက မိမိကိုယ်ပိုင် ပုန်ကန်တတ်သော အခြေအနေကို နားလည်နိုင်ရန်အလို့ငှာ၊ ၎င်းသည် ဘုရားသခင်ကို ပုန်ကန်ပြီး အတိုက်အခံလုပ်နေသည့်သူတစ်ဦး ဖြစ်ကြောင်းနှင့် သူနှင့် သဟဇာတဖြစ်ခြင်းကို လုံးဝ စွမ်းဆောင်မရရှိနိုင်ကြောင်းကို သဘောပေါက်နိုင်ရန်အလို့ငှာ၊ သမ္မာတရားကို ၎င်းက လက်ခံကာ လက်တွေ့လုပ်ဆောင်သည့် ဖြစ်စဉ်တွင် ထုတ်ဖော်ပြသည့် ရည်ရွယ်ချက်များ၊ အယူအဆများ၊ နှစ်သက်မှုများနှင့် ရွေးချယ်မှုများကို စိတ်ဖြာလေ့လာဆွေးနွေးကာ သိရှိလာသည့်အချိန် ဖြစ်သည်။ ဤအရာကို လူတို့ နားလည်ကြသည့်အခါ၊ သမ္မာတရားကို လက်တွေ့လုပ်ဆောင်ရန် ၎င်းတို့အတွက် လွယ်ကူသည်။ ဤသည်မှာ ကျိုးနွံနာခံမှု သမ္မာတရားကို လက်တွေ့လုပ်ဆောင်ခြင်း အစသာ ဖြစ်သည်။ သင်၏ကိုယ်ပိုင် ဖောက်ပြန်ပျက်စီးခြင်းကို သုံးသပ်ခြင်းနှင့် သိနားလည်ခြင်းဖြင့် အစပြုကာ သင်၏ ဖောက်ပြန်ပျက်စီးသော စိတ်သဘောထား၊ သင်၏ ပုန်ကန်မှု၊ ဘုရားသခင်အတွက် သင်၏ လွန်ကဲသော လိုအင်ဆန္ဒများ၊ သင်၏ နှစ်သက်မှုများ၊ စဉ်းစားဆင်ခြင်ခြင်းများနှင့် ရည်မှန်းချက်များကို သင် ဖြေရှင်းသည့်အဆင့်ထိ ဖြစ်စဉ်တွင်၊ သင်၏ ကိုယ်ပိုင် ဖောက်ပြန်ပျက်စီးခြင်းကို သင် အကြိမ်ကြိမ် ရှာဖွေတွေ့ရှိလိမ့်မည်၊ ဘုရားသခင်နှင့် သင် သဟဇာတမဖြစ်နိုင်သည့် ကဏ္ဍများကို သိလိမ့်မည်ဖြစ်ပြီး သင်၏ ကိုယ်ပိုင် သဘာဝ အနှစ်သာရကို နားလည်လိမ့်မည်။ လူတို့အတွက် ဘုရားသခင်ကို ကျိုးနွံနာခံရန် မလွယ်ကြောင်း၊ ဘုရားသခင်ကို ကျိုးနွံနာခံခြင်းနှင့်ဆိုင်သည့် အယူဝါဒကို နားလည်ရန်နှင့် ဘုရားသခင်ကို သင် ကျိုးနွံနာခံမည်ဟု ပြောရန် လွယ်ကောင်းလွယ်နိုင်သော်လည်း၊ ဤအရာကို ဆောင်ရွက်ရန် မလွယ်ကူကြောင်း သင် အသိတရားလည်းရလာလိမ့်မည်။ ပြီးလျှင် ကျိုးနွံနာခံခြင်းကို တောင်းဆိုရာတွင် ဘုရားသခင်၏ ရည်ရွယ်ချက်မှာ အဘယ်နည်း။ လူတို့ကို ထုတ်ဖော်ပြရန်သာ ဖြစ်သလော။ ကျိုးနွံနာခံခြင်းအတွက် ဘုရားသခင်၏ တောင်းဆိုမှုတွင်ရှိသည့် သမ္မာတရားမှာ အဘယ်နည်း။ ဘုရားသခင်ကို လူတို့ ကျိုးနွံနာခံသည့် ဖြစ်စဉ်သည် လူတို့ကို ဘုရားသခင် သန့်စင်သည့် ဖြစ်စဉ်တစ်ခု ဖြစ်သည်။ ဆိုလိုသည်မှာ လူတို့ကို သန့်စင်ကာ ချုပ်ထိန်းရန်နှင့် ဘုရားသခင်ရှေ့မှောက်သို့ လာကာ မိမိတို့ကိုယ်ကို သိရှိစေရန်၊ မိမိတို့ကိုယ်ပိုင် ပုန်ကန်မှု၊ မိမိတို့ကိုယ်ပိုင် ဖောက်ပြန်ပျက်စီးသော စိတ်သဘောထားနှင့် ဘုရားသခင်ကို အတိုက်အခံလုပ်သည့် မိမိတို့ကိုယ်ပိုင် သဘာဝတို့ကို နားလည်ရန် လမ်းပြဖို့ ဘုရားသခင်က ကျိုးနွံနာခံခြင်း သမ္မာတရားကို အသုံးပြုပေသည်။ ဤသည်မှာ မိမိကိုယ်ပိုင် အနှစ်သာရကို နားလည်ရန် ဆိုလိုသည့်အရာ ဖြစ်သည်။ စွမ်းဆောင်ရရှိသည့် နောက်ဆုံးရလဒ်မှာ အဘယ်နည်း။ လူတို့သည် မိမိတို့၏ ဖောက်ပြန်ပျက်စီးခြင်း နက်ရှိုင်းမှုများ၏ အကျည်းတန်မှုကို နားလည်နိုင်ကြသည်၊ ၎င်းတို့ မည်သည့်အရာ အမှန်တကယ်ဖြစ်သည်ကို သိနိုင်ကြသည်၊ မည်သည့်အရာ လုပ်ဆောင်သင့်ပြီး ဖန်ဆင်းခံများအဖြစ် မည်သည့်နေရာတွင် ရပ်တည်သင့်ကြသည်ကို သဘောပေါက်နိုင်ကြသည်။ ၎င်းတို့သည် ဘုရားသခင်ကို စစ်မှန်သည့် ကျိုးနွံနာခံမှု ရှိပြီး၊ ကျိုးကြောင်းမသင့်သည့် တောင်းဆိုချက်များကို မပြုလုပ်ကြတော့ပေ။ ဤသည်မှာ စွမ်းဆောင်ရရှိသည့် ရည်ရွယ်ထားသော ရလဒ်ဖြစ်သည်။ ဤသည်မှာ သမ္မာတရား၏ လက်တွေ့ကျမှုထဲသို့ ဝင်ရောက်ရန် ဆိုလိုသည့်အရာ ဖြစ်သည်။ ဤသည်တို့မှာ မိမိကိုယ်ကို သိရှိခြင်းအား ဆိုလိုသည့်အရာ၏ အသေးစိတ်အချက်များ ဖြစ်သည် မဟုတ်လော။ ဤသည်မှာ ဘုရားသခင်ကို ကျိုးနွံနာခံခြင်းတွင် ပါဝင်သည့် အသေးစိတ်ကျသော ကိစ္စများဖြစ်သည် မဟုတ်လော။ လူတို့သည် ကျိုးနွံနာခံခြင်း သမ္မာတရားကို ကြားသည့်အခါ ဤအသေးစိတ်အချက်များကို တွေးကြသလော။ မတွေးနိုင်ကြပေ။ ၎င်းတို့သည် ဤအသေးစိတ်အချက်များကို အပြည့်အဝ နားမလည်လျှင် ဘုရားသခင်ကို စစ်မှန်သည့် ကျိုးနွံနာခံမှုအား စွမ်းဆောင်ရရှိနိုင်ကြသလော။ ဘုရားသခင်ကို ကျိုးနွံနာခံမှု စွမ်းဆောင်ရရှိနိုင်ခြင်း မရှိလျှင်၊ ဖန်ဆင်းခံများအဖြစ် မိမိတို့၏ တာဝန်များကို လူတို့ ထမ်းဆောင်နိုင်ကြသလော။ မဖြစ်နိုင်ပေ။ မိမိကိုယ်ကိုနှင့်ပတ်သက်သည့် ဤအသေးစိတ်အချက်များကို အသိအမှတ်ပြုခြင်းသည် ပဓာနကျသည်ထက် ကျော်လွန်သည်။ ထိုအရာသည် ကယ်တင်ခြင်းကို စွမ်းဆောင်ရရှိရန် အခြေခံအကျဆုံးသော သင်ခန်းစာဖြစ်သည်။ သင်သည် တကယ့် အဆုံးထိ ကျိုးနွံနာခံသည့်အခါ၊ ဘုရားသခင် ပြောသည့်အရာကို သင် လေ့လာဆန်းစစ်မည်မဟုတ်၊ သင်၏ ကိုယ်ပိုင် ကိုယ်ရေးကိုယ်တာ အယူအဆများ မရှိသကဲ့သို့ သင်က၊ “ကျွန်ုပ် ထင်သည်”၊ “ကျွန်ုပ် တွေးသည်”၊ “ဤအရာ၊ ထိုအရာ လုပ်ဆောင်ရန် ကျွန်ုပ် စီစဉ်သည်” သို့မဟုတ် “ဤအရာ၊ ထိုအရာကို ကျွန်ုပ် လုပ်ဆောင်သင့်သည်”ဟူ၍ သင် မပြောပေ။ သင်သည် “ကျွန်ုပ်”နှင့် စသည့် ဤစဉ်းစားဆင်ခြင်မှုများ၊ လိုအင်ဆန္ဒများနှင့် ရည်မှန်းချက်များအားလုံး မရှိပေ။ သင်သည် ဘုရားသခင် ပြောသည့်အရာကို မြေဝယ်မကျ လက်ခံနိုင်ပြီး သူ၏ နှုတ်ကပတ်တော်များနှင့်အညီ လက်တွေ့လုပ်ဆောင်သည်။ ဤသည်မှာ ဘုရားသခင်၏ အမိန့်များကို နာခံခြင်းနှင့် သူ၏ လမ်းခရီးကို လိုက်လျှောက်ခြင်းဟု ဆိုလိုသည့်အရာ ဖြစ်သည်။ ဤနည်းဖြင့် သင့်ကို ဘုရားသခင် သန့်စင်ခြင်း ဖြစ်စဉ်သည် အဆုံးသတ်တစ်ခုသို့ ရောက်လာပြီဖြစ်သည်။ သင်၏ ဖောက်ပြန်ပျက်စီးခြင်းက သန့်စင်ခံရပြီးဖြစ်ကာ ဖန်ဆင်းခံတစ်ဦးအဖြစ် သင်၏ စစ်မှန်သော ကိုယ်ပိုင်လက္ခဏာကို ပြန်လည်ထိန်းသိမ်းပြီးဖြစ်သည်။ ဤသည်မှာ သင်၏ နေရာကို ရှာတွေ့ခြင်းနှင့် ထိုနေရာ၌ ခိုင်မာစွာ ရပ်တည်ခြင်းကို ဆိုလိုသည့်အရာ ဖြစ်သည်။ သင့်ကို နှောင့်ယှက်ရန် “ကျွန်ုပ်”ဖြင့်စသည့် ဤစဉ်းစားဆင်ခြင်ခြင်းများ၊ ဆုံးဖြတ်ချက်များနှင့် စိတ်ဆန္ဒများမရှိဘဲ၊ ကျိုးနွံနာခံခြင်းကို လက်တွေ့လုပ်ဆောင်ရန် သင့်အတွက် လွယ်ကူသည်။ လူအချို့က၊ “ဘုရားသခင်သည် ကျိုးနွံနာခံခြင်းကို အမြဲ တောင်းဆိုသော်လည်း၊ ယင်းက အဓိပ္ပာယ်မရှိပါ။ ကျွန်ုပ်သည် မိမိကိုယ်ကိုအတွက် ရပ်တည်ရမည် မဟုတ်လော။ ကျွန်ုပ်၏ မကျေမနပ်ဖြစ်ခြင်းသည် ကျိုးကြောင်းသင့်ပြီး လျောက်ပတ်သည် မဟုတ်လော”ဟု ပြောကြသည်။ ဤသည်မှာ ကျိုးနွံနာခံခြင်း ဖြစ်သလော။ ထိုသို့သော လူတစ်ဦးသည် ကျိုးနွံနာခံခြင်း သမ္မာတရားကို နားလည်သလော။ ၎င်းတို့သည် ကျိုးနွံနာခံခြင်း သမ္မာတရားကို နားမလည်ကြ၊ ကျိုးနွံနာခံခြင်း အဓိပ္ပာယ်၊ ၎င်းတို့၏ တာဝန်များနှင့် ဝတ္တရားများက မည်သည့်အရာဖြစ်သည်ကို မသိကြသကဲ့သို့ ၎င်းတို့၏ အလုပ်တာဝန် သို့မဟုတ် မည်သည့်နေရာတွင် ၎င်းတို့ ရပ်တည်သင့်သည်ကို မသိကြချေ။ တစ်ခါတစ်ရံ လူတို့ကို ဖော်ထုတ်သည့် ဘုရားသခင်၏ နှုတ်ကပတ်တော်များက အတော်လေး ပြင်းထန်သည်။ ယင်းတို့ကို လူတို့က နားထောင်သည့်အခါ၊ စိတ်သောကရောက်ပြီး၊ မသက်မသာခံစားကြသည်။ ၎င်းတို့၏ ဂုဏ်နှင့် သိက္ခာပင် ထိခိုက်ခံရလျက်၊ စိတ်ထဲတွင် နာကျင်မှုခံစားကြရသည်။ ၎င်းတို့က၊ “ဘုရားသခင်တွင် လူတို့အတွက် ချစ်ခြင်းမေတ္တာ၊ စာနာနားလည်မှု၊ အလျှော့ပေးမှု၊ သနားကရုဏာ၊ သည်းခံခြင်း သို့မဟုတ် ခွင့်လွှတ်ခြင်းမရှိပါ။ သူ မညှာတာလွန်းပါတကား”ဟု တွေးကြသည်။ လူအားလုံးက မိမိတို့၏ ဂုဏ်နှင့် သိက္ခာကို တန်ဖိုးထားကြပြီး၊ ဤအရာများ ထိခိုက်ခံရလျှင် လက်ခံရန် အလွန့်အလွန် ခက်ခဲသည်ဟု မြင်ကြသည်။ အကျိုးဆက်အနေဖြင့်၊ ၎င်းတို့ အလိုရှိလျှင်ပင် ကျိုးနွံနာခံနိုင်ခြင်း မရှိကြပေ။ ၎င်းတို့၏ စိတ်နှလုံးတွင် ၎င်းတို့က၊ “ဘုရားသခင်က လူတို့အပေါ် အလွန်တောင်းဆိုသည်။ သူသည် ငါ့ကို အရူးလုပ်ပြီး ညှဉ်းဆဲနေသည် မဟုတ်လော”ဟု တွေးထင်ကြသည်။ သို့ရာတွင် ဤသည်မှာ မမှန်ပေ။ သူ့ကို လူတို့ ကျိုးနွံနာခံရန် ဘုရားသခင်၏ တောင်းဆိုချက်သည် တစ်ဦးတလေအား သူ့ကို ကျိုးနွံနာခံရန် ဖိအားပေးဖို့ မဆိုထားနှင့်၊ သူ့ကို ကျိုးနွံနာခံရန် မည်သူ့ကိုမျှ အတင်းအကျပ်ခိုင်းရန်ပင် မရည်ရွယ်ပေ။ ဘုရားသခင်၏ တောင်းဆိုချက်များက သတ်မှတ်ချက်များနှင့် လာသည်။ ထိုတောင်းဆိုချက်မှာ အသိစိတ်နှင့် ဆင်ခြင်တုံတရားရှိကာ သမ္မာတရားကို လက်ခံနိုင်သူများနှင့် သမ္မာတရားကို နားလည်နိုင်သူများအား ရည်ညွှန်းထားခြင်းဖြစ်သည်။ သင့်အနေဖြင့် သမ္မာတရားကို နားမလည်သကဲ့သို့ အသိစိတ်နှင့် ဆင်ခြင်တုံတရားမရှိလျှင်၊ ဘုရားသခင်၏ သတ်မှတ်ချက်များကို မဖြည့်ဆည်းနိုင်ပေ။ အမှန်တွင် ဘုရားသခင် ဖော်ပြသည့် သမ္မာတရားအားလုံးသည် သမ္မာတရားကို ချစ်ပြီး လက်ခံနိုင်သူတို့အတွက် ထုတ်ပြန်ထားခြင်း ဖြစ်သည်။ သမ္မာတရားကို မချစ်သကဲ့သို့ လက်မခံသောသူတို့ထံမှ မည်သည့်အရာကိုမျှ ဘုရားသခင် မတောင်းဆိုပေ။ သမ္မာတရားကို လက်တွ့မလုပ်ဆောင်သည့် တစ်ဦးတလေက ချက်ချင်း ဆုံးမပဲ့ပြင်ခြင်း သို့မဟုတ် အပြစ်ဒဏ်ပေးခြင်း ရရှိသည်ကို သင် မြင်သလော။ ဤအရာသည် လူတစ်ဦးတစ်ယောက်ထံတွင်မျှ မဖြစ်ပေ။ ဘုရားသခင်၏ ရည်ရွယ်ချက်မှာ လူအားလုံးက သမ္မာတရားကို လက်ခံ၊ နားလည်ကာ လက်လှမ်းမီနိုင်ရန် ဖြစ်သည်။ ဤသည်မှာ သူ၏ ရည်ရွယ်ချက်ဖြစ်သည်။ လူတစ်ဦးက ဘုရားသခင်၏ နှုတ်ကပတ်တော်များကို မြင်ပြီး၊ ၎င်းက ဤနှုတ်ကပတ်တော်များ ပြောသည့်အရာကို လုပ်ဆောင်ဖို့ ဘုရားသခင် တောင်းဆိုသည်ဟု ခံစားလျှင်၊ ၎င်းက အထင်လွဲပြီဖြစ်သည်။ ထို့ကြောင့် ဘုရားနှုတ်ကပတ်တော်များကို သင် ဖတ်ရှုသည့်အခါ၊ သူ၏ ရည်ရွယ်ချက်များ၊ ပစ်မှတ်ထားသည့် ပရိသတ်နှင့် အဓိပ္ပာယ်ကို သင် နားလည်ရမည်။ သူ၏ နှုတ်ကပတ်တော်များနှင့်ပတ်သက်၍ အမှုမဲ့အမှတ်မဲ့ ရှင်းလင်းဝေဖန်မှု မပြုလုပ်နှင့်။ သင်သည် သင်၏ကိုယ်ပိုင် ဆင်ခြေများအမြဲပေးပြီး ကျိုးနွံနာခံမှု ကင်းမဲ့လျှင်၊ သင့်အပေါ် ဘုရားသခင် အဘယ်သို့ တွေးထင်မည်နည်း။ သင် သန့်စင်ခြင်း မခံရသေးကြောင်း၊ ဘုရားသခင်ကို ကျိုးနွံနာခံသည့် လူတစ်ဦး မဟုတ်ကြောင်းနှင့် ဘုရားသခင်ကို ကျိုးနွံနာခံခြင်းနှင့်ဆိုင်သည့် လက်တွေ့ကျမှုကို သင် အသက်မရှင်သေးကြောင်း ဘုရားသခင်က ပြောလိမ့်မည်။ ထို့ကြောင့်၊ သင် ပြောဆိုသည့် ကျိုးနွံနာခံခြင်းသည် အယူဝါဒတစ်ခုသာဖြစ်ပြီး၊ အစဉ်ထာဝရ သဘောတရားတစ်ခုသာ ဖြစ်လိမ့်မည်။ လူတို့သည် ဘုရားသခင်က စီစဉ်သည့် အမျိုးမျိုးသော လူများ၊ အဖြစ်အပျက်များ၊ အမှုအရာများနှင့် ပတ်ဝန်းကျင်တို့ကို ကြုံရသည့်အခါ၊ ၎င်းတို့စိတ်နှလုံးတွင် ဘုရားနှင့်ပတ်သက်သည့် အယူအဆများ မကြာခဏရှိကြပါက၊ ၎င်းတို့သည် ဘုရားသခင်ကို အကြောင်းပြပြောဆိုပြီး ပြန်တိုက်ခိုက်ဖို့ အလားအလာရှိသည်။ ဤလူစားမျိုးသည် ကျိုးနွံနာခံခြင်းနှင့်ဆိုင်သည့် သမ္မာတရား လက်တွေ့ကျမှု မပိုင်ဆိုင်ကြသကဲ့သို့၊ ဤလူတို့အတွက် ကျိုးနွံနာခံခြင်းသည် အယူဝါဒနှင့် အနှစ်မဲ့သော စကားများသာ ဖြစ်သည်။ မည်သည့် ဆက်စပ်အခြေအနေတွင် ဤကဲ့သို့သော လူများသည် အတိုင်းအတာ အနည်းငယ်ထိ ကျိုးနွံနာခံနိုင်ကြသနည်း။ ၎င်းတို့သည် မိမိတို့၏ အယူအဆများနှင့်ကိုက်ညီသည့် သင့်တော်သော ပတ်ဝန်းကျင်တစ်ခုတွင် ရှိရမည်ဖြစ်သည်။ ၎င်းတို့ စိတ်ချမ်းသာရမည်လည်း ဖြစ်သည်။ ထိုအခါတွင်မျှ ကျိုးနွံနာခံခြင်း သမ္မာတရားကို ၎င်းတို့ လက်တွေ့လုပ်ဆောင်နိုင်ကြသည်။ ထို့ကြောင့် ဤသည်မှာ ၎င်းတို့အနေဖြင့် ဘုရားသခင်ကို ကျိုးနွံနာခံခြင်းနှင့်ဆိုင်သည့် လက်တွေ့ကျမှုကို ပိုင်ဆိုင်ကြသည်ဟု ဆိုလိုသလော။ မဆိုလိုပေ။ အဘယ့်ကြောင့်ဆိုသော် ၎င်းတို့၏ ကျိုးနွံနာခံခြင်းက အလွန် အကန့်အသတ်ရှိသောကြောင့် ဖြစ်သည်။ ၎င်းတို့အတွက် ကျိုးနွံနာခံတတ်ရန်အလို့ငှာ ထိုအရာသည် ၎င်းတို့၏ အယူအဆများနှင့် ကိုက်ညီရမည်ဖြစ်ပြီး၊ ၎င်းတို့၏ သတ်မှတ်ချက်များကို ပြည့်မီရမည်ဖြစ်သည်။ ဤကဲ့သို့သော အခြေအနေများက အခါကျဲပြီး အလာနည်း၏။ သို့ဆိုလျှင် စစ်မှန်သည့် ကျိုးနွံနာခံခြင်းသည် မည်သည့်အရာနှင့်တူသနည်း။ ထိုအရာက သမ္မာတရားဖြစ်သည်ကို လူတစ်ဦးက အသိအမှတ်ပြုသရွေ့၊ သူသည် ဆင်ခြေများ သို့မဟုတ် သတ်မှတ်ချက်များကို ရှေ့တန်းမတင်ဘဲ ထိုအရာက လူ၏ အကြိုက်များ သို့မဟုတ် အယူအဆများနှင့် ကိုက်သည်ဖြစ်စေ၊ မကိုက်သည်ဖြစ်စေ ကျိုးနွံနာခံနိုင်သည်။ သူသည် သေရမည်ဆိုလျှင်ပင် ပြန်ငြင်းမည်မဟုတ်ဘဲ ကျိုးနွံနာခံလိမ့်မည် ဖြစ်သည်။ ဤသည်ကို သေသည်ထိ ကျိုးနွံနာခံခြင်းဟု ခေါ်သည်။ ဤသည်မှာ ပေတရု၏ ကျိုးနွံနာခံခြင်း ဖြစ်သည်။ လူမည်မျှသည် ဤကဲ့သို့သော ကျိုးနွံနာခံခြင်းမျိုး ရှိကြသနည်း။ တစ်ဦးမျှမရှိလုနီးပါး ဖြစ်သည်။ ဘုရားသခင်ကို ယုံကြည်သူတို့သည် သမ္မာတရားက မည်သည့်အရာဖြစ်သည်ကို နားလည်ရမည်။ သမ္မာတရားသည် နေရာအားလုံးနှင့် ခေတ်ကာလအားလုံးတွင် လူတို့ လိုက်လျှောက်သင့်သည့် လမ်းခရီးဖြစ်သည်။ ယင်းသည် လူအားလုံး လိုက်လျှောက်သင့်သည့် လမ်းခရီးဖြစ်သည်။ လူတို့က လိုက်လျှောက်နိုင်သည်ဖြစ်စေ လိုလားသည်ဖြစ်စေ၊ သမ္မာတရားမှာ လူသားမျိုးနွယ်အားလုံး၊ ဖောက်ပြန်ပျက်စီးသော လူသားမျိုးနွယ်နှင့် စာတန်က ဖောက်ပြန်ပျက်စီးစေခြင်း မခံရသည့် လူသားမျိုးနွယ်က ထပ်တူထပ်မျှ လိုက်လျှောက်သင့်သည့်၊ ယနေ့ လူသားမျိုးနွယ်နှင့် အနာဂတ်လူသားမျိုးနွယ်တို့ ထပ်တူထပ်မျှ လိုက်လျှောက်သင့်သည့် လမ်းခရီးဖြစ်သည်။ ပြီးလျှင် အဘယ်ကြောင့် ထိုသို့ဖြစ်ရသနည်း။ အဘယ်ကြောင့်ဆိုသော် သမ္မာတရားသည် မှန်သည့်လမ်းခရီးဖြစ်ပြီး အပြုသဘောဆောင်သောအရာများအားလုံး၏ လက်တွေ့ကျမှုဖြစ်ကာ ဖန်ဆင်းခံများအားလုံး လိုက်လျှောက်သင့်သည့် အပြုသဘောဆောင်သော အရာများ၏ လက်တွေ့ကျမှု ဖြစ်သောကြောင့် ဖြစ်သည်။ သမ္မာတရားက သင်၏ အတွေးများ၊ အမြင်များ သို့မဟုတ် စိတ်သဘောထားဖြင့် ကွဲလွဲဆန့်ကျင်သည့်အခါ မည်သည့်အရာကို သင် လုပ်ဆောင်သင့်သနည်း။ ကျိုးနွံနာခံရန် သင် ရွေးချယ်သင့်သည်။ ဤသည်မှာ ကျိုးနွံနာခံခြင်း သမ္မာတရား ဖြစ်သည်။ ကျိုးနွံနာခံခြင်း သမ္မာတရားဟူသည်မှာ အဘယ်နည်း။ ဘုရားသခင်ထံ ဤကျိုးနွံနာခံခြင်း သမ္မာတရား၏ လက်တွေ့ကျသော ဘက်ခြမ်းမှာ အဘယ်နည်း။ သင့်အနေဖြင့် သမ္မာတရားကို လက်တွေ့လုပ်ဆောင်လိုသည်ဖြစ်စေ၊ မလုပ်ဆောင်လိုသည်ဖြစ်စေ၊ ထိုအရာက မှန်သည်ဟု သင် ထင်သည်ဖြစ်စေ၊ မှားသည်ဟု ထင်သည်ဖြစ်စေ၊ သင်၏ ရှုထောင့်က မည်သည့်အရာ ဖြစ်နိုင်သည်ဖြစ်စေ၊ ဘုရားနှုတ်ကပတ်တော်များနှင့် ဘုရားသခင်၏ သတ်မှတ်ချက်များကို သင် မည်သို့ ရှုမြင်သည်ဖြစ်စေ၊ ယင်းတို့ကို သင် လက်ခံသင့်သည်၊ ကျိုးနွံနာခံပြီး၊ လက်တွေ့လုပ်ဆောင်သင့်သည်။ ဤသည်မှာ ကျိုးနွံနာခံခြင်းဖြစ်ပြီး ကျိုးနွံနာခံခြင်းနှင့်ဆိုင်သည့် သမ္မာတရားလည်း ဖြစ်သည်။ လူတို့သည် ၎င်းတို့တွင် ဖောက်ပြန်ပျက်စီးသော စိတ်သဘောထားများရှိကြသောကြောင့် သမ္မာတရားကို လက်တွေ့မလုပ်ဆောင်နိုင်ကြပေ။ တစ်စုံတစ်ဦးက သမ္မာတရားကို လက်တွေ့မလုပ်ဆောင်နိုင်လျှင်၊ ထိုအရာက သမ္မာတရား မဟုတ်ဘဲ ယင်းသည် အနှစ်မဲ့သော စကားများဖြစ်လာသည်ဟူ၍ မဟုတ်ပေ။ ဤယုံကြည်မှုသည် မှားယွင်းပြီး အဓိပ္ပာယ်မရှိပေ။ အချို့က၊ “လူတစ်ဦးသည် သမ္မာတရားကို လက်တွေ့မလုပ်ဆောင်နိုင်လျှင်၊ ထိုအရာက သမ္မာတရား ဖြစ်ကောင်းဖြစ်နိုင်သော်လည်း၊ ထိုအရာကို အဘယ်သူကမျှ လက်တွေ့လုပ်နိုင်စွမ်းမရှိလျှင်၊ ထိုအရာသည် သမ္မာတရား မဟုတ်ဟူ၍ ဖြစ်သည် မဟုတ်လော”ဟု တွေးဆကြသည်။ ဤမေးခွန်းသည် မှန်သလော။ (မမှန်ပါ။) ဤသည်မှာ ကျိုးကြောင်းဆီလျော်သော တွေးခေါ်မျှော်မြင်မှု ဖြစ်သည်။ အမှန်တရားမှာ သမ္မာတရား၏ အနှစ်သာရက မည်သည့်အခါတွင်မျှ မပြောင်းလဲခြင်း ဖြစ်သည်။ ထိုသမ္မာတရားကို သင် လက်တွေ့မလုပ်ဆောင်နိုင်လျှင်ပင်၊ သမ္မာတရားက လူတို့ လိုက်လျှောက်သင့်သည့် လမ်းခရီးနှင့် မှန်ကန်သည့် လမ်းကြောင်းဖြစ်နေဆဲ ဖြစ်သည်။ လူတစ်ဦးက မည်မျှကြိုးစားသည်ဖြစ်စေ သမ္မာတရားကို လက်တွေ့မလုပ်ဆောင်နိုင်လျှင်၊ ထိုသမ္မာတရားက မှန်ကန်ခြင်းမရှိဟု သင် ဆို၍ မရပေ။ လူတစ်သောင်းက လက်တွေ့မလုပ်နိုင်လျှင်ပင် သမ္မာတရားက မှန်ကန်ဆဲဖြစ်သည်။ မည်သူကမျှ လက်တွေ့မလုပ်နိုင်လျှင်ပင် သမ္မာတရားက မှန်ကန်ဆဲဖြစ်သည်။ သမ္မာတရားက မည်သည့်အခါတွင်မျှ မပြောင်းလဲပေ။ သမ္မာတရားကသာ လူသားမျိုးနွယ်အား ပုံမှန်အတိုင်း အသက်ရှင်နိုင်စေသည်၊ ဘုရားသခင်ရှေ့တွင် အသက်ရှင်နိုင်စေပြီး၊ သူ၏ အသိအမှတ်ပြုခြင်းနှင့် ကောင်းချီးကို ရရှိနိုင်စေသည်။ ဤသည်မှာ သမ္မာတရားဖြစ်ပြီး၊ သမ္မာတရားကို လက်ခံခြင်းအားဖြင့် စွမ်းဆောင်ရရှိနိုင်သည့် ရလဒ်ဖြစ်သည်။ သမ္မာတရားသည် မည်သည့်နေရာမှ လာသနည်း။ သမ္မာတရားက ဘုရားသခင်ထံမှ လာပေသည်။ ထိုသမ္မာတရားကို သူက ဖော်ပြခြင်းဖြစ်သည်။ သူ၏ နှုတ်ကပတ်တော်များက သမ္မာတရား ဖြစ်သည်။ သမ္မာတရားသည် ဘုရားသခင်၏ နှုတ်ကပတ်တော်ဖြစ်ပြီး ဘုရားသခင်၏ နှုတ်ကပတ်တော်သည် သမ္မာတရား ဖြစ်သည်။ လူတို့သည် သမ္မာတရားကို အသိအမှတ်ပြုကာ ထိုသမ္မာတရားကို လက်ခံလိုလျှင်၊ ကျိုးနွံနာခံတတ်ရန် မည်သည့်ပြဿနာများကို လူတို့ ဖြေရှင်းရမည်နည်း။ ၎င်းတို့သည် ၎င်းတို့၏ ဖောက်ပြန်ပျက်စီးသော စိတ်သဘောထားများအပြင်၊ ၎င်းတို့၏ ကိုယ်ရေးကိုယ်တာ ရွေးချယ်မှုများ၊ စဉ်းစားဆင်ခြင်မှုများ၊ အစီအစဉ်များ၊ စသည်တို့ကို ဖြေရှင်းရမည်။ ဤအရာများကို သင် သတိပြုမိပြီးနောက်တွင် ချက်ချင်း ဘေးဖယ်ထား၍ရနိုင်သလော။ (မရနိုင်ပေ။) လူတို့က ဤအရာများကို တဖြည်းဖြည်း ဖြေရှင်းပြီး သန့်စင်ခံရကြသည်မှာ ဘုရားသခင်က ပတ်ဝန်းကျင်များကို စီစဉ်ပေးရန်၊ လူများ၊ အဖြစ်အပျက်များနှင့် အမှုအရာများကို ဖြစ်ပေါ်စေရန်အတွက် ဆုတောင်းခြင်းမှတစ်ဆင့်၊ သူ၏ ရိုက်နှက်ဆုံးမခြင်းနှင့် ဆုံးမပဲ့ပြင်ခြင်း၊ သူ၏ ပြစ်တင်ဆုံးမခြင်းနှင့် တရားစီရင်ခြင်း၊ သူ၏ စမ်းသပ်မှုများနှင့် စစ်ဆေးမှုတို့အတွက် ဆုတောင်းခြင်းမှတစ်ဆင့် ကျိုးနွံနာခံခြင်း သမ္မာတရားကို ရှာဖွေခြင်း သို့မဟုတ် လက်တွေ့လုပ်ဆောင်ခြင်း ဖြစ်စဉ်တွင် ဖြစ်ပြီး၊ အကြင်သူက အကြွင်းမဲ့ ကျိုးနွံနာခံခြင်းကို စွမ်းဆောင်ရရှိနိုင်သည်မှာ သန့်စင်ခံရသည့်အခါတွင်သာ ဖြစ်သည်။ ဤပြဿနာများကို ဖြေရှင်းဖို့ ကြိုးစားခြင်း ဖြစ်စဉ်တွင် သင် ကျိုးနွံနာခံခြင်းရှိလျှင်၊ ထိုအရာများကို ဖြေရှင်း၍ ရနိုင်ပေသည်။ သင် ကျိုးနွံနာခံခြင်းမရှိလျှင်၊ ထိုအရာများက မည်သည့်အခါတွင်မျှ ပြေလည်သွားလိမ့်မည် မဟုတ်။ နောက်ဆုံးတွင်၊ ဤပြဿနာအားလုံး ပြေလည်သွားပြီး၊ သင် သန့်စင်ခြင်းခံရသည့်အခါတွင်သာ၊ သင်သည် ဘုရားသခင်ကို ကျိုးနွံနာခံတတ်သော တစ်စုံတစ်ဦး ဖြစ်လိမ့်မည်။ ဤအရာကို အဘယ်ကြောင့် ငါ ပြောသနည်း။ ဤတွင် ဆက်နွှယ်မှုကို သင်တို့ နားလည်ကြသလော။ သင့်ထံတွင် ကျိုးနွံနာခံခြင်းရှိသည့်အခါ၊ ဤသမ္မာတရား သွင်ပြင်လက္ခဏာက သင့်အထဲတွင် အလုပ်လုပ်နိုင်ပြီး သင်၏ လက်တွေ့ကျမှု ဖြစ်လာနိုင်ပေသည်။ ဤလက်တွေ့ကျမှု သွင်ပြင်လက္ခဏာကို သင် အသက်ရှင်နေထိုင်သည့်အခါ၊ ဤကဏ္ဍရှိ သင်၏ ပြဿနာများက ပြေလည်သွားလိမ့်မည်။ ဤသို့ ဖြစ်ရမည်ဖြစ်သည်။

လူတစ်ဦးတွင် ဝိညာဉ်ရေးရာ နားလည်သဘောပေါက်မှု ရှိမရှိဟူသည်ကို တိုင်းတာရန် မှန်ကန်တိကျသော နည်းလမ်းမှာ အဘယ်နည်း။ ဘုရားနှုတ်ကပတ်တော်များ၏ တိုက်ရိုက် အဓိပ္ပာယ်ကို ထိုသူ နားလည်နိုင်ခြင်း ရှိမရှိဟူသည်ကို ကြည့်ခြင်းမျှသည် လုံလောက်သလော။ (မလုံလောက်ပါ။) ဝိညာဉ်ရေးရာ နားလည်သဘောပေါက်မှု ရှိခြင်းသည် မည်သည့်အရာကို အတိအကျ ဆိုလိုသနည်း။ ယင်းမှာ လူတစ်ဦးက ဘုရားနှုတ်ကပတ်တော်များကို နားလည်နိုင်သည့်အချိန်တွင်ဖြစ်သည်၊ ပြီးလျှင် တရားဒေသနာများနှင့် မိတ်သဟာယတို့ကို အပြည့်အဝ နားလည်နိုင်ပြီး သဘောပေါက်နားလည်နိုင်ကာ တရားဒေသနာများနှင့် မိတ်သဟာယတို့၏ စကားများက ရှင်းရှင်းလင်းလင်း ဆက်စပ်မှုမရှိလျှင်ပင် နောက်ထပ်ရှင်းပြစရာမလိုဘဲ ယင်းတို့ကို နားလည်နိုင်သည့်အချိန်တွင်လည်းဖြစ်သည်။ တရားဒေသနာများနှင့် မိတ်သဟာယ၏ အဓိပ္ပာယ်ကို အပြည့်အဝ ထုတ်ပြောခြင်းမရှိလျှင်ပင်၊ ဤလူက နားလည်နိုင်ဆဲဖြစ်ကာ မည်သည့်အရာ ဆိုလိုသည်ကို သိနိုင်ဆဲဖြစ်သည်။ ဤလူစားမျိုးသည် ဝိညာဉ်ရေးရာ နားလည်သဘောပေါက်မှုရှိသောသူတစ်ဦး ဖြစ်သည်။ ဘုရားနှုတ်ကပတ်တော်များကို နားမလည်နိုင်သူများ သို့မဟုတ် တရားဒေသနာများနှင့် မိတ်သဟာယကို နားမလည်နိုင်သူများ၊ ဤအရာများကို အမြဲ အထင်လွဲနေပြီး၊ ဤအရာများအတွင်းတွင် မကိုက်ညီမှုများရှိသည်ဟု ခံစားနေသောသူများဖြစ်သော ဤလူစားမျိုးသည် ဝိညာဉ်ရေးရာ နားလည်သဘောပေါက်မှု မရှိကြချေ။ ဝိညာဉ်ရေးရာ နားလည်သဘောပေါက်မှု ကင်းမဲ့သောလူတို့အတွက်၊ ၎င်းတို့နှင့်အတူ သမ္မာတရားကို သင် ရှင်းလင်းစွာ မိတ်သဟာယပြုလျှင်ပင် ထိုသမ္မာတရားကို အပြည့်အဝ နားလည်နိုင်ကြလိမ့်မည် မဟုတ်။ ၎င်းတို့အတွက် အယူဝါဒများကို နားလည်နိုင်ခြင်းနှင့် စည်းမျဉ်းစည်းကမ်းများ ပုံသေစောင့်ထိန်းနိုင်ခြင်းက အတော်လေး လုံလောက်ပြီဖြစ်သည်။ ထို့ကြောင့်၊ ဝိညာဉ်ရေးရာ နားလည်သဘောပေါက်မှု မရှိသောလူတစ်ဦးအတွက် သမ္မာတရားကို နားလည်ရန် မလွယ်ကူပေ။ သို့ရာတွင်၊ ဝိညာဉ်ရေးရာ နားလည်သဘောပေါက်မှုရှိသော တစ်စုံတစ်ဦးက သမ္မာတရားကို မလိုက်စား၊ သို့မဟုတ် နားမလည်လျှင်၊ ၎င်းသည် အခြေခံအားဖြင့် ဝိညာဉ်ရေးရာ နားလည်သဘောပေါက်မှု ကင်းမဲ့သော တစ်စုံတစ်ဦးနှင့် ဘာမျှ ကွာခြားခြင်း မရှိပေ။ ထို့ကြောင့်၊ သမ္မာတရားကို နားလည်ရန် အရေးအကြီးဆုံး ဖြစ်သည်။ လူတစ်ဦးတွင် ဝိညာဉ်ရေးရာ နားလည်သဘောပေါက်မှု ရှိသည်ဖြစ်စေ၊ မရှိသည်ဖြစ်စေ၊ ထိုသူသည် သမ္မာတရားကို လက်လှမ်းမီသင့်သည်။ သမ္မာတရားကို လုံးလုံးလျားလျား နားလည်လေ၊ အကျိုးရှိလေ ဖြစ်လိမ့်မည်။ ကိစ္စရပ်များကို ရှင်းလင်းစွာ ၎င်းတို့ မြင်နိုင်လိမ့်မည်သာမက၊ မှန်ကန်သည့် လမ်းကြောင်းကိုလည်း ရွေးချယ်နိုင်ကြလိမ့်မည်။ ထို့ကြောင့်၊ တစ်နည်းအားဖြင့်၊ လူတစ်ဦးသည် သမ္မာတရားကို လိုက်စားလိုလျှင်၊ ဘုရားနှုတ်ကပတ်တော်များကို ဆာငတ်ရမည်၊ သူ၏ နှုတ်ကပတ်တော်များကို အားထုတ်ရမည်ဖြစ်ပြီး၊ ယင်းတို့ကို စဉ်းစားချင့်ချိန်ရန်၊ ဆုတောင်းဖတ်ရှုရန်၊ ယင်းတို့နှင့်ပတ်သက်၍ မိတ်သဟာယပြုရန်နှင့် ထိုအရာများအတွင်းတွင် ရှာဖွေရန် သင်ယူရမည်။ ပြီးလျှင် အရေးအကြီးဆုံးသော အရာမှာ အဘယ်နည်း။ ၎င်းတို့သည် ဘုရားနှုတ်ကပတ်တော်များကို လက်တွေ့လုပ်ဆောင်ကာ တွေ့ကြုံရမည်ဖြစ်သည်။ ဤနှုတ်ကပတ်တော်များကို သင် လက်တွေ့လုပ်ဆောင်ကာ တွေ့ကြုံပြီးဖြစ်သည့်အပြင် ဘုရားနှုတ်ကပတ်တော်များက သင်၏ လက်တွေ့ကျမှု ဖြစ်လာပြီးသည့်အခါတွင်သာ၊ သူ၏ နှုတ်ကပတ်တော်များက မည်သည့်အရာကို ရည်ညွှန်းနေပြီး၊ ထိုနှုတ်ကပတ်တော်များတွင် မည်သည့်သမ္မာတရားများ အတိအကျ ပါရှိသည်ကို သင် အမှန်တကယ် နားလည်နိုင်သည်။ သမ္မာတရားကို သင်နားလည်ပြီးသည့်အခါတွင်သာ၊ ဝိညာဉ်ရေးရာ နားလည်သဘောပေါက်မှု အလိုအလျောက် ရှိလိမ့်မည်။ သို့ရာတွင် ဝိညာဉ်ရေးရာ နားလည်သဘောပေါက်မှုကို ရရှိခြင်းသည် ရည်မှန်းချက် မဟုတ်ပေ။ မည်သည့်အရာမှာ ရည်မှန်းချက်ဖြစ်သနည်း။ ရည်မှန်းချက်မှာ သမ္မာတရားကို လက်တွေ့လုပ်ဆောင်ကာ သမ္မာတရားကို နားလည်ရန် ဖြစ်သည်။ တစ်စုံတစ်ဦးသည် ဘုရားနှုတ်ကပတ်တော်များကို လက်တွေ့လုပ်ဆောင်သည့်အခါ ရှေ့ဆက်လမ်းတစ်ခုရှိပြီး၊ မည်သို့ ရှေ့ဆက်လုပ်ဆောင်ရမည်ကို သိရှိကာ၊ သူ၏ နှုတ်ကပတ်တော်များကို လက်တွေ့လုပ်ဆောင်ပြီးနောက်၊ ထိုနှုတ်ကပတ်တော်များရှိ သမ္မာတရားများကို နားလည်နိုင်ပြီး ထိုအရာအတွင်းရှိ ဆက်နွှယ်မှုများကိုလည်းကောင်း၊ လက်တွေ့လုပ်ဆောင်မှုနှင့်ဆိုင်သော စည်းမျဉ်းများကိုလည်းကောင်း သိရှိလျှင်၊ ဤသည်မှာ သမ္မာတရားကို သိနားလည်ခြင်း အကျိုးတရားများ စွမ်းဆောင်ရရှိပြီးဖြစ်သည့် ဝိညာဉ်ရေးရာ နားလည်သဘောပေါက်မှုရှိသောသူတစ်ဦး ဖြစ်ပေသည်။ အကြင်သူက ဝိညာဉ်ရေးရာ နားလည်သဘောပေါက်မှု ရှိမရှိဟူသည်မှာ ထိုသူ့အနေဖြင့် သမ္မာတရားကို နားလည်ကာ ရရှိခြင်း ရှိမရှိဟူသည်နှင့် ဆက်စပ်ပေသည်။ ထို့ကြောင့် ဘုရားသခင်ကို ယုံကြည်သူများအတွက် မိမိတွင် ဝိညာဉ်ရေးရာ နားလည်သဘောပေါက်မှု ရှိမရှိဟူသည်မှာ အလွန်အရေးပါသည့် ကိစ္စတစ်ခု၊ မိမိ၏ သမ္မာတရား နားလည်နိုင်စွမ်းကို တိုက်ရိုက် ထိခိုက်သည့်အရာတစ်ခု ဖြစ်သည်။ ဥပမာအနေဖြင့်၊ ဘုရားသခင်က လူ၏ ကျိုးနွံနာခံခြင်းကို တောင်းဆိုသော်လည်း၊ မည်သည့်အရာ အတိအကျကို လူက ကျိုးနွံနာခံရမည်နည်း။ ကျိုးနွံနာခံခြင်းခံရသည့်အရာမှာ မည်သည့်အရာနည်း။ (သမ္မာတရားနှင့် ဘုရားသခင်၏ နှုတ်ကပတ်တော်ဖြစ်သည်။) သမ္မာတရားနှင့် ဘုရားသခင်၏ နှုတ်ကပတ်တော်ကို ကျိုးနွံနာခံလော့။ သာ၍သေချာသော ဝေါဟာရဖြင့် ပြောရလျှင်၊ ဤသည်မှာ လူတို့အတွက် ဘုရားသခင်၏ သတ်မှတ်ချက်များကို ကျိုးနွံနာခံရန်၊ လူတို့အတွက် ဘုရားသခင် စီစဉ်သည့် လက်တွေ့ဘဝ ပတ်ဝန်းကျင်များ၊ လူများ၊ အဖြစ်အပျက်များနှင့် အမှုအရာများကို ကျိုးနွံနာခံရန်နှင့် ၎င်းတို့၏ အမျိုးမျိုးသော တာဝန်များတွင် လူတို့အပေါ် ဘုရားသခင်၏ သတ်မှတ်ချက်များကို ကျိုးနွံနာခံရန် ဆိုလိုသည်။ နောက်ထပ် ပြောကြဦးစို့။ ကျိုးနွံနာခံမှုနှင့်ဆိုင်သည့် လက်တွေ့ကျမှုထဲတွင် အခြား မည်သည့်အရာ ပါရှိသနည်း။ (အထက်၏ အလုပ်အစီအစဉ်များကို ကျိုးနွံနာခံခြင်းဖြစ်သည်။) ယင်းမှာ ထိုအရာ၏ တစ်စိတ်တစ်ပိုင်း ဖြစ်သည်။ အခြားမည်သည့်အရာ ရှိသေးသနည်း။ (ကျွန်ုပ်တို့အတွက် ဘုရားအိမ်တော်က စီစဉ်သည့် တာဝန်တိုင်းကို ကျိုးနွံနာခံခြင်း ဖြစ်သည်။) တာဝန်များသည် ဘုရားသခင်ကို ယုံကြည်သူများအတွက် အလွန်အရေးပါသော ကိစ္စတစ်ခုဖြစ်ပြီး မိမိတာဝန်ကို ကောင်းစွာ ထမ်းဆောင်နိုင်ခြင်း ရှိမရှိက သမ္မာတရား လက်တွေ့ကျမှုကို ၎င်းတို့ ပိုင်ဆိုင်ခြင်း ရှိမရှိဟူသည့်အရာနှင့် ဆက်စပ်ပေသည်။ ထိုအတွက် နောက်ထပ် အပိုင်းတစ်ခု ရှိသေးသည်။ လူတို့အပေါ် ဘုရားသခင် တောင်းဆိုသည့် အပြုအမူ စံနှုန်းဖြစ်သည်။ ဤသည်မှာလည်း အလွန်အရေးကြီး၏။ အကြင်သူ၏ ကျင့်ကြံပြုမူခြင်းတွင် မည်သည့်အရာများ ပါဝင်သနည်း။ အကြင်သူက မိမိ၏ ညီအစ်ကို မောင်နှမများကို ဆက်ဆံပုံ၊ ကြွယ်ဝချမ်းသာမှုကို သဘောထားပြုမူပုံနှင့် သူ၏ ရှေ့ရေး၊ အိမ်ထောင်ရေး၊ ချစ်ခင်မှုများနှင့် ဇာတိပကတိ ပျော်ရွှင်မှုတို့အား သဘောထားပြုမူပုံတို့ ပါဝင်သည်။ ဤအမျိုးမျိုးသော ကိစ္စရပ်များတွင် သမ္မာတရားကို ရှာဖွေခြင်း၊ ဘုရားသခင်၏ တောင်းဆိုချက်များအတိုင်း ဆောင်ရွက်ခြင်း၊ သမ္မာတရား၏ စည်းမျဉ်းများအတိုင်း အမှုအရာများကို လုပ်ဆောင်ခြင်းနှင့် မိမိ လက်တွေ့လုပ်ဆောင်ပြီး အသက်ရှင်နေထိုင်သည့်ပုံတွင် သမ္မာတရား စည်းမျဉ်းများကို လိုက်နာစောင့်ထိန်းခြင်းတို့ဖြစ်သည့် ဤအရာအားလုံးက ကျိုးနွံနာခံခြင်း ဖြစ်သည်။ ဤအရာအားလုံးက ကျိုးနွံနာခံခြင်းနှင့်ဆိုင်သည့် လက်တွေ့ကျမှု ဖြစ်သည်။ ဥပမာအနေဖြင့်၊ လူအချို့သည် မိမိ၏ ညီအစ်ကို မောင်နှမများအား ဆက်ဆံပုံသည် ကျိုးနွံနာခံခြင်း သမ္မာတရားနှင့် ဆက်စပ်မှုမရှိဟု ယုံကြည်ကြသည်။ ဤအမြင်သည် မှန်သလော။ ထိုအရာသည် မိမိ ပြုမူနေထိုင်ပုံနှင့် ဆက်စပ်ပေသည်။ သင် မနှစ်သက်သည့် ညီအစ်ကိုတစ်ဦး သို့မဟုတ် ညီအစ်မတစ်ဦးကို အမြဲ အနိုင်ကျင့်ရန်၊ ၎င်းတို့ကို အမြဲ ကြမ်းကြမ်းတမ်းတမ်း ပြောဆိုရန်သည် လူသားအပြုအမူ စည်းမျဉ်းဖြစ်သလော။ (မဟုတ်ပါ။) ဘုရားသခင်သည် လူတို့အား အခြားသူတို့ကို ဆက်ဆံရန် မည်သို့ တောင်းဆိုသနည်း။ (လူတို့ကို ကျွန်ုပ်တို့ မျှမျှတတ ဆက်ဆံရန် ဘုရားသခင် တောင်းဆိုပါသည်။) မျှတခြင်းဟူသည်မှာ မည်သည့်အရာကို ဆိုလိုသနည်း။ လူတို့ကို ၎င်းတို့၏ အသွင်အပြင်၊ ကိုယ်ပိုင်လက္ခဏာ၊ အဆင့်အတန်း၊ ၎င်းတို့ အသိပညာရှိမရှိ သို့မဟုတ် မိမိ၏ ကိုယ်ပိုင် နှစ်သက်မှုများ သို့မဟုတ် ၎င်းတို့အပေါ် ခံစားချက်များအတိုင်း ဆက်ဆံခြင်းမဟုတ်ဘဲ၊ သမ္မာတရားစည်းမျဉ်းများအတိုင်း ဆက်ဆံခြင်းကို ဆိုလိုသည်။ သို့ဆိုလျှင် လူတို့ကို သမ္မာတရား စည်းမျဉ်းများအတိုင်း ဆက်ဆံခြင်းသည် အဘယ်ကြောင့် မျှတသနည်း။ ဤအရာကို နားမလည်သောသူများစွာရှိပြီး၊ ထိုသို့နားလည်ရန် သမ္မာတရားကို ၎င်းတို့ နားလည်ဖို့ လိုအပ်သည်။ ဘာသာတရားမရှိသူများက နားလည်ထားသည့် မျှတမှုသည် စစ်မှန်သည့် မျှတမှု ဖြစ်သလော။ လုံးဝ မဟုတ်ပေ။ ဖြောင့်မတ်ခြင်းနှင့် တရားမျှတမှုတို့သည် ဘုရားသခင်ထံ၌သာ တည်ရှိသည်။ ဖန်ဆင်းရှင်က သူ၏ ဖန်ဆင်းခံများအပေါ် တောင်းဆိုချက်များတွင်သာ မျှတမှုရှိသည်၊ ဘုရားသခင်၏ ဖြောင့်မတ်ခြင်း ပေါ်လွင်နိုင်ပေသည်။ ထို့ကြောင့်၊ မျှတမှုသည် လူတို့ကို သမ္မာတရား စည်းမျဉ်းများအတိုင်း ဆက်ဆံခြင်းမှသာ လာနိုင်သည်။ အသင်းတော်တွင်ရှိသည့် လူများကို သင် မည်သည့်အရာ တောင်းဆိုသင့်ပြီး ၎င်းတို့ကို သင် မည်သို့ ဆက်ဆံသင့်သနည်း။ ၎င်းတို့ ထမ်းဆောင်နိုင်သည့် မည်သည့်တာဝန်မဆိုသည် ထမ်းဆောင်ရန် ၎င်းတို့အတွက် စီစဉ်သင့်သည့်အရာ ဖြစ်သည်။ ပြီးလျှင် ၎င်းတို့သည် တာဝန်တစ်ခုကို ထမ်းဆောင်နိုင်စွမ်းမရှိဘဲ အဖျက်အမှောင့်များပင် ဖြစ်စေလျှင်၊ ၎င်းတို့ ရှင်းလင်းပစ်ခံရခြင်းနှင့်ထိုက်တန်လျှင်၊ သင်နှင့် ကောင်းမွန်သည့် ဆက်ဆံရေးရှိလျှင်ပင် ၎င်းတို့ ရှင်းလင်းပစ်ခံရသင့်သည်။ ဤသည်မှာ မျှတမှုဖြစ်သည်။ ဤသည်မှာ အခြားသူတို့ကို မျှတစွာ ဆက်ဆံခြင်း စည်းမျဉ်းများတွင် ပါဝင်သည့်အရာ ဖြစ်သည်။ ဤသည်မှာ အပြုအမူ စည်းမျဉ်းများနှင့် ပတ်သက်သည်။ ကျိုးနွံနာခံခြင်း သမ္မာတရား၏ သွင်ပြင်လက္ခဏာတစ်ခုတွင် မိမိတာဝန်ကို ထမ်းဆောင်ခြင်း ပါဝင်သည်။ နောက်ထပ် သွင်ပြင်လက္ခဏာတွင် ကပ်ဘေးနှင့် နာမကျန်းမှု ရိုက်ခတ်သည့်အခါ ပြဿနာကို လူတို့ နာခံပြီး သဘောထားပြုမူပုံနှင့် မိမိတို့ သက်သေခံချက်တွင် ၎င်းတို့ ခိုင်ခိုင်မာမာ ရပ်တည်ပုံတို့ ပါဝင်သည်။ ထို့ထက်ပို၍၊ လူတို့၏ ကျင့်ကြံပြုမူမှုနှင့်ဆိုင်သော သွင်ပြင်လက္ခဏာ ရှိသည်။ အရေးအကြီးဆုံးမှာ၊ ၎င်းတို့အနေဖြင့် ရိုးသားသော လူတစ်ဦးဖြစ်ရန် ကြိုးပမ်းရမည်ဖြစ်ပြီး၊ အသိစိတ်နှင့် ဆင်ခြင်တုံတရား ရှိရမည်ဖြစ်သည်။ ၎င်းတို့သည် ရှင်သန်ရမည်လည်းဖြစ်ကာ စားသောက်၊ ဝတ်စားဆင်ယင်၊ အမိုးအကာအောက်တွင် နေထိုင်ပြီး ပုံမှန်လူတစ်ဦးအဖြစ် သွားလာလှုပ်ရှားရမည်ဖြစ်၏။ ဘဝအဆင့်အတန်းအရ၊ လူတို့အပေါ် ဘုရားသခင်၏ သတ်မှတ်ချက်မှာ အဘယ်နည်း။ (ကျွန်ုပ်တို့သည် အစားအစာနှင့် အဝတ်အထည်ဖြင့် ရောင့်ရဲသင့်ကြပါသည်။) ယင်းမှာ ကျေးဇူးတော်ခေတ်တွင် လူတို့အတွက် ဘုရားသခင်၏ သတ်မှတ်ချက်ဖြစ်ခဲ့သည်။ မျက်မှောက်ခေတ်တွင် လူတို့အတွက် ဘုရားသခင်၏ သတ်မှတ်ချက်များမှာ အဘယ်နည်း။ လူတို့၏ အစားအစာ၊ အဝတ်အစား၊ အမိုးအကာနှင့် သယ်ယူပို့ဆောင်ရေးနည်းလမ်းများအတွက်လည်းကောင်း၊ ၎င်းတို့၏ စကားနှင့် ကိုယ်ဟန်အမူအရာအတွက်လည်းကောင်း၊ ၎င်းတို့၏ ဝတ်စားဆင်ယင်ပုံအတွက်လည်းကောင်း ဘုရားသခင်တွင် သတ်မှတ်ချက်များရှိသည်။ သင့်ကို ခြိုးခြံသောအကျင့်ရှိရန် သူ မတောင်းဆိုသကဲ့သို့ သွေးသား သက်သာမှုတွင် မမွေ့လျော်စေပေ။ ပျင်းရိခြင်း၊ သွေးသား သက်သာမှုတွင် မွေ့လျော်ခြင်းနှင့် ပျော်ရွှင်မှု ရှာဖွေခြင်းတို့သည် ဘုရားသခင်၏ သတ်မှတ်ချက်များ မဟုတ်ပေ။ ဘုရားသခင်၏ သတ်မှတ်ချက်များနှင့်ဆိုင်သည့် စံနှုန်းများမှာ အဘယ်နည်း။ သူသည် သင့်အား အပြည့်အဝ ဆက်ကပ်ရန်၊ တာဝန်သိစိတ်ရှိရန်၊ သင်၏ တာဝန်များတွင် တာဝန်ယူရန်၊ သင် ဆင်းရဲဒုက္ခခံပြီး အဖိုးအခပေးဆပ်ရန်၊ လုံ့လဝီရိယရှိစွာ အလုပ်လုပ်ပြီး မပျင်းရိရန် တောင်းဆိုသည်။ ကြွယ်ဝချမ်းသာမှု၊ လောက၊ ဆိုးယုတ်သည့် ရေပန်းစားမှုများအပေါ် သင်၏ သဘောထားပြုမူခြင်းနှင့်ဆိုင်သည့် စံနှုန်းများလည်း ဘုရားသခင်ထံတွင်ရှိပြီး၊ ဤတောင်းဆိုချက်များအားလုံးတွင် ရှာရမည့် သမ္မာတရား ရှိသည်။ ဤကြီးမားသည့် အမျိုးအစားတစ်ခုစီအတွင်းတွင် လူတို့ လက်တွေ့လုပ်ဆောင်ပြီး ကျိုးနွံနာခံသင့်သည့် သမ္မာတရားများ ရှိသည်။ လူအချို့သည် သက်သာမှုတွင် မွေ့လျော်ကြပြီး၊ စားခြင်း၊ သောက်ခြင်းနှင့် ပျော်ပါးမှုတွင် မွေ့လျော်ခံစားကြသည်။ မိမိတို့၏ သွေးသား ဆန္ဒများကို အလိုလိုက်ပြီး ရေပန်းစားမှုများနောက်လိုက်ရန် ၎င်းတို့ နှစ်သက်ကြသည်။ လူ့အဖွဲ့အစည်းတွင်ရှိသည့် လူတို့က ပျော်ပါးကြပုံကို မြင်သည့်အခါ၊ ၎င်းတို့က ပါဝင်ချင်ကြပြီး၊ ၎င်းတို့၏ စိတ်နှလုံးများက အပြင်လောကနှင့် အမြဲ ရှိနေသည်။ ၎င်းတို့သည် မိမိတို့၏ တာဝန်ကို ကောင်းစွာ ထမ်းဆောင်နိုင်ကြသလော။ (မထမ်းဆောင်နိုင်ကြပေ။) လူအချို့သည် ဘာသာတရားမရှိသူများကို ၎င်းတို့၏ လှပသည့် အဝတ်အစားများနှင့် တွေ့သည့်အခါ၊ ဘုရားသခင်ကို ယုံကြည်သူများအဖြစ် မိမိတို့ ဝတ်ဆင်သည့်အရာကို အလွန်ရိုးရှင်းသည့်အရာအဖြစ် မြင်ကာ အထင်သေးခံရမည်ကို အမြဲ စိုးရိမ်နေကြသည်။ ၎င်းတို့သည် လုံးဝ စိတ်မကြည်မသာဖြစ်ကြလိမ့်မည်။ အခြားသူတို့က အခြားငယ်ရွယ်သော စုံတွဲများသည် မိမိတို့ကိုယ်ပိုင် ကမ္ဘာငယ်လေးများထဲတွင် အသက်ရှင်နေကြသည်ကိုမြင်ပြီး၊ အထီးကျန်ကာ မိမိတို့ကိုယ်ကို ထီးတည်းရှိနေသည်ဟု ခံစားကြရသည် ၎င်းတို့သည် ဤကိစ္စများဖြင့် အမြဲ စိတ်ဆင်းရဲကြပြီး၊ သမ္မာတရားကို မရှာဖွေကြသကဲ့သို့ ဘုရားသခင် ရှေ့မှောက်သို့ မလာကြပေ။ ၎င်းတို့သည် မိမိတို့တာဝန်ကို ကောင်းစွာ ထမ်းဆောင်နိုင်သလော။ (မထမ်းဆောင်နိုင်ပါ။) ဤအရာများက သာမညောင်ညဖြစ်ပြီး၊ သိသာထင်ရှားသည့် သမ္မာတရား ပါဝင်သည့်ပုံမရသော်လည်း၊ လူအတွက် ဘုရားသခင်၏ တောင်းဆိုချက်များနှင့်ဆိုင်သော အခြေခံအကျဆုံး သမ္မာတရားများနှင့် ဆက်စပ်ပေသည်။ လူတစ်ဦးသည် ဤပြဿနာများကို မအောင်မြင်နိုင်သကဲ့သို့ မချိုးနှိမ်နိုင်လျှင်လည်းကောင်း၊ ထိုအရာများသည် သူ၏အတွင်းတွင် အဖျက်အမှောင့်တစ်ခု အမြဲဖြစ်ကာ ဘုရားသခင်ကို သူ၏ ယုံကြည်မှုနှင့် သူ၏ တာဝန်ထမ်းဆောင်မှုတို့အား ထိခိုက်စေလျှင်၊ ဘုရားသခင်ကို ယုံကြည်မှု လမ်းကြောင်းမှန်ပေါ်တွင် အစပြုရန် သူ့အတွက် အတော်လေး ခက်ခဲလိမ့်မည် ဖြစ်သည်။

အခြေခံအကျဆုံးမှသည် အနည်းငယ် သာ၍ နက်နဲသောအရာများထိ၊ သမ္မာတရား၏ သွင်ပြင်လက္ခဏာတိုင်းသည် သမ္မာတရား ဖြစ်၏။ အပေါ်ယံအဆင့်နှင့် နက်နဲသော သမ္မာတရားတို့ကြား ခြားနားမှု မရှိပေ။ ခြားနားချက်မှာ လူတို့သည် မည်သည့် အခြေအနေများအောက်တွင် မည်သည့် သမ္မာတရားများကို လက်တွေ့လုပ်ဆောင်သင့်သည်ဟူသည်တွင် ရှိပေသည်။ အချို့သော သမ္မာတရားများသည် လူတို့၏ တာဝန်များနှင့် ပတ်သက်သည်။ အချို့မှာ ၎င်းတို့၏ နေ့စဉ်ဘဝနေထိုင်မှုပုံစံများနှင့် ပတ်သက်သည်၊ ဥပမာအနေဖြင့် ၎င်းတို့၏ နေ့စဉ် အမူအကျင့်များ၊ စည်းမျဉ်းများနှင့်လည်းကောင်း၊ နှစ်သက်မှုများနှင့်လည်းကောင်း ပတ်သက်ပြီး၊ အချို့မှာ လူအတွက် ဘုရားသခင် စီစဉ်သည့် ပတ်ဝန်းကျင်များ၊ လူများ၊ အဖြစ်အပျက်များ၊ အမှုအရာများနှင့် ပတ်သက်ပေသည်။ ပြဿနာက မည်သည့်အရာဖြစ်စေ၊ ထိုပြဿနာက နေ့စဉ်ဘဝ သို့မဟုတ် တာဝန်နှင့် ပတ်သက်သည်ဖြစ်စေ၊ ပြီးလျှင် ထိုပြဿနာနှင့်ပတ်သက်သည့် ကိစ္စရပ်က မည်မျှ ကြီးမားသည်၊ သေးငယ်သည်ဖြစ်စေ၊ သင် လေးနက်စွာ သဘောထားပြုမူနိုင်လျှင်၊ သမ္မာတရားကို ရှာဖွေနိုင်လျှင်၊ သမ္မာတရား စည်းမျဉ်းများအတိုင်း ပြုမူဆောင်ရွက်နိုင်ပြီး သမ္မာတရား စည်းမျဉ်းများအတိုင်း လက်တွေ့လုပ်ဆောင်နိုင်လျှင်၊ သမ္မာတရားကို သင် လိုက်စားနေခြင်း ဖြစ်သည်။ လူအချို့သည် တရားဒေသနာများကို နှစ်အနည်းငယ်ကြာ နားထောင်ပြီး၊ သမ္မာတရား လက်တွေ့လုပ်ဆောင်ခြင်းကို အာရုံစိုက်ခြင်းထက်၊ ယခင်က ၎င်းတို့ မကြားရသေးသည့် တရားဒေသနာများကို နားထောင်ခြင်းကိုသာ အာရုံစိုက်ကြသည်။ ၎င်းတို့သည် တတိယကောင်းကင်ဘုံ၏ ဘာသာစကား တစ်ခုခုနှင့် နက်နဲမှုများကို အစဉ်ကြားလိုကြပြီး၊ အခြားသူများထံ အဆင့်မြင့်သည့် တရားဒေသနာများကိုသာ အမြဲ ဟောပြောနေကြသည်။ ထိုသူတို့က နားမလည်သည်ကို ၎င်းတို့ မြင်သည့်အခါ၊ မိမိတို့ကိုယ်ကို အတော်လေး ကျေနပ်အားရကြသည်။ ဤသည်မှာ ဆင်ခြင်တုံတရားကို ကျော်လွန်ပေသည်။ ထိုအနှစ်မဲ့သောအရာများအကြောင်း ပြောခြင်း၏ အသုံးဝင်မှုမှာ အဘယ်နည်း။ သင်ဟောပြောသည့်အရာသည် လူ၏တာဝန်နှင့် ဆက်စပ်ခြင်းမရှိလျှင်၊ လူ၏ နေ့စဉ်ဘဝများတွင် ထုတ်ဖော်ပြသည့် အခြေအနေများ၊ ဖောက်ပြန်ပျက်စီးသော စိတ်သဘောထားများနှင့် ဆက်စပ်ခြင်းမရှိလျှင်၊ လူတို့၏ ဘဝများ၊ ၎င်းတို့၏ အသက်ဝင်ရောက်မှု၊ ၎င်းတို့၏ တာဝန်နှင့် အဆက်အစပ်မရှိလျှင်၊ ၎င်းတို့၏နေ့စဉ်ဘဝများတွင် ထင်ရှားပြီး ထုတ်ဖော်ပြသည့် အခြေအနေများနှင့် ဆက်နွှယ်မှုမရှိလျှင်၊ သင် ဟောပြောသည့်အရာသည် အယူဝါဒနှင့် အနှစ်မဲ့သော စကားများသာဖြစ်ပြီး သမ္မာတရား မဟုတ်ပေ။ တရားဒေသနာအတော်များများကို နားထောင်ပြီးနောက်တွင် သမ္မာတရားကို ၎င်းတို့နားလည်သည်ဟု တွေးထင်သည့် လူများစွာ ရှိသည်။ ၎င်းတို့သည် ဤတရားဒေသနာများမှ အချို့သော အယူဝါဒများနှင့် စည်းမျဉ်းစည်းကမ်းများကို အကျဉ်းချုပ်ပြီး၊ လူတို့ထံ မကြာခဏ ဟောပြောပြီး ၎င်းတို့နှင့် မိတ်သဟာယပြုကြသော်လည်း၊ ပြဿနာများ သို့မဟုတ် အခက်အခဲများ ဖြစ်ပေါ်သည့်အခါ မည်သို့ ကိုင်တွယ်ဖြေရှင်းရမည်ကို မသိကြချေ။ ထို့ကြောင့် ၎င်းတို့ နားလည်သည့် အယူဝါဒသည် မည်သည့် အမှန်တကယ်ဖြစ်သော ပြဿနာများကိုမျှ မဖြေရှင်းနိုင်သည်မှာ အဘယ်ကြောင့်နည်း။ ဤအရာက ၎င်းတို့အနေဖြင့် သမ္မာတရားကို နားမလည်ကြသေးကြောင်း သက်သေပြပေသည်။ လူအချို့သည် စကားလုံးများနှင့် အယူဝါဒများကို နှစ်ပေါင်းများစွာ ဟောပြောနေခဲ့သော်လည်း၊ သမ္မာတရားအကြောင်း မိတ်သဟာယပြုပြီး ပြဿနာများကို ဖြေရှင်းရန် စေခိုင်းခြင်းခံရသည့်အခါ ထိုသို့ မလုပ်နိုင်ကြပေ။ ၎င်းတို့၏ အတွေ့အကြုံဆိုင်ရာ သက်သေခံချက်များအကြောင်းကို ရေးသားရန် စေခိုင်းခြင်းခံရသည့်အခါ၊ ၎င်းတို့ မရေးနိုင်ကြသကဲ့သို့ တစ်စုံတစ်ဦးက တစ်စုံတစ်ရာကို ကြုံရပြီး အကူအညီအတွက် ၎င်းတို့ကို ရှာကြသည့်အခါ၊ ၎င်းတို့ အကူအညီမပေးနိုင်ကြပေ။ ဤသည်မှာ မည်သည့် လူစားမျိုးဖြစ်သနည်း။ ထိုသို့သောလူများသည် သမ္မာတရားကို နားမလည်ကြသကဲ့သို့ ဝိညာဉ်ရေးရာ နားလည်သဘောပေါက်မှု မရှိကြပေ။ သနားဖွယ်ကောင်းလိုက်လေခြင်း။ စကားကြီးစကားကျယ်ပြောပြီး ကျယ်လောင်စွာ သံပြိုင်ကြွေးကြော်ခြင်း၊ အသိပညာ၊ အယူဝါဒနှင့် ဓမ္မပညာတို့အပေါ်၊ အခြားသူများ မရှိသည့်အရာဖြင့် မိမိကိုယ်ကို ဖြည့်ဆည်းခြင်းအပေါ်၊ အခြားသူတို့က ယခင်က မကြားသေးသည့်အရာကို သင်ယူခြင်းအပေါ် အာရုံစိုက်ခြင်း၊ သို့မဟုတ် အမှုအရာများကို အသေအချာမှတ်သားထားခြင်းနှင့် အခြားသူတို့၏ ကိုးကွယ်မှုနှင့် လေးစားခြင်းကို ရယူခြင်းတို့အပေါ် အာရုံစိုက်ခြင်းတို့ဖြစ်သည့် ဤအရာများဖြင့် ဝိညာဉ်ရေးရာ နားလည်သဘောပေါက်မှုကို စွမ်းဆောင်ရရှိနိုင်သလော။ (မရရှိနိုင်ပါ။) ပြီးလျှင် ဝိညာဉ်ရေးရာ နားလည်သဘောပေါက်မှုကို မရရှိနိုင်သည့်သူများသည် သမ္မာတရားကို နားလည်နိုင်ကြသလော။ (နားမလည်နိုင်ပါ။) ထို့ကြောင့်၊ ဝိညာဉ်ရေးရာ နားလည်သဘောပေါက်မှုသည် သမ္မာတရားကို သိနားလည်ခြင်းနှင့် ဆက်စပ်ပေသည်။ တစ်စုံတစ်ဦးသည် ဘုရားသခင်ကို နှစ်ပေါင်းမည်မျှ ယုံကြည်ပြီးသည်ဖြစ်စေ၊ ၎င်းတို့တွင် ဝိညာဉ်ရေးရာ နားလည်သဘောပေါက်မှုရှိမရှိဟူသည်ကို ၎င်းတို့က သမ္မာတရားကို သိနားလည်ခြင်းရှိမရှိဟူသည့်အရာက ထုတ်ဖော်ပြသည်ထက် မည်သည့်အရာကမျှ သာ၍ ထုတ်ဖော်ပြခြင်း မရှိပေ။ ဝိညာဉ်ရေးရာ နားလည်သဘောပေါက်မှုရှိသောသူတို့သည် ဘုရားနှုတ်ကပတ်တော်များကို အလွယ်တကူ နားလည်နိုင်ပြီး၊ တရားဒေသနာများကို ကြားသည့်အခါ သမ္မာတရားကို အလွယ်တကူ နားလည်နိုင်ကြသည်။ သမ္မာတရားကို နားလည်နိုင်သော လူတို့သည် ဝိညာဉ်ရေးရာ နားလည်သဘောပေါက်မှုရှိသော လူများဖြစ်ပြီး၊ ဝိညာဉ်ရေးရာ နားလည်သဘောပေါက်မှုရှိသောသူတို့က သမ္မာတရားကို လိုက်စားသရွေ့၊ သမ္မာတရား လက်တွေ့ကျမှုထဲသို့ အလွယ်တကူ ဝင်ရောက်ကြလိမ့်မည် ဖြစ်သည်။

၂၀၂၀ ခုနှစ်၊ အောက်တိုဘာလ ၅ ရက်