အနန္တတန်ခိုးရှင် ဘုရားသခင် အသင်းတော် အပလီကေးရှင်း

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှဂန္တဝင်နှုတ်ကပတ်တော်များ

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

၁၂။ ဘုရားသခင်၏ သတ်မှတ်ချက်များ၊ တိုက်တွန်းချက်များ၊ နှစ်သိမ့်မှုများ၊ သတိပေးချက်များနှင့် ပတ်သက်သည့် နှုတ်ကပတ်တော်များ

(၁) လူသားအပေါ် ဘုရားသခင်၏ သတ်မှတ်ချက်များနှင့် ပတ်သက်သည့် နှုတ်ကပတ်တော်များ

၁။ သင်တို့သည် ကမ္ဘာမြေကြီးပေါ်တွင် ကောင်းကင်ဘုံရှိ ကောင်းချီးမင်္ဂလာများနှင့် ဆင်တူသော ငါ၏ ကောင်းချီးမင်္ဂလာများကို ခံစားရန် လိုလားသလော။ ငါ့ကို နားလည်ခြင်း၊ ငါ၏ နှုတ်ကပတ်တော်များနှင့် ငါ့ကို သိကျွမ်းခြင်းအား ခံစားခြင်းတို့ကို သင်တို့ အသက်တာထဲရှိ အဖိုးအထိုက်ဆုံးနှင့် အနက်အဓိပ္ပာယ် အပြည့်ဝဆုံးသော အရာများအဖြစ် မှတ်ယူခြင်းငှာ လိုလားသလော။ သင်တို့သည် မိမိတို့၏ တက်လမ်းများအတွက် တွေးတောခြင်းမရှိဘဲနှင့် ငါ့အား လုံးလုံးလျားလျား ကျိုးနွံနာခံနိုင်ခြင်းငှာ ဧကန်အမှန်ပင် တတ်နိုင်သလော။ သင်တို့သည် သိုးတစ်ကောင်ကဲ့သို့ ငါ၏ ဦးဆောင်ခြင်းကို ခံရန်နှင့် ကွပ်မျက်ခြင်းကို ခံရန် မိမိတို့ကိုယ်မိမိ ဧကန်အမှန် ခွင့်ပြုနိုင်သလော။ ထိုကဲ့သို့သော အရာများကို စွမ်းဆောင်ရရှိခြင်းငှာ တတ်စွမ်းနိုင်သောသူ သင်တို့အထဲတွင် တစ်စုံတစ်ဦးမျှ ရှိသလော။ ငါ၏ လက်ခံခြင်းကို ခံရသောသူများနှင့် ငါ၏ ကတိတော်များကို လက်ခံရရှိသောသူများသည် ငါ၏ ကောင်းချီးမင်္ဂလာများကို ရသောသူများ ဖြစ်နိုင်သလော။ ဤနှုတ်ကပတ်တော်များမှ သင်တို့သည် တစ်စုံတစ်ရာကို သဘောပေါက်နားလည်သလော။ အကယ်၍ ငါသည် သင်တို့ကို စမ်းသပ်ပါက သင်တို့သည် ငါ့အား အသနားခံရမည့်အခြေအနေတွင် မိမိတို့ကိုယ်မိမိ ဧကန်အမှန်ထားနိုင်ကြပါမည်လော၊ ဤစမ်းသပ်မှုများ၏ အလယ်တွင် ငါ၏ ရည်ရွယ်ချက်များကို ရှာဖွေနိုင်ပြီး ငါ၏ နှလုံးသားကို သိမှတ်နားလည်နိုင်ကြမည်လော။ စိတ်ကိုထိမိစေသော စကားများစွာကို သင်ပြောနိုင်ခြင်းငှာ သို့မဟုတ် စိတ်လှုပ်ရှားဖွယ် အဖြစ်အပျက်များစွာကို ဆိုနိုင်ခြင်းငှာ ငါဆန္ဒမပြု၊ ယင်းအစား သင်သည် ငါ့အား ကောင်းမွန်စွာ သက်သေခံနိုင်ရန်နှင့် လက်တွေ့အရှိတရားထဲသို့ အပြည့်အဝနှင့် နက်ရှိုင်းစွာ ဝင်ရောက်နိုင်ရန်သာ ငါတောင်းဆိုသည်။ အကယ်၍ ငါသည် တိုက်ရိုက် မပြောဆိုခဲ့ပါက သင့်ပတ်လည်တွင် ရှိသည့် အရာခပ်သိမ်းတို့ကို ကျောခိုင်းကာ ငါ၏ အသုံးကိုခံရရန် မိမိကိုယ်မိမိ ခွင့်ပြုခြင်းငှာ သင်တတ်နိုင်ပါမည်လော။ ဤအရာမှာ ငါတောင်းဆိုသော လက်တွေ့အရှိတရားပင် မဟုတ်သလော။ ငါ၏ နှုတ်ကပတ်တော်များထဲရှိ အနက်အဓိပ္ပာယ်ကို မည်သူသည် နားလည်သဘောပေါက်ခြင်းငှာ တတ်စွမ်းနိုင်သနည်း။ သို့သော် သင်တို့သည် ဒွိဟစိတ်များနှင့် ဝန်လေးပင်ပန်းမနေကြတော့ရန်၊ သင်တို့၏ ဝင်ရောက်မှုတွင် လက်ဦးမှု ရယူကြရန်နှင့် ငါ့နှုတ်ကပတ်တော်များ၏ အနှစ်သာရများကို နားလည်သဘောပေါက်ရန် ငါတောင်းဆိုသည်။ ဤအရာသည် ငါ၏ နှုတ်ကပတ်တော်များကို နားလည်မှုလွဲခြင်း၊ ငါ၏ ဆိုလိုရင်းကို မသဲကွဲခြင်းတို့ကြောင့် ငါ၏ စီမံအုပ်ချုပ်ရေးဆိုင်ရာ အမိန့်များကို ချိုးဖောက်မိခြင်းမှ တားဆီးပေးလိမ့်မည်။ ငါ၏ နှုတ်ကပတ်တော်များ အထဲရှိ သင်တို့အတွက် ငါ၏ ရည်ရွယ်ချက်များကို သင်တို့ နားလည်သဘောပေါက်ရန် ငါမျှော်လင့်သည်။ သင်တို့၏ ကိုယ်ပိုင် တက်လမ်းများကို စဉ်းစားခြင်း မပြုတော့ဘဲ အရာအားလုံး၌ ဘုရားသခင်၏ အစီအမံများကိုနာခံရန်အလို့ငှာ ငါ၏ မျက်မှောက်တွင် သင်စိတ်ပိုင်းဖြတ်ခဲ့သည့်အတိုင်း လုပ်ဆောင်လော့။ ငါ၏ အိမ်ထောင်အတွင်း ရပ်တည်သော သူအားလုံးသည် ၎င်းတို့တတ်နိုင်သမျှ လုပ်ဆောင်သင့်သည်၊ ကမ္ဘာမြေကြီးပေါ်ရှိ ငါ့အလုပ်၏ နောက်ဆုံးသော အပိုင်းကဏ္ဍထံ သင်သည် မိမိ၏ အကောင်းဆုံးကို ဆက်ကပ်သင့်သည်။ ထိုကဲ့သို့သော အရာများကို လက်တွေ့ကျင့်ဆောင်ရန် သင်သည် ဧကန်အမှန်ပင် လိုလားသလော။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အခန်း ၄” စကြဝဠာ တစ်ခုလုံးအတွက် ဘုရားသခင်၏ နှုတ်ကပတ်တော်များ မှ

၂။ နိုင်ငံတော်သားများအတွက် ဘုရားသခင်၏ သတ်မှတ်ချက်များမှာ အောက်ပါအတိုင်း ဖြစ်သည်-

၁။ ၎င်းတို့သည် ဘုရားသခင်၏ တာဝန်ပေးစေခိုင်းချက်များကို လက်ခံရမည်၊ ဆိုလိုသည်မှာ ၎င်းတို့သည် နောက်ဆုံးသောကာလ၌ ဘုရားသခင်၏ အလုပ်ထဲမှ ပြောသော နှုတ်ကပတ်တော် အားလုံးကို လက်ခံရမည်။

၂။ ၎င်းတို့သည် နိုင်ငံတော်၏ သင်တန်းထဲသို့ ဝင်ရောက်ရမည်။

၃။ ၎င်းတို့၌ ဘုရားသခင်၏ တို့ထိခြင်းကိုခံရသော စိတ်နှလုံးများရှိရန် ၎င်းတို့ လုပ်ဆောင်ရမည်။ သင်၏ စိတ်နှလုံးအား ဘုရားသခင်ထံသို့ လုံးလုံးလျားလျားလှည့်ပြီး သင်၌ သာမန် ဝိညာဉ်ရေးရာ အသက်တာ ရှိသည့်အခါ သင်သည် လွတ်လပ်သော နယ်ပယ်ထဲတွင် အသက်ရှင်ရလိမ့်မည်၊ ဆိုလိုသည်မှာ သင်သည် ဘုရားသခင်၏ ချစ်ခြင်းမေတ္တာအားဖြင့် ကာကွယ်မှုနှင့် စောင့်ရှောက်မှုအောက်တွင် အသက်ရှင်ရလိမ့်မည်။ ဘုရားသခင်၏ ကာကွယ်မှုနှင့် စောင့်ရှောက်မှုအောက်တွင် သင်အသက်ရှင်သည့်အခါမှသာ သင်သည် ဘုရားသခင်နှင့် စပ်ဆိုင်ပါလိမ့်မည်။

၄။ ၎င်းတို့သည် ဘုရားသခင်၏ ရယူခြင်းကို ခံရမည်။

၅။ ၎င်းတို့သည် ကမ္ဘာမြေကြီးပေါ်၌ ဘုရားသခင်၏ ဘုန်းတော်ကို ထင်ရှားစေသူများ ဖြစ်ရမည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ အသစ်ဆုံးသော အလုပ်ကို သိပြီး ဘုရားသခင်၏ ခြေလှမ်းများအတိုင်း လိုက်လျှောက်ပါ” မှ

၃။ အချိန်တိုင်းတွင်၊ ငါ၏လူတို့သည် ငါ့အိမ်၏ဂိတ်တံခါးကို ငါ့အတွက် ကာကွယ်ရင်း စာတန်၏ စဉ်းလဲသည့် အကြံအစည်များကို သတိထားကြရမည်၊ အချင်းချင်း အားပေးကာ ထောက်ပံ့နိုင်ကြရလိမ့်မည်ဖြစ်ပြီး ယင်းက စာတန်၏ ထောင်ချောက်ထဲသို့ ကျဆင်းခြင်းမှ သင်တို့ကို တားဆီးလိမ့်မည်၊ ထိုသို့ကျသွားသည့်အချိန်တွင် နောင်တရဖို့ရန် အလွန်နောက်ကျလိမ့်မည်ဖြစ်သည်။ ငါသည် အဘယ်ကြောင့် သင်တို့ကို ထိုသို့ အရေးတကြီး လေ့ကျင့်ပေးနေသနည်း။ ဝိညာဉ်ရေးရာလောက၏ အချက်အလက်များကို သင်တို့အား အဘယ်ကြောင့် ငါပြောသနည်း။ အဘယ်ကြောင့် ငါသည် သင်တို့ကို အထပ်ထပ်အခါခါ သတိပေးပြီး တိုက်တွန်းသနည်း။ ဤအရာကို သင်တွေးကြည့်ဖူးသလော။ ယင်းကို အဖြေရှာကြည့်ဖူးသလော။ ထို့ကြောင့်၊ သင်တို့သည် အတိတ်၏ အခြေခံအုတ်မြစ်အပေါ် အခြေပြုကာ အတွေ့အကြုံရင့်လာနိုင်ဖို့ လိုအပ်သည်သာမက၊ သည့်အပြင်၊ ငါ၏ နှုတ်ကပတ်တော်တစ်ခုစီတိုင်းအား သင်တို့၏ စိတ်ဝိညာဉ်များအတွင်း၌ အမြစ်တွယ်စေကာ ဖူးပွင့်လာစေဖို့အခွင့်ပေးရင်း ယနေ့ နှုတ်ကပတ်တော်များ၏ လမ်းညွှန်မှုအောက်တွင် သင်တို့အတွင်းရှိ မစင်ကြယ်မှုများကို ထုတ်ပစ်ရန်နှင့်၊ ထို့ထက် ပိုအရေးကြီးသည်မှာ ပိုမိုအသီးသီးဖို့ရန် လိုအပ်ပေသည်။ ယင်းမှာ ငါတောင်းဆိုသောအရာသည် တောက်ပပြီး စိမ်းလန်းစိုပြေသည့် ပန်းများမဟုတ်ဘဲ အလျှံပယ် အသီး၊ ထို့ထက်ပို၍၊ ပုပ်မသွားသော အသီးဖြစ်သောကြောင့် ဖြစ်သည်။ ငါ့စကားလုံးများ၏ အဓိပ္ပာယ်အစစ်အမှန်ကို နားလည်သလော။ ဖန်လုံအိမ်အတွင်းရှိ ပန်းတို့သည် ကြယ်များကဲ့သို့ မရေမတွက်နိုင်အောင်များပြားပြီး ကမ္ဘာလှည့်ခရီးသည်များအားလုံးကို ဆွဲဆောင်ကြသော်လည်း ၎င်းတို့ ညှိုးနွမ်းသည်နှင့် တစ်ပြိုင်နက် လှည့်ဖြားတတ်သော စာတန်၏ အကြံအစည်များကဲ့သို့ စုတ်ဖွာလာကြပြီး ၎င်းတို့ကို အဘယ်သူမျှ စိတ်ဝင်စားခြင်း မရှိကြချေ။ သို့သော်၊ လေများအတိုက်ခံရပြီး နေဒဏ်ခံခဲ့ကြရကာ ငါ့အား သက်သေခံကြသော သူတို့အနေဖြင့်၊ ဤသည်မှာ ငါ၏ သတ်မှတ်ချက်ဖြစ်သောကြောင့်၊ ဤပန်းပွင့်တို့သည် မလှပကြသော်လည်း ၎င်းတို့ ခြောက်သွေ့ညှိုးနွမ်းပြီးသည်နှင့် တစ်ပြိုင်နက် အသီးသီးလာကြလေသည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အခန်း ၃” စကြဝဠာ တစ်ခုလုံးအတွက် ဘုရားသခင်၏ နှုတ်ကပတ်တော်များ မှ

၄။ ငါတောင်းဆိုသည်မှာ ယခုသင်၏သစ္စာရှိမှုနှင့်နာခံမှု၊ ယခု သင်၏ချစ်ခြင်းမေတ္တာနှင့် သက်သေခံချက်တို့ ဖြစ်သည်။ သင်သည်သက်သေခံချက် သို့မဟုတ် မေတ္တာဟူသည် အဘယ်အရာဆိုသည်ကို ယခုအခိုက်အတန့်တွင် မသိသော်ငြားလည်း ငါ့အတွက် တတ်နိုင်သမျှဆောင်ရွက်ပေးပြီး သင့်တွင်ရှိသမျှသောရတနာများဖြစ်သည့် သစ္စာရှိမှုနှင့် နာခံမှုတို့ကို ငါ့လက်သို့ အပ်သင့်သည်။ စာတန်အပေါ်ငါအောင်နိုင်ခြင်း၏အရေးယူမှုမှာ လူသား၏ သစ္စာရှိမှုနှင့်နာခံမှုတွင် တည်ရှိနေသည်ကို သင် သိသင့်သည်။ လူသားအပေါ် ငါလုံးဝသိမ်းပိုက်ခြင်း၏ သက်သေခံချက်မှာလည်း ဤသို့ပင်ဖြစ်သည်။ ငါ့အပေါ် သင့်ယုံကြည်ခြင်းအတွက် တာဝန်မှာ ငါ့အတွက်သက်သေခံရန်၊ အခြားမည်သူ့အပေါ်မျှ မဟုတ်ဘဲ ငါ့အပေါ် သစ္စာရှိရန်နှင့် အဆုံးတိုင်အောင် နာခံရန်ဖြစ်သည်။ ငါ၏အမှုတော်အတွက် ငါ နောက်အဆင့် မစတင်မီ သင်သည် ငါ့အတွက်မည်သို့ သက်သေခံမည်နည်း။ သင်သည် ငါ့အပေါ်မည်သို့သစ္စာရှိ၍ နာခံမည်နည်း။ သင်၏သစ္စာရှိမှုကို သင်၏ တာဝန်ဝတ္တရားအတွက် ဆက်ကပ်သလား။ သို့မဟုတ် အရှုံးပေးရုံပဲလား။ သင်သည် (သေသည်ဖြစ်စေ၊ ပျက်စီးခြင်းသို့ ရောက်သည် ဖြစ်စေ) ငါ၏စီမံခန့်ခွဲမှုတိုင်းကို နာခံမည်လား။ သို့မဟုတ် ငါ၏အဆုံးအမကို ရှောင်ရှားရန် လမ်းတစ်ဝက်တွင် ထွက်ပြေးမည်လား။ သင်သည် ငါ့အတွက်သက်သေခံရန်နှင့် ငါ့အပေါ်သစ္စာရှိပြီး ငါ့ကိုနာခံရန် ငါသင့်ကို ဆုံးမခြင်းဖြစ်သည်။ ထို့အပြင် ပစ္စုပ္ပန်တွင်ဆုံးမခြင်းမှာ ငါ၏အမှုတော်နောက်အဆင့်ကို ဖော်ပြရန်ဖြစ်ပြီး အမှုတော်ကို အတားအဆီးမရှိ တိုးတက်စေရန်လည်းဖြစ်သည်။ သို့ဖြစ်၍ သင်သည်အမြော်အမြင်ရှိရန်နှင့် သင်၏ ဘဝဖြစ်စေ၊ သင်၏အသက်ရှင်တည်ရှိနေမှု၏ အရေးပါမှုကိုဖြစ်စေ တန်ဖိုးမဲ့သည့်သဲကဲ့သို့ သဘောမထားရန် ငါတိုက်တွန်း၏။ ငါ၏လာမည့်အမှုသည် မည်သို့ဖြစ်မည်ကို သင်အတိအကျသိနိုင်ပါမည်လား။ လာမည့် နေ့ရက်များတွင် ငါမည်သို့လုပ်ဆောင်မည်နှင့် ငါ၏အမှုမည်သို့ဖြစ်မည်ကို သင်သိပါသလား။ သင်သည် ငါ၏အမှု၌ သင့်အတွေ့အကြုံ၏အရေးပါပုံကို သိသင့်သည်။ ထို့အပြင် ငါ့အပေါ်သင့်ယုံကြည်ခြင်း၏ အရေးပါပုံကိုလည်း သိသင့်သည်။ ငါသည် များစွာလုပ်ဆောင်ခဲ့ပြီ ဖြစ်သည်။ သင်စိတ်ကူးယဉ်သည့်အတိုင်း ငါသည် လမ်းတစ်ဝက်တွင် မည်သို့ လက်မြှောက်အရှုံးပေးနိုင်မည်နည်း။ ငါသည် ဤကဲ့သို့ ကျယ်ပြန့်သည့်အမှုကို ပြုခဲ့ပြီဖြစ်သည်။ ၎င်းကို မည်သို့ ဖျက်ဆီးပစ်နိုင်မည်နည်း။ အကယ်စင်စစ် ငါသည် ဤခေတ်ကို အဆုံးသတ်ရန် ရောက်လာခြင်းဖြစ်သည်။ ဤသည်မှာ အမှန်ဖြစ်သော်လည်း ငါသည် ခေတ်သစ်ကိုစတင်၍ အမှုတော်အသစ်ကို စတင်ဆောင်ရွက်ကာ အဓိကကျဆုံးအနေဖြင့် နိုင်ငံတော်၏ဧဝံဂေလိတရား ဖြန့်ရမည်ဖြစ်ကြောင်းကို သင်သိရမည်။ သို့ဖြစ်၍ ယခုအလုပ်သည် ခေတ်တစ်ရပ်စတင်ရန်သာဖြစ်ကြောင်းနှင့် ဧဝံဂေလိတရားဖြန့်ရေးအတွက် အုတ်မြစ်ချရန်နှင့် ဤခေတ်ကို နောင်ကာလ၌ အဆုံးသတ်ရန်သာဆိုသည်ကို သင်သိသင့်သည်။ ငါ၏အမှုတော်သည် သင်ထင်သကဲ့သို့ မလွယ်ပါ။ သင်ယုံကြည်သည့်အတိုင်း တန်ဖိုးမဲ့သည်လည်း မဟုတ်၊ အဓိပ္ပါယ်မဲ့သည်လည်း မဟုတ်ပါ။ ထို့ကြောင့် ယခင်ကကဲ့သို့ ငါပြောမည်- ငါ၏အမှုတော်အတွက် သင်၏အသက်ကို ပေးသင့်သည်။ ထို့အပြင် ငါ၏ ဘုန်းအတွက် သင့်ကိုယ်သင် ဆက်ကပ်သင့်သည်။ ၎င်းအပြင် သင်ငါ့အတွက်သက်သေခံခြင်းမှာ ငါကြာမြင့်စွာ စောင့်ဆိုင်းခဲ့ရသောအရာဖြစ်ပြီး ငါ၏ဧဝံဂေလိတရားကို သင်ဖြန့်ရန် ငါသည် သာ၍တမ်းတလျက်ရှိ၏။ ငါ့စိတ်နှလုံးအတွင်း၌ အဘယ်အရာရှိသည်ကို သင်နားလည်သင့်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ယုံကြည်ခြင်းအကြောင်း သင်ဘာသိသနည်း” မှ

၅။ ဤအချိန်သည် ကြီးမားသော အမှုများကို ငါ၏ဝိညာဉ်က လုပ်ဆောင်နေချိန် ဖြစ်သည်။ တစ်ပါးအမျိုးသား တိုင်းနိုင်ငံများအကြား၌ ငါ၏အလုပ်ကို စတင်လုပ်ဆောင်နေချိန် ဖြစ်သည်။ ထို့အပြင် ဤအချိန်သည် ငါဖန်ဆင်းထားသူများ အားလုံးကို တစ်ဦးချင်း သက်ဆိုင်ရာ အုပ်စုအလိုက် ခွဲခြားနေချိန် ဖြစ်သည်။ ငါ၏ အလုပ် လျင်လျင်မြန်မြန်နှင့် ထိထိရောက်ရောက် ရှေ့ဆက်နိုင်ရန်အတွက် ထိုသို့လုပ်ဆောင်ခြင်းဖြစ်သည်။ ငါသင်တို့ဆီမှ တောင်းဆိုနေသည်မှာ ငါ၏အလုပ်အားလုံးအတွက် သင်တို့ကိုယ်ကိုသာမက ရှိရှိသမျှကို ဆက်ကပ်ဖို့ ဖြစ်သည်။ ထို့အပြင် သင်၌ ငါလုပ်ဆောင်ခဲ့သမျှကို သင်သည် ရှင်းရှင်းလင်းလင်း ထိုးထွင်းနားလည်ကာ သေသေချာချာ သိသင့်သည်။ ငါ့အလုပ် ပိုမိုထိရောက်စေရန်အတွက် သင်သည် သင့်ခွန်အား အားလုံးကို အသုံးပြုသင့်သည်။ ဤအချက်ကို သင်နားလည်ရမည်။ အချင်းချင်း ခိုက်ရန်ဖြစ်ခြင်း၊ နောက်ကြောင်းပြန်လှည့်ဖို့ လမ်းကို ရှာဖွေခြင်း၊ ကာမဂုဏ်၌ ပျော်မွေ့ဖို့ ကြိုးစားခြင်းကို ရှောင်ကြလော့။ ငါ၏အလုပ်ကို နှောင့်နှေးစေသည့်အပြင် သင်၏ အံ့သြဖွယ် အနာဂါတ်ကို ပျက်စီးစေနိုင်သည့် အရာများဖြစ်သည်။ ထိုအရာများကို လုပ်ဆောင်ခြင်းသည် သင့်ကို အကာအကွယ် လုံးဝမပေးနိုင်သည့်အပြင် သင့်ကို ပျက်စီးစေမည် ဖြစ်သည်။ ထိုအရာများကို လုပ်ဆောင်ခြင်းသည် မိုက်မဲခြင်းပင် ဖြစ်သည် မဟုတ်လော။ ယနေ့ သင်လောဘတကြီး မွေ့လျော်နေသော အရာများသည် အနာဂါတ်၌ သင့်ကို ဖျက်ဆီးမည့်အရာများ ဖြစ်ပြီး ယနေ့သင် ခံစားနေသည့် နာကျင်မှုသည် သင့်ကို အကာအကွယ်ပေးနေသည့် အရာပင် ဖြစ်သည်။ ဤအရာများကို သင် ရှင်းရှင်းလင်းလင်း သိဖို့လိုသည်၊ သို့မှသာ သင့်ကိုယ်သင် လွတ်မြောက်စေရန် အခက်တွေ့မည့် ဖြားယောင်းသွေးဆောင်မှုများ၏ သားကောင်ဖြစ်ခြင်းမှ ရှောင်ရှားရန်နှင့် ထူထပ်သည့်မြူများထဲ၌ စမ်းတဝါးဝါးဖြစ်ပြီး နေကို မမြင်နိုင်ခြင်းအား ရှောင်ရှားရန်အလို့ငှာ ဖြစ်သည်။ မြူထူများ မရှိတော့သောအခါမှ တရားစီရင်သည့် အထူးနေ့၌ သင်တရားစီရင်ခြင်း ခံနေရသည်ကို သင်တွေ့မည် ဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဧဝံဂေလိတရားကို ဖြန့်ဝေသည့် အလုပ်သည် လူသားကို ကယ်တင်သည့် အလုပ်လည်းဖြစ်သည်” မှ

၆။ မည်သူမျှ မပြုနိုင်သည့်အမှုကို ငါပြုခဲ့ပြီဖြစ်ပြီး ငါ၏တစ်ခုတည်းသောမျှော်လင့်ခြင်းမှာ လူသားသည် ငါ့ကို ကောင်းမှုများအချို့ဖြင့် ကျေးဇူးပြန်ဆပ်ရန်သာ ဖြစ်သည်။ ငါ့ကို ကျေးဇူးဆပ်နိုင်သူများမှာ အလွန်နည်းပါးသော်လည်း ငါသည် ဤလူသားကမ္ဘာတွင် ငါ၏ခရီးကို အဆုံးသတ်ဦးမည်ဖြစ်ပြီး ငါ၏ဖွင့်လှစ်ပြခြင်းအမှု၏ နောက်တစ်ဆင့်ကို စတင်မည်။ အကြောင်းမူကား ဤနှစ်ပေါင်းများစွာ လူသားတို့အကြား ငါ၏အပူတပြင်းလုပ်ဆောင်မှုသည် အကျိုးဖြစ်ထွန်း၍ ငါသည် အလွန်ကျေနပ်၏။ ငါအရေးစိုက်သည်မှာ လူအရေအတွက်မဟုတ်ဘဲ သူတို့၏ ကောင်းမှုများသာ ဖြစ်၏။ မည်သို့ပင်ဖြစ်စေကာမူ သင်တို့၏ခရီးဆုံးပန်းတိုင်အတွက် ကောင်းမှုများအလုံအလောက် သင်တို့ပြင်ဆင်မည်ဟု ငါမျှော်လင့်၏။ ထိုအခါ ငါကျေနပ်လိမ့်မည်။ သို့မဟုတ်ပါက သင်တို့တစ်ဦးမျှ သင်တို့အပေါ်ကျရောက်သည့် ဘေးအန္တရာယ်ကို ရှောင်နိုင်လိမ့်မည်မဟုတ်။ ဤဘေးအန္တရာယ်သည် ငါ့ထံမှစတင်၍ ငါမှစီစဥ်ညွှန်ကြားခြင်းပင်ဖြစ်သည်။ ငါ၏အမြင်၌ သင်တို့သည် ကောင်းမွန်ကြောင်း မပြသနိုင်လျှင် သင်တို့သည် ဘေးအန္တရာယ်ခံစားရခြင်းမှ ရှောင်ရှားနိုင်လိမ့်မည်မဟုတ်ပေ။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “သင်တို့၏ လမ်းဆုံးပန်းတိုင်အတွက် လုံလောက်သော ကောင်းမှုများကို ပြင်ဆင်လော့” မှ

၇။ ဘုရားသခင်ကို ယုံကြည်မူ အချိန်တန်ကြာရှိပြီးသော လူတွင် ယခု၌ ထိုသို့သော လှပသည့် ခရီးဆုံး ပန်းတိုင်အတွက် မျှော်လင့်ချက် ထားလာကြပြီး၊ ဘုရားသခင်ကို ယုံကြည်သော လူအားလုံးတို့သည် သူတို့အပေါ် ကောင်းမွန်သည့် ကံအကြောင်းတရားတို့ ရုတ်တရတ်ပင် ကျရောက်လာလိမ့်မည်ဟု ယုံကြည် တတ်ကြကာ၊ သူတို့အားလုံးသည် သူတို့ မသိလိုက်ခင်မှာပင် ကောင်းကင်ဘုံ၏ နေရာတစ်ခုမဟုတ် တစ်ခုတွင် ထိုင်နေရသည်ကို ငြိမ်းချမ်းစွာ တွေ့မြင်နိုင်မည်ဟု မျှော်လင့်ကြလေသည်။ သို့သော်လည်း ထိုသို့သော လှပသည့် အတွေးအမြင်များ ရှိထားကြသည့် ဤလူများက သူတို့သည် ကောင်းကင်ဘုံမှ ကျလာသော ထိုကဲ့သို့ ကောင်းမွန်သည့် ပေါများကြွယ်ဝခြင်းကို ခံယူရရှိနိုင်ရန်၊ သို့မဟုတ် ကောင်းကင်ဘုံ၌ ထိုင်ခုံတစ်နေရာတွင် ထိုင်ခွင့်ရရန်အတွက် အရည်အချင်း ပြည့်မီသည်၊ မပြည့်မီသည်တို့ကိုကား မည်သည့် အချိန်တွင်မျှ မသိရှိကြဟု ငါပြောမည်။ လက်ရှိတွင် သင်တို့၌ မိမိတို့ကိုယ်တိုင်နှင့် ပတ်သက်သည့် ကောင်းမွန်သော အသိပညာရှိသော်လည်း သင်တို့သည် နောက်ဆုံးသောကာလ၏ ကပ်ဆိုးများနှင့် ဆိုးသွမ်း သူတို့အား အပြစ်ဒဏ်ပေးသည့် အနန္တတန်ခိုးရှင်၏ လက်တော်ထဲမှ လွတ်မြောက်နိုင်မည်ဟု မျှော်လင့်ဆဲ ဖြစ်သည်။ ချိုသာသော အိပ်မက်များရှိခြင်းနှင့် သက်သာသည့် အသက်တာကို လိုလားတောင့်တခြင်းသည် စာတန်၏ ယိုယွင်းဖျက်ဆီးခြင်းကို ခံရပြီးသော လူအားလုံးတို့၏ ဘုံကြန်အင်လက္ခဏာ ဖြစ်ဘိသည့်အလား ထင်ရပြီး၊ ယင်းမှာ အချို့သော တစ်ဦးချင်း၏ ထူးခြားကြီးမားသည့် အချက်မျိုးမဟုတ်ပေ။ ထိုသို့တိုင် သင်တို့၏ ကောင်းချီးမင်္ဂလာများရရှိရန် စိတ်ထက်သန်လှခြင်းနှင့် လွန်ကဲလှသည့် အလိုဆန္ဒများတို့အား ငါသည် အဆုံးသတ်ချင်သေး၏။ သင်တို့၏ မြောက်များလှသော ဒုစရိုက်အပြစ်များနှင့် သင်တို့၏ မြောက်များလှသော နာခံမှုမရှိခြင်း၏ အချက်အလက်များသည် အစဥ်တစိုက် ကြီးထွားလျှက်ရှိနေသည်ကို ထောက်ကြည့်ပါက ဤအရာများသည် အနာဂတ်အတွက် သင်တို့၏ နှစ်သက်ဖွယ်ဖြစ်သော အသေးစိတ် စီမံချက်များနှင့် အဘယ်သို့လျှင် ကိုက်ညီနိုင်ပါမည်နည်း။ မှားယွင်းမှုထဲတွင် ရှိနေသည့်တိုင် သင့်ကို ချုပ်ထိန်း မည့်အရာ ဘာမျှမရှိဘဲ သင့်စိတ်ကြိုက် ထိုအတိုင်းသာ သွားချင်နေသော်လည်း အိပ်မက်များကို ပြည့်စုံလာ စေရန် ဆန္ဒရှိနေဆဲဆိုပါက၊ သင်၏ ယစ်မူးခြင်းတွင် ဆက်လက်ရှိနေရန်နှင့် မည်သည့်အခါမျှ မနိုးထရန် သင့်အား ငါတိုက်တွန်းသည်။ အကြောင်းမှာ သင်မက်သည့် အိပ်မက်သည် အခွံမျှသာဖြစ်ပြီး၊ ဖြောင့်မတ် သော ဘုရားသခင်နှင့် ရင်ဆိုင်ရသောအခါ ယင်းအိပ်မက်သည် သင့်အား ခြွင်းချက်တစ်ခုအနေနှင့် ဖြစ်စေ လိမ့်မည် မဟုတ်။ သင်၏အိပ်မက်များကို အမှန်တကယ် ဖြစ်လာစေချင်သည် ဆိုပါက၊ မည်သည့်အချိန်မျှ အိပ်မက်မမက်နှင့်၊ သမ္မာတရားကိုသာ ထာဝစဥ် ရင်ဆိုင်ပါ၊ အချက်အလက်များကိုသာ ရင်ဆိုင်ပါ။ ဤအရာသည် သင့်အား ကယ်တင်ရန် တစ်ခုတည်းသော နည်းလမ်းပင် ဖြစ်ပေသည်။ ဤနည်းလမ်း၏ အဆင့်များသည် လက်ဆုပ်လက်ကိုင် ပြနိုင်သော စကားရပ်များအရဆိုလျှင် အဘယ်အရာများနည်း။

ပထမအနေဖြင့်၊ သင်၏ ဒုစရိုက်အပြစ်များ အားလုံးကို စီစစ်ခန့်ခွဲပါ၊ ပြီးလျှင် သမ္မာတရားနှင့် မကိုက်ညီသော သင်၏ အပြုအမူနှင့် အတွေးများအားလုံးကို စစ်ဆေးပါ။

ဤအရာသည် သင်တို့ အလွယ်တကူ လုပ်ဆောင်နိုင်သည့် အရာပင်ဖြစ်ပြီး၊ တွေးတောတတ်သော သူတို့သည် ဤအရာကို လုပ်ဆောင်နိုင်သည်ဟု ငါယုံကြည်သည်။ သို့သော်ငြားလည်း၊ ဒုစရိုက်အပြစ်များနှင့် သမ္မာတရားဆိုသည်မှာ အဘယ်အရာကို ဆိုလိုသည်ကို မည်သည့်အချိန်တွင်မျှ မသိရှိသည့် ထိုလူများသည် ခြွင်းချက်ဖြစ်သည်၊ အကြောင်းမှာ အခြေခံအရဆိုလျှင် ထိုသူတို့သည် တွေးတောတတ်သော သူများ မဟုတ်ကြ၍ပင် ဖြစ်သည်။ ဘုရားသခင်၏ သဘောကျခြင်းခံရပြီးသော လူများ၊ ရိုးသားဖြောင့်မတ်သော လူများ၊ စီမံအုပ်ချုပ်ရေး အမိန့်ထုံးဖွဲ့ချက်များကို ပြင်းထန်စွာ ကျူးလွန်ခြင်းမရှိသော လူများနှင့် မိမိတို့၏ ဒုစရိုက် အပြစ်များကို အလွယ်တကူ ရှာတွေ့တတ်ကြသော လူများကို ငါပြောနေခြင်းဖြစ်သည်။ ဤအရာသည် သင်တို့ထံမှ ငါတောင်းဆိုသည့် သင်တို့အတွက် လွယ်ကူသောအရာပင် ဖြစ်သော်ငြားလည်း၊ ထိုအရာ တစ်ခုတည်းကိုသာ ငါတောင်းဆိုနေခြင်း မဟုတ်ပေ။ မည်သို့ပင် ဖြစ်စေကာမူ၊ ဤတောင်းဆိုချက်အား သင်တို့သည် တစ်ဦးတည်း တိတ်တဆိတ် ပြက်ရယ်ပြုလိမ့်မည် မဟုတ်ကြောင်း ငါမျှော်လင့်သည်။ သို့မဟုတ် ယင်းအရာကို ပေါ့ပေါ့တန်တန် သဘောထားခြင်း၊ အထင်အမြင် သေးခြင်းများ ပြုမည် မဟုတ်ကြောင်းကို သာ၍မျှော်လင့်သည်။ ယင်းအရာကို အလေးအနက်ထား ဆက်ဆံပါ၊ အရေးမပါ သကဲ့သို့ သဘောမထားနှင့်။

ဒုတိယအနေဖြင့်၊ သင်၏ ဒုစရိုက်အပြစ်များနှင့် မနာခံတတ်မှု တစ်ခုစီတိုင်းအတွက် ၎င်းတို့နှင့် လိုက်လျောညီထွေသော သမ္မာတရားကို ရှာကြံပြီးလျှင် ဤသမ္မာတရားများကို ၎င်းတို့အား ဖြေရှင်းရန် အသုံးပြုပါ။ ထို့နောက် သင်၏ ဒုစရိုက်လွန်ကျူသော ကျင့်ကြံပြုမူခြင်းများနှင့် မနာခံတတ်သော အတွေးများကို သမ္မာတရားအား လက်တွေ့ကျင့်ဆောင်ခြင်းနှင့် အစားထိုးပါ။

တတိယအနေဖြင့်၊ ရိုးသားဖြောင့်မတ်သောသူဖြစ်ပါ။ အမြဲတတ်သိကျွမ်းကျင်သောသူ၊ အမြဲကောက်ကျစ်သောသူ မဖြစ်ပါစေနှင့်။ (ငါသည် သင့်အား ရိုးသားဖြောင့်မတ်သောသူတစ်ယောက် ပြန်ဖြစ်ရန် တောင်းဆိုနေခြင်း ဖြစ်သည်။)

သင်သည် ထိုအရာသုံးခုစလုံးအား ပြည့်စုံအောင် လုပ်ဆောင်နိုင်သည်ဆိုပါက သင်သည် ကံကောင်း ထောက်မသောသူဖြစ်ပြီး၊ အိပ်မက်များ ပြည့်စုံသောသူနှင့် ကောင်းမွန်သော ကြွယ်ဝမှုရရှိသူပင် ဖြစ်သည်။ သင်တို့သည် ဤနှစ်မြို့ဖွယ် မကောင်းသော တောင်းဆိုချက်သုံးခုအား လေးလေးနက်နက် ဆက်ဆံကောင်း ဆက်ဆံမည်၊ သို့မဟုတ် ယင်းတို့ကို လက်လွတ်စပယ် ဆက်ဆံကောင်း ဆက်ဆံနိုင်ပေမည်။ မည်သို့ပင် ဆက်ဆံသည် ဖြစ်စေ၊ ငါ၏ ရည်ရွယ်ချက်မှာ သင်တို့၏ အိပ်မက်များကို ပြီးပြည့်စုံစေရန်၊ လက်တွေ့ အသုံးပြုသောသူဖြစ်ရန်၊ သင်တို့အား အရူးမလုပ်ကြစေရန်နှင့် သင်တို့အား ပြက်ရယ် မပြုကြစေရန် ဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဒုစရိုက်အပြစ်များက လူကိုငရဲသို့ ပို့ဆောင်လိမ့်မည်” မှ

၈။ ငါ့နိုင်ငံတော်၏ လူများအနေဖြင့် သင်တို့သည် အဆင်းနီသော နဂါးကြီးကို သင်တို့၏ အရိုးများထဲမှပင် စက်ဆုပ်ရွံရှာကြသောကြောင့် သင်တို့သည် ငါ၏နှလုံးသားကို သင်တို့၏ လုပ်ရပ်များနှင့် ကျေနပ်စေရမည် ဖြစ်ပြီး ဤနည်းလမ်းအားဖြင့် နဂါးအား အရှက်ရစေရမည်။ အဆင်းနီသော နဂါးကြီးသည် အမုန်းတရားနှင့် ပြည့်နေသည်ဟု သင်တို့သည် အမှန်တကယ် ခံစားရသလော။ ၎င်းမှာ နိုင်ငံတော် ရှင်ဘုရင်၏ ရန်သူဖြစ်သည်ဟု သင်တို့သည် အမှန်တကယ် ခံစားရသလော။ သင်တို့သည် ငါ့အတွက် အံ့သြဖွယ် သက်သေခံနိုင်သည်ဟု ယုံကြည်ချက် အမှန်တကယ် ရှိသလော။ အဆင်းနီသော နဂါးကြီးကို အနိုင်ယူရန် သင်တို့သည် အမှန်တကယ် ယုံကြည်ခြင်း ရှိသလော။ ဤသည်မှာ သင်တို့အား ငါတောင်းဆိုသော အရာပင်ဖြစ်သည်။ ငါလိုအပ်သမျှမှာ သင်တို့သည် ဤအဆင့်ထိတိုင်အောင် လုပ်ဆောင်နိုင်ရန်ဖြစ်သည်၊ သင်တို့သည် ဤအရာကို လုပ်ဆောင်နိုင်မည်လော။ ဤအရာကို သင်တို့သည် စွမ်းဆောင်ရရှိနိုင်သည်ဟု ယုံကြည်ချက် ရှိသလော။ လူသားသည် အဘယ်အရာကို တတ်စွမ်းနိုင်သနည်း။ ငါကိုယ်တိုင်ပင် ယင်းအရာကို လုပ်ဆောင်လျှင် ပိုကောင်းသည် မဟုတ်လော။ အဘယ်ကြောင့် ငါသည် တိုက်ပွဲဖြစ်ပွားသော အရပ်သို့ ကိုယ်တိုင်ကိုယ်ကျ ဆင်းကြွလာသည်ဟု ပြောသနည်း။ ငါလိုသောအရာမှာ သင်တို့၏ ယုံကြည်ခြင်းဖြစ်သည်၊ သင်၏ လုပ်ဆောင်ခြင်းများ မဟုတ်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အခန်း ၁၀” စကြဝဠာ တစ်ခုလုံးအတွက် ဘုရားသခင်၏ နှုတ်ကပတ်တော်များ မှ

၉။ နောက်ဆုံးသောကာလ၏ လူစုအတွင်းရှိ ငါ၏အမှုသည် မကြုံစဖူးသော လုပ်ငန်းဖြစ်သည်၊ သို့ဖြစ်သည့်အတွက် ငါ၏ဘုန်းသည် စကြဝဠာကို ပြည့်စေရန်အလို့ငှာ လူအားလုံးတို့သည် ငါ့အတွက် နောက်ဆုံးသော ဆင်းရဲဒုက္ခကို ခံစားကြရသည်။ သင်တို့သည် ငါ၏ အလိုကို နားလည်ကြသလော။ ဤသည်မှာ လူအတွက် ငါပြဋ္ဌာန်းသော နောက်ဆုံးသတ်မှတ်ချက်ဖြစ်သည်၊ ဆိုလိုသည်မှာ လူအားလုံးတို့သည် အဆင်းနီသောနဂါးကြီးရှေ့တွင် အားကြီး၍ ထူးကဲလှသော သက်သေကိုခံနိုင်ရန် ငါမျှော်လင့်သည်။ နောက်ဆုံးသော အကြိမ်အဖြစ် သူတို့ကိုယ်ကို ငါ့အတွက် ဆက်ကပ်နိုင်ပြီး နောက်ဆုံးအနေနှင့် ငါ၏ သတ်မှတ်ချက်များကို ဖြည့်ဆည်းနိုင်ရန် ငါမျှော်လင့်သည်။ သင်တို့သည် ဤသည်ကို အမှန်တကယ် ဆောင်ရွက်နိုင်ကြသလော။ အတိတ်တွင် သင်တို့သည် ငါ၏စိတ်နှလုံးကို ကျေနပ်စေနိုင်စွမ်း မရှိခဲ့ကြ၊ နောက်ဆုံးအကြိမ်တွင် သင်တို့သည် ဤစံနမူနာကို ချိုးဖျက်နိုင်ကြမည်လော။ ငါသည် လူတို့ကို ဆင်ခြင်သုံးသပ်ရန် အခွင့်ပေးသည်၊ ငါ့ကို နောက်ဆုံး အဖြေတစ်ခု မပေးမီ ဂရုတစိုက် ချင့်ချိန်တွေးတောခွင့် ပေးထားသည်။ ထိုသို့ ဆောင်ရွက်ခြင်းမှာ မှားယွင်းသလော။ ငါသည် လူ၏တုံ့ပြန်ချက်ကို စောင့်ဆိုင်းသည်၊ သူ၏ “ပြန်စာ” ကို စောင့်ဆိုင်း၏။ သင်တို့သည် ငါ၏သတ်မှတ်ချက်တို့ကို ဖြည့်ဆည်းပေးရန် ယုံကြည်မှုရှိကြသလော။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အခန်း ၃၄” စကြဝဠာ တစ်ခုလုံးအတွက် ဘုရားသခင်၏ နှုတ်ကပတ်တော်များ မှ

၁၀။ ငါသည် လူအတွက် အလွန်တင်းကြပ်သော စံနှုန်းကို တောက်လျှောက်စွဲကိုင်ထားခဲ့သည်။ အကယ်၍ သင်၏သစ္စာစောင့်သိမှုသည် သင်၏ရည်ရွယ်ချက်များ၊ သတ်မှတ်ချက်များနှင့် ဒွန်တွဲ၍ ပါလာပါက သင်၏သစ္စာစောင့်သိမှုဟုဆိုသော မည်သည့်အရာကိုမျှ ငါမခံယူလိုပေ။ အကြောင်းမှာ မိမိတို့၏ရည်ရွယ်ချက်များဖြင့် ငါ့ကိုလှည့်ဖြားသူများ၊ သတ်မှတ်ချက်များနှင့် ငါ့ထံမှ အတင်းအကျပ် တောင်းယူသူများကို ငါစက်ဆုပ်ရွံရှာသောကြောင့် ဖြစ်သည်။ လူ့အနေဖြင့် ငါမှလွဲ၍ အခြားမည်သူ့အပေါ်ကိုမျှ သစ္စာမစောင့်သိကြရန်နှင့် ယုံကြည်ခြင်းဟူသော စကားလုံးတစ်လုံးအတွက် အရာအားလုံးကို လုပ်ဆောင်ပြီး သက်သေပြကြရန်သာ ငါအလိုရှိသည်။ ငါပျော်ရွှင်စေဖို့အတွက် အချိုသတ်ထားသော စကားများကို သင်တို့အသုံးပြုသည်ကို ငါစက်ဆုပ်သည်။ ငါသည် သင်တို့ကို စိတ်ရင်းလုံးလုံးနှင့် အမြဲဆက်ဆံသဖြင့် သင်တို့သည်လည်း ငါ့အပေါ် စစ်မှန်သောယုံကြည်ခြင်းဖြင့် ပြုမူဆက်ဆံစေလိုသည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “သင်သည် ဘုရားသခင်ကို ယုံကြည်သူစစ်စစ် ဖြစ်သလော” မှ

၁၁။ သင်ယနေ့ အမွေခံရသော အရာများသည် ရှေးကတမန်တော်များ၊ ပရောဖက်များ အမွေခံရသည်ထက် ကျော်လွန်သည်သာမက၊ မောရှေနှင့် ပေတရုတို့ အမွေခံရသည်ထက်ပင်လည်း ပိုမိုသာလွန်ပေသည်။ ကောင်းချီးမင်္ဂလာများသည် နှစ်ရက်၊ သုံးရက်တည်းနှင့် လက်ခံနိုင်သော အရာမျိုး မဟုတ်ပေ၊ ၎င်းတို့အား များစွာသော ပေးဆပ်ခြင်းများအားဖြင့် လုပ်ကိုင်ရယူရမည် ဖြစ်သည်။ ဆိုလိုသည်မှာ သင်၌ စစ်ဆေးခြင်းခံရထားသော ချစ်ခြင်းမေတ္တာ၊ ကြီးမားသည့် ယုံကြည်ခြင်းနှင့် ဘုရားသခင်က သင့်အား ရရှိရန်တောင်းခံသည့် သမ္မာတရားများစွာတို့ ရှိရမည် ဖြစ်သည်၊ ထို့အပြင် တရားမျှတမှုအား သင်မျက်မှောက်ပြုနိုင်ရန် လိုအပ်သကဲ့သို့ သူရဲဘောကြောင်ခြင်းနှင့် အရှုံးပေးခြင်းတို့အား မည်သည့်အခါ၌မျှ လုပ်ဆောင်မှုမပြုရန် လိုအပ်သည့််အပြင် ဘုရားသခင်အပေါ်၌ အစဉ်ချစ်ခြင်းနှင့် မလျော့သောချစ်ခြင်း ရှိနေရန် လိုအပ်သည်။ တိကျပြတ်သားသည့် ဆုံးဖြတ်ချက်သင်၌ရှိရန် လိုအပ်သကဲ့သို့ အသက်တာ စိတ်နေသဘောထား ပြောင်းလဲရန်လည်း လိုအပ်ပေသည်၊ သင်၏ယိုယွင်းမှုအား ကုစားရန်လည်း လိုအပ်ကာ၊ ဘုရားသခင်၏ စီစဉ်ညွှန်ကြားမှု အားလုံးတို့အား စောဒကတက်ခြင်း မရှိဘဲ လက်သင့်ခံရန် လိုအပ်ပြီး၊ သေသည့် တိုင်အောင် ပင်လျှင် နာခံခြင်းရှိရန် လိုအပ်သည်။ ဤအရာသည် သင် အထမြောက်သင့်သည့် အရာဖြစ်သည်။ ယင်းသည် ဘုရားသခင်၏အမှု၏ နောက်ဆုံးသောရည်ရွယ်ချက်ဖြစ်ပြီး ဤလူစုထံမှ ဘုရားသခင် တောင်းဆိုသည့် အရာများလည်း ဖြစ်သည်။ သင့်အား ဘုရားသခင် ပေးထားသည်နှင့်အမျှ၊ သင့်ထံမှ ပြန်လည် တောင်းခံခြင်းကိုလည်း ပြုရမည်ဖြစ်ပြီး၊ သင့်တော်သည့် တောင်းဆိုမှုများ ပြုရမည် ဖြစ်သည်။ ထို့ကြောင့် ဘုရားသခင်၏ အလုပ်အားလုံးသည် အကြောင်းမဲ့ မဟုတ်ဘဲ၊ ထိုအရာမှတဆင့် ဘုရားသခင်သည် မြင့်မားသည့် စံနှုန်းနှင့် တင်းကျပ်သည့် သတ်မှတ်ချက်များရှိသော အမှုအား ထပ်ခါတလဲလဲ ပြုလုပ်ရသည့် အကြောင်းရင်းကို တွေ့မြင်နိုင်သည်။ ထိုအကြောင်းကြောင့် သင်သည် ဘုရားသခင်အား ယုံကြည်ခြင်းနှင့် ပြည့်လျက်ရှိနေသင့်ခြင်း ဖြစ်သည်။ အတိုချုပ်အားဖြင့်ဆိုရပါက ဘုရားသခင်ပြုသောအမှု အားလုံးတို့သည် သင့်အတွက် ပြုနေခြင်းဖြစ်ကာ သင့်အား သူ၏အမွေ ရထိုက်စေရန် ဖြစ်သည်။ ဤသည်မှာ ဘုရားသခင်၏ ကိုယ်ပိုင်ဘုန်းတော်အတွက် သိပ်မဟုတ်ဘဲ သင်၏ကယ်တင်ခြင်းနှင့် မသန့်ရှင်းသောမြေ၌ ကြီးစွာသော ဒုက္ခကိုခံနေရသောသူများအား စုံလင်စေရန်အတွက်လည်း ဖြစ်သည်။ သင်သည် ဘုရားသခင်၏ အလိုတော်ကို နားလည်ရမည်။ ထို့ကြောင့် ဘုရားသခင်အား စမ်းသပ်ခြင်းနှင့် ခုခံခြင်း မပြုလေတော့နှင့်ဟု ငါသည် ထိုးထွင်းသိမြင်ခြင်း သို့မဟုတ် အသိတရား ဘာမျှမရှိသော အသိဉာဏ်မဲ့နေသည့် လူများစွာအား တိုက်တွန်းသည်။ လူသား မည်သည့်အခါကမျှ ခံစားခဲ့ဖူးခြင်း မရှိသည့် ဒုက္ခဆင်းရဲ အလုံးစုံအား ဘုရားသခင် ခံစားခဲ့ပြီး ဖြစ်သည့်အပြင် ရှေးမဆွကပင် ပိုမိုအရှက်ကွဲခြင်းအား လူသားအစား ခံစားခဲ့ပြီး ဖြစ်သည်။ မည်သည့်အရာအား သင်လက်မလွှတ်နိုင်ဘဲ ရှိနေသနည်း။ မည်သည့်အရာက ဘုရားသခင်၏ အလိုတော်ထက် ပိုမို၍ အရေးကြီးသနည်း။ ဘုရားသခင်၏ မေတ္တာအထက်၌ မည်သည့်အရာများ ရှိနေသနည်း။ မသန့်ရှင်းသောဤနယ်မြေ၌ သူ၏အမှုထမ်းဆောင်ရန်မှာ ဘုရားသခင်အနေဖြင့် နှစ်ဆကြိုးစားအားထုတ်နေရပြီး ဖြစ်သည်။ အကယ်၍ လူသားသည် သိလျက်နှင့် တမင် ဖောက်ပြန် ကျူးလွန်လျှင် ဘုရားသခင်၏အမှုကို ရှည်ကြာစေရလိမ့်မည် ဖြစ်သည်။ မည်သို့ပင်ဖြစ်စေကာမူ ဤအရာသည် မည်သူ့အတွက်မျှ အကျိုးမရှိသကဲ့သို့ မည်သူတစ်ဦးတစ်ယောက်အတွက်မျှလည်း အကျိုးအမြတ် မဟုတ်ပေ။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “လူသားတွေးခေါ်သည့်အတိုင်း ဘုရားသခင်၏ အမှုသည် ရိုးရှင်းလွန်းသလော” မှ

၁၂။ ငါပြောသည့် နှုတ်ကပတ်တော်များသည် လူသားအားလုံးကို တိုက်ရိုက်ရည်ရွယ်သော သမ္မာတရားများဖြစ်ပြီး လူတစ်ဦးတစ်ယောက် သို့မဟုတ် လူအမျိုးအစား တစ်မျိုးတည်းအတွက်သာ ရည်ရွယ်ပြောခြင်းမဟုတ်ပေ။ ထို့ကြောင့် သမ္မာတရား၏ ရှုထောင့်မှနေ၍သာမက ရိုးသားမှုနှင့် မမှိတ်မသုန်အာရုံစိုက်သော သဘောထားတစ်ရပ်ကို ထိန်းသိမ်းလျက် ငါ၏နှုတ်ကပတ်တော်များကို လက်ခံရန်အာရုံပြု သင့်ပေသည်။ ငါပြောသည့်နှုတ်ကပတ်တော် သို့မဟုတ် သမ္မာတရားကို တစ်လုံးတစ်ပါဒမှ လျစ်လျူရှုခြင်း မပြုရသည့်အပြင် ငါ၏နှုတ်ကပတ်တော်အားလုံးကို မထီမဲ့မြင် မပြုရ။ သင်တို့ဘဝများ၌ သင်တို့ပြုသောအရာများစွာသည် သမ္မာတရားနှင့်ဆီလျော်မှုမရှိသည်ကို ငါတွေ့သောကြောင့် ငါသည် သင်တို့အား စဉ်းလဲမှုနှင့် အကျည်းတန်မှုတို့၏ကျေးကျွန်အဖြစ်မှ လွန်မြောက်ပြီး သမ္မာတရား၏ အစေခံသူများ ဖြစ်လာစေရန် အထူးတလည် မေတ္တာရပ်ခံနေခြင်းဖြစ်သည်။ သမ္မာတရားကို နင်းချေခြင်း၊ ဘုရားသခင်၏ အိမ်တော်၏ မည်သည့်ထောင့်ကိုမျှ မဖျက်ဆီးလေနှင့်။ ဤအချက်သည် သင်တို့အား ငါ၏သတိပေးချက် ဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “သတိပေးချက် သုံးချက်” မှ

၁၃။ ငါမျှော်လင့်သည်မှာ သင်တို့ သည် ငါပင်ပန်းစွာ ကြိုးစားအားထုတ်ခဲ့သမျှကို အလဟဿ မဖြစ်စေရန်နှင့် ငါပြုသော စောင့်ရှောက်မှုနှင့် ငါ၏ စိတ်တို့ကို သင်တို့နားလည်နိုင်ကာ၊ ငါ၏ နှုတ်ကပတ်တော်သည် လူသားတစ်ဦး ကျင့်ကြံပြုမူရမည့် အခြေခံမူဖြစ်သည်ဟု သင်တို့လက်ခံစေရန်သာ ဖြစ်သည်။ ငါ့နှုတ်ကပတ်တော်အား သင်တို့ နာခံလိုသည် ဖြစ်စေ၊ မနာခံလိုသည် ဖြစ်စေ၊ စိတ်ပါလက်ပါ လက်ခံသည် ဖြစ်စေ၊ မအီမသာ လက်ခံသည်ဖြစ်စေ၊ သင်တို့သည် ထိုနှုတ်ကပတ်တော်ကို အလေးအနက်ထားရမည်။ သို့မဟုတ်လျှင် သင်တို့၏ အလေးအနက် မထားခြင်း၊ လျစ်လျူရှုခြင်း စိတ်သဘောနှင့် အမူအကျင့်သည် ငါ့ကို စိတ်မချမ်းမြေ့ စေသည်သာမက စက်ဆုပ်ရွံရှာ စေလိမ့်မည်။ သင်တို့သည် ငါ့နှုတ်ကပတ်တော်ကို အဖန်တလဲလဲ— အကြိမ်ထောင်ချီ၍— ဖတ်သည်သာမက အလွတ်ရသည်အထိ ကျက်မှတ်သည်ကို ငါလွန်စွာ မျှော်လင့်သည်။ ထိုနည်းအားဖြင့်သာ သင်တို့သည် ငါမျှော်လင့်ထားသည့်အတိုင်း ပြည့်မီနိုင်မည်ဖြစ်သည်။ သို့ရာတွင် ယခုအခါ သင်တို့ တစ်ဦး တစ်ယောက်မျှ ထိုကဲ့သို့ အသက်ရှင်ခြင်း မရှိသည့်အပြင် သင်တို့အားလုံးသည် မိမိ၏အလိုဆန္ဒ ပြည့်ဝသည့် အထိ အလွန်အကျွံ သောက်စားမူးယစ်ကာ ကိုယ်ကျင့်တရား ပျက်ပြားသော ဘဝတွင် နစ်မွန်းလျက်ရှိကာ သင်တို့၏ နှလုံးသားနှင့် စိတ်ဝိညာဉ် ချမ်းသာရေးအတွက် ငါ့နှုတ်ကပတ်တော်ကို မှီဝဲသူ အလျင်းမရှိပေ။ ထိုအကြောင်းကြောင့် လူသားမျိုးနွယ်၏ ပုံရိပ်မှန်သည် အမြဲတစေ ငါ့ကို သစ္စာဖောက်လျက် တစ်ဦး တစ်ယောက်မျှ ငါ၏နှုတ်ကပတ်တော်ကို အကြွင်းမဲ့ သစ္စာစောင့်သိရိုသေသူ တစ်ဦးတစ်ယောက်မျှ မရှိနိုင်ဟု ငါကောက်ချက်ချသည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဆိုးရွားလှသော ပြဿနာ— သစ္စာဖောက်ခြင်း (၁)” မှ

၁၄။ လူသားမျိုးနွယ်နှင့် သူ့နောက်လိုက်သော သူများအပေါ် ဘုရား၏ မှန်ကန်သော သတ်မှတ်ချက်များမှာ အောက်ပါအတိုင်းဖြစ်၏- ဘုရားသခင်သည် သူ့နောက်သို့လိုက်သောသူများထံမှ စစ်မှန်သောယုံကြည်ခြင်း၊ သစ္စာရှိသောနောက်လိုက်ခြင်း၊ အကြွင်းမဲ့နာခံခြင်း၊ စစ်မှန်စွာသိခြင်းနှင့် အူလှိုက်သည်းလှိုက်ရိုသေလေးမြတ်ခြင်းစသည့် အရာငါးခုကို တောင်းဆိုထား၏။

ဤအရာငါးခုတွင် လူတို့သည် ဘုရားသခင်အား မေးခွန်းမထုတ်တော့ရန်နှင့် ၎င်းတို့၏စိတ်ကူးစိတ်သန်းများ သို့မဟုတ် မရေရာဘဲ စိတ်ကူးသက်သက် သဘောထားများကို အသုံးပြု၍ သူ့နောက်မလိုက်ရန် တောင်းဆိုထား၏၊ ၎င်းတို့သည် ဘုရားသခင်နောက်သို့ စိတ်ကူးစိတ်သန်းများ သို့မဟုတ် အယူအဆများဖြင့် မလိုက်ရ။ သူ၏နောက်သို့လိုက်သောသူတိုင်းသည် သစ္စာရှိစွာလိုက်၍၊ စိတ်မပါ့တပါ သို့မဟုတ် သံန္နိဋ္ဌာန်မရှိဘဲ မလိုက်ရန် သတ်မှတ်ထား၏။ ဘုရားသခင်သည် သင့်အပေါ် သတ်မှတ်ချက်များ ပြုလုပ်သည့်အခါ၊ သို့မဟုတ် သင့်ကိုစမ်းသပ်သည့်အခါ၊ တရားစီရင်သည့်အခါ၊ သင့်ကို ရိုက်နှက်ဆုံးမပြီး ပြုပြင်သည့်အခါ၊ သို့မဟုတ် ဆုံးမပဲ့ပြင်၍ ရိုက်နှက်သည့်အခါ သင်သည် သူ့ကို လုံးဝနာခံရမည်။ အကြောင်းတရားကို မမေးသင့်၊ သို့မဟုတ် သတ်မှတ်ချက်များ မပြုလုပ်ရဘဲ အကြောင်းပြချက်ကို သာ၍မပြောသင့်ပေ။ သင်၏နာခံမှုသည် လုံးဝဥဿုံနာခံမှုဖြစ်ရမည်။ ဘုရားသခင်ကိုသိခြင်းသည် လူတို့ အချို့တဲ့နေဆုံး နေရာဖြစ်၏။ ၎င်းတို့သည် ဘုရားသခင်နှင့်သက်ဆိုင်ခြင်းမရှိသော ဆိုရိုးများ၊ မိန့်မြွက်ချက်များနှင့် စကားများကို ဘုရားသခင်အပေါ် သတ်မှတ်ကြသည်။ ဤစကားများသည် ဘုရားသခင်ကိုသိခြင်းအတွက် အတိကျဆုံးသော အဓိပ္ပာယ် သတ်မှတ်ချက်များဖြစ်သည်ဟု ယုံကြည်လျက် ထိုသို့ပြုလုပ်ခြင်းဖြစ်သည်။ လူတို့၏စိတ်ကူးစိတ်သန်း၊ ၎င်းတို့ကိုယ်တိုင်၏ ဆင်ခြင်တုံတရားနှင့် ၎င်းတို့၏ကိုယ်ပိုင် အသိဉာဏ်တို့မှလာသော ဤဆိုရိုးများသည် ဘုရားသခင်၏အနှစ်သာရနှင့် စိုးစဉ်းမျှ ဆက်စပ်မှုမရှိသည်ကို ၎င်းတို့ သိပ်မသိပေ။ ထို့ကြောင့် ဘုရားသခင်မှ နှစ်သက်သည့်သူများရှိ အသိဉာဏ်တွင် ဘုရားသခင်သည် သင့်ကို ဘုရားသခင်နှင့် သူ၏နှုတ်ကပတ်တော်တို့ကို သိရုံသာ တောင်းဆိုသည်မဟုတ်ဘဲ ဘုရားသခင်ကို သင်၏သိခြင်းသည် မှန်ကန်ရန်လည်း တောင်းဆိုကြောင်းကို ငါသည် သင်တို့အား ပြောပြလို၏။ သင်သည် ဝါကျတစ်ကြောင်းသာ ပြောနိုင်သည်ဖြစ်သော်လည်း၊ သို့မဟုတ် အနည်းငယ်သာ သိသော်လည်း၊ ဤအနည်းငယ်သည် မှန်ကန်၍ စစ်မှန်ကာ ဘုရားသခင်ကိုယ်တော်တိုင်၏ အနှစ်သာရနှင့် သဟဇာတဖြစ်၏။ ဘုရားသခင်သည် သူ့အပေါ် လူတို့၏ လက်တွေ့မကျဘဲ ပေါ့ပေါ့တန်တန် ချီးမွမ်းခြင်းနှင့် ချီးကျူးခြင်းတို့ကို စက်ဆုပ်ရွံရှာသောကြောင့်ဖြစ်သည်။ ထိုထက်ပို၍ လူတို့သူ့အား လေကဲ့သို့သဘောထားသောအခါ သူမုန်းတီး၏၊ ဘုရားသခင်အကြောင်း အကြောင်းအရာများကို ဆွေးနွေးစဉ် လူတို့သည် ပေါ့တန်စွာပြောဆိုခြင်း၊ ဆန္ဒရှိသည်အတိုင်း တုံ့ဆိုင်းခြင်းမရှိဘဲ ပြောဆိုခြင်း၊ ၎င်းတို့၏စိတ်ထဲတွင် သင့်တော်သည်ဟုထင်တိုင်း ပြောဆိုခြင်းတို့ကို သူမုန်းတီး၏၊ ထို့အပြင် ဘုရားသခင်ကို သူတို့သိသည်ဟု ယုံကြည်သောသူများ၊ ဘုရားသခင်အကြောင်း အကြောင်းအရာများကို ကန့်သတ်ချုပ်ချယ်မှု သို့မဟုတ် သံသယမရှိဘဲ ဆွေးနွေးကြသည့် ဘုရားသခင်ကို သိခြင်းအပေါ် ဝါကြွားသူများကို မုန်းတီး၏။ ၎င်းသတ်မှတ်ချက်ငါးခုအနက် နောက်ဆုံးမှာ အူလှိုက်သည်းလှိုက် ရိုသေလေးမြတ်ခြင်းဖြစ်သည်။ ဤသည်မှာ ဘုရားသခင်နောက်လိုက်သူတို့အားလုံးအပေါ် သူ၏အဆုံးစွန်သော သတ်မှတ်ချက်ဖြစ်၏။ တစ်စုံတစ်ဦး၏ ဘုရားသခင်ကိုသိခြင်းသည် မှန်ကန်၍စစ်မှန်သည့်အခါ ထိုသူတို့သည် ဘုရားသခင်အား စစ်မှန်စွာ ရိုသေလေးမြတ်၍ မကောင်းမှုကို စစ်မှန်စွာရှောင်ရှားနိုင်၏။ ဤရိုသေလေးမြတ်မှုသည် ၎င်းတို့နှလုံးသား၏ နက်ရှိုင်းသောနေရာမှလာ၍ လိုလိုလားလားရှိပြီး ဤသည်မှာ ဘုရားသခင်မှ ၎င်းတို့အပေါ် ဖိအားပေး၍ မဟုတ်ပေ။ ဘုရားသခင်သည် သူ့အပေါ် ကောင်းမွန်သည့်သဘောထား သို့မဟုတ် အမူအကျင့် သို့မဟုတ် ပြင်ပအပြုအမူ လက်ဆောင်ပေးရန် သင့်အား မတောင်းဆိုပေ။ ယင်းအစား သင်သည် သူ့အားရိုသေလေးမြတ်ရန်နှင့် သင့်နှလုံးသား၏ နက်ရှိုင်းသောနေရာမှ သူ့ကို ကြောက်ရွံ့ရန် သူတောင်းဆို၏။ ဤရိုသေလေးမြတ်မှုသည် သင့်ဘဝ အနေအထားပြောင်းလဲမှုများ၏ ရလဒ်အနေဖြင့် ရရှိခြင်းဖြစ်သည်။ ဤသည်မှာ သင်သည် ဘုရားသခင်ကိုသိခြင်းကြောင့်၊ သင်သည် ဘုရားသခင်၏လုပ်ဆောင်ချက်များကို နားလည်ခြင်းကြောင့်၊ သင်သည် ဘုရားသခင်၏အနှစ်သာရကို နားလည်ခြင်းကြောင့်နှင့် သင်သည် ဘုရားသခင်ဖန်ဆင်းထားသော သတ္တဝါတစ်ခုဖြစ်ကြောင်း အမှန်တရားကို အသိအမှတ်ပြုခဲ့ခြင်းတို့ကြောင့် ဖြစ်၏။ ထို့ကြောင့် ဤနေရာတွင် ရိုသေလေးမြတ်မှုကို အဓိပ္ပာယ်သတ်မှတ်ရန် “အူလှိုက်သည်းလှိုက်” ဟူသောစကားလုံးကို အသုံးပြုရခြင်းအတွက် ငါ၏ရည်မှန်းချက်မှာ ဘုရားသခင်အတွက် လူတို့၏ရိုသေလေးမြတ်မှုသည် ၎င်းတို့နှလုံးသားများ၏ အရင်းခံနေရာမှ လာသင့်သည်ကို လူသားမျိုးနွယ်မှ နားလည်စေရန်ဖြစ်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၁၀)” မှ

၁၅။ အချိန်တိုတောင်းသောကြောင့် ဘုရားသခင်သည် ဤနည်းဖြင့် အမှုပြုခြင်းဖြစ်သည်။ သင်တို့သည် သင်တို့၏အသက်ကို မြတ်နိုးသကဲ့သို့ ဘုရားသခင်ကို စိတ်နှလုံးအကြွင်းမဲ့၊ ဉာဏ်ရှိသမျှနှင့် ကိုယ်စွမ်းရှိသမျှဖြင့် ချစ်ကြမည်ဟု မျှော်လင့်သည်။ ဤသည်မှာ အဆုံးစွန် အဓိပ္ပာယ်ရှိသော ဘဝတစ်ခုပင် ဖြစ်သည်မဟုတ်လော။ ဘဝ၏အဓိပ္ပာယ်ကို အခြားမည်သည့်နေရာတွင် သင်တို့ရှာဖွေနိုင်မည်နည်း။ ထိုအရာမှာ အလွန်မျက်စိကန်းခြင်းပင် ဖြစ်လိမ့်မည်မဟုတ်လော။ သင်သည် ဘုရားသခင်ကိုချစ်ရန် လိုလိုလားလားရှိသလော။ ဘုရားသခင်သည် လူသား၏ချစ်ခြင်းမေတ္တာနှင့် ထိုက်တန်သလော။ လူတို့သည် လူသား၏ကြင်နာမြတ်နိုးခြင်းနှင့် ထိုက်တန်သလော။ ထို့ကြောင့် အဘယ်အရာကို သင်ပြုသင့်သနည်း။ သံသယများမရှိဘဲ ဘုရားသခင်ကို ရဲဝံ့စွာ ချစ်လော့၊ ထိုအခါ ဘုရားသခင်သည် သင့်အား အဘယ်အရာပြုလိမ့်မည်ကို ကြည့်လော့။ သူသည် သင့်ကို သတ်ဖြတ်မည်၊ မသတ်ဖြတ်မည်ကို ကြည့်လော့။ အချုပ်အားဖြင့် ဘုရားသခင်ကို ချစ်သောအလုပ်သည် ဘုရားသခင်အတွက် အကြောင်းအရာများကို မိတ္တူကူး၍ ရေးချခြင်းထက် ပို၍အရေးကြီးသည်။ သင်၏ဘဝသည် ပို၍အဓိပ္ပာယ်ရှိပြီး ပျော်ရွှင်မှုဖြင့်ပြည့်ရန် သင့်အနေဖြင့် အရေးကြီးဆုံးသောအရာကို ပထမနေရာတွင် ထားသင့်သည်၊ ထို့နောက် သင့်အတွက် ဘုရားသခင်၏ “စီရင်ချက်” ကို သင်စောင့်ဆိုင်းသင့်သည်။ သင်၏အကြံအစည်ထဲတွင် ဘုရားသခင်ကို ချစ်ခြင်းအရာ ပါဝင်မည်လောဟု ငါသိချင်မိသည်၊ အယောက်တိုင်း၏ အကြံအစည်များမှာ ဘုရားသခင်၏ ပြည့်စုံစေခြင်းကိုခံရပြီး လက်တွေ့အရှိတရားဖြစ်လာသော အကြံအစည်များ ဖြစ်လာကြရန် ငါလိုလားပေသည်။

နှုတ်ကပတ်တော်သည် လူ့ဇာတိ၌ ပေါ်လာ၏စာအုပ်ထဲရှိ “အခန်း ၄၂” စကြဝဠာ တစ်ခုလုံးအတွက် ဘုရားသခင်၏ နှုတ်ကပတ်တော်များနှင့်သက်ဆိုင်သော နက်နဲမှုများ၏ အနက်ဖွင့်ဆိုချက် မှ

၁၆။ လူသည် လေးနက်စွာ ရှင်သန်နေထိုင်ရန် ရှာဖွေလိုက်လျှောက်ရမည်ဖြစ်ပြီး သူ၏ လက်ရှိအခြေအနေများဖြင့် ရောင့်ရဲမနေသင့်ပါ။ ပေတရု၏ ပုံရိပ်အတိုင်း ရှင်သန်ရန် လူသည် ပေတရုအကြောင်းနှင့် သူ၏ အတွေ့အကြုံများအကြောင်းကို သိထားရမည်။ လူသည် ပိုမိုမြင့်မားပြီး ပိုမိုနက်နဲသိမ်မွေ့သော အရာများကို လေ့လာလိုက်စားရမည်။ သူသည် ဘုရားသခင်၏ ပိုမိုလေးနက်၍ ပိုမိုဖြူစင်သော ချစ်ခြင်းမေတ္တာအပြင် တန်ဖိုးနှင့် အဓိပ္ပာယ်ပြည့်ဝသော အသက်တာကို ရှာဖွေလိုက်လျှောက်ရမည်ဖြစ်သည်။ ယင်းသည်သာ အသက်ရှင်ခြင်းအကြောင်း ဖြစ်၏၊ သို့မှသာ လူသည် ပေတရုနှင့် တူမည်ဖြစ်သည်။ အကောင်းဘက်တွင် သင်၏ လက်တွေ့ကျကျ ကြိုးစားအားထုတ်ခြင်းကို သင်အာရုံစိုက်ရမည်၊ ပိုမိုနက်နဲသိမ်မွေ့ပြီး ပိုမိုတိကျကာ ပိုမိုလက်တွေ့ကျသည့် သမ္မာတရားများကို လျစ်လျူရှုရင်း တဒင်္ဂသာယာမှုအတွက် ယခင်အခြေအနေအတိုင်း ပြန်နေရန် သင့်ကိုယ်သင် ခွင့်မပြုရ။ သင့်ချစ်ခြင်းသည် လက်တွေ့ကျရမည်ဖြစ်ပြီး တိရစ္ဆာန်နှင့်မခြားသည့် အကျင့်စာရိတ္တပျက်ပြားကာ ပေါ့ပေါ့တန်တန်ဘဝမှ သင့်ကိုယ်သင် လွတ်မြောက်စေရန် နည်းလမ်းများကို သင်ရှာရမည်။ သင်သည် လေးနက်သောဘဝ၊ တန်ဖိုးရှိသောဘဝဖြင့် ရှင်သန်နေထိုင်ရမည်ဖြစ်ပြီး သင့်ကိုယ်သင် အရူးလုပ်ခြင်း သို့မဟုတ် သင့်ဘဝကို ဆော့ကစားစရာ အရုပ်ကဲ့သို့ သဘောထားခြင်းတို့ကို မပြုလုပ်ရ။ ဘုရားသခင်အား ချစ်ရန် ဆန္ဒပြင်းပြသော လူတိုင်းအတွက် မရရှိနိုင်သော သမ္မာတရားများ ဆိုသည်မှာ မရှိပါ၊ သူတို့ ကြံ့ကြံ့မခံနိုင်သောအရာအတွက် တရားစီရင်မှုလည်း မရှိပါ။ သင့်အသက်တာကို မည်သို့ရှင်သန်သင့်သနည်း။ ဘုရားသခင်ကို သင်မည်သို့ ချစ်သင့်ပြီး သူ့အလိုကိုဖြည့်ဆည်းရန် ထိုချစ်ခြင်းကို မည်သို့အသုံးပြုသင့်သနည်း။ သင့်အသက်တာတွင် ထို့ထက်ပို၍ ကြီးမြတ်သောအရာ မရှိပါ။ အထူးသဖြင့် သင့်တွင် ထိုကဲ့သို့သော ရည်မှန်းချက်များနှင့် ဇွဲလုံ့လတို့ ရှိရမည်ဖြစ်ပြီး ကြောက်တတ်သော လူပျော့လူညံ့များကဲ့သို့ မဖြစ်သင့်။ လေးနက်သော အသက်တာဖြစ်စေရန်နှင့် လေးနက်သောအမှန်တရားများကို တွေ့ကြုံရန် သင်လေ့လာရမည်ဖြစ်ပြီး ဤသို့ဖြင့် သင့်ကိုယ်သင် ဝတ်ကျေတန်းကျေ သဘောမထားသင့်ပေ။ သင်သတိမထားမိဘဲ သင့်အသက်တာသည် သင့်ကို ဝကွက်ချန်ထားခဲ့လိမ့်မည်၊ ယင်းနောက်တွင် ဘုရားသခင်ကိုချစ်ရန် သင်၌ နောက်တစ်ကြိမ် အခွင့်အရေး ရှိပါဦးမည်လော။ လူသည် သေလွန်ပြီးနောက် ဘုရားသခင်အား ချစ်နိုင်ပါမည်လော။ သင့်တွင် ပေတရုကဲ့သို့ တူညီသည့် ရည်မှန်းချက်များနှင့် စိတ်ဓာတ်ရှိရမည်၊ သင့်အသက်တာသည် လေးနက်တည်ကြည်ရမည်ဖြစ်ပြီး သင့်ကိုယ်သင် မကစားသင့်ပါ။ လူသားတစ်ဦး အနေဖြင့်သာမက ဘုရားသခင် နောက်သို့ လိုက်သောသူတစ်ဦးအနေဖြင့် သင့်အသက်တာကို မည်သို့သဘောထားသင့်သည်၊ ဘုရားသခင်ထံ သင့်ကိုယ်သင် မည်သို့ဆက်ကပ်အပ်နှံသင့်သည်၊ ဘုရားသခင်၌ ပိုမိုလေးနက်သော ယုံကြည်မှုကို မည်သို့ထားရှိသင့်သည်တို့အပြင် ဘုရားသခင်ကို သင်ချစ်သည့်အလျောက် ဘုရားသခင်အား ပိုမိုဖြူစင်စွာ၊ ပို၍လှပစွာ၊ ပိုမိုကောင်းမွန်စွာ မည်သို့ချစ်သင့်သည်တို့ကို အသေအချာ သင်စဉ်းစားသင့်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ပေတရု၏ အတွေ့အကြုံများ- သူသိသော ပြစ်တင်ဆုံးမခြင်းနှင့် တရားစီရင်ခြင်းအကြောင်း” မှ

၁၇။ သင်သည် ဖန်ဆင်းခံသတ္တဝါတစ်ဦး ဖြစ်သည်၊ သင်သည် ဘုရားသခင်ကို အမှန်ပင် ကိုးကွယ်သင့်ပြီး အဓိပ္ပါယ်ပြည့်ဝသော အသက်တာကို မီအောင်လိုက်သင့်သည်။ အကယ်၍ သင်သည် ဘုရားသခင်ကို မကိုးကွယ်ဘဲ ညစ်ညမ်းသော ဇာတိပကတိအထဲ၌ အသက်ရှင်လျှင် သင်သည် လူအဝတ်ကိုဝတ်သော သားရဲတိရစ္ဆာန်ပင် မဟုတ်ပေသလော။ သင်သည် လူသားတစ်ဦး ဖြစ်သောကြောင့် သင့်ကိုယ်သင် ဘုရားသခင်အဖို့ အသုံးခံသင့်ပြီး ဆင်းရဲဒုက္ခအားလုံးကို ခံနိုင်ရည်ရှိသင့်သည်တကား။ သင်သည် ယနေ့ခံစားရသော ဆင်းရဲဒုက္ခအနည်းငယ်ကို ဝမ်းမြောက်စွာနှင့် အသေအချာ လက်ခံသင့်ပြီး ယောဘကဲ့သို့၊ ပေတရုကဲ့သို့ အဓိပ္ပါယ်ရှိသော အသက်တာနှင့် အသက်ရှင်သင့်သည်။ ဤကမ္ဘာပေါ်တွင် လူသားသည် မကောင်းဆိုးဝါး၏ အဝတ်အထည်ကို ဆင်မြန်းပြီး နတ်ဆိုးထံမှ အစားအစာကို သုံးဆောင်သည်၊ မကောင်းဆိုးဝါး၏ ကြိုးဆွဲရာကရသည့်အောက်၌ အလုပ်လုပ်၍ အစေခံကာ ထိုအရာ၏ ညစ်ညမ်းခြင်းထဲ၌ လုံးလုံးလျားလျား နင်းချေခြင်း ခံလာခဲ့ရသည်။ အကယ်၍ သင်သည် အသက်တာ၏အဓိပ္ပါယ် သို့မဟုတ် မှန်ကန်သောလမ်းကို နားမလည်လျှင် သင့်ဘဝထဲတွင် မည်သည့်အဓိပ္ပာယ် ရှိအံ့နည်း။ သင်တို့သည် လမ်းကြောင်းမှန်ကို မီအောင်လိုက်နေသောလူများ၊ တိုးတက်မှုကို ရှာဖွေနေသောသူများ ဖြစ်ကြသည်။ သင်တို့သည် အဆင်းနီသောနဂါးကြီး၏ တိုင်းပြည်ထဲမှာ ထကြွလာသောလူများ၊ ဘုရားသခင်က ဖြောင့်မတ်သည်ဟု သတ်မှတ်သောသူများ ဖြစ်ကြသည်။ ထိုအရာမှာ အဓိပ္ပါယ်အရှိဆုံး အသက်တာပင် မဟုတ်သလော။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “လက်တွေ့လုပ်ဆောင်ခြင်း (၂)” မှ

၁၈။ ဘုရားသခင်၏ အနှစ်သာရကို သိကျွမ်းလာခြင်းအရာသည် မပြောပလောက်သော ကိစ္စရပ် မဟုတ်ပေ။ သင့်အနေဖြင့် သူ၏စိတ်နေသဘောထားကို နားလည်ရပေမည်။ ဤနည်းအားဖြင့် သင်သည် တဖြည်းဖြည်း အမှုမဲ့အမှတ်မဲ့နှင့် ဘုရားသခင်၏ အနှစ်သာရကို သိကျွမ်းလာလိမ့်မည်။ ဤအသိတရားကို သင်ရရှိပြီးသည့်အခါ ပို၍မြင့်မားပြီး ပို၍လှပသော အခြေအနေထဲသို့ သင်ဝင်ရောက်နေသည်ကို တွေ့ရလိမ့်မည်။ အဆုံးတွင် သင်သည် သင်၏အကျည်းတန်သော စိတ်ကို ရှက်လာမည်ဖြစ်သည့်အပြင် သင်၏အရှက်ရခြင်းမှ ပုန်းကွယ်ရန်နေရာ မရှိဟု ခံစားရလိမ့်မည်။ ထိုအချိန်တွင် သင်၏အပြုအမူ၌ ဘုရားသခင်၏ စိတ်နေသဘောထားကို ပုန်ကန်ပြစ်မှားသောအရာ ပို၍ပို၍ နည်းလာမည်ဖြစ်ပြီး သင်၏နှလုံးသားသည် ဘုရားသခင်၏ နှလုံးသားနှင့် တိုး၍တိုး၍ နီးကပ်လာမည်ဖြစ်ကာ သူ့ကိုချစ်ခြင်းသည် သင်၏နှလုံးသားထဲတွင် တဖြည်းဖြည်း ကြီးထွားလာလိမ့်မည်။ ဤသည်မှာ လှပသော အခြေအနေထဲသို့ လူသားမျိုးနွယ် ဝင်ရောက်ခြင်း၏ သင်္ကေတဖြစ်သည်။ သို့သော်လည်း ယခုတိုင် သင်တို့သည် ဤအရာကို မရရှိကြသေးပေ။ သင်တို့အားလုံးသည် သင်တို့၏ကံကြမ္မာအတွက် ပြေးလွှားလုပ်ကိုင်ကြသည့်အားလျော်စွာ ဘုရားသခင်၏ အနှစ်သာရကို သိကျွမ်းရန်အတွက် ကြိုးစားခြင်းအရာ၌ စိတ်ဝင်စားသောသူ မည်သူရှိသနည်း။ ဤသို့ဆက်ဖြစ်နေပါလျှင် သင်တို့သည် စီမံအုပ်ချုပ်ရေးဆိုင်ရာ အမိန့်များကို အမှုမဲ့အမှတ်မဲ့ ချိုးဖောက်မိကြလိမ့်မည်၊ အကြောင်းမှာ သင်တို့သည် ဘုရားသခင်၏ စိတ်နေသဘောထားကို မဖြစ်စလောက်မျှသာ နားလည်ကြသောကြောင့်ဖြစ်သည်။ ထို့ကြောင့် သင်တို့ ယခုပြုကြသည့်အရာမှာ ဘုရားသခင်၏ စိတ်နေသဘောထားကို ပုန်ကန်ပြစ်မှားခြင်းများ၏ အခြေခံအုတ်မြစ်ကို ချနေကြခြင်းပင် မဟုတ်လော။ ဘုရားသခင်၏ စိတ်နေသဘောထားကို နားလည်ရန် သင်တို့ကို ငါတောင်းဆိုခြင်းသည် ငါ၏အမှုနှင့် ဆန့်ကျင်ကွဲလွဲခြင်း မရှိပေ။ အကြောင်းမှာ သင်တို့သည် စီမံအုပ်ချုပ်ရေးဆိုင်ရာ အမိန့်များကို မကြာမကြာ ချိုးဖောက်နေပါက သင်တို့အထဲမှ မည်သူက အပြစ်ဒဏ်ပေးခြင်းမှ လွတ်မြောက်လိမ့်မည်နည်း။ ထိုသို့ဆိုပါက ငါ၏အမှုသည် အချည်းနှီးသက်သက် ဖြစ်နေခဲ့လိမ့်မည် မဟုတ်လော။ ထို့ကြောင့် သင်တို့၏ ကိုယ်ပိုင်အပြုအမူကို စေ့စေ့စပ်စပ် ကြည့်ရှုစစ်ဆေးကြရန်အပြင် သင်တို့လှမ်းသော ခြေလှမ်းများကိုပါ သတိထားကြရန် ယခုတိုင် ငါတောင်းဆိုနေခြင်းဖြစ်သည်။ ဤသည်မှာ သင်တို့အပေါ် ငါပြုသည့် ပို၍မြင့်မားသော တောင်းဆိုချက်ဖြစ်ပြီး သင်တို့အားလုံးသည် ထိုအရာကို ဂရုတစိုက် ဆင်ခြင်သုံးသပ်ကြကာ အလွန်ထက်သန်သော အလေးထားမှု ပြုကြလိမ့်မည်ဟု ငါမျှော်လင့်သည်။ သင်တို့၏လုပ်ရပ်များသည် ငါ့ကို ရှူးရှူးရှားရှား ဒေါသဖြစ်စေသည်အထိ စိတ်လာဆွသည့်နေ့ ရောက်လာပါက အကျိုးဆက်များမှာ သင်တို့အတွက်သာလျှင် သုံးသပ်ဆင်ခြင်စရာ ဖြစ်လိမ့်မည်၊ ထို့အပြင် သင်တို့ကိုယ်စား အပြစ်ဒဏ်ပေးခြင်းကို ခံပေးမည့် အခြားမည်သူမျှ ရှိလိမ့်မည် မဟုတ်ပေ။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ စိတ်နေသဘောထားကို နားလည်ရန်မှာ အလွန်အရေးကြီးပေ၏” မှ

၁၉။ သင်တို့၏ အယောင်ဆောင်အသက်တာသည် ငါ့အား သစ္စာဖောက်မှု ကျူးလွန်နေသည်ကို မြင်တွေ့နိုင်ရန် သင်တို့အားလုံး မိမိကိုယ်ကို ဖြစ်နိုင်သမျှ အလျှင်အမြန် ဆန်းစစ်ကြလော့။ သင်တို့၏တုံ့ပြန်မှုကို ငါစိတ်ရှည်စွာ စောင့်နေမည်မဟုတ်။ ငါ့ကို ခါထုတ်ချင်သလော။ ငါသည် ပေါ့ပေါ့တန်တန် ပြုလုပ်သူ မဟုတ်။ ငါမိန့်တော်မူသည့်အတိုင်း တိတိကျကျ ငါဆောင်ရွက်သည်။ အမိန့်တော်သည် အလေးအနက် ထားစေရန်အတွက်ဖြစ်သည်။ သိပ္ပံစိတ်ကူးယဉ်ဝတ္ထုတစ်ခုကဲ့သို့ မှတ်ရန်မဟုတ်။ သင်တို့၏ စိတ်ကူးကို မဟုတ်၊ လက်တွေ့ လုပ်ဆောင်မှုကို ငါမြင်လိုသည်။ ထို့အပြင် ငါမေးသော အောက်ပါမေးခွန်းများကို သင်တို့ ဖြေဆိုရမည်။ ၁- အကယ်၍ သင်သည် စစ်မှန်သောငါ၏ အမှုတော်ကို ဆောင်ရွက်သောသူ ဖြစ်သည် မှန်လျှင်၊ ငါ့အားသစ္စာ ရှိစွာဖြင့် ငါ့အမှုတော်ကိုဆက်ကပ် ရမည်။ ဝတ်ကျေတမ်းကျေဆောင်ရွက်ခြင်း နှင့် အဖျက်သဘောဆောင်သော လုပ်ရပ်မျိုး မရှိစေရ။ ၂- အကယ်၍ သင်ဆောင်ရွက်သော အမှုတော်အပေါ်တွင် ငါဘယ်သောအခါမျှ အသိအမှတ်ပြုကာ ကြိုဆိုခြင်းမရှိသည်ကို သင်တွေ့ရှိသော် ငါ့အမှုတော်ကို ရာသက်ပန် နေ၍ ဆက်ကပ် နိုင်မည်လော။ ၃- အကယ်၍ သင်ခွန်အားပိုမိုစိုက်ထုတ်၍ လုပ်ဆောင်ပါလျက် ငါသည် သင့်အပေါ် အေးတိအေးစက် နိုင်လွန်းလျှင် သင်သည် ထိုမတင်မကျ အခြေအနေတွင် ငါ့အတွက် ဆက်လက်အမှုတော်ဆောင်နိုင်ဦးမည်လော။ ၄- အကယ်၍ သင်သည် ငါ့အတွက် စိုက်ထုတ်ထားခြင်းအတွက် ငါ့အား အသနားခံ၍ တောင်းဆိုခြင်းကို ငါကျေနပ်မှုမရှိခဲ့သော် သင်စိတ်ဓါတ်ကျကာ ငါ့ကိုစိတ်ပျက်မိသည်သာမက ဒေါသထွက်၍ ငါ့အား အော်ကြီးဟစ်ကျယ်ခံပြော မည်လော။ ၅- အကယ်၍ သင်သည် ငါ့အားအစဉ်အမြဲသစ္စာရှိ၍ ငါ့အပေါ်မေတ္တာထားသော်လည်း သည်းထန်စွာဖျားနာခြင်း၊ ဘဝတွင်ဆင်းရဲခြင်း၊ မိတ်ဆွေများနှင့် ဆွေမျိုးသားချင်းများ၏ ပစ်ပယ်မှုကို ခံရခြင်းနှင့် ဘဝအကြောင်းမလှခြင်း စသည့်ဒဏ် အမျိုးမျိုးကို ခံစားခဲ့ရသော် ငါ့အားသစွာရှိခြင်းနှင့် ချစ် ခြင်း ဆက်လက်၍ မြဲမည်လော။ ၆- အကယ်၍ ငါပြုသမျှသည် သင်စိတ်ကူးထားသည့်အရာများနှင့် တစ်ခုမျှကိုက်ညီမှုမရှိလျှင် ရှေ့ဆက်ရမည့် ဘဝခရီးကို မည်သို့ လျှောက်လှမ်းမည်နည်း။ ၇- အကယ်၍ သင်မျှော်မှန်းထားသည့်အရာ တစ်ခုကိုမျှ မရရှိခဲ့သော် ငါ့၏နောက်လိုက်အဖြစ် ဆက်၍ ရပ်တည်နိုင်ကြမည်လော။ ၈- အကယ်၍ ငါ့အမှုတော်၏ ဦးတည်ချက်နှင့် ထူးခြားမှုကို သင်နားလည် သဘောပေါက်ခြင်း မရှိခဲ့သော်၊ တစ်ဖက်စောင်းနှင်းသည့် ဝေဖန်ခြင်းနှင့် ကောက်ချက်ချခြင်းများနှင့် ကင်းရှင်းသော အမိန့်တော်ကိုနာခံတတ်သည့် အမှုဆောင်သူ ဖြစ်နိုင်မည်လော။ ၉- ငါသည်လူသားများနှင့် အတူရှိနေစဉ် ငါမြွှက်ဆိုသမျှနှင့် ငါလုပ်ဆောင်သမျှကို သင်တန်ဖိုးထားကာ နှလုံးသွင်းနိုင်မည်လော။ ၁၀- သင်သည် မည်သည့်အရာကိုမျှ မရရှိရင်တောင်မှ ငါ့အတွက် တစ်သက်လုံး ဒုက္ခခံလိုသည့်ဆန္ဒရှိသော ငါ့ကိုသစ္စာရှိသည့် နောက်လိုက်ကောင်း ဖြစ်နိုင်မည်လော။ ၁၁- သင်သည် မိမိကြံအစည်နှင့် ဘဝရှေ့ရေးရပ်တည်နိုင်ရန်အတွက် ကိုယ်ပိုင်စီမံချက်များကို ငါ့အတွက် ငြင်းပယ်နိုင် မည်လော။ ဤမေးခွန်းများသည် သင်တို့ထံမှ ငါ၏ နောက်ဆုံးတောင်းဆိုချက်များဖြစ်ပြီး၊ သင်တို့အားလုံး ဖြေဆိုနိုင်မည်ဟု ငါမျှော်လင့်သည်။

နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဆိုးရွားလှသော ပြဿနာ— သစ္စာဖောက်ခြင်း (၂)” မှ

ယခင်က:(၁၇) စိတ်သဘောထားဆိုင်ရာ ပြောင်းလဲမှုနှင့် ဘုရားသခင်အားဖြင့် စုံလင်ခံရခြင်းတို့နှင့် ပတ်သက်သည့် နှုတ်ကပတ်တော်များ

နောက်တစ်ခုသို့:(၂) လူသားအပေါ် ဘုရားသခင်၏ တိုက်တွန်းချက်များ၊ နှစ်သိမ့်မှုများနှင့် ပတ်သက်သည့် နှုတ်ကပတ်တော်များ

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) သိုးသငယ် ဖွင့်သည့် စာစောင် တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ နိုင်ငံတော်၏ ဧဝံဂေလိတရားအကြောင်း အနန္တတန်ခိုးရှင်ဘုရားသခင်၏ စံနမူနာ နှုတ်ကပတ်တော်များ လက်ရွေးစင်များ နောက်ဆုံးသောကာလ၏ ခရစ်တော်အတွက် သက်သေခံချက်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အောင်မြင်သောသူများ၏ သက်သေခံချက်များ