ရိုးသားသောလူတစ်ဦးဖြစ်ခြင်း၏ အခြေခံအကျဆုံး လက်တွေ့လုပ်ဆောင်ချက်

ရိုးသားသူတစ်ယောက်ဖြစ်ခြင်းနှင့် ပတ်သက်၍ သင်တို့၏ ကိုယ်ပိုင်အတွေ့အကြုံမှာ အဘယ်သို့နည်း။ (ရိုးသားသူတစ်ယောက်ဖြစ်ခြင်းသည် အလွန်ခက်ခဲသည်ဟု ခံစားရသည်။) အဘယ်ကြောင့် ခက်ခဲသည်ဟု ခံစားရသနည်း။ (ကျွန်ုပ်သည် အမှန်ပင် ရိုးသားသူတစ်ယောက်ဖြစ်ချင်သည်။ သို့သော် နေ့စဉ် မိမိကိုယ်ကို ဆန်းစစ်သောအခါ ကျွန်ုပ်သည် မရိုးသားဘဲ ကျွန်ုပ်၏ အပြောအဆိုတွင် မသန့်စင်မှုများစွာပါဝင်သည်ကို တွေ့ရသည်။ တစ်ခါတစ်ရံတွင် ကျွန်ုပ်၏ စကားများတွင် ခံစားချက်များ ထည့်ပြောသည်။ သို့မဟုတ် ကျွန်ုပ်စကားပြောသောအခါတွင် ရည်ရွယ်ချက်အချို့ရှိသည်။ တစ်ခါတစ်ရံတွင် ကျွန်ုပ်သည် ပေါ့ပေါ့တန်တန် လုပ်ဆောင်သည်၊ သို့မဟုတ် ဝေ့ဝိုက်၍ ပြောသည်၊ သို့မဟုတ် ကျွန်ုပ်သည် ပန်းတိုင်တစ်ခုကို ရရှိဖို့အတွက်သက်သက်ဖြင့် လက်တွေ့အရှိတရားကို ဆန့်ကျင်သောအရာများ၊ လှည့်စားသောအရာများ၊ တစ်ဝက်သာ မှန်ကန်သောအရာများ၊ အခြားသော မုသားအမျိုးအစားများကို ပြောသည်။) ဤအပြုအမူအားလုံးသည် လူတို့၏ ဖောက်ပြန်ပျက်စီးသော စိတ်သဘောထားများမှ ဖြစ်ပေါ်သည်။ ဤအရာတို့သည် ကောက်ကျစ်ပြီး လှည့်စားသောလူတို့ဘက်နှင့် သက်ဆိုင်သည်။ လူတို့သည် အဘယ်ကြောင့် မရိုးမသား လုပ်ဆောင်ကြသနည်း။ ၎င်းတို့၏ ကိုယ်ပိုင်ရည်ရွယ်ချက်များ ဖြစ်မြောက်ရန်၊ ၎င်းတို့၏ ကိုယ်ပိုင်ပန်းတိုင်များကို ရရှိရန်ဖြစ်သည်။ ထို့ကြောင့် ၎င်းတို့သည် မသမာသောနည်းလမ်းများကို အသုံးပြုကြသည်။ ဤသို့လုပ်ဆောင်ရာတွင် ၎င်းတို့သည် ပွင့်လင်းခြင်း၊ ရိုးသားခြင်းမရှိပေ။ ၎င်းတို့သည် ရိုးသားသောသူများမဟုတ်ပေ။ လူတို့က ၎င်းတို့၏ အန္တရာယ်များမှုနှင့်၊ ကောက်ကျစ်မှု၊ သို့မဟုတ် ဆိုးယုတ်မှုနှင့် စက်ဆုပ်ဖွယ်ဖြစ်မှုတို့ကို ဖွင့်ပြသည်မှာ ဤသို့သော အချိန်များတွင်ဖြစ်သည်။ ဤသည်မှာ ရိုးသားရာတွင် အခက်အခဲရှိသည့်နေရာဖြစ်သည်။ မိမိ၏ စိတ်နှလုံးတွင် ဤ ဖောက်ပြန်ပျက်စီးသော စိတ်သဘောထားများရှိနေလျှင် ရိုးသားသူတစ်ယောက်ဖြစ်ရန် အထူးပင် ခက်ခဲသည်ဟု အမှန်ပင် ထင်ရသည်။ သို့သော် သင်သည် သမ္မာတရားကို ချစ်သောသူတစ်ယောက်ဖြစ်လျှင်၊ သမ္မာတရားကို လက်ခံနိုင်သောသူဖြစ်လျှင် ရိုးသားသူဖြစ်ခြင်းသည် အလွန်ခက်ခဲမည်မဟုတ်ပေ။ အလွန်ပင် ပို၍ လွယ်ကူသည်ဟု သင် ခံစားရလိမ့်မည်။ ရိုးသားသူတစ်ယောက်ဖြစ်ခြင်းအတွက် အကြီးမားဆုံးသော အတားအဆီးများမှာ လူတို့၏ မသိမသာ ထိခိုက်စေမှု၊ လှည့်စားမှု၊ မလိုမုန်းထားမှု၊ လူတို့၏ စက်ဆုပ်ဖွယ် ရည်ရွယ်ချက်များဖြစ်သည်ဆိုသည်ကို ကိုယ်တွေ့ အတွေ့အကြုံရှိသောသူများက ကောင်းစွာသိသည်။ ဤဖောက်ပြန်ပျက်စီးသော စိတ်သဘောထားများက ကျန်ရှိနေသရွေ့ ရိုးသားသူတစ်ယောက်ဖြစ်ခြင်းက အလွန်ခက်ခဲလိမ့်မည်။ သင်တို့အားလုံးသည် ရိုးသားသူတစ်ယောက်ဖြစ်ရန် လေ့ကျင့်နေကြသည်။ ထို့ကြောင့် ဤနေရာတွင် သင်တို့၌ အတွေ့အကြုံအချို့ရှိသည်။ သင်တို့၏ အတွေ့အကြုံမှာ အဘယ်သို့ဖြစ်သနည်း။ (နေ့စဉ် ကျွန်ုပ်ပြောသော အဓိပ္ပာယ်မရှိသောစကားများနှင့် ကျွန်ုပ်ပြောခဲ့သော မုသားများအားလုံးကို ကျွန်ုပ်ချရေးသည်။ ထို့နောက်တွင် မိမိကိုယ်ကို အနည်းငယ်ပြန်လည်ဆန်းစစ်ပြီး ပိုင်းခြားစိစစ်သည်။ ဤလိမ်ညာမှုအများစု၏ နောက်ကွယ်တွင် ရည်ရွယ်ချက်တစ်မျိုးမျိုးရှိသည်၊ မာန်မာနအတွက်၊ သိက္ခာဆည်ဖို့အတွက် ထိုအရာများကို ကျွန်ုပ်ပြောခဲ့သည်ဆိုသည်ကို တွေ့ရသည်။ ကျွန်ုပ်ပြောသည့်အရာသည် သမ္မာတရားနှင့်မညီသည်ကို သတိပြုမိသော်လည်း လိမ်ညာပြီး ဟန်မဆောင်ဘဲ မနေနိုင်ပါ။) ဤသည်မှာ ရိုးသားသူတစ်ယောက်ဖြစ်ခြင်းနှင့်ပတ်သက်ပြီး အလွန်ခက်ခဲသောအရာဖြစ်သည်။ သင် သတိပြုမိခြင်းရှိမရှိက အရေးမကြီးပေ။ အဓိကအချက်မှာ သင်သည် သင်၏ ရည်ရွယ်ချက်များကို ရရှိရန်အတွက်၊ သင်၏ ကိုယ်ပိုင်ပုံရိပ်နှင့် သိက္ခာကို ထိန်းသိမ်းရန်အတွက် သင်လုပ်သည့်အရာက မှားသည်ကို သိလျက်ဖြင့် ခေါင်းမာစွာဖြင့် ဆက်၍ လိမ်ညာခြင်းဖြစ်သည်။ မသိနားမလည်ခြင်းကြောင့်ဖြစ်သည်ဟု ပြောဆိုလျှင် လိမ်ညာခြင်းပင်ဖြစ်သည်။ ရိုးသားသူတစ်ယောက်ဖြစ်ခြင်းအတွက် အဓိကအချက်မှာ သင်၏ စေ့ဆော်မှုများ၊ ရည်ရွယ်ချက်များ၊ ဖောက်ပြန်ပျက်စီးသော စိတ်သဘောထားများကို ဖြေရှင်းရန်ဖြစ်သည်။ ဤသည်မှာ မုသားပြောသည့် ပြဿနာကို အရင်းအမြစ်မှနေ၍ ဖြေရှင်းရန် တစ်ခုတည်းသောနည်းလမ်းဖြစ်သည်။ မိမိ၏ တစ်ကိုယ်ရေပန်းတိုင်များကို ရရှိရန်အတွက်၊ ဆိုလိုသည်မှာ မိမိကိုယ်တိုင် အကျိုးအမြတ်ရရှိရန်၊ အခြေအနေတစ်ခုကို အခွင့်ကောင်းယူရန်၊ မိမိကိုယ်ကို အမြင်ကောင်းစေရန်၊ သို့မဟုတ် အခြားလူများ၏ ထောက်ခံမှုကို ရရှိရန်တို့ဖြစ်သော ဤအရာများသည် လူတို့က မုသားများပြောဆိုသောအခါ ၎င်းတို့၏ ရည်ရွယ်ချက်များ၊ ဦးတည်ချက်များဖြစ်သည်။ ဤသို့သော လိမ်ညာမှုမျိုးသည် ဖောက်ပြန်ပျက်စီးသော စိတ်သဘောထားတစ်ခုကို ဖွင့်ပြသည်။ ဤသည်မှာ မုသားများပြောဆိုခြင်းနှင့်ပတ်သက်ပြီး သင်လိုအပ်သည့် ပိုင်းခြားသိမြင်မှုဖြစ်သည်။ ဤသို့ဆိုလျှင် ဤဖောက်ပြန်ပျက်စီးသော စိတ်သဘောထားကို မည်သို့ ဖြေရှင်းသင့်သနည်း။ ဤအရာအားလုံးက သမ္မာတရားအား သင် ချစ်ခြင်းရှိမရှိအပေါ်တွင် မူတည်သည်။ သင်သည် သမ္မာတရားကို လက်ခံနိုင်ပြီး သင့်ကိုယ်သင် ထောက်ခံခြင်းမရှိဘဲ ပြောဆိုနိုင်လျှင်၊ သင်၏ ကိုယ်ပိုင်အကျိုးစီးပွားအား ထည့်သွင်းစဉ်းစားခြင်းကို ရပ်တန့်ပြီး ထိုအစား အသင်းတော်အလုပ်၊ ဘုရားအလိုတော်၊ ဘုရားသခင်ရွေးချယ်ထားသောသူများ၏ အကျိုးစီးပွားများကို ထည့်သွင်းစဉ်းစားနိုင်လျှင်၊ သင်သည် မုသားများပြောဆိုခြင်း ရပ်တန့်သွားလိမ့်မည်။ မှန်မှန်ကန်ကန်ဖြင့် တည့်တည့်မတ်မတ် ပြောဆိုနိုင်လိမ့်မည်။ ဤဝိညာဉ်ရင့်ကျက်မှုမရှိလျှင် သင်သည် မှန်မှန်ကန်ကန် ပြောဆိုနိုင်မည်မဟုတ်ဘဲ သင်၏ ဝိညာဉ်ရင့်ကျက်မှုသည် နည်းပါးပြီး သမ္မာတရားကို သင် လက်တွေ့လုပ်ဆောင်နိုင်ခြင်းမရှိသည်ကို သက်သေပြသည်။ ထို့ကြောင့် ရိုးသားသူတစ်ယောက်ဖြစ်ခြင်းသည် သမ္မာတရားအား နားလည်ခြင်းလုပ်ငန်းစဉ်၊ ဝိညာဉ်ရင့်ကျက်မှု ကြီးထွားခြင်းလုပ်ငန်းစဉ်လိုအပ်သည်။ ဤပုံစံဖြင့် ဤအရာကို ကြည့်ရှုသောအခါတွင် အတွေ့အကြုံရှစ်နှစ်မှ ဆယ်နှစ်အထိမရှိဘဲ ရိုးသားသူတစ်ယောက်ဖြစ်ရန် မဖြစ်နိုင်ပေ။ ဤသည်မှာ အသက်တာတွင် ကြီးထွားတိုးတက်ခြင်း ဖြစ်စဉ်အတွက်၊ သမ္မာတရားအားနားလည်ခြင်း၊ ရရှိခြင်း ဖြစ်စဉ်အတွက် ကုန်ဆုံးရမည့် အချိန်ဖြစ်သည်။ လူအချို့က “လိမ်ညာခြင်း၏ ပြဿနာကို ဖြေရှင်းခြင်း၊ ရိုးသားသူတစ်ယောက်ဖြစ်ခြင်းသည် အမှန်တကယ်ပင် ဤမျှခက်သလော။” ဟု မေးကောင်းမေးနိုင်သည်။ ဤသည်မှာ မည်သူနှင့်ပတ်သက်၍ ပြောသည်ဆိုသည့်အပေါ်တွင် မူတည်သည်။ သမ္မာတရားကို ချစ်သောသူတစ်ယောက်ဖြစ်လျှင် အချို့သော အမှုကိစ္စများနှင့်ပတ်သက်လျှင် သူသည် လိမ်ညာခြင်းကို စွန့်လွှတ်နိုင်လိမ့်မည်။ သို့သော် သမ္မာတရားကို မချစ်သောသူဖြစ်လျှင် လိမ်ညာပြောဆိုခြင်းကို စွန့်လွှတ်ခြင်းသည် ပို၍ပင် ခက်ခဲလိမ့်မည်။

မိမိကိုယ်ကို ရိုးသားသူတစ်ယောက်ဖြစ်ရန် လေ့ကျင့်ခြင်းသည် အဓိကအားဖြင့် မုသားများပြောခြင်းပြဿနာကို ဖြေရှင်းသည့်ကိစ္စဖြစ်ပြီး မိမိ၏ ဖောက်ပြန်ပျက်စီးသော စိတ်သဘောထားကို ဖြေရှင်းခြင်းလည်းဖြစ်သည်။ ဤသို့ လုပ်ဆောင်ခြင်းတွင် အဓိကကျသော လေ့ကျင့်မှု ပါဝင်သည်။ သင်သည် လူတစ်ယောက်ကို လိမ်ညာလှည့်စားခဲ့သည်ကို သတိပြုမိသောအခါတွင် ထိုသူကို ဖွင့်ပြောသင့်သည်။ သင့်ကိုယ်သင် ဖွင့်ချပြသင့်ပြီး တောင်းပန်သင့်သည်။ ဤအလေ့အကျင့်သည် လိမ်ညာခြင်းကို ဖြေရှင်းရန်အတွက် အလွန်ပင် အကျိုးအမြတ်ရှိသည်။ ဥပမာ သင်သည် တစ်စုံတစ်ယောက်ကို လှည့်စားခဲ့လျှင်၊ သို့မဟုတ် သင်ပြောသည့်စကားများတွင် မသန့်စင်မှု၊ သို့မဟုတ် ကိုယ်ပိုင်ရည်ရွယ်ချက်တစ်ခုခုရှိခဲ့လျှင် ထိုသူထံသို့ ချဉ်းကပ်ပြီး သင့်ကိုယ်သင် ပိုင်းခြားစိစစ်သင့်သည်။ သင်က ထိုသူအား “သင့်ကို ကျွန်ုပ်ပြောသောအရာသည် မုသားဖြစ်သည်။ ကျွန်ုပ်၏ ကိုယ်ပိုင်မာနကို ကာကွယ်ရန် ရည်ရွယ်သည်။ ပြောပြီးသည့်နောက်တွင် ကျွန်ုပ်သည် အနေရခက်မိသည်။ ထို့ကြောင့် ကျွန်ုပ်သည် ယခု သင့်ကို တောင်းပန်ခြင်းဖြစ်သည်။ ကျေးဇူးပြုပြီး ကျွန်ုပ်ကို ခွင့်လွှတ်ပါ။” ဟူ၍ ပြောသင့်သည်။ ဤသည်မှာ အလွန်ပင် အားသစ်တိုးစေသည်ဟု ထိုသူက ခံစားရမည်။ မုသားတစ်ခုကို ပြောပြီး ထိုအတွက် တောင်းပန်သည့်လူတစ်ယောက် မည်သို့ရှိနေနိုင်သည်ကို တွေးတောလိမ့်မည်။ ဤသို့သော သတ္တိသည် ထိုသူက အလွန်ပင် လေးစားသောအရာတစ်ခုဖြစ်သည်။ ဤသို့သော အလေ့အကျင့်ကို ဝင်ရောက်လုပ်ကိုင်ခြင်းအားဖြင့် မည်သည့်အကျိုးအမြတ်ကို ရရှိသနည်း။ ဤအရာ၏ ရည်ရွယ်ချက်သည် အခြားလူများ၏ လေးစားမှုကို ရရှိရန်မဟုတ်ဘဲ မလိမ်ညာရန်အတွက် မိမိကိုယ်ကို ပို၍ ထိရောက်မှုရှိစွာ ချုပ်ထိန်းပြီး ဟန့်တားရန်ဖြစ်သည်။ ထို့ကြောင့် သင်သည် လိမ်ညာပြီးနောက်တွင် ဤသို့ လိမ်ညာခြင်းအတွက် တောင်းပန်ရန် လေ့ကျင့်ရမည်။ ဤပုံစံဖြင့် ပိုင်းခြားစိစစ်ခြင်း၊ သင့်ကိုယ်သင် ဖွင့်ချပြခြင်း၊ လူတို့အား တောင်းပန်ခြင်းတို့ကို လက်တွေ့လုပ်ဆောင်ရန်အတွက် သင့်ကိုယ်သင် လေ့ကျင့်လေလေ၊ ရလဒ်များက ကောင်းလေလေ၊ သင်ပြောသည့် မုသားအရေအတွက်က နည်းပါးလေလေဖြစ်သည်။ ရိုးသားသူတစ်ယောက်ဖြစ်ပြီး မလိမ်ညာရန် သင့်ကိုယ်သင် ချုပ်တည်းဖို့အတွက် ပိုင်းခြားစိစစ်ပြီး သင့်ကိုယ်သင် ဖွင့်ချပြခြင်းကို လက်တွေ့လုပ်ဆောင်ခြင်းသည် သတ္တိလိုအပ်ပြီး လူတစ်ယောက်အား လိမ်ညာပြီးနောက်တွင် ထိုသူကို တောင်းပန်ခြင်းသည် ပို၍ပင် သတ္တိကို လိုအပ်သည်။ သင်တို့သည် ဤအရာကို တစ်နှစ်၊ သို့မဟုတ် နှစ်နှစ် လက်တွေ့လုပ်ဆောင်လျှင်၊ သို့မဟုတ် သုံးနှစ်မှ ငါးနှစ်အထိ ဖြစ်ကောင်းဖြစ်လျှင် ရှင်းလင်းသော ရလဒ်များကို မြင်တွေ့ရရန် အာမခံချက်ရှိသည်။ ပြီးလျှင် သင်၏ လိမ်ညာမှုများကို ဖယ်ရှားရန် ခက်ခဲမည်မဟုတ်ပေ။ မိမိ၏ လိမ်ညာမှုများကို ဖယ်ရှားခြင်းသည် ရိုးသားသူတစ်ယောက်ဖြစ်ခြင်းအတွက် ပထမအဆင့်ဖြစ်သည်။ သုံးနှစ်၊ သို့မဟုတ် ငါးနှစ် အားစိုက်ထုတ်ခြင်းမရှိဘဲ မလုပ်ဆောင်နိုင်ပေ။ လိမ်ညာသည့်ပြဿနာကို ဖြေရှင်းပြီးသည့်နောက်တွင် ဒုတိယအဆင့်မှာ လိမ်လည်လှည့်စားခြင်းပြဿနာကို ဖြေရှင်းရန်ဖြစ်သည်။ တစ်ခါတစ်ရံတွင် လူတစ်ယောက်အနေဖြင့် လိမ်လည်လှည့်စားခြင်းသည် လိမ်ညာဖို့ မလိုပေ။ ဤအရာများကို အလုပ်သက်သက်ဖြင့် ပြီးမြောက်နိုင်သည်။ လူတစ်ယောက်သည် အပြင်ပန်းမှကြည့်လျှင် မလိမ်ညာကောင်း မလိမ်ညာနိုင်ပေ။ သို့သော် သူ၏ စိတ်နှလုံးတွင် လိမ်လည်လှည့်စားမှုများ ရှိနေနိုင်သေးသည်။ သူသည် အခြားလူတိုင်းထက် ဤအရာကို ပို၍သိသည်။ အဘယ်ကြောင့်ဆိုသော် သူသည် ဤအရာကို အလေးအနက်တွေးတောပြီး ဂရုတစိုက် စဉ်းစားခဲ့သောကြောင့်ဖြစ်သည်။ နောက်ပိုင်းတွင် ဆင်ခြင်သုံးသပ်ခြင်းမှတစ်ဆင့် သိမြင်ရန် သူ့အတွက် လွယ်ကူသည်။ လိမ်ညာသည့် ပြဿနာ ပြေလည်သွားသည်နှင့် လိမ်လည်လှည့်စားခြင်းပြဿနာကို ဖြေရှင်းခြင်းသည် နှိုင်းယှဉ်ကြည့်လျှင် အနည်းငယ် ပို၍ လွယ်ကူသွားသည်။ သို့သော် မိမိသည် ဘုရားသခင်ကို ကြောက်ရွံ့သော စိတ်နှလုံးကို ပိုင်ဆိုင်ရမည်။ အကြောင်းမှာ လူသားသည် လိမ်လည်လှည့်စားခြင်းကို ဆောင်ရွက်သောအခါ ရည်ရွယ်ချက်၏ အုပ်စိုးခြင်းကို ခံရသောကြောင့်ဖြစ်သည်။ အခြားလူများသည် ဤအရာကို အပြင်ပန်းမှနေ၍ မသိမြင်နိုင်သကဲ့သို့ ပိုင်းခြားသိမြင်နိုင်ခြင်းလည်းမရှိပေ။ ဘုရားသခင်သာ ဤအရာကို စိစစ်နိုင်သည်။ ဘုရားသခင်သာ ဤအကြောင်းကို သိမြင်သည်။ ထို့ကြောင့် လူတစ်ယောက်သည် ဘုရားသခင်ထံသို့ ဆုတောင်းခြင်း၊ ဘုရားသခင်၏ စိစစ်မှုကို လက်ခံခြင်းအားဖြင့်သာ လိမ်လည်လှည့်စားခြင်းပြဿနာများကို ဖြေရှင်းနိုင်သည်။ လူတစ်ယောက်သည် သူ၏ စိတ်နှလုံးတွင် သမ္မာတရားကို မချစ်လျှင်၊ သို့မဟုတ် ဘုရားသခင်ကို မကြောက်ရွံ့လျှင် သူ၏ လိမ်လည်လှည့်စားမှုကို မဖြေရှင်းနိုင်ပေ။ သင်သည် ဘုရားသခင်ရှေ့တွင် ဆုတောင်းပြီး သင်၏ အမှားများကို ဝန်ခံနိုင်သည်။ ဝန်ချပြီး နောင်တရနိုင်သည်၊ သို့မဟုတ် သင်၏ ဖောက်ပြန်ပျက်စီးသော စိတ်သဘောထားများကို စိစစ်နိုင်သည်။ ထိုအချိန်က မည်သည့်အရာကို သင်စဉ်းစားနေခဲ့သည်၊ မည်သည့်အရာကို သင်ပြောခဲ့သည်၊ သင်၏ ရည်ရွယ်ချက်က မည်သို့ဖြစ်သည်၊ လှည့်စားခြင်းကို မည်သို့ ဆောင်ရွက်ခဲ့သည်တို့ကို မှန်မှန်ကန်ကန် ဖော်ပြနိုင်သည်။ ဤအရာအားလုံးမှာ လုပ်ဆောင်ရန် အတော်အတန် လွယ်ကူသော အရာများဖြစ်သည်။ သို့ရာတွင် အခြားလူတစ်ယောက်ထံသို့ သင့်ကိုယ်သင် ဖွင့်ချပြရန် သင့်အား တောင်းဆိုလျှင် သင်သည် သိက္ခာဆယ်လိုသောကြောင့် သင်၏ သတ္တိနှင့် စိတ်ပြတ်သားမှုကို ဆုံးရှုံးကောင်း ဆုံးရှုံးရနိုင်သည်။ ဤသို့ဆိုလျှင် ဖွင့်ပြောပြီး သင့်ကိုယ်သင် ဖွင့်ချပြခြင်းကို လက်တွေ့လုပ်ဆောင်ရန် သင့်အတွက် အလွန်ခက်ခဲလိမ့်မည်။ သင်က သင်၏ ကိုယ်ပိုင်တစ်ကိုယ်ရေရည်ရွယ်ချက်များ၊ ဦးတည်ချက်များကို အခြေခံပြီး ပြောဆိုနေခြင်း၊ လုပ်ဆောင်နေခြင်းကို ရံဖန်ရံခါ တွေ့ရသည်၊ သင်လုပ်ဆောင်သည့်၊ ပြောသည့်အရာများတွင် လှည့်စားမှု၊ မသန့်စင်မှု၊ လိမ်ညာမှု၊ သို့မဟုတ် လှည့်စားမှုအဆင့်တစ်ခုအထိ ရှိနေသည်ဆိုသည်ကို ယေဘူယျအနေဖြင့် ဝန်ခံကောင်း ဝန်ခံနိုင်မည်။ သို့သော် ထို့နောက်တွင် တစ်စုံတစ်ခု ဖြစ်ပျက်ပြီး သင့်ကိုယ်သင် ပိုင်းခြားစိစစ်ရန်၊ အစမှ အဆုံးအထိ အမှုအရာများက မည်သို့ဖြစ်သည်ကို ဖော်ထုတ်ပြရန်၊ သင်ပြောသည့်မည်သည့်စကားများက လှည့်စားခြင်းပါဝင်သည်၊ ထိုစကားများနောက်ကွယ်တွင် မည်သည့်ရည်ရွယ်ချက်ရှိသည်၊ မည်သည့်အရာကို သင်စဉ်းစားနေသည်၊ သင်က မလိုမုန်းထားခြင်း၊ သို့မဟုတ် အန္တရာယ်ပြုခြင်းရှိမရှိတို့ကို ရှင်းပြခိုင်းလျှင် သင်က တိတိကျကျ မပြောလိုပေ၊ သို့မဟုတ် အသေးစိတ် မဖော်ပြလိုပေ။ လူအချို့သည် “ဤသည်မှာ အရှိအတိုင်းပင်ဖြစ်သည်။ ငါသည် အလွန် လှည့်စားသော၊ မသိမသာဖြင့် ထိခိုက်တတ်သော၊ စိတ်မချရသောသူသာဖြစ်သည်။” ဟူ၍ပင် ဖော့၍ပြောကြသည်။ ဤသည်မှာ ၎င်းတို့၏ ဖောက်ပြန်ပျက်စီးသော အနှစ်သာရကို၊ သို့မဟုတ် ၎င်းတို့သည် မည်မျှပင် လှည့်စားတတ်ပြီး မသိမသာဖြင့် ဒုက္ခပေးတတ်သည်ကို ကောင်းမွန်စွာ ရင်ဆိုင်ရန် ၎င်းတို့တွင် အရည်အချင်းမရှိခြင်းကို ပြသည်။ ဤလူတို့သည် အစဉ်သဖြင့် ခေါင်းရှောင်သည့် ပုံစံနှင့် အခြေအနေတွင် အစဉ် ရှိကြသည်။ ၎င်းတို့သည် အစဉ်သဖြင့် မိမိတို့ကိုယ်ကို ခွင့်လွှတ်ပြီး လိုက်လျောကြသည်။ ရိုးသားသူတစ်ယောက်ဖြစ်ခြင်း သမ္မာတရားကို လက်တွေ့လုပ်ဆောင်ရန်အတွက် ဒုက္ခမခံနိုင်ကြ၊ သို့မဟုတ် မပေးဆပ်နိုင်ကြပေ။ လူများစွာတို့သည် အယူဝါဒစကားများကို နှစ်ချီ၍ ဟောပြောပြီး “ငါသည် လှည့်စားပြီး မသိမသာ ဒုက္ခပေးတတ်သည်။ ငါ၏ လုပ်ရပ်များတွင် မကြာခဏပင် လှည့်စားမှုရှိသည်။ လူတို့ကို လုံးဝ ရိုးသားစစ်မှန်စွာ မဆက်ဆံပေ။” ဟု အစဉ် ပြောဆိုကြသည်။ သို့သော် ဤသို့ နှစ်များစွာ အော်ဟစ်ပြီးနောက်တွင် ၎င်းတို့သည် ယခင်ကကဲ့သိုပင် လှည့်စားလျက်ရှိနေကြသည်။ အဘယ်ကြောင့်ဆိုသော် ၎င်းတို့သည် ဤလှည့်စားသောအခြေအနေကို ဖွင့်ပြသောအခါ၌ ၎င်းတို့ထံမှ အမှန်တကယ် ပိုင်းခြားစိစစ်ခြင်း၊ သို့မဟုတ် နောင်တရခြင်းကို မည်သည့်အခါမျှ မကြားရသောကြောင့်ဖြစ်သည်။ ၎င်းတို့သည် စုဝေးပွဲများတွင် ၎င်းတို့၏ အတွေ့အကြုံ၊ မိမိကိုယ်ကို ပိုင်းခြားစိစစ်ခြင်းနှင့် မိမိကိုယ်ကို သိမြင်ခြင်းနှင့်ဆိုင်သော သက်သေခံချက်တို့ကို မိတ်သဟာယဖွဲ့ဖို့ မဆိုထားနှင့်။ အခြားလူများထံသို့ မည်သည့်အခါမျှ မိမိတို့ကိုယ်ကို ဖွင့်ချမပြပေ၊ သို့မဟုတ် လူတို့ကို လိမ်ညာလှည့်စားပြီးနောက်တွင် မတောင်းပန်ပေ။ ထိုသို့သော အမှုကိစ္စများနှင့်ပတ်သက်ပြီး မိမိတို့ကိုယ်ကို မည်သို့ သိမြင်လာသည်၊ သို့မဟုတ် မည်သို့ နောင်တရခဲ့သည်ဆိုသည်ကိုလည်း လုံးဝ မပြောပေ။ ဤအရာများထဲမှ မည်သည့်အရာကိုမျှ ၎င်းတို့ မလုပ်ဆောင်ကြပေ။ ဤသည်မှာ ၎င်းတို့သည် မိမိတို့ကိုယ်ကို မသိ၊ အမှန်တကယ် နောင်တမရကြဆိုသည်ကို သက်သေပြသည်။ ၎င်းတို့က မိမိတို့သည် လှည့်စားတတ်သည်၊ ရိုးသားသူတစ်ယောက်ဖြစ်လိုသည်ဟု ပြောသောအခါတွင် ၎င်းတို့က ဆောင်ပုဒ်များကို အော်ပြီး အယူဝါဒကို ဟောပြောနေခြင်းသက်သက်သာဖြစ်သည်။ ဤထက် မပိုပေ။ ဤအရာများကို ၎င်းတို့ လုပ်ဆောင်ခြင်းမှာ ရေစုန်မျှောလိုက်ပြီး လူအများနောက်သို့လိုက်ဖို့ ကြိုးစားနေသောကြောင့် ဖြစ်နိုင်သည်။ သို့မဟုတ် အသင်းတော်အသက်တာ၏ ပတ်ဝန်းကျင်က ၎င်းတို့ကို အပေါ်ယံလုပ်ဆောင်ရန်၊ ဟန်လုပ်ရန် အတင်းအကျပ်စေခိုင်းသောကြောင့် ဖြစ်နိုင်သည်။ မည်သို့ပင်ဖြစ်စေ ဤသို့သော ဆောင်ပုဒ်များကို အော်ဟစ်သူများ၊ အယူဝါဒကို ဟောပြောသူများသည် မည်သည့်အခါမျှ အမှန်တကယ် နောင်တရမည်မဟုတ်ပေ။ ၎င်းတို့သည် ဘုရားသခင်၏ ကယ်တင်ခြင်းကို သေချာပေါက် ရရှိနိုင်မည်မဟုတ်ပေ။

လူတို့ကို လက်တွေ့လုပ်ဆောင်ရန် ဘုရားသခင်အလိုရှိသော သမ္မာတရားတိုင်းသည် လူတို့အား အဖိုးအခပေးဆပ်ရန်၊ ၎င်းတို့၏ လက်တွေ့အသက်တာများတွင် ထိုသမ္မာတရားတိုင်းကို အမှန်တကယ် လက်တွေ့လုပ်ဆောင်ပြီး တွေ့ကြုံရန် လိုအပ်သည်။ ဘုရားသခင်က လူတို့အား အယူဝါဒကို ရွတ်ဖတ်ခြင်း၊ မိမိကိုယ်ကို သိမြင်မှုအား ပြောဆိုခြင်း၊ မိမိတို့သည် လှည့်စားတတ်သည်၊ လူလိမ်များဖြစ်သည်၊ ကောက်ကျစ်သည်၊ ကလိမ်ကကျစ်ပြုလုပ်ပြီး သစ္စာဖောက်သည်ဟု အသိအမှတ်ပြုခြင်းမျှဖြင့်သာ အပြောနှင့်သာ လုပ်ဆောင်ရန်၊ ဤအရာများကို အကြိမ်ရေအနည်းငယ် ကျယ်လောင်စွာ ပြောဆိုပြီး ပစ်ထားလိုက်ရန် မတောင်းဆိုပေ။ လူတစ်ယောက်သည် ဤအရာအားလုံးကို ဝန်ခံသော်လည်း ထို့နောက်တွင် အနည်းငယ်မျှပင် မပြောင်းလဲလျှင်၊ သူသည် ဆက်လက်၍ လိမ်ညာပြီး လှည့်စားလျှင်၊ တူညီသော ဆိုးယုတ်သော လှည့်ကွက်များ၊ တစ်စုံတစ်ခုကို သူ ကြုံတွေ့သောအခါ တူညီသော ဆိုးယုတ်သော နည်းလမ်းများကို အသုံးချလျှင်၊ သူ၏ နည်းစနစ်များ၊ နည်းလမ်းများက မည်သည့်အခါမျှ မပြောင်းလဲလျှင် ဤသူသည် သမ္မာတရား၏ စစ်မှန်မှုအတွင်းသို့ ဝင်ရောက်နိုင်စွမ်းရှိသလော။ သူသည် သူ၏ စိတ်သဘောထားကို ပြောင်းလဲနိုင်ဦးမည်လော။ လုံးဝ မပြောင်းလဲနိုင်ပေ။ သင်သည် သင့်ကိုယ်သင် ဆင်ခြင်သုံးသပ်နိုင်ပြီး သိရှိနိုင်ရမည်။ ညီအစ်ကိုမောင်နှမများရှေ့တွင် သင့်ကိုယ်သင် ဖွင့်ဟပြီး ချပြရန်၊ သင်၏ အခြေအနေမှန်ကို မိတ်သဟာယဖွဲ့ပြရန် သတ္တိရှိရမည်။ သင်သည် သင်၏ ဖောက်ပြန်ပျက်စီးသော စိတ်သဘောထားကို မချပြရဲလျှင်ဖြစ်စေ၊ မစိစစ်ရဲလျှင်ဖြစ်စေ၊ သင်၏ အမှားများကို ဝန်မခံရဲလျှင်ဖြစ်စေ မိမိကိုယ်ကို သိသောသူဖြစ်ဖို့ မဆိုထားနှင့်၊ သမ္မာတရားကို လိုက်စားခြင်းပင်မရှိပေ။ လူတိုင်းသည် သူတစ်ပါးတို့၏ အထင်ကြီးလေးစားမှုကို ရဖို့အတွက်သက်သက်ဖြင့် အခြားလူများ၏ လေးစာမှုကို ရရှိရန်အတွက် ကြွားဝါသော၊ ဘုရားသခင်ကို မည်မျှချစ်သည်၊ ဘုရားသခင်ကို မည်မျှနာခံသည်၊ ဘုရားသခင်အပေါ် မည်မျှ ဆက်ကပ်အပ်နှံမှုရှိသည်၊ ဘုရားသခင်က ၎င်းတို့ကို မည်မျှချစ်သည်ဟု သက်သေခံသော ထိုဘာသာရေးသမားများကဲ့သို့ဖြစ်လျှင်၊ လူတိုင်းက ၎င်းတို့၏ ကိုယ်ပိုင်တစ်ဦးချင်းစီ၏ အစီအစဉ်များထားရှိပြီး ၎င်းတို့၏ စိတ်နှလုံးတွင် သီးသန့်နေရာတစ်ခုကို ထိန်းသိမ်းထားလျှင် မည်သူက တကယ့်အတွေ့အကြုံများကို ပြောဆိုနိုင်မည်နည်း။ တစ်ဦးနှင့်တစ်ဦးပြောပြရန် မည်သူမဆို၌ စစ်မှန်သောအတွေ့အကြုံ အဘယ်သို့ ရှိနိုင်မည်နည်း။ “အတွေ့အကြုံများ မျှဝေခြင်းနှင့်ပြောပြခြင်း” ဆိုသည်မှာ ဘုရားနှုတ်ကပတ်တော်အပေါ် သင့်အတွေ့အကြုံနှင့်အသိကိုမိတ်သဟာယဖွဲ့ခြင်းဖြစ်သည်။ သင်၏ စိတ်နှလုံးထဲမှ အတွေးတိုင်း၊ သင်၏အခြေအနေ၊ သင့်တွင် ဖွင့်ပြသော ဖောက်ပြန်ပျက်စီးသော စိတ်သဘောထားကို ထုတ်ဖော်ပြောဆိုခြင်းဖြစ်သည်။ ဤအရာတို့ကို အခြားလူများအား သိမြင်ခွင့်ပေးခြင်း၊ ထို့နောက် သမ္မာတရားကို မိတ်သဟာယဖွဲ့ခြင်းအားဖြင့် ပြဿနာကို ဖြေရှင်းခြင်းတို့ ဖြစ်သည်။ အတွေ့အကြုံများကို ဤနည်းဖြင့် မိတ်သဟာယဖွဲ့သည့်အခါမှသာ လူတိုင်းက များစွာ အကျိုးဖြစ်ပြီး ဆုလာဘ်များကို ရိတ်သိမ်းရသည်။ ဤသည်ကသာ စစ်မှန်သော အသင်းတော်အသက်တာဖြစ်သည်။ ဘုရားနှုတ်ကပတ်တော်၊ သို့မဟုတ် ဓမ္မတေးသီချင်းတစ်ပုဒ်အပေါ် သင်၏ အသိအမြင်များကို အနှစ်မရှိပြောဆိုခြင်းသက်သက်ဖြစ်လျှင် သင်သည် ရှေ့ဆက်ခြင်းလုံးဝမရှိဘဲ၊ သင်၏ တကယ့်အခြေအနေ၊ သို့မဟုတ် ပြဿနာများကို ယူဆောင်လာခြင်းမရှိဘဲ သင်ကျေနပ်သလို ပြောပြခြင်းဖြစ်သည်။ ထိုသို့သော မိတ်သဟာယမျိုးသည် အကျိုးအမြတ်မရှိပေ။ လူတိုင်းက အယူဝါဒဆိုင်ရာ၊ သို့မဟုတ် သီအိုရီဆိုင်ရာ အသိအမြင်များကို ပြောကြသော်လည်း တကယ့်အတွေ့အကြုံများမှ ၎င်းတို့ ရရှိသော အသိအမြင်အကြောင်း လုံးဝ မပြောလျှင်၊ သမ္မာတရားကို မိတ်သဟာယဖွဲ့သောအခါ ၎င်းတို့သည် ၎င်းတို့၏ ကိုယ်ရေးကိုယ်တာ ဘဝများ၊ ၎င်းတို့၏ လက်တွေ့ဘဝ ပြဿနာများ၊ ၎င်းတို့၏ ကိုယ်ပိုင်အတွင်းရေးများအား ပြောခြင်းကို ရှောင်လျှင် စစ်မှန်သော ပြောဆိုဆက်ဆံရေးက မည်သို့ ဖြစ်ပေါ်နိုင်မည်နည်း။ စစ်မှန်သော ယုံကြည်မှု အဘယ်သို့ ရှိနိုင်မည်နည်း။ မည်သည့်အရာမျှ ရှိနိုင်မည်မဟုတ်။ အကယ်၍ ဇနီးသည်တစ်ဦးက သူမ၏ခင်ပွန်းသည်အား သူမ၏စိတ်နှလုံးထဲရှိ စကားများကို လုံးဝထုတ်မပြောပြပါက၊ ရင်းနှီးမှုဟု မှတ်ယူသလော။ သူတို့သည် တစ်ယောက်နှင့် တစ်ယောက် စိတ်ထဲတွင် ရှိသည့်အရာကိုသိဖို့ ဖြစ်နိုင်သလော။ (မဖြစ်နိုင်ပါ။) ဤသို့ဆိုလျှင် သူတို့က “နင့်ကိုငါချစ်တယ်” ဟု အစဉ်မပြတ် ပြောကြသည်ဆိုကြပါစို့။ ဤအရာကိုသာ သူတို့ပြောသော်လည်းသူတို့၏ စိတ်နှလုံးများထဲ အမှန်တကယ် စဉ်းစားနေကြသည့်အရာ၊ သူတို့၏ လက်တွဲဖော်ထံမှ သူတို့မျှော်လင့်သည့်အရာ သို့မဟုတ် သူတို့၌ရှိနေသည့် ပြဿနာများတို့ကို မည်သည့်အခါမျှ အချင်းချင်း ဖွင့်ပြခြင်း၊ သို့မဟုတ် ပြောပြခြင်း မရှိဖူးပါချေ။ သူတို့သည်မည်သည့်အခါမျှ အချင်းချင်း ရင်မဖွင့်ကြပေ။ ပြီးလျှင် သူတို့သည် အတူတကွရှိနေကြသည့်အခါ တစ်ဦးနှင့်တစ်ဦး အပေါ်ယံ ယဉ်ကျေးသိမ်မွေ့သော စကားများမှအပ ဘာမျှမရှိကြပေ။ သူတို့သည် အမှန်တကယ် လင်မယားဖြစ်ကြသလော။ မဟုတ်သည်မှာ အသေအချာပင်။ အလားတူပင် အကယ်၍ ညီအစ်ကိုမောင်နှမများသည် အချင်းချင်း စိတ်ချယုံကြည်နိုင်စွမ်း ရှိကာ၊ အချင်းချင်း ကူညီနိုင်စွမ်း ရှိပြီး၊ အချင်းချင်း ကူညီနိုင်စွမ်းနှင့် ထောက်ပံ့နိုင်စွမ်းရှိရမည် ဆိုပါက အယောက်တိုင်းစီသည် ၎င်းတို့၏စစ်မှန်သော အတွေ့အကြုံများ အကြောင်းကို ပြောရမည် ဖြစ်သည်။ အကယ်၍ သင်သည် သင်၏ကိုယ်ပိုင် စစ်မှန်သော အတွေ့အကြုံများအကြောင်းကို မည်သည့်အရာမျှ မပြောဘဲ— လူနားလည်သည့် အယူဝါဒစကားများ၊ ဩဝါဒစာများကိုသာ ဟောလျှင်၊ ဘုရားသခင်အား ယုံကြည်ခြင်းနှင့်ပတ်သက်သည့် အယူဝါဒအနည်းငယ်ကိုသာ ဟောပြီး ဆန်းသစ်မှုမရှိသော စကားလုံးဟောင်းများကိုသာပြောပြီး သင့်စိတ်နှလုံးထဲရှိသည့်အရာအကြောင်း ဖွင့်မပြောပါက— သင်သည် ရိုးသားသောသူတစ်ဦး မဟုတ်ပေ။ ထို့အပြင် သင်၌ ရိုးသားသူတစ်ဦး ဖြစ်နိုင်စွမ်း မရှိပေ။ အလားတူ ဥပမာကို အသုံးပြုရလျှင် နှစ်အချို့ကြာ အတူနေထိုင်ခဲ့စဉ်တွင်၊ ခင်ပွန်းတစ်ဦးနှင့် ဇနီးတစ်ခုတို့သည် ရံဖန်ရံခါ စတင်စကားများ ရန်ဖြစ်ကြလျက်၊ အချင်းချင်း နေသားကျဖို့ ကြိုးစားကြသည်။ သို့ရာတွင် သင်တို့နှစ်ဦးလုံးသည် သာမန်လူ့သဘာဝ ရှိပါက၊ ပြီးလျှင် အသက်တာ၌၊ သို့မဟုတ်အလုပ်၌ သင် ကြုံတွေ့ရသည့် မည်သည့်အခက်အခဲများကိုမဆို၊ သင်စိတ်ထဲ၌တွေးနေသည့် မည်သည့်အရာမဆို၊ အမှုအရာများကို ဖြေရှင်းဖို့ သင်မည်သို့ စီစဉ်နေပါစေ၊ သင်၏သားသမီးများအနာဂတ်အတွက် သင်၌ ရှိသည့် အကြံဉာဏ်များ၊ သို့မဟုတ် အစီအစဉ်များဖြင့် ပတ်သက်လျှင်- သင်သည် သူ့ကို အစဉ် စိတ်နှလုံးထဲမှ စကားပြောပြီး သူကလည်း သင့်ကို ထိုသို့စကားပြောလျှင် သင်သည် သင်၏လက်တွဲဖော်ကို ဤအရာအားလုံးကို ပြောပြလျှင်သင်တို့နှစ်ဦးသည် အချင်းချင်း အထူးတလည် ရင်းနှီးနေမည် မဟုတ်လော။ သို့သော် သူသည် သူ၏အတွင်းကျကျ အတွေးအခေါ်များကို သင့်ကို မည်သည့်အခါမျှ မပြောဘဲ၊ အိမ်သို့ လစာ ယူဆောင်လာခြင်သာလုပ်ဆောင်လျှင်၊ သင်က သူ့အား သင်၏အတွေးအခေါ်များကို မည်သည့်အခါမျှ မပြောဘဲ၊ သင်တို့သည် မည်သည့်အခါမျှ အချင်းချင်း ယုံကြည်စွာ ရင်ဖွင့်မပြောပြလျှင်၊ သင်တို့နှစ်ဦးကြားတွင် စိတ်ခံစားချက်ဆိုင်ရာ ကွာဟချက် တစ်ခု ရှိနေသည်မဟုတ်လော။ သင်တို့သည် အချင်းချင်း၏ အတွေးအခေါ်များနှင့် အစီအစဉ်များကို နားမလည်ကြသည့်အတွက် ကွာဟချက် ရှိနေမည်မှာ သေချာသည်။ အဆုံး၌ သင်၏လက်တွဲဖော်သည် မည်သည့် လူမျိုးဖြစ်သည်ကို သငသိမြင်နိုင်မည်မဟုတ်သကဲ့သို့၊ သူကလည်း သင်မည်သည့်လူမျိုးဖြစ်သည်ကို သိနိုင်မည်မဟုတ်ပေ။ သင်သည် သူ၏လိုအပ်ချက်များကို နားလည်မည်မဟုတ်သကဲ့သို့၊ သူကလည်း သင်၏လိုအပ်ချက်များကို နားလည်မည်မဟုတ်ပေ။ လူများ၌ နှုတ်ဖြင့်ဖြစ်စေ၊ ဝိညာဉ်ရေးရာဖြင့်ဖြစ်စေ ဆွေးနွေးပြောဆိုခြင်း မရှိပါက၊ ၎င်းတို့ကြားတွင် ရင်းနှီးမှုရဖို့ ဖြစ်နိုင်ချေ မရှိပေ၊ ပြီးလျှင် ၎င်းတို့သည် အချင်းအချင်းအတွက် မထောက်ပံ့နိုင်သကဲ့သို့ မကူညီနိုင်ပေ။ သငသည် ဤသည်ကိ တွေ့ကြုံပြီးဖြစ်သည်မဟုတ်လော။ သင်၏ မိတ်ဆွေက သူတွေးနေသည့်အရာအားလုံးနှင့် သူခံစားနေရသည့် မည်သည့်အရာမဆို သို့မဟုတ် သူထားရှိသည့် မည်သည့်ပျော်ရွှင်မှုကိုမဆို သင့်အား ဖွင့်ဟလျက်၊ သင့်အား အရာအားလုံးကို ယုံကြည်စွာ ရင်ဖွင့်ပြောပြပါက၊ သင်သည် အထူပင် သူနှင့်ရင်းနှီးသည်ဟု ခံစားရမည်မဟုတ်သလော။ ဤအရာများကိုသင့်အား သူပြောဖို့ လိုလားနေသည့်အကြောင်းအရင်းမှာ သင်က သူ့ကိုလည်း သင်၏အတွင်းအကျဆုံး အတွေးများကို ယုံကြည်စွာ ပြောပြထားပြီးဖြစ်သောကြောင့် ဖြစ်သည်။ သင်တို့သည် အထူးပင်ရင်းနှီးပြီး ယင်းက သင်သည် အချင်းချင်း အလွန်သင့်မြတ်ပြီး အချင်းချင်း ကူညီနိုင်သောကြောင့် ဖြစ်သည်။ အသင်းတော်ရှိ ညီအစ်ကိုမောင်နှမများအကြား ဤမိတ်သဟာယဖွဲ့ခြင်းမျိုးနှင့် အပြန်အလှန်ပြုခြင်း မရှိလျှင် ၎င်းတို့သည် သဟဇာတဖြစ်စွာ ဆက်ဆံရေး အဆင်ပြေနိုင်မည်မဟုတ်ပေ။ ၎င်းတို့၏ တာဝန်များကို ထမ်းဆောင်စဉ်တွင် ကောင်းစွာအလုပ်လုပ်ဖို့ ဖြစ်နိုင်မည်မဟုတ်သည်ကို တွေ့ရမည်။ ထို့ကြောင့် သမ္မာတရားကို မိတ်သဟာယဖွဲ့ခြင်းသည် ဝိညာဉ်ရေးရာ ပြောဆိုဆက်ဆံမှုနှင့် စိတ်နှလုံးအတွင်းမှ ပြောဆိုနိုင်သည့် အရည်အချင်း လိုအပ်သည်။ ဤသည်မှာ ရိုးသားသူတစ်ယောက်ဖြစ်ရန် လူတစ်ယောက်တွင်ရှိရမည့် စည်းမျဉ်းတစ်ခုဖြစ်သည်။

အချို့က ရိုးသားသူတစ်ဦးဖြစ်ရန် သမ္မာတရားကို ပြောပြီး စိတ်နှလုံးအတွင်းမှ ပြောဆိုရမည်၊ လိမ်ညာလှည့်စားလျှင် ထိုသူသည် ဖွင့်ပြောကာ မိမိကိုယ်ကိုယ် ဖွငချပြရမည်ဖြစ်သည်ဆိုသည်ကို ကြားသည့်ခါ ၎င်းတို့က၊ “ရိုးသားရန် ခက်ခဲသည်။ ကျွန်ုပ်တွေးသမျှကို အခြားသူများအား ပြောရမည်လော။ အပြုသဘောဆောင်သောအရာများကို မိတ်သဟာယဖွဲ့ခြင်းမှာ မလုံလောက်သလော။ အခြားသူများအား ကျွန်ုပ်၏ မကောင်းသော သို့မဟုတ် ဖောက်ပြန်ပျက်စီးသော ဘက်ကို ပြောပြရန်မလိုအပ်ပေ၊ ကျွန်ုပ်ပြောပြရန်လိုသလော” ဟု ဆိုကြ၏။ အကယ်၍ သင်သည် အခြားသူတို့အား ဖွင့်ချမပြပါက၊ သင့်ကိုယ်သင် လေ့လာဆန်းစစ်ခြင်း မပြုပါက သင်သည် သင့်ကိုယ်သင် မည်သည့်အခါမျှ သိလိမ့်မည်မဟုတ်။ သင်သည် မည်သည့်အရာဖြစ်ကြောင်း မည်သည့်အခါမျှ သတိပြုမိလိမ့်မည်မဟုတ်ဘဲ အခြားသူများက သင့်ကို ဘယ်သောအခါမျှ ယုံကြည်နိုင်လိမ့်မည် မဟုတ်ပေ။ ဤသည်မှာ အမှန်တရားတစ်ခုဖြစ်သည်။ အကယ်၍ သင့်အား အခြားသူများ ယုံကြည်စေလိုလျှင် သင်သည် ပထမဦးစွာ ရိုးသားရမည်။ ရိုးသားသည့် လူတစ်ဦးဖြစ်ဖို့၊ သင်၏ စိတ်နှလုံးကို အယောက်တိုင်း တွေ့မြင်နိုင်ဖို့အလို့ငှာ၊ သင် တွေးနေသည့် အရာအားလုံးကို မြင်နိုင်ပြီး၊ သင်၏ သရုပ်မှန်ကို ကြည့်ရှုနိုင်ဖို့အလို့ငှာ၊ ဦးစွာပထမ သင်၏ စိတ်နှလုံးကို ဖွင့်ပြရမည်။ သင်သည် မိမိကိုယ်ကိုယ် ရုပ်ဖျက်ဖို့ သို့မဟုတ် ဖုံးကွယ်ဖို့ မကြိုးစားရ။ ထိုအခါမှသာ အခြားလူများက သင့်ကို ယုံကြည်ပြီး ရိုးသားသူတစ်ယောက်ဖြစ်သည်ဟု ယူဆကြလိမ့်မည်။ ဤသည်မှာ အခြေခံအကျဆုံး လက်တွေ့လုပ်ဆောင်ချက်ဖြစ်ပြီး ရိုးသားသော လူတစ်ဦးဖြစ်ခြင်း၏ မရှိမဖြစ်လိုအပ်ချက်တစ်ခုဖြစ်သည်။ သင်သည် အမြဲဟန်ဆောင်လျှင် သန့်ရှင်းခြင်း၊ မြင့်မြတ်ခြင်း၊ ကြီးမြတ်ခြင်း၊ ကိုယ်ကျင့်စရိုက်မြင့်မားခြင်း ရှိကြောင်း အမြဲအယောင်ဆောင်လျှင်၊ သင်သည် လူတို့အား သင်၏ဖောက်ပြန်ပျက်စီးခြင်းနှင့် သင်၏ချွတ်ယွင်းချက်များကို အမြင်မခံလျှင်၊ လူတို့က သင်သည် တည်ကြည်မှုရှိသည်၊ ကြီးမြတ်သည်၊ မိမိကိုယ်ကို ငြင်းပယ်သည်၊ တရားမျှတသည်၊ အတ္တကင်းခြင်းရှိသည်ဟု ထင်ကြစေရန် သင်သည် လူတို့အား ဟန်ဆောင်ထားသော ရုပ်သွင်ကို ပြလျှင် ဤသည်မှာ လှည့်ဖြားခြင်းနှင့် လိမ်ညာခြင်း မဟုတ်လော။ အချိန်ကြာလျှင် လူတို့သည် သင့်ကို ရိပ်စားမိနိုင်လိမ့်မည် မဟုတ်လော။ ထို့ကြောင့် အယောင်ဆောင်ခြင်း မပြုနှင့်၊ သို့မဟုတ် သင့်ကိုယ်သင် မဖုံးကွယ်နှင့်။ ထိုသို့ပြုမည့်အစား အခြားသူများ မြင်ဖို့အတွက် မိမိကိုယ်ကိုယ်နှင့် သင်၏စိတ်နှလုံးကို ဖွင့်ချပြလော့။ သင်သည် အခြားသူများမြင်စေရန် သင်၏စိတ်နှလုံးကို ဖွင့်ဟပြနိုင်လျှင်၊ အပြုသဘောဆောင်သော၊ အပျက်သဘောဆောင်သောအရာနှစ်မျိုးလုံးပါဝင်သော သင်၏အတွေးများနှင့် အစီအစဉ်များအားလုံး- ကို ဖွင့်ချပြနိုင်လျှင် ဤသည်မှာ ရိုးသားမှုမဟုတ်သလော။ သင်သည် အခြားသူများ မြင်စေရန် သင့်ကိုယ်သင် ဖွင့်ဟပြနိုင်ပါက၊ ဘုရားသခင်သည်လည်း သင့်ကို မြင်ပြီး “သင်သည် အခြားသူများမြင်စေရန် သင့်ကိုယ်သင် ဖွင့်ဟပ့်လျှင် ငါ့ရှေ့တွင သင်သည် ဧကန်အမှန်ပင် ရိုးသား၏” ဟု ဆိုလိမ့်မည်။ သို့သော် အကယ်၍ သင်သည် အခြားသူများ မမြင်သည့်အခါ၊ ဘုရားသခင်ထံ၌သာ သင့်ကိုယ်သင် ဖွင့်ဟပြပြီး၊ ကြီးမြတ်ကာ မြင့်မြတ်သကဲ့သို့ သို့မဟုတ် ၎င်းတို့နှင့်အတူတူ ရှိသည့်အချိန်တွင် ကိုယ်ကျိုးမငဲ့သကဲ့သို့ အစဉ်သဖြင့် ဟန်ဆောင်ပါက၊ ဘုရားသခင်သည် သင့်အား မည်သို့ ထင်မည်နည်း။ မည်သည့်အရာကို ပြောဆိုလိမ့်မည်နည်း။ သူက၊ “သင်သည်လုံးလုံးလျားလျားပင်လှည့်စားသူတစ်ယောက်ဖြစ်သည်။ သင်သည် လုံးလုံးလျားလျားပင် သူတော်ကောင်း ဟန်ဆောင်ပြီး ယုတ်မာ၏၊ ထို့အပြင် သင်သည် ရိုးသားသောလူတစ်ဦး မဟုတ်” ဟု ဆိုလိမ့်မည်။ ထို့ကြောင့် ဘုရားက သင့်အား စီရင်လိမ့်မည်။ အကယ်၍ သင်သည် ရိုးသားသော လူတစ်ဦးဖြစ်လိုပါက၊ ဘုရားသခင်ရှေ့ သို့မဟုတ် အခြားသူတို့ရှေ့တွင် မည်သည့်အရာကို သင်လုပ်ဆောင်ပါစေ၊ သင်စိတ်အတွင်းရှိသော အခြေအနေနှင့် သင့်စိတ်နှလုံးထဲရှိ စကားများအကြောင်းတို့ကို ရိုးသားပွင့်လင်းသည့် ဖြစ်ကြောင်းကုန်စင် ပြောနိုင်သင့်သည်။ ဤသည်မှာ စွမ်းဆောင်ရရှိရန် လွယ်ကူသလော။ ယင်းက လေ့ကျင့်ခြင်း အချိန်ကာလတစ်ခုအပြင် ဘုရားသခင်ထံ မကြာခဏ ဆုတောင်းခြင်းနှင့် မှီခိုခြင်းတို့လည်း လိုအပ်ပေသည်။ သင်သည် အရာခပ်သိမ်းတွင် စိတ်နှလုံးထဲမှနေ၍ ရိုးရှင်းစွာ၊ ပွင့်လင်းစွာပြောဆိရန် သင့်ကိုယ်သင် လေ့ကျင့်ရမည်။ ဤကဲ့သို့သော် လေ့ကျင့်မှုမျိုးဖြင့် သင် တိုးတက်နိုင်ပေသည်။ သင်သည် အကြီးစား အခက်အခဲကို ကြုံတွေ့လျှင် ဘုရားသခင်ထံ ဆုတောင်းပြီး သမ္မာတရားကို ရှာဖွေရမည်။ သမ္မာတရားကို လက်တွေ့လုပ်ဆောင်နိုင်သည်အထိ သင်၏စိတ်နှလုံးထဲတွင်တွန်းလှန်တိုက်ခိုက်ပြီး ဇာတိပကတိကို အောင်မြင်ဖို့ လိုအပ်သည်။ ထိုသို့သင့်ကိုယ်သင် လေ့ကျင့်ရာတွင် နည်းနည်းချင်းဆိုသလို သင်၏ စိတ်နှလုံးသည် တဖြည်းဖြည်း ဖွင့်ဟလာမည်။ သင်သည် ပို၍ပို၍သန့်စင်လာမည်ဖြစ်ကာသင်၏ အပြောနှင့် အလုပ်၏ သက်ရောက်မှုများသည် ယခင်ကထက် ကွာခြားလိမ့်မည်။ သင်၏အလိမ်အညာများနှင့် လှည့်စားမှုများသည် ပို၍ နည်းပါးလာမည်ဖြစ်ကာ ဘုရားသခင်၏ ရှေ့မှောက်တွင် သင် အသက်ရှင်နိုင်လိမ့်မည်။ ထို့နောက်တွင် သင်သည် အခြေခံအားဖြင့် ရိုးသားသူတစ်ဦး ဖြစ်လာပြီးဖြစ်လိမ့်မည်။

လူသားမျိုးနွယ်အားလုံးသည် စာတန်၏ ဖျက်ဆီးခြင်းကို ခံထားရသောကြောင့် ဆိုးယုတ်သော စိတ်သဘောထားဖြင့် အသက်ရှင်ကြသည်။ လူတို့သည် စာတန်ကဲ့သို့ပင် ကဏ္ဍတိုင်း၌ အယောင်ဆောင်ကြပြီး ဟန်လုပ်ကြသည်။ အမှုကိစ္စအားလုံးတွင် လှည့်စားခြင်း၊ အလေးအနက်မထားခြင်းတို့ကို ကျင့်သုံးကြသည်။ ၎င်းတို့က လှည့်စားခြင်း၊ အလေးအနက်မထားခြင်းတို့ကို ကျင့်သုံးခြင်းမရှိသည့်အရာတစ်ခုမျှ မရှိပေ။ လူအချို့သည် ဈေးဝယ်ထွက်ခြင်းကဲ့သို့သော အလွန်အတွေ့ရများသည့် ပြုဖွယ်ဆောင်တာများတွင်ပင် လှည့်စားသော အရာများကို လုပ်ဆောင်ကြသည်။ ဥပမာ ၎င်းတို့သည် ခေတ်အဆန်ဆုံး ဝတ်စုံကို ဝယ်ခဲ့နိုင်သည်။ သို့သော် ၎င်းတို့က ထိုအရာကို အလွန်နှစ်သက်သော်လည်း ဘုရားကျောင်းထဲတွင် မဝတ်ဆင်ရဲပေ။ အကြောင်းမှာ ညီအစ်ကိုမောင်နှမများက ၎င်းတို့အကြောင်းကို ပြောပြီး ၎င်းတို့ကို လေးနက်မှုမရှိဟု ပြောမည်စိုးသောကြောင့်ဖြစ်သည်။ ထို့ကြောင့် ၎င်းတို့က အခြားလူများ၏ နောက်ကွယ်တွင်သာ ဝတ်ကြသည်။ ဤသည်မှာ မည်သို့သော အပြုအမူမျိုးဖြစ်သနည်း။ လှည့်စားသော ဉာဏ်များသော စိတ်သဘောထားကို ဖွင့်ပြခြင်းဖြစ်သည်။ လူတစ်ယောက်က အဘယ်ကြောင့် ခေတ်ဆန်သော ဝတ်စုံတစ်ခုကို ဝယ်သော်လည်း ညီအစ်ကိုမောင်နှမများရှေ့တွင် မဝတ်ရဲသနည်း။ သူ၏ စိတ်နှလုံးတွင် ခေတ်ဆန်သောအရာများကို နှစ်သက်သည်။ မယုံကြည်သူများကဲ့သို့ ကမ္ဘာလောက၏ ရေပန်းစားသောအရာများနောက်သို့လိုက်သည်။ ညီအစ်ကိုမောင်နှမများက သူ့အကြောင်းသိမည်ကိုလည်းကောင်း၊ သူသည်မည်မျှ လေးနက်မှုမရှိကြောင်း မြင်မည်ကိုလည်းကောင်း၊ သူသည် လေးစားထိုက်သော၊ ဖြောင့်မတ်သောသူမဟုတ်ကြောင်း မြင်မည်ကိုလည်းကောင်း ကြောက်ရွံ့သည်။ သူ၏ စိတ်နှလုံးတွင် ခေတ်ဆန်သောအရာများနောက်ကို လိုက်ပြီး ထိုအရာများကို စွန့်လွှတ်ဖို့အတွက် အခက်အခဲဖြစ်ကြသည်။ ထို့ကြောင့် အိမ်တွင်သာ ဝတ်ဆင်နိုင်ပြီး ညီအစ်ကိုမောင်နှမများအား မြင်ခွင့်ပေးရမည်ကို ကြောက်သည်။ သူနှစ်သက်သောအရာများသည် လူမြင်မခံနိုင်လျှင် အဘယ်ကြောင့်ထိုအရာများကို မစွန့်လွှတ်နိုင်သနည်း။ သူ့အား ထိန်းချုပ်နေသော ဆိုးယုတ်သော စိတ်သဘောထားတစ်ခုမရှိသလော။ သူသည် အယူဝါဒစကားများကို စဉ်ဆက်မပြတ်ပြောဆိုပြီး သမ္မာတရားကို နားလည်သည့်ပုံစံရှိသည့်တိုင်အောင် သမ္မာတရားကို လက်တွေ့မလုပ်ဆောင်နိုင်ပေ။ ဤသည်မှာ ဆိုးယုတ်သောစိတ်သဘောထားတစ်ခုဖြင့် အသက်ရှင်နေသောသူတစ်ယောက်ဖြစ်သည်။ လူတစ်ယောက်သည် အစဉ်သဖြင့် အပြောနှင့် အလုပ်တွင် ဟန်ဆောင်နေလျှင်၊ အခြားလူများအား သူ၏ အရှိအတိုင်း မြင်ခွင့်မပြုလျှင်၊ အခြားလူများရှေ့တွင် ဘာသာရေးကိုင်းရှိုင်းသူတစ်ယောက်၏ ပုံရိပ်ကို အစဉ် ဟန်ဆောင်လျှင် ထိုသူနှင့် ဖာရိရှဲတို့ကြား၌ မည်သည့်ကွာခြားချက်ရှိသနည်း။ သူသည် မကောင်းသောမိန်းမတစ်ယောက်၏ ဘဝကို နေထိုင်လိုကြသည်။ သို့သော် သူ၏ ဗြဟ္မစရိယအကျင့်အတွက် တည်ဆောက်ထားသော အထိမ်းအမှတ်တစ်ခုလည်းရှိလိုကြသည်။ သူသည် လူအများရှေ့တွင် သူ၏ ထူးခြားဆန်းပြားသော ဝတ်စုံအား ဝတ်၍မရသည်ကို ကောင်းစွာသိကြသည်။ ဤသို့ဆိုလျှင် အဘယ်ကြောင့် ဝယ်သနည်း။ ငွေကို ဖြုန်းတီးခြင်းမဟုတ်လော။ ဤသည်မှာ သူသည် ဤသို့သောအရာမျိုးကို နှစ်သက်ပြီး ထိုဝတ်စုံကို တမ်းတမ်းစွဲဖြစ်နေသောကြောင့်သာဖြစ်သည်။ ထို့ကြောင့် သူသည် ထိုဝတ်စုံကို ဝယ်မှဖြစ်မည်ဟု ခံစားမိသည်။ သို့သော် ဝယ်ပြီးသည်နှင့် အပြင်တွင် ဝတ်လို့မရပေ။ သုံးလေးနှစ်ကုန်သွားပြီးနောက်တွင် သူသည် ထိုဝတ်စုံကို ဝယ်မိသည်ကို နောင်တရပြီး “ငါသည် ဤသို့ ပြုလုပ်ရသည်အထိ အဘယ်သို့ အလွန်မိုက်မဲပြီး အလွန်စက်ဆုပ်ဖွယ်ဖြစ်ရသနည်း။” ဟူ၍ ရုတ်တရက် သဘောပေါက်သွားသည်။ သူပင်လျှင် သူလုပ်သည့်အရာကို စက်ဆုပ်မိသည်။ သို့သော် သူ၏ လုပ်ရပ်များကို မထိန်းချုပ်နိုင်ပေ။ အဘယ်ကြောင့်ဆိုသော် သူသည် သူနှစ်သက်ပြီး လိုက်စားသည့်အရာကို လက်မလွတ်နိုင်သောကြောင့်ဖြစ်သည်။ ထို့ကြောင့် သူသည် မိမိကိုယ်ကို ကျေနပ်စေရန်အတွက် မရိုးသားသည့် နည်းဗျူဟာများနှင့် လှည့်စားမှုကို ခံယူသည်။ သူသည် ဤသို့သော အသေးအဖွဲကိစ္စတွင် လှည့်စားသော စိတ်သဘောထားကို ဖွင့်ပြလျှင် ပို၍ကြီးမားသော အရာတစ်ခုနှင့်ပတ်သက်လာလျှင် သမ္မာတရားကို လက်တွေ့လုပ်ဆောင်နိုင်မည်လော။ ဖြစ်နိုင်မည်မဟုတ်ပေ။ သိသာထင်ရှားစွာပင် လှည့်စားခြင်းသည် သူ၏ သဘာဝဖြစ်သည်။ လှည့်စားမှုသည် သူ၏ ပျော့ကွက်ဖြစ်သည်။ ခြောက်နှစ်၊ ခုနစ်နှစ်အရွယ်ရှိသော ကလေးတစ်ယောက်က သူ၏ မိသားစုနှင့်အတူ ကောင်းသောအရာတစ်ခုကို တစ်ကြိမ်စားလိုက်သည်။ မည်သည့်အရာဖြစ်သည်ကို အခြားကလေးများက သူ့ကို မေးသောအခါ သူက သူ့မျက်လုံးကို မျက်တောင်ခတ်လိုက်ပြီး “ငါ မေ့သွားပြီ။” ဟူ၍ ပြောသည်။ အမှန်တကယ်တွင် သူက အခြားကလေးများကို မပြောပြလိုခြင်းသာဖြစ်သည်။ သူ ယခုတင်စားသည့်အရာကို အမှန်တကယ် မေ့သွားနိုင်သလော။ ဤ ခြောက်နှစ်၊ ခုနစ်နှစ်အရွယ်ကလေးသည် မုသားများပြောတတ်သည်။ ဤသည်မှာ လူကြီးများက သူ့အား လုပ်ဆောင်ရန် သင်ပေးသောအရာတစ်ခုဖြစ်သလော။ သူ၏ အိမ်ပတ်ဝန်းကျင်၏ သက်ရောက်မှုတစ်ခုဖြစ်သလော။ မဟုတ်ပါ။ ဤသည်မှာ လူ့သဘာဝဖြစ်သည်။ သူ၏ အမွေဖြစ်သည်။ လူသည် လှည့်စားသော စိတ်သဘောထားတစ်ခုနှင့်အတူ မွေးဖွားလာသည်။ အမှန်တကယ်တွင် ကလေးက ကောင်းသည့်အရာ မည်သည့်အရာကို စားပါစေ ဤသို့ပြုလုပ်ခြင်းမှာ သာမန်ပင်ဖြစ်သည်။ သူ၏ မိဘများက သူ့အတွက် ပြုလုပ်ပေးခဲ့ခြင်းဖြစ်သည်။ တခြားတစ်ယောက်၏ အစားအစာကို သူ မခိုးယူခဲ့ပေ။ ဤကလေးက ဤသို့သော အခြေအနေမျိုးတွင်၊ လိမ်ညာပြောရန် လုံးဝ မလိုအပ်သောအချိန်တွင် လိမ်ညာပြောနိုင်လျှင် အခြားသောကိစ္စများတွင် ပို၍ပင် လိမ်နိုင်ခြေရှိသည်မဟုတ်လော။ ဤအရာက မည်သည့်ပြဿနာကို ပုံဆောင်ပြနေသနည်း။ ဤသည်မှာ သူ၏ သဘာဝနှင့်သက်ဆိုင်သော ပြဿနာမဟုတ်သလော။ ထိုကလေးက ယခုတွင် အရွယ်ရောက်နေပြီဖြစ်သည်။ လိမ်ညာခြင်းသည် သူ၏ သဘာဝဖြစ်လာသည်။ သူသည် အမှန်ပင် လှည့်စားသူတစ်ယောက်ဖြစ်သည်။ ဤအရာကို အလွန်ငယ်ရွယ်သော အသက်အရွယ်မှစ၍ သူ့တွင် မြင်နိုင်သည်။ လှည့်စားသောသူများသည် အခြားလူများကို လိမ်ညာလှည့်စားခြင်းမပြုဘဲ မနေနိုင်ပေ။ ၎င်းတို့၏ လိမ်ညာလှည့်စားမှုများသည် အချိန်၊ နေရာမရွေး သူ့ဘာသာ ပြသနိုင်သည်။ ၎င်းတို့က ဤအရာများကို မည်သို့လုပ်ဆောင်ရမည်ကို သင်စရာမလိုပေ၊ သို့မဟုတ် ဤအရာများကို လုပ်ဆောင်ရန် လှုံ့ဆော်ပေးဖို့မလိုပေ။ ၎င်းတို့သည် ဤသို့လုပ်ဆောင်နိုင်သော အရည်အချင်းဖြင့် မွေးဖွားလာကြသည်။ ဤကလေးသည် အလွန်ငယ်ရွယ်သောအသက်အရွယ်တွင် လူတို့ကို လှည့်စားရန်အတွက် မုသားများ ကြံဖန်ပြုလုပ်နိုင်လျှင် သူ၏ လိမ်ညာမှုသည် အမှန်ပင် တစ်ကြိမ်တစ်ခါသာဖြစ်သော ပြစ်မှားမှုဖြစ်နိုင်သလော။ သေချာပေါက် မဖြစ်နိုင်ပေ။ ဤသည်မှာ သူသည် သဘောသဘာဝနှင့် အနှစ်သာရအရ လှည့်စားသောသူတစ်ယောက်ဖြစ်သည်ကို ပြသည်။ ဤသို့သော ရိုးရှင်းသောအရာတစ်ခုသည် ပိုင်းခြားသိမြင်ရန် မလွယ်ကူသလော။ လူတစ်ယောက်သည် ကလေးဘဝကတည်းက မုသားများကို ပြောနေခဲ့လျှင်လည်းကောင်း၊ မကြာခဏ လိမ်ညာလျှင်လည်းကောင်း၊ လိမ်ညာလှည့်စားရန်မလိုအပ်သည့် ရိုးရှင်းသောကိစ္စများနှင့်ပင်ပတ်သက်ပြီး လူတို့ကို လိမ်ညာလှည့်စားလျှင်လည်းကောင်း၊ လိမ်ညာခြင်းက သူ၏ သဘာဝဖြစ်လာလျှင်လည်းကောင်း သူ့အတွက် ပြောင်းလဲရန် လွယ်ကူမည်မဟုတ်ပေ။ သူသည် အမှန်စင်စစ်ပင် လှည့်စားသူဖြစ်သည်။ လှည့်စားသောသူများသည် ကယ်တင်ခြင်းမခံရနိုင်ဟု အဘယ်ကြောင့်ဆိုသနည်း။ အဘယ်ကြောင့်ဆိုသော် ၎င်းတို့သည် သမ္မာတရားကို လက်ခံဖို့ အလားအလာမရှိသောကြောင့်ဖြစ်သည်။ ထို့ကြောင့် ၎င်းတို့သည် သန့်စင်ခြင်း၊ ပြောင်းလဲခြင်းခံရဖို့ မဖြစ်နိုင်ပေ။ ဘုရားသခင်၏ ကယ်တင်ခြင်းကို လက်ခံရရှိနိုင်သူများက ဤသို့မဟုတ်ပေ။ ၎င်းတို့သည် အစကတည်းက အတော်အတန် ဟန်ဆောင်မှုကင်းသည်။ ၎င်းတို့က လိမ်ညာမှုအနည်းငယ်ပြောလျှင် ၎င်းတို့သည် ရှက်၍ မျက်နှာနီရဲကာ အနေရခက်ဖို့ ဖြစ်နိုင်ခြေများသည်။ ထိုသို့သောသူတစ်ယောက်က ရိုးသားသူဖြစ်ရန် ပို၍ လွယ်ကူသည်။ သင်က ၎င်းတို့ကို လိမ်ရန်၊ ညာရန် ခိုင်းစေလျှင် ၎င်းတို့က ခက်ခဲသည်ဟု မြင်လိမ့်မည်။ ၎င်းတို့က အမှန်တကယ် လိမ်ညာသောအခါတွင် စကားများကို အကုန်ပြောမထွက်ဘဲ လူတိုင်းက ချက်ချင်းရိပ်စားမိနိုင်သည်။ ဤသူတို့သည် အတော်အတန် ရိုးရှင်းသောသူများဖြစ်သည်။ ၎င်းတို့သည် သမ္မာတရားကို လက်ခံနိုင်လျှင် ကယ်တင်ခြင်းကိုရရှိဖို့ ပို၍ ဖြစ်နိုင်ခြေများသည်။ ဤသို့သောသူမျိုးသည် အထူးအခြေအနေများတွင်၊ အခြားနည်းလမ်းမရှိတော့သောအချိန်များတွင်သာ လိမ်ညာကြသည်။ ယေဘူယျအားဖြင့် ၎င်းတို့သည် အစဉ်သဖြင့် အမှန်အတိုင်း ပြောနိုင်သည်။ ၎င်းတို့သည် သမ္မာတရားကို လိုက်စားသရွေ့ နှစ်အနည်းငယ် အားစိုက်ထုတ်လျှင် ဤဖောက်ပြန်ပျက်စီးခြင်း လက္ခဏာကို ဖယ်ရှားနိုင်လိမ့်မည်။ ထို့နောက်တွင် ရိုးသားသူတစ်ယောက်ဖြစ်ရန် ၎င်းတို့အတွက် ခက်ခဲမည်မဟုတ်ပေ။

ရိုးသားသောသူများအတွက် ဘုရားသခင် သတ်မှတ်သည့် စံနှုန်းမှာ အဘယ်နည်း။ ဘုရားသခင်၏ သတ်မှတ်ချက်များကို ဤဘုရားနှုတ်ကပတ်တော် အခန်းတွင်ရှိသော သတိပေးချက် သုံးချက်တွင် မည်သို့ ဖော်ပြထားသနည်း။ (“ရိုးသားဖြောင့်မတ်ခြင်းဆိုသည်မှာ ဘုရားသခင်ထံ သင့်နှလုံးသားကို ပေးအပ်ခြင်း၊ အရာခပ်သိမ်းတွင် ဘုရားသခင်ကို သဘောရိုးအတိုင်း ဆက်ဆံခြင်း၊ အရာအားလုံးတွင် ဘုရားသခင်နှင့် ပွင့်လင်းမှုရှိခြင်း၊ အမှန်တရားကို မည်သည့်အခါမျှ ကွယ်ဝှက်မထားခြင်း၊ မိမိအထက်မှ လူများနှင့် အောက်မှလူများကို လှည့်စားခြင်းကို မည်သည့်အခါမျှ မပြုခြင်းနှင့်၊ ဘုရားသခင်အား မျက်နှာလိုမျက်နှာရ မပြုခြင်းတို့ပင် ဖြစ်သည်။ အတိုချုံး၍ဆိုရလျှင် ရိုးသားဖြောင့်မတ်မှုရှိခြင်း ဆိုသည်မှာ သင်၏ လုပ်ရပ်များနှင့် စကားများတွင် စင်ကြယ်ဖို့နှင့် ဘုရားသခင်ကို ဖြစ်စေ၊ လူသားကိုဖြစ်စေ မလှည့်စားခြင်းဖြစ်သည်။...အကယ်၍ သင့်စကားများက ဆင်ခြေများ၊ အဖိုးမတန်သော ကျိုးကြောင်းပြချက်များနှင့် ပြည့်နှက်နေမည် ဆိုပါက၊ သင်သည် သမ္မာတရား လက်တွေ့ကျင့်သုံး ရမည်ကို အလွန်တရာကို စက်ဆုပ်သောသူတစ်ဦး သာဖြစ်သည်ဟု ငါဆို၏။ အကယ်၍ သင့်ထံတွင် လျှို့ဝှက်ကိစ္စများစွာ ရှိသဖြင့် သင်သည် ဝေမျှရန် ဝန်လေးနေပါက၊ သင်သည် အလင်း၏ လမ်းကို ရှာဖွေဖို့ အခြားသူများရှေ့တွင် သင်၏ လျှို့ဝှက်ချက်များကို- သင်၏ အခက်အခဲများကို- ချခင်းပြရန် အပြင်းအထန် ငြင်းဆန်နေပါက- သင်သည် ကယ်တင်ခြင်းကို အလွယ်တကူ မရရှိနိုင်သောသူ၊ အမှောင်ထုထဲမှ လွယ်ကူစွာ မထွက်နိုင်သူ ဖြစ်သည်ဟုငါဆို၏။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်)) ဤနေရာတွင် အထူးအရေးကြီးသော စာကြောင်းတစ်ကြောင်းရှိသည်။ မည်သည့်အရာဖြစ်သည်ကို သင်တို့ မြင်သလော။ (ဘုရားသခင်က ပြောသည်- “အကယ်၍ သင့်ထံတွင် လျှို့ဝှက်ကိစ္စများစွာ ရှိသဖြင့် သင်သည် ဝေမျှရန် ဝန်လေးနေပါက၊ သင်သည် အလင်း၏ လမ်းကို ရှာဖွေဖို့ အခြားသူများရှေ့တွင် သင်၏ လျှို့ဝှက်ချက်များကို- သင်၏ အခက်အခဲများကို- ချခင်းပြရန် အပြင်းအထန် ငြင်းဆန်နေပါက- သင်သည် ကယ်တင်ခြင်းကို အလွယ်တကူ မရရှိနိုင်သောသူ၊ အမှောင်ထုထဲမှ လွယ်ကူစွာ မထွက်နိုင်သူ ဖြစ်သည်ဟုငါဆို၏။”) မှန်သည်။ ဤသို့ဖြစ်သည်။ ဘုရားသခင်က “အကယ်၍ သင့်ထံတွင် လျှို့ဝှက်ကိစ္စများစွာ ရှိသဖြင့် သင်သည် ဝေမျှရန် ဝန်လေးနေပါက” ဟူ၍ ပြောသည်။ လူတို့သည် ၎င်းတို့ မပြောဆိုရဲသည့် အရာများစွာကို လုပ်ဆောင်ခဲ့ပြီး မှောင်မိုက်သောအခြမ်းများစွာရှိကြသည်။ ၎င်းတို့၏ နေ့စဉ်လုပ်ရပ်များတွင် ဘုရားနှုတ်ကပတ်တော်နှင့် ညီသည့်အရာ လုံးဝမရှိ။ ပြီးလျှင် ဇာတိပကတိကို မပုန်ကန်ကြပေ။ ၎င်းတို့ အလိုရှိသည့်အရာမှန်သမျှကို လုပ်ဆောင်ကြသည်။ ဘုရားသခင်အား နှစ်များစွာ ယုံကြည်ပြီးသည့်နောက်တွင်ပင် သမ္မာတရား၏ စစ်မှန်မှုအတွင်းသို့ ၎င်းတို့ ဝင်ရောက်ခြင်းမရှိ။ “သင်သည် အလင်း၏ လမ်းကို ရှာဖွေဖို့ အခြားသူများရှေ့တွင် သင်၏ လျှို့ဝှက်ချက်များကို- သင်၏ အခက်အခဲများကို- ချခင်းပြရန် အပြင်းအထန် ငြင်းဆန်နေပါက- သင်သည် ကယ်တင်ခြင်းကို အလွယ်တကူ မရရှိနိုင်သောသူ၊ အမှောင်ထုထဲမှ လွယ်ကူစွာ မထွက်နိုင်သူ ဖြစ်သည်ဟုငါဆို၏။” ဤနေရာတွင် ဘုရားသခင်က လူသားများအား လက်တွေ့လုပ်ဆောင်ရန် လမ်းကြောင်းတစ်ခုဆီသို့ ညွှန်ပြခဲ့သည်။ သင်သည် ဤနည်းဖြင့် လက်တွေ့မလုပ်ဆောင်လျှင်၊ ဆောင်ပုဒ်များ၊ အယူဝါဒများကိုသာ အော်ဟစ်လျှင် သင်သည် ကယ်တင်ခြင်းကို အလွယ်တကူ လက်ခံရရှိမည့်သူမဟုတ်ပေ။ ဤသည်မှာ အမှန်ပင် ကယ်တင်ခြင်းနှင့် ဆက်စပ်နေသည်။ ကယ်တင်ခံရခြင်းသည် လူတစ်ယောက်ချင်းစီတိုင်းအတွက် အလွန်အရေးကြီးသည်။ ဘုရားသခင်သည် အခြားမည်သည့်နေရာတွင် “ကယ်တင်ခြင်းအား အလွယ်တကူ မရရှိခြင်း” ကို ထုတ်ပြောခဲ့သနည်း။ အခြားတစ်နေရာရာတွင် ဘုရားသခင်သည် ကယ်တင်ခြင်းခံရရန် မည်မျှခက်ခဲသည်ဟို ရည်ညွှန်းခြင်း သိပ်မရှိပေ။ သို့သော် ရိုးသားခြင်းအကြောင်းပြောသောအခါတွင်မူ ဤအရာကို ပြောဆိုသည်။ သင်သည် ရိုးသားသူတစ်ယောက်မဟုတ်လျှင် ကယ်တင်ရန် အလွန်ခက်ခဲသောသူတစ်ယောက်ဖြစ်သည်။ “ကယ်တင်ခြင်းအား အလွယ်တကူ မရရှိခြင်း” ဆိုသည်မှာ သမ္မာတရားကို သင်လက်မခံလျှင် သင့်အတွက် ကယ်တင်ခြင်းခံရရန် ခက်ခဲမည်ဟု ဆိုလိုသည်။ သင်သည် ကယ်တင်ခြင်းဆီသို့ မှန်ကန်သော လမ်းကြောင်းကို လျှောက်နိုင်စွမ်းရှိမည်မဟုတ်ပေ။ ထို့ကြောင့် သင့်အတွက် ကယ်တင်ခြင်းခံရရန် ဖြစ်နိုင်မည်မဟုတ်ပေ။ ဘုရားသခင်က လူတို့အား ထွက်ပေါက်အချို့ပေးရန်အတွက် ဤစကားအသုံးအနှုန်းကို အသုံးပြုခြင်းဖြစ်သည်။ ဆိုလိုသည်မှာ သင်သည် ကယ်တင်ခြင်းခံရရန် မလွယ်ကူပေ။ သို့သော် ဘုရားနှုတ်ကပတ်တော်ကို လက်တွေ့လုပ်ဆောင်လျှင် သင့်တွင် ကယ်တင်ခြင်းရရှိရန် မျှော်လင့်ချက်ရှိသည်ဟူ၍ ဖြစ်သည်။ ဤသည်မှာ ယင်း၏ ဆန့်ကျင်ဘက် အဓိပ္ပာယ်ဖြစ်သည်။ သင်သည် ဘုရားနှုတ်ကပတ်တော်နှင့်အညီ လက်တွေ့မလုပ်ဆောင်လျှင်၊ သင်၏ လျှို့ဝှက်ချက်များ၊ အခက်အခဲများကို မည်သည့်အခါမျှ ပိုင်းခြားစိစစ်ခြင်းမရှိလျှင်၊ အခြားလူများကို မိတ်သဟာယဖွဲ့ရာတွင် မည်သည့်အခါမျှ သင့်ကိုယ်သင် ဖွင့်ချမပြလျှင်၊ ၎င်းတို့နှင့် သင်၏ ဖောက်ပြန်ပျက်စီးမှု၊ ဆိုးရွားသော အားနည်းချက်များကို မိတ်သဟာယပြုခြင်း၊ စိစစ်ခြင်း၊ ဖွင့်ပြခြင်းမရှိလျှင် သင်သည် ကယ်တင်ခြင်း မခံရနိုင်ပေ။ ဤသည်မှာ အဘယ်ကြောင့်နည်း။ သင်သည် ဤနည်းဖြင့် သင့်ကိုယ်သင် ဖွင့်ချမပြလျှင်၊ သို့မဟုတ် ပိုင်းခြားစိစစ်ခြင်းမပြုလျှင် သင်၏ ကိုယ်ပိုင် ဖောက်ပြန်ပျက်စီးသော စိတ်သဘောထားကို မုန်းတီးမည်မဟုတ်ပေ။ ထို့ကြောင့် သင်၏ ဖောက်ပြန်ပျက်စီးသော စိတ်သဘောထားသည် မည်သည့်အခါမျှ ပြောင်းလဲမည်မဟုတ်ပေ။ သင်သည် မပြောင်းလဲနိုင်လျှင် ကယ်တင်ခြင်းခံရဖို့ စဉ်းစားခြင်းကိုပင် မည်သို့ လုပ်ဆောင်နိုင်မည်နည်း။ ဘုရားနှုတ်ကပတ်တော်က ဤအရာကို ရှင်းလင်းစွာပြသည်။ ဤနှုတ်ကပတ်တော်များက ဘုရားအလိုတော်ကို ထင်ရှားစေသည်။ ဘုရားသခင်က လူတို့ကို ရိုးသားသင့်သည်ဟု အဘယ်ကြောင့်အစဉ် အလေးပေးပြောသနည်း။ ရိုးသားခြင်းသည် အလွန်အရေးကြီးသောကြောင့်ဖြစ်သည်။ ယင်းသည် လူတစ်ယောက်က ဘုရားသခင်အား နာခံနိုင်ခြင်းရှိမရှိ၊ ကယ်တင်ခြင်းရရှိနိုင်ခြင်းရှိမရှိနှင့် တိုက်ရိုက်သက်ဆိုင်သည်။ လူအချို့က “ငါသည် မာနထောင်လွှားပြီး မိမိကိုယ်ကို အမှန်ထင်သည်။ မကြာခဏ စိတ်ဆိုးပြီး ဖောက်ပြန်ပျက်စီးမှုကို ပြသည်။” ဟု ပြောသည်။ အခြားလူများက “ငါသည် အလွန် ပေါ့တန်ပြီး အချည်းနှီးဖြစ်သည်။ လူတို့က ငါ့ကို မြှောက်ပင့်ပြောသောအခါ ငါ နှစ်သက်သည်။” ဟု ဆိုသည်။ ဤအရာများအားလုံးသည် အပြင်ပန်းမှနေ၍ လူတို့အတွက် မြင်နိုင်သောအရာများဖြစ်ပြီး အကြီးစားပြဿနာများမဟုတ်ပေ။ ဤအရာများအကြောင်းကို ဆက်၍ ပြောမနေသင့်ပေ။ သင်၏ စိတ်သဘောထား၊ သို့မဟုတ် စရိုက်လက္ခဏာက မည်သို့ရှိသည်ဖြစ်စေ သင်သည် ဘုရားသခင် သတ်မှတ်သည့်အတိုင်း ရိုးသားသူတစ်ယောက်ဖြစ်နိုင်သရွေ့ ကယ်တင်ခြင်းခံရနိုင်သည်။ ဤသို့ဆိုလျှင် သင်တို့သည် အဘယ်သို့ဆိုမည်နည်း။ ရိုးသားရန် အရေးကြီးသလော။ ဤသည်မှာ အရေးကြီးဆုံးသောအရာဖြစ်သည်။ ထို့ကြောင့် ဘုရားသခင်က သူ၏နှုတ်ကပတ်တော်အခန်းဖြစ်သော သတိပေးချက် သုံးချက်တွင် ရိုးသားခြင်းအကြောင်းကို ပြောခြင်းဖြစ်သည်။ အခြားအခန်းများတွင် ယုံကြည်သူများသည် ပုံမှန်ဝိညာဉ်ရေးအသက်တာနှင့် သင့်တင့်လျောက်ပတ်သော အသင်းတော်အသက်တာရှိသင့်သည်ဟု ဘုရားသခင်က ကြိမ်ဖန်များစွာ ပြောဆိုထားပြီး ယုံကြည်သူများသည် သာမန်လူ့သဘာဝကို မည်သို့ အသက်ရှင်နေထိုင်သင့်သည်ဆိုသည်ကို သူ ဖော်ပြသည်။ ဤကိစ္စများအပေါ် သူ၏ နှုတ်ကပတ်တော်များမှာ အကြမ်းဖျင်းဖြစ်သည်။ အလွန်တိကျစွာ၊ သို့မဟုတ် အလွန်အသေးစိတ်ကျစွာ ဆွေးနွေးထားခြင်းမရှိပေ။ သို့ရာတွင် ဘုရားသခင်က ရိုးသားခြင်းအကြောင်းပြောသောအခါ လူတို့လိုက်လျှောက်ရမည့်လမ်းကြောင်းကို သူ ညွှန်ပြသည်။ လူတို့အား မည်သို့ လက်တွေ့လုပ်ဆောင်ရမည်ကို ဘုရားသခင်က ပြောပြသည်။ ပြီးလျှင် လုံလုံလောက်လောက်ဖြင့် အသေးစိတ်ကျစွာ၊ ရှင်းလင်းစွာ ပြောဆိုသည်။ ဘုရားသခင်က ပြောသည်- “အကယ်၍ သင့်ထံတွင် လျှို့ဝှက်ကိစ္စများစွာ ရှိသဖြင့် သင်သည် ဝေမျှရန် ဝန်လေးနေပါက၊ သင်သည် အလင်း၏ လမ်းကို ရှာဖွေဖို့ အခြားသူများရှေ့တွင် သင်၏ လျှို့ဝှက်ချက်များကို- သင်၏ အခက်အခဲများကို- ချခင်းပြရန် အပြင်းအထန် ငြင်းဆန်နေပါက- သင်သည် ကယ်တင်ခြင်းကို အလွယ်တကူ မရရှိနိုင်သောသူ။” ရိုးသားခြင်းသည် ကယ်တင်ခြင်းရရှိခြင်းနှင့် ဆက်နွှယ်နေသည်။ ဤသို့ဆိုလျှင် သင်တို့ အဘယ်သို့ ဆိုမည်နည်း။ ဘုရားသခင်က အဘယ်ကြောင့် လူတို့အား ရိုးသားရန် တောင်းဆိုသနည်း။ ဤသည်မှာ လူသား၏ ကျင့်ကြုံပြုမူခြင်းနှင့်ဆိုင်သော သမ္မာတရားနှင့်ပတ်သက်သည်။ ဘုရားသခင်က ရိုးသားသောသူများကို ကယ်တင်သည်။ သူ၏ နိုင်ငံတော်အတွက် သူအလိုရှိသောသူများမှာ ရိုးသားသောသူများဖြစ်သည်။ သင်သည် လိမ်ညာ၊ လှည့်စားမှုများကို လုပ်ဆောင်နိုင်စွမ်းရှိလျှင် သင်သည် လှည့်စားတတ်သော၊ ကောက်ကျစ်သော၊ မသိမသာ ဒုက္ခပေးသောသူတစ်ယောက်ဖြစ်သည်။ သင်သည် ရိုးသားသောသူတစ်ယောက်မဟုတ်ပေ။ ရိုးသားသူတစ်ယောက်မဟုတ်လျှင် ဘုရားသခင်က သင့်အား ကယ်တင်မည့် အခွင့်အရေးမရှိသကဲ့သို့ သင်သည်လည်း ကယ်တင်ခြင်းခံရရန် မဖြစ်နိုင်ပေ။ သင်က ယခုတွင် အလွန်ဘာသာတရားကိုင်းရှိုင်းသည်၊ မာနထောင်လွှားခြင်း၊ မိမိကိုယ်ကို အမှန်ထင်ခြင်းမရှိ၊ တာဝန်ထမ်းဆောင်ရာတွင် အဖိုးအခပေးဆပ်နိုင်သည်၊ သို့မဟုတ် ဧဝံဂေလိ ဖြန့်ဝေနိုင်ပြီး လူများစွာကို ပြောင်းလဲပေးနိုင်သည်ဟု သင် ပြောသည်။ သို့သော် သင်သည် မရိုးသားပေ။ လှည့်စားဆဲဖြစ်သည်။ လုံးဝ မပြောင်းလဲပေ။ ထို့ကြောင့် ကယ်တင်ခြင်းခံရနိုင်သလော။ လုံးဝ မခံရနိုင်ပေ။ ထို့ကြောင့် ကယ်တင်ခြင်းခံရရန်အတွက် ရှေးဦးစွာ ဘုရားသခင်၏ နှုတ်ကပတ်တော်များ၊ သတ်မှတ်ချက်များနှင့်အညီ ရိုးသားရမည်ဆိုသည်ကို ဤဘုရားနှုတ်ကပတ်တော်များက လူတိုင်းအား သတိပေးသည်။ ၎င်းတို့သည် မိမိတို့ကိုယ်ကို ဖွင့်ချပြရမည်။ ၎င်းတို့၏ ဖောက်ပြန်ပျက်စီးမှု၊ ရည်ရွယ်ချက်များ၊ လျှို့ဝှက်ချက်များကို ချပြရမည်ဖြစ်ပြီး အလင်း၏ လမ်းခရီးကို ရှာဖွေရမည်။ “အလင်း၏ လမ်းခရီးကို ရှာခြင်း” ဆိုသည်မှာ မည်သည့် အဓိပ္ပာယ်နည်း။ သင်၏ ဖောက်ပြန်ပျက်စီးသော စိတ်သဘောထားကို ဖြေရှင်းရန်အတွက် သမ္မာတရားအား ရှာဖွေခြင်းကို ဆိုလိုသည်။ သင်သည် သင်၏ ဖောက်ပြန်ပျက်စီးမှု၊ သင်၏ လုပ်ရပ်များနောက်ကွယ်ရှိ ပန်းတိုင်များ၊ ရည်ရွယ်ချက်များကို ချပြသောအခါ သင့်ကိုယ်သင်လည်း ပိုင်းခြားစိစစ်သည်။ ထို့နောက်တွင် သင်က “အဘယ်ကြောင့် ထိုအရာကို ငါလုပ်ခဲ့သနည်း။ ဤတွင် ဘုရားနှုတ်ကပတ်တော် အခြေပြုချက်ရှိသလော။ သမ္မာတရားနှင့် ကိုက်ညီသလော။ ဤသို့ လုပ်ဆောင်ခြင်းအားဖြင့် ငါသည် သိလျက်နှင့် မှားယွင်းသောအရာတစ်ခုကို လုပ်ဆောင်နေသလော။ ဘုရားသခင်အား လှည့်စားနေခြင်းဖြစ်သလော။ ငါသည် ဘုရားသခင်ကို လှည့်စားနေခြင်းဖြစ်လျှင် ဤအရာကို မလုပ်သင့်ပေ။ ဘုရားသခင်က သတ်မှတ်ထားသည့်အရာ၊ ဘုရားသခင် ပြောသည့်အရာကို ငါ ကြည့်သင့်ပြီး သမ္မာတရား စည်းမျဉ်းများက အဘယ်သို့ရှိသည်ကို သိအောင်လုပ်ရမည်” ဟူ၍ ရှာဖွေသည်။ ဤသည်မှာ သမ္မာတရားအား ရှာဖွေခြင်း၏ အဓိပ္ပာယ်ဖြစ်သည်။ အလင်းထဲတွင် လျှောက်လှမ်းခြင်း၏ အဓိပ္ပာယ်ဖြစ်သည်။ လူတို့သည် ဤအရာကို ပုံမှန် လက်တွေ့လုပ်ဆောင်နိုင်သောအခါ ၎င်းတို့သည် အမှန်တကယ် ပြောင်းလဲနိုင်သည်။ ထို့ကြောင့် ၎င်းတို့သည် ကယ်တင်ခြင်းကို ရရှိနိုင်သည်။

လူတို့အား ရိုးသားကြရန် ဘုရားသခင် တောင်းဆိုခြင်းမှာ သူသည် လိမ်လည်လှည့်ဖြားသောသူများကို တကယ်ကို စက်ဆုပ်ရွံရှာကြောင်းနှင့်၊ မနှစ်သက်ကြောင်း သက်သေပြခြင်းဖြစ်သည်။ လှည့်စားသောလူတို့ကို ဘုရားသခင်၏ မနှစ်သက်ခြင်းသည် အမှုအရာများကို ၎င်းတို့ လုပ်ဆောင်သည့်နည်းလမ်း၊ ၎င်းတို့၏ စိတ်သဘောထား၊ ရည်ရွယ်ချက်များနှင့် ၎င်းတို့၏ လှည့်စားသည့်နည်းလမ်းတို့ကို မနှစ်သက်ခြင်း ဖြစ်သည်။ ဤအရာအားလုံးကို ဘုရားသခင်က မနှစ်သက်ပေ။ လှည့်စားတတ်သောသူတို့သည် သမ္မာတရားကို လက်ခံနိုင်လျှင်၊ ၎င်းတို့၏ လှည့်စားသော စိတ်သဘောထားများကို ဝန်ခံပြီး ဘုရားသခင်၏ ကယ်တင်ခြင်းကို လက်ခံဖို့ လိုလားလျှင် လူအားလုံးကို ဘုရားသခင်က ညီတူညီမျှ ဆက်ဆံပြီး သမ္မာတရားကလည်း ထိုသို့ဖြစ်သည့်အတွက် ၎င်းတို့သည်လည်း ကယ်တင်ခြင်းခံရဖို့ မျှော်လင့်ချက်ရှိသည်။ ထို့ကြောင့် ကျွန်ုပ်တို့သည် ဘုရားသခင်ကို ကျေနပ်စေသူများ ဖြစ်လိုလျှင် ကျွန်ုပ်တို့လုပ်ဆောင်ရမည့် ပထမဆုံးအရာမှာ ကျွန်ုပ်တို့၏ ပြုမူနေထိုင်မှုစည်းမျဉ်းများကို ပြောင်းလဲခြင်းဖြစ်သည်။ ဆိုးယုတ်သော အတွေးအခေါ်များနှင့်အညီ အသက်ရှင်၍ မရတော့ပေ။ မုသားများ၊ လှည့်စားမှုများနှင့် နေ၍ မရတော့ပေ။ ကျွန်ုပ်တို့၏ မုသားအားလုံးကို နောက်တွင် စွန့်ပစ်ပြီး ရိုးသားသူများဖြစ်လာရမည်။ ထို့နောက်တွင် ကျွန်ုပ်တို့အပေါ် ဘုရားသခင်၏ အမြင်သည် ပြောင်းလဲလိမ့်မည်။ ယခင်က လူတို့သည်အခြားလူများကြား၌ နေထိုင်စဉ်တွင် မုသားများ၊ ဟန်ဆောင်မှု၊ လှည့်စားမှုတို့ကို အစဉ် အားကိုးပြီး ဆိုးယုတ်သော အတွေးအခေါ်များကို ၎င်းတို့၏ ဖြစ်တည်မှု၊ ၎င်းတို့၏ ဘဝများ၏အခြေခံအဖြစ်၊ ၎င်းတို့၏ ပြုမူနေထိုင်မှုအတွက် အခြေခံအုတ်မြစ်အဖြစ် အသုံးပြုခဲ့ကြသည်။ ဤသည်မှာ ဘုရားသခင် ရွံမုန်းသောအရာတစ်ခု ဖြစ်သည်။ မယုံကြည်သူများကြားတွင် သင်က ပွင့်လင်းစွာပြောဆိုလျှင်၊ အမှန်တရားကို ပြောလျှင်၊ ရိုးသားသောသူတစ်ယောက်ဖြစ်လျှင်၊ သင်သည် အသရေဖျက်ခံရမည်။ ဝေဖန်အပြစ်တင်ခံရပြီး စွန့်ပစ်ခံရမည်။ ထို့ကြောင့် သင်က လောကီရေပန်းစားမှုများနောက်သို့ လိုက်သည်။ ဆိုးယုတ်သော အတွေးအခေါ်များဖြင့် အသက်ရှင်သည်။ လိမ်ညာခြင်းတွင် ပိုပို၍ ကျွမ်းကျင်လာသည်။ ပိုပို၍ လှည့်စားလာသည်။ သင်၏ ပန်းတိုင်များကို ရရှိပြီး မိမိကိုယ်ကို ကာကွယ်ရန်အတွက် မသိမသာ အန္တရာယ်ဖြစ်စေသောနည်းများကို အသုံးပြုဖို့လည်း သင်ယူသည်။ စာတန်၏ ကမ္ဘာတွင် သင်သည် ပိုပို၍ ကြီးပွားချမ်းသာလာသည်။ ရလဒ်အနေဖြင့် သင်သည် မိမိကိုယ်မိမိ ကယ်မထုတ်နိုင်တော့သည်အထိ အပြစ်ထဲသို့ ပိုပို၍ကျဆင်းသည်။ ဘုရားသခင်၏ အိမ်တော်တွင် အမှုအရာများသည် အတိအကျပင် ဆန့်ကျင်ဘက်ဖြစ်သည်။ သင် လိမ်ညာပြီး လှည့်စားသောအရာများ လုပ်ဆောင်လေလေ၊ ဘုရားသခင် ရွေးချယ်ထားသောသူများက သင့်ကို စိတ်ကုန်ပြီး စွန့်ပစ်လေဖြစ်သည်။ သင်က နောင်တရရန် ငြင်းဆန်ပြီး ဆိုးယုတ်သော အတွေးအခေါ်များနှင့် ယုတ္တိများကို ဖက်တွယ်နေဆဲဖြစ်လျှင်၊ အယောင်ဆောင်ပြီး ဟန်လုပ်ရန်အတွက်ပရိယာယ်သုံးပြီး အကြံအစည်များကို အသေးစိတ်စီစဉ်လျှင် သင်သည် ထုတ်ဖော်ခံရပြီး စွန့်ပစ်ခံရဖို့ အလွန်ပင် ဖြစ်နိုင်ခြေရှိသည်။ ဤသည်မှာ ဘုရားသခင်က လှည့်စားသောသူများကို မုန်းတီးသောကြောင့် ဖြစ်သည်။ ဘုရားသခင်၏ အိမ်တော်တွင် ရိုးသားသောသူတို့သာ ကြီးပွားနိုင်သည်။ လှည့်စားသောသူတို့သည် နောက်ဆုံးတွင် ပစ်ပယ်ခံရပြီး ဖယ်ရှားခံရလိမ့်မည်။ ဤအရာအားလုံးကို ဘုရားသခင်က ကြိုတင်ပြဋ္ဌာန်းထားပြီးဖြစ်သည်။ ရိုးသားသောသူတို့သည်သာ ကောင်းကင်နိုင်ငံတော်တွင် ဝေစုကို ရရှိနိုင်သည်။ သင်သည် ရိုးသားသောသူတစ်ယောက်ဖြစ်ဖို့ မကြိုးစားလျှင်၊ သမ္မာတရားကို လိုက်စားသည့် ဦးတည်ချက်ဖြင့် တွေ့ကြုံပြီး လက်တွေ့လုပ်ဆောင်ခြင်းမရှိလျှင်၊ သင်၏ ကိုယ်ပိုင် အကျည်းတန်မှုကို ဖော်ထုတ်ပြီး သင့်ကိုယ်သင် ချပြခြင်းမရှိလျှင် သင်သည် မည်သည့်အခါမျှ သန့်ရှင်းသောဝိညာဉ်တော်၏ အလုပ်ကို လက်ခံရရှိပြီး ဘုရားသခင်၏ လက်ခံမှုကို ရရှိနိုင်လိမ့်မည်မဟုတ်ပေ။ မည်သည့်အရာကို သင်လုပ်ဆောင်သည်ဖြစ်စေ၊ သို့မဟုတ် မည်သည့်တာဝန်ကို ထမ်းဆောင်သည်ဖြစ်စေ၊ ရိုးသားသော သဘောထားရှိရမည်။ ရိုးသားသော သဘာထားတစ်ခုမရှိဘဲ သင်၏ တာဝန်ကို ကောင်းစွာ မထမ်းဆောင်နိုင်ပေ။ သင်သည် အစဉ်သဖြင့် ပေါ့ဆပြီး ဝတ်ကျေတမ်းကျေပုံစံဖြင့် သင်၏ တာဝန်ကို ထမ်းဆောင်လျှင်၊ တစ်စုံတစ်ခုကို ကောင်းမွန်စွာ မလုပ်နိုင်လျှင် သင့်ကိုယ်သင် ပြန်ဆင်ခြင်ကြည့်သင့်သည်။ သင့်ကိုယ်သင် နားလည်သင့်သည်။ သင့်ကိုယ်သင် စိစစ်ရန်အတွက် ဖွင့်ပြသင့်သည်။ ထို့နောက် ပေါ့ဆပြီး ဝတ်ကျေတမ်းကျေလုပ်မည့်အစား နောက်တစ်ကြိမ်တွင် သမ္မာတရားစည်းမျဉ်းများကို ရှာဖွေပြီး ပိုကောင်းအောင် လုပ်ဆောင်ဖို့ ကြိုးစားသင့်သည်။ သင်သည် ရိုးသားသော စိတ်နှလုံးတစ်ခုဖြင့် ကြိုးစားပြီး ဘုရားသခင်ကို ကျေနပ်စေခြင်းမရှိလျှင်၊ သင်ကိုယ်တိုင်၏ ဇာတိပကတိကို၊ သို့မဟုတ် မာန်မာနကို ဖြည့်ဆည်းဖို့ အစဉ်သဖြင့် အလေးထားလျှင် သင်သည် အလုပ်ကို ကောင်းကောင်း လုပ်ဆောင်နိုင်မည်လော။ သင့်တာဝန်ကို ကောင်းစွာ ထမ်းဆောင်နိုင်မည်လော။ သေချာပေါက် ထမ်းဆောင်နိုင်မည်မဟုတ်ပေ။ လှည့်ဖြားတတ်သောသူများသည် ၎င်းတို့၏ တာဝန်ကို ထမ်းဆောင်သည့်အခါ အစဉ်သဖြင့် ဝတ်ကျေတမ်းကျေ ဖြစ်ကြသည်။ မည်သည့်တာဝန်ကို ၎င်းတို့လုပ်နေရသည်ဖြစ်စေ ယင်းကို ကောင်းစွာ မလုပ်ဆောင်ကြချေ၊ ထိုသို့သော လူများသည် ကယ်တင်ခြင်းရရှိဖို့ အခက်တွေ့ကြလေသည်။ ငါ့ကို ပြောလော့၊ လှည့်ဖြားတတ်သော လူများသည် သမ္မာတရားကို လက်တွေ့လုပ်ဆောင်ကြသည့်အခါ၊ လှည့်ဖြားမှုတွင် ပါဝင်ပတ်သက်ကြသလော။ သမ္မာတရားကို လက်တွေ့လုပ်ဆောင်ခြင်းသည် ၎င်းတို့အား အဖိုးအခတစ်ခု ပေးဖို့၊ ၎င်းတို့ကိုယ်တိုင်၏ အကျိုးစီးပွားများကို စွန့်လွှတ်ဖို့၊ အခြားသူများထံ ဖွင့်ပြောပြီး မိမိတို့ကိုယ်ကိုယ် ထုတ်ဖော်ပြဖို့ တောင်းဆို၏။ သို့သော် ၎င်းတို့သည် တစ်စုံတစ်ရာကို ချုပ်တည်းထားကြသည်။ ၎င်းတို့ စကားပြောသည့်အခါ၊ ၎င်းတို့သည် တစ်ဝက်တစ်ပျက်သာ ပြောပြီး ကျန်သည့်အရာများကို ဆိုင်းထားကြသည်။ အခြားသူများမှာ ၎င်းတို့ မည်သည့်အရာ ဆိုလိုသည်ကို အမြဲ မှန်းဆကြရသည်၊ ၎င်းတို့၏ ဆိုလိုရင်းကို အဖြေရှာဖို့ အသေးစိတ်များကို အမြဲ ဆက်စပ်ကြရသည်။ ၎င်းတို့သည် တစ်မျိုးပြောင်းဖို့ မိမိတို့ကိုယ်ကိုယ် အမြဲခွင့်ပြုကြသည်၊ အခြားတစ်နည်းပြောင်းဖို့ အခွင့်အရေးအချို့ မိမိတို့ကိုယ်ကိုယ် ပေးကြလေသည်။ ၎င်းတို့သည် လှည့်စားတတ်သည်ဟု အခြားလူများကသတိထားမိသောအခါ ၎င်းတို့သည် ထိုသူတို့နှင့် မပတ်သက်လိုတော့ဘဲ ၎င်းတို့လုပ်သမျှတွင် ထိုသူတို့ကို သတိထားကာကွယ်ကြသည်။ ၎င်းတို့သည် လိမ်ညာပြီး အခြားလူများက ၎င်းတို့ကို မယုံကြည်နိုင်ပေ။ ၎င်းတို့ပြောသည့်အရာများတွင် မည်သည့်အရာက မှန်ပြီး မည်သည့်အရာက မှားသည်၊ သို့မဟုတ် ထိုအရာများက မည်မျှ စစ်မှန်မှုမရှိသည်ကို မသိရပေ။ ၎င်းတို့သည် မကြာခဏပင် အခြားလူများအပေါ် ကတိပျက်ပြီး လူတို့၏ စိတ်နှလုံးတွင် ၎င်းတို့ကို တန်ဖိုးမထားကြပေ။ ဤသို့ဆိုလျှင် ဘုရားသခင်၏ စိတ်နှလုံးတွင်မူ အဘယ်သို့ရှိသနည်း။ ဘုရားသခင်က ၎င်းတို့ကို မည်သို့ မြင်သနည်း။ ဘုရားသခင်က ၎င်းတို့ကို ပို၍ပင် မုန်းတီးသည်။ အဘယ်ကြောင့်ဆိုသော် ဘုရားသခင်သည် လူတို့၏ စိတ်နှင့် နှလုံးသား၏ အတွင်းထဲသို့ ကြည့်သောကြောင့်ဖြစ်သည်။ လူသားများသည် အပေါ်ယံတွင် ရှိသည့်အရာကိုသာ မြင်နိုင်သည်။ ဘုရားသခင်က ပို၍ တိကျစွာ၊ ပို၍ ပြတ်သားစွာ၊ ပို၍ လက်တွေ့ကျစွာ မြင်သည်။

သင်သည် ယုံကြည်သူဖြစ်သည်မှာ မည်မျှကြာသည်ဖြစ်စေ၊ သင်၏တာဝန်က မည်သည့်တာဝန်ဖြစ်စေ၊ သင်လုပ်ဆောင်သည့်အလုပ်က မည်သည့်အလုပ်ဖြစ်စေ၊ သင်၏ အစွမ်းအစက များသည်ဖြစ်စေ၊ နည်းသည်ဖြစ်စေ၊ သင်၏ အကျင့်စရိုက်က ကောင်းသည်ဖြစ်စေ၊ ဆိုးသည်ဖြစ်စေ သင်သည် သမ္မာတရားကို လက်ခံနိုင်ပြီး ရိုးသားသူတစ်ယောက်ဖြစ်လာရန် အားထုတ်သရွေ့ ဆုလာဘ်များကို သေချာပေါက် ရိတ်သိမ်းရမည်။ ရိုးသားသူတစ်ယောက်ဖြစ်လာရန် အားမထုတ်သောသူအချို့သည် ၎င်းတို့၏ တာဝန်ကို ကောင်းစွာထမ်းဆောင်ခြင်းက လုံလောက်သည်ဟု ထင်ကြသည်။ ၎င်းတို့ကို ငါက “သင်သည် သင်၏တာဝန်ကို မည်သည့်အခါမျှ ကောင်းစွာထမ်းဆောင်နိုင်မည်မဟုတ်” ဟု ပြောသည်။ အခြားလူများက ရိုးသားသူဖြစ်ခြင်းသည် အရေးကြီးသော ကိစ္စမဟုတ်၊ ဘုရားသခင်၏ အလိုတော်ကို အစေခံရန် အားထုတ်ခြင်းသည် ပို၍ကြီးသောတာဝန်ဖြစ်သည်၊ ဤအရာကသာ ဘုရားသခင်ကို ကျေနပ်စေရန် တစ်ခုတည်းသောနည်းလမ်းဖြစ်သည်ဟု ထင်ကြသည်။ ဤသို့ဆိုလျှင် ဆက်လက်၍ စမ်းသပ်ကြည့်လော့။ သင်သည် ရိုးသားသူတစ်ယောက်ဖြစ်ခြင်းမရှိဘဲ ဘုရားသခင်၏ အလိုတော်ကို အစေခံနိုင်ခြင်းရှိမရှိ ကြည့်လော့။ အခြားလူများသည် ရိုးသားသူတစ်ယောက်ဖြစ်ရန် အားမထုတ်ကြဘဲ နေ့စဉ် ဆုတောင်းခြင်း၊ စုဝေးပွဲများသို့ အချိန်မှန် သွားခြင်း၊ ဘုရားနှုတ်ကပတ်တော်များကို စားသောက်ခြင်းဖြင့် ရောင့်ရဲနေကြပြီး မယုံကြည်သူများကဲ့သို့ မနေထိုင်ခြင်းသာ ရှိသည်။ ၎င်းတို့က ဥပဒေကို မချိုးဖောက်သရွေ့၊ မကောင်းမှုတစ်ခုခုမလုပ်သရွေ့ လုံလောက်သည်။ သို့သော် ဘုရားသခင်ကို ဤပုံစံဖြင့် ကျေနပ်စေနိုင်သလော။ သင်သည် ရိုးသားသောသူတစ်ယောက်မဟုတ်လျှင် ဘုရားသခင်ကို မည်သို့ကျေနပ်စေနိုင်မည်နည်း။ သင်သည် ရိုးသားသောသူတစ်ယောက်မဟုတ်လျှင် မှန်ကန်သောသူအမျိုးအစားမဟုတ်ပေ။ သင်သည် မရိုးသားလျှင် ကောက်ကျစ်ပြီး ကလိမ်ကျသည်။ အမှုအရာများကို ပေါ့ဆသော၊ ဝတ်ကျေတမ်းကျေဆန်သောပုံစံဖြင့် လုပ်ဆောင်သည်။ ဖောက်ပြန်ပျက်စီးမှုမျိုးစုံကို ပြသသည်။ ဆန္ဒရှိသောအခါတွင်ပင် သမ္မာတရားကို လက်တွေ့မလုပ်ဆောင်နိုင်ပေ။ ရိုးသားသူတစ်ယောက်ဖြစ်ခြင်းမဟုတ်သော အရာမှန်သမျှသည် မည်သည့်အရာမျှ ကောင်းစွာမပြီးမြောက်ဟု အဓိပ္ပာယ်ရသည်။ သင်သည် ဘုရားသခင်အား နာခံခြင်းကို ရရှိရန်၊ သို့မဟုတ် ဘုရားသခင်အား ကျေနပ်စေရန် နည်းလမ်းရှိမည်မဟုတ်ပေ။ သင်သည် ရိုးသားခြင်းသဘောထားတစ်ခုမရှိဘဲ သင်လုပ်သမျှတွင် ဘုရားသခင်အား မည်သို့ကျေနပ်စေနိုင်မည်နည်း။ သင်သည် ရိုးသားသောသဘောထားမရှိဘဲ သင်၏ တာဝန်ကို ထမ်းဆောင်လျှင် ဘုရားသခင်ကို မည်သို့ ကျေနပ်စေနိုင်သနည်း။ သင့်တင့်လျောက်ပတ်စွာ ထမ်းဆောင်နိုင်မည်လော။ သင်သည် သင်၏ ကိုယ်ပိုင်ဇာတိပကတိနှင့် သင်၏ ကိုယ်ပိုင်မျှော်လင့်ချက်များကို အစဉ် စဉ်းစားသည်။ သင်သည် အစဉ်သဖြင့် သင်၏ ဇာတိပကတိ ဒုက္ခကို လျော့နည်းစေလိုသည်။ သင့်ကိုယ်သင် အသုံးခံခြင်းကို လျော့နည်းစေလိုသည်။ အနစ်နာခံခြင်းကို လျော့နည်းစေလိုသည်။ အဖိုးအခပေးဆပ်ရခြင်းကို နည်းပါးစေလိုသည်။ သင်သည် အစဉ်သဖြင့် တွန့်ဆုတ်နေသည်။ ဤသည်မှာ လှည့်စားသော သဘောထားဖြစ်သည်။ လူအချို့သည် ဘုရားသခင်အတွက် မိမိတို့ကိုယ်ကို အသုံးခံခြင်းနှင့်ပတ်သက်လျှင်ပင် တွက်ချက်နေကြသည်။ ၎င်းတို့က “ငါသည် နောင်အချိန်တွင် သက်သာစွာ နေရမည်။ ဘုရားသခင်၏ အမှုက မည်သည့်အခါမျှ မပြီးဆုံးလျှင် မည်သို့ပြုလုပ်မည်နည်း။ ငါသည် ငါ၏ ရာနှုန်းပြည့်ကို သူ့အား မပေးဆပ်နိုင်။ ဘုရားသခင်၏ နေ့ရက်က မည်သည့်အချိန်တွင်လာမည်ကိုပင် ငါမသိ။ ငါ တွက်ချက်ထားဖို့လိုသည်။ ဘုရားသခင်အတွက် ငါ့ကိုယ်ငါ အသုံးမခံခင်တွင် ငါ၏ မိသားစုဘဝနှင့် ငါ့အနာဂတ်အတွက် အစီအစဉ်များပြုလုပ်ဖို့လိုသည်။” ဟု ပြောကြသည်။ ဤသို့စဉ်းစားသည့်လူ များစွာရှိသလော။ လူတစ်ယောက်သည် တွက်ချက်ပြီး ကိုယ့်ကိုယ်ကိုယ်အတွက် အရေးပေါ်အစီအစဉ်များပြုလုပ်နေလျှင် ယင်းသည် မည်သည့်စိတ်သဘောထားဖြစ်သနည်း။ ဤလူတို့သည် ဘုရားသခင်အပေါ် သစ္စာရှိသလော။ ရိုးသားသောသူများဖြစ်သလော။ တွက်ချက်ခြင်းနှင့် အရေးပေါ်အစီအစဉ်များပြုလုပ်ခြင်းသည် ဘုရားသခင်နှင့် စိတ်နှလုံး တစ်လုံးတစ်ဝတည်းရှိခြင်းမဟုတ်ပေ။ ဤသည်မှာ လှည့်စားသော စိတ်သဘောထားဖြစ်သည်။ ဤသို့လုပ်ဆောင်သောလူတို့သည် လှည့်စားလျက် လုပ်ဆောင်နေခြင်းဖြစ်သည်။ ဘုရားသခင်အား ၎င်းတို့ ဆက်ဆံသည့် သဘောထားသည် ရိုးသားသော သဘောထား သေချာပေါက်မဟုတ်ပေ။ လူအချို့က ၎င်းတို့နှင့် အပြန်အလှန်ဆက်ဆံစဉ်တွင်၊ သို့မဟုတ် ပတ်သက်စဉ်တွင် ညီအစ်ကိုမောင်နှမများက ၎င်းတို့၏ ပြဿနာများကို ရိပ်စားမိပြီး ၎င်းတို့သည် ဝိညာဉ်ရင့်ကျက်မှု သေးငယ်သည်ဟု ပြောမည်ကို၊ သို့မဟုတ် ၎င်းတို့အား အထင်သေးမည်ကို ကြောက်ကြသည်။ ထို့ကြောင့် ၎င်းတို့သည် စကားပြောသောအခါ ၎င်းတို့သည် အလွန် စိတ်အားထက်သန်သည်၊ ဘုရားသခင်ကို တောင့်တသည်၊ သမ္မာတရားကို လက်တွေ့လုပ်ဆောင်ရန် စိတ်ဝင်စားသည်ဟူသည့် ပုံစံဖြစ်အောင် အစဉ် ကြိုးစားကြသည်။ သို့သော် စိတ်အတွင်းတွင် ၎င်းတို့သည် အမှန်တကယ်တွင် အလွန်ပင် အားနည်းပြီး အပျက်သဘောဆောင်သည်။ မည်သူကမျှ ၎င်းတို့ကို မရိပ်စားမိစေရန်အတွက် ၎င်းတို့သည် စိတ်ဓာတ်ခိုင်မာဟန်ဆောင်ကြသည်။ ဤသည်မှာလည်း လှည့်စားမှုဖြစ်သည်။ အတိုချုပ်ဆိုရလျှင် အသက်တာတွင်ဖြစ်စေ၊ တာဝန်ထမ်းဆောင်ရာတွင် ဖြစ်စေ သင်လုပ်သမျှတွင် အခြားလူများကို လိမ်လည်ရန်၊ သို့မဟုတ် လှည့်စားရန်၊ သင့်အား အထင်ကြီးပြီး ကိုးကွယ်အောင်ပြုလုပ်ရန်၊ သို့မဟုတ် သင့်အား အထင်မသေးစေရန်အတွက် မုသားနှင့် အယောင်ဆောင်မှုကို လုပ်ဆောင်လျှင်၊ သို့မဟုတ် အယောင်ဆောင် အသွင်အပြင်များကို အသုံးပြုလျှင် ဤသည်တို့အားလုံးမှာ လှည့်စားမှုဖြစ်သည်။ အမျိုးသမီးအချို့မှာ ၎င်းတို့၏ ခင်ပွန်းကို ချစ်မြတ်နိုးကြသည်။ အမှန်တကယ်တွင်မူ ၎င်းတို့၏ ခင်ပွန်းများသည် မကောင်းဆိုးဝါးများ၊ မယုံကြည်သူများဖြစ်သည်။ ဤသို့သော အမျိုးသမီးသည် သူမ၏ ချစ်ခင်မှုက များလွန်းသည်ဟု ညီအစ်ကိုမောင်နှမများက သူမကို ပြောမည်စိုးသောကြောင့် “ငါ၏ ခင်ပွန်းသည် မကောင်းဆိုးဝါးဖြစ်သည်။” ဟု ဦးစွာ ပြောလိမ့်မည်။ သို့သော် သူမ၏ စိတ်နှလုံးတွင် “ငါ၏ ခင်ပွန်းသည် လူကောင်းတစ်ယောက်ဖြစ်သည်။” ဟု ဆိုသည်။ ပထမပြောသောအရာမှာ သူ၏ နှုတ်ဖြင့်ပြောသည့်အရာဖြစ်သည်။ သို့သော် ဤသည်မှာ အခြားလူများ ကြားရန်အတွက်သာဖြစ်သည်။ ထို့ကြောင့် သူမသည် သူမ၏ အမျိုးသားအကြောင်းကို သိမြင်မှုရှိသည်ဟု ၎င်းတို့က ထင်ကြသည်။ သူမ အမှန်တကယ် ဆိုလိုသည်မှာ “ဤကိစ္စကို ချမပြနှင့်။ ဤအမြင်ကို ငါ ဦးစွာ ဖော်ပြမည်ဖြစ်သောကြောင့် သင်တို့ ထုတ်ပြောစရာမလိုပေ။ ငါ၏ ခင်ပွန်းသည် မကောင်းဆိုးဝါးတစ်ကောင်ဖြစ်သည်ဟု ငါ ဖော်ထုတ်ပြီးဖြစ်သည်။ ထို့ကြောင့် ဤသည်မှာ ငါသည် ငါ၏ ချစ်ခင်မှုများကို စွန့်လွှတ်ပြီးဖြစ်ကာ ဤအရာနှင့်ပတ်သက်ပြီး သင်တို့တွင် ပြောစရာ မည်သည့်အရာမျှ ရှိမည်မဟုတ်ဆိုသည့် သဘောဖြစ်သည်။” ဤသည်မှာ ဉာဏ်များခြင်းမဟုတ်သလော။ အတုအယောင်ဖြစ်သည်မဟုတ်လော။ သင်သည် ဤသို့ လုပ်ဆောင်လျှင် သင်သည် ဟန်လုပ်ခြင်းအားဖြင့် လူတို့ကို လှည့်စားနေခြင်းဖြစ်ပြီး အမြင်မှားစေခြင်းဖြစ်သည်။ သင်သည် လှည့်ကွက်များ ပြုလုပ်နေခြင်းဖြစ်သည်။ နေရာတိုင်းတွင် လှည့်စားမှုများကို လုပ်ဆောင်နေသည်။ ထို့ကြောင့် အခြားလူများမြင်သည့်အရာမှာ သင်၏ အယောင်ဆောင်ပုံရိပ်ဖြစ်ပြီး သင်၏ သရုပ်မှန်မဟုတ်ပေ။ ဤသည်မှာ အန္တရာယ်ရှိသည်။ ဤသည်မှာ လူ၏ လှည့်စားခြင်းဖြစ်သည်။ သင်၏ ခင်ပွန်းသည် မကောင်းဆိုးဝါးဖြစ်သည်ဟု သင် အသိအမှတ်ပြုသည်။ ဤသို့ဆိုလျှင် အဘယ်ကြောင့် သူ့အား မကွာရှင်းသနည်း။ ထိုမကောင်းဆိုးဝါး၊ ထိုစာတန်ကို အဘယ်ကြောင့် မငြင်းပယ်သနည်း။ သင်၏ ခင်ပွန်းသည် မကောင်းဆိုးဝါးဖြစ်သည်ဟု သင်ပြောသော်လည်း သူနှင့်အတူ သင်၏ဘဝကို ဆက်၍ ကုန်ဆုံးသည်။ ဤသည်မှာ သင်သည် မကောင်းဆိုးဝါးများကဲ့သို့ဖြစ်သည်ဆိုသည်ကို ပြသည်။ သူသည် မကောင်းဆိုးဝါးဖြစ်သည်ဟု သင်၏ နှုတ်က ပြောသည်။ သို့သော် သင်၏ စိတ်နှလုံးတွင် ဤအရာကို ဝန်မခံပေ။ ဤသည်မှာ သင်သည် အခြားလူများကို လှည့်စားနေခြင်း၊ တစ်ပတ်ရိုက်နေခြင်းဖြစ်သည်ဆိုသည့် သဘောဖြစ်သည်။ သင်သည် မကောင်းဆိုးဝါးများနှင့် တစ်ကျိတ်တည်းတစ်ဉာဏ်တည်းဖြစ်သည်၊ ၎င်းတို့ကို ကာကွယ်နေသည်ဆိုသည်ကိုလည်း ပြသည်။ သင်သည် သမ္မာတရားကို လက်တွေ့လုပ်ဆောင်နိုင်သူတစ်ယောက်ဖြစ်လျှင် သင်၏ ခင်ပွန်းသည် မကောင်းဆိုးဝါးဖြစ်သည်ဟု သင် အသိအမှတ်ပြုသည်နှင့်တစ်ပြိုင်နက် သူ့အား ကွာရှင်းလိမ့်မည်ဖြစ်သည်။ ထို့နောက်တွင် သင်သည် သက်သေခံနိုင်သည်။ သင်သည် သင်နှင့် နတ်ဆိုးကြားတွင် ရှင်းလင်းပြတ်သားသော စည်းတစ်ခုကို ဆွဲနေသည်ကို ပြလိမ့်မည်။ သို့သော် ကံမကောင်းစွာဖြင့် သင်သည် ထိုစည်းကို ရေးဆွဲဖို့ ပျက်ကွက်ရုံမကဘဲ သင်သည် သင်၏နေ့ရက်များကို မကောင်းဆိုးဝါးတစ်ကောင်ဖြင့် အသက်ရှင်နေထိုင်နေပြီး ညီအစ်ကိုမောင်နှမများအား မုသားများ၊ လှည့်စားမှုများဖြင့် အမြင်မှားအောင်ပြုလုပ်နေသည်။ ဤသည်မှာ သင်က နတ်ဆိုးနှင့် အမျိုးအစားတူညီသည်၊ သင်သည် လိမ်ညာပြောသော အခြားမကောင်းဆိုးဝါးတစ်ကောင်ဖြစ်သည်ဆိုသည်ကို သက်သေပြသည်။ အမျိုးသမီးတစ်ယောက်သည် သူမ၏ ခင်ပွန်းက မည်သည့်အရာကို လုပ်ဆောင်ပါစေ သူ့နောက်သို့လိုက်သည်ဟု လူတို့က ဆိုကြသည်။ သင်သည် မကောင်းဆိုးဝါးတစ်ကောင်ကို အိမ်ထောင်ပြုပြီး သူ့အား လုံးဝ ကျောမခိုင်းသောကြောင့် သင်သည်လည်း မကောင်းဆိုးဝါးဖြစ်သည်ဆိုသည်ကို သက်သေပြသည်။ သင်သည် နတ်ဆိုးနှင့် သက်ဆိုင်သည်။ သို့သော် သင်က ဘုရားသခင်နှင့်သက်ဆိုင်သည်ဟု သက်သေပြရန်အတွက် သင်၏ ခင်ပွန်းက မကောင်းဆိုးဝါးတစ်ကောင်ဖြစ်သည်ဟု သင်ပြောသည်။ ဤသည်မှာ လိမ်ညာပြီး လှည့်စားသည့် နည်းဗျူဟာမဟုတ်သလော။ သင်သည် အမှန်တရားကို ကောင်းကောင်းသတိပြုမိသည်။ သို့သော် သင်သည် သူတစ်ပါးတို့ကို လှည့်စားရန်အတွက် ဤသို့သော နည်းများကို အသုံးပြုဆဲဖြစ်သည်။ ဤသည်မှာ မသိမသာ ဒုက္ခပေးသည်။ လှည့်စားခြင်းဖြစ်သည်။ မသိမသာ ဒုက္ခပေးပြီး လှည့်စားသောသူများအားလုံးသည် လုံးလုံးလျားလျားပင် မကောင်းဆိုးဝါးများဖြစ်သည်။

လူတိုင်းတွင် ဖောက်ပြန်ပျက်စီးသော စိတ်သဘောထားတစ်ခုရှိသည်။ သင်သည် မိမိကိုယ်ကို အနည်းငယ် ပြန်လည်ဆန်းစစ်လျှင် အခြားလူများကို သင်အမြင်မှားစေသည့်၊ သို့မဟုတ် လှည့်စားလျက် လုပ်ဆောင်သည့် အခြေအနေ၊ သို့မဟုတ် ကျင့်သုံးမှုအချို့ကို သင် ရှင်းလင်းစွာ မြင်လိမ့်မည်။ သင်တို့အားလုံးသည် ဟန်လုပ်သော၊ သို့မဟုတ် သူတော်ကောင်းအယောင်ဆောင်သောအချိန်များရှိကြသည်။ လူအချို့က “ဤသို့ဆိုလျှင် အဘယ်ကြောင့် ငါ သတိမထားမိသနည်း။ ငါသည် ဟန်ဆောင်မှုကင်းသောသူဖြစ်သည်။ ငါသည် ဤကမ္ဘာလောကတွင် အဆက်မပြတ် အနိုင်ကျင့်ခံရပြီး အလိမ်ခံရသည်။ ငါသည် တစ်ကြိမ်တစ်ခါမျှ မလှည့်စားခဲ့ပေ။ ငါ၏ စိတ်နှလုံးတွင်ရှိသောအရာကိုသာ ငါပြောသည်။” ဟု ဆိုကြသည်။ ဤသည်မှာ သင်က ရိုးသားသူတစ်ယောက်ဖြစ်သည်ဟု သက်သေမပြသေးပေ။ သင်သည် ဉာဏ်မကောင်းခြင်း၊ သို့မဟုတ် ပညာသိပ်မတတ်ခြင်း၊ သို့မဟုတ် သင်သည် အဖွဲ့များအတွင်းတွင် အလွယ်တကူဖြင့် အကြမ်းပတမ်း ခိုင်းစေခံရနိုင်ခြင်း၊ သို့မဟုတ် သင်သည် သင်၏ လုပ်ဆောင်မှုများတွင် ဉာဏ်ပညာမရှိသော အသုံးမကျသောသူ၊ ကျွမ်းကျင်မှုအနည်းငယ်သာ ပိုင်ဆိုင်ပြီး လူ့အဖွဲ့အစည်းတွင် အဆင့်နိမ့်သောသူ ဖြစ်နိုင်ခြေရှိသည်။ ဤသည်မှာ သင်က ရိုးသားသူတစ်ယောက်ဖြစ်သည်ဟု အဓိပ္ပာယ်မရသေးပေ။ ရိုးသားသူတစ်ယောက်သည် သမ္မာတရားကို လက်ခံနိုင်သူဖြစ်သည်။ သနားစရာကောင်းသော ဒုက္ခရောက်နေသူ၊ အချည်းနှီးလူ၊ ငတုံးငအ၊ သို့မဟုတ် ဟန်ဆောင်မှုကင်းသောသူမဟုတ်ပေ။ သင်တို့သည် ဤအရာများကို ပိုင်းခြားသိမြင်နိုင်သင့်သည်မဟုတ်လော။ လူအချို့က ဤသို့ပြောသည်ကို ငါ မကြာခဏကြားရသည်။ “ငါသည် မည်သည့်အခါမျှ မုသားမပြော။ ငါသည် အစဉ်သဖြင့် အလိမ်ခံရသောသူဖြစ်သည်။ ငါသည် အစဉ်သဖြင့် ပြင်ပတွင်ရှိသော လူတို့က အကြမ်းပတမ်းခိုင်းစေခြင်းကို ခံရသည်။ ဘုရားသခင်က ငတ်မွတ်သောသူတို့ကို နောက်ချေးပုံထဲက ချီးမြှောက်သည်ဟု ဆိုသည်။ ငါသည် ထိုလူများထဲမှ တစ်ယောက်ဖြစ်သည်။ ဤသည်မှာ ဘုရားသခင်၏ ကျေးဇူးတော်ဖြစ်သည်။ ဘုရားသခင်က ငါတို့ကဲ့သို့သောလူများ၊ လူ့အဖွဲ့အစည်းတွင် လက်မခံကြသော ဟန်ဆောင်မှုကင်းသောသူများကို သနားသည်။ ဤသည်မှာ အမှန်ပင် ဘုရားသခင်၏ သနားကရုဏာဖြစ်သည်။” ဟူ၍ ဖြစ်သည်။ ဘုရားသခင်က ငတ်မွတ်သောသူတို့ကို နောက်ချေးပုံထဲက ချီးမြှောက်သည်ဟု ဆိုခြင်းသည် အမှန်ပင် လက်တွေ့ကျသည့်အပိုင်းရှိသည်။ သင်က ဤအရာကို မှတ်မိနိုင်သော်လည်း ဤသည်မှာ သင်က ရိုးသားသူတစ်ယောက်ဖြစ်သည်ဟု သက်သေမပြပေ။ အမှန်တကယ်တွင် လူအချို့သည် ငတုံး၊ ငအများသာဖြစ်သည်။ ၎င်းတို့သည် ကျွမ်းကျင်မှု လုံးဝ မရှိသည့် သူရူးများဖြစ်သည်။ အစွမ်းအစနည်းသည်။ သမ္မာတရားကို နားလည်ခြင်းမရှိပေ။ ထိုသို့သောသူမျိုးသည် ဘုရားသခင်ပြောသည့် ရိုးသားသောသူများနှင့် လုံးဝ အဆက်အစပ်မရှိပေ။ ဘုရားသခင်က ငတ်မွတ်သောသူတို့ကို နောက်ချေးပုံထဲက ချီးမြှောက်သည်မှာ မှန်သည်။ သို့သော် ငတုံးငအများ၊ သူရူးများသည် ချီးမြှောက်ခြင်းခံရသူများမဟုတ်ပေ။ သင်၏ အစွမ်းအစသည် မွေးရာပါ အလွန်နိမ့်ကျသည်။ သင်သည် ငတုံးငအဖြစ်သည်။ အချည်းနှီးလူဖြစ်သည်။ သင်သည် ဆင်းရဲသောမိသားစုတွင် မွေးဖွားပြီး လူ့အဖွဲ့အစည်း၏ နိမ့်ကျသော လူတန်းစားအဖွဲ့ဝင် ဖြစ်သော်လည်း သင်သည် ဘုရားသခင်၏ ကယ်တင်ခြင်းအတွက် ပစ်မှတ်မဟုတ်သေးပေ။ သင်က လူ့အဖွဲ့အစည်းတွင် များစွာ ဒုက္ခခံပြီး ခွဲခြားဆက်ဆံမှုခံရသောကြောင့်အတွက်နှင့်၊ လူတိုင်းက အကြမ်းပတမ်း ခိုင်းစေခြင်းကိုခံရပြီး လိမ်ညာခြင်းကို ခံရသောကြောင့်အတွက်နှင့် သင်သည် ရိုးသားသူတစ်ယောက်ဖြစ်သွားသည်ဟု မထင်နှင့်။ သင်သည် ဤသို့ ထင်မြင်လျှင် အလွန့်အလွန် မှားယွင်းသည်။ ရိုးသားသူတစ်ယောက်သည် အဘယ်သို့ဖြစ်သည်ဆိုသည်နှင့်ပတ်သက်ပြီး နားလည်မှုလွဲခြင်း၊ သို့မဟုတ် လွဲမှားသောအယူအဆတစ်ခုခုကို သင် ကိုင်စွဲထားသလော။ ဤမိတ်သဟာယတွင် သင်သည် အနည်းငယ်ရှင်းလင်းမှုရှိသလော။ ရိုးသားသူတစ်ယောက်ဖြစ်ခြင်းသည် လူတို့ ထင်သကဲ့သို့မဟုတ်ပေ။ မရောမရာဖြစ်ခြင်းမရှိသော တဲ့တိုးပြောတတ်သူဖြစ်ခြင်းမဟုတ်ပေ။ လူတစ်ယောက်သည် သဘာဝအလျောက်ပင် အလွန်တဲ့တိုးဆန်နိုင်သည်။ သို့သော် ဤသည်မှာ သူသည် လိမ်လည်ခြင်း၊ လှည့်စားခြင်းတို့ကို ဆောင်ရွက်ခြင်းမရှိဟု မဆိုလိုပေ။ ဖောက်ပြန်ပျက်စီးသော လူသားများအားလုံးတွင် ဉာဏ်များပြီး လှည့်စားသော ဖောက်ပြန်ပျက်စီးသည့် စိတ်သဘောထားများရှိသည်။ လူတို့သည် ဤကမ္ဘာလောကတွင်၊ စာတန်၏ လွှမ်းမိုးမှုအောက်တွင် အသက်ရှင်ပြီး စာတန်၏ အင်အားစု၏ အုပ်စိုးခြင်း၊ ထိန်းချုပ်ခြင်းကို ခံရသောအခါ ၎င်းတို့အတွက် ရိုးသားရန် မဖြစ်နိုင်ပေ။ အစဉ်ပို၍ လှည့်စားတတ်ခြင်းသာ ဖြစ်လာနိုင်သည်။ ဖောက်ပြန်ပျက်စီးသော လူသားမျိုးနွယ်ကြားတွင် အသက်ရှင်ရသောအခါ ရိုးသားသူတစ်ယောက်ဖြစ်ခြင်းတွင် အသေအချာပင် အခက်အခဲများစွာ ပါဝင်သည်။ ငါတို့သည် မယုံကြည်သူများ၊ နတ်ဆိုးဘုရင်များ၊ အသက်ရှင်နေသော မကောင်းဆိုးဝါးများက လှောင်ပြောင်ခြင်း၊ မကောင်းပြောခြင်း၊ ဝေဖန်အပြစ်တင်ခြင်း၊ ဖယ်ကြဉ်ခြင်းနှင့် နှင်ထုတ်ခံရခြင်းကိုပင် ခံရဖို့ များသည်။ ထို့ကြောင့် ဤကမ္ဘာလောကတွင် ရိုးသားသူတစ်ယောက်အနေဖြင့် ရှင်သန်ရန် ဖြစ်နိုင်သလော။ ဤကမ္ဘာလောကတွင် ငါတို့အတွက် ရှင်သန်ရန် အခွင့်အလမ်းတစ်ခုခုရှိသလော။ ရှိသည်။ ငါတို့အတွက် ရှင်သန်ရန် အခွင့်အလမ်း သေချာပေါက်ရှိသည်။ ဘုရားသခင်က ငါတို့ကို ကြိုတင်စီမံထားပြီး ရွေးချယ်ခဲ့သည်။ သူသည် ငါတို့အတွက် လွတ်လမ်းတစ်ခုကို သေချာပေါက် ဖွင့်ပေးသည်။ ငါတို့သည် ဘုရားသခင်ကို ယုံကြည်ပြီး သူ၏ လမ်းပြမှုအောက်တွင် သူ့နောက်သို့ အလုံးစုံ လိုက်လျှောက်သည်။ ငါတို့သည် သူချပေးသော ထွက်သက်ဝင်သက်နှင့် အသက်အားဖြင့် အလုံးစုံ အသက်ရှင်ကြသည်။ ငါတို့သည် ဘုရားနှုတ်ကပတ်တော်၏ သမ္မာတရားကို လက်ခံကြသောကြောင့် မည်သို့အသက်ရှင်ရမည်ဆိုသည်နှင့်ပတ်သက်ပြီး စည်းကမ်းအသစ်များရှိသည်။ ငါတို့၏ အသက်တာများအတွက် ပန်းတိုင်အသစ်များရှိကြသည်။ ငါတို့အသက်တာများ၏ အခြေခံအုတ်မြစ်များသည် ပြောင်းလဲသွားပြီဖြစ်သည်။ ငါတို့သည် သမ္မာတရားကို ရရှိပြီး ကယ်တင်ခြင်းခံရဖို့အတွက်သက်သက်ဖြင့် အသက်ရှင်ခြင်းနည်းလမ်းအသစ်၊ ကိုယ့်ကိုယ်ကိုယ် ကျင့်ကြံပြုမူခြင်းနည်းလမ်းအသစ်တစ်ခုကို ခံယူခဲ့သည်။ အသက်ရှင်ခြင်းပုံစံအသစ်တစ်ခုကို ငါတို့ ခံယူခဲ့သည်။ ငါတို့သည် ငါတို့၏ တာဝန်များကို ထမ်းဆောင်ပြီး ဘုရားသခင်ကို ကျေနပ်စေရန် အသက်ရှင်ကြသည်။ ဤသည်မှာ ငါတို့သည် ရုပ်ပိုင်းအနေဖြင့် စားသောက်သည့်အရာ၊ ဝတ်ဆင်သည့်အရာ၊ သို့မဟုတ် ငါတို့ နေထိုင်သည့်နေရာနှင့် လုံးဝ မသက်ဆိုင်ပေ။ ဤသည်မှာ ငါတို့၏ ဝိညာဉ်ရေးရာ လိုအပ်ချက်ဖြစ်သည်။ ရိုးသားသူတစ်ယောက်ဖြစ်ခြင်းသည် ခက်ခဲလွန်းသည်ဟု လူများစွာက ခံစားကြရသည်။ ဤအရာ၏ တစ်စိတ်တစ်ပိုင်းမှာ ဖောက်ပြန်ပျက်စီးသော စိတ်သဘောထားကို ဖယ်ရှားခြင်းသည် အလွန်ခက်ခဲခြင်းဖြစ်သည်။ ထို့အပြင် သင်သည် မယုံကြည်သူများကြားတွင် နေထိုင်လျှင်၊ အထူးသဖြင့် သင်သည် ၎င်းတို့နှင့်အတူ အလုပ်လုပ်နေလျှင် ရိုးသားသူတစ်ယောက်ဖြစ်ခြင်း၊ အမှန်အတိုင်းပြောခြင်းဖြင့် သင်သည် လှောင်ရယ်ခံရခြင်း၊ အသရေဖျက်ခံရခြင်း၊ ဝေဖန်အပြစ်တင်ခံရခြင်းနှင့် ဖယ်ကြဉ်ခြင်း၊ သို့မဟုတ် နှင်ထုတ်ခြင်းကိုပင်ခံရနိုင်သည်။ ဤသည်မှာ ငါတို့၏ ရှင်သန်ရေးအတွက် အခက်အခဲများကို ဖန်တီးသည်။ လူများစွာက “ရိုးသားသူတစ်ယောက်ဖြစ်ခြင်းသည် အလားအလာကောင်းခြင်းမရှိပေ။ ငါသည် ပွင့်လင်းစွာ ပြောဆိုလျှင် အခွင့်သာမည်မဟုတ်။ မုသားများမပြောဆိုဘဲ မည်သည့်အရာမျှ ပြီးမြောက်မည်မဟုတ်။” ဟု ဆိုကြသည်။ ဤသည်မှာ မည်သို့သော ရှုထောင့်မျိုးဖြစ်သနည်း။ ဤသည်မှာ လှည့်စားသူတစ်ယောက်၏ ရှုထောင့်နှင့် အကြောင်းပြချက်ဖြစ်သည်။ ထိုသူသည် သူ၏ ကိုယ်ပိုင်အဆင့်အတန်းနှင့် အကျိုးစီးပွားကို ကာကွယ်ရန်သက်သက်ဖြင့် မှားယွင်းသော၊ လှည့်စားသောအရာများကို ပြောကြသည်။ ၎င်းတို့သည် ထိုအရာများကို ဆုံးရှုံးရမည်စိုးသောကြောင့် ရိုးသားသူတစ်ယောက်ဖြစ်ပြီး အမှန်အတိုင်း ပြောလိုစိတ်မရှိကြပေ။ ဖောက်ပြန်ပျက်စီးသော လူသားမျိုးနွယ်အားလုံးမှာ ဤသို့ဖြစ်သည်။ ၎င်းတို့သည် မည်မျှ သင်ယူတတ်မြောက်ပြီးဖြစ်စေ၊ ၎င်းတို့၏ အဆင့်အတန်းက မည်မျှ မြင့်သည်၊ နိမ့်သည်ဖြစ်စေ၊ ၎င်းတို့သည် အစိုးရအရာရှိ၊ သို့မဟုတ် သာမန်နိုင်ငံသားဖြစ်စေ၊ နာမည်ကြီးသူဖြစ်စေ၊ သာမန်လူဖြစ်စေ ၎င်းတို့အားလုံးသည် အဆက်မပြတ် လိမ်ညာကြပြီး မည်သူကမျှ မယုံကြည်ထိုက်ပေ။ ဤဖောက်ပြန်ပျက်စီးသော စိတ်သဘောထားများကို မဖြေရှင်းလျှင် ၎င်းတို့သည် ဆက်လက်ပြီး အချိန်ပြည့် လိမ်ညာကြမည်။ လှည့်စားသော စိတ်သဘောထား အပြည့်ရှိနေလိမ့်မည်ဖြစ်သည်။ ၎င်းတို့သည် ဤသို့ဖြင့် စစ်မှန်သော နာခံခြင်းကို ရရှိနိုင်သလော။ ဘုရားသခင်၏ လက်ခံမှုကို ရရှိနိုင်သလော။ လုံးဝ မရရှိနိုင်ပေ။

ရိုးသားသူတစ်ယောက်ဖြစ်ခြင်းသည် လုပ်ဆောင်ရန် ခက်ခဲသည်ဟု သင်တို့ ခံစားရသလော။ သင်တို့သည် ဤအရာကို လက်တွေ့လုပ်ဆောင်ကြည့်ဖူးသလော။ မည်သည့်အချက်များတွင် ရိုးသားသူတစ်ယောက်ဖြစ်ခြင်းကို သင်တို့ လက်တွေ့လုပ်ဆောင်ပြီး တွေ့ကြုံခဲ့သနည်း။ မည်သည့်စည်းမျဉ်းများကို အခြေခံပြီး သင်တို့ လက်တွေ့လုပ်ဆောင်ခဲ့သနည်း။ လတ်တလောတွင် ဤအရာနှင့်ပတ်သက်ပြီး သင့်တို့တွင် မည်သို့သော အတွေ့အကြုံအဆင့်ရှိသနည်း။ သင်သည် အခြေခံအားဖြင့် ရိုးသားသူတစ်ယောက်ဖြစ်သည့် အခြေအနေသို့ ရောက်ရှိပြီးသလော။ ဤအရာကို သင်ရရှိခဲ့လျှင် အလွန်ကောင်းသည်။ ငါတို့ကို ကယ်တင်ပြီး ပြောင်းလဲရန်အတွက် ဘုရားသခင်သည် ကြိုတင်ပြင်ဆင်ထားသောအလုပ်အချို့၊ သို့မဟုတ် အနာဂတ်သည် မည်သို့ရှိနိုင်သည်ကို ပြသဖို့ အလုပ်ကိုသာ လုပ်ပြီး ပြီးသွားခြင်းမဟုတ်ဆိုသည်ကို ဘုရားနှုတ်ကပတ်တော်တွင် ငါတို့ မြင်နိုင်သင့်သည်။ လူတို့၏ ပြင်ပအပြုအမူကိုလည်း သူ မပြောင်းလဲပေ။ ထိုထက် သူသည် လူတစ်ယောက်ချင်းစီကို ပြောင်းလဲလိုပြီး ၎င်းတို့၏ စိတ်နှလုံး၏ အတွင်းကျဆုံးနေရာများမှ၊ ၎င်းတို့၏ စိတ်သဘောထားများ၊ ၎င်းတို့၏ တကယ့် အနှစ်သာရများမှစတင်ပြီး အရင်းအမြစ်မှနေ၍ ၎င်းတို့ကို ပြောင်းလဲစေလိုသည်။ ဤသည်မှာ ဘုရားသခင် အလုပ်လုပ်သည့် ပုံစံဖြစ်သည်ကို ကြည့်လျှင် ငါတို့သည် မိမိကိုယ်ကို မည်သို့ ပြုမူသင့်သနည်း။ ငါတို့သည် ငါတို့ရှာဖွေသည့်အရာအတွက်၊ ငါတို့၏ စိတ်သဘောထားဆိုင်ရာ ပြောင်းလဲမှုအတွက်၊ ငါတို့လုပ်ဆောင်သင့်သည့် တာဝန်များအတွက် တာဝန်ခံယူသင့်သည်။ ငါတို့သည် အမှုအရာများကို လွတ်မသွားစေဘဲ ငါတို့လုပ်ဆောင်သမျှတွင် အလေးအနက်ထားသင့်သည်။ အရာရာတိုင်းကို ပိုင်းခြားစိစစ်ရန်အတွက် တင်ပြနိုင်သင့်သည်။ သင်သည် တစ်စုံတစ်ခုကို လုပ်ဆောင်ပြီးသည့် အခါတိုင်းတွင် ယင်းသည် မှန်မှန်ကန်ကန် ပြီးမြောက်သည်ဟု သင် ယုံကြည်လျှင်ပင် သမ္မာတရားနှင့် မလွဲမသွေ ကိုက်ညီခြင်းမရှိနိုင်ပေ။ ယင်းကို စိစစ်ခြင်းလည်း ပြုလုပ်ရမည်။ ဘုရားနှုတ်ကပတ်တော်နှင့်အညီ နှိုင်းယှဉ်ကြည့်ရမည်။ မှန်ကန်ကြောင်း အတည်ပြုရမည်။ ပိုင်းခြားသိမြင်ရမည်။ ဤနည်းအားဖြင့် ယင်းသည် မှန်ကန်သလော၊ မှားယွင်းသလောဆိုသည်မှာ ရှင်းလင်းသွားလိမ့်မည်။ ထို့အပြင် မှားယွင်းလုပ်ဆောင်ခဲ့သည်ဟု သင်ထင်သောအရာများကိုလည်း စိစစ်ရမည်။ ဤသည်မှာ ညီအစ်ကိုမောင်နှမများက မိတ်သဟာယဖွဲ့လျက်၊ ရှာဖွေလျက်၊ အချင်းချင်း ကူညီဖေးမလျက်ဖြင့် အချိန်ကို ပို၍ ကုန်ဆုံးဖို့ လိုအပ်သည်။ သင် မိတ်သဟာယဖွဲ့လေလေ၊ သင်၏ စိတ်နှလုံးက လင်းလက်လေလေ၊ သမ္မာတရားစည်းမျဉ်းများကို သင်နားလည်မည်ဖြစ်လေလေဖြစ်သည်။ ဤသည်မှာ ဘုရားသခင်၏ ကောင်းချီးဖြစ်သည်။ သင်တို့ထဲမှ မည်သူကမျှ မိမိစိတ်နှလုံးကို မဖွင့်ဟလျှင်၊ အခြားလူများ၏ စိတ်ထဲတွင် အမြင်ကောင်းစေဖို့ မျှော်လင့်လျက်၊ သင့်အား အထင်ကြီးစေရန်၊ မလှောင်ပြောင်စေရန် ဆန္ဒရှိလျက်ဖြင့် သင်တို့အားလုံးသည် မိမိကိုယ်ကို ဖုံးကွယ်လျှင် အမှန်တကယ် ကြီးထွားမှုကို ကြုံတွေ့ရမည်မဟုတ်ပေ။ သင်သည် အစဉ်သဖြင့် သင့်ကိုယ်သင် ဟန်ဆောင်ပြီး မိတ်သဟာယတွင် မည်သည့်အခါမျှ ဖွင့်မပြောလျှင် သန့်ရှင်းသောဝိညာဉ်တော်၏ ဉာဏ်အလင်းဖွင့်ပြမှုကို ရရှိမည်မဟုတ်ပေ။ ပြီးလျှင် သမ္မာတရားကို သင် နားလည်နိုင်မည်မဟုတ်ပေ။ ဤသို့ဆိုလျှင် ရလဒ်က မည်သို့ဖြစ်မည်နည်း။ သင်သည် မှောင်မိုက်ထဲတွင် ထာဝရအသက်ရှင်လိမ့်မည်ဖြစ်ပြီး ကယ်တင်ခြင်းခံရမည်မဟုတ်ပေ။ သင်သည် သမ္မာတရားကို ရရှိလိုပြီး သင်၏ စိတ်သဘောထားကို ပြောင်းလဲလိုလျှင် သမ္မာတရားကို ရရှိပြီး သမ္မာတရားအား လက်တွေ့လုပ်ဆောင်ရန်အတွက် အဖိုးအခပေးဆပ်ရမည်။ သင်၏ စိတ်နှလုံးကို ဖွင့်ဟပြီး အခြားလူများနှင့် မိတ်သဟာယဖွဲ့ရမည်။ ဤသည်မှာ သင်၏ အသက်ဝင်ရောက်မှုနှင့် စိတ်သဘောထားဆိုင်ရာ ပြောင်းလဲမှုနှစ်ခုလုံးအတွက် အကျိုးဖြစ်စေသည်။ စုဝေးပွဲများတွင် သင်၏ အတွေ့အကြုံနှင့် နားလည်မှုကို ဆွေးနွေးခြင်းသည် သင်နှင့် အခြားလူများအတွက် အကျိုးဖြစ်စေသည်။ သင်တို့ထဲမှ မည်သူကမျှ မိမိကိုယ်ကို သိမြင်မှု၊ သို့မဟုတ် မိမိ၏ အတွေ့အကြုံနှင့် နားလည်မှုတို့အကြောင်း မပြောလျှင်၊ သင်တို့ထဲမှ မည်သူကမျှ မိမိကိုယ်ကိုယ် ပိုင်းခြားစိစစ်ခြင်း၊ ဖွင့်ပြောခြင်းမရှိလျှင်၊ သင်တို့အားလုံးက ဩဝါဒစာများ၊ အယူဝါဒများပြောဆိုခြင်းတွင် ထူးချွန်လျှင်၊ မည်သူကမျှ မိမိကိုယ်ကို နားလည်မှုကို မမျှဝေလျှင်၊ သင်ပိုင်ဆိုင်သည့် အနည်းငယ်သော မိမိကိုယ်ကို သိမြင်မှုဖြစ်သည့်အရာကို လူအများအားသိစေဖို့ သတ္တိမရှိလျှင် မည်သို့ဖြစ်မည်နည်း။ သင်တို့အားလုံးသည် အတူတကွ စုရုံးပြီး ယဉ်ကျေးသောစကားများနှင့် စကားစမြည်အချို့ကို အပြန်အလှန်ပြောကြလိမ့်မည်။ သင်တို့သည် အချင်းချင်း မြှောက်ပင့်ပြောဆိုလိမ့်မည်။ စစ်မှန်မှုမရှိသောအရာများကို ပြောမည်။ “အို သင်သည် အခုတစ်လော အလွန်ပင် တော်သည်။ သင် အနည်းငယ် ပြောင်းလဲသွားသည်”၊ “သင်သည် ယခုရက်ပိုင်းတွင် အလွန်ကြီးသော ယုံကြည်ခြင်းကို ပြသည်”၊ “သင်သည် အလွန်ပင် စိတ်ထက်သန်သည်”၊ “သင်သည် ကျွန်ုပ်ထက် အလွန်ပင်ပို၍ အသုံးခံခဲ့သည်”၊ “သင်၏ ကူညီပံ့ပိုးမှုသည် ကျွန်ုပ်ထက်ပို၍ ကြီးသည်။” ဤသည်မှာ ဖြစ်ပေါ်လာသော အခြေအနေမျိုးဖြစ်သည်။ လူတိုင်းက အချင်းချင်း မြှောက်ပင့်ပြောဆိုသည်။ မည်သူကမျှ လူတိုင်း ပိုင်းခြားသိမြင်ပြီး နားလည်ရန်အတွက် ၎င်းတို့၏ သရုပ်မှန်ကို ပိုင်းခြားစိစစ်ဖို့ ထုတ်ပြောလိုစိတ်မရှိပေ။ ဤသို့သော ပတ်ဝန်းကျင်မျိုးတွင် စစ်မှန်သော အသင်းတော်အသက်တာရှိနိုင်သလော။ မရှိနိုင်ပေ။ လူအချို့က “ငါသည် အသင်းတော်အသက်တာကို နှစ်အတော်ကြာနေခဲ့သည်။ အစဉ်သဖြင့် ရောင့်ရဲပြီး ပျော်ရွှင်ခဲ့သည်။ စုဝေးပွဲများတွင် ညီအစ်ကိုမောင်နှမများအားလုံးက ဘုရားသခင်ကို ချီးမွမ်းရန်အတွက် ဆုတောင်းခြင်း၊ ဓမ္မတေးသီဆိုခြင်းတို့ကို နှစ်သက်ကြသည်။ လူတိုင်းက ဆုတောင်းခြင်းနှင့် ဓမ္မတေးများကြောင့် မျက်ရည်ကျသည်အထိ ခံစားကြရသည်။ တစ်ခါတစ်ရံတွင် စိတ်ခံစားချက်များ ပြည့်လျှံကာ ငါတို့အားလုံး ပူပြီး ချွေးထွက်ကြသည်။ ညီအစ်ကိုမောင်နှမများက သီချင်းဆိုကြ၊ ကကြသည်။ အလွန်ပင် ကြွယ်ဝပြီး အရောင်အသွေးစုံလင်သော အသင်းတော်အသက်တာဖြစ်ပြီး ပျော်မွေ့ဖွယ်ရာဖြစ်သည်။ သန့်ရှင်းသောဝိညာဉ်တော်၏ လုပ်ဆောင်မှုကို အမှန်ပင် သရုပ်ထင်စေသည်။ ထို့နောက်တွင် ဘုရားနှုတ်ကပတ်တော်ကို ငါတို့ စားသောက်ကြသည်။ ဘုရားနှုတ်ကပတ်တော်က ငါတို့၏ စိတ်နှလုံးသို့ တည့်တည့်မတ်မတ်စကားပြောသည်ဟု ခံစားရသည်။ ငါတို့ မိတ်သဟာယပြုသည့်အခါတိုင်းတွင် လူတိုင်းက အမှန်ပင် စိတ်ထက်သန်ကြသည်။” ဟူ၍ ဆိုသည်။ ထိုသို့သော အသင်းတော်အသက်တာမျိုးကို နှစ်အနည်းငယ်ရှိခြင်းသည် လူတိုင်းအတွက် အမှန်ပင် ပျော်မွေ့ဖွယ်ရာဖြစ်သည်။ သို့သော် မည်သည့်ရလဒ်ကို ရရှိသနည်း။ အားလုံးနီးပါးက သမ္မာတရား၏ စစ်မှန်မှုအတွင်းသို့ အမှန်တကယ် ဝင်ရောက်ခြင်းမရှိပေ။ ဘုရားသခင်ကို သက်သေခံရန် ၎င်းတို့၏ အတွေ့အကြုံကို အားလုံးနီးပါးက မဖော်ပြနိုင်ပေ။ ၎င်းတို့သည် ဘုရားနှုတ်ကပတ်တော်ကို ဖတ်ခြင်း၊ သီချင်းဆိုခြင်း၊ ကခုန်ခြင်းအတွက် အားအင်များစွာရှိကြသည်။ သို့သော် သမ္မာတရားအား မိတ်သဟာယဖွဲ့သည့်အချိန်ရောက်လျှင် လူအချို့က စိတ်မဝင်စားတော့ပေ။ မည်သူကမျှ ရိုးသားသူတစ်ယောက်ဖြစ်ခြင်းနှင့်သက်ဆိုင်သည့် ၎င်းတို့၏ အတွေ့အကြုံကို မပြောပေ။ မည်သူကမျှ မိမိကိုယ်ကို ပိုင်းခြားစိစစ်ခြင်းမရှိပေ။ အခြားလူများအနေဖြင့် သိပြီး ပိုင်းခြားသိမြင်ရန်အတွက်၊ ၎င်းတို့၏ အကျိုးအတွက်၊ တည်ဆောက်စရာဖြစ်စေဖို့အတွက် မည်သူကမျှ ၎င်းတို့ကိုယ်တိုင်၏ ဖောက်ပြန်ပျက်စီးသော စိတ်သဘောထားကို ဖွင့်ချမပြပေ။ ဘုရားသခင်ကို ချီးမွမ်းထောမနာပြုဖို့အတွက် မည်သူကမျှ ၎င်းတို့၏ အမှန်တကယ် အတွေ့အကြုံနှင့် သက်သေခံချက်ကို မိတ်သဟာယမဖွဲ့ကြပေ။ ဤသို့ဖြင့် သီချင်းဆိုလျက်၊ ကခုန်လျက်၊ ပျော်ရွှင်လျက်၊ မွေ့လျော်မှုများပြည့်လျက်ဖြင့် အသင်းတော်အသက်တာ နှစ်ကာလအချို့သည် ဖြုန်းတီးပစ်ခြင်းခံရသည်။ သင်တို့ ငါ့အား ပြောလော့။ ဤပျော်ရွှင်မှုနှင့် မွေ့လျော်မှုသည် မည်သည့်နေရာမှ လာသနည်း။ ဤသည်မှာ ဘုရားသခင် မြင်လိုသည့်အရာ၊ သို့မဟုတ် ဘုရားသခင်ကို ကျေနပ်စေသည့်အရာမဟုတ်ဟု ငါဆိုမည်။ အဘယ်ကြောင့်ဆိုသော် ဘုရားသခင်မြင်လိုသောအရာသည် လူတို့၏ အသက်စိတ်သဘောထားတွင် ပြောင်းလဲခြင်းဖြစ်သည်။ သမ္မာတရား၏ စစ်မှန်မှုကို အသက်ရှင်နေထိုင်နေသောလူများဖြစ်သည်။ ဘုရားသခင်က ဤ စစ်မှန်မှုကို မြင်လိုသည်။ စုဝေးပွဲများတွင် သင်ရှိနေစဉ်တွင်၊ သို့မဟုတ် စိတ်ထက်သန်နေစဉ်တွင် သင်၏ ဓမ္မသီချင်းစာအုပ်များကို ဆုပ်ကိုင်ပြီး ဘုရားသခင်ကို ချီးမွမ်းသည့်အနေဖြင့် သီဆိုခြင်း၊ ကခုန်ခြင်းတို့ကို လုပ်ဆောင်ရန် ဘုရားသခင်က သင့်အား အလိုမရှိပေ။ ဤသည်မှာ ဘုရားသခင် မြင်လိုသောအရာမဟုတ်။ ဤအရာနှင့် ပြောင်းပြန်ပင်ဖြစ်သည်။ ဘုရားသခင်သည် ဤအရာကို မြင်သောအခါ ဝမ်းနည်းပြီး နာကျင်သည်။ စိတ်သောကရောက်သည်။ အဘယ်ကြောင့်ဆိုသော် သူသည် နှုတ်ကပတ်တော်များကို ထောင်သောင်းချီပြီး ပြောဆိုခဲ့သော်လည်း တစ်ဦးတစ်ယောက်ကမျှ ၎င်းတို့ကို အမှန်တကယ် သယ်ဆောင်ပြီး အသက်ရှင်နေထိုင်ခြင်းမရှိသောကြောင့်ဖြစ်သည်။ ဤသည်မှာ ဘုရားသခင်အား စိတ်ပူစေသည့်အရာသာဖြစ်သည်။ သင်တို့သည် မကြာခဏပင် သင်တို့၏ အသင်းတော်အသက်တာမှ ငြိမ်သက်ခြင်း၊ ပျော်ရွှင်ခြင်းအနည်းငယ်ဖြင့် အလွန်ပင် အားရကျေနပ်ပြီး မိမိကိုယ်ကို ကျေနပ်ကြသည်။ သင်တို့သည် ဘုရားသခင်ကို ချီးမွမ်းပြီး ပျော်ရွှင်မှုအချို့ရရှိသည်။ ကိုယ်စိတ်ချမ်းသာမှု တစ်စွန်းတစ်စ၊ သို့မဟုတ် ဝိညာဉ်ရေးရာ ကျေနပ်မှုအချို့ရရှိသည်။ ထို့နောက် သင်တို့သည် မိမိ၏ ယုံကြည်ခြင်းကို ကောင်းစွာ ကျင့်သုံးခဲ့သည်ဟု ယုံကြည်ကြသည်။ သင်တို့သည် ဤအထင်မှားမှုများကို ဖက်တွယ်ထားပြီး ၎င်းတို့ကို အရင်းအနှီးအဖြစ်၊ ဘုရားသခင်အပေါ် သင်တို့၏ ယုံကြည်ခြင်းတွင် အကြီးဆုံးသော အဓိကအချက်အဖြစ် မှတ်ယူသည်။ ပြီးလျှင် သင်တို့၏ အသက်စိတ်သဘောထားပြောင်းလဲခြင်းနှင့် ကယ်တင်ခြင်းလမ်းကြောင်းပေါ်သို့ ဝင်ရောက်မှုတို့အစား ထိုအရာများကို လက်ခံကြသည်။ ဤသို့ဖြင့် သင်တို့သည် သမ္မာတရားကို လိုက်စားဖို့မလို၊ သို့မဟုတ် ရိုးသားသူတစ်ယောက်ဖြစ်ခြင်းကို လိုက်စားဖို့မလိုဟု ထင်ကြသည်။ သင့်ကိုယ်သင် ဆင်ခြင်သုံးသပ်ဖို့၊ သင်၏ ပြဿနာများကို ပိုင်းခြားစိစစ်ဖို့၊ သို့မဟုတ် ဘုရားနှုတ်ကပတ်တော်များကို လက်တွေ့လုပ်ဆောင်ပြီး တွေ့ကြုံဖို့ မလိုပေ။ ဤသည်မှာ အန္တရာယ်ရှိသော နယ်မြေသို့ ရောက်လာနေပြီဖြစ်သည်။ လူတို့သည် ဤသို့ ဆက်လက်လုပ်ဆောင်နေလျှင်လည်းကောင်း၊ ဘုရားသခင်၏ အမှုတော်က ပြီးဆုံးသောအခါ၊ ၎င်းတို့သည် ရိုးသားသူများ မဖြစ်သေးလျှင်လည်းကောင်း၊ သို့မဟုတ် ၎င်းတို့တာဝန်ကို လုံလောက်စွာ ထမ်းဆောင်ဖို့ မလုပ်ဆောင်နိုင်သေးလျှင်လည်းကောင်း၊ ဘုရားသခင်အပေါ် အမှန်တကယ် နာခံခြင်းကို မရရှိဘဲ အန္တိခရစ်များ၏ လှည့်စားခြင်း၊ ထိန်းချုပ်ခြင်းကို ခံရနိုင်သေးလျှင်လည်းကောင်း၊ စာတန်၏ လွှမ်းမိုးမှုမှ မလွတ်မြောက်သေးလျှင်လည်းကောင်း၊ ဘုရားသခင်က ၎င်းတို့အား ပေးခဲ့သော သတ်မှတ်ချက်များကို မပြည့်မီသေးလျှင်လည်းကောင်း ၎င်းတို့သည် ဘုရားသခင် ကယ်တင်မည့်သူများမဟုတ်ပေ။ ဤသည်မှာ ဘုရားသခင်က စိတ်ပူရသည့် အကြောင်းရင်းဖြစ်သည်။

လူတို့သည် ယုံကြည်ခြင်းတွင် လူသစ်ဖြစ်သောအခါတွင် အလွန်ပင် စိတ်ထက်သန်ကြသည်။ အထူးသဖြင့် သမ္မာတရားကို ဘုရားသခင်က မိတ်သဟာယဖွဲ့သည်ကို ၎င်းတို့ ကြားသောအခါ ၎င်းတို့က “ယခုတွင် သမ္မာတရားကို ငါနားလည်ပြီ။ လမ်းမှန်ကို တွေ့ပြီ။ ငါ အလွန်ပင် ပျော်ရွှင်သည်။” ဟု စဉ်းစားကြသည်။ နေ့စဉ်နေ့တိုင်းက နှစ်သစ်၊ သို့မဟုတ် မင်္ဂလာဆောင်ပွဲတစ်ခုကို ကျင်းပနေသကဲ့သို့ ပျော်ရွှင်ဝမ်းမြောက်ရသည်။ နေ့စဉ်နေ့တိုင်းတွင် ၎င်းတို့သည် စုဝေးပွဲ၊ သို့မဟုတ် မိတ်သဟာယအား ဦးဆောင်မည့်သူတစ်ယောက်ကို စောင့်မျှော်ကြသည်။ သို့သော် နှစ်အနည်းငယ်ကြာပြီးနောက်တွင် လူအချို့သည် အသင်းတော်အသက်တာအပေါ် ၎င်းတို့၏ စိတ်ထက်သန်မှုမရှိတော့ဘဲ ဘုရားသခင်အား ယုံကြည်ခြင်းတွင်လည်း စိတ်ထက်သန်မှုမရှိတော့ပေ။ ဤသည်မှာ အဘယ်ကြောင့်နည်း။ အဘယ်ကြောင့်ဆိုသော် ၎င်းတို့သည် ဘုရားနှုတ်ကပတ်တော်နှင့် သမ္မာတရားအပေါ် အပေါ်ယံဆန်သော၊ သဘောတရားဆိုင်ရာ နားလည်မှုသာရှိသောကြောင့်ဖြစ်သည်။ ၎င်းတို့သည် ဘုရားနှုတ်ကပတ်တော်အတွင်းသို့ အမှန်တကယ် ဝင်ရောက်ခြင်းမရှိပေ၊ သို့မဟုတ် ၎င်းတို့၏ လက်တွေ့အရှိတရားကို ကိုယ်တိုင်ကိုယ်ကျ ကြုံတွေ့ခြင်းမရှိပေ။ ဘုရားသခင်ပြောသကဲ့သို့ပင် လူများစွာတို့သည် စားပွဲပေါ်ရှိ ခမ်းနားသော အစားအစာတို့ကို ကြည့်သော်လည်း လူအများစုမှာ ကြည့်ဖို့ရန်အတွက်သာ လာခြင်းဖြစ်သည်။ ဘုရားသခင်က ပေးသော အရသာရှိသည့်အစားအစာကို ယူပြီး စားခြင်းမရှိပေ။ ၎င်းတို့၏ ကိုယ်ခန္ဓာကို ပြန်လည်အားဖြည့်ရန်အတွက် မြည်းစမ်းခြင်း၊ အသုံးပြုခြင်းမရှိပေ။ ဤသည်မှာ ဘုရားသခင် အလွန်မုန်းတီးသည့်အရာဖြစ်ပြီး ဘုရားသခင်အား စိတ်ပူစေသည့်အရာဖြစ်သည်။ ဤသည်မှာ လက်ရှိတွင် သင်တို့ရောက်ရှိနေသော အခြေအနေမဟုတ်လော။ (ဟုတ်သည်။) ငါသည် သင်တို့အား ကူညီရန်အတွက် သင်တို့အားလုံးနှင့် ကြိမ်ဖန်များစွာ မိတ်သဟာယဖွဲ့သည်။ ငါစိတ်အပူဆုံးသောအရာမှာ သင်တို့သည် ဤတရားဒေသနာများကို နားထောင်ပြီး သင်တို့၏ ဝိညာဉ်ရေးဆိုင်ရာ လိုအပ်ချက်များ ပြည့်ဝပြီးနောက်တွင် ထိုအရာများကို လက်တွေ့လုပ်ဆောင်ရန် မည်သည့်အရာကိုမျှ လုပ်ဆောင်မည်မဟုတ်ဘဲ ထိုအရာများကို လုံးဝ စဉ်းစားတော့မည်မဟုတ်ပေ။ ဤသို့ဆိုလျှင် ငါပြောခဲ့သမျှသည် အချည်းနှီးဖြစ်လိမ့်မည်။ လူတစ်ယောက်သည် မည်သို့သော အစွမ်းအစမျိုးရှိသည်ဖြစ်စေ နှစ်နှစ်၊ သို့မဟုတ် သုံးနှစ် ယုံကြည်ပြီးနောက်တွင် သူသည် သမ္မာတရားကို ချစ်သောသူဟုတ်မဟုတ် သိမြင်နိုင်မည်။ သူသည် သမ္မာတရားကို ချစ်သောသူဖြစ်လျှင် သူသည် အနှေးနှင့် အမြန် သမ္မာတရားကို လိုက်စားလိမ့်မည်။ သူသည် သမ္မာတရားကို ချစ်သောသူမဟုတ်လျှင် ကြာရှည်စွာ တည်မြဲမည်မဟုတ်ဘဲ ဖော်ထုတ်ခံရပြီး ဖယ်ရှားခံရလိမ့်မည်။ သင်တို့သည် အမှန်တကယ်ပင် သမ္မာတရားကို ချစ်သောသူများဖြစ်သလော။ သင်တို့သည် ရိုးသားသောသူများ ဖြစ်လိုစိတ်ရှိသလော။ သင်တို့သည် နောင်ကာလတွင် ပြောင်းလဲနိုင်မည်လော။ ဤမိတ်သဟာယပြီးနောက်တွင် ဤအရာထဲမှ မည်မျှကို သင်တို့ ကိုယ်တိုင်ကိုယ်ကျ ဆောင်ရွက်မည်နည်း။ အမှန်တကယ်တွင် ဤအရာထဲမှ မည်မျှက သင်တို့အထဲတွင် ရလဒ်များဖြစ်ပေါ်စေမည်နည်း။ ဤအရာအားလုံးကို မသိနိုင်ပေ။ အဆုံးတွင် ပေါ်လွင်လာလိမ့်မည်။ ဤသည်မှာ လူတစ်ယောက်က ယုံကြည်ခြင်း၌ လူသစ်ဖြစ်သောအခါတွင် မည်မျှ စိတ်ထက်သန်မှုရှိသည်၊ မည်မျှဒုက္ခခံနိုင်သည်ဆိုသည်နှင့် လုံးဝ မသက်ဆိုင်ပေ။ အဓိကအချက်မှာ သမ္မာတရားကို ချစ်ခြင်းရှိမရှိ၊ သမ္မာတရားကို လက်ခံနိုင်ခြင်းရှိမရှိဖြစ်သည်။ သမ္မာတရားကို ချစ်သောသူများသာ တရားဒေသနာတစ်ပုဒ်ကို ကြားနာပြီးနောက်တွင် ဆင်ခြင်တွေးတောလိမ့်မည်။ ၎င်းတို့သည်သာ ဘုရားနှုတ်ကပတ်တော်ကို မည်သို့ လက်တွေ့လုပ်ဆောင်ရမည်၊ မည်သို့ တွေ့ကြုံရမည်၊ မိမိတို့၏ နေ့စဉ်အသက်တာများတွင် ထိုနှုတ်ကပတ်တော်များကို မည်သို့ အသုံးချရမည်၊ ဘုရားသခင်ကို အမှန်တကယ် နာခံသောသူတစ်ယောက်ဖြစ်လာရန်အတွက် ဘုရားနှုတ်ကပတ်တော်များတွင် သမ္မာတရား၏ စစ်မှန်မှုကို မည်သို့ အသက်ရှင်နေထိုင်ရမည်ဆိုသည်တို့ကို ချင့်ချိန်တွေးတောလိမ့်မည်။ ဤသည်မှာ အဆုံးတွင် သမ္မာတရားကို ချစ်သောသူများက သမ္မာတရားကို ရရှိမည့် အကြောင်းရင်းဖြစ်သည်။ သမ္မာတရားကို မချစ်သောသူများသည် စစ်မှန်သောလမ်းကို လက်ခံကောင်းလက်ခံနိုင်သည်။ နေ့စဉ်စုဝေးပြီး တရားဒေသနာများကို နားထောင်ကာ အယူဝါဒအချို့ကို သင်ယူကောင်းသင်ယူနိုင်သည်။ သို့သော် ဆင်းရဲဒုက္ခ၊ သို့မဟုတ် စမ်းသပ်မှုများကို ၎င်းတို့ ကြုံတွေ့ရသည်နှင့်တစ်ပြိုင်နက် အပျက်သဘောဆောင်ပြီး အားနည်းလာကြသည်။ ၎င်းတို့၏ ယုံကြည်ခြင်းကိုပင် စွန့်လွှတ်နိုင်သည်။ ယုံကြည်သူများအနေဖြင့် သမ္မာတရား၏ စစ်မှန်မှုအတွင်းသို့ သင် ဝင်ရောက်နိုင်ခြင်းရှိမရှိသည် သမ္မာတရားအပေါ် သင်၏ သဘောထားနှင့် သင်၏ လိုက်စားခြင်း၏ ပန်းတိုင်က မည်သည့်အရာဖြစ်သည်၊ ထိုပန်းတိုင်သည် အမှန်တကယ်ပင် သမ္မာတရားအား သင်၏ အသက်အဖြစ် ရရှိရန်ဟုတ်မဟုတ်ဆိုသည့်အပေါ်တွင် မူတည်သည်။ လူအချို့သည် အခြားလူများကို ကူညီရန်၊ ဘုရားသခင်အား အစေခံရန်၊ သို့မဟုတ် အသင်းတော်အား ကောင်းစွာ ဦးဆောင်ရန်အတွက် မိမိတို့ကိုယ်ကို သမ္မာတရားဖြင့် ပြင်ဆင်ထားသည်။ ဤသည်မှာ မဆိုးပေ။ ဤသည်မှာ ထိုလူတို့သည် ဝန်ထုပ်ဝန်ပိုးတစ်ခုခုကို ထမ်းရွက်သည်ဆိုသည့် သဘောဖြစ်သည်။ သို့သော် ၎င်းတို့သည် ၎င်းတို့၏ ကိုယ်ပိုင်အသက်ဝင်ရောက်မှုကို၊ သို့မဟုတ် သမ္မာတရားအား လက်တွေ့လုပ်ဆောင်ခြင်းကို အာရုံမစိုက်လျှင်၊ ပြီးလျှင် ပြဿနာများကို ဖြေရှင်းရန်အတွက် သမ္မာတရားကို မရှာဖွေလျှင် သမ္မာတရား၏ စစ်မှန်မှုအတွင်းသို့ ၎င်းတို့ ဝင်ရောက်နိုင်သလော။ ဤသည်မှာ ဖြစ်နိုင်ခြေရှိမည်မဟုတ်ပေ။ ၎င်းတို့သည် သမ္မာတရား၏ စစ်မှန်မှုကို မပိုင်ဆိုင်လျှင် သူတစ်ပါးတို့ကို မည်သို့ ကူညီနိုင်မည်နည်း။ ဘုရားသခင်အား မည်သို့ အစေခံနိုင်မည်နည်း။ အသင်းတော်အလုပ်ကို ၎င်းတို့ ကောင်းစွာလုပ်နိုင်သလော။ ဤသည်မှာလည်း ဖြစ်နိုင်ခြေရှိမည်မဟုတ်ပေ။ တရားဒေသနာမည်မျှကို သင်နားထောင်ပြီးသည်၊ သို့မဟုတ် မည်သည့်လမ်းကြောင်းကို သင်ရွေးချယ်ပြီးသည်က အရေးမပါပေ။ ငါသည် သင်တို့အား မှန်ကန်သော အမြင်ရှုထောင့်ကို မျှဝေမည်။ မည်သည့်တာဝန်ကို သင်ထမ်းဆောင်သည်ဖြစ်စေ၊ သင်သည် ခေါင်းဆောင်၊ သို့မဟုတ် သာမန်နောက်လိုက်တစ်ယောက်ဖြစ်စေ သင်သည် အဓိကအနေဖြင့် ဘုရားနှုတ်ကပတ်တော်များအပေါ် အားစိုက်ထုတ်ရမည်။ ဘုရားနှုတ်ကပတ်တော်များကို ဖတ်ပြီး အလေးအနက် စဉ်းစားရမည်။ သင်သိမြင်ပြီး လက်တွေ့လုပ်ဆောင်ရန်လိုအပ်သည့် သမ္မာတရားအားလုံးကို ဦးစွာ နားလည်ရမည်။ ထိုသမ္မာတရားများနှင့် သင့်ကိုယ်သင် ယှဉ်ကြည့်ပြီး သင့်ကိုယ်သင်အတွက် ထိုအရာများကို ဆောင်ရွက်လော့။ သင်သည် သမ္မာတရားကို ဦးစွာ နားလည်ပြီး သမ္မာတရား၏ စစ်မှန်မှုသို့ ဝင်ရောက်မှုမရှိမချင်း သမ္မာတရားကို မရရှိသေးပေ။ သင်သည် အခြားလူများကို သင်နားလည်သည့် အယူဝါဒအား အစဉ်ရှင်းပြသော်လည်း ထိုအရာများကို သင်က လက်တွေ့မလုပ်ဆောင်နိုင်လျှင်၊ သို့မဟုတ် မတွေ့ကြုံနိုင်လျှင် ဤသည်မှာ အမှားတစ်ခုဖြစ်သည်။ ဤသည်မှာ မိုက်မဲခြင်း၊ မသိနားမလည်ခြင်းဖြစ်သည်။ သင်သည် ဘုရားနှုတ်ကပတ်တော်အား သမ္မာတရားအနေဖြင့် လက်တွေ့လုပ်ဆောင်ပြီး တွေ့ကြုံသင့်သည်။ တဖြည်းဖြည်းနှင့် သမ္မာတရားအများအပြားကို နားလည်လာသင့်သည်။ ထို့နောက်တွင် သင်သည် သင်၏ တာဝန်တွင် ရလဒ်များပိုပို၍ ကောင်းလာလိမ့်မည်။ မျှဝေစရာ အတွေ့အကြုံများ၊ သက်သေခံချက်များ များစွာရှိလိမ့်မည်။ ဤသို့ဖြင့် ဘုရားနှုတ်ကပတ်တော်သည် သင်၏ အသက်ဖြစ်လာလိမ့်မည်။ သင်သည် သင်၏ တာဝန်ကို သေချာပေါက် ကောင်းစွာလုပ်ဆောင်လိမ့်မည်။ ပြီးလျှင် သင်သည် ဘုရားသခင်က သင့်အားပေးအပ်သည့် စေခိုင်းချက်ကို ပြီးမြောက်နိုင်လိမ့်မည်။ သင်သည် အစဉ်သဖြင့် အခြားလူများအား ဤနှုတ်ကပတ်တော်များနှင့် ယှဉ်ကြည့်လိုလျှင်၊ အခြားလူများအပေါ် အသုံးချလျှင်၊ သို့မဟုတ် သင်၏ အလုပ်တွင် အရင်းအနှီးအဖြစ် အသုံးပြုလျှင် သင် ဒုက္ခရောက်လိမ့်မည်။ ဤသို့ လုပ်ဆောင်ရာတွင် သင်သည် အတိအကျပင် ပေါလုနှင့် တူညီသောလမ်းကြောင်းကို လျှောက်နေခြင်းဖြစ်သည်။ ဤသည်မှာ သင်၏ အမြင်ရှုထောင့်ဖြစ်သောကြောင့် သင်သည် အသေအချာပင် ဤနှုတ်ကပတ်တော်များကို အယူဝါဒအဖြစ်၊ သီအိုရီအဖြစ် မှတ်ယူနေခြင်းဖြစ်သည်။ ပြီးလျှင် သင်သည် စကားများပြောဆိုပြီး အလုပ်ပြီးမြောက်ရန်အတွက် ဤသီအိုရီများကို အသုံးပြုလိုသည်။ ဤသည်မှာ အလွန် အန္တရာယ်ရှိသည်။ ဤသည်မှာ အယောင်ဆောင်ခေါင်းဆောင်များ၊ အန္တိခရစ်များ လုပ်ဆောင်သည့်အရာဖြစ်သည်။ သင်သည် သင်၏ ကိုယ်ပိုင်အခြေအနေကို ဘုရားနှုတ်ကပတ်တော်နှင့်အညီ ရှုမြင်လျှင်၊ ဦးစွာ သင့်ကိုယ်သင် ဆင်ခြင်သုံးသပ်ပြီး နားလည်ခြင်းရှိလျှင်၊ ပြီးလျှင် သမ္မာတရားအား လက်တွေ့လုပ်ဆောင်လျှင် ဆုလာဘ်များကို သင် ရိတ်သိမ်းရမည်ဖြစ်ပြီး သမ္မာတရား၏ စစ်မှန်မှုအတွင်းသို့ ဝင်ရောက်လိမ့်မည်။ ထိုအခါမှသာ သင်သည် အရည်အသွေးပြည့်မီပြီး သင်၏ တာဝန်ကို ကောင်းစွာထမ်းဆောင်ရန် ဝိညာဉ်ရင့်ကျက်မှုရှိလိမ့်မည်။ သင်သည် ဘုရားသခင်၏ အမှုတော်နှင့် နှုတ်ကပတ်တော်များကို လက်တွေ့ တွေ့ကြုံမှုမရှိလျှင်၊ အသက်အတွင်းသို့ လုံးဝ ဝင်ရောက်ခြင်းမရှိဘဲ ဩဝါဒစာများ၊ အယူဝါဒများကိုသာ ရွတ်ဖတ်နိုင်လျှင် သင်သည် အလုပ်လုပ်လျှင်ပင် ခိုင်မာသည့်အရာ မည်သည့်အရာကိုမျှ မရရှိဘဲ မမြင်မကန်းဖြင့် လုပ်ဆောင်နေရလိမ့်မည်။ အဆုံးတွင် သင်သည် အယောင်ဆောင်ခေါင်းဆောင်ဖြစ်ပြီး အန္တိခရစ်ဖြစ်လာလိမ့်မည်။ ပြီးလျှင် ဖယ်ရှားခြင်းခံရမည်။ သင်သည် သမ္မာတရား၏ လက္ခဏာသွင်ပြင်တစ်ခုကို နားလည်လျှင် ထိုအရာဖြင့် သင့်ကိုယ်သင် နှိုင်းယှဉ်ကြည့်သင့်ပြီး သင်၏ အသက်တာတွင် လက်တွေ့အကောင်အထည်ဖော်သင့်သည်။ ဤသို့အားဖြင့် ယင်းသည် သင်၏ လက်တွေ့အရှိတရားဖြစ်လာသည်။ ထို့နောက်တွင် သင်သည် တစ်စုံတစ်ခုကို ရရှိမည်ဖြစ်ပြီး ပြောင်းလဲလိမ့်မည်။ ဘုရားနှုတ်ကပတ်တော်သည် ကောင်းသည်၊ ၎င်းတို့သည် သမ္မာတရားဖြစ်ပြီး စစ်မှန်မှုရှိသည်ဟု သင်ခံစားရသော်လည်း သင်၏ စိတ်နှလုံးတွင် သမ္မာတရားကို ချင့်ချိန်စဉ်းစားခြင်းမရှိလျှင်၊ သို့မဟုတ် နားလည်ရန်မကြိုးစားလျှင်၊ သင်၏ လက်တွေ့ဘဝတွင် လက်တွေ့လုပ်ဆောင်ပြီး တွေ့ကြုံခြင်းလည်းမရှိလျှင်၊ ထိုအစား မှတ်စုစာအုပ်ထဲတွင်သာ ရေးချပြီး ထိုနေရာတွင်ပင် ရပ်နေလျှင် သင်သည် သမ္မာတရားကို မည်သည့်အခါမျှ နားလည်မည်မဟုတ်၊ ရရှိမည်မဟုတ်ပေ။ သင်သည် ဘုရားနှုတ်ကပတ်တော်ကို ဖတ်သောအခါ၊ သို့မဟုတ် တရားဒေသနာများနှင့် မိတ်သဟာယကို ကြားသောအခါ သင်သည် ထိုအရာများကို ချင့်ချိန်တွေးတောပြီး ထိုအရာများနှင့် သင့်ကိုယ်သင် ယှဉ်ကြည့်ရမည်။ သင်၏ ကိုယ်ပိုင်အခြေအနေများနှင့် ထိုအရာများကို ဆက်စပ်ရမည်။ သင်၏ ကိုယ်ပိုင်ပြဿနာများကို ဖြေရှင်းရန် ထိုအရာများကို အသုံးပြုရမည်။ နှုတ်ကပတ်တော်များကို ဤသို့ လက်တွေ့အကောင်အထည်ဖော်ခြင်းအားဖြင့်သာ ထိုအရာများထံမှ တစ်ခုခုကို သင် အမှန်တကယ် ရရှိနိုင်သည်။ ဤသည်မှာ တရားဒေသနာတစ်ခုကို သင်တို့ ကြားပြီးနောက်တွင် သင်တို့ လက်တွေ့လုပ်ဆောင်သောအရာတစ်ခုဖြစ်သလော။ ဤသို့မဟုတ်လျှင် ဘုရားသခင်သည် သင်တို့၏ အသက်တာများတွင်မရှိသကဲ့သို့ သူ၏ နှုတ်ကပတ်တော်များလည်းမရှိပေ။ ပြီးလျှင် ဘုရားသခင်အပေါ် သင်တို့၏ ယုံကြည်မှုတွင် စစ်မှန်မှုမရှိပေ။ သင်တို့သည် မယုံကြည်သူများကဲ့သို့ ဘုရားနှုတ်ကပတ်တော်များ၏ ပြင်ပတွင် အသက်ရှင်နေခြင်းဖြစ်သည်။ ဘုရားသခင်ကို ယုံကြည်သော်လည်း ဘုရားနှုတ်ကပတ်တော်များကို လက်တွေ့လုပ်ဆောင်ပြီး တွေ့ကြုံခံစားရန်အတွက် လက်တွေ့ဘဝတွင် ဘုရားနှုတ်ကပတ်တော်များကို အသုံးမချနိုင်သူ မည်သူမဆိုသည် ဘုရားသခင်အား အမှန်တကယ် မယုံကြည်ပေ။ ၎င်းတို့သည် မယုံကြည်သူများဖြစ်သည်။ သမ္မာတရားအား လက်တွေ့မလုပ်ဆောင်နိုင်သူများသည် ဘုရားသခင်ကို နာခံသောသူများမဟုတ်ပေ။ ၎င်းတို့သည် ဘုရားသခင်ကို ပုန်ကန်ပြီး အာခံသူများဖြစ်သည်။ မိမိ၏ လက်တွေ့ဘဝအတွင်းသို့ ဘုရားနှုတ်ကပတ်တော်ကို မသယ်ဆောင်လျှင် ၎င်းတို့သည် ဘုရားသခင်၏ လုပ်ဆောင်မှုကို တွေ့ကြုံခံစားဖို့ မဖြစ်နိုင်ပေ။ မိမိ၏ လက်တွေ့အသက်တာတွင် ဘုရားသခင်၏ လုပ်ဆောင်မှုကို၊ သို့မဟုတ် ဘုရားနှုတ်ကပတ်တော်များ၏ တရားစီရင်ခြင်းနှင့် ပြစ်တင်ဆုံးမခြင်းကို မတွေ့ကြုံလျှင် သမ္မာတရားကို ရရှိရန် မဖြစ်နိုင်ပေ။ ဤအရာကို သင်တို့ နားလည်သလော။ ဤစကားများကို သင်တို့ နားလည်သဘောပေါက်နိုင်လျှင် ဤသည်မှာ အကောင်းဆုံးဖြစ်လိမ့်မည်။ သို့သော် ဤစကားများကို သင်မည်မျှ နားလည်သဘောပေါက်ပါစေ၊ သင်မည်မျှ နားလည်ပါစေ အရေးပါဆုံးသောအရာမှာ သင်အမှန်တကယ်နားလည်သော ဘုရားနှုတ်ကပတ်တော်နှင့် သမ္မာတရားကို သင်၏ လက်တွေ့အသက်တာအတွင်းသို့ သယ်ဆောင်ပြီး လက်တွေ့လုပ်ဆောင်ရန်ဖြစ်သည်။ ဤသည်မှာ သင့်အတွက် ဝိညာဉ်ရင့်ကျက်မှု ကြီးထွားပြီး သင်၏ စိတ်သဘောထားပြောင်းလဲရန် တစ်ခုတည်းသော နည်းလမ်းဖြစ်သည်။

ဘုရားသခင်သည် သမ္မာတရားကို ဖော်ပြသောအခါ၊ သို့မဟုတ် လူတို့အပေါ် သူ၏ သတ်မှတ်ချက်များကို ပြသသောအခါ သူသည် လူတို့အတွက် စည်းမျဉ်းများနှင့် လက်တွေ့လုပ်ဆောင်မှုလမ်းကြောင်းများကို အစဉ် ညွှန်ပြလိမ့်မည်။ ဥပမာအားဖြင့် ငါတို့ ယခုပြောဆိုခဲ့သော ရိုးသားသူတစ်ယောက်ဖြစ်ခြင်းကို ကြည့်လော့။ ဘုရားသခင်သည် လူတို့အား မှန်ကန်သော လမ်းကြောင်းပေါ်သို့ ရောက်ရှိရန်အတွက် ရိုးသားသောသူများ မည်သို့ဖြစ်ရမည်၊ ရိုးသားသူတစ်ယောက်ဖြစ်ခြင်း စည်းမျဉ်းများအား မည်သို့ လက်တွေ့လုပ်ဆောင်ရမည်ဆိုသည်တို့ကို ပြောပြီး လူတို့အား လမ်းကြောင်းတစ်ခုပေးခဲ့သည်။ ဘုရားသခင် ပြောခဲ့သည်မှာ- “သင်သည် အလင်း၏ လမ်းကို ရှာဖွေဖို့ အခြားသူများရှေ့တွင် သင်၏ လျှို့ဝှက်ချက်များကို- သင်၏ အခက်အခဲများကို- ချခင်းပြရန် အပြင်းအထန် ငြင်းဆန်နေပါက- သင်သည် ကယ်တင်ခြင်းကို အလွယ်တကူ မရရှိနိုင်သောသူ၊ အမှောင်ထုထဲမှ လွယ်ကူစွာ မထွက်နိုင်သူ ဖြစ်သည်ဟုငါဆို၏။” ဤနေရာတွင် ဆိုလိုသည်မှာ ငါတို့က လျှို့ဝှက်ချက်ဖြစ်သည်၊ အတွင်းရေးဖြစ်သည်ဟု ထင်မြင်သောအရာတို့ကို ဖွင့်ပြရန်၊ ပိုင်းခြားစိစစ်ရန်အတွက် တင်ပြရန် ဘုရားသခင်က ငါတို့ကို တောင်းဆိုသည်။ ဤသည်မှာ သင်တို့ မတွေးရသေးသည့်အရာဖြစ်သည်။ ဘုရားသခင်က သင်တို့ကို ဤသို့ လက်တွေ့လုပ်ဆောင်စေရန်အတွက် ဤအရာကို ပြောခဲ့သည်ကို သင်တို့ နားမလည်ပေ၊ သို့မဟုတ် မသိပေ။ တစ်ခါတစ်ရံတွင် သင်သည် ဉာဏ်များသော၊ လှည့်စားသော ရည်ရွယ်ချက်ဖြင့် လုပ်ဆောင်သည်။ ထို့ကြောင့် သင်၏ လုပ်ရပ်များနှင့် ရည်ရွယ်ချက်များကို ပြောင်းလဲသင့်သည်။ သင်၏ စကားများတွင်ရှိသော ဉာဏ်များသော၊ သို့မဟုတ် လှည့်စားသော သဘာဝကို မည်သူကမျှ မသိမြင်ကောင်း မသိမြင်နိုင်ပေ။ သို့သော် မိမိကိုယ်ကို မချီးမွမ်းနှင့်။ သင်သည် ဘုရားသခင်ရှေ့သို့ လာရောက်ပြီး သင့်ကိုယ်သင် ဆန်းစစ်သင့်သည်။ သင်သည် လူတို့ကို အရူးလုပ်နိုင်သည်။ သို့သော် ဘုရားသခင်ကို အရူးမလုပ်နိုင်ပေ။ သင်သည် ဆုတောင်းရန်၊ သင်၏ ရည်ရွယ်ချက်များနှင့် နည်းလမ်းများကို ချပြပြီး ပိုင်းခြားစိစစ်ရန်၊ သင်၏ ဤရည်ရွယ်ချက်များသည် ဘုရားသခင်အတွက် ကျေနပ်ဖွယ်ရာရှိမရှိ၊ သို့မဟုတ် ၎င်းတို့သည် ဘုရားသခင်အတွက် စက်ဆုပ်ဖွယ်ရာဖြစ်ခြင်းရှိမရှိ၊ ၎င်းတို့ကို သင် ဖွင့်ချပြနိုင်ခြင်းရှိမရှိ၊ ၎င်းတို့သည် ပြောဆိုရန် ခက်ခဲခြင်းရှိမရှိ၊ သမ္မာတရားနှင့် ညီခြင်းရှိမရှိကို ဆင်ခြင်သုံးသပ်ရန် လိုအပ်သည်။ ဤသို့သော ပိုင်းခြားစိစစ်ခြင်းနှင့် စိတ်ဖြာလေ့လာခြင်းမျိုးဖြင့် သင်သည် အမှန်တကယ်တွင် ဤအမှုအရာသည် သမ္မာတရားနှင့်မညီဆိုသည်ကို တွေ့ရှိလိမ့်မည်။ ဤအပြုအမူမျိုးသည် အလင်းဆီသို့ သယ်ဆောင်လာရန် ခက်ခဲပြီး ဘုရားသခင်ကို စက်ဆုပ်ရွံရှာစေသည်။ ထို့နောက်တွင် ဤအပြုအမူကို သင် ပြောင်းလဲလော့။ ငါ၏ ဤမိတ်သဟာယသည် သင်တို့ကို အဘယ်သို့ ခံစားစေသနည်း။ အချို့မှာ စိတ်ပူကြဖို့များသည်။ သင်တို့က “ဘုရားသခင်ကို ယုံကြည်ခြင်းသည် အလွန် ရှုပ်ထွေးသည်။ ဤမျှထိရောက်ရှိရန် ခက်ခဲနေပြီဖြစ်သည်။ ယခုတွင် ငါသည် အစကပြန်စရမည်လော။” ဟု စဉ်းစားကြသည်။ အမှန်မှာ ယခုတွင် ဘုရားသခင်က ကြွလာပြီဖြစ်ပြီး သူသည် လူသားမျိုးနွယ်အား သမ္မာတရား၏ စစ်မှန်မှုအတွင်းသို့ ဝင်ရောက်ရန် စတင်ဦးဆောင်နေပြီဖြစ်သည်။ ဤသည်မှာ ယုံကြည်သူတစ်ယောက်အနေဖြင့်၊ လူပုဂ္ဂိုလ်တစ်ယောက်အနေဖြင့် စတင်မှုဖြစ်သည်။ သင်သည် ကောင်းစွာ အစပြုမည်ဆိုလျှင် သင်၏ ယုံကြည်ခြင်း၌ ခိုင်မာသော အခြေခံအုတ်မြစ်ကို တည်ဆောက်ရမည်။ ရှေးဦးစွာ ရူပါရုံသမ္မာတရားများနှင့် ဘုရားသခင်နောက်သို့လိုက်ခြင်း၏ အရေးပါမှုကို သင်ယူလေ့လာပြီး သမ္မာတရားအား လက်တွေ့လုပ်ဆောင်ခြင်းနှင့် သင်၏ တာဝန်ကို ကောင်းစွာထမ်းဆောင်ခြင်းအပေါ် အာရုံစိုက်ရမည်။ ဤသို့ဖြင့် သမ္မာတရား၏ စစ်မှန်မှုအတွင်းသို့ ဝင်ရောက်နိုင်သည်။ သင်သည် ဩဝါဒစာများ၊ အယူဝါဒများကို ပြောဆိုခြင်းကိုသာ အာရုံစိုက်ပြီး ထိုအရာများကို အခြေခံကာ အခြေခံအုတ်မြစ်တစ်ခုကို တည်ဆောက်လျှင် ဤသည်မှာ ပြဿနာတစ်ခုဖြစ်လာသည်။ ယင်းသည် သဲပေါ်တွင် အခြေခံအုတ်မြစ်ကို တည်ဆောက်ခြင်းကဲ့သို့ဖြစ်သည်။ မည်မျှမြင့်မားအောင် တည်ဆောက်သည်ဖြစ်စေ ပြိုလဲမည့် အန္တရာယ်ရှိသည်။ ရေရှည်ခံမည်မဟုတ်ပေ။ သို့ရာတွင် ဤနေရာတွင် သင်တို့အားလုံးနှင့်ပတ်သက်ပြီး ချီးကျူးစရာတစ်ခုရှိသည်။ သင်တို့သည် သင်တို့အား ငါမိတ်သဟာယဖွဲ့သည့်အရာကို နားလည်နိုင်ပြီး နားထောင်လိုစိတ်ရှိခြင်းပင်ဖြစ်သည်။ ဤသည်မှာ ကောင်းသည်။ သမ္မာတရားအား လိုက်စားခြင်းနှင့် စစ်မှန်မှုအတွင်းသို့ ဝင်ရောက်ခြင်းသည် အရေးပါဆုံးသောအရာဖြစ်သည်။ ကျန်သည့်အရာတို့မှာ အဓိကမဟုတ်ပေ။ ဤအရာကို သင် သိသရွေ့ သင်၏ ယုံကြည်ခြင်းတွင် မှန်ကန်သော လမ်းကြောင်းပေါ်သို့ ရောက်ရှိရန် ခက်ခဲမည်မဟုတ်ပေ။ သမ္မာတရားအား လိုက်စားခြင်းလမ်းကြောင်းကို လျှောက်ရန်အတွက် သင့်ကိုယ်သင် ဦးစွာသိရမည်။ မည်သည့် ဖောက်ပြန်ပျက်စီးသော စိတ်သဘောထားများကို သင်ပိုင်ဆိုင်သည်၊ သင်၏ အားနည်းချက်များက မည်သည့်အရာများဖြစ်သည်ဆိုသည်နှင့်ပတ်သက်ပြီး ရှင်းလင်းရမည်။ ထို့နောက်တွင် သင့်ကိုယ်သင် သမ္မာတရားနှင့် ပြင်ဆင်ခြင်း၏ အရေးကြီးမှုကို နားလည်လိမ့်မည်ဖြစ်ပြီး ပြဿနာများကို ဖြေရှင်းရန်အတွက် သမ္မာတရားကို လျင်မြန်စွာ ရှာဖွေနိုင်လိမ့်မည်။ အချိန်က လူကိုမစောင့်ပေ။ အသက်ဝင်ရောက်မှုနှင့်ပတ်သက်သော သင်၏ ပြဿနာများကို ကိုင်တွယ်ပြီး သမ္မာတရား၏ စစ်မှန်မှုကို သင်ပိုင်ဆိုင်သည်နှင့် သင်၏ စိတ်အတွင်းတွင် ငြိမ်သက်ခြင်းကို အလွန်ခံစားမိလိမ့်မည်။ ကပ်ဘေးများက မည်မျှကြီးမားသည်ဖြစ်စေ သင် ကြောက်ရွံ့မည်မဟုတ်ပေ။ သင်သည် သမ္မာတရားအား လိုက်စားခြင်းမရှိဘဲ ဤပြီးခဲ့သောနှစ်အနည်းငယ်ကို ဖြုန်းတီးခဲ့လျှင်၊ အမှုအရာများဖြစ်ပေါ်လာသောအခါ သင်သည် တွေဝေနေတတ်ဆဲဖြစ်ပြီး စောင့်ဆိုင်းနေသည့် မလှုပ်မယှက်အခြေအနေတွင် ရှိနေဆဲဖြစ်ကာ သင်၏ ပြဿနာများကို ဖြေရှင်းရန်အတွက် သမ္မာတရားကိုလည်း အသုံးမပြုနိုင်လျှင်၊ လောကီအတွေးအခေါ်များနှင့် ဖောက်ပြန်ပျက်စီးသော စိတ်သဘောထားများဖြင့် အသက်ရှင်ဆဲဖြစ်လျှင် ဤသည်မှာ မည်မျှ သနားစဖွယ်ဖြစ်သနည်း။ ကပ်ဘေးများ ကြီးမားလာသည့်အချိန်ကျရောက်သောအခါ သင်သည် သမ္မာတရား၏ စစ်မှန်မှု တစ်စွန်းတစ်စကိုမျှ မပိုင်ဆိုင်လျှင် သမ္မာတရားအား မလိုက်စားခဲ့ခြင်းအတွက်၊ သို့မဟုတ် သင်၏ တာဝန်ကို ကောင်းစွာ မထမ်းဆောင်ခြင်းအတွက် နောင်တရပြီး မည်သည့်သမ္မာတရားကိုမျှ လုံးဝ ရရှိမည်မဟုတ်ပေ။ သင်သည် အစဉ်သဖြင့် သောကရောက်သည့် အခြေအနေတွင် အသက်ရှင်ရလိမ့်မည်။ ယခုအချိန်တွင် သန့်ရှင်းသောဝိညာဉ်တော်၏ လုပ်ဆောင်မှုသည် မည်သည့်လူကိုမျှ မစောင့်ပေ။ လူတို့ စတင်ယုံကြည်သည့် နှစ်အနည်းငယ်တွင် သူသည် လူတို့အား ကျေးဇူးတော်အချို့၊ သက်ညှာမှုအချို့ကိုပေးသည်။ အကူအညီနှင့် အားဖြည့်ပံ့ပိုးမှုကို ပေးသည်။ လူတို့သည် မည်သည့်အခါမျှ မပြောင်းလဲဘဲ လက်တွေ့အရှိတရားအတွင်းသို့ မည်သည့်အခါမျှ မဝင်ရောက်ဘဲ ၎င်းတို့သိသည့် အယူဝါဒများနှင့် ကျေနပ်နေလျှင် ၎င်းတို့သည် အန္တရာယ်ရှိသည်။ ၎င်းတို့သည် သန့်ရှင်းသောဝိညာဉ်တော်၏ လုပ်ဆောင်မှုနှင့် လွဲချော်သွားပြီဖြစ်သည်။ ပြီးလျှင် ဘုရားသခင်၏ ကယ်တင်ခြင်း၊ လူသားမျိုးနွယ်အား စုံလင်ခြင်းတွင် နောက်ဆုံးသောအခွင့်အရေးကို လွဲချော်ပြီးဖြစ်သည်။ ၎င်းတို့သည် အံသွားခဲကြိတ်လျက် ကပ်ဘေးများအတွင်းသို့သာ ကျဆင်းသွားနိုင်သည်။

သင်သည် သင်၏ ယုံကြည်ခြင်းတွင် အခြေခံအုတ်မြစ်တစ်ခုကို စတင်တည်ဆောက်သောအခါ သမ္မာတရားအားလိုက်စားခြင်းလမ်းကြောင်းပေါ်တွင် မြဲမြံစွာ အခြေချသင့်သည်။ သမ္မာတရား၏ စစ်မှန်မှုအတွင်းသို့ ဝင်ရောက်ခြင်းနှင့် သက်ဆိုင်သော စမှတ်ပေါ်တွင် သင်ရှိသင့်ပြီး ဩဝါဒစာများ၊ အယူဝါဒများကို ရွတ်ဖတ်ခြင်းနှင့်သက်ဆိုင်သော စမှတ်ပေါ်တွင် မရှိသင့်ပေ။ သင်သည် သမ္မာတရား၏ စစ်မှန်မှုအတွင်းသို့ ဝင်ရောက်ခြင်း၊ အရာရာ၌ သမ္မာတရားအား ရှာဖွေခြင်းနှင့် လက်တွေ့လုပ်ဆောင်ခြင်း၊ အရာရာ၌ သမ္မာတရားအား လက်တွေ့လုပ်ဆောင်နိုင်ပြီး အရာရာဖြင့် နှိုင်းယှဉ်ရန်အတွက် သမ္မာတရားကို အသုံးပြုနိုင်ခြင်းတို့ကို အာရုံစိုက်သင့်သည်။ သမ္မာတရားအား မည်သို့ လက်တွေ့လုပ်ဆောင်ရမည်ကိုလည်းကောင်း၊ လက်တွေ့လုပ်ဆောင်ရမည့် စည်းမျဉ်းများမှာ မည်သည့်အရာဖြစ်သည်ကိုလည်းကောင်း၊ သမ္မာတရားအား မည်သို့လက်တွေ့လုပ်ဆောင်ခြင်းက ဘုရားသခင်၏ သတ်မှတ်ချက်များနှင့် ကိုက်ညီပြီး ဘုရားသခင်ကို ကျေနပ်စေမည်ကိုလည်းကောင်း ချင့်ချိန်တွေးတောသင့်သည်။ သို့ရာတွင် လူတို့သည် ဝိညာဉ်ရင့်ကျက်မှု အလွန်ကင်းမဲ့သည်။ ၎င်းတို့သည် သမ္မာတရားအား လက်တွေ့လုပ်ဆောင်ခြင်းနှင့် မသက်ဆိုင်သည့်အရာများ၊ မိမိကိုယ်ကို သိမြင်ခြင်း၊ သို့မဟုတ် ရိုးသားသူတစ်ယောက်ဖြစ်ခြင်းနှင့် မသက်ဆိုင်သည့်အရာများကို အစဉ် မေးမြန်းကြသည်။ ဤသည်မှာ သနားစဖွယ်မကောင်းသလော။ သေးငယ်သော ဝိညာဉ်ရင့်ကျက်မှုကို မပြသလော။ လူအချို့သည် ဘုရားသခင်၏ ဤအမှုတော်အဆင့်ကို ဘုရားသခင်က အစပြုသည်နှင့်တစ်ပြိုင်နက် လက်ခံခဲ့ကြပြီး လက်ရှိအချိန်အထိ ယုံကြည်သူများဖြစ်ခဲ့ကြသည်။ သို့သော် ၎င်းတို့သည် သမ္မာတရား၏ စစ်မှန်မှုက မည်သည့်အရာဖြစ်သည်၊ သို့မဟုတ် သမ္မာတရားအား လက်တွေ့လုပ်ဆောင်ခြင်းသည် မည်သို့ဖြစ်သည်ဆိုသည်ကို နားမလည်သေးပေ။ လူအချို့က “ကျွန်ုပ်သည် ကျွန်ုပ်၏ ယုံကြည်ခြင်းအတွက် မိသားစုနှင့် အသက်မွေးအလုပ်ကို စွန့်လွှတ်ခဲ့ပြီး များစွာ ဖြတ်သန်းကျော်လွှားခဲ့ရသည်။ ကျွန်ုပ်သည် သမ္မာတရား၏ စစ်မှန်မှုတစ်ခုမျှမရှိဟု မည်သို့ ဆိုနိုင်သနည်း။ ကျွန်ုပ်၏ မိသားစုကို နောက်တွင် ချန်ထားခဲ့သည်။ ဤသည်မှာ စစ်မှန်မှုမဟုတ်သလော။ ကျွန်ုပ်၏ အိမ်ထောင်ကို စွန့်လွှတ်ခဲ့သည်။ ဤသည်မှာ စစ်မှန်မှုမဟုတ်သလော။ ဤအရာအားလုံးသည် သမ္မာတရားအားလက်တွေ့လုပ်ဆောင်ခြင်း၏ ဖော်ပြချက်တစ်ခုမဟုတ်သလော။” ဟူ၍ ဆိုကြသည်။ အပြင်ပန်းတွင် သင်သည် လောကီကမ္ဘာကို စွန့်လွှတ်ခဲ့သည်။ ဘုရားသခင်အား ယုံကြည်ရန် သင်၏ မိသားစုကို စွန့်လွှတ်ခဲ့သည်။ သို့သော် ဤသည်မှာ သင်က သမ္မာတရား၏ စစ်မှန်မှုအတွင်းသို့ ဝင်ရောက်ပြီးဖြစ်သည်ဆိုသည့် သဘောဖြစ်သလော။ သင်သည် ရိုးသားသူဖြစ်သည်၊ ဘုရားသခင်အား နာခံသူဖြစ်သည်ဟု အဓိပ္ပာယ်ရသလော။ သင်၏ စိတ်သဘောထားသည် ပြောင်းလဲသွားပြီ၊ သို့မဟုတ် သင်သည် သမ္မာတရား၊ သို့မဟုတ် လူ့သဘာဝကို ပိုင်ဆိုင်သောသူတစ်ယောက်ဖြစ်သည်ဟု အဓိပ္ပာယ်ရသလော။ အသေအချာပင် ဤသို့ အဓိပ္ပာယ်မရပေ။ သင်၏ ထိုအပြင်ပန်း လုပ်ဆောင်မှုများသည် အခြားလူများအတွက် ကောင်းသည့်ပုံစံရှိနိုင်သည်။ သို့သော် ထိုအရာများက သင်သည် သမ္မာတရားအား လက်တွေ့လုပ်ဆောင်နေသည်၊ သို့မဟုတ် ဘုရားသခင်အား နာခံနေသည်ဟု အဓိပ္ပာယ်မရပေ။ ပြီးလျှင် သင်သည် သမ္မာတရား၏ စစ်မှန်မှုအတွင်းသို့ ဝင်ရောက်နေသည်ဟု သေချာပေါက် အဓိပ္ပာယ်မရပေ။ လူတို့၏ စွန့်လွှတ်အနစ်နာခံမှုများနှင့် အသုံးခံမှုများသည် အလွန်ပင် မသန့်စင်ပေ။ လူတို့အားလုံးသည် ကောင်းချီးရရှိရန်ဖြစ်သော ရည်ရွယ်ချက်၏ ထိန်းချုပ်ခြင်းကို ခံရသည်။ ပြီးလျှင် ၎င်းတို့သည် စမ်းသပ်မှု၊ စစ်ဆေးမှုမှတစ်ဆင့် သန့်စင်ခြင်းမခံရသေးပေ။ ထို့ကြောင့် လူများစွာတို့သည် ၎င်းတို့၏ တာဝန်များတွင် ဝတ်ကျေတမ်းကျေရှိနေဆဲဖြစ်ပြီး အမှန်တကယ် ရလဒ်များကို မရရှိခြင်းဖြစ်သည်။ ၎င်းတို့သည် အသင်းတော်အလုပ်ကို နှောင့်ယှက်၊ ဖျက်ဆီးခြင်း၊ သေးသိမ်အောင်လုပ်ခြင်း၊ ပြဿနာပေါင်းစုံ ဖြစ်စေခြင်းပင် လုပ်ဆောင်ကြသည်။ ၎င်းတို့သည် နောင်တရဖို့ စဉ်းစားခြင်းမရှိဘဲ အပျက်သဘောဆောင်မှုကို ဆက်လက် ဖြန့်ဝေသည်။ မုသားများပြောသည်။ ၎င်းတို့၏ အမှုကို ငြင်းဆန်ရန်အတွက် အမှန်တရားများကို မလိမ့်တပတ်လုပ်သည်။ အသင်းတော်က ၎င်းတို့ကို ရှင်းလင်းပစ်သည့်အချိန်တွင်ပင် လုပ်ဆောင်ကြသည်။ လူအချို့သည် ဆယ်စုနှစ်တစ်ခု၊ နှစ်ခုအထိ ယုံကြည်သော်လည်း အထိန်းအကွပ်မဲ့ ရမ်းကားပြီး မကောင်းမှုမျိုးစုံကို လုပ်ဆောင်ဆဲဖြစ်သည်။ ထို့နောက်တွင် ၎င်းတို့ကို အသင်းတော်က ရှင်းလင်းပစ်ပြီး နှင်ထုတ်သည်။ ဆိုးရွားသောအရာများစွာကို ၎င်းတို့ လုပ်ဆောင်နိုင်သည်ဆိုသည့်အချက်သည် ၎င်းတို့တွင် ဆိုးရွားသော စရိုက်လက္ခဏာရှိသည်ကိုလည်းကောင်း၊ အလွန်ပင် ကောက်ကျစ်ပြီး ဉာဏ်များသည်ကိုလည်းကောင်း၊ ၎င်းတို့သည် လုံးဝ ဟန်ဆောင်မှုကင်းခြင်း၊ နာခံခြင်း၊ သို့မဟုတ် ကျိုးနွံခြင်းမရှိဆိုသည်ကိုလည်းကောင်း လုံလောက်စွာ သက်သေပြသည်။ ဤသည်မှာ အဘယ်ကြောင့်ဆိုသော် ၎င်းတို့သည် သမ္မာတရားအား လက်တွေ့လုပ်ဆောင်ခြင်းနှင့် ရိုးသားသူတစ်ယောက်ဖြစ်ခြင်းကို မည်သည့်အခါမျှ အလွန်ဂရုမစိုက်ခဲ့သောကြောင့်ဖြစ်သည်။ ၎င်းတို့သည် ဘုရားသခင်အပေါ် ယုံကြည်ခြင်းကို “ငါ၏ မိသားစုကို စွန့်လွှတ်သရွေ့၊ ဘုရားသခင်အတွက် ငါ့ကိုယ်ငါ အသုံးခံ၊ ဒုက္ခခံပြီး အဖိုးအခပေးဆပ်သရွေ့ ဘုရားသခင်သည် ငါ၏ လုပ်ဆောင်မှုများကို အောက်မေ့ဂုဏ်ပြုသင့်သည်။ သူ၏ ကယ်တင်ခြင်းကို ငါ ရရှိသင့်သည်။” ဟူသည့် ပုံစံအဖြစ် မြင်ကြသည်။ ဤသည်မှာ စိတ်ကစားခြင်းနှင့် လိုရာဆွဲတွေးခြင်းသာ ဖြစ်သည်။ သင်သည် ကယ်တင်ခြင်းကို ရရှိလိုပြီး ဘုရားသခင်ရှေ့သို့ အမှန်တကယ် လာရောက်လိုလျှင် ရှာဖွေလျက်ဖြင့် ဘုရားသခင်ရှေ့သို့ လာရမည်။ “အို ဘုရားသခင်၊ မည်သည့်အရာကို ကျွန်ုပ် လက်တွေ့လုပ်ဆောင်သင့်သနည်း။ လူတို့ကို ကယ်တင်ခြင်းအတွက် ကိုယ်တော်၏ စံနှုန်းမှာ အဘယ်နည်း။ မည်သို့သောလူအမျိုးအစားကို ကိုယ်တော် ကယ်တင်သနည်း။” ဟူ၍ ဖြစ်သည်။ ဤသည်မှာ အရာရာအားလုံးထက် ငါတို့ ရှာဖွေပြီး သိသင့်သည့်အရာဖြစ်သည်။ သမ္မာတရားအပေါ် သင်၏ အခြေခံအုတ်မြစ်ကို တည်ဆောက်လော့။ အရာရာ၌ သမ္မာတရားအပေါ်၊ စစ်မှန်မှုအပေါ် အားစိုက်ထုတ်လော့။ ဤသို့ဆိုလျှင် သင်သည် အခြေခံအုတ်မြစ်တစ်ခုကို ပိုင်ဆိုင်သော၊ အသက်ကို ပိုင်ဆိုင်သောသူတစ်ယောက်ဖြစ်လိမ့်မည်။ သင်သည် ဩဝါဒစာများ၊ အယူဝါဒများအပေါ် သင်၏ အခြေခံအုတ်မြစ်ကို တည်ဆောက်လျှင်၊ မည်သည့်သမ္မာတရားကိုမျှ လုံးဝ လက်တွေ့မလုပ်ဆောင်လျှင်၊ သို့မဟုတ် မည်သည့်သမ္မာတရားကိုမျှ အားစိုက်ထုတ်ခြင်းမရှိလျှင် သင်သည် အသက်ကို မည်သည့်အခါမျှ မပိုင်ဆိုင်သောသူတစ်ယောက်ဖြစ်လိမ့်မည်။ ရိုးသားသူတစ်ယောက်ဖြစ်ခြင်းကို လက်တွေ့လုပ်ဆောင်သောအခါ ငါတို့သည် ရိုးသားသူတစ်ယောက်၏ အသက်၊ စစ်မှန်မှု၊ အနှစ်သာရကို ရရှိကြသည်။ ထို့နောက်တွင် ငါတို့သည် ရိုးသားသူတစ်ယောက်၏ ကျင့်ကြံမှုနှင့် အပြုအမူရှိကြသည်။ အနည်းဆုံးအနေဖြင့် ငါတို့၏ ထိုရိုးသားသောအပိုင်းသည် ဘုရားသခင်အား ဝမ်းမြောက်စေလိမ့်မည်။ ဘုရားသခင်က လက်ခံလိမ့်မည်။ သို့ရာတွင် ငါတို့သည် မုသားများ၊ လှည့်ကွက်များ၊ လှည့်စားမှုများကို မကြာခဏ ပြသဆဲဖြစ်သည်။ ဤအရာများကို သန့်စင်ဖို့လိုသည်။ ထို့ကြောင့် ငါတို့သည် ဆက်လက်ရှာဖွေပြီး ငြီးငွေ့ဖွယ် အပြောင်းအလဲမရှိသော အလုပ်ထဲတွင် နစ်မနေဖို့ လိုသည်။ ဘုရားသခင်သည် ငါတို့အား စောင့်နေပြီး အခွင့်အရေးပေးလျက်ရှိသည်။ သင်သည် ရိုးသားသူတစ်ယောက်ဖြစ်ရန် အစီအစဉ်များ လုံးဝ မပြုလုပ်လျှင်၊ ရိုးသားစွာဖြင့်၊ စိတ်နှလုံးထဲမှ မည်သို့စကားပြောရမည်ကိုလည်းကောင်း၊ မာယာများခြင်း၊ သို့မဟုတ် လှည့်စားခြင်းများ ရောနှောနေခြင်းမရှိဘဲ အမှုအရာများကို မည်သို့ လုပ်ဆောင်ရမည်ကိုလည်းကောင်း၊ ရိုးသားသူတစ်ယောက်ကဲ့သို့ မည်သို့ ပြုမူရမည်ကိုလည်းကောင်း လုံးဝ မရှာဖွေလျှင် သင်သည် ရိုးသားသော လူသားပုံသဏ္ဌာန်တစ်ခုနှင့် အသက်ရှင်ရန်၊ သို့မဟုတ် ရိုးသားသူတစ်ယောက်ဖြစ်ခြင်းနှင့် သက်ဆိုင်သော သမ္မာတရား၏ စစ်မှန်မှုအတွင်းသို့ ဝင်ရောက်ရန် မဖြစ်နိုင်ပေ။ သင်သည် သမ္မာတရား၏ ရှုထောင့်တစ်ခုခု၏ စစ်မှန်မှုအတွင်းသို့ ဝင်ရောက်ပြီးဖြစ်လျှင် သင်သည် ထိုသမ္မာတရားရှုထောင့်ကို ရရှိပြီးဖြစ်သည်။ သင်သည် ထိုစစ်မှန်မှုကို မပိုင်ဆိုင်လျှင် ထိုအသက်၊ သို့မဟုတ် ဝိညာဉ်ရင့်ကျက်မှုကို မပိုင်ဆိုင်ပေ။ စမ်းသပ်မှုများ၊ စုံစမ်းသွေးဆောင်ခြင်းများကို ရင်ဆိုင်ရာတွင်၊ သို့မဟုတ် စေခိုင်းချက်တစ်ခုကို သင်လက်ခံရရှိသောအခါတွင် သင်သည် မည်သည့်စစ်မှန်မှုမျှမရှိလျှင် အလွယ်တကူ ယိမ်းယိုင်ပြီး အမှားများ ပြုလုပ်လိမ့်မည်။ သင်သည် ဘုရားသခင်အား ပုန်ကန်ပြစ်မှားပြီး မနာခံခြင်းတို့ ဖြစ်လွယ်လိမ့်မည်။ သင့်ကိုယ်သင် ကူညီနိုင်မည်မဟုတ်ပေ။ လူများစွာသည် ၎င်းတို့၏ တာဝန်များတွင် အထိန်းအကွပ်မဲ့ ရမ်းကားကြပြီး အကြံဉာဏ်ရယူဖို့ ငြင်းဆန်ကာ မပြောင်းလဲနိုင်ဘဲရှိနေကြသည်။ ဤသို့ဖြင့် အသင်းတော်အလုပ်ကို အလွန်ပင် နှောင့်ယှက်၊ ဖျက်ဆီးပြီး ဘုရားအိမ်တော်၏ အကျိုးစီးပွားကို အလွန်ပင် ထိခိုက်ကြသည်။ ဤလူတို့သည် အဆုံးတွင် ရှင်းလင်းခံရပြီး နှင်ထုတ်ခံရသည်။ ဤသည်မှာ ရှောင်လွှဲ၍မရသော ရလဒ်ဖြစ်သည်။ သို့သော် သင်သည် လက်ရှိတွင် ရိုးသားသူတစ်ယောက်ဖြစ်ရန် သမ္မာတရားအား လက်တွေ့လုပ်ဆောင်နေလျှင် ရိုးသားသူတစ်ယောက်အဖြစ် သင်၏ အတွေ့အကြုံဆိုင်ရာ သက်သေခံချက်ကို ဘုရားသခင်က လက်ခံအတည်ပြုသည်။ ထိုအရာကို မည်သူကမျှ သင့်ထံမှ ယူဆောင်မသွားနိုင်ပေ။ ဤစစ်မှန်မှု၊ ဤအသက်ကို မည်သူကမျှ သင့်ထံမှ မဖယ်ရှားနိုင်ပေ။ လူအချို့က “ကျွန်ုပ်သည် အချိန်ကြာမြှင့်စွာအထိ ရိုးသားသူတစ်ယောက်ဖြစ်ခဲ့ပြီဖြစ်သည်။ ဉာဏ်များသောသူတစ်ယောက်အဖြစ်သို့ ကျွန်ုပ် ပြန်၍ပြောင်းလဲနိုင်သလော။” ဟူ၍ မေးသည်။ သင်သည် သင်၏ ဖောက်ပြန်ပျက်စီးသော စိတ်သဘောထားကို ဖယ်ရှားပြီးဖြစ်လျှင်၊ သင်သည် လူသားပုံသဏ္ဌာန်အတိုင်း အသက်ရှင်နေထိုင်ပြီး သင်၏ စိတ်နှလုံးတွင် မာယာများခြင်း၊ လှည့်စားခြင်းနှင့် မယုံကြည်သူများ၏ လောကကို စက်ဆုပ်ရွံရှာလျှင် စာတန်၏ လွှမ်းမိုးမှုအောက်သို့ ပြန်မသွားနိုင်ပေ။ ဤသည်မှာ အဘယ်ကြောင့်ဆိုသော် သင်သည် ဘုရားနှုတ်ကပတ်တော်နှင့်အညီ အသက်ရှင်နိုင်သောကြောင့်၊ အလင်းထဲတွင် အသက်ရှင်နေပြီဖြစ်သောကြောင့်ဖြစ်သည်။ ဉာဏ်များသောသူတစ်ယောက်မှ ရိုးသားသူတစ်ယောက်အဖြစ်သို့ ပြောင်းလဲခြင်းသည် မလွယ်ကူပေ။ ရိုးသားသူတစ်ယောက်ဖြစ်ခြင်းမှ ဉာဏ်များသောသူတစ်ယောက်အဖြစ်သို့ ပြန်၍ပြောင်းလဲခြင်းသည် ဖြစ်နိုင်မည်မဟုတ်ဘဲ ပို၍ပင် ခက်ခဲလိမ့်မည်။ လူအချို့က “ငါသည် ရိုးသားသူတစ်ယောက်ဖြစ်ခြင်းအား နှစ်အနည်းငယ် အတွေ့အကြုံရှိသည်။ အချိန်အများစုတွင် ငါသည် အမှန်အတိုင်းပြောပြီး အတော်အတန်ပင် ရိုးသားသည်။ သို့သော် တစ်ခါတစ်ရံတွင် မမှန်ကန်သော၊ တိုက်ရိုက်မဟုတ်သော၊ သို့မဟုတ် ဉာဏ်များသောအရာတစ်ခုကို ငါပြောသည်။” ဟု ဆိုကြသည်။ ဤသည်မှာ ပြုပြင်ရန် အလွန်ပို၍လွယ်ကူသော ပြဿနာဖြစ်သည်။ သင်သည် သမ္မာတရားအား ရှာဖွေခြင်း၊ သမ္မာတရားအတွက် ကြိုးပမ်းခြင်းကို အာရုံစိုက်သရွေ့ အနာဂတ်တွင် မပြောင်းလဲနိုင်မည်ကို စိုးရိမ်ဖို့မလိုပေ။ သင်သည် အသေအချာပင် ဆက်၍ တိုးတက်လိမ့်မည်။ မြေကြီးတွင် စိုက်ပျိုးသော ပျိုးပင်ကဲ့သို့ပင် အချိန်မှန်ရေလောင်းပြီး နေ့စဉ် နေရောင် ရရှိစေလျှင် နောက်ပိုင်းတွင် အသီးအပွင့် ဖြစ်ထွန်းမည်၊ မဖြစ်ထွန်းမည်ကို စိတ်ပူဖို့မလိုပေ။ ဆောင်းဦးရာသီတွင် အသေအချာပင် သီးနှံထွက်လိမ့်မည်။ ယခုအချိန်တွင် သင်တို့ အစိုးရိမ်သင့်ဆုံးသောအရာမှာ ဤအရာဖြစ်သည်။ သင်တို့သည် ရိုးသားသူတစ်ယောက်ဖြစ်ခြင်းသို့ ဝင်ရောက်မှုတစ်ခုခုရှိသလော။ သင်တို့သည် လိမ်ညာပြောဆိုခြင်းများ ပိုပို၍ နည်းလာသလော။ သင်သည် ယခုအခါ ခြုံငုံကြည့်လျှင် ရိုးသားသူတစ်ယောက်ဖြစ်သည်ဟု ဆိုနိုင်သလော။ ဤအရာတို့သည် အဓိကကျသော မေးခွန်းများဖြစ်သည်။ လူတစ်ယောက်က “ငါသည် လှည့်စားသူတစ်ယောက်ဖြစ်သည်ကို ငါသိသည်။ သို့သော် ရိုးသားသူတစ်ယောက်ဖြစ်ခြင်းကို မည်သည့်အခါမျှ လက်တွေ့မလုပ်။” ဟုဆိုလျှင် သင်သည် ရိုးသားသူတစ်ယောက်ဖြစ်ခြင်း၏ မည်သည့်စစ်မှန်မှုမျှမရှိပေ။ သင်သည် ကြိုးစားလုပ်ဆောင်ဖို့လိုသည်။ သင့်ဘဝ၏ ရှုထောင့်တိုင်းကိုလည်းကောင်း၊ သင်၏ အမျိုးမျိုးသော အပြုအမူများအားလုံးကိုလည်းကောင်း၊ လှည့်စားမှုကို သင် လက်တွေ့လုပ်ဆောင်သည့် နည်းများအားလုံးကိုလည်းကောင်း၊ အခြားလူများအပေါ် သင်၏ ဆက်ဆံမှုကိုလည်းကောင်း ပိုင်းခြားစိစစ်ကြည့်ဖို့ လိုအပ်သည်။ ဤအရာများကို သင် ပိုင်းခြားစိစစ်ခြင်းမပြုမီတွင် သင်သည် သင့်ကိုယ်သင် အလွန်ကျေနပ်နေနိုင်သည်။ သင်လုပ်ဆောင်ခဲ့သည့်အရာများကို လုပ်ဆောင်ခဲ့ခြင်းအတွက် သင့်ကိုယ်သင် အလွန်ကျေနပ်နေနိုင်သည်။ သို့သော် ထိုအရာများကို ဘုရားနှုတ်ကပတ်တော်နှင့် ယှဉ်ပြီး သင် ပိုင်းခြားစိစစ်သည်နှင့် သင်သည် “ငါသည် အလွန်ယုတ်မာသည်၊ အလွန်မလိုမုန်းထားပြီး မသိမသာ ဒုက္ခပေးသည်ဆိုသည်ကို သတိမထားမိခဲ့။” ဟူ၍ အလွန် အံ့အားသင့်သွားလိမ့်မည်။ သင်၏ သရုပ်မှန်ကို ရှာဖွေတွေ့ရှိမည်ဖြစ်ပြီး သင်၏ အခက်အခဲများ၊ အားနည်းချက်များ၊ လှည့်စားမှုများကို အမှန်တကယ် မြင်သွားလိမ့်မည်။ သင်သည် မည်သည့် ပိုင်းခြားစိစစ်မှုမျှ မပြုလုပ်ဘဲ သင့်ကိုယ်သင် ရိုးသားသူတစ်ယောက်ဖြစ်သည်၊ လှည့်စားမှုကင်းသောသူဖြစ်သည်ဟု ထင်မြင်သော်လည်း သင့်ကိုယ်သင် လှည့်စားသူတစ်ယောက်ဟု ခေါ်ဆဲဖြစ်လျှင် သင်သည် လုံးဝ ပြောင်းလဲမည်မဟုတ်ပေ။ သင်၏ စိတ်နှလုံးတွင်ရှိသော ထို စက်ဆုပ်ဖွယ်ကောင်းသော၊ ဆိုးယုတ်သော ရည်ရွယ်ချက်များကို တူးဆွမကြည့်လျှင် သင်၏ အကျည်းတန်မှုနှင့် ဖောက်ပြန်ပျက်စီးခြင်းကို သင်မည်သို့ မြင်မည်နည်း။ သင်၏ ဖောက်ပြန်ပျက်စီးသော အခြေအနေများကို ဆင်ခြင်သုံးသပ်ပြီး ပိုင်းခြားစိစစ်ခြင်းမရှိလျှင် သင်သည် မည်မျှပင် နက်နဲစွာ ပျက်စီးနေသည်ဆိုသည့် အမှန်တရားကို မြင်မည်လော။ သင်၏ ဖောက်ပြန်ပျက်စီးသော စိတ်သဘောထားကို နားလည်ခြင်း လုံးဝမရှိလျှင် သင်သည် ပြဿနာများဖြေရှင်းရန် သမ္မာတရားအား မည်သို့ရှာဖွေရမည်ကို သိမည်မဟုတ်ပေ။ ဘုရားသခင်၏ သတ်မှတ်ချက်များနှင့်အညီ သမ္မာတရားအား မည်သို့လိုက်စားပြီး စစ်မှန်မှုအတွင်းသို့ ဝင်ရောက်ရမည်ကို သင် သိမည်မဟုတ်ပေ။ ဤသည်မှာ “သင်သည် သမ္မာတရားအား လက်တွေ့မလုပ်ဆောင်လျှင် မည်သည့်အခါမျှ စစ်မှန်မှုရှိမည်မဟုတ်။” ဆိုသည့် စကား၏ နောက်ကွယ်တွင်ရှိသော အဓိပ္ပာယ်အစစ်အမှန်ဖြစ်သည်။

ဘုရားသခင် ပြောသမျှတိုင်းသည် သမ္မာတရားဖြစ်သည်။ စကားလုံးချင်းစီတိုင်းက သမ္မာတရား၏ စစ်မှန်မှုရှိသည်။ အားလုံးသည် အပြုသဘောဆောင်သောအရာများ၏ စစ်မှန်မှုဖြစ်သည်။ လူတို့သည် ဘုရားနှုတ်ကပတ်တော်များကို လက်တွေ့လုပ်ဆောင်ပြီး ဝင်ရောက်ရန်အတွက် ၎င်းတို့၏ နေ့စဉ်အသက်တာများဆီသို့ ထိုနှုတ်ကပတ်တော်တို့ကို သယ်ဆောင်လာဖို့သာ လိုအပ်သည်။ ဘုရားသခင်ဆီမှ နှုတ်ကပတ်တော်တိုင်းသည် လူသားမျိုးနွယ် လိုအပ်သည့်အရာအတွက် ရည်ရွယ်သည်။ နှုတ်ကပတ်တော်တိုင်းက လူတို့အနေဖြင့် မိမိတို့ကိုယ်ကို နှိုင်းယှဉ်ကြည့်ဖို့ရန်ဖြစ်သည်။ တစ်ခဏတာ ဖျတ်ကနဲ ကြည့်လိုက်ဖို့ ရည်ရွယ်ခြင်းမဟုတ်သကဲ့သို့ သင်၏ ဝိညာဉ်ရေးရာလိုအပ်ချက်အချို့ကို ဖြည့်ဆည်းဖို့ ရည်ရွယ်ခြင်းလည်းမဟုတ်ပေ။ သင့်အတွက် လက်တွေ့မပါဘဲ အပြောသက်သက်သာ လုပ်ဆောင်ရန်၊ သို့မဟုတ် ဩဝါဒစာများ၊ အယူဝါဒများကို ပြောရန်အတွက် သင်၏ လိုအပ်ချက်များ ပြည့်ရန်လည်းမဟုတ်ပေ။ ဘုရားနှုတ်ကပတ်တော်တစ်လုံးစီသည် သမ္မာတရား၏ စစ်မှန်မှုကို ပိုင်ဆိုင်သည်။ သင်သည် ဘုရားနှုတ်ကပတ်တော်ကို လက်တွေ့မလုပ်ဆောင်လျှင် သမ္မာတရား၏ စစ်မှန်မှုအတွင်းသို့ ဝင်ရောက်ရန် ဖြစ်နိုင်မည်မဟုတ်ပေ။ သင်သည် အစဉ်သဖြင့် စစ်မှန်မှုနှင့် ချိတ်ဆက်ခြင်းမရှိသည့်သူတစ်ယောက် ဖြစ်လိမ့်မည်။ သင်သည် ရိုးသားသူတစ်ယောက်ဖြစ်ခြင်းကို လက်တွေ့လုပ်ဆောင်လျှင် သင်သည် အယောင်ဆောင် ဟန်ဆောင်မှုများပြုလုပ်ခြင်းထက် ရိုးသားခြင်း၏ စစ်မှန်မှုရှိမည်ဖြစ်ပြီး ရိုးသားသူတစ်ယောက်ဖြစ်ခြင်း၏ အခြေအနေ အစစ်အမှန်ကို အသက်ရှင်နေထိုင်နိုင်လိမ့်မည်။ မည်သို့သောသူမျိုးက ရိုးသားပြီး မည်သို့သောသူမျိုးက မရိုးသားဆိုသည်နှင့် ဘုရားသခင်က အဘယ်ကြောင့် လှည့်စားသူများကို အလွန်မုန်းတီးသည်ဆိုသည်တို့ကိုလည်း သင် နားလည်နိုင်လိမ့်မည်။ သင်သည် ရိုးသားသူတစ်ယောက်ဖြစ်ခြင်း၏ အရေးပါမှုကို အမှန်တကယ် နားလည်လိမ့်မည်။ ဘုရားသခင်သည် လူတို့အား ရိုးသားဖို့ တောင်းဆိုသောအခါနှင့် အဘယ်ကြောင့် လူတို့ထံမှ ဤအရာကို လိုအပ်သည်ဆိုသည်နှင့်ပတ်သက်ပြီး ဘုရားသခင်က မည်သို့ခံစားရသည်ကို သင် တွေ့ကြုံရလိမ့်မည်။ သင်၏ အလွန်ပင် ဉာဏ်များသည်ဆိုသည်ကို သင် တွေ့ရှိသောအခါတွင် သင်၏ လှည့်စားမှုနှင့် ကောက်ကျစ်မှုကို သင် မုန်းတီးလိမ့်မည်။ သင်သည် သင်၏ လှည့်စားသော၊ ကောက်ကျစ်သော စိတ်သဘောထားဖြင့် မည်မျှအရှက်မဲ့စွာ အသက်ရှင်ခဲ့သည်ကို သင် မုန်းတီးလိမ့်မည်။ ဤသို့အားဖြင့် သင်သည် ပြောင်းလဲရန် စိတ်ထက်သန်နေလိမ့်မည်။ ဤသို့ဖြင့် ရိုးသားသူတစ်ယောက်ဖြစ်ခြင်းသည် သာမန်လူ့သဘာဝကို အသက်ရှင်နေထိုင်ရန်၊ အဓိပ္ပာယ်ရှိစွာ အသက်ရှင်ရန် တစ်ခုတည်းသောနည်းလမ်းဖြစ်သည်ကို သင် ပို၍၊ ပို၍ ခံစားမိလိမ့်မည်။ ဘုရားသခင်က လူတို့အား ရိုးသားရန် တောင်းဆိုခြင်းသည် အလွန့်အလွန်ပင် အဓိပ္ပာယ်ရှိသည်ကို သင် ခံစားရလိမ့်မည်။ ဤအရာကို လုပ်ဆောင်ခြင်းအားဖြင့်သာ ဘုရားသခင်၏ အလိုတော်နှင့် ကိုက်ညီနိုင်သည်ကိုလည်းကောင်း၊ ရိုးသားသူများသာ ကယ်တင်ခြင်းကို ရရှိမည်ကိုလည်းကောင်း၊ ဘုရားသခင်ပြောသည့်အရာသည် အလုံးစုံပင် တိကျသည်ဆိုသည်ကိုလည်းကောင်း သင်ခံစားမိလိမ့်မည်။ သင်တို့ ငါ့ကို ပြောလော့။ လူတို့အား ရိုးသားရန် ဘုရားသခင် တောင်းဆိုခြင်းသည် အဓိပ္ပာယ်ရှိသလော။ (ရှိပါသည်။) ဤသို့ဆိုလျှင် ယခုမှစပြီး သင်တို့သည် သင်တို့ကိုယ်တိုင်၏ လှည့်စားသော၊ ကောက်ကျစ်သော အပိုင်းတို့ကို ပိုင်းခြားစိစစ်သင့်သည်။ ထိုအရာများကို ပိုင်းခြားစိစစ်ပြီးသည်နှင့် လှည့်စားသောအရာရာတိုင်း၏ နောက်ကွယ်တွင် ရည်ရွယ်ချက်တစ်ခု၊ ပန်းတိုင်တစ်ခုခုနှင့် လူသား၏ အကျည်းတန်မှုတစ်ခုရှိသည်ကို သင်တို့ တွေ့ရှိလိမ့်မည်။ ဤလှည့်စားမှုသည် လူတို့၏ မိုက်မဲမှု၊ တစ်ကိုယ်ကောင်းဆန်မှု၊ စက်ဆုပ်ဖွယ်ကောင်းမှုတို့အား ဖွင့်ပြသည်ကို သင် တွေ့ရှိလိမ့်မည်။ ထိုအရာကို သင်တွေ့ရှိသောအခါ သင်၏ သရုပ်မှန်ကို မြင်လိမ့်မည်။ သင်၏ သရုပ်မှန်ကို မြင်သောအခါ သင့်ကိုယ်သင် မုန်းတီးလိမ့်မည်။ သင့်ကိုယ်သင် စတင်မုန်းတီးသောအခါ၊ သင်သည် မည်သို့သောအမျိုးအစားဖြစ်သည်ကို အမှန်တကယ်သိသောအခါ သင့်ကိုယ်သင် ဆက်၍ ကြွားလုံးထုတ်မည်လော။ အချိန်တိုင်း၊ အခါတိုင်းတွင် ဆက်လက်၍ ကြွားဝါနေမည်လော။ အခြားလူများထံမှ ချီးကျူးမှု၊ ချီးမွမ်းမှုတို့ကို အစဉ် အလိုရှိမည်လော။ ဘုရားသခင်၏ တောင်းဆိုချက်များသည် မြင့်မားလွန်းသည်၊ မလိုအပ်ပေဟု ဆိုဦးမလော။ သင်သည် ထိုသို့ ပြုမူမည်မဟုတ်သကဲ့သို့ ထိုအရာများကိုလည်း ပြောမည်မဟုတ်ပေ။ ဘုရားသခင်ပြောသည့်အရာကို သင် သဘောတူလိမ့်မည်ဖြစ်ပြီး “အာမင်” ဟု ဆိုလိမ့်မည်။ သင်၏ စိတ်၊ နှလုံးသားဖြင့်၊ သင်၏ မျက်လုံးဖြင့် လက်ခံယုံကြည်လိမ့်မည်။ ဤသို့ ဖြစ်ပျက်သောအခါ သင်သည် ဘုရားနှုတ်ကပတ်တော်အား စတင်၍ လက်တွေ့လုပ်ဆောင်နေသည်၊ စစ်မှန်မှုအတွင်းသို့ ဝင်ရောက်ပြီးဖြစ်သည်၊ ရလဒ်များကို စ၍ မြင်လာပြီဖြစ်သည်ဆိုသည့် အဓိပ္ပာယ်ဖြစ်သည်။ ဘုရားနှုတ်ကပတ်တော်အား သင် လက်တွေ့လုပ်ဆောင်လေလေ၊ ထိုဘုရားနှုတ်ကပတ်တော်များသည် မည်မျှတိကျပြီး မည်မျှလိုအပ်သည်ကို သင်ခံစားရလေလေဖြစ်သည်။ သင်သည် ၎င်းတို့ကို လက်တွေ့လုပ်ဆောင်ခြင်းမရှိဘဲ “အို ငါသည် မရိုးသားပေ။ ငါသည် လှည့်စားတတ်သည်။” ဟူ၍သာ အဓိပ္ပာယ်မရှိ ပြောဆိုနေလျှင် သင်သည် အခြေအနေတစ်ခုဖြင့် ရင်ဆိုင်ရသောအခါ သင်ပြုလုပ်နေကျအတိုင်း လှည့်စားခြင်းကို ဆက်လက်ပြုလုပ်လိမ့်မည်။ ထိုစဉ်တွင် သင်သည် ထိုအရာက လှည့်စားခြင်းအဖြစ် အကျုံးမဝင်ဘဲ ရိုးသားခြင်းဖြစ်သည်၊ ဤပုံစံဖြင့် လုပ်ဆောင်၍ရသည်ဟု ထင်သည်။ နောက်တစ်ကြိမ်တွင် တစ်စုံတစ်ခုဖြစ်ပေါ်သောအခါ သင်သည် နောက်တစ်ဖန် လှည့်စားမှုများ ပြုလုပ်မည်ဖြစ်သည်။ သင်သည် တိုက်ရိုက်ပြောဆိုခြင်းမရှိဘဲ လှည့်စားလိမ့်မည်။ မုသားများကိုသာ ပြောဆိုနေလိမ့်မည်။ ထို့နောက်တွင် သင်က “ငါသည် နောက်တစ်ဖန် ကောက်ကျစ်ပြီး လှည့်စားခဲ့သလော။ နောက်တစ်ဖန် လိမ်ညာခဲ့သလော။ ဤသို့ သတ်မှတ်၍ရသည်ဟု ငါမထင်ပေ။” ဟု တွေးတောလိမ့်မည်။ သင်သည် ဘုရားသခင်ရှေ့သို့လာပြီး “ဘုရားသခင်၊ ကျွန်ုပ်သည် အစဉ်သဖြင့် လိမ်ညာဖို့ ကြိုးစားသည်။ ကောက်ကျစ်လှည့်စားသည်ဆိုသည်ကို ကိုယ်တော်သိပါသည်။ ကျေးဇူးပြု၍ ကျွန်ုပ်ကို ခွင့်လွှတ်တော်မူပါ။ နောက်တစ်ကြိမ်တွင် ဤသို့ ဖြစ်မည်မဟုတ်။ ဤသို့ဖြစ်လျှင် ကျွန်ုပ်ကို ပဲ့ပြင်ဆုံးမတော်မူပါ။” ဟူ၍ ဆုတောင်းလိမ့်မည်။ သင်သည် ဤကိစ္စကို ဖော့ပြောပြီး ပေါ့ပေါ့တန်တန်ဖြင့် ပြောဆိုသည်။ မည်သို့သောသူမျိုးက ဤသို့ ပြုလုပ်မည်နည်း။ ဤသည်မှာ သမ္မာတရားကို မချစ်ဘဲ လက်တွေ့လုပ်ဆောင်လိုစိတ်မရှိသောသူတစ်ယောက်ဖြစ်သည်။ သင်သည် အဖိုးအခအနည်းငယ် ပေးဆပ်ကောင်းပေးဆပ်နိုင်သည်၊ သို့မဟုတ် သင်၏ တာဝန်ကို ထမ်းဆောင်လျက်၊ ဘုရားသခင်ကို အစေခံလျက် သို့မဟုတ် တရားဒေသနာများကို နားထောင်လျက်ဖြင့် အချိန်အနည်းငယ် ကုန်ဆုံးကောင်းကုန်ဆုံးနိုင်သည်။ သင်သည် အလုပ်လုပ်ချိန်အချို့ကို အနစ်နာခံစွန့်လွှတ်ပြီး ပိုက်ဆံအနည်းငယ်လျော့၍ ရကောင်းရနိုင်သည်။ သို့သော် အမှန်တကယ်တွင် သင်သည် သမ္မာတရားကို အနည်းငယ်မျှပင် လက်တွေ့လုပ်ဆောင်ခြင်းမရှိပေ။ သမ္မာတရားအား လက်တွေ့လုပ်ဆောင်ခြင်း အရေးကိစ္စကို အလေးအနက်မထားပေ။ သင်သည် လုံးဝ စဉ်းစားခြင်းမရှိဘဲ အပေါ်ယံဆန်ပြီး ဂရုမစိုက်ပေ။ သင်သည် သမ္မာတရားကို လက်တွေ့လုပ်ဆောင်သောအခါ ဝတ်ကျေတမ်းကျေသာ လုပ်ဆောင်လျှင် ဤသည်မှာ သမ္မာတရားအပေါ် သင်၏ သဘောထားက ချစ်ခြင်းနှင့်မသက်ဆိုင်ဆိုသည်ကို သက်သေပြသည်။ သင်သည် သမ္မာတရားကို လက်တွေ့လုပ်ဆောင်လိုစိတ်မရှိသောသူတစ်ယောက်ဖြစ်သည်။ သင်သည် သမ္မာတရားနှင့် ဝေးကွာပြီး သမ္မာတရားကို စိတ်ကုန်သည်။ သင်၏ ယုံကြည်ခြင်းသည် ကောင်းချီးများရရန်အတွက် ရှိခြင်းဖြစ်သည်။ ဘုရားသခင်ထံမှ သင် ထွက်ခွာမသွားသည့် တစ်ခုတည်းသော အကြောင်းပြချက်မှာ အပြစ်ဒဏ်ခံရမည်ကို ကြောက်သောကြောင့်ဖြစ်သည်။ ထို့ကြောင့် သင်၏ ယုံကြည်ခြင်းကို ဖြစ်သလိုလုပ်ဆောင်သည်။ သင့်ကိုယ်သင် အမြင်ကောင်းစေရန်အတွက် အယူဝါဒ စကားများ၊ ဩဝါဒများကို ဟောဖို့ အားထုတ်သည်။ ဝိညာဉ်ရေးရာ ဝေါဟာရအချို့နှင့် နာမည်ကြီးသော ဓမ္မသီချင်းအချို့ကို သင်ယူသည်။ သမ္မာတရားအား မိတ်သဟာယဖွဲ့ခြင်းအတွက် လူသိများသော စကားလုံးအချို့နှင့် သင်၏ ယုံကြည်ခြင်းနှင့် သက်ဆိုင်သော ရေပန်းစားသောစကားလုံးများကို သင်ယူသည်။ သင့်ကိုယ်သင် ဝိညာဉ်ရေးရှိသောသူတစ်ယောက်အဖြစ် တန်ဆာဆင်ပြီး သင်သည် ဘုရားအလိုတော်နှင့် ကိုက်ညီသောသူဖြစ်ပြီး ဘုရားသခင်က အသုံးပြုခြင်းကို ခံထိုက်သည်ဟု ထင်သည်။ သင်သည် မိမိကိုယ်ကို အားရကျေနပ်ပြီး မေ့လျော့သွားသည်။ ဤအပေါ်ယံအဆင့်ပုံရိပ်အားဖြင့်၊ ဤကြောင်သူတော် အပြုအမူများအားဖြင့် အယုံသွင်းခံရပြီး အရူးလုပ်ခြင်းခံရသည်။ သင်သည် သေသည်အထိ ဤအရာများ၏ အရူးလုပ်ခြင်းကို ခံရပြီး သင်သည် ကောင်းကင်ဘုံသို့ တက်ရောက်မည်ဟု သင်ထင်သော်လည်း အမှန်တကယ်တွင် ငရဲသို့ ကျဆင်းလိမ့်မည်။ ထိုသို့သော ယုံကြည်မှုမျိုးတွင် မည်သည့်အဓိပ္ပာယ်ရှိသနည်း။ သင်၏ ဤ “ယုံကြည်ခြင်း” ဆိုသောအရာတွင် စစ်မှန်သည့်အရာ လုံးဝ မရှိပေ။ အများဆုံးအနေဖြင့် ဘုရားသခင်ရှိသည်ဟု သင် အသိအမှတ်ပြုခဲ့သည်။ သို့သော် သင်သည် သမ္မာတရား၏ စစ်မှန်မှုအတွင်းသို့ အနည်းငယ်မျှပင် ဝင်ရောက်ခြင်းမရှိ။ ထို့ကြောင့် အဆုံးတွင် သင်၏ ရလဒ်သည် မယုံကြည်သူများနှင့် အတူတူပင် ဖြစ်လိမ့်မည်။ ကောင်းသော ရလဒ်မရှိဘဲ ငရဲသို့ ကျမည်ဖြစ်သည်။ ဘုရားသခင်က “ငါတောင်းဆိုသည့်အရာသည် တောက်ပပြီး စိမ်းလန်းစိုပြေသန်စွမ်းသည့် ပန်းပွင့်များမဟုတ်ဘဲ ရက်ရောစွာပေးသော သစ်သီးဖြစ်သည်။” ဟု ဆိုသည်။ သင့်တွင် ပန်းပွင့်မည်မျှရှိပါစေ၊ သို့မဟုတ် ထိုပန်းပွင့်များက မည်မျှလှပပါစေ ဘုရားသခင်က အလိုမရှိပေ။ ဆိုလိုသည်မှာ သင်က မည်မျှကောင်းမွန်စွာ စကားပြောပါစေ၊ သင်က အသုံးခံသည့်၊ ကူညီပံ့ပိုးသည့်၊ အနစ်နာခံသည့် ပုံစံ မည်မျှရှိပါစေ ဤသည်မှာ ဘုရားသခင် ဝမ်းမြောက်သည့်အရာမဟုတ်ပေ။ သင်သည် သမ္မာတရားမည်မျှကို အမှန်တကယ်နားလည်ပြီး လက်တွေ့လုပ်ဆောင်ခဲ့သည်၊ ဘုရားနှုတ်ကပတ်တော်ထဲမှ သမ္မာတရား၏ စစ်မှန်မှုမည်မျှကို သင် အသက်ရှင်နေထိုင်ခဲ့သည်၊ သင်၏ အသက်စိတ်သဘောထားတွင် အမှန်တကယ် ပြောင်းလဲခြင်းရှိမရှိ၊ သင့်တွင် စစ်မှန်သော အတွေ့အကြုံနှင့် သက်သေခံချက်မည်မျှရှိသည်၊ ကောင်းမှုမည်မျှကို သင်ပြင်ဆင်ပြီးဖြစ်သည်၊ ဘုရားသခင်၏ အလိုတော်ကို ဖြည့်ဆည်းရန် သင် မည်မျှလုပ်ဆောင်ခဲ့သည်၊ သင်၏ တာဝန်ကို စံနှုန်းနှင့်အညီ ထမ်းဆောင်ခဲ့ခြင်းရှိမရှိတို့ကိုသာ ဘုရားသခင်က ကြည့်ရှုသည်။ ဤအရာများသည် ဘုရားသခင် ကြည့်ရှုသောအရာများဖြစ်သည်။ လူတို့သည် ဘုရားသခင်ကို နားမလည်ဘဲ ဘုရားအလိုတော်ကို မသိသောအခါ ၎င်းတို့သည် အစဉ်သဖြင့် အနက်အဓိပ္ပာယ်ကောက်လွဲမှားပြီး ဘုရားသခင်နှင့် စာရင်းရှင်းရန်နည်းအဖြစ် အပေါ်ယံဆန်သောအရာအချို့ကို ဘုရားသခင်အား တင်ပြကြသည်။ ၎င်းတို့က “ဘုရားသခင်၊ ကျွန်ုပ်သည် နှစ်များစွာ ယုံကြည်သူဖြစ်ခဲ့သည်။ နေရာပေါင်းစုံသို့ ခရီးသွားခဲ့သည်။ ဧဝံဂေလိဟောခဲ့ပြီး လူများစွာကို ပြောင်းလဲခဲ့သည်။ ကိုယ်တော်၏ နှုတ်ကပတ်တော်အပိုဒ်အချို့ကို အလွတ်ရွတ်ဆိုနိုင်ပြီး ဓမ္မသီချင်းများစွာကို သီဆိုနိုင်သည်။ ကြီးမားသော ကိစ္စတစ်ခု၊ သို့မဟုတ် ခက်ခဲသောအရာတစ်ခု ဖြစ်ပေါ်သောအခါ ကျွန်ုပ်သည် အစဉ်သဖြင့် အစာရှောင်ဆုတောင်းသည်။ ကိုယ်တော်၏ နှုတ်ကပတ်တော်များကို အချိန်ပြည့်ဖတ်သည်။ ကျွန်ုပ်သည် ကိုယ်တော်၏ အလိုတော်နှင့် မည်သို့မညီဘဲ ရှိနေနိုင်သနည်း။” ဟု ပြောကြသည်။ ထို့နောက် ဘုရားသခင်က ၎င်းတို့အား “သင်သည် ယခုတွင် ရိုးသားသူတစ်ယောက်ဖြစ်သလော။ သင်၏ လှည့်စားမှုက ပြောင်းလဲသွားပြီလော။ သင်သည် ရိုးသားသူတစ်ယောက်ဖြစ်ရန် အဖိုးအခတစ်ခုခု ပေးဆပ်ဖူးသလော။ သင်လုပ်ဆောင်ခဲ့သော လှည့်စားသောအရာများ၊ လှည့်စားမှုကို သင်ပြသခဲ့သည့် နည်းလမ်းများအားလုံးကို ငါ့ရှေ့သို့ ယူဆောင်ခဲ့ပြီး ဖွင့်ပြခဲ့သလော။ သင်သည် ငါ့အပေါ် မရိုးသားခြင်းကို လျှော့ချသလော။ သင်သည် ငါ့အပေါ်သို့ မှားယွင်းသော ကျမ်းသစ္စာများ၊ အနှစ်မရှိသော ကတိများပြုလုပ်သော၊ သို့မဟုတ် ငါ့အား လှည့်စားရန်အတွက် ကောင်းသောအရာများကို ပြောသောအချိန်ကို မှတ်မိသလော။ ဤအရာများကို သင် စွန့်လွှတ်ပြီးသလော။” ဟု ပြောသည်။ သင်သည် ဤအရာကို စဉ်းစားပြီး ဤအရာများကို လုံးဝ လက်မလွတ်ရသေးသည်ကို တွေ့ရှိသောအခါ သင်သည် အံ့ဩမှင်တက်သွားလိမ့်မည်။ သင်သည် ဘုရားသခင်ရှေ့တွင် စာရင်းရှင်းရန် နည်းလမ်းမရှိဆိုသည့်အချက်ကို သတိထားမိလိမ့်မည်။ သင်တို့အား မိမိကိုယ်ကို သိမြင်ခွင့်ပေးရန်အတွက် သင်တို့၏ ဖောက်ပြန်ပျက်စီးသော အခြေအနေကို ငါ ဖော်ထုတ်သည်။ သမ္မာတရားကို သင်တို့ လက်တွေ့လုပ်ဆောင်ပြီး စစ်မှန်မှုအတွင်းသို့ ဝင်ရောက်နိုင်ရန်အတွက် ငါသည် ဤမျှပြောဆိုခြင်းဖြစ်သည်။ နှုတ်ကပတ်တော်များ၊ မိတ်သဟာယများ၊ သို့မဟုတ် သမ္မာတရားများသည် လူတို့အတွက် များစွာ ရွတ်ဖတ်ဖို့မဟုတ်ပေ။ လက်တွေ့လုပ်ဆောင်ဖို့ဖြစ်သည်။ သင်တို့သည် အဘယ်ကြောင့် သမ္မာတရားအားလက်ခံပြီး သမ္မာတရားကို လက်တွေ့လုပ်ဆောင်ရန် အစဉ်ပြောခြင်းခံရသနည်း။ အဘယ်ကြောင့်ဆိုသော် သမ္မာတရားကသာ သင်၏ ဖောက်ပြန်ပျက်စီးမှုကို သန့်စင်နိုင်ပြီး ဘဝအပေါ် သင်၏ အမြင်နှင့် သင်၏ တန်ဖိုးများကို ပြောင်းလဲပေးနိုင်သောကြောင့်ဖြစ်သည်။ သမ္မာတရားကသာ လူတစ်ယောက်၏ အသက်ဖြစ်နိုင်သည်။ သင်သည် သမ္မာတရားကို လက်ခံသောအခါ သမ္မာတရားသည် သင်၏ အသက်ဖြစ်လာရန်အတွက် လက်တွေ့လုပ်ဆောင်ခြင်းလည်းရှိရမည်။ သင်သည် သမ္မာတရားကိုနားလည်သည်ဟု ယုံကြည်သော်လည်း လက်တွေ့မလုပ်ဆောင်ရသေးလျှင်၊ သမ္မာတရားသည် သင်၏ အသက်မဖြစ်သေးလျှင် သင်သည် ပြောင်းလဲဖို့ မဖြစ်နိုင်ပေ။ သမ္မာတရားကို သင် လက်မခံရသေးသောကြောင့် သင်၏ ဖောက်ပြန်ပျက်စီးသော စိတ်သဘောထားက သန့်စင်ခြင်းခံရဖို့ မဖြစ်နိုင်ပေ။ သမ္မာတရားကို သင် လက်တွေ့မလုပ်ဆောင်နိုင်လျှင် သင် ပြောင်းလဲမည်မဟုတ်ပေ။ နောက်ဆုံးတွင် သမ္မာတရားသည် သင်၏ စိတ်နှလုံးတွင် အမြစ်မတွယ်ဘဲ သင်၏ အသက် မဖြစ်လာလျှင် ယုံကြည်သူအနေဖြင့် သင်၏ အချိန်ပြီးဆုံးသောအခါ သင်၏ ကံကြမ္မာနှင့် ရလဒ်ကို ဆုံးဖြတ်လိမ့်မည်။ ဤမိတ်သဟာယကိုကြည့်လျှင် သင်တို့အားလုံးသည် သမ္မာတရားကို အရေးတကြီး လက်တွေ့လုပ်ဆောင်လိုစိတ်ဖြစ်ကြသလော။ သုံးနှစ်၊ ငါးနှစ်၊ သို့မဟုတ် ထိုထက်ပို၍ စောင့်ဆိုင်းပြီးမှသာ သမ္မာတရားအား လက်တွေ့လုပ်ဆောင်ခြင်းမပြုနှင့်။ သမ္မာတရားအား လက်တွေ့လုပ်ဆောင်ခြင်းနှင့် ပတ်သက်လျှင် စောလွန်းသည်၊ သို့မဟုတ် နောက်ကျလွန်းသည်ဟူ၍ မရှိပေ။ သင်သည် မကြာခင်တွင် လက်တွေ့လုပ်ဆောင်လျှင် မကြာခင်တွင် ပြောင်းလဲမည်။ နောက်ပိုင်းမှ လက်တွေ့လုပ်ဆောင်လျှင် နောက်ပိုင်းမှ ပြောင်းလဲမည်။ သန့်ရှင်းသောဝိညာဉ်တော်၏ လုပ်ဆောင်မှုနှင့် လူသားမျိုးနွယ်အပေါ် ဘုရားသခင်၏ စုံလင်ခြင်း၌ သင်၏ အခွင့်အရေးကို လွဲချော်သွားလျှင် ကပ်ဘေးကြီးများကျရောက်သောအခါ သင်သည် အန္တရာယ်ရှိလိမ့်မည်။ ထို့နောက်တွင် လူသားမျိုးနွယ်အား ကယ်တင်ရန်ဖြစ်သည့် ဘုရားသခင်၏ အမှုတော် ပြီးဆုံးသောအခါ မည်သည့်အခွင့်အရေးမျှ ကျန်ရှိမည်မဟုတ်ပေ။ သင်၏ အခွင့်အရေးကို ဆုံးရှုံးပြီးနောက်တွင် သင်က “ကျွန်ုပ်သည် ထိုအချိန်က အားစိုက်ထုတ်ခြင်း လုံးဝမရှိခဲ့။ သို့သော် ယခုတွင် ဤအရာကို စတင်၍ လက်တွေ့လုပ်ဆောင်မည်။” ဟု ဆိုလျှင် အလွန်နောက်ကျသွားမည်။ ဘုရားသခင်၏ စုံလင်ခြင်းကို ခံရဖို့ ဖြစ်နိုင်မည်မဟုတ်ပေ။ ဤသည်မှာ သန့်ရှင်းသောဝိညာဉ်တော်က အလုပ်လုပ်မည်မဟုတ်တော့သောကြောင့်ဖြစ်ပြီး အရာအားလုံးအပေါ်၊ သမ္မာတရားအားလုံးအပေါ် သင်၏ နားလည်မှုသည် အလွန်နည်းပါးမည်ဖြစ်သောကြောင့်ဖြစ်သည်။ ယခုတွင် အခြေအနေမျိုးစုံ ဖြစ်ပေါ်နေသည်။ သမ္မာတရားအား မိတ်သဟာယဖွဲ့ခြင်းမှတစ်ဆင့် သင်တို့၏ ယုံကြည်ခြင်းသည် ကြီးထွားနေပြီး ဘုရားသခင်နောက်သို့လိုက်ရန် ပို၍ တွန်းအားရှိသည်။ အချိန်အတန်ကြာအထိ အခြေအနေတစ်ခုမျှ မရှိလျှင် သင်တို့သည် သေချာပေါက် အပျက်သဘောဆောင်ပြီး စည်းကမ်းရှိမည်မဟုတ်ဘဲ ဘုရားသခင်ထံမှ ပို၍သာ လွင့်မျောသွားလိမ့်မည်။ သင်တို့သည် ဘာသာရေးလောကထဲမှ လူများကဲ့သို့သာဖြစ်ပြီး စုဝေးပွဲများ၊ ဘာသာရေးအခမ်းအနားများ၏ ပုံစံများကိုသာ ကြည့်ရှုလေ့လာကာ သမ္မာတရား၏ စစ်မှန်မှု လုံးလုံး ရှိမည်မဟုတ်ပေ။ ဤသို့ဆိုလျှင် သင်တို့သည် ရင်ကိုထုပြီး ငိုကြွေးမြည်တမ်းလျှင် မည်သို့ကောင်းကျိုးရှိမည်နည်း။

ငါ့အားပြောလော့။ လှည့်စားသူများနှင့်အတူ နေထိုင်ရခြင်းသည် ပင်ပန်းနွမ်းနယ်သလော။ (ပင်ပန်းနွမ်းနယ်ပါသည်။) ၎င်းတို့သည်လည်း ပင်ပန်းနွမ်းနယ်ခြင်းမရှိသလော။ အမှန်တကယ်တွင် ၎င်းတို့သည်လည်း မောပန်းသည်။ သို့သော် ၎င်းတို့၏ မောပန်းခြင်းကို ၎င်းတို့ မခံစားရပေ။ အဘယ်ကြောင့်ဆိုသော် လှည့်စားသောသူများနှင့် ရိုးသားသောသူများသည် မတူညီပေ။ ရိုးသားသောသူများသည် ပို၍ ရိုးရှင်းသည်။ ၎င်းတို့၏ အတွေးများသည် အလွန်ရှုပ်ထွေးခြင်းမရှိပေ။ ၎င်းတို့ထင်သည့်အရာကို ၎င်းတို့ပြောသည်။ အခြားတစ်ဖက်တွင် လှည့်စားသူများမှာမူ အစဉ်သဖြင့် သွယ်ဝိုက်ပြီး ပြောဆိုရသည်။ မည်သည့်အရာကိုမျှ တိုက်ရိုက်ပြောဆိုခြင်းမရှိ။ ထိုအစား ၎င်းတို့သည် အစဉ်သဖြင့် လှည့်စားသော လှည့်ကွက်များကို အသုံးချနေပြီး ၎င်းတို့၏ မုသားများကို ဖုံးအုပ်နေကြသည်။ ၎င်းတို့သည် အစဉ်သဖြင့် ၎င်းတို့၏ စိတ်ကို အသုံးချနေပြီး အစဉ် စဉ်းစားနေကြကာ ၎င်းတို့သည် တစ်ခုခုပေါ့ဆခဲ့လျှင် တစ်စုံတစ်ခုမှားယွင်းသွားမည်ကို ကြောက်ကြသည်။ လူအချို့သည် လှည့်စားသော လှည့်ကွက်များကို မည်သည့်အတိုင်းအတာအထိ အသုံးချကြသနည်း။ ၎င်းတို့သည် မည်သူနှင့် ဆက်ဆံသည်ဖြစ်စေ မည်သူက ပို၍ တွက်ချက်သည်၊ မည်သူက ပို၍ ပါးနပ်သည်၊ မည်သူက ထိပ်တွင်ရှိသည်ဆိုသည်ကို သိဖို့ အစဉ်ကြိုးစားနေကြပြီး အဆုံးတွင် ၎င်းတို့၏ ယှဉ်ပြိုင်လိုမှုသည် မူမမှန်သော စိတ်အခြေအနေဖြစ်လာသည်။ ၎င်းတို့သည် ညတွင် အိပ်မပျော်နိုင်ပေ။ သို့တိုင်အောင် ၎င်းတို့သည် နာကျင်မှုကို မခံစားရဘဲ ဤသည်မှာ သာမန်ပင်ဖြစ်သည်ဟုပင် ထင်ကြသည်။ ဤသို့ဆိုလျှင် ၎င်းတို့သည် အသက်ရှင်နေသော မကောင်းဆိုးဝါးများဖြစ်မလာကြသလော။ ဘုရားသခင်သည် လူတို့ကို ကယ်တင်သောအခါ လူတို့အား စာတန်၏ လွှမ်းမိုးမှုနှင့် ၎င်းတို့၏ ဖောက်ပြန်ပျက်စီးသော စိတ်သဘောထားများကို ဖယ်ရှားခွင့်၊ ရိုးသားသောသူများဖြစ်လာပြီး သူ၏ နှုတ်ကပတ်တော်များဖြင့် အသက်ရှင်နေထိုင်ခွင့်ကို ပေးသည်။ ရိုးသားသူတစ်ယောက်အဖြစ် အသက်ရှင်ရခြင်းသည် လွတ်လပ်ပြီး ချုပ်ချယ်မှုကင်းသည်။ နာကျင်မှု အလွန်ပို၍ လျော့နည်းသည်။ ဤသည်မှာ အပျော်ရွှင်ဆုံးသော ဘဝဖြစ်သည်။ ရိုးသားသူများသည် ပို၍ ရိုးရှင်းကြသည်။ ၎င်းတို့၏ စိတ်နှလုံးတွင်ရှိသောအရာကို ပြောဆိုပြီး ၎င်းတို့စဉ်းစားနေသည့်အရာကို ပြောဆိုကြသည်။ ၎င်းတို့၏ အပြောနှင့် အလုပ်တွင် ၎င်းတို့၏ အသိစိတ်နှင့် ဆင်ခြင်တုံတရားနောက်သို့ လိုက်သည်။ ၎င်းတို့သည် သမ္မာတရားအတွက် ကြိုးပမ်းလိုစိတ်ရှိကြသည်။ သမ္မာတရားကို နားလည်သောအခါ လက်တွေ့လုပ်ဆောင်ကြသည်။ အမှုအရာတစ်ခုကို ရှင်းလင်းစွာ မသိမြင်နိုင်လျှင် သမ္မာတရားကို ရှာဖွေလိုစိတ်ရှိကြသည်။ ပြီးလျှင် သမ္မာတရားနှင့်ညီသည့် မည်သည့်အရာကိုမဆို လုပ်ဆောင်ကြသည်။ ၎င်းတို့သည် နေရာတိုင်းနှင့် အရာရာတိုင်းတွင် ဘုရားအလိုတော်ကို ရှာဖွေကြပြီး ၎င်းတို့၏ လုပ်ဆောင်မှုများတွင် ဘုရားအလိုတော်နောက်သို့ လိုက်ကြသည်။ ၎င်းတို့သည် မိုက်မဲပြီး သမ္မာတရားစည်းမျဉ်းများနှင့် မိမိတို့ကိုယ်ကို ပြင်ဆင်ရမည့် နယ်ပယ်အချို့ရှိနိုင်သည်။ ဤသည်မှာ ၎င်းတို့ကို စဉ်ဆက်မပြတ် ကြီးထွားတိုးတက်ဖို့ လိုအပ်သည်။ ဤသို့ တွေ့ကြုံခြင်းသည် ၎င်းတို့က ရိုးသားနိုင်သည်၊ အမျှော်အမြင်ရှိသောသူများ ဖြစ်နိုင်ပြီး ဘုရားအလိုတော်နှင့် အလုံးစုံ ကိုက်ညီနိုင်သည်ဆိုသည့် အဓိပ္ပာယ်ဖြစ်သည်။ သို့သော် လှည့်စားသောသူများသည် ဤသို့မဟုတ်ပေ။ ၎င်းတို့သည် ဆိုးယုတ်သော စိတ်သဘောထားများဖြင့် အသက်ရှင်နေထိုင်ပြီး ၎င်းတို့၏ ဖောက်ပြန်ပျက်စီးမှုကို ထင်ရှားစေသည်။ သို့တိုင်အောင် ၎င်းတို့က ဤသို့လုပ်ဆောင်ရာတွင် အခြားလူများက ၎င်းတို့အပေါ် အသုံးချဖို့ တစ်စုံတစ်ခုကို ရှာတွေ့သွားနိုင်သည်ကိုလည်း ကြောက်ကြသည်။ ထို့ကြောင့် ၎င်းတို့သည် တုံ့ပြန်သည့်အနေဖြင့် ကောက်ကျစ်ပြီး လှည့်စားသော လှည့်ကွက်များကို အသုံးပြုသည်။ ၎င်းတို့သည် အရာရာတိုင်းက ပေါ်လွင်သွားမည့်အချိန်ကို ကြောက်ရွံ့ကြသည်။ ထို့ကြောင့် ၎င်းတို့သည် မုသားများကို လုပ်ကြံပြောဆိုပြီး ၎င်းတို့ကို ဖုံးကွယ်ရန်အတွက် တတ်နိုင်သမျှ နည်းလမ်းတိုင်းကို အသုံးပြုကြသည်။ ကွာဟမှုတစ်ခု ပေါ်လာသောအခါတွင် ထိုအရာကို ဖုံးဖိရန်အတွက် မုသားများထပ်၍ ပြောကြသည်။ အစဉ်သဖြင့် လိမ်ညာပြီး ၎င်းတို့၏ မုသားများကို ဖုံးကွယ်နေရသည်။ ဤနည်းဖြင့် အသက်ရှင်သည်မှာ မပင်ပန်းသလော။ ၎င်းတို့သည် မုသားများကို ဖန်တီးပြီး ထိုမုသားများကို ဖုံးဖိရန်အတွက် အစဉ် ဦးနှောက်ခြောက်ခံ စဉ်းစားကြရသည်။ ဤသည်မှာ အလွန်ပင် ပင်ပန်းဖွယ်ရာဖြစ်သည်။ ဤသည်မှာ မုသားများ ဖန်တီးပြီး ထိုမုသားများကို ဖုံးကွယ်ဖို့အတွက် ၎င်းတို့၏ နေ့ရက်များကို ကုန်ဆုံးရသော လှည့်စားသောသူများသည် အလွန်ပင်ပန်းနွမ်းနယ်ပြီး နာကျင်သောဘဝများရှိသည့် အကြောင်းရင်းဖြစ်သည်။ သို့ရာတွင် ရိုးသားသောသူများမှာ ဤသို့မဟုတ်ပေ။ ရိုးသားသူတစ်ယောက်အနေဖြင့် ပြောဆို၊ ပြုမူသောအခါတွင် ထည့်သွင်းစဉ်းစားစရာများစွာမရှိပေ။ ဖြစ်ရပ်အများစုတွင် ရိုးသားသူသည် အမှန်အတိုင်းသာ ပြောနိုင်သည်။ အထူးကိစ္စတစ်ခုခုက ၎င်းတို့၏ အကျိုးစီးပွားနှင့် သက်ဆိုင်သောအခါတွင်မှသာ ၎င်းတို့၏ စိတ်ကို အနည်းငယ်ပို၍ အလုပ်လုပ်ရသည်။ ၎င်းတို့သည် ၎င်းတို့၏ အကျိုးစီးပွားများကို ကာကွယ်ရန်၊ ၎င်းတို့၏ ဘဝင်မြင့်ခြင်းနှင့် မာနကို ထိန်းသိမ်းရန် လိမ်ညာကောင်းလိမ်ညာနိုင်သည်။ ဤလိမ်ညာမှု အမျိုးအစားများသည် နည်းပါးသည်။ ထို့ကြောင့် ရိုးသားသူများအတွက် ပြောဆိုပြုမူခြင်းသည် အလွန်ပင်ပန်းနွမ်းနယ်ခြင်းမရှိပေ။ လှည့်စားသူများ၏ ရည်ရွယ်ချက်များသည် ရိုးသားသူများထက်ပို၍ အလွန် ရှုပ်ထွေးသည်။ ၎င်းတို့၏ ထည့်သွင်းစဉ်းစားမှုများသည် ရှုထောင့်များစွာပါဝင်နေသည်။ ၎င်းတို့သည် ၎င်းတို့၏ သိက္ခာ၊ ၎င်းတို့၏ ဂုဏ်၊ အကျိုးအမြတ်၊ အဆင့်အတန်းကို ထည့်သွင်းစဉ်းစားရသည်။ ပြီးလျှင် ၎င်းတို့၏ အကျိုးစီးပွားကို ကာကွယ်ရသည်။ ဤအရာအားလုံးပါဝင်ပြီး အခြားလူများအား မည်သည့်အားနည်းချက်ကိုမျှ မြင်ခွင့်မပေးရပေ၊ သို့မဟုတ် လှည့်ကွက်က မပေါ်လွင်သွားရပေ။ ထို့ကြောင့် မုသားများ ထုတ်ပြောရန်အတွက် ဦးနှောက်ခြောက်ခံစဉ်းစားရသည်။ ထို့အပြင် လှည့်စားသောသူများသည် ကြီးမားသော၊ လွန်ကဲသော ဆန္ဒများနှင့် များစွာသော တောင်းဆိုမှုများရှိကြသည်။ ၎င်းတို့သည် ၎င်းတို့၏ ပန်းတိုင်များကို ရရှိရန်အတွက် နည်းလမ်းများကို ဖန်တီးရသည်။ ထို့ကြောင့် ၎င်းတို့သည် ဆက်လက်ပြီး လိမ်ညာရသည်။ ပြီးလျှင် ၎င်းတို့သည် မုသားများကို ပို၍ပြောသည်နှင့်အမျှ မုသားများကို ပို၍ ဖုံးဖိဖို့ လိုလာသည်။ ဤအတွက်ကြောင့် လှည့်စားသူ၏ အသက်တာသည် ရိုးသားသူတစ်ယောက်၏ အသက်တာထက် အလွန်ပို၍ ပင်ပန်းဖွယ်၊ နာကျင်ဖွယ်ဖြစ်ခြင်းဖြစ်သည်။ လူအချို့သည် အတော်အတန် ရိုးသားသည်။ ၎င်းတို့သည် သမ္မာတရားကို လိုက်စားနိုင်လျှင်၊ မည်သည့်မုသားများကို ၎င်းတို့ ပြောခဲ့သည်ဖြစ်စေ မိမိတို့ကိုယ်ကို ဆင်ခြင်သုံးသပ်လျှင်၊ ၎င်းတို့ လုပ်ဆောင်ခဲ့သည့် လှည့်စားမှုက မည်သည့်အရာဖြစ်စေ ထိုအရာကို အသိအမှတ်ပြုလျှင်၊ ထိုလှည့်စားမှုကို ပိုင်းခြားစိစစ်ပြီး နားလည်ဖို့ရန်အတွက် ဘုရားနှုတ်ကပတ်တော်နှင့် ယှဉ်ပြီးကြည့်လျှင်၊ ဆက်လက်၍ ပြောင်းလဲဖို့ လုပ်ဆောင်လျှင် ၎င်းတို့သည် နှစ်အနည်းငယ်ထက်ပို၍ မကြာဘဲ ၎င်းတို့၏ လိမ်ညာမှု၊ လှည့်စားမှုများစွာကို ဖယ်ရှားနိုင်လိမ့်မည်။ ထို့နောက်တွင် ၎င်းတို့သည် အခြေခံအားဖြင့် ရိုးသားသောသူများဖြစ်လာလိမ့်မည်။ ဤသို့ အသက်ရှင်ခြင်းသည် ၎င်းတို့အား နာကျင်မှု၊ ပင်ပန်းမှုမှ လွတ်မြောက်စေရုံမကဘဲ ၎င်းတို့ကို ငြိမ်သက်ခြင်း၊ ပျော်ရွှင်ခြင်းကိုလည်း ယူဆောင်ပေးသည်။ အမှုအရာများစွာတွင် ၎င်းတို့သည် ဂုဏ်သိက္ခာ၊ အကျိုးအမြတ်၊ အဆင့်အတန်း၊ ဘဝင်မြင့်ခြင်း၊ မာနတို့၏ ချုပ်ချယ်မှုမှ လွတ်မြောက်မည်ဖြစ်ပြီး လွတ်လပ်ပြီး ချုပ်ချယ်မှုကင်းသော ဘဝကို အလိုအလျောက် အသက်ရှင်နေထိုင်ရလိမ့်မည်။ သို့ရာတွင် လှည့်စားသူများသည် ၎င်းတို့၏ ပြောဆို၊ ပြုမူမှုများနောက်ကွယ်တွင် အစဉ်သဖြင့် ဖုံးကွယ်ထားသော ရည်ရွယ်ချက်များရှိကြသည်။ ၎င်းတို့သည် သူတစ်ပါးတို့ကို လိမ်လည်၊ လှည့်ဖြားရန်အတွက် မုသားမျိုးစုံကို လုပ်ကြံပြောဆိုကြသည်။ ၎င်းတို့သည် ဖော်ထုတ်ခြင်းခံရသည်နှင့် တစ်ပြိုင်နက် ၎င်းတို့၏ မုသားများကို ဖုံးဖိဖို့ နည်းလမ်းများ စဉ်းစားကြသည်။ ဤသို့၊ ထိုသို့ ဒုက္ခရောက်ပြီး ၎င်းတို့သည်လည်း ၎င်းတို့၏ ဘဝများက ပင်ပန်းဖွယ်ရာဖြစ်သည်ဟု ခံစားကြရသည်။ ၎င်းတို့ ကြုံတွေ့သည့် အခြေအနေတိုင်းတွင် မုသားများစွာကို ပြောရခြင်းမှာ ပင်ပန်းဖွယ်ရာဖြစ်နေပြီ ဖြစ်သည်။ ထို့နောက်တွင် ထိုမုသားများကို ဖုံးကွယ်ရသည်မှာ ပို၍ပင် ပင်ပန်းဖွယ်ရာဖြစ်သည်။ ၎င်းတို့ ပြောသမျှတိုင်းသည် ပန်းတိုင်တစ်ခုကို ရရှိရန် ရည်ရွယ်သည်။ ထို့ကြောင့် ၎င်းတို့ပြောသည့် စကားတိုင်းတွင် စိတ်ပိုင်းဆိုင်ရာ အားအင်များစွာ အသုံးပြုရသည်။ ပြီးလျှင် ၎င်းတို့ စကားပြောပြီးသွားသောအခါ သင်က ၎င်းတို့အကြောင်း ရိပ်စားမိမည်ကို ၎င်းတို့ ကြောက်သောကြောင့် ၎င်းတို့၏ မုသားများကို ဖုံးကွယ်ဖို့ ဦးနှောက်ခြောက်ခံစဉ်းစားရသည်။ သင့်အား အလျှော့မပေးဘဲ ရှင်းလင်းပြရသည်။ ၎င်းတို့သည် သင့်အား လိမ်ညာနေခြင်း၊ လှည့်စားနေခြင်းမဟုတ်၊ ၎င်းတို့သည် လူကောင်းများဖြစ်သည် ဆိုသည်ကို သင် လက်ခံယုံကြည်အောင်ကြိုးစားရသည်။ လှည့်စားသောသူများသည် ဤအရာများကို လုပ်ဆောင်တတ်ကြသည်။ လှည့်စားသောသူနှစ်ယောက်က အတူတကွရှိလျှင် လျှို့ဝှက်ကြံစည်မှု၊ သဘောထားကွဲလွဲမှု၊ ကြံစည်မှုများ သေချာပေါက်ရှိသည်။ ရှည်လျားရှုပ်ထွေးသော ငြင်းခုံမှုက မည်သည့်အခါမျှ ဆုံးမည်မဟုတ်ဘဲ ရလဒ်အနေဖြင့် ပိုပို၍ မုန်းတီးလာကြသည်။ မဟာရန်ဘက်များဖြစ်လာကြသည်။ သင်သည် လှည့်စားသူတစ်ယောက်နှင့်အတူရှိသော ရိုးသားသူတစ်ယောက်ဖြစ်လျှင် ဤအပြုအမူများသည် အသေအချာပင် သင့်အား ရွံရှာစေလိမ့်မည်။ ၎င်းတို့သည် ရံဖန်ရံခါသာ ဤသို့ လုပ်ဆောင်လျှင် လူတိုင်းက ဖောက်ပြန်ပျက်စီးသည့် စိတ်သဘောထားရှိပြီး ဤသို့သောအရာများကို ရှောင်ရန် ခက်ခဲသည်ဟု သင်ဆိုလိမ့်မည်။ သို့သော် ၎င်းတို့သည် အချိန်ပြည့် ဤသို့ လုပ်ဆောင်လျှင် သင်သည် ဤနည်းလမ်းများကြောင့် အထူးပင် မအီမသာဖြစ်ပြီး စက်ဆုပ်ရွံရှာလိမ့်မည်။ သင်သည် ၎င်းတို့၏ ဤပုံစံနှင့် ၎င်းတို့တွင်ရှိသော ရည်ရွယ်ချက်များကို စက်ဆုပ်ရွံရှာလိမ့်မည်။ သင်သည် အလွန်ပင် စက်ဆုပ်ရွံရှာလာသောအခါ ၎င်းတို့ကို အထင်အမြင်သေးပြီး ငြင်းပယ်လိမ့်မည်။ ဤသည်မှာ အလွန်ပင် ပုံမှန်ပင်ဖြစ်သည်။ ၎င်းတို့သည် နောင်တရပြီး ပြောင်းလဲမှုအချို့မပြလျှင် ဆက်ဆံ၍ မရနိုင်ပေ။

သင်တို့ အဘယ်သို့ ဆိုမည်နည်း။ ဘဝသည် လှည့်စားသောသူများအတွက် ပင်ပန်းနွမ်းနယ်ဖွယ်မဟုတ်သလော။ ၎င်းတို့သည် မုသားများပြောလျက်၊ ထိုမုသားများကို ဖုံးဖိရန် မုသားများကို ထပ်၍ပြောလျက်၊ လှည့်စားမှုများကို လုပ်ဆောင်လျက်ဖြင့် ၎င်းတို့၏ အချိန်အားလုံးကို ကုန်ဆုံးကြသည်။ ဤပင်ပန်းမှုကို ၎င်းတို့အပေါ်သို့ ၎င်းတို့ကိုယ်တိုင် ယူဆောင်လာကြသည်။ ဤသို့အသက်ရှင်ခြင်းသည် ပင်ပန်းဖွယ်ရာဖြစ်သည်ကို ၎င်းတို့သိသည်။ ဤသို့ဆိုလျှင် ၎င်းတို့သည် အဘယ်ကြောင့် လှည့်စားလိုဆဲဖြစ်ပြီး ရိုးသားရန် ဆန္ဒမရှိသနည်း။ ဤမေးခွန်းကို သင်တို့ စဉ်းစားကြည့်ဖူးသလော။ ဤသည်မှာ လူတို့သည် ၎င်းတို့၏ ဆိုးယုတ်သော သဘာဝများက လှည့်စားခြင်းကို ခံရခြင်း၏ အကျိုးဆက်ဖြစ်သည်။ ဤအရာက ၎င်းတို့ကို ဤအသက်တာမျိုး၊ ဤစိတ်သဘောထားမျိုးကို ဖယ်ရှားခြင်းအား ပိတ်ပင်တားဆီးထားသည်။ လူတို့သည် ဤသို့ လှည့်စားခံရခြင်းကို လက်ခံရန်၊ ဤသို့ အသက်ရှင်ရန် လိုလားကြသည်။ သမ္မာတရားကို လက်တွေ့လုပ်ဆောင်ပြီး အလင်းလမ်းကြောင်းကို မလျှောက်လိုကြပေ။ ဤသို့ အသက်ရှင်ခြင်းသည် ပင်ပန်းဖွယ်ရာဖြစ်ပြီး ဤသို့ ပြုမူခြင်းသည် မလိုအပ်ပေဟု သင်ထင်သည်။ သို့သော် လှည့်စားသောသူများက လုံးဝ လိုအပ်သည်ဟု ထင်ကြသည်။ ဤသို့မလုပ်ဆောင်လျှင် ၎င်းတို့သည် အရှက်ရမည်၊ ၎င်းတို့၏ ပုံရိပ်၊ ၎င်းတို့၏ ဂုဏ်၊ ၎င်းတို့၏ အကျိုးစီးပွားကိုလည်း ထိခိုက်မည်၊ များစွာ ဆုံးရှုံးရမည်ဟု ၎င်းတို့ ထင်ကြသည်။ ဤအရာများကို ၎င်းတို့ တန်ဖိုးထားကြသည်။ ၎င်းတို့၏ ကိုယ်ပိုင်ပုံရိပ်၊ ၎င်းတို့၏ ကိုယ်ပိုင်ဂုဏ်နှင့် အဆင့်အတန်းကို တန်ဖိုးထားကြသည်။ ဤသည်မှာ သမ္မာတရားကို မချစ်သောသူများ၏ သရုပ်မှန်ဖြစ်သည်။ အတိုချုပ်အားဖြင့် ဆိုရလျှင် လူတို့သည် ရိုးသားလိုစိတ်၊ သို့မဟုတ် သမ္မာတရားအား လက်တွေ့လုပ်ဆောင်လိုစိတ်မရှိလျှင် ဤသည်မှာ သမ္မာတရားကို ၎င်းတို့ မချစ်သောကြောင့်ဖြစ်သည်။ ၎င်းတို့၏ စိတ်နှလုံးတွင် ၎င်းတို့သည် ဂုဏ်နှင့် အဆင့်အတန်းကဲ့သို့သော အရာများကို တန်ဖိုးထားသည်။ လောကီရေပန်းစားသောအရာများနောက်သို့ လိုက်လိုပြီး စာတန်၏ လွှမ်းမိုးမှုအောက်တွင် အသက်ရှင်လိုကြသည်။ ဤသည်မှာ ၎င်းတို့၏ သဘာဝ၏ ပြဿနာဖြစ်သည်။ ယခုတွင် ဘုရားသခင်ကို နှစ်များစွာ ယုံကြည်ခဲ့သော၊ တရားဒေသနာများစွာကို ကြားနာခဲ့သော၊ ဘုရားသခင်အား ယုံကြည်ခြင်းသည် မည်သည့်အရာကိုဆိုလိုသည်ကို သိသောလူများရှိကြသည်။ သို့သော် ၎င်းတို့သည် သမ္မာတရားကို လက်တွေ့မလုပ်ဆောင်သေးပေ။ အနည်းငယ်မျှပင် မပြောင်းလဲပေ။ ဤသည်မှာ အဘယ်ကြောင့်နည်း။ သမ္မာတရားကို ၎င်းတို့ မချစ်သောကြောင့်ဖြစ်သည်။ သမ္မာတရားအနည်းငယ်ကို ၎င်းတို့ နားလည်လျှင်ပင် ၎င်းတို့သည် ထိုသမ္မာတရားကို လက်တွေ့မလုပ်ဆောင်နိုင်သေးပေ။ ဤသို့သော လူများအတွက် ဘုရားသခင်အား နှစ်မည်မျှ ယုံကြည်ပါစေ အလဟဿဖြစ်လိမ့်မည်။ သမ္မာတရားအား မချစ်သောသူများသည် ကယ်တင်ခြင်းခံရနိုင်သလော။ လုံးဝ မဖြစ်နိုင်ပေ။ သမ္မာတရားအား မချစ်ခြင်းသည် မိမိ၏ စိတ်နှလုံးတွင်ရှိသော၊ မိမိ၏ သဘာဝတွင်ရှိသော ပြဿနာတစ်ခုဖြစ်သည်။ ယင်းကို ဖြေရှင်း၍ မရနိုင်ပေ။ လူတစ်ယောက်သည် သူ၏ ယုံကြည်ခြင်းတွင် ကယ်တင်ခြင်းခံရနိုင်ခြင်းရှိမရှိသည် အဓိကအားဖြင့် သူသည် သမ္မာတရားအား ချစ်မချစ်အပေါ်တွင် မူတည်သည်။ သမ္မာတရားကို ချစ်သောသူတို့သာ သမ္မာတရားကို လက်ခံနိုင်သည်။ ၎င်းတို့သာ သမ္မာတရားအတွက် ဆင်းရဲဒုက္ခကို ဖြတ်သန်းနိုင်ပြီး အဖိုးအခပေးဆပ်နိုင်သည်။ ၎င်းတို့သာ ဘုရားသခင်ကို ဆုတောင်းပြီး ဘုရားသခင်ကို အမှီပြုနိုင်သည်။ ၎င်းတို့သည်သာ သမ္မာတရားကို ရှာနိုင်ပြီး ၎င်းတို့၏ အတွေ့အကြုံများမှတစ်ဆင့် မိမိကိုယ်ကို ဆင်ခြင်သုံးသပ်ကာ သိမြင်နိုင်သည်။ ဇာတိပကတိကို စွန့်ပစ်ဖို့အတွက် သတ္တိရှိနိုင်သည်။ ပြီးလျှင် သမ္မာတရားအား လက်တွေ့လုပ်ဆောင်မှုနှင့် ဘုရားသခင်အား နာခံခြင်းကို ရရှိနိုင်သည်။ သမ္မာတရားကို ချစ်သောသူတို့သာ ဤနည်းလမ်းဖြင့် သမ္မာတရားကို လိုက်စားနိုင်သည်။ ကယ်တင်ခြင်းလမ်းကြောင်းကို လျှောက်နိုင်ပြီး ဘုရားသခင်၏ လက်ခံမှုကို ရရှိနိုင်သည်။ ဤအရာမှလွဲ၍ အခြားလမ်းကြောင်းမရှိပေ။ သမ္မာတရားကို မချစ်သောသူတို့အတွက် သမ္မာတရားကို လက်ခံရန် အလွန်ခက်ခဲသည်။ ဤသည်မှာ ၎င်းတို့၏ သဘောသဘာဝအရ ၎င်းတို့သည် သမ္မာတရားကို စိတ်ကုန်ပြီး မုန်းတီးသောကြောင့်ဖြစ်သည်။ ၎င်းတို့သည် ဘုရားသခင်အား အာခံခြင်း၊ မကောင်းမှုလုပ်ဆောင်ခြင်းကို ရပ်တန့်လိုလျှင် ဤသို့လုပ်ဆောင်ရန် ၎င်းတို့အတွက် အလွန်ခက်ခဲလိမ့်မည်။ အဘယ်ကြောင့်ဆိုသော် ၎င်းတို့သည် စာတန်နှင့် သက်ဆိုင်ပြီး နတ်ဆိုးများ၊ ဘုရားသခင်၏ ရန်သူများ ဖြစ်နေပြီဖြစ်သောကြောင့်ပင်။ ဘုရားသခင်က လူသားမျိုးနွယ်ကို ကယ်တင်သည်။ နတ်ဆိုးများ၊ သို့မဟုတ် စာတန်ကို မကယ်တင်ပေ။ လူအချို့က “ကျွန်ုပ်သည် သမ္မာတရားကို အမှန်ပင် နားလည်သည်။ လက်တွေ့မလုပ်ဆောင်နိုင်ခြင်းသာ ဖြစ်သည်။ အဘယ်သို့ ကျွန်ုပ် လုပ်ဆောင်သင့်သနည်း။” ဟူသကဲ့သို့သော မေးခွန်းများကို မေးသည်။ ဤသည်မှာ သမ္မာတရားကို မချစ်သောသူတစ်ယောက်ဖြစ်သည်။ လူတစ်ယောက်သည် သမ္မာတရားကို မချစ်လျှင် သမ္မာတရားကို နားလည်လျှင်ပင် လက်တွေ့မလုပ်ဆောင်နိုင်ပေ။ အဘယ်ကြောင့်ဆိုသော် ၎င်းတို့သည် စိတ်နှလုံးတွင် ထိုသို့လုပ်ဆောင်လိုစိတ်မရှိဘဲ သမ္မာတရားကို မနှစ်သက်သောကြောင့်ဖြစ်သည်။ ဤသို့သောသူသည် ကယ်တင်ခြင်းခံရဖို့ မဖြစ်နိုင်ပေ။ လူအချို့က “ကျွန်ုပ်အတွက် ရိုးသားသူတစ်ယောက်ဖြစ်ခြင်းအားဖြင့် များစွာ ရှုံးနိမ့်ရသည့် ပုံစံရှိသည်။ ထို့ကြောင့် ရိုးသားသူတစ်ယောက် မဖြစ်ချင်ပါ။ လှည့်စားသောသူများသည် မည်သည့်အခါမျှ ရှုံးနိမ့်ခြင်းမရှိ။ အခြားလူများထံမှ အခွင့်အကောင်းယူခြင်းအားဖြင့် အကျိုးအမြတ်ပင် ရရှိသည်။ ထို့ကြောင့် ကျွန်ုပ်သည် လှည့်စားသူသာ ဖြစ်လိုသည်။ ကျွန်ုပ်သည် ကျွန်ုပ်၏ အတွင်းရေးကိစ္စကို အခြားလူများအား သိစေဖို့၊ အခြားလူများအား ကျွန်ုပ်ကို သဘောပေါက်စေဖို့၊ နားလည်စေဖို့ မလိုလားပေ။ ကျွန်ုပ်၏ ကံကြမ္မာသည် ကျွန်ုပ်၏ ကိုယ်ပိုင်လက်ထဲတွင် ရှိသင့်သည်။” ဟူ၍ ပြောကြသည်။ ရသည်။ ဤသို့ဆိုလျှင် စမ်းသပ်ကြည့်လော့။ အဆုံးတွင် မည်သို့သော ရလဒ်မျိုးကို သင်ရှိသည်ကို ကြည့်လော့။ အဆုံးတွင် မည်သူက ငရဲကျပြီး မည်သူက အပြစ်ဒဏ်ခံရသည်ကို ကြည့်လော့။

သင်တို့သည် ရိုးသားလိုစိတ်ရှိသလော။ ဤမိတ်သဟာယကို ကြားနာပြီးနောက်တွင် မည်သည့်အရာကို လုပ်ဆောင်ရန် သင်တို့ စီစဉ်သနည်း။ ရှေးဦးစွာ မည်သည့်အရာဖြင့် အစပြုမည်နည်း။ (မလိမ်ညာခြင်းအားဖြင့် အစပြုမည်။) ဤသည်မှာ လက်တွေ့လုပ်ဆောင်ရန် မှန်ကန်သောနည်းလမ်းဖြစ်သည်။ သို့သော် မလိမ်ညာခြင်းသည် မလွယ်ကူပေ။ လူတို့၏ လိမ်ညာမှုများနောက်ကွယ်တွင် မကြာခဏပင် ရည်ရွယ်ချက်များရှိတတ်သည်။ သို့သော် လိမ်ညာမှုအချို့၏ နောက်ကွယ်တွင် မည်သည့်ရည်ရွယ်ချက်မျှမရှိသကဲ့သို့ တမင်သက်သက် စီစဉ်ထားခြင်းလည်းမရှိပေ။ ထိုအစား ၎င်းတို့သည် အလိုအလျောက် ထွက်ပေါ်လာခြင်းဖြစ်သည်။ ဤသို့သော မုသားများသည် ဖြေရှင်းရန် လွယ်ကူသည်။ ဖြေရှင်းရန် ခက်ခဲသော မုသားများမှာ နောက်ကွယ်တွင် ရည်ရွယ်ချက်များရှိသော မုသားများဖြစ်သည်။ ဤသည်မှာ အဘယ်ကြောင့်ဆိုသော် ဤရည်ရွယ်ချက်များသည် လူတစ်ယောက်၏ သဘာဝမှ ထွက်ပေါ်လာပြီး စာတန်၏ လှည့်စားမှုကို ကိုယ်စားပြုသောကြောင့်ဖြစ်သည်။ ၎င်းတို့သည် လူတို့ တမင်ရွေးချယ်သော ရည်ရွယ်ချက်များဖြစ်သည်။ လူတစ်ယောက်သည် သမ္မာတရားကို မချစ်လျှင် ဇာတိပကတိကို စွန့်လွှတ်နိုင်မည်မဟုတ်ပေ။ ထို့ကြောင့် သူသည် ဘုရားသခင်ကို ဆုတောင်းပြီး အမှီပြုသင့်သည်။ ပြဿနာကို ဖြေရှင်းရန် သမ္မာတရားကို ရှာဖွေသင့်သည်။ သို့သော် လိမ်ညာခြင်းအားလုံးကို တစ်ပြိုင်နက် အပြည့်အဝ မဖြေရှင်းနိုင်ပေ။ ရံဖန်ရံခါ ထပ်မံဖြစ်ပေါ်ခြင်းနှင့် များစွာ ထပ်မံဖြစ်ပေါ်ခြင်းပင် ရှိလိမ့်မည်။ ဤသည်မှာ သာမန်အခြေအနေဖြစ်သည်။ သင်ပြောသည့် မုသားတစ်ခုချင်းစီတိုင်းကို သင်ဖြေရှင်းသရွေ့၊ ဤအရာကို အမီလိုက်ပြီး လုပ်ဆောင်သရွေ့ ထိုမုသားများအားလုံးကို သင်ဖြေရှင်းပြီးဖြစ်သည့် နေ့ရက်ကို ရောက်လာမည်ဖြစ်သည်။ လိမ်ညာမှုကို ဖြေရှင်းခြင်းသည် ရှည်လျားသော စစ်ပွဲဖြစ်သည်။ မုသားတစ်ခု ပွင့်အန်ထွက်လာသောအခါတွင် သင့်ကိုယ်သင် ဆင်ခြင်သုံးသပ်ပြီး ဘုရားသခင်ထံ ဆုတောင်းလော့။ နောက်ထပ် မုသားတစ်ခု ထွက်လာသောအခါ နောက်တစ်ဖန် သင့်ကိုယ်သင် ဆင်ခြင်သုံးသပ်ပြီး ဘုရားသခင်ထံ ဆုတောင်းလော့။ ဘုရားသခင်အား သင် ဆုတောင်းလေလေ၊ သင်၏ ဖောက်ပြန်ပျက်စီးသော စိတ်သဘောထားကို မုန်းတီးလေလေ၊ သမ္မာတရားအား လက်တွေ့လုပ်ဆောင်ပြီး သမ္မာတရားကို အသက်ရှင်နေထိုင်ရန် သင် တောင့်တလေလေဖြစ်သည်။ ဤသို့ဖြင့် သင်သည် မုသားများကို စွန့်ပစ်ရန် အားအင်ရှိလိမ့်မည်။ ဤသို့သော အတွေ့အကြုံနှင့် လက်တွေ့လုပ်ဆောင်သည့် အချိန်ပြီးနောက်တွင် သင်၏ မုသားများသည် အလွန်ပို၍ နည်းပါးလာသည်ကိုလည်းကောင်း၊ သင်သည် အလွန်ပို၍ စိတ်အေးလျက် အသက်ရှင်နေသည်ကိုလည်းကောင်း၊ သင်သည် လိမ်ညာဖို့၊ သို့မဟုတ် သင်၏ မုသားများကို ဖုံးကွယ်ဖို့ မလိုတော့သည်ကိုလည်းကောင်း မြင်နိုင်လိမ့်မည်။ သင်သည် တစ်ရက်ပြီးတစ်ရက် စကားများစွာ မပြောဆိုကောင်း မပြောဆိုနိုင်သော်လည်း စကားတိုင်းက စိတ်နှလုံးမှ လာမည်ဖြစ်ပြီး မှန်ကန်လိမ့်မည်။ မုသား အလွန်နည်းလိမ့်မည်။ ဤသို့ အသက်ရှင်ရသည်မှာ မည်သို့ ခံစားရမည်နည်း။ ဤသည်မှာ လွတ်လပ်ပြီး ချုပ်ချယ်မှုကင်းမည်မဟုတ်လော။ သင်၏ ဖောက်ပြန်ပျက်စီးသော စိတ်သဘောထားသည် သင့်ကို အုပ်စိုးမည်မဟုတ်ဘဲ သင်သည် ယင်း၏ ချည်နှောင်ခြင်းကို ခံရမည်မဟုတ်ပေ။ သင်သည် အနည်းဆုံးအနေဖြင့် ရိုးသားသူတစ်ယောက်ဖြစ်ခြင်း၏ ရလဒ်များကို စတင်မြင်တွေ့လိမ့်မည်။ အထူးအခြေအနေများကို သင် ကြုံတွေ့ရသောအခါတွင် သင်သည် တစ်ခါတစ်ရံတွင် သေးငယ်သော မုသားတစ်ခု ပြောထွက်မိမည်မှာ ပြောစရာမလိုပေ။ သင်သည် အန္တရာယ်ကြုံတွေ့ရသော၊ သို့မဟုတ် ဒုက္ခတစ်မျိုးမျိုး ကြုံတွေ့ရသော၊ သို့မဟုတ် သင်၏ ဘေးကင်းမှုကို ထိန်းသိမ်းလိုသော အချိန်များရှိနိုင်သည်။ ထိုအချိန်များတွင် လိမ်ညာခြင်းက အထောက်အကူ မဖြစ်နိုင်ပေ။ သင်သည် ဘုရားကို ဆုတောင်းပြီး “ကျွန်ုပ်တွင် မုသားများနှင့် လှည့်စားမှုများ ရှိနေသေးသည်။ ကျွန်ုပ်၏ ဖောက်ပြန်ပျက်စီးသော စိတ်သဘောထားများမှ ကျွန်ုပ်ကို ဘုရားသခင် အပြီးအပိုင် ကယ်တင်တော်မူပါ။” ဟူ၍ ပြောသင့်သည်။ လူတစ်ယောက်သည် ဉာဏ်ပညာကို တမင် အသုံးချနေလျှင် ဖောက်ပြန်ပျက်စီးခြင်းကို ဖွင့်ပြခြင်းအဖြစ် အကျုံးမဝင်ပေ။ ဤသည်မှာ ရိုးသားသူတစ်ယောက်ဖြစ်ဖို့ရန်အတွက် တွေ့ကြုံရမည့်အရာဖြစ်သည်။ ဤနည်းအားဖြင့် သင်၏ မုသားများသည် ပို၍ အစဉ် နည်းပါးလာလိမ့်မည်။ ယနေ့တွင် သင်သည် မုသားဆယ်ခုပြောသည်မ။ မနက်ဖြန်တွင် ကိုးခုပြောကောင်းပြောနိုင်သည်။ ထိုနေ့ပြီးနောက်တွင် ရှစ်ခုပြောမည်။ နောက်ပိုင်းတွင် နှစ်ခု၊ သုံးခုသာ ပြောလိမ့်မည်။ သင်သည် အမှန်တရားကို ပိုပို၍ ပြောလိမ့်မည်။ ရိုးသားသူတစ်ယောက်ဖြစ်ရန် သင် လက်တွေ့လုပ်ဆောင်မှုသည် ဘုရားသခင်၏ အလိုတော်၊ သူ၏ တောင်းဆိုချက်များ၊ သူ၏ စံနှုန်းများနှင့် အစဉ်ပို၍ နီးစပ်လာလိမ့်မည်။ ဤသည်မှာ မည်မျှကောင်းလိမ့်မည်နည်း။ ရိုးသားခြင်းကို လက်တွေ့လုပ်ဆောင်ရန် သင်သည် လမ်းကြောင်းတစ်ခုရှိရမည်။ ဦးတည်ချက်တစ်ခုရှိရမည်။ မုသားပြောဆိုသည့် ပြဿနာကို အရင်ဦးဆုံး ဖြေရှင်းလော့။ ဤမုသားများကို သင်ပြောဆိုခြင်းနောက်ကွယ်ရှိ အနှစ်သာရကို သိရမည်။ ဤမုသားများကို ပြောဆိုရန် မည်သည့်ရည်ရွယ်ချက်နှင့် အကြောင်းရင်းများက တွန်းအားပေးသည်၊ ဤရည်ရွယ်ချက်များကို သင်အဘယ်ကြောင့် စိတ်စွဲနေသည်၊ ၎င်းတို့၏ အနှစ်သာရက မည်သည့်အရာဖြစ်သည်တို့ကို စိတ်ဖြာလေ့လာရမည်။ ဤပြဿနာအားလုံးကို သင်ရှင်းလင်းသွားသောအခါတွင် လိမ်ညာခြင်းပြဿနာကို သင် လုံးလုံးလျားလျား မြင်တွေ့ပြီးဖြစ်လိမ့်မည်။ သင့်အပေါ်သို့ တစ်စုံတစ်ခု ကျရောက်သောအခါ သင်သည် လက်တွေ့လုပ်ဆောင်ရန် စည်းမျဉ်းများရှိလိမ့်မည်။ ဤသို့ ဆက်လက်၍ လက်တွေ့လုပ်ဆောင်ပြီး တွေ့ကြုံလျှင် သင်သည် သေချာပေါက် ရလဒများကို မြင်တွေ့ရလိမ့်မည်။ တစ်ရက်တွင် သင်က ပြောလိမ့်မည်။ “ရိုးသားရသည်မှာလွယ်ကူသည်။ လှည့်စားခြင်းက အလွန်ပင်ပန်းသည်။ ကျွန်ုပ်သည် လှည့်စားသောသူ မဖြစ်လိုတော့ပေ။ မည်သည့်မုသားများကို ပြောရမည်၊ ကျွန်ုပ်၏ မုသားများကို မည်သို့ ဖုံးကွယ်ရမည်ကို အစဉ် စဉ်းစားမနေလိုတော့ပေ။ ဤသည်မှာ စိတ်ရောဂါတစ်ခု ရှိနေသည့် သူတစ်ယောက်ကဲ့သို့ ရှေ့နောက်မညီ ပြောဆိုနေခြင်းဖြစ်ပြီး ‘လူသား’ ဟုခေါ်ဆိုဖို့ မထိုက်တန်သည့် သူတစ်ယောက်ကဲ့သို့ဖြစ်သည်။ ဤသို့သော ဘဝမျိုးသည် ပင်ပန်းသည်။ ကျွန်ုပ်သည် ဤသို့ အသက်မရှင်လိုတော့ပေ။”ဟု ဖြစ်သည်။ ဤအချိန်တွင် သင်၌ အမှန်တကယ် ရိုးသားဖို့ မျှော်လင့်ချက်ရှိလိမ့်မည်။ ဤသည်မှာ သင်သည် ရိုးသာသူတစ်ယောက်ဖြစ်ရန် အခြေအနေတိုးတက်နေပြီဖြစ်သည်ကို သက်သေပြလိမ့်မည်။ ဤသည်မှာ ထိုးဖောက်ကျော်လွှားမှုတစ်ခုဖြစ်သည်။ စတင်၍ လက်တွေ့လုပ်ဆောင်သောအခါတွင် ရိုးသားသောစကားများကိုပြောပြီး မိမိကိုယ်ကို ဖွင့်ချပြပြီးနောက်တွင် အရှက်ရမည့်သူအချို့ရှိနိုင်သည်မှာ မှန်သည်။ သင်၏ မျက်နှာသည် နီပြီး သင်သည် အရှက်ရလိမ့်မည်။ အခြားလူများက ရယ်မောခြင်းကို သင် ကြောက်ရွံ့လိမ့်မည်။ ဤသို့ဆိုလျှင် မည်သည့်အရာကို သင် လုပ်ဆောင်သင့်သနည်း။ ဘုရားသခင်ထံဆုတောင်းပြီး သင့်အား ခွန်အားပေးရန် တောင်းဆိုခြင်းကိုသာ လုပ်ဆောင်ရမည်။ သင်က “အို ဘုရားသခင်၊ ကျွန်ုပ်သည် ရိုးသားသူတစ်ယောက်ဖြစ်လိုသည်။ သို့သော် ကျွန်ုပ်အမှန်အတိုင်းပြောသောအခါ လူတို့က ကျွန်ုပ်အား ရယ်မောမည်ကို ကျွန်ုပ်ကြောက်ရွံ့သည်။ ကျွန်ုပ်၏ ဆိုးယုတ်သော စိတ်သဘောထား၏ ချည်နှောင်မှုမှ ကျွန်ုပ်ကို ကယ်တင်ရန် ကိုယ်တော့်အား ကျွန်ုပ်တောင်းဆိုပါသည်။ ကျွန်ုပ်အား ကိုယ်တော်၏ နှုတ်ကပတ်တော်အတိုင်း အသက်ရှင်စေပါ။ လွတ်လပ်ပြီး ချုပ်ချယ်မှုကင်းစေပါ။” ဟု ပြောလော့။ ဤသို့ သင်ဆုတောင်းသောအခါ သင်၏ စိတ်နှလုံးတွင် ပို၍ အားတက်လာလိမ့်မည်ဖြစ်ပြီး သင့်ကိုယ်သင် ပြောလိမ့်မည်။ “ဤအရာကို လက်တွေ့လုပ်ဆောင်ရသည်မှာ ကောင်းသည်။ ယနေ့ သမ္မာတရားကို ငါလက်တွေ့လုပ်ဆောင်ပြီးပြီ။ နောက်ဆုံးတွင် ငါသည် တစ်ကြိမ်တစ်ခါ ရိုးသားသူတစ်ယောက် ဖြစ်ခဲ့သည်”ဟု ဖြစ်သည်။ ဤသို့ သင်ဆုတောင်းသောအခါ ဘုရားသခင်က သင့်ကို ဉာဏ်အလင်းဖွင့်ပြလိမ့်မည်။ ဘုရားသခင်က သင်၏ စိတ်နှလုံးတွင် စတင်အလုပ်လုပ်လိမ့်မည်။ ဘုရားသခင်သည် သင့်ကို တို့ထိပြီး ရိုးသားသောသူဖြစ်ခြင်းသည် မည်သို့ခံစားရသည်ဆိုသည်ကို သင့်ကို အသိအမှတ်ပြုခွင့်ပေးသည်။ ဤသည်မှာ သမ္မာတရားကို လက်တွေ့လုပ်ဆောင်ရမည့်နည်းလမ်းဖြစ်သည်။ အစပိုင်းတွင် သင့်၌ လမ်းကြောင်းရိမည်မဟုတ်ပေ။ သို့သော် သမ္မာတရားကို ရှာဖွေခြင်းမှတစ်ဆင့် လမ်းကြောင်းတစ်ခုကို သင်တွေ့လိမ့်မည်။ လူတို့က သမ္မာတရားကို ရှာဖွေသောအခါ ၎င်းတို့တွင် သေချာပေါက် ယုံကြည်ခြင်းမရှိပေ။ လမ်းကြောင်းတစ်ခုမရှိခြင်းသည် လူတို့အတွက် ခက်ခဲသည်။ သို့သော် သမ္မာတရားကို ၎င်းတို့ နားလည်ပြီး လက်တွေ့လုပ်ဆောင်မှု လမ်းကြောင်းရှိသည်နှင့် ၎င်းတို့၏ စိတ်နှလုံးက ယင်းတွင် ပျော်ရွှင်မှုကို တွေ့ရှိသည်။ ၎င်းတို့သည် သမ္မာတရားကို လက်တွေ့လုပ်ဆောင်နိုင်ပြီး စည်းမျဉ်းများနှင့်အညီ ဆောင်ရွက်နိုင်လျှင် ၎င်းတို့၏ စိတ်နှလုံးသည် သက်သာမှုကို ရှာတွေ့လိမ့်မည်။ို လွတ်လပ်ခြင်းနှင့် ချုပ်ချယ်မှုကင်းခြင်းကို ရရှိလိမ့်မည်။ သင့်တွင် ဘုရားသခင်အပေါ် အမှန်တကယ် သိမြင်မှုအချို့ရှိလျှင် ဤကမ္ဘာတွင်ရှိသော အရာအားလုံးကို ရှင်းလင်းစွာ မြင်နိုင်လိမ့်မည်။ သင်၏ စိတ်နှလုံးက အလင်းပေးခြင်းခံရမည်။ သင်သည် လမ်းကြောင်းတစ်ခု ရှိလိမ့်မည်။ ထို့နောက်တွင် သင်သည် အလုံးစုံ ချုပ်ချယ်မှုကင်းခြင်းနှင့် လွတ်လပ်ခြင်းကို ရရှိလိမ့်မည်။ ဤအချိန်တွင် သင်သည် သမ္မာတရားအား လက်တွေ့လုပ်ဆောင်ခြင်း၊ ဘုရားသခင်ကို ကျေနပ်စေခြင်း၊ စစ်မှန်သောသူတစ်ယောက်ဖြစ်ခြင်း၏ အဓိပ္ပာယ်ကို နားလည်လိမ့်မည်။ ဤတွင် ဘုရားသခင်အပေါ် သင်၏ ယုံကြည်ခြင်းတွင် သင်သည် မှန်ကန်သောလမ်းကြောင်းပေါ်တွင် ရှိလိမ့်မည်။

ဆောင်းဦးရာသီ၊ ၂၀၀၇ ခုနှစ်

အရှေ့သို့- သမ္မာတရားကို အားထုတ်ခြင်းနှင့် သမ္မာတရားကို လိုက်စားခြင်းလမ်းကြောင်း၏ အရေးပါပုံ

နောက်တစ်ခုသို့- စစ်မှန်စွာနာခံခြင်းဖြင့်သာလျှင် စစ်မှန်သောယုံကြည်ခြင်း ရှိနိုင်သည်

မည်သို့နှောင်တရပြောင်းလဲ မှသာလျှင် ဘုရားသခင်၏ ကွယ်ကာခြင်းကို ရရှိနိုင်မယ်ဆိုတာကို မိတ်ဆွေသိချင်ပါသလား။ ကျွန်ုပ်တို့ကို ချက်ချင်းဆက်သွယ်ပါ။

ဘုရားသခင်၏ ပေါ်ထွန်းခြင်းနှင့် အမှုတော် ဘုရားသခင်ကို သိကျွမ်းခြင်းနှင့် စပ်လျဉ်း၍ နောက်ဆုံးသော ကာလ ခရစ်တော်၏ ဟောပြောချက်များ သမ္မာတရားကို လိုက်စားခြင်းနှင့် စပ်လျဉ်း၍ ၁ တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ ဘုရားသခင်၏ နေ့စဉ် နှုတ်ကပတ်တော်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ နိုင်ငံတော် ဧဝံဂေလိတရားတော် ဖြန့်ဝေခြင်းအတွက် လမ်းညွှန်ချက်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော်၏ ဧဝံဂေလိတရားအကြောင်း စံပြုလောက်သော အမေးအဖြေများ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ

ဆက်တင်

  • စာတို
  • နောက်ခံအပြင်အဆင်များ

တပြေးညီ အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာကြောင်း အကွာအဝေး

စာမျက်နှာအနံ

မာတိကာ

ရှာဖွေမည်

  • ဤစာကို ရှာမည်
  • ဤစာအုပ်ကို ရှာမည်

Messenger မှတဆင့် ကျွန်ုပ်တို့ကို ဆက်သွယ်လိုက်ပါ။