လက်တွေ့ကျခြင်းနှင့်ဆိုင်သည့် အသိပညာနှင့် ဘုရားသခင်၏အမှုကို မခြွင်းမချန် သိနားလည်ခြင်းအား ရရှိခြင်း- ဤအရာနှစ်ခုလုံးကို သူ၏နှုတ်ကပတ်တော်များတွင် တွေ့ရပြီး၊ အသိဉာဏ်ပွင့်လင်းခြင်းကို သင် ရရှိနိုင်သည်မှာ ဤမိန့်မြွက်ချက်များမှတစ်ဆင့်သာ ဖြစ်သည်။ ထို့ကြောင့် သင်သည် ဘုရားသခင်၏ နှုတ်ကပတ်တော်များဖြင့် မိမိကိုယ်ကိုယ် ပြင်ဆင်ဖို့ သာ၍ လုပ်ဆောင်သင့်သည်။ ဘုရားသခင်၏ နှုတ်ကပတ်တော်များနှင့် ဆိုင်သည့် သင်၏သိနားလည်မှုကို မိတ်သဟာယ၌ ပြောပြလော့၊ ဤနည်းဖြင့် သင်သည် အခြားသူများကို အသိဉာဏ်ပွင့်လင်းစေနိုင်ပြီး ထွက်ပေါက်တစ်ခု ပေးနိုင်ပေသည်- ဤသည်မှာ လက်တွေ့ကျသော လမ်းကြောင်းတစ်ခု ဖြစ်သည်။ ဘုရားသခင်သည် သင့်အတွက် ပတ်ဝန်းကျင်တခုကို မစီစဉ်မီတွင်၊ သင်တို့ အသီးသီးသည် မိမိကိုယ်ကိုယ် သူ၏နှုတ်ကပတ်တော်များဖြင့် ဦးစွာ ပြင်ဆင်ရမည်။ ဤသည်မှာ အယောက်တိုင်း လုပ်ဆောင်သင့်သော အရာတစ်ခု ဖြစ်သည်။ ယင်းသည် အရေးတကြီး ဦးစားပေးအရာတစ်ခု ဖြစ်သည်။ ပထမဦးစွာ ဘုရားသခင်၏နှုတ်ကပတ်တော်များအား မည်သို့ စားသောက်ရမည်ကို သင်သိရှိသည့်အဆင့်တစ်ခုသို့ ရောက်လော့။ သင် မလုပ်ဆောင်နိုင်သော အရာမှန်သမျှအတွက်၊ လက်တွေ့လုပ်ဆောင်ရမည့် လမ်းကြောင်း တစ်ခုကို သူ၏နှုတ်ကပတ်တော်များ၌ ရှာဖွေပြီး၊ သင် နားမလည်သော မည်သည့်ကိစ္စရပ်မဆိုအတွက် သို့မဟုတ် သင်၌ ရှိကောင်းရှိမည့် မည်သည့်အခက်အခဲများမဆိုအတွက် ဤမိန့်မြွက်ချက်များကို စေ့စေ့ကြည့်လော့။ ဘုရားသခင်၏နှုတ်ကပတ်တော်များအား သင်၏ အထောက်အပံ့ဖြစ်စေပြီး၊ သင်၏ လက်တွေ့ကျသော အခက်အခဲများနှင့် ပြဿနာများကို ဖြေရှင်းရာတွင် ၎င်းတို့ကို ကူညီမစခွင့်ပေးလော့။ သူ၏ နှုတ်ကပတ်တော်များကို ဘဝတွင် သင်၏ အကူအညီဖြစ်လာခွင့်လည်း ပေးလော့။ ဤအရာများသည် သင် လုပ်ဆောင်ရသည့်အပိုင်းတွင် ကြိုးပမ်းအားထုတ်မှု လိုအပ်လိမ့်မည်။ ဘုရားသခင်၏ နှုတ်ကပတ်တော်အား စားသောက်ရာတွင်၊ ရလဒ်များကို သင်ရရှိရမည်။ သင်သည် သူ၏ ရှေ့မှောက်တွင် သင်၏ စိတ်နှလုံးကို တည်ငြိမ်စေနိုင်ရမည်ဖြစ်ပြီး၊ ပြဿနာများတစ်ခုတလေကို သင် ကြုံရသည့် မည်သည့်အချိန်တွင်မဆို သူ၏ မိန့်မြွက်ချက်များနှင့်အညီ သင် လက်တွေ့လုပ်ဆောင်ရမည်။ သင်သည် မည်သည့်ပြဿနာများကိုမျှ တွေ့ကြုံရခြင်း မရှိသေးချိန်တွင်၊ သူ၏ နှုတ်ကပတ်တော်များအား စားသောက်ခြင်းကိုသာ သင် စိတ်ဝင်စားသင့်သည်။ တစ်ခါတစ်ရံ သင်သည် ဆုတောင်းပြီး ဘုရားသခင်၏ ချစ်ခြင်းမေတ္တာကို ဆင်ခြင်ကောင်း ဆင်ခြင်နိုင်သည်၊ သူ၏နှုတ်ကပတ်တော်များနှင့်ဆိုင်သည့် သင်၏ သိနားလည်ခြင်းကို မိတ်သဟာယ၌ဝေမျှနိုင်ပြီး၊ မိမိကိုယ်ကိုယ်အတွင်း သင် တွေ့ကြုံရသည့် အသိဉာဏ်ပွင့်လင်းခြင်းနှင့် အလင်းပေးခြင်း၊ ပြီးလျှင် ဤမိန့်မြွက်ချက်များကို ဖတ်ရှုနေစဉ်တွင် သင်ရှိထားသော တုံ့ပြန်မှုများနှင့် ပတ်သက်၍ ပြောဆိုဆွေးနွေးပြုနိုင်သည်။ ထို့အပြင် သင်သည် လူတို့ကို ထွက်ပေါက်တစ်ခု ပေးနိုင်သည်။ ဤသည်သာလျှင် လက်တွေ့ကျ၏။ ဤအရာကို လုပ်ဆောင်ခြင်း၏ ရည်မှန်းချက်မှာ ဘုရားသခင်၏ နှုတ်ကပတ်တော်များကို သင်၏ လက်တွေ့ကျသော အထောက်အပံ့ ဖြစ်လာခွင့်ပေးရန် ဖြစ်သည်။

တစ်နေ့လုံးတွင် သင်သည် ဘုရားသခင့်ရှေ့၌ အမှန်တကယ် ရှိခြင်း၌ နာရီပေါင်းမည်မျှ အချိန်ကုန်ဆုံးသနည်း။ သင့်နေ့ရက်၏မည်မျှကို ဘုရားသခင်အား အမှန်တကယ် ပေးထားသနည်း။ ဇာတိပကတိကို မည်မျှ ပေးထားသနည်း။ မိမိ၏နှလုံးသားကို ဘုရားသခင်ဆီသို့ စိတ်သန်စေခြင်းသည် သူ၏ စုံလင်စေခြင်း လမ်းကြောင်းမှန်ပေါ် ရှိခြင်းအဖို့ ပထမခြေလှမ်း ဖြစ်သည်။ သင်သည် သင်၏ စိတ်နှလုံး၊ ခန္ဓာနှင့် သင်၏စစ်မှန်သော ချစ်ခြင်းမေတ္တာ အားလုံးကို ဘုရားသခင်ထံ ဆက်ကပ်အပ်နှံနိုင်ပါက၊ ယင်းတို့ကို ဘုရားသခင်ရှေ့တွင် ထားရှိနိုင်ပါက၊ သူ့အပေါ် လုံးဝ နာခံနိုင်ပြီး သူ၏အလိုကို လုံးဝ ထောက်ထားနိုင်ပါက- ဇာတိပကတိအတွက် မဟုတ်၊ မိသားစုအတွက် မဟုတ်၊ သင်၏ ကိုယ်ရေးကိုယ်တာ ဆန္ဒများအတွက် မဟုတ်ဘဲ၊ ဘုရားသခင့်အိမ်တော်၏ အကျိုးများအတွက်၊ အရာရာတွင် ဘုရားသခင်၏ နှုတ်ကပတ်တော်ကို အခြေခံသဘောတရားနှင့် အခြေခံအုတ်မြစ် အဖြစ်ခံယူလျက်- ထိုသို့လုပ်ဆောင်ခြင်းဖြင့် သင်၏ ရည်ရွယ်ချက်များနှင့် သင်၏ ရှုထောင့်အမြင်များအားလုံးသည် နေရာမှန်တွင် ရှိကြလိမ့်မည်ဖြစ်ပြီး၊ ထိုအခါ သင်သည် ဘုရားသခင့်ရှေ့တွင် သူ၏ချီးမွမ်းမှုကို ရရှိသော လူတစ်ဦး ဖြစ်လိမ့်မည်။ ဘုရားသခင်နှစ်သက်သူများသည် သူ့အပေါ် အကြွင်းမဲ့ရှိသူများ ဖြစ်သည်။ ၎င်းတို့သည် ဘုရားသခင်ကို လုံးဝဥဿုံ ဆက်ကပ်အပ်နှံနိုင်သော သူများ ဖြစ်သည်။ ဘုရားသခင် စက်ဆုပ်ရွံရှာသောသူများမှာ သူ့အပေါ် စိတ်မပါ့တပါဖြစ်သောသူများနှင့် သူ့ကို ဆန့်ကျင်ပုန်ကန်သောသူများ ဖြစ်သည်။ သူ့ကို ယုံကြည်ပြီး သူ့ကို အမြဲ မွေ့လျော်လိုသော်လည်း၊ သူ့အတွက် မိမိတို့ကိုယ်ကိုယ် လုံးဝ အသုံးပြုမခံနိုင်သောသူများကို သူ စက်ဆုပ်၏။ သူ့ကို ချစ်သည်ဟုပြောသော်လည်း၊ ၎င်းတို့၏ စိတ်နှလုံးများထဲတွင် သူ့အား ဆန့်ကျင်ပုန်ကန်သူများကို သူ စက်ဆုပ်၏။ လှည့်ဖြားခြင်း၌ ပါဝင်လုပ်ဆောင်ရန် စကားပြောကောင်းသည့်၊ ကွန့်လွန်းသော စကားများကို အသုံးပြုသောသူများအား သူ စက်ဆုပ်သည်။ ဘုရားသခင်အား အမှန်တကယ် မဆက်ကပ်သောသူများ သို့မဟုတ် သူ့၏ ရှေ့မှောက်တွင် သစ္စာဖာက်ပြီး အမှန်တကယ် ကျိုးနွံနာခံခြင်း မရှိသောသူများသည် သစ္စာဖေါက်ပြီး သဘာဝအားဖြင့် အလွန် မာနထောင်လွှားကြသည်။ ပုံမှန်၊ လက်တွေ့ကျသော ဘုရားသခင်ရှေ့၌ အမှန်တကယ် ကျိုးနွံနာခံနိုင်ခြင်း မရှိနိုင်သော သူများသည် သာ၍ပင် မာနထောင်လွှားကြပြီး ၎င်းတို့သည် အထူးသဖြင့် ကောင်းကင်တမန်မင်း၏ တာဝန်ကျေသော သားသမီးများ ဖြစ်ကြသည်။ ဘုရားသခင်အတွက် မိမိကိုယ်ကိုယ် အမှန်တကယ် အသုံးခံသောသူများသည် သူ့ထံတွင် ၎င်းတို့၏ ဖြစ်တည်ခြင်း တစ်ခုလုံးကို နှစ်မြုပ်ထားပြီး သူ၏ရှေ့တွင် မိမိတို့ကိုယ်ကို ထားရှိသည်။ ၎င်းတို့သည် သူ၏နှုတ်ကပတ်တော်နှင့် အမှုတော်အားလုံးကို ကျိုးနွံနာခံနိုင်ပြီး၊ သူ၏ နှုတ်ကပတ်တော်များကို လက်တွေ့လုပ်ဆောင်နိုင်ကြလေသည်။ ၎င်းတို့သည် ဘုရားသခင်၏နှုတ်ကပတ်တော်များကို လက်ခံနိုင်ပြီး ယင်းတို့ကို ၎င်းတို့၏ တည်ရှိခြင်း အခြေခံအုတ်မြစ် အဖြစ် ခံယူကာ၊ မည်သည့်အပိုင်းများအား လက်တွေ့လုပ်ဆောင်ရမည်ကို သိရှိဖို့ရန် ဘုရားသခင်၏ နှုတ်ကပတ်တော်များအတွင်း၌ စိတ်အားထက်သန်စွာ ရှာဖွေနိုင်ကြလေသည်။ ယင်းမှာ ဘုရားသခင်ရှေ့တွင် အမှန်တကယ် အသက်ရှင်သော လူများဖြစ်သည်။ သင်သည်ဤသို့ လက်တွေ့လုပ်ဆောင်လျှင် ယင်းက သင့်အသက်အတွက် အကျိုးရှိပြီး၊ သင်၏ အသက်စိတ်သဘောထား ပြောင်းလဲရန်အလို့ငှာ၊ သူ၏ နှုတ်ကပတ်တော်များကို စားသောက်ခြင်းအားဖြင့် သင်၏ အတွင်းလိုအပ်ချက်များနှင့် အားနည်းချက်များကို သင် ဖြည့်ဆည်း နိုင်ပါက၊ ဤအရာက ဘုရားသခင်၏ အလိုကို ဖြည့်ဆည်းလိမ့်မည်။ သင်သည် ဘုရားသခင်၏ သတ်မှတ်ချက်များနှင့်အညီ ဆောင်ရွက်ပါက၊ ပြီးလျှင် သင်သည် ဇာတိပကတိကို ကျေနပ်စေခြင်းမရှိဘဲ၊ ယင်းအစား ဘုရားသခင်၏ အလိုကို ကျေနပ်စေပါက၊ ဤအရာတွင် သူ၏နှုတ်ကပတ်တော်များ၏ လက်တွေ့အရှိတရားထဲသို့ သင် ဝင်ရောက်ပြီး ဖြစ်လိမ့်မည်။ ဘုရားနှုတ်ကပတ်တော်များ၏ လက်တွေ့အရှိတရားထဲသို့ ဝင်ရောက်ခြင်းသည် သင်၏ တာဝန်ကို ဆောင်ရွက်နိုင်ပြီး ဘုရားသခင်၏အလုပ်၏ လိုအပ်ချက်များကို ဖြည့်ဆည်းနိုင်သည်ကို ဆိုလိုပေသည်။ ဤသို့သော လက်တွေ့ကျသည့် လုပ်ဆောင်မှုများကိုသာ ဘုရားနှုတ်ကပတ်တော်များ၏ လက်တွေ့အရှိတရားထဲသို့ ဝင်ရောက်ခြင်းဟု ခေါ်ဆိုနိုင်ပေသည်။ ဤလက်တွေ့အရှိတရားထဲသို့ သင်ဝင်ရောက်နိုင်ပါက၊ သင်သည် သမ္မာတရားကို ပိုင်ဆိုင်လိမ့်မည်။ ဤသည်မှာ လက်တွေ့အရှိတရားထဲသို့ ဝင်ရောက်မှု စတင်ခြင်း ဖြစ်သည်။ သင်သည် ဤလေ့ကျင့်မှုကို ပထမဦးစွာ လုပ်ဆောင်ရမည်ဖြစ်ပြီး ထို့နောက်တွင်မှ သင်သည် သာ၍ပင် နက်ရှိုင်းသော လက်တွေ့အရှိတရားများထဲသို့ ဝင်‌ရောက်နိုင်လိမ့်မည်။ ပညတ်ချက်များကို မည်သို့ ထိန်းသိမ်းရမည်ဆိုသည်နှင့် ဘုရားသခင်ရှေ့တွင် မည်သို့ သစ္စာစောင့်သိရမည်ဆိုသည်တို့ကို ဆင်ခြင်လော့။ နိုင်ငံတော်ထဲသို့ မည်သည့်အချိန်တွင် သင် ဝင်ရောက်နိုင်မည်ဆိုသည်ကို စဉ်ဆက်မပြတ် မစဉ်းစားနှင့်။ သင်၏ စိတ်သဘောထား မပြောင်းလဲပါက၊ သင်စဉ်းစားသော အရာတိုင်းသည် အချည်းနှီးဖြစ်လိမ့်မည်။ ဘုရား နှုတ်ကပတ်တော်၏ လက်တွေ့အရှိတရားထဲသို့ ဝင်ရောက်ရန် သင်၏ စိတ်ကူးများနှင့် အတွေးများအားလုံး ဘုရားသခင်အတွက် ဖြစ်သည့်နေရာသို့ ပထမဦးစွာ သင် ရောက်ရှိရမည်- ဤသည်မှာ အခြေခံကျဆုံးသော လိုအပ်ချက် ဖြစ်သည်။

လတ်တလောတွင် စမ်းသပ်မှုများအလယ်တွင် ရှိပြီး ဘုရားသခင်၏ အမှုကို နားမလည်ကြသည့် လူများစွာရှိ၏၊ သို့သော် သင်တို့ကို ငါပြောသည်- ထိုအရာကို သင်တို့ နားမလည်ပါက၊ ထိုအရာနှင့် ပတ်သက်၍ အကဲဖြတ်ဝေဖန်ခြင်းများ မပြုသင့်ပေ။ သမ္မာတရား အလုံးစုံ ထင်ရှား လူသိများလာသည့် နေ့တစ်နေ့ ရှိကောင်းရှိလိမ့်မည်ဖြစ်ပြီး၊ ထိုအခါ သင်သည် နားလည်လိမ့်မည်။ အကဲဖြတ်ဝေဖန်မှုများ မပြုခြင်းသည် သင့်အတွက် အကျိုးရှိမည်ဖြစ်သော်လည်း၊ သင်သည် မတုန်မလှုပ် စောင့်၍သာ နေ၍ မရပေ။ သင်သည် တက်ကြွစွာ ဝင်ရောက်ရန် ကြိုးစားရမည်။ ထိုအခါမှသာ သင်သည် အမှန်တကယ် ဝင်ရောက်သောသူတစ်ဦး ဖြစ်လိမ့်မည်။ ၎င်းတို့၏ ပုန်ကန်မှုကြောင့်၊ လူတို့သည် လက်တွေ့ကျသော ဘုရားသခင်နှင့်ပတ်သက်၍ အယူအဆများ အမြဲ ဖြစ်ပေါ်နေကြသည်။ လက်တွေ့ကျသော ဘုရားသခင်သည် လူသားမျိုးနွယ်အတွက် အလွန် ကြီးမားသော စမ်းသပ်မှုတစ်ခု ဖြစ်သည့်အတွက်၊ ဤအရာက လူအားလုံးသည် မည်သို့ ကျိုးနွံနာခံရမည်ကို သင်ယူဖို့ လိုအပ်စေသည်။ သင်သည် ခိုင်မြဲစွာ မရပ်တည်နိုင်ပါက၊ အရာအားလုံး ပြီးဆုံးသွားပြီဖြစ်သည်။ လက်တွေ့ကျသော ဘုရားသခင်၏ လက်တွေ့ကျခြင်းနှင့်ဆိုင်သည့် သိနားလည်မှုတစ်ခု သင် မရှိပါက၊ သင်သည် ဘုရားသခင်၏ စုံလင်စေခြင်း ခံရနိုင်လိမ့်မည် မဟုတ်ပေ။ လူတို့သည် စုံလင်ခံရနိုင်ခြင်း ရှိမရှိဆိုသည့်အရာ၌ အရေးကြီးသော အဆင့်မှာ ဘုရားသခင်၏ လက်တွေ့ကျခြင်းနှင့်ဆိုင်သည့် ၎င်းတို့၏ သိနားလည်ခြင်း ဖြစ်သည်။ လူ့ဇာတိခံ ဘုရားသခင် ဤကမ္ဘာမြေသို့ ကြွလာခြင်း၏ လက်တွေ့ကျခြင်းသည် လူတစ်ဦးချင်းစီတိုင်းအတွက် စမ်းသပ်မှုတစ်ခု ဖြစ်သည်။ ဤကဏ္ဍတွင် သင်ခိုင်မြဲစွာ ရပ်တည်နိုင်ပါက၊ သင်သည် ဘုရားသခင်ကို သိသောသူတစ်ဦးဖြစ်လိမ့်မည်ဖြစ်ပြီး သူ့ကို အမှန်တကယ် ချစ်သောသူတစ်ဦး ဖြစ်လိမ့်မည်။ ဤကဏ္ဍတွင် သင်သည် ခိုင်မြဲစွာ မရပ်တည်နိုင်သကဲ့သို့၊ သင်သည် ဝိညာဉ်တော်၌သာ ယုံကြည်ပြီး ဘုရားသခင်၏ လက်တွေ့ကျခြင်း၌ ယုံကြည်နိုင်စွမ်းမရှိပါက၊ ဘုရားသခင်၌ သင့်ယုံကြည်ခြင်း မည်မျှကြီးမားသည်ဖြစ်စေ၊ ယင်းသည် အချည်းနှီး ဖြစ်လိမ့်မည်။ သင်သည် မြင်နိုင်သော ဘုရားသခင်ကို မယုံကြည်နိုင်ပါက၊ ဘုရားသခင်၏ ဝိညာဉ်တော်ကို သင် ယုံကြည်နိုင်မည်လော။ သင်သည် ဘုရားသခင်ကို လှည့်စားရန် ကြိုးစားနေခြင်းသာ မဟုတ်လော။ သင်သည် မြင်၍ရနိုင်သကဲ့သို့ လက်ဆုပ်လက်ကိုင်ပြ၍ရနိုင်သော ဘုရားသခင်ရှေ့တွင် ကျိုးနွံနာခံခြင်းမရှိပေ၊ သို့ဆိုလျှင် သင်သည် ဝိညာဉ်တော်၏ ရှေ့မှောက်တွင် ကျိုးနွံနာခံနိုင်စွမ်း ရှိပါသလော။ ဝိညာဉ်တော်သည် မြင်၍မရနိုင်သကဲ့သို့ လက်ဆုပ်လက်ကိုင်ပြ၍ မရနိုင်ပေ၊ သို့ဆိုလျှင် ဘုရားသခင်၏ဝိညာဉ်တော်ကို သင် ကျိုးနွံနာခံသည်ဟု ပြောသောအခါ၊ သင်သည် အဓိပ္ပာယ်မရှိသော အရာကို ပြောနေခြင်းသာ မဟုတ်လော။ ပညတ်ချက်များကို ထိန်းသိမ်းခြင်း၏ အဓိကသော့ချက်မှာ လက်တွေ့ကျသော ဘုရားသခင်နှင့်ဆိုင်သည့် သိနားလည်မှုရှိခြင်း ဖြစ်သည်။ သင်သည် လက်တွေ့ကျသော ဘုရားသခင်ကို နားလည်မှုတစ်ခု ရှိသည်နှင့်တစ်ပြိုင်နက်၊ ပညတ်ချက်များကို ထိန်းသိမ်းနိုင်လိမ့်မည်။ ယင်းတို့ကို ထိန်းသိမ်းရာတွင် အပိုင်းနှစ်ပိုင်း ပါဝင်သည်- တစ်ပိုင်းမှာ သူ၏ဝိညာဉ်တော်၏ အနှစ်သာရကို ဖက်တွယ်ထားခြင်းနှင့် ဝိညာဉ်တော်၏ရှေ့မှောက်တွင် ဝိညာဉ်တော်၏ စစ်ဆေးခြင်းကို လက်ခံနိုင်ခြင်းဖြစ်သည်။ နောက်တစ်ပိုင်းမှာ လူ့ဇာတိခံ ခန္ဓာနှင့်ဆိုင်သည့် စစ်မှန်သော သိနားလည်မှုရှိနိုင်ခြင်းနှင့် စစ်မှန်သော ကျိုးနွံနာခံမှုရရှိနိုင်ခြင်း ဖြစ်သည်။ ဇာတိပကတိရှေ့တွင် ဖြစ်စေ၊ ဝိညာဉ်တော်၏ရှေ့တွင် ဖြစ်စေ၊ ဘုရားသခင်ကို ကျိုးနွံနာခံခြင်းနှင့် ကြောက်ရွံ့ခြင်းကို အမြဲ သိုထားရမည်။ ဤသို့သော သူတစ်ဦးသာ စုံလင်စေခြင်းခံရဖို့ အရည်အချင်းပြည့်မီသည်။ သင်သည် လက်တွေ့ကျသော ဘုရားသခင်၏ လက်တွေ့ကျခြင်းနှင့်ဆိုင်သည့် သိနားလည်မှုရှိပါက- ယင်းမှာ ဤစမ်းသပ်မှုတွင် သင် ခိုင်မာစွာ ရပ်တည်ပါက- သင့်အတွက် မည်သည့်အရာမျှ မဖြစ်နိုင်ဖွယ်ရှိမည် မဟုတ်ပေ။

လူအချို့က၊ “ပညတ်ချက်များသည် စောင့်ထိန်းရန် လွယ်ကူသည်။ သင်သည် ဘုရားသခင်ရှေ့တွင်ရှိချိန်၌ ပွင့်ပွင့်လင်းလင်းနှင့် အလေးအနက် ပြောဆိုဖို့နှင့် မည်သည့်လက်ရိပ်ခြေရိပ်ပြခြင်းမျှ မပြုဖို့သာ လိုသည်။ ဤသည်မှာ ပညတ်ချက်များကို ထိန်းသိမ်းစောင့်ရှောက်ခြင်းဆိုသည့်အရာ ဖြစ်သည်” ဟု ပြောကြသည်။ ယင်းမှာ မှန်သလော။ သို့ဆိုလျှင် သင်သည် ဘုရားသခင်၏ နောက်ကွယ်တွင် သူ့ကို ဆန့်ကျင်သောအရာ အနည်းငယ် လုပ်ဆောင်ပါက၊ ယင်းမှာ ပညတ်ချက်များကို ထိန်းသိမ်းစောင့်ရှောက်ခြင်းအဖြစ် မှတ်ယူ၍ ရသလော။ သင်သည် ပညတ်ချက်များအား ထိန်းသိမ်းစောင့်ရှောက်ခြင်း၌ မည်သည့်အရာပါဝင်သည်ကို အကုန်အစင် သိနားလည်မှု ရှိရမည်။ ယင်းသည် သင့်အနေဖြင့် ဘုရားသခင်၏ လက်တွေ့ကျခြင်းနှင့်ဆိုင်သည့် စစ်မှန်သော သိနားလည်မှု ရှိ မရှိဆိုသည်နှင့် ဆက်နွှယ်ပေသည်။ သင်သည် လက်တွေ့ကျခြင်းနှင့်ဆိုင်သည့် သိနားလည်မှုရှိပြီး ဤစမ်းသပ်မှုအတွင်းတွင် ခလုတ်တိုက်ကာ မလဲကျပါက၊ သင်သည် ခိုင်မာသော သက်သေခံချက် ရှိသည်ဟု မှတ်ယူ၍ရပေသည်။ ဘုရားသခင်အတွက် ထူးကဲသည့် သက်သေတစ်ခုကိုသက်သေခံခြင်းသည်၊ သင်က လက်တွေ့ကျသော ဘုရားသခင်နှင့်ဆိုင်သည့် သိနားလည်မှု ရှိ မရှိဆိုသည်နှင့် သာမန်ဖြစ်သည် သာမက ပုံမှန်လည်းဖြစ်သည့် ဤလူ၏ ရှေ့တွင် သင် ကျိုးနွံနာခံနိုင်ပြီး သေသည်အထိ ကျိုးနွံနာခံနိုင်ခြင်း ရှိ မရှိ ဆိုသည်တို့နှင့် အဓိကအားဖြင့် ဆက်နွှယ်ပေသည်။ ဤကျိုးနွံနာခံခြင်းနည်းလမ်းအားဖြင့်၊ သင်သည် ဘုရားသခင်အတွက် အမှန်တကယ် သက်သေခံပါက၊ ယင်းမှာ သင့်ကို ဘုရားသခင်က ရရှိပြီဟု ဆိုလိုပေသည်။ သင်သည် သေသည့်တိုင်အောင် ကျိုးနွံနာခံနိုင်ပြီး သူ၏ ရှေ့မှောက်တွင် ညည်းညူမှုများ ကင်းနိုင်ပါက၊ အကဲဖြတ်ဝေဖန်မှုများ မပြု၊ အသရေပျက်အောင် လုပ်ကြံပြောဆိုခြင်းမရှိ၊ မည်သည့် အယူအဆမျှမရှိသကဲ့သို့၊ မည်သည့် ဖုံးကွယ်ထားသော ရည်ရွယ်ချက်များမျှ မရှိပါက၊ ဤနည်းလမ်းဖြင့် ဘုရားသခင်သည် ဘုန်းအသရေ ရရှိလိမ့်မည်။ လူက အထင်အမြင်သေးခံရသည့် သာမန်လူတစ်ဦးရှေ့တွင် ကျိုးနွံနာခံခြင်းနှင့် မည်သည့်အယူအဆမျှ မရှိဘဲ သေသည့်တိုင်အောင် ကျိုးနွံနာခံနိုင်ခြင်း- ဤသည်မှာ စစ်မှန်သော သက်သေခံချက် ဖြစ်သည်။ လူတို့ဝင်ရောက်ရန် ဘုရားသခင် တောင်းဆိုသည့် လက်တွေ့အရှိတရားဆိုသည်မှာ သင်သည် သူ၏ နှုတ်ကပတ်တော်များကို နာခံနိုင်ခြင်း၊ ယင်းတို့ကို လက်တွေ့လုပ်ဆောင်နိုင်ခြင်း၊ လက်တွေ့ကျသော ဘုရားသခင်၏ ရှေ့တွင် ပျပ်ဝပ်ဦးညွှတ်နိုင်ခြင်းနှင့် သင်၏ ဖောက်ပြန်ပျက်စီးခြင်းကို သိရှိခြင်း၊ သူ၏ရှေ့မှောက်တွင် သင်၏ စိတ်နှလုံးကို ဖွင့်ဟနိုင်ကာ နောက်ဆုံးတွင် သူ၏ ဤနှုတ်ကပတ်တော်များမှတစ်ဆင့် သူ၏ရယူခြင်းကို ခံရခြင်းတို့ ဖြစ်သည်။ ဤမိန့်မြွက်ချက်များက သင့်ကို သိမ်းပိုက်ပြီး၊ သူ့ကို အပြည့်အဝနာခံစေသည့်အခါ၊ ဘုရားသခင်သည် ဘုန်းအသရေ ရရှိလေသည်။ ဤအရာမှတစ်ဆင့် သူသည် စာတန်ကို အရှက်ရစေပြီး သူ၏ အမှုကို ပြည့်စုံစေသည်။ သင်သည် လူ့ဇာတိခံ ဘုရားသခင်၏ လက်တွေ့ကျခြင်းနှင့်ပတ်သက်၍ မည်သည့်အယူအဆမျှ မရှိသည့်အခါတွင်- ယင်းမှာ သင်သည် ဤစမ်းသပ်မှုတွင် ခိုင်မာစွာ ရပ်တည်ပြီးသည့်အခါ- သင်သည် ဤသက်သေခံချက်ကို ကောင်းကောင်း သက်သေခံပြီးဖြစ်သည်။ သင်သည် လက်တွေ့ကျသော ဘုရားသခင်နှင့်ဆိုင်သည့် ပြည့်ဝသော သိနားလည်မှုရှိပြီး၊ ပေတရုကဲ့သို့ သေသည့်တိုင်အောင် ကျိုးနွံနာခံနိုင်သောနေ့တစ်နေ့ ရှိလာပါက၊ သင်သည် ဘုရားသခင်၏ ရယူခြင်းခံရပြီး စုံလင်စေခြင်း ခံရလိမ့်မည်။ သင်၏ အယူအဆများနှင့် မကိုက်ညီသော ဘုရားသခင် လုပ်ဆောင်သည့် မည်သည့်အရာမဆိုသည် သင့်အတွက် စမ်းသပ်မှုတစ်ခု ဖြစ်သည်။ ဘုရားသခင်၏ အမှုသည် သင်၏ အယူအဆများနှင့် ကိုက်ညီခဲ့မည်ဆိုပါက၊ ယင်းမှာ သင့်အနေဖြင့် ဆင်းရဲဒုက္ခခံဖို့ သို့မဟုတ် စစ်ဆေးခြင်းခံဖို့ လိုအပ်မည်မဟုတ်ပေ။ ယင်းမှာ အဘယ့်ကြောင့်ဆိုသော် သူ၏အမှုသည် အလွန်လက်တွေ့ကျပြီး သင်၏ အယူအဆများနှင့် ကိုက်ညီမှုမရှိသောကြောင့်၊ သင့်အနေဖြင့် ထိုသို့သော အယူအဆများကို လက်လွှတ်ရန် လိုအပ်ခြင်း ဖြစ်ပေသည်။ ဤသည်မှာ ယင်းသည် သင့်အတွက် စမ်းသပ်မှုတခု ဖြစ်ရသည့် အကြောင်းရင်း ဖြစ်သည်။ လူအားလုံး စမ်းသပ်မှုများအလယ်တွင် ရှိကြသည်မှာ ဘုရားသခင်၏ လက်တွေ့ကျခြင်းကြောင့် ဖြစ်သည်။ သူ၏အမှုသည် လက်တွေ့ကျ၏၊ သဘာဝလွန်ခြင်း မရှိပေ။ မည်သည့် အယူအဆမျှ မရှိဘဲ၊ သူ၏လက်တွေ့ကျသော နှုတ်ကပတ်တော်များနှင့် သူ၏လက်တွေ့ကျသော မိန့်မြွက်ချက်များကို အပြည့်အဝ နားလည်ခြင်းနှင့် သူ၏ အမှုက ယခင်ထက် တိုး၍ လက်တွေ့ကျသည်နှင့်အမျှ သူ့ကို သာ၍ စစ်မှန်စွာ ချစ်နိုင်ခြင်းအားဖြင့်၊ သင်သည် သူ၏ ရယူခြင်း ခံရလိမ့်မည်ဖြစ်သည်။ ဘုရားသခင် ရယူမည့် လူစုမှာ ဘုရားသခင်ကို သိကျွမ်းသောသူများဖြစ်သည်။ ယင်းမှာ သူ၏ လက်တွေ့ကျခြင်းကို သိသောသူများ ဖြစ်၏။ ထို့အပြင် ၎င်းတို့သည် ဘုရားသခင်၏လက်တွေ့ကျသောအမှုကို ကျိုးနွံနာခံနိုင်သောသူများ ဖြစ်သည်။

လူ့ဇာတိ၌ရှိသည့် ဘုရားသခင်၏ အချိန်ကာလအတောအတွင်းတွင်၊ လူများထံမှ သူလိုအပ်သော ကျိုးနွံနာခံခြင်းသည် ၎င်းတို့စိတ်ကူးသကဲ့သို့ အကဲဖြတ်ဝေဖန်ခြင်းများ သို့မဟုတ် ခုခံခြင်းများကို ရှောင်ကြဉ်ခြင်း မပါဝင်ပေ။ ယင်းထက် လူတို့အနေဖြင့် သူ၏နှုတ်ကပတ်တော်များကို အသက်ရှင်ဖို့ ၎င်းတို့၏အခြေခံသဘောတရားနှင့် ၎င်းတို့၏ ရှင်သန်မှုနှင့်ဆိုင်သည့် အခြေခံအုတ်မြစ်အဖြစ် အသုံးပြုဖို့နှင့် သူ၏ နှုတ်ကပတ်တော်များ၏ အနှစ်သာရကို လုံးဝ လက်တွေ့လုပ်ဆောင်ပြီး သူ၏အလိုကို လုံးဝ ဖြည့်ဆည်းဖို့ သူ တောင်းဆိုပေသည်။ လူ့ဇာတိခံဘုရားသခင်ကို ကျိုးနွံနာခံရန် လူတို့ လိုအပ်ခြင်း၏ ရှုထောင့်တခုသည် သူ၏နှုတ်ကပတ်တော်များကို လက်တွေ့လုပ်ဆောင်ခြင်းအား ရည်ညွန်းစဉ်တွင်၊ နောက်ထပ်ရှုထောင့်တခုက သူ၏ သာမန်ဖြစ်ခြင်းနှင့် လက်တွေ့ကျခြင်းတို့ကို ကျိုးနွံနာခံနိုင်ခြင်းအား ရည်ညွှန်းပေသည်။ ဤအရာများသည် နှစ်ခုလုံး အကြွင်းမဲ့ ဖြစ်ရမည်။ ဤရှုထောင့်နှစ်ခုလုံးကို စွမ်းဆောင်ရရှိနိုင်သူများအားလုံးသည် ၎င်းတို့၏ စိတ်နှလုံးများထဲ၌ ဘုရားသခင်အတွက် စစ်မှန်သော ချစ်ခြင်းမေတ္တာ သိုထားသူများ ဖြစ်သည်။ ၎င်းတို့အားလုံးသည် ဘုရားသခင်၏ ရယူခြင်းခံရပြီးဖြစ်သော လူများဖြစ်ပြီး ၎င်းတို့အားလုံးသည် ဘုရားသခင်ကို မိမိတို့ ကိုယ်ပိုင်ဘဝကို ချစ်သကဲ့သို့ ချစ်သောသူများ ဖြစ်သည်။ လူ့ဇာတိခံ ဘုရားသခင်သည် သူ၏ အမှုတွင် ပုံမှန်နှင့် လက်တွေ့ကျသော လူ့သဘာဝကို ဆောင်လေသည်။ ဤနည်းအားဖြင့် သူ၏ ပုံမှန်ဖြစ်ပြီး လက်တွေ့လည်းကျသော လူ့သဘာဝ၏ အပြင်ဘက် ပြင်ပအလွှာသည် လူတို့အတွက် အလွန်ကြီးမားသော စမ်းသပ်မှုတခု ဖြစ်လာလေသည်။ ယင်းသည် ၎င်းတို့၏ အကြီးမားဆုံးသော အခက်အခဲ ဖြစ်လာသည်။ သို့သော် ဘုရားသခင်၏ ပုံမှန်ဖြစ်ခြင်းနှင့် လက်တွေ့ကျခြင်းတို့ကို ရှောင်လွှဲ၍မရနိုင်ပေ။ သူသည် အဖြေတခု ရှာတွေ့ရန် အရာရာတိုင်းကို ကြိုးစားခဲ့သော်လည်း၊ အဆုံးတွင် သူ၏သာမန်လူ့သဘာဝနှင့်ဆိုင်သည့် ပြင်ပအလွှာမှ မိမိကိုယ်ကိုယ် မဖယ်ရှားနိုင်ခဲ့ပေ။ အမှန်မှာမူ ဤသည်မှာ အဘယ်ကြောင့်ဆိုသော် သူသည် လူ့ဇာတိခံယူသော ဘုရားသခင် ဖြစ်ပြီး၊ ကောင်းကင်ဘုံ၌ရှိသည့် ဝိညာဉ်တော် ဘုရားမဟုတ်သောကြောင့် ဖြစ်သည်။ သူသည် လူများ မမြင်နိုင်သော ဘုရားမဟုတ်ဘဲ ဖန်ဆင်းခြင်းအနွယ်ဝင်တစ်ဦး၏ အပြင်အလွှာကို ယူတင်ဝတ်ဆင်ထားသောဘုရားသခင် ဖြစ်သည်။ ထို့ကြောင့် သူ၏ ပုံမှန်လူ့သဘာဝ အပြင်အလွှာမှ မိမိကိုယ်ကိုယ် ဖယ်ရှားခြင်းသည် လုံးဝ လွယ်ကူမည်မဟုတ်။ ထို့ကြောင့် မည့်သို့ပင်ဆိုစေကာမူ သူသည် သူ လုပ်ဆောင်လိုသောအမှုကို လူ့ဇာတိ၏ ရှုထောင့်မှ လုပ်ဆောင်ဆဲဖြစ်သည်။ ဤအမှုသည် ပုံမှန်ဖြစ်ပြီး လက်တွေ့ကျသော ဘုရားသခင်၏ ဖေါ်ပြခြင်းဖြစ်သည်၊ သို့ဆိုလျှင် ယင်းသည် လူတို့အတွက် ကျိုးနွံနာခံခြင်း မရှိဖို့မှာ အဘယ်သို့ အဆင်ပြေနိုင်မည်နည်း။ လူတို့သည် ဘုရားသခင်၏ လုပ်ဆောင်မှုများနှင့်ပတ်သက်၍ မည်သည့်အရာကို လုပ်ဆောင်နိုင်သနည်း။ သူသည် သူလုပ်ချင်သောအရာ မည်သည့်အရာကိုမဆို လုပ်ဆောင်၏။ သူ ပျော်ရွှင်ရသည့် မည်သည့်အရာမဆိုသည် ထိုနည်း၎င်းသာ ဖြစ်ကြသည်။ လူတို့သည် ကျိုးနွံနာခံခြင်းမရှိပါက၊ ၎င်းတို့ထံတွင် အားထားယုံကြည်လောက်သော အခြားမည်သည့်အစီအစဉ်များ ရှိနိုင်ကြသနည်း။ ယခုထက်ထိ ကျိုးနွံနာခံခြင်းသာ လူများကို ကယ်တင်နိုင်ပေသည်။ မည်သူမျှ အခြားထက်မြက်သည့် မည်သည့် စိတ်ကူးများမျှ မရှိကြလေပြီ။ ဘုရားသခင်သည် လူတို့အား စစ်ဆေးချင်ပါက၊ ယင်းနှင့်ပတ်သက်၍ ၎င်းတို့ မည်သည့်အရာ လုပ်ဆောင်နိုင်သနည်း။ သို့သော် ဤအရာအားလုံးသည် ကောင်းကင်ဘုံ၌ရှိသော ဘုရားသခင်က အကြံထုတ် ထားခဲ့ခြင်းမဟုတ်ပေ။ ယင်းကို လူ့ဇာတိခံဘုရားသခင်က အကြံထုတ် ထားခဲ့ခြင်း ဖြစ်သည်။ သူသည် ဤအရာကို လုပ်ဆောင်ချင်သည်၊ ထို့ကြောင့် ယင်းကို မည်သူမျှ မပြောင်းလဲနိုင်ပေ။ ကောင်းကင်ဘုံ၌ရှိသော ဘုရားသခင်သည် လူ့ဇာတိခံ ဘုရားသခင် လုပ်ဆောင်သည့်အရာကို ဝင်ရောက်စွက်ဖက်ခြင်းမရှိပေ၊ ထို့ကြောင့် ဤသည်မှာ လူများအနေဖြင့် သူ့အား ကျိုးနွံနာခံသင့်သည့် အကြောင်းရင်း ပို၍ပင် ဖြစ်သည်မဟုတ်လော။ သူသည် လက်တွေ့ကျသကဲ့သို့ ပုံမှန်လည်းဖြစ်သော်လည်း၊ သူသည် လူ့ဇာတိခံ ဘုရားသခင် လုံးဝ ဖြစ်သည်။ သူ၏ကိုယ်ပိုင် ယူဆချက်များပေါ် အခြေခံ၍ သူ လုပ်ဆောင်ချင်သည့် မည်သည့်အရာကိုမဆို သူလုပ်ဆောင်သည်။ ကောင်းကင်ဘုံရှိ ဘုရားသခင်သည် သူ့အား တာဝန်အားလုံးကို လွှဲအပ်ပြီး ဖြစ်သည်၊ သင်သည် သူလုပ်ဆောင်သည့် မည်သည့်အရာကိုမဆို ကျိုးနွံနာခံရမည်။ သူသည် လူ့သဘာဝရှိပြီး အလွန် ပုံမှန်ဖြစ်သော်လည်း၊ ဤအရာအားလုံးကို သူ တမင်သက်သက် စီစဉ်ထားပြီးဖြစ်သည်၊ ထို့ကြောင့် လူများသည် သူ့အား သဘောမတူသော မျက်လုံးပြူးကြီးများဖြင့် မည်သို့ စိန်းစိန်းဝါးဝါး ကြည့်နိုင်ကြမည်နည်း။ သူသည် ပုံမှန်ဖြစ်ချင်သောကြောင့် ပုံမှန်ဖြစ်၏။ သူသည် လူ့သဘာဝအတွင်း၌ အသက်ရှင်ချင်သောကြောင့် လူ့သဘာဝအတွင်း၌ အသက်ရှင်သည်။ သူသည် ဘုရား၏ သဘောသဘာဝအတွင်း၌ အသက်ရှင်ချင်သောကြောင့် ဘုရား၏ သဘောသဘာဝအတွင်း၌ အသက်ရှင်သည်။ လူတို့သည် ယင်းကို ၎င်းတို့မြင်ချင်သလို မြင်နိုင်သော်လည်း၊ ဘုရားသခင်သည် အမြဲ ဘုရားသခင်ဖြစ်လိမ့်မည် ဖြစ်ပြီး လူသားများသည် အမြဲ လူသားများ ဖြစ်လိမ့်မည်ဖြစ်သည်။ သူ၏အနှစ်သာရကို အရေးမပါသော အသေးစိတ် အချက်အလက် အချို့ကြောင့် ငြင်းပယ်၍မရနိုင်သကဲ့သို့၊ သေးငယ်သောအရာ တစ်ခုကြောင့် ဘုရား၏ “ဇာတိအဖြစ်တော်” ပြင်ပသို့လည်း သူ့ကို တွန်းပို့၍မရနိုင်ပေ။ လူတို့သည် လူသားများနှင့်ဆိုင်သည့် လွတ်လပ်မှုရှိပြီး ဘုရားသခင်သည် ဘုရားသခင်နှင့်ဆိုင်သည့် ဂုဏ်သိက္ခာ ရှိသည်။ ဤအရာများသည် တစ်ခုနှင့်တစ်ခု ဝင်ရောက်စွက်ဖက်မှုမရှိပေ။ လူတို့သည် ဘုရားသခင်ကို အနည်းငယ်မျှသော လွတ်လပ်မှု မပေးနိုင်သလော။ ၎င်းတို့သည် ဘုရားသခင်၏ အနည်းငယ်ပို၍ သာမန်ကာလျှံကာဖြစ်ခြင်းကို သည်းမခံနိုင်သလော။ ဘုရားသခင်နှင့်ပတ်သက်၍ တင်းကျပ်လွန်းမနေနှင့်။ အသီးသီးသည် အချင်းချင်းအတွက် သည်းခံမှု ရှိသင့်၏။ ထိုအခါ အရာအားလုံး တည်ငြိမ်သွားမည် မဟုတ်လော။ ခပ်တန်းတန်းဖြစ်ခြင်းတစ်ခုတလေ ရှိသေးသလော။ တစ်ဦးတစ်ယောက်သည် ထိုသို့အရေးမပါလှသော ကိစ္စရပ် တစ်ခုကို သည်းမခံနိုင်လျှင်၊ ၎င်းတို့သည် “ဝန်ကြီးတစ်ဦး၏ စိတ်နှလုံးသည် ရွက်လှေတစ်စီးလွှင့်ဖို့ လုံလုံလောက်လောက် ကြီးမားပေ၏။” ကဲ့သို့ အရာတစ်ခုတစ်လေပင် မည်သို့လျှင် ပြောနိုင်သနည်း။ ၎င်းတို့သည် စစ်မှန်သော လူတစ်ဦး မည်သို့ဖြစ်နိုင်သနည်း။ လူသားမျိုးနွယ်ကို အခက်အခဲ ဖြစ်စေသည်မှာ ဘုရားသခင်မဟုတ်ဘဲ ဘုရားသခင်အတွက် အခက်အခဲဖြစ်စေသည်မှာ လူသားမျိုးနွယ်ဖြစ်သည်။ ၎င်းတို့သည် အမြဲ တစ်ဆိတ်ကို တစ်အိတ်လုပ်ခြင်းအားဖြင့် အမှုအရာများကို ကိုင်တွယ်ကြသည်။ ၎င်းတို့သည် ဘာမျှမရှိခြင်းမှ တစ်စုံတစ်ခုကို အမှန်တကယ် ဖန်တီးကြပြီး ယင်းသည် အလွန် မလိုအပ်ပေ။ ဘုရားသခင်သည် ပုံမှန်ဖြစ်ပြီး လက်တွေ့ကျသော လူ့သဘာဝအတွင်း၌ အမှုပြုချိန်တွင်၊ သူလုပ်ဆောင်သောအရာသည် လူသားမျိုးနွယ်၏အလုပ်မဟုတ်ဘဲ၊ ဘုရားသခင်၏အမှု ဖြစ်သည်။ သို့သော် လူသားများသည် သူ၏ အမှု၏ အနှစ်သာရကို မမြင်ကြပေ။ ၎င်းတို့သည် သူ၏လူ့သဘာဝ၏ အပြင်ဘက် အပြင်အလွှာကိုသာ အမြဲ မြင်ကြလေသည်။ ၎င်းတို့သည် ထိုသို့သော ကြီးမြတ်သည့်အမှုကို မမြင်ဖူးကြသော်လည်း၊ ဘုရားသခင်၏သာမန်နှင့် ပုံမှန်လူ့သဘာဝကို မြင်ခြင်းငှာ မရမက တောင်းဆိုပြီး ယင်းကို လက်လွှတ်ကြလိမ့်မည် မဟုတ်ပေ။ ဤအရာကို ဘုရားသခင်၏ရှေ့တွင် ကျိုးနွံနာခံခြင်းဟု အဘယ်သို့ ခေါ်ဆိုနိုင်မည်နည်း။ ကောင်းကင်ဘုံရှိဘုရားသခင်သည် ယခု မြေကြီးပေါ်ရှိ ဘုရားသခင်အဖြစ် “ပြောင်းလဲ” သွားပြီးဖြစ်ကာ မြေကြီးပေါ်ရှိ ဘုရားသခင်သည် ယခု ကောင်းကင်ဘုံရှိ ဘုရားသခင် ဖြစ်သည်။ ၎င်းတို့၏ပြင်ပအသွင်အပြင်များသည် တူညီခြင်း ရှိ မရှိဆိုသည်မှာ အရေးမကြီးသကဲ့သို့၊ ၎င်းတို့ မည်သို့ အတိအကျ အမှုပြုကြသည်ဆိုသည်မှာလည်း အရေးမကြီးပေ။ နောက်ဆုံးတွင် ဘုရားသခင် ကိုယ်တိုင်၏အမှုကို လုပ်ဆောင်သောသူသည် ဘုရားသခင် ကိုယ်တော်တိုင် ဖြစ်သည်။ သင် လိုချင်သည်ဖြစ်စေ၊ မလိုချင်သည်ဖြစ်စေ၊ ကျိုးနွံနာခံရမည် ဖြစ်သည်- ဤသည်မှာ သင် ရွေးချယ်စရာရှိသော ကိစ္စရပ်တစ်ခု မဟုတ်ပေ။ ဘုရားသခင်ကို လူသားတို့ နာခံရမည်ဖြစ်ပြီး၊ လူသားများသည် ဘုရားသခင်အား ဟန်ဆောင်မှု စိုးစဉ်းမျှမရှိဘဲ လုံးဝနာခံရမည်ဖြစ်သည်။

ယနေ့ လူ့ဇာတိခံ ဘုရားသခင် ရယူချင်သော လူစုမှာ သူ၏ အလိုနှင့်ကိုက်ညီသောသူများ ဖြစ်သည်။ ၎င်းတို့သည် သူ၏ အမှုကို ကျိုးနွံနာခံဖို့နှင့် မရေရာမှုတွင် အသက်ရှင်ရင်းနှင့် အမှုအရာများကို လူ့ဇာတိ၌ရှိသည့် ဘုရားသခင်အတွက် ခက်ခဲစေရင်း၊ ကောင်းကင်ဘုံရှိ ဘုရားသခင်၏ စိတ်ကူးများကို စဉ်ဆက်မပြတ် စိတ်ဝင်စားခြင်းအား ရပ်တန့်ဖို့သာ လိုအပ်ပေသည်။ သူ့ကိုနာခံနိုင်သောသူများသည် သူ့နှုတ်ကပတ်တော်များကို အကြွင်းမဲ့ နားထောင်သူများနှင့် သူ့အစီအစဉ်များကို ကျိုးနွံနာခံသောသူများ ဖြစ်သည်။ ထိုသို့သော လူများသည် ကောင်းကင်ဘုံရှိဘုရားသခင်သည် မည်သည့်အရာနှင့် အမှန်တကယ်တူမည် သို့မဟုတ် ကောင်းကင်ဘုံရှိဘုရားသခင်သည် လူသားမျိုးနွယ်အလယ်တွင် လတ်တလော မည်သည့်အမှုမျိုး လုပ်ဆောင်နေမည်ဆိုသည်တို့ကို လုံးဝ ဂရုမထားကြပေ။ ၎င်းတို့သည် မြေကြီးပေါ်ရှိ ဘုရားသခင်အား ၎င်းတို့၏ နှလုံးသားများကို အပြည့်အဝပေးပြီး သူ၏ရှေ့မှောက်တွင် ၎င်းတို့၏ ဖြစ်တည်ခြင်း တစ်ခုလုံးကို ထားရှိကြလေသည်။ ၎င်းတို့သည် မိမိတို့ကိုယ်တိုင်၏လုံခြုံမှုကို လုံးဝ မည်သို့မျှ ထည့်သွင်းမစဉ်းစားကြသကဲ့သို့၊ လူ့ဇာတိ၌ရှိသည့် ဘုရားသခင်၏ ပုံမှန်ဖြစ်ခြင်းနှင့် လက်တွေ့ကျခြင်းတို့ကို မည်သည့်အခါမျှ ရေးကြီးခွင်ကျယ်လုပ်ခြင်း မရှိကြပေ။ လူ့ဇာတိ၌ရှိသည့် ဘုရားသခင်ကို ကျိုးနွံနာခံသောသူများသည် သူ၏ စုံလင်စေခြင်းခံရနိုင်သည်။ ကောင်းကင်ဘုံရှိဘုရားသခင်ကို ယုံကြည်သောသူများသည် မည်သည့်အရာမျှ ရရှိကြလိမ့်မည်မဟုတ်ပေ။ ဤသည်မှာ အဘယ့်ကြောင့်ဆိုသော် လူတို့အပေါ် ကတိတော်များနှင့် ကောင်းကြီးမင်္ဂလာများ အပ်နှင်းသူမှာ ကောင်းကင်ဘုံရှိ ဘုရားသခင် မဟုတ်ဘဲ မြေကြီးပေါ်ရှိဘုရားသခင် ဖြစ်သောကြောင့် ဖြစ်သည်။ လူတို့သည် မြေကြီးပေါ်ရှိ ဘုရားသခင်ကို သာမန်လူတစ်ဦးမျှအဖြစ် မြင်နေကြစဉ်တွင်၊ ကောင်းကင်ဘုံရှိဘုရားသခင်အား အမြဲ ချဲ့ကားပြောဆိုခြင်း မပြုသင့်ပေ။ ဤသည်မှာ မတရားပေ။ ကောင်းကင်ဘုံရှိ ဘုရားသခင်သည် ကြီးမြတ်ပြီး အံ့ဩဖွယ်ကောင်းသော ဉာဏ်ပညာဖြင့် ချီးကျူးလောက်စရာဖြစ်သော်လည်း၊ ဤသည်မှာ လုံးဝ မတည်ရှိပေ။ မြေကြီးပေါ်ရှိ ဘုရားသခင်သည် အလွန်သာမန်ဖြစ်ပြီး အရေးမပါသကဲ့သို့၊ သူသည် အလွန်လည်း ပုံမှန်ဖြစ်ပေသည်။ သူသည် သာမန်ထက်လွန်ကဲသော ဉာဏ် မရှိပေ၊ သို့မဟုတ် မြေကြီးကို တုန်လှုပ်စေသော လုပ်ဆောင်မှုများ မဆောင်ရွက်ပေ။ သူသည် အလွန်ပုံမှန်ဖြစ်ကာ လက်တွေ့ကျသော နည်းလမ်းဖြင့်သာ အမှုပြုကာ စကားပြောဆိုရုံလေသည်။ သူသည် မိုးချုန်းသံမှတစ်ဆင့် စကားမပြောသော်လည်း၊ သို့မဟုတ် လေနှင့်မိုးတို့အား ခေါ်ဖိတ်ခြင်း မပြုသော်လည်း၊ သူသည် ကောင်းကင်ဘုံရှိဘုရားသခင်၏ လူ့ဇာတိခံယူခြင်း အမှန်တကယ် ဖြစ်ကာ လူသားများအလယ် အသက်ရှင်နေသည့် ဘုရားသခင် အမှန်တကယ်ဖြစ်ပေသည်။ လူတို့သည် ၎င်းတို့ လက်မခံနိုင်သကဲ့သို့ လုံးဝ စိတ်မကူးနိုင်သောသူအား နိမ့်ကျသူအဖြစ် မြင်နေစဉ်တွင်၊ ၎င်းတို့နားလည်နိုင်ပြီး ဘုရားအဖြစ် ၎င်းတို့၏ ကိုယ်ပိုင်စိတ်ကူးများနှင့် ကိုက်ညီသော သူကို ချဲ့ကားပြောဆိုခြင်း ပြုရမည်မဟုတ်။ ဤအရာအားလုံးသည် လူတို့၏ ပုန်ကန်ခြင်းမှ လာပေသည်။ ယင်းမှာ ဘုရားသခင်ကို လူသားမျိုးနွယ်၏ ခုခံခြင်း အရင်းအမြစ်သာ ဖြစ်ပေသည်။