အနန္တတန်ခိုးရှင် ဘုရားသခင် အသင်းတော် အကြောင်းအရာ

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

ဘုရားသခင်အတွက် စစ်မှန်သောချစ်ခြင်းသည် အလိုအလျောက် ဖြစ်သည်

လူအားလုံးသည် ဘုရားသခင်၏ နှုတ်ကပတ်တော်အားဖြင့် စစ်ဆေးခြင်းကို ခံကြရသည်။ လူ့ဇာတိ ခံယူသော ဘုရားသခင်ကြောင့်သာမဟုတ်ပါက လူသားမျိုးနွယ်သည် ထိုကဲ့သို့ဒုက္ခခံစားရဖို့ ကောင်းချီးခံရမည် မဟုတ်ပေ။ ဘုရားသခင်၏ နှုတ်ကပတ်တော်၏ စမ်းသပ်ခြင်းကို လက်ခံနိုင်သော သူများသည် ကောင်းချီးခံစားရသော သူများဖြစ်သည်ဟုလည်း ပြော၍ရသည်။ လူများ၏ နဂိုအရည်အသွေး၊ သူတို့၏ အပြုအမူနှင့် ဘုရားသခင်အပေါ် သူတို့၏ သဘောထားများကို အခြေခံကြည့်ပါက သူတို့သည် ဤကဲ့သို့သော စစ်ဆေးခြင်းကို လက်ခံရရှိဖို့ မထိုက်တန်ကြပေ။ ဘုရားသခင်က သူတို့ကို မြှင့်တင်ခဲ့သည့်အတွက်ကြောင့် ထိုသူတို့သည် ဤကောင်းချီးကို ခံစားရခြင်းဖြစ်သည်။ လူတွေက မိမိတို့မှာ ဘုရားသခင်၏ မျက်နှာကို မြင်ရရန် သို့မဟုတ် သူ၏နှုတ်ကပတ်တော်များကို ကြားရရန် မထိုက်တန်ကြပါဟု ပြောလေ့ရှိကြသည်။ ယနေ့ လူများသည် ဘုရားသခင်၏ နှုတ်ကပတ်တော်များ၏ စစ်ဆေးခြင်းကို ရရှိကြခြင်းမှာ ဘုရားသခင်၏ မြှင့်တင်ခြင်းသက်သက်နှင့် သူ့၏ ကရုဏာသက်သက်ကြောင့် ဖြစ်သည်။ ဤသည်မှာ နောက်ဆုံးသော ကာလ၌ အသက်ရှင်နေထိုင်ကြသော လူတစ်ဦးချင်းစီတိုင်း၏ ကောင်းချီးဖြစ်၏။ ဤသည်ကို သင်တို့ကိုယ်တိုင် တွေ့ကြုံဖူးသလော။ လူများသည် မည်သည့်ရှုထောင့်များမှ ဒုက္ခခံရပြီး အခက်အခဲများ ရှိမည်ဆိုခြင်းကို ဘုရားသခင်က ကြိုတင်သတ်မှတ်ထားခြင်းဖြစ်ပြီး လူတို့ကိုယ်တိုင်၏ လိုအပ်ချက်များကို အခြေခံထားခြင်း မဟုတ်ပေ။ ဤအချက်က လုံးဝ မှန်ကန်သည်။ ယုံကြည်သူတိုင်းသည် ဘုရားသခင်၏ နှုတ်ကပတ်တော်၏ စမ်းသပ်မှုကို တွေ့ကြုံနိုင်စွမ်းနှင့် သူ့နှုတ်ကပတ်တော်အတွင်း၌ ဒုက္ခခံစားကြနိုင်စွမ်းကို ပိုင်ဆိုင်ကြရမည်။ ဤသည်မှာ သင်တို့ ရှင်းရှင်းလင်းလင်းမြင်နိုင်သောအရာ ဖြစ်သလော။ ထို့ကြောင့် သင်ကြုံတွေ့ခဲ့ရသော ဆင်းရဲဒုက္ခနှင့် ယနေ့ကောင်းချီးများကို ဖလှယ်လိုက်ခြင်း ဖြစ်သည်။ အကယ်၍ သင်သည် ဘုရားသခင်အတွက် ဒုက္ခမခံပါက သူ၏ချီးမွမ်းမှုကို မရရှိနိုင်ပေ။ သင်သည် ယခင်က မကျေမနပ် ညည်းညူခဲ့နိုင်သည်၊ သို့သော် သင်သည် မည်မျှပင် ညည်းညူပြောဆိုခဲ့ပါစေ ဘုရားသခင်က သင်နှင့်ပတ်သက်၍ ထိုအကြောင်းကို သတိရမည် မဟုတ်ပေ။ ယနေ့သည် ရောက်လာလေပြီ၊ ယမန်နေ့က ကိစ္စများကို ပြန်ကြည့်ဖို့ရန် အကြောင်းမရှိချေ။

အချို့လူများက သူတို့သည် ဘုရားသခင်ကို ချစ်ဖို့ကြိုးစားသော်လည်း မတတ်နိုင်ကြဟု ပြောကြပြီး၊ ဘုရားသခင်က ထွက်ခွာသွားတော့မည် ဆိုသည်ကို သူတို့ကြားသည့်အခါတွင်မှ သူ့အတွက် ချစ်ခြင်းမေတ္တာ သူတို့၌ ရှိလာကြသည်။ အချို့လူများက ယေဘူယျအားဖြင့် သမ္မာတရားကို လက်တွေ့မကျင့်သုံးကြချေ။ ဘုရားသခင်က အမျက်ထွက်၍ ထွက်သွားတော့မည် ဆိုသည်ကို သူတို့ကြားသည့်အခါ သူ့ရှေ့ကို လာပြီး “အိုး ဘုရားသခင် ကျေးဇူးပြုပြီး မသွားပါနဲ့။ ကျွန်တော့်ကို အခွင့်အရေးတစ်ခုပေးပါ။ ဘုရားသခင်၊ အရင်က ဘုရားသခင်ကို စိတ်မကျေနပ်စေခဲ့ဘူး။ ကိုယ်တော်ရဲ့ ကျေးဇူးတွေရှိပြီး ကိုယ်တော်ကို ခုခံခဲ့တယ်။ ယနေ့ ကျွန်တော်ဟာ နောက်ဆုံးမှာ ကိုယ်တော်ကို စိတ်ကျေနပ်စေဖို့နဲ့ ချစ်မြတ်နိုးဖို့အတွက် ကျွန်တော့်ရဲ့ ကိုယ်ခန္ဓာနှင့် နှလုံးသားကို အပြည့်အဝ ပေးအပ်ဖို့ ဆန္ဒရှိနေပါတယ်။ ဒီအခွင့်အရေးကို နောက်တစ်ခါ တောင်းဆိုမှာ မဟုတ်တော့ပါဘူး”ဟု ဆုတောင်းကြသည်။ ဤဆုတောင်းချက်မျိုး သင်တောင်းဖူးသလော။ တစ်ယောက်ယောက်က ထိုကဲ့သို့ဆုတောင်းလျှင် ဘုရားသခင်၏ နှုတ်ကပတ်တော်များက သူတို့၏ အသိစိတ်ကို လှုပ်နှိုးလိုက်ခြင်းကြောင့် ဖြစ်သည်။ လူသားအားလုံးသည် ထုံအပြီး မိုက်မဲကြသည်။ သူတို့သည် ပြစ်တင်ဆုံးမခြင်းနှင့် စစ်ဆေးခြင်းကို ကြုံတွေ့ရသော်လည်း ဘုရားသခင်က အဘယ်အရာကို အထမြောက်အောင် ဆောင်ရွက်နေသနည်း ဆိုသည်ကို သူတို့မသိကြချေ။ အကယ်၍ ဘုရားသခင်က ဤနည်းလမ်းအတိုင်း မလုပ်ဆောင်ပါက လူများမှာ ရှုပ်ထွေးဆဲရှိနေဦးမည် ဖြစ်သည်။ လူတို့၏ နှလုံးသားများထဲမှ ဝိညာဉ်ရေးရာ ခံစားချက်များကို မည်သူမျှ မနှိုးဆွနိုင်ပေ။ ထိုအသီးအပွင့်ကို ဖြစ်ထွန်းစေနိုင်သည်က လူတို့ကို ဘုရားသခင်၏ တရားစီရင်ခြင်းနှင့် ဖော်ထုတ်ခြင်းအားဖြင့်သာ ဖြစ်သည်။ ထို့ကြောင့် အရာအားလုံးသည် ဘုရားသခင်၏ နှုတ်ကပတ်တော်တို့ကြောင့် ရရှိပြီး ပြီးမြောက်သည်။ သူ၏ နှုတ်ကပတ်တော်များကြောင့်သာ ဘုရားသခင်အတွက် လူသားမျိုးနွယ်၏ ချစ်ခြင်းက နှိုးထလာခြင်း ဖြစ်သည်။ အကယ်၍ လူတို့သည် သူတို့၏ ကိုယ်ပိုင် အသိစိတ်များကို အခြေခံပြီး ဘုရားသခင်ကို ချစ်ပါက သူတို့သည် မည်သည့်ရလဒ်ကိုမျှ မြင်ရမည် မဟုတ်ပေ။ အတိတ်က လူတို့သည် ဘုရားသခင်အတွက် သူတို့၏ ချစ်ခြင်းကို သူတို့၏ ကိုယ်ပိုင်အသိစိတ်များအပေါ်၌ အခြေခံခဲ့ကြသည် မဟုတ်လော။ ဘုရားသခင်ကို ချစ်မြတ်နိုးဖို့အတွက် အစပြုလုပ်ဆောင်သောသူ တစ်ဦးတစ်ယောက် ရှိသလော။ ဘုရားသခင်၏ နှုတ်ကပတ်တော်များ၏ အားပေးမှုအားဖြင့်သာလျှင် သူတို့သည် ဘုရားသခင်ကို ချစ်ခဲ့ကြခြင်းဖြစ်သည်။ အချို့လူများက “ဘုရားသခင်နောက်ကို နှစ်အတော်ကြာကြာ ငါလိုက်ခဲ့ပြီး ကိုယ်တော့်ရဲ့ ကျေးဇူးတော်၊ များပြားလှတဲ့ ကောင်းချီးတွေကို ခံစားခဲ့ရတယ်။ ငါက ကိုယ်တော့် နှုတ်ကပတ်တော်တွေရဲ့ စစ်ဆေးခြင်းနဲ့ တရားစီရင်ခြင်းကို ခံခဲ့ရတယ်။ ဒါကြောင့် ငါတော်တော်နားလည်လာပြီးတော့ ဘုရားသခင်ရဲ့ ချစ်ခြင်းမေတ္တာကိုလည်း မြင်ခဲ့ပြီးပြီ။ ကိုယ်တော့်ကို ငါကျေးဇူးတင်ရမယ်။ ကိုယ်တော့် ကျေးဇူးတော်တွေကို ငါပြန်ပြီးပေးဆပ်ရမယ်။ ဘုရားသခင်ကို သေခြင်းနဲ့ ငါစိတ်ကျေနပ်စေမယ်။ ကိုယ်တော့်အတွက် ငါ့ရဲ့ချစ်ခြင်းကို ငါ့အသိစိတ်အပေါ်မှာ အခြေခံမယ်” ဟူ၍ ပြောကြသည်။ အကယ်၍ လူများသည် မိမိတို့အသိစိတ်၏ ခံစားချက်များအပေါ်၌သာ အမှီပြုနေလျှင် သူတို့သည် ဘုရားသခင်၏ ချစ်မြတ်နိုးဖွယ်ကောင်းခြင်းကို မခံစားရနိုင်ချေ။ အကယ်၍ သူတို့သည် မိမိတို့၏ အသိစိတ်အပေါ်၌သာ မှီခိုပါက ဘုရားသခင်အတွက် သူတို့၏ ချစ်ခြင်းက အားနည်းနေပါလိမ့်မည်။ အကယ်၍ သင်က ဘုရားသခင်၏ ကျေးဇူးတော်နှင့် ချစ်ခြင်းကို ပြန်လည်ပေးဆပ်ရန်သာ ပြောနေပါလျှင် သူ့အတွက် သင်၏ချစ်ခြင်း၌ မည်သည့်စိတ်ဓာတ်ခွန်အားမျှ ရှိမည်မဟုတ်ချေ။ သင့်အသိစိတ်၏ ခံစားချက်များအပေါ် အခြေခံပြီး သူ့ကိုချစ်ခြင်းသည် တက်ကြွလှုပ်ရှားမှုမရှိသော ချဉ်းကပ်မှုသာဖြစ်သည်။ တက်ကြွလှုပ်ရှားမှု မရှိသော ချဉ်းကပ်မှုဟု အဘယ်ကြောင့် ငါပြောရသနည်း။ ဤသည်မှာ လက်တွေ့ကျသော ပြဿနာတစ်ခုပင်။ ဤသည်မှာ မည်ကဲ့သို့သော ချစ်ခြင်းမျိုးနည်း။ ဤသည်မှာ ဘုရားသခင်ကို အရူးလုပ်ရန် ကြိုးစားပြီး သူ့အတွက် စိတ်မပါ့တပါ လုပ်နေခြင်းသာ မဟုတ်လော။ ဘုရားသခင်ကို ချစ်ခြင်းအတွက် ဆုလာဘ်မရှိ၊ သို့ဖြစ်စေကာမူ သူ့ကိုမချစ်ခြင်းအတွက် ပြစ်တင်ဆုံးမခြင်းခံရမည်၊ ထို့ကြောင့် ခြုံကြည့်လျှင် အပြစ်မလုပ်ခြင်း သက်သက်က လုံလောက်သည်ဟု လူအများစုက ယုံကြည်ကြသည်။ ထို့ကြောင့် မိမိအသိစိတ်၏ ခံစားချက်များကို အခြေခံပြီး ဘုရားသခင်ကို ချစ်ခြင်းနှင့် သူ့အချစ်အတွက် ပြန်လည်ပေးဆပ်ခြင်းက တက်ကြွလှုပ်ရှားမှုမရှိသော ချဉ်းကပ်မှုဖြစ်ပြီး ထိုအရာသည် ဘုရားသခင်အတွက် နှလုံးသားမှ အလိုအလျောက်ဖြစ်လာသော ချစ်ခြင်း မဟုတ်ချေ။ ဘုရားသခင်အတွက် ချစ်ခြင်းက လူတစ်ယောက်၏ နှလုံးသားအတွင်းထဲမှလာသော စစ်မှန်သည့် ခံစားချက် ဖြစ်သင့်ပေသည်။ အချို့လူများက “ကျွန်တော်ကိုယ်တိုင် ဘုရားသခင်ကို မီအောင်လိုက်ဖို့၊ ကိုယ်တော့်နောက်ကို လိုက်ဖို့ဆန္ဒရှိတယ်။ အခု ဘုရားသခင်က ကျွန်တော့်ကို စွန့်လွှတ်ချင်တယ်။ ဒါပေမဲ့ ကိုယ်တော့်နောက်ကို ကျွန်တော်လိုက်ချင်နေတုန်းပါပဲ။ ကိုယ်တော် ကျွန်တော့်ကို လိုချင်သည် ဖြစ်စေ၊ မလိုချင်သည်ဖြစ်စေ၊ ကိုယ်တော့်ကို ကျွန်တော် ချစ်တုန်းပါပဲ။ အဆုံးမှာ ကိုယ်တော့်ကို ကျွန်တော် ရရှိမှဖြစ်မယ်။ ကျွန်တော့်ရဲ့ နှလုံးသားကို ဘုရားသခင်ကို ပေးအပ်ပါတယ်။ ကိုယ်တော်ဘာပဲလုပ်လုပ် ကျွန်တော့်ဘဝတစ်ခုလုံး ကိုယ်တော့်နောက်ကို လိုက်ပါမယ်။ ဘာပဲဖြစ်နေပါစေ ကျွန်တော် ဘုရားသခင်ကို ချစ်ပြီး ကိုယ်တော့်ကို ရရှိရမယ်။ ကိုယ်တော့်ကို မရမချင်း ကျွန်တော်မနားပါဘူး”ဟူ၍ ပြောကြသည်။ ထိုစိတ်ဓာတ်မျိုး သင်၌ ရှိသလော။

ဘုရားသခင်ကို ယုံကြည်ခြင်း လမ်းကြောင်းသည် သူ့ကိုချစ်ခြင်း လမ်းကြောင်းပင်ဖြစ်သည်။ သူ့ကို သင်ယုံကြည်ပါက သူ့ကို ချစ်ရမည်။ သို့သော် သူ့ကိုချစ်မြတ်နိုးခြင်းက သူ့အချစ်ကို ပြန်ပေးဆပ်ခြင်း သို့မဟုတ် အသိစိတ်၏ ခံစားချက်များပေါ် အခြေခံပြီး ချစ်ခြင်းကို ရည်ညွှန်းခြင်းသာ မဟုတ်ပေ။ ထိုအရာသည် ဘုရားသခင်အတွက် သန့်စင်သည့် ချစ်ခြင်းဖြစ်သည်။ လူတွေက သူတို့၏ အသိစိတ်များပေါ်၌သာ အမှီပြုပြီး ဘုရားသခင်၏ ချစ်ခြင်းကို သူတို့မခံစားနိုင်သော အချိန်များ ရှိသည်။ “ဘုရားသခင်၏ ဝိညာဉ်တော်သည် ငါတို့၏ ဝိညာဉ်များကို နှိုးဆော်ပါစေ”ဟု အဘယ်ကြောင့် ငါအမြဲတမ်း ပြောသနည်း။ ဘုရားသခင်ကိုချစ်ရန် အလို့ငှာ လူတို့၏ အသိစိတ်များကို နှိုးဆော်ခြင်းအား အဘယ်ကြောင့် ငါမပြောခဲ့သနည်း။ အကြောင်းမှာ လူတို့၏ အသိစိတ်များသည် ဘုရားသခင်၏ ချစ်မြတ်နိုးဖွယ်ကောင်းမှုကို မခံစားနိုင်၍ဖြစ်သည်။ ထို့ကြောင့် သင်က ထိုစကားလုံးများကို မယုံကြည်လက်မခံပါက သူ၏ချစ်ခြင်းကို ခံစားရဖို့ရန်အလို့ငှာ သင်၏ အသိစိတ်ကို အသုံးပြုနိုင်ပြီး ထိုအချိန်ခဏတွင် သင်၌ စိတ်ဓာတ်ခွန်အား ရှိလိမ့်မည်ဖြစ်သော်လည်း ပျောက်ကွယ်သွားမည်ပင် ဖြစ်သည်။ ဘုရားသခင်၏ ချစ်ခင်နှစ်လိုဖွယ်ကောင်းမှုကို ခံစားရဖို့အလို့ငှာ သင်၏ အသိစိတ်ကိုသာ အသုံးပြုပါက သင်ဆုတောင်းသည့်အခါ သင့်မှာ စိတ်ဓာတ်ခွန်အားရှိသော်လည်း ထို့နောက်တွင်မူ ထိုအရာသည် ထွက်သွားသည်၊ ပျောက်ကွယ်သွားသည်။ ဤသည်မှာ မည်သို့ဖြစ်သနည်း။ အကယ်၍ သင်သည် မိမိ၏ အသိစိတ်ကိုသာ အသုံးပြုပါက ဘုရားသခင်အတွက် သင်၏ချစ်ခြင်းကို သင်လှုပ်နှိုးနိုင်မည် မဟုတ်ချေ။ သင့်နှလုံးသားထဲ၌ သူ၏ ချစ်ခင်နှစ်လိုဖွယ်ကောင်းမှုကို အမှန်တကယ် ခံစားရသောအခါ သင်၏ ဝိညာဉ်သည် သူ၏ နှိုးဆောခြင်း ခံရလိမ့်မည်။ ထိုအချိန်မှသာလျှင် သင်၏ အသိစိတ်က ၎င်း၏ နဂိုအခန်းကဏ္ဍကို ကပြနိုင်လိမ့်မည်။ ဆိုလိုသည်မှာ လူတို့သည် သူတို့၏ ဝိညာဉ်ထဲ၌ ဘုရားသခင်၏ နှိုးဆော်ခြင်းကိုခံရပြီး သူတို့နှလုံးသားက အသိပညာနှင့် အားပေးတိုက်တွန်းမှုအား ရရှိသောအခါ၊ တစ်နည်းအားဖြင့် သူတို့သည် အတွေ့အကြုံ ရရှိပြီးနောက်မှသာ သူတို့၏ အသိစိတ်များနှင့် ဘုရားသခင်ကို ထိထိရောက်ရောက် ချစ်မြတ်နိုးနိုင်မည် ဖြစ်သည်။ သင်၏အသိစိတ်နှင့် ဘုရားသခင်ကို ချစ်ခြင်းက မမှားပေ၊ ဤသည်မှာ ဘုရားသခင်ကို ချစ်ခြင်း၌ အနိမ့်ဆုံးအဆင့် ဖြစ်သည်။ ဘုရားသခင်၏ ကျေးဇူးတော် မှန်ကန်ကြောင်း ပြခြင်းသက်သက်ဖြစ်သည့် လူသားမျိုးနွယ်၏ ချစ်ပုံချစ်နည်းသည် သူတို့၏ တက်ကြွစွာ ဝင်ရောက်မှုကို လုံးဝ မလှုံဆော်နိုင်ချေ။ သန့်ရှင်းသော ဝိညာဉ်တော်၏ လုပ်ဆောင်မှုအချို့ကို လူတို့လက်ခံရရှိသည့်အခါ၊ ဆိုလိုသည်မှာ၊ သူတို့၏ လက်တွေ့အတွေ့အကြုံထဲ၌ ဘုရားသခင်၏ ချစ်ခြင်းကို မြင်တွေ့ရပြီး မြည်းစမ်းရသည့်အခါ၊ သူတို့၌ ဘုရားသခင်အကြောင်း အသိပညာအချို့ရှိပြီး ဘုရားသခင်သည် လူသားမျိုးနွယ်၏ ချစ်ခြင်းနှင့် အလွန်ထိုက်တန်သည်ဆိုခြင်းနှင့် သူသည် မည်မျှ ချစ်ဖွယ်ကောင်းသည် ဆိုခြင်းကို အမှန်တကယ် သိမြင်သည့်အခါ၊ ထိုအခါမှသာ လူတို့သည် ဘုရားသခင်ကို အမှန်တကယ် ချစ်နိုင်သည်။

လူတို့က ဘုရားသခင်ကို သူတို့၏ နှလုံးသားနှင့် ဆက်သွယ်သည့်အခါ၊ သူတို့၏ နှလုံးသားသည် သူ့ထံ လုံးဝ လှည့်လာနိုင်သည့်အခါ၊ ဤသည်မှာ ဘုရားသခင်အတွက် လူသား၏ ချစ်ခြင်း၏ ပထမအဆင့် ဖြစ်သည်။ အကယ်၍ သင်က ဘုရားသခင်ကို ချစ်မြတ်နိုးလိုပါက ပထမဆုံး သင့်နှလုံးသားကို သူ့ဘက်ကို လှည့်လာနိုင်ရမည်။ ဘုရားသခင်ထံ သင့်နှလုံးသားကို လှည့်ခြင်းဆိုသည်မှာ အဘယ်နည်း။ သင့်နှလုံးသားထဲ၌ မီအောင်လိုက်သော အရာရာတိုင်းက ဘုရားသခင်ကို ရရှိခြင်းနှင့် ချစ်ခြင်းအတွက် ဖြစ်သည့်အခါပင်ဖြစ်ပြီး ဤသည်မှာ သင်က ဘုရားသခင်ထံ သင့်နှလုံးသားကို လုံးဝလှည့်ပြီး ဖြစ်သည်ဆိုခြင်းအား ပြသည်။ ဘုရားသခင်နှင့် သူ၏ နှုတ်ကပတ်တော်များမှလွဲ၍ သင့်နှလုံးသားထဲ၌ အခြားအရာ ဘာမျှမရှိလုနီးပါးဖြစ်သည် (မိသားစု၊ ချမ်းသာမှု၊ လင်ယောင်္ကျား၊ ဇနီးမယား၊ သို့မဟုတ် အခြားအရာများ)။ ရှိနေလျှင်ပင် ထိုအရာများက သင့်နှလုံးသားကို မသိမ်းပိုက်နိုင်ချေ။ ထို့အပြင် သင်သည် မိမိ၏ အလားအလာများကို မတွေးဘဲ ဘုရားသခင်အား ချစ်ခြင်းကိုသာ မီအောင်လိုက်သည်။ ထိုအချိန်၌ သင်သည် ဘုရားသခင်ထံ သင်၏ နှလုံးသားကို လုံးဝလှည့်လိုက်ပြီး ဖြစ်လိမ့်မည်။ အကယ်၍ သင်က သင့်နှလုံးသား၌ သင့်အတွက် အစီအစဉ်များ ဆွဲနေသေးသည်ဆိုပါက သင်က သင်ကိုယ်တိုင်၏ အကျိုးအမြတ်အတွက် အမြဲတမ်း ကြိုးစားအားထုတ်နေခြင်း ဖြစ်သည်။ “ဘုရားသခင်ဆီကနေ သေးငယ်တဲ့ တောင်းဆိုမှုတစ်ခုကို ကျွန်တော် ဘယ်အချိန် ပြုလုပ်နိုင်မလဲ။ ကျွန်တော့်ရဲ့ မိသားစုက ဘယ်အချိန်မှာ ချမ်းသာလာမှာလဲ။ အဝတ်အစား ကောင်းကောင်းတွေ ကျွန်တော် ဘယ်လိုရမှာလဲ။...” သင်က ထိုအခြေအနေ၌ နေထိုင်နေပါလျှင် သင့်နှလုံးသားက ဘုရားသခင်ထံ အပြည့်အဝ လှည့်မလာသေးဟု ပြနေသည်။ သင့်နှလုံးသားထဲ၌ ဘုရားသခင်၏ နှုတ်ကပတ်တော်များသာ ရှိပြီး ဘုရားသခင်ကို သင်ဆုတောင်းနိုင်ကာ တစ်ချိန်လုံး သူနှင့် နီးစပ်လာပါက၊ သူက သင့်နှင့် အလွန် ရင်းနှီးနေသည့်အလား၊ ဘုရားသခင်က သင့်အတွင်း၌ ရှိနေပြီး သင်က သူ့အတွင်း၌ ရှိနေသည့်အလား ဆိုပါက၊ အကယ်၍ သင်က ဤအဆင့်မျိုး၌ ရှိသည်ဆိုလျှင် သင့်နှလုံးသားက ဘုရားသခင်၏ မျက်မှောက်ထဲ၌ ရှိနေသည်ဟု ဆိုလိုသည်။ အကယ်၍ သင်က ဘုရားသခင်ကို ဆုတောင်းပြီး သူ၏နှုတ်ကပတ်တော်များကို နေ့စဉ်စားသောက်ပါက၊ အသင်းတော် အလုပ်များကို အမြဲတမ်း စဉ်းစားနေပါက၊ ဘုရားသခင်၏ အလိုကို ထောက်ထားပါက၊ သူ့ကိုစစ်မှန်စွာ ချစ်ပြီး သူ့နှလုံးသားကို ကျေနပ်စေဖို့ရန် သင့်နှလုံးသားကို အသုံးပြုပါက၊ သင်၏ နှလုံးသားသည် ဘုရားသခင်နှင့် သက်ဆိုင်ပေသည်။ အကယ်၍ သင်၏နှလုံးသားသည် အခြားအရာများ၏ နေရာယူထားခြင်းကို ခံထားရပါက၊ သင့်နှလုံးသားကို စာတန်က နေရာယူထားဆဲဖြစ်ပြီး ဘုရားသခင်ထံ အမှန်တကယ် မလှည့်ထားချေ။ လူတစ်ယောက်၏ နှလုံးသားသည် ဘုရားသခင်ထံ အမှန်တကယ် လှည့်ပြီးသည့်အခါ သူတို့၌ ဘုရားသခင်အတွက် စစ်မှန်ပြီး အလိုအလျောက်ဖြစ်သော ချစ်ခြင်း ရှိမည်ဖြစ်ပြီး ဘုရားသခင်၏ အမှုကို ထောက်ထားနိုင်မည် ဖြစ်သည်။ သူတို့၌ မိုက်မဲပြီး အသိတရားမဲ့သော အခြေအနေများ ရှိနေမည်ဖြစ်သော်လည်း သူတို့သည် ဘုရားသခင် အိမ်တော်၏ အကျိုးတို့အတွက်၊ သူ၏ အမှုအတွက်နှင့် မိမိတို့၏ စိတ်သဘောထား ပြောင်းလဲမှုအတွက် ထောက်ထားနိုင်စွမ်း ရှိမည်ဖြစ်သည်။ သူတို့၏ နှလုံးသားသည် လုံးဝ မှန်ကန်လိမ့်မည်။ အချို့လူများက မိမိတို့အဘယ်အရာပင် ပြုသည်ဖြစ်စေ အသင်းတော် ဘက်မှ အမြဲတမ်း ရပ်တည်ကြသည်။ စင်စစ်အားဖြင့် ဤသည်မှာ သူတို့၏ ကိုယ်ကျိုးအတွက်ဖြစ်သည်။ ထိုသို့သောလူမျိုး၌ မှန်ကန်သည့် စေ့ဆော်မှု မရှိချေ။ ထိုသူသည် ကလိမ်ကကျစ်ကျ၍ လှည့်စားတတ်ကာ သူလုပ်သောအရာ အများစုသည် သူ့ကိုယ်ပိုင် အကျိုးအမြတ်အတွက် ရှာဖွေဖို့ဖြစ်သည်။ ဤသို့သော လူမျိုးသည် ဘုရားသခင်ကို ချစ်ခြင်းအား မီအောင်မလိုက်ချေ။ သူ၏နှလုံးသားသည် စာတန်နှင့် သက်ဆိုင်နေဆဲဖြစ်ပြီး ဘုရားသခင်ထံ မလှည့်နိုင်ချေ။ ဘုရာသခင်က ဤကဲ့သို့သော လူမျိုးကို ရရှိရန် နည်းလမ်းမရှိပေ။

ဘုရားသခင်ကို အမှန်တကယ်ချစ်ခြင်းနှင့် သူ၏ ရရှိခြင်းကို ခံခြင်း၏ ပထမအဆင့်က ဘုရားသခင်ထံ သင့်နှလုံးသားကို လုံးဝ လှည့်လိုက်ဖို့ ဖြစ်သည်။ သင်လုပ်သမျှ တစ်ခုချင်းစီတိုင်း၌၊ သင့်ကိုယ်သင် စိစစ်ကာ “ဘုရားသခင်အတွက် ချစ်ခြင်းနှလုံးသားတစ်ခုကို အခြေခံပြီး ဒါကို ငါလုပ်နေတာလား။ ဒီအထဲမှာ ပုဂ္ဂိုလ်ရေး ရည်ရွယ်ချက်တွေ ပါနေသလား။ ငါဒါကို လုပ်နေရခြင်းရဲ့ ပန်းတိုင်အမှန်က ဘာများလဲ”ဟု မေးခွန်းထုတ်ပါ။ အကယ်၍ သင်က သင့်နှလုံးသားကို ဘုရားသခင်ထံ လွှဲပြောင်းပေးလိုပါက သင့်နှလုံးသားကို ဦးစွာ ထိုး၍ နှိပ်စက်ရမည်၊ သင်၏ကိုယ်ပိုင် ရည်ရွယ်ချက်အားလုံးကို စွန့်ပစ်ပြီး လုံးဝ ဘုရားသခင်အတွက် ဖြစ်ခြင်း အဆင့်ကို ရောက်ရှိရမည်။ ဤသည်မှာ ဘုရားသခင်ထံ သင်၏နှလုံးသားကို ပေးအပ်ခြင်းအား လက်တွေ့ကျင့်သုံးရန် လမ်းကြောင်းဖြစ်သည်။ မိမိနှလုံးသားကို ထိုး၍နှိပ်စက်ခြင်းဆိုသည်မှာ အဘယ်အရာကို ရည်ညွှန်းသနည်း။ ဇာတိပကတိ၏ အတောမသတ်နိုင်သော ဆန္ဒများကို စွန့်လွှတ်ခြင်း၊ အဆင့်အတန်း ကောင်းချီးများကို မတောင့်တခြင်း သို့မဟုတ် နှစ်သိမ့်မှုကို မက်မောခြင်း၊ ဘုရားသခင်ကို စိတ်ကျေနပ်စေရန် အရာအားလုံးကို ပြုလုပ်ခြင်းနှင့် မိမိနှလုံးသားသည် လုံးဝ သူ့အတွက်ဖြစ်ပြီး ကိုယ့်အကျိုးအတွက် မဖြစ်ခြင်းတို့ ဖြစ်သည်။

ဘုရားသခင်အတွက် စစ်မှန်သော ချစ်ခြင်းသည် နှလုံးသား၏ နက်ရှိုင်းသော အတွင်းနေရာမှ လာ၏။ ဘုရားသခင်အပေါ် လူသားမျိုးနွယ်၏ အသိပညာ၏ အခြေခံ အပေါ်မှာသာ တည်ရှိသည့် ချစ်ခြင်းဖြစ်သည်။ လူတစ်ယောက်၏ နှလုံးသားသည် ဘုရားသခင်ထံ လုံးဝ လှည့်ပြောင်းလာသောအခါ ဘုရားသခင်အတွက် ချစ်ခြင်း သူတို့၌ရှိ၏။ သို့သော် ထိုအချစ်က ဧကန်အမှန် သန့်စင်၍ ပြီးပြည့်စုံခြင်းမျိုးကား မဟုတ်ချေ။ ဤသို့ဖြစ်ရခြင်းမှာ ဘုရားသခင်ထံ လူတစ်ယောက်၏ နှလုံးသားက လုံးဝလှည့်ပြောင်းသွားခြင်းနှင့် ထိုလူက ဘုရားသခင်အပေါ် စစ်မှန်သည့် နားလည်မှုနှင့် သူ့အပေါ်၌ စစ်မှန်သည့် မြတ်နိုးမှုရှိခြင်း အကြားမှာ အကွာအဝေးတစ်ခုရှိသောကြောင့် ဖြစ်၏။ လူတစ်ယောက်အတွက် ဘုရားသခင်၏ စစ်မှန်သော ချစ်ခြင်းကို ရဖို့နှင့် ဘုရားသခင်၏ စိတ်သဘောထားကို သိဖို့ရန်မှာ ဘုရားသခင်ထံ သူတို့၏ နှလုံးသားကို လှည့်ဖို့ဖြစ်သည်။ သူတို့၏ စစ်မှန်သော နှလုံးသားကို ဘုရားသခင်အား ပေးပြီးနောက်၌ သူတို့သည် ဘဝအတွေ့အကြုံထဲကို စတင်ဝင်ရောက်လာမည်ဖြစ်ပြီး ဤနည်းလမ်းနှင့် သူတို့၏ စိတ်သဘောထားသည် စတင်ပြောင်းလဲလာကာ ဘုရားသခင်အပေါ် သူတို့၏ ချစ်ခြင်းမှာ တဖြည်းဖြည်း ကြီးထွားလာပြီး၊ သူတို့၏ ဘုရားသခင်နှင့် ပတ်သက်သော အသိပညာကလည်း တဖြည်းဖြည်းနှင့် တိုးလာပေမည်။ ထို့ကြောင့် မိမိနှလုံးသားကို ဘုရားသခင်ဆီသို့ လှည့်ခြင်းက ဘဝအတွေ့အကြုံ၏ လမ်းမှန်ပေါ်ကို ရောက်ဖို့ရန် ကြိုတင်သတ်မှတ်ချက် တစ်ခုဖြစ်သည်။ လူတို့သည် ဘုရားသခင်ရှေ့၌ မိမိတို့၏ နှလုံးသားကို ထားလိုက်သည့်အခါ သူတို့၌ ဘုရားသခင်ကို တမ်းတသည့် နှလုံးသားသာရှိပြီး သူ့အတွက် ချစ်ခြင်းမရှိချေ။ အဘယ်ကြောင့်ဆိုသော် သူတို့၌ သူ့ကို နားလည်ခြင်း မရှိ၍ဖြစ်သည်။ ဤအခြေအနေ၌ သူ့အတွက် ချစ်ခြင်းအချို့ ထိုသူတို့တွင် ရှိနေလျှင်ပင် ထိုချစ်ခြင်းက အလိုအလျောက်ဖြစ်ခြင်းမဟုတ်၊ စစ်မှန်သောချစ်ခြင်း မဟုတ်ပေ။ ဤသို့ဖြစ်ရခြင်းမှာ လူသား၏ ဇာတိပကတိမှလာသော အရာတိုင်းက စိတ်ခံစားမှု၏ သက်ရောက်မှု တစ်ခုဖြစ်ပြီး စစ်မှန်သည့် နားလည်ခြင်းမှ လာခြင်း မဟုတ်၍ ဖြစ်သည်။ ထိုအရာသည် တဒင်္ဂ ရုတ်တရက်ဖြစ်ပေါ်သည့် တွန်းအားတစ်ခုသာဖြစ်ပြီး ကြာရှည်တည်မြဲသည့် မြတ်နိုးမှု မဖြစ်နိုင်ချေ။ လူတို့သည် ဘုရားသခင်အပေါ် နားလည်ခြင်း မရှိသည့်အခါ သူတို့သည် မိမိတို့၏ ကိုယ်ပိုင်နှစ်သက်မှုများနှင့် မိမိတို့၏ တစ်ဦးချင်း အယူအဆများအပေါ်၌ အခြေခံ၍သာ သူ့ကို ချစ်နိုင်သည်။ ထိုသို့သော ချစ်ခြင်းမျိုးကို အလိုအလျောက်ချစ်ခြင်းဟု မခေါ်နိုင်သကဲ့သို့ စစ်မှန်သော ချစ်ခြင်းဟုလည်း မခေါ်ဆိုနိုင်ပေ။ လူတစ်ယောက်၏ နှလုံးသားသည် ဘုရားသခင်ထံ စစ်မှန်စွာ လှည့်ပြောင်းလာသည့်အခါ သူတို့သည် အရာအားလုံးထဲ၌ ဘုရားသခင်၏ အကျိုးတို့ကို စဉ်းစားနိုင်လာသည်။ သို့သော် သူတို့၌ ထိုနားလည်မှု မရှိပါက သူတို့သည် စစ်မှန်သော အလိုအလျောက်ဖြစ်သည့် ချစ်ခြင်းရှိဖို့ မတတ်စွမ်းနိုင်ပေ။ သူတို့လုပ်နိုင်သည့်အရာ အားလုံးက အသင်းတော်အတွက် တာဝန်အချို့ကို ထမ်းဆောင်ပြီး သူတို့၏တာဝန် အနည်းငယ်ကို ဆောင်ရွက်ခြင်းပင် ဖြစ်သည်။ သို့သော် ထိုအရာသည် အရင်းအမြစ် သို့မဟုတ် အခြေခံအကြောင်းရင်း မပါဝင်ပေ။ ထိုသို့သောလူမျိုး၌ ပြောင်းလဲဖို့ခက်ခဲသော စိတ်သဘောထားရှိသည်။ သူတို့အားလုံးသည် သမ္မာတရားကို မီအောင်မလိုက်သောသူ၊ သို့မဟုတ် နားမလည်သောသူများထဲမှ တစ်ခုခုပင် ဖြစ်ကြသည်။ အကယ်၍ လူတစ်ယောက်က ဘုရားသခင်ထံ မိမိနှလုံးသားကို လုံးဝ လှည့်လိုက်လျှင်ပင် ဘုရားသခင်အတွက် သူတို့၏ချစ်ခြင်းက လုံးဝသန့်စင်သည်ဟု မဆိုလိုပေ။ အဘယ်ကြောင့်ဆိုသော် မိမိတို့ နှလုံးသား၌ ဘုရားသခင်ရှိသော သူများသည် သူတို့နှလုံးသား၌ ဘုရားသခင်အတွက် ချစ်ခြင်းမှာ မဖြစ်မနေ ရှိနေခြင်းမျိုး မဟုတ်ချေ။ ဤသည်မှာ ဘုရားသခင်အား နားလည်ခြင်းကို မီအောင်လိုက်သောသူနှင့် မလိုက်သောသူကြားက ကွာခြားချက်နှင့် သက်ဆိုင်သည်။ လူတစ်ယောက်က သူ့ကို နားလည်ခြင်း ရှိသည်နှင့် သူတို့နှလုံးသားသည် ဘုရားသခင်ထံ လုံးဝ လှည့်သွားပြီးဖြစ်သည် ဆိုခြင်းကိုပြ၏။ သူတို့နှလုံးသားထဲ၌ရှိသော ဘုရားသခင်အတွက် သူတို့၏ စစ်မှန်သောချစ်ခြင်းက အလိုအလျောက် ဖြစ်သည်ဆိုခြင်းကို ပြသည်။ ထိုသို့သော လူမျိုးကသာ သူတို့နှလုံးသား၌ ဘုရားသခင်ရှိသောသူ ဖြစ်သည်။ ဘုရားသခင်ထံ မိမိနှလုံးသားကို လှည့်ခြင်းက သူတို့ လမ်းမှန်ပေါ်ကိုရောက်ဖို့အတွက်၊ ဘုရားသခင်ကို နားလည်ဖို့အတွက်၊ ဘုရားသခင်၏ ချစ်ခြင်းကို ရရှိဖို့အတွက် ကြိုတင်သတ်မှတ်ချက်တစ်ခု ဖြစ်သည်။ ထိုအရာမှာ ဘုရားသခင်ကိုချစ်ဖို့ သူတို့၏ တာဝန်ကို ပြီးမြောက်ခြင်း အမှတ်အသားမဟုတ်သကဲ့သို့ သူ့အတွက် စစ်မှန်သော ချစ်ခြင်းရှိသည့် အမှတ်အသားလည်း မဟုတ်ပေ။ လူတစ်ယောက်အတွက် ဘုရားသခင်၏ စစ်မှန်သော ချစ်ခြင်းကို ရရှိရန်မှာ သူ့ထံ သူတို့၏ နှလုံးသားကို လှည့်ဖို့ဖြစ်ပြီး၊ သူ၏ ဖန်ဆင်းခံများထဲမှ တစ်ယောက်က လုပ်ရမည့် ပထမဆုံးသော အရာလည်းဖြစ်သည်။ ဘုရားသခင်ကို ချစ်သောသူများသည် အသက်ကို ရှာဖွေသောသူ အားလုံးဖြစ်သည်၊ ဆိုလိုသည်မှာ သမ္မာတရားကို ရှာဖွေသောသူများနှင့် ဘုရားသခင်ကို အမှန်တကယ် လိုချင်သောသူများ ဖြစ်သည်။ သူတို့အားလုံး၌ သန့်ရှင်းသော ဝိညာဉ်တော်၏ ဉာဏ်အလင်းဖွင့်ပြခြင်းရှိပြီး သူ့အားဖြင့် နှိုးဆော်ခံရပြီး ဖြစ်သည်။ သူတို့အားလုံးသည် ဘုရားသခင်၏ လမ်းညွှန်မှုကို ခံနိုင်ကြသည်။

လူတစ်ယောက်က ဘုရားသခင်အပေါ် သူတို့ကျေးဇူးကြွေးတင်ရှိသည်ဟု ခံစားနိုင်လျှင် သူတို့သည် သန့်ရှင်းသော ဝိညာဉ်တော်၏ နှိုးဆော်ခြင်းကို ခံရပြီးဖြစ်သည့်အတွက်ကြောင့် ဖြစ်၏။ သူတို့သည် ထိုသို့ ခံစားရပါက သူတို့၌ တောင့်တသော နှလုံးသားရှိဖို့ ဖြစ်လာပြီး အသက်တာထဲသို့ ဝင်ရောက်ခြင်းကို မီအောင်လိုက်နိုင်မည် ဖြစ်သည်။ သို့သော် သင်က အဆင့်တစ်နေရာ၌ ရပ်တန့်လိုက်ပါက ပိုပြီး နက်နက်နဲနဲ သွားနိုင်မည် မဟုတ်ချေ။ စာတန်၏ ပိုက်ကွန်ထဲ၌ မိနိုင်သော အန္တရာယ်က ရှိနေသေးပြီး အတိုင်းအတာ တစ်ခုကို ရောက်သည်နှင့် စာတန်၏ ဖမ်းဆီးခြင်းကို သင်ခံရလိမ့်မည်။ ဘုရားသခင်၏ အလင်းပေးခြင်းသည် လူတို့ကို မိမိတို့ကိုယ်မိမိ သိခွင့်ကိုပေးပြီး ထို့နောက်တွင် ဘုရားသခင်အပေါ်တင်သည့် သူတို့၏ကျေးဇူးကြွေးကို ခံစားရစေကာ သူနှင့် ပူးပေါင်းလုပ်ဆောင်ရန် ဆန္ဒရှိခြင်းကို ခံစားရပြီး သူ့ကို စိတ်မကျေနပ်စေသော အရာများကို စွန့်ပစ်ဖို့ အခွင့်ပေးသည်။ ဤသည်မှာ ဘုရားသခင် အမှု၏ နိယာမဖြစ်သည်။ သင်တို့အားလုံးက သင်တို့ အသက်တာထဲ၌ ကြီးထွားလာခြင်းနှင့် ဘုရားသခင်အား ချစ်ခြင်းကို မီအောင်လိုက်လိုကြသည်။ သို့ဆိုလျှင် သင်က မိမိ၏ အပေါ်ယံနည်းလမ်းများမှ သင့်ကိုယ်သင် ဖယ်ရှင်းပစ်ပြီးပြီလော။ ထိုနည်းလမ်းများမှ သင့်ကိုယ်သင်သာ ဖယ်ရှားပြီး မည်သည့်အနှာင့်အယှက်မျှ သင်မဖြစ်စေလျှင် သို့မဟုတ် သင့်ကိုယ်သင် မကြွားဝါလျှင်၊ ဤသည်မှာ သင်၏အသက်တာထဲ ကြီးထွားလာခြင်းကို အမှန်တကယ် မီအောင်လိုက်နေခြင်း ဟုတ်သလော။ အကယ်၍ သင်၌ မည်သို့သော အပေါ်ယံအပြုအမူမျိုးမျှ မရှိသော်လည်း ဘုရားသခင်၏ နှုတ်ကပတ်တော်ထဲသို့ သင်မဝင်ရောက်လျှင် သင်က တက်ကြွသည့် တိုးတက်မှု ဘာမျှမရှိသော သူတစ်ယောက် ဖြစ်သည်ဟု ဆိုလိုသည်။ အပေါ်ယံအပြုအမူများကို ခံယူခြင်း၏ အရင်းအမြစ်က အဘယ်အရာနည်း။ သင်၏ အပြုအမူများက သင့်အသက်တာထဲ၌ ကြီးထွားလာဖို့အတွက်လော။ ဘုရားသခင်၏ လူများထဲမှ တစ်ဦးဖြစ်ဖို့ သင်အရည်အသွေးမီခြင်းအား သင်မီအောင်လိုက်နေသလော။ သင်အာရုံစိုက်သည့်အရာမှာ မည်သည့်အရာပင် ဖြစ်ပါစေ ထိုအရာသည် သင်အသက်ရှင် နေထိုင်သွားရမည့် အရာဖြစ်သည်။ အကယ်၍ သင်က အပေါ်ယံ နည်းလမ်းများအပေါ် အာရုံစိုက်လျှင် သင့်နှလုံးသားက အပြင်ပန်းကိုသာ အာရုံစိုက်၏။ သင့်အသက်တာထဲ၌ ကြီးထွားလာခြင်းကို မီအောင်လိုက်ရန် မည်သည့်နည်းလမ်းမျှ သင်၌ရှိမည်မဟုတ်။ ဘုရားသခင်က စိတ်သဘောထား ပြောင်းလဲမှုကို သတ်မှတ်ပြဋ္ဌာန်းထားသည်။ သို့သော် သင်က အမြဲတမ်း ပြင်ပအရာများကို မီအောင်လိုက်နေသည်။ ဤသို့သောလူမျိုးသည် သူတို့စိတ်သဘောထားကို ပြောင်းလဲဖို့ နည်းလမ်းမရှိချေ။ မိမိတို့ဘဝ မရင့်ကျက်လာခင်တွင် လူတိုင်း၌ ထိုထိုသော နည်းလမ်းတစ်ခုစီ ရှိကြသည်။ ၎င်းတို့မှာ ထိုသူတို့သည် တရားစီရင်ခြင်း၊ ပြစ်တင်ဆုံးမခြင်း၊ ဘုရားသခင်၏ နှုတ်ကပတ်တော်၏ ပြည့်စုံစေခြင်းတို့ကို လက်ခံရမည့်အရာ ဖြစ်သည်။ အကယ်၍ သင်၌ ဘုရားသခင်၏ နှုတ်ကပတ်တော်များမရှိဘဲ သင်ကိုယ်တိုင်၏ ကိုယ့်ကိုယ်ကိုယ် ယုံကြည်မှုနှင့် လိုအင်ကိုသာ အမှီပြုပါက သင်လုပ်သမျှ အရာတိုင်းက စိတ်အား ထက်သန်မှု အပေါ်၌သာ အခြေခံသည်။ ဆိုလိုသည်မှာ သင့်အသက်တာ၌ ကြီးထွားလာခြင်းကို အလိုရှိပါက သင်သည် ဘုရားသခင်၏ နှုတ်ကပတ်တော်များကို သာ၍ စားသောက်ကာ သာ၍နားလည်ရပေမည်။ သူ့နှုတ်ကပတ်တော်တို့၏ ပြည့်စုံခြင်းကို ခံရသော လူအားလုံးသည် ထိုနှုတ်ကပတ်တော်တို့ကို အသက်ရှင် နေထိုင်နိုင်ကြသည်။ သူ့နှုတ်ကပတ်တော်၏ စစ်ဆေးခြင်းကို မကြုံတွေ့သောသူများ၊ သူ့နှုတ်ကပတ်တော်၏ တရားစီရင်မှုကို မကြုံတွေ့သောသူများသည် သူအသုံးပြုဖို့အတွက် မကိုက်ညီနိုင်ပေ။ သို့ဆိုလျှင် သူ၏ နှုတ်ကပတ်တော်အတိုင်း သင်တို့ မည်သည့်အဆင့်အထိ အသက်ရှင်နေထိုင်သနည်း။ သင်တို့က ဘုရားသခင်၏ နှုတ်ကပတ်တော်တို့ကို စားသောက်ပြီး၊ သင်တို့၏ကိုယ်ပိုင် အသက်တာအခြေအနေနှင့် နှုတ်ကပတ်တော်တို့ကို နှိုင်းယှဉ်နိုင်ပြီး၊ ငါပြဆိုသော အကြောင်းအချက်များအရ လက်တွေ့ကျင့်သုံးခြင်း လမ်းကြောင်းကို ရှာတွေ့မှသာ သင်တို့၏ လက်တွေ့ကျင့်သုံးခြင်းက မှန်ကန်လိမ့်မည်။ ထိုအရာသည် ဘုရားသခင်၏ စိတ်နှလုံးနှင့်လည်း ညီညွတ်ပေလိမ့်မည်။ ဤသို့သော လက်တွေ့ကျင့်သုံးမှုမျိုး ရှိသည့်သူသာလျှင် ဘုရားသခင်ကို ချစ်မြတ်နိုးဖို့ စိတ်ဆန္ဒရှိသောသူ ဖြစ်သည်။

ယခင်က:ဘုရားသခင်၏ ယနေ့အမှုကို သိသောသူများသာလျှင် ဘုရားသခင်ကို အစေခံနိုင်သည်

နောက်တစ်ခုသို့:ဆုတောင်းခြင်းအကျင့်နှင့် ပတ်သက်၍

သင်နှစ်သက်နိုင်သည့် အရာများ