အနန္တတန်ခိုးရှင် ဘုရားသခင် အသင်းတော် အကြောင်းအရာ

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

အခန်း ၁၈

ဘုရားသခင်၏နှုတ်ကပတ်တော်အားလုံးတွင် သူ၏စိတ်သဘောထား အစိတ်အပိုင်းတစ်ရပ် ပါဝင်၏၊ သူ၏ စိတ်သဘောထားကို နှုတ်ကပတ်တော်များဖြင့် အပြည့်အစုံဖော်ပြနိုင်ခြင်းမရှိသောကြောင့် ဤသည်မှာ သူ့တွင် ကြွယ်ဝမှု မည်မျှရှိသည်ကို ပြ၏။ လူတို့မြင်နိုင်ကိုင်နိုင်သည်မှာ စင်စစ်အားဖြင့် အကန့်အသတ်ရှိသကဲ့သို့ လူတို့၏စွမ်းရည်သည်လည်း အကန့်အသတ်ရှိ၏။ ဘုရားသခင်၏ နှုတ်ကပတ်တော်တို့သည် ရှင်းသော်လည်း လူတို့သည် အပြည့်အစုံနားလည်နိုင်စွမ်း မရှိပေ။ ဤနှုတ်ကပတ်တော်များကဲ့သို့ပင် “လျှပ်တပြက် လျှပ်စီးလက်ခြင်းအတွင်း တိရစ္ဆာန်တိုင်းသည် ၎င်း၏စစ်မှန်သောအသွင်ဖြင့် ဖော်ထုတ်ခြင်းခံရ၏။ ငါ့အလင်း၏ အလင်းပေးခြင်းကိုခံရသော လူသားတို့သည်လည်း ၎င်းတို့တစ်ချိန်တစ်ခါက ပိုင်ဆိုင်ခဲ့သော မွန်မြတ်သန့်စင်မှုကို ပြန်လည်ရရှိခဲ့ကြပြီးဖြစ်၏။ အို၊ အတိတ်ကာလ၏ ဖောက်ပြန်ပျက်စီးသောလောကသည် အဆုံး၌ ညစ်ပေသောရေအတွင်းသို့ ဇောက်ထိုးကျ၍ မျက်နှာပြင်အောက်သို့ နစ်မြုပ်သွားကာ ရွှံ့အတွင်း ပျော်ဝင်သွားခဲ့ခြင်း” ဖြစ်၏။ ဘုရားသခင်၏နှုတ်ကပတ်တော် အားလုံးသည် သူ၏ဖြစ်တည်ခြင်းတွင် ပါရှိကာ၊ လူတို့အားလုံးသည် ဤနှုတ်ကပတ်တော်တို့ကို သိသော်လည်း ၎င်းတို့၏အဓိပ္ပာယ်များကို မည်သည့်အခါကမျှ သိခဲ့ခြင်းမရှိပေ။ ဘုရားသခင်၏မျက်လုံးများထဲတွင် သူ့ကိုခုခံသူအားလုံးသည် သူ၏ရန်သူဖြစ်၏။ ဆိုလိုသည်မှာ နတ်ဆိုးတို့နှင့် သက်ဆိုင်သူများသည် တိရစ္ဆာန်များဖြစ်၏။ ဤသည်မှ အသင်းတော်၏စစ်မှန်သောအခြေအနေကို တွေ့နိုင်၏။ လူတို့၏ သြဝါဒပေးခြင်း သို့မဟုတ် ပြစ်တင်ဆုံးမခြင်း မခံရဘဲ၊ လူတို့၏တိုက်ရိုက်ထုတ်ပယ်မှု သို့မဟုတ် လူ့နည်းလူ့ဟန်များ အစိတ်အပိုင်းတစ်ရပ် သို့မဟုတ် လူတို့၏ ညွှန်ပြခြင်း မခံရဘဲ၊ လူသားအားလုံးသည် ဘုရားသခင်၏နှုတ်ကပတ်တော်များ၏ အလင်းပေးမှုအောက်တွင် ၎င်းတို့မိမိကိုယ်ကိုယ် စစ်ဆေးကြကာ၊ ၎င်းတို့အတွင်းတွင် အကယ်စင်စစ် “အဏုကြည့်ကိရိယာ” တစ်ခု၏ ရှုထောင့်အရ နာမကျန်းမှုမည်မျှဖြစ်နေသည်ကို အလွန်ရှင်းလင်းစွာ မြင်ကြ၏။ ဘုရားသခင်၏ နှုတ်ကပတ်တော်များတွင် ဝိညာဉ်အမျိုးအစားတိုင်းသည် အုပ်စုခွဲခြားသတ်မှတ်ခံရပြီး ဝိညာဉ်တိုင်း၏ မူရင်းပုံစံသည် ဖော်ထုတ်ခြင်း ခံရ၏။ ကောင်းကင်တမန်တို့၏ ဝိညာဉ်များသည် တိုး၍အလင်းပေးခြင်းခံရ၍ တိုး၍ဉာဏ်အလင်း ရကြသဖြင့် ဘုရားသခင်မှပြောခဲ့သော ၎င်းတို့သည် “၎င်းတို့တစ်ချိန်တစ်ခါက ပိုင်ဆိုင်ခဲ့သော မွန်မြတ်သန့်စင်မှုကို ပြန်လည်ရရှိခဲ့ကြပြီးဖြစ်၏” သည် ဘုရားသခင်မှရရှိသော နောက်ဆုံးရလဒ်များအပေါ်တွင် အခြေခံထားခြင်းဖြစ်၏။ ဤသည်ကို ယခုအပြည့်အဝ အထမြောက်အောင်မြင်နိုင်ခြင်းမရှိသည်မှာ အမှန်တကယ်ဖြစ်၏—ဤသည်မှာ အမြည်းသာဖြစ်၏။ ဤသည်တွင် ဘုရားသခင်၏အလိုဆန္ဒကို ထိုးထွင်းမြင်နိုင်ကာ၊ လူအတော်များများသည် ဘုရားသခင်၏ နှုတ်ကပတ်တော်များတွင် လဲကျ၍ သန့်ရှင်းသူကဲ့သို့ တဖြည်းဖြည်း ဖြစ်လာခြင်း လုပ်ငန်းစဉ်တွင် လူတို့အားလုံး ကျရှုံးလိမ့်မည်ကို ပြ၏။ ဤနေရာတွင် ဖော်ပြထားသည့် “ရွှံ့အတွင်း ပျော်ဝင်သွားခဲ့ခြင်း” သည် ဘုရားသခင်မှ လောကကို မီးဖြင့်ဖျက်ဆီးခြင်းနှင့် ဆန့်ကျင်ခြင်းမရှိဘဲ “လျှပ်ပြက်ခြင်း” သည် ဘုရားသခင်၏ အမျက်ဒေါသကို ရည်ညွှန်း၏။ ဘုရားသခင်သည် သူ၏အမျက်ဒေါသကို ထုတ်လွှတ်သည့်အခါ ရလဒ်အနေဖြင့် လောကတစ်ခုလုံးသည် မီးတောင်ပေါက်ကွဲမှုကဲ့သို့ ကပ်ဘေးအမျိုးမျိုးနှင့် ကြုံတွေ့ရလိမ့်မည်။ မိုးကောင်းကင်အထက် ရပ်နေသည့်အခါ မြေကြီးပေါ်၌ လူသားမျိုးနွယ်အပေါ် ဘေးဒုက္ခအမျိုးမျိုး တစ်နေ့ပြီးတစ်နေ့ ဝိုင်းရံလာနေသည်ကို တွေ့နိုင်၏။ အထက်မှအောက်သို့ကြည့်သည့်အခါ ကမ္ဘာမြေကြီးသည် ငလျင်မလှုပ်မီ မြင်ကွင်းအမျိုးမျိုးကဲ့သို့ဖြစ်၏။ မီးကဲ့သို့သောရေသည် နေရာတိုင်း တဟုန်ထိုးထွက်နေ၏၊ ချော်ရည်သည် နေရာတကာ စီးဆင်းနေ၏၊ တောင်များသည် ရွေ့လျားနေကြကာ အေးသောအလင်းသည် နေရာတိုင်း လင်းလက်နေ၏။ တစ်ကမ္ဘာလုံး မီးအတွင်း နစ်မြုပ်သွားခဲ့ပြီးဖြစ်၏။ ဤသည်မှာ ဘုရားသခင်မှ သူ၏အမျက်ဒေါသထုတ်လွှတ်သည့် မြင်ကွင်းဖြစ်ကာ ဤသည်မှာ သူ၏တရားစီရင်ချက် အချိန်ဖြစ်၏။ ဇာတိပကတိဖြစ်သူအားလုံးသည် လွတ်မြောက်နိုင်ခြင်း ရှိမည်မဟုတ်ပေ။ ထို့ကြောင့် တစ်ကမ္ဘာလုံးကို ဖျက်ဆီးရန် နိုင်ငံများအကြား စစ်မက်များနှင့် လူတို့အကြား ပဋိပက္ခများ လိုအပ်မည် မဟုတ်ဘဲ ကမ္ဘာသည် ဘုရားသခင်၏ ပြစ်တင်ဆုံးမမှု၏ထွေးပိုက်မှုကို “သတိရှိစွာဖြင့် ခံစား” လိမ့်မည်ဖြစ်၏။ မည်သူမျှ ဤသည်မှ လွတ်မြောက်နိုင်ခြင်းရှိမည်မဟုတ်ဘဲ ၎င်းတို့သည် ဤသည်ကို တစ်ခုပြီးတစ်ခု ဖြတ်သန်းသွားကြလိမ့်မည်။ ၎င်းနောက်တွင် စကြဝဠာတစ်ခုလုံးသည် သန့်ရှင်းသောထွန်းလင်းမှုဖြင့် တဖန်ပြန်၍လင်းလက်လာကာ လူသားမျိုးနွယ်တစ်ရပ်လုံးသည် တဖန်ပြန်၍ အသစ်သောအသက်တာကို စတင်လိမ့်မည်။ ထို့နောက် ဘုရားသခင်သည် စကြဝဠာတစ်ခုလုံး၏အထက်တွင် နားနေလျက် လူသားမျိုးနွယ်အားလုံးအား နေ့စဉ် ကောင်းချီးပေးလိမ့်မည်။ ကောင်းကင်သည် မခံမရပ်နိုင်အောင် တိတ်ဆိတ်ခြောက်ကပ်နေမည် မဟုတ်ဘဲ၊ လောကကို ဖန်ဆင်းချိန်ကတည်းက မရှိခဲ့သည့် တက်ကြွမှုကို ပြန်လည်ရရှိလိမ့်မည်ဖြစ်သည်။ ထို့အပြင် “ဆဋ္ဌမမြောက်နေ့” သည် ဘုရားသခင်မှ အသစ်သောအသက်တာကို စတင်သည့်နေ့ဖြစ်သည်။ ဘုရားသခင်နှင့်လူသားတို့အားလုံးသည် နားနေမှုအတွင်း ဝင်ရောက်ကာ စကြဝဠာသည် နောက်ကျိခြင်း သို့မဟုတ် ညစ်ပေခြင်းတို့ မဖြစ်တော့ဘဲ အသစ်တဖန် ပြုပြင်ခြင်းကို ရရှိလိမ့်မည်။ ထို့ကြောင့် ဘုရားသခင်မှ - “ကမ္ဘာမြေကြီးသည် ငြိမ်သက်လျက် တိတ်ဆိတ်နေခြင်း မရှိတော့ပေ။ ကောင်းကင်သည် လူသူကင်းမဲ့လျက် ဝမ်းမနည်းတော့ပေ။” ဟုပြောခြင်းဖြစ်သည်။ ကောင်းကင်နိုင်ငံတော်တွင် မည်သည့်အခါကမျှ ဖြောင့်မတ်မှုမရှိခြင်း သို့မဟုတ် လူ့ခံစားချက်များ သို့မဟုတ် လူသားမျိုးနွယ်၏ ပျက်စီးသောစိတ်သဘောထားများ မရှိခဲ့ဖူးချေ။ အဘယ်ကြောင့်ဆိုသော် စာတန်၏နှောင့်ယှက်ခြင်း မရှိသောကြောင့်ဖြစ်သည်။ လူတို့အားလုံးသည် ဘုရားသခင်၏နှုတ်ကပတ်တော်များကို နားလည်နိုင်ကြကာ ကောင်းကင်ရှိအသက်တာသည် ဝမ်းမြောက်ခြင်းပြည့်ဝသော အသက်တာတစ်ရပ်ဖြစ်၏။ ကောင်းကင်ဘုံတွင်ရှိသော သူအားလုံးတို့တွင် ဘုရားသခင်၏ဉာဏ်အမြော်အမြင်နှင့် ဂုဏ်သိက္ခာတို့ရှိကြ၏။ ကောင်းကင်နှင့်မြေကြီးအကြား ကွဲပြားမှုများကြောင့် ကောင်းကင်နိုင်ငံသားတို့သည် “လူတို့” ဟု ဘုရားသခင်၏ ခေါ်ဆိုခြင်း မခံရဘဲ “ဝိညာဉ်များ” ဟု ခေါ်ဆိုခြင်းခံရ၏။ ဤစကားနှစ်လုံးတွင် အဓိကကွဲပြားချက်များရှိကြကာ၊ ယခုတွင် “လူတို့” ဟု ရည်ညွှန်းခံရသူများ အားလုံးသည် စာတန်၏ဖျက်ဆီးခြင်းကို ခံရပြီးဖြစ်၍၊ “ဝိညာဉ်များ” ဟု ရည်ညွှန်းခံရသောသူများမှာ ဖျက်ဆီးခြင်း မခံခဲ့ရပေ။ အဆုံးတွင် ဘုရားသခင်သည် မြေကြီးပေါ်ရှိလူသားအားလုံးအား ကောင်းကင်ရှိဝိညာဉ်များ၏ ပင်ကို အရည်အချင်းများရှိစေရန် ပြောင်းလဲမည်ဖြစ်၍ ၎င်းတို့သည် စာတန်၏နှောင့်ယှက်ခြင်းကို ခံရတော့မည် မဟုတ်ပေ။ ဤသည်မှာ “ငါ၏ သန့်ရှင်းခြင်းသည် စကြဝဠာတစ်ခွင်လုံး ပြန့်သွားခဲ့ပြီးဖြစ်သည်” ဟူသော နှုတ်ကပတ်တော်တို့၏ စစ်မှန်သော အဓိပ္ပာယ်ဖြစ်၏။ “ကမ္ဘာဦးအနေအထားတွင် ရှိနေသည့် ကမ္ဘာမြေကြီးသည် ကောင်းကင်နှင့် သက်ဆိုင်ကာ၊ ကောင်းကင်သည် ကမ္ဘာမြေကြီးနှင့် ပေါင်းစည်းထား၏။ လူသားသည် ကောင်းကင်နှင့် ကမ္ဘာမြေကြီးကို ပေါင်းစည်းထားသော ကြိုးဖြစ်၍ ၎င်း၏ မွန်မြတ်သန့်စင်မှု ကျေးဇူးကြောင့်၊ ၎င်း၏ အသစ်တဖန် ပြုပြင်မှုကြောင့်၊ ကောင်းကင်သည် ကမ္ဘာမြေကြီးမှ ကွယ်ဝှက်နေခြင်း မရှိတော့ပေ။ ထို့အပြင် ကမ္ဘာမြေကြီးသည် ကောင်းကင်အပေါ် နှုတ်ဆိတ်နေခြင်း မရှိတော့ပေ။” ကောင်းကင်တမန်တို့၏ဝိညာဉ်များရှိသော လူတို့ကို ရည်ညွှန်းသည့်အနေဖြင့် ဤသည်ကို ပြောဆိုခြင်းဖြစ်၍၊ ထိုအချိန်တွင် ကောင်းကင်တမန်တို့သည် တဖန်ပြန်၍ ငြိမ်းချမ်းစွာ အတူနေထိုင်နိုင်ကြပြီး ၎င်းတို့၏မူလအနေအထားကို ပြန်လည်ရရှိကြမည်ဖြစ်ကာ ဇာတိပကတိကြောင့် ကောင်းကင်နှင့် မြေကြီး လောကနှစ်ခုအကြား ကွဲပြားနေတော့မည် မဟုတ်ပေ။ မြေကြီးပေါ်ရှိ ကောင်းကင်တမန်တို့သည် ကောင်းကင်ရှိ ကောင်းကင်တမန်တို့နှင့် ပြောဆိုဆက်သွယ်နိုင်ကြလိမ့်မည်၊ မြေကြီးပေါ်ရှိ လူတို့သည် ကောင်းကင်၏နက်နဲသောအရာများကို သိကြလိမ့်မည်ဖြစ်ကာ ကောင်းကင်ရှိ ကောင်းကင်တမန်တို့သည် လူ့လောက၏လျှို့ဝှက်ချက်များကို သိကြလိမ့်မည်။ ကောင်းကင်နှင့် မြေကြီးတို့သည် ၎င်းတို့အကြား ဝေးကွာမှုမရှိဘဲ ပေါင်းစည်းခြင်းခံရမည်။ ဤသည်မှာ နိုင်ငံတော် အကောင်အထည်ဖော်ခြင်း၏ ကောင်းကွက်ဖြစ်သည်။ ဤသည်မှာ ဘုရားသခင်မှ စုံလင်စေလိုသည့်အရာဖြစ်၍ လူအားလုံးနှင့် ဝိညာဉ်အားလုံး တောင့်တသည့် အရာလည်း ဖြစ်၏။ သို့ရာတွင် ဘာသာရေးလောက၌ရှိသောသူတို့သည် ဤသည်ကို လုံးဝမသိကြပေ။ ထိုသူတို့သည် ကယ်တင်ရှင်ယေရှု ဖြူသောမိုးတိမ်ပေါ်မှ ၎င်းတို့၏ဝိညာဉ်များကို ယူသွား၍ မြေကြီးပေါ်တွင် နေရာတကာ “အမှိုက်သရိုက်” (အမှိုက်သရိုက်ဟူသည် အလောင်းကောင်များကို ရည်ညွှန်းခြင်းဖြစ်၏) ချန်ထားခဲ့ရန်သာ စောင့်မျှော်နေကြ၏။ ဤသည်မှာ လူအားလုံး၏ အယူအဆမဟုတ်သလော။ ထို့ကြောင့် ဘုရားသခင်က “ဘာသာရေး လောက- အဘယ်သို့လျှင် ယင်းသည် ကမ္ဘာမြေကြီးပေါ်ရှိ ငါ၏သြဇာအာဏာအားဖြင့် ဖျက်ဆီးခြင်းကို မခံရဘဲနေနိုင်သနည်း။” ဟု ပြောခြင်းဖြစ်၏။ မြေကြီးပေါ်တွင် ဘုရားသခင်၏လူတို့ စုံလင်ခြင်းကြောင့် ဘာသာရေးလောကသည် မှောက်လှန် ခံရလိမ့်မည်။ ဤသည်မှာ ဘုရားသခင်ပြောသည့် “သြဇာအာဏာ” ၏ စစ်မှန်သောအဓိပ္ပာယ်ဖြစ်၏။ ဘုရားသခင်မှ- “ငါ၏နေ့ရက်၌ ငါ၏နာမကို အရှက်ရစေသူများ ရှိသလော။ လူသားအားလုံးသည် ၎င်းတို့၏ ရိုသေလေးမြတ်သော ငေးစိုက်ကြည့်မှုကို ငါ့ဘက်သို့ဦးတည်ကြ၍ ၎င်းတို့၏နှလုံးသားများတွင် ငါ့ထံသို့ လျှို့ဝှက်စွာ အော်ခေါ်ကြ၏” ဟုပြော၏။ ဤသည်မှာ ဘာသာရေးလောကကို ဖျက်ဆီးခြင်း၏ သက်ရောက်မှုများအကြောင်း သူပြောဆိုခြင်း ဖြစ်သည်။ ဘာသာရေး လောကအားလုံးသည် ဘုရားသခင်၏နှုတ်ကပတ်တော်များကြောင့် သူ၏ပလ္လင်တော်ရှေ့တွင် နာခံကြလျက် ဖြူသောမိုးတိမ် ဆင်းသက်လာရန် စောင့်နေခြင်း သို့မဟုတ် မိုးကောင်းကင်ကိုကြည့်နေခြင်း ပြုတော့မည် မဟုတ်ဘဲ ဘုရားသခင်၏ ပလ္လင်တော်ရှေ့တွင် သိမ်းပိုက်ခြင်းခံရလိမ့်မည်။ ထို့ကြောင့်“၎င်းတို့၏နှလုံးသားများတွင် ငါ့ထံသို့ လျှို့ဝှက်စွာ အော်ခေါ်ကြ၏” —ဤသည်မှာ ဘုရားသခင်၏ သိမ်းပိုက်ခြင်းကိုခံရမည့် ဘာသာရေးလောက အားလုံး၏ ရလဒ်ဖြစ်ကာ၊ ဤသည်ကိုသာလျှင် ဘုရားသခင်၏အနန္တတန်ခိုးဟု ခေါ်ဆိုခြင်းခံရ၏— လူသားမျိုးနွယ်၏ ပုန်ကန်သည့်သဘော အရှိဆုံး ဘာသာရေးကိုင်းရှိုင်းသူများအား ၎င်းတို့၏ကိုယ်ပိုင် အယူအဆများကို မည်သည့်အခါမျှ နောက်တဖန် စွဲကိုင်ခြင်း မပြုဘဲ ဘုရားသခင်ကို သိစေရန်၊ ဘုရားသခင်၏အနန္တတန်ခိုးသည် ၎င်းတို့ကို ဒဏ်ခတ်၏။

ဘုရားသခင်၏နှုတ်ကပတ်တော်များသည် နိုင်ငံတော်၏လှပမှုအကြောင်း ကြိမ်ဖန်များစွာ ကြိုတင် ပြောကြားခဲ့သော်လည်း၊ ၎င်း၏ လက္ခဏာအမျိုးမျိုးအကြောင်း ပြောကြားခဲ့၍ ရှုထောင့် အမျိုးမျိုးမှ ဖော်ပြခဲ့သော်လည်း ထိုသူတို့သည် နိုင်ငံတော်ခေတ်၏ အခြေအနေတိုင်းကို စုံလင်စွာ ဖော်ပြနိုင်ခြင်း မရှိသေးပေ။ အဘယ်ကြောင့်ဆိုသော် လူတို့၏လက်ခံနိုင်မှုစွမ်းရည်မှာ နည်းပါးလွန်း၍ဖြစ်သည်။ သူ၏မိန့်မြွက်ချက်အားလုံး၏ နှုတ်ကပတ်တော်များကို ပြောဆိုခဲ့ပြီး ဖြစ်သော်လည်း လူတို့သည် ၎င်းတို့ကို မှန်ဘီလူးမှတဆင့် မကြည့်ရသေးပေ။ ဤသည်ကြောင့် လူတို့သည် မရှင်းလင်းသေးခြင်းနှင့် နားမလည်သေးခြင်းများ ဖြစ်နေသေးကာ၊ မရေရာခြင်းနှင့် ဇဝေဇဝါဖြစ်ခြင်းများပင် ဖြစ်နေကြ၏။ ဤသည်မှာ ဇာတိပကတိ၏ အကြီးမားဆုံးသော ချို့ယွင်းချက်ဖြစ်၏။ လူတို့သည် ၎င်းတို့၏ နှလုံးသားများတွင် ဘုရားသခင်ကို ချစ်လိုသော်လည်း စာတန်၏နှောင့်ယှက်မှုကြောင့် ၎င်းတို့သည် သူ့အား ခုခံကြ၏။ ထို့ကြောင့် ဘုရားသခင်သည် လူသားတို့ ပြန်လည်ရှင်သန်လာနိုင်ရန် ၎င်းတို့၏ ထုံ၍နုံအသော နှလုံးသားများကို အကြိမ်ကြိမ် တို့ထိခဲ့ခြင်းဖြစ်၏။ ဘုရားသခင်မှ ဖော်ထုတ်သောအရာအားလုံးမှာ စာတန်၏ အကျည်းတန်မှုဖြစ်၏။ ထို့ကြောင့် သူ၏နှုတ်ကပတ်တော်များ ကြမ်းလေလေ၊ စာတန် အရှက်ရလေလေဖြစ်ကာ၊ လူတို့၏နှလုံးသားများ ချည်နှောင်ထားခြင်းမရှိမှုကို ခံနိုင်စွမ်းရှိလေလေ၊ လူတို့၏ချစ်ခြင်းမေတ္တာကို နှိုးဆွနိုင်လေလေ ဖြစ်၏။ ဤသည်မှာ ဘုရားသခင်၏ လုပ်ဆောင်ပုံဖြစ်၏။ စာတန်သည် ထုတ်ဖော်ခြင်းခံရခဲ့၍ ၎င်းကို ထိုးထွင်းမြင်ခဲ့ခြင်း ခံရခဲ့သဖြင့် ၎င်းသည် လူတို့၏နှလုံးသားများတွင် နေရာမယူဝံ့တော့သည့်အတွက် ကောင်းကင်တမန်တို့သည် နှောင့်ယှက်ခြင်း မခံရတော့ပေ။ ဤနည်းအားဖြင့် ၎င်းတို့သည် ဘုရားသခင်အား ၎င်းတို့၏ စိတ်နှလုံးအကြွင်းမဲ့ ချစ်ကြခြင်းဖြစ်၏။ ၎င်းတို့၏စစ်မှန်သော အရည်အသွေးများသည် ဘုရားသခင်နှင့်သက်ဆိုင်၍ ဘုရားသခင်ကို ချစ်ခြင်းနှင့် သက်ဆိုင်ကြောင်းကို ထိုအခါမှသာ ၎င်းတို့ပြကြ၏။ ဤလမ်းကြောင်းအားဖြင့်သာ ၎င်းတို့သည် ဘုရားသခင်၏ အလိုဆန္ဒကို ရယူနိုင်၏။ “၎င်းတို့၏နှလုံးသားများအတွင်း၌ ငါ့အတွက် တစ်နေရာ ထူထောင်ထားပြီး ဖြစ်သည်။ လူသားတို့အကြား ငါသည် မနှစ်မြို့ခြင်း သို့မဟုတ် စွန့်လွှတ်ခြင်းနှင့် ရင်ဆိုင်ရတော့မည် မဟုတ်ချေ။ အဘယ်ကြောင့်ဆိုသော် ငါ၏ကြီးမြတ်သောအမှု အထမြောက်ခဲ့ပြီးဖြစ်၍ နှောင့်ယှက်ခံရတော့မည် မဟုတ်သောကြောင့်ဖြစ်သည်။” ဤသည်မှာ အထက်ဖော်ပြပါအချက်၏ ဂယက်အနက်ဖြစ်သည်။ စာတန်၏ နှောင့်ယှက်မှုကြောင့် လူတို့သည် ဘုရားသခင်အား ချစ်ရန်အချိန် ရှာမရကြပေ၊ ၎င်းတို့သည် လောက၏အရာများနှင့် အစဉ် ရစ်ပတ်နေလျက်၊ ၎င်းတို့သည် စိတ်ရှုပ်ထွေးမှုအရ လုပ်ကိုင်နေရန် စာတန်၏ လှည့်ဖြားခြင်းကို ခံရ၏။ ထိုကြောင့် လူသားမျိုးနွယ်သည် “ဘဝ၏အခက်အခဲများစွာ၊ လောက၏မတရားမှုများစွာ၊ လောက၏ အတက်အကျ များစွာတို့နှင့် ကြုံခဲ့ရသော်လည်း ၎င်းတို့သည် ယခု ငါ၏အလင်း၌ နေထိုင်ကြ၏။ မနေ့က မတရားမှုများအပေါ် မငိုသူ မည်သူရှိသနည်း” ဟု ဘုရားသခင်ဆိုခဲ့ခြင်းဖြစ်၏။ ဤနှုတ်ကပတ်တော်တို့ကို လူတို့ကြားပြီးသောအခါ၊ ဘုရားသခင်သည် ၎င်းတို့၏ ဒုက္ခခံဖော် ဒုက္ခခံဖက်အလား၊ ၎င်းတို့နှင့် စာနာစကားပြောနေသည့်အလားနှင့် ထိုအချိန်တွင် သူ၏ဒုက္ခများကို လူသားနှင့် အိတ်သွန်ဖာမှောက်ပြောနေသည့်အလား ၎င်းတို့ခံစားရ၏။ ၎င်းတို့သည် လူ့လောက၏နာကျင်မှုကို ရုတ်တရက်ခံစားရကာ- “ဤသည်မှာ မမှန်ပေဘူးလော—ငါသည် မည်သည့်အခါကမျှ လောကရှိ မည်သည့် အရာအပေါ်မျှ မွေ့လျော်ခဲ့ဖူးခြင်း မရှိပေ။ ငါ့မိခင်၏ သားအိမ်မှ ထွက်လာစဉ်ကတည်းက ယခုအထိ ငါသည် လူ့ဘဝကို တွေ့ကြုံခံစားခဲ့ပြီး ငါသည် မည်သည့်အရာကိုမျှ ရရှိခဲ့ခြင်းမရှိသော်လည်း ကြီးမားစွာ ဒုက္ခခံခဲ့ရ၏။ ဤသည်မှာ အကယ်စင်စစ်ပင် အနှစ်သာရကင်းမဲ့၏။ ထို့နောက် ယခုတွင် ငါသည် စာတန်၏ဖျက်ဆီးခြင်းကို လွန်စွာခံရ၏။ အို။ ဘုရားသခင်၏ ကယ်တင်ခြင်းကြောင့်သာမဟုတ်လျှင်၊ ငါသေဆုံးသည့်အချိန် ရောက်သည့်အခါ ငါသည် ဘဝတစ်သက်တာလုံး အချည်းနှီးနေထိုင်ခဲ့ခြင်းဖြစ်လိမ့်မည် မဟုတ်သလော။ လူ့ဘဝတွင် အဓိပ္ပာယ် တစ်စုံတစ်ရာ ရှိသလော။ နေအောက်အရာခပ်သိမ်းသည် အနှစ်သာရကင်းမဲ့၏ဟု ဘုရားသခင်ပြောသည်မှာ အံ့သြဖွယ်မဟုတ်ပေ။ ဘုရားသခင်သည် ငါ့ကို ယနေ့ဉာဏ်အလင်းမပေးလျှင် ငါသည် အမှောင်ထဲတွင် ရှိနေဦးမည်ဖြစ်သည်။ လွန်စွာ သနားဖွယ်ကောင်းလေခြင်း” ဟု စဉ်းစားကြ၏။ ဤသည်ကို ၎င်းတို့စဉ်းစားသည့်အခါ ၎င်းတို့၏နှလုံးသားတွင်- “ငါသည် ဘုရားသခင်၏ကတိကို မရနိုင်လျှင် အသက်တာကို မည်သို့ဆက်လက် ခံစားနိုင်မည်နည်း” ဟူသော စဉ်းစားဆင်ခြင်မှု အချို့ရှိကြ၏။ ဤနှုတ်ကပတ်တော်တို့ကို ဖတ်သူအားလုံးသည် ၎င်းတို့၏ဆုတောင်းချက်တွင် ကောင်းမွန်စွာ ငိုကြွေးကြလိမ့်မည်။ ဤသည်မှာ လူ့စိတ်ပင်ဖြစ်၏။ တစ်စုံတစ်ဦးသည် ဤသည်ကိုဖတ်၍ မည်သည့်တုံ့ပြန်ချက်မျှ မရှိဘဲနေနိုင်၏ဟု သင်ပြောလျှင်၊ ၎င်းတို့တွင် စိတ်ရောဂါတစ်ရပ် မရှိပါက ဤသည်မှာ လုံးဝမဖြစ်နိုင်ပေ။ ဘုရားသခင်သည် လူအမျိုးမျိုး၏ အနေအထားများကို နေ့စဉ်ဖော်ထုတ်၏။ တစ်ခါတစ်ရံ သူသည် ၎င်းတို့ကိုယ်စား မကျေနပ်မှုများကို ရင်ဖွင့်၏။ တစ်ခါတစ်ရံ သူသည် လူတို့ အချို့သောပတ်ဝန်းကျင်ကို ကျော်လွှား၍ ဖြတ်သန်းရန် ကူညီ၏။ တစ်ခါတစ်ရံ သူသည် လူတို့အတွက် ၎င်းတို့၏ ပြောင်းလဲမှုများကို ထောက်ပြ၏။ သို့မဟုတ်ပါက လူတို့သည် ၎င်းတို့၏ဘဝများ မည်မျှ ကြီးမားသည်ကို သိမည်မဟုတ်ပေ။ တစ်ခါတစ်ရံ ဘုရားသခင်သည် အမှန်တရားရှိလူတို့၏အတွေ့အကြုံများကို ထောက်ပြကာ၊ တစ်ခါတစ်ရံ သူသည် ၎င်းတို့၏ အားနည်းချက်များနှင့် အပြစ်အနာအဆာများကို ထောက်ပြ၏။ တစ်ခါတစ်ရံ သူသည် ၎င်းတို့အပေါ် သတ်မှတ်ချက် အသစ်များ ပြုလုပ်ကာ၊ တစ်ခါတစ်ရံ သူသည် ၎င်းတို့သူ့အပေါ်နားလည်ခြင်း၏အတိုင်းအတာကို ထောက်ပြ၏။ သို့ရာတွင် ဘုရားသခင်သည်- “များစွာသောလူတို့၏ နှလုံးသားမှ ပြောဆိုသော စကားများ၊ များစွာသောလူတို့ ပြောပြသည့် ဒုက္ခခံရမှုအကြားရှိ နာကျင်ဖွယ်ရာ အတွေ့အကြုံများအကြောင်း အဖြစ်အပျက်များကို ငါကြားခဲ့ပြီးဖြစ်သည်။ အဆိုးရွားဆုံး အခြေအနေများတွင် များစွာတို့သည် ငါ့အပေါ် ၎င်းတို့၏သစ္စာကို မပျက်မကွက် ဆက်ကပ်သည်ကို ငါတွေ့ခဲ့ဖူးပြီး၊ များစွာတို့သည် ခက်ခဲသော လမ်းကြောင်းတွင် လျှောက်လှမ်းရင်း ထွက်ပေါက်ရှာရန် ရုန်းကန်သည်ကိုလည်း ငါကြည့်ခဲ့ဖူးပြီး ဖြစ်သည်” ဟုလည်း ပြောခဲ့၏။ ဤသည်မှာ အပြုသဘောဆောင်သော ဇာတ်ကောင်တို့၏ ဖော်ပြချက်ဖြစ်၏။ “သမိုင်းအခြေခံ ပြဇာတ်” ၏ အခန်းတစ်ခုစီတွင် အပြုသဘောဆောင်သော ဇာတ်ကောင်များရော အဖျက်သဘောဆောင်သော ဇာတ်ကောင်များပါ ရှိခဲ့သဖြင့် ဤနောက်ပိုင်းတွင် အဖျက်သဘောဆောင်သော ဇာတ်ကောင်တို့၏ အကျည်းတန်မှုကိုလည်း ဘုရားသခင် ဖော်ထုတ်၏။ ဤနည်းအားဖြင့် “သစ္စာဖောက်များ” ၏ ကွဲပြားခြားနားမှုအားဖြင့်သာ “ဖြောင့်မတ်သောလူများ” ၏ အလျှော့မပေးသော သစ္စာရှိမှုနှင့် ကြောက်ရွံ့ခြင်းကင်းသော သတ္တိတို့သည် ဖော်ထုတ်ခြင်း ခံရ၏။ လူတို့အားလုံး၏အသက်တာများတွင် အဖျက်သဘောဆောင်သော အချက်များ ရှိကာ၊ အပြုသဘောဆောင်သော အချက်များသည်လည်း ခြွင်းချက်မရှိ ရှိကြ၏။ သစ္စာဖောက်များသည် ၎င်းတို့၏ ဦးခေါင်းများ ငုံ့လျက် ၎င်းတို့၏အပြစ်များကို ဝန်ခံစေရန်နှင့် ဖြောင့်မတ်သော လူများသည် အားပေးမှုအောက်တွင် ဆက်လက်၍သစ္စာရှိစေရန်၊ ဘုရားသခင်သည် လူတို့အားလုံးအကြောင်း သမ္မာတရားကို ၎င်းရှုထောင့်နှစ်မျိုးမှ ဖော်ထုတ်၏။ ဘုရားသခင်၏ နှုတ်ကပတ်တော်များ၏ သွယ်ဝိုက်သော အဓိပ္ပာယ်သည် လွန်စွာနက်ရှိုင်း၏။ ရံဖန်ရံခါ လူတို့သည် ၎င်းတို့ကိုဖတ်ပြီးနောက် ကိုယ်ကိုကိုင်း၍ ရယ်မောကြကာ၊ ရံဖန်ရံခါ တိတ်ဆိတ်စွာဖြင့် ဦးခေါင်း ငိုက်စိုက်ချကြ၏။ ရံဖန်ရံခါ ၎င်းတို့သည် ပြန်လည်တွေးတောကြ၍၊ ရံဖန်ရံခါ ၎င်းတို့သည် ခါးသီးစွာငိုကြွေးကာ ၎င်းတို့၏အပြစ်များကို ဝန်ခံကြ၏၊ ရံဖန်ရံခါ ၎င်းတို့သည် စမ်းတဝါးဝါး လုပ်ကာ၊ ရံဖန်ရံခါ ၎င်းတို့သည် ရှာဖွေကြ၏။ ခြုံငုံကြည့်လျှင် ဘုရားသခင်၏နှုတ်ကပတ်တော်များနှင့် ကွဲပြားသော နောက်ခံများကြောင့် လူတို့၏တုံ့ပြန်မှုများတွင် ပြောင်းလဲမှုများရှိကြ၏။ လူတစ်ဦးသည် ဘုရားသခင်၏ နှုတ်ကပတ်တော်ကို ဖတ်သည့်အခါ၊ တစ်ခါတစ်ရံတွင် ဘေးမှရပ်ကြည့်သူများက ထိုသူသည် စိတ်ရောဂါဝေဒနာရှင်ဟုပင် မှားယွင်းစွာ ထင်မြင်ယူဆနိုင်ကြ၏။ သင်သည် “ထို့ကြောင့် အငြင်းပွားဖွယ်ရာ ငြင်းခုံမှုများ မဖြစ်တော့သည့်အပြင်၊ ငါမှထုတ်ပြန်သော နှုတ်ကပတ်တော်တို့ကို လိုက်နာလျက် ခေတ်သစ်၏ အမျိုးမျိုးသော “လက်နက်များ” သည်လည်း ရုပ်သိမ်းခြင်း ခံရ၏” ကိုလည်း ကြည့်နိုင်၏။ “လက်နက်များ” ဟူသော စကားသည် တစ်နေ့တာလုံးအတွက် သင့်အတွက် ဟာသတစ်ခု ဖြစ်လောက်၏။ ထို့အပြင် လူတို့သည် သတိမမူမိဘဲ “လက်နက်များ” အကြောင်း စဉ်းစားမိသောအခါ ၎င်းတို့သည် တိတ်တခိုး ရယ်မောကြလိမ့်မည်။ ဟုတ်သည် မဟုတ်လော။ ဤသည်ကြောင့် သင်မရယ်မောခြင်းများ ဖြစ်နိုင်သလော။

သင်ရယ်မောသည့်အခါ လူသားအပေါ် ဘုရားသခင်၏ သတ်မှတ်ချက်များကို နားလည်ရန် မမေ့လေနှင့်။ ထို့အပြင် အသင်းတော်၏ စစ်မှန်သောအခြေအနေများကို မြင်ရန်လည်း မမေ့လေနှင့်- “လူသားမျိုးနွယ် အားလုံးသည် ပုံမှန်အနေအထားသို့ ပြန်ရောက်ကာ အသစ်သော အသက်တာတစ်ရပ် စတင်ခဲ့ပြီဖြစ်သည်။ ပတ်ဝန်းကျင် အသစ်များတွင် တည်ရှိရင်း၊ လောက အသစ်စက်စက်အတွင်း ဝင်ရောက်ခဲ့သည့်အလား ခံစားကြလျက်၊ လူဦးရေ အများအပြားသည် ၎င်းတို့အနီးအနားကို ကြည့်ကြ၏။ ထို့အပြင် ဤသည်အတွက်ကြောင့် ၎င်းတို့သည် ၎င်းတို့၏လက်ရှိ ပတ်ဝန်းကျင်နှင့် လိုက်လျောညီထွေရှိရန် ချက်ချင်း မပြောင်းလဲနိုင်ပေ၊ သို့မဟုတ် လမ်းကြောင်းမှန်ပေါ်သို့ ချက်ချင်း မရောက်နိုင်ပေ။” ဤသည်တို့မှာ အသင်းတော်၏ လက်ရှိအမှန်တကယ် အခြေအနေများဖြစ်ကြ၏။ လူတို့အားလုံးအား လမ်းကြောင်းမှန်အတွင်း ချက်ချင်းဝင်ရောက်စေရန် စိုးရိမ်မှုလွန်ကဲခြင်းမရှိနှင့်။ သန့်ရှင်းသောဝိညာဉ်တော်၏ အမှုသည် အချို့သောအဆင့်သို့ တိုးတက်ပြီးသည်နှင့် လူတို့အားလုံးသည် သတိမူမိခြင်းမရှိဘဲ ၎င်းအတွင်းသို့ ဝင်ရောက်ကြလိမ့်မည်။ ဘုရားသခင်၏နှုတ်ကပတ်တော်တို့၏ အနှစ်သာရကို သင်နားလည်သည့်အခါ သူ၏ဝိညာဉ်သည် မည်သည့်အဆင့်ကို လုပ်ဆောင်ခဲ့ပြီးကြောင်း သင်သိလိမ့်မည်။ ဘုရားသခင်၏ အလိုဆန္ဒမှာ- “လူတိုင်း လမ်းကြောင်းမှန်ပေါ်သို့ ရောက်စေရေးအတွက် ပိုမိုကောင်းမွန်စွာ ထောက်ကူပေးရန် သင့်တော်သည့် ‘ပညာပေး’ လုပ်ဆောင်ချက်တစ်ရပ်ဖြစ်သည့် တရားစီရင်ခြင်းကိုသာ သူ၏ ဖြောင့်မတ်ခြင်းမရှိသော လုပ်ဆောင်ချက်များအပေါ် မူတည်၍ ငါ ပြုလုပ်” ရန်ဖြစ်၏။ ဤသည်မှာ ဘုရားသခင်၏ ပြောဆိုခြင်းနှင့် လုပ်ကိုင်ခြင်း နည်းနာဖြစ်ကာ၊ လူသားမျိုးနွယ်၏ လက်တွေ့ကျင့်သုံးသော တိကျသည့်လမ်းကြောင်းလည်းဖြစ်၏။ ဤနောက်ပိုင်းတွင် လူတို့အတွက် လူသားမျိုးနွယ်၏အနေအထားနောက်တစ်ခုကို သူညွှန်ပြ၏- “ငါ၌ရှိသော ပီတိကို ခံစားရန် လူသားတို့ လိုလိုလားလား မရှိပါက၊ ငါသည် ၎င်းတို့၏အလိုဆန္ဒများကို လိုက်လျောလျက် ၎င်းတို့အား အနက်ဆုံးတွင်းထဲသို့ ပို့ရုံသာရှိ၏။” ဘုရားသခင်သည် အပြည့်အဝပြောဆိုခဲ့ကာ လူတို့ညည်းညူရန် အခွင့်အရေး တစ်စိုးတစ်စဉ်မျှပင် မပေးဘဲထားခဲ့၏။ ဤသည်မှာ ဘုရားသခင်နှင့် လူသားအကြား ကွဲပြားမှုအတိအကျဖြစ်၏။ ဘုရားသခင်သည် လူသားအား အစဉ်ပွင့်လင်းစွာနှင့် လွတ်လပ်စွာ ပြောဆို၏။ ဘုရားသခင်သည် လူတို့အား သူ့နေရာတွင် နေစေခဲ့ကာ၊ ဘုရားသခင်မှ သက်တံ၏ မည်သည့်အရောင်မှန်းသိရန် “၎င်းတို့၏ခံစားချက်ကို ပွင့်လင်းစွာဖော်ပြ” နိုင်စေခဲ့ပြီးနောက်၊ သူ၏ရိုးသားမှန်ကန်မှုကို သူ၏နှုတ်ကပတ်တော်တစ်ခုစီတွင် တွေ့နိုင်၏။ ဘုရားသခင်သည် မည်သူ တစ်ဦးတစ်ယောက်၏ ယုံကြည်ခြင်း သို့မဟုတ် ချစ်ခြင်းကို မည်သည့်အခါကမျှ ချီးကျူးခဲ့ခြင်း မရှိသော်လည်း သူသည် လူတို့အပေါ် သတ်မှတ်ချက်များ အစဉ်ပြုလုပ်ကာ ၎င်းတို့၏အကျည်းတန်မှုကို ထုတ်ဖော်ခဲ့၏။ လူတို့၏ “ဝိညာဉ်အသက်တာ” မည်မျှသေးငယ်ကြောင်းနှင့် ၎င်းတို့၏ “ကြံ့ခိုင်မှု” မည်မျှချို့တဲ့နေကြောင်းကို ဤသည်ကပြ၏။ ၎င်းအတွကဖြည့်ဆည်းရန် ၎င်းတို့သည် “ကိုယ်လက်လေ့ကျင့်ခန်း” သာ၍လုပ်ရန်လို၏။ ထို့ကြောင့် ဘုရားသခင်သည် လူတို့အပေါ် အစဉ်ဒေါသထွက်နေခြင်းဖြစ်သည်။ လူသားမျိုးနွယ်အကြောင်း သမ္မာတရားတစ်ရပ်လုံးကို ဘုရားသခင်မှ ထုတ်ဖော်ပြီးသည့်တစ်နေ့တွင် လူတို့သည် စုံလင်ခြင်းခံရမည်ဖြစ်ကာ၊ ဘုရားသခင်သည် အေးငြိမ်းသက်သာလိမ့်မည်။ လူတို့သည် ဘုရားသခင်အား လှည့်ဖြားတော့မည် မဟုတ်ဘဲ၊ သူသည် ၎င်းတို့အား “ပညာပေး” တော့မည် မဟုတ်ပေ။ ထိုအချိန်မှစ၍ လူတို့သည် “၎င်းတို့ဘာသာ” နေနိုင်လိမ့်မည်ဖြစ်သော်လည်း ဤသည်မှာ အချိန်မကျသေးပေ။ လူတို့တွင် “အတုအပ” များစွာရှိသေးသဖြင့် ၎င်းတို့သည် အကြိမ်ရေအချို့ စမ်းသပ်စစ်ဆေးမှု ခံယူရန် ရှိပြီး၊ စစ်ဆေးရေး စခန်းများ တစ်ခုစီတွင် လူသားမျိုးနွယ်၏ “အခွန်များ” ပေးနိုင်ရေးအတွက် ပိုမိုများပြားသော “စစ်ဆေးရေး စခန်းများ” သတ်မှတ်ရန် လိုသေး၏။ ကုန်ပစ္စည်းအတုအပများ ရှိနေသေးပါက ၎င်းတို့ကို သိမ်းယူမည်ဖြစ်၍ ရောင်းချခြင်း မပြုနိုင်တော့ဘဲ ခိုးသွင်းလာသော ထိုကုန်ပစ္စည်း တစ်သုတ်ကို ဖျက်ဆီးလိုက်မည်ဖြစ်သည်။ ဤသည်မှာ ပြုလုပ်ဖွယ်ကောင်းသော အရာတစ်ခု မဟုတ်သလော။

ယခင်က:ဆယ့်ခုနှစ်ကြိမ်မြောက် မိန့်မြွက်ချက်၏ အနက်ဖွင့်

နောက်တစ်ခုသို့:အခန်း ၁၉

သင်နှစ်သက်နိုင်သည့် အရာများ