ဘင်ချီ၊ တရုတ်ပြည်

၂၀၂၂ ခုနှစ်တုန်းက အစွမ်းအစတော်တော်လေးကောင်းတဲ့ ယုံကြည်သူအသစ်တချို့ကို ရေလောင်းဖို့ အသင်းတော်ခေါင်းဆောင်က ကျွန်မအတွက် စီစဉ်ပေးခဲ့တယ်။ စိတ်ထဲမှာ တော်တော်လေး ကျေနပ်သွားတာပေါ့။ တခြားရေလောင်းသူတွေအားလုံးထဲကနေ ကျွန်မကို ဒီတာဝန်အတွက် ရွေးလိုက်တာဟာ ခေါင်းဆောင်တွေက ကျွန်မကို အထင်ကြီးလေးစားတယ်လို့ ခံစားရပြီး ဒါဟာ ကျွန်မ အလုပ် တော်တော်ကောင်းကောင်း လုပ်နေတယ်ဆိုတဲ့ အဓိပ္ပာယ်ပဲဖြစ်ရမယ်လို့ ခံစားခဲ့တာပေါ့။ နှစ်လကြာပြီးနောက်မှာ၊ ချန်ဒန်လို့ခေါ်တဲ့ ညီအစ်မအသစ်တစ်ယောက် ကျွန်မတို့အဖွဲ့ထဲကို ဝင်လာတယ်။ သူ့ရဲ့အစွမ်းအစက တော်တော်ကောင်းတယ်၊ သဘောပေါက်နားလည်နိုင်စွမ်းရှိတယ်၊ တိုးတက်မှုကလည်း မြန်တယ်။ ယုံကြည်သူအသစ်တွေကို ရေလောင်းတဲ့အခါ၊ သူက သမ္မာတရားတွေကို တော်တော်လေး ရှင်းရှင်းလင်းလင်းနဲ့ ပြည့်ပြည့်စုံစုံ မိတ်သဟာယပြုတယ်၊ ပြီးတော့ သူ့မှာ ဘာသာစကားသုံးပြီး ကိုယ့်ခံစားချက်ကို ထိထိမိမိပြောပြနိုင်စွမ်းလည်းရှိတယ်၊ ရှင်းလင်းပြီးတော့ အဆီအငေါ်တည့်အောင် မိတ်သဟာယပြုနိုင်တယ်။ ကျွန်မ ချက်ချင်းပဲ စိုးရိမ်စိတ်ဝင်လာပြီး စဉ်းစားမိတယ်၊ “ချန်ဒန်က အစွမ်းအစလည်းကောင်း၊ တိုးတက်မှုကလည်းမြန်လိုက်တာ။ ဒီအတိုင်းသာ ဆက်သွားရင် သူ ငါ့ကို ကျော်တက်သွားမှာ မဟုတ်ဘူးလား။ သူသာ ကျော်တက်သွားရင် ငါက သူ့လောက်မတော်ဘူးဆိုတဲ့ အဓိပ္ပာယ်ဖြစ်သွားမှာပေါ့၊ အဲဒီအခါကျရင် ငါ့မှာ ဘာဂုဏ်သိက္ခာ ကျန်တော့မှာလဲ” လို့ပေါ့။ ဒီလိုစိတ်နဲ့ ကျွန်မက သမ္မာတရားတွေနဲ့ ကိုယ့်ကိုယ်ကိုယ် ကြိုးစားပြီး ပြင်ဆင်ဖို့၊ ကိုယ့်ခံစားချက်ကို ထိထိမိမိပြောပြနိုင်စွမ်းကို တိုးတက်အောင်လုပ်ဖို့ ကျွန်မ တိတ်တဆိတ် စိတ်ပိုင်းဖြတ်လိုက်တယ်။ ဘာပဲဖြစ်ဖြစ် သူ့ကို ကျွန်မထက် သာခွင့်မပေးဖို့ စိတ်ပိုင်းဖြတ်ချက်ချလိုက်တယ်။ ဒါပေမဲ့ ကျွန်မ ဘယ်လောက်ပဲ ပြင်းပြင်းထန်ထန် ကြိုးစားကြိုးစား၊ တိုးတက်မှုက နည်းပါးခဲ့တယ်။ ပြဿနာတွေကို ဖြေရှင်းတဲ့အခါမှာ ကျွန်မ ကိုယ့်ခံစားချက်ကို ထိထိမိမိပြောပြချင်လေလေ၊ ပိုပြီးတော့ ဗလုံးဗထွေး ဖြစ်လာလေလေပဲ၊ ကျွန်မ နဂိုရှိပြီးသားဖြစ်တဲ့ ကိုယ့်ခံစားချက်ကို ထိထိမိမိပြောပြနိုင်စွမ်းကိုတောင် အသုံးမချနိုင်တော့ဘူး။ ချန်ဒန်က ပြဿနာတွေကို ဖြေရှင်းဖို့ သမ္မာတရားတွေပေါ်မှာ မိတ်သဟာယပြုနိုင်တာကိုမြင်တော့ ကျွန်မကို တော်တော်လေး စိတ်ဓာတ်ကျသွားစေတယ်။ ခဏကြာတော့ အစ်မချန်ဒန်က အဖွဲ့ခေါင်းဆောင်အဖြစ် ရွေးချယ်ခံခဲ့ရတယ်။ ကျွန်မမှာ မနာလိုစိတ်တွေနဲ့ ပြည့်သွားပြီး ကိုယ့်မာနတွေ လုံးလုံးလျားလျား ပျက်စီးသွားသလို ခံစားခဲ့ရတယ်။ သူ့ကို ကျွန်မအူထဲအသည်းထဲကနေကို ကြည့်မရတာ၊ ကျွန်မကို အဲဒီလောက် အနေရခက်တာ သူရှိနေလို့ပဲလို့ ခံစားမိပြီး အဲဒီနောက်မှာ ကျွန်မ နေ့တိုင်း စိတ်မချမ်းမသာဖြစ်ပြီး၊ ကိုယ့်တာဝန်မှာ စိတ်အားထက်သန်မှုမရှိတော့ဘူး၊ သူ့လို အစွမ်းအစကောင်းတွေ မပေးတဲ့အတွက် ဘုရားသခင်ကိုတောင် မကျေမနပ်ပြောခဲ့တယ်။ တစ်ခါတလေ ချန်ဒန်က ကျွန်မအတွက် အလုပ်တချို့ စီစဉ်ပေးတဲ့အခါ၊ ကျွန်မက ပူးပေါင်းဆောင်ရွက်မှုမရှိဘဲ သူ့ရှေ့မှာ မျက်နှာသေနဲ့ပဲ နေခဲ့တယ်။ ကျွန်မရဲ့ ရေလောင်းခြင်းအလုပ်မှာရှိတဲ့ ပြဿနာတွေကို သူထောက်ပြတဲ့အခါ၊ ကျွန်မ အတိုက်အခံလုပ်ချင်စိတ်ဖြစ်ပြီး တော်တော်လေးကြမ်းတမ်းတဲ့စကားတချို့ကို ပြောခဲ့တယ်။ နောက်ပိုင်းမှာ နောက်ထပ်ညီအစ်မနှစ်ယောက် ကျွန်မတို့အဖွဲ့ထဲကို ဝင်လာတယ်။ သူတို့က ကျွန်မအစား ချန်ဒန်ဆီကနေ အကူအညီတောင်းတာကို ကျွန်မမြင်တဲ့အခါ၊ ဒါက စော်ကားခံလိုက်ရသလိုခံစားလိုက်ရတယ်။ ကျွန်မ အဲဒီအတွက် အရမ်းစိတ်မကောင်းဖြစ်ပြီး၊ ကျွန်မဟာ သူ့ရဲ့ လောင်းရိပ်မိနေပြီဆိုပြီး သူ့အပေါ် အပြစ်တင်မိတော့ သူ့အပေါ် ကျွန်မရဲ့မနာလိုစိတ်က ပိုပြီးတော့တောင် ပြင်းထန်လာခဲ့တယ်။ အဖွဲ့ခေါင်းဆောင်အနေနဲ့ အလုပ်မျိုးစုံကို တာဝန်ယူဖို့က ချန်ဒန့်မှာ တာဝန်ရှိတယ်။ သူ မနိုင်မနင်းဖြစ်တဲ့အခါ၊ ယုံကြည်သူအသစ်တွေကို ကူညီပျိုးထောင်ပေးဖို့ ကျွန်မကို တောင်းဆိုခဲ့တယ်။ ကျွန်မ စဉ်းစားမိတယ်၊ “ငါသာ ယုံကြည်သူအသစ်တွေကို ကောင်းကောင်းပျိုးထောင်ပေးလိုက်ရင် နင်ပဲ နာမည်ကောင်းရသွားမှာမဟုတ်ဘူးလား” လို့ပေါ့။ ဒါနဲ့ ကျွန်မ ငြင်းလိုက်ပြီး သူ့ကို ပြောလိုက်တယ်၊ “အစ်မက အဖွဲ့ခေါင်းဆောင်လေ၊ ယုံကြည်သူအသစ်တွေကို ပျိုးထောင်ပေးဖို့က အစ်မအလုပ်ပဲ” လို့ပေါ့။ စုဝေးပွဲတစ်ခုမှာ ချန်ဒန်က အဖွဲ့ခေါင်းဆောင်လုပ်ရတာက ခက်ခဲတဲ့အကြောင်းနဲ့၊ ဒီတာဝန်ကနေ သူ ဆင်းပေးဖို့ စဉ်းစားနေတဲ့အကြောင်း မိတ်သဟာယပြုခဲ့တယ်။ ဒီလိုကြားတဲ့အခါမှာ ကိုယ့်ကိုယ်ကိုယ် ဆင်ခြင်သုံးသပ်ရမဲ့အစား ကျွန်မက သူ့အခက်အခဲတွေနဲ့ပတ်သက်လို့ ကြည်နူးနေပြီး စိတ်ထဲမှာ သူ့ကိုလှောင်ပြောင်ခဲ့တယ်၊ တွေးတာပေါ့၊ “နင်က ငါ့ထက်နေရာတိုင်းမှာ ပိုတော်နေရမှာမဟုတ်ဘူးလား။ ဒါဆိုရင် အရာရာတိုင်းကို နင်ပဲကိုင်တွယ်သင့်တာပေါ့” လို့ပေါ့။ ကျွန်မ နုတ်ထွက်စာတွေ တင်ခဲ့တာတောင် အကြိမ်ပေါင်းမနည်းဘူး။ နောက်ဆုံးမှာတော့၊ သူ့ရဲ့အရည်အချင်းတွေအပေါ် ကျွန်မရဲ့မနာလိုစိတ်က အဖွဲ့အပေါ် မကောင်းတဲ့ သက်ရောက်မှုဖြစ်စေလို့ ကျွန်မရဲ့ရာထူးကနေ ဖြုတ်ချခံခဲ့ရတယ်။

ကျွန်မရဲ့ ဝတ်ပြုခြင်းတွေအတွင်းမှာ ဘုရားသခင်ရဲ့ နှုတ်ကပတ်တော်တစ်ပိုဒ်ကို ဖတ်ခဲ့ရတယ်။ “လူတို့အပေါ် အန္တိခရစ်များ၏ လူသိရှင်ကြား ဖိနှိပ်ခြင်း၊ ဖယ်ကြဉ်ခြင်း၊ တိုက်ခိုက်ခြင်းနှင့် လူတို့၏ ပြဿနာများကို ဖော်ထုတ်ခြင်းတို့သည် တိကျစွာ ရည်ရွယ်ထားခြင်းသာ ဖြစ်သည်။ ၎င်းတို့သည် သမ္မာတရားလိုက်စားပြီး ၎င်းတို့အား ပိုင်းခြားသိမြင်နိုင်သူတို့ကို ပစ်မှတ်ထားရန် ဤသို့သော နည်းလမ်းများကို ဧကန်မုချ အသုံးပြုကြသည်။ ဤလူတို့ကို ဖြိုလှဲခြင်းဖြင့် ၎င်းတို့သည် မိမိတို့ကိုယ်ပိုင် ရာထူးများကို ခိုင်ခံ့စေခြင်းဟူသည့် ရည်မှန်းချက်ကို စွမ်းဆောင်ရရှိကြသည်။ ဤကဲ့သို့ လူတို့ကို တိုက်ခိုက်ခြင်းနှင့် ဖယ်ကြဉ်ခြင်းသည် သဘာဝအားဖြင့် မလိုမုန်းထားခြင်း ဖြစ်သည်။ ၎င်းတို့၏ စကားနှင့် ပြောပုံဆိုပုံတွင် ရန်လိုစိတ်ရှိသည်။ ဖော်ထုတ်ခြင်း၊ ရှုတ်ချခြင်း၊ အသရေပျက်အောင် မမှန်မကန် ပြောခြင်းနှင့် ဆိုးယုတ်သော မတော်မတရားပြောဆိုခြင်းတို့ ရှိသည်။ ၎င်းတို့သည် အပြုသဘောဆောင်သော အရာများကို အပျက်သဘော ဆောင်သည့်အလား၊ အပျက်သဘောဆောင်သည့် အရာများကို အပြုသဘော ဆောင်သည့်အလား ပြောဆိုလျက် အမှန်တရားများကို မလိမ့်တပတ်ပင် လုပ်ကြသည်။ ဤကဲ့သို့ အဖြူအမည်းကို ပြောင်းပြန်လှန်ပြီး အမှန်အမှားကို ရောထွေးစေခြင်းက လူတို့ကို အနိုင်ယူခြင်းနှင့် ၎င်းတို့နာမည်များ ပျက်စီးစေခြင်းတည်းဟူသော အန္တိခရစ်တို့၏ ရည်မှန်းချက်ကို ပြည့်စုံစေသည်။ အမြင်မတူသူများအပေါ် ဤတိုက်ခိုက်ခြင်းနှင့် ဖယ်ကြဉ်ခြင်းတို့အား မည်သည့် စိတ်ဓာတ်က ဖြစ်ပေါ်စေသနည်း။ အချိန်အများစုတွင် ယင်းသည် မနာလိုသော စိတ်ဓာတ်မှ လာသည်။ ရက်စက်ကြမ်းကြုတ်သော စိတ်သဘောထားတွင် မနာလိုမှုသည် ယင်းနှင့်အတူ အားကောင်းသော မုန်းတီးမှုကို သယ်ဆောင်ပြီး ၎င်းတို့၏ မနာလိုမှု အကျိုးဆက်အနေဖြင့် အန္တိခရစ်များသည် လူတို့ကို တိုက်ခိုက်ကာ ဖယ်ကြဉ်ကြသည်။ ဤကဲ့သို့သော အခြေအနေမျိုးတွင် အန္တိခရစ်တို့သည် ဖော်ထုတ်ခံရခြင်း၊ တိုင်ကြားခံရခြင်း၊ မိမိတို့၏ အဆင့်အတန်းများ ဆုံးရှုံးခြင်းနှင့် ထိုးနှက်ခံရခြင်းတို့ကို ကြုံတွေ့ရပါက သူတို့သည် အာခံကာ မကျေမနပ် ဖြစ်လာကြမည်ဖြစ်ပြီး ၎င်းတို့အနေဖြင့် ပြင်းပြင်းထန်ထန် အငြိုးထားလိုစိတ်လည်း ပို၍ပင် ရှိလာရန် လွယ်ကူပေလိမ့်မည်။ အငြိုးထားခြင်းသည် စိတ်ထားတစ်မျိုးဖြစ်ပြီး ဖောက်ပြန်ပျက်စီးသော စိတ်သဘောထား အမျိုးအစားတစ်ခုလည်း ဖြစ်သည်။ တစ်စုံတစ်ဦး လုပ်သည့်အရာက မိမိတို့အဖို့ ထိခိုက်နစ်နာစရာဖြစ်သည်ကို အန္တိခရစ်တို့က မြင်သည့်အခါ ၎င်းတို့ထက် အခြားသူများ ပိုစွမ်းဆောင်နိုင်သည်၊ သို့မဟုတ် တစ်စုံတစ်ဦး၏ ပြောဆိုချက်များနှင့် အကြံပြုချက်များက ၎င်းတို့ထက် ပိုကောင်းပြီး သို့မဟုတ် ပို၍ အမြော်အမြင်ရှိပြီး လူတိုင်းက ထိုလူ၏ ပြောဆိုချက်များနှင့် အကြံပြုချက်များအား သဘောတူ လက်ခံကြသည်ကို မြင်သည့်အခါ၊ အန္တိခရစ်များက ၎င်းတို့၏ ရာထူး ခြိမ်းခြောက်ခံရသည်ဟု ခံစားကြသည်၊ ၎င်းတို့၏ စိတ်နှလုံးများတွင် မနာလိုမှုနှင့် မုန်းတီးခြင်းတို့ ဖြစ်ပေါ်ပြီး ၎င်းတို့က တိုက်ခိုက်ကာ လက်စားချေကြသည်။ လက်စားချေသည့်အခါ အန္တိခရစ်များသည် ယေဘုယျအားဖြင့် မိမိတို့၏ ပစ်မှတ်များကို လက်ဦးမှုယူသည့် ထိုးနှက်ချက်တစ်ခု လုပ်ကြသည်။ တစ်ဖက်လူက အညံ့ခံသည်အထိ လူတို့ကို တိုက်ခိုက်ပြီး ဖြိုလှဲရာတွင် လက်ဦးမှုရယူကြသည်။ ထိုအခါမှသာ ၎င်းတို့သည် စိတ်ခံစားချက်များ ထွက်ပေါက်ပေးလိုက်ရပြီ ဖြစ်သည်ဟု ခံစားကြသည်။ လူတို့ကို တိုက်ခိုက်ခြင်းနှင့် ဖယ်ကြဉ်ခြင်းနှင့်ဆိုင်သည့် အခြားသော သရုပ်သကန်များမှာ အဘယ်နည်း။ (အခြားသူများကို သိမ်ငယ်စေခြင်း ဖြစ်သည်။) အခြားသူများကို သိမ်ငယ်စေခြင်းသည် ပေါ်လွင်အောင်ပြသသည့် နည်းလမ်းများထဲမှ တစ်ခု ဖြစ်သည်။ အလုပ်ကို သင် မည်မျှကောင်းစွာ လုပ်ဆောင်သည်ဖြစ်စေ သင် အပျက်သဘောဆောင်ပြီး အားနည်းကာ မရပ်တည်နိုင်သည်အထိ အန္တိခရစ်များက သင့်ကို သိမ်ငယ်စေဦးမည်၊ သို့မဟုတ် ရှုတ်ချဦးမည်ဖြစ်သည်။ ထို့နောက် ၎င်းတို့သည် ကျေနပ်လိမ့်မည်ဖြစ်ပြီး မိမိတို့၏ ရည်မှန်းချက် ပြည့်စုံပြီးဖြစ်မည်။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၂- အမြင်မတူသူများကို ၎င်းတို့ တိုက်ခိုက်ကာ ကြဉ်ထားကြ၏) အန္တိခရစ်တွေမှာ ရက်စက်ကြမ်းကြုတ်တဲ့ စိတ်သဘောထားတွေ၊ မနာလိုတဲ့စိတ်နှလုံးတွေနဲ့ အဆင့်အတန်းအတွက် ပြင်းပြတဲ့ လိုအင်ဆန္ဒတွေရှိတယ်လို့ ဘုရားသခင်က ဖော်ထုတ်ခဲ့တယ်။ သူတို့အနားက တစ်စုံတစ်ယောက်က သူတို့ထက်ပိုတော်တယ်ထင်ရပြီး သူတို့ရဲ့အဆင့်အတန်းကို ခြိမ်းခြောက်ပြီဆိုတာနဲ့၊ အန္တိခရစ်တွေဟာ မနာလိုစိတ်ဝင်လာပြီး လက်စားချေဖို့ စိတ်ဓာတ်က ပေါ်လာတတ်တယ်။ သူတို့ရဲ့အဆင့်အတန်းကို ခိုင်မာစေဖို့အတွက်၊ အမြင်မတူသူတွေကို ဖိနှိပ်ပြီး ဖယ်ကြဉ်ဖို့ နည်းလမ်းအမျိုးမျိုးကို သုံးနိုင်တယ်။ ချန်ဒန်ရောက်လာခါစတုန်းက သူ့အစွမ်းအစကောင်းတာ၊ ကဏ္ဍအားလုံးမှာ ကျွန်မထက်သာတာ၊ ပြီးတော့ အဖွဲ့ထဲက အဖွဲ့ဝင်အသစ်တွေကလည်း သူ့ကိုပဲဝိုင်းဝိုင်းလည်ပြီး သူ့ကိုအထင်ကြီးလေးစားကြတာကို မြင်တဲ့အခါ၊ ကျွန်မ ဆိုးဆိုးရွားရွား ခံစားခဲ့ရတယ်၊ ကျွန်မကို အဲဒီလောက် အနေရခက်အောင်လုပ်ခဲ့တာ ချန်ဒန်ပဲလို့ ယုံကြည်ပြီး ဒါကြောင့် သူ့အပေါ်တေးထားတဲ့ ကျွန်မရဲ့မနာလိုမှုနဲ့ မခံချိမခံသာဖြစ်မှုတွေဟာ ထိန်းမနိုင်သိမ်းမရ ပေါက်ထွက်ခဲ့တာကို ကျွန်မပြန်သတိရမိတယ်။ နောက်ပိုင်းမှာ ချန်ဒန်က ကျွန်မအတွက် အလုပ်တချို့စီစဉ်ပေးတဲ့အခါ၊ ကျွန်မက ပူးပေါင်းမဆောင်ရွက်ဘဲ သူ့ကို မကြည်မသာပုံလုပ်ပြတယ်၊ မကျေမနပ်တဲ့လေသံနဲ့ စကားပြောတယ်၊ ဒါက သူ့ရဲ့အခြေအနေကိုလည်း သက်ရောက်မှုရှိစေခဲ့တယ်။ တစ်ခါတလေ ကျွန်မတို့ ပြဿနာတွေကို ဆွေးနွေးတဲ့အခါ၊ ချန်ဒန်ပြောတာက စည်းမျဉ်းတွေနဲ့ ကိုက်ညီမှန်း ကျွန်မသိပေမဲ့၊ ကျွန်မရဲ့ကိုယ်ပိုင်အမြင်တွေကို တမင်တကာ ဆုပ်ကိုင်ထားပြီး လက်မလွှတ်ခဲ့ဘူး၊ သူ့ကိုဆန့်ကျင်ဖို့ တခြားသူတွေကို ကျွန်မဘက်ပါအောင် လှုံ့ဆော်ခဲ့လို့ အလုပ်မှာ နှောင့်နှေးမှုတွေ ဖြစ်စေခဲ့တယ်။ အလုပ်တွေအများကြီးရှိတာကို ကျွန်မသိခဲ့သလို၊ အဖွဲ့ခေါင်းဆောင်ကဏ္ဏမှာ အသစ်ဖြစ်တဲ့ ချန်ဒန်ဟာ အခက်အခဲတွေအများကြီး သေချာပေါက် ရင်ဆိုင်ခဲ့ရတာကိုလည်း သိခဲ့တယ်၊ ဒါပေမဲ့ မနာလိုစိတ်ကြောင့် ကျွန်မရဲ့တာဝန်ကို မထမ်းဆောင်ချင်စိတ်နဲ့ တမင်တကာ ကျွန်မ နှောင့်ယှက်ခဲ့တယ်၊ သူ့ကို ကျရှုံးစေချင်လို့ သူ့အတွက် ကိစ္စတွေ ခက်ခဲအောင်လုပ်ဖို့နည်းတစ်ခုအနေနဲ့ပေါ့။ ဒီအပြုအမူတွေကို ဆင်ခြင်သုံးသပ်ကြည့်တော့၊ ကျွန်မဟာ အဆင့်အတန်းအတွက် ပြင်းပြလွန်းတဲ့ လိုအင်ဆန္ဒရှိတဲ့ အန္တိခရစ်တစ်ယောက်လိုပဲဆိုတာ ကျွန်မ သိမြင်ခဲ့သလို၊ တစ်စုံတစ်ယောက်က ကျွန်မရဲ့ရာထူးကို ခြိမ်းခြောက်လာတဲ့အခါမှာ မနာလိုစိတ်နဲ့ လက်စားချေလိုစိတ်တွေ ဖြစ်ပေါ်လာပြီး အသင်းတော်အလုပ်ကို လုံးလုံးလျားလျား မျက်ကွယ်ပြုခဲ့တယ်ဆိုတာ ကျွန်မ သိမြင်ခဲ့တယ်။ ပြီးတော့ ကျွန်မရဲ့စိတ်သဘောထားက ရက်စက်ကြမ်းကြုတ်ပြီး လူ့သဘာဝကင်းမဲ့နေတယ်ဆိုတာကို ကျွန်မ သတိပြုမိခဲ့တယ်။ ဒီတာဝန်ကို ကျွန်မ ပထမဆုံး စတင်လေ့ကျင့်ခဲ့တုန်းက၊ ခေါင်းဆောင်တွေက ကျွန်မတို့ကို လမ်းညွှန်ကူညီပေးဖို့ လူတစ်ယောက်ကို အထူးတလည် စီစဉ်ပေးခဲ့တာကို ကျွန်မ မှတ်မိသေးတယ်။ ကျွန်မတို့ စည်းမျဉ်းတွေကို မြန်မြန်ဆန်ဆန်နားလည်ပြီး ကျွန်မတို့တာဝန်တွေကို ကောင်းကောင်းထမ်းဆောင်နိုင်အောင်ပေါ့။ အသင်းတော်က ကျွန်မကို ဒီလိုနည်းနဲ့ ရာထူးတိုးပေးပြီး ပျိုးထောင်ပေးခဲ့ပေမဲ့၊ ကျွန်မက မှန်ကန်တဲ့လမ်းကို မလိုက်လျှောက်ဘဲ ကျော်ကြားမှုနဲ့ အကျိုးအမြတ်ကို ရှာဖွေခဲ့တယ်၊ ကိုယ်နဲ့အမြင်မတူသူကို နည်းမျိုးစုံနဲ့ ဖယ်ကြဉ်ပြီး အသင်းတော်အလုပ်ကို နှောင့်ယှက်ဖို့ ကြိုးစားခဲ့တယ်။ ကျွန်မဟာ တကယ်ကို မနှစ်မြို့စရာကောင်းတဲ့အရာပဲ။

အဲဒီနောက်မှာ ဘုရားသခင်ရဲ့ နှုတ်ကပတ်တော် နောက်တစ်ပိုဒ်ကို ကျွန်မ ဖတ်ခဲ့ရတယ်။ “တစ်စုံတစ်ဦးက ၎င်းသည် သမ္မာတရားကို ချစ်ကြောင်းနှင့် ၎င်းသည် သမ္မာတရားကို လိုက်စားကြောင်း ပြောသော်လည်း၊ အနှစ်သာရအားဖြင့် ၎င်းတို့လိုက်စားသည့် ပန်းတိုင်သည် မိမိကိုယ်ကို ထင်ပေါ်ဂုဏ်တက်စေဖို့၊ ကြွားဝါဖို့၊ လူများက ၎င်းကို အထင်ကြီးစေဖို့၊ မိမိ၏တစ်ကိုယ်ရေ အကျိုးစီးပွားကို ရရှိဖို့ဖြစ်ပြီး ၎င်း၏တာဝန်ကို ထမ်းဆောင်ခြင်းသည် ဘုရားသခင်ကို ကျိုးနွံနာခံဖို့ဖြစ်စေ၊ စိတ်ကျေနပ်စေဖို့ဖြစ်စေ မဟုတ်ဘဲ၊ ထိုအစား ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းကို ရရှိဖို့ ဖြစ်ပါက ၎င်း၏လိုက်စားမှုသည် လျော်ကန်ခြင်းမရှိပေ။ ထိုသို့ဖြစ်၍ အသင်းတော်၏အလုပ်နှင့်ပတ်သက်ပါက ၎င်းတို့၏ လုပ်ရပ်များသည် အဟန့်အတားတစ်ခုဖြစ်သလော၊ သို့မဟုတ် ၎င်းတို့သည် ရှေ့ဆက်တိုးတက်ဖို့ ကူညီပေးသလော။ ၎င်းတို့သည် အဟန့်အတားဖြစ်သည်မှာ သိသာထင်ရှားပေသည်။ ၎င်းတို့သည် ရှေ့ဆက်တိုးတက်အောင် မလုပ်ပေ။ အသင်းတော်၏ အလုပ်ကို လုပ်ဆောင်သည့် အောင်လံတံခွန် လွှင့်သော်လည်း မိမိတို့၏ကိုယ်ပိုင် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းကို လိုက်စားကာ၊ မိမိတို့၏ကိုယ်ပိုင် လုပ်ငန်းကို လုပ်ဆောင်ပြီး၊ မိမိတို့၏ကိုယ်ပိုင် အုပ်စုလေး၊ မိမိတို့၏ကိုယ်ပိုင် နိုင်ငံလေးကို ဖန်တီးသူအချို့ဖြစ်သည့် ဤလူအမျိုးအစားသည် မိမိ၏တာဝန်ကို ထမ်းဆောင်နေခြင်းလော။ ၎င်းတို့ လုပ်သမျှ အလုပ်အားလုံး၏ အနှစ်သာရမှာ အသင်းတော်၏အလုပ်ကို အဖျက်အမှောင့်လုပ်ကာ နှောင့်ယှက်ပြီးထိခိုက်စေသည်။ ကျော်ကြားမှု၊ အကျိုးအမြတ်နှင့် အဆင့်အတန်းတို့ကို ၎င်းတို့ လိုက်စားခြင်း၏ အကျိုးဆက်မှာ အဘယ်နည်း။ ပထမဦးစွာ ဤသည်မှာ ဘုရားသခင် ရွေးချယ်ထားသောသူများက ဘုရားသခင်၏ နှုတ်ကပတ်တော်ကို ပုံမှန်စားသောက်ပုံနှင့် သမ္မာတရားကို နားလည်ပုံကို ထိခိုက်သည်။ ၎င်းတို့၏ အသက်ဝင်ရောက်မှုကို တားဆီးသည်။ ၎င်းတို့အား ဘုရားသခင်ကို ယုံကြည်ခြင်း၌ မှန်ကန်သော လမ်းကြောင်းသို့ ဝင်ရောက်ခြင်းမှ တားဆီးပြီး လမ်းမှားသို့ ဆိုက်ရောက်စေသည်။ ယင်းသည် ရွေးချယ်ခံရသူများကို ဘေးဖြစ်စေပြီး ၎င်းတို့အား ပျက်စီးစေသည်။ ပြီးလျှင် ယင်းက အဆုံးတွင် အသင်းတော်၏ အလုပ်ကို အဘယ်အရာ ဖြစ်စေသနည်း။ နှောင့်ယှက်ခြင်း၊ ထိခိုက်ခြင်းနှင့် ဖြိုဖျက်ခြင်း၊ တို့ ဖြစ်စေသည်။ ဤသည်မှာ လူတို့၏ ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းနောက်သို့ လိုက်ခြင်းမှ ဖြစ်ပေါ်လာသော အကျိုးဆက်ဖြစ်သည်။ ၎င်းတို့သည် တာဝန်ကို ဤနည်းလမ်းဖြင့် ထမ်းဆောင်သည့်အခါ ဤအရာကို အန္တိခရစ်တစ်ဦး၏ လမ်းကြောင်းကို လျှောက်ခြင်းအဖြစ် မသတ်မှတ်နိုင်သလော။ လူများ အား ကျော်ကြားမှု၊ အကျိုးအမြတ်နှင့်ဂုဏ်အဆင့်အတန်းတို့ကို ဘေးဖယ်ထားဖို့ ဘုရားသခင်က တောင်းဆိုသည့်အခါ သူသည် လူများ၏လွတ်လပ်စွာ ရွေးချယ်ခွင့်ကို ပိတ်ပင်နေခြင်း မဟုတ်ချေ။ ယင်းထက် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းတို့ကို လိုက်စားစဉ်တွင် လူများသည် အသင်းတော်၏ အလုပ်နှင့် ဘုရားသခင် ရွေးချယ်ထားသောသူများ၏ အသက်ဝင်ရောက်မှုကို အဖျက်အမှောင့်လုပ်ပြီး နှောင့်ယှက်ကာ ပို၍များသောလူများ၏ ဘုရားနှုတ်ကပတ်တော်များကို စားသောက်ခြင်းနှင့် သမ္မာတရား နားလည်ခြင်းတို့အပေါ်တွင် ဩဇာလွှမ်းမိုးမှုများပင် ရှိနိုင်ပြီး၊ ထိုသို့ဖြင့် ဘုရားသခင်၏ကယ်တင်ခြင်းကို ရရှိခြင်းအပေါ် ဩဇာလွှမ်းမိုးမှု ရှိသောကြောင့် ဖြစ်လေသည်။ ဤသည်မှာ မငြင်းခုံနိုင်သော အချက်ဖြစ်သည်။ လူများသည် မိမိတို့၏ ကိုယ်ပိုင် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းတို့ကို လိုက်စားသည့်အခါတွင်၊ ၎င်းတို့သည် သမ္မာတရားကို လိုက်စားမည် မဟုတ်ကြောင်း၊ ၎င်းတို့သည် မိမိတို့၏ တာဝန်ကို သစ္စာရှိစွာ ဖြည့်ဆည်းမည်မဟုတ်ကြောင်းမှာ သေချာပေသည်။ ၎င်းတို့သည် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းအတွက်သာ ပြောဆို လုပ်ဆောင်ကြလိမ့်မည်ဖြစ်ပြီး ၎င်းတို့ လုပ်ဆောင်သမျှသည် ထိုအရာများအတွက်သာ ဖြစ်သည်မှာ ခြွင်းချက်တစ်စက်မျှ မရှိပေ။ ထိုသို့သော ပြုမူလုပ်ဆောင်ခြင်းသည် အန္တိခရစ်တို့၏ လမ်းကြောင်းကို လျှောက်ခြင်း ဖြစ်သည်မှာ သံသယမရှိပေ။ ယင်းမှာ ဘုရားအမှုတော်အပေါ် အနှောင့်အယှက်နှင့် အဖျက်အဆီးဖြစ်ပြီး ယင်း၏ အကျိုးဆက်မျိုးစုံမှာ နိုင်ငံတော် ဧဝံဂေလိတရား ဖြန့်ဝေခြင်းနှင့် အသင်းတော်အတွင်း ဘုရားအလိုတော်ကို ဆောင်ရွက်ခြင်းကို တားဆီးခြင်း ဖြစ်သည်။ ထို့ကြောင့် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းကို လိုက်စားသူတို့ လိုက်လျှောက်သည့် လမ်းကြောင်းသည် ဘုရားသခင်ကို ခုခံသည့်လမ်းကြောင်း ဖြစ်သည်ဟု အသေအချာ ပြောနိုင်ပေသည်။ ယင်းမှာ သူ့ကို တမင်တကာ ခုခံခြင်း၊ ငြင်းပယ်ခြင်းဖြစ်သည်။ ယင်းသည် ဘုရားသခင်ကို ခုခံခြင်းနှင့် သူ့ကို ဆန့်ကျင်ဖို့ ရပ်တည်ရာ၌ စာတန်နှင့် ပူးပေါင်းဆောင်ရွက်ခြင်း ဖြစ်ပေသည်။ ဤသည်မှာ ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းတို့နောက် လိုက်သည့် လူများ၏ သဘာဝ ဖြစ်လေသည်။ လူများက မိမိတို့၏ကိုယ်ပိုင် အကျိုးစီးပွားများကို လိုက်စားခြင်းနှင့် ပတ်သက်သည့် အမှားမှာ ၎င်းတို့ လိုက်စားသည့် ပန်းတိုင်များသည် စာတန်၏ပန်းတိုင်များ ဖြစ်နေခြင်းပင် ဖြစ်ပြီး ယင်းတို့သည် ကောက်ကျစ်ဆိုးယုတ်ကာ မတရားသည့်ပန်းတိုင်များ ဖြစ်သည်။ လူများသည် ကျော်ကြားမှု၊ အကျိုးအမြတ်နှင့် ဂုဏ်အဆင့်အတန်းကဲ့သို့သော တစ်ကိုယ်ရေ အကျိုးစီးပွားများကို လိုက်စားသည့်အခါ၊ ၎င်းတို့သည် စာတန်၏တန်ဆာပလာတစ်ခု အမှတ်တမဲ့ ဖြစ်လာသည်၊ ၎င်းတို့သည် စာတန်အတွက် ထွက်ပေါက်တစ်ခု ဖြစ်လာသည်၊ ထို့အပြင် ၎င်းတို့သည် စာတန်၏ပြယုဂ်ဖြစ်လာသည်။ ၎င်းတို့သည် အသင်းတော်တွင် အပျက်သဘောဆောင်သော ကဏ္ဍကို ပါဝင်လုပ်ဆောင်ကြသည်။ အသင်းတော်၏ အလုပ်၊ အသင်းတော် ပုံမှန်အသက်တာနှင့် ဘုရားသခင် ရွေးချယ်ထားသောလူများ၏ ပုံမှန်လိုက်စားမှုတို့အပေါ် ၎င်းတို့ဖြစ်စေသည့် အကျိုးသက်ရောက်မှုသည် နှောင့်ယှက်ဖို့နှင့် ထိခိုက်စေဖို့ ဖြစ်သည်။ ၎င်းတို့၌ ကောင်းကျိုးမပေးသည့်၊ အပျက်သဘောဆောင်သည့် အကျိုးသက်ရောက်မှု ရှိပေသည်။” (နှုတ်ကပတ်တော်၊ အတွဲ (၄)၊ အန္တိခရစ်တို့ကို ဖော်ထုတ်ခြင်း၊ အချက် ၉ (အပိုင်း ၁)) အရင်က ကျွန်မထင်ခဲ့တာကတော့ ကျော်ကြားမှုနဲ့ အဆင့်အတန်းကို ရှာဖွေခြင်းဟာ သမ္မာတရားကို မလိုက်စားနိုင်တဲ့ လူတစ်ယောက်ရဲ့ ကိုယ်ရေးကိုယ်တာ ကျရှုံးမှုတစ်ခုသာဖြစ်ပြီး၊ လူတစ်ယောက်ရဲ့ ကိုယ့်အသက်တာကိုပဲ ဆုံးရှုံးမှုတွေ ဖြစ်စေမှာ၊ တခြားသူတွေကို မထိခိုက်ဘူးလို့ပေါ့။ ဒါကို ဖောက်ပြန်ပျက်စီးမှုရဲ့ အသေးစားထုတ်ဖော်မှုတစ်ခုအဖြစ် အမြဲတမ်း သဘောထားခဲ့ပြီး၊ လူတိုင်းမှာ ဒီလိုဖောက်ပြန်ပျက်စီးမှုမျိုးရှိတာပဲ၊ ဒါကို တစ်ညတည်းနဲ့ ပြောင်းလဲလို့မရဘူး၊ ဖြည်းဖြည်းချင်းပဲ လုပ်ယူရမှာလို့ တွေးခဲ့တယ်။ ဘုရားသခင်က ကျော်ကြားမှုနဲ့ အဆင့်အတန်း လိုက်စားတာကို ဘာကြောင့် အဲဒီလောက်တောင် မုန်းတီးရသလဲဆိုတာကို ကျွန်မ နားမလည်ခဲ့ဘူး။ ဘုရားသခင်ရဲ့ ဒီနှုတ်ကပတ်တော်တွေကို ဖတ်ပြီးမှ ကျွန်မ သဘောပေါက်ခဲ့တာက၊ ကျော်ကြားမှုနဲ့ အဆင့်အတန်းကို လိုက်စားတာဟာ ကိုယ့်အသက်တာကို ထိခိုက်စေရုံသာမက အသင်းတော်အလုပ်ကိုပါ နှောင့်ယှက်တယ်ဆိုတာကိုပါ။ ချန်ဒန်က အဖွဲ့ခေါင်းဆောင်ဖြစ်ပြီး၊ သူ့အလုပ်မှာ ကျွန်မက သူ့ကို ထောက်ပံ့ပြီး ပူးပေါင်းဆောင်ရွက်ပေးသင့်တယ်။ ဒါပေမဲ့ မနာလိုစိတ်ကြောင့်၊ သူ့အလုပ်စီစဉ်မှုတွေကို ကျွန်မ တမင်တကာ ပူးပေါင်းမဆောင်ရွက်ခဲ့ဘဲ သူ့အတွက် ကိစ္စတွေ ခက်ခဲအောင်လုပ်ခဲ့တယ်၊ ဒါက ရေလောင်းခြင်းအလုပ်ကို ထိခိုက်စေခဲ့တယ်။ ပြဿနာတွေကို ဆွေးနွေးတဲ့အခါ၊ သူ့မိတ်သဟာယက မှန်ကန်မှန်း သိပေမဲ့၊ သူ့ကို နားထောင်လိုက်ရင် ကျွန်မ ညံ့တဲ့ပုံပေါက်သွားပြီး သိက္ခာကျရမှာကို ကျွန်မ ကြောက်ခဲ့တယ်။ ဒါကြောင့် ကျွန်မရဲ့ကိုယ်ပိုင်အမြင်တွေကို ခေါင်းမာမာနဲ့ ဆုပ်ကိုင်ထားခဲ့တယ်၊ အဲဒါက အလုပ်မှာ နှောင့်နှေးမှုတွေ ဖြစ်ပေါ်စေခဲ့တယ်။ ကျွန်မက တမင်တကာ အနှောင့်အယှက်ပေးတာ၊ လက်ရှောင်တာတွေတောင်လုပ်ခဲ့ပြီး၊ ကျွန်မ လုပ်နိုင်တဲ့အရာတွေကိုတောင် လုပ်ဖို့ငြင်းဆန်ပြီး၊ ချန်ဒန်အပေါ် ဖိအားပေးဖို့အတွက် အလုပ်တွေကို သူ့ဆီကို ပုံချခဲ့တယ်။ အပေါ်ယံမှာတော့ ကျွန်မက ကျော်ကြားမှုနဲ့ အကျိုးအမြတ်အတွက် တခြားသူတွေနဲ့ ပြိုင်ဆိုင်နေပုံရပေမဲ့ တကယ်တမ်းမှာတော့ ကျွန်မက ဘုရားသခင်ကို အတိုက်အခံလုပ်နေခဲ့တာပဲ။ အသင်းတော်အလုပ် နှောင့်နှေးမှုကို ရင်းပြီး ကျွန်မရဲ့အချည်းနှီးဖြစ်တဲ့မာနကို ဖြည့်ဆည်းခဲ့တယ်။ အခုမှ ကျွန်မနားလည်သွားတာက၊ အန္တိခရစ်တွေ အများကြီး နှင်ထုတ်ခံရတာဟာ သူတို့က ကျော်ကြားမှုနဲ့ အဆင့်အတန်းကို လိုက်စားလို့၊ ဒါမှမဟုတ် ဖောက်ပြန်တဲ့စိတ်သဘောထားတွေရှိလို့ မဟုတ်ဘဲ၊ ကျော်ကြားမှုနဲ့ အဆင့်အတန်းကို လိုက်စားရာမှာ တခြားသူတွေကို ဖိနှိပ်ဖို့နဲ့ ဒုက္ခပေးဖို့ ဘာမဆိုလုပ်တတ်လို့၊ ဘုရားအိမ်တော်ရဲ့အလုပ်ကို နှောင့်ယှက်ပြီး ဒုစရိုက်အမှု အများကြီး ကျူးလွန်လို့ပဲဖြစ်တယ်။ ကျွန်မရဲ့လုပ်ရပ်တွေဟာ သဘာဝအရတော့ အန္တိခရစ်တွေနဲ့ အတူတူဖြစ်နေခဲ့တယ်။ ကျွန်မသာ နောင်တမရရင်၊ ကျွန်မရဲ့ များပြားလှတဲ့ ဒုစရိုက်အမှုတွေကြောင့် နောက်ဆုံးမှာ အသင်းတော်ကနေ နှင်ထုတ်ခံရမှာပဲ။ ဒါကို ဆင်ခြင်သုံးသပ်မိတော့ ကျွန်မကြောက်လာတယ်။ အဲဒီအချိန်မှာ ကျွန်မ အတော်ကလေး စိတ်မချမ်းမသာဖြစ်သွားပြီး၊ ဒီလောက်များတဲ့ မကောင်းမှုတွေလုပ်ပြီးတဲ့နောက်မှာ ကယ်တင်ခြင်းရဖို့ မျှော်လင့်ချက် ရှိသေးရဲ့လား၊ ဘုရားသခင်က ကျွန်မကို ထုတ်ဖော်ပြီး ဖယ်ရှားရှင်းလင်းဖို့ ဒီအခြေအနေကို အသုံးချနေတာလားလို့ တွေးမိခဲ့တယ်။

နောက်ပိုင်းမှာ ဘုရားသခင်ရဲ့ နှုတ်ကပတ်တော်တစ်ပိုဒ်ကို ကျွန်မ ဖတ်ခဲ့ရတယ်။ “ယနေ့တွင်၊ သင်တို့သည် ဘုရားသခင်ကို မြင်နိုင်ရုံသာမက၊ သာ၍အရေးကြီးသည်မှာ၊ သင်တို့သည် ပြစ်တင်ဆုံးမခြင်းနှင့် တရားစီရင်ခြင်းတို့ကို ရရှိပြီးဖြစ်သည်၊ အနက်ရှိုင်းဆုံးသော ဤကယ်တင်ခြင်းကို သင်တို့ ရရှိပြီးဖြစ်သည်၊ ဆိုလိုသည်မှာ၊ သင်တို့သည် ဘုရားသခင်၏ အကြီးမြတ်ဆုံးသော ချစ်ခြင်းမေတ္တာကို ရရှိပြီးဖြစ်ပေသည်။ သူ လုပ်ဆောင်သမျှအားလုံးတွင်၊ ဘုရားသခင်သည် သင်တို့အပေါ် အမှန်တကယ် ချစ်ခင်ပေသည်။ သူသည် မကောင်းသော ရည်ရွယ်ချက် လုံးဝ မရှိပေ။ သင်တို့အနေဖြင့် မိမိတို့ကိုယ်ကိုယ် ဆင်ခြင်သုံးသပ်ပြီး ဤကြီးမားလှသော ကယ်တင်ခြင်းကို ရရှိဖို့အလို့ငှာ၊ သင်တို့၏ အပြစ်များကြောင့် သင်တို့ကို သူ တရားစီရင်ခြင်း ဖြစ်သည်။ ဤအရာအားလုံးကို လူသားအား စုံလင်စေခြင်းတည်းဟူသော ရည်ရွယ်ချက်အတွက် လုပ်ဆောင်ခြင်း ဖြစ်သည်။ အစမှ အဆုံးတိုင်၊ ဘုရားသခင်သည် လူသားကိုကယ်တင်ဖို့ အစွမ်းကုန် လုပ်ဆောင်နေခဲ့ပြီးဖြစ်ကာ၊ သူ၏ လက်များဖြင့် ဖန်ဆင်းခဲ့သော လူသားများကို လုံးဝ ဖျက်ဆီးရန် ဆန္ဒမရှိပေ။ ယနေ့တွင်၊ သူသည် သင်တို့အလယ် အမှုပြုရန် ကြွလာပြီးဖြစ်ကာ၊ ဤကယ်တင်ခြင်းသည် ယခင်ကထက် သာ၍ပင် ကြီးမားသည် မဟုတ်လော။ သူသည် သင်တို့ကို မုန်းခဲ့ပါက၊ သင်တို့ကို သူကိုယ်တိုင် လမ်းပြရန် ထိုမျှအရေးပါမှု အတိုင်းအတာရှိသော အမှုကို လုပ်ဆောင်လိမ့်ဦးမည်လော။ သူသည် အဘယ်ကြောင့် ထိုသို့ ဆင်းရဲဒုက္ခခံရမည်နည်း။ ဘုရားသခင်သည် သင်တို့ကို မမုန်းပေ သို့မဟုတ် သင်တို့အပေါ် မကောင်းသော မည်သည့်ရည်ရွယ်ချက်မျှ မရှိပေ။ ဘုရားသခင်၏ ချစ်ခြင်းမေတ္တာသည် အစစ်မှန်ဆုံး ဖြစ်သည်ကို သင်တို့သိသင့်သည်။ လူတို့ကို တရားစီရင်ခြင်းမှတစ်ဆင့် သူ ကယ်တင်ရသည်မှာ လူတို့ ပုန်ကန်ကြသောကြောင့်သာ ဖြစ်ပေသည်။ ဤအတွက်သာ မဟုတ်ပါက၊ ၎င်းတို့ကို ကယ်တင်ခြင်းသည် ဖြစ်နိုင်မည်မဟုတ်ပေ။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ သိမ်းပိုက်ခြင်းအမှု၏ စစ်မှန်သော ဇာတ်လမ်း (၄)) ဘုရားသခင်ရဲ့ နှုတ်ကပတ်တော်တွေကို ဖတ်ပြီးနောက်မှာ ကျွန်မစိတ်ထဲမှာ အကြီးအကျယ် တို့ထိခံစားခဲ့ရပြီး ကျွန်မဘယ်လောက်တောင် ဆင်ခြင်တုံတရား မရှိခဲ့သလဲဆိုတာကို သဘောပေါက်ခဲ့တယ်။ ဒီနေ့ ဖြုတ်ချခံရတာဟာ ကျွန်မက ကျော်ကြားမှုနဲ့ အကျိုးအမြတ်ကို ရှာဖွေခဲ့လို့၊ ပြီးတော့ မှန်ကန်တဲ့လမ်းကို မလိုက်လျှောက်ဘဲ၊ မကောင်းမှုကိုလုပ်ပြီး အသင်းတော်အလုပ်ကို နှောင့်ယှက်ခဲ့လို့ပဲ။ ဒါကြောင့် ဘုရားသခင်ရဲ့ ရည်ရွယ်ချက်ကို အထင်အမြင်မလွဲဘဲ၊ ဒီဆုံးမပဲ့ပြင်ခြင်းနဲ့ ရိုက်နှက်ခြင်းကို ကျွန်မ လက်ခံသင့်တယ်။ ကျွန်မ ဘာကြောင့် ဒီလိုဒုစရိုက်အမှုတွေကို ကျူးလွန်နိုင်ခဲ့သလဲဆိုတာကိုလည်း ကိုယ့်ကိုယ်ကိုယ် ဆင်ခြင်သုံးသပ်ခဲ့တယ်။ ကျော်ကြားမှုနဲ့ အဆင့်အတန်းအတွက် ပြင်းပြတဲ့ လိုအင်ဆန္ဒရှိတဲ့အပြင် ကျွန်မမှာ ဘုရားသခင်ကို ကြောက်ရွံ့တဲ့ စိတ်နှလုံး လုံးဝကင်းမဲ့နေခဲ့တယ်။ ကျွန်မရဲ့ကျော်ကြားမှုနဲ့ အဆင့်အတန်းကို ခြိမ်းခြောက်တဲ့ ဘယ်အရာမဆို ဖြစ်ပျက်လာတဲ့အခါတိုင်း၊ ကျွန်မက တစ်ဇွတ်ထိုးလုပ်တယ်၊ မကောင်းမှုကိုလုပ်တယ်၊ ဘုရားသခင်ကို အတိုက်အခံလုပ်တတ်တယ်။ ကျွန်မ ဘုရားသခင်ရဲ့ နှုတ်ကပတ်တော် နောက်တစ်ပိုဒ်ကိုလည်း ဖတ်ခဲ့ရတယ်။ “သို့ဆိုလျှင် ဘုရားသခင်ကို ကြောက်ရွံ့သော စိတ်နှလုံးရှိသော လူတစ်ဦးရှိပါက ၎င်းသည် မည်သို့ ပြုမူလိမ့်မည်နည်း။ (၎င်းသည် မဆင်မခြင် သို့မဟုတ် တစ်ဇွတ်ထိုး ပြုမူလိမ့်မည်မဟုတ်ပါ။) ဤစကားနှစ်လုံးသည် အတော် သင့်လျော်ပေ၏။ သို့ဆိုလျှင် မဆင်မခြင် မပြုမူခြင်းကိုဖြစ်စေ၊ တစ်ဇွတ်ထိုး မပြုမူခြင်းကိုဖြစ်စေ သင်တို့ မည်သို့ လက်တွေ့လုပ်ဆောင်သနည်း။ (ကျွန်ုပ်တို့သည် ရှာဖွေသည့် စိတ်နှလုံး ရှိသင့်ပါသည်။) ပြဿနာတစ်ခုကို ထိပ်တိုက်ရင်ဆိုင်ရသောအခါ လူအချို့သည် အခြားသူများထံမှ အဖြေကို အမှန်တကယ် ရှာဖွေသော်လည်း အခြားလူတစ်ဦးသည် သမ္မာတရားနှင့်အညီ စကားပြောဆိုသည့်အခါ ၎င်းတို့သည် လက်မခံကြချေ၊ ၎င်းတို့ မနာခံနိုင်ကြသကဲ့သို့ ၎င်းတို့၏ စိတ်နှလုံးထဲတွင် ‘သူ့ထက် ငါ ပုံမှန်အားဖြင့် ပိုတော်ပါတယ်။ သူ့ရဲ့ အကြံပြုချက်ကို ငါနားထောင်ရင်၊ ဒီတစ်ခါ သူက ငါ့ထက် ပိုသာသလို ထင်ရလိမ့်မယ် မဟုတ်လား။ မဖြစ်ဘူး၊ ဒီကိစ္စနဲ့ပတ်သက်လို့ သူပြောတာကို ငါ နားမထောင်နိုင်ဘူး။ ငါ ကြိုက်သလို ငါလုပ်မယ်’ ဟု တွေးကြသည်။ ထို့နောက် အခြားလူ၏ အမြင်ရှုထောင့်ကို ငြင်းပယ်ရန် အကြောင်းပြချက်နှင့် ဆင်ခြေတစ်ခုကို သူတို့ ရှာကြသည်။ ၎င်းတို့ထက် သာလွန်သော လူတစ်ဦးကို ၎င်းတို့တွေ့မြင်သည့်အခါ လူတို့၏ စိတ်နှလုံးထဲရှိ မိမိတို့၏ နေရာကို ကာကွယ်ရန်အလို့ငှာ ထိုသူအကြောင်း အခြေအမြစ်မရှိသော ကောလာဟလများ လုပ်ကြံဖန်တီးလျက် သို့မဟုတ် ထိုသူကို အပုပ်ချပြီး ထိုသူ၏ ဂုဏ်သတင်းကို လျော့ပါးစေရန် စက်ဆုပ်ဖွယ်ကောင်းသော နည်းလမ်းများကို အသုံးချလျက် ထိုသူကို မိမိတို့၏ ခြေဖဝါးအောက်တွင်ပင် နင်းချေလျက် ထိုသူကို ပြိုလဲစေရန် ကြိုးစားကြ၏။ ဤသည်မှာ မည်သို့သော စိတ်သဘောထားအမျိုးအစားဖြစ်သနည်း။ ဤသည်မှာ မာနထောင်လွှားခြင်းနှင့် စိတ်ကြီးဝင်ခြင်း သက်သက်မဟုတ်ပေ။ စာတန်၏ စိတ်သဘောထားဖြစ်သည်။ ဤသည်မှာ မလိုမုန်းထားသော စိတ်သဘောထားဖြစ်သည်။ ဤလူက သူ့ထက်ပိုသာလွန်ပြီး ပို၍ စွမ်းဆောင်နိုင်သောသူတို့ကို တိုက်ခိုက်ပြီး ဖယ်ကြဉ်နိုင်ခြင်းသည် မသိမသာ ဒုက္ခပေးတတ်ပြီး ကောက်ကျစ်ဆိုးယုတ်သည်။ လူတို့ကို ပြိုလဲအောင်ပြုလုပ်ရန် ၎င်းတို့သည် မည်သည့်အရာကိုမဆို လုပ်ဆောင်မည်ဖြစ်သည်မှာ ၎င်းတို့ထဲတွင် နတ်ဆိုးဆန်သောသဘာဝ မသေးလှကြောင်းကို ပြသည်။ စာတန်၏ စိတ်သဘောထားဖြင့် အသက်ရှင်လျက် ၎င်းတို့သည် လူတို့ကို သေးသိမ်စေရန်၊ ချောက်ချရန်၊ လူတို့ကို ညှဉ်းပန်းရန် လုပ်ဆောင်တတ်ကြသည်။ ဤသည်မှာ မကောင်းမှုလုပ်ဆောင်ခြင်း မဟုတ်လော။ ဤသို့အသက်ရှင်လျက်ဖြင့် ၎င်းတို့ အဆင်ပြေသည်၊ လူကောင်းဖြစ်သည်ဟု ထင်ကြဆဲဖြစ်သည်။ သို့တိုင်အောင် ၎င်းတို့ထက် ပိုတော်သောသူကို မြင်သောအခါ ၎င်းတို့သည် ထိုသူတို့ကို ညှဉ်းပန်းရန်၊ ထိုသူတို့ကို အားလုံး နင်းချေပစ်ရန် လုပ်ဆောင်တတ်ကြသည်။ ဤတွင် ပြဿနာက အဘယ်နည်း။ ထိုသို့ ဒုစရိုက်အမှုများကို ကျူးလွန်နိုင်စွမ်း ရှိသည့်လူများသည် စိုးရိမ်ကြောင့်ကြမှုမဲ့သကဲ့သို့ ဇွတ်တရွတ်နိုင်သည် မဟုတ်လော။ ထိုသို့သော လူများသည် မိမိတို့၏ ကိုယ်ကျိုးစီးပွားများကိုသာ တွေးတောသည်၊ မိမိတို့၏ ကိုယ်ပိုင်ခံစားချက်များကို ဆင်ခြင်စဉ်းစားပြီး ၎င်းတို့သည် မိမိတို့၏ ကိုယ်ပိုင်လိုအင်များ၊ ရည်မှန်းချက်များနှင့် ပန်းတိုင်များကို စွမ်း‌ဆောင်ရရှိဖို့ကိုသာ အလိုရှိကြသည်။ အသင်းတော်၏အလုပ်အပေါ် ၎င်းတို့က မည်မျှ ထိခိုက်နစ်နာစေသည်ကို ဂရုမစိုက်ပေ။ ၎င်းတို့သည် လူတို့စိတ်ထဲရှိ ၎င်းတို့၏ အဆင့်အတန်းနှင့် ၎င်းတို့၏ ကိုယ်ပိုင် ဂုဏ်သတင်းကို ကာကွယ်ရန် ဘုရားအိမ်တော်၏ အကျိုးစီးပွားများကို စွန့်လွှတ်ဖို့ ပို၍ နှစ်သက်ကြသည်။ ဤသို့သောလူတို့သည် မာနထောင်လွှားခြင်း၊ မိမိကိုယ်ကို အမှန်ဟုထင်မြင်ခြင်း၊ တစ်ကိုယ်ကောင်းဆန်ပြီး ယုတ်မာခြင်းမရှိသလော။ ဤသို့သောသူတို့သည် မာနထောင်လွှားပြီး မိမိကိုယ်ကို အမှန်ဟု ထင်မြင်ရုံသာမက အလွန့်အလွန် တစ်ကိုယ်ကောင်းဆန်ပြီး ယုတ်မာသည်။ ၎င်းတို့သည် ဘုရားသခင်၏ ရည်ရွယ်ချက်များကို လုံးဝ အလေးမထားပေ။ ဤသို့သောသူတို့သည် ဘုရားသခင်ကို ကြောက်ရွံ့သော စိတ်နှလုံး ရှိသလော။ ၎င်းတို့သည် ဘုရားသခင်ကို ကြောက်ရွံ့သော စိတ်နှလုံး လုံးဝ မရှိပေ။ ဤအတွက်ကြောင့် ၎င်းတို့က အသိစိတ်၏ အပြစ်တင်ခြင်း လုံးဝမရှိဘဲ၊ စိုးရိမ်ပူပန်ခြင်း လုံးဝမရှိဘဲ၊ ကြောက်ရွံ့ခြင်း လုံးဝမရှိဘဲ၊ သို့မဟုတ် စိတ်ပူခြင်းလုံးဝ မရှိဘဲ၊ အကျိုးဆက်များကို ထည့်သွင်းစဉ်းစားခြင်း မရှိဘဲ လက်လွတ်စပယ် လုပ်ဆောင်ကာ အလိုရှိသလို ဆောင်ရွက်ကြခြင်း ဖြစ်သည်။ ဤသည်မှာ ၎င်းတို့ မကြာခဏ လုပ်ဆောင်သည့်အရာနှင့် အမြဲ ပြုမူကြပုံ ဖြစ်သည်။ ထိုသို့သော အပြုအမူ၏ သဘာဝမှာ အဘယ်နည်း။ သက်သက်သာသာ ပြောရမည်ဆိုလျှင် ထိုသို့သော လူများသည် အလွန့်အလွန် မနာလိုတတ်ကြပြီး ပုဂ္ဂိုလ်ရေး ဂုဏ်သတင်းနှင့် အဆင့်အတန်းအတွက် အလွန် အားကောင်းသည့် လိုအင်ဆန္ဒတစ်ခု ရှိကြလေသည်။ ၎င်းတို့သည် အလွန် လှည့်ဖြားကြပြီး မသိမသာ ဒုက္ခပေးတတ်ကြသည်။ သာ၍ ပြင်းထန်စွာ ပြောရလျှင် ပြဿနာ၏ အနှစ်သာရမှာ ထိုသို့သော လူများတွင် ဘုရားသခင်ကို ကြောက်ရွံ့သော စိတ်နှလုံး လုံးဝ မရှိကြခြင်းဖြစ်သည်။ ဘုရားသခင်ကို သူတို့ မကြောက်ပေ၊ မိမိတို့ကိုယ်ကို အကြီးမြတ်ဆုံးအဖြစ် ယုံကြည်ကြပြီး မိမိတို့၏ ရှိသမျှအရာအားလုံးကို ဘုရားသခင်ထက် ပိုမြင့်ပြီး သမ္မာတရားထက် ပိုမြင့်သည်ဟု သူတို့မှတ်ယူကြသည်။ သူတို့၏ စိတ်နှလုံးများထဲတွင် ဘုရားသခင်သည် ဖော်ပြဖို့ မထိုက်တန်ဘဲ အရေးမပါဖြစ်ကာ သူတို့၏ စိတ်နှလုံးများထဲတွင် ဘုရားသခင်သည် လုံးဝ အဆင့်အတန်း တစ်စက်မျှ မရှိချေ။ မိမိတို့၏ နှလုံးသားများထဲတွင် ဘုရားသခင်အတွက် နေရာမရှိသောသူများနှင့် ဘုရားသခင်ကို ကြောက်ရွံ့သော စိတ်နှလုံး မရှိသူများက သမ္မာတရားကို လက်တွေ့လုပ်ဆောင်နိုင်ကြသလော။ လုံးဝ မလုပ်ဆောင်နိုင်ပေ။ ထို့ကြောင့် သူတို့သည် ထုံးစံအတိုင်း အလုပ်ရှုပ်ပြီး အားထုတ်မှုများစွာကို အသုံးပြုကြကာ ခွန်အားပြည့်ဝစွာ သွားလာကြသောအခါ သူတို့ မည်သည့်အရာ ပြုလုပ်နေကြသနည်း။ ထိုကဲ့သို့သောလူတို့က ဘုရားသခင်အတွက် အသုံးတော်ခံရန် အရာရာတိုင်းကို စွန့်လွှတ်ပြီး များစွာဒုက္ခခံခဲ့ကြပြီဟုပင် ကြွေးကြော်ကြ၏၊ သို့သော်လည်း အမှန်မှာမူ သူတို့လုပ်ဆောင်ချက်များအားလုံး၏ စေ့ဆော်မှု၊ စည်းမျဉ်းနှင့် ရည်ရွယ်ချက်တို့မှာ ၎င်းတို့၏ ကိုယ်ပိုင်အဆင့်အတန်းနှင့် ဂုဏ်သိက္ခာအတွက်၊ ၎င်းတို့၏ အကျိုးစီးပွားအားလုံးကို ကာကွယ်ရန်အတွက် ဖြစ်သည်။ ဤသို့သောလူမျိုးကို ဆိုးဝါးသည်ဟု သင်တို့ ဆိုမည်လော၊ မဆိုမည်လော။ မည်သည့် လူစားမျိုးသည် ဘုရားသခင်ကို နှစ်ပေါင်းများစွာ ယုံကြည်ပြီးဖြစ်သည့်တိုင် ဘုရားသခင်ကို ကြောက်ရွံ့သော စိတ်နှလုံး မရှိရသနည်း။ ၎င်းတို့သည် မာနထောင်လွှားသူများ မဟုတ်သလော။ ၎င်းတို့သည် စာတန်များ မဟုတ်သလော။ မည်ကဲ့သို့သော အရာများသည် ဘုရားသခင်ကို ကြောက်ရွံ့သော စိတ်နှလုံး မရှိဆုံး ဖြစ်သနည်း။ သားရဲတိရစ္ဆာန်များမှလွဲ၍ ဆိုးယုတ်သူများနှင့် အန္တိခရစ်များ၊ နတ်ဆိုးများနှင့် စာတန်၏ အမျိုးများ ဖြစ်ပေသည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ဘုရားသခင်ကို ယုံကြည်ခြင်းနှင့်သက်ဆိုင်သည့် မှန်ကန်သော လမ်းကြောင်းပေါ် စတင်ရန် ပြည့်စုံရမည့် သတ်မှတ်ချက် ငါးချက်) ဘုရားသခင်ရဲ့ နှုတ်ကပတ်တော်တွေကို ဖတ်ပြီးတော့ ကျွန်မစိတ်နှလုံးထဲမှာ နက်နက်ရှိုင်းရှိုင်း နာကျင်ခံစားခဲ့ရပြီး ကျွန်မဟာ ကိုယ်တော်ဖော်ထုတ်ခဲ့တဲ့၊ ဘုရားသခင်ကို ကြောက်ရွံ့တဲ့ စိတ်နှလုံးမရှိတဲ့ လူစားမျိုး အတိအကျပဲဆိုတာကို တွေ့လိုက်ရတယ်။ တိရစ္ဆာန်တွေ၊ ဆိုးယုတ်တဲ့လူတွေ၊ အန္တိခရစ်တွေ၊ နတ်ဆိုးတွေနဲ့ စာတန်တို့ပဲ ဘုရားသခင်ကို ကြောက်ရွံ့တဲ့ စိတ်နှလုံး လုံးဝမရှိကြဘူးလို့ ဘုရားသခင်က ပြောခဲ့ပြီး၊ ဒီလိုလူတွေအပေါ် ဘုရားသခင်ရဲ့ ရွံရှာစက်ဆုပ်ခြင်းနဲ့ အမုန်းတရားကို ကျွန်မ ခံစားနိုင်ခဲ့တယ်။ ဒါကို စဉ်းစားကြည့်တော့၊ ကျွန်မက ဘုရားသခင်ကို ယုံကြည်ပေမဲ့၊ ကျွန်မစိတ်နှလုံးထဲမှာ ကိုယ်တော့်အတွက် နေရာမရှိခဲ့ဘူး။ ကျွန်မရဲ့ကိုယ်ပိုင်ကျော်ကြားမှုနဲ့ အဆင့်အတန်းကို အမြဲတမ်း ဦးစားပေးခဲ့ပြီး၊ တခြားသူတွေကို နည်းမျိုးစုံနဲ့ ဖိနှိပ်ဖယ်ကြဉ်တဲ့အထိတောင် လုပ်ခဲ့တယ်။ ချန်ဒန်က ကျွန်မထက် အစွမ်းအစကောင်း ပိုရှိတာကို မြင်တော့၊ ကျွန်မ မနာလိုဖြစ်ပြီး အရာရာတိုင်းမှာ ကိုယ့်ကိုယ်ကိုယ် သူနဲ့ နှိုင်းယှဉ်ခဲ့တယ်။ ချန်ဒန် အဖွဲ့ခေါင်းဆောင်ဖြစ်လာပြီးနောက်မှာ၊ ကျွန်မက ရေလောင်းခြင်းအလုပ်ကို သူ့ထက်ပိုကြာကြာလုပ်ခဲ့တာဖြစ်လို့၊ သူက ကျွန်မအတွက် အလုပ်တွေ စီစဉ်ပေးတာဟာ၊ ကျွန်မရဲ့မာနကို ထိခိုက်စေတယ်လို့ ခံစားခဲ့ရတယ်။ ဒါကြောင့် ကျွန်မ တမင်တကာ သူ့နဲ့ ပူးပေါင်းဆောင်ရွက်ဖို့ ငြင်းဆန်ပြီး ကိစ္စတွေကို သူ့အတွက် ခက်ခဲအောင်လုပ်ခဲ့တယ်။ ဆွေးနွေးပွဲတွေမှာတောင် သူ့စကားကို နားထောင်တာက ကျွန်မက သူ့ထက် ညံ့တဲ့ပုံပေါက်သွားမှာစိုးလို့ သင့်လျော်တဲ့ သူ့ရဲ့အကြံပြုချက်တွေကို လက်ခံဖို့ ငြင်းဆန်ပြီးတော့ ကိုယ့်ကိုယ်ကိုယ် အမြဲ သိက္ခာဆယ်ခဲ့တယ်။ နောက်ဆုံးမှာတော့ သူက ကျွန်မကို ကဏ္ဍတိုင်းမှာ ကျော်တက်သွားပြီး သူ့ထက် ကျွန်မ မသာနိုင်တော့တာကို မြင်တဲ့အခါ၊ အဖွဲ့ထဲမှာ ကျွန်မအတွက် ထင်ပေါ်ကျော်ကြားဖို့ အလားအလာမရှိတော့ဘူးလို့ ခံစားခဲ့ရတယ်၊ ဒါကြောင့် ကျွန်မက တမင်တကာ အနှောင့်အယှက်ပေးပြီး ကိုယ့်တာဝန်ကို ထမ်းဆောင်ဖို့ကို အတိုက်အခံလုပ်လာခဲ့တယ်။ ဒါက ကျွန်မစိတ်နှလုံးထဲမှာ ဘုရားသခင်ကို ကြောက်ရွံ့မှုမရှိတာနဲ့ လူ့သဘာဝကင်းမဲ့တာကို ထုတ်ဖော်ခဲ့တယ်။ ကျွန်မစိတ်နှလုံးထဲမှာ ဘုရားသခင်ကို ကြောက်ရွံ့တဲ့စိတ် နည်းနည်းလေးလောက်သာရှိခဲ့ရင်၊ ဒီလိုဒုစရိုက်အမှုတွေကို ကျွန်မ လုပ်ခဲ့မှာမဟုတ်သလို၊ ကိုယ့်ခံပြင်းစိတ်တွေကို အသင်းတော်အလုပ်အပေါ်မှာ မဲမိမှာလည်း မဟုတ်ဘူး။ ကျွန်မ ကိုယ့်တာဝန်တွေကို စိတ်ရင်းမှန်နဲ့ မထမ်းဆောင်နိုင်ခဲ့ရုံတင်မကဘဲ တခြားသူတွေ သူတို့တာဝန်ထမ်းဆောင်တာကိုလည်း နှောင့်ယှက်ခဲ့ပြီး အသင်းတော်အလုပ်ကိုလည်း နှောင့်ယှက်ခဲ့တယ်။ ဒါက ဘုရားသခင်ရဲ့ ရွံရှာစက်ဆုပ်ခြင်းကို မဖြစ်စေနိုင်ဘဲ ဘယ်နေမှာလဲ။ ဒီဖြုတ်ချခံရခြင်းဟာ ကျွန်မအပေါ် သက်ရောက်လာတဲ့ ဘုရားသခင်ရဲ့ ဖြောင့်မတ်တဲ့ စိတ်သဘောထားရဲ့အကျိုးဆက်ပဲ၊ ကျွန်မဟာ ကိုယ့်ပြဿနာကိုယ်ရှာခဲ့တာပဲလေ။ ကျွန်မစိတ်ထဲမှာ နက်နက်ရှိုင်းရှိုင်း နောင်တရပြီး ကိုယ့်ကိုယ်ကိုယ်အပြစ်တင်မိတယ်၊ ပြီးတော့ ဘုရားသခင်ဆီ ဝန်ချလို့ နောင်တရပြီး တိတ်တိတ်လေး ဆုတောင်းခဲ့တယ်။

ဆက်ပြီးတော့ ပင်ကိုစွမ်းရည်ရှိပြီး အစွမ်းအစရှိတဲ့သူတွေကို မနာလိုဖြစ်တဲ့ ကျွန်မရဲ့ပြဿနာကို ဘယ်လိုဖြေရှင်းမလဲ၊ ပြီးတော့ ကျော်ကြားမှုနဲ့ အဆင့်အတန်းကို လိုက်စားတဲ့ ကျွန်မရဲ့ရည်မှန်းချက်ကို ဘယ်လိုကိုင်တွယ်မလဲဆိုတာကို ကျွန်မ နားလည်ဖို့ ကြိုးစားခဲ့တယ်။ တစ်နေ့မှာ ဘုရားသခင်ရဲ့ နှုတ်ကပတ်တော်တွေကို ကျွန်မ ဖတ်ခဲ့ရတယ်။ “လူတို့၏မွေးရာပါ ဆုကျေးဇူးများနှင့် စွမ်းရည်များကို ဘုရားသခင် အပ်နှင်းထားခြင်းဖြစ်သည်။ ယင်းတို့ကို ဘုရားသခင်က ရှေးယခင်ကတည်းက ကြိုတင်ပြဋ္ဌာန်းထားခဲ့သည်။ ဘုရားသခင်က သင့်အား တုံးအအောင်ပြုပါက သင်၏တုံးအမှု၌ အဓိပ္ပာယ်ရှိပေသည်။ အကယ်၍ သူက သင့်အား ထက်မြက်အောင်ပြုပါက သင်၏ထက်မြက်မှု၌ အဓိပ္ပာယ်ရှိ၏။ ဘုရားသခင်က သင့်အား မည်သည့်စွမ်းရည်များကိုမဆို ပေးပါစေ၊ သင်၏အားသာချက်များက မည်သည့်အရာဖြစ်ပါစေ၊ သင်၏ဉာဏ်ရည်ဉာဏ်ကဲက မည်မျှမြင့်မားပါစေ ယင်းတို့အားလုံးသည် ဘုရားသခင်အတွက် ရည်ရွယ်ချက် တစ်ခုရှိလေသည်။ ဤအရာများအားလုံးကို ဘုရားသခင်က ကြိုတင်ပြဋ္ဌာန်းထားသည်။ သင်၏ ဘဝတွင် သင်ပါဝင်လုပ်ဆောင်ရသောနေရာနှင့် သင်ထမ်းဆောင်သောတာဝန်တို့ကို ရှေးယခင်ကတည်းက ဘုရားသခင်က ကြိုတင်ပြဋ္ဌာန်းထားပြီးဖြစ်သည်။ အချို့သောလူတို့သည် ၎င်းတို့မပိုင်ဆိုင်သော အားသာချက်များကို အခြားလူများက ပိုင်ဆိုင်သည်ကိုမြင်ပြီး မကျေမနပ်ဖြစ်ကြသည်။ ၎င်းတို့က သာ၍ သင်ယူလေ့လာခြင်း၊ သာ၍ကြည့်ခြင်းနှင့် သာ၍ လုံ့လဝီရိယရှိခြင်းတို့အားဖြင့် အမှုကိစ္စများကို ပြောင်းလဲလိုကြသည်။ သို့သော် ၎င်းတို့၏ လုံ့လဝီရိယက စွမ်းဆောင်ရရှိနိုင်သည့်အရာတွင် အကန့်အသတ်ရှိသည်။ ၎င်းတို့သည် ဆုကျေးဇူးများနှင့် ကျွမ်းကျင်မှုများ ရှိသည့်လူတို့ကို မကျော်နိုင်ပေ။ သင်မည်မျှ တွန်းလှန်တိုက်ခိုက်ပါစေ အသုံးမဝင်ပေ။ သင်ဖြစ်မည့်အရာကို ဘုရားသခင်က ကြိုတင်ပြဋ္ဌာန်းပြီးဖြစ်ကာ ယင်းကိုပြောင်းလဲရန် မည်သူကမျှ လုပ်နိုင်သည့်အရာ တစ်ခုမျှမရှိပေ။ သင်သည် မည်သည့်အရာ၌ တော်ပါစေ ယင်းသည် သင်အားထုတ်ကြိုးပမ်းသင့်သည့် နေရာဖြစ်သည်။ သင်နှင့် သင့်တော်သည့် မည်သည့်တာဝန်မဆိုသည် သင်ထမ်းဆောင်သင့်သည့် တာဝန်ဖြစ်သည်။ သင် မကျွမ်းကျင်သည့် အခြားအပိုင်းများကို အတင်းလုပ်ဆောင်ရန် မကြိုးစားနှင့်၊ အခြားသူများကို မနာလိုမဖြစ်နှင့်။ လူတိုင်း၌ ၎င်းတို့၏အသုံးဝင်မှုရှိသည်။ အခြားလူများကို လူစားထိုးပြီး သင့်ကိုယ်သင် အများမြင်အောင် ပြသဖို့အတွက် အစဉ်ဆန္ဒရှိလျက် သင်သည် အရာရာတိုင်းကို ကောင်းစွာလုပ်ဆောင်နိုင်သည်၊ သို့မဟုတ် သင်သည် အခြားလူများထက်ပို၍ ပြည့်စုံသည်၊ သို့မဟုတ် တော်သည်ဟု မထင်နှင့်။ ဤသည်မှာ ဖောက်ပြန်ပျက်စီးသည့် စိတ်သဘောထားတစ်ခုဖြစ်သည်။...သင့်တွင် ထိုကဲ့သို့သော စိတ်သဘောထားတစ်ခု ရှိသောအခါ သင်သည် သူတစ်ပါးတို့ကို ဖိနှိပ်ရန် အစဉ်ကြိုးစားနေသည်၊ ၎င်းတို့ထက် သာရန် အစဉ်ကြိုးစားနေသည်၊ ဖြတ်စားလျှပ်စား အစဉ်လုပ်နေသည်၊ လူတို့ထံမှ ရယူရန် အစဉ်ကြိုးစားနေသည်။ သင်သည် အလွန်အမင်း မနာလိုဖြစ်သည်၊ မည်သူ့ကိုမျှ အလျှော့မပေး၊ ထို့ပြင် လူပုံအလယ်၌ မိမိကိုယ်ကို သိသာထင်ရှားစေရန် အစဉ်ကြိုးစားနေသည်။ ဤသည်မှာ ပြဿနာသဘောသက်ရောက်သည်။ ဤသည်မှာ စာတန်လုပ်ဆောင်သည့်ပုံစံဖြစ်သည်။ သင်သည် စံနှုန်းပြည့်မီသော ဖန်ဆင်းခံတစ်ဦး အမှန်တကယ် ဖြစ်လိုလျှင် သင်၏ ကိုယ်ပိုင်အိပ်မက်များ နောက်သို့မလိုက်နှင့်။ သင်၏ ရည်မှန်းချက်များ အောင်မြင်ရန်အတွက် သင့်ကိုယ်သင်ထက် ပို၍ သာလွန်ပြီး စွမ်းဆောင်နိုင်အောင် ကြိုးစားခြင်းသည် မကောင်းပေ။ သင်သည် ဘုရားသခင်၏ စီစဉ်ညွှန်ကြားမှုနှင့် အစီအစဉ်များကို ကျိုးနွံနာခံရန် သင်ယူသင့်ကာ လူသားတစ်ဦးယူသင့်သည့် နေရာကို စွဲမြဲစွာနေသင့်သည်။ ဤသည်ကသာ ဆင်ခြင်တုံတရားရှိခြင်း၏ သရုပ်ဖော်ချက်တစ်ခုဖြစ်၏။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ပြုမူနေထိုင်ခြင်းတွင် ရှိထားသင့်သည့် စည်းမျဉ်းများ) ဘုရားသခင်ရဲ့ နှုတ်ကပတ်တော်တွေကို ဖတ်ပြီးနောက်မှာ ကျွန်မစိတ်နှလုံးထဲမှာ တို့ထိခံစားခဲ့ရတယ်။ အစွမ်းအစကောင်းတဲ့လူတွေနဲ့ ကြုံရတိုင်း ကျွန်မက မနာလိုဖြစ်လာပြီး သူတို့နဲ့ကိုယ့်ကိုယ်ကိုယ် နှိုင်းယှဉ်တယ်၊ ကျော်ကြားမှုနဲ့ အဆင့်အတန်းကို ထိန်းမနိုင်သိမ်းမရ လိုက်စားတတ်တယ်ဆိုတာကို ကျွန်မ သဘောပေါက်ခဲ့တယ်။ ဒီအပြုအမူဟာ အရာရာတိုင်းမှာ သူများတွေထက် သာချင်တဲ့ မာနထောင်လွှားတဲ့ ကိုယ့်ကိုယ်ပိုင်စိတ်သဘောထားထဲမှာ အမြစ်တွယ်နေခဲ့တယ်၊ ဒါပေမဲ့ ကျွန်မမှာရှိတဲ့ ဆုကျေးဇူးနဲ့ အစွမ်းအစတွေဟာ ဘုရားသခင်က ကြိုတင်သတ်မှတ်ထားတာဖြစ်ပြီး၊ အဲဒီထဲမှာ ဘုရားသခင်ရဲ့ ကောင်းမွန်တဲ့ရည်ရွယ်ချက်လည်း ရှိတယ်။ ကျွန်မရဲ့ မာနထောင်လွှားတဲ့ စိတ်သဘောထားကြောင့် ကျွန်မဟာ ကျော်ကြားမှုနဲ့ အဆင့်အတန်းကို အမြဲတမ်းလိုက်စားချင်ခဲ့တယ်၊ ကျွန်မမှာသာ တကယ်အဲဒီလောက်ကောင်းတဲ့ အစွမ်းအစရှိခဲ့ရင် ဘယ်လောက်တောင် မာနထောင်လွှားလိုက်မလဲဆိုတာ ဘယ်သူသိမှာလဲ။ ကျွန်မဟာ မကောင်းမှုတွေအများကြီးကျူးလွန်ပြီး အန္တိခရစ်ရဲ့ လမ်းကြောင်းကို လိုက်လို့ အသင်းတော်ကနေ နှင်ထုတ်ခံရတာနဲ့ အဆုံးသတ်သွားနိုင်တယ်။ ဘုရားသခင်က ကျွန်မကို သာမန်အစွမ်းအစရှိဖို့ ကြိုတင်သတ်မှတ်ထားတာဟာ ကျွန်မအတွက် ကာကွယ်ခြင်းတစ်ခုပဲ။ ဒါ့အပြင် ဘုရားသခင်က ကျွန်မတို့ကို စွမ်းအားရှင်တွေ ဒါမှမဟုတ် ကြီးမြတ်တဲ့လူတွေဖြစ်ဖို့နဲ့ အရာရာတိုင်းမှာ တခြားသူတွေထက် သာဖို့ မတောင်းဆိုပါဘူး။ ဘုရားသခင်တန်ဖိုးထားတာက ကျွန်မတို့ဟာ ကိုယ့်ရဲ့ဝိညာဉ်ရင့်ကျက်မှုနဲ့ အစွမ်းအစတွေအလိုက်၊ ကျွန်မတို့ လုပ်နိုင်တဲ့အရာကို အပြည့်အဝ အသုံးချပြီး၊ စစ်မှန်တဲ့ စိတ်နှလုံးနဲ့ ကိုယ့်တာဝန်တွေကို ကောင်းကောင်းထမ်းဆောင်ဖို့ကို အာရုံစိုက်ခြင်းပဲဖြစ်တယ်။ ချန်ဒန်က အစွမ်းအစပိုကောင်းပြီး၊ အဖွဲ့ခေါင်းဆောင်အနေနဲ့ အဖွဲ့ရဲ့အလုပ်တစ်ခုလုံးကို တိုက်တွန်းအားပေးဖို့က သူ့ရဲ့တာဝန်ပဲ။ ကျွန်မက သူ့ကို ထောက်ပံ့ပြီး ပူးပေါင်းဆောင်ရွက်သင့်တယ်၊ သူ့ရဲ့အားသာချက်တွေကို သင်ယူပြီး သူနဲ့ သဟဇာတရှိရှိ အတူတူ အလုပ်လုပ်ပြီးပေါ့၊ ဒါမှ ကျွန်မရဲ့တာဝန်ကို ပိုကောင်းအောင် ထမ်းဆောင်နိုင်မှာလေ။ ကျွန်မတို့ရဲ့အစွမ်းအစတွေက ကောင်းတာဖြစ်ဖြစ်၊ ညံ့တာဖြစ်ဖြစ်၊ လူတိုင်းရဲ့ ဘုံရည်မှန်းချက်က ကိုယ့်တာဝန်တွေကို ကောင်းကောင်းထမ်းဆောင်ဖို့ပဲ၊ အဲဒါက အရေးကြီးဆုံးအရာပဲ။ ကျွန်မ တခြားသူတွေနဲ့ အဆက်မပြတ် နှိုင်းယှဉ်ပြိုင်ဆိုင်နေခဲ့တာဟာ တကယ်တော့ ဘုရားသခင်ကို အတိုက်အခံလုပ်နေတာ၊ ဘုရားသခင်ရဲ့ အချုပ်အခြာအာဏာနဲ့ စီစဉ်မှုတွေကို ကျိုးနွံနာခံမှုမရှိတာဖြစ်ပြီး၊ စာတန်ရဲ့ညှဉ်းပန်းမှုကို ကျွန်မ ခံစားရစေဖို့ပဲ ဦးတည်ခဲ့တယ်။ ကိုယ့်တာဝန်တွေကို ထမ်းဆောင်ဖို့ အခွင့်အရေးကို တန်ဖိုးမထားဘဲ၊ အဲဒီအစား တခြားသူတွေနဲ့ ရန်ဖြစ်ပြိုင်ဆိုင်ဖို့ကိုပဲ အာရုံစိုက်ခဲ့တာကို ဆင်ခြင်သုံးသပ်မိတော့ ကျွန်မ နည်းနည်းနောင်တရမိတယ်။

သုံးလေးလကြာပြီးနောက်မှာ၊ ခေါင်းဆောင်တွေက ကျွန်မကို ချန်ဒန်ရယ် တခြားသူတွေနဲ့ရယ် အလုပ်လုပ်ဖို့ စီစဉ်ပေးခဲ့တယ်။ အစပိုင်းမှာ ကျွန်မ နည်းနည်းစိုးရိမ်မိတယ်၊ ဖောက်ပြန်တဲ့စိတ်သဘောထားတွေ ထပ်ထုတ်ဖော်မိမှာကို ကြောက်လို့ပေါ့။ ဒါပေမဲ့ ဒီအခြေအနေဟာ ဘုရားသခင်စီစဉ်ပေးတာဖြစ်ပြီး ကျွန်မအတွက် နောင်တရဖို့ အခွင့်အရေးတစ်ခုပဲဆိုတာကိုလည်း ကျွန်မသိခဲ့တယ်။ ဘုရားသခင်ကို ကျွန်မ စိတ်မပျက်စေချင်ဘူး၊ ဒါကြောင့် ကျွန်မ ဒါကို ရင်ဆိုင်ဖို့လိုအပ်တယ်။ ကျွန်မ သတိရှိရှိနဲ့ ဘုရားသခင်ဆီကို ပိုပြီးဆုတောင်းခဲ့တယ်၊ ကိုယ်တော်ရဲ့ မျက်မှောက်မှာ အသက်ရှင်နေထိုင်နိုင်ဖို့ ကိုယ်တော်ရဲ့စောင့်ရှောက်မှုကို တောင်းခံခဲ့တယ်၊ ပြီးတော့ ကျော်ကြားမှုနဲ့ အကျိုးအမြတ်ကို မရှာဖွေဖို့၊ တခြားသူတွေနဲ့ ကိုယ့်ကိုယ်ကိုယ် မနှိုင်းယှဉ်ဖို့ အဆက်မပြတ် သတိပေးနေခဲ့တယ်။ တစ်ခါတုန်းက ကျွန်မ မှတ်မိသေးတယ်၊ ညီအစ်မတစ်ယောက် သိသိသာသာ တိုးတက်လာတာကို ကျွန်မ သတိထားမိတော့၊ ကျွန်မ ချက်ချင်းပဲ လမ်းပျောက်သလိုဖြစ်ပြီး စိုးရိမ်စိတ်ဝင်လာတယ်၊ အဲဒီညီအစ်မက ကျွန်မကို ကျော်တက်သွားမှာ၊ ပြီးတော့ ကျွန်မက အဖွဲ့ထဲမှာ အညံ့ဆုံးဖြစ်လာပြီး သိက္ခာကျရမှာကို ကြောက်ခဲ့တယ်။ ကျွန်မဟာ တခြားသူတွေနဲ့ ကိုယ့်ကိုယ်ကိုယ် ထပ်ပြီးနှိုင်းယှဉ်နေမိပြန်ပြီဆိုတာကို ချက်ချင်း သဘောပေါက်လိုက်ပြီး ကျွန်မ စိတ်နှလုံးထဲမှာ သတိရှိရှိနဲ့ ဘုရားသခင်ဆီကို ဆုတောင်းခဲ့တယ်။ အရင်က ကျွန်မဖတ်ခဲ့တဲ့ ဘုရားသခင်ရဲ့ နှုတ်ကပတ်တော်တွေကို ကျွန်မ စဉ်းစားမိတယ်။ “သင်၏တာဝန်ကို အမှန်ပင် ကောင်းစွာထမ်းဆောင်လိုလျှင် ရှေးဦးစွာ သင့်အတွက် သင့်တော်သော နေရာကို ရှာရမည်ဖြစ်ပြီး ထို့နောက်တွင် သင် လုပ်ဆောင်နိုင်သမျှကို သင်၏ စိတ်နှလုံး အကြွင်းမဲ့ရှိသမျှနှင့်၊ ဉာဏ်ရှိသမျှနှင့် အစွမ်းသတ္တိ ရှိသမျှနှင့် လုပ်ဆောင်ပြီး သင်တတ်နိုင်သမျှ လုပ်ဆောင်လော့။ ဤသည်မှာ အရည်အချင်းပြည့်မီပြီး ထိုကဲ့သို့သော တာဝန်ထမ်းဆောင်မှုတွင် စင်ကြယ်မှု အတိုင်းအတာတစ်ခု ရှိသည်။ ဤသည်မှာ စစ်မှန်သော ဖန်ဆင်းခံ တစ်ယောက် လုပ်သင့်သည့်အရာ ဖြစ်သည်။ ပထမဦးစွာ စစ်မှန်သော ဖန်ဆင်းခံတစ်ယောက်သည် အဘယ်ဖြစ်သည်ကို သင် နားလည်ရမည်။ ပုံမှန် ဖန်ဆင်းခံတစ်ယောက်သည် အာဂလူ တစ်ယောက် မဟုတ်ဘဲ ကမ္ဘာမြေပေါ်တွင် တည်ငြိမ်သောပုံစံဖြင့် အသက်ရှင် နေထိုင်သူတစ်ယောက် ဖြစ်သည်။ သူတို့သည် သာမန်ထက် လွန်ကဲခြင်း လုံးဝ မရှိသည့်အပြင် ထူးခြားခြင်း စိုးစဉ်းမျှမရှိဘဲ သာမန်လူတစ်ဦးနှင့် တူညီပေသည်။ အခြားသူများထက် အမြဲသာလွန်ဖို့၊ အခြားသူများထက် အဆင့်အတန်းရှိဖို့ သင် အစဉ်သဖြင့် ဆန္ဒရှိပါက သင်သည် စာတန်၏ မာနထောင်လွှားသော စိတ်သဘောထားဖြင့် စိုးမိုးခြင်းခံရပြီး ယင်းမှာ သင်၏ ရည်မှန်းချက်က ဖြစ်ပွားစေသော ထင်ယောင်ထင်မှားဖြစ်ခြင်းတစ်ခု ဖြစ်လေသည်။ အမှန်မှာမူ ဤအရာကို သင် မရရှိနိုင်ဘဲ၊ သင့်အတွက် ထိုသို့လုပ်ဆောင်ရန်လည်း မဖြစ်နိုင်ချေ။ ဘုရားသခင်က သင့်အား ထိုသို့သော ပါရမီ သို့မဟုတ် ကျွမ်းကျင်မှုတို့ကို မပေးခဲ့သကဲ့သို့၊ ထိုသို့သော အနှစ်သာရတစ်ခုကိုလည်း သူက သင့်အား မပေးခဲ့ချေ။ သင်သည် အခြားသူများနှင့် လုံးလုံး ကွဲပြားခြားနားခြင်း မရှိဘဲ သာမန်လူသားမျိုးနွယ်ဝင် တစ်ဦးဖြစ်သည်ကို မမေ့နှင့်။ သင်၏ အသွင်အပြင်၊ မိသားစုနှင့် သင်မွေးဖွားရာ နောက်ကြောင်းရာဇဝင်တို့က ကွဲပြားကောင်း ကွဲပြားနိုင်ပြီး သင်၏ စွမ်းပကားများနှင့် ဆုကျေးဇူးများတွင် ကွဲပြားခြားနားမှု တစ်ခုခု ရှိကောင်း ရှိနေနိုင်ခြင်းသာ ဖြစ်လေသည်။ သို့ရာတွင် ဤအချက်ကို မမေ့လေနှင့်။ သင်သည် မည်မျှပင် ထူးခြားနေပါစေ၊ ဤသေးငယ်သော နည်းလမ်းများနှင့် သင်၏ ဖောက်ပြန်ပျက်စီးသော စိတ်သဘောထားတို့၌သာလျှင် အခြားသူများနှင့် တထေရာတည်းဖြစ်သည်၊ သင်၌ ရှိသင့်သည့် စိတ်နေစိတ်ထားနှင့် သင်၏တာဝန် ထမ်းဆောင်ခြင်းတွင် လိုက်နာရမည့် အခြေခံ သဘောတရားများ သည် အခြားသူများနှင့် ချွတ်စွပ်တူသည်။ ၎င်းတို့၏ ခွန်အားများနှင့် ဆုကျေးဇူးများတွင်မျှသာ လူများသည် ကွဲပြားကြလေသည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ ပြုမူနေထိုင်ခြင်းတွင် ရှိထားသင့်သည့် စည်းမျဉ်းများ) ဘုရားသခင်ရဲ့ နှုတ်ကပတ်တော်တွေက ကျွန်မဟာ သာမန်ဖန်ဆင်းခံတစ်ဦး၊ သာမန်လူတစ်ယောက်ပဲဆိုတာကိုကျွန်မ နားလည်အောင် ကူညီပေးခဲ့တယ်။ ကျွန်မမသိတဲ့အရာတွေ ဒါမှမဟုတ် တခြားသူတွေလောက် မတော်တဲ့နေရာတွေ ရှိနေတာက ပုံမှန်ပါပဲ။ ကျွန်မက ယုံကြည်သူအသစ်တွေကို ရေလောင်းတာကို အရင်စပြီးလေ့ကျင့်ခဲ့ရုံနဲ့ ကဏ္ဍတိုင်းမှာ တခြားသူတွေထက် ပိုတော်သင့်တယ်လို့ အဓိပ္ပာယ်မရှိဘူး။ ဒီလိုမျိုးစဉ်းစားတာဟာ မာနထောင်လွှားပြီး ဆင်ခြင်တုံတရား မရှိတာပဲ။ ဘုရားသခင်က ကျွန်မကို သာမန်လူတစ်ယောက်ဖြစ်ဖို့၊ တာဝန်သိသိနဲ့ ကျွန်မအကောင်းဆုံးကြိုးစားဖို့၊ ပြီးတော့ ကျွန်မရဲ့ ဝိညာဉ်ရင့်ကျက်မှုနဲ့ အစွမ်းအစတွေအလိုက် ကိုယ့်ရဲ့စွမ်းဆောင်နိုင်စွမ်းတွေကို အပြည့်အဝအသုံးချဖို့ တောင်းဆိုတယ်။ ဒါ့အပြင် ဘုရားသခင်က လူတစ်ယောက်ချင်းစီကို မတူညီတဲ့ အစွမ်းအစတွေ နဲ့ အားသာချက်တွေ ပေးထားတယ်။ အတူတူ အလုပ်လုပ်ပြီး၊ ကျွန်မတို့ဟာ တစ်ယောက်နဲ့တစ်ယောက်ရဲ့ အားသာချက် အားနည်းချက်တွေကို အပြန်အလှန်ဖြည့်ဆည်းပေးနိုင်တယ်၊ သဟဇာတရှိရှိ ပူးပေါင်းဆောင်ရွက်နိုင်တယ်၊ ဒါက တာဝန်အတွက် အကျိုးရှိတယ်။ ညီအစ်မမှာ ကျွန်မမှာမရှိတဲ့ စွမ်းဆောင်နိုင်စွမ်းတွေရှိရင်၊ ကျွန်မ သူ့ဆီကနေ သင်ယူသင့်တယ်၊ ဒါကလည်း ကျွန်မရဲ့ အားနည်းချက်တွေကို ဘုရားသခင်က အစားထိုးပေးတဲ့ နည်းလမ်းတစ်ခုပဲ။ ဘုရားသခင်ရဲ့ ရည်ရွယ်ချက်ကို သဘောပေါက်လိုက်တာနဲ့ ကျွန်မစိတ်ထဲမှာ သက်သာရာရသွားပြီး၊ တဖြည်းဖြည်းနဲ့ ကိုယ့်တာဝန်တွေအပေါ်မှာ ပိုပြီးအာရုံစိုက်လာနိုင်ခဲ့တယ်။ ကျွန်မ ချန်ဒန်နဲ့ ပြန်လည်ရင်ဆိုင်ရတဲ့အခါ၊ သူ့အလုပ်ကို ထောက်ပံ့ပြီး သူနဲ့ သဟဇာတရှိရှိ ပူးပေါင်းဆောင်ရွက်နိုင်ခဲ့တယ်။ ကျွန်မနားမလည်တဲ့အရာတွေနဲ့ ကြုံရတဲ့အခါ၊ ကိုယ့်ရဲ့မာနကို ဘေးချိတ်ပြီး သူ့ဆီကနေ အကြံဉာဏ်တောင်းဖို့ လိုလိုလားလားရှိခဲ့တယ်။ ဒီလိုမျိုး လက်တွေ့လုပ်ဆောင်တာက ကျွန်မကို အေးဆေးပြီး သက်သာရာရစေခဲ့တယ်။ ပြီးတော့ ကိုယ့်တာဝန်တွေကို ထမ်းဆောင်ရာမှာလည်း တိုးတက်မှုတချို့ ရရှိခဲ့တယ်။ ဒီအတွက် ဘုရားသခင်ကို ကျေးဇူးတင်ပါတယ်။