အနန္တတန်ခိုးရှင် ဘုရားသခင် အသင်းတော် အပလီကေးရှင်း

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

လူ့ဇာတိခံယူခြင်း၏ နက်နဲသောအရာ (၃)

ဘုရားသခင်သည် သူ၏အမှုကို လုပ်ဆောင်သည့်အခါ သူသည် တစ်စုံတစ်ရာ တည်ဆောက်ခြင်း သို့မဟုတ် လှုပ်ရှားမှုများထဲတွင် ပါဝင်ရန် လာခြင်းမဟုတ်ဘဲ သူ၏အမှုတော်ကို ကျေပွန်အောင်လုပ်ဆောင်ရန် လာခြင်းဖြစ်သည်။ သူလူ့ဇာတိခံယူသည့်အကြိမ်တိုင်း အမှု၏အဆင့်တစ်ခု ပြီးမြောက်စေရန်နှင့် ခေတ်ကာလအသစ်တစ်ခုကို ဖွင့်လှစ်ရန်သာဖြစ်သည်။ ယခုအခါ နိုင်ငံတော်ခေတ် ရောက်ရှိနေပြီဖြစ်ပြီး နိုင်ငံတော်အတွက် လေ့ကျင့်ပေးခြင်းသည်လည်း ထို့အတူပင် ဖြစ်သည်။ အမှု၏ ဤအဆင့်မှာ လူ၏အလုပ် မဟုတ်ပေ၊ ယင်းသည် လူသားကို အတိုင်းအတာ တစ်စုံတစ်ခုအထိ ပြုပြင်ရန်လည်း မဟုတ်ပေ၊ ယင်းသည် ဘုရားသခင်၏ အမှုအစိတ်အပိုင်းတစ်ခုကို စုံလင်စေရန်သာဖြစ်သည်။ သူလုပ်ဆောင်သောအရာမှာ လူ၏အလုပ် မဟုတ်ပေ၊ ယင်းသည် ကမ္ဘာမြေကြီးမှ မထွက်ခွာမီ လူကို ပြုပြင်ရာ၌ တိကျသောရလဒ်တစ်ခုကို ရရှိရန်အတွက် မဟုတ်ပေ၊ သူ၏အမှုတော်ကို ကျေပွန်အောင်လုပ်ဆောင်ရန်နှင့် သူပြုရမည့်အမှုကို အဆုံးသတ်ရန်သာဖြစ်၍ ယင်းသည် ကမ္ဘာမြေကြီးပေါ်ရှိ သူ၏အမှုအတွက် သင့်လျော်သောအစီအစဉ်များကို ချမှတ်ရန်ဖြစ်ကာ၊ ထိုနည်းအားဖြင့် ဘုန်းထင်ရှားလာစေရန်ဖြစ်သည်။ လူ့ဇာတိခံယူသော ဘုရားသခင်၏အမှုသည် သန့်ရှင်းသောဝိညာဉ်တော်၏ အသုံးပြုခြင်းကိုခံရသော လူတို့၏အမှုနှင့် မတူညီပေ။ ဘုရားသခင်သည် ကမ္ဘာမြေကြီးပေါ်၌ သူ၏အမှုကို လုပ်ဆောင်ရန်ကြွလာသည့်အခါ၊ သူ၏အမှုတော် ကျေပွန်စေရန်အတွက်သာ သူအလေးထား၏။ သူ၏အမှုတော်နှင့်မသက်ဆိုင်သည့် အခြားသောကိစ္စအားလုံးတို့၌ သူသည် ပါဝင်ပတ်သက်ခြင်း မရှိသလောက်ပင်ဖြစ်ကာ၊ မသိကျိုးကျွန် ပြုသည်အထိဖြစ်၏။ သူသည် သူပြုသင့်သောအမှုကို လုပ်ဆောင်ရုံမျှသာဖြစ်ပြီး၊ လူတို့ပြုသင့်သောအမှုနှင့်ပတ်သက်၍ သူသည် ပူပန်မှုမရှိဆုံးဖြစ်၏။ သူပြုသောအမှုသည် သူရှိနေသော ခေတ်ကာလ၊ သူကျေပွန်အောင်လုပ်ဆောင်သင့်သော အမှုတော်နှင့်သာ လုံးလုံးသက်ဆိုင်ပြီး၊ အခြားသောကိစ္စမှန်သမျှမှာ သူ၏အာဏာစက်ပြင်ပ၌ ရှိသကဲ့သို့ဖြစ်သည်။ သူသည် လူသားတစ်ဦးအဖြစ် အသက်ရှင်ရာ၌ ပို၍အခြေခံကျသော အသိဖြင့် မိမိကိုယ်ကို ဖြည့်ဆည်းခြင်းမရှိသကဲ့သို့၊ နောက်ထပ်လူမှုရေးရာကျွမ်းကျင်မှုများကို သင်ယူခြင်းသော်လည်းကောင်း၊ လူတို့နားလည်သော အခြားအရာတစ်စုံတစ်ခုဖြင့် မိမိကိုယ်ကို ပြည့်စုံစေခြင်းသော်လည်းကောင်း သူမပြုချေ။ လူသားတို့ ပိုင်ဆိုင်သင့်သောအရာမှန်သမျှကို စိတ်ဝင်စားခြင်း လုံးဝမရှိဘဲ၊ သူသည် သူ၏တာဝန်ဖြစ်သောအမှုကို ပြုရုံမျှသာဖြစ်သည်။ ထို့ကြောင် လူ့ဇာတိခံယူသောဘုရားသခင်သည် အကြောင်းခြင်းရာအများအပြား၌ မပြည့်စုံလွန်းသည့်အတွက် သူသည် လူတို့၌ရှိသင့်သော အရာများစွာကိုပင် အလေးဂရုမပြုသည်သာမက ယင်းသို့သောအရာများအပေါ် နားလည်မှုဟူသည်လည်း မရှိဟု လူတို့က မြင်ကြလေသည်။ တစ်ကိုယ်ရေအပြုအမူနှင့် အခြားသူများနှင့် တုံ့လှယ်မှုအပေါ် ထိန်းချုပ်သော စည်းမျဉ်းများအပြင်၊ ဘဝနှင့်သက်ဆိုင်သည့် ဘုံအသိကဲ့သို့သော အကြောင်းအရာများသည် သူနှင့်သက်ဆိုင်မှုမရှိဟု ထင်ရ၏။ သို့သော်လည်း သင်သည် လူ့ဇာတိခံယူသောဘုရားသခင်ထံမှ ပုံမှန်မဟုတ်ခြင်း၏ အရိပ်အမြွက်အနည်းငယ်ကိုမျှ သတိပြုမိနိုင်မည်မဟုတ်ပေ။ တစ်နည်းဆိုသော် သူ၏လူ့သဘာဝသည် သာမန်လူသားတစ်ဦးဖြစ်သော သူ၏အသက်တာနှင့် သာမန်တွေးခေါ်ဆင်ခြင်မှုရှိသော သူ၏ဦးနှောက်ကို ထိန်းသိမ်းခြင်းသာဖြစ်ပြီး၊ သူ့အား အမှန်နှင့်အမှားကို ခွဲခြားနိုင်စွမ်းပေးလေသည်။ သို့သော်လည်း သူသည် လူတို့ (ဖန်ဆင်းခံသတ္တဝါများ)သာ ပိုင်ဆိုင်သင့်သော အရာများဖြစ်သည့် အခြားသောအရာအားလုံးဖြင့် ဖြည့်ဆည်းထားခြင်းကား မရှိပေ။ ဘုရားသခင်သည် သူ၏အမှုတော်ကို ကျေပွန်အောင်လုပ်ဆောင်ရန်သာ လူ့ဇာတိခံယူခြင်းဖြစ်သည်။ သူ၏အမှုသည် ခေတ်ကာလတစ်ခုလုံးကို ရည်ညွှန်းခြင်းဖြစ်၏၊ လူတစ်ဦးတစ်ယောက် သို့မဟုတ် နေရာတစ်ခုမျှကိုသာ မဟုတ်ဘဲ၊ စကြဝဠာတစ်ခုလုံးကို ရည်ညွှန်းခြင်းဖြစ်၏။ ဤသည်မှာ သူ၏အမှုတော် ရည်မှန်းချက်ဖြစ်ပြီး၊ သူအမှုပြုသော အခြေခံသဘောတရားဖြစ်သည်။ ဤအရာကို မည်သူမျှ ပြောင်းလဲ၍မရသည့်အပြင်၊ လူသားသည် ယင်းအရာ၌ ပါဝင်ပတ်သက်လာရန်အကြောင်းလည်း မရှိပေ။ ဘုရားသခင် လူ့ဇာတိခံယူသည့်အကြိမ်တိုင်းတွင် ထိုခေတ်ကာလ၏အမှုကို သူနှင့်အတူ ဆောင်ယူလာ၏၊ ထို့ပြင် လူသားသည် သူ့အား ပို၍နားလည်ကာ ထိုးထွင်းသိမြင်နိုင်စေရန်အလို့ငှာ လူတို့နှင့်အတူ အနှစ်နှစ်ဆယ်၊ သုံးဆယ်၊ လေးဆယ် သို့မဟုတ် အနှစ်ခုနစ်ဆယ်၊ ရှစ်ဆယ်မျှပင် နေထိုင်မည်ဟူသော ရည်ရွယ်ချက် သူ့မှာမရှိပေ။ ထိုအရာသည် မလိုအပ်ချေ။ ထိုသို့ပြုခြင်းဖြင့် ဘုရားသခင်၏ ပင်ကိုစိတ်နေသဘောထားအပေါ် လူသား၏အသိကို မည်သို့မျှ နက်ရှိုင်းစေလိမ့်မည် မဟုတ်၊ ယင်းအစား လူသား၏အယူအဆများကိုသာ တိုးလာစေမည်ဖြစ်ပြီး၊ လူသား၏အယူအဆများနှင့် အတွေးများကို ခိုင်မြဲလာစေရန်သာ ဖြစ်စေလိမ့်မည်။ ထို့ကြောင့် သင်တို့အားလုံးသည် လူ့ဇာတိခံယူသော ဘုရားသခင်၏အမှုမှာ အဘယ်အရာဖြစ်သည်ကို အတိအကျနားလည်အပ်ပေသည်။ "ငါလာခဲ့သည်မှာ သာမန်လူသားတစ်ဦး၏ အသက်တာကို တွေ့ကြုံရန်အတွက်မဟုတ်" ဟူ၍ သင်တို့အား ငါပြောခဲ့ပြီးသော နှုတ်ကပတ်တော်များကို၊ သင်တို့အနေဖြင့် နားမလည်ထား၍ မရပေ။ "ဘုရားသခင်သည် ကမ္ဘာလောကသို့ ကြွလာခြင်းမှာ သာမန်လူသားတစ်ဦး၏အသက်တာဖြင့် နေထိုင်ရန်မဟုတ်" ဟူသော နှုတ်ကပတ်တော်တို့ကို သင်တို့မေ့လျော့ကြပြီလော။ လူ့ဇာတိခံယူရာ၌ ဘုရားသခင်၏ရည်ရွယ်ချက်ကို သင်တို့နားမလည်ကြသည့်အပြင်၊ "ဘုရားသခင်သည် ဖန်ဆင်းခံလူသားတစ်ဦး၏ဘဝကို တွေ့ကြုံခံစားရန် ရည်ရွယ်ချက်ဖြင့် ကမ္ဘာမြေကြီးပေါ်သို့ အဘယ်ကြောင့် ကြွလာခဲ့မည်နည်း" ဟူသော အဓိပ္ပာယ်ကိုလည်း သင်တို့မသိကြပေ။ ဘုရားသခင်သည် ကမ္ဘာမြေကြီးပေါ်သို့ ကြွလာခြင်းမှာ သူ၏အမှုကို အပြီးသတ်ရန်အတွက်သာဖြစ်သဖြင့်၊ ကမ္ဘာမြေကြီးပေါ်မှ သူ၏အမှုသည် သက်တမ်းတိုခြင်းဖြစ်သည်။ ဘုရားသခင်၏ဝိညာဉ်တော်အနေဖြင့် သူ၏လူ့ဇာတိခန္ဓာကိုယ်အား အသင်းတော်ကို ဦးဆောင်မည့် ကြီးမြတ်သောလူတစ်ဦးအဖြစ် ပြုစုပျိုးထောင်ပေးရန်ဟူသော ရည်ရွယ်ချက်ဖြင့် ကမ္ဘာမြေကြီးပေါ်သို့ ကြွလာခြင်းမဟုတ်။ ဘုရားသခင်သည် ကမ္ဘာမြေကြီးပေါ်သို့ ကြွလာသာအခါ နှုတ်ကပတ်တော်သည် လူ့ဇာတိခံယူခြင်းဖြစ်သည်၊ သို့သော်လည်း လူတို့သည် သူ၏အမှုကို မသိကြဘဲ၊ အကြောင်းအရာများကို သူနှင့် အတင်းအကျပ် ပတ်သက်စပ်ဆိုင်စေကြ၏။ သို့သော် ဘုရားသခင်သည် "လူ့ဇာတိခံယူသော နှုတ်ကပတ်တော်" ဖြစ်၍၊ ဘုရားသခင်၏အခန်းကဏ္ဍကို ယာယီအားဖြင့် တာဝန်ယူရန်အလို့ငှာ ဘုရားသခင်ဝိညာဉ်တော်၏ ပျိုးထောင်ခြင်းခံထားရသော လူ့ဇာတိခန္ဓာကိုယ်တစ်ခု မဟုတ်ကြောင်းကို သင်တို့အားလုံး သဘောပေါက်သင့်သည်။ ဘုရားသခင်ကိုယ်တော်တိုင်သည် ပျိုးထောင်ခြင်း၏ ရလဒ်မဟုတ်ဘဲ၊ လူ့ဇာတိခံယူသော နှုတ်ကပတ်တော်သာဖြစ်ပြီး၊ ယနေ့ သင်တို့အားလုံးအလယ်၌ သူ၏အမှုကို သူတရားဝင်လုပ်ဆောင်နေသည်။ ဘုရားသခင်၏ လူ့ဇာတိခံယူခြင်းသည် စစ်မှန်သော သမ္မာတရားတစ်ခုဖြစ်ကြောင်းကို သင်တို့အားလုံးသိကြပြီး၊ အသိအမှတ်ပြုကြသော်လည်း၊ သင်တို့သည် သင်တို့၏ကျင့်သုံးနိုင်စွမ်းကို ကျော်လွန်သော နားလည်မှုတစ်ခုဖြစ်သယောင် ဟန်ဆောင်ကြ၏။ လူ့ဇာတိခံယူသော ဘုရားသခင်၏အမှုမှသည် လူ့ဇာတိခံယူခြင်း၏ အရေးပါမှုနှင့် အနှစ်သာရအထိ ဤအရာများကို သင်တို့သည် အနည်းငယ်မျှ နားလည်သဘောပေါက်နိုင်ခြင်း မရှိကြဘဲ၊ မှတ်မိသရွေ့ နှုတ်ကပတ်တော်တို့ကို ရွှန်းရွှန်းဝေအောင် ရွတ်ဆိုပြရင်းဖြင့် အခြားသူများအတိုင်းသာ လိုက်ကြ၏။ လူ့ဇာတိခံယူသော ဘုရားသခင်သည် သင်စိတ်ကူးသည်နှင့်အညီဖြစ်မည်ဟု သင်ထင်သလော။

ဘုရားသခင် လူ့ဇာတိခံယူခြင်းမှာ ခေတ်ကာလကို ဦးဆောင်ရန်နှင့် အမှုသစ်ကို စတင်လှုပ်ရှားစေရန်သာဖြစ်သည်။ ဤအချက်ကို သင်တို့အနေဖြင့် နားလည်ရန် လိုအပ်သည်။ ဤအရာသည် လူသား၏အလုပ်နှင့် များစွာကွာခြားပြီး၊ ထိုနှစ်ခုကို တစ်ချိန်တည်းတွင်ဖော်ပြရန် မဖြစ်နိုင်ချေ။ လူသားအား အမှုတော်ကို လုပ်ဆောင်စေရန်အတွက် အသုံးမပြုနိုင်သေးခင်တွင်၊ သူ့အား အချိန်ကာလကြာမြင့်စွာ ပျိုးထောင်ရန်နှင့် စုံလင်အောင်ပြုလုပ်ပေးရန် လိုအပ်ပြီး၊ အလိုရှိသော လူ့သဘာဝမှာလည်း အထူးသဖြင့် အဆင့်အတန်းမြင့်သည်မျိုးဖြစ်၏။ လူသားသည် သူ၏သာမန် လူသားစွမ်းရည်ဖြစ်သော ဆင်ခြင်ခြင်းကို ထိန်းသိမ်းနိုင်စွမ်း ရှိရမည်သာမက၊ အခြားသူများနှင့်ပတ်သက်သော သူ၏အပြုအမူအား ထိန်းချုပ်သည့် စည်းမျဉ်းစည်းကမ်းများစွာကိုလည်း ထပ်မံ၍ နားလည်ရမည်ဖြစ်သည်၊ ထို့အပြင် သူသည် ဉာဏ်ပညာနှင့် လူသား၏ကျင့်ဝတ်ဆိုင်ရာအသိ အကြောင်းကို ပို၍ပင် လေ့လာသင်ယူရန် စိတ်ပိုင်းဖြတ်ရမည်ဖြစ်သည်။ ဤသည်မှာ လူသားအနေဖြင့် ဖြည့်ဆည်းသင့်သော အရာများဖြစ်၏။ သို့သော် လူ့ဇာတိခံယူသော ဘုရားသခင်အတွက်မူ ဤသို့မဟုတ်ပေ၊ အဘယ်ကြောင့်ဆိုသော် သူ၏အမှုသည် လူသားကို ကိုယ်စားပြုခြင်း မဟုတ်သကဲ့သို့ လူသား၏အမှုလည်း မဟုတ်ချေ။ ယင်းသည် သူ၏ဖြစ်ခြင်းကို တိုက်ရိုက်ဖော်ပြချက်တစ်ခုဖြစ်ပြီး၊ သူပြုသင့်သောအမှုကို တိုက်ရိုက်အကောင်အထည်ဖော်မှုတစ်ခုသာ ဖြစ်သည်။ (သဘာဝအားဖြင့် သူ၏အမှုသည် သင့်လျော်သောအချိန်တွင် လုပ်ဆောင်ခြင်းဖြစ်၍၊ သာမန်ကာလျှံကာနှင့် ကြုံရာကျပန်း မဟုတ်သည့်အပြင်၊ သူ၏အမှုတော်ကို ဖြည့်စွမ်းရန် အချိန်ရောက်မှသာ အစပြုခြင်းဖြစ်၏။) သူသည် လူသား၏အသက်တာ သို့တည်းမဟုတ် လူသား၏အလုပ်တွင် ပါဝင်ပတ်သက်ခြင်းမရှိ၊ တစ်နည်းဆိုသော် သူ၏လူ့သဘာဝသည် ဤအရာတစ်စုံတစ်ခုဖြင့် ဖြည့်ဆည်းထားခြင်းမရှိပေ (သို့သော်လည်း ဤသည်မှာ သူ၏အမှုကို ထိခိုက်စေခြင်းမရှိချေ။) သူသည် သူ၏အမှုတော်ကို ပြုရန်အချိန်ကျသည့်အခါ၊ ယင်းအား ဖြည့်စွမ်းခြင်းသာ ဖြစ်သည်။ သူ၏အဆင့်အတန်း မည်သို့ရှိသည်ဖြစ်စေ၊ သူသည် သူပြုသင့်သောအမှုဖြင့် ရှေ့သို့သာ ဆက်တိုး၏။ လူသားသည် သူ့အပေါ် မည်သို့သိသည်ဖြစ်စေ၊ သူ့အပေါ် မည်သို့ထင်မြင်ယူဆသည်ဖြစ်စေ၊ သူ၏အမှုမှာ အလျှင်းထိခိုက်ခြင်းမရှိပေ။ ဥပမာအားဖြင့် ယေရှုသည် သူ၏အမှုကို လုပ်ဆောင်ခဲ့သည့်အချိန်၌ သူသည် မည်သူဖြစ်ကြောင်းကို အဘယ်သူမျှ တိတိကျကျ သိခဲ့ခြင်းမရှိသော်လည်း၊ သူသည် သူ၏အမှုဖြင့် ရှေ့သို့သာ ဆက်တိုးခဲ့၏။ ဤအရာတို့သည် သူပြုသင့်သောအမှုကို လုပ်ဆောင်ရာ၌ အဟန့်အတား မဖြစ်ခဲ့ပေ။ ထို့ကြောင့် သူသည် သူမည်သူမည်ဝါဖြစ်ကြောင်းကို ကနဦးတွင် ဝန်ခံခြင်း သို့မဟုတ် ကြေညာခြင်း မရှိခဲ့ဘဲ၊ လူတို့အား သူ၏နောက်သို့သာ လိုက်စေခဲ့၏။ ပင်ကိုအားဖြင့် ဤသည်မှာ ဘုရားသခင်၏နှိမ့်ချမှု ဖြစ်ခဲ့ရုံမကဘဲ၊ ယင်းသည် ဘုရားသခင်အနေဖြင့် လူ့ဇာတိ၌ အမှုပြုခဲ့သော နည်းလမ်းလည်း ဖြစ်ခဲ့၏။ သူသည် ဤနည်းဖြင့်သာ အမှုကို ပြုနိုင်ခဲ့၏၊ အကြောင်းမှာ လူသားသည် သာမန်မျက်စိဖြင့် သူ့အား မှတ်မိသိရှိနိုင်ခြင်း မရှိသောကြောင့်ဖြစ်သည်။ ထို့အပြင် အကယ်၍ လူသားသည် သူ့အား မှတ်မိသိရှိခဲ့လျှင်ပင်၊ သူ၏အမှုအတွက် လူသားသည် ကူညီနိုင်စွမ်း ရှိခဲ့လိမ့်မည်မဟုတ်ပေ။ ထို့အပြင် သူသည် လူတို့အနေဖြင့် သူ၏လူ့ဇာတိကို သိလာစေရန်အလို့ငှာ လူ့ဇာတိခံယူခဲ့ခြင်း မဟုတ်ပေ၊ သူ၏အမှုတော်ကို ဆောင်ရွက်ကာ ဖြည့်စွမ်းရန်ပင်ဖြစ်သည်။ ဤအကြောင်းရင်းကြောင့် သူမည်သူမည်ဝါဖြစ်ကြောင်းကို လူအများသိခြင်းငှာ ပြုလုပ်ခြင်းကို သူအလေးမပေးခဲ့ခြင်းဖြစ်သည်။ သူပြုသင့်သောအမှုအားလုံးကို ပြီးစီးခဲ့သည့်အချိန်၌မူ၊ သူမည်သူမည်ဝါဖြစ်ကြောင်းနှင့် သူ၏ဂုဏ်ဒြပ်တို့သည် လူသားတို့အတွက် အလိုလိုပင် ရှင်းလင်းသွားခဲ့၏။ လူ့ဇာတိခံယူသော ဘုရားသခင်သည် နှုတ်ဆိတ်လျက်နေပြီး၊ ထုတ်ဖော်ချက်တစ်စုံတစ်ရာကို မည်သည့်အခါမျှ မပြုပေ။ သူသည် လူသားကိုသော်လည်းကောင်း၊ လူသားအနေဖြင့် သူ၏နောက်သို့လိုက်ရာတွင် မည်သို့ရှိသည်ကိုသော်လည်းကောင်း အရေးစိုက်ခြင်းမရှိဘဲ၊ သူ၏အမှုတော်ကို ဖြည့်စွမ်းရင်း၊ သူပြုသင့်သော အမှုကို လုပ်ဆောင်ရင်းဖြင့် ရှေ့သို့သာ ဆက်တိုး၏။ သူ၏အမှုတော်လမ်းကြောင်း၌ မည်သူမျှ ပိတ်ဆို့နိုင်စွမ်းမရှိပေ။ သူ၏အမှုကို နိဂုံးချုပ်ရန် အချိန်ကျရောက်သည့်အခါ၊ ယင်းအမှုသည် သေချာပေါက် နိဂုံးချုပ်၍ အဆုံးသို့ ရောက်ရှိမည်ဖြစ်ပြီး၊ မည်သူကမျှ အခြားသောတစ်နည်းဖြင့် ဆုံးဖြတ်ပေးနိုင်မည်မဟုတ်ချေ။ သူ၏အမှုပြီးဆုံး၍ လူသားထံမှ သူထွက်ခွာသွားပြီးမှသာ လူသားသည် အပြည့်အဝ မရှင်းလင်းသေးသော်လည်း၊ သူပြုသောအမှုကို နားလည်လာမည်ဖြစ်သည်။ ထို့အပြင် လူသားအနေဖြင့် လူ့ဇာတိခံယူသော ဘုရားသခင်က သူ၏အမှုကို စတင်ကာ လုပ်ဆောင်ခဲ့သည့် ရည်ရွယ်ချက်ကို အပြည့်အဝနားလည်ဖို့ရန် အချိန်ကြာမြင့်ပေလိမ့်မည်။ တစ်နည်းဆိုသော် လူ့ဇာတိခံယူသော ဘုရားသခင်၏ ခေတ်ကာလအမှုကို နှစ်ပိုင်းခွဲခြားထား၏။ တစ်ပိုင်းတွင် လူ့ဇာတိခံယူသော ဘုရားသခင် ကိုယ်တော်တိုင် ပြုသည့်အမှုနှင့် လူ့ဇာတိခံယူသော ဘုရားသခင် ကိုယ်တော်တိုင် မိန့်ဆိုသည့် နှုတ်ကပတ်တော်များ ပါဝင်၏။ သူ့လူ့ဇာတိ၏ အမှုတော် လုံးလုံးပြီးမြောက်သည့်အခါ၊ အမှု၏ကျန်အပိုင်းကို သန့်ရှင်းသောဝိညာဉ်တော်၏ အသုံးပြုခြင်းကိုခံရသောသူများအားဖြင့် လုပ်ဆောင်ရန် ကျန်ရှိသေး၏။ လူသားအနေဖြင့် သူ၏အလုပ်ကို ကျေပွန်အောင်လုပ်ဆောင်သင့်သည်မှာ ဤအချိန်ပင်ဖြစ်သည်၊ အကြောင်းမှာ ဘုရားသခင်သည် လမ်းဖွင့်ပေးနှင့်ပြီဖြစ်ပြီး၊ ယင်းအား လူသားကိုယ်တိုင် လျှောက်လှမ်းရန်သာ လိုအပ်တော့သည်။ တစ်နည်းဆိုရသော် လူ့ဇာတိခံယူသော ဘုရားသခင်သည် အမှု၏ကနဦးအပိုင်းကို လုပ်ဆောင်ပြီးနောက်၊ သန့်ရှင်းသောဝိညာဉ်တော် သာမက သန့်ရှင်းသောဝိညာဉ်တော်၏ အသုံးပြုခြင်းကို ခံရသူများသည် ဤအမှုကို ဆက်ခံကြမည်ဖြစ်၏။ ထို့ကြောင့် လူသားသည် ဤအဆင့်၌ လူ့ဇာတိခံယူသော ဘုရားသခင် လုပ်ဆောင်သည့် အရင်းခံအမှုအကြောင်းကို သိသင့်သည်။ ထို့ပြင် လူသားအပေါ်ပြုထားသော တောင်းဆိုချက်များနှင့်အညီ ဘုရားသခင်ထံ တောင်းဆိုနေမည့်အစား၊ ဘုရားသခင်လူ့ဇာတိခံခြင်း၏ အဓိပ္ပာယ်မှာ မည်သို့ဖြစ်ကြောင်းနှင့် သူပြုသင့်သာအမှုမှာ အဘယ်အရာဖြစ်သည်တို့ကို အတိအကျ နားလည်ရပေမည်။ ဤနေရာတွင် လူသား၏အမှား၊ သူ၏အယူအဆနှင့် ထိုမျှမက သူ၏မနာခံခြင်းတို့ ရှိနေ၏။

ဘုရားသခင်၏လူ့ဇာတိကို လူတို့သိစေရန် သို့တည်းမဟုတ် လူ့ဇာတိခံယူသော ဘုရားသခင်၏ ဇာတိခန္ဓာနှင့် လူသား၏ ဇာတိပကတိကြားမှ ကွဲပြားခြားနားချက်များကို လူတို့ခွဲခြားတတ်စေရန်ဟူသော ရည်ရွယ်ချက်ဖြင့် ဘုရားသခင် လူ့ဇာတိခံယူခြင်း မဟုတ်ပေ။ ဘုရားသခင်သည် လူသား၏ ချင့်ချိန်နိုင်စွမ်းကို လေ့ကျင့်ပေးရန် လူ့ဇာတိခံယူခြင်းလည်းမဟုတ်၊ ထို့အပြင် ကြီးစွာသော ဘုန်းထင်ရှားခြင်း ဖြစ်စေရန်အလို့ငှာ၊ လူတို့အား လူ့ဇာတိခံယူသော ဘုရားသခင်ကို ကိုးကွယ်စေခြင်း ရည်ရွယ်ချက်ဖြင့်လည်း ထိုကဲ့သို့ ပြုသည်မဟုတ်ချေ။ ဤအရာတို့သည် လူ့ဇာတိခံယူရာ၌ ဘုရားသခင်၏ မူလရည်ရွယ်ချက် မဟုတ်ပေ။ ဘုရားသခင်သည် လူသားကို ပြစ်တင်ရှုတ်ချရန်သော်လည်းကောင်း၊ လူသားကို တမင်ရည်ရွယ်ကာ ထုတ်ဖော်ရန်သော်လည်းကောင်း၊ လူသားကို အခက်ကြုံစေရန်သော်လည်းကောင်း လူ့ဇာတိခံယူခြင်း မဟုတ်ပေ။ ဤအရာတို့သည် ဘုရားသခင်၏ မူလရည်ရွယ်ချက် မဟုတ်ကြချေ။ ဘုရားသခင် လူ့ဇာတိခံသည့်အကြိမ်တိုင်းသည် ရှောင်လွှဲ၍မရသော အမှုပုံစံတစ်မျိုးသာ ဖြစ်သည်။ သူ၏ သာ၍ကြီးမားသော အမှုနှင့် သာ၍ကြီးမားသော စီမံခန့်ခွဲမှုအတွက် သူပြုသည့်အတိုင်း သူလုပ်ဆောင်ခြင်းဖြစ်၏၊ လူသားစိတ်ကူးသော အကြောင်းပြချက်များအတွက် မဟုတ်ပေ။ ဘုရားသခင်သည် သူ့အမှုတော် တောင်းဆိုသည့်အခါမှသာ ကမ္ဘာမြေကြီးပေါ်သို့ လာခြင်းဖြစ်ပြီး၊ လိုအပ်မှသာ လာခြင်းဖြစ်သည်။ သူသည် ကမ္ဘာမြေကြီးပေါ်တွင် လှည့်လည်သွားလာရန်ဟူသော ရည်ရွယ်ချက်ဖြင့် ကြွလာခြင်းမဟုတ်၊ သူပြုသင့်သောအမှုကို လုပ်ဆောင်ရန်အတွက်သာဖြစ်သည်။ သို့မဟုတ်လျှင် သူသည် ဤအမှုကို လုပ်ဆောင်ရန်အတွက် ထိုမျှလေးလံသောဝန်တစ်ခုကို အဘယ်ကြောင့် လက်ခံ၍၊ အဘယ်ကြောင့် ထိုမျှကြီးမားစွာ အရဲစွန့်မည်နည်း။ ဘုရားသခင်သည် မဖြစ်မနေ ပြုရမည့်အချိန်တွင်သာ လူ့ဇာတိခံယူခြင်းဖြစ်ပြီး၊ ထူးခြားသော အဓိပ္ပာယ်သည် အမြဲတွဲလျက်ပါ၏။ အကယ်၍ လူတို့အနေဖြင့် သူ့အားမြင်စေရန်၊ ၎င်းတို့၏အမြင်များကို ဖွင့်လှစ်ပေးရန်အတွက်သာ ဖြစ်ခဲ့ပါမူ၊ သူသည် လူတို့ကြားသို့ မည်သည့်အခါမျှ အလွန်ပေါ့တန်စွာဖြင့် ကြွလာမည်မဟုတ်သည်မှာ မုချသေချာလှသည်။ သူသည် သူ၏စီမံခန့်ခွဲမှုနှင့် ပို၍ကြီးမားသော သူ၏အမှုအတွက် ကမ္ဘာမြေကြီးပေါ်သို့ ကြွလာခြင်းဖြစ်ကာ၊ ပို၍များသောလူတို့ကို ရရှိနိုင်ရန်အတွက်လည်း ဖြစ်သည်။ သူသည် ခေတ်ကာလကို ကိုယ်စားပြုရန် လာ၏၊ စာတန်ကို အနိုင်ယူရန် လာ၏၊ စာတန်ကို အနိုင်ယူရန်အလို့ငှာ သူသည် လူ့ဇာတိဖြင့်လွှမ်းခြုံ၏။ ထိုမျှမက သူသည် လူသားမျိုးနွယ်တစ်ရပ်လုံးကို ၎င်းတို့၏အသက်တာများအား ရှင်သန်ရာ၌ လမ်းပြရန်အလို့ငှာ ကြွလာခြင်းဖြစ်သည်။ ဤအရာအားလုံးသည် သူ၏စီမံခန့်ခွဲမှုနှင့် သက်ဆိုင်ပြီး၊ ယင်းသည်လည်း စကြဝဠာတစ်ခုလုံး၏အမှုနှင့် သက်ဆိုင်၏။ အကယ်၍ ဘုရားသခင်သည် သူ၏လူ့ဇာတိကို လူတို့မြင်စေရန်နှင့် ၎င်းတို့၏မျက်လုံးများကို ဖွင့်ပေးရုံအတွက်မျှသာ လူ့ဇာတိခံယူခဲ့သည်ဆိုလျှင်၊ သူသည် အဘယ်ကြောင့် တိုင်းနိုင်ငံအားလုံးသို့ မလှည့်လည်ဘဲနေမည်နည်း။ ဤသည်မှာ အလွန့်အလွန် လွယ်ကူသော ကိစ္စတစ်ခု မဟုတ်သလော။ သို့သော်လည်း သူသည် ထိုကဲ့သို့ မပြုခဲ့ပေ၊ ယင်းအစား အခြေချရန်နှင့် သူပြုသင့်သောအမှုကို စတင်ရန်အတွက် သင့်လျော်သောနေရာတစ်ခုကို ရွေးချယ်ခဲ့၏။ ဤလူ့ဇာတိတစ်ခုတည်းပင်လျှင် လွန်စွာအရေးပါလှ၏။ သူသည် ခေတ်ကာလတစ်ခုလုံးကို ကိုယ်စားပြုသကဲ့သို့၊ ခေတ်ကာလတစ်ခုလုံး၏ အမှုကိုလည်း လုပ်ဆောင်လေသည်။ သူသည် ယခင်ခေတ်ကာလကို အဆုံးသတ်စေသကဲ့သို့၊ ခေတ်ကာလအသစ်ကိုလည်း ဖွင့်လှစ်ပေး၏။ ဤအရာအားလုံးသည် ဘုရားသခင်၏စီမံခန့်ခွဲမှုနှင့် သက်ဆိုင်သည့် အရေးကြီးသော အကြောင်းအရာတစ်ခုဖြစ်၏၊ ထို့ပြင် ဘုရားသခင်က ကမ္ဘာမြေကြီးပေါ် လာရောက်၍ လုပ်ဆောင်သော အမှုတော်အဆင့်တစ်ခု၏ ရည်ရွယ်ချက်လည်း ဖြစ်သည်။ ယေရှုသည် ကမ္ဘာလောကသို့ လာခဲ့သည့်အချိန်၌၊ သူသည် နှုတ်ကပတ်တော်အချို့ကိုသာ မိန့်ခဲ့ပြီး၊ အမှုအချို့တို့ကိုသာ လုပ်ဆောင်ခဲ့၏။ သူသည် လူ၏အသက်တာကို စိတ်ဝင်စားခဲ့ခြင်း မရှိဘဲ၊ သူ၏အမှုကို အပြီးသတ်ပြီးသည်နှင့် ထွက်ခွာသွားခဲ့ခြင်းဖြစ်သည်။ ယနေ့အချိန်၌ ငါသည် သင်တို့အား ငါ၏နှုတ်ကပတ်တော်များကို ပြောဆိုလက်ဆင့်ကမ်းခြင်း ပြီးဆုံးသည့်အခါ၊ သင်တို့အားလုံးသည်လည်း နားလည်သွားသည့်အခါ၊ သင်တို့၏အသက်တာသည် မည်သို့ပင်ရှိမည်ဖြစ်စေ ငါ၏အမှုထဲမှ ဤအဆင့်မှာ အဆုံးသတ်သွားလိမ့်မည်ဖြစ်၏။ အနာဂတ်တွင်မူ ငါ၏အမှုထဲမှ ဤအဆင့်ကို ဆက်၍လုပ်ဆောင်မည့်၊ ဤနှုတ်ကပတ်တော်များနှင့်အညီ ကမ္ဘာမြေကြီးပေါ်တွင် ဆက်၍အမှုပြုမည့် လူအချို့သည် ရှိရမည်ဖြစ်သည်။ ယင်းအချိန်၌ လူသား၏အလုပ်နှင့် လူသား၏တည်ဆောက်မှုသည် စတင်လာလိမ့်မည်။ သို့သော်လည်း လက်ရှိ၌မူ ဘုရားသခင်သည် သူ၏အမှုတော်ကို ဖြည့်စွမ်းရန်နှင့် သူ၏အမှုအဆင့်တစ်ဆင့်ကို ပြီးမြောက်စေရန်အလို့ငှာ၊ သူ၏အမှုကိုသာ ပြုလျက်ရှိသည်။ ဘုရားသခင်သည် လူသား၏နည်းဟန်နှင့် ခြားနားစွာ လုပ်ဆောင်တတ်၏။ လူသားသည် ဝတ်ပြုပွဲများ၊ ဆွေးနွေးပွဲများကို နှစ်သက်ကာ၊ ဟိတ်ဟန်ကို အရေးထားကြသော်လည်း၊ ဘုရားသခင် အရွံမုန်းဆုံးသောအရာမှာ လူသား၏ ဝတ်ပြုပွဲများနှင့် တွေ့ဆုံပွဲများပင် ဖြစ်သည်။ ဘုရားသခင်သည် လူသားနှင့် လွတ်လပ်စွာ စကားလက်ဆုံကျတတ်၏။ ဤသည်မှာ ဘုရားသခင်၏အမှုဖြစ်၍၊ ယင်းသည် ထူးခြားစွာဖြင့် အချုပ်အချယ်ကင်းကာ၊ သင်တို့ကိုလည်း လွတ်မြောက်စေလေသည်။ သို့သော်လည်း ငါသည် သင်တို့နှင့် စည်းဝေးရခြင်းကို လုံးလုံးရွံမုန်း၏၊ ထို့ပြင် သင်တို့ကဲ့သို့ ပုံစံသွင်းခံထားရသော အသက်တာတစ်ခုကို ငါသည် ကျင့်သားမရနိုင်ဘဲ ရှိသည်။ ငါသည် စည်းကမ်းများကို အရွံမုန်းဆုံးဖြစ်သည်၊ ယင်းတို့သည် လူသားအား အရွေ့အပြောင်းတစ်ခု မပြုရဲစေရန်၊ မပြောဆိုရဲစေရန်၊ မသီဆိုရဲစေရန်အထိ ချုပ်ချယ်ကာ၊ သူ၏မျက်လုံးတို့သည် သင့်အား ငေးစိုက်ကြည့်နေရုံသာ တတ်နိုင်တော့၏။ ငါသည် သင်တို့၏ တွေ့ဆုံစည်းဝေးပုံကို လုံးလုံးရွံမုန်းသကဲ့သို့၊ ကြီးမားသော ဝတ်ပြုပွဲများကိုလည်း အလျှင်းရွံမုန်း၏။ ငါသည် သင်တို့နှင့်အတူ ဤနည်းအားဖြင့် စည်းဝေးရန် ရှင်းရှင်းငြင်းပယ်သည်၊ အဘယ်ကြောင့်ဆိုသော် ဤသို့သော ရှင်သန်နေထိုင်ပုံသည် တစ်စုံတစ်ဦးအား ချုပ်နှောင်ခံထားရသလို ခံစားရစေပြီး၊ သင်တို့သည် များပြားလှသော ဟိတ်ဟန်များ၊ များပြားလှသော စည်းကမ်းများကို လိုက်နာကြ၏။ အကယ်၍ သင်တို့သည် လူတို့အား ဦးဆောင်ရန် အခွင့်ပေးခံရလျှင်၊ သင်တို့သည် ၎င်းတို့အား စည်းကမ်းများ ကြီးစိုးရာနယ်အတွင်းသို့ ဦးဆောင်သွားလိမ့်မည်ဖြစ်ကာ၊ လူတို့သည် သင်တို့၏ခေါင်းဆောင်မှုအောက်၌ စည်းကမ်းများကို ဘေးဖယ်ထား၍ရတော့မည် မဟုတ်ပေ။ ယင်းအစား ဘာသာတရား၏သွင်ပြင်သည် ပို၍ပင် ပြင်းထန်လာမည်သာဖြစ်ပြီး၊ လူသား၏ အလေ့အထများသည်လည်း ဆက်၍ တိုးပွားလာမည်သာဖြစ်သည်။ စည်းဝေးကြသည့်အခါမျိုး၌ လူအချို့သည် တရားဟောခြင်း၊ ဟောပြောခြင်းတို့ကို မနားမနေပြုကြပြီး၊ မည်သည့်အခါမျှ ငြီးငွေ့ခြင်းလည်း မရှိကြ၊ ထို့အပြင် အချို့တို့သည် ရက်ပေါင်းများစွာတိုင်အောင် မရပ်မနားတမ်း တရားဟောပြောနိုင်ကြ၏။ ဤအရာအားလုံးကို လူသား၏ ကြီးမားသောဝတ်ပြုပွဲများနှင့် တွေ့ဆုံပွဲများဟု ယူဆကြ၏။ ယင်းတို့သည် စားသောက်ခြင်းအသက်တာ၊ ဝမ်းမြောက်ခြင်းအသက်တာ၊ သို့တည်းမဟုတ် လွတ်လပ်နေသော စိတ်ဝိညာဉ်၏ အသက်တာနှင့် သက်ဆိုင်ခြင်းမရှိပေ။ ဤသည်တို့အားလုံးသည် တွေ့ဆုံပွဲများပင် ဖြစ်လေ၏။ သင်တို့၏ လုပ်ဖော်ဆောင်ဖက် တွေ့ဆုံပွဲများ သာမက ဝတ်ပြုပွဲ ကြီးငယ်ဟူသမျှတို့သည် ငါ့အတွက် ရွံမုန်းစရာကောင်းပြီး၊ ငါသည် ယင်းတို့အပေါ် မည်သည့်အခါမျှ စိတ်ဝင်စားခဲ့ခြင်း မရှိပေ။ ဤသည်မှာ ငါအမှုပြုသော အခြေခံသဘောတရား ဖြစ်သည်၊ ငါသည် ဝတ်ပြုပွဲများ၌ တရားဟောပြောရန် ဆန္ဒမရှိသကဲ့သို့၊ ကြီးမားသောလူထုစည်းဝေးပွဲမျိုး၌ တစ်စုံတစ်ရာ ထုတ်ဖော်ပြောဆိုရန်လည်း အလိုမရှိ၊ သင်တို့အားလုံးနှင့်အတူ အထူးဆွေးနွေးပွဲတစ်ခုအဖြစ် ရက်အနည်းငယ်ကြာ ပြုဖို့ဆိုလျှင် ပို၍ပင် ဆန္ဒမရှိချေ။ သင်တို့အားလုံးသည် တွေ့ဆုံပွဲတစ်ခု၌ ဣန္ဒြေရရ စည်းကမ်းတကျဖြင့် ထိုင်သင့်သည်ဆိုသည်ကို ငါသည် သဘောတူရန် အကြောင်းမတွေ့ပေ၊ ပြုလုပ်သော အခမ်းအနားတစ်ခုခု၏ ကန့်သတ်မှုများအတွင်း၌ သင်တို့နေထိုင်ကြသည်ကို မြင်ရသည်မှာ ငါစက်ဆုပ်လှ၏၊ ထိုမျှမက ငါသည် သင်တို့၏ ယင်းသို့သော အခမ်းအနားတစ်ခု၌ ပါဝင်ရန် ငြင်းဆန်၏။ ဤအရာကို သင်တို့က ပို၍ပြုလေလေ၊ ငါသည် ပို၍ရွံမုန်းလေဖြစ်သည်။ ငါသည် သင်တို့၏ ဤအခမ်းအနားများနှင့် စည်းကမ်းများအပေါ် အနည်းငယ်မျှ စိတ်ဝင်စားခြင်းမရှိ၊ သင်တို့က ယင်းတို့ကို မည်မျှကောင်းမွန်စွာ လုပ်ဆောင်သည်ဖြစ်စေ၊ ယင်းတို့အားလုံးကို ရွံမုန်းစရာဟု ငါမြင်၏။ သင်တို့၏ စီစဉ်မှုများမှာ မသင့်လျော်ခြင်း သို့မဟုတ် သင်တို့သည် အလွန်နိမ့်ကျခြင်းကြောင့် မဟုတ်ပေ၊ ငါသည် သင်တို့၏ အသက်ရှင်နေထိုင်ပုံကို ရွံမုန်းခြင်းသာဖြစ်ပြီး၊ ထိုမျှမက ယင်းသို့ အသက်ရှင်ပုံကို ငါသည် မယဉ်ပါးလာနိုင်သောကြောင့်ဖြစ်သည်။ သင်တို့သည် ငါပြုချင်သောအမှုကို အနည်းငယ်မျှပင် နားမလည်ကြချေ။ ဟိုယခင်အချိန်၌ ယေရှုသည် သူ၏အမှုကို တစ်ခုသောနေရာတွင် လုပ်ဆောင်ကာ၊ တရားတော်ကို ဟောပြောပြီးသည်နှင့်၊ သူသည် သူ၏တပည့်တော်များကို ဦးဆောင်လျက် မြို့အတွင်းမှ ထွက်ခွာသွားတတ်သည်၊ လူအပေါင်းတို့ထံမှ ရှောင်ခွာရင်းဖြင့်၊ သူသည် ချစ်စွာသောတပည့်တော် အနည်းငယ်ကို ဦးဆောင်ကာ၊ ၎င်းတို့ နားလည်အပ်သော လမ်းခရီးများအကြောင်းကို ၎င်းတို့နှင့်အတူ ပြောဆိုခဲ့၏။ သူသည် ယင်းသို့သော ပုံစံမျိုးဖြင့် မကြာခဏ အမှုပြုခဲ့ခြင်းဖြစ်သည်။ လူအပေါင်းတို့ကြား၌ သူပြုခဲ့သောအမှုမှာ လွန်စွာရှားပါးပေသည်။ သင်တို့ သူ့အား တောင်းလျှောက်သည်များနှင့် လျော်ညီစေရန်ဟုဆိုကာ၊ လူ့ဇာတိခံယူသော ဘုရားသခင်ထံ၌ သာမန်လူသားတစ်ဦး၏အသက်တာ မရှိသင့်ပေ။ သူသည် သူ၏အမှုကို ဆောင်ရွက်ရမည်ဖြစ်ပြီး၊ ထိုင်နေသည်ဖြစ်စေ၊ ရပ်နေသည်ဖြစ်စေ၊ လမ်းလျှောက်နေသည်ဖြစ်စေ သူသည် ပြောဆိုရမည်ဖြစ်၏။ သူသည် အချိန်တိုင်း အမှုပြုရမည်ဖြစ်ကာ၊ သူ၏ "လည်ပတ်ခြင်းများ" ကို မည်သည့်အခါမျှ ရပ်တန့်၍ မရပေ၊ သို့မဟုတ်လျှင် သူသည် သူ၏တာဝန်များကို လျစ်လျူရှုခြင်း ဖြစ်လိမ့်မည်။ လူသား၏ ဤတောင်းဆိုချက်တို့သည် လူသားအသိနှင့် ဆီလျော်ပါ၏လော။ သင်တို့၏ တည်ကြည်မှုမှာ ဘယ်သို့ရောက်နေသနည်း။ သင်တို့သည် မြောက်မြားစွာကို မတောင်းသလော။ ငါအမှုပြုသည်ကို ငါ့အား ဆန်းစစ်ရန် သင့်ကို လိုအပ်သလော။ ငါက ငါ၏အမှုတော်အား ဖြည့်စွမ်းသည်ကို ကြီးကြပ်ရန် သင့်ကို လိုအပ်သလော။ မည်သည့်အမှုကို ငါပြုသင့်ကြောင်းနှင့် မည်သည့်အချိန်တွင် ငါပြုသင့်ကြောင်းကို ငါသည် ကောင်းစွာသိသည်၊ အခြားသူတို့ ဝင်ရောက်စွက်ဖက်ရန် မလိုအပ်ပေ။ ငါသည် မြောက်မြားစွာ ပြုခဲ့ခြင်းမရှိဟု သင့်အနေဖြင့် ထင်မြင်ကောင်းထင်မြင်နိုင်၏၊ သို့သော် ယင်းအချိန်၌ ငါ၏အမှုမှာ အဆုံးသို့ရောက်ပြီ ဖြစ်သည်။ ခရစ်ဝင်ကျမ်းလေးကျမ်းတို့မှ ယေရှု၏နှုတ်ကပတ်တော်များကို ဥပမာယူလော့၊ ယင်းတို့သည်လည်း အကန့်အသတ်ရှိခဲ့သည် မဟုတ်လော။ ထိုအချိန်က ယေရှုသည် တရားဇရပ်သို့ဝင်၍ တရားတော်ဟောပြောသည့်အခါ၊ သူသည် အများဆုံးဆိုသော် မိနစ်အနည်းငယ်အတွင်း ဟောပြောပြီး၏။ ထို့ပြင် သူပြောဆိုပြီးသည့်အခါ သူ၏တပည့်တော်များကို လှေပေါ်သို့ ဦးဆောင်ခေါ်၍၊ ရှင်းပြချက်တစ်စုံတစ်ရာမရှိဘဲ ထွက်ခွာတတ်သည်။ အများအားဖြင့်ဆိုသော် တရားဇရပ်အတွင်း ရှိသူတို့သည် ဤတရားကို ၎င်းတို့ချင်းသာ ဆွေးနွေးကြပြီး၊ ယင်းအကြောင်းအရာသည် ယေရှုနှင့် သက်ဆိုင်ခြင်း မရှိတော့ချေ။ ဘုရားသခင်သည် သူပြုသင့်သောအမှုကိုသာပြု၍၊ ဤသည်အပြင် အခြားမရှိတော့။ ယခုအခါ လူများစွာတို့သည် ငါ့အား တစ်ရက်လျှင် အနည်းဆုံး နာရီအချို့ ပိုမို၍ ဟောပြောဆွေးနွေးစေလိုကြသည်။ ဘုရားသခင်သည် ပြောဆိုမှုမရှိလျှင်၊ ဘုရားသခင်ဟူ၍ မမည်တော့ဘဲ၊ ပြောဆိုသောသူသာလျှင် ဘုရားသခင်ဖြစ်၏ဟု သင်တို့မြင်ကြသည်။ သင်တို့အားလုံးသည် မျက်ကန်းများဖြစ်၏။ အရိုင်းအစိုင်းများ ဖြစ်၏။ အသိတရားမရှိသည့် ပညာမဲ့သောအရာများ ဖြစ်၏။ သင်တို့၌ များစွာသော အယူအဆများ ရှိကြ၏၊ သင်တို့၏ တောင်းဆိုချက်များမှာ လွန်လွန်းလှ၏။ သင်တို့သည် လူသားမဆန်ကြ။ သင်တို့သည် ဘုရားသခင်ဟူသည်မှာ အဘယ်အရာအား ဆိုလိုသည်ကို အနည်းငယ်မျှပင် နားမလည်ကြ။ ဟောပြောသူများနှင့် အာဝဇ္ဇန်းရွှင်သူများအားလုံးကို ဘုရားသခင်ဟူ၍လည်းကောင်း၊ သင်တို့အား နှုတ်ကပတ်တော်များဖြင့် ထောက်ပံ့ပေးချင်သော မည်သူကိုမဆို သင်တို့၏ ဖခင်ဟူ၍လည်းကောင်း သင်တို့သည် ယုံကြည်ကြ၏။ "ကောင်းမွန်စွာ ဖွဲ့စည်းထားသော" အင်္ဂါရပ်များနှင့် "ထူးခြားသော" ပုံပန်းရှိကြသည့် သင်တို့ထံ၌ အသိတရား အနည်းငယ်မျှပင် ရှိကြသေးသလော၊ ငါ့အား ပြောကြလော့။ ကောင်းကင်နေမင်းကို သင်တို့သိသလော။ သင်တို့တစ်ဦးချင်းစီသည် လောဘကြီးသော အကျင့်ပျက် အရာရှိတစ်ဦးနှင့်တူသောကြောင့်၊ အသိတရားကို မည်သို့မြင်နိုင်မည်နည်း။ သင်တို့သည် အမှန်နှင့်အမှားကို မည်သို့ခွဲခြားနိုင်မည်နည်း။ ငါသည် သင်တို့အား များစွာပေးအပ်ခဲ့ပြီးဖြစ်သော်လည်း၊ သင်တို့အထဲမှ ဘယ်နှစ်ဦးသည် ယင်းအပေါ် တန်ဖိုးထားခဲ့သနည်း။ မည်သူသည် ယင်းကို အပြည့်အဝ ပိုင်ဆိုင်သနည်း။ သင်တို့ ယနေ့လျှောက်နေသောလမ်းကို ဖွင့်ပေးခဲ့သူမှာ မည်သူဖြစ်ကြောင်းကို သင်တို့သည် မသိကြ၊ ထို့ကြောင့် သင်တို့သည် ငါ့အား ဆက်၍တောင်းဆိုကြကာ၊ ငါ့အား အဓိပ္ပာယ်မရှိသည့် ယုတ္တိမတန်သော တောင်းဆိုချက်များကို ပြုလုပ်ကြ၏။ သင်တို့သည် ရှက်ကိုးရှက်ကန်း မဖြစ်ကြသလော။ ငါသည် လုံလောက်စွာ မပြောထားသလော။ ငါသည် လုံလောက်စွာ မပြုထားသလော။ သင်တို့ထဲမှ မည်သူသည် ငါ၏နှုတ်ကပတ်တော်များကို ရတနာတစ်ပါးအဖြစ် စစ်မှန်စွာ မြတ်နိုးနိုင်သနည်း။ သင်တို့သည် ငါ၏မျက်မှောက်တွင် ငါ့ကို မျက်နှာချိုသွေးကြသော်လည်း၊ မျက်မှောက်၌မရှိသောအခါ သင်တို့သည် မုသားဆို၍ လှည့်စားကြ၏။ သင်တို့၏ပြုမူပုံများသည် အလွန်စက်ဆုပ်ဖွယ်ကောင်းပြီး၊ ယင်းတို့သည် ငါ့အတွက် ရွံရှာဖွယ်ကောင်း၏။ သင်တို့သည် ငါ့အား ပြောဆိုရန်၊ အမှုပြုရန် တောင်းဆိုခြင်းမှာ သင်တို့၏အသက်တာများကို ပြောင်းလဲစေရန်အတွက် မဟုတ်ဘဲ၊ သင်တို့၏မျက်လုံးများကို အစာကျွေးရန်၊ သင်တို့၏အမြင်များကို ကျယ်ပြန့်စေရန်ဟူသော အကြောင်းရင်းအတွက်သာ ဖြစ်ကြောင်းကို ငါသိသည်။ သင်တို့ကို ငါသည် မည်မျှပြောခဲ့ပြီးဖြစ်သနည်း။ သင်တို့၏အသက်တာများ ပြောင်းလဲသင့်ခဲ့သည်မှာ ကြာလှပြီဖြစ်၏၊ သို့ဆိုလျှင် သင်တို့သည် ယခုတိုင်အောင် အဘယ်ကြောင့် သင်တို့၏အခြေအနေဟောင်းသို့ ထပ်ကာထပ်ကာ ပြန်ရောက်နေသေးသနည်း။ ငါ၏နှုတ်ကပတ်တော်များသည် သင်တို့ထံမှ လုယူခြင်းခံရကာ၊ သင်တို့သည် ၎င်းတို့ကို မရရှိခဲ့ခြင်းဖြစ်နိုင်သလော။ အမှန်အတိုင်းဆိုရလျှင် သင်တို့ကဲ့သို့ ယိုယွင်းဆုတ်ယုတ်သူများကို ငါသည် ဆက်၍မပြောဆိုချင်တော့ပေ၊ အချည်းနှီးပင်ဖြစ်လိမ့်မည်။ ငါသည် အလဟဿဖြစ်သော အမှုမြောက်မြားစွာကို ပြုလိုခြင်းမရှိ။ သင်တို့သည် သင်တို့၏အမြင်များကို ချဲ့ထွင်ရန် သို့မဟုတ် မျက်စိစားပွဲထိုင်ရန်သာ အလိုရှိကြပြီး၊ အသက်ကိုရရန် အလိုမရှိကြ။ သင်တို့အားလုံးသည် မိမိကိုယ်ကို လိမ်လည်လှည့်ဖြားနေကြခြင်းပင် ဖြစ်၏။ သင်တို့ကို ငါမေးမည်၊ သင်တို့ကို မျက်နှာချင်းဆိုင် ပြောဆိုထားသည်များ၏ မည်မျှလောက်ကို သင်တို့သည် လက်တွေ့လုပ်ဆောင်ပြီးပြီနည်း။ သင်တို့လုပ်သည့်အရာမှာ အခြားသူများကို လှည့်စားရန် ပရိယာယ်ဆင်ခြင်းသာဖြစ်၏။ သင်တို့ထဲတွင် ပွဲကြည့်ပရိသတ်များအဖြစ် လက်ပိုက်ကြည့်ကာ ကျေနပ်နေသူများကို ငါရွံမုန်း၏၊ ထို့ပြင် သင်တို့၏ သိချင်စိတ်ပြင်းပြခြင်းမှာ လွန်စွာစက်ဆုပ်ဖွယ်ကောင်းသည်ဟု ငါသဘောထားသည်။ အကယ်၍ သင်တို့သည် ဤနေရာသို့ ရောက်နေခြင်းမှာ စစ်မှန်သောလမ်းကို ရှာရန်အတွက် သို့မဟုတ် သမ္မာတရားကို ဆာငတ်ခြင်းအတွက် မဟုတ်လျှင်၊ သင်တို့သည် ငါ၏မုန်းတီးစက်ဆုပ်ခြင်းကို ခံရသောအရာများပင်ဖြစ်၏။ သင်တို့သည် ငါပြောဆိုသည်ကို နားထောင်ခြင်းမှာ သင်တို့၏သိချင်စိတ်ပြင်းပြခြင်းကို ဖြည့်ဆည်းရန် သို့မဟုတ် သင်တို့၏လောဘလိုအင်များကို တစ်ခုမဟုတ်တစ်ခု ပြည့်ဝစေရန်အတွက်သာဖြစ်ကြောင်း ငါသိသည်။ သင်တို့၌ သမ္မာတရား၏တည်ရှိခြင်းကို ရှာဖွေရန်သော်လည်းကောင်း၊ အသက်တာသို့ ဝင်ရောက်ရန်အတွက် မှန်သောလမ်းကြောင်းကို စူးစမ်းရှာဖွေရန်သော်လည်းကောင်း အတွေးမရှိကြပေ၊ ဤလိုအပ်ချက်တို့သည် သင်တို့ကြား၌ မတည်ရှိခြင်းသာဖြစ်၏။ သင်တို့ပြုလုပ်သမျှမှာ ဘုရားသခင်အား လေ့လာစရာ သဘောကျစရာ ကစားစရာတစ်ခုအဖြစ် သဘောထားခြင်းပင်ဖြစ်သည်။ သင်တို့၌ အသက်တာကို ရှာဖွေရန် စိတ်ထက်သန်မှု အနည်းငယ်မျှသာ ရှိသော်လည်း၊ စူးစမ်းရန်အတွက်မူ ဆန္ဒမြောက်မြားစွာရှိကြသည်။ ယင်းသို့သော လူတို့အား အသက်တာလမ်းအကြောင်း ရှင်းပြခြင်းသည် လေထဲသို့ စကားပြောနေသည့် သဘောပင်ဖြစ်၏၊ ငါသည် လုံးဝမပြောလျှင်ပင် ကောင်းဦးမည်။ သင်တို့ကို ငါပြောမည်၊ အကယ်၍ သင်တို့သည် သင်တို့၏စိတ်နှလုံးအတွင်းမှ ဟာကွက်ကိုဖြည့်ရန် ရှာကြံနေရုံမျှသာ ရှိသည်ဆိုလျှင်၊ သင်တို့သည် ငါ့ထံသို့မလာသည်သာ အကောင်းဆုံးဖြစ်ပေမည်။ သင်တို့သည် သင်တို့၏အသက်တာများအပေါ် အလေးထားသင့်သည်။ မိမိကိုယ်ကို မလှည့်စားကြနှင့်။ သင်တို့၏သိချင်စိတ်ပြင်းပြမှုအား သင်တို့၏အသက်တာကို ရှာဖွေမှုအတွက် အခြေခံအကြောင်းရင်းအဖြစ် မမှတ်ယူခြင်းသည်လည်းကောင်း၊ ငါ့အား သင်တို့ထံ ပြောဆိုစေရန် အကြောင်းပြချက်တစ်ခုအဖြစ် အသုံးမပြုခြင်းသည်လည်းကောင်း သင်တို့အတွက် အကောင်းဆုံးဖြစ်မည်။ ဤအရာအားလုံးမှာ သင်တို့အနေဖြင့် လွန်ကဲစွာကျွမ်းကျင်သော ပရိယာယ်များပင်ဖြစ်သည်။ သင့်ကို ငါထပ်၍မေးမည်၊ သင့်ကို ဝင်ရောက်ရန် ငါတောင်းဆိုထားသည့်အရာ၏ မည်မျှလောက်ကို သင်သည် အမှန်တကယ် ဝင်ရောက်ပြီးပြီနည်း။ သင့်အား ငါပြောပြီးသောအရာအားလုံးကို သင်သည် နားလည်သဘောပေါက်ပြီလော။ သင့်အား ငါပြောပြီးသောအရာအားလုံးကို သင်သည် လက်တွေ့လုပ်ဆောင်ထားနိုင်ပြီလော။

ခေတ်ကာလတိုင်း၏အမှုကို ဘုရားသခင်ကိုယ်တော်တိုင်မှ အစပြုခြင်းဖြစ်၏၊ သို့သော် ဘုရားသခင်က မည်သို့သောနည်းလမ်းဖြင့် အမှုပြုသည်ဖြစ်စေ၊ သူသည် လှုပ်ရှားမှုတစ်ခုကို စတင်ရန်လည်းကောင်း၊ အထူးဆွေးနွေးပွဲများကို ကျင်းပရန်လည်းကောင်း၊ သင်တို့ကိုယ်စား အဖွဲ့အစည်းတစ်ခုခုကို တည်ထောင်ရန်လည်းကောင်း ကြွလာခြင်းမဟုတ်သည်ကို သင်သိသင့်၏။ သူပြုသင့်သောအမှုကို လုပ်ဆောင်ရန်အတွက်သာ သူကြွလာခြင်းဖြစ်သည်။ သူ၏အမှုသည် မည်သည့်လူသား၏ကန့်သတ်မှုကိုမျှ ခံရခြင်းမရှိပေ။ သူသည် သူ၏အမှုကို သူအလိုရှိသည့်အတိုင်းပြု၏။ လူသားသည် ယင်းအပေါ် မည်သို့တွေးသည်ဖြစ်စေ၊ မည်သို့သိသည်ဖြစ်စေ၊ သူသည် သူ၏အမှုကို လုပ်ဆောင်ရန်အတွက်သာ အလေးထားခြင်းဖြစ်သည်။ ကမ္ဘာမြေကြီးကို ဖန်ဆင်းသည့်အချိန်မှစ၍ ပစ္စုပ္ပန်ကာလအထိ အမှု၏ အဆင့်သုံးဆင့် ရှိခဲ့ပြီဖြစ်သည်။ ယေဟောဝါမှသည် ယေရှုအထိ၊ ပညတ်တော်ခေတ်မှသည် ကျေးဇူးတော်ခေတ်အထိ၊ ဘုရားသခင်သည် လူသားအတွက် အထူးဆွေးနွေးပွဲတစ်ခုကို မည်သည့်အခါမျှ ကျင်းပခဲ့ခြင်း မရှိသကဲ့သို့၊ တစ်ကမ္ဘာလုံးဆိုင်ရာ အထူးအလုပ်ရုံ ဆွေးနွေးပွဲတစ်ခုကို ကျင်းပ၍ သူ၏အမှုနယ်ပယ်ကို ချဲ့ထွင်ရန်အလို့ငှာ လူသားမျိုးနွယ်အားလုံးကို အတူတကွ စုဝေးစေခြင်းကိုလည်း သူမပြုခဲ့ပေ။ သူပြုသမျှမှာ သင့်လျော်သောအချိန်၊ သင့်လျော်သောနေရာတစ်ခု၌ ခေတ်ကာလတစ်ခုလုံး၏ ကနဦးအမှုကို လုပ်ဆောင်ခြင်းဖြစ်ပြီး၊ ယင်းသို့အားဖြင့် ခေတ်ကာလကို ဖွင့်လှစ်ပေးကာ၊ လူသားမျိုးနွယ်အား ၎င်းတို့၏အသက်တာများကို နေထိုင်စေရန် လမ်းပြခြင်းဖြစ်၏။ အထူးဆွေးနွေးပွဲများသည် လူသား၏ဝတ်ပြုပွဲများသာ ဖြစ်သည်။ အားလပ်ရက်များကျင်းပရန် လူတို့အား အတူတကွစုဝေးစေခြင်းသည် လူသား၏အလုပ်ဖြစ်သည်။ ဘုရားသခင်သည် အားလပ်ရက်များကို ကျင်းပခြင်း မရှိသည့်အပြင်၊ ယင်းတို့ကို စက်ဆုပ်ရွံမုန်း၏။ သူသည် အထူးဆွေးနွေးပွဲများကို ကျင်းပခြင်း မရှိသည်သာမက၊ ယင်းတို့ကို စက်ဆုပ်ရွံမုန်းလေ၏။ ယခု သင်သည် လူ့ဇာတိခံယူသော ဘုရားသခင်မှ လုပ်ဆောင်ပြီးစီးသည့် အမှုအကြောင်းကို အတိအကျ နားလည်သင့်ပေပြီ။

ယခင်က:လူ့ဇာတိခံယူခြင်း၏ နက်နဲရာအချက် (၂)

နောက်တစ်ခုသို့:လူ့ဇာတိခံယူခြင်း၏ နက်နဲသောအရာ (၄)

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) သိုးသငယ် ဖွင့်သည့် စာစောင် တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလ၏ ခရစ်တော်အတွက် သက်သေခံချက်များ နိုင်ငံတော်၏ ဧဝံဂေလိတရားအကြောင်း အနန္တတန်ခိုးရှင်ဘုရားသခင်၏ စံနမူနာ နှုတ်ကပတ်တော်များ လက်ရွေးစင်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ