အနန္တတန်ခိုးရှင် ဘုရားသခင် အသင်းတော် အပလီကေးရှင်း

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

အခန်း ၉၈

ခပ်သိမ်းသောအရာတို့သည် သင်တို့အယောက်တိုင်းအပေါ် ကျရောက်လိမ့်မည်ဖြစ်ပြီး၊ ၎င်းတို့သည် သင်တို့အား ငါ့အကြောင်းကို ပို၍ သိစေမည်ဖြစ်ကာ၊ ငါ့အကြောင်းကို ပို၍ သေချာစေလိမ့်မည်။ ထိုအရာတို့သည် သင်တို့အား တစ်ပါးတည်းသော ဘုရားသခင်ကိုယ်တိုင် ဖြစ်သည့် ငါ့ကို သိစေမည်၊ အနန္တတန်ခိုးရှင်ဖြစ်သော ငါ့ကို သိစေမည်၊ လူ့ဇာတိခံ ဘုရားသခင်ကိုယ်တိုင် ဖြစ်သော ငါ့ကို သိစေလိမ့်မည်။ ထို့နောက်တွင် ငါသည် ဇာတိပကတိမှ ထွက်ခွာ၍၊ ငါ၏ နေထိုင်ရာဖြစ်သော ဇိအုန်သို့ ပြန်မည်၊ ငါ၏ ပန်းတိုင်ဖြစ်သော ကောင်းမွန်ရာ ခါနန်ပြည်သို့ ပြန်လိမ့်မည်၊ ထို့ပြင် ၎င်းသည် အရာအားလုံးကို ငါ ဖန်ဆင်းခဲ့သည့် အရင်းခံနေရာလည်း ဖြစ်၏။ ယခုတွင် သင်တို့ တစ်စုံတစ်ဦးမျှ ငါ ပြောနေသော စကားလုံးများ၏ အဓိပ္ပါယ်ကို နားမလည်ချေ၊ ဤစကားတို့၏ အဓိပ္ပါယ်ကို နားလည်နိုင်သောသူ တစ်ယောက်မျှ မရှိပေ။ သင်တို့အား အရာအားလုံးကို ထုတ်ဖော် ပြသည့်အခါမှသာ၊ သင်တို့သည် ဤစကားတို့ကို အဘယ်ကြောင့် ငါက ပြောဆိုနေသည်ကို နားလည်ကြလိမ့်မည်။ ငါသည် လောကနှင့် မသက်ဆိုင်သကဲ့သို့၊ ငါသည် စကြဝဠာနှင့်ပင် မသက်ဆိုင်ပေ၊ အဘယ်ကြောင့်ဆိုသော် ငါသည် တစ်ပါးတည်းသော ဘုရားသခင်ကိုယ်တိုင် ဖြစ်သောကြောင့် ဖြစ်သည်။ ငါသည် စကြဝဠာလောက တစ်ခုလုံးကို ငါ၏လက်ထဲတွင် ဆုပ်ကိုင်ထား၏၊ ငါကိုယ်တိုင်သည် ၎င်းအား ညွှန်ကြားသည့်သူဖြစ်ပြီး၊ လူတို့သည် ငါ၏ ဩဇာအာဏာအား နာခံရုံသာ နာခံနိုင်၏၊ ငါ၏ သန့်ရှင်းသော နာမအား ပြောဆိုရုံသာ ပြောဆိုနိုင်၏၊ ငါ့အား ချီးမွမ်းထောမနာပြုရုံသာ ပြုနိုင်၏။ အရာခပ်သိမ်းကို သင်တို့အား ဖြည်းဖြည်းချင်း ထုတ်ဖော် ပြလိမ့်မည်။ မည်သည့်အရာကိုမျှ ဖုံးကွယ်ထားခြင်း မရှိသော်လည်း၊ သင်တို့သည် ငါ၏ ပြောဆိုဟန်နှင့် ငါ့နှုတ်ကပါတ်တော်တို့၏ သဘောကို နားမလည်နိုင်ကြသေးချေ။ ငါ၏ စီမံခန့်ခွဲမှုအစီအစဉ် အကြောင်းခြင်းရာတို့ကို နားမလည်ကြသေးချေ။ ထို့ကြောင့် ငါ ပြောဆိုထားသည်များမှ သင်တို့ နားမလည်သော အရာအားလုံးကို နောက်ပိုင်းတွင် သင်တို့အား ငါ ပြောမည်၊ အဘယ်ကြောင့်ဆိုသော် ခပ်သိမ်းသော အရာတို့သည် ငါ့အဖို့ ရိုးရှင်းလွယ်ကူသော်လည်း၊ သင်တို့အဖို့မူ ခက်ခဲလွန်းနေခြင်းကြောင့်၊ နားမလည်ခြင်းမျှသာ ဖြစ်သည်။ ထို့ကြောင့် ငါသည် ငါ၏ ပြောဆိုဟန်ကို ပြောင်းလဲမည်၊ ငါ ပြောဆိုသောအခါ အကြောင်းအရာများကို ဆက်စပ်တော့မည်မဟုတ်ဘဲ၊ အချက်တစ်ခုချင်းစီကို ရှင်းလင်းတော့မည်။

သေခြင်းမှ ရှင်ပြန်ထမြောက်ခြင်း ဆိုသည်မှာ အဘယ်နည်း။ ဇာတိပကတိတွင် သေဆုံး၍၊ သေခြင်းနောက်တွင် ကိုယ်ခန္ဓာသို့ ပြန်လာခြင်း ဖြစ်သလော။ ဤသည်ကို သေခြင်းမှ ရှင်ပြန်ထမြောက်ခြင်းဟု ခေါ်ဆိုသလော။ ထိုမျှပင် ရိုးရှင်းသလော။ ငါသည် အနန္တတန်ခိုးရှင် ဘုရားသခင်ဖြစ်သည်၊ ဤအကြောင်းကို သင်သည် ဘာများ သိသနည်း။ ဤအရာကို မည်သို့ နားလည်သဘောပေါက်သနည်း။ ငါ၏ ပထမအကြိမ် လူ့ဇာတိခံယူမှုအတွင်း သေခြင်းမှ ရှင်ပြန်ထမြောက်ခဲ့ခြင်းကို အတိအကျယုံကြည်နိုင်သလော။ ကျမ်းစာထဲ၌ ဖော်ပြထားသကဲ့သို့ အမှန်တကယ် ဖြစ်ခဲ့သလော။ ငါက ပွင့်လင်းစွာ မပြောဆိုလျှင်၊ ငါက ရှင်းလင်းစွာ မပြောဆိုလျှင်၊ ငါ့နှုတ်ကပတ်တော်တို့၏ အနက်အဓိပ္ပါယ်ကို မည်သူမျှ နားလည်နိုင်လိမ့်မည်မဟုတ်ဟု ငါ ပြောထားပြီးဖြစ်သည်။ သေခြင်းမှ ရှင်ပြန်ထမြောက်ခြင်းသည် ထိုသို့ ဖြစ်သည်ဟု မယူဆခဲ့သောသူဟူသည် ခေတ်ကာလများတစ်လျှောက်တွင် တစ်ဦးတစ်ယောက်မျှ မရှိပေ။ ကမ္ဘာလောကကို ဖန်ဆင်းချိန်ကတည်းကပင် မည်သူတစ်ဦးတစ်ယောက်မျှ ဤအရာ၏ စစ်မှန်သော အဓိပ္ပာယ်ကို နားမလည်သေးပေ။ ငါသည် ကားတိုင်ပေါ်တွင် အမှန်တကယ် သံမှိုစွဲခံခဲ့ရသလော။ ထို့ပြင် သေပြီးနောက် ငါသည် သချိုင်းတော်ထဲမှ ထွက်ခဲ့သလော။ အမှန်တကယ်ပင် ဤသို့ ဖြစ်ခဲ့သလော။ ဤအရာသည် တကယ်ပင် အမှန်ဖြစ်နိုင်သလော။ ခေတ်ကာလများတစ်လျှောက်တွင် မည်သူကမျှ ဤအရာနှင့်ပတ်သက်၍ အားစိုက်ထုတ်ခဲ့ခြင်း မရှိ၊ ဤအရာမှတစ်ဆင့် ငါ့အား မည်သူကမျှ သိလာခြင်းလည်း မရှိ၊ ထို့ပြင် မယုံကြည်သောသူတစ်ယောက်မျှလည်း မရှိ၊ လူတိုင်းလူတိုင်းသည် ဤအရာအား အမှန်ဖြစ်သည်ဟု ထင်ကြ၏။ ငါ၏ နှုတ်ကပတ်တော်တိုင်းတွင် အတွင်းအနက်အဓိပ္ပါယ်တစ်ခု ရှိသည်ကို ၎င်းတို့ မသိကြပေ။ သို့ဆိုလျှင် သေခြင်းမှ ရှင်ပြန်ထမြောက်ခြင်းသည် အတိအကျဆိုသော် အဘယ်နည်း။ (မဝေးသော အနာဂတ်တွင် သင်တို့သည် ဤအရာကို ကြုံတွေ့ရတော့မည်ဖြစ်၍၊ သင်တို့ကို ငါ ကြိုတင်ကာ ပြောတော့မည်။) ဖန်ဆင်းခံ သတ္တဝါတိုင်းသည် သေခြင်းထက် ရှင်ခြင်းကို ပိုနှစ်သက်ကြ၏။ ငါ၏ အမြင်၌ ဇာတိပကတိ၏ သေဆုံးခြင်းသည် အမှန်တကယ် သေခြင်းတစ်ခု မဟုတ်ပေ။ ငါ၏ ဝိညာဉ်အား လူတစ်ယောက်ထံမှ ပြန်သိမ်းသောအခါ၊ ထိုသူသည် သေဆုံး၏။ ထို့ကြောင့် စာတန်၏ ဖျက်ဆီးခြင်း ခံရသော ထို မကောင်းဆိုးဝါးများအားလုံး (ယုံကြည်ခြင်း မရှိသောသူများ၊ မယုံကြည်သူများအားလုံး)ကို လူသေတို့ဟု ငါက ခေါ်ဆို၏။ ကမ္ဘာကြီးကို ဖန်ဆင်းချိန်မှစ၍ ငါ၏ ဝိညာဉ်ကို ငါ ရွေးကောက်ထားသော အယောက်တိုင်းထံတွင် ထည့်သွင်းထားသည်။ သို့သော် ဖန်ဆင်းခြင်းနောက်၌ ဖြစ်ပေါ်သော အဆင့်တစ်ခုအပြီးတွင်၊ လူတို့သည် အချိန်အတော်ကြာ စာတန်၏ သိမ်းပိုက်ခြင်းကို ခံခဲ့ရ၏။ ထို့ကြောင့် ငါသည် စွန့်ခွာခဲ့၍၊ လူတို့သည် ဆင်းရဲဒုက္ခကို စတင် ခံစားခဲ့ရ၏ (လူ့ဇာတိခံပြီးနောက် ငါ့အား ကားတိုင်တွင် သံမှိုစွဲချိန်၌ ငါ ခံစားခဲ့ရသော ဆင်းရဲဒုက္ခမျိုးကို ဆိုလိုသည်)။ သို့သော် ငါ့အားဖြင့် ကြိုတင်ပြဋ္ဌာန်းသော အချိန်တွင် (လူတို့အပေါ် ငါ၏စွန့်ခွာမှု အဆုံးသတ်သောအချိန်)၊ ငါ ကြိုတင်ပြဋ္ဌာန်းထားခဲ့သော လူတို့ကို ပြန်သိမ်းယူခဲ့သည်၊ ထို့နောက် သင်တို့အနေဖြင့် အသက်တာသို့ ပြန်လာစေရန်အလို့ငှာ၊ ငါ၏ဝိညာဉ်အား သင်တို့ထံတွင် ထပ်မံ၍ ထားရှိခဲ့၏။ ဤအရာကို သေခြင်းမှ ရှင်ပြန်ထမြောက်ခြင်းဟု ခေါ်သည်။ ယခု၌ ငါ၏ ဝိညာဉ်အတွင်း ရှင်သန်နေထိုင်သောသူတို့သည် ထူးကဲသာလွန်နေပြီးဖြစ်ကာ၊ ၎င်းတို့အားလုံးသည် ကိုယ်အတွင်း၌ နေထိုင်ကြ၏။ သို့ရာတွင် များမကြာမီ၌ သင်တို့အားလုံးသည် သင်တို့၏ စဉ်းစားခြင်း၊ သင်တို့၏ အယူအဆများနှင့် လောက၏ အချုပ်အနှောင်အားလုံးတို့ကို စွန့်လွှတ်ကြလိမ့်မည်။ သို့သော် လူတို့ တွေးထင်သကဲ့သို့ ဆင်းရဲဒုက္ခခံပြီးနောက် သေခြင်းမှ ထလာခြင်း မဟုတ်ပေ။ ယခု သင်တို့ ရှင်သန်နေထိုင်နေခြင်းသည် ကိုယ်အတွင်း၌ နေထိုင်ခြင်းအတွက် ကြိုတင်သတ်မှတ်ချက်ဖြစ်သည်၊ ဝိညာဉ်လောကသို့ ဝင်ရောက်ဖို့ရန် လိုအပ်သောလမ်း ဖြစ်၏။ ငါ ပြောဆိုသော သာမန်လူ့သဘာဝကို ကျော်လွန်ခြင်းဟူသည် မိသားစုမရှိခြင်း၊ ဇနီးမယားနှင့် သားသမီး မရှိခြင်း၊ လူသားဆိုင်ရာလိုအပ်ချက်များ မရှိခြင်းကို ဆိုလိုသည်။ ၎င်းသည် ငါ၏ပုံသဏ္ဍာန်အား တွေ့ကြုံခြင်းတွင် အာရုံစိုက်ရန်သာ ဖြစ်သည်၊ ငါ၏အတွင်းသို့ ဝင်ရောက်ခြင်းတွင် အာရုံစိုက်ရန်သာ ဖြစ်ပြီး၊ ငါ၏ပြင်ပရှိ အခြားသော အရာများကို မတွေးတောရန် ဖြစ်သည်။ သင်သွားသော နေရာတိုင်းသည် သင့်အိမ်ဖြစ်၍၊ ဤသည်မှာ သာမန်လူ့သဘာဝကို ကျော်လွန်နေခြင်းပင် ဖြစ်သည်။ သင်တို့သည် ငါ၏ ထိုစကားတို့ကို လုံးလုံးလျားလျား တလွဲအဓိပ္ပာယ် ကောက်ထားကြ၏၊ သင်တို့၏ နားလည်ခြင်းမှာ တိမ်လွန်းသည်။ ငါသည် တိုင်းနိုင်ငံအားလုံးနှင့် လူမျိုးအားလုံးတို့ထံ အတိအကျအားဖြင့် မည်ကဲ့သို့ ပေါ်ထွန်းမည်နည်း။ ယနေ့တွင် ဇာတိပကတိအားဖြင့်လော။ မဟုတ်ချေ။ အချိန်တန်သောအခါ ငါသည် စကြဝဠာ၏ တိုင်းနိုင်ငံတိုင်းတွင် ငါ၏ကိုယ်အတွင်း၌ ပေါ်ထွန်းလိမ့်မည်။ သင်တို့အနေဖြင့် တိုင်းတစ်ပါးသားတို့အား ဦးဆောင်လမ်းပြရန် လိုအပ်သော အချိန်ကာလသည် မရောက်ရှိသေးချေ။ ထိုကာလ ရောက်ရှိသောအခါ သင်တို့သည် ၎င်းတို့ကို ဦးဆောင်လမ်းပြဖို့ရန် ဇာတိပကတိမှ ထွက်ခွာ၍၊ ကိုယ်အတွင်းသို့ ဝင်ရောက်ရန် လိုအပ်လိမ့်မည်။ ဤအရာသည် အမှန်တကယ် ဖြစ်သော်လည်း၊ ၎င်းသည် လူတို့ တွေးထင်ကြသော "သေခြင်းမှ ရှင်ပြန်ထမြောက်ခြင်း" မဟုတ်ပေ။ သတ်မှတ်ထားသော အချိန်၌၊ သင်တို့သည် ဇာတိပကတိမှ အမှတ်တမဲ့ ထွက်ခွာ၍၊ ဝိညာဉ်လောကသို့ ဝင်ရောက်ကာ၊ ငါတို့နှင့်အတူ တိုင်းနိုင်ငံအားလုံးကို အုပ်စိုးကြလိမ့်မည်။ အချိန် မကျသေးချေ။ ငါသည် သင်တို့ကို ဇာတိပကတိအတွင်း ရှိစေလိုသောအခါ၊ သင်တို့သည် ဇာတိပကတိအတွင်း ရှိနေကြလတ္တံ့ (ငါ့အမှု၏ သတ်မှတ်ချက်များနှင့်အညီ သင်တို့သည် ယခုအချိန်၌ စဉ်းစားခြင်း ရှိရမည်၊ ဇာတိပကတိအတွင်း နေထိုင်နေရမည်၊ ထို့ကြောင့် သင်တို့အနေဖြင့် ဇာတိပကတိအတွင်း ပြုလုပ်ရန် လိုအပ်သောအရာများကို ငါ၏ခြေလှမ်းများအတိုင်း လုပ်ဆောင်သင့်တုန်းပင် ဖြစ်သည်။ မလှုပ်မယှက်ဖြင့် မစောင့်ဆိုင်းနှင့်၊ အဘယ်ကြောင့်ဆိုသော် စောင့်ဆိုင်းခြင်းသည် အကြောင်းအရာတို့ကို ကြန့်ကြာစေလိမ့်မည်)။ ငါသည် သင်တို့ကို အသင်းတော်၏ သိုးထိန်းများကဲ့သို့ ကိုယ်အတွင်း၌ ဆောင်ရွက်စေလိုသောအခါ၊ သင်တို့သည် ဇာတိပကတိမှ ထွက်ခွာ၍၊ တွေးခေါ်ခြင်းကို စွန့်ပစ်ကာ၊ အသက်ရှင်နေထိုင်ရန်အတွက် ငါ့အား လုံးလုံးလျားလျား အမှီပြုကြလိမ့်မည်။ ငါ၏ တန်ခိုးတော်၌ ယုံကြည်ခြင်းရှိလော့၊ ငါ၏ ဉာဏ်ပညာကို ယုံကြည်ခြင်းရှိလော့။ အရာခပ်သိမ်းတို့ကို ငါကိုယ်တိုင် ပြီးမြောက်စေမည်။ သင်တို့သည် ဝမ်းမြောက်ဖို့ရန် စောင့်ဆိုင်းဖို့သာ လို၏။ ကောင်းချီးမင်္ဂလာအလုံးစုံသည် သင်တို့ထံ ရောက်လာမည်ဖြစ်ပြီး၊ သင်တို့သည် အဆုံးအစမဲ့သော မကုန်ခမ်းနိုင်သော အထောက်အပံ့ကို ရရှိလိမ့်မည်။ ထိုသို့သောနေ့ရက် ရောက်သောအခါ၊ သင်တို့သည် ဤအရာအပေါ် ငါ၏ပြုလုပ်ပုံ အခြေခံသဘောကို နားလည်လိမ့်မည်၊ ငါ၏ အံ့ဖွယ် လုပ်ဆောင်ချက်များကို သိလာမည်ဖြစ်ပြီး၊ ငါ၏သားဦးတို့ကို ဇိအုန်သို့ မည်ကဲ့သို့ ပြန်လည်ခေါ်ဆောင်သည်ကိုလည်း နားလည်ကြလိမ့်မည်။ ဤအရာသည် သင်တို့ စိတ်ကူးသကဲ့သို့ မရှုပ်ထွေးသော်လည်း၊ သင်တို့ ထင်သလောက်လည်း မရိုးရှင်းပေ။

ငါက ဤအရာကို ပြောသည့်အခါ၊ သင်တို့သည် ၎င်း၏နောက်ကွယ်မှ ငါ၏ရည်ရွယ်ချက်ကို အနည်းငယ်သာလျှင် နားလည်နိုင်ပြီး၊ ပို၍ပင် ရှုပ်ထွေးကြသည်ကို ငါ သိ၏။ အစောပိုင်းတွင် ငါ ပြောဆိုထားသည်များနှင့် ရောထွေးကုန်မည်ဖြစ်ကာ၊ မည်သည်ကိုမျှ နားမလည်နိုင်ဘဲရှိမည်၊ ထွက်ပေါက်မရှိသကဲ့သို့ ထင်ရလိမ့်မည်။ သို့သော် စိတ်မပူကြနှင့်၊ ငါသည် သင်တို့အား အရာခပ်သိမ်းကို ပြောပြမည်။ ငါ ပြောသော အရာခပ်သိမ်းသည် အဓိပ္ပါယ်ရှိ၏။ ငါသည် တည်ရှိနေသော အရာများကို မရှိခြင်းသို့ ပြန်ထားနိုင်ပြီး၊ အရာမျိုးစုံကိုလည်း မရှိခြင်းထဲမှ ထုတ်ယူနိုင်သည်ဟူ၍ ငါ ပြောဆိုထား၏။ လူသားစိတ်ကူးထဲ၌၊ ဇာတိပကတိမှ ကိုယ်အတွင်းသို့ ဝင်ရောက်ရန်မှာ၊ တစ်ဦးတစ်ယောက်အနေဖြင့် သေခြင်းမှ ထမြောက်ရမည်ဖြစ်သည်။ ယခင်ကမူ ငါသည် ဤနည်းလမ်းကို သုံး၍၊ ငါ၏ အကြီးဆုံးသော အံ့ဖွယ်အမှုကို ထင်ရှားပြခဲ့သည်၊ သို့သော် ယနေ့အချိန်သည် အတိတ်ကကဲ့သို့ မဟုတ်ပေ။ ငါသည် သင်တို့ကို ဇာတိပကတိမှ ကိုယ်အတွင်းသို့ တိုက်ရိုက် ပို့ဆောင်မည်ဖြစ်သည်။ ဤသည်မှာ သာ၍ပင် ကြီးမြတ်သော နိမိတ်လက္ခဏာတစ်ခု မဟုတ်ပေလော။ ဤအရာသည် ငါ၏ အနန္တတန်ခိုးကို သာ၍ ပေါ်လွင်စေခြင်း မဟုတ်လော။ ငါ၌ ငါ၏အစီအစဉ် ရှိ၏။ ငါ၌ ငါ၏ ရည်ရွယ်ချက်များ ရှိ၏။ အဘယ်သူသည် ငါ၏လက်များမှ ကင်းလွတ်သနည်း။ ငါသည် လုပ်ဆောင်သကဲ့သို့၊ ငါသည် သိ၏။ ယခု ငါ၏ လုပ်ဆောင်မှု နည်းလမ်းများသည် အမှန်တကယ်၌ အတိတ်နှင့် ကွဲပြားလျက်ရှိလေသည်။ ငါသည် ငါ၏ လုပ်ဆောင်မှုနည်းလမ်းများကို ခေတ်ကာလတို့၏ အပြောင်းအလဲနှင့်အညီ ပြုပြင်၏။ ငါ့အား ကားတိုင်တွင် သံမှိုစွဲခဲ့သော ကာလသည် ကျေးဇူးတော်ခေတ် ဖြစ်ခဲ့သည်၊ သို့သော် ယခုသည် နောက်ဆုံးသောကာလ ဖြစ်၏။ ငါ့အမှု၏ အဟုန်သည် အရှိန်မြင့်လာနေသည်။ ၎င်းသည် အတိတ်တွင် ဖြစ်ခဲ့သော မြန်နှုန်းနှင့် မတူညီပေ၊ အတိတ်ကထက် ပို၍ များစွာ နှေးကွေးလျက်၊ အတိတ်ကထက် ပို၍ များစွာ မြန်ဆန်လာ၏။ ၎င်းအား ဖော်ပြဖို့ရန် မဖြစ်နိုင်ခြင်းသာ ဖြစ်ပြီး၊ ခက်ခဲရှုပ်ထွေးသော လုပ်ငန်းစဉ်များစွာ မလိုအပ်ချေ။ ငါသည် မည်သည့်အရာကိုမဆို လွတ်လပ်စွာ လုပ်ကိုင်သည်။ ငါ၏ အလိုအား မည်သို့ ပြည့်စုံစေမည်ဆိုသည်နှင့် ငါသည် သင်တို့အား မည်သို့ စုံလင်စေမည်ဆိုသည်တို့ကို ချမှတ်ရန်အတွက် ငါ့ထံမှ အာဏာစကားတစ်ခွန်းသာလျှင် လိုအပ်သည်မှာ အမှန် မဟုတ်သလော။ ငါ ပြောသော အရာခပ်သိမ်းတို့သည် မုချ ပြီးစီးလိမ့်မည်။ ယခင်အတိတ်ကာလ၌ ငါသည် ဆင်းရဲဒုက္ခ ခံရလိမ့်မည်ဟု မကြာခဏ ပြောခဲ့၏၊ ထို့ပြင် ဟိုယခင် ငါ ခံစားခဲ့ရသော ဆင်းရဲဒုက္ခကို လူတို့အား ထုတ်ဖော်ပြောခွင့် မပြုခဲ့ပေ။ ဤအရာအား ထုတ်ဖော်ပြောခြင်းသည် ငါ့အား ရိုင်းပျစော်ကားခြင်း ဖြစ်ခဲ့၏။ ဤသည်မှာ ငါသည် ဘုရားသခင်ကိုယ်တိုင် ဖြစ်ခြင်းကြောင့် ဖြစ်ပြီး၊ ငါ့အဖို့ ဆင်းရဲဒုက္ခဟူသည် မရှိချေ။ သင်က ဤဆင်းရဲဒုက္ခအကြောင်း ပြောသောအခါ၊ လူတို့ကို ငိုကြွေးစေ၏။ အနာဂတ်တွင် ညည်းတွားခြင်းများ၊ မျက်ရည်များ ရှိတော့မည် မဟုတ်ကြောင်းကို ငါ ပြောဆိုထားသည်။ ၎င်းအား ဤရှုထောင့်မှ ရှင်းပြမှသာလျှင်၊ ငါ့နှုတ်ကပတ်တော်တို့၏ အဓိပ္ပာယ်ကို နားလည်နိုင်မည်ဖြစ်သည်။ "လူသားတို့သည် ဤဆင်းရဲဒုက္ခကို ကြံ့ကြံ့မခံနိုင်ခြင်းသာဖြစ်၏" ဟူသော စကား၏ အဓိပ္ပါယ်မှာ ငါသည် လူသားအယူအဆများနှင့် အတွေးအခေါ်အားလုံးတို့မှ လွတ်မြောက်နိုင်သည်ကို လည်းကောင်း၊ ဇာတိပကတိ၏ စိတ်ခံစားချက်များမှ လွတ်မြောက်နိုင်သည်ကိုလည်းကောင်း၊ လောကီဆန်ခြင်း လက္ခဏာအားလုံးကို ချိုးဖျက်၍၊ ဇာတိပကတိမှ ဖယ်ခွာနိုင်သည်ကိုလည်းကောင်း၊ ထို့ပြင် ငါ့အား အယောက်တိုင်းက ငြင်းပယ်နေချိန်တွင်၊ ငါသည် ကြံ့ကြံ့ခံနိုင်ဆဲဖြစ်သည်ကို လည်းကောင်း ဆိုလို၏။ ဤအချက်ပင်လျှင် ငါသည် တစ်ပါးတည်းသော ဘုရားသခင်ကိုယ်တိုင် ဖြစ်ကြောင်း သက်သေပြရန် လုံလောက်၏။ "သားဦးတိုင်းသည် ဇာတိပကတိမှ ဝိညာဉ်လောကသို့ ဝင်ရောက်ရမည်။ ဤသည်မှာ ရှင်ဘုရင်များအဖြစ် ငါနှင့်အတူ စိုးစံရန်အတွက် ၎င်းတို့ လျှောက်ရမည့် လမ်း ဖြစ်သည်" ဟူ၍ ငါ ဆိုထားသည်။ ဤ စာကြောင်း၏ အဓိပ္ပါယ်မှာ သင့်အနေဖြင့် အတိတ်တွင် စိတ်ကူးထားသော အရာအား ကြုံတွေ့သောအခါ၊ သင်တို့သည် ထို မင်းများနှင့် ရှင်ဘုရင်များအား တရားဝင် စတင်ကာ တရားစီရင်ရန်အတွက် ဇာတိပကတိမှ တရားဝင် ထွက်ခွာ၍၊ ကိုယ်အတွင်း ဝင်ရောက်လိမ့်မည်ဖြစ်ကြောင်း ဆိုလိုသည်။ ၎င်းတို့သည် ဤအချိန်၌ ဖြစ်ပေါ်သော အရာများအပေါ် အခြေခံ၍ တရားစီရင်ခြင်းခံရလိမ့်မည်။ သို့သော် ယင်းသည် သင်တို့ တွေးထင်သလောက် မရှုပ်ထွေးဘဲ၊ ခဏအတွင်း ပြီးမြောက်လိမ့်မည်။ သင်တို့သည် သေခြင်းမှ ထမြောက်ရန် မလိုအပ်သကဲ့သို့၊ ဆင်းရဲဒုက္ခကို ခံစားဖို့ရန်ပင် လိုအပ်လိမ့်မည် မဟုတ်ပေ (အဘယ်ကြောင့်ဆိုသော် ကမ္ဘာမြေကြီးပေါ်မှ သင်တို့၏ ဆင်းရဲဒုက္ခနှင့် အခက်အခဲများတို့သည် အဆုံးသတ်သို့ ရောက်ရှိနေပြီးသောကြောင့်ဖြစ်သည်။ ထို့ပြင် ငါသည် ယင်းနောက်တွင် ငါ၏သားဦးများကို ရိုက်နှက်ဆုံးမခြင်း ပြုတော့မည်မဟုတ်ဟု ပြောဆိုထားပြီးဖြစ်သည်)။ ဆိုထားသည့်အတိုင်း သားဦးတို့သည် ၎င်းတို့၏ ကောင်းချီးမင်္ဂလာများကို ခံစားရမည်မှာ ဤနေရာတွင်ဖြစ်၏၊ သင်သည် ဝိညာဉ်လောကသို့ အမှတ်တမဲ့ဖြင့် ဝင်ရောက်လိမ့်မည်။ ဤသည်မှာ ငါ၏ ကျေးဇူးတော်နှင့် သနားကရုဏာ ဖြစ်ကြောင်း ငါသည် အဘယ်ကြောင့် ဆိုသနည်း။ အကယ်၍ လူတစ်ဦးသည် သေခြင်းမှ ထမြောက်ပြီးမှသာ ဝိညာဉ်လောကသို့ ဝင်ရောက်နိုင်သည်ဆိုလျှင်၊ ဤအရာသည် သနားကရုဏာနှင့် ကျေးဇူးတော်ဖြင့် ပြည့်စုံခြင်းမှ ဝေးကွာနေပေမည်။ ထို့ကြောင့် ဤအရာသည် ငါ၏ကျေးဇူးတော်နှင့် သနားကရုဏာ၏ အထင်ရှားဆုံး ထုတ်ဖော်ပြခြင်းဖြစ်သည်၊ ထို့အပြင် ငါ၏ ကြိုတင်ပြဋ္ဌာန်းခြင်းနှင့် ငါ၏ ရွေးကောက်ထားသော လူတို့ကိုလည်း ထုတ်ဖော်ပြ၏။ ငါ၏ စီမံအုပ်ချုပ်ရေးဆိုင်ရာအမိန့်သည် မည်မျှ တင်းကျပ်ကြောင်းကို ယင်းက လုံလောက်စွာ ပြသ၏။ ငါ ဆန္ဒရှိသော မည်သူ့အပေါ်မဆို ငါသည် ကျေးဇူးတော်ဖြင့် ပြည့်စုံမည်ဖြစ်ပြီး၊ ငါ ဆန္ဒရှိသော မည်သူ့အပေါ်မဆို ငါသည် သနားကရုဏာဖြင့် ပြည့်စုံမည်ဖြစ်သည်။ မည်သူမျှ ဖက်ပြိုင်ခြင်း၊ တိုက်လှန်ခြင်း မပြုရာ။ ငါသည် ဤအရာအားလုံးကို ဆုံးဖြတ်မည်။

လူတို့သည် ယင်းကို နားမလည်နိုင်ကြ၍၊ အသက်မရှူနိုင်အောင်ဖြစ်သည်အထိ ၎င်းတို့ကိုယ်၎င်းတို့ ဖိအားပေးကြ၏၊ သို့သော် ၎င်းတို့သည် ကိုယ့်ကိုယ်ကိုယ် ချည်နှောင်ဆဲဖြစ်သည်။ လူတို့၏ တွေးခေါ်ခြင်းသည် အမှန်ပင် ကန့်သတ်ချက်ရှိသည်၊ ထို့ကြောင့် ၎င်းတို့သည် လူသားအတွေးအခေါ်နှင့် အယူအဆတို့ကို ဖယ်ရှားပစ်ရမည်။ ဤအကြောင်းကြောင့် ငါသည် အရာခပ်သိမ်းကို ထိန်းချုပ်ရန်၊ အရာခပ်သိမ်းကို စီမံခန့်ခွဲရန်အတွက်၊ ဇာတိပကတိမှ ထွက်ခွာ၍ ဝိညာဉ်လောကသို့ ဝင်ရောက်ရမည်ဖြစ်သည်။ ဤသည်မှာ လူအပေါင်းတို့နှင့် တိုင်းနိုင်ငံအားလုံးကို အုပ်စိုးဖို့ရန်၊ ငါ၏အလို ပြည့်စေဖို့ရန်အတွက် တစ်ခုတည်းသော နည်းလမ်း ဖြစ်သည်။ ၎င်းသည် မဝေးတော့ပေ။ သင်တို့သည် ငါ၏ အနန္တတန်ခိုးအား ယုံကြည်ခြင်း မရှိကြ၊ ငါ ဖြစ်နေသော လူသားကိုလည်း မသိကြချေ။ ငါ့အား လူသားတစ်ဦး ဖြစ်သည်ဟုသာ ထင်မြင်၍၊ ငါ၏ ဘုရားသဘောသဘာဝကို လုံးဝ မမြင်နိုင်ကြချေ။ အကြောင်းအရာတို့အား ငါက ပြည့်စုံစေလိုသော အချိန်တွင်၊ ၎င်းတို့သည် ပြည့်စုံလိမ့်မည်ဖြစ်သည်။ ငါ၏ နှုတ်မှစကားကိုသာ လိုအပ်၏။ သင်တို့သည် မကြာသေးမီက ငါ ပြောဆိုထားသော ငါ၏ လူ့သဘာဝ သွင်ပြင်လက္ခဏာနှင့် ငါ၏လှုပ်ရှားမှုတိုင်းကိုသာ အာရုံစိုက်ထားကြပြီး၊ ငါ၏ ဘုရားသဘောသဘာဝ သွင်ပြင်လက္ခဏာကိုမူ အာရုံစိုက်ထားခြင်း မရှိပေ။ တစ်နည်းဆိုသော် ငါ့ထံတွင်လည်း အတွေးအခေါ်နှင့် အယူအဆတို့ ရှိသည်ဟု ထင်ကြခြင်းဖြစ်သည်။ သို့သော် ငါ၏အတွေးများ၊ စိတ်ကူးများနှင့် စိတ်သည်လည်းကောင်း၊ ငါ၏လုပ်ဆောင်ချက်တိုင်းသည်လည်းကောင်း၊ ငါ ပြုသော အရာတိုင်းနှင့် ငါ ပြောသော အရာတိုင်းသည်လည်းကောင်း၊ ဘုရားသခင်ကိုယ်တိုင်၏ ပြည့်စုံသော သရုပ်သကန်ဖြစ်သည်ဟူ၍ ငါ ဆိုထားပြီးဖြစ်သည်။ သင်တို့သည် ဤအရာအားလုံးကို မေ့လျော့နေပြီလော။ သင်တို့အားလုံးသည် မရေရာသော လူတို့ပေတကား။ ငါ့နှုတ်ကပတ်တော်တို့၏ အနက်အဓိပ္ပါယ်ကို နားမလည်ကြချေ။ ငါသည် ငါ ပြောဆိုထားသည်များမှတစ်ဆင့် ငါ၏ သာမန်လူ့သဘာဝ သွင်ပြင်လက္ခဏာကို သင်တို့အား တွေ့မြင်စေပြီး ဖြစ်သည် (ငါသည် သင်တို့အား ငါ၏ နေ့စဉ်ဘဝအတွင်းမှ ငါ၏ သာမန်လူ့သဘာဝကို မြင်တွေ့စေပြီးဖြစ်သည်၊ အဘယ်ကြောင့်ဆိုသော် သင်တို့သည် ဤကာလအတွင်း ငါ ပြောခဲ့သည်များမှ ငါ၏ သာမန်လူ့သဘာဝ သွင်ပြင်လက္ခဏာကို နားမလည်ကြသေး၍ ဖြစ်၏)၊ သို့သော် ငါ၏ သာမန်လူ့သဘာဝကို နားမလည်ကြဘဲ၊ ငါ့အား ဆန့်ကျင်ဘက်ပြုနိုင်သော၊ ငါ့ရှေ့တွင် မထိန်းမသိမ်းနိုင်လွန်းသော တစ်စုံတစ်ရာကို ဆုပ်ကိုင်ရန်သာ ကြိုးစားကြ၏။ မျက်ကန်းပေတကား။ အသိဉာဏ်ကင်းမဲ့လှချေတကား။ သင်တို့သည် ငါ့အား မသိကြ။ ငါသည် ကာလကြာရှည်စွာ အချည်းနှီး ပြောဆိုမိလေပြီ၊ သင်တို့သည် ငါ့ကို လုံးလုံး မသိကြ၊ ငါ၏ သာမန်လူ့သဘာဝအား ပြည့်စုံသော ဘုရားသခင်ကိုယ်တိုင်၏ အစိတ်အပိုင်းတစ်ခုအဖြစ် မမှတ်ယူကြခြင်းပင်တည်း။ ငါသည် အမျက်မထွက်ဘဲ နေနိုင်မည်လော။ ငါသည် နောက်တစ်ဖန် သနားကရုဏာဖြင့် ပြည့်စုံနိုင်ပါမည်လော။ ငါသည် ဤ မနာခံခြင်း၏ သားတို့အား ငါ၏ အမျက်ဒေါသဖြင့်သာ တုံ့ပြန်နိုင်၏။ ငါသည် ငါ့ကိုယ်ငါ ယုံကြည်မှုလွန်ကဲ၍၊ မသိနားမလည်မိခြင်းပင်တကား။ ငါ ဖြစ်သော လူသားသည် လွဲမှားထားသည်ဟု ထင်ကြ၏။ ငါသည် မှားခဲ့နိုင်သလော။ ငါသည် မည်သည့် ဇာတိပကတိကိုမဆို ခံယူဖို့ရန် ကြုံရာကျပန်း ရွေးချယ်ခဲ့မည်လော။ ငါ၏ လူ့သဘာဝနှင့် ငါ၏ ဘုရားသဘောသဘာဝသည် ခွဲထုတ်၍ မရသော အစိတ်အပိုင်းနှစ်ခုဖြစ်၍၊ ယင်းတို့သည် ပြည့်စုံသော ဘုရားသခင်ကိုယ်တိုင် ဖြစ်သည်။ ယခု သင်တို့သည် ဤအကြောင်းအရာကို ပြည့်စုံစွာ နားလည်သင့်ပြီ။ ငါ ပြောရမည့် အရာအားလုံးကို ငါသည် ပြောဆိုထားပြီးလေပြီ။ ငါသည် ယခုထက်ပို၍ ရှင်းပြတော့မည် မဟုတ်။

ယခင်က:အခန်း ၉၇

နောက်တစ်ခုသို့:အခန်း ၉၉

သင်နှစ်သက်နိုင်သည့် အရာများ

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မြွက်ဆိုချက်များ လက်ရွေးစင်များ သိုးသငယ် ဖွင့်သည့် စာစောင် တရားစီရင်ခြင်းသည် ဘုရားသခင်၏ အိမ်တော်မှ စတင်သည် နိုင်ငံတော်၏ ဧဝံဂေလိတရားအကြောင်း အနန္တတန်ခိုးရှင်ဘုရားသခင်၏ စံနမူနာ နှုတ်ကပတ်တော်များ လက်ရွေးစင်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ စစ်မှန်သော လမ်းခရီးကို စုံစမ်းခြင်းအပေါ် အမေးအဖြေတစ်ရာ နောက်ဆုံးသောကာလ၏ ခရစ်တော်အတွက် သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ