ငါ့ကို ရိုးသားစွာ အလိုရှိသောသူအားလုံးကို ငါချစ်သည်။ သင်တို့သည် ငါ့ကိုချစ်ခြင်းအပေါ် အလေးဂရုပြုလျှင် သင်တို့ကို ကောင်းချီးမင်္ဂလာမြောက်များစွာ ဧကန်အမှန်ငါပေးမည်။ ငါ၏ ရည်ရွယ်ချက်များကို သင်တို့ နားလည်သလော။ ငါ့အိမ်တော်တွင် အဆင့်အတန်း နိမ့်ခြင်း၊ မြင့်ခြင်း ခွဲခြားမှုမရှိ။ လူတိုင်းသည် ငါ၏သားများ ဖြစ်ကြပြီး၊ ငါသည် သင်တို့၏အဖ၊ သင်တို့၏ ဘုရားသခင် ဖြစ်၏။ ငါသည် အမြင့်ဆုံးသောအထွတ်အထိပ်နှင့် အတုမရှိ ဖြစ်၏။ ငါသည် စကြဝဠာနှင့် အရာအားလုံးကို ထိန်းချုပ်ထား၏။

ငါ့အိမ်တော်ထဲတွင် သင်သည် “နှိမ့်ချစွာဖြင့် မထင်မရှား ငါ့ကိုအစေခံ” သင့်ပေသည်။ ဤစကားရပ်သည် သင်၏ဆောင်ပုဒ်အဖြစ် အသုံးတော်ခံသင့်၏။ သစ်ပင်တစ်ပင်ပေါ်ရှိ သစ်ရွက်တစ်ရွက် မဖြစ်ဘဲ၊ အပင်၏အမြစ်ဖြစ်ပြီး၊ အသက်တာ၌ နက်ရှိုင်းစွာ အမြစ်တွယ်လော့။ အသက်တာ၏ စစ်မှန်သော အတွေ့အကြုံထဲသို့ ဝင်ရောက်ပြီး၊ ငါ့နှုတ်ကပတ်တော်များအားဖြင့် အသက်ရှင်လော့၊ အကြောင်းအရာတိုင်း၌ ငါ့ကို ပိုမိုရှာဖွေကာ၊ ငါ့နားသို့ချဉ်းကပ်ပြီး၊ ငါနှင့် မိတ်သဟာယဖွဲ့လော့။ မည်သည့် အပြင်ပန်းအရာကိုမျှ အလေးဂရုမပြုနှင့်။ ထို့အပြင် မည်သည့်လူ၊ မည်သည့်ဖြစ်ရပ် သို့မဟုတ် မည်သည့်အမှုအရာ၏ ဘောင်ခတ်ခြင်းကိုမျှ မခံဘဲ ငါ၏ဖြစ်ခြင်းကို ဝိညာဉ်ရေးရာပြည့်ဝသောသူများနှင့်သာ မိတ်သဟာယဖွဲ့လော့။ ငါ၏ ရည်ရွယ်ချက်တို့ကို နားလည်လော့၊ ငါ့အသက်ကို သင်တို့၏အကြား စီးဝင်စေပြီး ငါ၏နှုတ်ကပတ်တော်များအတိုင်း အသက်ရှင်နေထိုင်ကာ ငါ၏သတ်မှတ်ချက်များကို လိုက်နာလော့။

ငါသင့်အားတာဝန်ပေးထားခဲ့ပြီးဖြစ်သော ကိစ္စရပ်များပေါ်တွင် သင်၏ခွန်အားရှိသမျှဖြင့် ဆက်ကပ်လော့၊ ငါ၏ စိတ်နှလုံးကို ကျေနပ်စေရန် သင်တတ်စွမ်းသမျှ လုပ်ဆောင်လော့။ ငါသည် သင်၏ စွမ်းအားနှင့် သင်၏ဝမ်းမြောက်မှုဖြစ်၏...ငါသည် သင်၏အလုံးစုံဖြစ်၏။ ငါ့နောက်သို့သာလိုက်လော့။ ငါသည် သင့်စိတ်နှလုံး၏ စစ်မှန်သောဆန္ဒများကို သိပြီး၊ ငါ့အတွက် သင့်ကိုယ်သင် စစ်မှန်စွာအသုံးပြုကြောင်းကို ငါသိ၏၊ သို့သော် ငါ့အိမ်တော်တွင် သစ္စာတရားကို ငါ့အား အဘယ်ကဲ့သို့ ပြရမည်နှင့် အဆုံးထိ ငါ့နောက်သို့မည်သို့လိုက်ရမည်ကို သင်သိသင့်၏။

အသင်းတော်သည် ငါ့နှလုံးသားဖြစ်ပြီး၊ ငါ၏အသင်းတော် တည်ဆောက်ရေးအတွက် ငါသည် စိုးရိမ် သောကပြင်းပြလျက်ရှိ၏။ ငါ၏စိတ်နှလုံး ကျေနပ်ဖို့အလို့ငှာ သံသယစိုးစဉ်းမျှမထားဘဲ သင့် ကိုယ်သင် ဆက်ကပ်အပ်နှံခြင်းဖြင့် ငါ့အတွက် သင့်ကိုယ်သင် အသုံးပြုသင့်ပြီး ငါ့ရည်ရွယ်ချက်များအပေါ် ဆင်ခြင်သုံးသပ်မှုကို ပြသသင့်ပေသည်။