လင်းဟွေ၊ တရုတ်ပြည်

၂၀၂၃ ခုနှစ်၊ ဇွန်လမှာ ကျွန်မက စာနဲ့ပတ်သက်တဲ့အလုပ် ကြီးကြပ်ရေးမှူးအဖြစ် အရွေးခံခဲ့ရတယ်။ ညီအစ်ကိုမောင်နှမတွေနဲ့ ထိတွေ့ဆက်ဆံရာကနေ သူတို့ရဲ့ လုပ်ငန်းကျွမ်းကျင်မှုတွေနဲ့ အလုပ်လုပ်နိုင်စွမ်းက အတော်လေး အားနည်းတာကို ကျွန်မ တွေ့ခဲ့ရတယ်။ ဒါကြောင့် ကျွန်မက သူတို့ကို စိတ်ရှည်လက်ရှည် လမ်းပြပြီး ကူညီခဲ့တယ်၊ သူတို့ကြုံရတဲ့ အခက်အခဲမှန်သမျှကို ဖြေရှင်းဖို့ သူတို့နဲ့ မိတ်သဟာယပြုခဲ့တယ်။ ဒါပေမဲ့ အလုပ်တွေ ရှုပ်လာတဲ့အခါ၊ ကျွန်မ စိတ်မရှည်တော့ဘဲ သူတို့ကို အထင်သေးစပြုလာတယ်။ ဇူလိုင်လမှာ အသင်းတော်က တရုတ်ကွန်မြူနစ်ပါတီရဲ့ အရူးအမူး ဖမ်းဆီးမှုတွေကို ရင်ဆိုင်ခဲ့ရတယ်။ စာနဲ့ပတ်သက်တဲ့အလုပ် လုပ်တဲ့သူ တော်တော်များများကို ကျွန်မ ဆက်သွယ်လို့မရခဲ့ဘဲ ကျွန်မတို့ အလုပ်ရဲ့ ရလဒ်တွေက စပြီး ကျဆင်းလာခဲ့တယ်။ အဖွဲ့တစ်ဖွဲ့က ညီအစ်ကိုမောင်နှမတွေက ရှေ့လျှောက် အလုပ်တွေကို ဘယ်လိုဆက်လုပ်ရမလဲဆိုတာ ဆွေးနွေးချင်ကြတယ်။ အဲဒီအချိန်မှာ ကျွန်မက တခြားအလုပ်တစ်ခုကို လုပ်နေတာဆိုတော့၊ အလုပ်ကို ဘယ်လိုလုပ်ရမယ်ဆိုတဲ့ အကြမ်းဖျင်းလမ်းကြောင်းလောက်ပဲ သူတို့ကို အကြမ်းဖျင်း ပြောပြလိုက်ပြီး သူတို့ဘာသာ ဘယ်လို အကောင်အထည်ရမလဲဆိုတာ သိလောက်တယ်လို့ တွေးလိုက်တယ်။ ဒါပေမဲ့ အဖွဲ့ခေါင်းဆောင်က အခက်အခဲတချို့ ကြုံနေရတယ်ဆိုပြီးတော့ စာပြန်လာတုန်းပဲ။ ကျွန်မ ကိုယ့်ဘာသာ တွေးမိတယ်၊ “အသင်းတော်က ဖမ်းဆီးမှုတွေကို စကြုံရတုန်းက၊ ငါလဲ ဘာလုပ်ရမှန်း မသိခဲ့ပါဘူး၊ ဒါပေမဲ့ ဆုတောင်းပြီး ရှာဖွေရာကနေ လမ်းကြောင်းတချို့ကို ငါ ရှာတွေ့နိုင်ခဲ့တာပဲ။ နင့်ဘာသာ လမ်းကြောင်းတစ်ခု ဘာလို့ မရှာနိုင်ရတာလဲ။ အခက်အခဲတွေအကြောင်း ညည်းဖို့လောက်ပဲ နင် သိတာကိုး။ နင်က နင့်တာဝန်မှာ အာရုံမှမစိုက်တာ၊ ထမင်း ခူးခပ်ကျွေးတာကို စောင့်နေတာ။ နင်က အဖွဲ့ခေါင်းဆောင်လေ၊ နင်က အခက်အခဲတွေအကြောင်း ညည်းတဲ့အခါ၊ တခြားလူတွေအပေါ် မကောင်းတဲ့ သက်ရောက်မှု ရှိမှာပေါ့” လို့ပေါ့။ စုဝေးပွဲတစ်ခုမှာ၊ အပြစ်တင်တဲ့ လေသံနဲ့ ကျွန်မ ပြောလိုက်တယ်၊ “ဒီအခက်အခဲတွေအတွက် ဖြေရှင်းနည်း တစ်ခုခုများ နင်တို့ ဆွေးနွေးပြီးကြပြီလား။ တစ်နေ့တစ်နေ့ နင်တို့ ဘာတွေများ လုပ်နေကြတာလဲ။ နင်တို့ဘာသာ လမ်းကြောင်းတစ်ခု ရှာဖို့ ဘာလို့ မကြိုးစားကြတာလဲ” လို့ပေါ့။ အဲဒီညီအစ်မ စိတ်မကောင်းဖြစ်နေတာကို ကျွန်မ မြင်တော့၊ ကျွန်မလေသံ မမှန်မှန်း သတိပြုမိလိုက်တယ်။ ဒါပေမဲ့ ကျွန်မပြောတာဟာ အမှန်ပဲလေ၊ ပြီးတော့ အခက်အခဲတွေ ကြုံရတဲ့အခါ အဲဒါတွေအကြောင်း ညည်းနေမဲ့အစား ဘုရားသခင်ကို ပိုမှီခိုတတ်အောင် သူ့ကို ကျွန်မ လမ်းပြပေးနေတာပဲလို့ တွေးမိပြန်ရော။ ဒါ သူ့ကောင်းဖို့အတွက်ပဲလို့ ကိုယ့်ကိုယ်ကိုယ် ပြောလိုက်တယ်။ တစ်ခါတလေ၊ ညီအစ်မ လျူကို ကျွန်မ မေးခွန်းတွေ မေးတဲ့အခါ၊ ကျွန်မ စကားပြောမြန်တော့၊ သူက ချက်ချင်း တုံ့ပြန်မှုမလုပ်နိုင်ဘဲ သူ့အဖြေတွေက နည်းနည်း ဝေ့လည်ကြောင်ပတ် ဖြစ်နေတတ်တယ်။ ကျွန်မ သူ့ကို အထင်သေးပြီး တွေးမိတယ်၊ “ငါ့မေးခွန်းကိုတောင် နင် ဖြေမှ မဖြေတာ။ တည့်တည့်နဲ့ လိုရင်းတိုရှင်း ဖြေလို့ မရဘူးလား။ ဘာလို့များ စကားကို သွယ်ဝိုက်နေရတာလဲ” လို့ပေါ့။ ပြီးတော့ အပြစ်တင်တဲ့ လေသံနဲ့ ကျွန်မ ပြောလိုက်တယ်၊ “စကားကို သွယ်ဝိုက်မနေနဲ့။ မေးတာကိုပဲ ဖြေ၊ မဟုတ်ရင် ဘယ်သူမှ နင့်ကို နားလည်မှာ မဟုတ်ဘူး” လို့ပေါ့။ ကျွန်မ ဒီလိုပြောပြီးတဲ့နောက်မှာ၊ သူ နည်းနည်း ဘောင်ခတ်ခံရသလို ခံစားရရှာတယ်။ တစ်ခါတုန်းက၊ ညီအစ်မ ကျန်းက သူ့အခြေအနေကို ဝေငှရင်း ပြောပြတယ်၊ တစ်ခါတလေ ကျွန်မ သူ့ကို တစ်ခုခုမေးတဲ့အခါ၊ ကျွန်မဆိုလိုတာကို သူ ချက်ချင်း သဘောမပေါက်ဘူးတဲ့။ သူ့အဖြေတွေက လိုရင်းမရောက်တဲ့အခါ၊ ကျွန်မက သူ့ကို ဆူပူတတ်တော့၊ လိုရင်းမရောက်အောင် ဖြေမိလို့ ပြုပြင်ခံရမှာကြောက်ပြီး နောက်ထပ် ဘာမှ ထပ်မပြောရဲတော့ဘူးတဲ့။ ညီအစ်မ ကျန်း ဒီလိုပြောတာကို ကြားတော့လည်း၊ ကျွန်မ ကိုယ့်ကိုယ်ကိုယ် ဆင်ခြင်သုံးသပ်တာမျိုး မလုပ်သေးဘူး။ အဲဒီအစား သူက မျက်နှာမပျက်ဖို့ပဲ သိပ်ဂရုစိုက်လွန်းတယ်လို့ ကျွန်မ ထင်ခဲ့တယ်။ ကျွန်မ တွေးမိတယ်၊ “နင့်ပြဿနာတွေကို ငါ ထောက်ပြတာ နင့်ကောင်းဖို့ မဟုတ်လို့လား။ နင်က ဘာဖြစ်လို့များ ဘောင်ခတ်ခံရတယ်လို့တောင် ခံစားနေရတာလဲ။ နင်က သိပ်ကို ဆတ်ဆတ်ထိမခံ ဖြစ်လွန်းတာပဲ” လို့ပေါ့။ ခဏကြာတော့၊ ညီအစ်မတွေက ကျွန်မနဲ့ နည်းနည်း စိမ်းသွားကြတယ်။ တစ်ခါတလေ၊ ရုံးခန်းထဲမှာ သူတို့ စကားပြောပြီး ရယ်မောနေကြတာကို ကျွန်မ ကြားရပေမဲ့၊ ကျွန်မ ဝင်သွားတဲ့ ခဏမှာပဲ သူတို့ ငြိမ်ကျသွားတတ်တယ်။ ဒီအတိုင်းသာ ဆက်ဖြစ်နေရင်၊ သူတို့အားလုံး ကျွန်မကို ရှောင်ဖယ်ကြတော့မယ်၊ အဲဒီကျရင် ကျွန်မတို့တာဝန်တွေကို လုပ်ဖို့ ဘယ်လိုများ ပူးပေါင်းဆောင်ရွက်နိုင်ကြတော့မလဲဆိုတာ ကျွန်မ သဘောပေါက်လိုက်တယ်။ ဒါကြောင့် မာနထောင်လွှားတဲ့ စိတ်သဘောထားကို စိစစ်ထားတဲ့ ဘုရားနှုတ်ကပတ်တော်တချို့ကို ကျွန်မ ရှာပြီး ကျွန်မအခြေအနေနဲ့ ဘယ်လိုကိုက်ညီလဲဆိုတာ မြင်ဖို့ ကြိုးစားခဲ့တယ်။ အပြင်ပန်းအရလဲ ကိုယ့်ကိုယ်ကိုယ် ချုပ်တည်းပြီး သူတို့ကို များသောအားဖြင့် ပိုနူးညံ့တဲ့လေသံနဲ့ ပြောဖို့၊ ဒါမှမဟုတ် အခြေအနေပေါ့သွားအောင် ဟာသတွေပြောဖို့ ကြိုးစားခဲ့တယ်။

နောက်ပိုင်းမှာ၊ လုပ်ဖော်ကိုင်ဖက်တစ်ယောက်ဖြစ်တဲ့ ညီအစ်ကို ဝမ်က အဖွဲ့သားတော်တော်များများ ကျွန်မကြောင့် ဘောင်ခတ်ခံရတယ်လို့ ခံစားနေရတာကို သိသွားပြီး ကျွန်မပြဿနာကို ထောက်ပြတယ်။ သူက ကျွန်မကို ဘုရားနှုတ်ကပတ်တော်တွေ အများကြီး ဖတ်ပြခဲ့တယ်၊ အထူးသဖြင့် နှုတ်ကပတ်တော်တစ်ပိုဒ်က ကျွန်မစိတ်ထဲမှာ အကြီးအကျယ် စွဲမှတ်သွားစေတယ်။ အနန္တတန်ခိုးရှင် ဘုရားသခင် ပြောသည်မှာ “သင်သည် စကားလုံးများနှင့် အယူဝါဒများကိုသာ ဟောပြောပြီး လူများကို သြဝါဒပေးပြီး ပြုပြင်မှသာ ၎င်းတို့ကို သမ္မာတရား နားလည်စေပြီး လက်တွေ့ကျမှုထဲသို့ ဝင်ရောက်စေနိုင်သလော။ သင် မိတ်သဟာယပြုသည့် အရာသည် လက်တွေ့မကျလျှင်၊ စကားများနှင့် အယူဝါဒများသာဖြစ်လျှင်၊ ၎င်းတို့ကို သင်မည်မျှ ပြုပြင်ပြီး သြဝါဒပေးပါစေ အကျိုးရှိမည်မဟုတ်ပေ။ လူတို့က သင့်ကို ကြောက်ရွံ့ခြင်း၊ သင်ပြောသည့်အရာကို လုပ်ဆောင်ခြင်းနှင့် မကန့်ကွက်ရဲခြင်းတို့သည် သမ္မာတရားကို ၎င်းတို့ နားလည်ကာ ကျိုးနွံနာခံခြင်းနှင့် အတူတူဖြစ်သည်ဟု သင် ထင်သလော။ ဤသည်မှာ ကြီးမားသော အမှားတစ်ခုဖြစ်သည်။ အသက်ဝင်ရောက်မှုသည် အလွန်ရိုးရှင်းခြင်းမရှိပေ။ ခေါင်းဆောင်အချို့သည် အမြင်ကောင်းစေရန်အတွက် ကြိုးစားနေသော မန်နေဂျာအသစ်တစ်ယောက်နှင့်တူသည်။ လူတိုင်းက ၎င်းတို့ကို ကျိုးနွံနာခံရန်အတွက် ဘုရားသခင်ရွေးချယ်ထားသောသူတို့အပေါ် ၎င်းတို့၏ လတ်တလောရရှိထားသည့်အာဏာကို အသုံးချရန် ကြိုးစားပြီး ဤသို့ဖြင့် ၎င်းတို့အလုပ်က ပို၍လွယ်ကူလိမ့်မည်ဟု ထင်ကြသည်။ သင်သည် သမ္မာတရားလက်တွေ့ကျမှု ကင်းမဲ့လျှင် မကြာခင်တွင် သင်၏ စစ်မှန်သော ဝိညာဉ်ရင့်ကျက်မှုက ထုတ်ဖော်ခံရလိမ့်မည်၊ သင်၏ သရုပ်မှန်က ဖော်ထုတ်ခြင်းခံရလိမ့်မည်။ သင်သည် ကောင်းစွာ ဖယ်ရှားရှင်းလင်းခြင်းခံရနိုင်ပေမည်။ စီမံအုပ်ချုပ်ရေးဆိုင်ရာ အလုပ်အချို့တွင် အနည်းငယ် ပြုပြင်ခြင်းနှင့် ပဲ့ပြင်ဆုံးမခြင်းသည် လက်ခံနိုင်ဖွယ်ဖြစ်သည်။ သို့ရာတွင် သင်သည် သမ္မာတရားကို မိတ်သဟာယပြုနိုင်စွမ်းမရှိပါက၊ အဆုံး၌ ပြဿနာများကို ဖြေရှင်းနိုင်ဦးမည် မဟုတ်သကဲ့သို့၊ ဤသို့ဖြင့် အလုပ်၏ ရလဒ်များကို ထိခိုက်လိမ့်မည်။ အသင်းတော်၌ မည်သည့်ပြဿနာများ ပေါ်ပေါက်သည်ဖြစ်စေ၊ လူများကို သင် ဆက်၍ ဩဝါဒပေးပြီး အပြစ်တင်နေလျှင်၊ သင်သည် အစဉ် စိတ်တိုသည့်ပုံစံဖြင့် ပြုမူနေရုံသာရှိလျှင်၊ ဤသည်မှာ သင်၏ ဖောက်ပြန်ပျက်စီးသော စိတ်သဘောထားက သူ့ဘာသာသူ ထုတ်ဖော်ပြနေခြင်း ဖြစ်လေသည်။ သင်သည် သင်၏ ဖောက်ပြန်ပျက်စီးခြင်း၏ အကျည်းတန်သော မျက်နှာကို ပြသပြီးဖြစ်သည်။ သင်သည် အမြဲတမ်း အထက်စီးမှနေ၍ လူများကို ဤကဲ့သို့ ဩဝါဒပေးနေပါက၊ အချိန်ကြာလာသည်နှင့်အမျှ လူများသည် သင့်ထံမှ အသက်ပံ့ပိုးမှုကို လက်ခံရရှိနိုင်မည်မဟုတ်ပေ။ ၎င်းတို့သည် လက်တွေ့ကျသည့် မည်သည့်အရာကိုမျှ ရလိမ့်မည်မဟုတ်ပေ။ ထိုအစား သင်သည်အလွန်မုန်းတီးခြင်းနှင့် ရွံရှာခြင်းသာ ခံရလိမ့်မည်။ ထို့အပြင် ချင့်ချိန်နိုင်စွမ်း မရှိသောကြောင့် သင်၏ ဩဇာလွှမ်းမိုးခြင်းကို ခံခဲ့ရပြီးသည့်နောက်၊ အခြားသူများကို ထိုနည်းတူ ဩဝါဒပေးပြီး ပြုပြင်မည့် လူအချို့ရှိလိမ့်မည် ဖြစ်သည်။ ၎င်းတို့သည်လည်း ထိုနည်းတူ စိတ်ဆိုးပြီး ဒေါသထွက်ကြလိမ့်မည်။ သင်သည် လူများ၏ ပြဿနာများကို ဖြေရှင်းနိုင်လိမ့်မည် မဟုတ်ရုံသာမက၊ ၎င်းတို့၏ ဖောက်ပြန်ပျက်စီးသော စိတ်သဘောထားများကိုလည်း အားပေးမြှင့်တင်ပေးနေမိလိမ့်မည်။ ယင်းက ၎င်းတို့အား ပျက်စီးခြင်းဆီသို့ လမ်းကြောင်းပေါ် ဦးဆောင်နေခြင်း မဟုတ်လော။ ယင်းက ဆိုးယုတ်သည့် အပြုအမူတစ်ခု မဟုတ်သလော။ ခေါင်းဆောင်တစ်ဦးသည် သမ္မာတရားအကြောင်း မိတ်သဟာယပြုခြင်းနှင့် အသက်ကို ထောက်ပံ့ပေးခြင်းတို့အားဖြင့် အဓိက ဦးဆောင်သင့်သည်။ သင်သည် အစဉ်သဖြင့် အပေါ်စီးမှနေကာ အခြားသူများအား ဩဝါဒပေးလျှင်၊ ၎င်းတို့သည် သမ္မာတရားကို နားလည်နိုင်လိမ့်မည်လော။ သင်သည် အချိန်အတော်ကြာအောင် ဤနည်းလမ်းဖြင့် အလုပ်လုပ်လျှင် လူများက သင့်ကို အရှိအတိုင်း ရှင်းလင်းစွာ မြင်လာသည့်အခါ သင့်ကို ၎င်းတို့က စွန့်ပစ်လိမ့်မည်။ ဤသို့အလုပ်လုပ်ခြင်းအားဖြင့် လူများကို ဘုရားသခင်၏ ရှေ့မှောက်သို့ သင် ခေါ်ဆောင်နိုင်သလော။ သင် သေချာပေါက် မခေါ်ဆောင်နိုင်ပေ။ သင်လုပ်နိုင်သည့်အရာမှာ အသင်းတော်အလုပ်ကို ပျက်စီးအောင်လုပ်မိပြီး ဘုရားသခင် ရွေးချယ်ထားသော လူများကို သင့်အား ရွံရှာစက်ဆုပ်ပြီး စွန့်ပစ်ဖို့ ဖြစ်စေရုံသာ ရှိသည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ အပိုင်း သုံး) ဘုရားနှုတ်ကပတ်တော်တွေကို ကျွန်မ ဆင်ခြင်တွေးတော့၊ ကျွန်မ နှလုံးသားထဲထိ တကယ်ကို ထိမှန်သွားတယ်။ ဘုရားသခင် ဖော်ထုတ်လိုက်တာက ကျွန်မရဲ့ အခြေအနေအတိုင်း အတိအကျပါပဲ။ ကျွန်မက ကြီးကြပ်ရေးမှူးတစ်ယောက်ပါ၊ ဒါပေမဲ့ ညီအစ်ကိုမောင်နှမတွေ သူတို့တာဝန်တွေမှာ အခက်အခဲတွေ၊ ပြဿနာတွေ ကြုံရတာကို မြင်တဲ့အခါ၊ သူတို့နဲ့ မိတ်သဟာယပြုပြီး ကူညီဖို့ ပျက်ကွက်ခဲ့တဲ့အပြင် အဲဒီအစား ကျွန်မက သူတို့ကို ဩဝါဒခြွေပြီး ဝေဖန်ကဲ့ရဲ့ဖို့ အထက်စီးမှာပဲ နေခဲ့တာ။ ဒါက လူတိုင်းကို ကျွန်မကို ရှောင်ဖယ်ပြီး ကြောက်ရွံ့သွားစေတယ်။ သူတို့ရဲ့ အခြေအနေတွေ ဆိုးလာပြီး သူတို့တာဝန်တွေကို ထမ်းဆောင်နိုင်စွမ်း ထိခိုက်သွားတယ်။ ကျွန်မရဲ့ ဖောက်ပြန်ပျက်စီးတဲ့ စိတ်သဘောထားတွေအပေါ် အခြေခံပြီး လူတွေကို ဆက်ဆံတာက ဘုရားသခင်ကို တကယ် ရွံမုန်းစေပြီး တခြားလူတွေကို စိတ်ပျက်စေတယ်။ တစ်လောက အသင်းတော်မှာ အကြီးအကျယ် ဖမ်းဆီးမှုတွေ ကြုံခဲ့ရတယ်၊ စာနဲ့ပတ်သက်တဲ့အလုပ် လုပ်တဲ့သူ တော်တော်များများကို ဆက်သွယ်လို့ မရခဲ့ဘူး၊ ပြီးတော့ စာနဲ့ပတ်သက်တဲ့အလုပ်ရဲ့ တိုးတက်မှု နှေးကွေးသွားတယ်။ ညီအစ်ကိုမောင်နှမတွေက အခက်အခဲထဲမှာ အသက်ရှင်နေရပြီး ဘယ်လို တွေ့ကြုံရမလဲဆိုတာ မသိခဲ့ကြဘူး။ ဒီအချိန်ဟာ မိတ်သဟာယပြုပေးဖို့နဲ့ ကူညီပေးဖို့၊ သူတို့နဲ့အတူ ရှေ့ဆက်ရမဲ့ လမ်းကြောင်းကို ရှာဖို့နဲ့ သူတို့ရင်ဆိုင်နေရတဲ့ အခက်အခဲမျိုးစုံနဲ့ ပြဿနာတွေကို ဖြေရှင်းဖို့ ကျွန်မကို သူတို့ လိုအပ်နေတဲ့အချိန်ပါ။ ဒါပေမဲ့ လက်တွေ့ကျကျ မိတ်သဟာယပြုပြီး ကူညီပေးမဲ့အစား၊ ညီအစ်မတွေကို ကျွန်မ အထင်သေးပြီး ဩဝါဒခြွေနေခဲ့တယ်။ ရလဒ်အနေနဲ့ သူတို့ ဘာအကူအညီမှ မရခဲ့တာတောင်မှ အချိန်တိုင်းမှာ ကျွန်မရဲ့ ဘောင်ခတ်တာကို ခံနေရတယ်။ ဒါ ကျွန်မတာဝန်ကို ထမ်းဆောင်နေတာ လုံးဝ မဟုတ်ပါဘူး။ ကျွန်မ မကောင်းမှုလုပ်နေတာ မဟုတ်ဘူးလား။ ဘုရားသခင်ရဲ့ ဒီနှုတ်ကပတ်တော်တွေကို မြင်လိုက်တဲ့အခါမျိုးမှာ ဒါကို ကျွန်မ ခံစားလိုက်ရတယ်။ “သင်သည် အမြဲတမ်း အထက်စီးမှနေ၍ လူများကို ဤကဲ့သို့ ဩဝါဒပေးနေပါက၊ အချိန်ကြာလာသည်နှင့်အမျှ လူများသည် သင့်ထံမှ အသက်ပံ့ပိုးမှုကို လက်ခံရရှိနိုင်မည်မဟုတ်ပေ။ ၎င်းတို့သည် လက်တွေ့ကျသည့် မည်သည့်အရာကိုမျှ ရလိမ့်မည်မဟုတ်ပေ။ ထိုအစား သင်သည်အလွန်မုန်းတီးခြင်းနှင့် ရွံရှာခြင်းသာ ခံရလိမ့်မည်။” ကြီးကြပ်ရေးမှူးတစ်ယောက်အနေနဲ့ အထက်စီးကနေ သူများကို ဩဝါဒခြွေတာ၊ ဘောင်ခတ်တာတွေလုပ်တော့ အလုပ်မှာ အမှားဖြစ်ရုံတင်မကဘူး၊ ညီအစ်ကိုမောင်နှမတွေက ကျွန်မဆီက ဘာအကူအညီမှ မရနိုင်ရင်၊ သူတို့ ကျွန်မကို ငြင်းပယ်ကြလိမ့်မယ်။ အခု ကျွန်မတို့အလုပ်ရဲ့ ရလဒ်တွေ ကျဆင်းလာတယ်၊ ညီအစ်ကိုမောင်နှမတွေရဲ့ အခြေအနေတွေက ဆိုးရွားနေတယ်၊ ပြီးတော့ ဒီနည်းနဲ့ ကျွန်မ ပြုပြင်ခံရပြီး ဖော်ထုတ်ခံရတယ်။ ဒါ ဘုရားသခင် ကျွန်မကို ရိုက်နှက်ဆုံးမနေတာ မဟုတ်ဘူးလား။ ဒါကို သဘောပေါက်လိုက်တော့၊ ကျွန်မ အရမ်း စိတ်ဆင်းရဲပြီး အပြစ်ရှိသလို ခံစားရတယ်။ ကျွန်မ စိတ်နှလုံးကို ငြိမ်သက်စေပြီး ကိုယ့်ပြဿနာတွေကို ဖြေရှင်းဖို့ သမ္မာတရားကို ရှာချင်စိတ်ပဲ ရှိတော့တယ်။

နောက်ပိုင်းမှာ၊ ဘုရားနှုတ်ကပတ်တော် နောက်တစ်ပိုဒ်ကို ကျွန်မ ဖတ်ရတယ်၊ အဲဒါက ကျွန်မကို တကယ် နက်နက်ရှိုင်းရှိုင်း ရိုက်နှက်ခဲ့တယ်။ အနန္တတန်ခိုးရှင် ဘုရားသခင် ပြောသည်မှာ “များစွာသော ခေါင်းဆောင်တို့သည် အထက်စီးမှ လူတို့ကို ဩဝါဒပေးကာ တရားဟောနိုင်စွမ်းသာရှိကြပြီး အခြားသူများနှင့် တန်းတူကဲ့သို့ ဆက်သွယ်ပြောဆိုနိုင်ခြင်း မရှိကြသည်ကို ငါ တွေ့ပြီးဖြစ်သည်။ ၎င်းတို့သည် လူများနှင့် ပုံမှန်အတိုင်း မဆက်ဆံနိုင်ကြချေ။ လူအချို့ စကားပြောသည့်အခါ ၎င်းတို့က အမြဲ မိန့်ခွန်းပြောနေသကဲ့သို့၊ သို့မဟုတ် သတင်းပေးပို့ချက် ပြုလုပ်နေသကဲ့သို့ ဖြစ်သည်။ ၎င်းတို့၏ စကားလုံးများသည် အခြားလူများ၏ အခြေအနေများကိုသာ ဦးတည်သော်လည်း မိမိကိုယ်တိုင်အကြောင်းကို မည်သည့်အခါတွင်မျှ ဖွင့်မပြောကြချေ။ မိမိတို့ကိုယ်ပိုင် ဖောက်ပြန်ပျက်စီးသော စိတ်သဘောထားများကို ၎င်းတို့ လုံးဝ စိတ်ဖြာလေ့လာဆွေးနွေးခြင်း မရှိ။ ထိုအစား လူတိုင်းအား အသိပညာပေးရန် အခြားသူများကို ဥပမာများအဖြစ် အသုံးပြုလျက် အခြားသူများ၏ ပြဿနာများကိုသာ စိတ်ဖြာလေ့လာဆွေးနွေးကြသည်။ ၎င်းတို့သည် အဘယ်ကြောင့် ဤသို့ လုပ်ဆောင်ကြသနည်း။ အဘယ်ကြောင့် ထိုသို့သော တရားဒေသနာများကို ဟောပြီး ထိုသို့သောအရာများကို ၎င်းတို့ ပြောဆိုကြသနည်း။ ဤသည်မှာ ၎င်းတို့သည် မိမိတို့နှင့်ဆိုင်သည့် အသိပညာ မည်သို့မျှ မရှိကြောင်း၊ ဆင်ခြင်တုံတရား အလွန်ကင်းမဲ့နေကြကြောင်းနှင့် အလွန်မာနထောင်လွှားကာ မိမိကိုယ်ကို မှန်သည်ဟု ထင်မှတ်ကြကြောင်း သက်သေဖြစ်၏။ အခြားသူများ၏ ဖောက်ပြန်ပျက်စီးသော စိတ်သဘောထားများကို ၎င်းတို့ သတိပြုမိနိုင်စွမ်းသည် ၎င်းတို့က အခြားသူများအထက်တွင် ရှိကြောင်း၊ လူများနှင့် အမှုအရာများကို ပိုင်းခြားသိမြင်ရာတွင် အခြားသူများထက် တော်ကြောင်းနှင့် ၎င်းတို့က အခြားသူများထက် ဖောက်ပြန်ပျက်စီးမှု ပို၍ လျော့နည်းကြောင်း သက်သေပြသည်ဟု တွေးထင်ကြသည်။ ၎င်းတို့သည် အခြားသူများကို စိတ်ဖြာလေ့လာကာ ဩဝါဒခြွေနိုင်ကြသော်လည်း မိမိတို့ကိုယ်ကို မဖွင့်ချပေ၊ မိမိတို့ကိုယ်ပိုင် ဖောက်ပြန်ပျက်စီးသော စိတ်သဘောထားများကို မဖော်ထုတ်ပေ၊ သို့မဟုတ် စိတ်ဖြာလေ့လာခြင်း မပြုပေ၊ သို့မဟုတ် မိမိတို့၏ သဘောသဘာဝအမှန်ကို မပြပေ၊ သို့မဟုတ် မိမိတို့ကိုယ်ပိုင် ကြံရွယ်ချက်များအကြောင်း မည်သည့်အရာမျှ မပြောကြချေ။ အခြားသူများကိုသာ မလျော်မကန် ပြုမူခြင်းအတွက် ဩဝါဒပေးကြသည်။ ဤသည်မှာ မိမိ၏ ဩဇာအရှိန်အဝါ ကြီးအောင်လုပ်ခြင်းနှင့် မိမိကိုယ်ကို ချီးမြှောက်ခြင်း ဖြစ်သည်။ သင်သည် ခေါင်းဆောင်တစ်ဦး ဖြစ်သည့်တိုင် အဘယ်သို့ မတန်တဆ ဒုက္ခပေးတတ်သနည်း။ အသင်းတော် ခေါင်းဆောင်တစ်ဦး ဖြစ်ပြီးသည့်နောက်တွင် အဘယ်ကြောင့် သင်သည် အခြားသူများကို သာမန်ကာလျှံကာ ကြိမ်းမောင်းရသနည်း၊ ထင်ရာမြင်ရာ ပြုမူပြီး မိမိနှစ်သက်သည့်အတိုင်း ဆောင်ရွက်ရသနည်း။ သင့်စကားများ၏ အကျိုးဆက်များကို အဘယ်ကြောင့် လုံးဝ မစဉ်းစားရသနည်း။ သင် မည်သူမည်ဝါဖြစ်ကြောင်းကို အဘယ့်ကြောင့် လုံးဝ ထည့်မစဉ်းစားသနည်း။ သင်သည် အဘယ်ကြောင့် ဤသို့ ပြုမူရသနည်း။ ဤသည်မှာ အဘယ့်ကြောင့်ဆိုသော် သင်သည် ခေါင်းဆောင်တစ်ဦး ဖြစ်သော်လည်း သင့်ကိုယ်ပိုင် အဆင့်အတန်း၊ သို့မဟုတ် သင်မည်သူမည်ဝါဖြစ်ကြောင်းကို မသိသောကြောင့် ဖြစ်သည်။ သင် ခေါင်းဆောင်တစ်ဦးဖြစ်ဖို့အတွက် စီစဉ်ခြင်းသည် သင့်ကို မြှင့်တင်ကာ လက်တွေ့လုပ်ဆောင်ဖို့ အခွင့်အရေး ပေးရုံမျှသာ ဖြစ်သည်။ အခြားသူများထက် လက်တွေ့ကျမှု သင် ပိုမိုပိုင်ဆိုင်သောကြောင့်၊ သို့မဟုတ် အခြားသူများထက် ပိုတော်သောကြောင့် မဟုတ်ပေ။ အမှန်တွင် သင်သည် အခြားလူအယောက်တိုင်းနှင့် အတူတူပင် ဖြစ်သည်။ သင်တို့တစ်ဦးမျှ လက်တွေ့ကျမှု မပိုင်ဆိုင်သကဲ့သို့ တစ်နည်းနည်းဖြင့် သင်သည် အခြားသူများထက်ပင် ပိုမိုဖောက်ပြန်ပျက်စီးကောင်း ပျက်စီးနိုင်ပေသည်။ ထို့ကြောင့် သင်သည် အခြားသူတို့အား အဘယ်ကြောင့် မတန်တဆ ဒုက္ခဖြစ်စေကာ ထင်ရာမြင်ရာ ဩဝါဒပေး၍ ဒေါသဖြင့် ဝေဖန်ပြောဆိုပြီး စိတ်ကျဉ်းကျပ်စေသနည်း။ သင်မှားသည့်အချိန်တွင်ပင် အဘယ်ကြောင့် အခြားသူများကို အတင်းနားထောင်စေသနည်း။ ဤအရာက မည်သည့်အရာကို သက်သေပြသနည်း။ ဤအရာက သင်သည် မှားယွင်းသည့် နေရာတွင်ရှိသည်ကို သက်သေပြ၏။ သင်သည် လူသားတစ်ဦး၏ နေရာမှ အလုပ်လုပ်နေခြင်းမရှိ၊ ဘုရားသခင်၏ နေရာ၊ အခြားသူများ၏ အထက်နေရာမှ သင်၏ အလုပ်ကို သင် လုပ်နေသည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ နိုင်ငံတော်ခေတ်၌ ဘုရားသခင်၏ စီမံအုပ်ချုပ်ရေးဆိုင်ရာ အမိန့်များနှင့်ပတ်သက်၍) ဘုရားနှုတ်ကပတ်တော်တွေကို ဖတ်ရတာ ကျွန်မနှလုံးသားထဲထိ ထိုးဖောက်သွားတယ်။ ကျွန်မက ဘုရားသခင် ပြောနေတဲ့ လူစားမျိုး မဟုတ်ဘူးလား။ ညီအစ်မတွေရဲ့ လုပ်ငန်းကျွမ်းကျင်မှုနဲ့ အလုပ်လုပ်နိုင်စွမ်းက အတော်လေး အားနည်းတယ်၊ ပြီးတော့ အကြီးအကျယ် ဖမ်းဆီးမှု အခြေအနေကြောင့် သူတို့အလုပ် အဟန့်အတားဖြစ်တဲ့အခါ၊ ဖြေရှင်းဖို့ လမ်းကြောင်းတစ်ခုရှာရာမှာ ကျွန်မရဲ့အကူအညီကို သူတို့ လိုအပ်ခဲ့တယ်။ ဒါပေမဲ့ သူတို့ကို ကူညီဖို့ ကျွန်မ စိတ်မပါခဲ့ရုံမက အထက်စီးကနေ ဩဝါဒခြွေခဲ့သေးတယ်။ ကျွန်မက စကားပြောမြန်တော့၊ ညီအစ်မတစ်ယောက်က ကျွန်မဆိုလိုတာကို နားမလည်ရင်၊ ကျွန်မရဲ့ ဆူပူတာကို သူ ခံရတော့တာပဲ။ သူများတွေကို နာကျင်မှုနဲ့ ထိခိုက်မှုပဲ ကျွန်မ ပေးခဲ့တာ၊ ပြီးတော့ အလုပ်ကိုလည်း ထိခိုက်စေခဲ့တယ်။ အဲဒီအထဲမှာ လူ့သဘာဝ အစအနလေးတောင် ဘယ်မှာရှိလို့လဲ။ လွန်ခဲ့တဲ့တစ်လောက နှင်ထုတ်ခံလိုက်ရတဲ့ ယဲ့ ဆိုတဲ့ အန္တိခရစ်အကြောင်းကို ကျွန်မ တွေးမိတယ်။ ညီအစ်ကိုမောင်နှမတွေရဲ့ တာဝန်တွေမှာ လမ်းလွဲတာတွေ၊ ပြဿနာတချို့ကို သူတွေ့တဲ့အခါ၊ အခြေအနေကို မစဉ်းစားဘဲ၊ ဒါမှမဟုတ် သူတို့ရဲ့ တကယ့်အခက်အခဲတွေကို နားမလည်ဘဲ သူတို့ကို ဩဝါဒခြွေတယ်၊ ပြုပြင်တယ်၊ ပြီးတော့ ညှဉ်းပန်းတယ်။ ဒါက ညီအစ်ကိုမောင်နှမတွေကို သူ့ကိုမြင်တဲ့အခါ ကြောက်ရွံ့စေပြီး သတိထားရှောင်တဲ့ အခြေအနေမှာ အသက်ရှင်စေခဲ့တယ်၊ အဲဒါက သူတို့တာဝန်တွေကို ထိခိုက်စေခဲ့တယ်။ ပြီးတော့ ကျွန်မ ကိုယ့်ကိုယ်ကိုယ် ကြည့်လိုက်တယ်။ ယဲ့ လောက် ပြင်းပြင်းထန်ထန် လူတွေကို ကျွန်မ ဩဝါဒမခြွေ၊ မညှဉ်းပန်းခဲ့ပေမဲ့၊ အဖွဲ့သားတွေကို ကျွန်မ အထင်သေးပြီး ဩဝါဒခြွေခဲ့တာကြောင့် ကျွန်မရဲ့ ညီအစ်မတွေအားလုံး သတိထားရှောင်ပြီး နေနေခဲ့ကြရတယ်။ ဆူပူတာမခံရအောင် ကျွန်မကို ဘယ်လို ကျေနပ်အောင်လုပ်ရမလဲဆိုတာပဲ သူတို့ တွေးနေခဲ့ကြတယ်၊ အဲဒါက သူတို့ရဲ့ အခြေအနေတွေရော အလုပ်ကိုပါ ထိခိုက်စေခဲ့တယ်။ သူများကို ကျွန်မ ဘောင်ခတ်တာရဲ့ သဘောသဘာဝနဲ့ အကျိုးဆက်တွေက အရမ်းပြင်းထန်ပြီး အခြေအနေတွေကို ကျွန်မ မပြောင်းလဲရင်၊ အဆုံးမှာ ကျွန်မဟာ အန္တိခရစ် လမ်းကြောင်းပေါ်ရောက်ပြီး ယဲ့ လိုပဲ ဖယ်ရှားရှင်းလင်းခံရမယ်ဆိုတာ ကျွန်မ သဘောပေါက်လိုက်တယ်။ ကျွန်မ ကြောက်လဲကြောက် အပြစ်ရှိသလိုလဲ ခံစားရတော့၊ နောင်တရဖို့ ဘုရားသခင်ဆီ ဆုတောင်းခဲ့တယ်၊ ကိုယ့်ကိုယ်ကိုယ် ထပ်ပြီး ဆင်ခြင်သုံးသပ်တဲ့အပြင် သိမြင်နိုင်ဖို့ လမ်းပြပေးပါလို့ တောင်းလျှောက်ရင်းနဲ့ပေါ့။

ပြီးတော့ ဘုရားနှုတ်ကပတ်တော်တချို့ကို ဖတ်ပြီး ကျွန်မပြဿနာကို နည်းနည်း နားလည်သွားတယ်။ အနန္တတန်ခိုးရှင် ဘုရားသခင် ပြောသည်မှာ “သင်၏စိတ်နှလုံးထဲတွင် သင်သည် သမ္မာတရားကို အမှန်တကယ် နားလည်ပါက၊ သမ္မာတရားကို လက်တွေ့လုပ်ဆောင်ကာ ဘုရားသခင်ကို ကျိုးနွံနာခံဖို့ နည်းလမ်းအား သင်သိလိမ့်မည် ဖြစ်ပြီး သမ္မာတရား လိုက်စားခြင်း လမ်းကြောင်းပေါ်ကို သင် အလိုအလျောက် စတင်လိမ့်မည် ဖြစ်သည်။ သင်လျှောက်သည့် လမ်းကြောင်းသည် မှန်ကန်သည့် လမ်းကြောင်းဖြစ်ပြီး ဘုရားသခင်၏ ရည်ရွယ်ချက်များနှင့် ကိုက်ညီပါက၊ သန့်ရှင်းသောဝိညာဉ်တော်၏ အလုပ်သည် သင့်ကို စွန့်ခွာလိမ့်မည် မဟုတ်ချေ။ ထိုအခြေအနေတွင် ဘုရားသခင်အား သင် သစ္စာဖောက်ဖို့အလားအလာ နည်းသည်ထက် နည်းလာပေလိမ့်မည်။ သမ္မာတရားမရှိပါက မကောင်းမှုပြုရန် လွယ်ကူပြီး မရည်ရွယ်ဘဲ ယင်းကို သင်လုပ်မိလိမ့်မည် ဖြစ်သည်။ ဥပမာ၊ သင့်တွင် မာနထောင်လွှားပြီး စိတ်ကြီးဝင်သော စိတ်သဘောထားတစ်ခုရှိလျှင် ဘုရားသခင်ကို မဆန့်ကျင်ရန် ပြောဆိုခံရခြင်းသည် ထူးခြားမှုမရှိပေ။ သင်သည် ကိုယ့်ကိုယ်ကိုယ် မထိန်းနိုင်ပေ။ သင်ထိန်းချုပ်နိုင်သည်ထက် ကျော်လွန်သည်။ သင်သည် ရည်ရွယ်ချက်ရှိရှိဖြင့် လုပ်ဆောင်မည်မဟုတ်ပေ။ သင်၏ မောက်မာပြီး ထောင်လွှားသော သဘာဝဗီဇ၏ အုပ်စိုးမှုအောက်၌ သင် ထိုသို့ပြုလိမ့်မည်။ သင်၏ မာနထောင်လွှားခြင်းနှင့် စိတ်ကြီးဝင်ခြင်းတို့သည် သင့်ကို ဘုရားသခင်အား အထင်အမြင်သေးစေမည်ဖြစ်ပြီး သူ့အား အရေးမပါသောသူအဖြစ် မြင်စေမည်ဖြစ်သည်။ ထိုအရာတို့သည် သင့်ကိုယ်သင် ချီးမြှောက်အောင် လုပ်လိမ့်မည်ဖြစ်ပြီး သင့်ကိုယ်သင် အစဉ်တစိုက် ပြစားဝင့်ဝါအောင် လုပ်လိမ့်မည် ဖြစ်သည်။ ယင်းတို့က သင့်အား အခြားသူများကို အထင်အမြင်သေးစေမည်၊ သင့်စိတ်နှလုံးထဲတွင် သင်ကိုယ်တိုင်မှလွဲ၍ အခြားမည်သူကိုမျှ ထားမည် မဟုတ်ချေ။ ယင်းတို့က သင်၏ စိတ်နှလုံးထဲမှ ဘုရားသခင်၏နေရာကို လုယူလိမ့်မည်။ ပြီးလျှင် နောက်ဆုံးတွင် သင့်အား ဘုရားသခင်၏နေရာတွင် ထိုင်ဖို့ဖြစ်စေပြီး သင့်ကိုယ်ပိုင်အတွေးများ၊ အကြံဉာဏ်များနှင့် အယူအဆများကို သမ္မာတရားအဖြစ် ကြည်ညိုလေးစားစေလျက်၊ သင့်ကို ကျိုးနွံနာခံဖို့ တောင်းဆိုစေမည် ဖြစ်သည်။ မိမိတို့၏ မောက်မာ၍ ထောင်လွှားသော သဘာဝ၏ အုပ်စိုးမှုအောက်၌ လူတို့သည် များပြားလှသော ဒုစရိုက်မှုကို ပြုကြသည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ သမ္မာတရားအား လိုက်စားခြင်းအားဖြင့်သာ စိတ်သဘောထား ပြောင်းလဲမှုတစ်ခုကို ရရှိနိုင်သည်) ဘုရားနှုတ်ကပတ်တော်တွေကနေ ကျွန်မ နားလည်လိုက်တာက လူတွေကို ကျွန်မ အထင်သေးပြီး ဘောင်ခတ်ရတဲ့ အဓိကအကြောင်းရင်းက ကျွန်မရဲ့သဘာဝက အရမ်း မာနထောင်လွှားနေလို့ပဲ။ ညီအစ်မတွေ အခက်အခဲတွေကြုံပြီး ဘယ်လိုဖြေရှင်းရမှန်းမသိတဲ့အခါ၊ ကျွန်မရဲ့ လက်တွေ့ကျတဲ့ အကူအညီကို သူတို့ လိုအပ်ခဲ့တယ်။ ဒါပေမဲ့ သူတို့ဘာသာ ဆုတောင်းပြီး ရှာဖွေရင်း ရှေ့ဆက်ရမဲ့ လမ်းကြောင်းတချို့ကို ရှာတွေ့နိုင်လောက်တယ်၊ ပြီးတော့ ကျွန်မက ရိုးရိုးရှင်းရှင်း ရှင်းပြလိုက်ရင် ကျွန်မဆိုလိုရင်းကို သူတို့ သဘောပေါက်နိုင်လောက်တယ်လို့ ကျွန်မ ထင်ခဲ့တယ်။ သူတို့မှာ အခက်အခဲတွေ ရှိနေတုန်းဆိုရင်၊ ကျွန်မက သူတို့ကို အထင်သေးလာပြီး၊ သူတို့ ဘယ်နေရာမှာ ပိတ်မိနေလဲဆိုတာ အမှန်တကယ် မမေးဘဲ သူတို့ကို ပြုပြင်တော့တာပဲ။ တကယ်တော့ အတိတ်မှာ ကျွန်မ အခက်အခဲတွေ ကြုံခဲ့ရတုန်းက၊ ကျွန်မ ခဏခဏ လမ်းပျောက်ပြီး ဘယ်လိုဖြေရှင်းရမှန်း မသိခဲ့ဘူး၊ တစ်ခါတလေ ကွယ်ရာမှာ ခိုးတောင် ငိုခဲ့ဖူးတယ်။ ဒါပေမဲ့ ကျွန်မက အဖွဲ့သားတွေထက် ကိုယ့်ကိုယ်ကိုယ် ပိုတော်တယ်လို့ ယူဆပြီး၊ စိတ်ထဲမှာ ကိုယ့်ကိုယ်ကိုယ် မြှင့်တင်ပြီး သူတို့ကို နှိမ့်ချခဲ့တယ်။ ကျွန်မက အရမ်း မာနထောင်လွှားပြီး ဆင်ခြင်တုံတရား တစ်စက်မှ မရှိတာပဲ။ မာနထောင်လွှားတဲ့ စိတ်သဘောထားနဲ့ ညီအစ်မတွေကို ဆက်ဆံတော့ ကျွန်မ သူတို့ကို ဘောင်ခတ်ခဲ့ပြီး ကျွန်မတို့တာဝန်ကို အဖျက်အမှောင့်လုပ်ပြီး နှောင့်ယှက်ခဲ့တယ်။ ဒါ ဘုရားသခင်ကို အတိုက်အခံလုပ်တာ မဟုတ်ဘူးလား။ ကျွန်မ ပိုတွေးလေ၊ ကျွန်မရဲ့ မာနထောင်လွှားတဲ့ စိတ်သဘောထားကို မဖြေရှင်းရင်၊ ကျွန်မ တကယ်ပဲ အလိုအလျောက် မကောင်းမှု လုပ်မိနိုင်တယ်လို့ ပိုခံစားရလေပဲ။ အခြေအနေတွေကို ကျွန်မ အကျိုးဖြစ်ထွန်းအောင် လုပ်ပြီး ပြောင်းလဲပစ်ချင်တဲ့အပြင် ညီအစ်မတွေကို ဘုရားနှုတ်ကပတ်တော်နဲ့အညီ ဆက်ဆံချင်ခဲ့တယ်။

တစ်နေ့မှာ၊ ဘုရားနှုတ်ကပတ်တော်တွေကို ကျွန်မ ဖတ်ရတယ်၊ အဲဒါက ကျွန်မကို အရမ်း တို့ထိခဲ့ပြီး သမ္မာတရားကို လက်တွေ့လုပ်ဆောင်ဖို့ စိတ်ပိုင်းဖြတ်မှု ပေးခဲ့တယ်။ အနန္တတန်ခိုးရှင် ဘုရားသခင် ပြောသည်မှာ “အကြောင်းမှာ သင်တို့အားလုံး ထုံထိုင်းပြီး သမ္မာတရားအတွက် ချစ်ခြင်းမရှိဘဲ သင်တို့၏ ညံ့ဖျင်းသော အစွမ်းအစနှင့်တကွ သမ္မာတရားကို လိုက်စားခြင်းလည်း မရှိသည်ကို ငါမြင်သောကြောင့် ငါသည် အသေးစိတ် ပြောရမည်ဖြစ်သည်။ ငါသည် ငါ၏ စကားထဲတွင် အရာအားလုံးကို နားရှင်းအောင်ပြောကာ ဂဃနဏ ခွဲခြမ်းစိတ်ဖြာပြီး တစ်ပိုင်းတစ်စစီ ပြောရမည်ဖြစ်သည်။ ပြီးလျှင် အမှုကိစ္စများကို ရှုထောင့်တိုင်းမှနေ၍ ဘက်ပေါင်းစုံမှ ငါ ပြောရမည်ဖြစ်သည်။ ထိုမှသာလျှင် သင်တို့ အနည်းငယ် နားလည်ပေသည်။ သင်တို့ကို ငါဝတ်ကျေတမ်းကျေပြုကာ သေချာမတွေးသလို မကြိုးစားဘဲ စိတ်မပါ့တပါဖြင့် ငါစိတ်ပါသည့်အချိန်တိုင်း မည်သည့်အကြောင်းအရာကိုမဆို အနည်းငယ်ပြောဆိုကာ စိတ်မပါသည့်အချိန်တွင် စကားမပြောလျှင် သင်တို့ မည်သည့်အရာကို ရနိုင်မည်နည်း။ သင်တို့ကဲ့သို့ အစွမ်းအစဖြင့် သင်တို့သည် သမ္မာတရားကို နားလည်မည်မဟုတ်။ ကယ်တင်ခြင်းကို ရရှိဖို့မဆိုထားနှင့် မည်သည့်အရာကိုမျှ ရရှိမည် မဟုတ်ချေ။ သို့ရာတွင် ထိုအရာကို ငါမပြုလုပ်နိုင်ပေ။ ထိုအစား အသေးစိတ် စကားပြောရမည်။ ငါ အသေးစိတ် ဆွေးနွေးပြီး လူအမျိုးအစားတစ်ခုစီတိုင်း၏ အခြေအနေများနှင့် စပ်လျဉ်း၍လည်းကောင်း၊ သမ္မာတရားအပေါ် လူများက ထားရှိသော သဘောထားနှင့်စပ်လျဉ်း၍လည်းကောင်း၊ ဖောက်ပြန်ပျက်စီးသော စိတ်သဘောထားအမျိုးအစား တစ်ခုစီတိုင်းနှင့်စပ်လျဉ်း၍လည်းကောင်း ဥပမာများပေးရမည် ဖြစ်သည်။ ထိုအခါမှသာ ငါပြောနေသည့်အရာကို သင်တို့ နားလည်သဘောပေါက်လိမ့်မည်ဖြစ်ပြီး ကြားသည့်အရာကို သင် နားလည်လိမ့်မည်။ သမ္မာတရား၏ မည်သည့်ကဏ္ဍကို မိတ်သဟာယပြုသည်ဖြစ်စေ ငါသည် အမျိုးမျိုးသောနည်းလမ်းများဖြင့် စကားပြောသည်။ လူကြီးများအတွက်၊ ကလေးများအတွက် မိတ်သဟာယပုံစံများဖြင့် ပြောသည်။ သီအိုရီနှင့် ကျင့်သုံးမှုကို အသုံးပြုလျက်၊ အတွေ့အကြုံများကို ပြောဆိုလျက်ဖြင့် သဘောတရားနှင့် ပုံပြင်များပုံစံဖြင့်လည်း ပြောသည်။ သမ္မာတရားကို လူတို့နားလည်ပြီး စစ်မှန်မှုထဲသို့ ဝင်ရောက်နိုင်ရန်ဖြစ်သည်။ ဤနည်းဖြင့် အစွမ်းအစရှိပြီး စိတ်နှလုံး ပိုင်ဆိုင်သူတို့သည် သမ္မာတရားကို နားလည်လက်ခံပြီး ကယ်တင်ခြင်းခံရရန် အခွင့်အရေး ရှိလိမ့်မည်။” (နှုတ်ကပတ်တော်၊ အတွဲ (၃)၊ နောက်ဆုံးသော ကာလ ခရစ်တော်၏ ဟောပြောဆွေးနွေးချက်များ၊ မိမိ၏တာဝန်ကို ကောင်းစွာထမ်းဆောင်ဖို့ရာ အကြင်သူသည် အသိစိတ်နှင့် ဆင်ခြင်တုံတရားတို့ အနည်းဆုံး ပိုင်ဆိုင်ရမည်) ကိုယ့်ဖောက်ပြန်ပျက်စီးတဲ့ သဘာဝတွေက ကျွန်မတို့အားလုံးထဲမှာ ဘယ်လို နက်နက်ရှိုင်းရှိုင်း အမြစ်တွယ်နေလဲဆိုတာ ကျွန်မ တွေးမိတယ်။ ဘုရားသခင်ရဲ့အလုပ်ကို နားလည်မှု ကင်းမဲ့တဲ့အတွက်၊ ကိုယ်တော်နဲ့ပတ်သက်ပြီး အယူအဆတွေ၊ နားလည်မှုလွဲတာတွေ ကျွန်မတို့မှာ ဖြစ်တတ်တယ်၊ ပြီးတော့ ဖောက်ပြန်ပျက်စီးတဲ့ စိတ်သဘောထား အမျိုးမျိုးက တစ်ခုပြီးတစ်ခု ပေါ်လာတတ်တယ်။ အချိန်တော်တော်များများမှာ၊ သမ္မာတရားကို နည်းနည်း နားလည်ရင်တောင်၊ ကျွန်မတို့ အဲဒါကို လက်တွေ့မလုပ်ဆောင်နိုင်ကြဘူး။ ဒါပေမဲ့ ဘုရားသခင်က ကျွန်မတို့ကို ဘယ်တော့မှ လက်မလျှော့ခဲ့ဘူး။ ကျွန်မတို့ကို ထောက်ပံ့ဖို့နဲ့ ကူညီဖို့ နှုတ်ကပတ်တော်တွေကို သူ ဆက်တိုက် ဖော်ပြနေတယ်။ တချို့က နှစ်သိမ့်ခြင်းနဲ့ တိုက်တွန်းနှိုးဆော်ခြင်း စကားတွေဖြစ်ပြီး၊ တချို့ကျတော့ တရားစီရင်ခြင်းနဲ့ ဖော်ထုတ်ခြင်း စကားတွေ ဖြစ်တယ်။ တစ်ခါတလေ၊ ကျွန်မတို့ ပိုနားလည်အောင် ကူညီဖို့၊ ဥပမာတွေ၊ ပုံဥပမာတွေနဲ့ ဇာတ်လမ်းတွေကိုလဲ သူ သုံးတယ်။ ကျွန်မတို့ သမ္မာတရားကို နားလည်အောင် ဘုရားသခင်က အရာအားလုံး လုပ်ဆောင်တယ်။ အဲဒါမှ ကျွန်မတို့ ကိုယ့်ပြဿနာတွေကို ဆင်ခြင်သုံးသပ်ပြီး အသိအမှတ်ပြုနိုင်တဲ့အပြင် လက်တွေ့လုပ်ဆောင်မှု လမ်းကြောင်းကို ရှာတွေ့နိုင်မှာလေ။ ဘုရားသခင်ရဲ့ စိတ်နှလုံးက အရမ်း လှပပြီး ကောင်းမြတ်တာ၊ ပြီးတော့ သူ ကျွန်မတို့ကို ဆောင်ကြဉ်းပေးတဲ့အရာအားလုံးက အကျိုးရှိတာကို ကျွန်မ တွေ့ခဲ့ရတယ်။ ဒါပေမဲ့ ညီအစ်ကိုမောင်နှမတွေကို စိတ်ရှည်ရှည်နဲ့ဖြစ်ဖြစ်၊ မေတ္တာနဲ့ဖြစ်ဖြစ် မဆက်ဆံခဲ့ပုံကို ပြန်တွေးမိတယ်။ ညီအစ်မတွေ အခက်အခဲကြုံရတဲ့အခါ၊ ကျွန်မ တစ်ခါနှစ်ခါလောက် ကူညီပြီးတော့ သူတို့ကို စပြီး အထင်သေးတော့တာပဲ။ သူတို့ကို ဘာအကျိုးကျေးဇူးမှ မပေးနိုင်ခဲ့ရုံမက၊ အဲဒီအစား သူတို့ကို ဘောင်ခတ်တာနဲ့ ဒုက္ခပေးတာပဲ ရှိခဲ့တယ်။ ကျွန်မမှာ လူ့သဘာဝ ကင်းမဲ့လိုက်တာ။ နောက်ပိုင်းမှာ၊ အဖွဲ့သားတွေကို ကျွန်မ ရင်ဖွင့်ပြီး၊ ကိုယ့်ဖောက်ပြန်ပျက်စီးမှုကို ဖော်ထုတ်ခဲ့တယ်၊ ပြီးတော့ သူတို့ကို တောင်းပန်ခဲ့တယ်။

နောက်တော့၊ ကျွန်မ ကိုယ့်ကိုယ်ကိုယ် ဆင်ခြင်သုံးသပ်ပြီး လူတွေကို ကျွန်မ ဘောင်ခတ်ခဲ့ရတဲ့ နောက်ထပ် အကြောင်းရင်းတစ်ခု ရှိတာကို သဘောပေါက်လိုက်တယ်။ လူတွေကို စည်းမျဉ်းတွေနဲ့အညီ ဘယ်လို ဆက်ဆံရမလဲဆိုတာ ကျွန်မ မသိခဲ့တာပဲ။ ညီအစ်မတွေရဲ့ တကယ့် အခက်အခဲတွေနဲ့ အခြေအနေတွေကို ကျွန်မ မစဉ်းစားခဲ့ဘူး၊ ကျွန်မက တစ်ပြေးညီ နည်းလမ်းကိုပဲ သုံးခဲ့တာ။ တကယ်တော့၊ သူတို့ကလဲ သူတို့တာဝန်တွေကို ကောင်းကောင်း လုပ်ချင်ကြပါတယ်၊ ဒါပေမဲ့ သူတို့ရဲ့ အစွမ်းက သာမန်ပဲရှိပြီး အလုပ်လုပ်နိုင်စွမ်း လိုအပ်နေတာပါ။ ဒါကြောင့် သူတို့ကို ကူညီဖို့ ကျွန်မဘက်က ပိုအားစိုက်ပြီး အချိန်နဲ့ အင်အား ပိုပေးဖို့ လိုအပ်ခဲ့တယ်။ နောက်ပိုင်းမှာ ဒီဘုရားနှုတ်ကပတ်တော်တွေကို ကျွန်မ ဖတ်ရတယ် “အစွမ်းအစ ညံ့ဖျင်းပြီး အလုပ်လုပ်နိုင်စွမ်း ကင်းမဲ့သည့် အနည်းငယ်သော ခေါင်းဆောင်များနှင့် အမှုဆောင်များကို သင် မည်သို့ သဘောထားသင့်သနည်း။...သင်သည် ၎င်းတို့အား အလုပ်ကို မည်သို့လုပ်ဆောင်ရမည်၊ မည်သို့ အကောင်အထည်ဖော်ရမည်ဟူသည်တို့ကို တိကျစွာ ပြောပြရန် လိုအပ်သည်။ ဤတာဝန်အတွက် မည်သူ့ကို ခန့်အပ်ပြီး တာဝန်ယူစေသင့်သည်၊ ပြီးလျှင် ယင်းနှင့်ပတ်သက်၍ အတူတကွ ပူးပေါင်းဆောင်ရွက်ရန် မည်သည့်လူများကို ရွေးချယ်သင့်သည်ဟူသည်တို့ကို ၎င်းတို့အား သင် ပြောပြသင့်သည်။ ဤအသေးစိတ်အချက်များအားလုံးကို ၎င်းတို့အား ရှင်းပြပြီး ဤအရာကို ၎င်းတို့အား ဆောင်ရွက်စေလော့။ အဘယ်ကြောင့် ဤနည်းဖြင့် လုပ်ဆောင်သင့်သနည်း။ အကြောင်းမှာ ဒေသခံအသင်းတော်၏ အသင်းသားများသည် ယေဘုယျအားဖြင့် အတွေ့အကြုံ အလွန်နုနယ်သေးပြီး အလုပ်လုပ်နိုင်စွမ်း ကင်းမဲ့ကြသဖြင့် သင့်တော်သော ခေါင်းဆောင်များနှင့် အမှုဆောင်များကို ရွေးချယ်ရန် မဖြစ်နိုင်သောကြောင့် ဖြစ်သည်။ ဤနည်းလမ်းဖြင့် အလုပ်လုပ်ခြင်းအားဖြင့်သာ အလုပ်အစီအစဉ်များကို အကောင်အထည်ဖော်နိုင်ပေသည်။ အကယ်၍ သင်သည် ဤနည်းလမ်းဖြင့် အလုပ်မလုပ်သည့်အပြင်၊ ဤလူတို့ကို အခြားခေါင်းဆောင်များနှင့် အမှုဆောင်များကဲ့သို့ပင် အလားတူ သဘောမထားဘဲ တိကျသော စည်းမျဉ်းများနှင့် အစီအစဉ်များအကြောင်းကိုသာ ၎င်းတို့အား ပြောပြပြီး မဆင်မခြင်ပြုမူပါက၊ အလုပ်အစီအစဉ်များက အကောင်အထည်ပေါ်လိမ့်မည် မဟုတ်ပေ။ အကယ်၍ သင်သည် ဤအရာကို အာရုံမစိုက်ပါက တာဝန်ပျက်ကွက်ခြင်းဖြစ်သည် မဟုတ်လော။ (ဟုတ်ပါသည်။) ဤသည်မှာ ခေါင်းဆောင်များနှင့် အမှုဆောင်များ၏ တာဝန်တစ်ခု ဖြစ်သည်။ အချို့သော ခေါင်းဆောင်များနှင့် အမှုဆောင်များက ‘အခြားသူများသည် အလုပ်အစီအစဉ်များကို မည်သို့ အကောင်အထည်ဖော်ပြီး လက်တွေ့လုပ်ဆောင်ရမည်ကို သိကြသည်၊ ဤလူက အဘယ်ကြောင့် မသိသနည်း။ သူတို့ မသိလျှင် သူတို့နှင့်ပတ်သက်၍ ကျွန်ုပ် စိတ်အနှောင့်အယှက်ဖြစ်ခံမည် မဟုတ်ပါ။ ယင်းမှာ ကျွန်ုပ်၏ တာဝန်မဟုတ်ပါ။ မည်သို့ပင်ဖြစ်စေ ကျွန်ုပ်ဘက်ကတော့ တာဝန်ကျေပြီ’ ဟု ပြောကြသည်။ ဤကျိုးကြောင်းဆင်ခြင်ချက်သည် ခိုင်လုံသလော။ (မခိုင်လုံပါ။) ဥပမာအားဖြင့် မိခင်တစ်ဦးတွင် ကလေးသုံးယောက်ရှိပြီး ၎င်းတို့ထဲမှ တစ်ဦးမှာ အားနည်းကာ အမြဲတမ်း ဖျားနာပြီး အစာမစားချင်ဟု ဆိုကြပါစို့။ အကယ်၍ မိခင်က ဤကလေးကို အစာမစားဘဲ နေခွင့်ပြုပါက ထိုကလေးသည် ကြာကြာ ရှင်သန်နိုင်မည် မဟုတ်ပေ။ သူမ မည်သည့်အရာကို လုပ်ဆောင်သင့်သနည်း။ မိခင်တစ်ဦးအနေဖြင့် သူမသည် ထိုအားနည်းသော ကလေးကို အထူးဂရုစိုက်ပေးရမည်။ မိခင်က ‘ကျွန်မ၏ ကလေးများကို တန်းတူရည်တူ ဆက်ဆံခြင်းက လုံလောက်နေပြီဖြစ်သည်။ ဤကလေးကို ကျွန်မ မွေးခဲ့ပြီး သူ့အတွက် အစားအသောက် ပြင်ဆင်ပေးခဲ့သည်။ ကျွန်မ၏ တာဝန်ကို ကျွန်မ ဖြည့်ဆည်းပြီးဖြစ်သည်။ သူ စားသည်ဖြစ်စေ၊ မစားသည်ဖြစ်စေ ကျွန်မ ဂရုမစိုက်ပါ။ သူ မစားလျှင် ဗိုက်ဆာပါစေ၊ သူ တကယ် ဗိုက်ဆာလောက်သည့်အခါ၊ စားပါလိမ့်မည်’ဟု ပြောသည် ဆိုကြပါစို့။ ဤမိခင်မျိုးကို သင်တို့ မည်သို့ထင်သနည်း။ (သူမသည် တာဝန်မဲ့ပါသည်။) ဤကဲ့သို့သော မိခင်များ ရှိသလော။ ဉာဏ်ထိုင်းသော အမျိုးသမီး သို့မဟုတ် မိထွေးတစ်ဦးသာ ထိုသို့ဖြစ်ပေမည်။ အကယ်၍ သူမသည် တကယ့်အမိရင်းဖြစ်ပြီး ဉာဏ်မထိုင်းပါက မိမိ၏ ကိုယ်ပိုင်ကလေးကို ဤကဲ့သို့ မည်သည့်အခါမျှ ဆက်ဆံမည်မဟုတ်ပေ၊ မှန်သလော။ (မှန်ပါသည်။) အကယ်၍ ကလေးတစ်ဦးသည် အားနည်းပါက၊ အမြဲတမ်း ဖျားနာကာ အစာမစားချင်ပါက ၎င်းတို့၏ မိခင်သည် ပို၍ ဂရုစိုက်ပြီး အားထုတ်ပေးရမည်။ သူမသည် ကလေးကို အစာစားလာစေရန် နည်းလမ်းများ ရှာဖွေရမည်၊ ကလေး စားချင်သမျှကို ချက်ပြုတ်ပေးရမည်၊ ၎င်းတို့အတွက် အထူးအစားအစာများ ပြင်ဆင်ပေးရမည်ဖြစ်ပြီး၊ ကလေးက အစာမစားချင်သည့်အခါ ချော့မော့ကျွေးရမည်ဖြစ်သည်။ ၎င်းတို့က အသက် ဆယ့်ရှစ် သို့မဟုတ် ဆယ့်ကိုးနှစ်အရွယ်သို့ ရောက်ရှိပြီး ၎င်းတို့၏ ခန္ဓာကိုယ်သည် သာမန်လူကြီးတစ်ဦးကဲ့သို့ ကျန်းမာလာသောအခါ မိခင်သည် စိတ်အေးလက်အေးဖြစ်ကာ ထိုသို့လုပ်ဆောင်ခြင်းကို ရပ်နိုင်ပြီး ဤကလေးကို အထူးဂရုစိုက်ပေးရန် မလိုအပ်တော့ပေ။ အကယ်၍ မိခင်တစ်ဦးသည် အထူးအခြေအနေများရှိသော ကလေးတစ်ဦးကို ဤကဲ့သို့ သဘောထားပြီး သူမ၏ တာဝန်ကို ဖြည့်ဆည်းနိုင်လျှင် ခေါင်းဆောင်တစ်ဦး သို့မဟုတ် အမှုဆောင်တစ်ဦးနှင့် ပတ်သက်၍ကော မည်သို့နည်း။ ညီအစ်ကိုမောင်နှမများအတွက် သင်သည် မိခင်တစ်ဦး၏ မေတ္တာမျိုးပင် မရှိပါက တာဝန်မဲ့သူသာ ဖြစ်သည်။ သင်သည် သင်ဖြည့်ဆည်းသင့်သည့် တာဝန်ဝတ္တရားများကို ဖြည့်ဆည်းရမည်၊ သင်သည် အတော်အတန် အားနည်းပြီး အတော်အတန် ညံ့ဖျင်းသော အလုပ်လုပ်နိုင်စွမ်း ပိုင်ဆိုင်ထားသူများ ကြီးကြပ်သည့် အသင်းတော်များကို ထည့်သွင်းစဉ်းစားရမည်။ ခေါင်းဆောင်များနှင့် အမှုဆောင်များသည် ဤကိစ္စရပ်များတွင် အထူးဂရုပြုပြီး အထူးလမ်းညွှန်မှု ပေးရမည်။ အထူးလမ်းညွှန်မှုဟူသည်မှာ မည်သည့်အရာကို ရည်ညွှန်းသနည်း။ သမ္မာတရားကို မိတ်သဟာယဖွဲ့ခြင်းအပြင် သင်သည် ပို၍ တိကျပြီး အသေးစိတ်ကျသော လမ်းညွှန်မှုနှင့် အကူအညီကိုလည်း ပေးရမည်ဖြစ်ပြီး ယင်းမှာ ဆက်သွယ်ပြောဆိုခြင်းအရ ပို၍ အားထုတ်ရန် လိုအပ်သည်။ အကယ်၍ သင်သည် အလုပ်ကို ၎င်းတို့အား ရှင်းပြပြီး ၎င်းတို့ နားမလည်သေးသည့်အပြင်၊ မည်သို့ အကောင်အထည်ဖော်ရမည်ကို မသိပါက၊ သို့မဟုတ် ၎င်းတို့သည် ယင်းကို အယူဝါဒအရ နားလည်ပြီး မည်သို့ အကောင်အထည်ဖော်ရမည်ကို သိပုံရသော်လည်း၊ အမှန်တကယ် အကောင်အထည်ဖော်မှုက မည်သို့ဖြစ်လိမ့်မည်ကို သင် မသေချာသေးသည့်အပြင် အနည်းငယ် စိုးရိမ်နေပါက မည်သည့်အရာကို သင် လုပ်ဆောင်သင့်သနည်း။ သင်သည် ၎င်းတို့ကို လမ်းညွှန်ရန်နှင့် တာဝန်ကို ၎င်းတို့နှင့်အတူ အကောင်အထည်ဖော်ရန် ဒေသခံအသင်းတော်ထဲသို့ ကိုယ်တိုင် ဝင်ရောက်သွားရန် လိုအပ်သည်။ စည်းမျဉ်းများကို ၎င်းတို့အား ပြောပြရင်း၊ တစ်ချိန်တည်းတွင် အလုပ်အစီအစဉ်များ၏ သတ်မှတ်ချက်များနှင့်အညီ ဦးစွာ မည်သည့်အရာ လုပ်ဆောင်ရမည်၊ ဆက်လက်၍ မည်သည့်အရာကို လုပ်ရမည်၊ လူတို့အား မည်သို့ ကောင်းစွာ ခွဲဝေပေးရမည်ဟူသကဲ့သို့သော တိကျသော စီစဉ်မှုများ ပြုလုပ်ရမည်။ ဤသည်မှာ ဆောင်ပုဒ်များ ကြွေးကြော်ခြင်း သို့မဟုတ် လက်ညှိုးထိုး ခိုင်းစေခြင်း၊ အယူဝါဒအချို့ဖြင့် ၎င်းတို့ကို ဟောပြောပို့ချပြီးနောက် သင်၏အလုပ် ပြီးပြီဟု မှတ်ယူခြင်းတို့နှင့် ဆန့်ကျင်ဘက်အနေဖြင့် ၎င်းတို့၏အလုပ်တွင် ၎င်းတို့ကို လက်တွေ့ကျကျ လမ်းညွှန်ခြင်း ဖြစ်သည်။ ယင်းမှာ တိကျသော အလုပ်ကို လုပ်ဆောင်ခြင်း၏ သရုပ်သကန်တစ်ခု မဟုတ်သည့်အပြင် ဆောင်ပုဒ်များ ကြွေးကြော်ခြင်းနှင့် လူတို့ကို ဩဇာပေးခြင်းတို့သည် ခေါင်းဆောင်များနှင့် အမှုဆောင်များ၏ တာဝန်ဝတ္တရားများ မဟုတ်ပေ။ ဒေသခံအသင်းတော် ခေါင်းဆောင်များ သို့မဟုတ် ကြီးကြပ်သူများက အလုပ်ကို တာဝန်ယူနိုင်ပြီး အလုပ်သည် လမ်းကြောင်းမှန်ပေါ်သို့ ရောက်ရှိသွားကာ အခြေခံအားဖြင့် ကြီးမားသော ပြဿနာများ မရှိတော့သည့်အခါမှသာ ခေါင်းဆောင် သို့မဟုတ် အမှုဆောင်က ထွက်သွား၍ရသည်။” (နှုတ်ကပတ်တော်၊ အတွဲ (၅)၊ ခေါင်းဆောင်များနှင့် အမှုဆောင်များ၏ တာဝန်များ၊ ခေါင်းဆောင်များနှင့် အမှုဆောင်များ၏ တာဝန်များ (၁၀)) “လူတို့ တွေ့ကြုံရသော အခက်အခဲများစွာကို ဖြေရှင်းရန် သင်သည် သန့်ရှင်းသော ဝိညာဉ်တော်၏ အမှုနှင့်ဆိုင်သည့် အင်အားများကို ပထမဦးစွာ နားလည်ရမည်၊ သင်သည် မတူညီသောလူများအပေါ် သန့်ရှင်းသော ဝိညာဉ်တော်က အလုပ်ကို မည်သို့ဆောင်ရွက်သည်ကို နားလည်ရမည်၊ လူတို့ ရင်ဆိုင်ရသည့် အခက်အခဲများနှင့် ၎င်းတို့၏ အားနည်းချက်များကို နားလည်မှု ရှိရမည်ဖြစ်ပြီး ပြဿနာ၏ အဓိကအကြောင်းရင်းများကို သွေဖည်ခြင်း သို့မဟုတ် အမှားများတစ်ခုတစ်လေ ပြုလုပ်ခြင်းမရှိဘဲ ရိပ်မိနိုင်ရမည်ဖြစ်သည်။ ဤကဲ့သို့သော လူမျိုးသည်သာ ဘုရားသခင်ကို အစေခံရာတွင် ညှိနှိုင်း ဆောင်ရွက်ရန် အရည်အချင်းရှိပေသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အသုံးခံရန် သင့်တော်သော သိုးထိန်းတစ်ဦး၌ ပိုင်ဆိုင်ထားသင့်သည့်အရာ) ဘုရားနှုတ်ကပတ်တော်တွေကို ဖတ်ပြီးတဲ့နောက်မှာ၊ အစွမ်းအစညံ့တဲ့သူတွေက လမ်းပြမှုနဲ့ အကူအညီ ပိုလိုအပ်ပြီး၊ တစ်ပြေးညီ နည်းလမ်းကို သုံးလို့မရဘူးဆိုတာ ကျွန်မ နားလည်လိုက်တယ်။ အဲဒါက ကလေးအများကြီးရှိတဲ့ မိခင်တစ်ယောက်နဲ့ တူတယ်၊ ကလေးတစ်ယောက်က အားနည်းပြီး ဖျားနာတတ်တယ် ဆိုပါစို့။ အဲဒီကလေး ကျန်းကျန်းမာမာ ကြီးပြင်းလာနိုင်ဖို့ မိခင်က တခြားကလေးတွေထက် သူ့ကို ပိုဂရုစိုက်ပေးရမှာပေါ့။ ဒါပေမဲ့ တာဝန်မဲ့တဲ့ မိခင်က၊ သူ့ကလေး အားနည်းတာကို မြင်တဲ့အခါ၊ ဂရုမစိုက်တဲ့အပြင် ကျေနပ်လောက်အောင် မသန်မာဘူးဆိုပြီး ကလေးကို အပြစ်တင်တယ်။ အဲဒီလိုဆို ကလေးက ဘယ်လိုလုပ် ကျန်းကျန်းမာမာ ကြီးပြင်းလာနိုင်မှာလဲ။ ဘုရားသခင်က လူတွေကို မနိုင်ဝန် မထမ်းခိုင်းပါဘူး။ လူတွေအတွက် သူ့ရဲ့ တောင်းဆိုချက်တွေက သူတို့ရဲ့ ပင်ကိုယ် အစွမ်းအစအပေါ် အခြေခံပါတယ်။ ကျွန်မလဲ ညီအစ်ကိုမောင်နှမတွေကို ဘုရားနှုတ်ကပတ်တော်နဲ့အညီ ဆက်ဆံသင့်တယ်၊ သူတို့ကို လမ်းပြမှုနဲ့ အကူအညီ ပိုပေးရင်းနဲ့ပေါ့။ အဲဒီနောက်မှာ၊ ကျွန်မရဲ့ ညီအစ်မတွေ အလုပ်မှာ အခက်အခဲတွေ ကြုံရတာကို မြင်တဲ့အခါ၊ သူတို့ရဲ့ ပြဿနာတွေ၊ အခက်အခဲတွေအကြောင်း ပြောပြတာကို စိတ်ရှည်လက်ရှည် နားထောင်ပြီးတော့၊ သူတို့ရဲ့ ပြဿနာတွေကို အဓိကထားပြီး သူတို့ကို ကူညီဖို့ မိတ်သဟာယပြုခဲ့တယ်။ ဒီလို လက်တွေ့လုပ်ဆောင်လိုက်တော့၊ ညီအစ်မတွေက အရင်ကလို ကျွန်မရဲ့ ဘောင်ခတ်တာကို မခံရတော့ဘူး။ သူတို့တာဝန်တွေမှာ ရှင်းရှင်းလင်းလင်း မမြင်ရတဲ့ ကိစ္စတွေ ကြုံရတဲ့အခါ၊ ကျွန်မကို တက်တက်ကြွကြွ မေးမြန်းလာကြတယ်။ အဲဒီအခါ ဖြေရှင်းဖို့အတွက် ကျွန်မတို့အတူတူ သမ္မာတရားကို ရှာဖွေကြတယ်၊ ပြီးတော့ ကျွန်မတို့အလုပ်ရဲ့ ရလဒ်တွေလဲ တိုးတက်လာတယ်။

ဒီအတွေ့အကြုံကနေတဆင့်၊ ဖောက်ပြန်ပျက်စီးတဲ့ စိတ်သဘောထားအရ လူတွေကို ဆက်ဆံတာက သူတို့ကို ဘောင်ခတ်တာနဲ့ ထိခိုက်နာကျင်တာပဲ ဖြစ်စေပြီး အလုပ်ကို ထိခိုက်စေတယ်ဆိုတာ ကျွန်မ ရှင်းရှင်းလင်းလင်း မြင်ခဲ့ရတယ်။ သမ္မာတရား စည်းမျဉ်းတွေ၊ ဘုရားနှုတ်ကပတ်တော်နဲ့အညီ ညီအစ်ကိုမောင်နှမတွေကို ဆက်ဆံပြီး ကိုယ့်တာဝန်ကိုယ် ကောင်းကောင်းမွန်မွန် ဖြည့်ဆည်းတာက အလုပ်အတွက် အကျိုးရှိတဲ့အပြင် တခြားလူတွေကိုလဲ တည်ဆောက်ပေးရာ ရောက်တယ်။