ကျောက်ကျီ၊ ဟေဘေးစီရင်စု

ကျွန်တော့်အမည်မှာ ကျောက်ကျီ ဖြစ်ပြီး၊ ယခုနှစ်တွင် ကျွန်တော် အသက် ၅၂ နှစ်ရပြီဖြစ်သည်။ ကျွန်တော် အနန္တတန်ခိုးရှင် ဘုရားသခင်၏ နောက်လိုက်တစ်ယောက် ဖြစ်ခဲ့သည်မှာ ၁၄နှစ်ကြာခဲ့ပါပြီ။ ကျွန်တော်၏ ယုံကြည်မှု မရရှိမီ စီးပွားရေး ကျွန်တော် လုပ်ကိုင်ခဲ့ပါသည်။ လူများကို ဖျော်ဖြေရင်း၊ လက်ဆောင်များပေးရင်း နှင့် ရင်းနှီးစွာ ပေါင်းသင်းရင်း ကျွန်တော် မကြာခဏ အလုပ်ရှုပ်ခဲ့သည်။ ကာရာအိုကေဆိုင်များ နှင့် လောင်းကစားရုံများကဲ့သို့ ဖျော်ဖြေရေးကျင်းပရာနေရာများကို ကျွန်တော် မကြာခဏ ဝင်ထွက်ခဲ့သည်။ ဤအကြောင်းနှင့် ပတ်သက်ပြီး ကျွန်တော်၏ဇနီးက ကျွန်တော်နှင့် အမြဲ စကားများခဲ့ပြီး ၊ နောက်ဆုံးတွင် ကျွန်တော့်ကို ကွာရှင်းရန် နှင့် အိမ်မှထွက်သွားရန် ခြိမ်းခြောက်ခြင်းဖြင့် အဆုံးသတ်ရလေသည်။ ထိုအချိန်က ဤနွံထဲတွင် ကျွန်တော် လုံးလုံးလျားလျား ပိတ်မိနေခဲ့ပြီး၊ မိမိကိုယ်ကို ရုန်းမထွက်နိုင်ခဲ့ပါ၊ ပြီးလျှင် မိမိ၏မိသားစုကို ကောင်းကောင်းစောင့်ရှောက်ရန် ကျွန်တော် အကောင်းဆုံး ကြိုးစားခဲ့သော်လည်း၊ ကျွန်တော် မလုပ်နိုင်ခဲ့ပါ။ ဘဝသည် အမှန်တကယ် စိတ်မချမ်းမြေ့စရာကောင်းသည်ဟု ကျွန်တော်ခံစားခဲ့ရသည်။ ကျွန်တော် ခြေကုန်လက်ပန်း ကျခဲ့ပါသည်။ ၁၉၉၉ ခုနှစ် ဇွန်လတွင် အနန္တတန်ခိုးရှင်ဘုရားသခင်၏ ကယ်တင်ခြင်းကျေးဇူးတော်က ကျွန်တော်တို့ထံ ကျရောက်လာခဲ့ပြီး ဤလောကထဲမှ အမှောင်နှင့် လူသား၏ ဖောက်ပြန်ပျက်စီးခြင်းတို့သည် စာတန်က ကျွန်တော်တို့ကို ထိခိုက်နစ်နာစေခြင်းနှင့် ကစားခြင်းတို့ကြောင့် လုံးလုံးလျားလျားဖြစ်ကြောင်း ဘုရားသခင်၏ နှုတ်ကပတ်တော်များကို ဖတ်ရှုခြင်းနှင့် ညီအစ်ကိုမောင်နှမများနှင့် မိတ်သဟာယပြုခြင်းတို့မှတစ်ဆင့် ကျွန်တော့်ဇနီး နားလည်သဘောပေါက်လာခဲ့သည်။ သူမက ကျွန်တော့် အခြေအနေနှင့်ပတ်သက်သည့် နားလည် သဘောပေါက်မို ဖော်ပြခဲ့ပြီး၊ ကျွန်တော်နှင့် မိတ်သဟာယပြုရာတွင် သူမ၏စိတ်နှလုံးကို ဖွင့်ပြခဲ့သည်။ ဘုရားသခင်၏ နှုတ်ကပတ်တော်များ လမ်းပြမှုမှတစ်ဆင့် ကျွန်မသည် ဒုစရိုက်တွင် မွေ့လျော်နေခဲ့ကြောင်း နှင့် ဘုရားသခင်သည် ယင်းကို ရွံရှာပြီး မုန်းတီးကြောင်းတို့ကိုလည်း ကျွန်တော်သိခဲ့သည်။ ဤထက်ပိုသည်မှာ ကျွန်တော်သည် လူသားတစ်ယောက်အနေနှင့် လုံးဝမပြုမူခဲ့ကြောင်းကို တွေ့မြင်ခဲ့ရသည်။ ကျွန်တော် နောင်တရပြီး အပြစ်ရှိသည်ဟု ခံစားခဲ့ရသည်၊ ထို့ကြောင့် လူသစ်တစ်ယောက်ဖြစ်လာရန် ဘုရားသခင်ရှေ့တော်တွင် စိတ်ပိုင်းဖြတ်ခဲ့သည်။ ထို့နောက်မှစကာ ကျွန်တော်နှင့် ကျွန်တော်၏ဇနီးတို့က နေ့စဉ်နေ့တိုင်း ဆုတောင်းပြီး ဘုရားသခင်၏ နှုတ်ကပတ်တော်များကို ဖတ်ရှုကြသည်၊ ပြီးလျှင် ညီအစ်ကိုမောင်နှမများနှင့် မိတ်သဟာယပြုခြင်းအတွက် မကြာခဏ စုဝေးကြသည်။ ကျွန်တော်တို့မသိလိုက်မီတွင်ပင်၊ ကျွန်တော်တို့ကြားမှ ပဋိပက္ခများနှင့် ကျွန်တော်တို့ ခံစားခဲ့ရသည့် စိတ်သောကများသည် မီးခိုးငွေ့ကဲ့သို့ ကွယ်ပျောက်သွားခဲ့ပြီး၊ ကျွန်တော်တို့၏ ဘဝများသည် ငြိမ်သက်ခြင်းနှင့် ဝမ်းမြောက်ခြင်းတို့ဖြင့် ပြည့်ဝလာခဲ့သည်။ အနန္တတန်ခိုးရှင်ဘုရားသခင်သည် ကျွန်တော်တို့ မိသားစုကို ပျက်စီးလုနီးနီး ဖြစ်နေချိန်တွင် ကယ်တင်ခဲ့ပြီး၊ ကျွန်တော်တို့ကို အသက်တာအသစ်များ လုံးလုံး ဆောင်ကြဉ်း ပေးခဲ့ကြောင်း ကျွန်တော် လေးလေးနက်နက် သတိပြုမိခဲ့ပါသည်။ အလွန်ကျေးဇူးတင် ရှိသည်ဟု ခံစားရခြင်းအပြင်၊ ဘုရားသခင်၏ ကျေးဇူးတော်ကို ပြန်လည်ပေးဆပ်ရန် ကျွန်တော်၏ ဖြစ်ခြင်းအလုံးစုံကို ဆက်ကပ်အပ်နှံဖို့အတွက်လည်း သိုသိုသိပ်သိပ် စိတ်ပိုင်းဖြတ်ခဲ့ပါသည်။ ထို့နောက် နောက်ဆုံးသောကာလတွင် ကျွန်တော်တို့ထံ ဘုရားသခင်ဆောင်ကြဉ်းပေးသည့်် ကယ်တင်ခြင်းကို ပိုမိုများပြားသောလူများ ရရှိနိုင်ဖို့အလို့ငှာ ကျွန်တော်၏ တာဝန်ကို ထမ်းဆောင်ရန်နှင့် ဧဝံဂေလိတရားဝေမျှရန် ခြေစုံပစ် စတင်ခဲ့သည်။ သို့သော် ဘုရားမဲ့သော တရုတ်ကွန်မြူနစ် ပါတီအစိုးရသည် ဘုရားသခင်ကို ကိုးကွယ်ရန် သို့မဟုတ် လမ်းကြောင်းအမှန်ကို လျှောက်ရန် လူများကို ခွင့်မပြုခဲ့သလို ဧဝံဂေလိတရား ဖြန့်ဝေရန်နှင့် ဘုရားသခင်ကို သက်သေခံရန်တို့ကိုလည်း ခွင့်မပြုခဲ့ပါ။ ဘုရားသခင်ကို ယုံကြည်ပြီး၊ ဧဝံဂေလိတရား ဟောကြားခြင်းကြောင့် ကျွန်တော်သည် တရုတ်ကွန်မြူနစ်ပါတီ အစိုးရ၏ ဖမ်းဆီးခြင်းနှင့် ညှဉ်းပန်းနှိပ်စက်ခံခဲ့ရသည်။

ယင်းမှာ ၂၀၀၂ ခုနှစ် နွေဦးရာသီ ရက်တစ်ရက်ဖြစ်သည်။ ညီအစ်ကိုတစ်ယောက်နှင့် ကျွန်မတို့က ကျေးရွာတစ်ခုတွင် ဧဝံဂေလိတရားဝေမျှစဉ် မလိုမုန်းထားသောလူတစ်ယောက်က ရဲကို တိုင်ချက်ဖွင့်ခဲ့လေသည်။ ရဲများ ချက်ခြင်းရောက်လာခဲ့ပြီး၊ အခြေအနေကို လုံးဝလေ့လာမစိစစ်ဘဲ၊ ကျွန်တော့်ကို လက်ထိပ်ခတ်ကာ၊ ရဲကားဆီသို့ တရွတ်တိုက်ခေါ်လာခဲ့သည်၊ ပြီးလျှင် ရဲစခန်းသို့ ပြန်လည်ခေါ်ဆောင်သွားခဲ့သည်။ စစ်ဆေးမေးမြန်းသည့် အခန်းထဲသို့ ကျွန်တော်တို့ ရောက်သည်နှင့် တပြိုင်နက် ကျွန်တော်တုံ့ပြန်ဖို့ အခွင့်တစ်ခုပင် မရသေးမီ၊ အရာရှိတစ်ယောက်က ကျွန်တော့် ရှေ့ကို အတင်းပြေးလာကာ၊ ကျွန်တော့် ကော်လံကို ဆွဲကိုင်ပြီး၊ အကြိမ်ရေ အနည်းငယ် ပြင်းထန်စွာ ပါးရိုက်ခဲ့သည်။ ကျွန်တော် ချက်ခြင်းမူးဝေလာပြီး စတင် ကြယ်မြင်လမြင် ဖြစ်လာခဲ့လေသည်၊ ပြီးလျှင် ဒယိမ်းဒယိုင်ဖြစ်ပြီး၊ ကြမ်းပြင်ပေါ်သို့ ဇောက်ထိုးမကျဘဲ မနေနိုင်ခဲ့ပါ။ ကျွန်တော် ပါးစပ်နှင့် နှာခေါင်းတို့မှ သွေးထွက်နေခဲ့ပြီး၊ ကျွန်တော်၏ မျက်နှာက နာကျင်မှုဖြင့် ပူလောငနေခဲ့သည်။ ဤအရာကို မြင်သည့်အခါတွင်၊ ဆိုးယုတ်သောရဲသည် ကျွန်တော့်ကို ရက်ရက်စက်စက် ကန်ကျောက်ပြီး၊ အံ့ကြိတ်ကာ ဒေါသူပုန်ထနေလေသည်။ “ဆန်ကုန်မြေလေး၊ ငါ့ကို လာဟန်မဆောင်နဲ့။ ထစမ်း” အခြားအရာရှိနှစ်ဦး အနားသို့ လာကာ လက်များမှ ကျွန်တော့်ကို ဆောင့်ဆွဲပြီး၊ အခြားတစ်ဖက်ကို တွန်းထုတ်သည်၊ ထို့နောက် သူတို့သုံးယောက်သား ကျွန်တော့်ကို စတင်ထိုးနှက်၊ ကန်ကျောက်ခဲ့ကြသည်။ ကျွန်တော်၏ ခန္ဓာကိုယ် အနှံ့ မခံမရပ်နိုင်သည့် နာကျင်မှုများ ခံစားခဲ့ရသည်၊ ကြမ်းပြင်ပေါ်သို့ ကျွန်တော်ကျသွားပြီး၊ ပြန်မထနိုင်ခဲ့ပါ။ သူတို့က ကျွန်တော့်ကို သတ်ဖြတ်တော့မည့် အကြည့်မျိုးဖြင့် ကြည့်ပြီး၊ ကျားတစ်ကောင်က သူ့သားကောင်ကို ကြည့်သကဲ့သို့ စိန်းစိန်းဝါးဝါးကြည့်ခဲ့ကြသည်။ သူတို့ထဲမှ တစ်ယောက်က ကျွန်တော့်ကို “မင်းနာမည် ဘယ်လိုခေါ်လဲ။ မင်းဘယ်ကလာလဲ။ အဲဒီလူရဲ့ အိမ်မှာ မင်းဘာလို့ ရှိနေခဲ့တာလဲ။ မင်းစကားမပြောရင်၊ မင်းငါ့အကြောင်း တကယ့်ကို သိစေရမယ်” ဟု ဟောက်ခဲ့သည်။ ဘုရားသခင် ရှေ့တော်မှောက်တွင် ဆက်လက်ငြိမ်သက်နိုင်ရန် ကျွန်တော့်နှလုံးသားကို ကွယ်ကာဖို့နှင့် သူတို့၏ခြိမ်းခြောက်မှုများအားဖြင့် မကြောက်လန့်စေဖို့ ကျွန်တော့်ကို ယုံကြည်မှုနှင့် သတ္တိတို့ ပေးပါရန် ကိုယ်တော့်ကို တောင်းလျှောက်ရင်း ဘုရားသခင်ကို ကျွန်တော် တိတ်ဆိတ်စွာ ဆုတောင်းခဲ့ပါသည်။ ကျွန်တော် စကားမပြောသည်ကို တွေ့သည့်အခါ၊ တကယ့်ကို ကြမ်းကြုတ်ရက်စက်ပုံရှိသည့် အရာရှိတစ်ယောက်က လျှပ်စစ်ကျင်တံကို ကောက်ယူပြီး၊ ကျွန်တော်၏မျက်နှာရှေ့တွင် တမင်သက်သက် တစ်ဖျောက်ဖျောက်မြည်အောင်လုပ်ရင်း ရှေ့နောက် ဝှေ့ယမ်းလေသည်။ သူက ကျွန်တော့်ကို ၎င်းဖြင့် ချိန်ပြီး၊ “မင်းစကားပြောမလား၊ မပြောဘူးလား။ မင်းမပြောရင်၊ ငါမင်းကိုသေတဲ့အထိ တို့မှာ” ဟု အန္တရာယ်ပြုမည့်ဟန်ဖြင့် ပြောခဲ့သည်။ ကျွန်တော်က ဤအရာအားဖြင့် အတော်အတန် ကြောက်ရွံ့ခဲ့ပြီး “အိုဘုရားသခင်။ ဒီ ဆိုးယုတ်တဲ့ အရာရှိတွေတစ်အုပ်အပါအဝင် အမှုအရာအားလုံး ကိုယ်တော့်လက်တော်ထဲမှာ ရှိပါတယ်။ သူတို့က ကျွန်တော့်ကို ဘယ်လိုပဲ ဆက်ဆံပါစေ၊ အဲဒါက ကိုယ်တော့်ခွင့်ပြုချက်နဲ့ပါ။ ကိုယ်တော့် စီစဉ်ညွှန်ကြားမှုတွေနဲ့ စီစဉ်မှုတွေကို ကျွန်တော်ကျိုးနွံနာခံလိုပါတယ်။ ကျွန်တော့် ဝိညာဉ်အသက်တာက နုနယ်တဲ့အပြင်၊ ကျွန်တော် အားနည်းပြီး၊ ကြောက်နေလို့ပါ။ ကျွန်တော် ယုဒတစ်ယောက် ဖြစ်မလာစေဖို့ ကျေးဇူးပြုပြီး ကျွန်တော့်ကို ယုံကြည်မှုနဲ့ ခွန်အားတို့ ပေးသနားပြီး ကျွန်တော့်ကို ကွယ်ကာတော်မူပါ။ စာတန်ရှေ့မှာ ကျွန်တော့် သက်သေခံချက်ကို ကျွန်တော်ဆုံးရှုံးတာမျိုး ဖြစ်ခွင့်မပေးပါနဲ့” ဟု ဘုရားသခင်ထံ အလျင်အမြန် ဆုတောင်းခဲ့ပါသည်။ ဆုတောင်း ပြီးနောက်၊ ဘုရားသခင်၏ နှုတ်ကပတ်တော်များ ကျမ်းပိုဒ်တစ်ပိုဒ်က ကျွန်တော်၏ စိတ်ထဲတွင် ပေါ်လာခဲ့သည်။ “ငါတို့သည် ငါတို့အတွင်း၌ ခရစ်တော်၏ ရှင်ပြန်ထမြောက်သော အသက်ကို ပိုင်ဆိုင်၏။ ငါတို့သည် ဘုရားသခင်၏ မျက်မှောက်၌ သိသိသာသာ ယုံကြည်ခြင်း ကင်းမဲ့ကြပေသည်- ဘုရားသခင်သည် ငါတို့၏အတွင်း၌ စစ်မှန်သော ယုံကြည်ခြင်းကို ထည့်ပေးမည်သာပင်။ ဘုရားသခင်၏ နှုတ်ကပတ်တော်သည် ဧကန်အမှန် ချိုမြိန်သည်တကား။ ဘုရားသခင်၏ နှုတ်ကပတ်တော်သည် ထိရောက်သောဆေးဝါး ဖြစ်ပေသည်တကား။ ယင်းက နတ်ဆိုးများ နှင့် စာတန်ကို အရှက်ရစေသည်တကား။ ဘုရားသခင်၏ နှုတ်ကပတ်တော်ကို သဘောပေါက်ခြင်းက ငါတို့ကို ထောက်ပံ့မှုပေး၏။ သူ၏ နှုတ်ကပတ်တော်သည် ငါတို့၏ စိတ်နှလုံးများကို ကယ်တင်ဖို့ အလျင်အမြန် လုပ်ဆောင်လေသည်။ ယင်းက အရာအားလုံးကို ပပျောက်စေပြီး၊ အရာအားလုံးကို အေးချမ်းစေ၏။ ယုံကြည်ခြင်းသည် သစ်လုံးတစ်လုံးတည်း တံတားကဲ့သို့ ဖြစ်သည်- အသက်ကို လက်မှိုင်ချလျက် ဖက်တွယ်ထားသူတို့သည် ယင်းတံတားကို ဖြတ်ကူးရာတွင် အခက်ကြုံလိမ့်မည် ဖြစ်သော်လည်း၊ မိမိတို့ကိုယ်ကိုယ် စွန့်လွှတ်အနစ်နာခံရန် အသင့်ရှိသော သူတို့သည် ခြေမြဲကာ စိုးရိမ်မှုကင်းလျက် ဖြတ်ကူးနိုင်ကြ၏။ အကယ်၍ လူသားသည် တွန့်ဆုတ်ကာ ကြောက်ရွံ့သော အတွေးများ သိုထားပါက၊ ယင်းမှာ ဘုရားသခင်ထဲသို့ ဝင်ရောက်ဖို့ ယုံကြည်ခြင်း တံတားအား ငါတို့ ဖြတ်ကူးမည်စိုးလျက်၊ စာတန်သည် ၎င်းတို့ကို လှည့်စားပြီး ဖြစ်သောကြောင့် ဖြစ်သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၆)) “အဲဒါမှန်တယ်” ဟု ကျွန်တော်တွေးမိသည်။ “စာတန်ရဲ့ လှည့်ကွက်အားဖြင့် လှည်စားတာခံရလို့ ငါအရမ်းကြောက်နေတယ်။ အဲဒီအရာရှိတွေရဲ့ ကြမ်းကြုတ်ရက်စက်တဲ့ အသွင်အပြင်ရှိပေမဲ့လည်း၊ အရာအားလုံးက ဘုရားသခင်ရဲ့ လက်တော်ထဲမှာရှိပြီး၊ ဘုရားသခင်က ငါ့ရဲ့ စစ်ကူဖြစ်တယ်။ စာတန်ကို အောင်မြင်ဖို့ ငါ့ယုံကြည်မှုကို မှီခိုပြီး၊ ဘုရားသခင်ရဲ့ နှုတ်ကပတ်တော်တွေကို အားကိုးရမယ်။” ထို့ကြောင့် ကျွန်တော် ပါးစပ်ပိတ်ထားခဲ့သည်၊ ပြီးလျှင် ကျွန်တော် စကားတစ်လုံးမျှမပြောသည်ကို သူမြင်သည့်အချိန်တွင်၊ ထိုအရာရှိသည် သူ၏ လက်ကိုင်တုတ်ကိုလွှဲလိုက်ပြီး၊ ကျွန်တော့်ကို ဆတ်ခနဲထိုးလိုက်သည်။ ပြင်းထန်သည့် နာကျင်မှုအတွက် ပြင်ဆင်ခြင်းဖြင့် ကျွန်တော့်မျက်လုံးများကို တင်းတင်းပိတ်ထားပြီး၊ အံကြိတ်ထားသော်လည်း၊ အံ့သြစရာကောင်းစွာပင် ထိုလက်ကိုင်တုတ်က ကျွန်တော့်ကို အဖန်ဖန် ထိုးခဲ့သည့်တိုင်၊ ကျွန်တော် တစ်စုံတစ်ခုမျှ မခံစားခဲ့ရပါ။ ယင်းမှာ အမှန်တကယ် ထူးဆန်းသည်ဟု သူတို့အားလုံးက တွေးခဲ့ကြပြီး၊ “ဒီနေ့ ဒီဟာက ဘာလို့ အလုပ်မလုပ်ရတာလဲ။ ဒါပျက်နေတာဖြစ်ရမယ်၊ နောက်တစ်ခုစမ်းကြည့်စမ်း” ဟု တွေဝေကာ ပြောခဲ့သည်။ ကျွန်တော့်ကို လျှပ်စစ်ဓာတ်တို့ဖို့ သူတို့နောက်တစ်ခု ယူလာခဲ့သော်လည်း၊ ထိုတစ်ခုကလည်း အလုပ်မဖြစ်ပါ။ ကျွန်တော့် နှလုံးသားထဲတွင် ကျွန်တော် အဆက်မပြတ် ကြွေးကြော်နေခဲ့သည်၊ “အိုဘုရားသခင်၊ ကျေးဇူးတင်ပါတယ်။ ကိုယ်တော်က ကျွန်တော့် ဆုတောင်းခြင်းကို နားညောင်းပြီး ကျွန်တော့်ကို တိတ်တဆိတ် ကွယ်ကာနေပါတယ်။ ကိုယ်တော်က အရမ်းချစ်ဖွယ်ဖြစ်ပြီး၊ အရမ်းသစ္စာရှိတယ်။ ဘုရားသခင်၊ အနာဂတ်မှာ ဘယ်လိုရက်စက်တဲ့ နှိပ်စက်မှုမျိုးကိုမဆို ကျွန်တော် ရင်ဆိုင်ပါစေ၊ ကျွန်တော့် စိတ်နှလုံးအကြွင်းမဲ့နဲ့ ကိုယ်တော့်ကို ယုံကြည်ဖို့ ဆန္ဒရှိနေပါတယ်။ ကျွန်တော့် သက်သေခံချက်မှာ ခိုင်မာစွာရပ်တည်ဖို့ သံန္နိဌာန်ချထားပါတယ်” သူတို့၏လျှပ်စစ်ကျင်စက်က ကျွန်တော့်အပေါ် ဘာမျှ အကျိုးမထူးသည်ကို မြင်သည့်အခါ၊ ယင်းအတိုင်းထားခဲ့ဖို့ သူတို့ မလိုလားသေးသောကြောင့် ကျွန်တော့်ကို လက်ထိပ်နှင့် သံခြေကျင်းခတ်ပြီး၊ ရဲကားဆီသို့ တရွတ်တိုက်ဆွဲခေါ်သွားခဲ့သည်၊ ပြီးလျှင် ကျွန်တော့်ကို ကျေးရွာနှင့် ဝေးသော နှစ်ထပ်တိုက်တစ်ခုဆီသို့ မောင်းခေါ်သွားခဲ့သည်။

ကျွန်တော်တို့ အထဲသို့ ဝင်သွားသည့်အချိန်တွင်၊ အရာရှိတစ်ဦးက အေးတိအေးစက် ပြုံးပြီး “ဒီမှာ ဘာမှမရှိတာ မင်းတွေ့တာပဲ၊ ပြီးတော့ ဘယ်သူကမှ ဒီနေရာကို ရှာတွေ့မှာ မဟုတ်ဘူး။ အခု မင်းက ဒီကို ရောက်ပြီဆိုတော့၊ မင်းစကားမပြောသေးဘူးဆိုရင်၊ အဲဒါက မင်းအတွက် အဆုံးသတ်ဖြစ်မှာပဲ။ မင်း ဒီမှာ မြေမြုပ်ခံရပြီး ဘယ်သူကမှ သိမှာမဟုတ်ဘူး။ အဲဒါကို ကိုယ့်ဘာသာ သေချာစဉ်းစားကြည့်၊ မင်းသာ ပါးနပ်တယ်ဆိုရင်၊ ငါတို့သိလိုတာကို မင်းပြောပြမှာပဲ” ဟု အန္တရာယ်ပြုမည့်ဟန်ဖြင့် ပြောခဲ့သည်။ ယင်းကို ကျွန်တော် ကြားသည့်အချိန်တွင် ကျွန်တော့် လည်ချောင်းထဲဆို့နင့်သွားခဲ့သည်။ ကျွန်တော့်ရှေ့တွင် ရပ်နေကြသည့် ဤသွေးဆာနေပုံပေါက်ပြီး မြေအောက်ဂိုဏ်းလူဆိုးများကဲ့သို့ ပြုမူနေကြသည့် “ပြည်သူ့ရဲများ” က ကျွန်တော့်ကို မည်သည့်အရာပြုမည်ကို ကျွန်တော် အမှန်တကယ် စိတ်မကူးနိုင်ခဲ့ပါ။ လာမည့် ရက်စက်သော နှိပ်စက်မှုများကို ကျွန်တော် ခံနိုင်ရန် ဆင်းရဲဒုက္ခကို ကြံ့ကြံ့ခိုင်ဖို့ ဆုံးဖြတ်ချက် နှင့် ခွန်အားတို့ပေးပါရန် ကိုယ်တော့်ကို တောင်းလျှောက်ရင်း၊ ကျွန်တော်၏ နှလုံးသားထဲတွင် ဘုရားသခင်ကို အလျင်အမြန် အော်ခေါ်ခဲ့သည်။ စကားပြောဖို့ကို ငြင်းဆန်ဆဲဖြစ်ကြောင်း တွေ့သည့်အခါ၊ အရာရှိများထဲမှနှစ်ဦးက ကျွန်တော့်ကို ရက်ရက်စက်စက် တိုက်ခိုက်ကာ၊ ကျွန်တော့် အဝတ်အစားများအားလုံး ဆွဲဖြဲကြသည်၊ ထို့နောက် ကျွန်တော့်ကို တစ်ဖက်တွင် မတ်တပ်ရပ်ခိုင်းခဲ့ကြသည်။ သူတို့ထဲမှတစ်ယောက်က ကျွန်တော့်နှာခေါင်းကို လက်ညှိုးထိုးပြီး၊ သရော်တော်တော်ဖြင့် “အဲဒါကို ကြည့်ပါဦး၊ မင်းက ဘာအရှက်မှ မရှိတာဘဲ” ဟု ပြောခဲ့သည်။ နောက်တစ်ယောက်က အစာရှာဖွေနေသည့် ဆာလောင်နေသော ခွေးတစ်ကောင်ကဲ့သို့ ကျွန်တော့်အင်္ကျီ အတွင်းအပြင်ကို စတင်ရှာဖွေပါတော့သည်။ သူက ယွမ်၃၀သာ ရှာတွေ့ခြင်းဖြင့် အဆုံးသတ်သွားသည်၊ ထို့နောက် သူ့ခေါင်းကို ခါကာ၊ “မင်းက မိမစစ်ဖမစစ် ငမွဲပဲ” ဟု ဒေါနှင့်မောနှင့်ဆဲရေးရင်း၊ ထိုပိုက်ဆံများကို သူ့အိတ်ကပ်ထဲသို့ ထိုးထည့်ခဲ့သည်။ ဤအရာက ကျွန်တော့်ကို ဒေါသထွက်ပြီး၊ မုန်းတီးရစ်စေခဲ့သည်။ ကျွန်တော်က “ဒီရဲတွေက ဘယ်လိုများ ‘ပြည်သူကို အမှုထမ်း’ နေကြတာလဲ။ သူတို့က ပြည်သူတွေကို နိုင်လိုမင်းထက်ပြုမူပြီး၊ သာမာန်ပြည်သူတွေကို အကျိုးမြတ်ထုတ်နေတဲ့ လူဆိုးတစ်သိုက် သက်သက်ပဲ။ ဒါကို ဒီနေ့ ငါ့မျက်စိနဲ့ တပ်အပ်မမြင်ခဲ့ရင် ၊ ငါဟာ တရုတ်ကွန်မြူနစ် ပါတီရဲ့ မုသားတွေနဲ့ ဘယ်လောက် ကြာအောင် ဆက်အရူးလုပ်ခံ နေရမယ်ဆိုတာကို မသိတော့ပါဘူး။” ထို့နောက် ထိုနေ့ကျွန်တော် အဖမ်းခံရခြင်း နောက်ကွယ်တွင် ဘုရားသခင်၏ ကောင်းမြတ်သော အလိုတော်ရှိကြောင်း ကျွန်တော် နားလည်သဘောပေါက်လာခဲ့သည်။ ဘုရားသခင်သည် ကျွန်တော့်ကို တမင်တကာ ဒုက္ခခံစားစေခြင်း မဟုတ်ခဲ့ပါ၊ ထိုအစား ကျွန်တော့်အနေဖြင့် တရုတ်ကွန်မြူနစ်ပါတီ၏ ဆိုးယုတ်သောစရိုက်ကို ရှင်းရှင်းလင်းလင်း တွေ့မြင်စေရန် ဤအရာ ဖြစ်ပျက်နေခဲ့ခြင်း ဖြစ်လေသည်။ နောက်ထပ် ၁၀ မိနစ်ခန့်တွင်၊ နောက်ထပ် အရာရှိတစ်ယောက်က ကောက်ကျစ်စဉ်းလဲစွာပြုံးလျက် လျှပ်စစ်ဝါယာ ကြိုးနှစ်ခုဖြင့် ဝင်ရောက်လာပြီး၊ သူက ကျွန်တော့်ကို အန္တရာယ်ပြုမည့်ဟန်ပန်ဖြင့် လက်ဟန်ခြေဟန် ပြကာ “ကြောက်သွားလား။ တစ်နှစ်က စကားမပြောချင်ခဲ့တဲ့ တခြားရာဇဝတ်သား တစ်ယောက်ရှိ ခဲ့တယ်၊ ဒါပေမဲ့ လျှပ်စစ်ဓါတ်နဲ့တို့တာကို သူကြာကြာမခံနိုင်ဘူး။ သူ အကုန်လုံးပြောပြတာနဲ့ အဆုံးသတ်ခဲ့တာပဲ။ နင့်ပါးစပ်ဟလာအောင် ငါတို့လုပ်နိုင်မယ်ဆိုတာ ငါသေချာတယ်” ဟု ပြောခဲ့သည်။ သူတို့ ကျွန်တော့်ကို လျှပ်စစ်ဓာတ်တို့တော့မည်ကို မြင်သည့်အခါ၊ ကျွန်တော် အမုန်းတရားနှင့် အကြောက်တရား နှစ်ခုလုံးခံစားခဲ့ရသည်။ ထိုကဲ့သို့ နှိပ်စက်မှုမျိုးသာ ဆက်ပြီးကြာရှည်နေပါက၊ ကျွန်တော် သေမည်မှာ အသေအချာပင် ဖြစ်သည်။ ကျွန်တော်က ဘုရားသခင်ကို လျင်မြန်စွာ ဆုတောင်းခဲ့သည်။ “ဘုရားသခင်၊ ဒီဆိုးယုတ်တဲ့ အရာရှိတွေက အရမ်းရက်စက်တယ်။ ကျွန်တော်တော့ ဒါကို ကျော်နိုင်မယ် မထင်ဘူး။ ကျွန်တော့် ဇာတိပကတိရဲ့ အားနည်းချက်ကြောင့် ကျွန်တော် ယုဒတစ်ယောက် ဖြစ်လာပြီး၊ ကိုယ်တော့်ကို သစ္စာမဖောက်အောင် ကျွန်တော့်ကို ကျေးဇူးပြုပြီး ကွယ်ကာပြီး ခွန်အားပေးတော်မူပါ။” ကျွန်တော် ဆုတောင်းပြီးနောက်တွင် ဤအသင်းတော် ဓမ္မသီချင်းကို တွေးမိစေဖို့ ဘုရားသခင်က ကျွန်တော့်ကို ဉာဏ်အလင်းပေးခဲ့ပါသည်။ “ကျွန်ုပ်၏ ဦးခေါင်းကွဲကြေပြီး သွေးများ စီးဆင်းနိုင်၏၊ သို့သော် ဘုရားသခင်၏ လူတို့၏ သတ္တိသွေးများ မဆုံးရှုံးနိုင်ပေ။ ဘုရားသခင်၏ တိုက်တွန်းမှုက စိတ်နှလုံးတွင် တည်ထားသည်၊ နတ်ဆိုးစာတန်ကို အရှက်ရစေရန် ကျွန်ုပ် ဆုံးဖြတ်သည်။ နာကျင်ခြင်းနှင့် ဆင်းရဲဒုက္ခများကို ဘုရားသခင် ကြိုတင်ပြဠာန်းထားပေ၊ ကိုယ်တော့်ကို သစ္စာရှိဖို့ အရှက်ရခြင်းကို ကျွန်ုပ် သည်းခံမည်။ ဘုရားသခင်ကို တစ်ဖန် ဘယ်သောအခါမျှ ကျွန်ုပ် မျက်ရည်ကျစေမည် မဟုတ် သို့မဟုတ် စိုးရိမ်စေမည် မဟုတ်ပေ။” (သိုးသငယ်နောက်လိုက်ပြီး သီချင်းအသစ်များကိုသီဆိုပါ စာအုပ်ထဲရှိ “ဘုရားသခင်၏ ဘုန်းကြီးသော နေ့ကို ကျွန်ုပ် မြင်တွေ့လိုသည်”) “အဲဒါမှန်တယ်” ဟု ကျွန်တော် တွေးမိသည်။ “နိုင်ငံတော်ရဲ့ လူတွေက နိုင်ငံတော်က လူတစ်ယောက်ရဲ့ သမာဓိနဲ့ ခံနိုင်ရည်မျိုး ရှိကိုရှိရမယ်။ ဘဝအတွက် လောဘကြီးပြီး၊ သေခြင်းတရားကို ကြောက်တာက သူရဲဘောနည်းတာပဲ။ ဘုရားသခင်ကို ငါသစ္စာဖောက်ပြီး၊ ကယ်တင်ခြင်းရဖို့ ငါ့အခွင့်အရေးကို ပျက်စီးအောင် ညှဉ်းပန်းခြင်းကနေတဆင့် သူလုပ်နိုင်တယ်လို့ စာတန်က မိုက်မိုက်မဲမဲ တွေးတယ်။ သူ့အကြံအစည်ကို အောင်မြင်စေဖို့ ငါလုံးဝခွင့်မပြုနိုင်ဘူး၊ ပြီးတော့ ငါ့ကြောင့် ဘုရားသခင်ရဲ့ နာမတော်ကို အရှက်ရစေဖို့ လုံးဝ ခွင့်မပြုနိုင်ဘူး။” ဤအရာအားလုံးကို ကျွန်တော် သေချာစဉ်းစားပြီးနောက်တွင်၊ ကျွန်တော့်အထဲတွင် ခွန်အားဟုန်းခနဲ ထွက်လာခဲ့သည်ကို ခံစားရပြီး၊ ညှဉ်းဆဲမှုကို ရင်ဆိုင်ဖို့ သတ္တိကို ကျွန်တော် ရှာတွေ့ခဲ့သည်။

ဤအရာအားလုံးကို ကျွန်တော် တွေးတောနေစဉ်တွင်ပင်၊ အရာရှိနှစ်ဦးက ကျွန်တော့်ထံ အပြေးအလွှားလာပြီး၊ ကျွန်တော့်ကို ကြမ်းပြင်ပေါ်တွင် ဝမ်းလျားမှောက်လျက် ဖိထားခဲ့ပြီးနောက် ကျွန်တော့်အပေါ် ထိုင်ခုံတစ်ခုကို ဖိထားခဲ့သည်။ အရာရှိနှစ်ဦး ထပ်ရောက်လာခဲ့ပြီး၊ ကျွန်တော့် ဘေးတစ်ဖက်တစ်ချက်စီတွင် နေကာ၊ ကျွန်တော့် လက်တစ်ဖက်စီကို ခြေထောက်ဖြင့် ဖိထားခဲ့သည်။ ကျွန်တော့်လက်များ ကြမ်းပြင်တွင် သံမှိုစွဲထားသကဲ့သို့ ခံစားခဲ့ရသည်၊ ကျွန်တော် လုံးဝ မလှုပ်နိုင်ခဲ့ပါ။ လျှပ်စစ်ကြိုးဖြင့် ထိုရဲက လျှပ်စစ်စီးသည့်ဗူးထဲမှ လျှပ်စစ်ကြိုးနှစ်ခုကို ယူကာ၊ တစ်ခုကို ကျွန်တော့် ဘယ်လက်ချောင်းတစ်ခုတွင် ချည်ပြီး၊ တစ်ခုကို ကျွန်တော့် ညာလက်တွင် ချည်ခဲ့သည်၊ ထို့နောက် လျှပ်စစ်စီးသည့်ပုံးမှ လျှပ်စစ်ဓာတ်အားကို ဖွင့်လိုက်လေသည်။ လျှပ်စစ်စီးကြောင်းသည် ကျွန်တော့် ခန္ဓာကိုယ်ထဲတွင် အာရုံကြောတစ်ခုချင်းစီကိုချက်ခြင်း ဖြတ်ကျော်သွားသည်။ ယင်းမှာ ထုံကျင်မှုနှင့် နာကျင်မှုနှစ်ခုလုံးဖြစ်ပြီး၊ ကျွန်တော်သည် ခန္ဓာကိုယ်တစ်ခုလုံး အကြောမဆွဲဘဲ မနေနိုင်တော့ပါ။ ယင်းမှာ နာကျင်လှလွန်း၍ ကျွန်တော် အော်ဟစ်ခဲ့သည်။ ဆိုးယုတ်သောရဲသည် ရော်ဘာဖိနပ်ကို ကျွန်တော့်ပါးစပ်ထဲ ထိုးထည့်ခဲ့သည်။ ထိုနည်းဖြင့် သူတို့က ကျွန်တော့်ကို ထပ်ခါထပ်ခါ ဓာတ်လိုက်စေခဲ့ကြသည်၊ ကြီးစွာသော နာကျင်မှုကို ဖြစ်စေသည်မှာ ကျွန်တော်သည် ချွေးများဖြင့် လုံးလုံးရွှဲစိုနေလေသည်၊ မကြာမီတွင် ထိုချွေးများသည် ကျွန်တော့် အဝတ်အစားအားလုံး အနှံ့အပြား စိုရွှဲကုန်ခဲ့သည်မှာ ကျွန်တော် ရေများဖြင့် ရွှဲရွှဲစိုနေသကဲ့သို့ ဖြစ်သည်။ လျှပ်စစ်ဓာတ်ကျင်စက်ကို စီမံခန့်ခွဲရင်း၊ ထိုအရာရှိက “မင်းစကားပြောမှာလား၊ မပြောဘူးလား။ မင်းမပြောခဲ့ရင် မင်းကို မသေမချင်း ငါ ဓာတ်လိုက်အောင် လုပ်မယ်။ ဒါက မင်းစကားမပြောတဲ့အတွက် မင်းရတဲ့ဟာပဲ” ဟု ဆက်ပြီး အော်ပြောခဲ့သည်။ ကျွန်တော် အံ့ကြိတ်ထားပြီး၊ မိမိကိုယ်ကိုယ် အသံတစ်စက်မျှ မထွက်မိစေဘဲ ထိုနာကျင်မှုကို သည်းခံခဲ့သည်။ သူတို့က ဤအခြင်းအရာကို မြင်သည့်အခါတွင်၊ လျှပ်စစ်ဓာတ်ကို ပိုကြာအောင် စထိန်းထားခဲ့သည်။ နောက်ဆုံးတွင် ကျွန်တော်သည် နောက်ထပ် သည်းမခံနိုင်တော့ဟု ခံစားရပြီး၊ သေသာ သေလိုက်ချင်ခဲ့သည်။ ကျွန်တော့် ခန္ဓာကိုယ်ထဲမှ နောက်ဆုံးခွန်အားရှိသမျှကို သုံးပြီး ကျွန်တော့်အပေါ်တွင် ထိုင်ခုံဖြင့် ဖိအားသည့် အရာရှိနှစ်ဦးကို တွန်းထုတ်လိုက်သည်၊ ထို့နောက် ကျွန်တော့် ဦးခေါင်းကို ကြမ်းပြင်နှင့် ပြင်းထန်စွာ ဆောင့်ပစ်လိုက်သည်။ သို့သော်လည်း ထူးခြားစွာပင် ထိုမာကျောသော ကွန်ကရစ်ကြမ်းပြင်သည် ဝါဂွမ်းကဲ့သို့ ရုတ်တရက် ခံစားခဲ့ရပြီး၊ ၎င်းကို ကျွန်တော့်ဦးခေါင်းနှင့် မည်မျှ ကြမ်းတမ်းစွာ တိုက်ပါစေ၊ မည်သည့် ထိရောက်မှုမျှမရှိခဲ့ပါ။ ထို့နောက်တွင်ပင် ယခင်က မိတ်သဟာယပြုခြင်းတွင် မကြာခဏပါလေ့ရှိခဲ့သည့် ဘုရားသခင်၏ နှုတ်ကပတ်တော်များမှ စာကြောင်းတစ်ချို့က စိတ်ထဲသိသာထင်ရှားစွာ ရုတ်တရက် ရောက်လာခဲ့သည်။ “အချို့သူများ၏ ဒုက္ခဝေဒနာခံစားရခြင်းမှာ လွန်ကဲပြင်းထန်လာပြီး ၎င်းတို့၏အတွေးများသည် သေခြင်းတရားဘက်သို့ လှည့်သွားကြသည်။ ဤသည်မှာ ဘုရားသခင်အတွက် စစ်မှန်သော ချစ်ခြင်းမဟုတ်ပေ။ ထိုသို့သော လူများသည် သူရဲဘောကြောင်သူများ ဖြစ်ကြပြီး ၎င်းတို့၌ ဇွဲလုံ့လဝီရိယ မရှိကြပေ၊ ၎င်းတို့သည် အားနည်းပြီး အစွမ်းမရှိသူများပင် ဖြစ်ကြတော့သည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ နာကျင်သည့်စမ်းသပ်မှုများကို တွေ့ကြုံခြင်းဖြင့်သာ ဘုရားသခင်၏နှစ်လိုဖွယ်ကောင်းခြင်းကို သိနိုင်မည်) “သင်တို့၏ ဇာတိပကတိ ဒုက္ခဆင်းရဲရောက်သော်လည်း သင်၌ ဘုရားသခင်၏ နှုတ်ကပတ်တော်နှင့် ဘုရားသခင်၏ ကောင်းချီးမင်္ဂလာ ရှိသည်။ အကယ်၍ သင်သေလိုလျှင်လည်း မသေနိုင်ရာ- သင်သေပါက ဘုရားသခင်ကိုမသိခြင်းနှင့် သမ္မာတရားအားမရရှိခြင်းကို သင်ကြိတ်မှိတ်၍ လက်ခံနိုင်သလော။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “လူ့သဘာဝကို သိရှိရန် နည်းလမ်း”) ကျွန်တော်သည် ဆင်းရဲဒုက္ခကို မခံစားနိုင်သောကြောင့် သေလိုခြင်းဖြစ်ကြောင်း နှင့် ဘုရားသခင်ကို ကျွန်တော် သက်သေခံမည်မဟုတ်ဘဲ ဘုရားသခင်ကို အရှက်ရစေကာ သစ္စာဖောက်ခြင်းသာ ဖြစ်ကြောင်းတို့ကို ဘုရားသခင်၏ နှုတ်ကပတ်တော်များက ကျွန်တော့်အတွက် နူးညံ့သော သတိပေးချက်တစ်ခုအနေဖြင့် အသုံးတော်ခံခဲ့သည်။ ယင်းမှာ သတ္တိမရှိခြင်း ဖြစ်ပေလိမ့်မည်၊ ယင်းမှာ သူရဲဘောနည်းခြင်း ဖြစ်ပေလိမ့်မည်၊ ပြီးလျှင် ယင်းက စာတန်ကို လုံးဝ အရှက်ရစေမည် မဟုတ်ပါ။ ထိုကြမ်းပြင် ရုတ်တရက် နူးညံ့သွားခြင်းမှာ ဤဆိုးရွားသည့် အခြေအနေအလယ်တွင် ကျွန်တော် သက်သေရပ်တည်နိုင်ပြီး၊ ထိုသို့ဖြင့် စာတန်ကို အရှက်ရစေကာ၊ ဘုရားသခင်ကို ဘုန်းကျက်သရေ ဆောင်းကြဉ်းပေးရန် မျှော်လင့်ချက်ဖြင့် ဘုရားသခင်က ကျွန်တော့်ကို တိတ်တဆိတ် တားဆီးနေခဲ့ခြင်း၊ ကွယ်ကာနေခဲ့ခြင်း နှင့် ကျွန်တော့်ကို သေခွင့်မပေးခဲ့ခြင်းတို့ဖြစ်ကြောင်း ဘုရားသခင်၏ ဉာဏ်အလင်းပေးခြင်းက ကျွန်တော့်ကို နားလည်သဘောပေါက်စေခဲ့သည်။ ဘုရားသခင်၏ ချစ်ခြင်းမေတ္တာနှင့် ကွယ်ကာမှုတို့ကို တွေ့မြင်ရသည်မှာ ကျွန်တော့်အတွက် အလွန့်အလွန် စိတ်ဓာတ်တက်ကြွစေပြီး ကျွန်တော် တိတ်တဆိတ် စိတ်ပိုင်းဖြတ်ချက်ချခဲ့သည်။ ဤဆိုးယုတ်သောရဲများ ကျွန်တော့်ကို မည်မျှနှိပ်စက်ပါစေ၊ ကျွန်တော့် ရှေ့ဆက်သွားပြီး၊ ကျွန်တော့် နောက်ဆုံးထွက်သက်တွင်ပင်၊ ၎င်းကို ကျွန်တော် ကောင်းမွန်စွာ အသုံးချသွားပြီး၊ ဘုရားသခင်အတွက် သက်သေရပ်တည်မည် ဖြစ်ကာ ကျွန်တော် သူ့ကို လုံးဝစိတ်ပျက်စေမည် မဟုတ်ပါ။ ကျွန်တော့် ခန္ဓာကိုယ်တစ်ခုလုံးသည် ခွန်အားများအုံကြွလာခဲ့ပြီး၊ ကျွန်တော် အံ့ကိုကြိတ်ကာ၊ ပို၍များပြားသော လူမဆန်သည့် လျှပ်စစ်ဓာတ်ဖြင့် နှိပ်စက်မှုကို လက်ခံရန် ပြင်ဆင်ခဲ့ပါသည်။

ကျွန်တော် အရှုံးမပေးသည်ကို မြင်သည့်အခါ၊ ထိုအရာရှိများက ဒေါသထွက်လွန်း၍ သူတို့ သွေးကြောများထောင်နေကြလေသည်။ သူတို့မျက်လုံးများတွင် ရက်စက်သော အကြည့်များရှိသည်၊ သူတို့က အံ့များကြိတ်နေကြပြီး လက်သီးများ ဆုပ်ထားကြသည်၊ သူတို့က ကျွန်တော့်ကို ဝါးမြိုဖို့ တရွရွဖြစ်နေ ပုံပေါက်သည်။ သူတို့ထဲမှတစ်ဦးက ကမ်းကုန်အောင် ဒေါသထွက်လျက် ကျွန်တော့် အနီးကို ဝုန်းဒိုင်းကြဲ ရောက်ရှိလာကာ၊ ကျွန်တော့် ဆံပင်လက်တစ်ဆုပ်စာကို ဆွဲလိုက်ပြီး၊ ကျွန်တော့်ဦးခေါင်းကို အတင်းအကျပ် ဆောင့်ဆွဲခဲ့သည်၊ ကျွန်တော့်မျက်နှာနားသို့ တိုးကာ၊ ရက်စက်ကြမ်းကြုတ် သရဲမရဲစီးသော အကြည့်ဖြင့် အော်ဟစ်ပြောဆိုလေသည်၊ “မင်း ဆန်ကုန်မြေလေး၊ မင်း စကားပြောမှာလား၊ မပြောဘူးလား။ မင်းမပြောရင် မင်းရဲ့အရေခွံခွာပစ်ပြီး၊ မင်းကို မသေမရှင်ထားမယ်။ အဲဒါ မင်းစကားမပြောတဲ့အတွက် ရမဲ့ဟာပဲ” ထို့နောက် သူက ကျွန်တော့်ဆံပင်များကို လွှတ်လိုက်ပြီး၊ နောက်ထပ် ဆိုးယုတ်သောရဲကို ကသုတ်ကရက် အော်ဟစ်ခဲ့သည်၊ “သူ့ကို သေလောက်တဲ့ လျှပ်စစ်ဗို့အား ပေးစမ်း” ဤပို၍ကြီးမားသော ဗို့အားကို တောင့်မခံနိုင်ဘဲ ကျွန်တော် သတိမေ့သွားခဲ့သည်။ ကျွန်တော် သတိပြန်လည်လာစေဖို့ သူတို့က ကျွန်တော့်ကို ရေအေးဖြင့် ပက်ကြသည်၊ ထို့နောက် သူတို့၏နှိပ်စက်မှုကို ဆက်ကြပြန်သည်။ နောက်ထပ် အနည်းငယ် ဓာတ်လိုက်ခြင်းပြီးနောက် ကျွန်တော့် ခန္ဓာကိုယ်တစ်ခုလုံးအနှံ့ မခံမရပ်နိုင်ဖြစ်သော နာကျင်မှုကို ခံစားရလေသည်။ ၎င်းကို ကျွန်တော် နောက်ထပ် အမှန်တကယ် သည်းမခံနိုင်တော့ဘဲ၊ အချိန်မရွေး ကျွန်တော် သေသွားနိုင်သည်ဟု ခံစားခဲ့ရသည်။ ဤသေရေးရှင်ရေးကာလတွင် ဘုရားသခင်က ဤအသင်းတော်ဓမ္မသီချင်းကို တွေးမိစေရန် ကျွန်တော့်ကို လမ်းပြခဲ့ပါသည်။ “အခက်အခဲတွင်၊ ဘုရား နှုတ်ကပတ်တော်များ၏ ဦးဆောင်မှုက ကျွန်ုပ်တို့ကို စိတ်နှလုံးကို ခွန်အားပေးသည်။ ယေရှုနောက်လိုက်ပြီး၊ နောက်သို့ ကျွန်ုပ် ပြန်မလှည့်သင့်ပေ။ နိုင်ငံတော်၏ လေ့ကျင့်ပေးခြင်းကို လက်ခံဖို့ရန်မှာ ရှားပါးလှပြီး၊ စုံလင်ခံရဖို့ ဤအခွင့်အရေးကို ကျွန်ုပ် လုံးဝ လက်မလွှတ်နိုင်။ ဘုရားသခင်ကို တာဝန်မကျေဖြစ်ရင်း၊ ကျွန်ုပ်ဘဝ၏ ကျန်ရှိသည့် တစ်သက်လုံးကျွန်ုပ် ဝမ်းနည်းရလိမ့်မည်။ ဘုရားသခင်ကို ကျွန်ုပ် ကျောခိုင်းလျှင်၊ ကျွန်ုပ် ရာဇဝင်ရိုင်းလိမ့်မည်။...ကျွန်ုပ်၏ စိတ်နှလုံးက သမ္မာတရားကိုသာ တန်ဖိုးထားပြီး၊ ဘုရားသခင်ကို ဆက်ကပ်အပ်နှံသည်၊ ဘုရားသခင်ကို ပူဆွေးမှုဖြစ်အောင် ကျွန်ုပ် မည်သည့်အခါမျှ ထပ်ပြီး မပုန်ကန်ပါ။ ဘုရားသခင်ကို ချစ်ပြီး ဘုရားသခင်ထံ ဆက်လက် လုံးဝ ဆက်ကပ်အပ်နှံဖို့ ကျွန်ုပ် ဆုံးဖြတ်ကာ၊ မည်သည့်အရာ နှင့် မည်သူမျှ ကျွန်ုပ်ကို မတားဆီးနိုင်။ ပြီးလျှင် စမ်းသပ်မှုများနှင့် ဆင်းရဲဒုက္ခတို့ မည်မျှ ခက်ခဲပါစေ၊ ဘုရားသခင်ကို ဘုန်းထင်ရှားစေဖို့ ကျွန်ုပ် သက်သေခံရပ်တည်မည်။ သမ္မာတရားနှင့် ဘုရားသခင်၏ စုံလင်ခြင်းကို ရရှိခြင်းအားဖြင့် အဓိပ္ပါယ်ရှိသော အသက်တာတစ်ခုကို ကျွန်ုပ် အသက်ရှင်မည်။” (သိုးသငယ်နောက်လိုက်ပြီး သီချင်းအသစ်များကိုသီဆိုပါ စာအုပ်ထဲရှိ “ဘုရားသခင်ထံ လုံးဝ ဆက်လက်အပ်နှံရန် ဆုံးဖြတ်ထားသည်”) ကျွန်တော် ဘုရားသခင်၏ ဤနှုတ်ကပတ်တော်များကိုလည်း တွေးမိခဲ့သည်။ “သင်သည် ထွက်သက်ဝင်သက်တစ်ခု ရှိသေးသရွေ့၊ ဘုရားသခင်သည် သင့်အား သေစေလိမ့်မည် မဟုတ်ပေ။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၆)) ဘုရားသခင်၏ နှုတ်ကပတ်တော်များအားဖြင့် လမ်းပြခံရကာ၊ ကျွန်တော့်၏အားနည်းသည့် နှလုံးသားသည် နောက်တစ်ကြိမ် ခွန်အားပြည့်လာခဲ့သည်။ “မင်းတို့ နတ်ဆိုးတစ်သိုက်က ဘယ်လိုရက်စက်ကြမ်းကြုတ်ပါစေ၊ မင်းတို့ ငါ့သွေးသားကိုပဲ နှိပ်စက်ပြီး၊ ငါ့ဘဝကို သေတာထက်ဆိုးအောင် လုပ်လို့ရမယ်၊ ဒါပေမဲ့ ဘုရားသခင်နောက်ကို လိုက်ချင်တဲ့ ငါ့ဆန္ဒကိုတော့ မင်းတို့ ဘယ်တော့မှ ပြောင်းလို့မရဘူး။ မင်းတို့ ငါ့ကို ပိုနှိပ်စက်လေ၊ မင်းတို့ရဲ့ ဆိုးယုတ်တဲ့ စရိုက်တွေကို ငါပိုပြီး ရှင်းရှင်းလင်းလင်းမြင်လေပဲ၊ ပြီးတော့ ဘုရားသခင် နောက်ကိုလိုက်ဖို့ ငါ့ရဲ့ စိတ်ပိုင်းဖြတ်ချက်မှာ ပိုခိုင်မြဲလေပဲ။ ငါ့ကို ညီအစ်ကိုမောင်နှမ တစ်ယောက် တစ်လေလောက် ဖော်ကောင်လုပ်ခိုင်းလို့ရမယ်လို့ မင်းတို့ စိတ်တောင်မကူးနဲ့။ ဒီနေ့ ငါသေရမယ်ဆိုရင်တောင်၊ ဒီတစ်ခါတော့ ငါဘုရားသခင်ကို စိတ်ကျေနပ်စေမယ်” ဟု မိမိဘာသာ တွေးခဲ့သည်။ ကျွန်တော့် အသက်ကို စတေးဖို့ ဆန္ဒရှိလာသည်နှင့် တပြိုင်နက်၊ ကျွန်တော်သည် နောက်တစ်ကြိမ် ဘုရားသခင်၏အနန္တတန်ခိုးအပြင်၊ ကျွန်တော့်အတွက် သူ၏ သနားကရုဏာနှင့် စောင့်ရှောက်မှုတို့ကိုပါ မျက်မြင်ကိုယ်တွေ့ကြုံခဲ့ပါသည်။ သူတို့က ကျွန်တော့်ကို အကြိမ်ပေါင်း အနည်းငယ် ထပ်မံ လျှပ်စစ်ဓာတ်တို့ခဲ့ကြပြီး၊ ကျွန်တော်က အမှန်တကယ်ကို ပြင်းပြင်းထန်ထန် တစ်ကိုယ်လုံး အကြောဆွဲနေခဲ့သည်ကို သူတို့မြင်သည့်အချိန်တွင်၊ ကျွန်တော် သေသွားပြီး၊ သူတို့တာဝန်ယူရမည်ကို ကြောက်သောကြောင့် သူတို့ ရှေ့မဆက်ဝံ့တော့ပါ၊ သို့သော်လည်း သူတို့ လက်မလျှော့သေးပါ။ သူတို့က ကျွန်တော့်ကို မြေကြီးပေါ်မှ တစ်ဖန်ဆွဲမပြီး၊ ကျွန်တော့် လက်များကို နောက်ကျောသို့ အတင်းအကျပ်လိမ်ပြီး၊ ကြိုးတစ်ချောင်းဖြင့် တင်းကျပ်စွာ ချည်နှောင်ခဲ့သည်။ ၎င်းက အလွန် တင်းကျပ်လှသည်မှာ ကျွန်တော့် လက်ကောက်ဝတ်များ အလွန်နာကျင်ပြီး၊ မကြာမီပင် ကျွန်တော့်လက်များ အေးစက်ပြီး၊ ယောင်ယမ်းလာခဲ့သည်။ ၎င်းတို့ အလွန်ထုံကျင်သွားသည်မှာ ၎င်းတို့တွင် ကျွန်တော်မည်သည့်အရာမျှ မခံစားရတော့ပါ။ ထိုဆိုးယုတ်သော ရဲများက ကျွန်တော်ကို ထပ်ပြီးနှိပ်စက်ရန် ကြိုးဆွဲချလိုသော်လည်း၊ သူတို့ ထိုကြိုးကို ဆွဲတင်လိုက်တိုင်း၊ ၎င်းက လျော့သွားလေသည်။ ဤအရာကို သူတို့ အကြိမ်ပေါင်းများစွာ ကြိုးစားလုပ်ဆောင်ခဲ့သော်လည်း၊ အကြိမ်တစ်ခုချင်းစီတွင် အရေးနိမ့်ခြင်းဖြင့်သာ အဆုံးသတ်လေသည်။ ဇဝေဇဝါဖြစ်လျက်၊ သူတို့က “ဒီနေ့ဘာတွေဖြစ်နေတာလဲ။ အဲဒီကြိုးက ကိုင်တွယ်ရတာ အရမ်းခက်တယ်။ အဲဒါ တကယ့်ကို ထူးဆန်းတယ်။ အဲဒါ ဒီကောင့်ကို မသတ်သင့်ဘူးဆိုတဲ့ လက္ခဏာ ဖြစ်နိုင်တယ်” ဟု ပြောခဲ့သည်။ သူတို့ထဲမှ တစ်ယောက်က “မေ့လိုက်တော့။ ဒီနေ့တော့ တော်ပြီ။ မိုးချုပ်နေပြီ” ဟု ပြောလိုက်သည်။ ကျွန်တော့်ကို ကြိုးဖြင့်ဆွဲထားလိုသည့် ထိုကြောက်စရာကောင်းသည့် ရဲက လက်လျှော့ဖို့ကလွဲပြီး ရွေးချယ်စရာ မရှိတော့သော်လည်း၊ သူက ကျွန်တော့်ကို လက်ညိုးထိုးကာ၊ အန္တရာယ်ပြုမည့်ဟန်ဖြင့် “မင်းဒီနေ့ တော်တော် ကံကောင်းတယ်၊ ဒါပေမဲ့ မနက်ဖြန် ငါ မင်းအတွက် ဘာတွေပြင်ဆင်ထားတယ်ဆိုတာကိုသာ စောင့်ကြည့်” ဟု ပြောခဲ့သည်။ ဘုရားသခင်က ကျွန်တော့်ကို နောက်တစ်ကြိမ် ကွယ်ကာခဲ့ကြောင်း ကျွန်တော် သိလိုက်ပါသည်၊ ပြီးလျှင် ကျွန်တော့်နှလုံးသားထဲမှ သူ့ကို ထပ်ခါထပ်ခါ ကျေးဇူးတင်မိသည်။ ထို့နောက်တွင်ပင် ဘုရားသခင်ထံမှ ဤနှုတ်ကပတ်တော်များ ကျွန်တော့်ထံ ပေါ်ပေါက်လာခဲ့သည်။ “စကြာဝဠာနှင့် အရာခပ်သိမ်းတို့သည် ငါ၏လက်များအထဲတွင် ရှိကြသည်။ ငါသည် မြွက်တော်မူလျှင် ထိုအတိုင်းဖြစ်သည်။ ငါချမှတ်ဆုံးဖြတ်လျှင်၊ ထိုအတိုင်းဖြစ်လိမ့်မည်။ စာတန်သည် ငါ၏ခြေအောက်တွင်ရှိသည်- ၎င်းသည် အနက်ဆုံးသောတွင်း အထဲ၌ရှိသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၁၅)) “ငါသည် သင်၏ အထောက်အပံ့ ဖြစ်ပြီး၊ သင်သည် ယောက်ျားသား၏ စိတ်ဓါတ်ရှိရမည်။ စာတန်သည် ၎င်း၏ နောက်ဆုံးသော မချိတင်ကဲ သေဆုံးခြင်း၌ ရုတ်တရက် ဒေါသတကြီး တိုက်ခိုက်နေသော်လည်း၊ ၎င်းသည် ငါ၏ တရားစီရင်ခြင်းမှ လွတ်မြောက်နိုင်လိမ့်မည် မဟုတ်သေးပေ။ စာတန်သည် ငါ၏ ခြေအောက်တွင် ရှိနေပြီး၊ သင်တို့၏ ခြေအောက်တွင်လည်း အနင်းခံရလျက်ရှိသည်- ဤသည်မှာ အမှန်တရားဖြစ်၏။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အစအဦး၌ ခရစ်တော်၏ မိန့်မြွက်ချက်များ၊ အခန်း (၁၇)) ထို့နေ့တွင် ကျွန်တော့်ကို ဘုရားသခင်၏ အံ့ချီးဖွယ် ကွယ်ကာမှုအား ကျွန်တော်ကိုယ်တိုင် မျက်မြင်ကိုယ်တွေ့ ကြုံခဲ့ရသည်၊ ပြီးလျှင် ဘုရားသခင်သည် အမှန်တကယ် အနန္တတန်ခိုးရှင်ဖြစ်ကြောင်း နှင့် သူသည် အရာအားလုံးကို အုပ်စိုးတော်မူကြောင်း၊ ကောင်းကင်နှင့် မြေကြီးတွင် ရှိသမျှအရာအားလုံး တကယ့်ကို ဘုရားသခင်၏ လက်တော်တွင်ရှိကြောင်းနှင့် သက်ရှိဖြစ်စေ၊ သက်မဲ့ဖြစ်စေ အရာအားလုံးကိုဘုရားသခင်က လုံးလုံး အုပ်စိုးကြောင်းတို့ကို ကျွန်တော် ကိုယ်တိုင် တွေ့ကြုံခံစားခဲ့ရပါသည်။ ထိုဆိုးယုတ်သော ရဲအရာရှိများသည် ဘုရားသခင်၏ စီစဉ်ညွှန်ကြားမှုများ လက်အောက်တွင် အထူးသဖြင့် ရှိကြောင်းနှင့် သူတို့က အပြင်ပန်းတွင် ရက်စက်ကြမ်းကြုတ်ပုံရသော်လည်း၊ ဘုရားသခင်၏ ခွင့်ပြုချက်မပါဘဲ သူတို့ ကျွန်တော့်ခေါင်းပေါ်မှ ဆံတစ်မျှင်ကိုပင် မထိနိုင်ကြောင်းတို့ကို ကျွန်တော် တွေ့ခဲ့ရသည်။ ဘုရားသခင်ကို ကျွန်တော် ဆက်လက်ယုံကြည်ကာ၊ သူ့ကို စိတ်ကျေနပ်စေဖို့ ကျွန်တော့်အသက်ကို စွန့်လွှတ်ဖို့ ဆန္ဒရှိသည့်အပြင်၊ သူ့အတွက် သက်သေရပ်တည်လိုသည့် ဆန္ဒရှိသမျှကာလပတ်လုံး ထိုနတ်ဆိုးများသည် ဧကန်မုချ အရှက်ရပြီး၊ ရှုံးနိမ့်မည် ဖြစ်သည်။ ဤသည်မှာ ဘုရားသခင်၏ အနန္တတန်ခိုးနှင့် သူ၏လုံးဝဉဿုံ အောင်ပွဲခံခြင်းတို့၏ ပြယုဂ် ဖြစ်လေသည်။

ထိုအရာရှိများသည် ကျွန်တော့်ကို ရဲစခန်းသို့ ပြန်မခေါ်သွားမီ ထိုနှစ်ထပ်အဆောက်အအုံငယ်တွင် ၂ နာရီမှ ၆ နာရီအထိ မရပ်မနား နှိပ်စက်ခဲ့ကြသည်။ ကျွန်တော်တို့ ပြန်ရောက်သည့်အချိန်တွင် သူတို့က ကျွန်တော့်ကို သံလှောင်အိမ်တစ်ခုအတွင်း ထည့်ထားပြီး၊ စားသောက်ရန် မည်သည့်အရာမျှ မပေးခဲ့ကြပါ။ အေးပြီး၊ ဆာလောင်ကာ၊ ရုပ်ပိုင်းဆိုင်ရာ အားနည်း၍ လှောင်အိမ်၏ သံတိုင်များပေါ်မှီပြီး၊ ထိုနေ့က ဖြစ်ပျက်ခဲ့သမျှအားလုံးကို ကျွန်တော် ပြန်တွေးခဲ့သည်။ ဘုရားသခင်၏ နှုတ်ကပတ်တော်အချို့က ကျွန်တော့်စိတ်ထဲတွင် ပေါ်ပေါက်လာခဲ့သည်။ “ပြစ်မှုထဲက ဤကြံရာပါ^၁ အုပ်စု။ ကမ္ဘာလောကသည် ပြောင်းလဲလွယ်ပြီး မတည်တံ့သော နေရာဖြစ်လာကာ၊ လူသား၏ နှလုံးသားသည် ကြောက်လန့်မှုနှင့် စိုးရိမ်ပူပန်မှုတို့ဖြင့် ပြည့်သည်အထိ ၎င်းတို့သည် အမှုအရာများကို အလွန် မွှေနှောက်ကြလျက်၊ ၎င်းတို့သည် အပျော်အပါး၌ မွေ့လျော်ရန်နှင့် ရုတ်ရုတ်သဲသဲဖြစ်စေဖို့၊ သေမျိုးဖြစ်သော နယ်ပယ်ထဲသို့ ဆင်းသက်လာကာ၊ ၎င်းတို့သည် လူသားကို အလွန်ကစားခဲ့ကြသည်မှာ လူသား၏ သွင်ပြင်သည် အလွန့်အလွန် အကျည်းတန်လျက် စိုက်ကွင်း၏ လူမဆန်သော သားရဲတစ်ကောင်၏ သွင်ပြင်ဖြစ်လာပြီးဖြစ်ကာ၊ ယင်းမှ မူလက သန့်ရှင်းသောလူ၏ နောက်ဆုံး အရိပ်အယောင်သည် ပျောက်ဆုံးသွားပြီးဖြစ်သည်။ ထို့အပြင်၊ ၎င်းတို့သည် ကမ္ဘာမြေပေါ်တွင် အချုပ်အခြာအာဏာကို သိမ်းပိုက်ရန်ပင် ဆန္ဒရှိကြ၏။ ၎င်းတို့သည် ဘုရားသခင်၏ အမှုကို အလွန် ပိတ်ဆို့ကြသည်မှာ အရှေ့သို့ နည်းနည်းမျှ တိုးရန် အနိုင်နိုင်ဖြစ်ပြီး၊ ၎င်းတို့သည် လူသားကို ကြေးနီနှင့် သံမဏိတံတိုင်းများတမျှ တင်းကျပ်စွာ ပိတ်ထား၏။ များစွာသော ဆိုးရွားသည့် အပြစ်များကို ကျူးလွန်ပြီး များစွာသော ကပ်ဘေးဒုက္ခများ ဖြစ်စေပြီးနောက်၊ ၎င်းတို့သည် ပြစ်တင်ဆုံးမခြင်းမှလွဲ၍ အခြားတစ်စုံတစ်ရာကို မျှော်လင့်နေကြသေး သလော။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ အမှုတော်နှင့် ဝင်ရောက်ခြင်း (၇)) ဘုရားသခင်၏ နှုတ်ကပတ်တော်များကို ထိုအချက်အလက်များဖြင့် နှိုင်းယှဉ်သည့်အခါ၊ ယခင်က ကျွန်တော် အထင်ကြီးလေးစားခဲ့သည် ရဲအရာရှိများသည် အမှန်တကယ် အလွန့်အလွန် ရက်စက်ကြမ်းကြုတ်ပြီး၊ ကြောက်စရာ ကောင်းကြောင်းကို နောက်ဆုံးတွင် ကျွန်တော် သိသာထင်ရှားစွာ မြင်ခဲ့ပါသည်။ သူတို့က အလွန်ဂုဏ်သိက္ခာရှိပုံပေါက်ပြီး၊ တာဝန်နှင့် သမာဓိတို့အကြောင်း အမြဲတမ်း ခရားရေလွှတ်တတွတ်တွတ် ပြောနေခဲ့ကာ၊ “ပြည်သူ့ဝန်ထမ်းများ” အဖြစ်စေတနာထားသည့် စရိုက်တစ်ခု ဟန်လုပ်ထားသော်လည်း၊ အမှန်တွင် သူတို့သည် လူမဆန်သော၊ စာနာစိတ်မရှိသော လူ့တိရစ္ဆာန်တစ်သိုက်၊ လူတစ်ယောက်ကို မျက်နှာတစ်ချက်မပျက်ဘဲ သတ်ဖြတ်နိုင်သည့် နတ်ဆိုးတစ်သိုက် ဖြစ်လေသည်။ ယုံကြည်မှုရှိခြင်းနှင့် ပတ်သက်ပြီး ကျွန်တော် မည်သည့်အရာ မှားယွင်းသနည်း။ ကျွန်တော် ဘုရားသခင်ကို ကိုးကွယ်ခြင်းနှင့် ပတ်သက်ပြီး မည်သည့်အရာက မှားယွင်းသနည်း။ ထိုဆိုးယုတ်သော အရာရှိများက အသက်အန္တရာယ်ပေးမည့် ရန်သူတစ်ယောက် အဖြစ် မြင်ကြကာ၊ သေမင်းနှုတ်ခမ်းဝသို့ တွန်းပို့ရင်း ရက်စက်သော လူမဆန်မှုဖြင့် ဆက်ဆံခဲ့ကြသည်။ လူသားတစ်ယောက်သည် ထိုသို့သော အမှုအရာများကို အဘယ်သို့ စွမ်းဆောင်နိုင်သနည်း။ ၎င်းတို့မှာ နတ်ဆိုးတစ်ပါးသာ လုပ်နိုင်သည့် အမှုအရာများ မဟုတ်ပါလား။ ထိုရဲအရာရှိများသည် အပြင်ပန်းတွင် လူသားအသွင်ရှိသော်လည်း၊ အတွင်းတွင်မူ သူတို့၏ အနှစ်သာရသည် သမ္မာတရားနှင့် ဘုရားသခင်တို့ကို မုန်းတီးပြီး၊ ဘုရားသခင်၏ ပင်ကို ရန်သူများဖြစ်ကြသည့် နတ်ဆိုးများနှင့် ဝိညာဉ်ဆိုးများသာ ဖြစ်ကြောင်းကို ထို့နောက်တွင်မှသာ ကျွန်တော် နားလည် သဘောပေါက်ခဲ့သည်။ သူတို့က လူများကို ထိခိုက်ရန် နှင့် ဝါးမြိုရန် အထူးသဖြင့် သက်ရှိတစ္ဆေများအနေဖြင့် ဤလောကကို လာခဲ့ကြခြင်းဖြစ်သည်။ ကျွန်တော် သူတို့ကို မုန်းတီးခြင်းဖြင့် ပြည့်နှက်နေပြီး၊ တစ်ချိန်တည်းမှာပင် ဘုရားသခင်၏ ကြင်နာခြင်းနှင့် ချစ်ဖွယ်ကောင်းခြင်းတို့နှင့် ပတ်သက်သည့် နက်ရှိုင်းသည့် အသိစိတ်ဝင်လာခဲ့သည်။ ကျွန်တော်သည် နတ်ဆိုးတို့၏ သားရဲတွင်းထဲသို့ ကျရောက်ခဲ့ရသော်လည်း၊ ဘုရားသခင်သည် ကျွန်တော်နှင့် အမြဲအတူရှိကာ၊ ကျွန်တော့်ကို သူ့နှုတ်ကပတ်တော်များဖြင့် တိတ်တဆိတ် ကွယ်ကာစောင့်ရှောက် နေခဲ့သည်၊ အားပေးနေခဲ့ပြီး နှစ်သိမ့်နေခဲ့သည်၊ ပြီးလျှင် ထိုနတ်ဆိုးများ ကျွန်တော့်ကို မကြာခဏ နှိပ်စက်ခြင်းနှင့် ဖျက်ဆီးခြင်းတို့ကို အောင်မြင်လွန်မြောက်နိုင်ဖို့အလို့ငှာ ကျွန်တော့်ကို ယုံကြည်မှုနှင့် ခွန်အားတို့ပေးနေခဲ့သည်။ ကျွန်တော် သေလုမျောပါး ဖြစ်သည့်အချိန် အနည်းငယ်တွင်ပင်၊ ဘုရားသခင်က ကျွန်တော်၏သေခြင်းမှ ကျွန်တော့်ကို ကယ်တင်ရင်း သူ၏ကြီးမြတ်သည့်တန်ခိုးဖြင့် ကျွန်တော့်ကို ကွယ်ကာခဲ့သည်။ ကျွန်တော့်အတွက် ဘုရားသခင်၏ ချစ်ခြင်းမေတ္တာသည် အမှန်တကယ် အလွန်စစ်မှန်လှသည်။ ကျွန်တော် မိမိကိုယ်ကို တိတ်ဆိတ်စွာ တိုက်တွန်းအားပေးခဲ့သည်။ အနာဂတ်တွင် ဤနတ်ဆိုးများက ကျွန်တော့်ကို မည်သို့နှိပ်စက်ပါစေ၊ ကျွန်တော်က ဘုရားသခင်ကို သက်သေရပ်တည်ပြီး၊ စိတ်ကျေနပ်စေပါမည်။ ဘုရားသခင့်နှုတ်ကပတ်တော်များ၏ ဉာဏ်အလင်းပေးခြင်းနှင့် လမ်းပြမှုတို့က ကျွန်တော့်နှလုံးသားကို နှစ်သိမ့်ခဲ့ပြီး၊ ကျွန်တော့် ရုပ်ပိုင်းဆိုင်ရာ နာကျင်မှုသည် သိသိသာသာ သက်သာခဲ့သည်။ ဘုရားသခင်၏ ချစ်ခြင်းမေတ္တာ အဖော်ပြုပေးခြင်းဖြင့် ကျွန်တော်သည် ရှည်လျားသည့်ညကို အောင်မြင်ကျော်ဖြတ် နိုင်ခဲ့သည်။

နောက်တစ်နေ့တွင် အရာရှိများထဲမှနှစ်ယောက်က သူတို့ နံနက်စာစားပြီးနောက် လှောင်အိမ် ရှေ့တွင် မတ်တပ်လာရပ်ကြသည်။ သူတို့ထဲမှ တစ်ယောက်က စဉ်းလဲစွာ ပြုံးလိုက်ပြီး “မင်းဘယ်လိုနေလဲ။ မနေ့ညက သေချာစဉ်းစားဖို့ အချိန်ရခဲ့လား။ ဒါဆို မင်းစကားပြောမလား၊ မပြောဘူးလား” ဟု ပြောခဲ့သည်။ ကျွန်တော်က သူ့ကို ဖျတ်ခနဲကြည့်လိုက်သော်လည်း မည်သည့်အဖြေမှမပေးပါ။ ဤအရာကို မြင်သည့်အခါတွင် သူက သူ၏ လေသံကို ချက်ခြင်းပြောင်းလိုက်သည်၊ သူက လှောင်အိမ်ထဲသို့ လက်ထည့်ပြီး၊ ကျွန်တော့်ဆံပင် လက်တစ်ဆုပ်ကို ဆွဲကိုင်ကာ၊ ကျွန်တော့်ကို သူ့မျက်နှာရှေ့တည့်တည့်တွင် ဆောင့်ဆွဲသည်။ ထို့နောက် ကျွန်တော့်နှာခေါင်းကို သူ့စီးကရက် ထိပ်ဖျားဖြင့် အပူပေးခဲ့ပြီး၊ ကျွန်တော့်ကို ရက်စက်ကြမ်းကြုတ်စွာ ကြည့်ကာ “ငါမင်းကို ပြောနေတာ၊ ဒီကိုလာကြတဲ့ အပြစ်သား တော်တော်များများနဲ့ စကားပြောဖို့ ဝန်အလေးဆုံး လူတွေတောင် ငါ့လက်ထဲက ရုန်းမထွက်နိုင်ကြဘူး။ မင်းဒီမှာ မသေရင်တောင်မှ၊ မင်းကိုငါ အရှင်လတ်လတ် အရေခွံခွာပစ်ဦးမှာပဲ” ဟု ပြောခဲ့သည်။ အခြားအရာရှိနှစ်ဦး မကြာမီမှာပင် ရောက်လာကြသည်။ သူတို့က လှောင်အိမ်ကိုဖွင့်ပြီး ကျွန်တော့်ကို ဆွဲထုတ်ကြသည်။ ထိုအချိန်တွင် ကျွန်တော့် ခြေထောက်များက တောင့်တင်းနေပြီး၊ အားနည်းနေကာ၊ ကျွန်တော် မတ်တပ်မရပ်နိုင်ခဲ့ပါ။ ကြမ်းပြင်ပေါ်သို့ ကျွန်တော် လဲကျသွားခဲ့သည်။ အရာရှိများထဲမှ တစ်ယောက်က ကျွန်တော် ဟန်ဆောင်နေသည်ဟု ထင်သောကြောင့် ကျွန်တော့်ထံသို့လာပြီး၊ “မင်းက ငါ့ကို သေချင်ယောင်ဆောင်ပြလို့ ရမယ်ထင်နေလို့လား” ဟု အော်ဟစ်ကာ၊ ကျွန်တော့်ကို ရက်စက်ကြမ်းကြုတ်စွာ အကြိမ်အနည်းငယ် ကန်ကျောက်ခဲ့သည်။ အခြားအရာရှိနှစ်ဦးက ကျွန်တော့်ကို ဆွဲမပြီး၊ လက်သီးဖြင့် ဆွဲထိုးကြသည်၊ ကျွန်တော့်မျက်နှာ နှင့် ခန္ဓာကိုယ် အထက်ပိုင်းတို့ကို ထိုးကြိတ်သည်။ သူတို့ အတန်ကြာ ထိုသို့ပြုလုပ်ပြီးနောက်၊ ကျွန်တော့် ခန္ဓာကိုယ်သည် အလောင်းကောင်တစ်ခုကဲ့သို့ ပျော့ခွေနေပြီး၊ ကျွန်တော့် နှာခေါင်းနှင့် ပါးစပ်တို့မှ သွေးများထွက်နေသည့်အပြင် ကျွန်တော့်မျက်နှာသည် ဆိုးရွားစွာအထိုးခံထားရပြီး၊ တုံ့ပြန်မှုမရှိသည်ကို သူတို့ တွေ့လိုက်ရသည်။ သူတို့ထဲမှ တစ်ယောက်က “မေ့လိုက်တော့၊ ရပ်လိုက်ကြရအောင်။ သူ့ကြည့်ရတာ ကြာကြာခံမဲ့ပုံ မပေါ်ဘူး၊ ပြီးတော့ သူ ငါတို့လက်ထဲမှာ သေသွားခဲ့ရင်၊ ငါတို့ ပြဿနာတော်တော်တက်မယ်” ဟု ပြောလိုက်သည်။ ထို့နောက်မှသာ ကျွန်တော့်ကို သူတို့ ကြမ်းတမ်းစွာ ကိုယ်ထိလက်ရောက် တိုက်ခိုက်မှုကို ရပ်တန့်လိုက်ပြီး၊ ကျွန်တော့်ကို ဘေးတွင် ပစ်ထားခဲ့လေသည်။ သူတို့ကြား သိုသိုသိပ်သိပ် စကားပြောနေသည်ကို ကျွန်တော် ကြားရပြီး သူတို့ထဲမှ တစ်ယောက်က “ငါရဲအရာရှိဖြစ်လာတဲ့ သက်တမ်းတစ်လျှောက် သူ့လောက် မာတဲ့ကောင် တစ်ခါမှ မမြင်ဖူးဘူး။ ဒီတစ်ချိန်လုံး သူဘာစကားတစ်လုံးမှ မပြောခဲ့ဘူး။ အဲဒါ တကယ့်ကိုတစ်ခုခုတော့တစ်ခုခုပဲ” ဟု ပြောခဲ့သည်။ စာတန်က သူ့ဦးခေါင်းကို ငုံ့ထားကာ၊ သူတို့စကားများတွင် စိတ်ဓာတ်ကျစွာ သက်ပြင်းချသံကို ကျွန်တော် ကြားရသည်၊ ပြီးလျှင် ရှုံးနိမ့်ခြင်းနှင့် ရင်ဆိုင်ရာတွင် သူက အလန့်တကြား ထွက်ပြေးသည်ကိုလည်း ကျွန်တော် မြင်ရပါသည်။ ဘုန်းကျက်သရေ ရရှိခြင်းကြောင့် ဘုရားသခင် ပြုံးနေသည်ကိုလည်း ကျွန်တော် မြင်ရပြီး၊ ပြောမပြနိုင်သော ဝမ်းမြောက်ခြင်းတစ်ခုကို ကျွန်တော် ခံစားခဲ့ရသည်။ ကျွန်တော်က ဘုရားသခင်ကို တိတ်ဆိတ်စွာ ကျေးဇူးတော်ချီးမွမ်းခဲ့ပြီး အသင်းတော် ဓမ္မသီချင်းကို သီဆိုခြင်းမှ မိမိကိုယ်ကိုယ် မတားဆီးနိုင်ခဲ့ပါ။ နိုင်ငံတော်၊ ကျွန်တော့် စိတ်နှလုံးတွင်း၌ ရှိသည်။ “ဘုရားသခင်သည် ကျွန်ုပ်ကို ထောက်မသူ၊ ကြောက်ရွံ့စရာ ဘယ်အရာရှိသနည်း။ အဆုံးထိတိုင် စာတန်နှင့် တိုက်ပွဲ၀င်ရန် ကျွန်ုပ်ဘ၀အား ကျိန်ဆိုသည် ဘုရားသခင်သည် ကျွန်ုပ်တို့အား မြှောက်ပင့်ခဲ့သည် ကျွန်ုပ်တို့ အရာအားလုံးအား နောက်တွင် ချန်ထားရစ်ခဲ့ကာ ခရစ်တော်အတွက် သက်သေခံရန် တိုက်ခိုက်သင့်သည်။ ဘုရားသခင်သည် ကမ္ဘာ မြေပေါ်တွင် သူ၏ အလိုတော်ကို ပြည့်စုံစေလိမ့်မည်။ ကျွန်ုပ်၏ အချစ်၊ သစ္စာ တရားအား ပြင်ဆင်ကာ ထိုအရာအားလုံးကို ဘုရားသခင်အတွက် ပေးအပ်မြုပ်နှံပါမည်။ ဘုရားသခင် ဘုန်းတန်ခိုးနှင့် ဆင်းသက်လာမည့် ပြန်လာချိန်ကို ကျွန်ုပ် ၀မ်းမြောက်စွာ စောင့်ကြိုပါမည်။ ခရစ်တော်၏ နိုင်ငံတော် ထူထောင်ချိန်တွင် သူနှင့် အတူ နောက်တစ်ဖန် တွေ့မြင်ရပါမည်။... ဤအခက်အခဲအတွင်းမှ အောင်နိုင်သူ စစ်သည်ကောင်းများစွာ ပေါ်ထွန်းလာခဲ့သည်။ ကျွန်ုပ်တို့သည် ဘုရားသခင်နှင့်အတူ အောင်နိုင်ကြပြီး ဘုရားသခင်၏ သက်သေ ဖြစ်လာကြသည်။ ဘုရားသခင် ဘုန်းတော် တိုးတက်လာသည့် နေ့ကို ကြည့်သည် ထိုနေ့သည် တားဆီးမရသော ခွန်အားဖြင့် လာသည် လူသားတိုင်း ထို တောင်သို့ ရောက်ရှိ လာကြသည် ဘုရားသခင်၏ အလင်းရောင်အတွင်း လျှောက်လှမ်းကြသည်။ ပြိုင်ဘက်မရှိ အလွန် ခမ်းနားသော နိုင်ငံတော် သည် ကမ္ဘာတစ်၀ှမ်း ရှင်းလင်းစွာ ပေါ်ပေါက်လာရမည်။” (သိုးသငယ်နောက်လိုက်ပြီး သီချင်းအသစ်များကိုသီဆိုပါ စာအုပ်ထဲရှိ “နိုင်ငံတော်”) ကျွန်တော် ပိုသီဆိုလေ၊ ပို၍အားပြည့်သည်ဟု ခံစားရလေ ဖြစ်သည်။ ဘုရားသခင် နောက်ကိုလိုက်ခြင်းတွင် ဤကဲ့သို့ ဖိနှိပ်ခြင်းမျိုးနှင့် အခက်အခဲမျိုးကို တွေ့ကြုံခံစားနိုင်ခြင်းသည် ကျွန်တော့်အတွက် အမှန်တကယ် အထူးအခွင့်အလမ်း တစ်ခုဖြစ်သည်ဟု ကျွန်တော် ခံစားခဲ့ရသည်။ ကျွန်တော့် ယုံကြည်မှုက အလွန်လျင်မြန်စွာ တိုးလာခဲ့ပြီး၊ စာတန်ကို အဆုံးထိ တိုက်ခိုက်ရန် ကျွန်တော် သစ္စာဆိုခဲ့သည်။ ဤသည်မှာ ကျွန်တော် နောက်တစ်နေ့ကို အောင်မြင်စွာ ကျော်ဖြတ်ခဲ့ပုံ ဖြစ်ပါသည်။

တတိယမြောက်နေ့တွင် ရဲအရာရှိတစ်ယောက်က နံနက်၉နာရီခန့်တွင် ဝင်ရောက်လာခဲ့သည်။ သူဝင်လာသည့် အခိုက်အတန့်တွင်ပင် ကျွန်တော့်အား သူ့ကိုယ်သူ မိတ်ဆက်ပေးပြီး၊ သူက ထိုရဲစခန်း၏ ဌာနအကြီးအကဲ ဖြစ်ကြောင်း ပြောခဲ့သည်။ သူက ကျွန်တော့်ရှေ့တွင် မတ်တပ်ရပ်ကာ၊ ဟန်ဆောင်ထားသည့် နူးညံ့သိမ်မွေ့ခြင်းဖြင့် “မင်းတကယ့်ကို ဒုက္ခခံစားလိုက်ရတာပဲ။ ငါက ပြီးခဲ့တဲ့ ရက်တစ်ချို့မှာ အစည်းအဝေးအတွက် နယ်ကို ရောက်နေခဲ့တာ။ ငါအခုပဲ ပြန်ရောက်ပြီး၊ မင်းနဲ့ ပတ်သက်ပြီး ဖြစ်နေတာတွေ ကြားခဲ့ရတယ်။ သူတို့ကို ငါတကယ့်ကို ပြင်းပြင်းထန်ထန်ကို အပြစ်တင်ဆုံးမလိုက်တယ်။ သူတို့က အခြေအနေကို အရင်နားမလည်ဘဲနဲ့ လူတစ်ယောက်ကို စိတ်ကူးပေါက်တဲ့အတိုင်း ဘယ်လိုများ ရိုက်နှက်နိုင်ပါလိမ့်။ ဒါက တကယ့်ကို စည်းကျော်တာပဲ” ဟု ပြောခဲ့သည်။ ကျွန်တော်က ဆိုးယုတ်သည့်ရဲအရာရှိတစ်ယောက်ထံမှ မမျှော်လင့်ထားသည့် ဤကြင်နာမှုကို ရင်ဆိုင်ရာတွင် ဇဝေဇဝါမဖြစ်ဘဲ မနေနိုင်ခဲ့ပါ၊ သို့သော်၊ ထို့နောက်တွင်ပင် ဘုရားသခင်၏နှုတ်ကပတ်တော်များ တစ်ချို့ထံမှ သတိပေးချက်တစ်ခုကို ကျွန်တော် ရရှိခဲ့သည်။ “အချိန်တိုင်းတွင်၊ ငါ၏လူတို့သည် ငါ့အိမ်၏တံခါးကို ငါ့အတွက် စောင့်ကြပ်ရင်း၊ စာတန်၏ စဉ်းလဲသည့် အကြံအစည်များကို သတိထားသင့်ပေသည်။” (နှုတ်ကပတ်တော်၊ အတွဲ (၁)၊ ဘုရားသခင်၏ ပေါ်ထွန်းခြင်းနှင့် အမှုတော်၊ စကြဝဠာတစ်ခုလုံးအတွက် ဘုရားသခင်၏ နှုတ်ကပတ်တော်များ၊ အခန်း (၃)) ဤသည်မှာ စာတန်၏လှည့်ကွက်များထဲမှ တစ်ခုဖြစ်ကြောင်း ကျွန်တော် သတိပြုမိခဲ့သည်။ ကျွန်တော်က ဘုရားသခင်ကို သစ္စာဖောက်ပြီး အသင်းတော်ကို ဖော်ကောင်လုပ်စေရန် ကြိုးပမ်းအားထုတ်ရာတွင် ရိုက်ခြင်းကအလုပ်မဖြစ်သည်ကို သူမြင်သည့်အချိန်တွင်၊ ချော့မော့ခြင်းကို အသုံးပြုခဲ့သည်။ ကျွန်တော့် စိတ်နှလုံး အားတက်သွားခဲ့ပြီး၊ အတွင်းပိုင်း ယုံကြည်မှုနှင့် ပတ်သက်သည့် အသိစိတ်တစ်ခုကို ကျွန်တော် ခံစားရလေသည်။ ကျွန်တော်က “ဘုရားသခင်ရဲ့ အမြော်အမြင်က စာတန်ရဲ့ လိမ်လည်လှည့်စားမှုမှာ အခြေခံကျင့်သုံးတယ်။ ဒါကြောင့် မင်းက ဘယ်လောက် စဉ်းလဲပြီး၊ လည်ပါစေ၊ မင်းနတ်ဆိုးအိုကြီးရေ၊ ငါ့မှာ ငါ့ကို လမ်းပြဖို့ ဘုရားသခင်ရဲ့ နှုတ်ကပတ်တော်တွေ ရှိတယ်။ မင်းရဲ့ လှည့်ကွက်တွေက အောင်မြင်လိမ့်မယ်လို့ မင်းတွေးနေရင်၊ မင်းက အိပ်မက်မက်နေတာပဲ” ဟု တွေးခဲ့သည်။ ကျွန်တော့်ကို သွေးဆောင်ဖြားယောင်းဖို့ မည်မျ “ချိုသာသော အရာများ” ကို သူပြောပါစေ၊ ကျွန်တော်က သူ့ကို လျစ်လျူရှုထားခဲ့သည်။ ယင်းမှာ လုံးဝ အကျိုးမရှိကြောင်း တွေ့သည့်အခါ၊ သူက နောက်ဆုံးတွင် ထွက်ခွာသွားရုံမှလွဲပြီး၊ ရွေးချယ်စရာမရှိခဲ့ပါ။ ထို့နောက် အခြားအရာရှိနှစ်ဦးက ဝင်ရောက်လာပြီး၊ ဒေါသတကြီးဖြင့် ကျွန်တော့်ကို အော်ပြောပါသည်၊ “မင်း ဆန်ကုန်မြေလေး။ မင်းစောင့်နေပါ။ မင်းစကားမပြောရင်၊ ဒီနေရာက ဘယ်တော့မှ ထွက်ရမှာမဟုတ်ဘူး။ ဘာသက်သေအထောက်အထားမှ မရှိဘဲနဲ့ မင်းကို ပြစ်ဒဏ်ချမှတ်ခံရအောင် ငါတို့ လုပ်လို့ရတယ်။မင်း စောင့်သာကြည့်နေ” သူတို့၏ ခြိမ်းခြောက်မှုများကို ရင်ဆိုင်ရာတွင် ကျွန်တော်က အလွန်တည်ငြိမ်နေခဲ့ကာ၊ “အရာအားလုံးက ဘုရားသခင်ရဲ့ လက်တော်ထဲမှာ ရှိတယ်ဆိုတာရယ်၊ ငါပြစ်ဒဏ်ချမှတ်ခံရတာ မခံရတာကလည်း သူ့လက်တော်ထဲမှာ ရှိတယ်ဆိုတာကို ငါယုံကြည်တယ်။ ဒီနတ်ဆိုးတွေက ဆုံးဖြတ်ခွင့်မရှိဘူး၊ ဘုရားသခင်ကသာ ဆုံးဖြတ်ခွင့်ရှိတယ်။ ဘာပဲဖြစ်ပါစေ ဘုရားသခင်လုပ်သမျှမှာ အဓိပ္ပာယ်ရှိတယ်ဆိုတာ ငါယုံကြည်ပြီး၊ အဆုံးထိ နာခံဖို့ ငါဆန္ဒရှိတယ်” ဟု မိမိဘာသာ တွေးနေခဲ့ပါသည်။

ရဲများတွင် ပြစ်မှုထင်ရှားစီရင်ခြင်းအတွက် မည်သည့် သက်သေအထောက်အထားမျှ မရှိခဲ့သော်လည်း သူတို့က ကျွန်တော့်ကို လက်လွှတ်ဖို့ ဆန္ဒမရှိသေးပါ။ သူတို့က ရက်အနည်းငယ်ကြာတစ်ခါ ကျွန်တော့်ကို အစာရေစာ ပေးရန် ငြင်းဆန်ခဲ့ကြသည်။ ထိုညနေတွင် ကျွန်တော်က အလွန်ဆာလောင်လှသည်မှာ ကျွန်တော့်မှာ ရုပ်ပိုင်းဆိုင်ရာခွန်အား လုံးဝ မရှိတော့သည့်အပြင်၊ အခြေအနေများ ထိုနည်းအတိုင်း ဆက်သွားနေပါက ကျွန်တော် ငတ်ပြီးသေရခြင်းဖြင့် အဆုံးသတ်တော့မလားဟု ကျွန်တော် တွေးမိသည်။ ထို့နောက်တွင်ပင် “လူတွေရဲ့ကံကြမ္မာတွေက ဘုရားသခင်ရဲ့ လက်တော်တွေထဲမှာ ရှိတာကြောင့် ဘုရားသခင်က လူတစ်ယောက်ကို မသေစေချင်ရင်၊ သူသေမှာ မဟုတ်ဘူး။ ငါက ဘုရားသခင်ရဲ့ စီစဉ်မှုတွေနဲ့ စီစဉ်ညွှန်ကြားမှုတွေကို ကျိုးနွံနာခံရုံပဲရှိတယ်” ဟု ကျွန်တော် တွေးခဲ့သည်။ ပြီးနောက် မကြာမီတွင် ရဲများက လောင်းကစားလုပ်ရင်း အဖမ်းခံရသည့် လူခြောက်ယောက်ကို ခေါ်သွင်းလာခဲ့သည်။ ထိုခြောက်ယောက်က သူတို့တစ်ယောက်လျှင် ပေါက်စီတစ်ပေါင်နှုန်းဖြင့် ရဲများကို ဝယ်ယူခိုင်းပြီး၊ ရဲများက ခုနှစ်ပေါင်ခန့် ပြန်သယ်လာကြသည်။ သူတို့က သူတို့၏ ဒဏ်ငွေများပေးခြင်းဖြင့် အဆုံးသတ်ပြီး၊ လျင်မြန်စွာ အလွှတ်ခံရသည်။ သူတို့မထွက်ခွာမီ၊ သူတို့၏ စားကြွင်းစားကျန် ပေါက်စီများကို ရဲများမသိအောင် ကျွန်တော့်ကို ပေးခဲ့ကြသည်။ လူများ၊ အဖြစ်အပျက်များ နှင့် အမှုအရာများ အားလုံးတို့သည် ဘုရားသခင်၏ လက်တော်များတွင်း၌ စီစဉ်ညွှန်ကြားခံရကြောင်း ကျွန်တော် နောက်တစ်ကြိမ် မြင်ခဲ့ရပြန်သည်။ ကျွန်တော့် မျက်လုံးများသည် မျက်ရည်များဖြင့် ပြည့်နေပြီး၊ ကျွန်တော်သည် မရှင်းပြနိုင်သည့် နည်းလမ်းတစ်ခုဖြင့် တို့ထိခံခဲ့ရသည်။ ဘုရားသခင်သည် မည်မျှချစ်ဖွယ်ကောင်းပြီး၊ အံ့သြဖွယ်ကောင်းကြောင်းသာ ကျွန်တော် ခံစားခဲ့ရသည်။ ကျွန်တော်သည် နတ်ဆိုးတို့၏ သားရဲတွင်းထဲသို့ ကျရောက်ခဲ့သည့်တိုင် ဘုရားသခင်သည် ကျွန်တော့်ကို ဂရုစိုက်ကာ၊ စောင့်ကြည့်နေရင်း၊ ကျွန်တော့်၏ အတွင်းမှ အသက်စွမ်းအားအဖြစ် ပြုမူကာ၊ စာတန်အားဖြင့် ထပ်ခါထပ်ခါ စုံစမ်းနှောင့်ယှက်ခံရခြင်းမှ အောင်မြင်ရန် ပံ့ပိုးပေးနေလျက် ကျွန်တော့်နံဘေးတွင် တစ်ချိန်လုံးရှိနေခဲ့သည်။ သူက ကျွန်တော့်ကို ဤအခက်အခဲများကြားမှ ကူညီကျော်ဖြတ်ပေးရင်း ကျွန်တော့် အားနည်းချက်အတွက် သနားကရုဏာကိုလည်း ပြခဲ့သည်။ ဘုရားသခင်သည် အလွန်လက်တွေ့ကျပြီး၊ သူ့ချစ်ခြင်းမေတ္တာက အလွန်စစ်မှန် ပါသည်။

ဆဌမမြောက်နေ့တွင် ရဲများက ကျွန်တော့်ကို ပြစ်မှုတစ်ခုအတွက် စွဲချက်တင်ရန် မည်သည့်သက်သေအထောက်အထားမျှ လုံးဝ ရှာမတွေ့နိုင်ခဲ့သောကြောင့် ကျွန်တော့်ကို ယွမ် ၂၀၀ ဒဏ်ငွေဆောင်ခိုင်းပြီး လွှတ်ပေးရခြင်းဖြင့် အဆုံးသတ်ခဲ့ပါသည်။ ဘုရားသခင်သည် ဤအရာများအားလုံးကို အုပ်စိုးနေခဲ့ကြောင်းနှင့် ကျွန်တော် မည်မျှဆင်းရဲဒုက္ခခံစားသင့်သည်နှင့် ကျွန်တော် လမ်းမည်မျှ လျှောက်သင့်သည်ကို ဘုရားသခင် အတိအကျသိကြောင်း၊ ဘုရားသခင်က ကျွန်တော် ဒုက္ခခံဖို့မလိုသည့် နေ့ရက်တစ်ရက်ကိုမျှ ကျွန်တော့်ကို ဒုက္ခခံခွင့်ပေးမည် မဟုတ်ကြောင်းတို့ကို ကျွန်တော် နက်နဲစွာ သတိပြုမိခဲ့ပါသည်။ ရဲများသည် သူတို့၏ ဆိုးယုတ်သော၊ အန္တရာယ်ပြုမည့်လက္ခဏာရှိသော သဘာဝတို့ကြောင့် ကျွန်တော့်ကို သူတို့ မည်သည့်အခါမျှ အလွယ်တကူ လွှတ်ပေးမည် မဟုတ်သည့်အားလျော်စွာ ထိုနေ့က ကျွန်တော့်ကို လွှတ်မပေးလိုကြကြောင်းကို ကျွန်တော် သိရှိခဲ့သည်။ သို့သော်လည်း ဘုရားသခင်က ယင်းကို နောက်ထပ်ခွင့်မပြုတော့သောကြောင့် ဤအရေးကိစ္စတွင် သူတို့ ပြောပိုင်ခွင့်မရှိခဲ့ပါ။ ဘုရားသခင်က သူ၏ ရွေးချယ်ထားသော လူများကို စုံလင်စေသည်နှင့်အညီ စာတန်နှင့် သူ၏နတ်ဆိုးများသည် အစေခံမှုပေးနေကြရခြင်း ဖြစ်ကြောင်းနှင့် သူတို့က ကြမ်းကြုတ်ရက်စက်ပုံပေါက်သော်လည်း ဘုရားသခင်က အရာအားလုံးကို အုပ်စိုးကြောင်းတို့ကို ဤအရာက ကျွန်တော့်ကို မြင်စေခဲ့သည်။ ကျွန်တော်က ဘုရားသခင်ကို အမှန်တကယ် အားကိုးပြီး ကျိုးနွံနာခံသမျှကာလပတ်လုံး၊ ဘီလူးသရဲစီးသော စွမ်းအားများအားလုံးကို ကျွန်တော်တို့ အောင်မြင်နိုင်ရန်နှင့် အန္တရာယ်ကို ကျော်ဖြတ်ပြီး လုံခြုံစိတ်ချမှုထဲရောက်နိုင်ရန် ကိုယ်တော်က ကျွန်တော်တို့ကို ကာကွယ်လိမ့်မည်။

ကျွန်တော်သည် ရဲစခန်းတွင် ခြောက်ရက်လုံးလုံး နှိပ်စက်ခံခဲ့ရပြီး၊ ထိုခြောက်ရက်၏ ထူးခြားသော အတွေ့အကြုံက တရုတ်ကွန်မြူနစ်ပါတီအစိုးရ၏ အကျည်းတန်သော စရိုက်နှင့် ၎င်း၏ ဆိုးယုတ် ဖောက်ပြန်သော သဘာဝနှင့် အနှစ်သာရတို့ကို ကျွန်တော် အမှန်တကယ် မြင်တွေ့ရန် ကူညီခဲ့သည်။ ယင်းမှာ ဘုရားသခင်အတွက် ရန်သူတစ်ယောက်ဖြစ်သည့် နတ်ဆိုး တစ်ကောင် ဖြစ်ပြီး၊ ယင်းမှာ လူဆိုးတစ်အုပ်ဖြင့် ဖွဲ့စည်းထားကြောင်းကို ကျွန်တော်တွေ့ခဲ့သည်။ ယင်းက ကျွန်တော့်ကို ဘုရားသခင်၏ အနန္တတန်ခိုး၊ အချုပ်အခြာအာဏာ၊ အံ့ချီးမှုနှင့် ဉာဏ်ပညာတို့ကို နားလည်သဘောပေါက်စေပြီး၊ ဘုရားသခင်၏ ချစ်ခြင်းမေတ္တာနှင့် ကယ်တင်ခြင်းတို့ကိုပါ ကိုယ်တိုင်ကိုယ်ကျ တွေ့ကြုံခံစားစေခဲ့သည်။ ဘုရားသခင်သည် အနန္တတန်ခိုးရှင်ဖြစ်သည်၊ သစ္စာစောင့်သည်၊ ကြီးမြတ်ပြီး၊ ချစ်ဖွယ်ကောင်းသော ဘုရားသခင် ဖြစ်သည်၊ သူသည် လူသားမျိုးနွယ်၏ ယုံကြည်မှုနှင့် ကိုးကွယ်ခြင်းတို့ကို ထာဝရထိုက်တန်သူတစ်ဦးဖြစ်ကြောင်းတို့ကို ကျွန်တော် နားလည်သဘောပေါက်ခဲ့သည်။ ထို့ထက်ပိုပြီးလျှင် ကိုယ်တော်သည် လူသားမျိုးနွယ်၏ ချစ်ခြင်းမေတ္တာနှင့် ထိုက်တန်ပေသည်။ ထိုအတွေ့အကြုံမရှိပါက၊ ကျွန်တော်သည် စာတန်အတွက် စစ်မှန်သည့် အမုန်းတရား မည်သည့်အခါမျှ ဖြစ်ပေါ်လာမည် မဟုတ်သည့်အပြင်၊ ဘုရားသခင်ကို စစ်မှန်သည့် နားလည်သဘောပေါက်ခြင်းလည်း ရရှိမည်မဟုတ်သောကြောင့်၊ ၎င်းသည် ကျွန်တော့် ယုံကြည်မှုအသက်တာတွင် အလှည့်အပြောင်း တစ်ခုဖြစ်လာခဲ့သည်။ ထို့နောက် ဘုရားသခင်ကို ကျွန်တော့် ယုံကြည်မှုသည် အလွန်အနှစ်သာရမဲ့ပြီး ကယ်တင်ခြင်းအပြည့်အဝကိုလည်း ကျွန်တော် အောင်မြင်ရရှိမည် မဟုတ်ပါ။ တရုတ်ကွန်မြူနစ်ပါတီ၏ လူမဆန်သည့် ညှဉ်းပန်းနှိပ်စက်ခြင်းနှင့် ဖိနှိပ်ချုပ်ချယ်ခြင်းတို့ကို ကြုံခြင်းအားဖြင့်သာ ကျွန်တော်သည် စာတန်နှင့် ၎င်း၏နတ်ဆိုးများက မည်သည့်အရာဖြစ်ကြောင်း၊ ကမ္ဘာပေါ်မှ ငရဲက မည်သည့်အရာဖြစ်ကြောင်းနှင့် မှောင်မိုက်ဆိုးယုတ်သော အင်အားစုများသည် မည်သည့်အရာဖြစ်ကြောင်းတို့ကို ကျွန်တော် သိလာခဲ့သည်။ ပြီးလျှင် ထိုအတွေ့အကြုံမှတဆင့်သာမှောင်မိုက်ပြီး၊ ဆိုးယုတ်သည့်မြေပေါ်တွင် မွေးဖွားခဲ့သည့် ကျွန်တော်သည် စာတန်၏ လက်သည်းများမှ ရုန်းထွက် လွတ်မြောက်နိုင်ပြီး၊ အသက်တာတွင် ယုံကြည်မှုလမ်းကြောင်းကို လျှောက်ကာ၊ အလင်းကို မြင်တွေ့နိုင်သည်မှာ ဘုရားသခင်သည် အလွန်ကြီးမားသော ကျေးဇူးတော်နှင့် သနားကရုဏာတို့ကို ကျွန်တော့်အား ပြသနေခြင်းဖြစ်သည်ကို ကျွန်တော် သတိမူမိလာခဲ့သည်။ ဘုရားသခင်၏ အနန္တတန်ခိုးနှင့် အချုပ်အခြာအာဏာ တို့ကိုလည်း ကျွန်တော် မျက်မြင်ကိုယ်တွေ့ကြုံပြီး သူ့နှုတ်ကပတ်တော်များ၏ သြဇာအာဏာနှင့် ကြီးကျယ်မြင့်မြတ်ခြင်းတို့ကို တွေ့ကြုံခံစားခဲ့ရသည်။ သူ့နှုတ်ကပတ်တော်များသည် လူတစ်ယောက်၏အသက် အမှန်တကယ်ဖြစ်လာနိုင်ပြီး၊ ၎င်းတို့က လူများကို စာတန်၏ စွမ်းအားမှ ကယ်တင်နိုင်သည်၊ ပြီးလျှင် သူတို့ကို သေခြင်းတရား၏ ကန့်သတ်မှုကိုလည်း အောင်မြင်ကျော်လွှားဖို့ ကူညီပေးနိုင်သည်။ စာတန် နှင့် သူ့နတ်ဆိုးများကမူ လူများကို လှည့်စားသည်၊ ထိခိုက်ပြီး ဝါးမျိုးခြင်းသာ လုပ်နိုင်သည့်အချိန်တွင်၊ ဘုရားသခင်သည်သာလျှင် လူများအတွက် စစ်မှန်သည့်ချစ်ခြင်းမေတ္တာနှင့် လူများ၏ စစ်မှန်သည့် ကယ်တင်ခြင်းတို့ကို ပေးနိုင်စွမ်းရှိကြောင်းကိုလည်း ကျွန်တော် အမှန်တကယ် တွေ့ကြုံခံစားခဲ့ရသည်။ အမှားနှင့် အမှန်တို့အကြား ခွဲခြားနိုင်စေရန်၊ ကောင်းမြတ်ခြင်းနှင့် ဆိုးယုတ်ခြင်းကို သိသာ ရှင်းလင်းစွာ တွေ့မြင်နိုင်ရန် တရုတ်ကွန်မြူနစ်ပါတီ၏ ဖိနှပ်မှုကို အသုံးပြုခဲ့ခြင်းအတွက် ကျွန်တော် ဘုရားသခင်ကို ကျေးဇူးတင်ပါသည်။ ယနေ့မှစကာ၊ ဘုရားသခင်ကို စစ်မှန်သော သိကျွမ်းမှု ရရှိရန်နှင့် ဘုရားသခင်၏ ဧဝံဂေလိတရားကို နိုးကြားစွာ ဖြန့်ဝေရန်၊ ပြီးလျှင် ပို၍များပြားသော လူများသည် ဘုရားသခင် ရှေ့တော်မှောက်သို့ လာရောက်ပြီး၊ သူ့ကို ကိုးကွယ်နိုင်ဖို့အလို့ငှာ၊ သမ္မာတရားကို နားလည်ပြီး၊ ပိုမိုရရှိရန်သာ ကျွန်တော် ကြိုးစားလိုသည့် ဆန္ဒရှိပါသည်။

အောက်ခြေမှတ်စု(များ)-

၁။ “ပြစ်မှုထဲက ဤကြံရာပါ” ဆိုသည်မှာ “လူရမ်းကားတစ်သိုက်” နှင့် အမျိုးအစားတူသည်။