အနန္တတန်ခိုးရှင် ဘုရားသခင် အသင်းတော် အပလီကေးရှင်း

ဘုရားသခင်၏ အသံတော်ကို နားထောင်၍ သခင်ယေရှု ပြန်ကြွလာတော်မူခြင်းကို ကြိုဆိုလော့။

သမ္မာတရားကို ရှာဖွေနေသူများ ကျွန်ုပ်တို့ကို ဆက်သွယ်ရန် ဖိတ်ခေါ်ပါသည်။

နှုတ်ကပတ်တော်သည် လူ့ဇာတိ၌ ပေါ်လာ၏

ထင်ရှားသည့်အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာမျက်နှာအနံ

0 ရှာဖွေခြင်း ရလဒ်များ

ရလဒ်များမတွေ့ရှိပါ။

လမ်းခရီး၏နောက်ဆုံးခရီးတစ်ထောက်ကို မည်ကဲ့သို့ သင်လျှောက်လှမ်းသင့်ပုံ

သင်တို့သည် လမ်းခရီး၏ နောက်ဆုံးခရီးတစ်ထောက်တွင် ယခုရှိနေပြီး၊ ဤအရာသည် ၎င်း၏ အရေးကြီးဆုံးသောအပိုင်း ဖြစ်သည်။ သင်သည် ဆင်းရဲဒုက္ခကို အနည်းငယ်တော့ ခံစားရပြီး ဖြစ်နိုင်သည်၊ အလုပ်များစွာလုပ်ပြီးဖြစ်နိုင်သည်၊ လမ်းများစွာကို သွားလာခဲ့ပြီး ဖြစ်နိုင်သည်၊ တရားဒေသနာများစွာကို နားထောင်ခဲ့ပြီးဖြစ်နိုင်သည်၊ ထို့ပြင် ယခုအချိန်ထိ ရောက်လာနိုင်ရန်မှာလည်း လွယ်ကူမှုမရှိခဲ့ချေ။ သင်သည် သင့်ရှေ့တွင်ရှိသော ဆင်းရဲဒုက္ခကို သည်းမခံနိုင်လျှင်၊ အတိတ်တွင် သင်လုပ်ခဲ့သည့်အတိုင်းသာ သင်ဆက်လုပ်နေလျှင်၊ သင်သည် စုံလင်အောင်ပြုခြင်း မခံရနိုင်ပေ။ ဤအရာက သင့်ကိုကြောက်ရွံ့စေဖို့ မဟုတ်၊ ဤအရာက အဖြစ်မှန်ဖြစ်သည်။ ပေတရုသည် ဘုရားသခင်၏ အလုပ်အနည်းငယ်ကို ကြုံတွေ့ခဲ့ရပြီးနောက်၊ သူသည် အတွေးအမြင်အချို့နှင့် ထိုးထွင်းသိမြင်မှုများစွာကို ရရှိခဲ့သည်။ သူသည် အစေခံခြင်း၏ နိယာမအနည်းငယ်ကိုလည်း နားလည်လာခဲ့ပြီး၊ နောက်ပိုင်းတွင် ယေရှုက သူ့ကိုတာဝန်ပေး စေခိုင်းထားသောအရာကို အပြည့်အဝဆက်ကပ်ရန် လုပ်ဆောင်နိုင်ခဲ့သည်။ သူရရှိခဲ့သည့် ကြီးမားသော စစ်ဆေးခြင်းက အများအားဖြင့် သူလုပ်ခဲ့သောအရာများထဲတွင်၊ သူသည် ဘုရားသခင်ကို အလွန်အမင်း အကြွေးတင်ခဲ့သည်ဟု ခံစားခဲ့ပြီး၊ ဘုရားသခင်ကို မည်သည့်အခါမျှ ပြန်ပေးဆပ်နိုင်လိမ့်မည်မဟုတ်ဟု ခံစားခဲ့ရသောကြောင့် ဖြစ်သည်၊ လူသားသည် အလွန်ပျက်စီးယိုယွင်းသည်ကို သူအသိအမှတ်ပြုခဲ့သည်၊ ထိုကြောင့် သူ့ထံ၌ အပြစ်ရှိသည့်အသိစိတ် ရှိနေခဲ့သည်။ ယေရှုက သူ့ကို အကြောင်းအရာများစွာ ပြောခဲ့ပြီး၊ ထိုအချိန်အခါက သူသည် အနည်းငယ်သာ နားလည်ခဲ့သည်။ တစ်ခါတစ်ရံ သူသည် ခုခံခြင်းနှင့် ပုန်ကန်မှုများ ပြုလုပ်ဆဲရှိခဲ့သည်။ ယေရှုသည် လက်ဝါးကပ်တိုင်တွင် သံမှိုနှင့်ဆွဲနှက်ခြင်း ခံရပြီးနောက်၊ ပေတရုသည် နောက်ဆုံးတွင် အနည်းငယ်နိုးထမှု ရှိလာခဲ့ပြီး မိမိမှာ ဆိုးဝါးစွာ အပြစ်တင်ခံထိုက်သူဖြစ်သည်ဟု ခံစားခဲ့သည်။ နောက်ဆုံးတွင် မမှန်ကန်သော အတွေးအခေါ် သူ့ထံ၌ရှိသောအချိန်တွင် သူဝမ်းနည်းသည့်အချက်သို့ ရောက်ရှိလာခဲ့သည်။ သူသည် မိမိအခြေအနေကို ကောင်းစွာသိခဲ့ပြီး၊ သခင့်၏ သန့်ရှင်းခြင်းကိုလည်း ကောင်းစွာ သိရှိခဲ့သည်။ ရလဒ်အနေဖြင့် သခင့်ကိုချစ်သော နှလုံးသားတစ်ခုက သူ့အထဲတွင် ပိုမိုကြီးထွားလာခဲ့ပြီး၊ သူသည် မိမိ၏ကိုယ်ပိုင်အသက်တာကို ပိုပြီး အလေးထားလာခဲ့သည်။ ဤအရာကြောင့် သူသည် ကြီးမားသောအခက်အခဲများကို ခံစားခဲ့ရသည်၊ တစ်ခါတစ်ရံတွင် သူသည် အပြင်းအထန် ဖျားနာခဲ့ပြီး သေမင်းတံခါးဝတွင် ရောက်နေသည့်အလား ခံစားခဲ့ရသည့်အချိန်များ ရှိသော်လည်း၊ ဤနည်းဖြင့် အကြိမ်ပေါင်းများစွာ စစ်ဆေးခြင်းခံရပြီးနောက်၊ သူသည် သူ့ကိုယ်သူ ပိုနားလည်မှုရှိလာခဲ့ပြီး၊ ဤနည်းအားဖြင့်သာ သခင့်အတွက် သူ၏ စစ်မှန်သောအချစ်က ဖွံ့ဖြိုးလာခဲ့သည်။ သူ၏ဘဝတစ်ခုလုံးသည် စစ်ဆေးခြင်းထဲတွင်၊ ထို့ထက်ပို၍ ပြစ်တင်ဆုံးမခြင်းထဲတွင် အချိန်ကုန်ခဲ့သည်ဟု ဆိုနိုင်ပါသည်။ သူ၏အတွေ့အကြုံက အခြားသောသူ၏အတွေ့အကြုံနှင့် ကွဲပြားခြားနားပြီး၊ သူ၏ချစ်ခြင်းမေတ္တာက စုံလင်အောင် ပြုခြင်းမခံရသောသူ တစ်စုံတစ်ယောက်ထက် သာလွန်ခဲ့ပါသည်။ သူ့အား စံပြနမူနာအဖြစ် ရွေးချယ်ခဲ့ရသည့် အကြောင်းရင်းမှာ သူသည် သူ့ဘဝတွင် မချိတင်ကဲဝေဒနာအပြင်းဆုံးကို တွေ့ကြုံခဲ့ရပြီး၊ သူ၏အတွေ့အကြုံများက အောင်မြင်မှုအရှိဆုံးဖြစ်သောကြောင့် ဖြစ်သည်။ အကယ်၍ သင်တို့သည် ပေတရုကဲ့သို့ လမ်းခရီး၏နောက်ဆုံးခရီးတစ်ထောက်ကို လျှောက်လှမ်းရန် အမှန်တကယ်တတ်နိုင်လျှင်၊ သင်တို့၏ကောင်းချီးများကို အဝေးသို့ယူသွားနိုင်သည့် ဖန်ဆင်းခံသတ္တဝါ တစ်ယောက်တလေမျှ ရှိလိမ့်မည်မဟုတ်ပါ။

ပေတရုသည် အသိစိတ်ရှိသော လူတစ်ယောက်ဖြစ်ခဲ့သည်၊ ထိုလူ့သဘာဝမျိုးဖြင့် ယေရှုနောက်သို့ သူပထမဆုံး လိုက်ခဲ့စဉ်က ဆန့်ကျင်တတ်ပြီး ပုန်ကန်တတ်သည့် စိတ်ကူးများစွာကို သူမတွေးဘဲမနေနိုင်ခဲ့ပေ။ သို့သော် သူသည် ယေရှုနောက်ကို လိုက်နေစဉ်အတွင်း ဤအရာများကို အလေးအနက်မထားခဲ့ပေ၊ ထို့အပြင် လူတို့သည် ထသို့ဖြစ်သင့်သည်ဟု သူယုံကြည်ခဲ့သည်၊ ထို့ကြောင့် အစပိုင်းတွင် သူသည် မည်သည့်အပြစ်တင်မှုကိုမျှ မခံစားခဲ့ရ၊ ကိုင်တွယ်ဖြေရှင်းခြင်းလည်း မခံခဲ့ရပေ။ ယေရှုသည် ပေတရု၌ရှိသည့် ထိုတုံ့ပြန်မှုများကို အလေးအနက်မထားခဲ့သကဲ့သို့ ထိုအရာများကို ဂရုလည်း မစိုက်ခဲ့ပါ။ ယေရှုသည် သူလုပ်ဆောင်ရန် ရည်ရွယ်ထားသည့်အလုပ်ကို ဆက်လက်၍သာ လုပ်ဆောင်နေခဲ့သည်။ ယေရှုသည် ပေတရုနှင့် အခြားသောသူတို့အပေါ် မည်သည့်အခါမျှ အပြစ်မရှာခဲ့ပါ။ “ယေရှုက သူတို့တုံ့ပြန်ခဲ့သည့် ဤအကြံများအကြောင်းကို မသိခဲ့၍များ ဖြစ်နိုင်သလော” ဟု သင်ဆိုကောင်းဆိုလိမ့်မည်။ လုံးဝမဟုတ်ပါ။ ယေရှုသည် ပေတရုကို အမှန်တကယ် နားလည်သောကြောင့် သူ့အပေါ် မည်သည့်အရေးယူမှုမျှ မပြုခဲ့ခြင်း ဖြစ်သည်၊ ယေရှုက ပေတရုအပေါ် ကြီးမားသော နားလည်မှုရှိသည်ဟု ဆိုနိုင်သည်။ ယေရှုသည် လူသားမျိုးနွယ်ကို မုန်းခဲ့သော်လည်း၊ သူတို့ကိုလည်း သနားခြင်းရှိလေသည်။ သင်တို့အထဲတွင် ပေါလုကဲ့သို့ ဆန့်ကျင်ခုခံတတ်ပြီး၊ ပေတရုက သခင်ယေရှုကို ထိုအချိန်က ပြုခဲ့သကဲ့သို့ အယူအဆများစွာရှိသော လူများစွာ ရှိနေသည် မဟုတ်လော။ သင့်ကို ငါပြောမည်၊ သင့်တတိယအာရုံတွင် လွန်စွာမယုံကြည်လျှင် သာ၍ကောင်းမည်။ သင်၏ခံစားချက်ကို အားကိုး၍မရပါ၊ သင့်ခံစားချက်သည် ကြာမြင့်စွာ ကတည်းက စာတန်၏ယိုယွင်းပျက်စီးခြင်းဖြင့် လုံးဝဖျက်ဆီးခံခဲ့ရသည်။ သင့်ခံစားချက်က လုံး၀စုံလင်သည်ဟု သင်ထင်သလော။ ပေါလုသည် သခင်ယေရှုကို အကြိမ်ပေါင်းများစွာ ခုခံခဲ့သော်လည်း၊ ယေရှုက မည်သည့်တုံ့ပြန်မှုကိုမျှ မလုပ်ခဲ့ပါ။ ထိုသို့ဖြစ်ရခြင်းမှာ ယေရှုသည် ဖျားနာသူကို ကျန်းမာစေပြီး နတ်ဆိုးများကို နှင်ထုတ်နိုင်ခဲ့သော်လည်း၊ ပေါလုအထဲရှိ “နတ်ဆိုး” ကို မောင်းထုတ်နိုင်ခြင်းမရှိခဲ့၍များ ဖြစ်နိုင်သလော။ ပေါလုသည် ယေရှု၏တပည့်တော်များကို အကြောင်းမဲ့ဖမ်းဆီးစဉ် ယေရှုသည် ရှင်ပြန်ထမြောက်ခဲ့ပြီး ကောင်းကင်သို့ တက်ကြွသွားပြီးနောက်မှသာ နောက်ဆုံး၌ ဒမာသတ်မြို့သို့သွားရာ လမ်းပေါ်တွင် ပေါလုထံ ပေါ်လာခဲ့ပြီး သူ့ကို ဒဏ်ခတ်ခဲ့သည်မှာ အဘယ်ကြောင့်နည်း။ သခင်ယေရှုက အလွန်နှေးကွေးစွာ တုံ့ပြန်ခဲ့၍ကြောင့်များ ဖြစ်နိုင်သလော။ သို့မဟုတ် ယေရှုသည် ဇာတိခန္ဓာထဲ၌ မည်သည့်အခွင့်အာဏာမျှ မရှိခဲ့သောကြောင့်လော။ သင်က ငါ့နောက်ကွယ်၌ လျှို့ဝှက်စွာ ဖျက်ဆီးပြီး ခုခံနေချိန်တွင် ငါမသိဟု သင်ထင်လေသလော။ သန့်ရှင်းသောဝိညာဉ်တော်ထံမှ သင်ရရှိသော ဉာဏ်အလင်းအစအနအား ငါ့ကိုခုခံဖို့ရန် အသုံးပြုနိုင်မည်ဟု သင်ထင်လေသလော။ ပေတရုသည် မရင့်ကျက်သေးချိန်တွင်၊ သူသည် ယေရှုနှင့်ပတ်သက်၍ အတွေးများစွာ ထားခဲ့သည်၊ သို့ဆိုလျှင် သူသည် အဘယ်ကြောင့် အပြစ်တင်မခံရသနည်း။ ယခုတွင်၊ လူများစွာသည် အပြစ်တင်ခြင်းမရှိဘဲ အမှုကိစ္စများကို လုပ်ဆောင်နေကြသည်၊ ထိုအရာများကို လုပ်ဆောင်ခြင်းက မမှန်ကန်ဟု ရှင်းလင်းစွာ ပြောဆိုခြင်းခံရလျှင်ပင်၊ သူတို့သည် နားမထောင်ကြ။ ဤသည်မှာ လူသား၏ ပုန်ကန်မှုလုံးလုံးကြောင့်ပင် မဟုတ်လော။ ယခုတွင် ငါသည်များစွာဆိုခဲ့ပြီ၊ သို့သော်လည်း သင်သည် အသိဉာဏ်၏ သိမြင်နားလည်ခြင်း အနည်းငယ်မျှပင် ယခုတိုင်ရှိမနေပါ၊ ထို့ကြောင့် သင်သည် လမ်းခရီး၏နောက်ဆုံးခြေလှမ်းကို အဆုံးမရောက်ခင်ထိ မည်သို့လျှင် လျှောက်လှမ်းနိုင်မည်နည်း။ ဤအရာသည် အလွန့်အလွန် ကြီးမားသော ကိစ္စတစ်ခု ဖြစ်သည်ဟု သင်မခံစားရသလော။

လူတို့ သိမ်းပိုက်ခြင်း ခံခဲ့ရပြီးနောက် သူတို့သည် ဘုရားသခင်၏ စီစဉ်ညွှန်ကြားခြင်းကို နာခံနိုင်သည်၊ သူတို့သည် မိမိတို့၏ယုံကြည်ခြင်းနှင့် ဘုရားသခင်နောက်ကိုလိုက်ပြီး သူ့ကိုချစ်လာရန်ဟူသည့် မိမိတို့၏ဆန္ဒအပေါ် အားကိုးနိုင်သည်။ ထို့ကြောင့် လမ်းခရီး၏ နောက်ဆုံးခရီးတစ်ထောက်ကို မည်သို့လျှောက်လှမ်းနိုင်မည်နည်း။ ဘေးဒုက္ခကို ကြုံတွေ့ရသည့် နေ့များတွင် သင်သည် အခက်အခဲအားလုံးကို သည်းခံရမည်ဖြစ်ပြီး၊ ဆင်းရဲဒုက္ခခံရန် ဆန္ဒရှိရမည်၊ ဤနည်းအားဖြင့်သာ သင်သည် လမ်းခရီး၏ နောက်ဆုံးခရီးတစ်ထောက်ကို ကောင်းစွာလျှောက်လှမ်းနိုင်မည် ဖြစ်သည်။ လမ်းခရီး၏ နောက်ဆုံးခရီးတစ်ထောက်ကို လျှောက်လှမ်းရန်မှာ ထိုမျှလွယ်ကူလှမည်ဟု သင်ထင်သလော။ သင်ဖြည့်ဆည်းရမည့် လုပ်ဆောင်ချက်ကို သင်သိသင့်သည်၊ သင်တို့သည် သင်တို့၏ အရည်အသွေးကို တိုးမြှင့်ပြီး၊ သင့်တို့ကိုယ်သင်တို့ လုံလောက်သော သမ္မာတရားဖြင့် ဆင်ယင်ထားရမည်။ ဤအရာသည် တစ်ရက် သို့မဟုတ် နှစ်ရက်သာဖြစ်သည့် အလုပ်မဟုတ်၊ သင်ထင်ထားသကဲ့သို့ မရိုးရှင်း။ လမ်းခရီး၏ နောက်ဆုံးခရီးတစ်ထောက်ကို လျှောက်လှမ်းခြင်းသည် သင်၌ အမှန်တကယ်ရှိသည့် ယုံကြည်ခြင်းနှင့် ဆန္ဒအမျိုးအစားအပေါ် မူတည်သည်။ သန့်ရှင်းသော ဝိညာဉ်တော် သင့်အထဲတွင် အလုပ်လုပ်နေခြင်းကို သင်မမြင်နိုင်ခြင်း ဖြစ်ကောင်းဖြစ်မည်၊ သို့မဟုတ် အသင်းတော်ထဲတွင် သန့်ရှင်းသောဝိညာဉ်တော်၏အလုပ်ကို ရှာဖွေတွေ့ရှိရန် သင်မစွမ်းဆောင်နိုင်ခြင်း ဖြစ်ကောင်းဖြစ်မည်၊ ထို့ကြောင့် သင်သည် အဆိုးမြင်ကာ စိတ်ပျက်လက်ပျက်ဖြစ်ရပြီး၊ လာမည့်လမ်းအတွက် စိတ်ပျက်ဖွယ်ရာအပြည့် ဖြစ်နေခြင်းဖြစ်သည်။ ထိုရှေးစစ်သည်များအားလုံး လဲကျသွားခဲ့သည်၊ အထူးသဖြင့် ဤအရာအားလုံးက သင့်အတွက် ထိုးနှက်ချက်တစ်ခု ဖြစ်သည်မဟုတ်လော။ ဤအရာများကို သင်မည်သို့ မြင်သင့်သနည်း။ သင်၌ ယုံကြည်ခြင်းရှိသလော သို့မဟုတ် မရှိသလော။ ယနေ့အလုပ်ကို သင်အပြည့်အဝ နားလည်သလော သို့မဟုတ် နားမလည်သလော။ ဤအရာများက သင်သည် လမ်းခရီး၏ နောက်ဆုံးခရီးတစ်ထောက်ကို ကောင်းစွာလျှောက်နိုင်၊ မလျှောက်နိုင်ကို ဆုံးဖြတ်ပေးနိုင်သည်။

ယခုတွင် သင်တို့သည် လမ်းခရီး၏ နောက်ဆုံးခရီးတစ်ထောက်တွင်ရှိနေသည်ဟု အဘယ်ကြောင့် ဆိုရသနည်း။ အဘယ်ကြောင့်ဆိုသော် သင်တို့သည် သင်တို့နားလည်သင့်သည့် အရာတိုင်းကို နားလည်သောကြောင့်ဖြစ်ပြီး၊ လူတို့ရရှိသင့်သည့် အရာတိုင်းကို သင့်တို့အား ငါပြောပြပြီး ဖြစ်သောကြောင့်ဖြစ်သည်။ သင်တို့ကို တာဝန်ပေးစေခိုင်းထားသည့် အရာတိုင်း၏ အကြောင်းကိုလည်း သင်တို့အား ငါပြောခဲ့ပြီးဖြစ်သည်။ ထို့ကြောင့် သင်တို့ ယခု လျှောက်လှမ်းနေသည့်အရာသည် ငါဦးဆောင်နေသော လမ်းခရီး၏ နောက်ဆုံးအစိတ်အပိုင်း ဖြစ်သည်။ သင်တို့သည် လွတ်လပ်စွာ အသက်ရှင်နိုင်သည့် အစွမ်းအစကို ရောက်ရှိနိုင်ရန်၊ မည်သည့်အချိန်တွင်ဖြစ်စေ သင်၌ လျှောက်လှမ်းရန်လမ်း အမြဲရှိနေရန်၊ သင့်အရည်အသွေးကို ထုံးစံအတိုင်း မြှင့်တင်ပြီး၊ ဘုရားသခင်၏နှုတ်ကပတ်တော်များကို မှန်ကန်စွာ ဖတ်ရှုကာ၊ မှန်ကန်သော လူ့အသက်တာတစ်ခု ရှိရန်တို့ကိုသာ ငါလိုအပ်သည်။ ဤနည်းဖြင့် အသက်ရှင်ရန် သင့်ကို ယခုငါဦးဆောင်နေသော်လည်း၊ အနာဂတ်တွင် ငါ သင့်ကို ဦးမဆောင်သည့်အခါ ဤနည်းလမ်းဖြင့် သင်အသက်ရှင်နိုင်ဆဲ ရှိလိမ့်ဦးမည်လော။ သင်ဆက်လက် စခန်းသွားနိုင်မည်လော။ ဤအရာသည် ပေတရု၏အတွေ့အကြုံဖြစ်သည်။ ယေရှုက သူ့ကို ဦးဆောင်နေချိန်တွင်၊ သူ၌ နားလည်မှုမရှိခဲ့ပါ၊ သူသည် သူငယ်ကဲ့သို့ ပူပင်မှုကင်းစွာ အမြဲနေခဲ့ပြီး၊ သူလုပ်ခဲ့သောအရာများအတွက် အလေးအနက်ထားခြင်းမရှိခဲ့ပါ။ ယေရှုထွက်ခွာသွားခဲ့ပြီးမှသာ သူ၏မှန်ကန်သော လူ့အသက်တာကို သူအစပြုခဲ့ခြင်းဖြစ်သည်။ သူ၏ အဓိပ္ပာယ်ရှိသော အသက်တာသည် ယေရှုထွက်ခွာပြီးမှသာ အစပြုခဲ့သည်။ သူသည် သာမန်လူ့သဘာဝ၏ အသိစိတ်အချို့နှင့် သာမန်လူတစ်ဦးပိုင်ဆိုင်သင့်သောအရာကို ပိုင်ဆိုင်ထားခဲ့သော်လည်း သူ၏ စစ်မှန်သောအတွေ့အကြုံနှင့် ရှာဖွေမှုတို့က ယေရှုမထွက်ခွာသွားခင်အထိ အသစ်အစမပြုသေးပါ။ ဤအချက်တွင် သင်တို့အတွက် အကြောင်းအရာများက မည်သို့ရှိသနည်း။ ငါသည် သင့်ကို ဤလမ်းဖြင့် ယခုဦးဆောင်နေပြီး၊ သင်ကလည်း ဤအရာက ကြီးမြတ်သည်ဟုထင်သည်။ သင့်အပေါ်ကျရောက်မည့် ပတ်ဝန်းကျင်နှင့် စမ်သပ်ခြင်းများ မရှိသော်လည်း၊ ဤနည်းဖြင့် သင်၌ မည်သည့်ဝိညာဉ်အသက်တာမျိုး အမှန်တကယ်ရှိသည်ကို မြင်ရန်နည်းလမ်းမရှိပါ၊ သမ္မာတရားနောက်လိုက်သောသူ သင်အမှန်တကယ်ဖြစ်သည်၊ မဖြစ်သည်ကို မြင်ရန် မည့်သည့်နည်းလမ်းမျှလည်း မရှိပါ။ သင်က သင်၏ကိုယ်ပိုင်အနှစ်သာရကို နားလည်သည်ဟု သင့်နှုတ်ဖြင့် ဆိုသော်လည်း ဤအရာများသည် အနှစ်မဲ့သော စကားလုံးများဖြစ်သည်။ နောက်ပိုင်းတွင် အကြောင်းအချက်များက သင့်အပေါ်လာသောအခါ၊ ထိုမှသာ သင့်နားလည်မှုကို အတည်ပြုပေးလိမ့်မည်ဖြစ်သည်။ “ကျွန်ုပ်၏အသွေးအသားသည် အလွန်ပျက်စီးယိုယွင်းပြီး၊ လူသားအသွေးအသား၏ အနှစ်သာရသည် ဘုရားသခင်ကို ဆန့်ကျင်ခုခံ၊ တော်လှန်ရန်ဖြစ်သည်ကို ကျွန်ုပ်နားလည်ပါသည်။ ဘုရားသခင်၏ တရားစီရင်ခြင်းနှင့် ပြစ်တင်ဆုံးမခြင်းကို လက်ခံနိုင်စွမ်းသည် သူ၏မြှင့်တင်ပေးခြင်းသက်သက်ဖြစ်သည်။ ယခု ထိုအရာကို ကျွန်ုပ်နားလည်လာပြီးဖြစ်သည်၊ ဘုရားသခင်၏ချစ်ခြင်းကို ပြန်လည်ပေးဆပ်ရန် ကျွန်ုပ်ဆန္ဒရှိပါသည်” ဟူသည့် ပြောဆိုရန် လွယ်ကူသော နားလည်မှုမျိုး ယခုတွင် သင်၌ ရှိနေသော်ငြားလည်း၊ နောက်ပိုင်းတွင် ဘေးဒဏ်ကြီး၊ စမ်းသပ်ခြင်းနှင့် ဆင်းရဲဒုက္ခတို့ သင့်အပေါ် ရောက်လာသောအခါ၊ ၎င်းတို့ကို ခံရန် လွယ်ကူလိမ့်မည်မဟုတ်ပါ။ နေ့စဉ် သင်တို့သည် ဤနည်းလမ်းကို လိုက်နာခဲ့သော်လည်း၊ သင်တို့အတွေ့အကြုံကို ရှေ့ဆက်ရန် မတတ်နိုင်ဆဲရှိသည်။ အကယ်၍ ငါသည် သင်တို့ကို လွှတ်ပေးလိုက်လျှင်၊ သင်တို့ကို အာရုံမစိုက်တော့လျှင် ထို့ထက် ပိုဆိုးသွားပါလိမ့်မည်။ လူအများစုသည် လဲကျလိမ့်မည်ဖြစ်ကာ ရှက်ခြင်း၏ သင်္ကေတဖြစ်သည့် ဆားတိုင်ဖြစ်လာလိမ့်မည်။ ဤအရာများအားလုံး အလွန်ဖြစ်နိုင်ပေသည်။ ဤအရာကို သင်မစိုးရိမ်သလော၊ သို့မဟုတ် ပူပန်မှုမရှိလေသလော။ ပေတရုသည် ထိုကဲ့သို့သော ပတ်ဝန်းကျင်မျိုးကို ရင်ဆိုင်ခဲ့ရပြီး၊ ထိုကဲ့သို့သော ဆင်းရဲဒုက္ခမျိုးကို တွေ့ကြုံခဲ့ရသော်လည်း၊ သင်သည် ခိုင်မြဲစွာ ဆက်လက်ရပ်တည်ခဲ့သည်။ အကယ်၍ ထိုပတ်ဝန်းကျင်ကို သင့်ထံယူဆောင်လာခဲ့လျှင်၊ သင်သည် ခိုင်မြဲစွာ ရပ်တည်နိုင်မည်လော။ မြေကြီးပေါ်ရှိစဉ် ယေရှုဆိုခဲ့သောအရာများနှင့် သူလုပ်ခဲ့သောအလုပ်တို့က ပေတရုကို အခြေခံအုတ်မြစ်ပေးခဲ့ပြီး၊ မိမိ၏နောက်ပိုင်းလမ်းခရီးကို ပေတရုလျှောက်လှမ်းခဲ့သည်မှာ ဤအခြေခံအုတ်မြစ်ထံမှပင် ဖြစ်သည်။ သင်တို့သည် ထိုအဆင့်သို့ ရောက်ရှိနိုင်မည်လော။ ယခင်က သင်လျှောက်လှမ်းခဲ့ပြီးသော လမ်းခရီးများနှင့် သင်နားလည်ခဲ့ပြီးသော သမ္မာတရားများသည် အနာဂတ်တွင် ခိုင်မြဲစွာ ရပ်တည်ခြင်းအတွက် သင်၏အခြေခံအုတ်မြစ် ဖြစ်လာနိုင်သလော။ နောက်ပိုင်းတွင် ခိုင်မြဲစွာ ရပ်တည်ခြင်းအတွက် ၎င်းတို့သည် သင့်ရူပါရုံ ဖြစ်လာနိုင်သလော။ သင်တို့ကို အမှန်အတိုင်း ငါပြောမည်၊ လူတို့လက်ရှိနားလည်သည့် အရာအားလုံးသည် အယူဝါဒများဖြစ်သည်ဟု တစ်ယောက်က ပြောနိုင်သည်။ ဤသို့ဖြစ်ရခြင်းမှာ သူတို့နားလည်သည့်အရာသည် သူတို့ခံခဲ့ပြီးသော အရာများအားလုံးမဟုတ်သောကြောင့် ဖြစ်သည်။ ယခုထိတိုင် သင်ဆက်လက် စခန်းသွားနိုင်ခြင်းသည် အလင်းသစ်၏ ခေါင်းဆောင်မှုလုံးလုံးကြောင့် ဖြစ်သည်။ သင်၏ ဝိညာဉ်အသက်တာက သေချာသည့်အဆင့်တစ်ခုသို့ ရောက်ရှိသွားခြင်းမဟုတ်ဘဲ၊ သင့်ကို လက်ရှိနေ့ရက်အထိ လမ်းပြနေခဲ့သည်မှာ ငါ၏နှုတ်ကပတ်တော်များသာ ဖြစ်သည်၊ သင်၌ ကြီးမားသော ယုံကြည်ခြင်းရှိနေ၍ မဟုတ်ဘဲ ငါ့နှုတ်ကပတ်တော်များ၏ ဉာဏ်ပညာကြောင့်သာ သင်သည် ယခုတိုင် မလိုက်လျှောက်ဘဲ မနေနိုင်ဖြစ်ခဲ့ရခြင်း ဖြစ်သည်။ အကယ်၍သာ ယခု ငါမပြောဆိုပါက၊ ငါ့အသံကို မမြွက်ဆိုပါက၊ သင်သည် ဆက်လက်သွားနိုင်မည် မဟုတ်ပါ၊ သင်၏ရှေ့သို့ဆက်သွားနေခြင်းသည် ရုတ်တရက် ရပ်တန့်သွားပါလိမ့်မည်။ ဤသည်မှာ သင်တို့၏ ဝိညာဉ်အသက်တာအမှန် မဟုတ်လော။ မည်သည့်ကဏ္ဍများမှ ဝင်ရောက်ရမည်၊ သင်တို့၌ မရှိသောအရာအတွက် မည်သည့်ကဏ္ဍများတွင် လုပ်ဆောင်ရမည်တို့နှင့် ပတ်သက်သည့် အကြံအစည် သင်တို့၌မရှိ။ အဓိပ္ပာယ်ရှိသော လူ့ဘဝကို မည်သို့အသက်ရှင်နေထိုင်ရမည်၊ ဘုရားသခင်၏ ချစ်ခြင်းမေတ္တာကို မည်သို့ပြန်လည်ပေးဆပ်ရမည်၊ သို့မဟုတ် သန်မာထူခြားသော သက်သေကို မည်သို့ခံရမည်တို့ကို သင်တို့နားမလည်။ သင်တို့သည် ဤအရာအားလုံးကို မရရှိနိုင်ပါတကား။ သင်တို့သည် ပျင်းရိပြီး မိုက်မဲကြလေစွ။ သင်တို့လုပ်နိုင်သောအရာမှာ တစ်စုံတစ်ရာအပေါ် မှီခိုဖို့ရန်ဖြစ်ပြီး သင်တို့မှီခိုသောအရာသည် အလင်းသစ်ဟူသော သင်တို့ကို ရှေ့ကဦးဆောင်နေသော သူအပေါ်ကိုသာဖြစ်သည်။ ယနေ့ထိတိုင် သင်မလျှော့တမ်း လုပ်ဆောင်နိုင်စွမ်း ရှိခြင်းသည် အလင်းသစ်နှင့် များမကြာမီက ဖွင့်ဆိုချက်များအပေါ်တွင် လုံးဝအားထားနေခဲ့ခြင်းကြောင့် ဖြစ်သည်။ သင်တို့သည် စစ်မှန်သောလမ်းကို မီအောင်လိုက်ရာတွင် ကျွမ်းကျင်သော ပေတရုနှင့် ဘာတစ်ခုမျှမတူ၊ သို့မဟုတ် ယေဟောဝါကို အကြွင်းမဲ့ ကိုးကွယ်နိုင်ပြီး၊ ယေဟောဝါက မိမိကို မည်သို့ပင်စမ်းသပ်စေကာမူ၊ ယေဟောဝါက မိမိကိုကောင်းချီးပေးသည်ဖြစ်စေ၊ မပေးသည်ဖြစ်စေ ယေဟောဝါသည် ဘုရားသခင်ဖြစ်သည်ဟု ယုံကြည်နိုင်သော ယောဘနှင့် သင်တို့သည် ဘာတစ်ခုမျှမတူ။ သင်ရော ထိုအရာကို လုပ်နိုင်သလော။ သင်တို့သည် မည်ကဲ့သို့ သိမ်းပိုက်ခြင်း ခံခဲ့ရသနည်း။ ရှုထောင့်တစ်ခုက တရားစီရင်ခြင်း၊ ပြစ်တင်ဆုံးမခြင်းနှင့် ကျိန်ဆဲခြင်းတို့ဖြစ်ပြီး၊ အခြားသောရှုထောင့်မှာ သင်တို့ကိုသိမ်းပိုက်သော နက်နဲရာများ ဖြစ်သည်။ သင်တို့အားလုံးသည် မြည်းများကဲ့သို့ပင် ဖြစ်ကြသည်။ အကယ်၍ ငါပြောသောအရာသည် သိပ်မမြင့်မားပါက၊ မည်သည့်နက်နဲရာများမျှ မပါပါက သင်တို့သည် သိမ်းပိုက်ခြင်း မခံရနိုင်ပေ။ လူတစ်ဦးက တရားဟောနေပြီး သူသည် အချိန်ကာလအတိုင်းအတာတစ်ခုအထိ တူညီသော အကြောင်းအရာများကို အမြဲဟောပြောခဲ့လျှင်၊ သင်တို့အားလုံးသည် နှစ်နှစ်မပြည့်မီ ထွက်ပြေးသွားကြလိမ့်မည်ဖြစ်ပြီး၊ သင်တို့သည် ဆက်စခန်းသွားရန် တတ်နိုင်လိမ့်မည်မဟုတ်ချေ။ ပိုမိုနက်နဲစွာ မည်သို့သွားရမည်ကို သင်တို့မသိသကဲ့သို့ သမ္မာတရား သို့မဟုတ် အသက်လမ်းကို မည်သို့မီအောင်လိုက်ရမည်ကိုလည်း သင်တို့နားမလည်ပေ။ သင်တို့နားလည်သမျှမှာ နက်နဲရာများ သို့မဟုတ် ရူပါရုံများကို နားထောင်ခြင်း၊ သို့မဟုတ် ဘုရားသခင် မည်သို့အလုပ်လုပ်လေ့ရှိသည်ကို နားထောင်ခြင်း၊ သို့မဟုတ် ပေတရု၏ အတွေ့အကြုံများကို နားထောင်ခြင်း၊ သို့မဟုတ် ယေရှုလက်ဝါးကပ်တိုင်ပေါ် အသေခံခြင်းနောက်ခံအကြောင်းအရာတို့ကဲ့သို့သော ဇာတ်လမ်းရှည်ဖြစ်သည့် တစ်စုံတစ်ရာကို လက်ခံနေခြင်းသာ ဖြစ်သည်။ သင်တို့သည် ဤအရာများကို နားထောင်ရန်သာ ဆန္ဒရှိပြီး၊ သင်တို့နားထောင်လေလေ သင်တို့သည် ပိုမိုတက်ကြွလေလေဖြစ်သည်။ သင်တို့သည် မိမိတို့၏ ဝမ်းနည်းမှုနှင့် ပျင်းရိငြီးငွေ့မှုကို ဖယ်ရှားရန် ဤအရာအားလုံးကို နားထောင်ကြသည်။ သင်တို့၏ဘဝများသည် ဤဇာတ်လမ်းရှည် အကြောင်းအရာများဖြင့် အပြည့်အဝ အားဖြည့်ထားသည်။ ယနေ့တွင် သင်သည် ဤနေရာသို့ သင်၏ ကိုယ်ပိုင်ယုံကြည်ခြင်းဖြင့် ရောက်လာသည်ဟု ထင်သလော။ ဤအရာသည် သင်တို့ပိုင်ဆိုင်သော မဖြစ်စလောက်၊ သနားဖွယ်ရာ ဝိညာဉ်အသက်တာ မဟုတ်လော။ သင့်တို့၏ သမာဓိဂုဏ်က အဘယ်မှာနည်း။ သင်တို့၏ လူ့သဘာဝက အဘယ်မှာနည်း။ လူသားဘဝကို သင်တို့ ပိုင်ဆိုင်သလော။ စုံလင်အောင်ပြုခြင်း ခံရရန်အတွက် သင်တို့၌ အခြေခံသဘောတရား မည်မျှရှိသနည်း။ ငါပြောနေသည့်အရာက အကြောင်းအချက် ဟုတ်သလော။ ဤနည်းဖြင့် ငါပြောဆိုလုပ်ဆောင်သော်လည်း သင်တို့သည် ဂရုမစိုက်ဆဲရှိသည်။ သင်တို့သည် နောက်မှ လိုက်နေစဉ်တွင် စောင့်ကြည့်ကြသည်။ စိတ်မဝင်စားသည့် ပုံပန်းကို သင်တို့အမြဲထိန်းထားပြီး၊ သင်တို့ကို နဖားကြိုးတပ်၍ အမြဲဆွဲခေါ်နေရသည်။ သင်တို့အားလုံး စခန်းသွားနေခဲ့ပုံမှာ ထိုကဲ့သို့ ဖြစ်သည်။ သင်တို့ကို ယနေ့ကာလသို့ ဦးဆောင်လာခဲ့သည်မှာ ပြစ်တင်ဆုံးမခြင်း၊ စစ်ဆေးခြင်းနှင့် ဆုံးမခြင်းတို့သက်သက်သာ ဖြစ်သည်။ အသက်တာထဲ ဝင်ရောက်ခြင်းနှင့်ဆိုင်သည့် နှုတ်ကပတ်တော်အချို့ကိုသာ ဝေငှခဲ့ပါက၊ သင်တို့အားလုံးသည် ကြာမြင့်စွာကတည်းကပင် လမ်းချော်သွားခဲ့မည် မဟုတ်သလော။ သင်တို့တစ်ဦးစီသည် နောက်တစ်ဦးထက် သာ၍ပင် အထက်ဖား အောက်ဖိ လုပ်တတ်ကြသည်၊ အမှန်စင်စစ် သင်တို့သည် ညစ်ညူးသော ရေဖြင့်သာ ပြည့်နေကြသည်။ နက်နဲရာအချို့ကို သင်နားလည်ခဲ့ပြီး၊ ယခင်က လူတို့နားမလည်ခဲ့သော အရာအချို့ကိုလည်း သင်နားလည်ခဲ့သည်၊ ထို့ကြောင့် ယခုထိတိုင် သင်ခံနိုင်ရုံမျှ ရှိခဲ့ခြင်းဖြစ်သည်။ သင်တို့တွင် မလိုက်နာရန် အကြောင်းမရှိ၊ ထို့ကြောင့် သင်တို့သည် မိမိတို့ကိုယ်မိမိ အားတင်းရုံမျှသာပြုပြီး အလိုက်သင့်သာ မျောပါနေခဲ့ကြသည်။ ဤအရာသည် ငါ၏ နှုတ်ကပတ်တော်များအားဖြင့် ရရှိခဲ့သော ရလဒ်မျှသာဖြစ်သည်၊ သို့သော် ၎င်းသည် သင်တို့၏ ကိုယ်ပိုင်စွမ်းဆောင်မှု ဧကန်ပင် မဟုတ်ပါ။ ထိုအရာနှင့်ပတ်သက်၍ သင်တို့ကြွားဝါစရာ အဘယ်အကြောင်းမျှမရှိ။ ထို့ကြောင့် ဤအလုပ်အဆင့်တွင် အဓိကအားဖြင့် နှုတ်ကပတ်တော်များ မှတစ်ဆင့် လက်ရှိနေ့ရက်သို့ သင်တို့သည် ဦးဆောင်ခံခဲ့ရဖြစ်သည်။ သို့မဟုတ်ပါက သင်တို့ထဲမှ မည်သူသည် နာခံနိုင်စွမ်းရှိမည်နည်း။ ယနေ့ထိ မည်သူက ခံနိုင်ခဲ့မည်နည်း။ အစအဦးကပင် သင်တို့သည် ဖြစ်နိုင်သည့် အစောဆုံးအချိန်၌ ထွက်ခွာသွားရန် အလိုရှိခဲ့ကြသော်လည်း၊ သင်တို့ မလုပ်ဆောင်ရဲခဲ့ကြပေ၊ သင်တို့၌ သတ္တိမရှိခဲ့ကြ။ ယနေ့အထိတိုင် သင်တို့သည် စိတ်မပါ့တပါဖြင့် နောက်လိုက်နေခဲ့ကြသည်။

လက်ဝါးကပ်တိုင်ထက်ဝယ် ယေရှုရိုက်တင်ခံရပြီး ခွဲခွာသွားသည့်နောက်ပိုင်းမှသာလျှင် ပေတရုသည် မိမိကိုယ်ပိုင်လမ်းကြောင်းကို စတင်လျှောက်လှမ်းခဲ့သည်ဖြစ်ပြီး မိမိလျှောက်လှမ်းသင့်သောလမ်းကို စတင်လျှောက်လှမ်းခဲ့ခြင်း ဖြစ်သည်။ သူသည် မိမိ၏ အားနည်းချက်များနှင့် ချို့ယွင်းချက်များကို မြင်တွေ့ခဲ့ရပြီးနောက်မှသာ လေ့ကျင့်ပြင်ဆင်ပေးမှုကို စတင်ခံယူခဲ့လေသည်။ သူသည် ဘုရားသခင်အတွက် အလွန်းသေးနုပ်သော ချစ်ခြင်းမေတ္တာ ရှိခဲ့ပြီး ဆင်းရဲဒုက္ခခံလိုသော မိမိဆန္ဒသည် မလုံလောက်ကြောင်း၊ မိမိ၌ မည်သည့်ထိုးထွင်းအမြင်မျှ မရှိကြောင်းနှင့် မိမိ၏ ဆင်ခြင်တုံတရားသည် အားနည်းနေခဲ့ကြောင်း တွေ့ရှိခဲ့လေသည်။ မိမိကိုယ်တွင်း၌ ယေရှု၏အလိုတော်နှင့် မကိုက်ညီသည့် အရာများစွာရှိနေခဲ့ကြောင်း၊ ပုန်ကန်တတ်သည့်သဘောနှင့် ခုခံတော်လှန်တတ်သည့်သဘောရှိသော အရာများစွာနှင့် လူ့ဆန္ဒနှင့် ရောယှက်နေသည့်အရာများစွာ ရှိနေခဲ့သည်ကို သူမြင်တွေ့ခဲ့သည်။ ထိုသို့ဖြစ်သည်မှာ သူ့အနေဖြင့် ကဏ္ဍတစ်ခုစီအထဲသို့ ဝင်ပေါက်ရရှိခဲ့ပြီးမှသာ ဖြစ်ပေသည်။ ယေရှုက သူ့ကို ဦးဆောင်ခဲ့စဉ်တွင် ကိုယ်တော်သည် ပေတရု၏အနေအထားကို ဖွင့်ပြတော်မူခဲ့ရာ ပေတရုက ၎င်းကို ဝန်ခံလိုက်ပြီး တွင်တွင်ကြီး လက်ခံသဘောတူခဲ့သော်လည်း ထိုနောက်ပိုင်းအချိန်အထိ မှန်ကန်သော နားလည်သဘောပေါက်မှု သူ့မှာမရှိခဲ့ရှာပေ။ ထိုသို့ဖြစ်ခဲ့ရခြင်းမှာ ထိုအချိန်က သူသည် မည်သည့်အတွေ့အကြုံမျှ မရှိခဲ့သေးသည့်အပြင် မိမိ၏ ကိုယ်ပိုင်ဝိညာဉ်အသက်တာကိုပင် သိရှိခြင်းမရှိခဲ့သောကြောင့်ဖြစ်သည်။ ဆိုလိုသည်မှာ ငါသည်သင်တို့ကို ဦးဆောင်ဖို့အတွက် နှုတ်ကပတ်တော်များကိုသာ အသုံးပြုနေသည်ဖြစ်ရာ တိုတောင်းသောအချိန်တစ်ခုအတွင်း သင်တို့ကို စုံလင်စေဖို့မှာ မဖြစ်နိုင်ဘဲ သင်တို့အနေဖြင့် သမ္မာတရားကို နားလည်ပြီး သိရှိရန်သာ တတ်နိုင်လိမ့်မည်။ ဤသို့ဖြစ်ရသည်မှာ သင်တို့ကို သိမ်းပိုက်ပြီး သင်တို့စိတ်နှလုံးထဲတွင် သင်တို့ကို လက်ခံယုံကြည်စေခြင်းသည် လက်ရှိအမှုဖြစ်ပြီး လူများကို သိမ်းပိုက်ပြီးနောက်ပိုင်းမှသာ သူတို့အထဲမှအချို့သည် စုံလင်လာလိမ့်မည်ဖြစ်သောကြောင့်ဖြစ်သည်။ ယခုလက်ငင်းတွင် သင်တို့နားလည်သော ထိုရူပါရုံများနှင့် ထိုသမ္မာတရားများက သင်တို့၏အနာဂတ်အတွေ့အကြုံများအတွက် အုတ်မြစ်တစ်ခုကို တည်ဆောက်နေသည်၊ အနာဂတ်ဘေးဒဏ်ကြီးအတွင်း သင်တို့အားလုံး၌ ဤနှုတ်ကပတ်တော်များနှင့် သက်ဆိုင်သည့် လက်တွေ့ကျသော အတွေ့အကြုံများရှိကြရလိမ့်မည်။ နောင်တွင် စမ်းသပ်ခြင်းများ သင့်ထံသို့ရောက်လာပြီး သင်သည် ဘေးဒဏ်ကြီးကို ကြုံတွေ့ရသောအခါ သင်တို့အနေဖြင့် မည်သည့်ဘေးဒဏ်ကြီး၊ မည်သည့်စမ်းသပ်ခြင်းများ သို့မဟုတ် မည်သည့်ကပ်ဘေးများပင် ငါရင်ဆိုင်ရစေကာမူ ငါသည် ဘုရားသခင်ကို ကျေနပ်အားရစေရမည်ဟု ယနေ့သင်ပြောဆိုနေသော စကားများကို သင်တို့တွေးမိလိမ့်မည်။ ပေတရု၏ အတွေ့အကြုံကို စဉ်းစားကြည့်ပါ၊ ပြီးလျှင် ယောဘ၏ အတွေ့အကြုံကို စဉ်းစားကြည့်ပါ။ သင်သည် ယနေ့၏စကားများအားဖြင့် လှုံ့ဆော်မှုခံရပေမည်။ ဤနည်းအားဖြင့်သာ သင်တို့ယုံကြည်ခြင်းကို လှုံ့ဆော်နိုင်ပေသည်။ ပေတရုသည် ထိုအချိန်တွင် မိမိအနေဖြင့် ဘုရားသခင်၏ တရားစီရင်မှုနှင့် ပြစ်တင်ဆုံးမမှုကို ခံယူဖို့ရန် ထိုက်တန်မှုမရှိပါကြောင်းဖြင့် ပြောဆိုခဲ့သည်ဖြစ်ရာ သင်တို့အနေနှင့်လည်း မိမိအားဖြင့် လူအပေါင်းတို့သည် ဘုရားသခင်၏ ဖြောင့်မတ်သော စိတ်သဘောထားကို မြင်တွေ့စေလိုသောဆန္ဒ ဖြစ်ပေါ်လာပေလိမ့်မည်။ သင်တို့သည် ကိုယ်တော်၏ တရားစီရင်မှုနှင့် ပြစ်တင်ဆုံးမမှုကို ခံယူဖို့ရန် အဆင်သင့်လိုလားကြလိမ့်မည်ဖြစ်ပြီး၊ ကိုယ်တော်၏ တရားစီရင်မှု၊ ပြစ်တင်ဆုံးမမှုနှင့် ကျိန်ခြင်းတို့သည် သင်တို့အတွက် နှစ်သိမ့်မှုတစ်ခုဖြစ်လာပေလိမ့်မည်။ လက်ရှိတွင် သင်တို့အနေဖြင့် သမ္မာတရားနှင့် လေ့ကျင့်ပြင်ဆင်ပေးမှုကို မခံယူ၍မရပေ။ သင်တို့အနေဖြင့် အနာဂတ်တွင် ခိုင်မာစွာ ရပ်တည်နိုင်လိမ့်မည် မဟုတ်သည့်အပြင် လက်ရှိအမှုကို ဖြတ်သန်းသွားနိုင်စွမ်းလည်း ရှိကြမည်မဟုတ်ချေ။ ဤနည်းဖြင့် သင်တို့သည် ဖျက်စီးပစ်ခြင်းနှင့် အပြစ်ဒဏ်ပေးခြင်းကို ခံရသူဖြစ်မည် မဟုတ်လော။ ယခုလက်ငင်းတွင် သင်တို့အပေါ်သို့ မည်သည့်အချက်အလက်မျှ ကျရောက်ခဲ့ခြင်းမရှိသေးဘဲ သင်တို့၏ အားနည်းချို့တဲ့နေသည့် ကဏ္ဍတိုင်းတွင် ငါသည် ထောက်ပံ့ပေးလျက်ရှိနေ၏။ ငါသည် ကဏ္ဍအသီးသီးမှနေ၍ ပြောဆိုနေခြင်းဖြစ်သည်။ သင်တို့သည် ဒုက္ခဆင်းရဲများစွာကို ခံစားနေရခြင်း လုံးဝမရှိသေးဘဲ၊ ရနိုင်သည့်အထဲက လှမ်းယူလိုက်ရုံသာပြုပြီး၊ မည်သည့်အဖိုးအခမျှလည်း ပေးရခြင်းမရှိ၊ ယုတ်စွအဆုံး စစ်မှန်သည့် ကိုယ်တိုင်အတွေ့အကြုံများနှင့် ထိုးထွင်းအမြင်များပင် မရှိပေ။ သို့ဖြစ်၍ သင်တို့သိနားလည်ထားသည်မှာ သင်တို့၏ဝိညာဉ်အသက်တာအမှန် မဟုတ်ပေ။ သင်တို့သည် နားလည်ခြင်း၊ သိခြင်းနှင့် မြင်ခြင်းတို့နှင့်သာ ကန့်သတ်ထားခြင်းခံရပြီး ရိတ်သိမ်းခြင်းများစွာ မပြုနိုင်ကြပေ။ အကယ်၍ ငါသည် သင်တို့အပေါ် ဘယ်သောအခါမျှ ဂရုမစိုက်ခဲ့ဘဲ သင်တို့ကို မိမိတို့ကိုယ်ပိုင်နေအိမ်တွင် အတွေ့အကြုံများရရှိစေခဲ့မည်ဆိုလျှင် သင်တို့သည် ကြာမြင့်စွာကတည်းက ကမ္ဘာကြီးထဲသို့ လှည့်ပြန်၍ ထွက်ပြေးတိမ်းရှောင်ခဲ့ကြမည်ဖြစ်၏။ အနာဂတ်တွင် သင်တို့လျှောက်လှမ်းမည့်လမ်းသည် ဒုက္ခဆင်းရဲ၏လမ်းကြောင်းတစ်ခုဖြစ်ပေလိမ့်မည်။ ထို့ပြင် သင်တို့သည် လမ်းခရီး၏ ယခုခရီးတစ်ထောက်ကို ကောင်းမွန်စွာ လျှောက်လှမ်းခဲ့သည်ရှိသော် နောက်နောင် ပို၍ကြီးမားသော ဘေးဒဏ်ဒုက္ခကို သင်တို့တွေ့ကြုံကြသောအခါ သင်တို့၌ သက်သေခံချက် ရှိကြပေလိမ့်မည်။ သင်သည် လူ့ဘဝ၏အရေးပါမှုကို သိနားလည်ပြီး လူ့ဘဝ၏လမ်းကြောင်းမှန်ပေါ်တွင် လျှောက်ခဲ့လျှင်၊ အနာဂတ်တွင် ဘုရားသခင်သည် သင့်ကို မည်သို့မည်ပုံ ပြုမူဆက်ဆံသည်ဖြစ်စေ သင့်အနေဖြင့် ကိုယ်တော်၏အကြံအစည်များကို မည်သည့်စောဒကတက်မှုများ သို့မဟုတ် ရွေးချယ်မှုများမရှိဘဲ နာခံမည်ဆိုလျှင် သင်၌ ဘုရားသခင်၏ မည်သည့် တောင်းဆိုမှုမျှ ရှိတော့မည်မဟုတ်ဘဲ ဤနည်းဖြင့် သင်သည် တန်ဖိုးရှိသောလူဖြစ်ပါလိမ့်မည်။ ယခုလောလောဆယ်တွင် သင်သည် ဘေးဒဏ်ကြီးကို တွေ့ကြုံခြင်းမရှိသေးသည်ဖြစ်၍ ဘယ်အရာကိုမဆို နာခံနိုင်ကြသည်။ ဘုရားသခင်သည် မည်သို့ပင် ဦးဆောင်လမ်းပြသည်ဖြစ်စေ ကောင်းမြတ်တော်မူပြီး ကိုယ်တော်၏အကြံအစည်များအားလုံးကို နာခံပါမည်ဟု သင်ဆို၏။ ဘုရားသခင်က သင့်ကို ပြစ်တင်ဆုံးမသည်ဖြစ်စေ ကျိန်တော်မူသည်ဖြစ်စေ သင့်အနေဖြင့် ကိုယ်တော်ကို ကျေနပ်အားရစေဖို့ရန် ဆန္ဒရှိနေမည်ဟု သင်ဆို၏။ ဤသို့ပြောဆိုခဲ့လျက်ပင် ယခုသင်ပြောဆိုသည့်အရာသည် သင်၏ဝိညာဉ်အသက်တာကို ကိုယ်စားမပြုပေ။ ယခု သင်လုပ်ဆောင်လိုသည့်အရာက သင်သည် အဆုံးတိုင်အောင် လိုက်လျှောက်နိုင်ကြောင်းကို ပြသနိုင်ခြင်းမရှိပေ။ ဘေးဒဏ်ကြီးများ သင့်အပေါ်သို့ ကျရောက်လာသောအခါ သို့မဟုတ် ဖိစီးနှိပ်စက်မှု သို့မဟုတ် အနိုင်အထက်ပြုမှု သို့မဟုတ် ပို၍ကြီးမားသော စမ်းသပ်မှုများကို သင်တွေ့ကြုံရသောအခါ အထက်ပါစကားများကို သင်တို့သည် ပြောဆိုနိုင်ကြမည်မဟုတ်ချေ။ အကယ်၍ သင်သည် ထိုသို့သော သိရှိနားလည်မှုမျိုး ရှိနိုင်ပြီး ခိုင်မြဲစွာရပ်တည်နိုင်မည်ဆိုပါက ဤသည်သာလျှင် သင်တို့၏ ဝိညာဉ်အသက်တာဖြစ်ပေလိမ့်မည်။ ပေတရုသည် ထိုအချိန်က မည်သည့်အရာနှင့်တူခဲ့သနည်း။ သူက “သခင်၊ ကျွန်ုပ်သည် ကိုယ်တော့်အတွက် မိမိအသက်ကို စတေးပါမည်။ ကိုယ်တော်သည် ကျွန်ုပ်ကို သေဖို့အလိုရှိတော်မူခဲ့လျှင် ကျွန်ုပ်သေပါမည်” ဟု ပြောဆိုခဲ့သည်။ ဤသည်မှာ ထိုအချိန်က သူဆုတောင်းခဲ့သည့် နည်းလမ်းဖြစ်ပြီး သူက “အခြားသူများသည် ကိုယ်တော့်ကို မချစ်ကြလျှင်ပင် ကျွန်ုပ်အနေဖြင့် အဆုံးတိုင်အောင် ကိုယ်တော့်ကို ချစ်ရပါမည်။ ကျွန်ုပ်သည် ကိုယ်တော့်နောက်တော်သို့ တစ်ချိန်လုံး လိုက်ပါမည်” ဟုလည်း သူပြောဆိုခဲ့သည်။ ဤသည်မှာ ထိုအချိန်က သူပြောဆိုခဲ့သည်များဖြစ်၏။ သို့ရာတွင် စမ်းသပ်မှုများ သူ့အပေါ်ကျရောက်လာသည်နှင့်တစ်ပြိုင်နက် သူသည် ပြိုလဲသွားပြီး ငိုကြွေးနေခဲ့လေတော့သည်။ ပေတရုက သခင့်ကို သုံးကြိမ်ငြင်းပယ်ခဲ့သည်ကို သင်တို့အားလုံး သိထားကြသည် မဟုတ်လော။ မိမိတို့အပေါ်သို့ စမ်းသပ်မှုများ ရောက်ရှိလာသည့်အခါ လူ့အားနည်းချက်များကို ဖော်ပြလျက် ငိုကြွေးကြမည့်သူ အများအပြားရှိသည်။ သင်သည် မိမိကိုယ်တိုင်၏ သခင်မဟုတ်ပါ။ ဤအချက်၌ သင်သည် မိမိကိုယ်ကိုယ် မထိန်းချုပ်နိုင်ပါ။ ယနေ့သင်သည် အကယ်ပင် အောင်မြင်ကောင်း အောင်မြင်နေပေမည်။ သို့သော် ဤသည်မှာ သင့်အနေဖြင့် သင့်လျော်သော ပတ်ဝန်းကျင်တစ်ခု ရရှိထားသောကြောင့်သာဖြစ်၏။ အကယ်၍ မနက်ဖြန်တွင် ၎င်းသည် အပြောင်းအလဲရှိလာမည်ဆိုလျှင် သင့်အနေဖြင့် မိမိ၏ သူရဲဘောကြောင်မှုနှင့် မစွမ်းဆောင်နိုင်မှုကို ပြသလိမ့်မည်ဖြစ်ပြီး သင်၏ စက်ဆုပ်ဖွယ်ကောင်းမှုနှင့် မထိုက်တန်မှုတို့ကိုလည်း ပြသလာမည်သာဖြစ်၏။ သင်၏ “ယောက်ျားပီသမှု” သည် ကျဆင်းပျောက်ကွယ်သည်မှာ ကြာခဲ့မည်ဖြစ်ပြီး တစ်ခါတစ်ရံ သင့်အနေဖြင့် လက်မြှောက်အရှုံးပေးပြီး ထွက်သွားမည်ဖြစ်သည်။ သင့်အနေဖြင့် ထိုအချိန်အခိုက်အတန့်တွင် သိရှိနားလည်ခဲ့သည်များမှာ သင်၏ဝိညာဉ်အသက်တာအမှန် မဟုတ်ခဲ့သည်ကို ဤအချက်က ပြသလျက်ရှိပေသည်။ လူတို့သည် ဘုရားသခင်ကို အမှန်ချစ်မချစ်ကိုလည်းကောင်း၊ သူတို့အနေဖြင့် ဘုရားသခင်၏ အကြံအစည်ကို အမှန်တကယ် နာခံနိုင်စွမ်း ရှိမရှိကိုလည်းကောင်း၊ သူတို့အနေဖြင့် မိမိတို့အသက်ကို စတေးရမည်ဆိုလျှင်ပင် ဘုရားသခင်၏ တောင်းဆိုသည့်အရာကို လုပ်ဆောင်ခြင်းထဲသို့ မိမိတို့စွမ်းအားကို အကုန်အစင်သုံးနိုင်စွမ်းရှိမရှိ၊ ဘုရားသခင်ထံသို့ ဆက်လက်၍ ကိုးကွယ်ဆည်းကပ်ပြီး အကောင်းဆုံးကို ပေးကမ်းနိုင်ခြင်းရှိမရှိ စသည်တို့ကို မြင်ဖို့ရန် လူပုဂ္ဂိုလ်တစ်ဦး၏ ဝိညာဉ်အသက်တာအမှန်ကို ကြည်ရှုရမည် ဖြစ်သည်။

ဤစကားများသည် ယခုပြောထုတ်ထားပြီးဖြစ်ကြောင်း သင့်အနေဖြင့် မှတ်မိနေရပေမည်။ နောင်တွင် သင်သည် သာ၍ကြီးမားသော ဘေးဒဏ်ကြီးနှင့် သာ၍ကြီးမားသော ဒုက္ခဆင်းရဲကို ရင်ဆိုင်တွေ့ကြုံလိမ့်မည်ဖြစ်၏။ စုံလင်ဖို့ဆိုသည်မှာ လွယ်ကူရိုးစင်းသောအရာတစ်ခုမဟုတ်ပါ။ အနည်းဆုံး သင့်အနေဖြင့် ယောဘ၏ယုံကြည်ခြင်း သို့မဟုတ် သူ့ယုံကြည်ခြင်းထက် ပိုကြီးသောယုံကြည်ခြင်းကိုပင် ပိုင်ဆိုင်ထားရပေမည်။ အနာဂတ်ရှိ စမ်းသပ်မှုများသည် ယောဘခံရသော စမ်းသပ်မှုများထက် ပို၍ကြီးမားလိမ့်မည်ဖြစ်ကြောင်းနှင့် သင်သည် ရေရှည်ပြစ်တင်ဆုံးမခြင်းကို ရင်ဆိုင်တွေ့ကြုံရဦးမည်ဖြစ်ကြောင်း သင့်အနေဖြင့် သိရှိထားသင့်ပေသည်။ ဤသည်မှာ လွယ်ကူရိုးရှင်းသည့်အရာတစ်ခု ဟုတ်သလော။ အကယ်၍ သင်၏ အရည်အသွေးသည် မတိုးတက်နိုင်ဘဲ သင်၏ သိရှိနားလည်နိုင်ခြင်းအစွမ်းအစသည် အားနည်းနေပြီး သင်သည် အနည်းငယ်သာ သိရှိသည်ဆိုလျှင် ထိုအချိန်တွင် သင့်အနေဖြင့် သက်သေတစ်ခုမျှ ရှိလိမ့်မည်မဟုတ်ဘဲ လူရယ်စရာတစ်ခုဖြစ်ကာ စာတန်အတွက် ကစားစရာတစ်ခု ဖြစ်လာပေလိမ့်မည်။ အကယ်၍ သင့်အနေဖြင့် ဤရူပါရုံများကို ယခုဆုပ်ကိုင်မထားနိုင်သေးလျှင် သင်၌ အခြေခံအုတ်မြစ် လုံးဝမရှိဘဲ အနာဂတ်တွင် သင်သည် ပစ်ပယ်ခြင်းခံရပေလိမ့်မည်။ လမ်းခရီး၏ အစိတ်အပိုင်းတစ်ခုစီတိုင်းသည် လျှောက်လှမ်းဖို့ မလွယ်ကူပါသဖြင့် ဤကိစ္စကို ပေါ့တန်စွာ သဘောမထားပါနှင့်။ ယခုပင် ဤကိစ္စကို ဂရုတစိုက်ချိန်ဆလျက် ဤခရီး၏ နောက်ဆုံးခရီးတစ်ထောက်ကို မည်ကဲ့သို့ ကောင်းမွန်စွာလှမ်းနိုင်ပါမည်အကြောင်း ပြင်ဆင်မှုများ ပြုလုပ်ထားလော့။ ဤခရီးသည် အနာဂတ်တွင် လျှောက်လှမ်းရမည့် လမ်းခရီးဖြစ်ပြီး လူတိုင်းလျှောက်လှမ်းရမည်ဖြစ်သည်။ ယခုလက်ရှိ သိနားလည်ခြင်းကို တစ်ဖက်နားမှဝင်၍ တစ်ဖက်နားမှထွက်သွားဖို့ရန် ခွင့်မပြုရ။ ထို့အပြင် သင့်ကို ငါပြောဆိုထားသမျှ အားလုံးကို လေကန်ခြင်းတစ်ခုအဖြစ်သာ မထင်နှင့်။ ထိုအရာအားလုံးကို အသုံးချရမည့်နေ့ရက် ရောက်ရှိလာမည်ဖြစ်ရာ စကားများသည် အချည်းနှီး ပြောဆိုထားခြင်းမရှိနိုင်ပေ။ ယခုလက်ရှိအချိန်သည် မိမိကိုယ်ကိုယ် လေ့ကျင့်ပြင်ဆင်ရမည့်အချိန် ဖြစ်သည်။ ယခုသည် အနာဂတ်အတွက် လမ်းခင်းရမည့်အချိန်ဖြစ်သည်။ နောင်တွင် လျှောက်လှမ်းရမည့် လမ်းခရီးကို သင့်အနေဖြင့် ပြင်ဆင်ထားသင့်သည်။ သင့်အနေဖြင့် နောင်တွင် မည်ကဲ့သို့ ခိုင်မြဲစွာရပ်တည်နိုင်မည့်အကြောင်းကို စိုးရိမ်ကာ ပူပန်နေသင့်ပြီး သင်၏အနာဂတ်ခရီးအတွက် ကောင်းစွာ ပြင်ဆင်ထားသင့်ပေသည်။ လောဘလွန်ကျူးပြီး ပျင်းရိမနေနှင့်။ သင်လိုအပ်သည့်အရာမှန်သမျှကို ရရှိနိုင်မည့်အကြောင်း သင်၏အချိန်ကို အကောင်းဆုံးအသုံးချနိုင်ဖို့ သင့်အနေဖြင့် မိမိတတ်နိုင်သမျှ အရာအားလုံးကို လုံးလုံးလျားလျား လုပ်ဆောင်ရပါမည်။ သင်နားလည်သဘောပေါက်နိုင်မည့်အကြောင်း ငါသည် သင့်ကို အရာရာတိုင်းပေးနေသည်။ သုံးနှစ်မပြည့်တတ်မီအတွင်း ငါသည် များစွာပြောဆိုခဲ့ပြီး များစွာအမှုပြုခဲ့သည်ကို သင်တို့အနေဖြင့် မျက်ဝါးထင်ထင် မြင်တွေ့ခဲ့ကြပြီးဖြစ်၏။ ဤနည်းဖြင့်အလုပ်လုပ်ခြင်း၏ ကဏ္ဍတစ်ခုမှာ လူတို့သည် အလွန်အားနည်းချို့တဲ့နေသောကြောင့်ဖြစ်ပြီး အခြားကဏ္ဍတစ်ခုမှာ အချိန်သည် တိုတောင်းလွန်းသောကြောင့်ဖြစ်၍ နောက်ထပ်အချိန်ဆွဲ၍ မရတော့သောကြောင့်ဖြစ်သည်။ သင်၏ စိတ်ကူးယဉ်သည့်လမ်းစဉ်အပေါ် အခြေခံ၍၊ လူတို့အနေဖြင့် သက်သေခံနိုင်ပြီး အသုံးပြုခြင်းမခံရမီ အတွင်းပိုင်း ပြည့်စုံသည့် ရှင်းလင်းမှုတစ်ခု ဦးစွာ ရရှိရပါမည်။ ယင်းမှာ နှေးကွေးလွန်းသည် မဟုတ်ပါလား။ သို့ဆိုလျှင် ငါသည် မည်မျှကြာကြာ သင့်ကို အပေါင်းအဖော်လုပ်ပေးနေရဦးမည်နည်း။ သင့်အနေဖြင့် ငါသွားကျဲဆံဖြူသည်အထိ သင့်ကို အဖော်ပြုပေးနေစေမည်ဆိုလျှင် ယင်းသည် မဖြစ်နိုင်သည့်ကိစ္စဖြစ်သည်။ သာ၍ကြီးမားသော ဘေးဒဏ်ကြီးကို ရင်ဆိုင်တွေ့ကြုံခြင်းဖြင့် လူအပေါင်းတို့၏အတွင်းထဲတွင် စစ်မှန်သော နားလည်သဘောပေါက်မှုကို ရရှိလာပေလိမ့်မည်။ ဤသည်မှာ အမှု၏ အဆင့်တစ်ဆင့်ဖြစ်သည်။ ယနေ့တွင် မိတ်သဟာယဖွဲ့ ဆေးနွေးထားသော ရူပါရုံများကို သင်အပြည့်အဝ နားလည်ပြီး စစ်မှန်သောဝိညာဉ်အသက်တာကို သင်ရရှိသောအခါ အနာဂတ်တွင် သင်ရင်ဆိုင်တွေ့ကြုံရမည့် မည်သည့်ခက်ခဲမှုကမျှ သင့်ကို အနိုင်ယူလိမ့်မည်မဟုတ်ဘဲ သင်သည် ၎င်းတို့ကို ကြံ့ကြံ့ခံရပ်တည်နိုင်လိမ့်မည်ဖြစ်သည်။ ငါသည် အမှု၏ ဤနောက်ဆုံးအဆင့်ကိုပြီးစီး၍ နောက်ဆုံးနှုတ်ကပတ်တော်များကို မြွက်ဆိုပြီးသောအခါ အနာဂတ်တွင် လူတို့သည် ကိုယ့်လမ်းခရီးကို ကိုယ်လျှောက်လှမ်းဖို့ လိုပေလိမ့်မည်။ ဤအချက်သည် ယခင် ပြောဆိုထားသည့် နှုတ်ကပတ်တော်များကို ပြည့်စုံစေလိမ့်မည်ဖြစ်သည်။ သန့်ရှင်းသောဝိညာဉ်တော်၌ လူတစ်ဦးစီအတွက် တာဝန်ပေးစေခိုင်းချက်တစ်ရပ်နှင့် လူပုဂ္ဂိုလ်တစ်ဦးစီတိုင်း၏အထဲတွင် လုပ်ဆောင်ဖို့ အမှုတစ်ခုရှိနေ၏။ အနာဂတ်တွင် သန့်ရှင်းသောဝိညာဉ်တော်၏ ဦးဆောင်မှုအားဖြင့် လူတစ်ဦးစီတိုင်းသည် မိမိတို့လျှောက်လှမ်းသင့်သော ခရီးလမ်းအသီးသီးကို လျှောက်ရလိမ့်မည်ဖြစ်သည်။ ဘေးဒဏ်ကြီးကို ရင်ဆိုင်တွေ့ကြုံနေရစဉ်တွင် အခြားသူများအတွက် မည်သူက ဂရုစိုက်ပေးနိုင်လိမ့်မည်နည်း။ တစ်ဦးချင်းစီတို့သည် မိမိတို့ဒုက္ခဆင်းရဲကိုယ်စီ ရှိနေကြသည်ဖြစ်ပြီး မိမိတို့ဝိညာဉ်အသက်တာ ကိုယ်စီရှိနေကြသည်ဖြစ်၏။ တစ်ဦး၏ ဝိညာဉ်အသက်တာသည် အခြားတစ်ဦး၏ဝိညာဉ်အသက်တာနှင့် တူသည်မဟုတ်ချေ။ ခင်ပွန်းသည်တို့သည် မိမိတို့ဇနီးသည်များကို ဂရုစိုက်လိမ့်မည်မဟုတ်ဘဲ မိဘတို့သည် မိမိတို့သားသမီးများကို ဂရုစိုက်မည် မဟုတ်ပေ။ မည်သူတစ်ဦးတစ်ယောက်ကမျှ အခြားတစ်ဦးကို ဂရုစိုက်နိုင်လိမ့်မည်မဟုတ်ပေ။ ယခုအချိန်ကဲ့သို့ အပြန်အလှန် ဂရုစိုက်မှု ထောက်မမှုများ ရှိနိုင်တော့မည် မဟုတ်ပေ။ ၎င်းသည် လူပုဂ္ဂိုလ်အမျိုးအစားတိုင်းကို လှစ်ဟပြသောအချိန်တစ်ခု ဖြစ်ပေလိမ့်မည်။ ဤသည်မှာ သိုးထိန်းကို ဘုရားသခင်က ရိုက်သတ်လိုက်သောအခါ သိုးစုသည် ကွဲလွင့်ကုန်ကြလိမ့်မည့်အကြောင်းဖြစ်ပြီး ထိုအချိန်တွင် သင်တို့ထံ၌ စစ်မှန်သောခေါင်းဆောင် တစ်ဦးမျှရှိမည်မဟုတ်ပေ။ လူတို့သည် ကွဲပြားကြလိမ့်မည်ဖြစ်ရာ ယခုကဲ့သို့ အစုအဝေးတစ်ခုအဖြစ် အတူလာရောက်စုဝေးနိုင်လိမ့်မည်မဟုတ်ပေ။ နောက်ပိုင်းတွင် သန့်ရှင်းသောဝိညာဉ်တော်၏ လုပ်ဆောင်မှု မရှိသောသူတို့သည် မိမိတို့၏ စရိုက်မှန်ကို ပြသကြပေလိမ့်မည်။ ခင်ပွန်းသည်တို့သည် မိမိတို့ဇနီးမယားများကို ရောင်းစားကြလိမ့်မည်ဖြစ်ပြီး ဇနီးသည်များက မိမိတို့ခင်ပွန်းသည်များကို ရောင်းစားကြလိမ့်မည်ဖြစ်သည်။ သားသမီးများက မိမိတို့မိဘများကို ရောင်းစားကြလိမ့်မည်ဖြစ်ပြီး မိဘများက မိမိတို့သားသမီးများကို ညှဉ်းဆဲကြပေလိမ့်မည် ဖြစ်ရကား၊ လူ့စိတ်နှလုံးကို မှန်းဆ၍ ရနိုင်လိမ့်မည်မဟုတ်ပေ။ တစ်ဦးတစ်ယောက်အနေဖြင့် လုပ်ဆောင်၍ရနိုင်သောအရာမှာ မိမိ၌ရှိနေသောအရာကို ကိုင်စွဲဖို့နှင့် လမ်းခရီး၏ နောက်ဆုံးခရီးတစ်ထောက်ကို ကောင်းမွန်စွာလျှောက်လှမ်းဖို့သာ ဖြစ်ပေသည်။ ယခုလောလောဆယ်အချိန်တွင် သင်တို့အနေဖြင့် ဤအရာကို ရှင်းလင်းစွာမမြင်ရဘဲ သင်တို့အားလုံးသည် အဝေးမှုန်လျက် ရှိနေကြ၏။ အမှု၏ဤအဆင့်ကို အောင်မြင်စွာ ရင်ဆိုင်တွေ့ကြုံသွားဖို့မှာ လွယ်ကူသောအရာမဟုတ်ပေ။

ဘေးဒဏ်ကြီးကာလသည် ရှည်ကြာလွန်းမည်မဟုတ်ဘဲ တစ်နှစ်ပင်ကြာမည်မဟုတ်ပေ။ အကယ်၍ ယင်းသည် တစ်နှစ်မျှ ရှည်ကြာမည်ဆိုလျှင် အမှု၏ နောက်အဆင့်ကို နှောင့်နှေးစေမည်ဖြစ်ပြီး လူတို့၏ ဝိညာဉ်အသက်တာများမှာ အရည်အသွေး ပျက်ပြားလိမ့်မည်ဖြစ်သည်။ အကယ်၍ ယင်းသည် အလွန်ရှည်ကြာခဲ့မည်ဆိုလျှင် သူတို့အနေဖြင့် ၎င်းကို တောင့်ခံနိုင်လိမ့်မည် မဟုတ်ပေ။ သူတို့၏ ဝိညာဉ်အသက်တာသည် အကန့်အသတ်များရှိနေကြသည်ဖြစ်၏။ ငါ၏ကိုယ်ပိုင်အမှုကို ဆောင်ရွက်ပြီးနောက်တွင် နောက်တစ်ဆင့်မှာ လူတို့အနေဖြင့် မိမိတို့ လျှောက်လှမ်းသင့်သောလမ်းခရီးကို လျှောက်လှမ်းဖို့ ဖြစ်ပေလိမ့်မည်။ လူတိုင်းသည် မည်သည့်လမ်းခရီးကို မိမိလျှောက်လှမ်းသင့်သည်ကို သိရှိနားလည်ရမည်ဖြစ်သည်။ ဤခရီးသည် ဒုက္ခဆင်းရဲခြင်း၏ လမ်းခရီးနှင့် ဒုက္ခဆင်းရဲခြင်းဖြစ်စဉ်တစ်ခုဖြစ်ပြီး ဘုရားသခင်ကို ချစ်ဖို့ရန် သင်၏ဆန္ဒကို စစ်ဆေးခြင်း၏ လမ်းခရီးတစ်ခုလည်းဖြစ်သည်။ မည်သည့် သမ္မာတရားထဲသို့ သင်ဝင်ရောက်သင့်သည်၊ မည်သည့် သမ္မာတရားများကို သင်ထပ်ဖြည့်သင့်သည်၊ မည်ကဲ့သို့ သင်တွေ့ကြုံခံစားသင့်သည်၊ မည်သည့်လမ်းကြောင်းမှ သင်ဝင်ရောက်သင့်သည် စသည်တို့အားလုံးကို သင့်အနေဖြင့် သိရှိနားလည်ထားရမည်ဖြစ်၏။ သင့်အနေဖြင့် ယခုပင် မိမိကိုယ်ကိုယ် လေ့ကျင့်ပြင်ဆင်ထားရမည်ဖြစ်သည်။ အကယ်၍ သင့်အနေဖြင့် မိမိထံသို့ ဘေးဒဏ်ကြီးရောက်လာသည်အထိ စောင့်နေမည်ဆိုလျှင် နောက်ကျလွန်းသွားပေလိမ့်မည်။ လူတိုင်းလူတိုင်းသည် မိမိတို့၏ အသက်ကိုယ်စီအတွက် ဝန်ထုပ်ဝန်ပိုးတစ်ခုစီကို ထမ်းရွက်ရမည်ဖြစ်သည်။ အခြားသူများ၏ သတိပေးခြင်းကိုလည်းကောင်း သို့မဟုတ် သင့်ကို သူတို့အရိပ်အကဲပြောမည်ကို အမြဲစောင့်မနေနှင့်။ ငါသည် များစွာပြောပြခဲ့ပြီးသော်လည်း သင့်အနေဖြင့် မည့်သည့်သမ္မာတရားထဲသို့ ဝင်ရောက်သင့်ကြောင်း သို့မဟုတ် မည်သည့်သမ္မာတရားနှင့် မိမိကိုယ်ကိုယ် လေ့ကျင့်ပြင်ဆင်သင့်ကြောင်း သိရှိခြင်း မရှိသေးချေ။ ဤအချက်က သင်သည် ဘုရားသခင်၏ နှုတ်ကပတ်တော်ကို ဖတ်ရှုခြင်းထဲသို့ ကြိုးစားအားထုတ်မှု မပြုကြောင်း ပြသလျက်ရှိသည်။ သင့်အနေဖြင့် မိမိအသက်အတွက် မည်သည့်ဝန်ထုပ်ဝန်ပိုးမျှ ထမ်းရွက်ခြင်းမရှိပါတကား။ မည်သို့အဆင်ပြေနိုင်ပါမည်နည်း။ သင်အနေဖြင့် မည်သည့်အရာအထဲသို့ မိမိဝင်ရောက်သင့်သည်ကို ရှင်းလင်းသိရှိခြင်းမရှိဘဲ အဘယ်အရာကို မိမိသိရှိနားလည်သင့်သည်ကို သိရှိနားလည်ခြင်းမရှိ ဖြစ်နေပြီး မည်သည့်အနာဂတ်ခရီးလမ်းကို မိမိလျှောက်လှမ်းသင့်သည်ဆိုသည့်အထိပင် သင်သည် လုံးဝဥဿုံ သတိမမူမိဘဲ ဖြစ်နေတော့သည်။ သင်သည် အမှိုက်သရိုက်အစအနမျှသာ ဖြစ်သည်မဟုတ်လော။ သင်သည် အဘယ်အတွက်များ အသုံးဝင်သေးသနည်း။ ယခု သင်တို့လုပ်နေကြသည်မှာ သင်တို့၏ကိုယ်ပိုင်လမ်းများကို တည်ဆောက်နေခြင်းနှင့် ဖောက်လုပ်နေခြင်းသာဖြစ်၏။ လူတို့သည် အဘယ်အရာကို ဆောင်ရွက်ရရှိသင့်သည်ကိုလည်းကောင်း လူသားမျိုးနွယ်အတွက် ဘုရားသခင့် တောင်းဆိုချက်များ၏ စံချိန်စံနှုန်းကိုလည်းကောင်း သင့်အနေဖြင့် သိရှိထားရမည်ဖြစ်သည်။ အောက်ပါအတိုင်း သင်နားလည်သိရှိထားရမည်။ မည်သို့ပင်ဖြစ်စေ ငါသည် အလွန်ဖောက်ပြန်နေသည့်တိုင် ငါ့အနေဖြင့် ဘုရားသခင့်ရှေ့တော်၌ ဤအပြစ်အနာဆာများကို ပြုပြင်ရမည်။ ဘုရားသခင်က ငါ့ကို ပြောမပြခင်တုန်းက ငါသည် သိရှိနားလည်ခြင်းမရှိခဲ့ပါ။ သို့သော် ယခုတွင် ကိုယ်တော်သည် ငါ့ကို ပြောပြထားခဲ့ပြီဖြစ်၍ ငါသည် နားလည်သိရှိခဲ့ပြီးဖြစ်သည့်အားလျော်စွာ ငါ့အနေဖြင့် ၎င်းကိုပြုပြင်ဖို့ အမြန်ဆုံး လုပ်ဆောင်ရမည်ဖြစ်ပြီး ယင်းမှာ သာမန်လူ့သဘာဝကို အသက်ရှင်ဖို့နှင့် ဘုရားသခင်၏အလိုတော်ကို ကျေနပ်အားရစေနိုင်သော ပုံရိပ်တစ်ခုအဖြစ် ရှင်သန်သွားဖို့ဖြစ်သည်။ အကယ်၍များ ငါ့အနေဖြင့် ပေတရုပြုခဲ့သည့်အတိုင်း မရှင်သန်နိုင်ခဲ့လျှင်ပင် အနည်းဆုံးအနေဖြင့် ငါသည် သာမန်လူ့သဘာဝကို အသက်ရှင်သွားသင့်သည်ဖြစ်ပြီး ဤနည်းအားဖြင့် ဘုရားသခင်၏ စိတ်နှလုံးတော်ကို ကျေနပ်ရောင့်ရဲစေနိုင်မည်ဖြစ်သည်။

ဤခရီး၏နောက်ဆုံးခရီးတစ်ထောက်သည် ယခုမှစ၍ အနာဂတ်ဘေးဒဏ်ကြီး၏အဆုံးအထိဖြစ်သည်။ လမ်းခရီး၏ ဤခရီးတစ်ထောက်သည် လူတို့အနေဖြင့် မိမိတို့၏ ဝိညာဉ်အသက်တာအမှန်ကို ဖော်ထုတ်ခံရသည့်အခါတွင်လည်းကောင်း မိမိတို့၌ စစ်မှန်သောယုံကြည်ခြင်း ရှိသည် မရှိသည်ကို ဖော်ထုတ်ခံရသည့်အခါတွင်လည်းကောင်း ဖြစ်ပေလိမ့်မည်။ လမ်းခရီး၏ ဤခရီးတစ်ထောက်သည် ကုန်လွန်ခဲ့သောအချိန်တွင် ပို့ဆောင်တော်မူသော ခရီးတို့ထက် ပို၍ကြမ်းတမ်းလိမ့်မည်ဖြစ်ပြီး၊ ယခင်ထက်ပို၍ ကျောက်ထူထပ်သောလမ်းတစ်ခု ဖြစ်လိမ့်မည်ဖြစ်သည့်အတွက် ၎င်းကို “လမ်းခရီး၏ နောက်ဆုံးခရီးတစ်ထောက်” ဟု ခေါ်တွင်ခြင်းဖြစ်လေသည်။ အမှန်မှာ ယင်းသည် လမ်း၏ တကယ့်နောက်ဆုံးပိုင်း မဟုတ်ပေ။ ဤသို့ဖြစ်ရသည်မှာ ဘေးဒဏ်ကြီးကို ရင်ဆိုင်တွေ့ကြုံပြီးနောက်တွင် သင်သည် ဧဝံဂေလိတရား၏ ဖြန့်ကားခြင်းအလုပ်ကို ရင်ဆိုင်တွေ့ကြုံလိမ့်မည်ဖြစ်ပြီး အသုံးတော်ခံခြင်းအလုပ်ကို ရင်ဆိုင်တွေ့ကြုံမည့် လူအချို့ ရှိလိမ့်မည်ဖြစ်သည်။ သို့ဖြစ်၍ “လမ်းခရီး၏ နောက်ဆုံးခရီးတစ်ထောက်” သည် လူတို့ကို စစ်ဆေးခြင်းဘေးဒဏ်ကြီးနှင့် ပြင်းထန်ကြမ်းတမ်းသော ပတ်ဝန်းကျင်ကို ရည်ညွှန်းပြောဆိုခြင်းသာလျှင်ဖြစ်သည်။ ကုန်လွန်ခဲ့ပြီးသည့်အချိန်တွင် လမ်း၏ ထိုခရီးလမ်းပိုင်းတွင် သင်၏ ပျော်ရွှင်ဖွယ်ခရီးတစ်လျှောက်လုံး သင့်ကို သင်ပေးဖို့နှင့် ခွံ့ကျွေးဖို့ လက်ကိုကိုင်ဆွဲလျက် ငါသည် ကိုယ်တိုင်ကိုယ်ကျ ပို့ဆောင်ပေးနေခဲ့သည်ဖြစ်၏။ သင်သည် ပြစ်တင်ဆုံးမခြင်းနှင့် တရားစီရင်ခြင်းကို ကြိမ်ဖန်များစွာ ဖြတ်သန်း၍ လျှောက်လှမ်းခဲ့ရသော်လည်း ၎င်းတို့သည် သင့်အပေါ် ထပ်ခါတလဲလဲကျရောက်ခဲ့သော အသေးစားရိုက်နှက်ခြင်းမျှသာ ဖြစ်သည်။ ယင်းသည် သင့်ကို ဘုရားသခင်၌ယုံကြည်ခြင်းအပေါ် သင့်အမြင်များကို အနည်းငယ်မျှ ပြောင်းလဲစေသည်ဖြစ်ပြီး သင်၏စိတ်သဘောထားကိုလည်း အနည်းငယ်မျှ တည်ငြိမ်စေကာ ငါ့ကို သိရှိနားလည်ခြင်း အနည်းငယ်မျှ ရရှိစေခဲ့သည်။ သို့သော် ဤသို့ ငါပြော၏၊ လမ်းခရီး၏ ထိုအပိုင်းကို လျှောက်လှမ်းရာ၌ လူများကပေးဆပ်ရသည့် အဖိုးအခ သို့မဟုတ် အပတ်တကုတ်ကြိုးပမ်းမှုသည် သေးငယ်လှသည်ဖြစ်ပြီး ယနေ့ထိတိုင် သင့်ကို ပို့ဆောင်ပေးနေသူမှာ ငါပင်ဖြစ်၏။ ဤသည်မှာ ငါသည်သင့်ကို တစ်စုံတစ်ရာလုပ်ခိုင်းနေသည်မဟုတ်ဘဲ ငါ၏တောင်းဆိုချက်များသည်လည်း မြင့်မားလွန်းသည် မဟုတ်သောကြောင့်ဖြစ်သည်။ ငါသည် သင့်ကို ရရှိနိုင်သည်များကို အရယူဖို့ ခွင့်ပြုထားလေသည်။ ဤအချိန်ကာလအတောအတွင်း ငါသည် သင်တို့၏လိုအပ်ချက်များကို မပြတ်မလပ်ထောက်ပံ့ပေးခဲ့သည်ဖြစ်ပြီး မည်သည့်အခါမျှ အသားလွတ် တောင်းဆိုခြင်း မပြုခဲ့ဖူးပါ။ သင်တို့သည် ထပ်ခါတလဲလဲ ပြစ်တင်ဆုံးမမှုကို ခံခဲ့ရသည့်တိုင် ငါ၏မူလတောင်းဆိုချက်များကိုပင် ရအောင်လုပ်နိုင်စွမ်းမရှိခဲ့ပါချေ။ သင်တို့သည် နောက်ဆုတ်ပြီး စိတ်ပျက်ခဲ့သည် ဖြစ်သော်လည်း ငါသည် ဤကိစ္စကို အမှုမထားပေ။ အဘယ်ကြောင့်ဆိုသော် ယခုအချိန်သည် ငါကိုယ်တိုင်၏အလုပ်ချိန်ဖြစ်၍ ငါ့အပေါ်သင်တို့၏ဆက်ကပ်မှုကို လွန်စွာအလေးထားခြင်းမရှိပေ။ သို့ရာတွင် ဤနေရာမှစ၍ လမ်းခရီးတွင် ငါသည် လုပ်ကိုင်ပြောဆိုခြင်း ပြုမည်မဟုတ်တော့ဘဲ ထိုအခါ ငါသည် သင်တို့ကို ထိုကဲ့သို့သော ပျင်းရိဖွယ်ကောင်းသည့် ဟန်ပန်ဖြင့် ဆက်သွားခိုင်းတော့မည်မဟုတ်ပေ။ ငါသည် သင်တို့ကို ကြီးမားသော သင်ခန်းစာများသင်ယူဖို့ ခွင့်ပြုမည်ဖြစ်ပြီး ရနိုင်သည်များထဲမှ ရယူဖို့ ခွင့်ပြုတော့မည်မဟုတ်ချေ။ ယနေ့တွင် သင်တို့၌ရှိနေသည့် စစ်မှန်သောဝိညာဉ်အသက်တာကို လှစ်ဟပြရမည်ဖြစ်သည်။ သင်တို့၏ နှစ်ရှည်လများ ကြိုးစားအားထုတ်မှုသည် အသီးအပွင့် ဖြစ်ထွန်းသည်ဖြစ်စေ မဖြစ်ထွန်းသည်ဖြစ်စေ လမ်းခရီး၏ နောက်ဆုံးခရီးတစ်ထောက်ကို မည်သို့လှမ်းခဲ့သည်ကို မြင်တွေ့ရမည်ဖြစ်သည်။ ပြီးခဲ့သည့်အချိန်တွင် ဘုရားသခင်ကို ယုံကြည်ခြင်းဆိုသည်မှာ အလွန်ရိုးစင်းလှသည်ဟု သင်တို့သည် တွေးထင်ခဲ့သည်ဖြစ်ပြီး ထိုသို့ဖြစ်ရသည်မှာ ဘုရားသခင်သည် သင်နှင့်ပတ်သက်၍ သိပ်ပြီးအလေးအနက်မထားခဲ့သောကြောင့်ဖြစ်သည်။ ယခုတွင် မည်သို့ရှိပါသနည်း။ ဘုရားသခင်ကို ယုံကြည်ခြင်းဆိုသည်မှာ ရိုးစင်းလွယ်ကူသည်ဟု သင်တို့ထင်မြင်သလော။ ဘုရားသခင်ကို ယုံကြည်ခြင်းသည် ကလေးသူငယ်များ လမ်းထဲတွင် ကစားနေသကဲ့သို့ ပျော်စရာကောင်းပြီး အပူအပင်ကင်းသည်ဟု သင်တို့ခံစားနေရဆဲ ဖြစ်သလော။ သင်တို့သည် သိုးဖြစ်သည်မှာ မှန်သော်လည်း သင်တို့အနေဖြင့် ဘုရားသခင်၏ ကျေးဇူးတော်ကို ပြန်လည်ပေးဆပ်ဖို့နှင့် သင်တို့ယုံကြည်သော ဘုရားသခင်ကို လုံးလုံးလျားလျား ရရှိဖို့အလို့ငှာ မိမိတို့လျှောက်လှမ်းသင့်သော လမ်းခရီးကို သင်တို့သည် လျှောက်လှမ်းနိုင်ရမည်ဖြစ်သည်။ သင်တို့သည် မိမိကိုယ်ကိုယ် မလှည့်ဖြားကြနှင့်။ မိမိကိုယ်ကိုယ် အရူးမလုပ်ကြနှင့်။ သင့်အနေဖြင့် လမ်းခရီး၏ ဤနောက်ဆုံးခရီးတစ်ထောက်ကို ပြုနိုင်မည်ဆိုလျှင် သင်သည် မကြုံစဖူးသောအရာကို မြင်တွေ့လာနိုင်မည်ဖြစ်ပြီး စကြဝဠာတစ်ခုလုံးတွင် ဖြန့်ကျက်နေသာ ငါ့ဧဝံဂေလိအမှု၏ ကြီးကျယ်ခမ်းနားသောမြင်ကွင်းကို မြင်တွေ့လာနိုင်ကာ သင်သည် ငါ့လူရင်းအဖြစ် ကံကြမ္မာကောင်းများကို ရရှိလာပြီး စကြဝဠာ တစ်နှံတစ်လျား ငါ့အမှုကို ချဲ့ထွင်ဖြန့်ကားရာတွင် သင်သည် မိမိအခန်းကဏ္ဍကို ကပြနိုင်မည်ဖြစ်သည်။ ထိုအခါ သင့်အနေဖြင့် မိမိလျှောက်လှမ်းသင့်သော လမ်းခရီးကို အလွန်ဝမ်းမြောက်စွာဖြင့် ဆက်လျှောက်နိုင်ပေလိမ့်မည်။ အနာဂတ်သည် အတိုင်းမသိ တောက်ပနေလိမ့်မည်ဖြစ်သော်လည်း ယခုပဓာနကျသောအရာမှာ လမ်းခရီး၏ နောက်ဆုံးခရီးတစ်ထောက်ကို ကောင်းမွန်စွာ လျှောက်လှမ်းဖို့ဖြစ်သည်။ ဤကိစ္စကို မည်သို့လုပ်ဆောင်ရမည်ကို သင့်အနေဖြင့် နည်းလမ်းရှာဖွေ၍ ပြင်ဆင်ရမည်ဖြစ်သည်။ ဤသည်မှာ ယခုလက်ငင်းတွင် သင်လုပ်ဆောင်ရမည့်အရာဖြစ်သည်။ ဤကိစ္စသည် ယခု အရေးတကြီးကိစ္စတစ်ခုဖြစ်သည်။

ယခင်က:သင်တို့သည် လုပ်ငန်းကိုနားလည်သဘောပေါက်ရမည်။ ရှုပ်ထွေးသည့်စိတ်နှလုံးနှင့် မလိုက်ကြနှင့်။

နောက်တစ်ခုသို့:သင်၏အနာဂတ်သာသနာပြုလုပ်ငန်းကို မည်သို့အာရုံစိုက်၍ လုပ်ဆောင်သင့်သနည်း

နှုတ်ကပတ်တော်သည် လူ့ဇာတိ၌ ပေါ်လာ၏ နောက်ဆုံးသောကာလ ခရစ်တော်၏ မိန့်မြွက်ချက်များ (လက်ရွေးစင်များ) သိုးသငယ် ဖွင့်သည့် စာစောင် တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလ၏ ခရစ်တော်အတွက် သက်သေခံချက်များ နိုင်ငံတော်၏ ဧဝံဂေလိတရားအကြောင်း အနန္တတန်ခိုးရှင်ဘုရားသခင်၏ စံနမူနာ နှုတ်ကပတ်တော်များ လက်ရွေးစင်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ