၆၀။ ဘုရားသခင်က ဖြောင့်မတ်လွန်းပါတယ်

ဂျပန်နိုင်ငံ၊ ကျန်းလင်

၂၀၁၂ စက်တင်ဘာလပိုင်းပေါ့၊ အသင်းတော်အလုပ်ကို ကျွန်တော် ဦးဆောင်နေတဲ့အချိန်မှာ၊ ခေါင်းဆောင်ယန်ကျူးနဲ့ ဆုံခဲ့ရတယ်။ သူက ညီအစ်ကိုမောင်နှမတွေကို တစ်အိမ်တက်ဆင်း ဧဝံဂေလိ ဟောပြောခိုင်းနေတာဗျ။ ဒါက စည်းမျဉ်းတွေကို ဆိုးဆိုးဝါးဝါး ချိုးဖောက်တာပဲ။ ဒါနဲ့ ကျွန်တော့်လုပ်ဖော်ကိုင်ဖက်နဲ့ ကျွန်တော်က သူ့ကို ပြောတယ်၊ “ဧဝံဂေလိ ဖြန့်ဝေပြီဆိုရင် ဘုရားအိမ်တော်ရဲ့ စည်းမျဉ်းတွေကို လိုက်နာရမယ်။ ခင်ဗျား အခု လုပ်နေတာက အဲဒါတွေနဲ့ ဆန့်ကျင်နေတယ်။ အသင်းတော်ထဲကို မယုံကြည်သူတွေ၊ မကောင်းမှုလုပ်တဲ့လူတွေ ဝင်လာခဲ့ရင်၊ ဘုရားအိမ်တော်ရဲ့အလုပ်ကို အနှောင့်အယှက်ဖြစ်လိမ့်မယ်။ ဘယ်လိုပဲဖြစ်ဖြစ် အဲဒီလို ဧဝံဂေလိ ဟောတယ်ဆိုတာ အန္တရာယ်များတယ်။ တစ်ယောက်ယောက်က ရဲတိုင်လိုက်ရင်၊ ကိုယ့်ညီအစ်ကိုမောင်နှမတွေကို ထိုးကျွေးပြီးသား ဖြစ်သွားလိမ့်မယ်” ပေါ့။ သူက ဂရုမစိုက်ဘူးဗျ။ ကျွန်တော်တို့ကိုလည်း စည်းမျဉ်းတွေကို မစွန့်နိုင်တဲ့သူတွေဆိုပြီး စွပ်စွဲတယ်။ အဲဒီနောက်ပိုင်း စည်းဝေးပွဲတွေမှာ သူက ကျွန်တော်တို့နှစ်ယောက်ကို ခဏခဏ ဆူတော့တာပဲ။ ကျွန်တော်တို့က ဘုရားအိမ်တော်ရဲ့ ဧဝံဂေလိအလုပ်ကို တားဆီးနေတယ်ပေါ့။ ကျွန်တော်တို့နှစ်ယောက်လုံး တော်တော် စိတ်ကသိကအောက်ဖြစ်ကြတယ်။ အဲဒီနှစ် ဒီဇင်ဘာလ ရောက်တော့၊ နယ်ခံအသင်းဝင်တွေက ယန်ကျူး ပြောတဲ့အတိုင်း၊ အပြင်မှာလိုက်ပြီး ဧဝံဂေလိ ဟောပြောကြရော။ လူတစ်ရာကျော် အဖမ်းခံရတယ်ဗျာ။ ဒါက ဘုရားအိမ်တော်ရဲ့အလုပ်ကို တော်တော်ကြီး ထိခိုက်သွားတာ။ ဒါပေမဲ့ ယန်ကျူးက လုံးဝ နောင်တမရဘူး။ မာနထောင်တာတွေ၊ မဆင်မခြင်လုပ်တာတွေကို သူ့ကိုယ်သူ ခွဲခြားသုံးသပ်တာမျိုး ကျွန်တော် တစ်ခါမှ မမြင်ခဲ့ရဘူး။ ၂၀၁၃ နိုဝင်ဘာလ ရောက်တော့၊ ကျွန်တော်က အသင်းတော်ဗီဒီယိုတွေ ထုတ်တာကို ဦးဆောင်ရတယ်။ သူက သူ လုပ်ချင်တာတွေကိုပဲ အထက်စီးကနေ လုပ်နေတုန်းပဲ။ သူနဲ့ ထင်မြင်ချက်မတူတဲ့ လူတိုင်းကို ဆူတယ်၊ အပြစ်တင်တယ်။ သုံးသပ်ပေးဖို့ တင်ပြတဲ့ ဗီဒီယိုတွေကို ခဏခဏ အချိန်ဆွဲတယ်။ အဲဒီတော့ ညီအစ်ကိုမောင်နှမတွေက ဘုရားအိမ်တော်ကပေးတဲ့ အကြံဉာဏ်တွေ၊ အကူအညီတွေကို အချိန်မီ မရနိုင်ကြဘူး။ သူ့တာဝန်ကို လုပ်ကိုင်ပုံ ချို့ယွင်းနေတာလေးတွေကို ကျွန်တော်က ထောက်ပြတယ်။ အကြံပေးတာတွေလည်း လုပ်တယ်။ ဒါပေမဲ့ သူက အရင်လိုပဲ ဆက်လုပ်နေတာ။ ကျွန်တော် ပြောတာ နားမထောင်ဘူး။ ကျွန်တော့်ကို စိတ်ကြီးဝင်နေတဲ့လူဆိုပြီး ပြောသေးတာ။ ၂၀၁၄ မေလပိုင်း ရောက်တော့၊ သူက ကျွန်တော့်ကို ရာထူးကနေ ထုတ်ပြီး၊ အိမ်ပြန်ခိုင်းတယ်။ ကျွန်တော်လည်း အိမ်မှာ ပြန်နေရင်းနဲ့၊ အန္တိခရစ်တွေ၊ ခေါင်းဆောင်အတုအယောင်တွေကို ခွဲခြားပုံအကြောင်း အခြေခံသဘောလေးတွေကို ဖတ်မိရော။ ယန်ကျူးရဲ့ မပြောင်းလဲတဲ့ အမူအကျင့်တွေနဲ့ ယှဉ်ကြည့်တော့မှ၊ သူက ဘယ်လောက် စိတ်ကြီးဝင်ပြီး မလိုတမာစိတ် ရှိခဲ့တယ်ဆိုတာ၊ ကျွန်တော် နောက်ဆုံး နားလည်သွားတယ်။ သူ့တာဝန်မှာ အမြဲတမ်း အာဏာရှင်ဆန်ဆန်နဲ့ လက်လွတ်စပယ် လုပ်ခဲ့တာပဲ။ သမ္မာတရားကို လက်မခံဘူး၊ ညီအစ်ကိုမောင်နှမတွေ ပေးတဲ့ အကြံဉာဏ်တွေကို လက်မခံဘူး။ အဲဒီအစား လူတွေကို ဖိနှိပ်တယ်၊ အပြစ်တင်တယ်။ သူက သမ္မာတရားကို မုန်းတဲ့ အန္တိခရစ်ပဲဆိုတာ၊ သူ့အမူအကျင့်က ပြခဲ့တာမဟုတ်ဘူးလား။ သူ့အမူအကျင့်ကို အရှိအတိုင်း မြင်သွားတော့၊ ကျွန်တော် လန့်သွားတယ်။ ကျွန်တော်တို့က နှစ်နှစ်ကျော် အတူတူ အလုပ်လုပ်ခဲ့ကြတာ။ သူ့အမူအကျင့်နဲ့ လုပ်နည်းကိုင်နည်းကို ကျွန်တော် မြင်ခဲ့ရတယ်။ ဒါပေမဲ့ ဖောက်ပြန်ပျက်စီးမှုကို ဖော်ပြနေတာလို့ပဲ သဘောထားခဲ့တာ။ သူ့သဘာဝနဲ့ အနှစ်သာရကိုဖြစ်ဖြစ်၊ သူ လျှောက်နေတဲ့လမ်းကိုဖြစ်ဖြစ်၊ ဘုရားနှုတ်ကပတ်တော်တွေနဲ့ သုံးသပ်တာမျိုး ကျွန်တော် မလုပ်ခဲ့ဘူး။ ဒီတော့ သူနဲ့အတူ ရှိနေပြီဆိုရင်၊ ကျွန်တော်က စိတ်ရှည်သည်းခံခဲ့ရတယ်။ နောက်ဆုံး ဘုရားအိမ်တော်ရဲ့အလုပ်ကို ထိခိုက်နှောင့်နှေးစေတာပဲ အဖတ်တင်တယ်။ “ယန်ကျူးက အသင်းတော်ခေါင်းဆောင် ဆက်ဖြစ်နေမယ်ဆိုရင်၊ သူက ဘုရားအိမ်တော်ရဲ့အလုပ်ကို ပိုပြီးတော့ နှောင့်ယှက်ဦးမှာ” ဆိုပြီး စဉ်းစားမိတယ်။ သူ့ကိစ္စတွေကို ဘုရားအိမ်တော်ဆီ အသိပေးမယ်လို့ ကျွန်တော် ဆုံးဖြတ်လိုက်တယ်။ အရင်ဆုံး ဘုရားကို ဆုတောင်းတယ်။ ပြီးမှ သူ့အကြောင်း အသိပေးတဲ့စာတစ်စောင် ရေးတယ်။ စာအဆုံးမှာ ကျွန်တော်က ကိစ္စတစ်ခု ထပ်ထည့်သေးတယ်။ အဲဒီတုန်းက အဆင်မပြေတာလေးတွေ ပါနေတဲ့ ဗီဒီယိုတစ်ခု ရှိသေးမှန်း ကျွန်တော် သိတယ်လေ။ ဒါနဲ့ ကျွန်တော်က ဘုရားအိမ်တော်အနေနဲ့ အဲဒါကို စဉ်းစားသုံးသပ်ဖို့ ထည့်ရေးလိုက်တာ။

ရေးပြီးတဲ့စာကို ပို့တော့မယ်လည်းလုပ်ရော၊ ကျွန်တော့်မှာ အတွေးတွေ ထပ်ဝင်လာတယ်ဗျ။ “ငါ သူ့ကို အရင်က အကြံဉာဏ်တွေ ပေးခဲ့ပြီးပြီ။ သူ့တာဝန်နဲ့ပတ်သက်တဲ့ ပြဿနာတွေကိုလည်း ထောက်ပြခဲ့တယ်။ ဒါပေမဲ့ သဘောမကျလို့၊ သူ ငါ့ကို အိမ်ပြန်ပို့လိုက်တာ။ အခုဆို ငါ့တာဝန်ကိုတောင် မလုပ်နိုင်တော့ဘူး။ ငါက သူ့အကြောင်း အသိပေးတဲ့ ဒီစာကို ပို့လိုက်လို့၊ သူက မထင်မှတ်ဘဲ ဖတ်မိသွားတယ်ဆိုရင်၊ ငါက ခေါင်းဆောင်တွေ၊ အကျိုးဆောင်တွေကို တိုက်ခိုက်တယ်ဆိုပြီး သူက စွပ်စွဲလိမ့်မယ်။ အဲဒါဆို ငါ ဘယ်နေရာ ရောက်သွားမလဲ။ ဒီကိစ္စကို မေ့လိုက်သင့်တယ်။ ငါက အပြင်လူဖြစ်နေပြီဆိုတော့၊ ပြဿနာတွေကို မဆွတာပဲ ကောင်းတယ်” ပေါ့။ ဒါပေမဲ့ နောက်တော့ စဉ်းစားမိပြန်ရော၊ “ယန်ကျူးက အန္တိခရစ်တွေရဲ့လမ်းကို လျှောက်နေမှန်း မြင်အောင်၊ ဘုရားက ငါ့ကို ဒီနေ့ လမ်းပြလိုက်တာပဲ။ ငါက ဒါကို အသိမပေးဘူးဆိုရင်၊ ဘုရားအိမ်တော်ရဲ့အလုပ်နဲ့ ညီအစ်ကိုမောင်နှမတွေပဲ ထိခိုက်ကုန်မှာ” “အဲဒါဆို ငါက စာတန်ရဲ့လက်ပါးစေ ဖြစ်သွားမယ်၊ မကောင်းမှုလုပ်တဲ့သူ ဖြစ်သွားမယ်” ပေါ့။ ကျွန်တော့်စိတ်ထဲမှာ လွန်ဆွဲသလိုဖြစ်နေတာ၊ ဘုရားအိမ်တော်နဲ့ ညီအစ်ကိုမောင်နှမတွေရဲ့အကျိုးက တစ်ဖက်၊ ကျန်တဲ့တစ်ဖက်မှာက ကိုယ့်အနာဂတ် အဆင်ပြေဖို့ပေါ့။ ကျွန်တော်လည်း ဘာလုပ်ရမှန်း မသိဘူး။ သုံးလေးရက်လောက်အထိ ဘုရားရှေ့မှာပဲ ခဏခဏ ဆုတောင်းတယ်။ ကျွန်တော့်ကို လမ်းမှန်ပေါ် ရောက်အောင် လမ်းပြပေးဖို့ပေါ့။ နောက်တော့ ဘုရားနှုတ်ကပတ်တော် ကျမ်းပိုဒ်တစ်ခုကို ဖတ်မိတယ်ဗျ- “သင့်တွင် စုံလင်အောင်ပြုခံရခြင်းငှာ ရည်မှန်းချက်များနှင့် ရဲရင့်ခြင်းရှိရမည်ဖြစ်ပြီး သင့်ကိုယ်သင် မစွမ်းဆောင်နိုင်သူဟု အမြဲမတွေးသင့်ပါ။ သမ္မာတရားတွင် မျက်နှာသာပေးခြင်းများ ရှိသလော။ သမ္မာတရားသည် လူများကို တမင်ရည်ရွယ်ကာ ဆန့်ကျင်နိုင်ပါသလော။ သင် သမ္မာတရားနောက်သို့လိုက်လျှင် ယင်းက သင့်အား ဒုက္ခပေးနိုင်သလော။ တရားမျှတမှုအတွက် သင်အခိုင်အမာရပ်တည်လျှင် ယင်းက သင့်ကို လဲပြိုစေမည်လော။ အသက်နောက်သို့လိုက်ရန်မှာ သင်၏ရည်မှန်းချက် အမှန်ဖြစ်ပါက အသက်က သင့်ကို တိမ်းရှောင်နိုင်မည်လော။ သင်သည် သမ္မာတရားနှင့်အတူ မရှိလျှင် ယင်းမှာ သမ္မာတရားက သင့်ကို မသိကျိုးကျွန်ပြုခြင်း မဟုတ်ဘဲ သင်က သမ္မာတရားနှင့်ဝေးရာမှာ နေသောကြောင့်သာဖြစ်သည်။ တရားမျှတမှုအတွက် သင်ခိုင်မြဲစွာ မရပ်တည်နိုင်လျှင် ယင်းမှာ တရားမျှတမှုတွင် တစ်စုံတစ်ခု မှားယွင်းနေခြင်းမဟုတ်ဘဲ ယင်းမှာ အချက်အလက်များနှင့်မညီဟု သင်ထင်သောကြောင့်ဖြစ်သည်။ နှစ်ပေါင်းများစွာ ရှာဖွေသော်လည်း အသက်ကို သင်မရသေးလျှင် ယင်းမှာ အသက်တာက သင့်အပေါ် ခွဲခြားသိမြင်စိတ် မရှိ၍မဟုတ်ဘဲ သင်က အသက်တာအပေါ် ခွဲခြားသိမြင်စိတ်မရှိဘဲ အသက်ကို မောင်းထုတ်ထားသောကြောင့် ဖြစ်သည်။ သင်သည် အလင်းထဲ၌နေပြီး အလင်းကိုရယူရန် မစွမ်းဆောင်နိုင်ခဲ့ပါက သင့်အပေါ်သို့ အလင်းမထွန်းတောက်နိုင် သောကြောင့် မဟုတ်ဘဲ အလင်းတည်ရှိခြင်းကို သင်အာရုံမစိုက်ထား သောကြောင့် အလင်းသည် သင့်ထံမှ တိတ်ဆိတ်စွာ ထွက်ခွာသွားခြင်းသာဖြစ်သည်။ သင် ကြိုးပမ်းအားထုတ်ခြင်း မရှိပါက သင်သည် အဖိုးမတန်သော အမှိုက်ဖြစ်သည်၊ သင့်အသက်တာတွင် ရဲရင့်ခြင်းမရှိ၊ အမှောင်စွမ်းအားကို ခုခံရန် စွမ်းအားမရှိဟုသာ ပြောနိုင်သည်။ သင်သည် ပျော့ညံ့လွန်း ပါတကား။ သင့်ကိုဝိုင်းထားသော စာတန်၏စွမ်းအားမှ လွတ်မြောက် နိုင်ခြင်းမရှိဘဲ ဤသို့သော လုံခြုံဘေးကင်းသည့်ဘဝကို နေထိုင်ပြီး မသိနားမလည်မှုများဖြင့် သေဆုံးသွားရန်သာ သင်အလိုရှိသည်။ သင်လုပ်ဆောင်ရမည်မှာ သိမ်းပိုက်ခြင်းခံရဖို့ ကြိုးပမ်းအားထုတ်ရန် ဖြစ်သည်၊ ဤသည်မှာ သင်၏ အလေးအနက်ထားရမည့် တာဝန်ဖြစ်သည်။ အကယ်၍ သင်သည် သိမ်းပိုက်ခံရမှုကို ကျေနပ်နေပါက အလင်းတည်ရှိမှုကို သင်မောင်းထုတ်ခြင်းဖြစ်သည်။ သမ္မာတရားအတွက် ခက်ခဲမှုကို သင်ခံစားရမည်၊ သမ္မာတရားထံ သင့်ကိုယ်သင် ပေးအပ်ရမည်၊ သမ္မာတရားအတွက် အရှက်တကွဲ ဖြစ်ခြင်းကို သင်ခံရမည်၊ ထို့နောက် သမ္မာတရားကို သင်ပိုမိုရရှိရန်အတွက် ပို၍ပင် ဒုက္ခဆင်းရဲခံရပေမည်။ ဤသည်မှာ သင်လုပ်သင့်သည့်အရာဖြစ်သည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ပေတရု၏ အတွေ့အကြုံများ- ပြစ်တင်ဆုံးမခြင်းနှင့် တရားစီရင်ခြင်းတို့နှင့်သက်ဆိုင်သည့် သူ၏အသိပညာ”) ဒီကျမ်းပိုဒ်ကို ဖတ်မိတာ၊ ကျွန်တော် ခွန်အားရော ယုံကြည်ခြင်းရော ရသွားတယ်။ စိတ်ထဲမှာလည်း၊ “ဟုတ်တယ်၊ ဒီမကောင်းမှုအင်အားကို ငါ အရှုံးပေးလို့မဖြစ်ဘူး” ပေါ့။ ကျွန်တော်က ဟိုတုန်းက ယန်ကျူးနဲ့ပတ်သက်ရင် လုံးဝ မချင့်ချိန်တတ်ခဲ့ဘူး။ ဒါပေမဲ့ အခု သူ့သဘာဝ၊ သူ့အနှစ်သာရနဲ့ သူ လျှောက်တဲ့လမ်းကို ကျွန်တော် မြင်တတ်အောင်၊ ဘုရားက စီစဉ်ပေးထားတယ်။ ကျွန်တော်က ကိုယ့်ထင်မြင်ချက်ကို ရဲရဲဝံ့ဝံ့ ဖော်ထုတ်လိုက်သင့်တာ။ ဒါပေမဲ့ ကျွန်တော်က စာတန်အတွေးအခေါ်ကိုပဲ အာရုံစိုက်မိတယ်၊ “မိမိကို မထိခိုက်လျှင်၊ အကြောင်းကိစ္စများကို သူ့အတိုင်း ထားလိုက်ပါ” ပေါ့။ ကိုယ့်အနာဂတ် ကောင်းဖို့ပဲလေ။ ကျွန်တော် ဘယ်လောက် တစ်ကိုယ်ကောင်းဆန်တယ်၊ အသိစိတ်နဲ့ ဆင်ခြင်ဉာဏ် မရှိခဲ့ဘူးဆိုတာ မြင်သွားတယ်။ ဘုရားကို ယုံကြည်လာတဲ့ နှစ်တွေအားလုံးကို ပြန်တွေးကြည့်တယ်။ ဘုရားနှုတ်ကပတ်တော်တွေရဲ့ ရေလောင်းပေးတာ၊ အာဟာရပေးတာကို ကျွန်တော် ခံစားခဲ့တယ်။ ဒါပေမဲ့ ဒီလို အရေးကြီးတဲ့အချိန်ကျတော့၊ ကိုယ့်အကျိုးကို ကာကွယ်ဖို့ အသိစိတ်ကို လျစ်လျူရှုနေတယ်။ ဘုရားအိမ်တော်အတွက် မစဉ်းစားတော့ဘူး။ ကျွန်တော်က ကျေးဇူးမသိတဲ့၊ ရွံစရာကောင်းတဲ့ လူညံ့ပဲ။ ဒါကို သဘောပေါက်သွားတော့၊ ကျွန်တော် စဉ်းစားတယ်၊ “ငါက အသိစိတ်ရှိရှိနဲ့ အကျိုးသင့်အကြောင်းသင့် လုပ်ရမယ်။ သမ္မာတရားကို လက်တွေ့လုပ်ဆောင်ရမယ်။ ဘုရားအိမ်တော်ရဲ့အလုပ်ကို ကာကွယ်ရမယ်” ပေါ့။ ဒါနဲ့ ဘုရားရှေ့မှာ အကြိမ်ကြိမ်ထပ်ပြီး ဆုတောင်းတယ်။ နောက်ဆုံး ဒီဆုံးဖြတ်ချက်ကို ချလိုက်တယ်၊ “ဒီတိုင်စာကို ရေးလိုက်လို့ ဘယ်လိုအကျိုးဆက်တွေပဲ ဖြစ်လာဖြစ်လာ၊ ကိုယ့်အကျိုးကို ကာကွယ်ဖို့သက်သက်နဲ့ စာတန်လက်ပါးစေတော့ အဖြစ်မခံနိုင်ဘူး။ ယန်ကျူးရဲ့ပြဿနာတွေကို ငါ မြင်ထားတယ်၊ ဒါကြောင့် အမှန်ကို ရပ်တည်ပြီး မကောင်းတဲ့ သူ့လုပ်ရပ်တွေကို ဖော်ထုတ်သင့်တယ်။ ဘုရားအိမ်တော်ရဲ့အလုပ်ကို ကာကွယ်သင့်တယ်” ပေါ့။ ကျွန်တော်လည်း ဘုရားအိမ်တော်ကို တိုင်ကြားစာ ပို့လိုက်တယ်။ ပြီးသွားတော့ စိတ်က တော်တော် ပေါ့သွားတယ်။ ရင်ထဲမှာ ငြိမ်းချမ်းသွားတာ။ နောက်ရက်တွေကျတော့ ကျွန်တော် နေ့တိုင်း မျှော်ရတာပေါ့၊ ယန်ကျူးရဲ့အခြေအနေကို စစ်ဆေးဖို့ ဘုရားအိမ်တော်ကနေ လူတစ်ယောက် လွှတ်ပေးဖို့၊ ညီအစ်ကိုမောင်နှမတွေလည်း သူ့ကို အန္တိခရစ်ဖြစ်မှန်း မြင်ပြီး၊ ပစ်ပယ်ကြဖို့ပေါ့ဗျာ။ ကံဆိုးချင်တော့ ကျွန်တော့်အခြေအနေက အဲဒီစာကြောင့် ပိုဆိုးသွားရော။

၂၀၁၄ သြဂုတ်လမှာ အသင်းတော်က ကျွန်တော့်တာဝန်ကို ပြန်လုပ်ခွင့်ပြုလိုက်တယ်။ ဒါပေမဲ့ အောက်တိုဘာလလယ်ပိုင်းလောက် ရောက်တော့၊ လီဆိုတဲ့ ခေါင်းဆောင်တစ်ယောက်က ကျွန်တော် နေနေတဲ့ အိမ်ကို ရောက်လာတယ်။ သူက မျက်နှာထားတင်းတင်းနဲ့၊ “ရှင် တိုင်စာတစ်စောင် ရေးခဲ့လား” ဆိုပြီး မေးတယ်ဗျ။ ကျွန်တော်လည်း ရေးခဲ့တယ်ပေါ့။ သူက မကျေနပ်တဲ့ပုံစံမျိုးနဲ့ ပြောရော၊ “ယန်ကျူးက အသင်းတော်အလုပ်ရဲ့ ခေါင်းဆောင်ပဲ။ ကျွန်မနဲ့လည်း မကြာခဏ အဆက်အသွယ်ရှိတယ်။ သူ့မှာ ခေါင်းဆောင်အတုအယောင်လို၊ အန္တိခရစ်လို ပြုမူတဲ့ လက္ခဏာမျိုး ကျွန်မ လုံးဝ မမြင်ဖူးဘူး၊ မကြားခဲ့ဖူးဘူး။ ရှင် ရေးတဲ့စာက ခေါင်းဆောင်တွေ၊ အကျိုးဆောင်တွေကို ကြုံသလို ဝေဖန်တာမျိုးပဲ” တဲ့။ သူ အဲဒီလိုပြောလိုက်တော့၊ ကျွန်တော့်နားတောင် ကျွန်တော် မယုံနိုင်ဘူး။ လေးလလုံးလုံး စောင့်ပြီးတဲ့နောက်မှာ အဲဒီလိုရလဒ်မျိုး ဖြစ်လာမယ်လို့ လုံးဝ မထင်မိဘူး။ သူက အဲဒီလိုပြောပေမဲ့၊ ကျွန်တော် တည်တည်ငြိမ်ငြိမ်ပဲ နေလိုက်တယ်။ ယန်ကျူးနဲ့ပတ်သက်တဲ့ အဲဒီစာကို ကျွန်တော်က အချက်အလက်တွေ၊ စည်းမျဉ်းတွေနဲ့အညီ ရေးခဲ့တာလေ။ မမှန်မကန် စွပ်စွဲခဲ့တာမျိုး လုံးဝမဟုတ်ဘူး။ ပြီးတော့ အဲဒီခေါင်းဆောင်လီက ပြောပြန်ရော၊ “ရှင့်တိုင်စာမှာ တချို့ဗီဒီယိုတွေကို စစ်ဆေးဖို့အကြောင်း ပါတယ်။ အဲဒါကြောင့် ဘုရားအိမ်တော်က စစ်ဆေးတာတွေ၊ သုံးသပ်တာတွေကို နှစ်လအချိန်ပေးခဲ့ရတယ်။ ဒီစာက ဘုရားအိမ်တော်ရဲ့အလုပ်ကို အကြီးအကျယ် အနှောင့်အယှက်ဖြစ်သွားစေတယ်။ ဘုရားရဲ့ စိတ်သဘောထားကိုလည်း ပုန်ကန်ပြစ်မှားလိုက်တာပဲ” တဲ့။ လူကြီးပိုင်းခေါင်းဆောင်တွေက အဲဒီလို ပြောတယ်တဲ့ဗျာ။ ဒီမှတ်ချက်တွေကို ကြားရတော့ ကျွန်တော် တော်တော် တုန်လှုပ်သွားတယ်။ ကျွန်တော့်စာက ဘုရားအိမ်တော်ရဲ့အလုပ်ကို အဲဒီလို ဆိုးဆိုးဝါးဝါး အနှောင့်အယှက်ဖြစ်မယ်၊ ဘုရားရဲ့စိတ်သဘောထားကို ပုန်ကန်ပြစ်မှားမိမယ်ဆိုတာ လုံးဝ မထင်ထားခဲ့ဘူး။ သူ ပြောတဲ့အတိုင်းဖြစ်နေရင်၊ ကျွန်တော်က တကယ်ကို မကောင်းမှုကြီးတစ်ခု ကျူးလွန်မိပြီ။ ကျွန်တော့်တစ်ကိုယ်လုံး ရုတ်တရက်ကြီး ဘာအားမှ မရှိတော့သလိုပဲ။ မငိုမိအောင်လည်း ကိုယ့်ကိုယ်ကိုယ် ထိန်းမရတော့ဘူး။ နောက်တော့ ခေါင်းဆောင်လီက ပြောတယ်၊ “ရှင့်ပစ္စည်းတွေ သိမ်းပြီး အိမ်ပြန်လိုက်ပါ။ ကိုယ်လုပ်ခဲ့တာကိုလည်း ပြန်ဆင်ခြင်ကြည့်။ ဆင်ခြင်ကြည့်ပြီးပြီဆိုရင်၊ ရှင့်တာဝန်ကို ပြန်လုပ်လို့ရပြီ” တဲ့။ ကျွန်တော်လည်း အိမ်အပြန် ဘတ်စ်ကားပေါ်မှာ အတွေးတွေနဲ့ ချာချာလည်နေတယ်။ ရင်ထဲမှာလည်း တော်တော် လေးလံနေတာ။ ကျွန်တော်က ဘုရားကို နှစ်ပေါင်းများစွာ ယုံကြည်လာခဲ့တာလေ။ အခုတော့ ဘုရားအိမ်တော်ရဲ့အလုပ်ကို ဆိုးဆိုးဝါးဝါး နှောင့်ယှက်မိတဲ့ သာသနာပလူတစ်ယောက် ဖြစ်သွားပြီ။ ကျွန်တော်လည်း ကိုယ့်ကိုယ်ကိုယ် အပြစ်တင်တာတွေ၊ နောင်တတွေနဲ့ ပူလောင်လာတယ်။ ရှေ့ဆက်ပြီး ဘာတွေဖြစ်လာမလဲဆိုတာ မသိတော့ဘူး။ ကျွန်တော့်စိတ်နှလုံးကို ကာကွယ်ပေးဖို့ ဘုရားကိုပဲ တောင်းလျှောက်မိတယ်။ ဘုရားက ဘယ်လို ကိုင်တွယ်ဖြေရှင်းတာပဲဖြစ်ဖြစ်၊ သူ့အစီအစဉ်တွေကို ကျွန်တော် နာခံလိုက်မယ်။ ဘုရားကို ဘယ်တော့မှ အပြစ်မတင်ဘူးပေါ့။ ဆုတောင်းပြီးတော့ ကျွန်တော် တဖြည်းဖြည်း တည်ငြိမ်သွားတယ်။ အိမ်ပြန်ရောက်တာ သုံးရက်မြောက်တော့၊ ခေါင်းဆောင်လီ ပြောခဲ့တာတွေကို စဉ်းစားကြည့်တယ်။ ကျွန်တော့်မှာ မေးခွန်းတွေလည်း ပေါ်လာတယ်၊ ဘုရားအိမ်တော်မှာ ခရစ်တော်နဲ့ သမ္မာတရားက အုပ်ချုပ်တယ်။ လူတွေကို ကိုင်တွယ်ပုံအပါအဝင် ဘုရားအိမ်တော်က လုပ်ဆောင်သမျှတိုင်းမှာ စည်းမျဉ်းစည်းကမ်းတွေ ရှိတယ်။ လူတစ်ယောက်မှာ ခဏပေါ်လာတဲ့ အပြုအမူတွေနဲ့ စီမံအုပ်ချုပ်လို့မရဘူး။ ဒါဆို ခေါင်းဆောင်လီတို့က ကျွန်တော့်အပေါ် ဘယ်လိုစည်းမျဉ်းတွေအရ ဒီလိုပြုမူနေတာလဲ။ ခေါင်းဆောင်လီ ပြောတာတွေက တကယ်ကော မှန်ကန်ရဲ့လား။ ကျွန်တော် စဉ်းစားလို့ကိုမရဘူး။ ဒါပေမဲ့ အမှန်တရားက ဘယ်လိုပဲရှိရှိ၊ ဒါတွေအားလုံးကို ဘုရားက ဖြစ်စေတာပဲဆိုတာတော့ ကျွန်တော် သိတယ်။ ဒါကြောင့် ကိုယ်တော့်အစီအစဉ်တွေကို နာခံရမှာပဲ။ နောက်တော့ သိပ်မကြာဘူး၊ အသင်းတော်ခေါင်းဆောင်တစ်ယောက်က ကျွန်တော် စည်းဝေးပွဲတက်ဖို့ကို အုပ်စု ပြောင်းလိုက်တယ်။ နောက်တစ်လကျော်တော့ ကျွန်တော့်ကို အိမ်မှာ အမေနဲ့ပဲ စည်းဝေးပွဲတက်ဖို့ သတ်မှတ်လိုက်တယ်။ ကျွန်တော်တို့တာဝန်တွေကို လုပ်ခွင့်မပေးတော့ဘူး။ ကျွန်တော်တို့ကို ဝိုင်းပယ်နေပြီဆိုတာ အဲဒီအချိန်မှာ သိလိုက်တယ်။ ကျွန်တော်က ဘုရားကို တစ်ချိန်လုံး ယုံကြည်လာတာပါ။ အခုတော့ အိမ်မှာပဲနေဖို့ ခွဲခြားခံရတဲ့အပြင်၊ ကိုယ့်တာဝန်ကိုတောင် လုပ်လို့မရတော့ဘူး။ ကျွန်တော် တော်တော် ဝမ်းနည်းခဲ့ရတယ်။ အဲဒီအချိန်တွေတစ်လျှောက်လုံး ညီအစ်ကိုမောင်နှမတွေနဲ့အတူ စည်းဝေးတာတွေ၊ အလုပ်လုပ်တာတွေကိုပဲ ညတိုင်းနီးပါး အိပ်မက်မက်တယ်။ လန့်နိုးသွားပြီဆိုလည်း ပြန်အိပ်လို့မရတော့ဘူး။ ညတွေက ရှည်လွန်းနေသလိုပဲ။ တော်တော်ကို မခံနိုင်တော့ဘူး။ အဲဒီအချိန်တွေမှာ ကျွန်တော့်အမေလည်း ကျွန်တော်နဲ့အတူ ခံစားရတာပေါ့။ အထူးသဖြင့် ညဘက်ဆို ဘုရားကို ဆုတောင်းရင်း၊ အမေ ငိုနေတာကို ကြားရရင်၊ ကိုယ့်ကိုယ်ကိုယ် အပြစ်တင်မိတယ်။ စိတ်ဓာတ်လည်း ကျတယ်။ ကျွန်တော့်ကြောင့် အမေ ဒီလိုခံစားရတယ်ပေါ့။ ကျွန်တော် ဘုရားကို ယုံကြည်လာတဲ့ကာလတစ်လျှောက်လုံး ကြုံခဲ့ရတာတွေထဲမှာ အဲဒီအချိန်တွေက အနာကျင်ဆုံး၊ အခက်ခဲဆုံးပဲ။ ကိုယ့်ရင်ထဲမှာ နာကျင်ရတာကို သက်သာအောင် ဘုရားဆီ အမြဲတမ်း ဆုတောင်းနေတာတစ်ခုပဲ လုပ်နိုင်တော့တယ်။ နောက်တော့ အသင်းတော်ခေါင်းဆောင်ကို မေးကြည့်တယ်။ ကျွန်တော့်အလုပ်ကို ပြန်လုပ်လို့ရမလားပေါ့။ သူက ဘာပြောလဲဆိုတော့၊ “ရှင့်တာဝန်ကို လုပ်ချင်သေးလို့လား။ ရှင် လုပ်ရမဲ့ ကိုယ့်ကိုယ်ကိုယ် ဆင်ခြင်တာကို မလုပ်ဘူးဆိုရင်၊ ထုတ်ပယ်ခံရတဲ့အဖြစ် ရောက်သွားမယ်” တဲ့။ သူ ဒီလိုပြောတာကို ကြားတော့၊ ကျွန်တော် တော်တော် စိတ်ထိခိုက်သွားတယ်။ ကိုယ့်တာဝန်ကို ပြန်လုပ်ရဖို့ မဖြစ်နိုင်တော့ဘူးဆိုတာ အဲဒီအချိန်မှာ သိလိုက်တယ်။ ခေါင်းဆောင်တွေက ကျွန်တော်တို့အိမ်ကို စည်းဝေးပွဲအတွက် အပတ်တိုင်း လာကြတယ်။ ဒါပေမဲ့ တကယ်က ကျွန်တော့်အကြောင်း မေးမြန်းဖို့ လာကြတာ။ ကျွန်တော်က အပျက်သဘောဆောင်တာတွေ ဖြန့်ဝေနေလား၊ အုပ်စုတွေ ဖွဲ့နေလား သိအောင်ပေါ့။ အဲဒီတော့ သူတို့ လာမေးကြတဲ့အချိန်တိုင်း၊ ကျွန်တော်လည်း တော်တော်ကို စိတ်ညစ်တာ။ တစ်ခါတလေ၊ “ခင်ဗျားတို့ ကျွန်တော့်ကို ဘာလို့ ဒီလိုဆက်ဆံနေကြတာလဲ။ ယန်ကျူးအကြောင်းကို စည်းမျဉ်းတွေနဲ့အညီ အသိပေးစာ ရေးခဲ့တာလေ။ ခင်ဗျားတို့က သူ့ကို မစစ်ဆေးဘဲ၊ ကျွန်တော့်ကိုပဲ အိမ်မှာ နေခိုင်းထားတယ်။ သမ္မာတရားကို လက်တွေ့လုပ်ဆောင်တယ်ဆိုတာ မှားနေလို့လား” ဆိုပြီး မေးလိုက်ချင်တာ။ ကျွန်တော် တကယ်ကို ဝမ်းနည်းတယ်။ တစ်ခါတလေလည်း တွေးကြည့်တယ်၊ “သမ္မာတရားကို လက်တွေ့လုပ်ဆောင်တာက ဘာလို့ ဒီလိုဖြစ်ကုန်တာလဲ။ ဘုရားက ဖြောင့်မတ်တယ်လို့ ငါ ယုံကြည်တယ်။ ဒါပေမဲ့ အခု ဖြစ်နေတာတွေထဲမှာ ကိုယ်တော့်ဖြောင့်မတ်ခြင်းကို မမြင်ရဘူး” ပေါ့။ ကျွန်တော် တော်တော် စိတ်ရှုပ်သွားတာ။ အတတ်နိုင်ဆုံး လွဲလွဲမှားမှား မပြောဆိုမိအောင်၊ ဘုရားကို အပြစ်မတင်မိအောင်ပဲ ကိုယ့်ကိုယ်ကိုယ် ထိန်းထားလိုက်တယ်။ ဘုရားရှေ့မှာတော့ ခဏခဏ ဆုတောင်းတယ်။ ကိုယ်တော့်အလိုကို နားလည်အောင်၊ ကိုယ်တော့်ကို အထင်မမှားအောင်၊ ကျွန်တော့်ကို လမ်းပြပေးဖို့ပေါ့။

အဲဒီလို နာကျင်ရဆုံး၊ အခက်ခဲဆုံးဖြစ်နေတဲ့ အချိန်မှာ ဘုရားရဲ့နှုတ်ကပတ်တော်တချို့ကို ကျွန်တော် ဖတ်မိတယ်- “လူတို့သည် ဘုရားသခင်၏ ဖြောင့်မတ်သော စိတ်သဘောထားကို အတိအကျ မည်ကဲ့သို့ သိကျွမ်း၍ နားလည်သဘောပေါက်လာ သင့်သနည်း။ ဖြောင့်မတ်သောသူတို့သည် ကိုယ်တော်၏ကောင်းချီး မင်္ဂလာများကို ရရှိကြ၍ မတရားသောသူတို့သည် ကိုယ်တော်၏ကျိန်ခြင်းကို ခံရသောအခါ ဤအရာများသည် ဘုရားသခင်၏ဖြောင့်မတ်ခြင်း၏ သာဓကများ ဖြစ်ကြ သည်။ ဤအချက် မှန်ကန်သလော။ ဘုရားသခင်သည် ကောင်းသောအမှုကို အကျိုးပေး၍ မကောင်းမှုကို အပြစ်ဒဏ်ပေးကာ လူသားတိုင်းကို ၎င်းတို့၏ လုပ်ဆောင်ချက်များနှင့်အညီ အကျိုးကိုဆပ်ပေးသည်ဟု ဆိုထားသည်။ ထိုအချက် မှန်ကန်သည် မဟုတ်သလော။ သို့သော်လည်း ယခုနေ့ရက်ကာလတွင် ဘုရားသခင်အား ကိုးကွယ်သောသူများသည် အသေသတ်ခြင်း ခံရကြသည်၊ သို့မဟုတ် ကျိန်ဆဲခြင်းခံရကြသည်။ သို့မဟုတ် ကိုယ်တော်၏ကောင်းချီးပေးခြင်းကို မည်သည့် အခါမှ မခံစားရ၊ သို့မဟုတ် ကိုယ်တော်၏ အသိအမှတ်ပြုခြင်းကို မခံရကြပေ။ ထိုသူတို့သည် ဘုရားသခင်ကို မည်မျှကိုးကွယ် ကြစေကာမူ ကိုယ်တော်သည် သူတို့အား လျစ်လျူရှုသည်။ ဘုရားသခင်သည် မတရားသောသူတို့အား ကောင်းချီးမပေးသလို အပြစ်ဒဏ်လည်းမပေးပေ၊ သို့သော်လည်း ၎င်းတို့သည် ချမ်းသာကြွယ်ဝ၍ သားသမီး မြောက်မြားစွာရှိကြကာ ၎င်းတို့အတွက် အစစအရာရာ အဆင်ပြေသည်။ ၎င်းတို့သည် အရာရာတိုင်း၌ အောင်မြင်ကြသည်။ ဤအရာသည် ဘုရားသခင်၏ ဖြောင့်မတ်ခြင်း ဖြစ်ပေသလော။ အကျိုးဆက်အနေဖြင့် လူအချို့က ‘ဘုရားသခင်သည် ဖြောင့်မတ်ခြင်းမရှိ။ ကျွန်ုပ်တို့ ကိုယ်တော်ကို ကိုးကွယ်သော်လည်း ကိုယ်တော်သည် ကျွန်ုပ်တို့ကို မည်သည့်အခါမျှ ကောင်းချီးမပေးဘဲ ထိုအစား ကိုယ်တော့်အားခုခံ၍ မကိုးကွယ် သော ဆိုးယုတ်သူများသည် အရာခပ်သိမ်း၌ ပိုမိုအဆင်ပြေကြပြီး ကျွန်ုပ်တို့ တို့ထက် ရာထူးပိုကြီးကြသည်။ ဘုရားသခင်သည် ဖြောင့်မတ်ခြင်း မရှိလိုက်လေခြင်း။’ဟု ဆိုကြသည်။ ဤအရာက သင်တို့အား မည်သည့် အချက်ကို ဖေါ်ပြသနည်း။ ငါသည် သင်တို့အား ဥပမာ နှစ်ခုသာ ပေးခဲ့သည်။ မည်သည့် ဥပမာက ဘုရားသခင်၏ ဖြောင့်မတ်ခြင်းကို ပြောဆိုသနည်း။ လူအချို့က ‘ထိုဥပမာနှစ်ခုစလုံးသည် ဘုရားသခင့်ဖြောင့်မတ်ခြင်းကို ထင်ရှားပြသနေသည်တကား။’ ဟုဆိုကြသည်။ ၎င်းတို့ အဘယ်ကြောင့် ဤသို့ပြောဆို ကြသနည်း။ ဘုရားသခင်၏ စိတ်သဘောထားကို လူတို့ သိရှိနားလည်ပုံ မှားယွင်းနေ၏၊ ယင်းသည် ၎င်းတို့၏အတွေးများထဲနှင့် ရှုထောင့်အမြင်များထဲ၌၊ အရောင်းအဝယ်ဆိုင်ရာ ရှုထောင့်အမြင်တစ်ရပ်အတွင်း၌ တည်ရှိနေ သည်၊ သို့မဟုတ် ကောင်း၊ မကောင်းနှင့်သက်ဆိုင်သည့် ရှုထောင့်၊ အမှန်၊ အမှားနှင့်သက်ဆိုင်သည့် ရှုထောင့်၊ သို့မဟုတ် ကျိုးကြောင်းဆီလျော်သော ရှုထောင့်အမြင် အတွင်း၌ တည်ရှိနေသည်။ ထိုသူတို့သည် ဤရှုထောင့်အမြင်များကို ဘုရားသခင်ကိုသိကျွမ်းခြင်းသို့ ယူဆောင်လာကြ၏၊ ထိုကဲ့သို့သောသူတို့သည် ဘုရားသခင်နှင့် လိုက်လျောညီထွေမှု မရှိကြပေ။ ထို့အပြင် ကိုယ်တော့်အား ခုခံ၍ ညည်းတွားကြဖို့ရန် သေချာသည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “ဘုရားသခင်၏ ဖြောင့်မတ်သည့် စိတ်သဘောထားကို နားလည်သဘောပေါက်နည်း”)

ကိုယ်တော်သည် မိမိပြုသင့်သည့်အမှုကို ပြုမည်ဖြစ်ပြီး ကိုယ်တော်၏စိတ်သဘောထားသည် ဖြောင့်မတ်ပေသည်။ ဖြောင့်မတ်ခြင်းသည် တရားခြင်း သို့မဟုတ် ထိုက်သင့်ခြင်း အနည်းငယ်မျှ မရှိပေ၊ ယင်းသည် သာတူညီမျှရေးဝါဒ မဟုတ်၊ သို့မဟုတ် သင်လုပ်ဆောင် ပြီးစီးသည့် အလုပ်နှင့်အညီ သင်ရသင့်ရထိုက်သောအရာကို ခွဲဝေသတ်မှတ်ပေးခြင်း မဟုတ်ပေ၊ သို့မဟုတ် သင် လုပ်ဆောင်ပြီးစီးသည့် မည်သည့်အလုပ်မဆိုအတွက် ပေးချေခြင်း သို့မဟုတ် သင်၏ အားစိုက်ထုတ်ခြင်းအရ ပေးထိုက်သောအရာကို ပေးခြင်း မဟုတ်ပေ။ ဤအရာ သည် ဖြောင့်မတ်ခြင်း မဟုတ်ပေ။ ယောဘက ဘုရားသခင် အကြောင်းသက်သေခံပြီးနောက်တွင် ကိုယ်တော်က သူ့ကို သုတ်သင်ရှင်းလင်းလိုက်သည် ဆိုပါစို့- ထိုအခါတွင်လည်း ဘုရားသခင်သည် ဖြောင့်မတ်ခဲ့ပေလိမ့်မည်။ ဤအရာကို ဖြောင့်မတ်ခြင်းဟု အဘယ်ကြောင့် ခေါ်သနည်း။ လူ၏ရှုထောင့်မှကြည့်လျှင် တစ်စုံတစ်ခု သည် လူတို့၏အယူအဆများနှင့်ကိုက်ညီလျှင် ဘုရားသခင်သည် ဖြောင့်မတ်သည်ဟု ၎င်းတို့ပြောရန် အလွန်လွယ်ကူသည်။ သို့ရာတွင် ထိုအရာသည် ၎င်းတို့၏အယူအဆများနှင့် ကိုက်ညီသည်ဟု မမြင်ပါက၊ ယင်းသည် ၎င်းတို့ နားလည်နိုင်သည့် တစ်စုံတစ်ရာ မဟုတ်ပါက ၎င်းတို့အနေဖြင့် ဘုရားသခင်သည် ဖြောင့်မတ်သည်ဟု ပြောရန်ခက်ခဲပေလိမ့်မည်။...ဘုရားသခင်၏ အနှစ်သာရမှာ ဖြောင့်မတ်ခြင်း ဖြစ်သည်။ ကိုယ်တော်ပြုသောအမှုကို နားလည်ရန် မလွယ်ကူသော်လည်း ကိုယ်တော်ပြုသော အမှုအားလုံးသည် ဖြောင့်မတ်ပေသည်။ လူတို့က နားမလည်ကြခြင်းသာ ဖြစ်သည်။ ဘုရားသခင်က ပေတရုကို စာတန်ထံပေးသောအခါ ပေတရုက မည်သို့ တုန့်ပြန်သနည်း။ ‘လူသားမျိုးနွယ်သည် ကိုယ်တော်ပြုသောအမှုကို နားလည်နိုင်စွမ်း မရှိပေ၊ သို့သော် ကိုယ်တော်ပြုသည့်အမှုအားလုံးတွင် ကိုယ်တော်၏ စိတ်စေတနာကောင်းပါဝင်၏၊ ထိုအမှုတစ်ရပ်လုံးတွင် ဖြောင့်မတ်ခြင်းပါရှိသည်။ ကိုယ်တော်၏ပညာရှိသော လုပ်ဆောင်ချက်များအတွက် ကျွန်ုပ်မချီးမွမ်းဘဲ မည်သို့ နေနိုင်ပါအံ့နည်း။’ ယနေ့တွင် ဘုရားသခင်သည် လူတို့အား စာတန်က မည်သို့ ဖေါက်ပြန်ပျက်စီးစေကြောင်းနှင့် ဘုရားသခင်က ၎င်းတို့ကို မည်သို့ကယ်တင်ကြောင်း ပြသရန် စာတန်ကို ဖျက်စီးခြင်း မဟုတ်ကြောင်း သင်သဘောပေါက်သင့်သည်၊ နောက်ဆုံးတွင် စာတန်က လူတို့ကို ဖေါက်ပြန်ပျက်စီးစေသည့် အတိုင်းအတာအရ ၎င်းတို့သည် စာတန်၎င်းတို့ကို ဖေါက်ပြန်ပျက်စီးစေသည့် ကြောက်စရာကောင်းလှသည့် အပြစ်ကို တွေ့မြင်ရကြလိမ့်မည်ဖြစ်ပြီး၊ ဘုရားသခင်က စာတန်ကို ဖျက်ဆီးသည့်အခါ ၎င်းတို့သည် ဘုရားသခင်၏ ဖြောင့်မတ်ခြင်းကို တွေ့မြင်ကာ ယင်း၌ ဘုရားသခင်၏ စိတ်သဘောထားပါဝင်သည်ကို တွေ့မြင်ကြလိမ့်မည်။ ဘုရားသခင် ပြုသောအမှုအားလုံးသည် ဖြောင့်မတ်သည်။ ယင်းသည် သင်မတွေးတတ်အောင် ခက်ခဲနက်နဲနိုင်သော်လည်း မိမိသဘောရှိ တရား မစီရင်သင့်ပေ။ ကိုယ်တော်ပြုသောအမှု တစ်စုံတစ်ရာသည် သင့်အတွက် ကျိုးကြောင်းမဆီလျော်သလို ထင်ရပါလျှင်၊ သို့မဟုတ် သင့်မှာ ထိုအရာနှင့်ပတ်သက်၍ အယူအဆများရှိပြီး ၄င်းက ဘုရားသခင်သည် မဖြောင့်မတ်ဟု ပြောစေလျှင် သင်သာလျှင် ကျိုးကြောင်းမဆီလျော်ဆုံးသော သူဖြစ်သည်။ ပေတရုသည် အချို့သောအမှုအရာများကို နားမလည်နိုင်ကြောင်း တွေ့ရှိသော်လည်း ထိုအမှုအရာများထဲတွင် ဘုရားသခင်၏ဥာဏ်ပညာ ပါရှိပြီး ကိုယ်တော်၏စိတ်စေတနာ ပါဝင်ကြောင်း သူသေချာသည်ကို သင်တွေ့ရမည်။ လူတို့သည် အရာခပ်သိမ်းကို နားလည်သဘောပေါက်နိုင်စွမ်း မရှိပေ။ ၎င်းတို့ နားလည်သဘောမပေါက်နိုင်သော အရာများစွာ ရှိသည်။ ထို့ကြောင့် ဘုရားသခင်၏စိတ်သဘောထားကို သိရန်မှာ လွယ်ကူသောအရာ မဟုတ်ပေ။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “ဘုရားသခင်၏ ဖြောင့်မတ်သည့် စိတ်သဘောထားကို နားလည်သဘောပေါက်နည်း”) ဘုရားနှုတ်ကပတ်တော်တွေက အမှောင်ထဲမှာ မှန်အိမ်တစ်လုံး လင်းသွားသလိုမျိုးပဲ။ ကျွန်တော် ရုတ်တရက် နားလည်သွားတယ်။ ကျွန်တော်က ဘုရားရဲ့ဖြောင့်မတ်ခြင်းကို မမြင်နိုင်ဘူးဆိုတာ၊ ကိုယ့်အယူအဆတွေ၊ စိတ်ကူးတွေနဲ့ပဲ နားလည်အောင် ကြိုးစားနေတာကြောင့်ပါ။ အဲဒီ အန္တိခရစ်တွေ၊ ခေါင်းဆောင်အတုအယောင်တွေက ဘုရားအိမ်တော်ရဲ့အလုပ်ကို နှောင့်ယှက်နေတယ်ဆိုတာ မြင်ရတော့၊ သူတို့အကြောင်းကို အမှန်အတိုင်း အသိပေးလိုက်တာ တရားနည်းလမ်းကျတဲ့ လုပ်ရပ်လို့ပဲ ယုံကြည်လိုက်တယ်။ အဲဒီလုပ်ရပ်ကြောင့် ကျွန်တော်လည်း ဘုရားရဲ့ထောက်ခံမှုနဲ့ အကာအကွယ်ကို ရသင့်တယ်ပေါ့။ သူတို့တွေကို ချက်ချင်း ကိုင်တွယ်လိမ့်မယ်လို့ပဲ ထင်မိတာ။ အဲဒါကပဲ ဘုရားရဲ့ဖြောင့်မတ်ခြင်း ဖြစ်တယ်ပေါ့။ ဒါပေမဲ့ ဒီကိစ္စတွေကို တိုင်ပြီးတဲ့နောက်မှာ သူတို့က ရာထူးတွေ မြဲနေတုန်းပဲ၊ လက်လွတ်စပယ် လုပ်နေကြတုန်းပဲ။ ချုပ်ချယ်ခံရ၊ အပယ်ခံရတဲ့သူက ကျွန်တော်ဖြစ်နေတယ်။ အဲဒီအချိန်မှာ ကျွန်တော်က ဘုရားရဲ့ဖြောင့်မတ်ခြင်းကို စပြီး သံသယဝင်သွားတာပဲ။ ဘုရားနှုတ်ကပတ်တော်တွေကို ဖတ်ပြီးတော့မှ၊ ဘုရားရဲ့အနှစ်သာရက ဖြောင့်မတ်တယ်ဆိုတာ ကျွန်တော် နားလည်မိတယ်။ ကိုယ်တော် လုပ်ဆောင်တာတွေက ကျွန်တော်တို့အယူအဆတွေအတိုင်း ဖြစ်ဖြစ်မဖြစ်ဖြစ်၊ အဲဒါတွေက သူ့ရဲ့ဖြောင့်မတ်ခြင်းကို အမြဲတမ်း ဖော်ပြပါတယ်။ ယောဘကို စမ်းသပ်မှုတွေလိုပေါ့။ သူက ဘုရားရဲ့အမြင်မှာ စုံလင်တဲ့လူတစ်ယောက်ပဲ။ ဒါပေမဲ့ ဘုရားက သူ့ကို စာတန်ဆီ အပ်ပြီး၊ သူ့စည်းစိမ်ဥစ္စာနဲ့ သားသမီးတွေကို ဖယ်ရှားလိုက်တယ်။ ဒါက ဘုရားရဲ့ဖြောင့်မတ်ခြင်းပဲ။ ယောဘက ဘုရားကို ကြောက်ရွံ့တယ်။ မကောင်းမှုကို ရှောင်တယ်။ သူက ဘုရားကို ခိုင်ခိုင်မာမာ၊ ထူးထူးကဲကဲ သက်သေခံဖို့၊ သူ့ယုံကြည်ခြင်းကိုပဲ အားကိုးခဲ့တယ်။ အဲဒီတော့မှ ဘုရားကလည်း သူ့ကို ရှည်ကြာတဲ့အသက်၊ ပိုများတဲ့ စည်းစိမ်ဥစ္စာတွေ၊ ပိုကောင်းတဲ့သားသမီးတွေနဲ့ ကောင်းချီးပေးခဲ့တာ။ ဒါကလည်း ဘုရားရဲ့ဖြောင့်မတ်ခြင်းပဲလေ။ ယောဘက ဘုရားကို သက်သေခံပြီးတဲ့နောက်မှာ ဘုရားက သူ့ကို ကောင်းချီးမပေးဘဲ၊ ဖျက်ဆီးပစ်ခဲ့တယ်ဆိုပါစို့။ အဲဒီလိုဆိုလည်း ဘုရားရဲ့ဖြောင့်မတ်ခြင်းပဲ ဖြစ်လိမ့်မယ်။ ဘုရားရဲ့အနှစ်သာရနဲ့ စိတ်သဘောထားက ပင်ကိုအရ ဖြောင့်မတ်တာပါ။ ဒါကြောင့် ကိုယ်တော် လုပ်ဆောင်တာမှန်သမျှ ဖြောင့်မတ်တယ်။ ပြီးတော့ ရှင်ပေတရုအကြောင်းလည်း စဉ်းစားမိတယ်။ သူက စမ်းသပ်မှုတွေ၊ စစ်ဆေးမှုတွေကို ရာနဲ့ချီ ကြုံရပေမဲ့၊ ဘုရားရဲ့ဖြောင့်မတ်ခြင်းကို ချီးမွမ်းနေတုန်းပဲ။ ဖြစ်ခဲ့တာတွေမှန်သမျှကို သူ နားမလည်နိုင်ပေမဲ့၊ အဲဒါတွေရဲ့နောက်ကွယ်မှာ ဘုရားရဲ့ဖြောင့်မတ်ခြင်းနဲ့ ဉာဏ်ပညာ ရှိတယ်လို့ သူက ယုံကြည်ခဲ့တာ။ အဲဒါဆို ကျွန်တော်ကရော။ ကျွန်တော်က ဘုရားရဲ့ ဖြောင့်မတ်ခြင်းကို အမှန်တကယ် နားမလည်ခဲ့ဘူး။ အဲဒီအစား အကြောင်းကိစ္စတွေ ဘယ်လိုဖြစ်ပေါ်လဲ၊ ပြီးတော့ ရလဒ်ကလည်း ကိုယ့်အယူအဆတွေနဲ့ ကိုက်မကိုက်ဆိုတာကို ကြည့်ပြီး အကဲဖြတ်ခဲ့တာပါ။ ဘုရားရဲ့လုပ်ဆောင်ချက်က ကျွန်တော့်အယူအဆတွေနဲ့ ကိုက်တယ်၊ ကျွန်တော့်ကို အကျိုးရှိစေတယ်ဆိုရင်၊ ကိုယ်တော့်ဖြောင့်မတ်ခြင်းကို ကျွန်တော် ယုံကြည်လိုက်တယ်။ ဒါပေမဲ့ ကျွန်တော့်ကို အကျိုးမပြုတဲ့ အခြေအနေတွေကို ကိုယ်တော်က စီစဉ်တယ်ဆိုရင်၊ ကိုယ်တော့်ဖြောင့်မတ်ခြင်းကို ကျွန်တော် စပြီး သံသယရှိလာရော။ သူ စီစဉ်ပေးတာတွေက မမျှတဘူးလို့ ယုံကြည်လာတာ။ ကျွန်တော်က ဘုရားကို အတိအလင်း အပြစ်မတင်ခဲ့ဘူးဆိုပေမဲ့၊ စိတ်နှလုံးထဲမှာ ကိုယ်တော့်ကို အမြဲလိုလို ခံပြောနေတာပါ။ ကျွန်တော် ဘယ်လောက် အသိတရားမဲ့ခဲ့လဲဆိုတာ မြင်သွားတယ်။ ဘုရားက မဖြောင့်မတ်တာ မဟုတ်ဘူး။ ကျွန်တော်ကပဲ ဘုရားကို နားမလည်ခဲ့တာပါ။ ကျွန်တော်က တစ်ကိုယ်ကောင်းဆန်လွန်းပြီး မရိုးသားခဲ့တာ။ သမ္မာတရားကိုလည်း မရှာဖွေခဲ့ဘူး။ ကိုယ်တော် စီစဉ်ပေးတဲ့ အခြေအနေကနေ သင်ယူတာလည်း မလုပ်ခဲ့ဘူး။ အဲဒီအစား ကိုယ့်အနာဂတ်နဲ့ အကျိုးစီးပွားကို မက်ပြီး၊ မကျေမနပ်ဖြစ်ခဲ့တာပါ။ ဒီတော့ စိတ်ဓာတ်တွေကျပြီး မနာကျင်ဘဲနေမလား။ မခံမရပ်နိုင် ဖြစ်တာပေါ့။ နောက်ဆုံးမှ ကျွန်တော် ဘုရားအလိုတော်ကို နားလည်ခဲ့တာ။ ဘုရားက ကျွန်တော့်အမြင်မှားတွေ ပျောက်အောင်၊ ဒီအခြေအနေကို အသုံးပြုနေတာပါ။ ဒါမှ ကျွန်တော်က ကိုယ်တော့်ဖြောင့်မတ်ခြင်းကို ကိုယ့်အယူအဆတွေနဲ့ နားလည်အောင် မကြိုးစားတော့မှာ။ ကျွန်တော်လည်း ဖြစ်နေတာတွေကို နောက်ဆုံး နားလည်သလို ဖြစ်သွားတယ်။ ဘုရားရှေ့မှာလည်း ဆုတောင်းတယ်။ ကိုယ်တော့်အစီအစဉ်တွေကို နာခံချင်ပါတယ်။ ဒီအခြေအနေထဲမှာ ကိုယ်တော့်ကို နားလည်ချင်ပါတယ်ပေါ့။

အဲဒီအချိန်မှာပဲ ဘုရားရဲ့ ဒီနှုတ်ကပတ်တော်တွေကို ဖတ်မိတယ်ဗျ၊ “လူအများစုသည် ဘုရားသခင်၏အမှုတော်ကို နားမလည်ကြပေ။ ယင်းသည် နားလည်ရန်လွယ်ကူသောအရာ မဟုတ်သည်မှာ မှန်ပေသည်။ ဘုရားသခင်၏အမှုတော်အားလုံးတွင် အစီအစဥ်ရှိပြီး ၄င်းတို့အားလုံးကို ဘုရားသခင်၏အချိန်အခါ၌ လုပ်ဆောင်ကြောင်း ရှေးဦးစွာ သိမှတ်ရမည်။ ဘုရားသခင်မည်သည့်အမှုကို မည်သည့်အချိန်တွင် ပြုလုပ်ကြောင်း လူသားသည် ထာဝရ နားလည်နိုင်စွမ်း မရှိပေ။ ဘုရားသခင်သည် အမှုတစ်ခုကို အချိန်တစ်ခု၌ လုပ်ဆောင်ပြီး၊ ကိုယ်တော်သည် နှောင့်နှေးကြန့်ကြာခြင်း မရှိ၊ သူ၏အမှုတော်ကို မည်သူမျှ မဖျက်ဆီးနိုင်ပေ။ သူ၏ အစီအစဉ်အတိုင်း သူ၏ရည်ရွယ်ချက်အတိုင်း လုပ်ဆောင်ခြင်းသည် သူ၏အမှုတော်ကို သူပြုသည့် နိယာမဖြစ်ပြီး၊ ဤအရာကို မည်သူမျှပြောင်းလဲ၍ မရချေ။ ထိုအရာထဲ၌ ဘုရားသခင်၏ စိတ်သဘောထားကို သင်တွေ့မြင်သင့်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “ဘုရားသခင်၏ အနန္တတန်ခိုးကို သိခြင်းအားဖြင့်သာလျှင် သင်၌ စစ်မှန်သော ယုံကြည်ခြင်း ရှိနိုင်သည်”) “လူသားအထဲ၌ ဘုရားသခင် ပြုသမျှသည် သူ၏စီမံခန့်ခွဲမှုနှင့် လူသားမျိုးနွယ်ကို ကယ်တင်ခြင်းနှင့် သက်ဆိုင်သည့်အတွက်၊ ဘုရားသခင် ပြုသော အရာရာတိုင်းသည် လိုအပ်ပြီး ထူးခြားသော အရေးပါမှု ပိုင်ဆိုင်ပေသည်။ ပင်ကိုအားဖြင့် ဘုရားသခင်၏အမြင်တွင် ယောဘသည် စုံလင်ကာ ဖြောင့်မတ်သော်လည်း၊ ယောဘ၌ ဘုရားသခင်ပြုခဲ့သော အမှုသည် ကွဲပြားခြင်း မရှိပေ။ တစ်နည်းအားဖြင့် ဘုရားသခင် မည်သည့်အရာ ပြုသည် သို့မဟုတ် သူ ပြုသည့် နည်းလမ်းကို ပဓာနမထားဘဲ၊ အဖိုးအခကို ပဓာနမထားဘဲ၊ သို့မဟုတ် သူ၏ ရည်မှန်းချက်ကို ပဓာနမထားဘဲ၊ သူ၏ လုပ်ဆောင်ချက်များ၏ ရည်ရွယ်ချက်မှာ မပြောင်းလဲပေ။ သူ၏ ရည်ရွယ်ချက်မှာ လူသားထဲသို့ ဘုရားသခင်၏ နှုတ်ကပတ်တော်များ အပြင်၊ လူသားအတွက် ဘုရားသခင်၏ သတ်မှတ်ချက်များနှင့် ဘုရားသခင်၏အလိုတို့ကို လုပ်ဆောင်ရန် ဖြစ်သည်။ တစ်နည်းအားဖြင့် ယင်းမှာ ဘုရားသခင်၏ စိတ်နှလုံးကို လူသားအား နားလည်စေရင်းနှင့် ဘုရားသခင်၏ အနှစ်သာရကို သဘောပေါက်စေရင်း၊ ပြီးလျှင် ဘုရားသခင်၏ အချုပ်အခြာအာဏာနှင့် အစီအစဉ်များကို လူသားအား နာခံစေရင်း၊ ထိုသို့ဖြင့် လူသားအား ဘုရားသခင်ကို ကြောက်ရွံ့ခြင်းနှင့် မကောင်းမှုရှောင်ကြဉ်ခြင်းအား ရရှိခွင့်ပေးရင်း၊ ဘုရားသခင်သည် အပြုသဘောဆောင်သည်ဟု သူယုံကြည်သော အရာခပ်သိမ်းကို သူ၏ခြေလှမ်းများနှင့်အညီ လူသားထဲ၌ အမှုပြုရန် ဖြစ်သည်- ထိုအရာအားလုံးမှာ ဘုရားသခင်ပြုသမျှအားလုံးထဲက သူ၏ရည်ရွယ်ချက်၏ ကဏ္ဍတစ်ခုဖြစ်သည်။ အခြားသောကဏ္ဍမှာ စာတန်သည် ဘုရားသခင်၏ အမှုတွင် အဖြည့်ခံနှင့် အသုံးတော်ခံ ဖြစ်သောကြောင့်၊ လူသားသည် စာတန်ထံ မကြာခဏပေးအပ်ခံရခြင်း ဖြစ်သည်။ ဤသည်မှာ လူတို့အား စာတန်၏ စုံစမ်းနှောင့်ယှက်မှုများကို မြင်ခွင့်ပေးရန်နှင့် စာတန်၏ ဆိုးယုတ်မှု၊ အကျည်းတန်မှုနှင့် စက်ဆုပ်ဖွယ်ကောင်းမှုတို့ကို တိုက်ခိုက်ခွင့်ပေးရန် ဘုရားသခင် အသုံးပြုသော နည်းလမ်းဖြစ်သည်၊ ထိုသို့ဖြင့် လူတို့အား စာတန်ကို မုန်းတီးစေပြီး အပျက်သဘောဆောင်သောအရာကို သိရှိကာ အသိအမှတ်ပြုစေလေသည်။ ဤနည်းစနစ်သည် ဘုရားသခင်၏ နှုတ်ကပတ်တော်များ၊ ဘုရားသခင်အပေါ် ၎င်းတို့၏ အသိနှင့် နာခံမှု၊ ပြီးလျှင် ဘုရားသခင်၌ ၎င်းတို့၏ ယုံကြည်ခြင်းနှင့် သူ့ကို ကြောက်ရွံ့ခြင်းတို့ကြောင့် စာတန်၏ တိုက်ခိုက်မှုများနှင့် စွပ်စွဲမှုများအပေါ် အောင်မြင်သည်အထိ- ၎င်းတို့အား စာတန်၏ ထိန်းချုပ်မှုနှင့် စွပ်စွဲမှုများ၊ ဝင်ရောက်နှောင့်ယှက်မှုနှင့် တိုက်ခိုက်မှုတို့မှ မိမိကိုယ်ကိုယ် တဖြည်းဖြည်း လွတ်မြောက်စေခွင့်ပေးလေသည်။ ထိုအခါမှသာ ၎င်းတို့သည် စာတန်၏ အုပ်စိုးမှုအောက်မှ လုံးလုံးလျားလျား ကယ်ဆယ်ခြင်းကို ခံရလိမ့်မည် ဖြစ်သည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ အမှုတော်၊ ဘုရားသခင်၏ စိတ်သဘောထားနှင့် ဘုရားသခင် ကိုယ်တော်တိုင် (၂)”) ဘုရားနှုတ်ကပတ်တော်တွေကြောင့် ကျွန်တော် မြင်သွားတယ်။ ကိုယ်တော်က အမြဲတမ်း စည်းမျဉ်းစည်းကမ်းနဲ့ သူ့အချိန်ကျမှ လုပ်ဆောင်တယ်။ ဒါတွေအားလုံးရဲ့နောက်ကွယ်မှာ ကိုယ်တော့်ဖြောင့်မတ်ခြင်းနဲ့ ဉာဏ်ပညာ ရှိနေတယ်။ ကျွန်တော် ထင်ခဲ့တာက ဘုရားရဲ့ဖြောင့်မတ်ခြင်းဆိုတာ ချက်ချင်း ဒဏ်ခတ်တာမျိုးပဲ၊ မကောင်းမှုလုပ်သူတွေလည်း ချက်ချင်း အပြစ်ဒဏ်ပေးခံရမယ်ပေါ့။ ဒါပေမဲ့ ကျွန်တော် ထင်ခဲ့သလို ဖြစ်ပျက်ကြမယ်ဆိုရင်၊ ဘုရားက လူအမျိုးအစားအားလုံးကို ဘယ်လိုလုပ် ဖော်ထုတ်ပြမလဲ၊ သူ ရွေးကောက်ထားတဲ့သူတွေ ခွဲခြားသိမြင်မှု ရကြအောင် လုပ်ပေးလို့ရပါ့မလား။ တကယ်တော့ ဘုရားက အန္တိခရစ်တွေ ခေါင်းဆောင်အတုအယောင်တွေကို အသင်းတော်ထဲမှာ ရှိခွင့်ပေးတယ်။ ကျွန်တော်တို့တွေ အသက်တာမှာ ရင့်ကျက်လာအောင်၊ သမ္မာတရားကို ရှာဖွေကြအောင်၊ ခွဲခြားသိမြင်ခြင်း ရှိလာအောင်၊ ဒီလူတွေကို အသုံးပြုဖို့ပါ။ ကျွန်တော်တို့က သမ္မာတရားရဲ့စည်းမျဉ်းတွေကို အသုံးပြုပြီး ဒီလူတွေကို ခွဲခြားနိုင်ပြီဆိုရင်၊ အဲဒါက သမ္မာတရားကို နားလည်တဲ့အချိန်၊ သမ္မာတရားထဲ ဝင်ရောက်တဲ့အချိန်ပဲ။ အဲဒီလိုဖြစ်ပြီဆိုရင်၊ အန္တိခရစ်တွေ ခေါင်းဆောင်အတုအယောင်တွေက သူတို့ရည်ရွယ်ချက်ကို အစေခံလို့ ပြီးသွားတာပါ။ အဲဒီလိုအချိန်မှာ တချို့အန္တိခရစ်တွေ၊ ခေါင်းဆောင်အတုအယောင်တွေက အသင်းတော်ထဲမှာ အာဏာရှိတဲ့ရာထူးတွေကနေ တချို့လူတွေကို ထိန်းချုပ်လှည့်စားနိုင်တယ်လို့ ထင်ရပေမဲ့၊ အသင်းတော်မှာ ခရစ်တော်နဲ့ သမ္မာတရားက စိုးမိုးနေတုန်းပါပဲ။ ဒါကြောင့် သူတို့အားလုံး အနှေးနဲ့အမြန် ဖော်ထုတ်ခံရမှာပဲ။ စွန့်ပစ်ခံရမှာပဲ။

အန္တိခရစ်တွေရဲ့သဘာဝက ဘယ်လောက် အငြိုးကြီးတယ်၊ ကူးစက်တတ်တယ်ဆိုတာလည်း နားလည်သွားတယ်။ လုံးဝကို လူ့သဘာဝ ကင်းမဲ့တာပါ။ သူတို့က ဂုဏ်အဆင့်အတန်းကိုပဲ ဂရုစိုက်တာ။ ဘုရား ရွေးကောက်ထားသူတွေကို လုံးဝ ဂရုမစိုက်ဘူး။ သူတို့အကျိုးစီးပွားကို ထိပါးတဲ့လူမှန်သမျှ သူတို့အတွက် ဆူးတစ်ချောင်းဖြစ်သွားတာပဲ။ သူတို့က အဲဒီလူကို တိုက်ခိုက်မယ်၊ လက်စားချေမယ်။ သူတို့ကိုယ်တိုင် မပျက်စီးမချင်း ထိုးနှက်တော့တာပဲ။ သူတို့က စာတန်နတ်ဆိုးလိုပဲ ပြုမူကြတာ။ ဘုရား ရွေးကောက်ထားသူတွေကျတော့ အသင်းတော်အသက်ကို နေထိုင်ဖို့၊ သူတို့တာဝန်ကို လုပ်ဖို့အတွက်၊ အန္တိခရစ်တွေ ထုတ်ပယ်ခံရလည်း လုံးဝ နားကြရမှာမဟုတ်ဘူး။ ဘုရားက ကျွန်တော့်ကို ဒီလိုတွေ့ကြုံစေတယ်ဆိုတာ၊ တခြားသူတွေကို သူတို့တွေ ဘယ်လိုဒုက္ခပေး၊ လှည့်ဖြားတယ်ဆိုတာကို ဒီလူတွေကတစ်ဆင့် မြင်နိုင်အောင်၊ သူတို့သဘာဝနဲ့ အနှစ်သာရကို လက်ခံတတ်အောင်၊ သူတို့အယူမှားတွေကို ခွဲခြားမြင်နိုင်အောင်၊ သူတို့ထိန်းချုပ်လှည့်စားတာတွေကို လွတ်မြောက်နိုင်အောင်လို့ပါ။ ဘုရားက ကျွန်တော့်ကို လမ်းမှား မလျှောက်မိအောင်၊ သူတို့အမှားတွေကိုလည်း သင်ခန်းစာယူစေချင်တာပါ။ ဘုရားက ကျွန်တော့်ကို ကယ်တင်ဖို့ စုံလင်စေဖို့၊ ဒီအခြေအနေကို အမှန်တကယ် စီစဉ်နေတယ်ဆိုတာ ဒါတွေအားလုံးက ပြလိုက်တာပါ။ ဘုရားနှုတ်ကပတ်တော်တွေ မိန့်ဆိုသလိုပေါ့၊ “ဆန့်ကျင်ဘက်ပြုပြီး အပျက်သဘောဆောင်သော အရာများစွာ၏ အကူအညီနှင့်၊ စာတန်၏ အမျိုးမျိုးသော သရုပ်သကန်ဖော်ပြချက်များ တည်းဟူသော ၎င်း၏လုပ်ရပ်များ၊ ၎င်း၏စွပ်စွဲချက်များ၊ ၎င်း၏ အနှောင့်အယှက်များနှင့် လှည့်ဖြားမှုများကို အသုံးချခြင်းအားဖြင့် ဘုရားသခင်သည် သင့်အား စာတန်၏ အကျည်းတန်သော မျက်နှာကို ရှင်းရှင်းလင်းလင်း ပြသကာ၊ ထိုသို့ဖြင့် သင်သည် စာတန်ကို မုန်းတီးပြီး ပစ်ပယ်နိုင်ဖို့အလို့ငှာ သင်၏ စာတန်အား ခွဲခြားသိမြင်နိုင်စွမ်းကို စုံလင်စေသည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “စုံလင်ခြင်းသို့ ရောက်မည့်သူများသည် စစ်ဆေးခြင်းကို ခံကြရမည်”) ကိုယ်တော်ရဲ့ အပင်ပန်းခံအားထုတ်မှုတွေကို ကျွန်တော် နားလည်အောင် လမ်းပြတဲ့အတွက်၊ အမှောင်ထဲကနေ တွဲခေါ်ပေးတဲ့အတွက်၊ ဘုရားကို ကျေးဇူးတင်မိတယ်။

၂၀၁၅ ဇန်နဝါရီမှာ ကျွန်တော်က ယန်ကျူးအကြောင်း တိုင်စာတစ်စောင် ထပ်ရေးလိုက်တယ်။ သူ့ကို စစ်ဆေးဖို့ ဘုရားအိမ်တော်က လူတစ်ယောက် လွှတ်မယ့်အချိန်ကို အရင်လိုပဲ ရင်တမမနဲ့ နေ့တိုင်း စောင့်တယ်။ ဒါပေမဲ့ အချိန်နှစ်လ ကြာသွားတယ်၊ လာစစ်ဆေးမယ့်လူကို ကျွန်တော် မျှော်နေရတုန်းပဲ။ အသင်းတော်ခေါင်းဆောင်ကလည်း ကျွန်တော့်ကို ခဏခဏ လာပြီး မေးနေတာ။ “ရှင်က ဘုရားကို မကျေနပ်တာရှိလို့လား၊ ဒါမှမဟုတ် ဘုရားအိမ်တော်ကို မကျေနပ်တာရှိလို့လား” တဲ့။ သူ အဲဒီလိုပြောတော့ ကျွန်တော် စပြီး စိတ်ပူလာတယ်။ စိတ်ထဲမှာလည်း၊ “ငါက ဒီစာကို ထပ်ရေးလိုက်ပြီဆိုတော့၊ ဘာတွေဖြစ်လာမလဲမသိဘူး။ ငါ့ကိုတော့ ခွဲထုတ်ထားကြပြီးပြီ။ ဒီတော့ တစ်ခုခု ထပ်ဖြစ်တယ်ဆိုရင်၊ ငါက အသင်းတော်ကနေ ထုတ်ပယ်ခံရဖို့ သေချာတယ်” ပေါ့။ ကျွန်တော်က ဘုရားရဲ့ဖြောင့်မတ်ခြင်းကို ထပ်ပြီး သံသယရှိလာပြန်ပြီဆိုတာ ချက်ချင်း အသိဝင်ပြန်ရော။ ဒါနဲ့ ဘုရားရှေ့ ခပ်မြန်မြန်သွားပြီး၊ ဆုတောင်းတယ်၊ “ဘုရားသခင်၊ ကျွန်တော်က ကိုယ်တော့်ဖြောင့်မတ်မှုကို နှုတ်ကနေ လက်ခံပါတယ်။ ဘုရားအိမ်တော်မှာ ခရစ်တော်နဲ့ သမ္မာတရား စိုးမိုးတယ်လို့လည်း ယုံကြည်ပါတယ်။ ဒါပေမဲ့ အချိန်ကာလတွေ၊ အဖြစ်အပျက်တွေနဲ့ စမ်းသပ်ခံရတော့မှ၊ ကျွန်တော့်ယုံကြည်ခြင်း နည်းနေတာတွေ၊ ကိုယ်တော့်ဖြောင့်မတ်ခြင်းကို အမှန်တကယ် နားမလည်သေးတာတွေကို မြင်မိပါတယ်။ အခုတော့ ကျွန်တော့်အကျိုးစီးပွားတွေကို စွန့်ပြီး၊ ကိုယ်တော့်အစီအစဉ်တွေကို နာခံချင်ပါပြီ။ ကိုယ်တော့်အလိုကို နားလည်အောင် ကျွန်တော့်ကို လမ်းပြတော်မူပါ” ပေါ့။ နောက်တော့ ဘုရားနှုတ်ကပတ်တော် ကျမ်းပိုဒ်တစ်ခုကို ဖတ်မိတယ်- “ဘုရားသခင်အား ချစ်ရန် ဆန္ဒပြင်းပြသော လူတိုင်းအတွက် မရရှိနိုင်သော သမ္မာတရားများ ဆိုသည်မှာ မရှိပါ၊ သူတို့ ကြံ့ကြံ့မခံနိုင်သောအရာအတွက် တရားစီရင်မှုလည်း မရှိပါ။ သင့်အသက်တာကို မည်သို့နေထိုင်သင့်သနည်း။ ဘုရားသခင်ကို သင်မည်သို့ ချစ်သင့်ပြီး သူ့အလိုကိုဖြည့်ဆည်းရန် ထိုချစ်ခြင်းကို မည်သို့အသုံးပြုသင့်သနည်း။ သင့်အသက်တာတွင် ထို့ထက်ပို၍ ကြီးမြတ်သောအရာ မရှိပါ။ အထူးသဖြင့် သင့်တွင် ထိုကဲ့သို့သော ရည်မှန်းချက်များနှင့် ဇွဲလုံ့လတို့ ရှိရမည်ဖြစ်ပြီး ထိုကြောက်တတ်သော လူပျော့လူညံ့များကဲ့သို့ မဖြစ်သင့်ပါ။ အဓိပ္ပာယ်ပြည့်ဝသော အသက်တာကို တွေ့ကြုံရန်နှင့် အဓိပ္ပာယ်ပြည့်ဝသော သမ္မာတရားများကို တွေ့ကြုံရန် သင်လေ့လာရမည်ဖြစ်ပြီး ထိုကဲ့သို့ သင့်ကိုယ်သင် ဝတ်ကျေတန်းကျေ သဘောမထားသင့်ပေ။ သင်သတိမထားမိဘဲ သင့်အသက်တာသည် သင့်ကို ဝကွက်ချန်ထားခဲ့လိမ့်မည်၊ ယင်းနောက်တွင် ဘုရားသခင်ကိုချစ်ရန် သင်၌ နောက်တစ်ကြိမ် အခွင့်အရေး ရှိပါဦးမည်လော။ လူသည် သေလွန်ပြီးနောက် ဘုရားသခင်အား ချစ်နိုင်ပါမည်လော။ သင့်တွင် ပေတရုကဲ့သို့ တူညီသည့် ရည်မှန်းချက်များနှင့် စိတ်ဓာတ်ရှိရမည်၊ သင့်အသက်တာသည် အဓိပ္ပာယ်ပြည့်ဝရမည်ဖြစ်ပြီး သင့်ကိုယ်သင် မကစားသင့်ပါ။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ပေတရု၏ အတွေ့အကြုံများ- ပြစ်တင်ဆုံးမခြင်းနှင့် တရားစီရင်ခြင်းတို့နှင့်သက်ဆိုင်သည့် သူ၏အသိပညာ”) ဘုရားနှုတ်ကပတ်တော်တွေကနေ ကျွန်တော် မြင်မိတာက၊ ကိုယ်တော် စုံလင်စေတဲ့အရာဆိုတာ သမ္မာတရားနဲ့ ဖြောင့်မတ်ခြင်းကို ကျွန်တော်တို့ တောင့်တတာတွေ၊ ဘုရားကို ချစ်ခင်ဖို့ စိတ်ပိုင်းဖြတ်တာတွေပဲ။ အခက်အခဲ အတားအဆီးတွေ၊ ဝေဖန်တိုက်ခိုက်တာတွေကို ဘယ်လိုပဲကြုံကြုံ၊ နောက်မဆုတ်ရဘူး။ ဘုရားအတွက် သမ္မာတရားအတွက် ရှင်သန်ရမယ်။ စာတန်ရဲ့အင်အားမှန်သမျှကို အလျှော့မပေးရဘူး။ အဲဒီတော့မှ ကျွန်တော်တို့က သမ္မာတရားကို ရပြီး၊ စုံလင်ခြင်းဖြစ်နိုင်တာပါ။ ကျွန်တော်က အဲဒီလို စိတ်ပိုင်းဖြတ်မှုမျိုး၊ စိတ်ခွန်အားမျိုး မရှိခဲ့တာပဲ။ ကျွန်တော်က ဘုရားအိမ်တော်ရဲ့အလုပ်ကို ကာကွယ်ဖို့၊ သမ္မာတရားကို လက်တွေ့လုပ်ဆောင်ဖို့၊ ဘုရားရှေ့မှာ ဆုတောင်းထားတယ်၊ ဆုံးဖြတ်ထားတယ်ဆိုပေမဲ့၊ မကောင်းတဲ့အင်အားတွေ ပေါ်နေတာကို မြင်လိုက်တာနဲ့၊ ကြောက်လန့်ပြီး နောက်တွန့်သွားတာ။ အလျှော့ပေးမိတာပါ။ ကျွန်တော်က ဘုရားရဲ့ဖြောင့်မတ်ခြင်းကို အမှန်တကယ် နားမလည်သေးဘူး၊ အကြောင်းကိစ္စတွေ ကြုံပြီဆိုရင် ကိုယ့်အတွက်ပဲ စဉ်းစားတယ်ဆိုတာတွေကို အသိဝင်သွားတယ်။ ဘုရား မိန့်ဆိုထားတာတစ်ခုလည်း ခေါင်းထဲရောက်လာတယ်၊ “ဆိုးညစ်သောသူများသည် အပြစ်ဒဏ်ပေးခြင်းကို မုချခံကြရလိမ့်မည်” “ဒါပေါ့၊ ဘုရားနှုတ်ကပတ်တော်တွေက ပြည့်စုံလာမှာပဲ။ ကိုယ်တော် ဖြစ်မြောက်စေတာတွေက ထာဝရတည်တယ်။ မကောင်းမှုလုပ်တဲ့သူတိုင်း ဘုရားရဲ့ဖြောင့်မတ်ခြင်းနဲ့ အပြစ်ဒဏ်ပေးတာကို ခံရမှာပဲ။ ဘယ်အချိန်ကျမှ ဖြစ်ဖြစ်၊ ဘယ်လိုတွေပဲဖြစ်ဖြစ်၊ ဒါတွေအားလုံးက နောက်ဆုံးမှာ ဘုရားနှုတ်ကပတ်တော်တွေအတိုင်း အမြဲတမ်း ဖြစ်ပျက်ကြလိမ့်မယ်” ပေါ့။ ဒါနဲ့ ကျွန်တော် စဉ်းစားပြန်ရော၊ “ငါ့အယူအဆတွေကို စွန့်လွှတ်ရမယ်၊ မရိုးသားတဲ့ မကောင်းတဲ့ ငါ့စိတ်သဘောထားကိုလည်း စွန့်ရမယ်၊ ဘုရားနှုတ်ကပတ်တော်တွေကို ယုံကြည်ရမယ်၊ ဘုရားက ဖြောင့်မတ်တယ်ဆိုတာကို ယုံကြည်ရမယ်။ စာတန်ရဲ့အင်အားတွေကို ငါ အလျှော့မပေးတော့ဘူး” ပေါ့။ ကျွန်တော် ဒီလို အသိဝင်သွားတော့၊ တဖြည်းဖြည်း တည်ငြိမ်လာတယ်၊ စိုးရိမ်တာတွေလည်း ပျောက်သွားတယ်။

၂၀၁၅ ဧပြီလရောက်တော့၊ ခေါင်းဆောင်လီနဲ့ တခြားခေါင်းဆောင်တွေ၊ အကျိုးဆောင်တွေဆီကနေ စာတွေ ရောက်လာတယ်ဗျ။ ယန်ကျူးက သူတို့ကို လိမ်ညာလှည့်စားခဲ့တဲ့ကိစ္စတွေ၊ သူတို့ကြောင့် ကျွန်တော် ဒုက္ခရောက်ခဲ့ရတဲ့အကြောင်းတွေပေါ့။ သူတို့အားလုံးက တောင်းပန်ကြတယ်။ ခေါင်းဆောင်လီဆိုရင် သူ့စာထဲမှာ ဝန်ခံတယ်ဗျ၊ “ရှင်က အသင်းတော်အလုပ်ကို ဆိုးဆိုးဝါးဝါး နှောင့်ယှက်နေတယ်လို့ စွပ်စွဲခဲ့တာက လူကြီးပိုင်းခေါင်းဆောင်တွေ မဟုတ်ဘူး။ ယန်ကျူးက စွပ်စွဲတာပါ” တဲ့။ အဲဒီအချိန်ကျမှ ကျွန်တော် သိလိုက်တယ်၊ ယန်ကျူးက သူ့အကြောင်း တိုင်တဲ့ စာနှစ်စောင်လုံးကို ဖတ်ကြည့်ထားတာပဲ။ ပြီးတော့ သူ့အတွက် အန္တရာယ်မရှိဖို့၊ ကျွန်တော် ထုတ်ပယ်ခံရအောင် ကြိုပြီးပြင်ဆင်ထားတာ။ ဒါပေမဲ့ နောက်တော့ တချို့ခေါင်းဆောင်တွေ၊ အကျိုးဆောင်တွေက သူ့အကြောင်းတွေကို မြင်ပြီး၊ ဘုရားအိမ်တော်ကို တိုင်စာတစ်စောင် ပေါင်းပို့လိုက်ကြတာပါ။ သူတို့စာတွေအားလုံးကို ဖတ်ပြီးတော့မှ၊ ကျွန်တော်လည်း သက်ပြင်းကြီးချမိတယ်။ ဘုရားရှေ့ ဒူးထောက်ပြီး၊ ငိုလည်း ငိုမိတယ်။ ကျွန်တော့်အပေါ် ဘုရားရဲ့ကျေးဇူးတွေ များလွန်းသွားပြီလို့ အဲဒီအချိန်မှာ ခံစားရတယ်။ ကျွန်တော်က ဘုရားကို နှစ်ပေါင်းများစွာ ယုံကြည်လာတယ်။ ဒါပေမဲ့ ကိုယ်တော့်ဖြောင့်မတ်ခြင်းကို ကိုယ့်စိတ်ကူးအတိုင်းအတာနဲ့ပဲ အမြဲတမ်း မြင်မိခဲ့တယ်။ အကြောင်းကိစ္စတွေ ပေါ်ပြီဆိုရင်၊ ကိုယ် စိတ်ကူးထားတာနဲ့ ကိုက်အောင် ကြိုးစားကြည့်တယ်။ အဲဒီလိုလုပ်တာ အဆင်မပြေဘူးဆိုရင်၊ ဘုရားကို အထင်မှားပြီး အပြစ်တင်ရော။ ဒါပေမဲ့ ကျွန်တော် ပျော့ညံ့တာ၊ ဖောက်ပြန်ပျက်စီးတာကို ကိုယ်တော်က ဥပေက္ခာပြုပေးတယ်။ အနာကျင်ဆုံး အခံရခက်ဆုံးဆိုတဲ့ အချိန်တစ်လျှောက်လုံး ကျွန်တော့်ကို လမ်းပြပေးခဲ့တာပါ။ ဒီအတွေ့အကြုံကနေ ကျွန်တော် မြင်သွားတာက၊ ခေါင်းဆောင်အတုအယောင်တွေကို ခွဲခြားဖို့ တိုင်ကြားဖို့ဆိုတဲ့ ဒီဝိညာဉ်ရေးတိုက်ပွဲကို ဘုရားက ကျွန်တော့်အတွက် အသုံးပြုခဲ့တာပဲ။ ကျွန်တော့်အယူအဆမှားတွေ ပျောက်အောင်၊ သူ့ဖြောင့်မတ်ခြင်းကို စစ်မှန်တဲ့နားလည်မှု ရအောင်ပေါ့။ ကျွန်တော်က ဘုရား လုပ်ဆောင်သမျှတိုင်းကို ကိုယ့်စိတ်ကူးအတိုင်းအတာနဲ့ပဲ သုံးသပ်ခဲ့မိတယ်ဆိုတာလည်း နားလည်လာတယ်။ ကျွန်တော်က တကယ်တော့ ဘုရားကို ဘောင်ခတ်စော်ကားနေတာ။ သူ့စိတ်သဘောထားကို ပုန်ကန်ပြစ်မှားခဲ့တာပါ။ ဘုရားရဲ့အနှစ်သာရက ဖြောင့်မတ်တယ်ဆိုတာ၊ ဒီအတွေ့အကြုံက ပြလိုက်တာပဲ။ ဘုရား မိန့်ဆိုလုပ်ဆောင်တာမှန်သမျှက လူတွေရဲ့ အယူအဆတွေအတိုင်း ဖြစ်ဖြစ် မဖြစ်ဖြစ်၊ ဖြောင့်မတ်တဲ့ သူ့စိတ်သဘောထားကို ထုတ်ဖော်ခြင်းပါပဲ။ အနန္တတန်ခိုးရှင် ဘုရားသခင် ပြောသည်မှာ- “ဘုရားသခင်၏ဖြောင့်မတ်သည့် စိတ်သဘောထားသည် ဘုရားသခင်၏ကိုယ်ပိုင်အနှစ်သာရစစ်စစ်ဖြစ်သည်။ လူသားက ရေးသားထားသည့်အရာသော်လည်းကောင်း၊ ပုံသွင်းထားသည့်အရာသော်လည်းကောင်း မဟုတ်ပေ။ သူ၏ ဖြောင့်မတ်သည့် စိတ်သဘောထားသည် သူ၏ဖြောင့်မတ်သည့် စိတ်သဘောထားပင်ဖြစ်ပြီး မည်သည့်ဖန်ဆင်းခံနှင့်မျှ ဆက်နွှယ်ခြင်း၊ သို့မဟုတ် ဆက်စပ်ခြင်းမရှိပေ။ ဘုရားသခင်ကိုယ်တော်တိုင်က ဘုရားသခင်ကိုယ်တော်တိုင်ပင်ဖြစ်သည်။ သူသည် ဖန်ဆင်းခြင်းအစိတ်အပိုင်းတစ်ခု ဘယ်တော့မျှ ဖြစ်လာမည် မဟုတ်ပေ။ သူ့အနေဖြင့် ဖန်ဆင်းခံသတ္တဝါဝင်တစ်ဦး ဖြစ်လာလျှင်ပင် သူ၏ရှိရင်းစွဲစိတ်သဘောထားနှင့် အနှစ်သာရသည် ပြောင်းလဲမည်မဟုတ်ပေ။ ထို့ကြောင့် ဘုရားသခင်ကို သိခြင်းက အရာဝတ္ထုတစ်ခုကို သိခြင်းနှင့် မတူပေ။ ဘုရားသခင်ကို သိခြင်းသည် တစ်ခုခုကို ခွဲခြမ်းစိတ်ဖြာလေ့လာခြင်း မဟုတ်သကဲ့သို့ လူတစ်ယောက်ကို နားလည်ခြင်းအဖြစ်နှင့်လည်း မတူညီပေ။ အကယ်၍ လူသားသည် အရာဝတ္ထုတစ်ခုကိုသိဖို့၊ သို့မဟုတ် လူတစ်ယောက်ကို နားလည်ဖို့အတွက်သုံးသည့် သူ၏အယူအဆ၊ သို့တည်းမဟုတ် နည်းလမ်းကို ဘုရားသခင်ကို သိဖို့ရန် အသုံးပြုလျှင် သင်သည် ဘုရားသခင်၏အကြောင်းကို ဘယ်တော့မျှ သိနိုင်မည်မဟုတ်ပေ။ ဘုရားသခင်ကိုသိခြင်းက အတွေ့အကြုံ၊ သို့မဟုတ် စိတ်ကူးထင်မြင်ခြင်းအပေါ်မှာ အမှီမပြုပေ။ ထို့ကြောင့် သင်သည် သင်၏အတွေ့အကြုံ၊ သို့မဟုတ် စိတ်ကူးထင်မြင်မှုကို ဘုရားသခင်အပေါ် ဘယ်တော့မျှ သတ်မှတ်ခြင်း မပြုရပေ။ သင်၏အတွေ့အကြုံနှင့် စိတ်ကူးထင်မြင်မှုတို့က မည်မျှပင်ကြွယ်ဝနေပါစေ ၎င်းတို့က အကန့်အသတ်ရှိသည်။ ထို့အပြင် သင်၏စိတ်ကူးထင်မြင်မှုက သမ္မာတရားနှင့် ကိုက်ညီရန် မဆိုထားနှင့်၊ အချက်အလက်များနှင့်ပင် ကိုက်ညီခြင်း မရှိပေ။ ၎င်းက ဘုရားသခင်၏ စိတ်သဘောထားအမှန်အပြင် အနှစ်သာရအမှန်တို့နှင့်လည်း သဟဇာတမဖြစ်ပေ။ ဘုရားသခင်၏ အနှစ်သာရကို နားလည်ဖို့ရန် သင်၏စိတ်ကူးထင်မြင်မှုကို အမှီပြုလျှင် သင်ဘယ်တော့မျှ အောင်မြင်မည်မဟုတ်ပေ။ တစ်ခုတည်းသော လမ်းကြောင်းမှာ ဤသို့ဖြစ်သည်- ဘုရားသခင်ထံမှလာသည့် အရာအားလုံးကို လက်ခံလော့၊ ထို့နောက် ၎င်းကို တဖြည်းဖြည်းနှင့် တွေ့ကြုံခံစားပြီး နားလည်လော့။ သင်၏ပူးပေါင်းလုပ်ဆောင်မှုကြောင့်၊ သမ္မာတရားအပေါ် သင်၏ငတ်မွတ်ဆာလောင်မှုကြောင့် ဘုရားသခင်သည် သူ့ကိုအမှန်တကယ်နားလည်ပြီး သိဖို့ရန် သင့်ကို ဉာဏ်အလင်းဖွင့်ပြသည့်နေ့ ရောက်လာလိမ့်မည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အတုမရှိ ဘုရားသခင်ကိုယ်တော်တိုင် (၂)”)

၂၀၁၅ မေလပိုင်းမှာ အန္တိခရစ်ယန်ကျူးကို မကောင်းမှုတွေ အများကြီး လုပ်တယ်ဆိုပြီး အသင်းတော်ကနေ ထုတ်ပယ်လိုက်တယ်။ သူ့အပေါင်းအသင်းတွေ၊ ကြံရာပါတွေလည်း ကိုင်တွယ်ဖြေရှင်းခံရတယ်။ အဲဒီ ထုတ်ပယ်တဲ့ကြော်ငြာစာကို ဖတ်မိတော့၊ ဘုရားက အမှန်တကယ် ဖြောင့်မတ်ပါလားဆိုတာကို ကျွန်တော် လှိုက်လှိုက်လှဲလှဲ ခံစားလိုက်ရတယ်။ ဘုရားအိမ်တော်မှာ ခရစ်တော်နဲ့ သမ္မာတရား စိုးမိုးပါတယ်။ ဘုရားကျေးဇူးတော်ပါ။

အရှေ့သို့- ၅၉။ ရိုးသားသောတင်ပြချက်တစ်ခုရဲ့ အသီးအပွင့်

နောက်တစ်ခုသို့- ၆၁။ သမ္မာတရားက ကျွန်မကို လမ်းပြပေးလိုက်ပါပြီ

ယနေ့မှာ ကပ်ဘေးများကျရောက်နေပြီ။မည်သို့လုပ်ဆောင်မှ သခင်တဖန်ပြန်ကြွလာခြင်းကို ကြိုဆိုရန် လက်မလွှတ်နိုင်မည်နည်း။ကျွန်ုပ်တို့ကိုဆက်သွယ်ပါ။သင့်အားအဖြေပြောပြပေးမည်။

သက်ဆိုင်သည့် အကြောင်းအရာ

၁၁။ အသက်တာတွင် ဘုရားသခင်၏ အချုပ်အခြာအာဏာကို သိခြင်း

အမေရိကန်နိုင်ငံ၊ ရှင့်ရှင်းအနန္တတန်ခိုးရှင် ဘုရားသခင် ပြောသည်မှာ- “ဘုရားသခင်၏ သြဇာအာဏာ၊ ဘုရားသခင်၏ တန်ခိုး၊ ဘုရားသခင်၏ ပင်ကိုလက္ခဏာနှင့်...

၆၄။ မာနထောင်လွှားခြင်းသည် ကျရှုံးခြင်းမတိုင်မီ လာ၏

တရုတ်နိုင်ငံ ကွမ်ရှီး ဒေသ၊ ရှင်းကျယ်အနန္တတန်ခိုးရှင် ဘုရားသခင် ပြောသည်မှာ- “မာနထောင်လွှားခြင်းသည် လူသား၏ ဖောက်ပြန်ပျက်စီးသော စိတ်သဘောထား၏...

၆၇။ လူသား၏ ပုံစံအတိုင်း အနည်းငယ် အသက်ရှင်နေထိုင်ခြင်းသည် ဧကန်အမှန် အလွန်ကောင်း၏

ကနေဒါနိုင်ငံ၊ ထားရှီအနန္တတန်ခိုးရှင် ဘုရားသခင် ပြောသည်မှာ- “သူ၏ အနှစ်ခြောက်ထောင် စီမံခန့်ခွဲမှု အစီအစဉ် အဆုံးမသတ်မီ- လူ အတန်းအစား အသီးသီး၏...

၇၅။ ကျွန်မ ကြုံခဲ့ရသော စမ်းသပ်မှု

တရုတ်နိုင်ငံ ကျိလင် စီရင်စု၊ ကျုံးရှင်းအနန္တတန်ခိုးရှိသော ဘုရားသခင် ပြောသည်မှာ- “ငါ၏ လုပ်ဆောင်ချက်များသည် ကမ်းခြေများရှိ သဲလုံးများထက်...

နှုတ်ကပတ်တော်သည် လူ့ဇာတိ၌ ပေါ်လာ၏ တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ ဘုရားသခင်၏ နေ့စဉ် နှုတ်ကပတ်တော်များ အနန္တတန်ခိုးရှင် ဘုရားသခင်၏ နှုတ်ကပတ်တော် လက်ရွေးစင်များ သမ္မာတရားကို လက်တွေ့လုပ်ဆောင်ခြင်း၏ အခြေခံမူ ၁၇၀ သိုးသငယ်နောက်လိုက်ပြီး သီချင်းအသစ်များကိုသီဆိုပါ နောက်ဆုံးသော ကာလ ခရစ်တော်၏ ပေါ်ထွန်းခြင်းနှင့် အမှုတော် နိုင်ငံတော် ဧဝံဂေလိတရားတော် ဖြန့်ဝေခြင်းအတွက် လမ်းညွှန်ချက်များ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အောင်မြင်သောသူများ၏ သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ

ဆက်တင်

  • စာတို
  • နောက်ခံအပြင်အဆင်များ

တပြေးညီ အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာကြောင်း အကွာအဝေး

စာမျက်နှာအနံ

မာတိကာ

ရှာဖွေမည်

  • ဤစာကို ရှာမည်
  • ဤစာအုပ်ကို ရှာမည်