၅၉။ ရိုးသားသောတင်ပြချက်တစ်ခုရဲ့ အသီးအပွင့်

တရုတ်နိုင်ငံ ဟူပေ စီရင်စု၊ ကျောက်မင်

၂၀၁၁ ခုနှစ် ဧပြီလတုန်းက နိုင်ငံရဲ့တခြားဒေသတစ်ခုက အသင်းတော်တစ်ခုက ခေါင်းဆောင်ဖြစ်တဲ့ ယောင်လန်းနေရာကို ကျွန်မအစားဝင်ရတယ်။ နေရာလွှဲပြောင်းတဲ့အချိန်မှာ ယောင်လန်းက အသင်းတော်ရဲ့အခြေအနေကို အကျဥ်းချုပ်ရှင်းပြတော့ သူ့သမီး ရှောင်မင်းက ရေလောင်းရေးအကူဖြစ်ပြီးတော့ အသင်းတော်ရဲ့အလုပ်တွေနဲ့ ကျွန်မရင်းနှီးလာအောင်ကူညီပေးလိမ့်မယ်လို့ပြောတယ်။ သူကအဲဒီလိုသေချာရှင်းပြတာကိုကြားရတော့ ကျွန်မသူ့ကိုလေးစားချစ်ခင်မိတယ်။ ယောင်လန်းက တော်တော် အရည်အချင်းရှိပြီးတော့ အသင်းတော်ရဲ့အလုပ်တွေကို ကောင်းကောင်းကိုင်တွယ်နိုင်တဲပုံပါပဲ။ အဲဒါကြောင့် အလုပ်တွေအများကြီးကို သူလုပ်နိုင်ပါ့မလားလို့ ကျွန်မသံသယမရှိခဲ့ပါဘူး။ ဘုရားသခင်ရဲ့အလိုတော်ကို အလေးထားပြီးတော့ အသင်းတော်ရဲ့အလုပ်တွေကို ကောင်းကောင်းလုပ်ပါ့မယ်လို့ ကျွန်မစိတ်ထဲမှာသန္နိဌာန်ချခဲ့ပါတယ်။

နောက်ရက်ကျတော့ ရှောင်မင်းက ကျွန်မကို အသင်းခေါင်းဆောင် အစည်းအဝေးကိုခေါ်သွားတယ်။ ကျွန်မတို့ဘုရားသခင်ရဲ့နှုတ်ကပတ်တော်တွေကိုဖတ်ပြီးတော့ ကျွန်မကိုယ်တိုင်နဲ့ ပတ်သက်တဲ့ အတွေ့အကြုံနဲ့ နားလည်ထားတာလေးတွေ နည်းနည်းမျှဝေခဲ့တယ်။ အစ်မရှားက မကျေမနပ်နဲ့ပြောတယ် “အရင်ခေါင်းဆောင်ယောင်လန်းက ဘုရားသခင်ရဲ့နှုတ်ကပတ်တော်တွေကို အဲဒီလိုမိတ်သဟာယမဖွဲ့ဘူး။ သူက ‘ဒါကတော့အားပေးတာ’၊ ‘ဒါကတော့ သတိပေးတာ’ ဆိုပြီး တစ်ကြောင်းချင်းရှင်းပြတာ။” တဲ့ တခြားညီအစ်ကိုမောင်နှမတွေကလည်း ယောင်လန်းက သမ္မာတရားကို မိတ်သဟာယဖွဲ့တာ အရမ်းရှင်းလင်းတယ်ဆိုပြီး ဝင်ထောက်ခံကြတယ်။ ကျွန်မအရမ်းအံ့သြပြီး “ဘုရားသခင်ရဲ့နှုတ်ကပတ်တော်တွေကို မိတ်သဟာယဖွဲ့တာက နှုတ်ကပတ်တော်တွေကို အခြေခံပြီးတော့ ကိုယ်ပိုင်အတွေ့အကြုံနဲ့ နားလည်မှုတွေကို မျှဝေတာမဟုတ်ဘူးလား။ ဘယ်လိုဖြစ်လို့ ယောင်လန်းက ဘုရားသခင်ရဲ့နှုတ်ကပတ်တော်တွေကို လက်တွေ့လုပ်ဆောင်ပြီး ကြုံတွေ့ရတာကို မပြောရတာလဲ။ ဘာလို့ညီအစ်ကိုမောင်နှမတွေကို ဘုရားသခင်ရဲ့နှုတ်ကပတ်တော်တွေကို တစ်ကြောင်းချင်းရှင်းပြရတာလဲ။ အဲဒီလိုမိတ်သဟာယဖွဲ့တာက သူတို့ကိုယ်သူတို့သိပြီးတော့ သမ္မာတရားကိုနားလည်နိုင်ပါ့မလား” လို့တွေးမိတယ်။ ဘုရားသခင်ရဲ့နှုတ်ကပတ်တော်တွေကို မိတ်သဟာယဖွဲ့ရခြင်းရဲ့ အခြေခံသဘောတရားတွေကို တွေ့ဆုံပွဲတွေမှာ သူတို့နဲ့ဆွေးနွေးချင်ခဲ့တယ်။ ဒါပေမဲ့ပြီးတော့ ကျွန်မတွေးမိတယ် “ငါကဒီအသင်းတော်ကို အခုမှရောက်တာ။ ငါ့အလုပ်အတွက် ယောင်လန်းမှာတာဝန်ရှိတယ်။ သူ့သမီးလည်းဒီမှာရှိတယ်။ ဘုရားသခင်ရဲ့နှုတ်ကပတ်တော်တွေကို ယောင်လန်းမိတ်သဟာယဖွဲ့တာက အဓိပ္ပါယ်ကို တိုက်ရိုက်ရှင်းပြတာနဲ့ အတူတူပဲလို့ ပြောလိုက်ပြီး ဒီစကားကို သူပြန်ကြားရရင် ငါကရောက်တာနဲ့ သူ့အမှားတွေကိုထောက်ပြတယ်ဆိုပြီးတော့ ငါ့ကိုတစ်မျိုးထင်သွားနိုင်တယ်။ သူစိတ်ဆိုးသွားရင် ငါလည်းနေရထိုင်ရခက်လိမ့်မယ်” လို့ပေါ့။ အဲဒါကြောင့်ကျွန်မဘာမှမပြောဘဲနဲ့ အဲဒီအတိုင်းပဲထားလိုက်တယ်။

တစ်ရက်ကျတော့ အစ်မရှောင်က ရှောင်မင်းမသိအောင် ကျွန်မကိုစာတစ်စောင်ပေးတယ်။ စာထဲမှာ သူအရင်က ယောင်လန်းကိုအကြံဉာဏ်ပေးခဲ့ပေမဲ့လည်း ယောင်လန်းကလက်မခံရုံတင်မကဘဲ သူ့ကိုပါပိတ်ပင်ပြီးတော့ အိမ်ရှင်အနေနဲ့ စီစဉ်ပေးရတဲ့ တာဝန်ကို သူ့ကို မပေးတော့ဘူးတဲ့။ ကျွန်မအရမ်းအံ့သြသွားတယ်။ “အစ်မရှောင်ပြောတာ ဟုတ်ကောဟုတ်ရဲ့လား။ ယောင်လန်းကဘာလို့သူများတွေကို ဖိနှိပ်ရမှာလဲ” လို့တွေးမိတယ်။ အဲဒါပြီးတော့ အခြေအနေကို သေချာသိရအောင်လို့ ကျွန်မရှောင်မင်းကိုသွားတွေ့ခဲ့တယ်။ အစ်မရှောင်က အရမ်းစိတ်အားထက်သန်မှုရှိတယ်။ ဒါပေမဲ့ သူ့ရဲ့နားလည်မှုမှာ အမှားအယွင်းတွေရှိနေတတ်တယ်လို့ ရှောင်မင်းကပြောတယ်။ သူကပြီးတော့ ထပ်ပြောတယ်။ အစ်မရှောင်ကို ဒီမှာ ယုံကြည်သူအဖြစ်လူသိများပြီးတော့ သူ့အိမ်ကမလုံခြုံဘူးတဲ့။ သူ့အိမ်မှာလုံခြုံစိတ်ချရတဲ့ ပတ်ဝန်းကျင်တစ်ခုဖန်တီးဖို့ သူ့မှာဉာဏ်ပညာမရှိဘူးတဲ့။ သူက အစ်မရှောင်နဲ့ပတ်သက်ပြီး မကောင်းတာတွေ တော်တော်လေးပြောတယ်။ ကျွန်မကိုယ့်ဘာသာတွေးမိတယ် “ဒါတွေသာတကယ်ဆိုရင် အစ်မရှောင်က အိမ်ရှင်အနေနဲ့ စီစဉ်ပေးရတဲ့ တာဝန်နဲ့ မသင့်တော်ဘူး။ ဒါပေမဲ့ ဘာလို့ ယောင်လန်းကသူ့ကိုဖိနှိပ်တယ်လို့ပြောရတာလဲ။ သူ့မှာယောင်လန်းကို မကျေနပ်တာမျိုးရှိလို့လည်းဖြစ်နိုင်တယ်” ပေါ့။ ဒါပေမဲ့ ကျွန်မစိတ်ထဲမရှင်းသေးတာနဲ့ အစ်မရှောင်အိမ်ကို သွားလည်ခဲ့တယ်။ သူ့အိမ်က သူများတွေနဲ့ယှဥ်ရင် အိမ်ရှင်အနေနဲ့ စီစဉ်ပေးဖို့ သင့်တော်ပြီး သူ့မှာဉာဏ်ပညာလည်းရှိတယ်ဆိုတာကို ကျွန်မတွေ့ခဲ့ရတယ်။ အဲဒါကြောင့် ကျွန်မစပြီးတော့ နားမလည်နိုင်ဖြစ်လာတယ်။ “ရှောင်မင်းပြောတာနဲ့လည်း လုံးဝမတူပါလား။ ယောင်လန်းကတကယ်ပဲ အစ်မရှောင်ကို ဖိနှိပ်နေတာများလား” လို့တွေးမိတယ်။ အစ်မရှောင်ကို ကျွန်မထပ်မေးကြည့်တော့ ယောင်လန်းက ပတ်ဝန်းကျင်လုံခြုံမှုမရှိဘူးဆိုတာကို အကြောင်းပြပြီးတော့ အသင်းတော်အကူတွေကိုလည်း တာဝန်ကနေရပ်ဆိုင်းခဲ့တယ်၊ အဲဒါကြောင့် ညီအစ်ကိုမောင်နှမတွေကို ရေလောင်းပေးမယ့်သူမရှိခဲ့ဘဲနဲ့ သူတို့ပုံမှန်အသင်းတော်ဘဝကိုမနေကြရဘူးဆိုတာကို ကျွန်မသိခဲ့ရတယ်။ အစ်မရှောင်က ယောင်လန်းကို အဲဒီပြဿနာကိုထောက်ပြပြီးတော့ သူ့အစီအစဥ်တွေက အလုပ်မဖြစ်တာကိုပြောတော့ ယောင်လန်းက လက်မခံရုံတင်မဟုတ်ဘဲ အစ်မရှောင်ကိုပါ တာဝန်ကနေရပ်စဲခဲ့တယ်။ အဲဒီထက်ပိုပြီး မယုံနိုင်စရာကောင်းတာကဘာလဲသိလား။ အစ်မရှောင်ရဲ့ တင်ပြချက်စာကို ဖွင့်တောင်မဖတ်ဘူး။ အဲဒါကိုကြားရတော့ ကျွန်မအရမ်းအံ့သြရတယ်။ ဘယ်လိုဖြစ်တာလဲပေါ့။ ယောင်လန်းကအရှင်းကြီးမှားနေပေမဲ့လည်း အစ်မရှောင်ပြောတာကို လက်မခံဘဲနဲ့ သူ့ကိုဖိနှိပ်ပြီး စာကိုလည်းချောင်ထိုးထားခဲ့တယ်။ သူကသမ္မာတရားကိုလက်ခံတဲ့သူမဟုတ်ဘူးဆိုတာ အသေအချာပါပဲ။ အဲဒီတော့မှ သူဘုရားသခင်ရဲ့နှုတ်ကပတ်တော်တွေကို မိတ်သဟာယဖွဲ့ရင် သူ့ရဲ့ကိုယ်ပိုင်အတွေ့အကြုံနဲ့ နားလည်မှုတွေအကြောင်းကို ဘယ်တော့မှမပြောဘဲ ဘုရားသခင်ရဲ့နှုတ်ကပတ်တော်တွေကို တလွဲတွေရှင်းပြီး ညီအစ်ကိုမောင်နှမတွေကို တလွဲအသိတွေပေးတာကို သွားစဥ်းစားမိတယ်။ ဘုရားသခင်နှုတ်ကပတ်တော်တွေကို မိတ်သဟာယဖွဲ့ခြင်းရဲ့ အခြေခံစည်းမျဉ်းတွေနဲ့ သူလုပ်တာနဲ့က လုံးဝဆန့်ကျင်ဘက်ပဲ။ သူ့မှာတကယ့်ပြဿနာရှိနေနိုင်ပြီးတော့ အဲဒါကိုကျွန်မ လူကြီးတွေကို တင်ပြဖို့လိုတာကို သဘောပေါက်ခဲ့တယ်။ အဲဒါမှ ဘုရားသခင်အိမ်တော်ရဲ့အလုပ်တွေ မနှောင့်နှေးမှာ။ ဒါပေမဲ့ ပြီးတော့ “အစ်မရှောင်ပြောပုံအရဆိုရင် ယောင်လန်းမှာ လူသားဆန်မှုနိမ့်ကျနေတယ်။ သူကအခုလောလောဆယ် ငါ့အလုပ်မှာ ဦးဆောင်တဲ့သူ။ အဲဒီတော့သူ့ကိုတိုင်တာ ငါဆိုတာသာသိသွားရင် ငါ့ကိုနှိပ်ကွပ်ပြီးတော့ တာဝန်ကနေ ရပ်ဆိုင်းလိုက်နိုင်တယ်” လို့တွေးမိတယ်။ ကျွန်မသက်ပြင်းချပြီးတော့ ဘာမှမပြောတာအကောင်းဆုံးပဲလို့ ဆုံးဖြတ်ခဲ့တယ်။ ဒါပေမဲ့ အစ်မရှောင်ကိုလည်း အိမ်ရှင်အနေနဲ့ စီစဉ်ပေးရတဲ့တာဝန်ကို ပြန်လုပ်ရအောင် စီစဥ်ပေးဖို့ ဆုံးဖြတ်ခဲ့တယ်။

နောက်ရက်နည်းနည်းကြာတော့ မမျှော်လင့်ထားဘဲနဲ့ အစ်မချန်ကလည်း ယောင်လန်းမကောင်းတာတွေကို ကျွန်မကိုတိုင်လာတယ်။ အစ်ကိုဝမ်နဲ့ သူ့အမျိုးသမီးက အခုမှဘာသာပြောင်းလာပြီးတော့ တရုတ်ပြည်ကွန်မြူနစ်ပါတီရဲ့ ဖမ်းဆီးဖိနှိပ်မှုတွေကို နည်းနည်းကြောက်တာကြောင့် အိမ်ရှင်အနေနဲ့ စီစဉ်ရတဲ့တာဝန်ကို မလုပ်ရဲဘူးဖြစ်နေတယ်တဲ့။ ယောင်လန်းက သူတို့ကိုကူညီဖို့ သမ္မာတရားကို မိတ်သဟာယမဖွဲ့ပေးရုံတင်မကဘဲ သူတို့ကိုဆူပြီးတော့ သူများတွေကိုလည်း ကူညီခွင့်မပေးခဲ့ဘူးတဲ့။ နောက်ဆုံးကျတော့ အစ်ကိုဝမ်တို့ လင်မယားက အနှုတ်လက္ခဏာဆောင်တဲ့ဘက်ကိုရောက်သွားပြီးတော့ တွေ့ဆုံပွဲတွေကို မတက်ချင်တော့ဘူးတဲ့။ အစ်မချန်က ယောင်လန်းကို ညီအစ်ကိုမောင်နှမတွေကို ဒီလိုဆက်ဆံရမှာမဟုတ်ဘူးလို့ပြောတော့ သူက သူ့ကိုယ်သူလုံးဝပြန်မသုံးသပ်ခဲ့ဘဲနဲ့ အစ်မချန်ရဲ့လုံခြုံမှုကို စိတ်မချရဘူးဆိုပြီး လျှောက်ပြောခဲ့တယ်တဲ့။ ပြီးတော့ အစ်မချန်ကို အသင်းတော်ကနေ သုံးလ လေးလလောက်ပယ်ထားခဲ့ပြီးတော့ အသင်းတော်ဘဝမှာ ပါဝင်ခွင့်မပေးခဲ့ဘူးတဲ့။ ရေလောင်းပေးတဲ့တာဝန် ကိုထမ်းဆောင်နေတဲ့ ညီအစ်မတစ်ယောက်လည်းရှိတယ်။ တွေ့ဆုံပွဲတွေမှာဆိုရင် ဘုရားသခင်ရဲ့နှုတ်ကတော်တွေကို သူ့ရဲ့မိတ်သဟာယမှာထည့်သွင်းတယ်၊ သူထုတ်ဖော်နေတဲ့အကျင့်ပျက်စိတ်သဘောထားတွေနဲ့ ပတ်သက်ပြီးလုံးဝပွင့်ပွင့်လင်းလင်းနဲ့ ရိုးရိုးသားသားပြောလေ့ရှိတယ်။ ယောင်လန်းကအဲဒီအခွင့်အရေးကို အသုံးချပြီးတော့ သူ့ကို တာဝန်ကနေ ထုတ်ပယ်ခဲ့တယ်တဲ့။ ပြီးတော့ သူ့သမီး ရှောင်မင်ကို ရေလောင်းပေးရတဲ့ တာဝန်ကို ရာထူးတိုးပေးခဲ့ပြီးတော့ နောက်ကျရင် ဘုရားသခင်အိမ်တော်မှာ အရေးပါတဲ့တာဝန်တွေကိုလုပ်ဆောင်မှာမို့လို့ ညီအစ်ကိုမောင်နှမတွေကိုလည်း သူ့ကိုကောင်းကောင်းလေ့ကျင့်ပေးဖို့ပြောခဲ့တယ်တဲ့။ ယောင်လန်းကသူ့အမျိုးသားကိုလည်း အသင်းခေါင်းဆောင်အဖြစ်ရာထူးတိုးပေးခဲ့ပြီးတော့ တကယ်တမ်းဆို သူ့အမျိုးသားက စစ်မှန်တဲ့ယုံကြည်သူတောင်မဟုတ်ဘဲ တွေ့ဆုံပွဲတွေမှာ တန်ဖိုးရှိတာဘာကိုမှ မိတ်သဟာယမဖွဲ့နိုင်ခဲ့ဘူးတဲ့။ ဒါပေမဲ့ ယောင်လန်းကတော့ သူ့စိတ်ခံစားချက်ကိုပဲဦးစားပေးခဲ့တယ်။ သူ့အမျိုးသားကိုအသင်းတော်ကိုခေါ်လာပြီးတော့ အသင်းခေါင်ဆောင်ခန့်ခဲ့တာက စီမံရေးဆိုင်ရာ ဆုံးဖြတ်ချက်တွေကို ပြင်းပြင်းထန်ထန် ချိုးဖောက်လိုက်တာပဲ။ သူမကောင်းတာတွေက အဲဒီမှာတင်မပြီးသေးဘူး။ ယောင်လန်းနဲ့ သူ့သမီးက အသင်းတော်ကို သက်ဦးဆံပိုင်စနစ်လိုအုပ်ချုပ်ခဲ့ပြီးတော့ သူ့ကိုမြင်တာနဲ့ကြောက်ပြီး ဘာမှမပြောရဲအောင် ညီအစ်ကိုမောင်နှမတွေကို သူတို့သဘောအတိုင်း အမိန့်ပေးပြီး ဖိနှိပ်ခဲ့တယ်တဲ့။ အစ်မချန်းပြောတာကိုနားထောင်ပြီးတော့ ကျွန်မအံ့သြပြီး စိတ်လည်းတိုမိတယ်။ အစက ယောင်လန်း ကျွန်မကိုသူ့အလုပ်တွေလွှဲပေးတော့ အလုပ်တွေအားလုံးအဆင်ပြေချောမွေ့တယ်လို့ပြောတော့ ကျွန်မသူ့ကိုလေးစားအားကျခဲ့တယ်။ ဒါပေမဲ့ အဲဒါတွေအားလုံးက အလိမ်အညာတွေပါပဲ။ မိတ်သဟာယမှာ ဘုရားသခင်ရဲ့နှုတ်ကပတ်တော်တွေကို တလွဲကိုးကားပြီးတော့ စာတွေနဲ့ အယူဝါဒတွေကိုပြောပြီး ညီအစ်ကိုမောင်နှမတွေကို အသိအမှားတွေပေးခဲ့ရုံတင်မကဘဲ သူနေရာရထားတဲ့ ကောင်းချီးကို သာယာပြီးတော့ ညီအစ်ကိုမောင်နှမတွေကိုလည်းအနိုင်ကျင့်ခဲ့တယ်။ အသင်းတော်ကို အာဏာရှင်ဆန်ဆန်အုပ်ချုပ်ပြီး သူ့သဘောအတိုင်းသူများတွေကိုဖိနှိပ်ပြီး တာဝန်ကနေ ထုတ်ပယ်ခဲ့တယ်။ သူနဲ့နီးစပ်တဲ့သူတွေကို မြေတောင်မြှောက် ရာထူးတိုးပေးခဲ့ပြီး ဆွေမျိုးကောင်းစားရေးဝါဒကိုကျင့်သုံးခဲ့တယ်။ သူ့ရဲ့သိက္ခာမဲ့ပြီး ဂရုမစိုက်တဲ့ အပြုအမူတွေ၊ သူ့ရဲ့ များပြားလှတဲ့ မကောင်းမှုတွေက သူဟာ အရိုးစွဲနေတဲ့ အန္တီခရစ်တစ်ယောက်ပဲဆိုတာကို ပြသနေတယ်။ အခုဆိုရင် သူ့ရဲ့ တာဝန်ကပိုကျယ်ပြန့်လာတဲ့အတွက် ညီအစ်ကိုမောင်နှမတွေပိုပြီးထိခိုက်မှာ သေချာတယ်။ လူကြီးတွေကိုအမြန်ဆုံးတိုင်ပြီးတော့ အသင်းတော်ရဲ့အလုပ်တွေကို ထိန်းသိမ်းရမယ်ဆိုတာကို ကျွန်မသိခဲ့တယ်။ ဒါပေမဲ့ သူ့ကိုတိုင်မယ်လုပ်တဲ့အချိန်မှာ ကျွန်မစိုးရိမ်ပြီးတော့ “ယောင်လန်းက ငါ့အလုပ်ကိုစီမံခန့်ခွဲတဲ့သူ။ ငါတိုင်တယ်ဆိုတာကိုသိသွားရင် သူ့အပြုအမူတွေအရဆိုရင် ငါ့ကိုအသင်းခေါင်းဆောင်အဖြစ်ကနေ ရပ်စဲပြီး အိပ်ပြန်ပို့လိုက်နိုင်တယ်။ အကြောင်းရှာပြီးတော့ ဖိနှိပ်အပြစ်ပေးတာမျိုးတောင်လုပ်နိုင်တယ်။ ငါ့ဘဝအရမ်းခက်ခဲသွားလိမ့်မယ်။ အသင်းတော်ကနေ နှင်ထုတ်ခံရရင်ဘယ်လိုလုပ်မလဲ။ အဲဒီအခါကျရင် ငါ့ရဲ့ဘုရားသခင်ကိုယုံကြည်သက်ဝင်တဲ့လမ်းကြောင်း အဆုံးသတ်သွားနိုင်တယ်။ ငါလက်တွေ့ကျမှဖြစ်မယ်။ အသင်းတော်အလုပ်တွေအရင်လုပ်ပြီးမှပဲ ကြည့်လုပ်ရမယ်” လို့တွေးမိတယ်။ အဲဒီလိုနဲ့ပဲ ကိုယ့်ကိုယ်ကိုယ်ကာကွယ်ဖို့အတွက် သူ့ကိုမတိုင်ဘဲနဲ့ သူ့အကြောင်းကို မထုတ်ဖော်ဖို့ကျွန်မဆုံးဖြတ်ခဲ့တယ်။ ဒါပေမဲ့ နောက်တွေ့ဆုံပွဲမှာ ဖိနှိပ်ခံထားရတဲ့ ညီအစ်ကိုမောင်နှမတွေရဲ့ မျှော်လင့်နေတဲ့အကြည့်တွေကိုမြင်ရတော့ ကျွန်မအရမ်းစိတ်မချမ်းမသာဖြစ်ရပြီးတော့ လိပ်ပြာမလုံခဲ့ဘူး။ ပြီးတော့ ရှောင်မင်းက ယောင်လန်း သမ္မာတရားကိုမိတ်သဟာယဖွဲ့တာ ဘယ်လောက်တော်ကြောင်းကို အသင်းတော်မှာပတ်ကြွားပြီး ညီအစ်ကိုမောင်နှမတွေကိုတော့ တင်းကြပ်ပြီး ချိုးချိုးနှိမ်နှိမ်ပြောဆိုတဲ့အကြောင်း သူတို့ပြောနေတာကြားရတော့ ကျွန်မပိုစိတ်တိုမိတယ်။ “ယောင်လန်းနဲ့ ရှောင်မင်း မကောင်းတာတွေကို လူကြီးတွေကိုတိုင်မှဖြစ်မယ်။ သူတို့အကျင့်ယုတ်ပြီး ညီအစ်ကိုမောင်နှမတွေကို စိတ်ရှိတိုင်းဖိနှိပ်နေတာကို ငါ ခွင့်မပြုနိုင်ဘူး” လို့ကိုယ့်ဘာသာတွေးမိတယ်။ အဲဒါနဲ့ သူတို့အကြောင်း ညီအစ်ကိုမောင်နှမတွေပြောတာတွေကို အကုန်ချရေးတယ်။ ဒါပေမဲ့ တွေ့ဆုံပွဲပြီးတော့ ကျွန်မစိတ်မပြတ်မသားဖြစ်ပြန်ရော။ ယောင်လန်းကသိသွားလို့ ကျွန်မကိုအပြစ်ပေးရင်ဘယ်လိုလုပ်မလဲ။ ဒါပေမဲ့ ကျွန်မကိုယ်ကျွန်မကာကွယ်ပြီးတော့ သူတို့နှစ်ယောက်အကြောင်းကို မဖော်ထုတ်ရင်လည်း ကျွန်မ မကောင်းမှုလုပ်တာပဲမဟုတ်ဘူးလား။ ကျွန်မဘေးကျပ်နံကျပ်ဖြစ်ခဲ့ရပြီးတော့ စိတ်မွန်းကျပ်လွန်းလို့ အသက်ရှုရတာတောင်မဝခဲ့ဘူး။ မျက်ရည်တွေနဲ့ ကျွန်မဒူးထောက်ပြီး ဘုရားသခင်ကိုဆုတောင်းတယ် “အဖ ဘုရားသခင်၊ ယောင်လန်းနဲ့ သူ့သမီးကို ခေါင်းဆောင်တွေနဲ့ တိုင်ချင်ပေမဲ့ သူတို့ကကျွန်မကိုပြန်အငြှိုးထားပြီး ဒုက္ခပေးမှာကိုကြောက်နေမိပါတယ်။ ဘုရားသခင်၊ အမှောင်ထုရဲ့ အားအင်တွေရဲ့ ဖိနှိပ်မှုကနေ လွတ်မြောက်ကာ သမ္မာတရားကို လက်တွေ့လုပ်ဆောင် ပြီး အသင်းတော်ရဲ့အလုပ်တွေကို ထိန်းသိမ်းနိုင်အောင် ကျွန်မကိုလမ်းပြပေးတော်မူပါ” လို့ပြောခဲ့တယ်။

ဆုတောင်းပြီးတော့ ဘုရားသခင်ရဲ့နှုတ်ကပတ်တော်တွေထဲက ဒါကိုဖတ်ခဲ့ပါတယ် “သင်တို့အားလုံးက ဘုရားသခင်၏ ဝန်ထုပ်ဝန်ပိုးကို အရေးထားကာ၊ အသင်းတော်၏ သက်သေခံချက်ကို ကာကွယ်ပြောဆိုမည်ဟု ပြောကြသော်လည်း၊ သင်တို့ထဲမှ မည်သူသည် ဘုရားသခင်၏ ဝန်ထုပ်ဝန်ပိုးကို အမှန်တကယ် အရေးထားခဲ့ကြပြီနည်း။ သင့်ကိုယ်သင် မေးလော့- သင်သည် ဘုရားသခင်၏ ဝန်ထုပ် ဝန်ပိုးကို ထည့်သွင်းစဉ်းစားမှု ပြသပြီးသော သူတစ်စုံတစ်ဦးလော။ ဘုရားသခင်အတွက် ဖြောင့်မတ်ခြင်းတရားကို သင်လက်တွေ့ လုပ်ဆောင်နိုင်သလော။ ငါ့အတွက် သင်ထရပ်ကာ ပြောဆိုနိုင်သလော။ သင်သည် သမ္မာတရားကို တည်ကြည်ခိုင်မာစွာ လက်တွေ့လုပ်ဆောင် နိုင်သလော။ စာတန်၏ လုပ်ရပ်အားလုံးကို ဆန့်ကျင်တိုက်ခိုက်ရလောက်အောင် သင်သည် ရဲရင့်သလော။ သင်သည် သင်၏ စိတ်ခံစားမှုများကို ဘေးဖယ်ကာ၊ ငါ၏ သမ္မာတရားအတွက် စာတန်ကို ဖော်ထုတ်ပေးနိုင်မည်လော။ သင့်အထဲတွင် ငါ၏ ရည်ရွယ်ချက်များ ပြည့်စုံစေခွင့် သင် ပေးနိုင်သလော။ အရေးအပါဆုံးသော အခိုက်အတန့်များတွင် သင်၏နှလုံးသားကို သင် ဆက်ကပ်ပြီးပြီလော။ သင်သည် ငါ၏အလိုကို လုပ်ဆောင်သောသူ တစ်စုံတစ်ဦးလော။ ဤမေးခွန်းများကို သင့်ကိုယ်သင် မေးပြီး ၎င်းတို့နှင့်ပတ်သက်၍ မကြာခဏ စဉ်းစားလော့။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အခန်း ၁၃” အစအဦး၌ ခရစ်တော်၏မိန့်မြွက်ချက်များ) ဘုရားသခင် နှုတ်ကပတ်တော်တွေရဲ့ ဖွင့်လှစ်ပြသမှုတွေကို ဖတ်လိုက်ရတော့ ကျွန်မကိုယ့်ကိုယ်ကိုယ် အရမ်းရှက်မိတယ်။ ကျွန်မကဘုရားသခင်ကို ယုံကြည်ပေမဲ့ ကျွန်မရင်ထဲမှာ ဘုရားသခင်ရှိမနေဘူး။ ဘုရားသခင်ရဲ့တာဝန်ပေးစေခိုင်းချက်ကို အလေးမထားခဲ့ဘဲနဲ့ ပြဿနာတွေနဲ့ ကြုံတွေ့လာရတဲ့အချိန်မှာ ကျွန်မကိုယ်ကျိုးအတွက်ပဲစဥ်းစားခဲ့တယ်။ ဘုရားသခင်အိမ်တော်ရဲ့အလုပ်တွေကို ကျွန်မလုံးဝမကာကွယ်ခဲ့ဘူး။ ယောင်လန်းက ဘုရားသခင်ရဲ့နှုတ်ကပတ်တော်တွေကို တလွဲတွေကိုးကားပြီးရှင်းပြတယ်၊ အသင်းတော်မှာ ဗိုလ်ကျပြီးတော့ ညီအစ်ကိုမောင်နှမတွေကို ဖိနှိပ်အပြစ်ပေးတယ် ဆိုတာကို ကျွန်မ ရှင်းရှင်းလင်းလင်း တွေ့ခဲ့ပါတယ်။ သူနဲ့နီးစပ်တဲ့သူတွေကို ရာထူးတိုးပေးပြီး သူ အဖွဲ့တောင့်လာအောင်လို့ သူများတွေကို စိတ်ကူးပေါက်သလို ရာထူးကနေထုတ်ပယ်ခဲ့တယ်။ အသင်းတော်ဘဝကို ဆိုးဆိုးရွားရွား နှောင့်ယှက်ဖျက်ဆီးပြီးတော့ ညီအစ်ကိုမောင်နှမတွေကို တင်းကျပ်ပြီး ဒုက္ခပေးနေတယ်။ အထူးသဖြင့် အခုသူကပိုလုပ်ပိုင်ခွင့်ရလာတော့ ညီအစ်ကိုမောင်နှမတွေကို ပိုဒုက္ခပေးနိုင်သွားပြီ။ ဒါပေမဲ့ ယောင်လန်းရဲ့အရှိန်အဝါနဲ့ လွှမ်းမိုးမှုကို ကျွန်မကြောက်ခဲ့တယ်။ သူကဖိနှိပ်ပြီး ထုတ်ပယ်လိုက်လို့ ကျွန်မနေရာနဲ့ အနာဂတ်တက်လမ်းပျောက်ဆုံးမှာကိုကြောက်ခဲ့တယ်။ သူနဲ့ သူ့သမီးကကျွန်မကိုအငြှိုးနဲ့ ဒုက္ခပေးမှာကို ကျွန်မကြောက်ခဲ့တယ်။ အဲဒါကြောင့် အခြေခံစည်းမျဉ်းတွေကို ဆုပ်ကိုင်ပြီး သူတို့အကြောင်းကို မတိုင်ရဲခဲ့ဘူး။ အဲဒါနဲ့ အန္တီခရစ်နဲ့ အကျင့်မကောင်းတဲ့သူတွေက အသင်းတော်ကိုဖျက်လိုဖျက်ဆီးလုပ်နေတာကို သိသိကြီးနဲ့ လက်ပိုက်ကြည့်နေခဲ့တယ်။ ညီအစ်ကိုမောင်နှမတွေ ဖိနှိပ်ခံရပြီး သူတို့ဘဝတွေထိခိုက်ရပေမဲ့ ကျွန်မက ခိုင်ခိုင်မာမာ ရပ်တည်ပြီး စာတန်ကို မဖော်ထုတ်ရဲခဲ့ဘူး။ ကျွန်မ ဘယ်လောက်တောင် အသုံးမကျ၊ အတ္တကြီးပြီး ဆိုးယုတ်လိုက်သလဲ။ ပြီးတော့ ဘုရားသခင်ရဲ့နှုတ်ကပတ်တော်တွေထဲမှာ ဒီလိုပြောထားတာကို ဖတ်ခဲ့ရပါတယ် “လူသားသည် စာတန်၏ နက်ရှိုင်းစွာ ဖျက်ဆီးခြင်း ခံခဲ့ရသည်။ စာတန်၏ အဆိပ်သည် ခပ်သိမ်းသော လူပုဂ္ဂိုလ်တိုင်း၏ အသွေးထဲ၌ စီးဆင်းနေပြီး လူသား၏ သဘာဝဗီဇသည် ဖောက်ပြန်ကာ ဆိုးယုတ်၍ ခေတ်နောက်ပြန်ဆွဲတတ်ပြီး စာတန်၏ ဒဿနများနှင့် ပြည့်နှက်နေ၍ ထိုဒဿနများထဲ၌ နစ်မြုပ်နေ၏၊ ၎င်းတစ်ရပ်လုံးသည် ဘုရားသခင်ကို ဆန့်ကျင်ပုန်ကန်သော သဘာဝဗီဇတစ်ခုပင် ဖြစ်သည်။ ထို့ကြောင့်ပင် လူတို့သည် ဘုရားသခင်ကို ခုခံကြပြီး ဆန့်ကျင်ကြခြင်း ဖြစ်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “လူ့သဘာဝကို သိရှိရန် နည်းလမ်း”) “စာတန်၏အဆိပ်မှာ မည်သည့်အရာဖြစ်ကြောင်းနှင့် ပတ်သက်၍၊ ယင်းကို စကားလုံးများဖြင့် အပြည့်အဝ ဖော်ပြနိုင်၏။ ဥပမာအားဖြင့်၊ မကောင်းမှုပြုသူအချို့ကို သူတို့သည် ၎င်းတို့ ပြုခဲ့သည့်ပုံစံ အဘယ်ကြောင့် ပြုကြသည်ကို သင်မေးပါက၊ သူတို့က ‘လူတိုင်း ကိုယ့်အတွက်သာ ကိုယ်ကြည့်ပြီး၊ ဘယ်သူသေသေ ငတေမာပြီးရော ဖြစ်သောကြောင့်’ ဟု ဖြေကြလိမ့်မည်။ ဤတစ်ခုတည်းသောစကားစုက ပြဿနာ၏ တကယ့်အရင်းအမြစ်ကို ဖော်ပြလေသည်။ စာတန်၏ တွေးခေါ်မှုစနစ်သည် လူသားတို့၏ အသက်တာများ ဖြစ်လာပြီဖြစ်သည်။ သူတို့သည် အမှုအရာများကို ဤရည်ရွယ်ချက် သို့မဟုတ် ထိုရည်ရွယ်ချက်အတွက် ပြုလုပ်ကောင်းပြုလုပ်ကြသော်လည်း၊ ထိုသူတို့သည် ယင်းကို မိမိတို့အတွက်သာ ပြုကြခြင်းဖြစ်သည်။ ကိုယ့်အတွက်သာ ကိုယ်ကြည့်၊ ဘယ်သူသေသေ ငတေမာပြီးရော ဖြစ်သောကြောင့်၊ သူတို့သည် မိမိတို့၏ကိုယ်ပိုင် အကျိုးအတွက်သာ အသက်ရှင်သင့်ပြီး၊ အစားအစာနှင့် ကောင်းမွန်သော အဝတ်အစားအတွက် ရာထူးကောင်းတစ်နေရာ ရရှိရန် သူတို့ အရာရာကို အစွမ်းကုန် ကြိုးစားလုပ်ဆောင်သင့်သည်ဟု အယောက်တိုင်းက ထင်မှတ်ကြသည်။ ‘ကိုယ့်အတွက်ပဲ ကိုယ်ကြည့်၊ ဘယ်သူသေသေ ငတေမာပြီးရော’ ဟူသော ဤအရာမှာ လူသား၏အသက်နှင့် ဒဿနအမြင်ဖြစ်ပြီး ၎င်းက လူသား၏ သဘာဝဗီဇကိုလည်း ကိုယ်စားပြုလေသည်။ စာတန်၏ ဤစကားများမှာ အတိအကျဆိုရလျှင် စာတန်၏ အဆိပ်ဖြစ်ပြီး၊ လူတို့က ယင်းကို နှလုံးသွင်းကြသည့်အခါတွင်၊ ယင်းသည် သူတို့၏ သဘာဝဗီဇ ဖြစ်လာသည်။ စာတန်၏ သဘာဝဗီဇမှာ ဤစကားလုံးများအားဖြင့် ထုတ်ဖော်ခြင်းခံရသည်။ ယင်းတို့က ၎င်းကို လုံးလုံး ကိုယ်စားပြု၏။ ဤအဆိပ်သည် လူတို့၏ အသက်များဖြစ်လာသည့်အပြင်၊ သူတို့တည်ရှိမှု၏ အခြေခံအုတ်မြစ်ဖြစ်လာပြီး ဖောက်ပြန်ပျက်စီးသော လူသားမျိုးနွယ်က နှစ်ထောင်ချီ၍ ဤအဆိပ်၏ အုပ်စိုးခြင်းကို မပြောင်းမလဲ ခံလာရပြီဖြစ်သည်။” (ခရစ်တော်၏ပြောဆိုချက် မှတ်တမ်းများ စာအုပ်ထဲရှိ “ပေတရု၏လမ်းကြောင်းအတိုင်း လျှောက်လှမ်းနည်း”) ကျွန်မဟာ စာတန်ရဲ့ချနင်းခြင်း၊ အကျင့်ပျက်အောင်လုပ်ခြင်းခံထားရတယ်ဆိုတာ၊ ကျွန်မကိုယ်တိုင် ပိုပိုပြီး အတ္တကြီး ဆိုးယုတ်လာတဲ့အထိ ကျွန်မရဲ့အသွေးထဲအသားထဲမှာ စာတန်ရဲ့အဆိပ်တွေ၊ အတွေးအခေါ်တွေနဲ့ စံနှုန်းတွေပြည့်နှက်နေခဲ့တယ်ဆိုတာ ဘုရားနှုတ်ကပတ်တော်တွေက ကျွန်မကို ပြသခဲ့ပါတယ်။ “မိမိကိုယ်သာ ကိုးကွယ်ရာဖြစ်၏” တို့၊ “တစ်စုံတစ်ရာ မှားယွင်းသည်ကို သိသည့်အခါ၊ နည်းနည်းပြောသည်က ပိုကောင်း၏” တို့၊ “မိမိကိုယ်ကို ကာကွယ်ရန် ဆိတ်ဆိတ်ငြိမ်နေ၍ အပြစ်တင်ခံရမှုမှ လွတ်မြောက်ရန်သာ ကြိုးစားပါ” ဆိုတဲ့ စာတန်ရဲ့အဆိပ်တွေနဲ့ နေထိုင်ခဲ့တယ်။ ကျွန်မရဲ့အတွေးအခေါ်တွေအကုန်လုံး ပျက်ယွင်းလာပြီးတော့ ဘဝကို ဆိုးရွားတဲ့စံနှုန်းတွေ၊ အမြင်တွေနဲ့ နေခဲ့တယ်။ ကျွန်မရဲ့ကိုယ်ကျိုး၊ အနာဂတ်တက်လမ်းနဲ့ ကျွန်မကံကြမ္မာကို အရာရာထက် ပိုအရေးကြီးတယ်လို့ သဘောထားခဲ့တယ်။ ယောင်လန်းနဲ့ သူ့ရဲ့ဆိုးယုတ်တဲ့ အန္တီခရစ်စွမ်းအားတွေက အသင်းတော်က ညီအစ်ကိုမောင်နှမတွေကို ဒုက္ခပေးနေတာကိုမြင်ရတော့ သူတို့ကိုဖော်ထုတ်ပြီး တိုင်ရမယ်ဆိုတာ ကျွန်မသိခဲ့တယ်။ ဒါပေမဲ့ ကျွန်မဖိနှိပ်ခံရပြီး နေရာနဲ့ အနာဂတ်တက်လမ်းပျောက်ဆုံးမှာကို ကြောက်ခဲ့တယ်။ ကျွန်မဘယ်လောက်ပဲ အားတင်းထားထား မလုပ်ရဲခဲ့ဘူး။ အဲဒါကြောင့် အန္တီခရစ်တွေကို အသင်းတော်ကို ဖျက်လိုဖျက်ဆီးလုပ်ခွင့်ပြုခဲ့တယ်။ ကျွန်မက မျက်နှာရအောင်နေခဲ့ပြီးတော့ ဘက်မလိုက်တဲ့ စကားတစ်ခွန်းတောင်မပြောရဲခဲ့ဘူး။ စာတန်ရဲ့အဆိပ်တွေထဲမှာ မရုန်းနိုင်အောင်ပိတ်မိနေပြီး သူ့ရဲ့အစေအပါး၊ ခွေးတစ်ကောင်လိုဖြစ်လာတာကို သတိထားမိတယ်။ အဲဒါကိုဘုရားသခင်က ရွံရှာစက်ဆုပ်ပြီးတော့ ကျွန်မကဘုရားသခင်ရဲ့ရှေ့မှောက်မှာ နေထိုင်ဖို့မထိုက်တန်ပါဘူး။ ဘုရားသခင်ရဲ့ လမ်းညွှန်မှုနဲ့ အလုပ်တွေလုပ်ရတာကို ကျွန်မနှစ်တွေအများကြီး ပျော်ရွှင်ခဲ့ပြီး အသင်းတော်ခေါင်းဆောင်အနေနဲ့ ကျွန်မအမှုတော်ကိုထမ်းဆောင်နိုင်အောင် သူကမြေတောင်မြှောက်ပေးခဲ့တယ်။ ကျွန်မကတော့အဲဒါကိုတန်ဖိုးထားရမှန်းမသိခဲ့ဘဲနဲ့ ညီအစ်ကိုမောင်နှမတွေကို စောင့်ရှောက်ဖို့နဲ့ ဘုရားသခင်အိမ်တော်ရဲ့အလုပ်တွေကို ထိန်းသိမ်းဖို့ မစဥ်းစားခဲ့ဘူး။ ဂုဏ်သိက္ခာလုံးဝမရှိဘဲ ကျွန်မရဲ့အတ္တကြီးတဲ့စိတ်ဆန္ဒတွေနဲ့ပဲ ပြည့်နှက်ပြီး နေထိုင်ခဲ့တယ်။ ညီအစ်ကိုမောင်နှမတွေရဲ့ယုံကြည်ကိုးစားမှုနဲ့ ကိုက်ညီအောင်မနေနိုင်ခဲ့တဲ့အပြင် ဘုရားသခင်ရဲ့တာဝန်ပေးစေခိုင်းချက်ကိုလည်း မကျေပွန်ခဲ့ပါဘူး။ အဲဒီလိုတွေးမိတော့ အရမ်းအတ္တကြီးပြီး ဆိုးယုတ်လို့ ကျွန်မကိုယ့်ကိုယ်ကိုယ်မုန်းတီးပြီ ဝန်ချတောင်းပန်ဖို့ ဘုရားသခင်ကိုဆုတောင်းခဲ့တယ်။ ကျွန်မကိုခွန်အားတွေပေးပြီးတော့ ဒီအမှောင်လွှမ်းမိုးမှုတွေကနေ ရုန်းထွက်ပြီးတော့ သမ္မာတရားကိုလက်တွေ့လုပ်ဆောင်နိုင်အောင် လမ်းပြပေးဖို့တောင်းဆိုခဲ့တယ်။

ပြီးတော့ ဘုရားသခင်နှုတ်ကပတ်တော်တွေထဲက ဒါကိုဖတ်ခဲ့ပါတယ်။ “ဘုရားသခင်၏ စိတ်နေသဘောထားမှာ သက်ရှိသက်မဲ့ အရာအားလုံးတို့ကို အုပ်စိုးသောသူနှင့် သက်ဆိုင်ပြီး ဖန်ဆင်းခြင်းခပ်သိမ်း၏ သခင်နှင့် သက်ဆိုင်သည်။ သူ၏ စိတ်နေသဘောထားသည် ဂုဏ်ပြုခြင်း၊ တန်ခိုး၊ မြင့်မြတ်ခြင်း၊ ကြီးမြတ်ခြင်းကို ကိုယ်စားပြုပြီး အရေးကြီးဆုံးမှာ သာလွန်ကြီးစိုးခြင်းကို ကိုယ်စားပြုသည်။ သူ၏စိတ်နေသဘောထားသည် သြဇာအာဏာ၏ သင်္ကေတဖြစ်ပြီး ဖြောင့်မတ်သောအရာအားလုံး၏ သင်္ကေတဖြစ်ကာ လှပ၍ ကောင်းမွန်သည့်အရာအားလုံး၏ သင်္ကေတလည်း ဖြစ်ပေသည်။ ထိုထက်မက ထိုစိတ်နေသဘောထားသည် အမှောင်ထုနှင့် မည်သည့် ရန်သူအင်အားကမျှ အနိုင်ယူ၍မရနိုင်သောက၊ သို့မဟုတ် ထိပါး၍ မရနိုင်သော သူ၏ သင်္ကေတဖြစ်ပြီး၊ မည်သည့်ဖန်ဆင်းခံ သတ္တဝါကမျှ ပုန်ကန်ပြစ်မှား၍ မရနိုင်သော (ပုန်ကန်ပြစ်မှားခြင်းကိုလည်း သူသည်းခံမည် မဟုတ်ပေ) သူ၏ သင်္ကေတလည်း ဖြစ်သည်။ သူ၏စိတ်နေသဘောထားသည် အမြင့်ဆုံးသောတန်ခိုး၏ သင်္ကေတဖြစ်၏။ မည်သည့်လူကမျှ၊ သို့မဟုတ် မည်သည့်လူအများကမျှ သူ၏အမှု၊ သို့တည်းမဟုတ် သူ၏စိတ်နေသဘောထားကို မနှောင့်ယှက်နိုင်ပေ၊ သို့မဟုတ် နှောင့်ယှက်ခွင့်ရှိမည်လည်း မဟုတ်ပေ။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “ဘုရားသခင်၏ စိတ်နေသဘောထားကို နားလည်ရန်မှာ အလွန်အရေးကြီးပေ၏”) ဘုရားသခင်က အရာခပ်သိမ်းကိုအုပ်စိုးပြီးတော့ သူ့ရဲ့ စိတ်သဘောထား ကအမြင့်ဆုံးအာဏာရဲ့ သင်္ကေတဖြစ်ပြီး ဘယ်ရန်သူနဲ့ အမှောင်စွမ်းအားတွေကမှ အဲဒါကို ပုန်ကန်ပစ်မှားလို့မရဘူးဆိုတာကို ဘုရားသခင်ရဲ့နှုတ်ကပတ်တော်တွေကနေတဆင့် ကျွန်မနားလည်ခဲ့တယ်။ ဘုရားသခင်ဟာ စာတန်ရဲ့ အနှောင့်အယှက်ပေးတဲ့ မကောင်းတဲ့ အင်အားစုတွေကို အသင်းတော်ကနေ သန့်စင်ဖယ်ရှင်းပြီး အပြီးအပြတ် နှိမ်နင်းပစ်လိမ့်မယ်။ အဲဒါဟာဘုရားသခင်လုပ်ဆောင်မှုရဲ့ဦးတည်ချက်ဖြစ်ပြီးတော့ ဘုရားသခင်ဟာအဲဒါကိုပြီးမြောက်မယ်ဆိုတာလည်း တကယ်ပါပဲ။ ယောင်လန်းက အသင်းတော်ကို အာဏာရှင်လို အုပ်ချုပ်တယ်။ ညီအစ်ကိုမောင်နှမတွေကို ထိန်းချုပ်ဖိနှိပ်ပြီးတော့ သူနဲ့နီးစပ်တဲ့သူတွေကိုတော့ မြှောက်စားပြီး ထီးနန်းတစ်ခုတည်ဆောက်နေတယ်။ သူကဘုရားသခင်ရဲ့လုပ်ဆောင်မှုကို နှောင့်ယှက်ဖျက်ဆီးတယ်၊ မကောင်းမှုမျိုးစုံလုပ်ပြီးတော့ ဘုရားသခင်ရဲ့စိတ်သဘောထားကို ဆိုးဆိုးရွားရွားပုန်ပန်ပြစ်မှားတယ်။ သူက အသင်းတော်ကနေ အနှေးနဲ့ အမြန် ဖယ်ရှားခံရတော့မယ့် အန္တီခရစ်မကောင်းဆိုးဝါးတစ်ယောက်ပါပဲ။ ဘုရားသခင်ရဲ့အိမ်တော်က အရင်တုန်းက မကောင်းတဲ့လူတွေ၊ အန္တိခရစ်တွေ အများကြီးကို ထုတ်ပယ်ခဲ့တာကို ကျွန်မ တွေးမိတယ်။ သူတို့ဘယ်လောက်ပဲရက်စက်ကြမ်းကြုတ်ပါစေ ခဏလေးပဲ အောင်မြင်ပြီးတော့ အဆုံးသတ်မှာတော့ ဘုရားသခင်ရဲ့ပြစ်ဒဏ်ပေးမှုကနေ မလွတ်မြောက်နိုင်ပါဘူး။ အဲဒါက ဘုရားသခင်ရဲ့ ဖြောင့်မတ်မှု ပဲမဟုတ်ဘူးလား။ ဒါပေမဲ့ ကျွန်မက ဘုရားသခင်ရဲ့ဖြောင့်မတ်မှုကို နားမလည်ခဲ့ဘဲနဲ့ ဘုရားသခင်ရဲ့အိမ်တော်မှာ သမ္မာတရားနဲ့ ဖြောင့်မတ်မှုက အမြဲတမ်းလွှမ်းမိုးပြီး ဘုရားသခင်ကအုပ်စိုးတယ်ဆိုတာကို မယုံကြည်ခဲ့ဘူး။ ဘုရားသခင်ရဲ့အိမ်တော်မှာလည်း အပြင်လောကမှာလိုပဲ အရှိန်အဝါနဲ့ အာဏာရှိတဲ့သူကပဲအနိုင်ရပြီး ယောင်လန်းနဲ့သူ့သမီးဘက်ကမနေရင် ကျွန်မရဲ့အနာဂတ်တက်လမ်းနဲ့ နေရာပျောက်မယ်လို့ထင်ခဲ့တယ်။ ကျွန်မကိုသူတို့လက်စားချေမှာကိုတောင် ကြောက်ခဲ့တယ်။ ဘုရားသခင်ကအရာခပ်သိမ်းကိုအုပ်စိုးတယ်ဆိုတာကို ကျွန်မမယုံကြည်ခဲ့ဘူး။ အဲဒီလိုယုံကြည်မှုမျိုးက ဘုရားသခင်ကို ပြစ်မှားစော်ကားတာပါပဲ။ ပြီးတော့ ဘုရားသခင်ရဲ့ နှုတ်ကပတ်တော်တွေထဲက ဒါကိုဖတ်ခဲ့ပါတယ် “ငါ၏ နှုတ်ကပတ်တော်များသည် အမှောင်၏လွှမ်းမိုးမှုအောက်မှ လူသား၏ လွတ်မြောက်ခြင်းနှင့်ဆိုင်သည့် အခြေခံအကြောင်းရင်းဖြစ်ပြီး၊ ငါ၏ နှုတ်ကပတ်တော်များနှင့်အညီ လက်တွေ့မလုပ်ဆောင်နိုင်သော လူများသည် အမှောင်၏လွှမ်းမိုးမှု အချုပ်အနှောင်များမှ လွတ်မြောက်နိုင်ကြလိမ့်မည် မဟုတ်။ မှန်ကန်သော အခြေအနေ တစ်ခုတွင် အသက်ရှင်ရန်ဆိုသည်မှာ ဘုရားသခင်၏ နှုတ်ကပတ်တော်များ၏ လမ်းပြမှုအောက်တွင် အသက်ရှင်ရန်၊ ဘုရားသခင်ကို သစ္စာစောင့်သိသော အခြေအနေတွင် အသက်ရှင်ရန်၊ သမ္မာတရားကို ရှာဖွေခြင်း အခြေအနေတစ်ခုတွင် အသက်ရှင်ရန်၊ ဘုရားသခင်အတွက် ရိုးသားစစ်မှန်စွာ မိမိကိုယ်ကိုယ် အသုံးခံခြင်းနှင့်ဆိုင်သည့် လက်တွေ့အရှိတရားထဲတွင် အသက်ရှင်ရန်နှင့် ဘုရားသခင်ကို စစ်မှန်စွာချစ်ခြင်း အခြေအနေတစ်ခုတွင် အသက်ရှင်ရန် ဖြစ်သည်။ ဤအခြေအနေများနှင့် ဤလက်တွေ့အရှိတရားအတွင်းတွင် အသက်ရှင်သောသူများသည် သမ္မာတရား၏ နက်ရှိုင်းမှုထဲသို့ ၎င်းတို့ ဝင်ရောက်သည်နှင့်အမျှ တဖြည်းဖြည်း ပြောင်းလဲကြလိမ့်မည်ဖြစ်ပြီး၊ အမှု နက်ရှိုင်းသထက် နက်ရှိုင်းသွားသည်နှင့်အမျှ ၎င်းတို့ ပြောင်းလဲကြလိမ့်မည်။ ပြီးလျှင် နောက်ဆုံးတွင်၊ ၎င်းတို့သည် ဘုရားသခင်၏ ရယူခြင်းခံရသည့် လူများနှင့် ဘုရားသခင်ကို စစ်မှန်စွာ ချစ်သော လူများ သေချာပေါက် ဖြစ်လာကြလိမ့်မည်။” (နှုတ်ကပတ်တော်သည် လူ့ဇာတိ၌ ပေါ်လာ၏ စာအုပ်ထဲရှိ “အမှောင်၏လွှမ်းမိုးမှုမှ လွတ်မြောက်လော့၊ ပြီးလျှင် သင်သည် ဘုရားသခင်၏ ရယူခြင်း ခံရလိမ့်မည်”) ဘုရားသခင်ရဲ့နှုတ်ကပတ်တော်တွေက ကျွန်မကိုလမ်းပြပေးလိုက်တယ်။ စာတန့်အမှောင်လွှမ်းမိုးမှုရဲ့အချုပ်အနှောင်တွေက လွတ်မြောက်ချင်ရင် ဘုရားသခင်ရဲ့နှုတ်ကပတ်တော်တွေနဲ့ အညီလက်တွေ့လုပ်ဆောင်ရမယ်။ ကျွန်မရဲ့ကိုယ်ကျိုးနဲ့အနာဂတ်အကြောင်းတွေးနေတာကို စွန့်လွှတ်ပြီး သမ္မာတရားကို လက်တွေ့လုပ်ဆောင်ရမယ်၊ အန္တီခရစ်တွေကို ဖော်ထုတ်တင်ပြပြီး ဘုရားသခင်အိမ်တော်ရဲ့အလုပ်တွေကို ထိန်းသိမ်းစောင့်ရှောက်ရမယ်။ တာဝန်ကနေ ထုတ်ပယ်ခံရပြီးတော့ ကျွန်မနေရာနဲ့ တက်လမ်းကိုစွန့်လွှတ်ရမယ်ဆိုရင်တောင် သမ္မာတရား အခြေခံစည်းမျဉ်းတွေကို ဆုပ်ကိုင်ထားဖို့လိုတယ်။ အဲဒါကိုနားလည်သွားတော့ ကျွန်မခွန်အားတွေရှိလာပြီး ယောင်လန်းနဲ့ ရှောင်မင်းအကြောင်းကို ခေါင်းဆောင်တွေဆီကို စာရေးပြီးတိုင်ခဲ့တယ်။

နောက်ရက်ကျတော့ ယောင်လန်းနဲ့ရှောင်မင်း ကျူးလွန်ထားတဲ့ မကောင်းမှုတွေကို ဖော်ထုတ်ဖို့ ခေါင်းဆောင်တွေက ညီအစ်ကိုမောင်နှမတွေကို အကုန်လုံးကိုခေါ်ပြီးတော့ အစည်းအဝေးလုပ်ခဲ့တယ်။ အခြေခံစည်းမျဉ်းတွေနဲ့အညီ ယောင်လန်း၊ သူ့အမျိုးသားနဲ့ သူသမီးကို တာဝန်ကနေ ထုတ်ပယ်ခဲ့တယ်။ ယောင်လန်းနဲ့သူ့သမီးက သူတို့ကိုယ်သူတို့ပြန်မစဥ်းစားခဲ့သလို သိဖို့လည်း မကြိုးစားခဲ့ဘူး။ အဲဒီအစား ညီအစ်ကိုမောင်နှမတွေရဲ့အိမ်ကိုသွားပြီးတော့ နောင်တရသလိုဟန်ဆောင်ပြပြီး ညီအစ်ကိုမောင်နှမတွေကို လှည့်ဖျားဖို့အတွက် သူတို့မတရားလုပ်ခံရပါတယ်ဆိုပြီးညည်းပြကြတယ်။ သူတို့မှာဝန်ချတောင်းပန်လိုစိတ်လုံးဝမရှိဘဲ နောက်ဆုံးမှာတော့ သူတို့ရဲ့မကောင်းမှုတွေကြောင့် အကျင့်မကောင်းတဲ့အပြုအမူအကုန်ကျူးလွန်တဲ့ မကောင်းမှုလုပ်တဲ့သူနဲ့ အန္တီခရစ်တွေဖြစ်ဖို့ စိတ်ပိုင်းဖြတ်ထားကြပြီး အသင်းတော်ကနေထုတ်ပယ်ခံခဲ့ရတယ်။ အသင်းတော်ဘဝကပုံမှန်ပြန်ဖြစ်ခဲ့ပြီး ညီအစ်ကိုမောင်နှမတွေလည်း လက်ခုပ်တီးပျော်ရွှင်ကြပြီးတော့ ဘုရားသခင်ရဲ့သန့်ရှင်းမှုနဲ့ ဖြောင့်မတ်မှုကို အားလုံးကချီးမွမ်းကြတယ်။ ခရစ်တော်က အုပ်စိုးတယ်ဆိုတာကို အဲဒါကကျွန်မကို ပိုပြီးရှင်းရှင်းလင်းလင်း မြင်တွေ့စေခဲ့ပါတယ်။ အန္တီခရစ်တွေရဲ့ဆိုးယုတ်တဲ့စွမ်းအားတွေက ဘယ်လောက်ပဲဆိုးယုတ်ပြီး အားကောင်းပါစေ၊ ဘယ်လောက်ပဲ အစွမ်းထက်ပါစေ ဘုရားသခင်ရဲ့အာဏာကိုမကျော်လွန်နိုင်ဘဲ ဘုရားသခင်ရဲ့လုပ်ဆောင်မှုကို မဖျက်ဆီးနိုင်ပါဘူး သူများတွေရဲ့ကံကြမ္မာကို ထိန်းချုပ်ဖို့က ပိုပြီးတော့ မဖြစ်နိုင်ပါဘူး။ သူတို့ကဘုရားသခင်လက်ထဲက စစ်တုရင်အရုပ်လေးတွေလိုပဲ။ ဘုရားသခင်ရဲ့ရွေးချယ်ခံရတဲ့သူတွေကို ပိုင်းခြားသိမြင်မှုရှိလာအောင်လုပ်ပေးရတဲ့ ကိရိယာလေးတွေပါ။ သူတို့ရဲ့လုပ်ဆောင်မှုတွေက သူများတွေကို အန္တီခရစ်တွေနဲ့ မကောင်းတဲ့လူတွေက ဘယ်လိုလဲဆိုတာကို ပြသပြီးတော့ လမ်းမလွဲအောင်လုပ်ပေးတယ်။ ဒီအန္တီခရစ်တွေကို တိုင်ရတဲ့အတွေ့အကြုံကနေတစ်ဆင့် ဘုရားသခင်နှုတ်ကပတ်တော်တွေရဲ့ ဦးဆောင်မှု၊ လမ်းပြမှုနဲ့ ဉာဏ်အလင်းပေးမှုတွေက ကျွန်မကိုအမှောင်ထုရဲ့စွမ်းအားတွေကနေ လွတ်မြောက်စေပြီးတော့ သမ္မာတရားကို လက်တွေ့လုပ်ဆောင်စေခဲ့တယ်။ ကျွန်မစိတ်သက်သာရာရပြီး ရင်ထဲအေးချမ်းခဲ့တယ်။ အဲဒီလိုပြုမူနေထိုင်ခြင်းက ဂုဏ်သိက္ခာရှိရှိနေထိုင်ဖို့ တစ်ခုတည်းသောနည်းလမ်းဖြစ်ပြီးတော့ ကျွန်မလွတ်လပ်မှုကိုခံစားခဲ့ရပါတယ်။ အဲဒါကတော့ ရိုးသားတဲ့တင်ပြချက်ကို ရေးသားခြင်းရဲ့ အသီးအပွင့်ပါပဲ။

ဘုရားသခင်ရဲ့ကျေးဇူးတော်ပါပဲ။

အောက်ခြေမှတ်စု(များ)-

က။ မူရင်းစာသားတွင် “အနိုင်ယူခြင်း မခံရနိုင်သော သင်္ကေတ”။

ခ။ မူရင်းစာသားတွင် “ပုန်ကန်ပြစ်မှားခြင်းကို မခံရနိုင်သော (ထို့ပြင် ပုန်ကန်ပြစ်မှားခံရခြင်းကို သည်းမခံသော) သင်္ကေတ”။

အရှေ့သို့- ၅၈။ အယောင်ဆောင်ခေါင်းဆောင်အား ဖော်ထုတ်ခြင်း တစ်ကိုယ်ရေ ရုန်းကန်ကြိုးစားခြင်း

နောက်တစ်ခုသို့- ၆၀။ ဘုရားသခင်က ဖြောင့်မတ်လွန်းပါတယ်

ဘုရားသခင်၌ မည်သည့်ယုံကြည်မှုမျိုးသည် သူ၏ ချီးမွမ်းခြင်းကို ခံရနိုင်သည်ကို သင်သိပါသလား။ ကျွန်ုပ်တို့သည် ဘုရားသခင်၌ စစ်မှန်သော ယုံကြည်ခြင်းကို မည်သို့ ဖြစ်ပေါ်စေနိုင်သနည်း။ အဖြေများကို ရရှိဖို့ ကျွန်ုပ်တို့ကို ဆက်သွယ်ရန် အားမနာပါနှင့်။
Messenger မှတဆင့် ကျွန်ုပ်တို့ကို ဆက်သွယ်လိုက်ပါ။
Viber မှတဆင့် ကျွန်ုပ်တို့ကို ဆက်သွယ်လိုက်ပါ။

သက်ဆိုင်သည့် အကြောင်းအရာ

၂၁။ လူတွေကို ဘယ်လို မှန်ကန်စွာ ဆက်ဆံရမယ်ဆိုတာ ကျွန်မ သိခဲ့ရပြီ

ပြင်သစ်၊ ရှီးယွမ်လွန်ခဲ့တဲ့နှစ်နှစ်လောက်တုန်းက ကျွန်မ အသင်းတော်မှာ ခေါင်းဆောင်လုပ်နေတာ။ အဲဒီအသင်းတော်မှာ အစွမ်းအစကောင်းတဲ့ ချန်မျိုးရိုး...

၆၄။ မာနထောင်လွှားခြင်းသည် ကျရှုံးခြင်းမတိုင်မီ လာ၏

တရုတ်နိုင်ငံ ကွမ်ရှီး ဒေသ၊ ရှင်းကျယ်အနန္တတန်ခိုးရှင် ဘုရားသခင် ပြောသည်မှာ- “မာနထောင်လွှားခြင်းသည် လူသား၏ ဖောက်ပြန်ပျက်စီးသော စိတ်သဘောထား၏...

၁၁။ အသက်တာတွင် ဘုရားသခင်၏ အချုပ်အခြာအာဏာကို သိခြင်း

အမေရိကန်နိုင်ငံ၊ ရှင့်ရှင်းအနန္တတန်ခိုးရှင် ဘုရားသခင် ပြောသည်မှာ- “ဘုရားသခင်၏ သြဇာအာဏာ၊ ဘုရားသခင်၏ တန်ခိုး၊ ဘုရားသခင်၏ ပင်ကိုလက္ခဏာနှင့်...

၃၆။ ကြွယ်ဝချမ်းသာမှုနှင့် အောင်မြင်ကျော်ကြားမှုတို့မှလွတ်မြောက်ခြင်း

တရုတ်နိုင်ငံ ရှန်းတုန်း စီရင်စု၊ ရှောင်မင်ဘုရားသခင်၏ နှုတ်ကပတ်တော်၌ ပြောထားသည်- “လူတို့သည် ကျော်ကြားမှုနှင့် အမြတ်အစွန်းအတွက်သာ...

နှုတ်ကပတ်တော်သည် လူ့ဇာတိ၌ ပေါ်လာ၏ တရားစီရင်ခြင်းသည် ဘုရားသခင်၏ အိမ်တော်မှ စတင်သည် နောက်ဆုံးသောကာလခရစ်တော်၊ အနန္တတန်ခိုးရှင် ဘုရားသခင်ထံမှ စံနမူနာ နှုတ်ကပတ်တော်များ ဘုရားသခင်၏ နေ့စဉ် နှုတ်ကပတ်တော်များ အနန္တတန်ခိုးရှင် ဘုရားသခင်၏ နှုတ်ကပတ်တော် လက်ရွေးစင်များ သိုးသငယ်နောက်လိုက်ပြီး သီချင်းအသစ်များကိုသီဆိုပါ နောက်ဆုံးသော ကာလ ခရစ်တော်၏ ပေါ်ထွန်းခြင်းနှင့် အမှုတော် သမ္မာတရားကို လက်တွေ့လုပ်ဆောင်ခြင်း၏ အခြေခံမူ ၁၇၀ ဘုရားသခင်၏သိုးတို့သည် ဘုရားသခင်၏ အသံတော်ကို ကြားကြ၏ ယုံကြည်သူအသစ်အတွက် အခြေခံလိုအပ်ချက်များ ဘုရားသခင်၏ အသံကို နားထောင်လော့ ဘုရားသခင်၏ ပေါ်လာခြင်းကို ရှုမြင်ကြလော့ နိုင်ငံတော် ဧဝံဂေလိတရားတော် ဖြန့်ဝေခြင်းအတွက် လမ်းညွှန်ချက်များ နိုင်ငံတော်၏ ဧဝံဂေလိတရားအကြောင်း စံနမူနာ အမေးအဖြေများ လက်ရွေးစင်များ ခရစ်တော်၏ တရားစီရင်ခြင်း ပလ္လင်တော်ရှေ့ အတွေ့အကြုံများအကြောင်း သက်သေခံချက်များ အောင်မြင်သောသူများ၏ သက်သေခံချက်များ အနန္တတန်ခိုးရှင်ဘုရားသခင်ထံ ကျွန်ုပ်ပြန်လှည့်ခဲ့ပုံ

ဆက်တင်

  • စာတို
  • နောက်ခံအပြင်အဆင်များ

တပြေးညီ အရောင်များ

နောက်ခံအပြင်အဆင်များ

စာလုံးပုံစံ

စာလုံးအရွယ်အစား

စာကြောင်း အကွာအဝေး

စာကြောင်း အကွာအဝေး

စာမျက်နှာအနံ

မာတိကာ

ရှာဖွေမည်

  • ဤစာကို ရှာမည်
  • ဤစာအုပ်ကို ရှာမည်